དགུང་ལོ་བཞི་བཅུ་པ།
དགུང་ལོ་བཞི་བཅུ་པ་ཤིང་གླང་ལོ་གསར་གྱི་དགྱེས་སྟོན་དང་གྲྭ་པའི་ཇ་ཞུ་སོགས་རྩེར་འགོལ་བཞུགས་ཀྱིས་བཞེས་ཤིང་། ཚེས་གསུམ་གྱི་ཉིན་ཆོས་རྗེ་བློ་བརྟན་པ་ལ་ཁོལ་མོ་རེ་མ་ཏིའི་སྐོར་གྱི་ལུང་ཕྲན་འགའ་ཞིག་གསན་ཏེ། དེ་ནུབ་ནས་བཟུང་ཟླ་གཅིག་བར་གཟིམས་ཆུང་བསམ་གཏན་སྦུག་ཏུ་སྐུ་མཚམས་དམ་པར་བཅད་དེ་ལྷ་སྔགས་འོད་གསལ་གྱི་འཁོར་ལོ་ལས་མི་འདའ་བར་བཞུགས། དེ་ནས་ཕྱི་རྟེན་ནཻ་པ་ལའི་བཟོ་རིག་པ་གསུམ་གྱིས་སློབ་དཔོན་སངས་རྒྱས་གཉིས་པའི་སྐུ་བརྙན་རྒྱབ་ཡོལ་ལ་རིགས་བདག་མཚན་བརྒྱད་དང་བཅས་པས་མཛེས་པ་ཐོག་ཚད་དུ་ལོངས་པ་འདི་ཉིད་བཞེངས་པའི་བཟོ་གྲྭ་ཚུགས། ཧོར་ཟླ་གཉིས་པའི་ནང་དུ་གཞུང་སའི་སྐུ་རིམ་ལ་བསམ་ཡས་སུ་ཐེགས། བཻ་ཙ་གླིང་དུ་འཆི་མེད་ཡང་སྙིང་ཀུན་འདུས་ཀྱི་སྒོ་ནས་སྐུ་ཚེའི་སྒྲུབ་པ་དང་། གཤིན་རྗེ་དྲེགས་འཇོམས་ཀྱི་མནན་པ་ཞིག་མཛད། སྟག་རྩེ་ཞབས་དྲུང་ནས་ཀྱང་བསྙེན་བཀུར་རྒྱ་ཆེར་བསྟབས་ཤིང་། གཞན་ཡང་སྐྱ་སེར་གྱི་མཇལ་མི་མང་དུ་བྱུང་། ཟླ་བ་གསུམ་པའི་འགོར་གདན་སར་ཕྱག་ཕེབས་ནས་ཚེས་བཅུའི་ཉིན་རྟེན་བཞེངས་ཀྱི་གསེར་བཞུ་བར་མཛད་དུས་ཐོག་མར་ཞམ་རིང་པ་བློ་བརྟན་པ་དག་གིས་ཡིད་གཞུངས་པར་བཏེག་པ་ལས་ཕྱིས་བཞུ་ཚར་ནས་འདེགས་དུས་ཞོ་བཞི་འཕར་པའི་ཡ་མཚན་ཆེ་བ་བྱུང་། དེའི་ཚེ་གོང་དཀར་ཁུལ་སྡེབས་སྒྲིལ་གྱིས་ཞབས་བརྟན་ཕུལ་བའི་རྗེས་འབྲེལ་འབུལ་བ་དང་བཅས་བརྟན་བཞུགས་འབུལ་བར་མགྲོན་གཉེར་མངགས། ཟླ་བ་བཞི་པའི་ཚེས་བདུན་ལ་གུ་རུའི་སྐུ་བརྙན་ནང་གཟུངས་ཀྱི་གནོད་སྦྱིན་འཁོར་ལོ་སོགས་ཕྱག་བྲིས་ཕྱག་བསྟར་མ་ཁོ་ན་དང་། ཨེ་པ་དཔོན་མོ་ཆེ་བ་བསམ་གྲུབ་སོགས་ཡིག་མཁན་མཁས་བསྡུས་བཞི་འབོད་པར་མཛད་ནས་རིན་པོ་ཆེ་གསེར་དངུལ་ལས་རྙིང་མ་རྒྱུད་འབུམ་བཞེངས་པའི་ལས་འགོ་ཚུགས། སྐྱི་སྟོན་སྔགས་འཆང་འཁོར་འདས་རང་གྲོལ་གྲྭ་བཅས་དང་། མདོ་ཁམས་དབོན་པོ་སོགས་ལ་གཏེར་གསར་ཐུགས་ཐིག་དང་རྡོར་སེམས་ཀྱི་ལུང་སྩལ། བཅུ་གསུམ་ནས་ཟུར་ཡང་དབེན་པ། གྲྭ་ཚང་གི་དབུ་ཆེ། སྐྱི་སྟོན་སྔགས་འཆང་སོགས་བཅུ་སྐོར་ལ། སྒྱུ་འཕྲུལ་ཞི་བ་དང་། ཁྲོ་བོའི་དབང་བཀའ་རོག་གི་ཚེ་དབང་ལུང་ལུགས། མགོན་པོ་ལེགས་ལྡན་གྱི་དབང་བཞི། གཏོར་དབང་དང་བཅས་པ་སེམས་སྡེ་ཨ་དོན་བཅོ་བརྒྱད། བདེ་འདུས་རྣལ་འབྱོར་རྒྱུན་དབང་། གཏེར་གསར་ཚེ་དབང་རྣམས་དང་། སྙིང་པོའི་རྒྱ་འགྲེལ་སྤར་ཁབ། སྒྱུ་འཕྲུལ་ལམ་རྣམ་བཀོད་དམ་ཚིག་གསལ་བཀྲ། ཞི་བ་རྡོ་རྗེ་ལས་རིམ། མེ་ལོང་ལྟ་བུའི་སྒྲུབ་ཐབས། དྲ་བ་ཆེ་ཆུང་། ཁྲོ་བོ་དམ་པ་རྒྱན། ཚོགས་ཀྱི་འཁོར་ལོ་ཐུགས་ཀྱི་སྒྲུབ་པ། ཞི་བ་ལྷ་རྒྱུད། བོད་འགྲེལ་གཡུང་ཊཱིཀ་རྣམས་ཀྱི་ལུང་སྩལ། དེ་ནས་སྟག་རྩེ་ཞབས་དྲུང་གིས་གོས་སྐུའི་རབ་གནས་ལ་སྤྱན་འདྲེན་བྱུང་བ་ལྟར་ཟླ་བ་ལྔ་པའི་ཚེས་བཅུ་གཉིས་ལ་བསམ་ཡས་སུ་ཆིབས་བཏེག གྲུ་ཁར་ཆིབས་བསུ་དང་བཅས་ཏེ་རིམ་པར་ཕོ་བྲང་དུ་ཕེབས། ཐལ་ཇི་དང་མཇལ་ཞིང་ཕེབས་སྤྲོ་རྒྱ་ཆེར་སྤྲོས། བཅོ་ལྔའི་ཉིན་དཀོར་མཛོད་གླིང་དུ་མདོ་སྡེའི་འཆམས་ཀྱི་གཟིགས་མོ་དང་། ཆོས་སྐྱོང་དཔོན་བློན་ལ་འཕྲིན་གསོལ་གྱི་ཅོད་པན་སོགས་སྩལ། བཅུ་དྲུག་གི་སྔ་དྲོ་ཕོ་བྲང་དུ་ཞབས་དྲུང་ལ་ཚེ་དབང་དང་། ཕྱི་དྲོ་དཀར་ཆལ་ཐང་དུ་རྒྱ་གུར་ཁྲི་སྟན་གྱི་བཀོད་པ་མཛེས་པར་བཤམས་ཤིང་། བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་ལ་བརྟེན་ནས། རྒྱལ་བ་མ་ཕམ་པའི་གོས་སྐུ་ལ་ལྷག་པར་གནས་པའི་སྟ་གོན་དང་། དེའི་སང་ཉིན་དངོས་གཞིའི་ཆོ་ག་སྨིན་རྒྱས་སུ་སྩལ་བའི་ཡོན་བདག་བསྐོ་བཞག་ལ་ཐལ་ཇི་ཉིད་ངོས་ཕེབས་དང་། རབ་སྟོན་ཡོན་སོགས་རྒྱ་ཆེར་བསྟབས། དེ་དུས་ཕྱོགས་ཀུན་ཏུ་ཐན་པས་ཉེན་པ་ལ་སྟ་གོན་གྱི་ནུབ་མོ་ཆར་ཤིན་ཏུ་ཆེ་བ་དང་། དངོས་གཞིའི་ཉིན་ནམ་མཁའ་ཤིན་ཏུ་དྭངས་པ་བྱུང་བས་ཀུན་ཡིད་རངས་པར་གྱུར། དེ་རྗེས་ཕོ་བྲང་གི་ཚོམས་ཆེན་དུ་འཆི་མེད་ཡང་སྙིང་ཀུན་འདུས་ཀྱི་སྒྲུབ་པ་ཞག་ལྔ་མཛད་དེ། གུ་རུའི་ཞབས་རྗེས་ཀྱི་དྲུང་དུ་ཞབས་དྲུང་ལ་འཆི་བསླུ་དང་ཚེ་དབང་བརྒྱ་རྩ་མཛད། ཉེར་བཞིའི་སྔ་དྲོ་ཕེབས་རྫོངས་ཀྱི་སྟོན་མོ་དང་འབུལ་བ་རྒྱ་ཆེར་སྤྲོས་ཤིང་། ཆིབས་སྐྱེལ་དང་བཅས་ཏེ་བཏེག་ནས་གདན་སར་ཕེབས། ཟུར་ཡང་དབེན་པའི་མ་ཆེན་འབུལ་བ་རྒྱས་པ་དང་བཅས་མཇལ་དུ་བྱུང་བར་སྐྱེས་ལན་རྒྱ་ཆེར་སྩལ་ཏེ་ཡབ་སྲས་ལྷན་དུ་ཕྱིར་ཐེགས། ཟླ་བ་དྲུག་པའི་འགོར་ཕྱག་མཛོད་ལྷ་ཁང་པ་སོགས་མཇལ་མི་ཁ་ཡར་བྱུང་བའི་སོ་སོའི་རེ་འདོད་སྐོང་བར་མཛད་ཅིང་། ཉིན་ཞིག་ཤོལ་བོ་ལུང་དང་བླ་བྲང་ཨར་ལས་ཀྱི་སར་ཞབས་འཆག་ཏུ་ཐེགས་པ་དང་གྲོང་རྙིང་འགྱུར་མེད་འདས་པ་འགྲིག་ནས་དེར་སྤྱན་དྲངས་པར་འཕོ་བའི་མཚམས་སྦྱོར་གྱིས་རྗེས་སུ་བཟུང་། ཟླ་བ་དེའི་གནམ་གང་ནས་བཟུང་བསམ་ཡས་བྱང་ཆུབ་ཆེན་པོའི་སྐུ་མདུན་དུ། ཇི་སྲིད་བར་མར་མེ་རྒྱུན་སྦར་གྱི་ཐེབས་ཀོང་བུ་དང་བཅས་པ་འཛུགས་མི་རྫོང་སྟ་མཛད་ཅིང་དེ་དང་བསྟུན་བརྒྱ་མཆོད། སྙན་ཤལ་ལ་སྨོན་ལམ་བཀའ་རྩོམ་དང་བཅས་པ་གནང་ཞིང་། འདི་ཁར་དགེ་འདུན་རྣམས་ཀྱིས་མཆོད་འབུལ་དང་སྨོན་ལམ་ཉིན་ཁ་ཡར་ཞལ་འདོན་དུ་མཛད། ཟླ་བ་བདུན་པའི་འགོར་སྐུ་ཞང་གི་གཞིས་འདུམ་པོར་ཐེགས་ཏེ་ཞི་བའི་སྦྱིན་སྲེག་དང་། དཔོན་གཡོག་ཚང་མར་ཚེ་དབང་མཛད། ཞབས་ཏོག་འཁོས་སུ་ཕེབས་པ་བསྟབས། དེར་བྱ་བཏང་འཁྲུལ་ཞིག་ཀློང་ཡངས་འོད་གསལ་ཆེད་དུ་སྤྱན་འདྲེན་མཛད་ནས་ཨ་རོ་སྙན་བརྒྱུད་ཀྱི་དབང་ལུང་མན་ངག་དང་བཅས་པ་དང་། རོག་པའི་ཕུར་ཊཱིཀ་ཉི་མའི་འོད་ཟེར་སོགས་ཀྱི་ལུང་གསན། དེ་ནས་ཕྱིར་ཕེབས་ཏེ་ཕྱོགས་འདུས་ཀྱི་སྐལ་ལྡན་མང་པོར་བཞེད་སྦྱར་གྱི་བཀའ་ལུང་ཐུན་རེ་རེ་ཙམ་ཆག་མེད་དུ་མཛད། འདི་དག་གི་ཚེ་ངོ་མཚར་བའི་གཟིགས་སྣང་དུ་མ་ཞིག་བྱུང་བ་རྣམས་ཟིན་རིས་སུ་མཛད་པའི་ཤོག་དྲིལ་འགའ་ཡོད་གསུང་ཡང་འདིར་བྲི་བར་བཀའ་མ་འཁྲོལ་ལོ། །དེ་དུས་གསེར་དངུལ་སོགས་རིན་པོ་ཆེའི་རྒྱུ་ཕུན་སུམ་ཚོགས་པ་ལ་སློབ་དཔོན་སངས་རྒྱས་གཉིས་པའི་སྐུ་ཆུང་ངུ་ཞིག་བལ་པོས་སྤྲ་ལུགས་ཀྱིས་བཞེངས་བར་མཛད་དུས། ལུགས་ཁར་ཕྱག་ནས་མཛད་པ་ཕྱིས་ནས་འབྲུ་སྐྱོན་ཕྲ་མོས་ཀྱང་མ་གོས་པར་ཞབས་མཐིལ་ནས་བྱུང་བས་ཀུན་ངོ་མཚར་བར་གྱུར། སྨོན་གྲུབ་ཀྱི་ཡུམ་ཐ་མའི་སྙུན་གྱིས་ཟིན་པའི་སྔས་མགོར་སྤྱན་དྲངས་པར་འཕོ་བའི་མཚམས་སྦྱོར་དང་། ཕྱིས་འདད་ཀྱི་གྲལ་དབུར་ཡང་ཐེགས། འབྲས་ལྗོངས་ཀཿཐོག་སྤྲུལ་སྐུ་མཆེད་སོགས་སྔ་ཕྱིར་འབྱོར་བའི་ཕྱོགས་འདུས་པ་མང་པོར་གཏེར་གསར་གཙོ་བོར་གྱུར་པའི་དབང་ལུང་མང་དུ་སྩལ། མོན་ཤར་ནས་བླ་མ་རྣམ་རྒྱལ་དང་བཀྲ་ཤིས་མཆེད་སོགས་མོན་པའི་འགྲུལ་པ་མང་དུ་འབྱོར། ལྷོ་ཟོག་གི་འབུལ་བ་སྤྱི་སྒེར་སོ་སོ་ནས་རྒྱ་ཆེར་བསྟབས་པར་བསྔོ་བ་དང་གཏེར་གསར་གྱི་ཚེ་དབང་། རྡོར་སེམས་ཀྱི་དབང་། ནང་རྟེན་རགས་རིམ་ཙམ་གྱི་མཇལ་ཁ་རྣམས་མཛད། ཟླ་བ་དགུ་པའི་ཚེས་བདུན་གྱི་གཟའ་སྐར་འཕྲོད་སྦྱོར་བཟང་པོ་ལ་བླ་བྲང་ཆོས་འཁོར་ལྷུན་པོའི་རྩེར།:ག་ཊི་ར་༼གཉྫི་ར༽འཛུགས་པ་དང་བསྟུན་བསང་མཆོད་རྒྱས་པ་དང་། དེ་ཉིན་ཐོག་མར་སྟན་འཇགས་པའི་སྐར་འཛིན་གྱི་ཞལ་སྲོ་མཛད་པར་གྲྭ་ཚང་གི་གྲྭ་པ་བགྲེས་པ་དང་། ཞབས་ཕྱི་དྲུང་འཁོར། སྐུ་ཞང་འདུམ་པོ་བ་སོགས་ཀྱིས་ལེགས་སྐྱེས་རྒྱ་ཆེར་བསྟབས། དེ་ནས་ཚེས་དགུ་ལ་དགེ་སློང་ཀུན་དགས་འབུལ་བ་གྱ་ནོམ་པ་དང་། འདུས་ཚོགས་སུ་མང་ཇ་ཚོགས་འཁོར། རྗེའི་འཁྲུངས་རབས་ཀྱི་ཐང་མོ་ཆེ་སྤྱི་རྫས་སུ་སྦྱོར་འཇགས་དང་བཅས་ཏེ། བླ་བྲང་གི་གཟིམས་ཆུང་ཀུན་བཟང་ཕོ་བྲང་དུ་ཚེ་དཔག་མེད་ཡང་སྙིང་ཀུན་འདུས་ཀྱི་སྒོ་ནས་ཞབས་བརྟན་ཕུལ། དེ་ཉིན་བལ་པོ་བཟོ་བོ་རྣམས་ཡོན་གྱིས་ཚིམས་པར་མཛད་དེ་ཕྱིར་ལོག དེ་ནས་གོང་མའི་ལུང་བཞིན་བསམ་ཡས་སུ་སྐུ་རིམ་ལ་ཐེགས། དེར་ཀི་ཀང་གི་སྒྲུབ་པ་བདུན་ཕྲག་གཅིག་མཛད་དེ་བཅུ་དགུ་ལ་མཆོད་རྟེན་ནག་པོའི་འོག་ཏུ་མནན་པ་དང་། ཉེར་དགུ་ལ་གཤིན་རྗེ་དྲེགས་འཇོམས་ཀྱི་ཟོར་འཕེན། གནམ་གང་ལ་ཧས་པོ་རིའི་རྩེར་བསྟན་མའི་རྟེན་འཛུགས། རྒྱགས་བརྔན། བཀའ་ནན་རབ་བརྗིད་རྣམས་མཛད། ཟླ་བ་བཅུ་པའི་ཚེས་གཅིག་ལ་གཙུག་ལག་ཁང་རྣམས་ལ་རབ་ཏུ་གནས་པའི་མེ་ཏོག་འཐོར། དེ་ཉིན་གོང་མའི་མཆོད་དཔོན་ཆེན་མོ་ཡང་མཇལ་དུ་བྱུང་། ཚེས་གཉིས་ལ་ལྕོག་ཏུ་ཆོས་སྐྱོང་ཙིཏྟ་དམར་པོ་ཁོག་ཏུ་ཞུགས་པ་དང་མཇལ་ཞིང་དགྱེས་པའི་རྣམ་འགྱུར་ཅི་ཡང་ཞིག་མཛད། སླར་ཡང་བསམ་ཡས་སུ་སྐུ་རིམ་མཐུད་དེ་མཛད་དགོས་པའི་གོང་ནས་བཀའ་ལུང་ཕེབས་ནའང་དགོས་ཆ་མ་སླེབ་པས། དེ་བར་དཔོན་སློབ་ཉུང་བསྡུས་ཀྱིས་གདན་སར་སྐོར་ཙམ་ཕེབས་ནས་བླ་བྲང་གི་རྩེའི་གཡུ་རྩིའི་བྱ་འདབ་:འབུགས་༼འབུབས་༽པར་མཛད། དེ་དུས་མི་དབང་ཆེན་པོའི་ཡུམ་ལ་ལྟ་བའི་མཚན་ལམ་ཤིན་ཏུ་འཚུབ་པ་བྱུང་བ་ལྟར། སྐུ་རིམ་འཕྲལ་དུ་གནང་དགོས་པའི་ཞབས་སྐུལ་མཛད། དེ་ཁོ་ན་བཞིན་ཕ་གིར་སྐུ་ཤིན་ཏུ་ཉེན་པའི་སྙུན་གྱིས་བཏབ་འདུག་ནའང་སྐུ་རིམ་འདི་རྣམས་འཕྲལ་དུ་གནང་ན་མི་སྐྱོན་པའི་ལུང་བསྟན་གནང་བ་བཞིན་ཐོག་ཏུ་ཁེལ་བས་ཐུགས་མོས་གོང་འཕེལ་དུ་གྱུར། སླར་ཡང་ཚེས་བཅུ་གསུམ་ལ་བསམ་ཡས་སུ་ཐེགས། རྡོ་རྗེ་གྲོ་ལོད་ཀྱི་སྒོ་ནས་དགྲ་མནན་བདུན་ཕྲག་གཅིག་གི་བར་མཛད། ཚེས་བཅུ་བདུན་ལ་ལྷ་ཁང་གི་བཀོད་པ་ཡ་མཚན་པ་སྣ་ཚོགས་དང་། ནམ་མཁའ་ལ་སྤྲིན་དང་འཇའི་གུར་ཁྱིམ་བཀྲ་བའི་དཀྱིལ་ན་གནས་བརྟན་ཆེན་པོ་བཅུ་དྲུག་དང་། གཞན་ཡང་སངས་རྒྱས་བྱང་སེམས་རིགས་མ་ངེས་པ་སྣ་ཚོགས་བཞུགས་པ་ཞིག་གསལ་བའི་ཉམས་ཤར་གསུང་། ཉེར་གཉིས་ཀྱི་ཉིན་ཕྱག་མཛོད་ལྷ་ཁང་པས་བསམ་གྲུབ་གླིང་དུ་སྤྱན་དྲངས་ཏེ་བསྙེན་བཀུར་རྒྱས་པར་སྤྲོས་ཤིང་ཚེ་དབང་སྩལ། དེའི་སང་ཉིན་ནས་བཟུང་འཆར་ཁའི་མདོས་དང་འབྲེལ་བའི་སྲུང་བཟློག་གི་སྒྲུབ་པ་ཚུགས་པ་ཉེར་དགུ་ལ་ཟོར་འཕེན་མཛད། འདི་སྐབས་ཧོར་ལོ་ཆེན་བློ་གྲོས་མཆོག་ལྡན་གྱིས་སྙན་ཚིག་གི་ཞུ་ཡིག་ཆིབས་ཆིབས་རོལ་དང་བཅས་པའི་འབུལ་སྐྱེས། ཧོར་ཁོར་ཚ་རུ་རྙིང་ནས་ཅལ་ཏེ་སྐུ་སྐྱེ་དང་། དཔོན་རིན་ཆེན་སྒྲོན་མ་སོགས་ཧོར་འགྲུལ་མང་པོས་རྟ་ནོར་མཛོ་ཕོ་མོ་མར་སོགས་འབུལ་བ་སྤམ་མཐོ་བ་དང་། མདོ་ཁམས་ནས་གོ་འཇོ་བླ་མ་ཤེས་རབ་འོད་ཟེར་གྲྭ་སློབ་བཅས་པས་རྟ་ནོར་གྱི་འབུལ་བ་བཟང་པོ་དང་བཅས་འབྱོར་ཞིང་། ཁོང་པ་གྲྭ་སློབ་བཅུ་གསུམ་གྱིས་གྲྭ་ཚང་དུ་ཞུགས། དེ་ནས་ཚེས་གཅིག་ལ་གདན་སར་ཕེབས། སྔར་ཞབས་དྲུང་ཁྲི་ལྕམ་དེ་ཉིད་ལ་གདུལ་བྱར་གྱུར་པ་ཐམས་ཅད་ཀྱིས་གདུང་སྲས་ཤིག་ཡོང་བའི་རེ་བ་བཅས་ནའང་རྟེན་འབྲེལ་གྱི་སྒོ་འཆུགས་པ་ལྟ་བུས་མ་བྱུང་བར་བརྟེན། ཞབས་རིང་པ་དག་གིས་རྒྱལ་མཆོག་དམ་པའི་སྐུ་ཞབས་སུ་གསུང་བརྟག་ཞུས་པར་ཡུམ་གཞན་ཞིག་ལ་ཡོང་བའི་ངོ་ཙམ་བབས་ཚུལ་ཕེབས་པ་དང་། འཁྲུལ་ཞིག་གྲུབ་ཆེན་རིན་པོ་ཆེས་ཀྱང་འདུམ་པོའི་ལྕམ་འདི་ས་ལེའི་སྤྲུལ་པ་དེའི་སྐྱེ་བ་ཡིན་པ་དང་། འདི་ལ་ལུང་དང་མཐུན་པའི་སྲས་དེ་འབྱུང་ངེས་པའི་མཚན་མ་བཟང་པོའང་མཐོང་བས། བསྟན་འགྲོར་དགོངས་ནས་བཞེས་དགོས་པའི་ཞུ་བ་དང་། ཞབས་ཕྱི་དག་ལའང་རྟེན་འབྲེལ་སྒྲིག་དགོས་པའི་ཞལ་ཏ་མཛད་ཅིང་། གཙོ་བོར་མཐུན་པའི་རྐྱེན་ཐམས་ཅད་ཚོགས་ཏེ་རེ་ཞིག་བར་གཅོད་ཀྱིས་མི་རྫི་བའི་སླད་དུ་གསང་སྤྱོད་ཀྱི་སྒོ་ནས་ལས་རྒྱར་བསྟེན་པ་ན། རྟེན་འབྲེལ་གྱི་དུས་གནད་འཛོམ་པ་ལས་ཟླ་བ་བཅུ་གཅིག་པ་སྔ་མའི་ཡར་ངོའི་ཚེས་དགུའི་མཚན་ཕྱེད་ཡོལ། ཡོན་ཏན་གྱི་དབྱངས་ཨོ། རེས་གཟའ་བཀྲ་ཤིས། རྒྱུ་སྐར་ཁྲུམས་སྟོད། འབྱུང་འཕྲོད་འཕེལ་འགྱུར། འཕྲོད་མདའ། སྦྱོར་བ་རྡོ་རྗེ། བྱེད་བ་ཏཻ་ཏི་ལཾ། རྟེན་འབྲེལ་ལེན་པ། ཕག་གི་ཉི་མས་སླེབས་པ། ཚེས་ཞག་བཅུ་པ་ལ་བབས་པ་བུ་མོའི་དུས་སྦྱོར་ཐོག གདུང་བརྒྱུད་རིན་པོ་ཆེ་འདི་ཉིད་བཀྲ་ཤིས་རབ་བརྟན་གྱི་གཟིམས་ཆུང་དུ་དགེ་མཚན་གྱི་ལྟས་དང་བཅས་ཏེ་ལྕམ་ཡོན་ཏན་སྒྲོལ་མའི་སྲས་སུ་སྐུ་བལྟམས། འདི་ནི་གཏེར་གསར་སྔ་ཕྱིའི་ལུང་བསྟན་ལས་དབང་ཆེན་གྱི་སྤྲུལ་པར་ལུང་བསྟན་པ་གསལ་པོར་བརྙེས་ཤིང་། ཁྱད་པར་འཁྲུངས་པའི་དུས་ཚིགས་དང་བསྟུན་ནའང་ཤ་འུག་གཏེར་གསར་ལས། ཆོས་བདག་ལོ་བདུན་ཁོངས་སུ་འབྱུང་༔ ཞེས་ལུང་བསྟན་པ་ཉིད་ཡིན་པར་གདོན་མི་འཚལ་ལོ། །སྐྱེ་འགྲོའི་བསོད་ནམས་ཤར་རིའི་ཕྲག་པ་ལ། །རྒྱལ་བའི་སྲས་མཆོག་མཚན་དཔེའི་ཟླ་བ་འཛེགས། །གངས་ཅན་བསྟན་འགྲོའི་དགེ་ལེགས་ཀུནྡཱའི་ཚལ། །འདབ་སྟོང་བཞད་པས་ཟེའུ་འབྲུ་ངོམ་པ་བཞིན། །དེའི་ཚེ་རྗེ་ཉིད་ནས་བཙས་མ་ཐག་ལྗགས་སྟེངས་སུ་གིའུ་ཝཾ་གི་དྷཱི་ཡིག་འདྲི་བ་སོགས་བློ་རྣོ་བའི་ཆོ་ག་དང་། གུར་དྲག་གི་དབང་། ལོཀྟྲིའི་རིག་གཏད། ཚེ་དབང་། བྱབ་ཁྲུས་སོགས་བྱིན་རླབས་དང་། ལྷ་མོ་བུ་རྫིའི་རྟེན་མདོས་འཛུགས་པ་སོགས་མཛད། དེ་ནས་བཟུང་གྲྭ་པ་གཉིས་ཀྱིས་ལོ་འཁོར་གྱི་བར་དུ་ཉིན་རེ་བཞིན་གདོན་ཆེན་བཅོ་ལྔའི་མདོས་གཏོང་བའི་རྒྱུན་དང་། བདག་དང་རིག་བྱེད་པ་དཔལ་བཟང་གཉིས་ཀྱིས་བརྒྱ་རྡེའུ་འགྲེམ་པ་སོགས་རྩིས་ལས་བྱུང་བའི་རྟེན་འབྲེལ་མང་པོའང་ཞུས་ཏེ། མདོར་ན་ལོ་ཐོག་བཟང་པོར་སད་སེར་སོགས་གནོད་པ་བཟློག་པའི་སྦྱོར་བ་ལ་འབད་པ་ཇི་ལྟ་བ་བཞིན་དུ་བསྲུང་བའི་ཆོ་ག་ལ་གཅིག་ཏུ་བརྩོན་པ་མཛད་པས་རེ་བའི་འབྲས་སུ་ཡོངས་སུ་གང་བར་གྱུར་པ་འདི་ཉིད་དོ། །དེའི་ཚེ་འདུམ་པོ་དང་། ཕུན་རབ་སོགས་ནས་བཙས་སྟོན་དཔངས་མཐོ་བ་དང་། གྲྭ་ཚང་གྲྭ་རིགས་བཅས་པའི་ལེགས་འབུལ་ཡང་རིམ་པར་བྱུང་། དེ་ནས་སློབ་དཔོན་སངས་རྒྱས་གཉིས་པའི་གསེར་སྐུ་ལ་གཟུངས་འབུལ་ཕྱག་ལས་:བདར་༼ བསྟར་༽ཏེ་མཛད་པ་ལེགས་པར་གྲུབ་ནས། ཟླ་བ་བཅུ་གཅིག་པ་རྟིང་མའི་ཚེས་གཉིས་ལ་ཞབས་ཕྱིར་ཆོག་རོགས་པ་ཉི་ཤུ་སྐོར་དང་བཅས་རབ་ཏུ་གནས་པ་མཛད། དེ་ནས་མི་རིང་བར་གོང་ནས་སྤྱན་འདྲེན་པ་འབྱོར་བ་བཞིན་ཚེས་བཅོ་བརྒྱད་ལ་ཆིབས་བཏེག་པའི་ལམ་དུ་སྐྱིད་གཤོངས་གཞིས་གཉེར་དང་། ར་བ་སྨད་སྤྱི་གཉེར་གྱིས་བསྙེན་བཀུར་བསྟབས་ཤིང་གཞུང་ཉ་བསྐྱུར་ལྷ་ཁང་ལ་རབ་ཏུ་གནས་པའི་མེ་ཏོག་འཐོར་ཏེ་ལུམ་པའི་གྲུ་བརྒྱུད་ཉེར་གཉིས་ལ་ཕོ་བྲང་ཆེན་པོར་ཕེབས། དེ་མ་ཐག་པར་གོང་ཞབས་སྐུ་མཚམས་ཤིན་ཏུ་དམ་པའི་ཁོག་ཏུ་མཇལ། དེ་ནས་ཉེར་བཞི་ལ་སྐུ་ཞབས་ཤོད་མཇལ་ཞིང་། དེ་ཉིན་གོང་ཞབས་ཡས་ཕྱིན་ལྷན་རྒྱས་སུ་བྱད་འགྲོལ་དང་ཚེ་དབང་སོགས་འབུལ་བ་མཛད་པར་ཡོན་དུ་དངུལ་གྱི་མཎྜལ། ཁ་བཏགས་ཉིན་བདེ་མ། གོས་ཡུག་སོགས་སྩལ། ཉེར་ལྔ་ལའང་སྐུ་ཞབས་ལྷན་པར་འཆི་བསླུ་དང་དྲག་དམར་གྱི་དབང་སོགས་འབུལ་བ་མཛད། དེའི་སང་ཉིན་གྲྭ་གཞིར་ཡུམ་དྲུང་སྐུ་མཆེད་ཀྱིས་སྤྱན་དྲངས་ཏེ་ཞག་གཉིས་བཞུགས། གཏེར་གསར་ཚེ་དབང་དང་གུར་དྲག་གི་དབང་ལོཀྟྲིའི་རིག་གཏད། པད་གླིང་གི་ཕུར་པ་དང་དྲག་དམར། ཆོས་དབང་གི་ཕྱག་རྡོར། རཏྣའི་རྟ་ནག་རྣམས་ཀྱི་དབང་དང་། གཏེར་གསར་རྫོགས་ཆེན་གྱི་དམིགས་སྐྱོར། ཚེ་དབང་བརྒྱ་རྩ། བཀའ་བསྒོ་དང་བཅས་པ་གནང་བས་སྙུང་བ་བདེ་དྭངས་སུ་གྱུར། དེར་འཕྲལ་གྱི་ཞབས་ཏོག་དང་། གསེར་དངུལ་གོས་ཕྱི་ནང་སོགས་འབུལ་བ་བསམ་གྱིས་མི་ཁྱབ་པས་མཆོད་ཅིང་། སླར་ཡང་རྩེར་ཕེབས་ཏེ་ཞག་ལྔའི་བར་བྱད་འགྲོལ་གྱི་བུམ་སྒྲུབ་མཛད་ནས་ཟླ་བ་བཅུ་གཉིས་པའི་ཚེས་གསུམ་ནས་བཟུང་ཉིན་གསུམ་གྱི་རིང་གོང་ཞབས་ཡས་ཕྱིན་ཐུན་མོང་དུ། རྡོ་རྗེ་གྲོ་ལོད་ཀྱི་དབང་། བྱད་འགྲོལ་གཟའི་དུག་འབྱིན། རྟ་མགྲིན་གསང་སྒྲུབ་ཀྱི་དབང་། མཁའ་འགྲོ་གྲིབ་སེལ། ལོཀྟྲིའི་རིག་གཏད། སྨེ་བརྩེགས། བྱབ་ཁྲུས་རྣམས་རིམ་འབུལ་མཛད་པར་དངུལ་གྱི་མཎྜལ། ཁ་བཏགས་ཉིན་བདེ་མ། གོས་ཡུག་རྣམས་ཉིན་རེ་བཞིན་སྩལ། དེ་རྟིང་སྐུ་ཞབས་གྲྭ་ཚང་གི་གྲྭ་པ་འགའ་ལ་དྭངས་མ་བཅུད་འདྲེན་གྱི་དབང་དང་། ཕྱག་རྡོར་གྱི་བུམ་སྒྲུབ་ཞག་གསུམ་མཛད་ནས་ལྷ་སར་མི་དབང་ཆེན་པོར་དྲེགས་འདུལ་དང་གཉེན་པོ་ལྷ་གསུམ་གྱི་སྒོ་ནས་ཀླུའི་གདོན་འགྲོལ་སོ་སོའི་ལུགས་བཞིན་འབུལ་བར་མཛད། གོས་ཕྱི་ནང་སོགས་གནང་ཆའང་གཟབ་པར་སྩལ། སླར་ཡང་རྩེར་ཕེབས་ཏེ། གོང་ཞབས་སུའང་སྔར་བཞིན་གདོན་འགྲོལ་ལེ་ཚན་དང་། རྟ་མགྲིན་གསང་སྒྲུབ་ཀྱི་བྱིན་རླབས་ཀྱང་འབུལ་བར་མཛད། ཚོམས་ཆེན་དུ་ཕུར་སྒྲུབ་ཀྱི་དཀྱིལ་འཁོར་སོགས་ལ་གཟིགས་རྟོག་དང་། གཟིམས་ཆུང་ཀུན་བཟང་བདེ་ཆེན་དུ་ཐུགས་དམ་རྟེན་གྱི་སྔགས་སྐུ་དང་། སངས་རྒྱས་སོ་ལྔའི་གསེར་ཐང་ཆེན་མོ་སོགས་བྲིས་འབུར་གྱི་རྟེན་མང་པོར་རབ་ཏུ་གནས་པའི་སྟ་གོན་དང་། དེའི་སང་ཉིན་ཚེས་བཅུ་གསུམ་ལ་དངོས་གཞིའི་ཆོ་ག་མཛད། རབ་སྟོན་དང་ཡོན་གྱི་དངོས་པོ་སྤམ་མཐོ་བ་སྩལ། དེ་ནུབ་ནས་སྐུ་རིམ་གྱི་སྐུ་མཚམས་བདུན་ཕྲག་གཅིག་མཛད། བསམ་གྲུབ་གླིང་དུ། བླ་སྨན་དར་མོ་ནས་ལ་བྱད་འགྲོལ་དང་ལོཀྟྲིའི་རིག་གཏད་སྩལ། སླར་ཡང་སྐུ་མཚམས་ཀྱི་ཁོངས་སུ་སྐུ་སྲུང་གི་སྒྲུབ་པའང་ཁ་ཡར་དང་། སྐབས་ཅི་རིགས་པར་ཡས་ཕྱིན་གྱི་དྲུང་འཁོར་དང་། གྲྭ་ཚང་ཆེན་མོའི་གྲྭ་པ་སོགས་མཇལ་ཁ་ཞུ་མི་མང་པོར་སོ་སོའི་རེ་བ་སྐོང་བའི་དབང་དང་བྱིན་རླབས་སོགས་མཛད།