ཞིང་འདིའི་མཛད་པ་བསྡུས་ཏེ་སྐུ་ཞི་བར་གཤེགས་ཚུལ།
དེ་ལྟར་ཞིང་འདིའི་བསྟན་དང་འགྲོ་བའི་དོན། །དེ་ཙམ་དགོངས་ལ་ཞིང་གཞན་དགོངས་པ་གཏད། །ཐ་མའི་མཛད་པའི་རྗེས་འབྲེལ་ཕྱི་ནང་གི། རྟེན་གྱི་ནང་གཟུངས་ཕལ་ཆེར་སྟ་གོན་དང་། །གསུང་རྟེན་ཤེར་ཕྱིན་གླེགས་བམ་བཅུ་ཕྲག་གཉིས། །དྲུག་གིས་ལྷག་པ་གསེར་ཆོས་བཞེངས་རྒྱུར་དགོངས། །གདོང་རྫར་ཞལ་ཁེབས་ཧོར་གོས་འབའ་ཞིག་ལས། །གྲུབ་པ་ཞལ་བྱང་བཅས་པའང་བཟོད་བཀོད་མཛད། །ཁྱད་པར་རྒྱུད་འཛིན་ཐུགས་སྲས་མཆེད་གཉིས་དང་། །གསུང་སྲས་འདུས་པའི་སྡེ་ཡི་ཆེ་བགྲེས་སོགས། །སྡེ་འདིའི་གཙོ་བོའི་ལས་འཛིན་ཕལ་ཆེར་ལ། །ཕྱི་མཐའ་གཟིགས་པའི་ཞལ་ཆེམས་རྒྱུན་མར་བསྩལ། །དེ་ནས་མཛད་མཐའ་སྟོན་ལ་ཉེར་ཕྱོགས་ཏེ། །སྐབས་འདིར་སྐུ་ལ་རྩ་དཀར་ལྟ་བུ་ཡིས། ཅུང་ཟད་བསྙུན་པའི་ཚུལ་མཛད་དེར་ཕན་བྱེད། །བདུད་རྩི་སྨན་གྱི་ཆུ་ཚན་ཞག་བདུན་བར། །སྔོན་དུ་སྐུ་ལ་བསྟེན་པ་དེ་ཉིད་ཀྱི། །འཕྲོད་ངོ་བལྟས་པའི་སྐུ་ངལ་གསོས་པ་ལ། །དེ་མ་ཐག་པར་དྲན་བཞིན་མཁྱེན་བཞིན་དུ། །འོ་སྐོལ་སྟོན་པའང་གྱད་ཡུལ་རྩྭ་ཅན་དུ། །མྱ་ངན་འདའ་བར་དགོངས་ལ་གཤེགས་པ་ལྟར། །ཚ་ཆབ་སྐུ་ལ་བསྟེན་རྒྱུའི་ཚུལ་ཉིད་ཀྱི། །ཤར་ཕྱོགས་དག་པའི་གནས་མཆོག་འོལ་དགའ་རུ། །མྱ་ངན་འདའ་བཞེད་ནོ་ཡོན་པཎྜི་ཏར། །ཕེབས་བྱང་གཡར་མཛད་དགོངས་པ་ཇི་བཞིན་འབྱོར། །དེ་ཚེ་རྒྱལ་སྲས་སྐུ་མཆེད་ཡུམ་འཁོར་བཅས། །མགྲིན་ལམ་གཅིག་པས་རེ་ཞིག་སྐུ་ངལ་སྟབས། །ཆིབས་བསྐྱོད་བཤོལ་བའི་ཞུ་བ་ནན་གསོལ་ཀྱང་། །རེ་བ་བཀའ་ཡིས་མ་བཞེས་ཐབས་སུ་བྲལ། །སྤྱི་དང་བྱེ་བྲག་སོ་སོས་ཞབས་པད་ཉིད། །ཡུན་དུ་བརྟན་པའི་སྐུ་རིམ་གསོལ་འདེབས་དང་། །ཐབས་སྒོ་དུ་མ་རྒྱ་ཆེར་བསྒྲུབས་མཛད་ཅིང་། །དེ་ལས་གཞན་པའི་ཐབས་ཀྱིས་དབེན་པར་གྱུར། །སྐུ་ཉེའི་རིགས་གྱུར་ཕུན་རབ་ཆོས་དྲུང་ནས། །སྟོན་འཁོར་མ་ལུས་གཙང་དག་པོད་པ་ཡི། །ཚོགས་ཀྱི་སྟོན་མོས་མཉེས་པར་བྱས་པ་ལ། །དགེ་བའི་རྩ་བ་བྱང་ཆེན་སར་བསྔོ་མཛད། །དེ་ལས་རིགས་སྲས་མཆེད་བཅས་འཁོར་ཚོགས་ཀུན། །རིམ་པར་ཆིབས་བཏེག་མོན་མཁར་ཟ་ར་སྡེར། །ཞག་ས་མཛད་ལ་ཀླུ་ཁང་གྲུ་ལ་བརྟེན། །ཟངས་རི་སྐྱིད་ཚལ་ཀླུ་ཁང་ཞེས་པར་བཞུགས། །གསལ་བྱེད་ཟླ་བའི་དཀྱིལ་འཁོར་མར་ངོ་བཞིན། །རིམ་གྱིས་སྐུ་ཁམས་ཇེ་ཞན་དུ་གྱུར་པར། །རྒྱལ་སྲས་མཆེད་འཁོར་ཀུན་གྱིས་མགྲིན་གཅིག་ཏུ། །ད་ཆ་སྐུ་ཁམས་བབ་དང་ཕྱི་ནང་གི། པྲ་རྟགས་ལ་སོགས་གང་ལ་བལྟས་ན་ཡང་། །དགོན་གནས་ཕྱིར་ཕེབས་དགོས་པའི་ཞུ་བ་ནི། །ལན་གཅིག་མིན་པར་ནན་གྱིས་གསོལ་བཏབ་ཀྱང་། །སྐྱོན་མེད་འོལ་དགར་ཅིས་ཀྱང་འགྲོ་བ་ཡིན། །ཞེས་པའི་བཀའ་ཡིས་བཞེས་པ་མེད་པ་ལ། །སྔ་དགོང་ཞབས་བརྟན་སྐུ་རིམ་ཅི་འགྲུབ་ནས། །ཆིབས་དང་ཕེབས་བྱམ་གང་བདེ་བརྟེན་བཞིན་པར། །རིམ་བཏེག་སླེའུ་ལུང་མདོ་རུ་ཞག་ས་མཛད། །ཕྱི་ཉིནའང་སྔར་བཞིན་ཕེབས་ལ་ཉི་ཤུའི་ཚེས། །ཉིན་མོར་བྱེད་པ་ཕྱེད་ཡོལ་ཙམ་གྱི་དུས། །རང་བྱུང་སྨན་གྱི་རྫིང་བུའི་ཁང་པར་ཕེབས། །གཟིམས་ཁྲིར་བརྟེན་པའི་བཀའ་ལས་འདི་སྐད་ཅེས། །ཁྱེད་རྣམས་ཆབ་རོལ་བཞེད་ཚེ་ཁོ་བོ་ཅག །ངལ་གསོའི་རིང་ལ་ཅིས་ཀྱང་ཕེབས་ཞེས་གསུངས། །དེ་བཞིན་འཁོར་བཅས་འགའ་ཡི་བཀའ་བཞིན་ཐེགས། །དེ་ལས་མགྱོགས་མྱུར་སྐུ་མདུན་ཕེབས་གྱུར་པས། །སྔར་ལས་སྐུ་གཟུགས་ཤིན་ཏུ་ཞན་སོང་བར། །དེ་འཕྲལ་དགོན་དུ་རྒྱ་ཆེའི་སྐུ་རིམ་སོགས། །སྒྲུབ་དགོས་གནས་ཚུལ་འབུལ་བར་བཤད་རྩོལ་གྱི། །རྟ་ལ་བརྟེན་པའི་བྱ་མ་རྟ་ཉིད་མངགས། །དེར་འཁོད་མཆེད་འཁོར་ཀུན་གྱིས་རྟེན་འབྱུང་གི། དངོས་འབུལ་ཅུང་ཟད་དང་བཅས་མགྲིན་གཅིག་ཏུ། །ལག་པའི་པདྨོ་སྦྱར་བས་འདི་སྐད་གསོལ། །འཕགས་ཆེན་རྣམས་ནི་སྒྱུ་མ་ལྟ་བུ་ཡི། །ཏིང་ངེ་འཛིན་ལ་མངའ་དབང་འབྱོར་བའི་ཕྱིར། །ཐུགས་འདུན་གང་གཏད་འགྲུབ་པ་ཆོས་ཉིད་བཅས། །སྤྱིར་ནི་སེམས་ཅན་ཐམས་ཅད་སྒོས་ཉིད་དུ། །བདག་ཅག་གདུལ་བྱར་གྱུར་པ་རྣམས་ཉིད་དང་། །ཡང་སྒོས་ཞབས་དྲུང་སྐུ་མཆེད་རྣམས་ཀྱི་དབུས། །ཆོས་སྲས་འདུས་པའི་སྡེ་དང་བཅས་རྣམས་དང་། །ཁྱད་པར་འདིར་བསྐྱོད་དཔོན་གཡོག་འདི་རྣམས་ནི། །ཅི་བྱའི་གཏོལ་བྲལ་སྡུལ་བསྔལ་ཉམ་ཐག་པའི། །ཚུལ་འདིར་ལེགས་པར་དགོངས་ལ་མགོན་ཁྱོད་ཀྱིས། །ཐུགས་ཀྱི་བརྩེ་བའི་སྤྱན་གྱིས་གཟིགས་གྱུར་ནས། །ཞི་བའི་ལམ་ལ་ཐུགས་མི་གཞོལ་བ་ནས། །ཞབས་པད་ཡུན་བརྟན་ཐུགས་སྣང་རིང་དགོས་ཞེས། །ནན་གྱིས་གསོལ་བ་བཏབ་ཀྱང་ཁོ་བོ་ནི། །སྨིན་པའི་འབྲས་བུ་ས་ལ་ལྷུང་དང་འདྲ། །ཞེས་པའི་བཀའ་ལས་ཆེས་འཕྲོས་རྒྱལ་བའི་སྲས། །མཆེད་འཁོར་ཀུན་ལ་སྤྱན་གྱི་གཟིགས་པ་གཏད། །འཕྲལ་དང་ཡུན་གྱི་བགྱི་འོས་མང་པོ་དང་། །ཁྱད་པར་རྒྱལ་བའི་སྲས་མཆོག་གང་ཉིད་ལ། །བསྟན་པའི་གཉེར་ཁ་འཛིན་པའི་ཞལ་ཆེམས་བཅས། །ཉིན་ཐུན་མཐའ་མ་རྫོགས་པར་ཉེ་བའི་ཚེ། །གདུལ་བྱ་རྟག་འཛིན་ཅན་རྣམས་འདུལ་བ་དང་། །ལེ་ལོ་ཅན་རྣམས་ཆོས་ལ་བསྐུལ་བའི་ཕྱིར། །སྤྱན་གྱི་གཟིགས་པ་མཁའ་ལ་གཏོད་པ་དང་། །ཕྱག་གཡས་གདེངས་ཀ་སྡིགས་མཛུབ་གཡོན་དཀུར་བརྟེན། །སྐུ་སྟོད་རྒྱས་དང་དབུ་གཙུག་འཕར་བ་སོགས། །ངོ་མཚར་ཆོ་འཕྲུལ་བཀོད་པ་ཚད་མེད་པས། །མངོན་པར་བྱང་ཆུབ་བསམ་མི་ཁྱབ་པ་ཡི། །རྣམ་ཐར་བཞི་ལྡན་ཡེ་ཤེས་འོད་གསལ་བའི། །ཆོས་སྐུ་ཀ་དག་ཆེན་པོའི་ཀློང་ཉིད་དུ། །སྤྲུལ་བའི་རང་གཟུགས་བསྡུ་བའི་མཛད་པ་བསྟན། །དེ་ཚེ་དེར་འཁོད་མཆེད་འཁོར་མ་ལུས་པ། །རེ་ཞིག་མྱ་ངན་གདུང་བ་ཆེན་པོས་མནར། །བླང་དོར་གནས་མེད་རྟོག་དཔྱོད་གོ་སྐབས་བྲལ། །ཅི་བྱ་གཏོལ་མེད་ལོང་བ་ཐང་དཀྱིལ་ལམ། །དྭ་ཕྲུག་ཐང་སྟོང་བོར་བ་བཞིན་དུ་གྱུར། །དེ་ནས་རང་བློ་དང་འཚམས་བསྟན་པ་ཡི། །གཟུགས་སྐུའི་ཞལ་ཁྱིམ་མཐོང་དང་གསུང་ཉིད་ཀྱི། །བདུད་རྩིར་སྤྱོད་པའི་སྐལ་བ་ཟད་གྱུར་པས། །རང་རིག་བླ་མའི་ངོ་བོར་ངེས་བྱས་ནས། །ཐུགས་དམ་བསྐུལ་ཞིང་གསོལ་འདེབས་ནན་ཏན་ནས། །ནང་གི་རླུང་སྦྱོར་དང་བསྟུན་སྐུ་གདུང་ལས། །བྱིན་རླབས་དབང་བཞིའི་ཚུལ་དུ་ལེགས་བཞེས་ནས། །མཐར་ནི་འཁོར་གསུམ་མི་དམིགས་ངང་མདངས་བསྐྱངས། །སླར་ཡང་འཚོ་བྱེད་ཡར་འཕེལ་རོགས་བཅས་ཉིད། །དགོན་དུ་གནས་ཚུལ་འབུལ་བར་རྫོང་བདའ་མཛད། །དེ་ལས་མཚན་མོའི་གུང་ལ་ཉེ་བ་ན། །སྐུ་གདུང་ཡིད་བཞིན་ནོར་བུ་རིན་པོ་ཆེ། །གར་དབང་ཐུགས་རྗེ་ཆེན་པོའི་སྐུར་བསྐྱེད་པའི། །གཙུག་ཏོར་ཐུགས་ཀ་ལྟ་གསང་ཕྱག་ཞབས་བཞིའི། །ཚིགས་བཞིར་ནང་སྒྲུབ་ལུས་དཀྱིལ་ལྷ་རྣམས་སྒོམ། །སོ་སོའི་རྩ་སྔགས་བྲིས་པའི་གདགས་ཡིག་ཕུལ། །དཀྱིལ་འཁོར་ཆེན་པོའི་ངོ་བོར་སྒྲུབ་པ་ལ། །ཡེ་ཤེས་སྤྱན་དྲངས་བསྟིམ་ནས་མཆོད་པའི་རྗེས། །སྦྱངས་ཁྲུས་སྔོན་འགྲོའི་ག་བུར་དྲི་བཟང་གི། བྱུག་པ་ཕུལ་ལ་དར་དཀར་ཀ་རས་ཉིད། །དྲི་ཡིས་སྦགས་པས་དྲིལ་སྦྱངས་ལེགས་བཅས་ནས། །ཁ་དོག་སྣ་ལྔའི་དར་གྱིས་ལེགས་པར་བཀླུབས། །དབུ་རྒྱན་ལ་སོགས་ལྷ་ཡི་ཆས་གསོལ་ལ། །སྐུ་ཡི་ཉེར་སྤྱད་མ་ལུས་ལེགས་པར་བཀོད། །རྒྱ་ཆེ་སྣ་ལྔའི་མཆོད་པ་སྤྱན་སྔར་བསྟར། །བླ་མ་ཞི་བ་བདེ་གཤེགས་ཀུན་འདུས་ཀྱི། །དཀྱིལ་འཁོར་ཞལ་ཕྱེ་གདུང་མཆོད་འཕྲལ་དུ་བཙུགས། །དེ་ལས་ཞག་གསུམ་འདས་པའི་ཐོ་རེངས་དུས། །སྐུ་གདུང་ཡིད་བཞིན་ནོར་བུ་སྤྱན་དྲངས་ལ། །རང་དགོན་ཕྱིར་ཕེབས་གཟིམ་ཆུང་དབང་ཁང་དུ། །སླར་ཡང་སྦྱངས་ཁྲུས་སྔོན་དུ་འགྲོ་བ་ཡི། །དྲི་བཟང་ཕུར་མས་ལེགས་པར་གཏམས་བྱས་ཏེ། །ཟ་མ་ཏོག་ཏུ་བཞུགས་སུ་གསོལ་བ་ལ། །ལྷ་ཡི་ཆས་བཅས་རྒྱ་ཆེའི་མཆོད་པ་སོགས། །སྤྱན་སྔར་བསྟར་ལ་རྒྱལ་སྲས་སྐུ་མཆེད་གཉིས། །འདུས་སྡེའི་བགྲེས་གྲྭ་བཅུ་ཕྲག་གཉིས་བཅས་ནས། །ས་ཟླའི་བཅུའི་བར་གདུང་ཆོག་རྒྱས་པ་དང་། །རིག་འཛིན་འདུས་སྡེས་ན་རག་སྐོང་བཤགས་མཛད། །ཕྱི་དྲོ་གཟིམ་ཆུང་ཀུན་བཟང་ཕོ་བྲང་གི། མཐོང་ཁའི་ཐད་དུ་སེར་སྦྲེངས་དང་བཅས་ནས། །འདོ་ལིར་སྤྱན་དྲངས་རྒྱལ་སྲས་ཐུ་བོ་ཡིས། །ལས་སློབ་མཛད་ལ་གོང་གསལ་དཔོན་སློབ་ནས། །སྐུ་གདུང་ཞུགས་སུ་སྦྱོང་བའི་ཕྱག་ལེན་ནི། །ཕྲ་ཞིབ་མཛད་ལ་རྒྱ་ཆེའི་མཆོད་པ་ཕུལ། །དེ་ཚེ་དབུ་ཐོད་རིལ་པོ་ཐུགས་ཉིད་ཀྱང་། །ཞུགས་ཀྱིས་མ་གནོད་ཕྱི་རབས་གདུལ་བྱ་ཡི། །དད་པའི་རྟེན་དུ་བཞུགས་པའི་སྐལ་བཟང་ཐོབ། །དེ་ཡང་ཤར་ཕྱོགས་ཞི་བར་མནལ་དུས་དང་། །དགོན་གནས་སྐུ་གདུང་སྤྱན་འདྲེན་རྣམས་ཀྱི་དུས། །ནམ་མཁའི་དབྱིངས་ཀྱང་ཤིན་ཏུ་དྭངས་པ་ལ། །འཇའ་དཀར་ཀུ་ཤའི་ཆུན་པོ་བཀྲམ་འདྲ་དང་། །སྣ་ཚོགས་འཇའ་གུར་ཕུབ་དང་བརྐྱངས་པ་སོགས། །ངོ་མཚར་དགེ་བའི་མཚན་མ་མང་དུ་བྱུང་། །ཁྱད་པར་ཞུགས་འབུལ་དུས་དང་འབྲས་སྤྱི་སྡེའི། །རྩེ་ལས་ཤར་ཕྱོགས་ཁ་བལྟས་འཇའ་དཀར་དང་། །རྨ་བྱའི་མཇུག་སྒྲོ་བཀྲམ་འདྲའི་འཇའ་འོད་རིས། །བླ་བྲང་ཐད་དུ་ལྔ་ལྡན་གུར་ཕུབ་དང་། །འཇའ་དཀར་མདུང་ཚུགས་ཟུག་པ་ལ་སོགས་པའི། །ཀུན་གྱི་སྤྱོད་ཡུལ་ངོ་མཚར་ལྟས་བཟང་གྱུར། །སྐུ་ཚིགས་རྣམས་ལ་ཚོགས་སྡེ་ཡས་མས་སོགས། །ཕྱི་ནང་གྲ་ཡི་དགོན་སྡེ་ཆེ་ཕྲ་ཀུན། །སྤྱན་དྲངས་ཚ་གྲ་ཕྱག་འགྱེད་ལ་སོགས་པའི། །རྙེད་བཀུར་བསྟི་སྟང་དུ་མས་ལེགས་པར་མཆོད། །ཁྱད་པར་ས་ཟླའི་བཅོ་བརྒྱད་དངོས་གཞི་ལ། །ནང་དགོན་མ་བུར་བཅས་པར་ཚྭ་གྲ་འགྱེད། །ལྷག་པོར་སྤྱི་རྫས་སྦྱོར་འཇགས་གྲྭ་ཚང་དབུར། །པད་གླིང་གསུང་སྤྲུལ་ལྔ་པ་སྤྱན་དྲངས་ལ། །རྒྱ་ཆེའི་འབུལ་བ་ཟག་པར་བཅས་པ་ཉིད། །ཟག་མེད་བསྔོ་བས་ཟིན་པའི་བཀའ་དྲིན་བསྩལ། །དེ་ཡིས་རྗེས་འབྲེལ་རང་ཞབས་ལྷ་འབངས་དང་། །ཐར་གླིང་དགོན་ཞོལ་སྒོ་དུད་ཆེ་ཕྲ་ལ། །བཟའ་བཏུང་འབྲུ་འགྱེད་ལ་སོགས་རྒྱ་ཆེ་དང་། །གཞིས་བྱེས་ངན་སློང་བརྒྱ་ཕྲག་བརྒལ་བ་ལ། །སྦྱིན་པའི་ཕྱག་བརྐྱངས་དགའ་མགུས་ཚིམ་པར་མཛད། །གཞན་ཡང་པཎ་ཆེན་མཆོག་གི་སྤྲུལ་སྐུ་དང་། །རྒྱལ་ཚབ་དེ་མོ་ཧུ་ཐོག་ཐུ་ཡི་གཙོས། །ས་དགེ་རྙིང་འབྲུག་དཀར་འབྲི་བོ་དོལ་སོགས། །གྲུབ་མཐའ་རིས་མེད་བླ་མ་སློབ་དཔོན་ལ། །བཟང་ལ་སྤམས་མཐོའི་བསྔོ་རྟེན་གྱ་ནོམ་དང་། །དབུ་གཡོར་དྭགས་ཀོང་ལྷོ་དབུས་གཙང་སོགས་ཀྱི། །འདུས་སྡེ་ཕལ་མོ་ཆེ་ལ་མང་ཇ་འགྱེད། །ཚྭ་གྲ་ལ་སོགས་སྐབས་སུ་གང་འོས་དང་། །ལྷ་ས་བསམ་ཡས་ཁྲ་འབྲུག་ལ་སོགས་པའི། །གནས་ཆེན་ཁག་ལ་སྟོང་མཆོད་བརྒྱ་མཆོད་སོགས། །བསམ་མི་ཁྱབ་པའི་མཆོད་སྦྱིན་རྒྱ་ཆེར་སྤྲོས། །ནང་རྟེན་འདྲ་སྐུ་དགུང་ཞག་ཁོང་སྒྲུབ་ལ། །ལྷག་གནས་ཆོ་གས་དགེ་ཤིས་སྒྲུབ་པར་མཛད། །ཕྱི་རྟེན་དངུལ་གདུང་རྒྱུག་འདོམས་བཅུ་བདུན་གྱི། །སྐུ་ཚད་རྫོགས་པ་བཟོ་རྒྱུས་ཁྱད་འཕགས་དང་། །གསུང་རྟེན་ཤེར་ཕྱོགས་གསེར་ཆོས་པོད་ལ་སོགས། །ལོ་ཁོངས་ལེགས་པར་གྲུབ་པར་མཛད་པ་ལ། །རྒྱལ་སྲས་སྐུ་མཆེད་རིག་འཛིན་འདུས་པར་བཅས། །མྱོས་ལྡན་ས་ཡོས་དབོ་ཟླའི་ཚེས་བརྒྱད་ལ། །ལྷག་གནས་སྔོན་འགྲོའི་རབ་ཏུ་གནས་པར་མཛད། །དེ་འབྲེལ་རྒྱལ་སྲས་ཐུ་བོར་གྱུར་པ་གང་། །ཡབ་རྗེ་དམ་པའི་ཆོས་ཁྲིར་སྤྱན་དྲངས་ལ། །རྒྱལ་སྲས་ཨོ་ཊི་ཡ་ནའི་མཚན་ཅན་ནས། །ལུང་རིགས་དང་འབྲེལ་སྙན་འཇེབས་ལེགས་བཤད་ཀྱི། །སྟོང་ཐུན་སྔོན་འགྲོའི་བཀྲ་ཤིས་རྫས་བརྒྱད་སོགས། །མངའ་གསོལ་ཆོ་ག་རྒྱས་པར་བསྒྲུབས་པ་ལ། །སེམས་མེད་ནམ་མཁས་གྲགས་པའི་སྒྲ་དབྱངས་ལྡིར། །རང་ཞབས་ལྷ་འབངས་ཐར་གླིང་དགོན་ཞོལ་བས། །དགའ་སྐྱིད་བྲོ་གཞས་ཉམས་གླུ་ལེན་པ་སོགས། །ཕུན་སུམ་ཚོགས་པའི་རྟེན་འབྱུང་སྒོ་བརྒྱ་ཕྱེ། །སླད་འཆར་ལོ་ཟླའི་དུས་མཆོད་གཏན་ལ་ཕབ། །མདོར་ན་བགྱིས་དང་བགྱི་འགྱུར་བྱ་བ་ཀུན། །བསྟན་འགྲོར་ཕན་བདེ་སྤེལ་བར་དམིགས་གྱུར་ན། །རྗེ་འདིའི་ཐུགས་དགོངས་རྫོགས་པར་འགྱུར་བ་ཡིན། །དེ་ལྟར་རྒྱ་ཆེ་གནད་འགྲོའི་དགོངས་རྫོགས་རྣམས། །གཙོ་བོར་རྒྱལ་སྲས་སྐུ་མཆེད་གཉིས་ཀྱིས་གཙོས། །ཞལ་ངོ་སྐུ་འཁོར་མ་ལུས་ཕྱོགས་གཅིག་ཏུ། །ཐུགས་བསྐྱེད་དཀར་བའི་ནུས་མཐུས་བསྒྲུབས་པ་ལ། །གང་བཞེད་ཕྱག་རྩེར་སོན་པའང་མགོན་འདི་ཡི། །རྨད་བྱུང་ཐུགས་རྗེའི་མཐུ་དཔུང་ཡིན་པར་གོ།