དགུང་ལོ་སུམ་ཅུ་སོ་ལྔ་པ།

དགུང་ལོ་སུམ་ཅུ་སོ་ལྔ་པ་ལྕགས་སྤྲེ་གནམ་ལོ་གསར་ཚེས་ཀྱི་དགྱེས་སྟོན་ཡང་རྒྱས་པར་མཛད་རྗེས། ཟླ་བ་དང་པོའི་ཚེས་གསུམ་ནས་སྨིན་གྲོལ་གླིང་འདུས་ཚོགས་ཀྱི་ཁ་ལོངས་སུ་དར་རྒྱས་ཆོས་སྡིངས་པ་དང་སྙེ་མདོ་གྲྭ་ཚང་རྣམས་གདན་དྲངས་ཏེ་ཟབ་གཏེར་གྱི་བར་ཆད་ཞི་ཕྱིར་སྐུ་རིམ་དུ་བཛྲ་གུ་རུ་དུང་ཕྱུར་གཅིག ཡུམ་རྒྱས་པ་ཚར་གཅིག ཐང་ཡིག་བརྒྱ་ཚར། བསམ་པ་ལྷུན་གྲུབ་མ་ཁྲི་ཕྲག་གཅིག་རྣམས་བསགས་ཤིང་། འདུས་པ་རྣམས་ལ་མང་ཇ་གདན་ནོན་སོགས་ནར་མའི་བསྙེན་བཀུར་དང་། གོས་དར་བཟང་ཇའི་ཕྱག་འགྱེད་སྤྱི་འབུལ་སོགས་ཡོན་གྱི་དངོས་པོ་རྒྱ་ཆེར་སྩལ། གཞན་ཡང་ཡེར་པ། མཆིམས་ཕུ། གཡའ་མ་ལུང་། ཡང་རྫོང་། ཤེལ་བྲག་ཨོ་དཀར་བྲག་རྣམས་སུ་ཚོགས་མཆོད་བརྒྱ་ཚར། བསམ་ཡས་ཁྲ་འབྲུག་སོགས་སུ་མཆོད་འབུལ། དགེ་འདུན་གྱི་སྡེ་མང་པོར་གྲྭ་ཇ་གྲལ་འགྱེད་སོགས་སྐུ་རིམ་རྒྱ་ཆེན་པོ་མཛད། ཟླ་བ་གསུམ་པའི་ནང་དུ་གོང་ནས་སྤྱན་འདྲེན་གྱི་བཀའ་ཤོག་ཕེབས་པ་ལྟར་ཆིབས་བསྒྱུར་གདོང་། སྡིངས་པོ་ཆེ་ནས་སྤྲུལ་སྐུ་རིན་པོ་ཆེ་སྐུ་སྙུང་བའི་ཐུགས་དམ་བརྟག་པ་ཞུ་བའི་སམྦུ་ཊ་འབྱོར་དུས་བཀའ་ལས་མདང་རྨི་ལམ་ཤིན་ཏུ་འཚུབ་པ་བྱུང་བས་ད་ལམ་ཅིས་ཀྱང་ཕན་པ་མེད་གསུང་བ་ལྟར་མི་རིང་བར་སྐུ་གཤེགས་འདུག་ཅིང་ཕྱིས་ཧོར་དྲིལ་ཤང་ཤང་མ་སོགས་ཀྱི་བསྔོ་རྟེན་ཡང་འབྱོར། རིམ་པར་ཆིབས་བཏེག་སྟེ་བྱེ་ལ་བརྒྱུད་ཕོ་བྲང་རྩེར་ཕེབས་ནས་གོང་ཞབས་ཡས་ཕྱིན་ལ་ཕྱག་འབུལ་མཛད། དེ་ནས་ཡས་ཕྱིན་གདན་འཛོམ་པར། ཚེ་དབང་། གུ་རུ་དྲག་པོའི་དབང་། གཟའ་དབང་། སྐྱེར་སྒང་བའི་རྟ་མགྲིན་གྱི་དབང་རྣམས་དང་། འཆི་བསླུ། བྱད་འགྲོལ། གདོན་འགྲོལ་སོགས་སྐུ་རིམ་མང་དུ་མཛད། དབང་བཀའ་སོ་སོར་གསེར་སྲང་རེ། དངུལ་གྱི་མཎྜལ། ཁ་བཏགས་ཉི་བདེ་མ། གོས་ཡུག་རེ་སྟེ་ཡོན་གྱ་ནོམ་པར་སྩལ། དེ་རྗེས་གོང་ཞབས་སུ་རྡོ་རྗེ་གླིང་པའི་གཏེར་ཆོས་ཀྱི་དབང་ལུང་འཕྲོ་རྣམས་ཡོངས་རྫོགས་འབུལ་བར་མཛད་ཅིང་དབང་བཀའ་ཕལ་ཆེར་ལ་གུང་ཐང་སྤྲུལ་པའི་སྐུ་ཡང་ཞབས་ཕྱིར་ཆུག སྤྲེལ་ལོ་སྤྲེལ་ཟླའི་ཚེས་བཅུ་མཆོད་པ་ལ་ཚོམས་ཆེན་དུ་གཏེར་སྐུ་མང་པོ་གདན་དྲངས་པའི་སྤྱན་སྔར་མཆོད་པ་རྒྱས་པར་སྟར་ནས་སྐུ་ཞབས་གྲྭ་ཚང་ཆེན་མོའི་འདུས་ཚོགས་ཀྱི་ཚོགས་དབུར་གོང་ཞབས་ཕེབས་ཏེ་ཚེས་བཅུའི་གསུང་ཆོག་གནང་དུས་རྗེ་ཉིད་ལའང་ཕེབས་ཤིག་པའི་བཀའ་ལུང་བྱུང་བ་ལྟར་ཚོགས་གྲལ་དུ་ཕེབས་ནས་གསུང་ཆོག་ལྷན་ཅིག་ཏུ་མཛད་ཅིང་བཞུགས་གདན་སོགས་བཀུར་ཟོས་ཆེན་པོའང་སྩལ། དེའི་སྔ་དྲོ་གོང་གི་ཐུགས་དམ་རྟེན་མང་པོ་ལ་གཟིམ་ཆུང་ནུབ་ཏུ་རབ་གནས་ཀྱི་ཆོ་གའང་མཛད། སྔ་སོར་བདུད་རྩི་སྒྲུབ་པའི་ཁོག་དབུབས་ལག་ལེན་དམར་ཁྲིད་དུ་བསྡེབས་པ་ཞིག་དགོས་ཚུལ་གྱི་བྲི་གཞི་དང་གསེར་སྲང་གསུམ། གན་གོས་བཟང་པོའི་སྐུ་བེར་དང་བཅས་ཏེ་བཀས་བསྐུལ་བ། བྲི་གཞིའི་ཤོག་བུ་གཅིག་ཡིག་མཁན་གྱིས་ནོར་བ་སྐྱུར་རྗེས་བསྟན་བཅོས་ཇི་ལྟར་བྱུང་བ་དང་རང་འགྲིག་ཏུ་གྱུར་པ་དཔོན་སློབ་གཉིས་གས་ཆགས་ཐོགས་མེད་པའི་ཡེ་ཤེས་ཀྱི་གཟིགས་པ་མངོན་སུམ་པའི་ངོ་མཚར་བསྟན་ཅིང་། དེ་ཉིད་ལུང་དང་བཅས་པའང་འབུལ་བ་གནང་། གཞིས་ཀ་ནས་མི་དབང་ཆེན་པོའི་ཡུམ་དང་། སྲས་དམག་ཟོར་ཚངས་དབང་ལྕམ་སྲིང་། ཆུ་མིག་ཁ་དཔོན་སའི་དྲུང་རྣམས་ལ་རྩེར་ཚེ་དབང་། གུར་དྲག ལོཀྟྲི་སོགས་རྐྱེན་སེལ་གྱི་རྗེས་གནང་མང་དུ་མཛད། ལྷ་སར་བྱང་གླིང་གཞིས་ཀ་ཤར་སོགས་གནས་ཆེན་པ་མང་པོས་རང་རང་གི་སྡུམ་པར་སྤྱན་དྲངས་ཏེ་བསྙེན་བཀུར་བཟང་པོ་བསྟབས། རྩེར་གོང་ཞབས་ཡས་ཕྱིན་ནས་གསེར་དངུལ་གོས་ཕྱི་ནང་། ཇ་སིག རྟ་སོགས་ཕེབས་རྫོངས་ཀྱི་གནང་ཆ་རྒྱ་ཆེ་བ་དང་། ཕེབས་གདོང་ཕྱི་ཕྱག་གི་སྐབས་འཇའ་ཤེལ་ཁྱད་པར་ཅན་དང་། ཕྱག་ཕྲེང་ཕྱག་དྲེག་མ་ཕྱག་ལས་བསྟར་ཏེ་གནང་གསུང་། ཞབས་སྐྱེལ་དུ་ཆིབས་དྲེལ་སོགས་འཁོས་སུ་ཕེབས་པ་བསྟབས་ཏེ་ཆིབས་བཏེག་པའི་ཕེབས་ལམ་དུ་ཡར་འབྲོག་དཔལ་དེའུའི་སྡེ་པ་འདས་པའི་འདད་ལ་སྤྱན་དྲངས་ཤིང་། བྱང་བུ་བཞུ་བའི་ཆོ་ག་དང་བསྔོ་སྨོན་མཛད། རིམ་པར་གོང་དཀར་བརྒྱུད་དེ་གདན་སར་ཕེབས། དེར་ཞབས་དྲུང་ཁྲི་ལྕམ་རིན་པོ་ཆེ་ཞབས་འབམ་གྱི་སྙུང་གཞི་ཐུ་མོས་བཏབ་པར་སྨན་དཔྱད་དང་སྐུ་རིམ་དྲག་པོ་མཛད་པས་མི་རིང་བར་དྭངས། ཟླ་བ་དྲུག་པའི་འགོར་ཟངས་མཚོ་ཚེས་བཅུའི་དུས་མཆོད་ལ་ཐེགས་ནས་ཁྲོམ་ཁྲི་ཕྲག་བརྒལ་ཙམ་ལ་ཚེ་དབང་དང་། གྲྭ་པ་འགས་ཚོགས་གསོག་བགྱིས་པའི་གྲལ་དབུར་ཡང་ཕེབས། སྒྲུབ་སྡེའི་གྲྭ་པ་དང་གྲྭ་ཕྱི་ནང་འཕྱོངས་རྒྱས་མོན་མཁར་དོལ་འབྲོག་སོགས་ནས་ལྷགས་པའི་སྐྱེ་བོ་མང་པོ་ཡང་མཇལ་དུ་བྱུང་། གསོན་གཤིན་གྱི་བསྔོ་བའང་མཐའ་ཡས་པ་དང་། གཟིམས་ཕུག་ཟེར་བསྐོར་སོགས་གནས་རྣམས་ཀྱང་ཞིབ་མཇལ་མཛད་དེ་གདན་སར་ཕེབས། དེ་ནས་ཟབ་གཏེར་གྱི་རྟེན་འབྲེལ་གེགས་མེད་དུ་བསྒྲིག་པའི་ཕྱིར་གཟིམ་ཆུང་ཀུན་བཟང་ཡང་རྩེར་སྐུ་མཚམས་དམ་པར་བཅད་དེ་ལྷ་སྔགས་འོད་གསལ་གྱི་འཁོར་ལོ་ལས་མི་གཡོ་བར་བཞུགས་ཤིང་ཞི་བའི་སྦྱིན་སྲེག་ཀྱང་བརྒྱ་ཚར་མཛད་པས་གཏེར་གྱི་བར་ཆད་སེལ་ཞིང་འདོད་དོན་འགྲུབ་པའི་མཚན་ལྟས་གསལ་བར་གཟིགས། དེ་སྐབས་རྒྱལ་མཆོག་དམ་པས་སེར་འབྲས་སུ་ཕེབས་པའི་དངོས་སྣང་འཚུབ་ཅིང་མཚར་བའི་བརྡ་ཅན་མཚན་ལམ་དུ་ཤར་བ་གོང་དུ་སྐུ་རིམ་ཞབས་བསྐུལ་ཞབས་བརྟན་དང་བཅས་ཞུ་ཡིག་སྙན་འབུལ་མཛད་པས་མངོན་སུམ་ལྟར་འཕྱུགས་མེད་ཐིག་བབས་པ་བཞིན་འགྲིག་ཅེས་ཐུགས་ཡིད་ཆེས་པའི་བཀའ་ཤོག རྟེན་གོས་དམར་ཁྱད་ཅན། རྩེ་ཇ་བམ་བོ། ཁ་བཏགས་ཉིན་བདེ་མ། གཏེར་ཚབ་ཏུ་གཞུག་རྒྱུའི་རིན་པོ་ཆེའི་བུམ་གཏེར་དང་བཅས་ཕེབས། གཞན་ཡང་སྐུ་རིམ་དུ་གྲྭ་ཚང་འདུས་ཚོགས་ཀྱིས་བསམ་པ་ལྷུན་གྲུབ་མ་ཁྲི་ཚོ་དང་། ཡེ་ཤེས་སྐུ་མཆོག་ལྔ་སྟོང་ཙམ། གྲྭ་པ་བཞིས་བརྒྱད་སྟོང་པ། དྲི་མེད་བཤགས་རྒྱུད། ཐང་ཡིག་རྣམས་ཚར་མང་པོ་དང་། འབུམ་ཚར་གཅིག བདག་ཅག་གཉིས་ཀྱིས་གཞོན་ནུ་མའི་མཆོད་པ་སོགས་བསྒྲུབས། དེ་ནས་སྐུ་མཚམས་གྲོལ་ཏེ་ཟླ་བ་བདུན་པའི་ཚེས་བཅོ་ལྔའི་སྔ་དྲོ་ཁྲི་ལྕམ་རིན་པོ་ཆེས་འདུས་ཚོགས་སུ་མང་འགྱེད་སྩལ་བའི་ཚོགས་དབུར་གདན་དྲངས་ནས་འབུལ་བ་གྱ་ནོམ་པ་དང་བཅས་ཏེ་ཞབས་བརྟན་འབུལ་བར་མཛད་ནས་ཕྱི་དྲོ་གཟའ་ཚེས་རྒྱུ་སྐར་ཡུད་ཙམ་བཟང་པོ་ལ། གོང་ས་མཆོག་ནས་གསོལ་ཆས་ལམ་ཡིག་སོགས་མཐུན་རྐྱེན་ཐམས་ཅད་ཚོགས་པར་སྩལ་ཏེ་ལྷོ་བྲག་ཕྱོགས་སུ་ཆིབས་བཏེག རིམ་པར་ཡར་འབྲོག་སྔོ་ལུང་དུ་བཞུགས་པའི་ནུབ་མོ་ཆིབས་དྲེལ་རྣམས་ཡན་ནས་མ་རྙེད་པར་ཞག་གསུམ་བཅག་མལ་མཛད་དེ། གཏོར་མ་རུ་མཚོན་གཟུངས་འཛུགས་རྣམས་ཀྱི་མན་ངག་ཉུང་གསལ་གོ་བདེའི་བཀའ་རྩོམ་ཡང་མཛད། དེ་ནས་གྲི་གུ་བརྒྱུད་མཚོ་སྣར་རྫོང་ནས་སྟོན་མོ་རྒྱས་པ་དང་། ཐང་གྲོང་དུ་ཞག་གསུམ་ཙམ་བཞུགས་པར་མོན་བོད་ཀྱི་སྐྱེ་བོ་མང་པོ་མཇལ་དུ་བྱུང་ཞིང་གཤིན་གསོན་གྱི་བསྔོ་བའང་མཐའ་ཡས་པ་མཛད། དེ་ནས་ཤ་འུག་ཚུགས་ཁང་དུ་ཞག་ས་མཛད་ནས། གྲལ་ཚེས་ཉེར་བརྒྱད་པ་རེས་གཟའ་ཕུར་བུ་དང་རྒྱུ་སྐར་རྒྱལ་འཛོམ་པའི་དུས་དགེ་བར་དཀར་པོ་ཟངས་ཞེས་པ་གནས་ཀྱི་སྙིང་པོ་དེར་ཕེབས་ཤིང་སའི་ལྟེ་བ་པདྨའི་ཟེའུ་འབྲུ་ལྟ་བུའི་ཐད་དུ་གཞི་བདག་ལ་གཏོར་འབུལ་དང་འཕྲིན་བཅོལ་གནང་། དེ་ནུབ་མནལ་ལྟས་ངོ་མཚར་བ་མང་པོ་བྱུང་གསུང་ཡང་བཀའ་རྒྱས་བཏབ་པས་བྲི་བར་མ་ནུས་སོ། །ནངས་པར་ཉེ་བའི་འདུ་བ་འབྱུང་པོའི་ཉི་མ་ལ་བསང་དང་གསོལ་མཆོད་རྒྱས་པར་གནང་ཞིང་། རྗེ་ཉིད་དཔོན་སློབ་རྣམས་ཀྱིས་གནས་ཀྱི་ལྟེ་བ་དབང་ཆེན་ཡབ་ཡུམ་གྱི་སྐུ་རང་བྱོན་གྱི་མདུན་དུ་ཕེབས་ཏེ། ཉེ་འཁོར་དུ་མོན་བོད་ཀྱི་སྐལ་ལྡན་བརྒྱ་ཕྲག་ཙམ་གྱིས་བསྐོར་བ་དང་བཅས། དབང་ཆེན་ཡབ་ཡུམ་གྱི་སྦྱོར་མཚམས་ནས་ཟབ་གཏེར་གྱི་སྒྲོམ་བུ་སྐལ་ལྡན་ཀུན་གྱི་མངོན་གྱུར་དུ་སྤྱན་འདྲེན་པར་མཛད་ཅིང་། གཏེར་སྲུང་ལ་གསེར་སྐྱེམས་གཏོར་འབུལ། གཏེར་ཚབ་ཏུ་རིན་པོ་ཆེའི་བུམ་གཏེར་གཉིས་བཅུག་སྟེ་བཀྲ་ཤིས་དང་སྨོན་ལམ་རྒྱས་པ་དང་གཏེར་སྒོ་སྔར་བཞིན་བསྒྲིགས་ཏེ་མི་མངོན་པར་མཛད་ནས་ཞབས་རིང་པ་དང་ཁྲོམ་པ་ཀུན་ལ་གཏེར་སྒྲོམ་གྱི་བྱིན་རླབས་གནང་། དེ་དུས་ནམ་མཁའ་ཤིན་ཏུ་དྭངས་པ་ལ་འཇའ་ཚོན་གྱི་གུར་ཕུབ་ཅིང་པདྨ་འདབ་མ་བརྒྱད་དང་དྲུག་གི་རྣམ་པའི་མེ་ཏོག་གི་ཆར་བབས་པས་ཀུན་ངོ་མཚར་བར་གྱུར་ཏོ། །རྒྱུད་ལུང་མན་ངག་ཀུན་གྱི་སྙིང་པོའི་བཅུད། །ཟབ་དང་རྒྱ་ཆེའི་གནད་རྣམས་གཅིག་བསྡུས་པ། །ཐབས་ཤེས་དབྱེར་མེད་མ་ནིང་གཏེར་བཅུའི་གཙོ། །ཟབ་ལམ་བདེ་གཤེགས་འདུས་པའི་སྒྲུབ་སྐོར་དང་། །སྐུ་རྟེན་རྣམ་གཉིས་མྱོང་གྲོལ་རིལ་བུར་བཅས། །རོང་བཞི་འདུས་པ་ཤ་འུག་སྟག་སྒོ་ཡི། །རང་བྱུང་བདེ་ཆེན་འཁོར་ལོར་རྒྱས་བཏབ་པ། །ཕ་ནོར་བུ་བཞིན་ཕྱག་ཏུ་སོན་པར་གྱུར། །དེ་ཚེ་ཆུ་འཛིན་རིང་དུ་སྤངས་པའི་མཁའ་འགྲོའི་ལམ། །ཡིད་འོང་མཚར་སྡུག་དབང་པོའི་གཞུས་གཡོགས་དྲྭ་མིག་ནས། །མཆོག་ཏུ་རྒྱས་པ་ལྷ་ཡི་མེ་ཏོག་མནྡ་རའི། །ཆར་གདུགས་མཛེས་པ་ས་གཞིའི་རྒྱན་དུ་ལྷུང་བ་བཞིན། །དེའི་སང་ཉིན་གཏང་རག་གི་བསང་དང་གཏོར་འབུལ་ཚོགས་ཀྱི་མཆོད་པ་རྣམས་རྒྱས་པར་གནང་ཞིང་། དེ་ཉིན་མཚོའི་ཕྱག་རྗེས་ཀྱང་ཤིན་ཏུ་གསལ་བར་གཟིགས། ལ་འོག་ཡུལ་གསུམ་དུ་གདན་འདྲེན་གྱི་ཕོ་ཉ་བར་བླ་མ་ཨོ་རྒྱན་གླིང་པ། སངས་རྒྱས་གླིང་པ། ཤ་ཕུར་པ་རྣམས་སླེབ་སྟེ་སྤྱན་འདྲེན་གྱི་ཞུ་བ་ནན་ཆགས་བྱུང་བར་ཕྱིས་སླེབ་པ་བྱེད། ད་རེས་གོང་དུ་དགོངས་པ་མ་ཞུས་པ་བཅས་ཡོང་བ་མི་འགབ་གསུངས་ནས་ཞལ་བཞེས་མ་མཛད་པས་སླར་ཡང་སྤྱན་འདྲེན་དུ་ཡབ་རྗེའི་ཞལ་སློབ་བླ་མ་སྐུ་སྐྱེ་བྱ་བ་ལོ་བརྒྱད་ཅུ་བརྒལ་བ་འདག་འབྱར་ལ་བསྡད་ནས་ལོ་ལྔ་དྲུག་ཙམ་སོང་བ་དེ་མཚམས་ནས་ཐོན་ཏེ་སླེབ་པ་དང་། དེའི་རྗེས་སུའང་སྤྱན་འདྲེན་མིའི་བང་ཕྱིན་བསྐྱར་མ་འབྱོར་ཏེ་གསུམ་ག་ལ་ཞལ་བཞེས་མ་གནང་། བླ་མ་སྐུ་སྐྱེ་དང་། གནས་འཛིན་གྱི་དགེ་སློང་ཁམས་མོ་བྱ་བ་ལ་གསོལ་འདེབས་ལེའུ་བདུན་མ་དང་གཏེར་གསར་རྡོར་སེམས་ཀྱི་ལུང་གནང་། གནས་ཀྱི་མདའ་གཙུག་ལག་ཁང་དུ་གྲགས་པར་ཞག་བདུན་སྟན་འཇགས་ནས་མོན་བོད་ཀྱི་འདུས་པ་ཁྲི་ཕྲག་ཙམ་ལ་ཚེ་དབང་དང་། བླ་མ་སྐུ་སྐྱེ་སོགས་ལ་ཐུགས་ཐིག་གི་དབང་ལུང་རྣམས་སྩལ་ཅིང་། མོན་ནས་པད་གླིང་གི་ཆོས་བརྒྱུད་འཛིན་པ། སངས་རྒྱས་གླིང་པ། བླ་མ་རྣམ་རྒྱལ། ཨོ་རྒྱན་གླིང་པ། བླ་མ་བསྟན་འཛིན་གྲགས་པ། བཀྲ་ཤིས། ངག་དབང་། རྡོ་རྗེ། ཤ་ཕུར་བླ་མ། བླ་མ་གྲགས་པ། བླ་མ་ཀརྨ། གཙོར་བོ། དར་རྒྱས། ཀརྨ་རབ་དགའ། ཆོས་རྗེ་ཕོ་ལྷ་རྣམས་སོ་སོའི་ཕ་བུ་མིང་སྲིང་གྲྭ་སློབ་ཡོན་བདག་དང་བཅས་པ། གཞན་ཡང་ཇོ་བོ་ཕུན་ཚོགས་དང་སང་ནོར་བུ། ཡུལ་ཕུ་ཇོ་བོ་ཚེ་རིང་འཛོམ་སོགས་ལ་འོག་ཡུལ་གསུམ་ནས་སྐལ་ལྡན་ཁྲི་ཕྲག་བརྒལ་ཙམ་མོན་ཟོག་གི་འབུལ་བ་རྒྱ་ཆེར་བཏེག་སྟེ་མཇལ་དུ་བྱུང་བར་སོ་སོའི་རེ་འདོད་སྐོང་བའི་ཆོས་འབྲེལ་དང་བསྔོ་བ་གཏེར་སྒྲོམ་གྱི་བྱིན་རླབས། སྤྱིར་ཁྲོམ་དབང་ཞིག་མཛད། དེ་དུས་འཇའི་འོད་ཁྱིམ་ཁྲོམ་གྱི་མཐའ་བསྐོར་ཏེ་སྣེ་གཉིས་ཁྲིའི་གཡས་གཡོན་དུ་ཟུག་པས་ཀུན་ཡ་མཚན་པར་གྱུར། མོན་པ་གཙུག་ཕུད་འབུལ་མི་ཡང་བཞི་བཅུ་ཙམ་བྱུང་། དེ་ནས་ཆིབས་བསྐྱོད་དེ་མཚོ་སྣར་ཨ་ནེ་ནང་ཚང་དང་བཅས་པ་དང་། རྫོང་དཔོན་དར་མོ་ནས་སོགས་ལ་གུར་དྲག་དང་ཚེའི་དབང་བཀའ། གཏེར་སྒྲོམ་གྱི་བྱིན་རླབས་རྣམས་མཛད། རྫོང་གི་ཀླུ་སྡིངས་དང་དགོང་པ་རྩེ་རྣམས་སུ་སྤྱན་དྲངས་ཏེ་ཞབས་ནས་བཏེག བཤད་སྒྲུབ་ཆོས་འཁོར་དུའང་སེར་སྦྲེངས་ཀྱི་བཀོད་པ་ཚར་དུ་དངར་བ་དང་སྦྱོ་ར་ཞབས་དྲུང་ཡབ་སྲས་ཀྱི་ཞབས་བསུ་གུང་ཁྲི་བཤམས་པ་ཕྱག་སྣེ་གཏོད་པ་སོགས་བཀུར་སྟི་ཆེན་པོས་སྤྱན་དྲངས་ཤིང་། ཡབ་སྲས་ལ་ཚེའི་དབང་བཀའ་དང་སེང་གདོང་མའི་རྗེས་གནང་སོགས་མཛད། ཚུར་ཡང་དབྱངས་ཅན་མའི་རྗེས་གནང་གསན། ཁེང་ལ་བརྒྱུད་མདོ་མཁར་དུ་སྤྱན་འདྲེན་ཞུས། མངོན་མཁྱེན་རིན་པོ་ཆེ་དང་མདོ་མཁར་གྱི་ཞལ་ངོ་རྣམས་ལ་ཚེ་དབང་མཛད། དགེ་ཡེར་སྤྱན་དྲངས། དེར་རྗེའི་ལྕམ་སྲིང་མ་བསོད་ནམས་དཔལ་འཛོམ་ཡང་མཇལ་དུ་ཕེབས། རིམ་པར་གྲི་གུ་བརྒྱུད་ལམ་དུ་བོད་འབྲོག་གི་སྐྱ་སེར་མང་པོས་བསྙེན་བཀུར་དང་འབུལ་ནོད་རྒྱ་ཆེར་བསྟབས་ཏེ་སོ་སོའི་རེ་འདོད་སྐོང་བའི་ཆོས་འབྲེལ་དང་གཤིན་གསོན་གྱི་བསྔོ་བའང་བསམ་གྱིས་མི་ཁྱབ་པ་མཛད་དེ་གྲྭའི་སུམ་མདོ་གླིང་དུ་བཞུགས། དེ་དུས་གཞུང་ས་མཆོག་ནས་སྐྱིད་རུ་དང་དར་རྒྱས་ཁང་གསར་སྐོར་རྣམས་ལྷ་འབངས་སུ་སྦྱོར་འཇགས་གནང་བའི་རྩིས་བཞེས་སུ་ཡུམ་ཕེབས་འདུག་པ་དང་མཇལ། དར་རྒྱས་ཆོས་སྡིངས་པ་དང་འདུམ་པོ་སོགས་སྐྱ་སེར་གྱི་མཇལ་མི་ཡང་མཐའ་ཡས་པ་བྱུང་། ནངས་པར་ཆིབས་བསུ་རིང་ཐུང་དང་སེར་སྦྲེངས་ཀྱི་བཀོད་པ་ཚར་དུ་དངར་བས་མདུན་བསུས་ཏེ་གདན་སར་ཕེབས། དེ་ནས་ཟླ་བ་བརྒྱད་པའི་ཉི་ཤུ་ལྔའི་ཉིན་འདུས་ཚོགས་ཀྱིས་ཆོས་སྐྱོང་སྤྱིའི་བསྐང་གསོ་དང་རྗེ་ཉིད་ནས་གཟིམས་ཆུང་ཀུན་བཟང་ཡང་རྩེར་གཏེར་སྲུང་མཆོད་པ་དང་ཚོགས་འཁོར་རྒྱས་པར་གནང་སྟེ་གཏེར་སྒྲོམ་ཞལ་དབྱེ་བར་མཛད་ནས་གྲྭ་སློབ་ཐམས་ཅད་ལ་བྱིན་རླབས་གནང་། ནམ་མཁའ་དྭངས་ཤིང་འབྲུག་གི་སྒྲ་ལྟ་བུའི་སྒྲ་ཆེན་པོ་གྲགས་པ་དེར་འདུས་ཀུན་གྱིས་ཐོས། གོང་ཞབས་ཡས་ཕྱིན་དུ་ཟབ་གཏེར་གྱི་གནས་ཚུལ་འབུལ་བར་གཟིམས་དཔོན་ཆོས་མཛད་རྫོང་སྟ་མཛད་པས་ཤིན་ཏུ་མཉེས་པའི་བཀའ་ཤོག་དང་ལེགས་བྱའི་གནང་སྦྱིན་བསམ་གྱིས་མི་ཁྱབ་པ་སྩལ། དེ་ནས་གཟིམས་ཆུང་བསམ་གཏན་སྦུག་ཏུ་བདུན་ཕྲག་གཉིས་སྐུ་མཚམས་དམ་པར་མཛད་རྗེས་གྲྭ་ནང་གི་ལྷ་འབངས་གསར་གནང་ལ་གོང་དུ་ལེགས་ཇ་འབུལ་མི་རྫོང་སྟ་གནང་ཞིང་། དེ་རྗེས་བདག་གིས་ཡི་གེའི་ཞབས་ཕྱི་ཞུས་ཏེ་རྟགས་མེད་ཀྱི་ཤོག་དྲིལ་གསུམ་འབེབས་པར་མཛད། ཟླ་བ་བཅུ་པའི་འགོར་ཡར་འབྲོག་དཔོན་ཆེན་རི་བོ་བྲག་པའི་སྤྱན་འདྲེན་འབྱོར་པ་ལྟར། གྲྭ་ནང་བརྒྱུད་ཆིབས་བཏེག ཐབ་བསུ་རྫོང་སྟེང་ནས་བསང་དུང་དར་འཕྱར། བོ་དོང་གྲྭ་ཚང་པའི་སེར་སྦྲེངས། དཔོན་བློན་རྣམས་ཀྱིས་ཞབས་བསུ་སོགས་བཀུར་སྟི་ཆེན་པོས་རི་བོ་བྲག་ཕོ་བྲང་དུ་ཕེབས། དེར་གཏིང་སྐྱེས་ཁྲི་ལྕམ་བསྙུན་གྱིས་བཏབ་པའི་སྐུ་རིམ་དུ། འཆི་བསླུ། བྱད་གདོན་འགྲོལ་བ། ཚེ་དབང་བརྒྱ་ཚར། བླ་མ་དྲག་པོའི་དབང་རྣམས་མཛད་པས་མི་རིང་བར་དྭངས། ཞབས་དྲུང་ཡབ་སྲས་ཡུམ་དང་རྗེ་བཙུན་མ་རྣམས་ལ། ཚེ་རྟ་དྲག་དམར། ཡང་བཟློག སྒྲོལ་དཀར། དམག་ཟོར་མ་རྣམས་ཀྱི་རྗེས་གནང་། དུག་དབང་རྡོ་རྗེ་ཕ་ལམ། འཆི་བསླུ་སོགས་རྐྱེན་སེལ་མང་པོ་དང་། ཞབས་དྲུང་ཡབ་སྲས་དང་ལྕམ་རྣམས་ལ་ཐུགས་ཐིག གཤིན་རྗེ། གནམ་ལྕགས་བྲག་གཏེར་གསར་རྣམས་ཀྱི་དབང་ལུང་། ཨ་ཏི་ཟབ་དོན་སྙིང་པོའི་སྤོམ་ཁྲིད་དང་། བོ་དོང་གྲྭ་ཚང་ལ་དམག་ཟོར་མའི་རྗེས་གནང་རྣམས་སྩལ་ཅིང་། གཤིན་རྗེ་འཇོམས་བྱེད་ཀྱི་སྒོ་ནས་གཏོར་བཟློག་དང་མནན་པའང་མཛད། མཆོད་ཡོན་གཉིས་ཀས་ནན་གྱིས་གསོལ་བ་ལྟར་ཕྱིས་གཞུང་གི་དགོངས་པ་བསྐངས་ཏེ་བོ་དོང་གྲྭ་ཚང་དུ་བླ་མ་བསྐོ་བ་སོགས་ཞལ་འཛིན་བདག་རྐྱེན་གནང་། སྡེ་བདག་གཞུང་དང་གྲྭ་ཚང་སོ་སོ་ནས་བརྟན་བཞུགས་ཀྱང་རྒྱས་པར་ཕུལ་ཞིང་སྟོན་མོ་དང་ཡུན་གྱི་བསྙེན་བཀུར་འབུལ་བ་སོགས་མཐའ་ཡས་པས་ཞབས་ནས་བཏེག སྤ་ལུང་སྤྲུལ་སྐུ། ཆོས་རྗེ་པདྨ་གར་དབང་། བླ་མ་རྒྱལ་བ་སོགས་མཇལ་མི་ཆེ་ཕྲ་མང་པོ་དང་། སྡེ་པ་ནང་སོ་སོགས་བསྔོ་རྟེན་འབུལ་མི་ཡང་མཐའ་ཡས་པ་བྱུང་། སྟག་ལུང་དུ་ཡང་སྤྱན་འདྲེན་བྱུང་བ་ལྟར་ཐེགས། རིམ་པར་ཆིབས་བསུ་རྫོང་དང་ཆོས་སྡེ་ནས་བསང་དུང་དར་འཕྱར། གྲྭ་ཚང་ནས་སེར་སྦྲེངས་དང་སྡེ་ཡངས་སུ་ཞབས་དྲུང་ལྕམ་སྲིང་གིས་ཞབས་བསུ་སོགས་བཀུར་སྟི་ཆེན་པོས་སྤྱན་དྲངས་ཏེ་ཞབས་ཏོག་དང་འབུལ་བ་གྱ་ནོམ་པ་བསྟབས། དེར་དཔོན་སློ བ་རྣམས་ལ་ཚེ་དཔག་མེད། གུ་རུ་དྲག་པོའི་དབང་བཀའ་སོགས་རྐྱེན་སེལ་གྱི་དབང་བྱིན་རླབས་མང་པོ་དང་གསང་སྔགས་ཆོས་འཁོར་འདུས་ཚོགས་ལ་བཛྲ་གུ་རུའི་བཟླས་ལུང་དང་བླ་མའི་རྣལ་འབྱོར་གྱི་ཆོས་འབྲེལ་རྣམས་མཛད། བསམ་སྡིངས་ནས་སྤྱན་འདྲེན་པ་བྱུང་ཡང་ཐེགས་མ་ཐུབ་པས་ཇ་ཞུ་འབུལ་སྐྱེས་སྟོབ་པར་ཆོས་རྗེ་བདུད་འཇོམས་མངགས་པ་སོགས་སྐུ་དྲུང་དུ་མཇལ་ཁ་ཞུ་བ་ཡང་མང་དུ་བྱུང་། སླར་ཡང་རི་བོ་བྲག་ཏུ་ཕྱིར་ཕེབས་ནས་དཔོན་བློན་རྣམས་ལ་ཤ་འུག་གཏེར་སྒྲོམ་སོགས་གཏེར་རྫས་ཀྱི་མཇལ་ཁ་དང་བྱིན་རླབས་མཛད་ཅིང་། ཕེབས་རྫོངས་ཀྱི་སྟོན་མོ་འབུལ་ནོད་སོགས་རྒྱ་ཆེར་བསྒྲུབས་པ་དང་དུ་བཞེས་ནས་ཆིབས་བཏེག་པའི་ལམ་དུ་སྡེ་བ་རོང་པོ་བ་དང་ཞོལ་དབོན་པོ་གཉིས་ཀྱིས་སོ་སོའི་གཞིས་སུ་བསྙེན་བཀུར་ལ་སྤྱན་དྲངས་པ་སོགས་ཡར་འབྲོག་གི་ཆེ་ཕྲ་ཚང་མས་ཞབས་ནས་བཏེག་ཅིང་། སོ་སོར་གནང་སྦྱིན། གྲྭ་ཚང་རྣམས་སུ་མང་ཇ། དབང་བྱིན་རླབས་གཤིན་གསོན་གྱི་བསྔོ་བ་སོགས་རྣམ་པར་དཀར་བའི་ཕྲིན་ལས་ཀྱིས་གདུལ་བྱ་མཐའ་ཡས་པའི་རེ་འདོད་ཚིམ་པར་མཛད་དེ་རིམ་པར་དར་རྒྱས་ཆོས་གླིང་དུ་ཕེབས་ནས་བཟན་དབང་མཛད། དར་གླིང་པ་རྣམས་ཀྱིས་མཁའ་འགྲོ་བསུན་བཟློག་དང་འབྲེལ་བའི་ཞབས་བརྟན་དང་འཆམས་ཕུད། ཡུལ་པ་རྣམས་ཀྱིས་བྲོ་གཞས་ཀྱི་རྩེད་སྣའི་གཟིགས་མོ་ཕུལ། ཕྱིར་ལམ་རྒྱལ་གླིང་དུ་ཚོགས་ཆེན་དགེ་འདུན་སྒང་པའི་ཀུན་རར་སྤྱན་དྲངས་ནས་བསྙེན་བཀུར་ཞིང་ནང་རྟེན་དང་རོལ་མོ་སོགས་མཆོད་རྫས་མཚར་བ་ཐམས་ཅད་སྤྱན་ལམ་དུ་ཕབ། དེ་ནས་གདན་སར་ཕེབས་ཏེ་ཟླ་བ་བཅུ་གཅིག་པའི་མཇུག་ཏུ་གཏེར་སྒྲུབ་ཀྱི་སྐུ་མཚམས་དམ་པར་ཡོད་དུས་གཙང་རོང་ནས་ཏྲེ་བོ་སྤྲུལ་པའི་སྐུ་དཔོན་སློབ་རྣམས་ཆེད་གཏད་མཇལ་དུ་ཕེབས་བྱུང་བ་སྐུ་མཚམས་ཀྱི་སེང་དང་མ་འགྲིག་པས་བསྒུགས་ཞུགས་དང་། བདུན་ཕྲག་གི་མཚམས་སུ་སྤྲུལ་པའི་སྐུ་ཉིད་སྐུ་རྐྱང་ལ་མཇལ་ཁ་གནང་། སླར་ཡང་སྐུ་མཚམས་གྲོལ་བསྟུན་དཔོན་སློབ་ཐམས་ཅད་ལ་གཏེར་གསར་རྣམས་ཀྱི་དབང་ལུང་དང་ཁྱད་པར་ཐུགས་ཐིག་གི་མྱོང་ཁྲིད་སྨིན་པར་སྩལ་ཅིང་། སྤྲེལ་ལོ་དུས་རིམ་ཆེན་མོའི་རྡོ་རྗེ་སློབ་དཔོན་དུའང་ཕེབས།