ཀླད་ཀྱི་དོན།

རྗེ་བཙུན་བླ་མ་རིན་ཆེན་རྣམ་པར་རྒྱལ་བའི་རྣམ་ཐར་མདོར་བསྡུས་སྐལ་བཟང་གདུང་སེལ་ཞེས་བྱ་བ་བཞུགས་སོ། །ༀ་སྭ་སྟི། དཔལ་ལྡན་བླ་མ་དམ་པ་འགྱུར་མེད་རིན་ཆེན་རྣམ་པར་རྒྱལ་བའི་རྣམ་ཐར་མདོར་བསྡུས་སྐལ་བཟང་གདུང་སེལ་ཞེས་བྱ་བ། བླ་མ་དང་རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །ཆོས་དབྱིངས་རང་བཞིན་ཕ་མཐའ་བྲལ་བའི་མཁར། །རང་རིག་ཡེ་ཤེས་ཉི་མོར་བྱེད་པའི་གཟིས། །གཟུང་འཛིན་བདུད་སྡེའི་མུན་པ་མཐར་བཅིལ་ནས། །ཡང་དག་སྣང་བ་རྒྱས་མཛད་གང་དེར་འདུད། །དོན་གཉིས་མཐར་ཕྱིན་སྟོན་པ་རྫོགས་སངས་རྒྱས། །ཞི་བའི་ལམ་སྟོན་ལུང་རྟོགས་དམ་པའི་ཆོས། །རིག་གྲོལ་གཉིས་ལྡན་འཕགས་ཚོགས་དགེ་འདུན་སྡེ། །དཀོན་མཆོག་རིན་ཆེན་གསུམ་གྱིས་དགེ་ལེགས་སྩོལ། །རབ་འབྱམས་རྒྱལ་བའི་ཡེ་ཤེས་ཕུང་པོའི་གཏེར། །ངོ་མཚར་གཅིག་ཏུ་འཁྱིལ་བའི་ཆུ་གཏེར་ལས། །ལེགས་ཐོན་སྲིད་ཞིའི་བྱེད་པོ་ཀུན་གྱི་བདག །མཚོ་སྐྱེས་རྡོ་རྗེར་གྲགས་དེ་གཏན་གྱི་སྐྱབས། །དབྱིངས་རིག་སྒྲིབ་གཉིས་ཆུ་འཛིན་རྒྱ་ལས་གྲོལ། །འཛིན་པ་མི་རྟོག་དེ་བཞིན་ངང་དུ་དག །འགྱུ༵ར་མེ༵ད་གཤིས་ཀྱི་གནས་ལུགས་མངོན་གྱུར་པ། །འགྲོ་འདུལ་རྡོ༵་རྗེ༵འི་མཚན་དབྱངས་སྲིད་ན་འཁྲོལ། །ཟག་བཅས་འགྱུར་བའི་ཆོས་ཀུན་མེད་བཞིན་དུ། །རི༵ན་ཆེ༵ན་བྱང་ཆུབ་སྙིང་པོ་རྟོགས་ཐབས་སུ། །རྣ༵མ་མང་རྒྱ༵ལ་བའི་རོལ་བ་འགོག་མེད་དུ། །བསམ་འདས་མཛད་པ་སྟོན་དེར་སྙིང་ནས་དད། །མགོན་དེའི་གསང་བ་གསུམ་གྱི་ངོ་མཚར་ཕུལ། །བསྟན་འགྲོའི་དོན་ཆེན་ལས་གཞན་མ་གྱུར་པའི། །ཚུལ་འདིར་ཡིད་རངས་བདག་གཞན་འགྲོ་བ་ཀུན། །དད་པའི་འདབ་བརྒྱ་གྲོལ་བྱེད་མདོར་བསྡུས་སྤྲོ། །