རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ།
རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་བཞུགས་སོ། །གཏེར་བདག་གླིང་པ་འགྱུར་མེད་རྡོ་རྗེ།
རིག་པ་འཛིན་པ་འགྱུར་མེད་རྡོ་རྗེའི་གནས་ལུགས་དེ་བཞིན་ཉིད་ཀྱི་རྟོགས་པ་བརྗོད་པ་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་བཞུགས་སོ།
ན་མོ་གུ་རུ་པདྨ་སམ་བྷ་ཝ་ཡེ། རིག་པ་འཛིན་པ་འགྱུར་མེད་རྡོ་རྗེའི་གནས་ལུགས་དེ་བཞིན་ཉིད་ཀྱི་རྟོགས་པ་བརྗོད་པ་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ། བླ་མ་ལ་ཕྱག་འཚལ་ལོ། །འགྱུར་མེད་དོན་དམ་མཁའ་ཁྱབ་མཁའི་རྡོ་རྗེ། །མཐའ་ཡས་དངོས་པོ་ཀུན་གྱི་དེ་བཞིན་ཉིད། །མཚན་མའི་སྤྲོས་པ་ཡོངས་དག་གདོད་མའི་མགོན། །རང་རིག་དཔལ་ལྡན་བླ་མ་རྒྱལ་གྱུར་ཅིག །གང་ཞིག་ཐོག་མཐའ་དབུས་མེད་ཆོས་ཀུན་གྱི། །གནས་ལུགས་སྤྲོས་བྲལ་གདོད་མའི་ཕྱག་རྒྱ་ཆེ། །རང་རིག་རྫོགས་སངས་རྒྱས་པ་ཆོས་ཀྱི་སྐུའི། །རྣམ་ཐར་འཁྱོངས་པའི་བཀའ་དྲིན་དྲན་པས་འདུད། །རྨོངས་པའི་རྣམ་འགྱུར་ཀུན་གྱིས་གཏན་ཕེབས་ཕྱིར། །ངོ་མཚར་སྒྲོག་པའི་རྩོལ་བ་ངལ་བའི་གནས། །དེ་ཕྱིར་སྒྲོ་དང་སྐུར་པའི་མཐའ་གཉིས་ལས། །འདས་པའི་ལོ་རྒྱུས་གསོང་པོར་བརྗོད་ན་རུང་། །ཆེས་དམན་གནས་ལུགས་གསལ་ཕྱིར་དམ་པ་ཞེས། །མཆོག་རློམ་གྲགས་པ་སྒྲོག་ཕྱིར་བརྗོད་མིན་གྱིས། །བློ་གསལ་དད་བརྩོན་ལྡན་པའི་སློབ་བུ་འགས། །མོས་པས་བསྐུལ་བའི་ངོ་མ་ལྡོག་ཕྱིར་གླེང་། །དེ་ཡང་རང་ཉིད་བཟང་པོར་མ་གྱུར་ན། །བླུན་དད་ཕྱོགས་ཞེན་ཙམ་གྱིས་སངས་རྒྱས་ཞེས། །བརྗོད་ཀྱང་ཅི་བྱ་རང་སེམས་འགྱུར་མེད་གདེང་། །ཐོབ་ན་བདུད་དུ་འབོད་ཀྱང་ཚིག་ཏུ་བས། །དེ་ཕྱིར་ཆོས་བརྒྱད་རྣམ་པར་རྟོག་པའི་མཐའ། །མཉམ་ཡངས་ཁྱབ་གདལ་ཆེན་པོར་རང་གྲོལ་བའི། །མ་བཅོས་དེ་བཞིན་ཉིད་ཀྱི་རྟོགས་བརྗོད་ལ། །མོས་ལྡན་དག་སྣང་ཅན་རྣམས་དགྱེས་པར་མཛོད། །དེ་ཡང་གདོད་མའི་མགོན་པོ་དེ་བཞིན་ཉིད། །ཟག་པ་མེད་དབྱིངས་ཆོས་ཉིད་ཀུན་ཏུ་འགྲོ། །
བདེ་གཤེགས་སྙིང་པོ་རང་བཞིན་འོད་གསལ་བ། །ཀ་དག་དང་པོའི་སངས་རྒྱས་རྡོ་རྗེ་འཆང་། །དེ་སོགས་དུ་མའི་སྒྲ་ཡིས་སྙན་༼བསྙད༽བྱའི་གཞི། །སྐྱེ་འགག་གཉིས་མེད་རྩ་བ་བྱང་ཆུབ་སེམས། །མ་འདྲེས་ཡོངས་རྫོགས་རིག་པའི་སྐྱེས་བུ་དེའི། །རྨད་བྱུང་མཛད་ཕྲིན་རྣམ་པར་བྱང་བའི་ཆོས། །ཡོངས་སུ་སྤེལ་དང་རྒྱལ་བ་ཐམས་ཅད་ཀྱི། །སྐུ་དང་ཡེ་ཤེས་ཡོན་ཏན་ཕྲིན་ལས་ཀུན། །འདུས་བྱས་དབུས་སུ་ཉམས་པར་མི་འགྱུར་བའི། །སངས་རྒྱས་ས་བོན་ཉིད་དེ་ནམ་ཞིག་ན། །རིགས་སད་པ་ལས་རང་བཞིན་འདོད་དགུའི་གཏེར། །ཅིར་ཡང་འཆར་བ་སྲིད་དང་ཞི་བའི་དཔལ། །གང་གི་རྣམ་ཐར་འཕེལ་འགྲིབ་མི་མངའ་བ། །འཁོར་འདས་ཡོངས་ལ་ཁྱབ་པར་སྣང་བའོ། །དེ་ལྟ་ན་ཡང་མཁའ་ཁྱབ་མཁའི་རྡོ་རྗེ། །ཆ་མེད་ཀུན་འགྲོ་གདོད་མའི་ཡེ་ཤེས་དེ། །ལྷན་སྐྱེས་མ་རིག་སྒྲིབ་པས་མ་རྟོགས་ཤིང་། །ཀུན་བརྟགས་འཁྲུལ་སྣང་ལོག་པར་ཨ་འཐས་པས། །མ་རྟོགས་ལོག་རྟོག་སྲིད་པའི་རྒྱ་མཚོ་ནི། །ལས་དང་ཉོན་མོངས་རླབས་ཕྲེང་ཆེར་འཁྲུགས་པར། །རྟག་ཏུ་འཁོར་ཞིང་འཁྱམས་པའི་རྣམ་ཐར་ནི། །ཕ་མཐའ་མེད་ཕྱིར་བརྗོད་ཀྱིས་མི་ལང་ཞིང་། །མ་རིག་སྒྲིབ་གཡོགས་དབང་གིས་མཐོང་དུའང་ཅི། །མ་མཐོང་བཞིན་དུ་མི་ཆོས་བླ་མ་ཡིས། །མཐོང་ཞེས་གཡོ་སྒྱུའི་སྦྱོར་བས་བརྗོད་པ་ནི། །སྒྲིབ་པར་ལྕི་བས་བརྗོད་དུ་མ་སྤོབས་སོ། །དེ་ལྟ་ན་ཡང་སྔོན་ཚེ་རྒྱལ་བ་ལ། །ཅུང་ཟད་བྱ་བ་བྱས་ཤིང་སྨོན་ལམ་གྱི། །མཚམས་སྦྱོར་ལ་བརྟེན་ཚེ་འདིར་ཆོས་སྒྲུབ་པའི། །རིགས་སུ་སྐྱེས་ཤིང་དམ་པས་རྗེས་བཟུང་མཐུས། །བསྟན་པའི་སྒོར་ཞུགས་སྨིན་གྲོལ་གདམས་པ་ཐོབ། །ཐོས་བསམ་སྒོམ་ལ་ཅུང་ཟད་ཕྱོགས་པ་དང་། །རང་གཞན་བྱ་བ་ཆ་ཙམ་འགྲུབ་པ་སོགས། །ཕུལ་བྱུང་རྒྱན་གྱིས་གཞན་དུ་བརྗོད་ལས་མཁྱེན། །དེ་ཡང་སྔོན་གྱི་སྐྱེས་རབས་ཕྲེང་བ་རྣམས། །རྡོར་གླིང་ཉིད་ཀྱི་གཏེར་ལུང་ཞལ་གདམས་དང་། །མཆོག་ལྡན་རྣམ་ཐར་རང་གཏེར་ལུང་བསྟན་གྱི། །དོན་རྣམས་ཁུངས་དང་སྦྱར་ཏེ་བསྡེབས་པ་ལས། །དྲན་པའི་ལམ་ནས་བརྗོད་པ་མ་ཡིན་མོད། །འོན་ཀྱང་བཻ་རོ་ཟུར་ཆེན་རྡོར་གླིང་སོགས། །དམ་པ་འགའ་ཡི་སྔོན་རབས་ད་ལྟ་ཡི། །རྐྱེན་འགས་སད་ལས་འལ་འོལ་དྲན་པ་སྙམ། །གཞན་ཡང་ཀུན་
མཁྱེན་ཆེ་དང་འགོས་ལོ་ཡི། །གསུང་རབ་མཐོང་ཚེ་རང་གིས་བྱས་སྙམ་དང་། །ཐོག་མའི་ཚིག་གིས་དེ་རྗེས་ཚིག་དོན་རྣམས། །རྩོལ་མེད་ཤུགས་འབྱུང་ར་རི་འཆར་བ་སྙམ། །ཕྱི་དུས་འཁོར་ལོ་ཐ་མ་ངེས་དོན་དུ། །ཐོགས་མེད་སྨྲ་བ་དེ་དང་བློ་ཆེན་པའི། །ལས་སྣང་འགའ་ཞིག་བག་ཆགས་སད་འདྲ་བ། །སྤྲུལ་པའི་རྣམ་རོལ་གཉིས་པ་ཡིན་པར་འཁུམས། །ཁྱད་པར་ཆ ོས་ཀྱི་གོ་ཆའི་གནས་དུས་དང་། །འཁོར་སློབ་ལོངས་སྤྱོད་བྱ་བྱེད་གནས་ལུགས་ཀུན། །འདས་པའི་རྨི་ལམ་བཞིན་དུ་ཆེས་གསལ་བ། །ད་ལྟའང་ཡིད་ཀྱི་ཡུལ་དུ་ལམ་མེར་སྣང་། །ལངྐའི་ཡུལ་དང་རྒྱ་གར་ལ་སོགས་ཀྱི། །གནས་ཚུལ་བཀོད་པའི་དོན་སྤྱི་འལ་འོལ་ཙམ། །གསལ་བ་སྙམ་དང་ད་ལྟའི་འཁོར་སློབ་སོགས། །སྔོན་ལས་སྨོན་ལམ་དབང་གིས་འབྲེལ་ཚུལ་གྱི། །རྣམ་བཞག་འཆར་འཆར་འདྲ་ཡང་འཁྲུལ་ཤེས་ལས། །ཡིད་ཆེས་དད་འཛིན་ཐུབ་པ་ག་ལ་ཞིག །ཁྱད་པར་ཡང་སྲིད་སྔ་མའི་ལུས་ཀྱི་རྟེན། །ཉེ་བར་བསྡུ་ཚེ་རང་རིག་སྐད་ཅིག་མ། །བདེ་དང་གསལ་བའི་སྣང་ཆ་མ་འགགས་པར། །སྤྲོས་བྲལ་སྟོང་ཉིད་ནམ་མཁའ་ལྟར་དག་པའི། །དབྱིངས་སུ་རོ་གཅིག་གྱུར་ཚེ་རང་རིག་གདངས། །དཔའ་བོ་མཁའ་འགྲོའི་གླུ་ཡིས་འདི་ལྟར་སད། །ཀྱེ་ཧོ་རྣལ་འབྱོར་རིག་པའི་རྡོ་རྗེ་ཀྱེ། །བྱང་ཕྱོགས་སྤུར་རྒྱལ་བོད་ཀྱི་རྒྱལ་ཁམས་ན། །ལས་དང་སྨོན་ལམ་གདུལ་བྱའི་རྟེན་འབྲེལ་འཛོམས། །དེ་རུ་གཤེགས་ཤིག་ངེད་རྣམས་སྟོངས་གྲོགས་སོ། །ཞེས་བརྗོད་རྐྱེན་གྱིས་མི་རྟོག་ངང་ཉིད་ལས། །རགས་པའི་རྣམ་རྟོག་ཝལ་གྱིས་ཤར་བའི་མོད། །ཚེ་འདིའི་ཕ་མ་སྤྱོད་ཡུལ་ལོངས་སྤྱོད་སོགས། །ཐམས་ཅད་མངོན་སུམ་ཇི་བཞིན་གསལ་ལེར་རྟོགས། །དེ་ཚེ་གཉུག་མའི་ལུས་རྟེན་ཧེ་རུ་ཀའི། །རྣམ་པར་ཤར་ཞིང་དཔའ་བོ་རྣལ་འབྱོར་མ། །དུ་མའི་གྲོགས་བཅས་མཁའ་ལ་བསྐྱོད་པ་ན། །ཕ་མཐའ་མེད་པའི་འཇིག་རྟེན་ཁམས་མང་པོ། །མེ་ལོང་གཟུགས་བཞིན་གསལ་བར་མཐོང་བའི་མཐར། །བཀོད་ལེགས་རིན་ཆེན་ཁང་བུར་བཞུགས་སྙམ་ཚེ། །སྔར་གྱི་འཛིན་རྟོག་ཐམས་ཅད་དབྱིངས་ནུབ་ནས། །སྐྱེ་བ་འདི་ཡི་ལུས་ཀྱི་རྟེན་བཟུང་ངོ་། །ནམ་ཞིག་བཙས་ཚེ་སྐྱེ་བའི་སྡུག་བསྔལ་ཉིད། །དྲན་མ་གྱུར་ཀྱང་ཕྱི་རོལ་ཡུལ་སྣང་རྣམས། །མཐོང་བ་དྲན་
སྙམ་བགྱིད་མོད་དོན་སྤྱི་ཙམ། །རྣམ་རྟོག་འཕེལ་བའི་དབང་ལས་མ་གྱུར་ཏམ། །དེ་ཚེ་ཛོ་ཀི་སྔོ་སངས་ཐོར་ཚུགས་ཅན། །རུས་པའི་རྒྱན་ཅན་ཞིག་དང་མཛེས་སྡུག་གི །བུད་མེད་གཉིས་ཀྱིས་ཕལ་ཆེར་ཟླ་གྲོགས་ལྟར། །སྲི་ཞུའི་མེལ་ཚེ་བྱེད་པ་དངོས་སྣང་བཞིན། །ལོ་གསུམ་བར་དུ་བྱུང་མོད་དེ་རྗེས་ནས། །རེས་འབྱུང་རེས་མི་སྣང་མོད་ཉམ་ཐག་ཚེ། །ཤས་ཆེར་འབྱུང་ལས་ཕྱིས་ནས་རྨི་ལམ་དུ། །ཡང་ཡང་འབྱུང་བ་སྐྱོབ་བྱེད་ཡིན་ནམ་སྙམ། །ལོ་བཞིའི་དུས་ན་སྐྱབས་མཆོག་བླ་མ་ཡིས། །སྒྲུབ་ཆེན་བཀའ་བརྒྱད་གསང་རྫོགས་དཀྱིལ་འཁོར་དུ། །དབང་བསྐུར་མཛད་ཚེ་འཇུག་བྱའི་དཀྱིལ་འཁོར་གྱི། །གཙོ་བོ་བླ་མ་ཉིད་དང་དབྱེར་མེད་པའི། །དཔལ་ཆེན་སྐུ་རུ་སྐད་ཅིག་ལམ་མེར་སྣང་། །དཀྱིལ་འཁོར་ལྷ་དང་བླ་མ་དབྱེར་མེད་པའི། །གོ་རྟོགས་ཅུང་ཟད་རྐྱེན་འདིས་ཐོག་མར་སད། །དྲེགས་པའི་སྲོག་དབང་ཚེ་ན་གཟུགས་བརྙན་རྣམས། །དངོས་ཡིན་སྙམ་པའི་གསལ་སྣང་འགག་མེད་དུ། །ཤར་བའི་རྣམ་འགྱུར་དེར་འཁོད་ཕལ་གྱིས་གཟིགས། །མཐུ་ཆེན་གྲུབ་པའི་ལུང་བསྟན་དབུགས་དབྱུང་སྩལ། །གཞོན་ནུའི་དུས་ན་མཚན་མོའི་རྨི་ལམ་དུ། །སངས་རྒྱས་བྱང་ཆུབ་སེམས་དཔའ་རིག་འཛིན་ཚོགས། །བཀའ་བགྲོ་ལུང་སྟོན་རྗེས་འཛིན་མཛད་པ་སོགས། །དག་པའི་སྣང་བ་ཤས་ཆེར་འཆར་བ་བྱུང་། །ལོ་ལྔའི་ནང་དུ་ཇོ་ཤཱཀ་མཇལ་སོང་ཚེ། །གནས་དེ་སྔར་ཡང་མཇལ་བའི་སྣང་བ་དག །ཡལ་ཡུལ་དྲན་པ་སྙམ་བྱེད་སྔོན་རབས་ཀྱི། །བག་ཆགས་ཅུང་ཟད་སད་པ་ཡིན་ལ་རག །རང་ལོ་བཅུར་སོན་ཤིང་མོ་ལུག་ལོའི་སྟོན། །སྐྱབས་མཆོག་བླ་མ་ཉིད་ལས་དར་གླིང་དུ། །བཀའ་དགོངས་དབང་ལུང་མན་ངག་ནོད་པ་ལས། །ཁྱད་པར་བདེ་འདུས་དབང་བསྐུར་དངོས་གཞིའི་ནུབ། །ཡིད་འོང་ནགས་ཚལ་རབ་ཏུ་རྒྱས་པའི་དབུས། །སློབ་དཔོན་ཆེན་པོ་པདྨ་ཡིན་སྙམ་པའི། །རྣལ་འབྱོར་ཆ་ལུགས་གཟི་བརྗིད་མཚུངས་པ་མེད། །མཛེས་སྡུག་བུད་མེད་ལྔ་ཡིས་བསྐོར་བ་ལས། །བུད་མེད་ལྔ་པོས་བུམ་པ་ཆུས་བཀང་དང་། །ཐོད་པ་མར་ཁུས་གཏམས་དང་མར་མེའི་ཀོང་། །སྤུ་གྲི་མེ་ལོང་སོ་སོས་རིམ་པ་བཞིན། །གཏད་ཅིང་སྔགས་དང་ཕྱག་རྒྱས་བྱིན་བརླབས་ཚུལ། །མཛད་མཐར་གཅིག་ལ་གཅིག་ཐིམ་གཙོ་བོའི་བར། །དེ་ཉིད་
མཐིང་ཞུན་ཐིག་ལེ་མཁའ་ཁྱབ་འདྲེས། །རྨི་ལམ་ཉིད་དུ་མཐོང་བ་མགོན་དེ་ཡིས། །བྱིན་བརླབས་སྔགས་ཀྱི་བརྡ་རུ་ཕྱིས་ནས་གོ། བཅུ་གཅིག་ལོ་ནང་ལྷ་མིའི་འདྲེན་པ་ཆེ། །ཐམས་ཅད་མཁྱེན་ཞབས་བཏུད་ཚེ་སྐྱིད་གྲོང་གི །འཕགས་པ་ཝ་ཏི་གནས་དེར་ཐོག་མ་རུ། །ཕེབས་དང་ལྷན་ཅིག་ཉིད་དུ་དུས་འགྲིག་ཚེ། །འཕགས་པའི་སྐུ་ཉིད་ཞི་འཛུམ་ཆགས་པའི་ཉམས། །མཚུངས་མེད་གཟི་བརྗིད་རབ་རྒྱས་ཐུགས་ཀ་ནས། །འོད་ཟེར་འཕྲོས་པ་རང་ལ་ཐིམ་པ་དང་། །དབུགས་དབྱུང་མཛད་པའི་སྣང་བ་ཡུད་ཅིག་ཤར། །གུང་ཐང་གནས་སུ་སྔོན་གནས་ར་རི་ཙམ། །དྲན་པའི་བག་ཆགས་སྣང་བ་ཡལ་ཡུལ་དང་། །འགྲོ་མགོན་ཞང་ལ་བཟོད་མེད་དད་པ་ནི། །ཤུགས་འབྱུང་སྐྱེས་ཚེ་བྱིན་བརླབས་སྣང་བ་ཐོབ། །གཙང་རོང་བོན་པོར་ནད་ཀྱིས་ཉམ་ཐག་ཚེ། །སྔར་གྱི་བུད་མེད་གཉིས་ཀྱིས་དབུགས་དབྱུང་ཞིང་། །རྣལ་འབྱོར་པ་དེས་བྱིན་བརླབས་དངོས་སུ་མཐོང་། །ནངས་པར་བདེན་གྱུར་ལྷ་ཡིས་བསྐྱབས་པར་གོ། བཅུ་གསུམ་ལོ་ནང་དཔལ་རིར་ཡབ་རྗེ་ལས། །ཡུལ་འཁོར་སྲུང་གི་དམག་བཟློག་ནོད་པའི་ཚེ། །དེ་ཡི་ཕྱག་མཚན་རག་དུང་བུས་པའི་སྒྲས། །ས་གཞི་ཁྱབ་པའི་དཔུང་ཚོགས་འདུས་པ་དང་། །རྣམ་ཐོས་སྲས་ཀྱིས་རྒྱལ་མཚན་ལག་ཏུ་གཏད། །རྐྱེན་དེས་མཁའ་ལ་ཐོགས་མེད་བགྲོད་པ་ཡི། །རྨི་ལམ་གསལ་བར་མཐོང་མོད་ཕྱི་དུས་འདིར། །བསྟན་སྲིད་ཕས་རྒོལ་བསྲུང་བའི་མཐུ་ཐོབ་སྙམ། །དེ་ཚེ་སྙིང་ཐིག་གདམས་པའི་དབང་ལུང་ཁྲིད། །ཐོབ་ཚེ་ཀ་དག་ཆོས་ཟད་གནས་ལུགས་དོན། །ཕྱིན་ཅི་མ་ལོག་ཇི་བཞིན་ཉིད་རྟོགས་པའི། །ས་བོན་གྲུང་པོ་ཐོག་མར་ཐེབས་པ་ཡིན། །སྐབས་ཤིག་ཉེར་དགུའི་མུན་པ་མི་བཟད་ནང་། །ཁྱབ་འཇུག་སྐུ་ཉིད་མཁའ་དང་དབྱེར་མེད་ལས། །སྤྱན་མིག་ཉི་མ་ལྟར་འབར་དུད་སྤྲིན་དང་། །མེ་སྟག་ཕྲོམ་ཕྲོམ་མཁའ་ལ་འགྲོ་བ་མཐོང་། །མི་བཟད་འཇིགས་ཟིལ་ཞུད་རྔམས་གཞན་གྱིས་ཀྱང་། །མངོན་སུམ་ཉིད་དུ་གཏན་ལ་ཕེབས་པ་བྱུང་། །འདི་ནི་སྲུང་མ་གཡེལ་མེད་འགོ་བ་སྟེ། །ཕྱིས་ཀྱང་ཡང་ཡང་ཡོང་བ་མངོན་སུམ་བཞིན། །བཅུ་དྲུག་ལོ་ནང་སྐྱབས་མཆོག་བླ་མ་ལས། །གསང་འདུས་བླ་མའི་དབང་བསྐུར་ནོད་པའི་ནུབ། །གཞལ་མེད་ཁང་བརྩེགས་ཡིད་འོང་སྒོར་ཞུགས་ནང་། །
རིན་ཆེན་ཐེམ་སྐས་ཤིན་ཏུ་མཐོ་བའི་རྩེར། །བུད་མེད་མཛེས་མས་ཁྲིད་དེར་སོང་བ་ལས། །ཤིན་ཏུ་བཀོད་ལེགས་ཁྱོན་ཆེའི་ཁང་པ་ན། །བླ་མ་རྗེ་ཉིད་གཟི་བརྗིད་མཚུངས་མེད་སྐུའི། །མཐའ་སྐོར་གླེགས་བམ་མང་པོའི་བརྩིགས་རགས་དང་། །ལ་ལ་འགྱེལ་ནས་ཐང་མར་གདལ་བས་བསྐོར། །གུས་པས་བཏུད་ཚེ་འདི་རྣམས་བཀའ་གཏེར་གྱི། །ཟབ་ཆོས་ཡིན་ཡང་འགའ་ཞིག་འཁྲུགས་ནས་འདུག །ཁྱོད་ཀྱིས་སྒྲིག་པའི་ལས་སྐལ་གཏད་དོ་ཞེས། །དུང་དཀར་དར་དཔྱངས་གཡོ་བ་ལག་ཏུ་སྩལ། །དེ་ཚེ་འདི་རྣམས་ལོ་བརྒྱའི་བར་དུ་ཡང་། །འགྲུབ་པར་དཀའ་མོད་བདག་གིས་ཅི་བྱ་སྙམ། །རི་བོའི་ཁུར་གྱིས་ནོན་པ་བཞིན་དུ་ལྕི། །དེ་མཐར་བླ་མ་བཞེངས་ནས་ནུབ་ཕྱོགས་ཀྱི། །དཀར་གསལ་ལམ་ནས་མཁའ་ལ་ཐོགས་མེད་དུ། །སྒྲ་འོད་ཆོ་འཕྲུལ་དུ་མས་གཤེགས་པ་མཐོང་། །སྐྱོ་ཞིང་གདུང་བས་ཕྱི་ནས་སྙེག་བརྩམས་ཚེ། །གཉིད་སད་ཉམས་སྣང་མཁའ་ལ་བཅོམ་ལྡན་འདས། །རྡོ་རྗེ་གཞོན་ནུ་གཙོ་འཁོར་ཆེས་གསལ་བ། །སྒྲ་དང་འོད་ཟེར་ཆེན་པོའི་སྣང་བ་ཅན། །ཆུ་ཚོད་ཚད་ཙམ་གཡོ་མེད་གནས་པ་མཐོང་། །སྐབས་ཤིག་རྒྱུད་འགྲེལ་འགའ་ཡི་ལུང་ནོད་ཚེ། །ཆུ་གླིང་གྲོང་ཁྱེར་ནགས་ཀླུང་མེ་ཏོག་ཚལ། །རབ་རྒྱས་སིངྒ་ལ་ཡི་གླིང་ཡིན་སྙམ། །དེ་ན་བཀོད་ལེགས་ཁྲི་ལ་མ་ཕམ་པ། །ཉེ་ལོགས་ཐོགས་མེད་ཙན་དྲ་གོ་མི་སོགས། །ཡིན་སྙམ་དུ་མའི་འཁོར་བཅས་བྱིན་བརླབས་ཚུལ། །མཐོང་བའི་མོད་ལ་གཉིད་སད་དགའ་བདེས་ཁྱབ། །ཟབ་མོའི་ཚིག་དོན་གོ་བ་བོགས་ཆོད་དུ། །ནུས་པའི་ཤེས་རབ་སྔོན་ལས་འཕགས་པ་སྙམ། །བཅུ་བདུན་ལོ་ལ་ཆོས་འཁོར་བསམ་ཡས་སུ། །གངས་ཅན་སྐྱབས་གཅིག་ཐམས་ཅད་མཁྱེན་པ་ཡི། །སྤྱན་སྔར་སྙེགས་ཚེ་གང་སྐུ་སྤྱན་རས་གཟིགས། །དྲི་མེད་འོད་ཟེར་འཕྲོ་བར་ཡུད་ཅིག་མཐོང་། །རྐྱེན་དེས་སྔོན་གྱི་གནས་དུས་འབྲེལ་ཚུལ་སོགས། །བཟང་པོའི་བག་ཆགས་འགའ་ཞིག་གསལ་བར་སད། །ཤིན་ཏུ་བརྩེ་བའི་གསུང་གིས་དབུགས་དབྱུང་ཞིང་། །ཕྱི་མཐའ་གཟིགས་པའི་བླང་དོར་ལུང་བསྟན་མཛད། །དེ་ནས་ཡབ་རྗེའི་བདུན་ཚིགས་གཉིས་པའི་ནུབ། །ནམ་མཁའི་དབྱིངས་སུ་གང་གི་ཡེ་ཤེས་སྐུ། །ཉི་མ་བྱེ་བའི་དཔལ་དུ་འབར་བ་ཡིས། །འོད་ཟེར་སྦྲང་རྩི་ལྟ་བུ་ཁར་
སྩལ་ནས། །བྱིན་བརླབས་དབུགས་དབྱུང་ནུབ་ཕྱོགས་མཁའ་དབྱིངས་སུ། །སྒྲ་དང་འོད་ཀྱི་སྣང་བ་མི་བཟད་པའི། །ངོ་མཚར་ཆོ་འཕྲུལ་ཆེན་པོས་གཤེགས་པ་མཐོང་། །སྐབས་ཤིག་ཨོ་རྒྱན་ཆེན་པོ་ཡབ་ཡུམ་གྱི། །སྤྲུལ་པའི་གར་གྱིས་ཐབས་ཤེས་དམ་རྫས་དང་། །ཟབ་གཏེར་ཁ་བྱང་གདམས་པའི་གཉེར་གཏད་པ། །རྨི་ལམ་ཉིད་དུ་གསལ་བར་མཐོང་གྱུར་ཅིང་། །སད་ཚེ་ཟག་མེད་དགའ་བདེས་ལུས་སེམས་ཁྱབ། །རིང་མིན་དུས་མཐར་ལྷོ་བྲག་འབྲོག་རི་ནས། །ཟབ་གཏེར་ཐོག་མའི་ཁ་བྱང་ཤོག་རིལ་ཉིད། །ཟླ་གྲོགས་ཀུན་གྱིས་མཐོང་བར་ལག་ཏུ་སོན། །དེ་སོགས་གཏེར་ཁ་སྔ་ཕྱིའི་ཁ་བྱང་དང་། །ཟབ་གཏེར་ལོན་དང་བྱིན་བརླབས་རྟགས་མཐོང་ཚུལ། །ཆོས་བདག་རྣམས་ལ་གཏད་རྒྱ་བགྱིས་པ་སོགས། །གཏེར་བྱུང་ལོ་རྒྱུས་ལོགས་སུ་བཀོད་ལ་གཟིགས། །བཅོ་བརྒྱད་ལོ་ལ་དར་གླིང་བསམ་གཏན་་རྩེར། །གསང་འདུས་བླ་མའི་བསྙེན་སྒྲུབ་བྱས་པའི་ཚེ། །ཨོ་རྒྱན་སློབ་དཔོན་པདྨ་སམྦྷ་ཝ། །མཁའ་འགྲོའི་འཁོར་དང་བཅས་པ་ཡུད་ཅིག་མཐོང་། །དེ་ཚེ་སླར་ཡང་ངོ་མཚར་གཞལ་མེད་ཁང་། །ཡབ་རྗེ་བླ་མ་སྔར་གྱི་ཆ་བྱད་ལ། །གཟི་བརྗིད་མཚུངས་མེད་འཁོར་དུ་ཛོ་ཀི་དང་། །རབ་བྱུང་སྔགས་འཆང་བུད་མེད་མང་པོས་བསྐོར། །དེ་དག་ཧཱུྃ་མཛད་སངས་རྒྱས་གསང་བ་དང་། །མི་ཏྲ་ཛོ་ཀི་ནམ་སྙིང་རྨ་གཉགས་སོགས། །རྒྱ་བོད་མཁས་གྲུབ་དེ་རྣམས་ཡིན་སྙམ་བགྱིད། །བླ་མ་མཆོག་དེ་རྒྱ་བོད་རྣལ་འབྱོར་གྱི། །གཙོ་བོར་བཞུགས་ལ་རབ་མོས་གདུང་ཤུགས་ཀྱིས། །རྐྱེན་བྱས་དེ་ཉིད་ཨོ་རྒྱན་ཆེན་པོ་ཡི། །སྐུར་བཞེངས་རྗེས་སུ་བརྩེ་བའི་རྣམ་འགྱུར་གྱིས། །ཧེ་རུ་ཀ་ཡི་འཁོར་ལོར་དབང་བསྐུར་ཞིང་། །སྔགས་དང་ཕྱག་རྒྱ་བརྡ་ཐབས་དུ་མ་ཡིས། །བྱིན་བརླབས་མཁའ་འགྲོའི་ཚོགས་ཀྱིས་ཅང་ཏེའུའི་སྒྲས། །མཚོན་པར་ནམ་མཁའ་གང་བའི་གར་བྱེད་དོ། །སད་པའི་མོད་ལ་ཟག་མེད་བདེ་བའི་ཉམས། །ཧད་དེའི་ངང་ནས་སྔར་གྱི་མོས་པ་ཡང་། །བཅོས་མའི་རྣམ་རྟོག་ཙམ་མོ་དེ་ཉིད་ནས། །སྙེམས་ཁྲིགས་མེད་པའི་དད་པ་བརྟན་པོ་ནི། །རང་སེམས་རིག་པའི་ངོ་བོར་རོ་གཅིག་པའི། །གནས་ལུགས་བརྗོད་བྲལ་འགྱུར་བ་མེད་པ་གང་། །འགག་མེད་རྩལ་སྣང་དད་པར་མི་ཕྱེད་པ། །གདོད་མའི་དེ་བཞིན་
ཉིད་དུ་རོ་མཉམ་མོ། །མཛེས་བྱེད་སྣྲོན་ཟླའི་བཅུ་ལ་བྲག་དམར་གྱི། །གཡའ་མ་ལུང་ནས་ཐུགས་ཐིག་བླ་སྒྲུབ་སྐོར། །མྱོང་གྲོལ་དམ་རྫས་སྐུ་ཚབ་རྣམ་གཉིས་སོགས། །ཟབ་མོ་གཏེར་གྱི་དངོས་གྲུབ་དང་པོ་ཐོབ། །རང་ལོ་བཅུ་དགུ་ཆུ་སྟོད་ཅན་གྱི་བཅུར། །མཆིམས་ཕུའི་གནས་སུ་གུ་རུ་བསྙེན་པའི་ཚེ། །ཉེར་ལྔའི་ཐོ་རེངས་སྒྲུབ་རྫས་སྟེང་གི་མཁར། །གུ་རུའི་སྐུ་ཉིད་ཡུད་ཅིག་གསལ་བར་མཐོང་། །སླར་ཡང་ཟླ་དྲུག་བར་དུ་དཔལ་ཆེན་པོ། །བསྙེན་ཚེ་སྐབས་ཤིག་འོད་ཀྱི་སྦུ་གུ་ནི། །རག་དུང་དབྱིབས་ཅན་ཕྱི་མཐའ་ཚད་མེད་ཅིང་། །རྩ་བ་ཆེས་ཕྲ་མིག་ཏུ་ཟུག་པའི་ནང་། །རྒྱ་བོད་གནས་ཡུལ་སྐྱེ་བོའི་བྱ་བྱེད་སོགས། །ཐམས་ཅད་མེ་ལོང་གཟུགས་བཞིན་གསལ་བ་དང་། །ཁྱད་པར་བོད་ཡུལ་ཙམ་དང་དབུས་གཞུང་གི །ཉེ་འཁོར་གནས་ལུགས་མངོན་སུམ་བཞིན་དུ་མཐོང་། །དེ་མཐར་རླབས་ཀྱིས་དཀྲུགས་པའི་ཆུ་ཟླ་བཞིན། །འགྲིབ་ནས་སླར་ཡང་ཞིང་ཁམས་འཇའ་འོད་ཀྱི། །བྲེས་པའི་ཐིག་ལེ་མུ་ཁྱུད་ཅན་གྱི་དབུས། །མཐིང་ཞུན་ལྟར་དང་ནང་དུ་རྡོ་རྗེ་སེམས། །དྲི་མེད་དུང་མདོག་མཚན་དཔེ་གསལ་འབར་བ། །གཡས་གཡོན་མཛེས་སྡུག་ལྷ་མོ་དཀར་དམར་གཉིས། །པི་ཝང་གླིང་བུ་བསྒྱུར་བའི་རོལ་མོའི་གདངས། །བརྡ་ཚིག་བཅུ་གཅིག་དབྱངས་སུ་སྒྲོག་པ་ཐོས། །དེ་ཉིད་སྔར་བཞིན་ཡལ་མཐར་ཡི་གེ་ཨ། །དཀར་གསལ་འཇིག་རྟེན་གང་བ་འོད་ཟེར་ཅན། །སླར་འདུས་དེ་ཉིད་ཐིག་ལེ་དཀར་པོ་ནི། །ཡུངས་འབྲུ་ཙམ་ཞིག་མིག་ཏུ་ཐིམ་པ་སྙམ། །སྐབས་ཤིག་ནམ་མཁར་དཔལ་ཆེན་ཧེ་རུ་ཀཿ། འཁོར་བཅས་ཤིན་ཏུ་གསལ་བ་སྒྲ་འོད་ཀྱི། །སྣང་བ་དང་བཅས་མཐོང་བ་དེ་ཉིད་ལ། །གཡོ་མེད་སེམས་གནས་དར་ཅིག་བར་དུ་བྱུང་། །སླར་ཡང་ཡུལ་གྲོང་ནགས་ཀླུང་མེ་ཏོག་ཚལ། །ཡིད་འོང་རབ་རྒྱས་དབུས་སུ་ཨོ་རྒྱན་རྗེ། །ཛོ་ཀི་རྣལ་འབྱོར་སྤྱོད་པའི་ཆ་ལུགས་ཅན། །གཟི་བརྗིད་མཚུངས་མེད་ཉི་མ་ལྟར་འབར་བ། །རིག་འཛིན་མཁའ་འགྲོའི་འཁོར་དང་ཁྱད་པར་དུ། །མཚོ་རྒྱལ་མཛེས་སྡུག་མོན་མོའི་ཆ་བྱད་ཅན། །གཡོན་དུ་འཁོད་པའི་རྣམ་པ་གསལ་བ་ལ། །གུས་པས་བཏུད་ཚེ་བྱིན་བརླབས་བརྡ་ཐབས་དང་། །མཚོ་རྒྱལ་ཉིད་ཀྱིས་གླེགས་བམ་ཆུང་ངུ་ཞིག །ཕུར་བུའི་ཟབ་ཆོས་ཡིན་ཞེས་བདག་ལ་གཏད། །
ང་ནི་རྣལ་འབྱོར་བདུད་འདུལ་དྲག་མོ་རྩལ། །བུ་ཁྱོད་རྟག་ཏུ་བྱིན་གྱིས་རློབ་པ་ཡིན། །ཞེས་གསུངས་བདག་གིས་གླེགས་བམ་ཞལ་ཕྱེ་ནས། །ཀློག་པར་བརྩམས་ཚེ་མི་བཟད་རླུང་ཤུགས་ཀྱིས། །ཕྱོགས་བཅུར་ཁྱེར་བའི་སྒྲ་གདངས་ཀཱི་ལ་ཡར། །སྒྲོག་པའི་ངང་ནས་བདག་ཀྱང་བྱང་ཤར་གྱི། །མཁའ་ལ་བྱ་བཞིན་བསྐྱོད་དེ་སོང་བའི་ལམ། །ཤ་རུས་གཅོང་རོང་ཁྲག་གི་འབབ་ཆུ་ཅན། །དུར་ཁྲོད་འཇིགས་པའི་ནགས་ཚལ་དུ་མའི་མཐར། །སྣ་ཚོགས་མེ་ཏོག་རྒྱས་པའི་དགའ་བའི་ཚལ། །ཨསྨ་གཪྦྷའི་འགྲམ་སྟེགས་ཡིད་འོང་གི །དབུས་ན་ཡན་ལག་བརྒྱད་ལྡན་བཀོད་མའི་ཆུ། །ལྕང་ལོ་ཅན་གྱི་བདུད་རྩི་འདི་འོ་ཞེས། །ཐོས་པའི་མོད་ལ་འཐུང་བར་འདོད་པའི་བློས། །ལག་གིས་བཅུས་ཚེ་མཐིང་ཞུན་འདྲ་བའི་ཧཱུྃ། །སྙིམ་པ་གང་བ་ཁ་རུ་མིད་པ་ན། །རྒྱལ་ལོ་བར་ཆད་བདུད་རྩིའི་གཡུལ་ལས་རྒྱལ། །འགྲོ་དོན་བསྟན་པ་མཐའ་རུ་རྒྱས་པར་འགྱུར། །ཞེས་པའི་སྒྲ་གདངས་ནམ་མཁའ་གང་བ་ཙམ། །ཐོས་པའི་རྐྱེན་གྱིས་གཉིད་ལས་སད་པ་ན། །ལུས་སེམས་བདེ་བ་ཆེན་པོར་འབྱམས་ཀླས་པ། །ཡུན་རིང་བར་དུ་རྩོལ་མེད་གནས་པ་བྱུང་། །ནུབ་གཅིག་བུད་མེད་མང་པོས་མདུན་བསུས་ནས། །བཀོད་ལེགས་ཁང་བཟང་ནང་ཞུགས་རིན་ཆེན་ཁྲིར། །བླ་མ་རྗེ་བཞུགས་གུས་པས་ཕྱག་བགྱིས་ཚེ། །སྙིང་ཐིག་འདས་རྗེས་རྫོགས་པར་གསུང་སྙམ་བྱེད། །སྔར་གྱི་བུད་མེད་རྣམས་ཀྱིས་ཀ་པཱ་ལ། །ཤ་ཆང་ཟས་སྣས་གང་བ་གཏད་པའི་མཐར། །ཕྱི་མཐའི་གནས་དུས་བྱ་བྱེད་འགྱུར་ལྡོག་གི །གནས་ཚུལ་འགའ་ཞིག་ལུང་དུ་བསྟན་པ་རྨིས། །ཉི་ཤུ་ལོ་ལ་དར་གླིང་རི་བོའི་སྤོར། །རྟ་མགྲིན་བསྙེན་ཚེ་ནམ་མཁའི་སྤྲིན་གསེབ་ནས། །སྤྱན་རས་གཟིགས་དབང་མཛེས་འཛུམ་འོད་ཟེར་ཅན། །བྱོན་ནས་བདག་ལ་ཐིམ་སྙམ་བྱེད་པ་ན། །ལྷ་འདྲེ་མི་སོགས་རྣམ་འགྱུར་མ་ངེས་པའི། །འགྲོ་བ་མང་པོས་བདག་ལ་འདུད་པ་སོགས། །སྣང་ཉམས་ཤེས་ཉམས་ཟད་མི་ཤེས་པ་དང་། །གང་ཤར་སྒྱུ་མ་སྤྲོས་བྲལ་ཉིད་དུ་རྟོགས། །ཉེར་གཅིག་ལོ་ནང་གྲུ་འཛིན་ཕོ་བྲང་ཆེར། །ཐམས་ཅད་མཁྱེན་ཞབས་ཟབ་གཏེར་ཐོག་མ་ཡི། །བཀའ་གཏད་ཕུལ་ཚེ་རྗེ་ཉིད་ཆོས་རྒྱལ་གྱི། །རྣམ་པར་མཐོང་བས་རྐྱེན་བྱས་ཁྲི་སྲོང་དང་། །བཻ་རོའི་ལས་
འབྲེལ་སྔ་ཕྱིའི་སྐྱེ་བ་འགའ། །ཐོགས་མེད་ཡིད་ཤེས་ཙམ་དུ་གསལ་བར་ཤར། །བཟང་པོའི་ལས་ཀྱི་འཕྲོ་ཡི་བག་ཆགས་འགའ། །རྒྱུ་རྐྱེན་རྟེན་འབྲེལ་དབང་གིས་སད་པ་སྙམ། །སྐབས་ཤིག་ཉམས་གྲིབ་རྐྱེན་གྱིས་ཡུན་རིང་པོར། །སྲོག་ལ་འབབ་འདྲའི་ནད་ཀྱིས་མནར་བའི་ཚེ། །མཁའ་འགྲོའི་བསྐང་བཤགས་སྒྲུབ་ཚེ་ཝཱ་ར་ཧི། །བདག་འཛིན་ཞེན་ངོར་མི་སྡུག་ཁྲོ་ཚུལ་དང་། །འཛིན་མེད་རིག་རྩལ་ནང་གི་རྣལ་འབྱོར་མ། །འཆི་མེད་བུ་མོའི་འཇོ་སྒེག་ངོམ་པ་ནི། །སུ་ཁའི་ཉམས་དང་བརྡའ་ཚིག་གླུ་སྒྲ་ཡིས། །ན་བའི་རང་བཞིན་སྒྱུ་མར་ངོ་ཡང་སྤྲད། །སླར་ཡང་ནང་གི་མུན་པ་ཆེན་པོའི་མདངས། །འཕྲོག་བྱེད་ཞལ་ཅན་འཇིགས་པའི་རྣམ་འགྱུར་ནི། །གློག་ལྟར་འཁྱུག་པས་ནམ་མཁའི་ལམ་ཡངས་ནས། །བདུད་ལས་རྒྱལ་བའི་གད་རྒྱང་འབྲུག་བཞིན་ལྡིར། །དེ་ནས་གཟུང་འཛིན་གཅོད་པའི་རང་རིག་རྩལ། །རྣོ་དབལ་ཀརྟ་རི་ཡི་རྣམ་པ་ཅན། །སྙིང་ག་ནས་ཐོན་མདུན་གྱི་ནམ་མཁའ་ལ། །ཇེ་མཐོར་སོང་བ་མཁའ་དང་འཁྲུག་གིས་འདྲེས། །དེ་ཉིད་སྣང་བ་ཀུན་དང་རོ་གཅིག་པའི། །བདེ་གསལ་མི་རྟོག་ཉམས་རྩལ་རབ་འབར་བའི། །ངོ་བོ་འགྱུར་མེད་མཐར་སོན་སད་པ་ན། །ལུས་སེམས་བདེ་བའི་ཉམས་རྒྱས་ནད་ལས་གྲོལ། །ལོ་དེར་ནུས་འབྱིན་ས་ལེ་གཟུགས་གཞན་དུ། །སྨོན་ལམ་དུས་སུ་སད་པ་པདྨ་ཅན། །བདེ་བས་བདེ་བའི་མཐར་སོན་ཡ་མཚན་གྱི། །རི་མོ་ནམ་མཁའི་དབྱིངས་སུ་རང་གྲོལ་བའི། །གཟུགས་བརྙན་རྨི་ལམ་བྲག་ཆའི་དཔེས་མཚོན་པ། །གཉུག་མའི་འོད་གསལ་ཡེ་ཤེས་སྒྲོན་མེ་ལ། །གསལ་འགྲིབ་སྤངས་པ་གསལ་འགྲིབ་ཅན་དུ་ཤར། །དེ་ཡི་རྟེན་འབྲེལ་རྒྱུ་རྐྱེན་མངོན་དུ་མཐོང་། །དེ་ཡང་འདི་ལྟར་དར་གླིང་རི་བོའི་སྤོར། །ཐུགས་ཐིག་རིག་འཛིན་བླ་མའི་དཀྱིལ་འཁོར་དུ། །འཆི་མེད་བདུད་རྩིའི་སྒྲུབ་པ་བྱས་པའི་མཐར། །དད་འདུས་སྐལ་ལྡན་འགའ་ལ་བྱིན་བརླབས་ཚེ། །གུ་ཧྱ་ཛྙཱ་ན་བདེ་ཆེན་ཌཱ་ཀི་ནཱི། །ས་ལེའི་རྣམ་འགྱུར་ཤེས་རབ་གཟུགས་འཛིན་དེའི། །ཁུར་ཚོས་ལི་ཁྲིའི་ཨ་ཡིག་འབར་བ་ཡིས། །བདེ་དང་སྟོང་པའི་ཡེ་ཤེས་མཚོན་བྱས་ནུབ། །རྨི་ལམ་འཁྲུལ་ངོར་འཆི་མེད་གཞོན་ནུའི་ཚོགས། །སྙན་པའི་རོལ་མོ་གླུ་སྒྲའི་འགྱུར་ཁུགས་བཅས། །ནམ་མཁའི་ལམ་ལས་འཇའ་ཚོན་སྤྲིན་
ཕུང་སྟེང་། །མེ་ཏོག་ཆར་ཟིམ་འབེབས་བཞིན་སོན་པ་ཉིད། །ཉེ་བར་སླེབས་ཚེ་ཤེས་རབ་ཡུམ་གྱུར་དེས། །རིན་ཆེན་སོར་གདུབ་ནོར་བུའི་ཕྲ་ཚོམ་ཅན། །བདེ་ཆེན་ཡེ་ཤེས་བསྐྱེད་པའི་རྟེན་ཉིད་དུ། །བྱིན་པའི་མོད་ལ་ནོར་བུའི་བྲག་སྟེང་ན། །གནས་པས་བདུད་ལས་རྒྱལ་བའི་མཚན་མ་ནི། །རིན་ཆེན་འབར་བའི་ཏོག་ཅན་བཟུང་བའི་མོད། །ནམ་མཁར་ཨོ་རྒྱན་ཆེན་པོ་གཙོ་འཁོར་བཅས། །བཞུགས་པས་བདུད་རྩིའི་བུམ་བཟང་སྩོལ་བ་ཐོབ། །དེ་ནས་ལྷ་ལྷན་སྤྲུལ་པའི་གཙུག་ལག་ཆེར། །བསྐོར་བ་བགྱིས་དུས་ཉིན་གཅིག་མཆོད་ཁང་གི །ལྕགས་ཁྲ་གདོང་ནས་ཇོ་བོ་མཇལ་བའི་ཚེ། །སྐུ་ཚད་ཉིས་འགྱུར་ཙམ་དུ་འཕགས་པ་ལ། །ལྟ་བས་མི་ངོམས་མཚན་དཔེའི་གཟི་བྱིན་ཅན། །ཞལ་གྱི་དཀྱིལ་འཁོར་འཛུམ་ཞིང་བཞད་པ་ལས། །དྲི་མེད་འོད་ཟེར་འཕྲོ་བས་གནས་ཁང་ཀུན། །ཉི་མ་ལྟ་བུར་གསལ་བར་བྱས་པའི་མཐར། །མུ་ནིའི་གཟུངས་ཀྱི་སྒྲ་དང་འོད་ཟེར་བཅས། །རང་གི་སྙིང་གར་ཐིམ་པའི་མོད་ཉིད་ལ། །འཛིན་མེད་མཉམ་ཉིད་ངང་དུ་རེ་ཞིག་འདས། །སད་ནས་ལུས་སེམས་བདེ་བས་ཡུན་རིང་འཚོ། །རྒྱལ་ཟླའི་ནང་དུ་འདུས་པ་སྟོང་ཚོ་ཙམ། །ཚོགས་སྒྲུབ་བླ་མའི་དཀྱིལ་འཁོར་ལ་བརྟེན་པའི། །དབང་བསྐུར་དུས་སུ་དཔའ་བོ་མཁའ་འགྲོ་ཡི། །ལྷ་རྫས་མཆོད་སྤྲིན་དུ་མས་བསྟི་སྟང་བྱས། །ནུབ་ཕྱོགས་མཁའ་ལ་ཐོགས་མེད་སོང་བ་མཐོང་། །འདུས་པས་བྱ་རྒོད་བསྐོར་བ་བྱེད་པ་དང་། །དབང་པོའི་གཞུ་འདྲའི་འཇའ་ཚོན་གུར་ཁང་ནས། །མེ་ཏོག་ཆར་ཟིམ་འབབ་པ་བསྙོན་མེད་མཐོང་། །ཉེར་གཉིས་ལོར་སོན་མཆུ་ཟླའི་བཅོ་ལྔ་ལ། །སྐལ་ལྡན་འགའ་ལ་ཐུགས་ཐིག་དབང་བགྱིས་ཚེ། །སྙན་པའི་རྔ་སྒྲ་སྒྲོག་དང་དྲི་བཟང་ངད། །འཐུལ་བ་དེར་ཚོགས་ཀུན་གྱིས་གཏན་ལ་ཕེབས། །ལོ་དེར་བསམ་ཡས་རྟ་མགྲིན་ལྷ་ཁང་གི །དབང་ཆེན་སྐུ་ཉིད་དངོས་སུ་དར་ཅིག་མཐོང་། །རྟ་སྐད་བཞད་སྒྲས་སྐྱི་བུང་སྙམ་བྱེད་ཅིང་། །ཞལ་ནས་བདུད་རྩི་བཟུང་དུ་བཏུབ་པ་བསྩལ། །སྐབས་ཤིག་དེ་ཡི་ཇོ་བོ་གཙོ་འཁོར་ལྔ། །གདོས་བཅས་མིན་པར་དངོས་སུ་བཞུགས་པ་ལས། །མཛེས་འཛུམ་འོད་ཟེར་སྤྲོ་ཞིང་གསུང་བགྲོ་བར། །ཤིན་ཏུ་གསལ་བ་སྐད་ཅིག་ཙམ་ཞིག་མཐོང་། །སླར་ཡང་ནག་ཟླའི་བཅུ་ལ་ཞིང་སྐྱོང་གི །ཌཱ་ཀི་རྣམ་བཀྲའི་
གོས་ཀྱིས་ལྷབ་ལྷུབ་གོས། །གཡོ་བས་མ་ཧཱ་སུ་ཁའི་བརྡ་ཐབས་བསྟན། །འཇམ་དཔལ་ཆོས་ཀྱི་ཁ་བྱང་ལག་ཏུ་སོན། །སྐབས་དེར་དུང་ཅན་རྡོ་རྗེ་རེག་བྱ་མའི། །ཀཱ་ཡ་སུ་ཁས་གཉུག་མའི་སེམས་ཀྱི་གཤིས། །འགྱུར་མེད་བདེ་བར་མཚོན་པའི་མེ་ལོང་བཞིན། །གསལ་བས་རང་ལུས་རྩ་ཡི་འཆིང་བྱེད་བཀྲོལ། །མེ་ལུག་ཁྲུམས་ཟླའི་བརྒྱད་ལ་ཤེལ་རི་ནས། །འཇམ་དཔལ་ཁྲོ་བོའི་ཟབ་ཆོས་གདམས་པ་རྣམས། །རིག་རྩལ་འགག་མེད་ཤུགས་འབྱུང་རྣམ་རོལ་གྱིས། །སྤྱན་དྲངས་བསྟན་འགྲོར་ཕན་བདེའི་སྲོག་ཏུ་གྲུབ། །ཉེར་གསུམ་ལོ་ནང་སྐྱིད་ཤོད་བདེ་ཆེན་རྩེར། །སོང་བའི་ལམ་ཚིགས་སྒྲགས་ཕུར་ཞིང་སྐྱོང་མ། །མོན་མོའི་ཆས་ཀྱིས་ཀུན་མཁྱེན་བླ་མ་ཡི། །སྐུ་ཚེའི་འགལ་རྐྱེན་སེལ་བྱེད་རྟེན་འབྲེལ་བཅོས། །བསྟན་པའི་དོན་བཞིན་བསྒྲུབ་ན་འགལ་རྐྱེན་གེགས། །གཞན་དུ་འགྱུར་ཞེས་སྨྲས་པ་གསོང་པོ་རུ། །གསོལ་བའི་གནས་ཚུལ་རིང་མིན་དུས་ཉིད་དུ། །གཏན་ལ་ཕེབས་པས་ཡིད་ཆེས་གནས་སུ་འཛིན། །ཆོས་འཁོར་ལྷ་སར་ཚེ་སྒྲུབ་བགྱིས་པའི་སྐབས། །རང་བྱོན་ལྔ་ལྡན་ཐུགས་རྗེ་ཆེན་པོའི་སྐུ། །འཛུམ་ཞིང་བཞད་པའི་གསུང་གིས་དབུགས་དབྱུང་ཞིང་། །བྱིན་གྱིས་བརླབས་པའི་སྣང་བ་གསལ་བར་མཐོང་། །སྣྲོན་ཟླའི་ཉེར་གཅིག་གྲུ་འཛིན་ཕོ་བྲང་ཆེར། །འཇིག་རྟེན་དབང་ཕྱུག་བླ་མའི་ཞབས་པད་བསྙེན། །འཇམ་དཔལ་ཁྲོ་བོའི་ཆོས་བཀའ་དང་པོ་རུ། །ཕུལ་ཚེ་མེ་ཏོག་ཆར་ཆེན་འབེབས་པ་དང་། །དབང་གི་ནུབ་མོ་རྔ་ཡབ་དཔལ་རིའི་རྩེར། །ཨོ་རྒྱན་ཆེན་པོ་མཁའ་འགྲོའི་འཁོར་ཚོགས་དང་། །ཁྱད་པར་བཻ་རོ་ཆོས་རྒྱལ་ཡབ་སྲས་སོགས། །ལས་འབྲེལ་སྨོན་ལམ་མཐུན་པའི་ཚོམ་བུར་བཅས། །ཡེ་ཤེས་དཀྱིལ་འཁོར་ཆེན་པོའི་རྣམ་རོལ་དུ། །དབང་བསྐུར་བྱིན་བརླབས་དགའ་ཆེན་རོས་བརྩེན་ཅིང་། །འཆི་བདག་དྲེགས་པས་དམ་ནོས་འདུད་པ་སོགས། །ངོ་མཚར་སྣང་ཆ་རྨི་ལམ་ཆུ་མཚོར་གསལ། །ཕྱིར་འཁོར་གྲུབ་གནས་མེ་ཏོག་ཚལ་ནང་དུ། །བྱིན་བརླབས་སྦྲང་རྩི་འཐུང་པའི་མགྲིན་སྙན་ལས། །ལུང་སྟོན་གླུ་དབྱངས་སྒྲོག་པའི་བུང་བ་རྣམས། །འཕུར་ལྡིང་བསོད་ནམས་སྙེ་མའི་མགྲོན་དུ་ཁུགས། །རང་ལོ་ཉེར་བཞི་ཞི་བ་དབོ་ཟླའི་ནང་། །བསམ་གཏན་བདུད་རྩིའི་བདེ་བ་བསྟེན་པའི་ཚེ། །མཚོ་སྐྱེས་རྡོ་རྗེ་
ཡིད་བཟང་གཞོན་ནུའི་ཚུལ། །ལེགས་བྲིས་མཛེས་མའི་འཁོར་གྱིས་བསྟེན་པ་ཅན། །མཁའ་ལ་ཡུད་ཀྱིིས་སྣང་བ་གསལ་མཐོང་ཞིང་། །ཡིད་ཀྱི་མེ་ལོང་ནང་དུ་འབྱུང་འགྱུར་གཟུགས། །གསལ་པོར་ཤར་བའི་གནས་ལུགས་ཕྱི་དུས་སུ། །མངོན་སུམ་གྲུབ་པ་ཚངས་པའི་རི་མོ་བཞིན། །སྟོན་དུས་ལྷ་ལྡན་གྲུ་འཛིན་རི་བོའི་སྤོར། །འཇིག་རྟེན་མགོན་པོ་རྣམ་འདྲེན་བླ་མའི་དྲུང་། །རྡོ་རྗེ་ཐེག་པའི་ཆོས་ཚུལ་མཐའ་ཡས་པའི། །དབང་ལུང་མན་ངག་བདུད་རྩི་བསྟབ་པ་ལས། །སྙིང་ཐིག་སྤྲོས་བཅས་དཀྱིལ་འཁོར་སྟེང་གི་མཁར། །འོད་ལྔའི་གུར་ཁྱིམ་ཡི་གེའི་འཁོར་ལོ་ཅན། །རང་གདངས་རྡོ་རྗེའི་སྒྲ་དབྱངས་སྙན་སྒྲོག་པ། །བུང་བ་ཚང་ཞིག་ལྟ་བུར་སྣང་བ་ལ། །སེམས་འདྲེས་བདེ་དང་སྟོང་པ་རོ་གཅིག་པའི། །མི་རྟོག་ཏིང་འཛིན་ངང་དུ་འབྱམས་པ་དག །གཞན་རྐྱེན་བརྡ་ཡིས་བསྐུལ་ནས་སད་པ་ལས། །ཏིང་འཛིན་ཉམས་ཀྱིས་ཞག་འགའ་འཚོ་བར་གྱུར། །སྐབས་དེར་ཀུན་མཁྱེན་བླ་མ་ཞབས་འབམ་གྱིས། །བསྙུན་ཚུལ་བསྟན་པར་དྲག་དམར་ཟོར་སྒྲུབ་སོགས། །སྒྲུབ་ཚེ་རྗེ་ཡི་འོད་གསལ་གཟིགས་སྣང་ལ། །ཡི་གེ་བཀོད་པའི་ཤོག་དྲིལ་སྣ་ཚོགས་པ། །ཞབས་ལ་དཀྲིས་པ་གཞན་གྱིས་བཀྲོལ་བ་དང་། །དུས་མཚུངས་རག་དུང་དབྱིབས་འདྲའི་ཞབས་སྦུབས་ནས། །སྦྲུལ་གཟུགས་མཐིང་ནག་གོས་ཅན་སྔགས་འཆང་གིས། །ཕྱིར་ཕྱུང་བསྲེགས་སྦྱངས་བྱས་པ་བདག་ལ་རྨིས། །ནངས་པར་སྤྲིན་བྲལ་ཟླ་བཞིན་གྱུར་པ་དང་། །རིམ་བཞིན་དུས་ཅན་སྙུན་པའི་གེགས་བྲལ་བའི། །དགེ་མཚན་མངོན་དུ་གྱུར་པས་དབུགས་དབྱུང་ཞིང་། །རྗེས་སུ་བསྔགས་པའི་ཚུལ་ལ་སུ་ཞིག་བསྙོན། །སྐབས་ཤིག་ལྷོ་བྲག་སྨྲ་བོའི་དབེན་གནས་སུ། །མངའ་བདག་གདུང་ཐ་ཆོས་ཀྱི་དབང་པོ་ལ། །མཁའ་འགྲོ་ཆེན་མོའི་ཆོས་སྐོར་ནོད་པ་དང་། །གཏེར་རྫས་བླ་དཔེ་ལ་སོགས་མཇལ་བའི་ཚེ། །ནུབ་ཕྱོགས་མཁའ་ལ་རྡོ་རྗེ་བཙུན་མོའི་སྐུ། །དམར་གསལ་མེ་འོད་འཕྲོ་བ་གཟི་མདངས་ཅན། །ནམ་མཁའ་གང་བའི་ཡེ་ཤེས་སྐུར་གསལ་ཞིང་། །སྔགས་སྒྲ་འབྲུག་སྟོང་ལྟ་བུར་སྒྲོག་པའི་སྒྲས། །འཇིགས་སྐྲག་སྣང་བ་རང་ཤར་རིག་པའི་ངོར། །གྲོལ་ཚེ་སྐུ་ཡང་མེ་ལོང་ཧས་བཏབ་ལྟར། །བཾ་ཡིག་འོད་ཀྱི་ཐིག་ལེར་ཞུ་བ་ལས། །སྙིང་གར་ཐིམ་པའི་གསལ་སྣང་ཤིན་ཏུ་བརྟན། །
དེ་ཚེ་མཚན་མོའི་འཁྲུལ་རྟོག་ཁང་བཟང་ནང་། །མངའ་བདག་བླ་མ་རལ་པའི་ཐོར་ཚུགས་ཅན། །མཚུངས་མེད་གཟི་མདངས་རྒྱས་པས་ཟབ་ཆོས་ཀྱི། །གདམས་པའི་བདུད་རྩིས་སྐལ་བཟང་མཛད་པ་རྨིས། །དེ་ཚེ་ལྷོ་ཕྱོགས་བརྒྱུད་ནས་ཕྱིར་འཁོར་ལམ། །འབྲོག་དགོན་མྱ་ངམ་ཐང་གི་ཞག་ལམ་དུ། །དུག་ལྔའི་རང་གདངས་རྟོག་ཚོགས་གཉིས་འཛིན་གདོན། །མི་བཟད་ཆ ོ་འཕྲུལ་ཅིར་ཡང་སྟོན་པ་ཡི། །འཇིགས་ཟིལ་སྣང་ཆ་རིག་པའི་རང་རྩལ་དུ། །རྟོགས་ནས་ཅུང་ཟད་མནལ་བའི་རྨི་ལམ་དུ། །སྨུག་ནག་མཁའ་འགྲོ་བརྗིད་པའི་གཟི་མདངས་ཅན། །རུས་པའི་རྒྱན་ཅན་མི་ཐོད་ཀླད་ཁྲག་གིས། །གང་བ་གསོལ་ཞིང་ན་རའི་ཁྲིར་འཁོད་ནས། །གཟུང་འཛིན་འཁྲུལ་གཅོད་གདམས་པའི་གནད་གསང་བསྟན། །སད་ནས་དེ་དོན་ཉམས་སུ་བསྟར་བ་ལས། །བར་གཅོད་ཡུལ་ལས་རྒྱལ་བའི་མཚན་མ་ཐོབ། །གྲུ་འཛིན་གནས་སུ་འཇིག་རྟེན་དབང་ཕྱུག་གི །དག་སྣང་ཟབ་དོན་གདམས་པ་རྒྱ་ཅན་རྣམས། །དབང་ལུང་ཆོས་ཀྱི་བདུད་རྩི་སྐལ་བ་བཞིན། །སྩལ་ཚེ་དྭངས་ཤེལ་ལྟ་བུའི་ཁང་བཟང་ནི། །ཕྱི་ནང་སྒྲིབ་མེད་བཀོད་ལེགས་ཡིད་འོངནང་། །སྤྱན་རས་གཟིགས་མགོན་འོད་ཀྱི་དྲ་བ་ཅན། །མཐོང་ཚེ་དད་པའི་སེམས་ཀྱིས་བཏུད་པ་ལས། །རང་ཉིད་བློ་ཡི་རྗེས་ཞུགས་གཉིས་མེད་འདྲེས། །སྐུ་ཡི་རྣམ་པ་སྔར་བཞིན་གསལ་བ་ལ། །ནམ་མཁའ་གང་བའི་ལྷ་དང་ལྷ་མོ་ཡིས། །དབང་བསྐུར་བཀྲ་ཤིས་མེ་ཏོག་ཆར་འབེབས་ཤིང་། །དབུགས་དབྱུང་གཟེངས་བསྟོད་མངའ་གསོལ་བྱས་པ་རྨིས། །དེ་ཚེ་མཚན་རྒྱུའི་འབྱུང་པོ་མི་བསྲུན་པ། །ཞེ་སྡང་གདུག་སེམས་རང་གི་ཉེ་དུ་ཡང་། །བཟའ་བར་རྩོམ་འདི་འདུལ་བར་གྱིས་ཤིག་ཅེས། །གསུང་གི་གནང་བས་རྗེས་སུ་བསྐུལ་བ་ན། །སྙིང་རྗེའི་རྩལ་སྣང་གཏུམ་དྲག་ལྷར་ཤར་བའི། །ཕྲིན་ལས་ཧོ་མའི་ལས་སྦྱོར་ལ་ཞུགས་ཚེ། །ཕོ་ཉའི་འཁོར་གྱིས་ལུས་མེད་ཞགས་པས་སྐེ། །བཅིངས་པ་ཁྲིད་ནས་བསྒྲལ་ཅིང་བཅོམ་པ་མཐོང་། །སླར་ཡང་གྲུ་འཛིན་གནས་སུ་སྣང་སྲིད་ཀྱི། །ལྷ་སྲིན་རྣམས་ལ་བཀའ་བསྒོ་དམ་བསྒྲགས་ཚེ། །སྡེ་བརྒྱད་དྲེགས་པས་བཀའ་ནོད་ལས་བསྒྲུབས་པའི། །རྣམ་འགྱུར་ཉམས་སྣང་ཡུལ་དུ་གསལ་བར་ཤར། །དེ་ཚེ་གདུག་བྱེད་འགའ་ལ་སྲེག་པ་དང་། །དྲག་པོའི་ཟོར་
ལས་བྱད་གདོན་འགྲོལ་བ་སོགས། །ལས་སྦྱོར་དུ་མའི་གྲུབ་འབྲས་མངོན་སུམ་དུ། །གྱུར་པའི་ངོ་མཚར་ཀུན་གྱིས་གསལ་བར་མཐོང་། །ཁྱད་པར་གངས་ཅན་ལྗོངས་འདིར་ཕན་དང་བདེའི། །ཐབས་དང་རྟེན་འབྲེལ་དུ་མའི་བླང་དོར་རྣམས། །ཡེ་ཤེས་ལྷ་དང་འཇིག་རྟེན་དྲེགས་པ་འགས། །གསལ་པོར་བསྟན་པ་མངོན་སུམ་བཞིན་དུ་གྲུབ། །ཆོས་འཁོར་ལྷ་སར་གྲུབ་ཆེན་ཀ་ཧྣ། །གཟི་མདངས་མཚུངས་མེད་རྣལ་འབྱོར་སྤྱོད་པའི་ཆས། །བརྡ་ཐབས་ཕྱག་རྒྱས་བྱིན་གྱིས་བརླབས་པའི་ཚུལ། །མངོན་སུམ་བཞིན་དུ་ཡུད་ཅིག་གསལ་བར་མཐོང་། །ཡང་རྫོང་གནས་སུ་ཚོགས་མཆོད་བགྱིས་པའི་ནུབ། །དྭངས་ཤེལ་བརྩེགས་འདྲའི་མཐོན་མཐིང་རྡོ་ཡི་ཕུག །བཀོད་ལེགས་སྒོ་དང་ཐེམ་སྐས་རིམ་པ་ཅན། །དེ་ནང་གནུབས་ཆེན་སྔགས་ཆས་བརྗིད་པའི་སྐུ། །རྒྱ་བན་གཞོན་ནུ་མཛེས་མའི་འཁོར་དང་བཅས། །བཞུགས་པས་འབྱུང་འགྱུར་འགའ་ཡི་ལུང་བསྟན་དང་། །ཁྱད་པར་ཕུག་པའི་ངོས་ཡང་མཐིང་ཞུན་ལྟར། །དྭངས་པར་ཟབ་དོན་ཡི་གེའི་འཕྲེང་བའི་ཚོགས། །གསེར་མདོག་སྣང་བ་བཀླགས་པས་དེ་ཡི་དོན། །བཀྲོལ་ནས་ཞིབ་མོར་གསུང་སྙམ་བྱེད་པ་རྨིས། །སད་ཚེ་བདེ་ཆེན་ཉམས་ཀྱི་སྣང་ཆའི་རྩལ། །ཟབ་དོན་དཀའ་གནད་འགའ་ཞིག་གོ་སྙམ་བགྱིད། །གྲུ་འཛིན་གནས་སུ་དཀོར་བདག་ཆོ་འཕྲུལ་རྣམས། །ཏིང་འཛིན་མཐུ་ཡིས་ཟིལ་གྱིས་མནན་པ་དང་། །ཟུར་ཕུད་ལྔ་པ་དཔལ་གྱི་ལྷ་མོ་སོགས། །བསྟན་སྲུང་དུ་མས་བཏུད་ཅིང་དམ་ཚིག་ནོས། །མ་འོངས་འབྱུང་འགྱུར་དུ་མའི་རྣམ་པ་རྣམས། །ལུང་དུ་བསྟན་པའི་རྨི་ལམ་འཁྲུལ་སྣང་ཡང་། །ཇི་བཞིན་འཆུགས་མེད་གཏན་ལ་ཕེབས་པ་ནི། །ཀུན་གྱིས་མཐོང་གསལ་གནས་སུ་གྱུར་པ་ཉིད། །དེ་ཚེ་ཟབ་ཡངས་བར་ཁང་བཀོད་པ་ནི། །མངོན་སུམ་བཞིན་ལས་ཡངས་ཤིང་ཆེར་འཕགས་པར། །བཀོད་ལེགས་ཁྲི་ལ་ཆོས་ཀྱི་དབང་ཕྱུག་དང་། །ཀུན་སྤངས་བསོད་རྒྱལ་རྣམ་གཉིས་བཞུགས་པའི་འཁོར། །རིག་འཛིན་རྣལ་འབྱོར་དུ་མས་བསྐོར་བའི་དབུས། །ཕྲིན་ལས་རྡོ་རྗེ་ཕུར་པའི་དཀྱིལ་འཁོར་ནི། །རྟེན་དང་བརྟེན་པར་བཅས་པ་མངོན་སུམ་བཞིན། །ཕྱི་ནང་སྒྲིབ་མེད་གསལ་བར་དབང་བསྐུར་ཞིང་། །སྔགས་དང་ཕྱག་རྒྱས་བྱིན་བརླབས་བཀའ་གཏད་ནས། །ཐམས་
ཅད་མཐིང་ཞུན་ལྟ་བུའི་ཐིག་ལེར་ཞུ། །དེ་ཉིད་བདག་ཐིམ་བདག་ཀྱང་ནམ་མཁའ་ལྟར། །སྤྲོས་བྲལ་སྟོང་ཉིད་དབྱིངས་སུ་རེ་ཞིག་འདས། །གཞན་ཡང་ཆོས་ཀྱི་རྒྱལ་པོ་སྲོང་བཙན་དང་། །བི་མ་བཻ་རོ་ལ་སོགས་དམ་པ་འགས། །བྱིན་བརླབས་གདམས་པའི་གནད་དང་ལུང་བསྟན་སོགས། །མཛད་པའི་ཚུལ་རྣམས་ཤིན་ཏུ་གསལ་བར་རྨིས། །ཀུན་མཁྱེན་བླ་མར་འཇོམས་བྱེད་དབང་བསྐུར་དང་། །ཚེ་དབང་ཕུལ་ཚེ་དཀྱིལ་འཁོར་འཁོར་ལོར་བཅས། །མེ་ལོང་གཟུགས་བཞིན་གསལ་བས་བྱིན་བརླབས་པའི། །ངོ་མཚར་མཚན་མ་མངོན་སུམ་ཉིད་དུ་གཟིགས། །ཀུན་དགའི་ལོ་ཡི་ཆུ་སྟོད་ཉི་ཤུའི་ནུབ། །ཤིན་ཏུ་ཆེ་བརྗིད་མཁའ་ལྡིང་ལ་ཞོན་ནས། །ཐོགས་མེད་ནམ་མཁའི་ལམ་ཡངས་སོང་བ་ལས། །རིན་ཆེན་རི་དབང་དབྱིབས་ལེགས་བལྟ་ན་སྡུག །ལྗོན་ཤིང་ནགས་ཚལ་མེ་ཏོག་ཆུ་མཚོ་ཡིས། །རྣམ་པར་བསྐོར་བའི་ཁང་བཟང་བཀོད་ལེགས་ན། །གནོད་སྦྱིན་དབང་པོ་འཁོར་དང་བཅས་པ་ཡི། །ངོ་མཚར་བཀོད་པ་བསམ་མི་ཁྱབ་མཐོང་ནས། །སླར་ཡང་ཤར་ཕྱོགས་མཁའ་ལ་སོང་བའི་སྒྲས། །ཁོར་ཡུག་ཁྱོན་ཀུན་གཡོ་བ་སྙམ་བྱེད་པའི། །རྐྱེན་གྱིས་ས་གཞིའི་འགྲོ་བ་སྣ་ཚོགས་པས། །བདག་ལ་མཆོད་བསྟོད་སྲི་ཞུར་བྱེད་པ་རྨིས། །གུང་ཐང་མཁར་དུ་ཤར་ཕྱོགས་ནམ་མཁའི་དབྱིངས། །འོད་ཀྱི་ཐིག་ལེ་སྲན་མ་འཕོས་པ་ཙམ། །ཁ་དོག་སྣ་ཚོགས་གྲངས་མེད་འབྲེལ་བའི་ནང་། །སྐུ་དང་ཡིག་འབྲུའི་སྟོང་གཟུགས་སྣ་ཚོགས་པ། །ཤར་བ་གཅིག་ལ་གཅིག་ཐིམ་མཐིང་ཞུན་མདངས། །གསལ་ཞིང་འབར་བ་ཡུངས་འབྲུ་ལྟར་གྱུར་ནས། །སྨིན་ཕྲག་ཐད་ཀྱི་མཁའ་ལ་ཡལ་བའི་མཐར། །སྟོང་ཉིད་སྤྲོས་བྲལ་ངང་དུ་རེ་ཞིག་འདས། །དཀར་པོ་ཟངས་སུ་མཚོ་སྟེང་ཁྱབ་པ་ཡི། །ཐིག་ལེ་མུ་ཁྱུད་ཁ་དོག་སྣ་ཚོགས་པ། །དེ་ནང་སྟོང་གཟུགས་སྣང་བ་འབྱམས་ཀླས་པའི། །ངོ་མཚར་སྒྱུ་མ་དགའ་བའི་རོལ་མོར་ཤར། །ཁྱད་པར་མཁའ་འགྲོ་ལེགས་བྲིས་སྒེག་མོའི་གཟུགས། །མཛེས་སྡུག་ལང་ཚོ་ལྡན་པས་ལུང་བསྟན་པའི། །རྨི་ལམ་གསལ་བའི་ནངས་པར་ཟབ་གཏེར་གྱི། །ཁ་བྱང་ལྡེ་མིག་ཤོག་དྲིལ་ལག་ཏུ་སོན། །རྒྱལ་ཁབ་ཆེན་པོར་སྔར་སྨོས་ལུང་བསྟན་བཞིན། །ཡུལ་འཁོར་སྲུང་གི་རབ་གནས་སྒྲུབ་པ་ལ། །
ཞུགས་ཚེ་འཆི་བདག་གཤིན་རྗེའི་རྒྱལ་པོ་ཉིད། །ཕོ་བརྒྱད་མོ་བརྒྱད་དྲེགས་པའི་འཁོར་ཚོགས་ཀྱིས། །བསྐོར་བ་དམག་གི་ཁྲོམ་བཞིན་འཁྲིགས་པ་ན། །རིག་རྩལ་དུས་དགྲ་གཉེན་པོའི་ལྷར་ཤར་བས། །ཟིལ་མནན་བཀའ་བསྒོ་དམ་ནོས་ཕྲིན་ལས་བཞི། །ཐོགས་མེད་སྒྲུབ་པའི་གསལ་སྣང་ཡུད་ཅིག་ཤར། །འདུམ་པོར་མེས་པོ་དོན་གྲུབ་དབང་གི་རྒྱལ། །ལྔ་པར་གྱུར་ཚེ་སྒྲིབ་སྦྱོང་བྱས་པའི་ནུབ། །རྡོ་རྗེ་བཙུན་མོ་མི་མོའི་རྣམ་པ་ཡིས། །མཁའ་སྤྱོད་གནས་སུ་བདེ་བར་ཁྲིད་པ་མཐོང་། །ཐར་གླིང་གནས་སུ་སྲིན་པོའི་མགོ་ཟླའི་བཅུར། །ཁོར་ཡུག་རི་ངོགས་གདུགས་དང་རྒྱལ་མཚན་སོགས། །རྣམ་མང་མཆོད་པའི་ཚོགས་ཀྱིས་སྤྲིན་གཏིབས་ཤིང་། །སྙན་པའི་སྒྲ་དབྱངས་འབྲུག་ལྟར་ལྡིར་བ་དང་། །ལྷན་ཅིག་རིན་ཆེན་མེ་ཏོག་ཆར་འབེབས་ཤིང་། །དབུས་ན་འཇའ་ཚོན་གུར་ཁྱིམ་འཁྲིགས་པའི་ཀློང་། །ཨོ་རྒྱན་ཆེན་པོ་མཁའ་འགྲོའི་འཁོར་བཅས་ཀྱིས། །བྱིན་བརླབས་ལུང་བསྟན་དབུགས་དབྱུང་མཛད་པ་རྨིས། །སླར་ཡང་གྲུ་འཛིན་རི་བོར་སྲིན་པོའི་ལོའི། །རྒྱལ་ཟླའི་སྟོང་ལ་མ་མགོན་སྤྲུལ་པ་ཡི། །སྐྱོན་རྣམས་མཚང་འདྲུའི་ཚུལ་དང་བླང་དོར་གྱི། །ལུང་བསྟན་དུ་མ་གསལ་པོར་གསུང་བ་རྨིས། །མེ་འབྲུག་མཆུ་ཟླའི་གསུམ་ལ་དེ་ཉིད་དུ། །ཡེ་ཤེས་མཁའ་འགྲོ་མཛེས་བརྗིད་ལང་ཚོ་མས། །གནས་མལ་གཞི་འཛིན་དུས་དང་རྟེན་འབྲེལ་གྱི། །བཅོས་ཁའི་རྣམ་གྲངས་དུ་མ་གསལ་པོར་བསྟན། །ས་གཟུང་དུས་སུ་དཔལ་ཆེན་ཀུ་མཱ་རའི། །གསལ་སྣང་རེག་མཐོང་ལྟ་བུར་འཆར་བ་དང་། །ཡིད་ཤེས་མ་འོངས་འབྱུང་འགྱུར་ཇི་སྙེད་ལས། །སྔོན་སོང་རྡོ་ཡི་རི་མོ་བཞིན་དུ་བཙན། །ཟངས་རིར་ནག་ཟླའི་ཚེས་བཅུའི་མཆོད་པའི་སྲོད། །མདུན་མཁར་ཨོ་རྒྱན་ཆེན་པོ་ཡབ་ཡུམ་སྐུ། །གསལ་བར་མཐོང་ཚེ་བཟོད་མེད་མོས་གུས་ཀྱིས། །རྩལ་སྣང་སྟོང་ཉིད་རིག་པའི་ངོ་བོར་འདྲེས། །ཕྱིར་ལམ་བསམ་ཡས་མཐོང་ཚེ་སྔོན་དུས་ཀྱི། །གནས་དུས་གྲོགས་འཁོར་སྤྱོད་ཚུལ་ལ་སོགས་པ། །རྣམ་འགྱུར་འལ་འོལ་མཐོང་བ་ལྟ་བུའི་ཉམས། །བཟང་པོའི་བག་ཆགས་དགེ་བ་ཉིད་དུ་སད། །སྐབས་ཤིག་གཙུག་ལག་ཁང་གི་ལས་གྲའི་སྐབས། །སྲུང་མའི་གནས་ཁང་དམ་ཅན་རང་ཉིད་ཀྱིས། །ས་འདིར་འོས་ཞེས་བདག་གིར་མཛད་པའི་
ཚུལ། །རྨི་ལམ་འཁྲུལ་ངོར་ཤིན་ཏུ་གསལ་བར་མཐོང་། །ལོ་དེར་སྒྲུབ་ཆེན་བཀའ་བརྒྱད་ཕྲིན་ལས་ལ། །འཇུག་འདོད་གདུང་ཤུགས་གསོལ་བ་བཏབ་པའི་ནུབ། །མངའ་བདག་བླ་མ་རལ་པའི་ཅོད་པན་ཅན། །དགྱེས་འཛུམ་གཟི་བརྗིད་འབར་བའི་ཕྱག་གཉིས་ནི། །ཟབ་ཆོས་གླེགས་བམ་བཟུང་བས་ལུང་བསྟན་གྱི། །བརྡ་སྦྱོར་མཛད་ནས་སློབ་དཔོན་རྣམ་པ་བཞིའི། །ཐུགས་ཀྱི་དཔལ་བེའུ་འདི་ཞེས་བྱིན་བརླབས་མཐར། །འོད་ཞུ་དྷཱིཿཡིག་གཟུགས་ཀྱིས་ཐིམ་པ་རྨིས། །མེ་འབྲུག་ཁྲུམས་ཟླའི་ཉེར་ལྔར་ཙཱ་རི་ཏྲར། །འགྲོ་བར་ཞུགས་ཚེ་སྐུ་ལྷ་ཤམྦྷོ་ཡིས། །བཞིན་བཟང་སྐྱེས་པའི་རྣམ་པས་གུས་བཏུད་ཅིང་། །འཕྲིན་ལས་སྒྲུབ་པའི་དམ་ཚིག་གཉེར་དུ་བླངས། །ཆོས་ཟམ་གནས་སུ་ཞིང་སྐྱོང་དཔའ་བོ་ཡིས། །ཉེར་བསུས་མཐུན་རྐྱེན་སྒྲུབ་པར་ཁས་བླངས་ཤིང་། །ལྷན་སྐྱེས་ཌཱ་ཀིས་བདེ་ཆེན་ཡེ་ཤེས་བསྐྱེད། །རྩ་ཁམས་སྒྲིབ་མེད་གསལ་བའི་ངོ་མཚར་མཐོང་། །གཅིག་ཅར་གནས་སུ་སླེབས་སྐབས་ཁ་བ་ཡིས། །ལམ་གྱི་རྒྱུན་བཅད་ཕལ་ཆེར་ཕྱིར་ལོག་ཚེ། །གནོད་སྦྱིན་དཔའ་བོས་གེགས་མེད་བགྲོད་འགྱུར་ཞེས། །ལུང་བསྟན་ལམ་སྣས་མཚོན་བཞིན་བདེ་བར་འཁོད། །གནས་ཆེན་སོ་སོར་ཚོགས་མཆོད་བགྱིས་པའི་ཚེ། །ཡེ་ཤེས་ལྷ་དང་དམ་ཅན་འདུས་པའི་བྱིན། །དེར་ཚོགས་སྐལ་ལྡན་རྒྱུད་ལ་ཞུགས་པ་དང་། །དཔའ་བོའི་བརྡ་སྐད་སྤྱུགས་གླུ་འབོད་པ་ཐོས། །དེ་ཚེ་དབང་པོའི་གཞུ་རིས་རྣམ་བཀྲའི་གུར། །ཁོར་ཡུག་ཕ་མཐར་བྲེས་པའི་སྤྲིན་རུམ་ནས། །མེ་ཏོག་ཆར་ཟིམ་འབེབས་དང་ལྷན་ཅིག་པར། །བསྲུང་ཞིམ་ངད་པས་ཀུན་ཡིད་ཚིམ་པ་ཐོབ། །ཁྱད་པར་ངོ་མཚར་བཀོད་ལེགས་ཁང་བཟང་ནང་། །པད་འབྱུང་བི་མ་མཁའ་འགྲོའི་འཁོར་ལྡན་པས། །བཅུ་ཕྲག་ལོ་ཡི་བར་ཆད་སེལ་བ་དང་། །ཟབ་མོ་གཏེར་གྱི་ལུང་བསྟན་དུས་གནད་སྩལ། །སྟག་ཚང་གནས་སུ་དུར་ཁྲོད་བཀོད་པའི་དབུས། །མ་ཚོགས་མཁའ་འགྲོས་གྲུབ་ཆེན་ཉེར་ལྔ་དང་། །ལྷན་ཅིག་བམ་ཆེན་ཚོགས་ཀྱིས་མཆོད་བྱས་ཤིང་། །བྱིན་བརླབས་དངོས་གྲུབ་ཐོབ་པའི་དགེ་མཚན་རྨིས། །སླར་ཡང་རྒྱལ་ཟླའི་ཉ་ལ་གནམ་ལྕགས་བྲག །གསང་བའི་ཕུག་ནས་ཟབ་གཏེར་སྤྱན་དྲངས་པའི། །ངོ་མཚར་རྟགས་དང་མཚན་མ་བཟང་པོའི་ཚུལ། །
མངོན་གྱུར་གཏན་ལ་ཕེབས་པའི་ངོ་མཚར་ཐོབ། །དམར་སེར་དབོ་ཟླར་གྲུ་འཛིན་ཕོ་བྲང་ཆེར། །ཚེ་ལྷ་བསྙེན་ཚེ་འཆི་མེད་ཞིང་ཁམས་སུ། །ཡེ་ཤེས་ལྷ་ཡིས་ཚེ་བཅུད་དངོས་གྲུབ་དཔྱིད། །སྩལ་བར་རང་སྐལ་ཇི་བཞིན་སྤྱོད་པའི་ཚུལ། །སླར་ཡང་མུན་མཐོང་སྒྲོན་མེའི་སྣང་བ་དང་། །ཅ་ཅོའི་སྒྲ་ཡིས་མཚོན་མཐར་ནུབ་ཕྱོགས་སུ། །ཌཱ་ཀིས་འཁྱོགས་ལ་བསྟེན་ནས་སོང་བའི་མཐར། །མི་བཟད་དུར་ཁྲོད་ཧེ་རུ་ཀ་ཡི་ཞིང་། །འཇིགས་རུང་བཀོད་པའི་རྣམ་རོལ་མཐའ་ཡས་པར། །རྣམ་མང་ཌཱ་ཀི་རྩེ་བའི་དོ་ར་ན། །ཁྲག་འཐུང་དཔའ་བོར་སྙེམས་པའི་རྣམ་རོལ་གྱིས། །དམ་རྫས་བདུད་རྩིའི་དཔལ་ལ་རོལ་པའི་མཐར། །དབྱིངས་ཕྱུག་རེག་བྱའི་རྩེ་དགའ་གཏུམ་མོའི་མེས། །ཟླ་བ་བདུད་རྩིར་དྭངས་པ་དགའ་བཞིའི་འགྲོས། །ཡེ་ཤེས་རོལ་མོར་ཉམས་སུ་མྱོང་གྱུར་པའི། །བདེ་བའི་གསལ་སྣང་མེ་ལོང་གཟུགས་བཞིན་ཤར། །དེ་ཚེ་མཁའ་སྤྱོད་དགའ་མའི་མཛེས་སྡུག་གཟུགས། །ཟག་མེད་བདུད་རྩི་སྟོབ་པའི་རྣམ་འགྱུར་གྱིས། །བྱིན་བརླབས་བརྡ་ཐབས་ལུང་བསྟན་མཛད་བཞིན་པར། །ནུབ་ཕྱོགས་མཁའ་ལ་ཇེ་མཐོར་གཤེགས་པ་སྙམ། །སླར་ཡང་གྲུབ་མཆོག་དཔའ་བོའི་སྒྱུ་འཕྲུལ་གར། །གཞན་ལ་རྗེས་སུ་ཆགས་པའི་བརྡ་ཐབས་དང་། །བཞད་སྒྲས་གཉིད་ལས་སད་ཚེ་བདེ་ཆེན་གྱིས། །ལུས་སེམས་འཚོ་བ་ཞག་འགར་རྩོལ་མེད་བྱུང་། །དུས་ཀྱི་ཕོ་ཉའི་ཁྲུམས་ཟླ་ནས་བརྩམས་ཏེ། །བདེ་བའི་དཔྱིད་འཇོ་གྲུབ་པའི་ཕོ་ཉ་ནི། །གཞན་དུ་རབ་དགའི་བདུད་རྩི་སྦྱིན་བྱེད་གང་། །ཟླ་བཞིན་ལང་ཚོ་གསར་པའི་རྣམ་འགྱུར་ཅན། །འདབ་བརྒྱ་རྒོད་པ་སྦྲང་རྩིའི་ཟིལ་མངར་རོ། །ཀུ་མུད་གཉེན་དང་འགྲོགས་ཚེ་སུ་ཁའི་མེས། །རྣམ་རྟོག་ཚང་ཚིང་བུད་ཤིང་ཀུན་བསྲེགས་ནས། །འཇིགས་མེད་ཡེ་ཤེས་རྡོ་རྗེའི་གནས་ལ་སྦྱར། །གང་ཚེ་དྲི་མེད་ཤེལ་ལྟར་དྭངས་པའི་སེམས། །སྣ་ཚོགས་རྐྱེན་གྱིས་ཅིར་ཡང་འཆར་བྱེད་པའི། །རྣམ་འགྱུར་འདུ་བྱེད་སྤྲིན་དང་མཚུངས་པ་ཡང་། །རང་རིག་བདེ་ཆེན་ནམ་མཁའི་ངོ་བོར་གྲོལ། །དེ་ཚེ་ནམ་མཁའ་གང་བའི་དཔའ་བོ་དང་། །རྣལ་འབྱོར་མ་རྣམས་དགྱེས་དགུར་རོལ་པའི་སྤྲིན། །ངོ་མཚར་མཁའ་ཁྱབ་བདུད་རྩིའི་ཆར་འབེབས་པ། །གནས་ལུགས་ཡིད་མཚོར་རོ་གཅིག་གྱུར་པ་བཞིན། །
སྐབས་ཤིག་གཏི་མུག་གདུག་པའི་ནད་གདོན་གྱི། །རྣམ་འགྱུར་ཚོར་བའི་མེ་ལོང་ནང་ཤར་ཚེ། །ནད་གདོན་ཡེ་ནས་རང་བཞིན་མ་གྲུབ་པའི། །གནས་ལུགས་ཅུང་ཟད་རྟོགས་པ་རིག་པའི་རྩལ། །རིག་རྒྱལ་ལྷ་ཡི་རྣམ་པར་ཤར་བ་ཡིས། །བཟླས་བརྗོད་བསྙེན་པའི་རྣལ་འབྱོར་ལ་ཞུགས་ཚེ། །མགོ་ཟླའི་བཅུ་བདུན་སྲོད་ཀྱི་ཐུན་རྗེས་སུ། །ཅུང་ཟད་བྱིང་ཉམས་ཐུག་ཆོམ་སྒྲས་སད་ཚེ། །མདུན་མཁར་མི་བཟད་དུད་སྤྲིན་འཁྲིགས་པའི་ཀློང་། །རིག་པའི་རྒྱལ་པོ་རྔམ་བརྗིད་ཁྲོས་པའི་གཟུགས། །སྣ་ཚོགས་འོད་ཟེར་འཕྲོ་བའི་གཟི་མདངས་ཅན། །མཐོང་བའི་མོད་ལ་དངངས་ཤིང་བརྒྱལ་བ་སྙམ། །དེ་ལས་སད་ཚེ་སྙན་བརྗིད་སྒྲར་བཅས་པས། །འུབ་ཀྱིས་འདུས་ནས་རང་ལ་ཐིམ་པ་ལྟར། །གྱུར་ཚེ་ལུས་སེམས་བདེ་བའི་ཉམས་གསལ་བ། །འཛིན་རྟོག་བྲལ་བའི་ངང་དུ་རེ་ཞིག་འདས། །དེ་ཚེ་རྨི་ལམ་སྣང་ཆར་གདུག་པའི་གདོན། །ལྟོ་འགྲོའི་གཟུགས་ཀྱིས་ལུས་ལས་ཐོན་རྨིས་པས། །ནངས་པར་ནད་གདོན་བགེགས་ཀྱི་གཡུལ་ངོ་ལས། །རྒྱལ་བ་གཟའ་ལས་གྲོལ་བའི་ཟླ་བ་བཞིན། །དོན་གྲུབ་མཆུ་ཟླར་དམ་འདྲེས་རྡོ་རྗེའི་མཆེད། །གྲགས་ལྡན་ཞིག་གིས་ངན་སྦྱོར་བྱས་པའི་ཚུལ། །མངོན་སུམ་བཞིན་མཐོང་སྟོང་ཉིད་རིག་པའི་རྩལ། །བྱམས་དང་སྙིང་རྗེར་ཤར་བས་ཟིལ་གྱིས་མནན། །རིང་མིན་ཚེ་ན་འཕྲིན་ལས་མགོན་པོ་ཡིས། །བྱད་མའི་མགོ་བོ་མགྲིན་པ་ནས་བཅད་པ། །ཁྲག་འཛག་བཞིན་པར་མདུན་དུ་བོར་བ་མཐོང་། །མི་རིང་དུས་ན་དེ་རྟགས་མངོན་དུ་གྱུར། །སླར་ཡང་ཆུ་སྟོད་ཅན་གྱི་ཚེས་གསུམ་ལ། །ཡེར་པར་ཚོགས་མཆོད་བགྱིས་ཚེ་ཡེ་ཤེས་བྱིན། །རྒྱུད་ལ་ཞུགས་པས་གནས་དུས་འཁོར་སློབ་ཀྱི། །ལས་སྨོན་འབྲེལ་བའི་ཚུལ་རྣམས་གསལ་པོར་མཐོང་། །དྲག་པོ་ཆུ་སྟོད་ཟླ་བར་རྗེ་བླ་མ། །ཕན་ཚུན་གདན་སར་བསྐྱོད་པའི་དངོས་གནས་རྣམས། །རྨི་ལམ་འཁྲུལ་ངོར་གང་ཤར་གསོལ་བ་ན། །ཇི་བཞིན་གཏན་ལ་ཕེབས་ཞེས་དབུགས་དབྱུང་མཛད། །དེ་ཚེ་གསལ་སྣང་འགའ་ཡི་རྣམ་འགྱུར་དང་། །རྟེན་འབྲེལ་རྟགས་རྣམས་རིང་མིན་དུས་ཉིད་དུ། །ལོ་ཟླའི་ངེས་པ་ཇི་བཞིན་འཕྱུག་མེད་དུ། །མངོན་སུམ་གྱུར་པའི་གནས་ལ་སོམ་ཉི་བྲལ། །གྲོ་བཞིན་ཅན་གྱི་གང་བའི་དུས་ཉིད་དུ། །ལྷོ་ཕྱོགས་གོམ་པའི་
འདེགས་འཇོག་བཀོད་པ་ལས། །ཉེར་བརྒྱད་ཤ་འུག་སྟག་སྒོར་སླེབས་པའི་ནུབ། །ངོ་མཚར་དགེ་བའི་རྨི་ལྟས་གསལ་པོར་ཤར། །ནངས་པར་གནས་ཀྱི་ལྟེ་བ་དཔལ་ཆེན་པོའི། །གཟུགས་བརྙན་གོར་མའི་རྣམ་པར་ཤར་བ་ནས། །ཨོ་རྒྱན་ཐུགས་བཅུད་བདེ་གཤེགས་ཀུན་འདུས་ཀྱི། །ཟབ་གཏེར་སྐལ་ལྡན་ཚོགས་པའི་དབུས་སུ་བཏོན། །འདུས་པའི་འཁོར་ལ་བྱིན་རླབས་བགྱིས་པའི་ཚེ། །སྤྲིན་བྲལ་མཁའ་ལ་འཇའ་ཚོན་བྲེས་པ་ལས། །རྣམ་བཀྲའི་མེ་ཏོག་ཆར་སོགས་ངོ་མཚར་གྱི། །མཚན་མས་སྐལ་ལྡན་ཡིད་ཀྱི་ངལ་གསོ་བསྒྲུབས། །བློ་ངན་ནག་པོའི་དང་པོ་ནས་བཟུང་སྟེ། །གར་དབང་ཐུགས་རྗེ་ཆེན་པོ་བསྙེན་པའི་ཚེ། །དུས་གསུམ་ལས་འབྲེལ་འབྱུང་འགྱུར་ཇི་སྙེད་པ། །ཆུ་ནང་ཟླ་གཟུགས་བཞིན་དུ་གསལ་བ་དང་། །ཁྱད་པར་ཆོས་བདག་སྐྱེས་བུའི་སྐུ་ཚེ་ཡི། །འགལ་རྐྱེན་གཞན་དུ་བསྒྱུར་བའི་རྟེན་འབྲེལ་གྱི། །ཐབས་ཚུལ་བསྟན་པ་ཇི་བཞིན་བསྒྲུབས་པ་ལས། །རེ་ཞིག་འདོད་པའི་འབྲས་བུ་མངོན་གྱུར་ཅིང་། །སྲིད་པའི་གཅོང་རོང་ཉམ་ངའི་གཡང་ས་ལས། །ཞི་བའི་གྲོང་དུ་དགའ་མས་བདེར་དྲངས་ཚེ། །ངོ་མཚར་བཀོད་པའི་ཞིང་ཁམས་འཆི་མེད་ཀྱི། །གྲོང་ཁྱེར་གྱིས་ཀྱང་མཚོན་དུ་མེད་པའི་དབུས། །པད་འབྱུང་སྒྱུ་འཕྲུལ་རྡོ་རྗེའི་རྣམ་རོལ་གྱིས། །སྣང་སྲིད་དཀྱིལ་འཁོར་འཁོར་ལོར་ཡོངས་དྭངས་པར། །དབང་བསྐུར་ཐུགས་རྗེས་བདག་རྒྱུད་བྱིན་བརླབས་ནས། །བདེ་ཆེན་ཡེ་ཤེས་ཉམས་སུ་མྱོང་བ་སྩལ། །སླར་ཡང་ཡེ་ཤེས་ཌཱ་ཀིས་འཆི་མེད་ཀྱི། །བདུད་རྩིའི་ཤིང་འབྲས་བཅུད་ཀྱི་ཐིགས་པའི་ཚུལ། །བཅུ་གསུམ་གྲངས་དང་བདུན་དུ་སྩལ་བ་ཡིས། །རང་ལུས་མཚུངས་མེད་གཟི་མདངས་རྒྱས་པ་རྨིས། །སྐབས་ཤིག་འགག་མེད་ཉམས་ཀྱི་རྩལ་སྣང་དུ། །ཨོ་རྒྱན་ཡབ་ཡུམ་སྤྲུལ་པའི་རྣམ་རོལ་གྱིས། །བྱིན་བརླབས་མཛད་པའི་གསལ་སྣང་བརྟན་པོའི་མཐར། །བདེ་སྟོང་ཉམས་ཀྱི་སྣང་བས་རེ་ཞིག་འདས། །ཆུ་སྟོད་ཅན་གྱི་མར་ངོའི་ཚེས་བཅུའི་ནུབ། །ཌཱ་ཀིའི་ལམ་སྣས་མཚོན་པར་རྒྱ་མཚོ་དང་། །ནམ་མཁའི་ལམ་ལས་ཐོགས་མེད་སྐད་ཅིག་གིས། །ཨོ་རྒྱན་ཧེ་རུ་ཀ་ཡི་ཞིང་དུ་བགྲོད། །དུར་ཁྲོད་རོ་གླིང་ཀེང་རུས་གུར་ཁང་ནས། །ཌཱ་ཀི་མི་མོའི་གསང་ཡེས་
ཚུལ་ཅན་མཁའ་དབྱིངས་ལས། །དམར་གསལ་ཐིག་ལེ་སྤྲོས་པ་སྙིང་གར་བསྟིམས། །གསལ་སྟོང་ནམ་མཁའི་ངང་དུ་འདྲེས་པ་རྨིས། །གྲོ་བཞིན་ཅན་གྱི་ཉེར་བཞིར་གངས་ཅན་གྱི། །གྲུ་འཛིན་རྒྱལ་པོའི་ཁབ་ཀྱི་རྩེ་མོ་རུ། །ཆོས་རྒྱལ་ཡབ་སྲས་རྩོད་དུས་འགྲོ་བའི་མགོན། །མཁྱེན་བརྩེ་ནུས་པའི་ཕུལ་གྱུར་རྣམ་གཉིས་སུ། །བདེ་གཤེགས་ཀུན་འདུས་དཀྱིལ་འཁོར་ཆེན་པོ་རུ། །དབང་དང་བྱིན་རླབས་གདམས་པ་གཏད་རྒྱའི་བཀའ། །དང་པོར་ཕུལ་ཚེ་དགེ་བའི་མཚན་མ་ཡིས། །ཐུགས་ལ་དགྱེས་པའི་ངོ་མཚར་ཅི་ཡང་སྤེལ། །དེ་ཚེ་མཚན་མོའི་ཐུན་གྱི་རྨི་ལམ་དུ། །མཚོ་སྐྱེས་རྡོ་རྗེ་ཐ་མལ་རྣལ་འབྱོར་གཟུགས། །མཛེས་སྡུག་མཁའ་འགྲོའི་ཕོ་ཉ་དང་བཅས་པས། །ཁྲོ་ཚུལ་བརྡ་ཡིས་ལུང་བསྟན་འགའ་ཞིག་མཛད། །གང་ཡང་སྨོན་ལམ་ས་བོན་དུས་སྨིན་པའི། །འབྲས་བུར་སྤྱོད་པ་དགེ་དང་མི་དགེ་བ། །རང་གཟུགས་འབྱུང་འགྱུར་དངོས་པོའི་གནས་ལུགས་ཀུན། །ཇི་བཞིན་བསྟན་པ་ཕྱིས་ན་མངོན་དུ་གྱུར། །དེ་ཚེ་ཐེག་ཀུན་རྩེ་མོ་ཨ་ཏིའི་ལམ། །གནས་ལུགས་ཀ་དག་རང་བཞིན་ལྷུན་གྲུབ་ཀྱི། །ངོ་སྤྲོད་ཕུལ་ཚེ་སྐུ་ཡི་གསལ་སྣང་ཉིད། །མཐིང་ཞུན་འོད་ཀྱི་གོང་བུར་འདྲེས་པ་མཐོང་། །སྐབས་ཤིག་ལྷ་ཚས་བཀྲ་ཤིས་མཚན་མའི་གཟུགས། །གསེར་འོད་ལང་ཚོས་སྒེག་དང་འགྱུར་མེད་ཁམས། །ཅིར་ཡང་འཆར་བ་མཚོན་པའི་མན་ཤེལ་སོགས། །བརྡ་ཐབས་རྟེན་འབྲེལ་སྐྱེས་སྩོལ་དབུགས་དབྱུང་མཛད། །དེ་ཚེ་སྐུ་དཀྱིལ་གསལ་སྣང་ཆུ་ཟླའི་གཟུགས། །རླབས་ཕྲེང་རྐྱེན་གྱིས་གསལ་འགྲིབ་ཇི་བཞིན་དུ། །རེས་གསལ་རེས་མི་གསལ་བར་སྣང་བའི་མཐར། །དང་པོའི་དབྱངས་ཡིག་འོད་ཀྱི་གོང་བུར་དྭངས། །དབྱུག་པ་ཅན་གྱི་དང་པོའི་ཚེས་བཅུའི་ནུབ། །རབ་ཏུ་རྒྱས་པའི་ལྗོན་ཤིང་སྡོང་པོ་ནི། །ལོ་འདབ་མེ་ཏོག་འབྲས་བུ་མཚར་བཞད་པ། །གཟུགས་མཛེས་སྙན་སྒྲ་སྒྲོག་པའི་མཁའ་འགྲོའི་ཚོགས། །གྲངས་མེད་འཕུར་ལྡིང་རྩེ་ཞིང་རོལ་བའི་མཐར། །མི་བཟད་རླུང་གིས་བསྐྱོད་པའི་སྐད་ཅིག་ལ། །ཁོར་ཡུག་ནམ་མཁའི་ཕ་མཐར་བྱེར་བ་དང་། །ཨ་ཧཾ་སྒྲ་ཡིས་སྲིད་གསུམ་གཡོ་བ་རྨིས། །རྔ་ཆེན་ནག་པའི་ཉ་ལ་བསམ་ཡས་ཀྱི། །བར་ཁང་གཡུ་ཞལ་ཅན་གྱི་གཙོ་འཁོར་ལྷ། །གཡོ་འགུལ་གསུང་བགྲོ་འོད་
ཟེར་སྤྲོ་བསྡུའི་ཚུལ། །མཐོང་བས་བཟོད་མེད་བྱིན་རླབས་རྒྱུད་ལ་ཞུགས། །ལྐོག་གྱུར་དངོས་པོའི་གནས་ལུགས་ཇི་སྙེད་པ། །ཤེས་ཉམས་སྣང་ཆར་གནམ་ས་གཡོ་བ་ཙམ། །མཐོང་བ་ཇི་བཞིན་བརྗོད་པ་ཕྱི་དུས་སུ། །སྒྲིམ་པོའི་བློ་ཅན་བདེན་པའི་ཟུངས་སུ་འཛིན། །དབྱུག་ཟླའི་བཅོ་བརྒྱད་བྱིན་རླབས་མོས་པའི་མཐུ། །རྒྱུ་རྐྱེན་རྟེན་འབྲེལ་ཕུན་སུམ་ཚོགས་པ་ལས། །ཡིད་ཤེས་ལམ་དུ་ཇི་ལྟར་གསལ་བ་རྣམས། །ངག་གི་བརྗོད་པས་དོན་དང་ལྡན་པ་གྲུབ། །སྨིན་དྲུག་ཅན་གྱི་བཅུ་བཞིར་བདེ་འབྱུང་ལྷས། །དམར་འོད་ཆགས་པའི་བཞིན་བཟང་སྐྱེས་བུ་ཡི། །རྣམ་པས་ཁམས་གསུམ་སྲེག་བཅུད་རིན་ཆེན་གྱི། །སྒྲོམ་བུའི་རྣམ་པར་གཏད་པའི་དགེ་མཚན་མཐོང་། །བཅོ་བརྒྱད་སྲོག་གཏད་དགེ་བའི་མཚན་བཟང་གི །རྟེན་འབྲེལ་ཉིན་མོར་བྱེད་པའི་འོད་བརྒྱ་པ། །ལོག་སྨོན་ཆུ་འཛིན་རྐྱེན་གྱིས་མ་བསྒྲིབས་ན། །བོད་འབངས་ཕན་བདེའི་སྣང་བས་འགེངས་པར་ཤར། །རྒྱལ་ཟླའི་བརྒྱད་ལ་སྔོན་དུས་ཌཱ་ཀི་ནི། །ཟབ་ལམ་ཕོ་ཉའི་གྲོགས་སུ་དམ་བཅས་པ། །བགྲང་བྱའི་ཧེ་ཏུ་ཇི་བཞིན་གཏན་ཕེབས་པའི། །ངོ་མཚར་མཚན་མའི་སྐྱ་རེངས་དང་པོར་མཐོང་། །ཁྲག་སྐྱུག་སྣྲོན་ཟླའི་གསུམ་ལ་ཤངས་ཀྱི་ཕུར། །གངས་དཀར་མ་སོགས་ཡུལ་བདག་འཁོར་བཅས་ཀྱིས། །བཏུད་ཅིང་མཆོད་པའི་ཉམས་སྣང་ཆེས་གསལ་ཞིང་། །ཕྱི་ལྟར་ཆར་རླུང་འཚུབ་འཁོར་མཚར་བ་མཐོང་། །བཅོ་བརྒྱད་ཚེས་ལ་སྲམ་པ་སྒྲུབ་ཁང་དུ། །དཔལ་ཆེན་ཡེ་ཤེས་སྐུ་ཅན་མཇལ་བ་ན། །དད་དང་ངེས་འབྱུང་དྲག་པོས་རྒྱུད་བསྐུལ་ཞིང་། །ཚོགས་མཆོད་རྣལ་འབྱོར་ལམ་ལ་ཉེར་ཞུགས་ཚེ། །སྔོན་དུས་དགེ་བའི་བག་ཆགས་སད་འདྲ་བའི། །གསལ་སྣང་རྣམ་འགྱུར་འལ་འོལ་སྣ་ཚོགས་པས། །ཡིད་ཀྱི་ཁྱེའུ་ཆུང་ཀུན་རྟོག་གར་གྱིས་བྲེལ། །བཟང་པོའི་ལས་ཀྱི་འཕྲོ་ཙམ་ཡིན་དུ་རེ། །འདིའི་ཐོག་མ་སྔར་ཟུར་ཙམ་སྨོས་ཤིང་ལོ་འདིའི་གྲོ་བཞིན་ཟླ་བ་དང་དུས་སྒྲིག །འདི་དུས་ཆུ་ཕག་ཡིན། མཆན། དེ་ནས་གསང་བ་ཡེ་ཤེས་ཌཱ་ཀི་མ། །མཁའ་ཟླ་གཅིག་ཉིད་དུ་མའི་ཆུ་སྣོད་དུ། །འཆར་བའི་རྣམ་རོལ་ཕ་མཐའ་མི་སྤོབས་པའི། །ངོ་མཚར་སྨོན་ལམ་འབྲེལ་བའི་མཚམས་སྦྱོར་ལས། །འཁོར་སློབ་མཛའ་བཤེས་མཐུན་པའི་རྐྱེན་གང་དུ། །འབབ་པ་དེ་དང་དེར་འཆར་ནུས་འབྱིན་སོགས། །
སྐྱེ་བའི་ཕྲེང་བ་དུ་མའི་ཟློས་གར་ནི། །ཡོངས་སུ་གྲུབ་པ་གུ་ཎ་ཏཱ་རེ་སྟེ། །བདེ་ཆེན་ལམ་གྱི་ཕོ་ཉར་ཡོངས་གྲུབ་པས། །ཚོགས་དྲུག་སྣང་ཆ་བདེ་བར་འཆར་བ་ལས། །རྟོགས་པའི་བོགས་ཐོན་ལྷན་སྐྱེས་ཡེ་ཤེས་ཀྱི། །བདེ་ཆེན་ཉམས་ཀྱི་མྱོང་བ་གཏན་ལ་ཕེབས། །མིག་དམར་སྣྲོན་གྱི་ཉེ་བའི་འདུ་བ་ལ། །ག་ཎ་ཙཀྲའི་འཁོར་ལོར་སྤྱོད་པའི་ཚེ། །བཟོད་མེད་གནམ་ས་གཡོ་འདྲའི་ཡེ་ཤེས་བྱིན། །རྒྱུད་ལ་ཞུགས་པའི་རྣམ་འགྱུར་སྣ་ཚོགས་མཐོང་། །དེ་ཚེ་ཨེ་ཡིག་འབར་བའི་མེ་འོད་ཀྱིས། །ཝཾ་ཡིག་བདེ་ཆེན་བདུད་རྩིར་དྭངས་པའི་སྤྲིན། །དགའ་བཞིའི་བདེ་སྟོང་ཡེ་ཤེས་ཆར་འབབ་པ། །སྒྱུ་འཕྲུལ་རྡོ་རྗེའི་རྒྱ་མཚོར་རོ་གཅིག་འདྲེས། །ཀཱ་ཡའི་གྲོང་གི་མགྲོན་པོ་ཇི་སྙེད་པ། །ཥྚཱུ་ཏིའི་ཕོ་བྲང་འོད་གསལ་ཁྲི་ལ་འཛེགས། །རྣམ་མང་རྟོག་པའི་སྤྲིན་ཚོགས་ཇི་སྙེད་ཀྱང་། །མི་རྟོག་ནམ་མཁའི་རྡོ་རྗེ་ཉིད་དུ་གྲུབ། །དེ་ཚེ་རྨི་ལམ་བདེན་གཉིས་ཞལ་ལྡན་མ། །རབ་དམར་འཛུམ་ཁྲོ་ཆ ེ་བརྗིད་གཟི་མདངས་ཅན། །མཐོང་བས་འཇིགས་དང་དགའ་བའི་སྣང་བ་དག །བཟོད་མེད་ཆུ་ཀླུང་དྲག་ཏུ་འཁྲུགས་བཞིན་འབར། །གང་གི་ཐུགས་གསང་སྒོ་ལྟར་ཕྱེ་བའི་ནང་། །ནགས་ཚལ་མེ་ཏོག་ཆུ་ཀླུང་རི་བྲག་སོགས། །ངོ་མཚར་བཀོད་པའི་ཞིང་ཁམས་ཆེས་ཡངས་པའི། །དབུས་ན་པད་ཅན་ཡེ་ཤེས་ཌཱ་ཀི་མ། །མཛེས་འཛུམ་ལང་ཚོ་རྒྱས་པའི་འགྱུར་བག་ཅན། །རིགས་དང་ཆ་ལུགས་རྣམ་འགྱུར་སྣ་ཚོགས་པའི། །འཁོར་གཡོག་དུ་མའི་དབུས་ན་དགྱེས་རོལ་ཞིང་། །གླུ་གར་རོལ་མོའི་སྒྲ་དབྱངས་སྙན་སྒྲོག་པའི། །རྣམ་འགྱུར་སྣ་ཚོགས་འཆར་སྒོ་འགག་མེད་ཀྱི། །གསལ་སྣང་ངང་ལ་སེམས་འདྲེས་རྟོག་མེད་དུ། །ཆམ་གྱིས་སོང་སྙམ་བགྱིད་མཐར་འཁོར་ཚོགས་རྣམས། །གཅིག་ལ་གཅིག་ཐིམ་གཙོ་མོ་ཉིད་ལ་ཐིམ། །དེ་ཉིད་དགའ་བའི་རོལ་མོས་འཁྲིལ་བ་ལས། །སྙོམས་པར་ཞུགས་ཚེ་བདེ་བའི་ཡེ་ཤེས་ཉམས། །རྣོ་ལ་ངར་བ་གསལ་རིག་རྗེན་ནེ་བ། །མཁའ་ཁྱབ་སྤྲོས་བྲལ་རིག་པའི་ངོ་བོར་རྟོགས། །སླར་ཡང་ཤེལ་ལྟར་དྭངས་པའི་ལུས་ཀྱི་རྩར། །ཐིག་ལེ་གསལ་ཧྲིག་འགྲོ་འོང་བྱེད་པའི་ཚུལ། །ལྷ་སྐུ་ཡིག་འབྲུ་ལ་སོགས་སྟོང་གཟུགས་ཀྱི། །རྣམ་པ་མེ་ལོང་ནང་གི་གཟུགས་བཞིན་གསལ། །དེ་ནས་ཤེས་རབ་འོད་ཀྱི་གོང་བུ་ནི། །དཀར་གསལ་
བཾ་ཡིག་དམར་པོས་མཚན་པར་ཞུ། །དེ་ཡང་ཡུད་ཀྱིས་བདག་ལ་ཐིམ་སྙམ་ཞིང་། །སྟོང་ཉམས་ནམ་མཁའ་ལྟ་བུར་དྭངས་པའི་མཐར། །གཉིད་ཀྱི་འོད་གསལ་བདེ་དང་སྟོང་པའི་ཉམས། །ཤིན་ཏུ་བརྟན་པ་ཡུན་རིང་གནས་པའི་མཐར། །སད་རྗེས་ཉིད་ནས་ཞག་འགའི་བར་དག་ཏུ། །བདེ་བའི་ཉམས་སྣང་རྩོལ་མེད་འཆར་བ་བྱུང་། །སྐལ་བཟང་དཔག་བསམ་སྙེ་མའི་ནགས་ནང་དུ། །རྡོ་རྗེ་བཙུན་མོའི་བྱིན་རླབས་བདུད་རྩིའི་བཅུད། །རང་རིག་འབབ་སྟེགས་ལས་འོངས་ངོ་མཚར་གྱི། །དགེ་མཚན་མངོན་དུ་གྱུར་པའི་སྐལ་བཟང་ཐོབ། །ཁྲོ་བོ་སྨིན་དྲུག་ཅན་གྱི་བཅུ་བདུན་ནུབ། །རྟ་མགྲིན་གླིང་དུ་རྨི་ལམ་གསལ་སྣང་ལ། །བཀོད་ལེགས་ཁང་བཟང་མཁའ་ལས་རོལ་མོའི་སྒྲ། །ཐོས་པའི་རྐྱེན་གྱིས་བལྟས་ཚེ་མདུན་གྱི་མཁར། །སྣ་ཚོགས་འཇའ་གུར་དྲྭ་བས་གཏིབས་པའི་ནང་། །མཐིང་ཞུན་ལྟ་བུར་གསལ་ཞིང་དྭངས་པའི་དབུས། །སངས་རྒྱས་བྱང་ཆུབ་སེམས་དཔའི་ཚོགས་མང་པོ། །ཏིལ་གྱི་གོང་བུ་བཞིན་དུ་གང་བའི་འོག །རྩིབས་ཤར་འཇའ་ཚོན་སྟེང་ན་འཕགས་ཆེན་གྱི། །གནས་བརྟན་བཅུ་དྲུག་ཆགས་བྲལ་ཉན་ཐོས་གཟུགས། །བྲེང་ཚར་དལ་གྱིས་གཤེགས་པའི་རྣམ་པ་དང་། །ལྷན་ཅིག་བཀྲ་ཤིས་མེ་ཏོག་ཆར་འབེབས་ཤིང་། །སེམས་ཅན་གང་དག་འགྲོ་དང་མི་འགྲོ་བ། །ཞེས་སོགས་དཀོན་མཆོག་གསུམ་གྱི་ཤིས་བརྗོད་རྣམས། །འུར་དིར་གསུངས་པའི་སྒྲ་ཡིས་ཁོར་ཡུག་ཀུན། །གཡོ་བ་ཙམ་དུ་ལྡིར་བས་སད་པའི་ཚེ། །དྲི་བཟང་ངད་དང་དབྱངས་ཀྱི་སྒྲ་གདངས་རྣམས། །མངོན་སུམ་དབང་པོའི་ཡུལ་ན་ལམ་མེར་སྣང་། །འདི་ལས་ཕྱིས་ཀྱི་རྟེན་འབྲེལ་རྟོགས་པ་དང་། །ཞག་འགར་རྩོལ་མེད་ཏིང་འཛིན་ངང་གིས་འཕེལ། །རབ་བྱུང་ནག་ཉར་འབྱུང་འཁྲུགས་ཀྱིས་མནར་བའི། །ཟུག་རྔུར་སེམས་བསྲེས་ཅུང་ཟད་མནལ་བའི་དུས། །ཤིན་ཏུ་དག་པའི་རྨི་ལམ་འོད་གསལ་གྱི། །སྣང་བ་དག་དང་འདྲེས་པའི་གསལ་སྣང་དུ། །རྨི་ལམ་རྟེན་གྱི་ནུབ་ཕྱོགས་ནམ་མཁའ་ལ། །སོང་མཐར་རིན་ཆེན་རི་བྲག་མེ་ཏོག་དང་། །ནགས་ཀླུང་དགའ་ཚལ་འདབ་ཆགས་རི་དྭགས་ཚོགས། །མཛེས་སྡུག་ངོ་མཚར་དུ་མས་ཁྱབ་པའི་དབུས། །སྣ་ཚོགས་རིན་ཆེན་དྭངས་པའི་ཁང་བཟང་མཆོག །རྒྱན་དང་བཀོད་པའི་ཁྱད་
པར་མཐའ་ཡས་ཤིང་། །ལྷ་མིའི་འབྱོར་པ་རྒྱ་མཚོས་གང་བའི་དབུས། །རིན་ཆེན་དར་ཟབ་བརྩེགས་པའི་ཁྲི་སྟེང་ན། །ཨིནྡྲ་བྷོ་དྷི་མཚར་སྡུག་རྒྱལ་པོའི་ཆས། །མཚུངས་མེད་གཟི་མདངས་རྒྱས་པ་བཙུན་མོའི་འཁོར། །དུ་མར་བཅས་པའི་དྲུང་དུ་ཡུད་ཀྱིས་སླེབས། །བཟོད་མེད་མོས་གུས་དྲག་པོས་གསོལ་བཏབ་ཚེ། །གསེར་སྦྱངས་བུམ་པ་བདུད་རྩིའི་བཅུད་ཅན་དང་། །རིན་ཆེན་ཀོང་བུར་སྒྲོན་མེ་འབར་བ་བཅས། །གཏད་ནས་བྱིན་བརླབས་ངོ་སྤྲོད་མཛད་པ་རྨིས། །རྣམ་འབྱུང་ས་གའི་བདུན་གྱི་སྐྱ་རེངས་ཆར། །སིལ་སྙན་རོལ་མོའི་སྒྲ་དང་ལྷན་ཅིག་པར། །བུད་མེད་མཛེས་སྡུག་གསེར་གཡུའི་རྒྱན་ཆ་ཅན། །གློག་ལ་ཞོན་ནས་མཁའ་ལ་འགྲོ་བ་དང་། །ལྷན་ཅིག་དགྱེས་འཛུམ་ཉམས་ཀྱིས་འདི་སྐད་དོ། །ང་ནི་སློབ་དཔོན་པདྨའི་བཀའ་ཉན་མ། །དམ་ཚིག་ཅན་གྱི་ཕྲིན་ལས་ཕོ་ཉ་ཡིན། །ཆོས་བཞིན་སྤྱོད་ན་ས་ཕྱོགས་གང་དུ་ཡང་། །མཐུན་རྐྱེན་འདོད་པའི་ཕྲིན་ལས་སྒྲུབ་པར་བྱེད། །ཆགས་སྡང་བློ་ཡིས་སྐྱེད་འཕེལ་བྱེད་པའི་དོན། །འགྲུབ་པར་དཀའ་འོ་ཟེར་ནས་ནུབ་ཕྱོགས་ཀྱི། །མཁའ་ལ་རོལ་མོའི་སྒྲར་བཅས་ཡུད་ཀྱིས་སོང་། །རྡོ་རྗེ་གཡུ་ཡི་སྒྲོན་མ་ཡིན་སྙམ་བྱེད། །དཀར་པོ་མཆུ་ཟླའི་བཅོ་ལྔའི་གུང་ཐུན་གྱི། །རྨི་ལམ་འཁྲུལ་ངོར་རྡོ་ཤེལ་ལྟ་བུ་ཡི། །མཆོད་རྟེན་ཉིས་སྒྲིག་མཐའ་སྐོར་རྡོ་ལེབ་ཀྱིས། །བཅལ་དུ་བཀྲམ་པའི་འགྲམ་སྟེགས་གྲུ་བཞིའི་སྟེང་། །ཀུན་མཁྱེན་ཆོས་རྗེ་གཟི་བརྗིད་མཚུངས་མེད་སྐུ། །བགྲེས་ཉམས་ཤ་རགས་ཚེམས་ཕྲེང་ཚེག་གེ་བ། །ན་བཟའ་བེར་ཟླུམ་པཎ་ཞྭ་ཟླུམ་བརྗིད་ཅན། །བཞུགས་མཐོང་གུས་པས་བཏུད་ཚེ་དེ་ཉིད་ཀྱིས། །ཇི་ལྟར་རྟོགས་པའི་ངེས་པ་བདག་ཉིད་ཀྱི། །དགོངས་པ་བླ་ན་མེད་པའི་དོན་ལ་འབྱོར། །འདི་ནི་རྒྱལ་བ་ཀུན་གྱི་དགོངས་པར་གནས། །དེ་ཕྱིར་འདི་ཡི་འཕྲིན་ལས་རྒྱས་གྱུར་ཅིག །ང་རྒྱལ་དང་ནི་ཁེངས་པར་མ་བྱེད་ཅིག །སྙིགས་མའི་སེམས་ཅན་གདུལ་བར་དཀའ་བ་རྣམས། །བྱམས་དང་སྙིང་རྗེ་ཆེན་པོས་རྗེས་བཟུང་ལ། །ཕན་བདེའི་སྙིང་སྟོབས་སྐྱེད་ཅིག་གསུང་བ་རྨིས། །ནག་པའི་ཚེས་བཞིར་རྒྱུན་གྱི་གནས་ཁང་དང་། །འཁོར་གྲོགས་དངོས་སྣང་བཞིན་དུ་གསལ་རྨིས་པར། །ཀུ་ཅོའི་ཐུག་ཆོམ་སྒྲར་བཅས་སྐྱེས་པ་དང་། །བུད་མེད་གོ་ཞུབ་མང་པོས་བསྐོར་བ་མཐོང་། །སྐྲག་
ཅིང་བག་ཁུམས་གྱུར་ཚེ་རྨི་ལམ་དུ། །ངོས་ཟིན་སྤྲུལ་བསྒྱུར་སེམས་ཀྱི་དགའ་མར་བཅས། །ཐོགས་མེད་མཁའ་ལ་འཕགས་ཚེ་ཏཱ་རེ་མ། །ནུབ་ཕྱོགས་ནམ་མཁའི་ཕ་མཐར་ཡུད་ཀྱིས་སོང་། །དེ་ཚེ་སྔར་གྱི་བག་ཆགས་ཡུལ་སྣང་རྣམས། །དངོས་མེད་ཞིག་པའི་སྐྱོ་འཇིགས་མི་བཟད་མེས། །སེམས་ཀྱི་བུད་ཤིང་བསྲེགས་པའི་འཁྲུལ་ངོ་ཀུན། །སྒྱུ་མའི་རྣམ་རོལ་འགག་མེད་རྩལ་དུ་ཤར། །ཆུ་སྟོད་ཅན་གྱི་ཡར་ཚེས་བཞི་ཡི་ནུབ། །གཡའ་གངས་ནགས་ཚལ་ལྡན་པའི་རི་བོའི་ངོགས། །རང་དང་ལྷན་ཅིག་རིགས་ལྡན་ཌཱ་ཀི་མ། །འགྲོ་བའི་མོད་ལ་དེ་ཉིད་སྐད་ཅིག་གིས། །རི་བོའི་རྩེ་མོར་ཡུད་ཀྱིས་བརྒལ་བ་ན། །མཛེས་སྡུག་བུད་མེད་མང་པོའི་འཁོར་ཚོགས་ཀྱིས། །གླུ་དབྱངས་རོལ་མོའི་རྣམ་འགྱུར་དུ་མར་བཅས། །མཁའ་ལ་ཐོགས་མེད་བགྲོད་པའི་སྣང་བ་རྨིས། །སླར་ཡང་ཕྱི་ནུབ་སྔར་གྱི་རྣམ་འགྱུར་གཟུགས། །ཁ་དོག་དམར་གསལ་དྭངས་ཤིང་ཆགས་ཚུལ་གྱིས། །ད་རེས་ལོག་པའི་སྨོན་ལམ་མཐུ་སྨིན་པའི། །དམ་སྲིའི་བར་ཆད་རྐྱེན་དབང་ཉིད་དུ་གྱུར། །ད་ནི་འདི་ནས་ལངྐའི་གླིང་དང་ནི། །དེ་བཱི་ཀོ་ཊར་འདུ་བའི་མཆོད་པ་དང་། །བྱ་བ་འགའ་ཞིག་བསྒྲུབས་ནས་ཨོ་རྒྱན་གྱི། །ཞིང་ཁམས་དྷུ་མ་ཐ་ལའི་གནས་སུ་འགྲོ། །སྔོན་དུས་གཡོར་པོའི་རྒྱུད་དུ་བྱིན་གྱིས་བརླབས། །དེ་ནས་ཕོ་ཉའི་གྲོགས་སུ་འདིར་མཆིས་ཀྱང་། །ལོག་སྤྱོད་འགོང་པོའི་སྨོན་ལམ་མཐུ་ཡིས་རྡིགས། །ད་རེས་ཟབ་མོའི་རྟེན་འབྲེལ་དོན་གྲུབ་ཀྱང་། །སྔར་བཞིན་བར་ཆད་ལོག་པའི་རྐྱེན་དབང་གིས། །སྤྲུལ་པའི་གཟུགས་བརྙན་རེ་ཞིག་དབྱིངས་སུ་བསྡུ། །རྨི་ལམ་སྣང་ཆར་བར་ཆད་སྐྱོབ་པའི་ཕྱིར། །ཐོགས་མེད་སྤྲུལ་པའི་གཟུགས་ཀྱིས་དབུགས་འབྱིན་བྱེད། །ཕྱི་དུས་སླར་ཡང་གཟུགས་ཀྱི་འདུ་བྱེད་ཀྱིས། །སྨོན་ལམ་ལས་ཀྱི་འབྲེལ་པས་མཚམས་སྦྱོར་འཐུས། །ཞེས་བརྗོད་དེ་མ་ཐག་པ་མཁའ་ལམ་ལས། །འུར་དིར་རོལ་མོའི་སྒྲར་བཅས་དབྱིངས་སུ་ནུབ། །དམར་ཆའི་བཅུ་ལ་རིགས་ལྡན་ཏཱ་རེ་མ། །བཞིན་མཛེས་ལང་ཚོ་བདེ་བའི་རྣམ་འགྱུར་ཅན། །སྨིན་དབུས་ལི་ཁྲིའི་ཚོམ་བུས་བཀྲ་བ་ནི། །བདག་གི་མདུན་དུ་ཁྲོང་གིས་འཁོད་ནས་ནི། །ང་ནི་བདེ་མཆོག་བདེ་བའི་རོལ་མོ་ཅན། །བརྡ་རྟགས་ཏི་ལ་ཌཱ་ཀིའི་ཕྱག་རྒྱ་སྟེ། །མཁའ་འགྲོའི་
ཚོགས་དང་བར་གཅོད་རྩོད་པའི་གེགས། །སེལ་ཕྱིར་མི་འགྱུར་མཚན་མར་བཀོད་དོ་ལོ། །འོད་ཟེར་དཀར་པོས་སྦྲེལ་བའི་ཕ་མཐའ་ནས། །མཁའ་ལ་ཡེད་ཡེད་སྐྱོད་ཚེ་བར་ཐག་གིས། །འོད་ཟེར་གྲིམས་ཤིང་ཆད་པའི་སྐྲག་ཉམས་དང་། །ཕྱིས་ཀྱི་ལུང་བསྟན་འགའ་ཞིག་བརྗོད་པ་རྨིས། །གང་འདིར་བར་གཅོད་རྐྱེན་ལས་ཐར་བ་ན། །ཚེ་ཡི་ཚད་དང་འགྲོ་དོན་ཕྲིན་ལས་ཀྱང་། །ལེགས་པར་གྲུབ་མོད་ད་ནི་དེར་ཟད་པའི། །གཏམ་གྱི་སྦྱོར་བ་འགའ་ཞིག་འདི་ལ་བྲིས། །དེ་ཚེ་འཁོར་གཡོག་ཕོ་ཉའི་མཁའ་འགྲོ་དང་། །དཔའ་བོའི་ཆ་ལུགས་རྣམ་འགྱུར་སྣ་ཚོགས་པ། །གང་གི་ཕྱི་བཞིན་འགྲོ་བའི་གསལ་སྣང་དང་། །རྨི་ལམ་སྣ་ཚོགས་ཞག་འགའི་བར་དུ་བྱུང་། །རབ་མྱོས་དབོ་ཟླའི་ཚེས་བཅུར་སྐུ་འབུམ་གྱི། །ས་ཆོག་ཆུ་པྲའི་འཁྱིལ་རིས་གཡས་འཁོར་དབུས། །འདབ་བརྒྱད་པདྨའི་ལྟེ་བར་ཡི་གེ་སཾ། །རྣམ་པར་བཀྲ་བ་ལཱཉྩའི་གཟུགས་སུ་མཐོང་། །དེ་ཚེ་སངས་རྒྱས་བྱང་ཆུབ་སེམས་དཔའི་ཚོགས། །ནམ་མཁའ་གང་བས་བྱིན་གྱིས་བརླབས་པའི་ཚུལ། །ཉམས་ཀྱི་གསལ་སྣང་གཟི་བྱིན་རྒྱས་པ་སོགས། །ངོ་མཚར་མཚན་མ་བཟང་པོས་ཤིས་པ་དང་། །ས་རྡོ་ཆུ་སོགས་གང་འདོད་ཉེ་འདབས་ནས། །འབད་མེད་གཏེར་ཁ་བཞིན་དུ་རྡོལ་བ་དང་། །ལས་བྱེད་རྣམས་ཀྱང་དགའ་བཞིན་ཆེས་སྤྲོ་བས། །རང་རང་ལས་ལ་ངང་གིས་བརྩོན་པར་འཇུག །ཉིན་མོ་མི་ཡི་ལས་གྲྭ་ཇི་བཞིན་དུ། །མཚན་མོ་ལྷ་འདྲེས་བརྩིགས་པའི་རྣམ་འགྱུར་གྱིས། །སྟོབས་ཆེན་ལས་ཀྱང་ལས་མི་ཉུང་ངུ་ཡིས། །དབྱར་ངོ་གཅིག་ལ་གེགས་མེད་ལེགས་པར་གྲུབ། །ཁྱད་པར་སྣྲོན་ཟླའི་བཅུ་ལ་དྲི་མེད་ཀྱི། །ཆོ་གའི་སྒོ་ནས་སྲོག་ཤིང་བཙུགས་པའི་ཚེ། །ཆར་ཟིམ་འཇམ་པོས་ས་ཡི་རྡུལ་མནན་རྗེས། །སྤྲིན་བྲལ་མཁའ་ཡི་སྲོག་ཤིང་རྩེ་མོའི་ཆར། །དབང་པོའི་གཞུ་ཁྱིམ་གདུགས་ལྟར་ཕུབ་པ་ལས། །འཕན་དར་ལྟ་བུའི་འཇའ་ཚོན་འཕྱང་བ་དང་། །འདབ་ལྡན་མེ་ཏོག་དཀར་པོའི་ཆར་ཟིམ་གྱིས། །བར་སྣང་ཁྱབ་པའི་ངོ་མཚར་གསལ་བ་དང་། །འགྱུར་མེད་སྲོག་ཤིང་ཨོ་རྒྱན་ཆེན་པོས་བཙུགས། །མཁའ་འགྲོ་སྡེ་བཞིས་ཕྱོགས་བཞིའི་འདྲེན་ཐག་འཐེན། །མ་ཕམ་མགོན་སོགས་སངས་རྒྱས་སྲས་བཅས་ཀྱིས། །བྱིན་རླབས་བཀྲ་ཤིས་མེ་
ཏོག་ཆར་དུ་བསྙིལ། །དཀར་ཕྱོགས་ལྷ་དང་སྲུང་མ་ཐམས་ཅད་ཀྱིས། །ཕྱོགས་བཅུ་ཀུན་ནས་མཆོད་སྤྲིན་སྤྲོ་བ་སོགས། །ཀུན་རྟོག་འཆར་སྒོའི་སྣང་ཆར་ངོ་མཚར་གཟུགས། །ཡིད་ཀྱི་མོས་མཚོར་ཐོགས་མེད་གསལ་ཤར་བ། །སྤྱིར་ན་ཡིད་བྱེད་འཁྲུལ་རྟོག་ཡིན་མོད་ཀྱང་། །རྩོལ་མེད་ཤུགས་འབྱུང་འགག་མེད་ཤར་བ་དང་། །སངས་རྒྱས་རྣམས་ཀྱི་སྨོན་ལམ་ཐུགས་རྗེའི་མཐུ། །འཕྲིན་ལས་འཇུག་ཚུལ་བསམ་མི་ཁྱབ་ཕྱིར་རོ། །ཆུ་སྟོད་མར་ངོའི་བཅུ་ལ་དམ་ཅན་གྱི། །རྟེན་འཛུགས་བྱས་ཚེ་སྒྲུབ་ཁང་སྒོ་དྲུང་ནས། །རྟེན་རྫས་ཕྱི་བཞིན་རླུང་འཚུབ་དྲག་འཁོར་བ། །གང་དུ་འཛུགས་རྒྱུའི་བར་དུ་འགྲོ་བ་དང་། །དམ་ཅན་མོན་པ་ཕོ་མོའི་གཟུགས་བཟུང་བ། །སྤྲུལ་པའི་བྱ་ཁྱི་མང་པོའི་འཁོར་དང་བཅས། །རྟེན་གྱི་གནས་སུ་ཡུད་ཀྱིས་ཐིམ་པ་ཡི། །གསལ་སྣང་མངོན་སུམ་བཞིན་དུ་ཤར་བར་གྱུར། །ཁྲུམས་ཀྱི་དམར་ཆའི་བརྒྱད་ལ་སྐུ་འབུམ་གྱི། །རབ་གནས་བྱས་ཚེ་མཁའ་ལ་འཇའ་གུར་ཕུབ། །ཕྱོགས་མཚམས་བཀྲ་ཤིས་རྟགས་ཀྱི་ཆུ་འཛིན་འཁྲིགས། །ཁོར་ཡུག་འོད་ཟེར་དཀར་པོའི་ཕྲེང་བས་བསྐོར། །ངོ་མཚར་དགེ་བའི་མཚན་མ་བཟང་པོ་རྣམས། །ཀུན་གྱི་མངོན་སུམ་གཏན་ལ་ཕེབས་པ་ཡིས། །བཟོད་མེད་བྱིན་ཕེབས་དག་སྣང་མོས་པའི་བློས། །སྐལ་བཟང་རྣམས་ལ་བཟང་པོའི་འབྲེལ་བ་བཞག །དེ་ཚེ་མཚན་མོའི་ཐུན་གྱི་རྨི་ལམ་དུ། །ཐེམ་སྐས་རིམ་བརྩེགས་རྩེ་མོར་གཞལ་མེད་ཁང་། །ཡིད་འོང་ཉམས་དགའི་ནང་དུ་ཞུགས་པ་ན། །འོད་ཀྱི་འཁོར་ལོ་གསལ་ཞིང་དྭངས་པའི་ནང་། །རིགས་བརྒྱའི་ལྷ་ཚོགས་ལམ་མེར་བཞུགས་པ་སྙམ། །ཤར་བར་རྩེ་གཅིག་མོས་པས་སེམས་འདྲེས་ཚེ། །དེ་དག་འུབ་འདུས་མགོན་པོ་འོད་དཔག་མེད། །དམར་གསལ་མཚན་དཔེའི་གཟི་བྱིན་འབར་བར་གྱུར། །དེ་ཡི་གསུང་ནས་ཁྱོད་ཀྱི་ཕྲིན་ལས་རྣམས། །གཞན་ཕན་གདུལ་བྱའི་ཡུལ་ལ་སྨིན་པ་དང་། །མྱུར་དུ་པདྨས་བརྒྱན་པའི་ཞིང་ཁམས་སུ། །རྫོགས་སངས་རྒྱས་ཀྱི་གོ་འཕང་འཐོབ་པར་འགྱུར། །འདི་ལྟར་དགེ་བའི་ལས་ལ་འབྲེལ་ཐོགས་ཀུན། །འདུས་པ་དང་པོར་སྐྱེ་བའི་རྟེན་འབྲེལ་འགྲིག །ཅེས་པའི་ལུང་བསྟན་དབུགས་དབྱུང་རྗེས་གནང་གི །སྐལ་བཟང་ཀུན་དགར་བྱས་པའི་ངོ་མཚར་རྨིས། །མདོར་ན་སྐྱབས་མགོན་བླ་
མས་དབང་བསྐུར་ཞིང་། །སྐུ་བཞིའི་ས་བོན་རྒྱུད་ལ་ཐེབས་པ་གང་། །མྱོས་བྱེད་ནས་བཟུང་བྱིན་བརླབས་ནུས་སྟོབས་ཀྱིས། །བུམ་དབང་རྟོགས་པའི་ཉམས་མྱོང་རིམ་བཞིན་འཕེལ། །སྣང་སྟོང་མཉམ་ཉིད་སྒྱུ་མ་ལྟ་བུར་ཤར། །སྐུ་ཡི་འགྲོ་དོན་ཤས་ཆེར་སྤྱོད་པའི་དུས། །འཁོར་གྲོགས་རྟེན་ཅིང་འབྲེལ་འབྱུང་རྐྱེན་འགའ་ཡིས། །ལུང་དོན་མངོན་དུ་གྱུར་པར་མ་ནུས་སོ། །དམར་སེར་དབོ་ཟླ་ནས་བཟུང་བདེ་ཆེན་གྱི། །བྱིན་རླབས་གསང་བའི་དབང་གི་རྟོགས་པའི་ཉམས། །རིམ་བཞིན་གོམས་པས་གསལ་སྟོང་རྣལ་འབྱོར་ལམ། །གཟུང་འཛིན་གདོད་ནས་དག་པའི་གནས་ལུགས་རྟོགས། །གསུང་གི་འགྲོ་དོན་ཤས་ཆེར་སྤྱོད་པའི་དུས། །དངོས་བརྒྱུད་ཟབ་རྒྱས་དམ་ཆོས་ཉི་མ་ཡིས། །ཐར་འདོད་ཕན་བདེའི་པདྨོ་རྒྱས་བྱེད་ཅིང་། །རྣམ་གྲོལ་སྦྲང་རྩི་འཛིན་པའི་དགའ་སྟོན་གྲུབ། །ཁྲག་སྐྱུག་ཁྲུམས་ཟླར་ཤེས་རབ་ཨེ་དབྱིངས་སུ། །ཐབས་མཆོག་བདེ་ཆེན་ཡེ་ཤེས་དགྱེས་རོལ་བའི། །དགའ་བཞིའི་རོལ་མོ་རྣམ་པ་མཐའ་ཡས་པས། །རིག་སྟོང་བརྗོད་བྲལ་རྣལ་འབྱོར་ཉམས་སུ་མྱོང་། །ཐུགས་ཀྱི་འགྲོ་དོན་ཤས་ཆེར་སྤྱོད་པའི་དུས། །ཟབ་ལམ་ཕོ་ཉ་བདེ་མཆོག་བདེ་ཆེན་གྱིས། །སེམས་ཀྱི་མདུད་གྲོལ་རང་རིག་ཕྱག་རྒྱ་ཆེས། །འཁོར་འདས་ཆོས་ཉིད་རྣམ་དག་ངོ་བོར་ཐིམ། །དེས་ན་བླ་མའི་བྱིན་རླབས་སྙིང་ལ་ཞུགས། །སྒྲོ་འདོགས་མཚན་མའི་སྤྲོས་པ་ནང་ནས་ཆོད། །སྒོ་གསུམ་རྡོ་རྗེ་གསུམ་གྱི་ཆོས་ཉིད་ཤེས། །བྱ་བ་ཅི་བྱེད་རང་དོན་འཛིན་པ་བྲལ། །འཁོར་བའི་ས་བོན་འབྱིན་པའི་འཇུག་པ་ཟད། །ཕྲིན་ལས་འགྲོ་དོན་མཉམ་ཡངས་ཁྱབ་གདལ་དུ། །སྤྱོད་པའི་དུས་ཉིད་ཡིན་མོད་དེ་ལྟ་ནའང་། །ཆ་ཙམ་འགྲུབ་པའི་ལྷག་བསམ་བརྟན་པ་འོ། །དེ་དག་སྔར་བརྗོད་ཁོངས་སུ་གསེབ་ཚགས་སུ། །གནས་པ་ལམ་གྱི་ཉམས་མྱོང་རིམ་པ་བཞིན། །སྐྱེས་པའི་ཚུལ་དང་འཕྲིན་ལས་དུས་སྐབས་རྣམས། །སྡེ་ཚན་ཕྱོགས་སུ་བསྡོམས་པའི་ཚུལ་ཙམ་མོ། །དེ་ལྟར་རང་རིག་གདོད་ནས་འགྱུར་མེད་འདི། །སངས་རྒྱས་ཀུན་གྱི་ངོ་བོར་གནས་པའི་ཕྱིར། །གང་གི་རྩལ་སྣང་རྣམ་འགྱུར་སྣ་ཚོགས་ཀྱང་། །དེ་ཡི་རྣམ་ཐར་ཉིད་དུ་ངང་གིས་གྲུབ། །དེ་ཕྱིར་དག་དང་མ་དག་དངོས་སྣང་གི །སྤྱོད་ཚུལ་ཀུན་ཀྱང་མཉམ་ཡངས་ཁྱབ་གདལ་
གྱི། །ངོ་བོ་འགྱུར་མེད་ཀ་དག་དེ་བཞིན་ཉིད། །ལྷུན་གྲུབ་འདུས་མ་བྱས་པ་ཉིད་དུ་གནས། །འོན་ཀྱང་མ་རིག་འཁྲུལ་པའི་ལས་སྣང་ལ། །རྟག་ཏུ་ཞེན་ཅིང་ཨ་འཐས་འཛིན་པ་ཅན། །ཀུན་རྨོངས་སེམས་ཅན་རང་གི་མཚན་ཉིད་དུ། །གནས་པའི་རྣམ་འགྱུར་གཏན་ལ་ཕེབས་འདིའོ། །དེས་ན་སོལ་བ་བཀྲུ་སྦྱངས་ལ་འབད་ཀྱང་། །གང་གི་མཚན་ཉིད་དཀར་པོར་མི་འགྱུར་ཞིང་། །རྗོད་བྱེད་གཏམ་གྱི་སྦྱོར་བ་སྣ་ཚོགས་པ། །བསྒྲགས་ཀྱང་ཡ་མཚན་མངོན་དུ་ཅི་ཞིག་མཆིས། །ཁྱད་པར་དག་པའི་སྣང་བ་འབྱམས་ཀླས་པའི། །མཐོང་དང་རྟོགས་ཚུལ་འདི་ཞེས་འཁོར་གྱི་དབུས། །སྒྲོག་པའི་རྣམ་ཐར་ས་ཆེན་ཐོབ་རྣམས་ལས། །ཀུན་རྨོངས་བདག་ལྟའི་སྤྱོད་ཡུལ་ག་ལ་ཞིག །དེ་ཡང་དཔལ་ལྡན་གསང་བ་འདུས་པ་ཡི། །རྒྱུད་ལས་ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་ཞེས་གསུངས་པས། །ཡེ་ཤེས་སྐུ་ཉིད་མཐོང་བར་སུ་ཞིག་རེ། །འོན་ཀྱང་ཉམས་སྣང་འཆར་སྒོ་མ་འགགས་པས། །ཡིན་ལུགས་སྣོད་བཅུད་རྒྱལ་བའི་འཁོར་ལོ་དང་། །དྲི་མེད་རང་སེམས་རྗེན་པར་མཐོང་བ་འདི། །ཡ་མཚན་གཏམ་འདིའི་གཞི་རུ་གནས་པ་ཡིན། །མ་རིག་ལས་ཀྱི་འདུ་བྱེད་སྐྱེད་པ་ལས། །འཁོར་བ་ལུགས་འབྱུང་སྲེད་ལེན་རྟེན་འབྲེལ་གྱིས། །སྲིད་འདིར་ཕུན་ཚོགས་དལ་འབྱོར་ལྡན་པའི་རྟེན། །ཐོབ་འདི་བཟང་པོའི་ས་བོན་འབྲས་བུར་ངེས། །འདུས་བྱས་ཆོས་རྣམས་གློག་གི་རྩེ་དགའ་བཞིན། །སྐད་ཅིག་མི་རྟག་འགྱུར་ཞིང་གཡོ་བ་ཅན། །ཟག་བཅས་ཆོས་ཀྱི་མཚན་ཉིད་ལེགས་རྟོགས་ནས། །བདེན་འཛིན་ཨ་འཐས་ཞེན་པ་རང་སར་ཆོད། །སྡུག་བསྔལ་རྒྱ་མཚོ་ལས་ཀྱི་དབུ་བ་ཅན། །འགྱུར་དང་འདུ་བྱེད་དྲག་པོར་འཁྲུགས་པའི་རླབས། །མི་བཟད་འཇིགས་རུང་བརྒལ་དཀའི་གྲོང་ཁྱེར་ལས། །འགྲོ་ཀུན་སྒྲོལ་བའི་སྙིང་སྟོབས་བརྟན་པར་བྱས། །དེ་ཕྱིར་སྲིད་པའི་སྨག་རུམ་མི་བཟད་པ། །འཕྲོག་བྱེད་སྐྱབས་གསུམ་ཚད་མེད་ཐུགས་རྗེའི་འོད། །ཉི་མ་བྱེ་བའི་དཔལ་གྱིས་མི་མཚོན་ཕྱིར། །ངེས་འབྱུང་དད་པའི་པདྨོ་གཅིག་ཏུ་བཏུད། །རྒྱལ་གསུང་ཟབ་དང་རྒྱ་ཆེའི་ཆོས་རྣམས་ཀྱི། །ཆ་ཤས་ཕྲ་མོ་རེར་ཡང་ཕན་བདེའི་རོ། །བདུད་རྩིར་འཛག་པས་འཁོར་བའི་གཅོང་ནད་ཀུན། །མཐར་བྱེད་
རང་སྐལ་དད་པའི་སྙིམ་པས་བླངས། །དང་པོར་ཚུལ་ཁྲིམས་བསླབ་པས་རང་རྒྱུད་བསྡམས། །བར་དུ་ཐོས་བསམ་སྒོམ་པའི་ཚུལ་ལ་འབད། །ཐ་མར་འཆད་རྩོམ་དགེ་བའི་ལས་ཐབས་ཀྱིས། །དལ་འབྱོར་དོན་མེད་ཉིད་དུ་མ་ལུས་ཙམ། །དེ་ཕྱིར་སྟོན་པས་གསུངས་ཤིང་རྒྱ་བོད་ཀྱི། །མཁས་གྲུབ་རྣམས་ཀྱིས་ཉན་བཤད་བསྒྲུབས་པ་ཡི། །བཀའ་བརྒྱུད་ད་ལྟའི་བར་དུ་མ་ཆད་པའི། །ཆོས་ཚུལ་ཀུན་ལ་དག་སྣང་མོས་གུས་སྦྱངས། །ཁྱད་པར་སྔ་འགྱུར་བཀའ་གཏེར་གཞུང་ལུགས་དང་། །མན་ངག་ལམ་གྱིས་མཚོན་ནས་མདོ་རྒྱུད་ཀྱི། །ཟབ་དོན་སྙིང་པོའི་དོན་ཀུན་འགལ་མེད་དུ། །ཕྱོགས་ཙམ་གོ་ཞིང་ཉམས་སུ་མྱོང་བར་གྱུར། །མདོ་སྒྱུ་སེམས་ཕྱོགས་བླ་རྫོགས་ཐུགས་གསུམ་སོགས། །བཀའ་གཏེར་ཟབ་མོའི་སྐྱེད་རྫོགས་ཆོག་ཕྲིན་གྱི། །ལག་ལེན་སྒྲིག་བསྐོས་མ་འདྲེས་གསལ་ཤར་ཞིང་། །བྱིན་རླབས་ཉམས་མྱོང་ཅུང་ཟད་ཐོབ་པ་ཙམ། །དམ་པ་རྣམས་ཀྱི་ཐུགས་རྗེའི་བྱིན་རླབས་ཀྱིས། །གནས་ལུགས་སྤྲོས་བྲལ་ཟབ་མོའི་དེ་བཞིན་ཉིད། །སྟོན་པའི་གཞུང་དང་དམ་པའི་རྣམ་ཐར་ལ། །མོས་གུས་མཆི་མ་འཁྲུག་པའི་དད་པ་ཐོབ། །ཀུན་རྫོབ་སྣང་ཆར་ཨ་འཐས་འཛིན་པ་ཡི། །རང་བློའི་འཁྲུལ་རྟོག་གྲུབ་མཐར་མ་བཟུང་ཞིང་། །རྒྱལ་བའི་གསུང་རབ་ཀུན་གྱི་དགོངས་པའི་གནད། །ཀུན་ཀྱང་འགལ་མེད་མདོ་དོན་གཅིག་ཏུ་གོ། བསྟན་པའི་སྲོལ་དང་དེ་འཛིན་གང་ཟག་ལ། །རང་གཞན་རིས་གཅོད་ཕྱོགས་སུ་མ་ལྷུང་ཞིང་། །ལྷ་སྔགས་རྫོགས་རིམ་རྣམ་པ་ཐ་དད་ཀྱང་། །རང་བཞིན་མཉམ་པ་ཉིད་དུ་གནས་པར་ཤེས། །ཕན་འདོད་ལྷ་འདྲེར་ཆགས་སྡང་རེ་དོགས་བྲལ། །བར་དུ་གཅད་བྱ་གཅོད་བྱེད་དབྱིངས་སུ་དག །བྱིན་གྱིས་བརླབ་བྱ་རློབ་བྱེད་སེམས་སུ་ཤེས། །ཐམས་ཅད་རིག་པའི་རང་རྩལ་ཉིད་དུ་རྫོགས། །བཙུན་པོའི་སྤྱོད་ཚུལ་གཙང་མས་མ་གོས་ཀྱང་། །སྡོམ་པ་གསུམ་གྱི་ཉེས་ལྟུང་ཕྲ་རགས་ལ། །སྤྱིར་བཏང་དམིགས་བསལ་བླང་དོར་མ་འཛོལ་བས། །ཆོས་དང་རང་སེམས་ཞུས་དག་ཕེར་བ་ཙམ། །བཟང་པོའི་རྣམ་ཐར་འཁྱོངས་པར་དཀའ་མོད་ཀྱང་། །གཡོ་སྒྱུས་སེམས་ཅན་བསླུ་བར་མ་བྱས་ཤིང་། །ཡུན་དུ་གནས་ལ་ཕན་པར་འགྱུར་མཐོང་ནས། །ཅི་ནུས་ཐབས་ལ་ཅི་འགྲུབ་བརྩོན་པ་བསྐྱེད། །སྣ་
ཚོགས་ཐ་སྙད་ཤེས་བྱའི་རྣམ་པ་རྣམས། །དོན་ལ་མི་སྦྱོར་མཁས་པར་རློམ་ཡང་ཅི། །ཚིགས་བཅད་གཅིག་གི་དོན་ཡང་དད་འདུན་གྱིས། །ཉམས་ལེན་སྙིང་པོར་དྲིལ་ན་ཟབ་པར་གོ། འཁོར་བ་ཡིན་ཕྱིར་སྡུག་བསྔལ་རང་བཞིན་དུ། །གྲུབ་མོད་ན་རྒ་འཆི་རྒུད་འཕོ་འགྱུར་ཆོས། །གང་བྱུང་ཆོས་ཉིད་ཡིན་པའི་རང་མཚང་རིག །གློ་བུར་འཁྲུལ་ངོ་ཆུ་ཟླ་ལྟ་བུར་རྟོགས། །དེས་ན་དགེ་བའི་ལས་ལམ་མཐའ་ཡས་ཀྱང་། །སྙིང་རྗེ་བྱང་ཆུབ་སེམས་དང་བདག་མེད་པ། །སྤྲོས་བྲལ་ལྟ་བས་ཟིན་པའི་ལས་རྣམས་ཀུན། །སངས་རྒྱས་ཐོབ་པའི་བླ་མེད་རྒྱུ་རུ་གནས། །དེས་མ་ཟིན་ཅིང་ཐར་འདོད་བློ་མེད་ན། །སྦྱིན་སོགས་ལས་ཀྱང་བྱང་ཆུབ་རྒྱུར་མ་ངེས། །ཚུལ་ཁྲིམས་བསྲུངས་ཀྱང་འཇིགས་སྐྱབས་ལེགས་སྨོན་ཙམ། །སེམས་གནས་ཏིང་འཛིན་བརྟན་ཀྱང་ས་མི་ཆོད། །མདོར་ན་ལས་འབྲས་བླང་དོར་མ་ནོར་བས། །ངེས་འབྱུང་བྱང་སེམས་སྟོང་ཉིད་རྟོགས་པ་ཡིས། །དགེ་བ་གང་བྱས་ཐར་པར་འགྱུར་བ་ལ། །དྲི་མེད་དམ་པའི་ལུང་ལ་ངེས་ཤེས་བསྐྱེད། །དེ་ཕྱིར་ཀ་དག་སྤྲོས་བྲལ་སྟོང་ཉིད་དང་། །ལྷུན་གྲུབ་བདེ་ཆེན་རྩལ་སྣང་མ་འགགས་པའི། །ཟུང་འཇུག་ལམ་གྱིས་འཁོར་འདས་རོ་མཉམ་དུ། །རྟོགས་པ་འདུས་མ་བྱས་ཀྱི་དགེ་བར་བཤད། །གང་གིས་སྲིད་པའི་འཁྲི་ཤིང་རྒྱུ་དང་བཅས། །ཡོངས་སུ་བཅད་མོད་དེ་ཡིས་ཟིན་གྱུར་ན། །དགེ་བའི་ལས་སྟོབས་ཆེ་ཆུང་གང་འགྲུབ་ཀྱང་། །འདུས་མ་བྱས་པའི་དགེ་བར་འགྱུར་མཐོང་ནས། །བདེ་བར་གཤེགས་པའི་སྐུ་དང་གསུང་གི་རྟེན། །ཆོས་སྐུའི་མཆོད་སྡོང་བཞེངས་སོགས་དགེ་བའི་ལས། །རྣམ་པ་དུ་མའི་ཐབས་དང་རྟེན་འབྲེལ་གྱིས། །རང་གཞན་དགེ་ལ་ཅི་ནུས་བསྐུལ་བ་བྱས། །བསྟན་པའི་སྙིང་པོ་གསང་ཆེན་རྙིང་མ་ཡི། །མདོ་སྒྱུ་སེམས་ཀློང་ལ་སོགས་བཀའ་མ་དང་། །བླ་རྫོགས་ཐུགས་གསུམ་གྱིས་མཚོན་གཏེར་མའི་ཆོས། །རྣམ་དག་བཀའ་སྲོལ་ཡོད་པ་ཕལ་ཆེར་ཐོས། །འགའ་ཞིག་ཆེས་དཀོན་ནུབ་ཏུ་ཉེ་བ་ཡང་། །དཀའ་བས་འབད་རྩོལ་བསྐྱེད་ནས་སྲོག་རྩ་འཐུད། །དབང་ལུང་ཁྲིད་སོགས་གདམས་པའི་སྒོ་མཐའ་ཡས། །འཆད་སྤེལ་དར་ཞིང་རྒྱས་པའི་སྙིང་སྟོབས་བསྐྱེད། །གཅམ་བུས་སེམས་བསྲུང་ཞེན་སྲེད་དད་མོས་སོགས། །སོ་སོའི་འདུད་ཚུལ་རྣམ་པ་དུ་མ་ཡི། །
རེ་བ་ཡུལ་དུས་གནས་སྐབས་དང་མཐུན་པར། །སྐོང་བའི་ལྷག་བསམ་བཟང་པོ་ཅི་ནུས་བསྐྱེད། །ཆོས་དང་ཟང་ཟིང་མི་འཇིགས་སྦྱིན་པའི་ཆ། །རང་གི་མཐུ་ཡིས་ཇི་ཙམ་ནུས་པ་བསྒྲུབས། །གཞན་དོན་ཁོ་ནར་འགྱུར་དང་མི་འགྱུར་བ། །འཕགས་པས་མཁྱེན་གྱི་བདག་བློའི་སྤྱོད་ཡུལ་མིན། །ཆེན་པོ་ཀུན་གྱིས་རྙེད་དང་བཀུར་སྟི་ཡིས། །མངོན་པར་བཏུད་ཀྱང་རློམ་པ་མ་སྐྱེས་ཤིང་། །མཆོག་དམན་སློབ་རིགས་ཡོན་བདག་དུ་མ་ཡང་། །འབད་རྩོལ་མེད་པར་རང་གི་ངང་གིས་འདུས། །གཙུག་ལག་གནས་རྟེན་དགེ་འདུན་འདུས་པའི་སྡེ། །བསྒྲུབས་ནས་མཆོད་ཅིང་སྲི་ཞུས་གུས་པར་བསྐྱངས། །དགེ་བའི་ལག་རྗེས་རང་གིས་ཅི་ནུས་པ། །འབད་པས་བསྒྲུབས་ཤིང་ཆ་ཙམ་འགྲུབ་པའང་ཡིན། །ཕྱི་མཐའི་བྱ་བ་འདི་ཉིད་མ་འགྲུབ་ཅེས། །འགྱོད་དང་བློ་ཡི་ལྷག་མ་བཅགས་པའང་མེད། །འོན་ཀྱང་ཇི་སྲིད་འཚོ་བ་དེ་སྲིད་དུ། །དགེ་བའི་ལས་ནི་ཅི་ནུས་སྒྲུབ་ལ་སྤྲོ། །དེ་ཡང་རང་ཉིད་གཅིག་པུའི་རྐྱེན་སེལ་སོགས། །ཚེ་འདིའི་བདེ་ཐབས་ཁོ་ནར་མ་དམིགས་ཏེ། །ཀུན་ཀྱང་རྒྱལ་བའི་བསྟན་པ་རྒྱས་པ་དང་། །མ་གྱུར་སེམས་ཅན་ཕན་བདེའི་ཆེད་དུའོ། །མདོར་ན་སངས་རྒྱས་ཀུན་དངོས་བླ་མ་ལ། །སྐྱབས་གནས་ཐམས་ཅད་འདུས་པའི་མོས་གུས་ཐོབ། །སྣང་གྲགས་ཐམས་ཅད་དག་པའི་འཁོར་ལོ་ལ། །བཟང་ངན་འབྱེད་ཆོས་མེད་པའི་དག་སྣང་འབྱོངས། །གཞུང་ལུགས་དུ་མའི་མདོ་དོན་རང་རིག་གི །ངོ་བོར་སྒྲོ་འདོགས་ཆོད་པའི་སྤོབས་པ་ཐོབ། །ལྟ་སྒོམ་སྤྱོད་པའི་འཛིན་ཞེན་དབྱིངས་སུ་ཟད། །གཞི་ལམ་འབྲས་བུའི་རྣམ་གཞག་རང་སར་གྲོལ། །ཆོས་བརྒྱད་རྣམ་རྟོག་དུག་ལྔའི་ཞེན་འཁྲིས་མཐའ། །གང་ཤར་གཅེར་གྲོལ་གཉིས་འཛིན་དབྱིངས་སུ་ནུབ། །རང་སེམས་དྲི་མེད་གནས་ལུགས་རྗེན་པར་མཐོང་། །རྒྱལ་བ་ཀུན་དང་དུས་གཅིག་མཇལ་བར་མཚུངས། །དེ་ཕྱིར་རང་སེམས་གསལ་རིག་བདེ་བའི་ཉམས། །ཕྱོགས་རིས་མེད་པའི་མཁའ་ལ་ཡངས་པར་གདལ། །དུས་གསུམ་ཀུན་ཏུ་འགྱུར་བ་མེད་པའི་དོན། །ཅང་མེད་མ་ཡིན་བདེ་བར་ཉམས་སུ་མྱོང་། །མྱོང་བྱེད་མཁན་པོ་རྡོ་རྗེ་རྣམ་གསུམ་དུ། །ཡེ་ནས་རྫོགས་པའི་ལྷན་ཅིག་སྐྱེས་པ་གང་། །རྩལ་སྣང་རྟེན་འབྲེལ་མ་འགགས་མཁའ་མཉམ་འགྲོའི། །ཕན་དང་བདེ་བའི་དཔལ་དུ་འཆར་
བར་ཤོག །དེ་ཡང་རླབས་ཆེན་སྤྱོད་པས་བསྟན་པ་དང་། །འགྲོ་ལ་ཕན་པ་དམ་པའི་རྣམ་ཐར་ཡིན། །རྨོངས་ལས་ཆེས་རྨོངས་བདག་འདྲར་ངོ་མཚར་གྱི། །རྟོགས་བརྗོད་ཡོན་ཏན་བརྗོད་རྒྱུ་མ་མཆིས་མོད། །འོན་ཀྱང་ནན་ཆ ེའི་དྲི་བས་རྐུན་མ་ཡི། །ངོ་ལེན་བཞིན་དུ་རྩལ་སྣང་མ་འགགས་པའི། །འཁྲུལ་རྟོག་འཆར་སྒོའི་རྣམ་འགྱུར་ཇི་སྙེད་པ། །གང་ཤར་བྲག་ཆའི་དབྱངས་ཀྱི་རྗེས་འགྲོར་སྤེལ། །དཔེར་ན་སྤྲེའུའི་ཟློས་གར་མཚར་ཆེ་ཡང་། །བྱིས་པའི་སྐྱེ་བོ་ཉི་ཚེའི་བློ་འབྲིད་ལས། །འབྲས་ལྡན་ཉིད་དུ་སྤྱོད་ལྡན་སུ་ཡིད་རྟོན། །དེ་ཕྱིར་དེ་འདྲའི་ངང་ཚུལ་ཁོ་ན་སྟེ། །ཀུན་རྨོངས་སྤྱོད་ཚུལ་ཆུ་ཤིང་སྡོང་པོ་ལ། །སྣ་ཚོགས་བརྗོད་པའི་ལོ་འདབ་དུད་ཀྱང་ཅི། །རྒྱལ་བའི་མཛད་པ་ཡོངས་འདུའི་འཁྲི་ཤིང་གི །ངོ་མཚར་གཏམ་དུ་གླེང་ན་མི་ལེགས་སམ། །འོན་ཀྱང་དག་དང་མ་དག་བརྗོད་པའི་སྒྲ། །ཀུན་ཀྱང་གནས་ལུགས་ཆོས་སྐུའི་རང་སྒྲར་གནས། །དེ་ཕྱིར་རྟོགས་བརྗོད་དབྱངས་ཀྱི་རྒྱལ་མོའི་གླུ། །གྲགས་སྟོང་སྐྱེ་མེད་རྡོ་རྗེའི་ཚིག་ཏུ་བརྗོད། །ཐོས་བསམ་སྒོམ་པའི་ཉམས་རྟོགས་རྩལ་ཆུང་ཞིང་། །འདོད་སྲེད་འཆིང་བའི་ལམ་དུ་ལྷུང་གྱུར་ཀྱང་། །ལྷག་བསམ་དགེ་བའི་མཁར་བ་ལ་བརྟེན་ནས། །སངས་རྒྱས་མཛད་པ་རྒྱ་མཚོའི་རྗེས་སློབ་ཤོག །གང་གི་མཛད་པ་ངོ་མཚར་རྒྱ་མཚོའི་ཚུལ། །དོན་བཞིན་སྟོན་པ་ཀུན་ཏུ་བཟང་པོ་ཅན། །རིས་མེད་གདུལ་བྱའི་མོས་པའི་ཁྱད་པར་བཞིན། །འཇུག་པའི་ཕྲིན་ལས་སངས་རྒྱས་ཉིད་འདྲར་ཤོག །གཞན་རྣམས་མགུ་བའི་རྣམ་ཐར་མ་འཁྱོངས་ཀྱང་། །རང་ལ་གནོང་འགྱོད་མེད་པའི་བློ་གདེང་ཆུག །དེ་ཕྱིར་གང་ཤར་ཡི་གེར་བཀོད་པ་འདི། །རྗེས་འབྲང་མོས་ཞེན་ཅན་གྱི་གདུང་སེལ་མཛོད། །རིག་པ་འཛིན་པ་འགྱུར་མེད་རྡོ་རྗེའི་ཤིན་ཏུ་གསང་བ་ཉམས་སྣང་གི་རྟོགས་བརྗོད་སྒྱུ་འཕྲུལ་རྡོ་རྗེའི་རོལ་མོ་ཞེས་བྱ་བ་འདི་ནི། བླ་མ་ཐམས་ཅད་མཁྱེན་པའི་སྐུའི་སྲི་ཞུ་བ་སྡོམ་བརྩོན་ངག་དབང་དཀོན་ཅོག་དང་གཞུང་ལུགས་རབ་འབྱམས་སྨྲ་བའི་སྤོབས་པ་མཆོག་ཏུ་གྲུབ་པ་བཤེས་གཉེན་གཞོན་ནུ་ཆགས་པ་ཆོས་འཕེལ་བཟང་པོས་ནན་ཆེན་པོའི་གསུང་གིས་སྔ་ཕྱིར་བསྐུལ་བ་དང་། རང་དང་ལྷན་ཅིག་སྤྱོད་པའི་གཅུང་ཀུན་དགའ་ཚུལ་ཁྲིམས་རྒྱ་མཚོ་དང་། དགེ་སློང་བློ་གསལ་རྒྱ་མཚོས་
ཀྱང་རྣ་བའི་བུ་ག་ཡང་ཡང་བཙེར་བའི་རྒྱུ་ལས། ཆུ་མོ་བྱའི་ལོ་ས་གས་ཉ་བའི་དུས་དགེ་བར་ཡི་གེར་སྤེལ་བ་སྟེ། ཆོས་ཀྱི་རྗེས་སུ་འབྲང་བའི་དད་པའི་བློ་ཅན་རྣམས་ལ་མོས་པའི་མཐུན་རྐྱེན་དུ་འགྱུར་བ་སྲིད། གཞན་དུ་སྒྲོ་སྐུར་གྱི་གཞིར་འགྱུར་བའི་ཕྱིར་གསང་ཞིང་སྦ་བ་ལ་ནན་ཏན་དུ་བྱའོ། །ས་མ་ཡ། རྒྱ་རྒྱ་རྒྱ། ༈ ཤྲི་ཡསྟུ།། །།དུས་གསུམ་རྒྱལ་ཀུན་ངོ་བོ་པདྨ་འབྱུང་། །གང་གི་རིང་ལུགས་ཆོས་ཀྱི་རྒྱལ་ཐབས་ལ། །དབང་འབྱོར་ཟབ་གཏེར་བདག་པོ་ཆོས་ཀྱི་རྒྱལ། །སྐལ་ལྡན་གླིང་བཞིའི་དབུས་ན་རི་དབང་བཞིན། །རིག་པའི་ཡེ་ཤེས་དངོས་འཛིན་ལས་གྲོལ་བས། །འགྱུར་མེད་བདེན་དོན་ཡོངས་གཟིགས་རྡོ་རྗེ་འཛིན། །གང་གི་ཡེ་ཤེས་སྒྱུ་དྲའི་རྟོགས་བརྗོད་ཀྱི། །ངོ་མཚར་ཡི་གེའི་བརྡ་ཡིས་གསལ་སྟོན་པ། །གཅིག་ལས་དུ་མར་ཆུ་ཟླ་བཞིན་འཆར་བའི། །འཕྲུལ་ཆེན་པར་གྱི་སྦྱིན་པོ་བསོད་ནམས་དང་། །བཟང་པོའི་སྨོན་ལམ་མཐུ་གྲུབ་རྣམ་དཔྱོད་ཅན། །རིན་ཆེན་དབང་གི་རྒྱལ་པོ་བཀྲ་ཤིས་ཀྱི། །འདོད་དགུ་ཆར་དུ་འབེབས་པ་གང་དེའོ། །ཚུལ་འདི་སྒྲུབ་ལ་བྲིས་བརྐོས་ཞུས་བྱེད་སོགས། །ལྷག་བསམ་མ་སྨད་སྦྱོར་བ་མཐུན་པ་ཀུན། །སྲས་བཅས་རྒྱལ་བའི་རྣམ་ཐར་རྗེས་ཞུགས་ནས། །དོན་གཉིས་བསམ་པ་ལྷུན་གྱིས་འགྲུབ་པར་ཤོག །ཅེས་པའང་འགྱུར་མེད་རྡོ་རྗེས་སོ། །སརྦ་མངྒ་ལཾ།། །།