དགུང་ལོ་སུམ་ཅུ་སོ་དྲུག་པ།
དགུང་ལོ་སུམ་ཅུ་སོ་དྲུག་པ་ལྕགས་བྱ་གནམ་ལོ་གསར་དུ་ཚེས་པའི་དགྱེས་སྟོན་གྱི་བཞུགས་གྲལ་ཡང་དཔོན་སློབ་རྣམས་དང་ལྷན་ཅིག་ཏུ་རྒྱས་པར་གནང་ཞིང་། དེ་ནས་བཀའ་བརྒྱད་བདེ་གཤེགས་འདུས་པའི་རྡུལ་ཚོན་གྱི་དཀྱིལ་འཁོར་ཆེན་པོ་བཞེངས་ཏེ་ཏྲེ་བོ་སྤྲུལ་པའི་སྐུ་དཔོན་སློབ་རྣམས་དང་སྨིན་གྲོལ་གླིང་འདུས་པར་བཅས་པ་ལ་ཁྲོ་བོའི་དབང་བཀའ་མཛད་ཅིང་། རིན་པོ་ཆེའི་སྐུ་རྒྱན་གསར་བཟོ་གནང་བ་ཡང་དེ་དུས་ཐོག་མར་བཞེས། དེ་རྗེས་སྤྲུལ་པའི་སྐུ་དཔོན་སློབ་རྣམས་ལ་རྣལ་འབྱོར་རྒྱུན་དབང་། གསང་རྫོགས་ལུགས་གསུམ། རང་བྱུང་རང་ཤར། མཁའ་འགྲོ་སྙིང་ཐིག་གི་དབང་རྣམས་རྡུལ་ཚོན་གྱི་དཀྱིལ་འཁོར་ལ་བརྟེན་པ་དང་། མ་མགོན་འཁོར་ལྔའི་རྗེས་གནང་། གྲྭ་པའི་ཛམ་དམར། རང་བྱུང་རང་ཤར་གྱི་ལུང་། མཁའ་འགྲོ་སྙིང་ཐིག་གི་ཁྲིད་བཀའ་དང་། ཆོས་བཀའ་ཉེར་མཁོའི་རིགས་གཞན་ཡང་མང་དུ་མཛད། བཀའ་བརྒྱད་དང་མཁའ་འགྲོ་སྙིང་ཐིག་གི་དཀྱིལ་འཁོར་གཉིས་པོའི་སྟེང་ནས་གཙུག་ལག་ཁང་རྟེན་བརྟེན་པར་བཅས་པ་ལ་རབ་ཏུ་གནས་པའང་སོ་སོའི་ལུགས་བཞིན་མཛད། འདི་སྐབས་གཞུང་དུ་སྟོད་ཀྱི་ལེགས་འབུལ་ཞུ་བར་གཅུང་ཀུན་དགའ་ཚུལ་ཁྲིམས་རྫོང་སྟ་གནང་ཞིང་། མི་རིང་བར་ཏྲེ་བོ་སྤྲུལ་པའི་སྐུ་དཔོན་སློབ་རྣམས་ལ་ཕེབས་རྫོངས་ཀྱི་འབུལ་བ་དང་ཆིབས་སྐྱེལ་སོགས་བཀུར་ཟོས་ཆེན་པོ་མཛད་ནས་ཕྱིར་ཐེགས། ཟླ་བ་གསུམ་གྱི་བར་གཟིམས་ཆུང་བསམ་གཏན་སྦུག་ཏུ་གཏེར་སྒྲུབ་ཀྱི་སྐུ་མཚམས་དམ་པར་བཅད་དེ་ལྷ་སྔགས་འོད་གསལ་གྱི་འཁོར་ལོ་ལས་མི་འདའ་བར་བཞུགས། དེ་དུས་འོད་གསལ་གྱི་གཟིགས་སྣང་ངོ་མཚར་བ་མང་དུ་བྱུང་བ་རྣམས་ནི་ལོགས་ན་ཡོད་དེ་འདིར་བཀའ་རྒྱ་ཡོད་པས་བྲིར་མ་ནུས་སོ། །དེ་རྗེས་རོང་པ་བླ་མ་འོད་གསལ་རང་གྲོལ་ལ་གཤིན་རྗེ་རུ་མཚོན་དམར་པོའི་དབང་ལུང་གསན་ཏེ་ཧོར་ཟླ་དྲུག་པའི་འགོར་གོང་ནས་སྤྱན་འདྲེན་གྱི་བཀའ་ཤོག་ཕེབས་པ་ལྟར་ཆུ་ཤུར་བརྒྱུད་ཕོ་བྲང་ཆེན་པོར་ཐེགས། ཕེབས་འཕྲལ་དུ་ཤར་མར་གོང་ཞབས་སུ་ཕྱག་འབུལ་དང་། དེ་རྗེས་མི་དབང་ཆེན་པོ་མཇལ་དུ་ཐེགས། ཚེས་བཅུ་གསུམ་གྱི་ཉིན་རྩེར་གོང་ཞབས་ཡས་ཕྱིན་ལྷན་ཅིག་ཏུ་ཤ་འུག་གཏེར་གསར་གྱི་དབང་བཀའ་འབུལ་བར་མཛད་ཅིང་ཤིན་ཏུ་མཉེས་པའི་བཀའ་ལུང་དང་དབང་ཡོན་ཡང་རྒྱ་ཆེར་སྩལ། དེ་རྗེས་གོང་ནས་དྲུང་ཡིག་ངག་དབང་བཀྲ་ཤིས་བྱ་བ་སྩལ་ཏེ་རྟགས་ཅན་གྱི་ཤོག་དྲིལ་བྱིངས་དང་། གཅུང་ཀུན་དགའ་ཚུལ་ཁྲིམས་དང་། དགེ་སློང་བློ་གསལ་གཉིས་ཀྱིས་ཀྱང་ཤོག་དྲིལ་རེ་རེ་རིམ་པར་བུ་ཡིག་ཏུ་འབེབས་པར་མཛད། མི་དབང་ཆེན་པོ་དང་རྗེ་འདིས་ལྷན་ཅིག་གོང་ཞབས་སུ་ཞབས་པད་བརྟན་པའི་གསོལ་བ་བཏབ་ན་བཟང་བའི་ལུང་བསྟན་བྱུང་བ་ལྟར། ཟླ་བ་བདུན་པའི་ཚེས་བཞིའི་ཉིན་ས་སྐྱོང་ཆེན་པོས་གཞིས་ཀ་ནས་སྦྱིན་བདག་གནང་བའི་ཞབས་བརྟན་རྒྱས་པར་ཕུལ་བའི་རྗེས་འབྲེལ་རྗེ་ཉིད་ནས་ཀྱང་གནམ་ལྕགས་ཀྱི་རྡོ་རྗེ་སོགས་འབུལ་བ་དང་བཅས་ཞབས་པད་བརྟན་པའི་རྟེན་འབྲེལ་དང་གསོལ་འདེབས་མཛད། སྔ་སོར་མཁའ་འགྲོས་དག་སྣང་ལ་ཕུལ་བའི་བརྟན་བཞུགས་ཚིགས་བཅད་མ་དེ་ཡང་སྐུ་ཞབས་གྲྭ་ཚང་ཚོགས་ཆེན་དུ་འདི་སྐབས་ཚུགས། དེ་ཉིན་ནས་བཟུང་གོང་དུ་མཁའ་འགྲོ་སྙིང་ཐིག་གི་ཁྲིད་བཀའ་གཞུང་ཁྲིད་ཞལ་གདམས་སྙན་བརྒྱུད་དང་བཅས་པས་བརྒྱན་པ་འབུལ་བར་མཛད་ཅིང་། རུ་ཤན་དབྱེ་བ་སོགས་ལུས་ངག་གི་གནད་དང་གནས་ལུགས་ཀྱི་དྲི་བ་ལ་ཞུན་ཐར་དཔྱོད་པ་སོགས་ལས་དང་པོ་པ་རྣམས་ལམ་འདི་ལ་འཁྲིད་པའི་ཐབས་མཁས་ཀྱི་བརྡ་སྟོན་པའི་ཕྱིར་བདག་གིར་བཞེས་གསུང་། དེ་དག་གི་སྲུབས་དབར་རྣམས་སུ། གུང་ཐང་སྤྲུལ་སྐུ། དགེ་སློང་འཇམ་དབྱངས་གྲགས་པ། ཧོར་ལོ་ཆེན་སོགས་ལ་མཁའ་འགྲོ་སྙིང་ཐིག་གི་དབང་དང་རཏྣའི་གུར་དྲག་གི་དབང་ལུང་། གུང་ཐང་སྤྲུལ་སྐུ། གླིང་སྟོད་སྤྲུལ་སྐུ། རྣམ་གླིང་པཎ་ཆེན། དར་མོ་ནས་ཀྱི་སྐུ་ཚ་སོགས་སྨན་པ་མང་པོར་གཡུ་ཐོག་སྙིང་ཐིག་གི་དབང་བཀའ་སྔ་ཕྱི་གཉིས་མཛད་དེ་སྩལ། མཚན་མོ་འབྲུ་མར་གྱི་སྣང་བ་ལ་བརྟེན་ནས་དགེ་སློང་འཇམ་དབྱངས་གྲགས་པ་ལ་མཁའ་འགྲོ་སྙིང་ཐིག བི་མ་སྙིང་ཐིག སྙན་བརྒྱུད་རྡོ་རྗེ་ཟམ་པ་རྣམས་ཀྱི་ལུང་དང་། ཉེར་བཞིའི་ཉིན་གོང་ཞབས་ཡས་ཕྱིན་དུ་གཏེར་གསར་གྱི་ལུང་རྣམས་འབུལ་བར་མཛད། ཐུགས་རྗེ་ཆེན་པོ་གསང་སྒྲུབ་ཀྱི་སྐུ་ལི་དམར་ལས་གྲུབ་པ་དང་། དམ་རྫས་སོགས་སྔར་ཞལ་མ་ཕྱེ་བ་རྣམས་འདི་དུས་ཞལ་དབྱེ་བར་མཛད་ནས་ཆོས་བདག་རྟེན་འབྲེལ་གྱི་སླད་དུ་སྐུ་བརྙན་དེ་ཉིད་དང་དམ་རྫས་རིལ་བུ་བརྒྱ་ཕྲག་ཏུ་ཉེ་བ་ཙམ་ཡང་འབུལ་བར་གནང་ཞིང་སྐབས་འདིའི་རྟེན་འབྲེལ་གྱི་བརྡ་སྟོན་ངེས་ཤེས་འདྲོངས་པའང་ཡོད་གསུང་། དེ་ནས་གླིང་ཁར་ཆབ་ཞུགས་ལ་ཕེབས་པར་མི་དབང་ཆེན་པོའི་སྐུ་ཞབས་ནས་ཇ་མར་བཞེས་སྤྲོ་སོགས་ཟུར་གསོས་གྱ་ནོམ་པའང་སྩལ། ཨོ་རྒྱན་གླིང་པ་དང་སངས་གླིང་བླ་མ། སྒང་སྟེང་གཟིམས་དཔོན་སོགས་མོན་པ་མང་པོ་ལ་མཇལ་ཁ་དང་། ཉང་བྲན་གྱི་ཚེས་བཅུ་པ། གཞིས་ཀའི་གཉེར་ཆེན་ཨ་ནོར་ལགས། ལྷ་སའི་གནས་ཆེན་པ་དང་བསྙེན་གནས་པ་ཁག་བཞི་རྣམས་ལ་སོ་སོའི་རེ་འདོད་སྐོང་བའི་དབང་ལུང་མང་དུ་མཛད། ཟླ་བ་བརྒྱད་པའི་ཚེས་བདུན་གྱི་ཉིན་རྩེར་གོང་ཞབས་སུ་སྙིང་ཐིག་གི་ཐོད་བརྒལ་ངོ་སྤྲོད་རྣམས་འབུལ་བར་མཛད་དུས་ཡོན་དུ་འཇའ་ཤེལ་རྒྱའི་མེ་ལོང་དངུལ་གྱི་ཀོང་བུ་མར་མེ་འབར་བ་སོགས་སྩལ། སྙིང་ཐིག་གི་ཁྲིད་རྫོགས་ནས་གཤིན་རྗེ་རུ་མཚོན་དམར་པོ་དང་། ཕུར་པ་ཡང་གསང་སྤུ་གྲིའི་དབང་ལུང་འབུལ་བར་མཛད་ཅིང་། ཡོན་དུ་ཧོར་དྲིལ་དངུལ་མགོ་མ་དང་ཧོར་སིལ་ཡུལ་འཁོར་མ་གསེར་སོགས་སྤམ་མཐོ་བ་སྩལ། གྲྭ་ཚང་ཚོགས་ཆེན་ལའང་གཤེད་དམར་གྱི་དབང་ལུང་མཛད་ཅིང་། སྐུ་ཞབས་ཡས་ཕྱིན་གྱི་སྐུ་སྲུང་དུ་བཏགས་གྲོལ་ཁྱད་པར་ཅན་སྒྲུབ་པ་གནང་བའང་ཞག་བདུན་དུ་རབ་གནས་མཛད་ནས་དེ་ཉིད་ཀྱི་དབང་བཀའ་དང་རྗེས་སུ་འབྲེལ་བར་འབུལ་བ་གནང་། རིན་ཆེན་འབྲུ་སྨན་སོགས་བཤད་ཚོད་དང་མཐུན་པའི་ཡོན་ཡང་སྩལ། དེ་རྗེས་བུམ་སྒྲུབ་ཞག་ལྔ་མཛད་དེ་ཉེར་བཞི་ལ་གོང་ཞབས་ཡས་ཕྱིན་དུ་བྱད་འགྲོལ། གདོན་འགྲོལ། འཆི་བ སླུ་སོགས་དང་། དེའི་ཕྱི་ཉིན་གཟིམས་ཆུང་རྩེར་སྐུ་ཞབས་རྩེ་ཤོད་ཀྱི་ཐུགས་དམ་ཐང་སྐུ་དང་འབུར་སྐུ་མང་པོར་རབ་གནས་ཀྱི་ཆོ་ག་མཛད་པའི་ཚེ་གནང་ཆར་རིན་པོ་ཆེའི་ཞི་རྒྱན་རྒྱ་བཟོ་ཁྱད་མཚར། ཀཱ་པཱ་ལ་མཚན་ལྡན་བདུད་རྩིའི་བཅུད་ཀྱིས་གཏམས་པ། རྡོ་རྗེ་ཁ་ཊྭཱཾ་ཀ་དང་། དགང་བླུགས་ཧོར་ཚགས་མ། དར་དཀར་ཡུག་རིང་སོགས་ཀྱི་ཡོན་རྒྱ་ཆེར་སྩལ་ཅིང་ཆོ་གའི་གྲལ་ལ་གཟིགས་མོར་ཕེབས་ནས་ཤིན་ཏུ་དགྱེས་པས་དབུགས་དབྱུང་ཞིང་། ཡོན་གྱི་རྟེན་འབྲེལ་ལས་རྡོ་རྗེ་འཛིན་པ་དག་གི་རྒྱན་དང་ཕྱག་ཆས་དབང་བསྐུར་ཞིང་བསྟན་པ་དྲི་མ་མེད་པ་ཡུན་རིང་དུ་སྐྱོངས་ཤིག་པའི་བརྡ་སྟོན་ལྷུན་གྱིས་གྲུབ་པས་རྗེས་སུ་བཟུང་བར་གོ་གསུང་། གོང་ནས་རྗེའི་འཁྲུངས་རབས་གསོལ་འདེབས་ཀྱང་འདི་སྐབས་བཀའ་རྩོམ་དུ་སྩལ་ཅིང་། དེ་དང་མཐུན་པའི་བྲིས་ཐང་གསར་བཞེངས་ལ་ཕྱག་ཞབས་ཀྱི་རྗེས་ཀྱང་བཀའ་ནན་ལྕི་བས་འབུལ་དགོས་བྱུང་གསུང་། དེ་ནས་གོང་དུ་ཡང་ཏིག་གཅེས་སྒྲོན་གྱི་ཉམས་ཁྲིད་སྨིན་རྒྱས་དང་། དེའི་དམིགས་པའི་རྐང་གྲངས་ཀྱི་བཀའ་རྩོམ། རབ་གནས་སོགས་རྗེ་ཉིད་ཀྱི་བཀའ་རྩོམ་ཕལ་ཆེ་བའི་ལུང་རྣམས་ཀྱང་འབུལ་བར་མཛད། དེ་སྐབས་རྡོ་རྗེ་བྲག་སྤྲུལ་སྐུ་རིན་པོ་ཆེར་གཏེར་གསར་གྱི་དབང་མཛད་ཅིང་ཚུར་ཡང་ཚེ་དབང་ཞིག་གསན། བོ་དོང་ཆོས་འཁོར་བའི་ཆོས་གཞིས་སྔར་རྒྱུན་ལྟར་འཇགས་གནས་སོགས་སྡེ་སྲིད་རིན་པོ་ཆེར་སྙན་སྐུལ་ཞུས་ཏེ་ཕན་པ་སྒྲུབ་པར་མཛད། དེ་ནས་ཕེབས་གདོང་གནང་ཆར་ལོ་རོ་བཀྲ་ཤིས་མཐོང་སྨོན་གྱི་རྟེན་གསུམ་དགོན་མ་ལག་དང་བཅས་པ་ཚང་མ། དངུལ་ལྔ་བཅུ་མ། གོས་ཡུག་སུམ་ཅུ་སོ་ལྔ། དར་ཡུག་སྣ་ཚོགས། ཇ་སིག དངུལ་མདོང་། དངུལ་གྱི་མཎྜལ་སོགས་སྤམ་མཐོ་བ་སྩལ། ཟླ་བ་དགུ་པའི་ཚེས་ལྔ་ལ་རྩེ་ནས་ཆིབས་བཏེག་སྟེ་ལྷ་སར་ཇོ་ཤཱཀ་ལ་ཕྱག་མཆོད་མཛད་དུ་ཕེབས། བཀའ་བརྒྱད་སྨད། བྱང་གླིང་། གཞིས་ཁ་ཤར་སོགས་གནས་ཆེན་པ་སོ་སོས་རང་རང་གི་སྡུམ་པར་སྤྱན་དྲངས་ཏེ་ཚེ་རྟ་གུར་དྲག་གི་དབང་ཞུས། དྷཱི་ཚ་སྤྲུལ་སྐུ་རིན་པོ་ཆེ་སྐུ་མདུན་དུ་མཇལ་དུ་བྱུང་བར་ཕྱག་དར་རྩེ་སྤྲོད་སོགས་བཀུར་ཟོས་འབུལ་བར་མཛད། འབྲི་གུང་སྤྲུལ་པའི་སྐུའི་བཀའ་ཤོག་དང་རྟ་སོགས་འབུལ་སྐྱེས་བཟང་པོ་བྱུང་། དགའ་ལྡན་ཁང་གསར་དུ་རྡོ་རྗེ་བྲག་རིག་འཛིན་སྤྲུལ་པའི་སྐུ་བཞུགས་པའང་མཇལ་བ་ཙམ་མཛད་ནས་ཆིབས་བཏེག་སྟེ་རིམ་པར་ཆུ་ཤུར་དུ་སྐུ་ཞང་གི་མཆིས་འབྲང་མ་བུར་རྐྱེན་སེལ་གྱི་དབང་དང་། ལྕགས་ཟམ་རྗེ་དབོན་དང་ཕྱག་མཛོད་ལྷུན་གྲུབ་རབ་བརྟན་པ་སོགས་མཇལ་མི་མང་པོའི་རེ་འདོད་སྐོང་བར་མཛད་དེ་གདན་སར་ཕེབས། མི་རིང་བར་གཅུང་ཀུན་དགའ་ཚུལ་ཁྲིམས་དང་ཞང་པོ་དྲུང་པ་སོགས་བཀྲ་ཤིས་མཐོང་སྨོན་རྩིས་བཞེས་པར་ལོ་རོར་རྫོང་སྟ་མཛད། ཏྲེ་བོ་སྤྲུལ་སྐུ་རིན་པོ་ཆེའི་ཡབ་གཤེགས་པའི་མགྱོགས་བསྔོ་རྟེན་འབུལ་བ་དང་སྐྱབས་ཡུལ་དུ་སྤྱན་འདྲེན་པའི་བང་ཕྱིན་སླེབ་པ་ལྟར་གོང་ཞབས་སུ་གནས་ཚུལ་འབུལ་བར་གཟིམས་དཔོན་ཆོས་མཛད་ཆེད་དུ་མངགས། འདུམ་པོའི་ཞལ་ངོ་རྣམས་མཇལ་དུ་བྱུང་བར་ཚེ་དབང་གུར་དྲག་གི་དབང་སོགས་ཀྱིས་རེ་འབྲས་གང་བར་མཛད། ལོ་རོ་ནས་རྩིས་བཞེས་པ་རྣམས་འབྱོར་བའི་ཕྱག་ཕྱིར་དབུ་མཛད་དྲུང་གནས་སོགས་བྱུང་བར་གཤིན་རྗེའི་དབང་ལུང་སྩལ། འདི་སྐབས་དུས་བབས་ཆོག་གྲའི་བསྒྱུར་ཁ་སོགས་རྟེན་འབྲེལ་གྱི་རྣམ་འགྱུར་ཅི་ཡང་བྱུང་གསུང་། དེ་ནས་ཟླ་བ་བཅུ་པའི་ཉེར་ལྔ་ལ་གཙང་རོང་དུ་ཆིབས་བཏེག་པའི་ཕེབས་ལམ་དུ་ཆོས་སྡེའི་གནས་མཇལ་དང་། དེའི་ཕྱི་ནུབ་བཙན་མདོ་ཆ་དཀར་དུ་དཔལ་དེའུ་གྲུབ་ཆེན་གྱིས་ཚོགས་འཁོར་འབུལ་པ་སོགས་རྒྱས་པར་བསྟབས། འདའུའི་ལ་ནས་རིམ་པར་དཔའ་དེའུ། རྩེ་ཐང་སོགས་བརྒྱུད་རོང་ཆུ་ཚན་ཁར་ཞག་ལྔའི་བར་ཆབ་ཚན་བསྟེན་ཏེ་བཞུགས། གསོལ་ཆས་གཟན་ཤིང་སོགས་གཞུང་གི་བཀས་རིན་སྤུངས་རྫོང་ནས་ཕུལ། དེར་ཡུལ་པ་མཇལ་མི་ཡང་མང་པོ་བྱུང་། དེ་ནས་རིམ་པར་སྒོ་མོ་ར་བ། སྐྱིད་གཤོངས་ནང་པ་སོ་སོའི་ཁྱིམ་དུ་ཞག་བཞུགས་དང་རྐྱེན་སེལ་གྱི་ཚེ་རྟའི་དབང་བསྐུར་བྱིན་རླབས་མཛད་ནས་རོང་བྱམས་ཆེན་གྱི་གནས་གཟིགས་དང་། དེ་ནུབ་རིན་སྤུངས་རྫོང་དུ་ཕེབས་ཏེ་རྫོང་དཔོན་དང་ཡུལ་མི་དད་ཅན་འགས་ཞབས་ནས་བཏེག་ཅིང་དབང་དང་བྱིན་རླབས་ཀྱིས་རེ་བ་གང་བར་མཛད། ནངས་པར་བཀྲ་ཤིས་གླིང་གི་ཚུགས་ཁར་ཏྲེ་བོ་སྤྲུལ་པའི་སྐུ་ངོས་ཕེབས་ཀྱི་ཐབ་བསུ་དང་། སྒར་པའི་སེར་སྦྲེངས་ཀྱིས་སྔུན་བསུས་ཏེ་ཚེས་བརྒྱད་ལ་དཀར་པོ་ལྕོག་གར་ཕེབས། དེར་ཡབ་ཀྱི་དོན་དུ་བྱང་བུ་བཞུ་བའི་ཆོ་ག་མཛད་ཅིང་། ཧོར་སིལ། མུ་ཏིག་གི་འཕན་ཆ། རྟེན་ལི་མ་དང་རྒྱ་ནག་མ་སོགས་རྟེན་གསུམ་མཆོད་ཆ་གོས་དར་རྟ་ནོར་གྱི་འབུལ་བ་སྤམ་མཐོ་བ་རྣམས་བྱང་ཆེན་དུ་བསྔོ་བསྒྱུར་མཛད། དེ་དག་གི་སྔ་ཕྱི་ཅི་རིགས་པ་སྤྲུལ་པའི་སྐུ་དཔོན་སློབ་རྣམས་ལ་གཏེར་གསར་བླ་མ་ཞི་དྲག་གཤིན་རྗེ། རྡོར་སེམས་རྣམས་ཀྱི་དབང་ལུང་དང་། ཡུལ་པ་རྣམས་འདུས་པའི་ཁྲོམ་ལ་ཚེ་དབང་། སྤྲུལ་སྐུ་རིན་པོ་ཆེ་སྐུ་རྐྱང་ལ་ཀུན་རིག་རྣམ་གྲོལ་སྒོ་ཆེན་གྱི་དབང་ལུང་དང་། ཟབ་མོ་ནང་དོན་གྱི་ལུང་། སྒྲོལ་དཀར་གྱི་རྗེས་གནང་སོགས་མཛད། ཕུང་པོ་རི་བོ་ཆེའི་བླ་མ་སོགས་ཕྱོགས་ཀྱི་བླ་མ་སློབ་དཔོན་དཔོན་སྐྱ་ཡུལ་མི་སོགས་ཀྱི་མཇལ་མི་མང་དུ་བྱུང་ཞིང་དབང་དང་བྱང་བཞུ་གཤིན་གསོན་གྱི་བསྔོ་བ་སོགས་ཀྱིས་རེ་འདོད་སྐོང་བར་མཛད། དེ་ནས་འོད་མཆོག་སྤྲུལ་པའི་སྐུས་སྤྱན་འདྲེན་ནན་ཆགས་བྱུང་བ་བཞིན། ཉེར་གསུམ་ལ་ཆིབས་བསྐྱོད་པའི་དགོན་གཤམ་གྱི་གྲོང་དུ་ཐབས་བསུ་དང་། དགོན་པའི་ཐང་སྒབ་ཏུ་སྤྲུལ་སྐུ་རིན་པོ་ཆེ་ངོས་ཕེབས་ཀྱི་ཆིབས་བསུ། གྲྭ་ཚང་གིས་སེར་སྦྲེངས་དང་བཅས་ཨོ་རྒྱན་ཆོས་གཏེར་གླིང་དུ་ཕེབས། དེར་སྔགས་འཆང་ལྕགས་གཏུན་པར་གིང་གི་བཀའ་གཏད་གསན་ཞིང་། དཔོན་སློབ་ཚོར་དབང་ལུང་ཐན་ཐུན་དང་ཡུལ་པ་རྣམས་ལ་ཚེ་དབང་མཛད། ཚུར་ཡང་སྤྲུལ་སྐུ་རིན་པོ་ཆེར་ཕུར་པ་དཔྱལ་ལུགས་ཀྱི་སྐོར་གསན། ཁོང་དཔོན་སློབ་ཀྱིས་བསྙེན་བཀུར་དང་འབུལ་བ་གྱ་ནོམ་པས་ཞབས་ནས་བཏེག་སྟེ། ཕྱིར་ཕེབས་ཀྱི་ལམ་དུ་ནང་པ་སྐྱིལ་པ་བས་སྤྱན་དྲངས་ཤིང་། དེ་ནུབ་བ་ཐོར་སྔགས་འཆང་ཆུ་སྤེ་སྟེང་པས་སྤྱན་དྲངས་ནས་ཁོང་པ་གྲྭ་བཅས་ལ་ཚེ་དབང་སོགས་ཀྱིས་རེ་བ་གང་བར་མཛད། ནངས་པར་ཤ་རའི་ཚུགས་དོན་པའི་གྲུ་ཁར་ཡུལ་པའི་སྐྱ་སེར་མང་པོ་མཇལ་དུ་བྱུང་ཞིང་ཡ་རབས་མདར་ནཱ་ལེན་དཱའི་གཟིམས་ཁང་འོག་གི་སློབ་དཔོན་ཟུར་པ་དང་། གྲྭ་ཚང་སོ་སོའི་སྒེར་རྒན་སོགས་ཀྱིས་ཆིབས་བསུ་དང་ཐབ་བསུ། མཁན་པོས་དབུས་པའི་དགེ་འདུན་རྣམས་ཀྱིས་སེར་སྦྲེངས་དང་བཅས་མཁས་པའི་འབྱུང་གནས་འབྲས་ཡུལ་སྐྱེད་མོས་ཚལ་གྱི་ཆོས་གྲྭར་ཕེབས། མཁན་ཆེན་བཀྲ་ཤིས་རྒྱལ་མཚན་པས་བླ་བྲང་གཞུང་གི་ཞབས་ཏོག་རྒྱས་པ་དང་། གྲྭ་ཚང་གསུམ་པོའི་སྤྱི་ཁང་དུའང་སོ་སོས་སྤྱན་དྲངས་ཤིང་བསྙེན་བཀུར་རྒྱ་ཆེར་བསྟབས། ཕྱིའི་ཆོས་ཁྲིའི་ཐོག་ནས་མཁན་སློབ་དགེ་འདུན་ཡུལ་པར་བཅས་པ་ལ་ཚེ་དབང་དང་། འདུ་ཁང་གི་ཁྲི་ཐོག་ནས་མཁན་པོས་དབུས་ཚོགས་པར་བླ་མའི་རྣལ་འབྱོར་ལུང་སྦྱོར་རྒྱས་པའི་ཁུངས་དང་སྦྱར་བ་བསྟན་པ་ལ་ཐོས་བསམ་གྱི་བགྱི་བ་རྒྱ་ཆེར་དགོས་པའི་ཚོགས་གཏམ་མཛད། དེར་དགེ་འདུན་རྣམས་ལ་མང་ཇ་ལྔ་སྦྲེལ། དར་འགྱེད། ཚན་གྲངས་བླ་བྲང་དུའང་གནང་ཆ་དང་དེར་བྱུང་གི་འབྲུ་ལ་སོགས་པའི་རྙེད་པ་རྣམས་འཇོག་པར་མཛད་ཅིང་པོད་ཆེན་རྒྱུགས་འབུལ་མི་རྣམས་ལའང་གནང་ཆ་རྒྱས་པར་གནང་། ཚུར་ཡང་སྤྱི་སྒེར་གྱི་འབུལ་ནོད་གྱ་ནོམ་པ་དང་། རིགས་གྲྭའི་ཁྲིར་ཡང་སྤྱན་འདྲེན་ཞུས། སླར་ཡང་གནམ་གང་ལ་གཞིས་བཞུགས་ཐམས་ཅད་ཀྱིས་ཆབ་ཁ་ནས་ཞབས་བསུས་ཏེ་དཀར་པོ་ལྕོག་ཏུ་ཕེབས། ཞག་བཅུ་སྐོར་བར་སྔར་གྱི་ཆོས་འཕྲོ་རྣམས་སྩལ། ཁོང་དཔོན་སློབ་ཀྱིས་ཚེ་དཔག་མེད་ཀྱི་དཀྱིལ་འཁོར་ལ་བརྟེན་པའི་ཞབས་བརྟན་དང་རྗེས་འབྲེལ། རྟེན་ལི་མ། རྒྱ་ནག་མ། དཀར་སྤྱད་སོགས་རྒྱའི་མཆོད་ཆ། ཧོར་རྔ་ཆེ་ཆུང་། གོས་དར། རྟ་ནོར་སོགས་སྤམ་མཐོ་བ་ཕུལ། ཟླ་བ་བཅུ་གཉིས་པའི་ཚེས་བཅུའི་ཉིན་ཕེབས་རྫོངས་ཀྱི་སྟོན་མོ་འབུལ་བ་དང་བཅས་པ་རྒྱ་ཆེར་བསྟབས། ཕར་ཡང་གོས་ཕྱི་ནང་ཡུག་ཁ་ཤས་རྩེ་ཇ་སློབ་རྩེ་དུ་མ། རྒྱ་སྦུག བླ་རེས། སྣམ་རས་རྟ་སོགས་རྒྱས་པར་ཕུལ་ནས་ནངས་པར་ཆིབས་བཏེག་པའི་ཚུགས་ཁར་སྐྱེད་ཚལ་གྱི་གྲྭ་པ་དུ་མ་དད་པས་མཇལ་དུ་བྱུང་། རྟ་བྲེས་བར་ཏྲེ་བོ་སྤྲུལ་སྐུ་རིན་པོ་ཆེ་དང་སྐྱེད་ཚལ་མཁན་པོ་སོགས་ཀྱིས་གསོལ་ཚིགས་སྟོན་མོ་དང་བཅས་དཔོན་སློབ་ཐམས་ཅད་འབྲལ་མི་ཕོད་པའི་གདུང་ཤུགས་ཀྱིས་སྤྱན་ཆབ་སྦྲེང་བཞིན་པས་ཞབས་སྐྱེལ་མཛད། ལམ་ཞོར་ཁམ་བུ་ལུང་གི་གནས་མཇལ་གནང་སྟེ་དེ་ནུབ་བྲེ་མདའ་བཟང་ལུང་དགོན་དུ་བཞུགས། སང་ཉིན་སྒྲུབ་སྡེ་བ་རྣམས་ཀྱིས་སེར་སྦྲེངས་དང་བཅས་བོན་ལུང་པདྨ་ཆོས་གླིང་དུ་སྤྱན་དྲངས། གྲྭ་བཙུན་ཡུལ་པ་རྣམས་ལ་ཁྲོམ་དབང་དང་། དེ་ནུབ་གྲྭ་པ་ཁེར་རྐྱང་ལ་རིག་འཛིན་རྩ་དབང་དང་ལས་བྱང་གི་ལུང་སྩལ། ཁོང་དཔོན་སློབ་རྣམས་ཀྱིས་མཁའ་འགྲོ་བསུན་བཟློག་དང་འབྲེལ་བའི་བརྟན་བཞུགས་ཕུལ་ཞིང་། དེར་ཚོགས་པར་ཆོས་འབྲེལ་བསླབ་བྱ་དང་། གདན་ས་བར་གུར་དྲག་དང་ཕྱག་རྡོར་གྱི་དབང་སྩལ། དེ་དུས་བྱ་རྒོད་པ་བྱ་བཏང་རྣལ་འབྱོར་གྱི་དབང་ཕྱུག་ཆོས་སྐྱོང་རྒྱལ་མཚན་པའང་མཇལ་དུ་བྱུང་བར་བོན་ལུང་གི་དཔོན་སློབ་རྣམས་དང་ལྷན་ཅིག་ཏུ་གོང་གི་དབང་ལུང་རྣམས་གནང་། ཚེས་བཅུ་བདུན་ལ་ཆིབས་བཏེག་སྟེ་རིམ་གྱི་སྙེ་མོར་བང་སྟག་ནང་པས་སྤྱན་དྲངས། རྐྱེན་སེལ་གྱི་ཚེ་རྟ་གུར་དྲག་ལོཀྟྲི་སོགས་ཀྱི་དབང་བྱིན་རླབས་དང་བྲིས་ཐང་མང་པོར་རབ་ཏུ་གནས་པའི་མེ་ཏོག་འཐོར། ཕེབས་ལམ་དུ་ནང་པ་མདོ་མཁར་བ་དང་ལྷ་རིས་པ་སོ་སོའི་གཞིས་ཀ་དང་། རིན་པོ་ཆེ་དཀོན་མཆོག་དཔལ་བས་དགེ་འདུན་སྒང་རྣམས་སུ་སྤྱན་དྲངས། བྱེ་མཁར་ཆོས་སྡེར་བསམ་སྡིངས་རྗེ་བཙུན་མས་སྤྱན་དྲངས་པ་ལྟར། འདུས་ཆེན་གྲྭ་ཚང་གིས་སེར་སྦྲེངས་སོགས་བཀུར་སྟི་ཆེན་པོས་མདུན་བསྟར་ཏེ་ཕེབས། འདུས་ཚོགས་སུ་ཚེ་དབང་དང་། རྗེ་བཙུན་མར་ཚེ་རྟ་ཕྱག་རྡོར་སོགས་ཀྱི་དབང་མཛད། དེ་ནས་ཆིབས་བཏེག་པའི་ལམ་ཞོར་དུ་བཻ་རོ་ཕུག་གི་གནས་གཟིགས་མཛད་ཅིང་། དེར་བང་སྟག་པའི་རྒྱལ་བུ་མཆེད་དཔོན་ཚང་གླིང་པ། རུ་པའི་མཁན་པོ་སོགས་མཇལ་ཁ་ཞུ་མི་མང་པོ་བྱུང་། རིམ་པར་རྒྱལ་བྱེད་ཚལ་ནས་ཐོན་སྲས་བཀྲ་ཤིས་རབ་བརྟན་པའི་ཇ་ཞུ་འབུལ་བ་དང་། ཞབས་དྲུང་དམག་དཔོན་པས་ཆིབས་བསུ་སོགས་ཀྱིས་མདུན་བསུས་ཏེ་ཐོན་མདའ་གཞིས་ཀར་སྤྱན་དྲངས། གཏེར་རྫས་ཀྱི་མཇལ་ཁ་གནང་། དེ་ནས་དོ་ནང་པདྨ་གླིང་པས་སྦུས་སྡེ་ཆུ་བཟང་དུ་གདན་དྲངས་ཏེ་ཞག་གཉིས་བཞུགས་ནས་ཚེ་དབང་དང་། དྲག་དམར་གྱི་བྱིན་རླབས། ཡུལ་པ་སྟོང་ཚོ་བརྒལ་ཙམ་ལ་ཁྲོམ་དབང་མཛད་ནས་ཡོལ་རིན་ཆེན་གླིང་དུ་ཞག་ས་དང་རྟེན་མཇལ། དགེ་འདུན་རྣམས་ལ་ཇ་བསྐོལ་དང་ཟང་ཟིང་གི་གནང་ཆ་མཛད་དེ་ལྕགས་ཟམ་གྲུ་བརྒྱུད་ལྷུན་གྲུབ་རབ་བརྟན་དུ་ཕེབས་ཏེ་ཞལ་ངོ་རྣམས་ལ་རྐྱེན་སེལ་གྱི་དབང་བྱིན་རླབས་མཛད་ནས་ཆོས་སྡེར་ཐེགས། བླ་བྲང་དུ་ཞག་བཞིའི་བར་སྟན་འཇགས་ནས་མདོས་ཆེན་དང་ཕུར་སྒྲུབ་ཀྱི་གཟིགས་མོ་གནས་གཟིགས་དང་བཅས་པ་མཛད་ཅིང་། འདུས་པར་མང་ཇ་གསུམ་འབྲེལ་དང་སྤྱི་འགྱེད་ཀྱང་རྒྱས་པར་སྩལ། ཉེར་བརྒྱད་ཀྱི་ཉིན་དཀོན་གཉེར་བ་དཔོན་སློབ་ཀྱི་ཆིབས་བསུ་དང་བཅས་རྫོང་དུ་སྤྱན་དྲངས་ཏེ་དུས་རིམ་གྱི་ཕྱག་ལེན་ལ་གཟིགས། རྫོང་དཔོན་ཟུང་གིས་ལེགས་རབ་ཏུ་སྤྱན་འདྲེན་ཞུས་ཏེ་སྟོན་མོ་རྒྱ་ཆེར་བསྟབས། དེ་ནུབ་ཆོས་སྡེར་མདོ་ནས་ཆོས་རྗེ་དགེ་བའི་དབང་པོ་ལ་ས་ཕུར་ལྷ་ཁྲའི་དབང་ལུང་གསན།