དགུང་ལོ་ཉི་ཤུ་རྩ་བདུན་པ།

དགུང་ལོ་ཉི་ཤུ་རྩ་བདུན་པ་ཆུ་ཕོ་བྱི་བའི་གནམ་ལོ་གསར་ཚེས་ཀྱི་དུས་སྟོན་དང་ཆོ་འཕྲུལ་མཆོད་པ་ཡང་རྒྱས་པར་མཛད་རྗེས་རོང་པ་རྫོགས་ཆེན་སྤྲུལ་སྐུར་ཟངས་ཐལ་དང་གཏེར་གསར་སྐོར་སོགས་ཆོས་བཀའ་མང་དུ་མཛད་པའི་དབུ་ཚུགས་ཙམ་ན་གོང་ནས་གདན་འདྲེན་གྱི་བཀའ་ཤོག་ཕེབས་པ་ལྟར་བྱེ་ལ་བརྒྱུད་ཕོ་བྲང་ཆེན་པོར་ཐེགས། རྒྱལ་མཆོག་དམ་པའི་སྐུ་རིམ་དུ་གཏེར་གསར་ཚེ་སྒྲུབ་དང་། བྱབ་ཁྲུས་སོགས་འབུལ་བ་གནང་བས་གོང་ཞབས་སྐུ་ཅུང་ཟད་ལྟེམས་པ་གཞི་མེད་དུ་དྭངས། གོང་གི་སྤྱན་སྔ་པ་མཆོད་དཔོན་དྲུང་སོགས་སྐུ་ཞབས་གྲྭ་ཚང་གི་གྲྭ་པ་ཉི་ཤུ་སྐོར་ལ་གཏེར་གསར། པད་གླིང་གུར་དྲག རྟ་མགྲིན་གསང་འདུས། ཕྱག་རྡོར་སྙན་བརྒྱུད། ཡང་བཟློག་མེའི་སྤུ་གྲི། ལོཀྟྲིའི་སྐོར་སོགས་ཆོས་བཀའ་དུ་མའི་དབང་ལུང་ཕྱག་ཁྲིད་དང་བཅས་པ་སྩལ། རིག་འཛིན་དཀོན་ཅོག་ལྷུན་གྲུབ་ལས་དྲག་སྔགས་ཀྱི་ཕྱག་ལེན་འགའ་ཞིག་ལ་དྲི་བའི་ཕྲ་གཅོད་དང་། གཙོ་བོར་རྒྱལ་མཆོག་དམ་པའི་ཞབས་དྲུང་དུ་དག་སྣང་རྒྱ་ཅན་སྐོར་གྱི་སྨིན་གྲོལ་རྣམས་རིག་འཛིན་སྤྲུལ་པའི་སྐུ་དང་ལྷན་ཅིག་ཏུ་གསན་ཅིང་། དེ་ཡང་རིག་པ་འཛིན་པའི་དབང་ཕྱུག་རྣམ་པ་གཉིས་པོ་ཟབ་ཆོས་འདི་ཉིད་ཀྱི་བདག་པོར་རྡོ་རྗེའི་ཚིག་གིས་ལུང་དུ་བསྟན་པ་སྟེ། བྷྲཱུྃ་མཚན་རྡོ་རྗེའི་རྭ་གདེངས་ཐོག་མདའི་རྒྱ་ཅན་ལས། དབང་གི་མིང་ཅན་ས་ཁམས་བཻ་རོའི་སྤྲུལ། །རྣལ་འབྱོར་རྡོ་རྗེའི་སྤྲུལ་པ་མེ་ཡི་ཁམས། །ལྷོའམ་ཤར་ལྷོའི་ཕྱོགས་ནས་འབྱུང་བར་ངེས། །ལས་ཅན་སྙིང་གི་བུ་གཉིས་འདི་བསྒྲུབ་ན། །བོད་འཕུང་དམ་སྲིའི་འཚུབ་ལྷོངས་ངེས་པར་འཇོམས། །ཞེས་སོགས་གསལ་བར་བྱུང་བ་བཞིན་གདམས་པའི་བདག་པོར་དབང་བསྐུར་ཞིང་མངའ་གསོལ་བར་མཛད་པ་ཡིན་ནོ། །དེ་སྐབས་ཕོ་བྲང་ཞོལ་དུ། རྡོ་རྗེ་བྲག་སྤྲུལ་སྐུ་རིན་པོ་ཆེར་ཚེ་བདག་གི་དབང་དང་། ཚེ་སྒྲུབ་མཚོ་སྐྱེས་རྡོ་རྗེའི་དབང་ལུང་གསན་ཞིང་། ཕར་ཡང་ཕྱག་རྡོར་སྙན་བརྒྱུད་དང་། གཏེར་གསར་གཤིན་རྗེའི་དབང་ལུང་འབུལ་བར་མཛད། དེ་ནས་གོང་ཞབས་སྐུ་འབྲུམ་གྱིས་སྙུན་པའི་སྐུའི་སྲི་ཞུར་དྲག་དམར་གྱི་གཏོར་བཟློག འཆི་བསླུ། གདོན་འགྲོལ། བྱབ་ཁྲུས། ཚེ་དབང་སོགས་འབུལ་བར་མཛད་ཅིང་། ཁྱད་པར་གཤིན་རྗེའི་གཏོར་བཟློག་ཅིག་མཛད་པས་ལྟས་མཚན་ངོ་མཚར་བ་བྱུང་བ་ལྟར་མི་རིང་བར་སྐུ་དྭངས། གོང་ནས་གཏང་རག་ཏུ་བླ་མ་དགོངས་འདུས་ཀྱི་ཐང་ཀ་གྲྭ་ཚར་དང་པུསྟི་ཆ་ཚང་། ཧོར་ཚགས་དང་ཙནྡན་དམར་པོའི་ཁ་ཊྭཱཾཀ བེ་ཅོན་རྒྱ་བཟོ་མ་སོགས་དབང་རྫས་ཁྱད་ཅན་དང་ན་བཟའི་གནང་སྦྱིན་སྤམ་མཐོ་བ་གནང་། ལྷ་སར་བདག་མོའི་དྲུང་ལའང་ཚེ་དབང་ལོཀྟྲི་གུར་དྲག་གི་དབང་སོགས་མཛད། སྐྱེད་ཚལ་གོང་འོག་གི་མཁན་པོ་དང་རྒྱ་མཁར་གདུང་བརྒྱུད། ཡང་རི་མཁན་པོ། ཆུ་མིག་པ། ཐེག་མཆོག་གླིང་དབོན་པོ། ཏ་དབང་བླ་མ་སོགས་ལའང་ཆོས་འབྲེལ་མཛད་ཅིང་། རྒྱ་མཁར་བའི་དབུ་མཛད་རྡོ་རྗེ་ལས་འདའ་ཕྱར་ལུགས་ཀྱི་སེར་བསྲུང་དང་། ཟུར་ངག་དབང་ཕུན་ཚོགས་ལས་དོང་སྤྲུགས་དང་ལེགས་ལྡན་གྱི་དབང་། ཕུར་པ་འབུམ་ནག་གི་ལུང་རྣམས་གསན་ནས་གོང་ཞབས་སུ་འབུལ་བར་མཛད། ཟླ་བ་ལྔ་པ་རྟིང་མའི་ནང་དུ་སྡེ་སྲིད་ནས་སྣེའུ་གདོང་གི་ལྕམ་ཁབ་ཏུ་བསུས་པའི་སྣ་བཅོག་ལ་དགའ་ལྡན་ཁང་གསར་དུ་དྲག་དམར་གྱི་གཏོར་བཟློག་དང་། དེར་བདག་མོ་ཡུམ་སྲས་ལ་དབང་རྗེས་གནང་བྱབ་ཁྲུས་སོགས་མཛད། རྩེར་ཐུགས་སྲས་སྤྲུལ་པའི་སྐུར་ལོཀྟྲིའི་བཀའ་ལུང་། ཆོས་རྗེ་སྒྲོལ་མ་བ་དང་སྙེ་མདོ་པ་སོགས་ལ་གཏེར་གསར། ལོཀྟྲིས། ཀི་ཀང་དམར་པོ། གསང་སྙིང་རྣམས་ཀྱི་དབང་ལུང་སྩལ། སླར་ཡང་གོང་ཞབས་ཀྱི་སྐུ་རིམ་དུ་ཞི་བའི་སྦྱིན་སྲེག་བརྒྱ་རྩ་དང་། དྲག་དམར་གྱི་སྒྲུབ་པ་སྔོན་འགྲོའི་ཧོ་མའི་ལས་སྦྱོར་མཛད་པས་ལུས་མེད་ཀྱི་ཚ་ངར་ཆག་པའི་ལེགས་སོར་ས་སྙིང་སྲང་འཁོར། འཕྲེང་པོ་གཏེར་སྟོན་གྱི་སྐུ་ཕོད་སོགས་གནང་སྦྱིན་བཟང་པོ་སྩལ། ཟླ་བ་དྲུག་པའི་ཚེས་བཅུ་ནས་བརྩམས་ཞ་ལུ་མཁན་ཆེན་རིན་ཆེན་བསོད་ནམས་མཆོག་གྲུབ་ལ་ནཱ་རོ་མཁའ་སྤྱོད་མའི་བྱིན་རླབས་དང་ཉམས་ཁྲིད་སློབ་བཤད་ལུགས་ལུང་དང་བཅས་པ། རྣམ་འཇོམས། རྨེ་བརྩེགས། འོད་ཟེར་ཅན་མ། རྣམ་སྲས་རྣམས་ཀྱི་རྗེས་གནང་རྣམས་གསན་ཞིང་། ཕར་ཡང་རཏྣའི་གུར་དྲག་དང་གཏེར་མགོན་ཞལ་བཞི་པའི་དབང་ལུང་མཛད། རྒྱལ་མཆོག་དམ་པའི་སྐུ་ཞབས་སུ་ཞ་ལུ་མཁན་ཆེན་དང་ལྷན་ཅིག་ཏུ་གཡུ་ཐོག་སྙིང་ཐིག་གི་དབང་ལུང་། འཇིགས་བྱེད་ཀྱི་འཕྲུལ་འཁོར། རྣལ་འབྱོར་མའི་ཆོས་ཚན་འགའི་ལུང་རྣམས་གསན། རིག་འཛིན་སྟོབས་ལྡན་དབང་པོའི་སྐུ་སྐྱེ་སོགས་བླ་མ་འགའ་ལ་གཏེར་གསར་གྱི་ཆོས་འབྲེལ་དང་། སྐུ་ཞབས་གྲྭ་ཚང་གི་གྲྭ་པ་མང་པོར་སོ་སོའི་འདོད་ཆོས་ཀྱི་རཏྣའི་གུར་དྲག་གི་དབང་རྒྱས་འབྲིང་དང་ལས་བྱང་གསང་སྒྲུབ་སོགས་ཀྱི་ལུང་། རྒྱ་ཅན་གྱི་ལུང་། རྣམ་སྲས་མདུང་དམར་ཅན་གྱི་དབང་ལུང་། འཇམ་དཔལ་རྫོགས་ཆེན་གྱི་ལྷ་ཁྲིད་དང་ལུང་། ཡང་བཟློག་རྣོན་པོ་ནང་གཅོད་ཀྱི་དབང་སོགས་མང་དུ་སྩལ། རིག་འཛིན་དཀོན་མཆོག་ལྷུན་གྲུབ་ལས་ལོཀྟྲིའི་ལུང་དང་ཁྲོ་ཆུའི་ཆོས་ཚན་ཁ་ཤས་གསན། ཀླུ་ཕུག་གླིང་ཁར་གོང་ཞབས་ཡས་ཕྱིན་ཆབ་ཞུགས་ལ་ཕེབས་པའི་ཞབས་ཕྱིར་ཡང་ཐེགས། དེ་ནས་རྩེར་སེ་སྟོན་ཐུགས་མཆོག་འོད་འབར་ལས་བྱང་གཏེར་ཐུགས་སྒྲུབ་ཀྱི་དབང་རྒྱས་འབྲིང་བསྡུས་གསུམ། ལྕགས་སྡོང་མ། མངའ་དབང་རིན་ཆེན་འབར་བ་སོགས་གསན། ཕར་ཡང་དབོན་རིན་པོ་ཆེ་སོགས་དང་ལྷན་དུ་ཐུགས་ཐིག་གི་དབང་ལུང་མཛད། རྡོ་རྗེ་བྲག་ཞབས་དྲུང་རིན་པོ་ཆེར་རིག་འཛིན་གདུང་སྒྲུབ་ཀྱི་དབང་ལུང་ཚང་མ་གསན། ཧོར་ཟླ་བརྒྱད་པའི་ཚེས་བདུན་ནས་བརྩམས་ཏེ་རྒྱལ་མཆོག་དམ་པའི་ཞབས་དྲུང་དུ་རྙིང་མའི་བླ་མ་མང་པོ་དང་སྐུ་ཞབས་གྲྭ་ཚང་འདུས་པར་བཅས་པ་དང་ལྷན་ཅིག་པར། གསང་རྫོགས་སྒྲུབ་ཆེན་གྱི་ཕྱག་ལེན་རྒྱས་པ་དང་འབྲེལ་བར་རྩ་དབང་སྒྲུབ་དབང་། གཞན་ཡང་ཚེ་བདག བྱང་གཏེར་ཕུར་པ་ཆེ་མཆོག ཕུར་པ་སྤུ་གྲི། འཇམ་དཔལ་རྫོགས་ཆེན། ཚེ་སྒྲུབ་བདུད་རྩི་འཁྱིལ་པ། འཇོམས་བྱེད་ཉི་ཟླ་ནག་པོ་སོགས་ཀྱི་དབང་བཀའ་སྨིན་རྒྱས་སུ་གསན། དེ་དག་གི་སྐབས་རྡོ་རྗེ་བྲག་སྤྲུལ་པའི་སྐུ་དང་རྗེ་འདི་ཉིད་གཙོ་བོར་གྱུར་པའི་བླ་མ་སོ་སོས་རྒྱལ་ཐེབས་མཛད་དེ་དབང་རྫས་བྲིམ་པ་སོགས་ཀྱི་ཕྱག་ལེན་རྒྱས་སྤྲོས་དང་། ཚེས་བཅོ་ལྔ་ནས་གོང་ཞབས་སུ་སྔར་གསན་པའི་དབང་བཀའ་དེ་དག་གི་རྒྱབ་ཆོས་སུ་སོ་སོའི་ལུང་རྣམས་དང་། གཞན་ཡང་བསྟན་མའི་སྒོས་མདོས། ལས་བྱང་ལེ་བརྒྱད་མ། གོང་གི་གསུང་འབུམ་འགའ་རེ་བཅས་པའི་ལུང་དང་། ཚེ་བདག་ལྕགས་སྡིག་དང་ལྕགས་འདྲ་གཉིས་ཀའི་བཅས་ཆོག་ལ་སོགས་པའི་ཕྱག་ལེན་ཆེ་ཕྲ་ཚང་མ་གསན་ཞིང་ཐུགས་སུ་ཆུད་པར་མཛད། སླར་ཡང་སེ་སྟོན་ཐུགས་མཆོག་འོད་འབར་ལ་མཁའ་འགྲོ་སྙིང་ཐིག་དང་བྱང་གཏེར་ཐུགས་སྒྲུབ་ཀྱི་ཁྲིད་གསན་ཞིང་། སྐྱེས་ལན་དུ་རིག་འཛིན་ཐུགས་ཐིག་གི་ཁྲིད་བཀའང་སྩལ། ཞབས་དྲུང་དབོན་དྲུང་དང་། བཀྲ་བཟང་ཆོས་རྗེ། དུང་དགོན་ཆོས་རྗེ། ཆོས་འབྱོར་རྒྱལ་མཚན། གནས་གཞི་ཆོས་རྗེ་སོགས་མང་པོར་འཇོམས་བྱེད་ཀྱི་དབང་། བསམ་དགོན་ཆོས་རྗེར་ཤུད་བུ་བའི་ཚེ་དབང་། དོན་གཉིས་གླིང་གི་གྲྭ་པ་འགར་ཐུགས་ཐིག་གི་དབང་ལུང་རྣམས་མཛད། ཟླ་བ་དགུ་པའི་མཇུག་ནས་བརྩམས་གོང་ཞབས་སུ་བྱང་གཏེར་ཐུགས་སྒྲུབ་ཀྱི་དབང་ལུང་རྣམས་འབུལ་བར་མཛད་ཅིང་། ཚུར་ཡང་ཀུན་བཟང་ཐུགས་གཏེར། གཉེན་པོ་ལྷ་གསུམ། ནཱ་ག་རཀྵ། རྟ་མགྲིན་ཡང་གསང་རྣམས་ཀྱི་དབང་ལུང་ཚང་བར་གསན། རྩེར་སྡེ་སྲིད་སྐུ་ཞབས་སུ་ཚེ་དབང་། ལྷ་སར་བདག་མོ་ཡུམ་སྲས་ལ་ཚེ་རྟ་དྲག་དམར་ལོཀྟྲི་རྣམས་ཀྱི་དབང་རྗེས་གནང་བྱབ་བཀྲུ་སོགས་སྔ་ཕྱིར་དང་། དེ་རེས་ཞི་བའི་སྦྱིན་སྲེག་བརྒྱ་ཚར་གཉིས་དང་རྒྱལ་མདོས་སོགས་སྐུ་རིམ་མང་དུ་མཛད། སླར་ཡང་རྩེར་ཕེབས་ཏེ་གོང་ཞབས་སུ་མངའ་དབང་རིན་ཆེན་འབར་བ་འབུལ་བར་མཛད། དགེ་སློང་འཇམ་དབྱངས་གྲགས་པ་དང་། བླ་སྨན་དར་མོ་ནས་ལ་ཞང་བློན་དང་བདུད་རྩི་སྒྲུབ་པའི་སྐོར། ཀན་བུ་བར་ཡང་བཟློག་གི་གཏོར་དབང་། རྫོང་རྒྱབ་དང་ན་ག་ལྕགས་གྲོང་ལྷ་སའི་ཚེས་བཅུ་པ་ཁག་ཅིག་སོགས་ལ་སོ་སོའི་རེ་བ་དང་བསྟུན་པའི་དཀོན་མཆོག་སྤྱི་འདུས། གཏེར་གསར། ལེའུ་བདུན་མ་སོགས་ཀྱི་ཆོས་འབྲེལ་མཛད། ཟླ་བ་བཅུ་གཅིག་པའི་མཇུག་ཏུ་ཕོ་བྲང་རྩེར་བདུན་ཕྲག་གཉིས་ཀྱི་བར་སྐུ་མཚམས་དམ་པར་བཅད་ནས་ཡང་གསང་དྲག་པོའི་བསྙེན་སྒྲུབ་མཛད་པས་མཚན་མ་ངོ་མཚར་བ་བྱུང་གསུང་།