སྐུ་ཚེ་འདིའི་མཛད་པ་སྤྲོས་ཏེ་བཤད་པ། དམ་པའི་རིགས་སུ་འཁྲུངས་ཤིང་ཆོས་ལ་ཐོས་བསམ་གནང་བ།
ན་མོ་གུ་རུ་ཀྵ་ར་ཤྲཱི་དཱི་པ་ཡེ། །ངོ་བོ་མི༵་འགྱུར༵་ཆོས་དབྱིངས་རྣམ་དག་ལས། །རང་བཞིན་འགག་མེད་དཔ༵ལ་གྱི་སྒྲོན༵་མའི་སྐུ། །ཐུགས་རྗེས་འགྲོ་རྣམས་སྒྲོལ་བའི་དེད་དཔོན་མཆོག །སྐུ་གསུམ་དོན་གྱི་བླ་མར་སྙིང་ནས་འདུད། །མཁའ་ཀློང་རྣམ་དག་ཆོས་དབྱིངས་འོག་མིན་ཞིང་། །མི་ཟད་གཞོམ་མེད་སྐུ་ཡི་རྣམ་འགྱུར་གྱི། །འགྲོ་ཀུན་རྡོ་རྗེའི་གར་གྱིས་འཁྲིད་མཛད་པའི། །རྣམ་ཀུན་མཆོག་ལྡན་མི༵་འགྱུར༵་དཔ༵ལ་སྒྲོན༵་རྒྱལ། །གདོད་ནས་གཞིར་རྫོགས་བདེ་གསང་འཁྱིལ་བའི་དབྱིངས། །མི་འགྱུར་རྡོ་རྗེའི་ངོ་བོར་ལྷུན་གྲུབ་པ། །རིགས་རྣམས་ཀུན་བདག་དཔལ་གྱི་སྒྲོན་མ་མཆོག །ཁྱབ་བདག་བླ་མའི་མཛད་ཚུལ་ཅུང་ཟད་བྲི། །ད་ནི་ཞིང་འདིའི་མཛད་པའི་ཚུལ་ཆ་ཙམ་བརྗོད་ན། དེ་ལ་བདག་ཉིད་ཆེན་མོ་འདིའི་སྐུ་བལྟམས་པའི་ཡུལ་ནི་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་འདི་ནས་བརྩིས་པའི་ལྷོ་ཕྱོགས་གཡོར་པོའི་ཆ་སྔར་ཀླུ་མེས་ཚུལ་ཁྲིམས་ཤེས་རབ་ཀྱི་གདན་ས་གྲ་ཕྱི་ཐར་པ་གླིང་ཞེས་དཔལ་ཨོ་རྒྱན་ཆེན་པོས་བྱིན་གྱིས་བརླབས་ཤིང་ལུང་བསྟན། བོད་ཡུལ་དགེ་བའི་བསྟི་གནས་གསང་ཆེན་རྡོ་རྗེ་ཐེག་མཆོག་གི་འབྲས་བུ་སྨིན་པའི་སར་གྱུར་པ་དེང་དུས་འོག་མིན་ཨོ་རྒྱན་སྨིན་གྲོལ་གླིང་ཞེས་ཡོངས་སུ་གྲགས་པའི་དགའ་བའི་ཚལ་ཆེན་པོ་སྟེ། དེ་ལ་སྐུ་སྐྱེད་པའི་ཡབ་ནི་ལོ་ཙཱ་ཆེན་པོ་བེ་རོ་ཙཱ་ནའི་སྐུའི་སྤྲུལ་པ་དཔལ་ལྡན་མཐིང་མ་སྨྱོས་ཀྱི་གདུང་འཁྲུལ་མེད་འགྲོ་འདུལ་རིག་པ་འཛིན་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དང་། ཡུམ་ནི་ཡར་རྒྱབ་ཆོས་རྒྱལ་གྱི་གདུང་རབས་འཕྱུགས་མེད་གྲྭ་ལྡུམ་པོ་བ་དང་གཉིས་སུ་མེད་པ་གྲྭ་ཕྱི་ཕུན་ཚོགས་རབ་བརྟན་པའི་ལྕམ་ཕུན་ཚོགས་དཔལ་འཛོམས་ཞེས་ཐུགས་ཐིག་གི་ལུང་བྱང་དུ། ཁྲོམ་པ་རྒྱན་སྤྲུལ་སྟག་བྱི་གླང་གི་ལོ༔རིགས་བཟང་ཁུངས་བཙུན་ཕྱག་རྒྱ་རྣམ་པ་ལྔ༔གསང་བ་སྔགས་ཀྱི་ཉམས་རྟོགས་ཇེ་ཆེར་སྤེལ༔ཞེས་པས་དགུང་སྙིང་བྱི་ལོ་མ་ཡིན་པ་དང་། གཟིགས་སྣང་ཆུ་ཟླའི་རོལ་རྩེད་དུ་རྗེ་གཏེར་ཆེན་བླ་མ་དང་། རྗེ་བཙུན་རྡོ་རྗེ་རྣལ་འབྱོར་གཉིས་མཇལ་དུས་རྣལ་འབྱོར་མའི་གསུང་
གིས། ངའི་སྤྲུལ་པ་བཅོ་ལྔ་ཡོད། ལ་ལས་ནད་སེལ། ལ་ལས་བུ་ནོར་བསྐྱེད། ལ་ལས་ཚེ་བསྲིང་། ལ་ལས་གཏེར་འབྱིན་པའི་གྲོགས་བྱེད་པ་ཡིན་ཞེས་པས་བུ་ནོར་བསྐྱེད་པར་ལུང་གིས་བསྟན་པ་ནི་རྒྱལ་ཡུམ་འདི་ཉིད་ཡིན་ཏེ། དེ་ལྟར་ཡབ་ཡུམ་དེ་གཉིས་ལ་སྲས་གསུམ་དང་སྲས་མོ་བཞི་སྟེ་ལྕམ་སྲིང་བདུན་འཁྲུངས་པ་ལས་དམ་པ་འདི་བཞི་པ་ཡིན། དེ་ཡང་ས་མོ་ཡོས་ཀྱི་ལོ་ཧོར་ཟླ་བཅུ་པའི་ཉེར་ལྔའི་ནུབ་ཌཱ་ཀི་འདུ་བའི་དུས་ཁྱད་པར་ཅན་ལ་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོའི་གཟིམ་ཆུང་བཀྲ་ཤིས་སྣང་བར་ངོ་མཚར་བའི་ལྟས་ཕུན་སུམ་ཚོགས་པ་དང་བཅས་བསྟན་འགྲོ་སྤྱི་དང་སྒོས་བདག་སོགས་གདུལ་བྱར་གྱུར་པའི་མཆོད་སྡོང་འགྲོ་འདྲེན་དམ་པར་རྗེ་བླ་མ་དམ་པ་བདེ་ཆེན་མཁའ་འགྲོའི་གཙོ་མོ་དམ་པ་འདི་ཉིད་སྐུ་བལྟམས་པ་ཡིན་ནོ། །དེ་ཡང་ཡབ་རྗེས་བརྒྱུད་འཛིན་འདི་ཉིད་དཀྱུས་མར་མི་ཡོང་བས་གཙང་སྦྲ་ལ་འབད་དགོས་གསུངས་པ་ལྟར་སྐུ་བལྟམས་མ་ཐག་པར་ལོ་ཆེན་དྷརྨ་ཤྲཱིས་མི་གཙང་བ་སེལ་བྱེད་ཁྲོ་བོ་སྨེ་བ་བརྩེགས་པའི་བྱབ་ཁྲུས་དང་། ནངས་པར་ཡབ་རྗེ་བླ་མ་གཏེར་ཆེན་ཉིད་ཀྱི་གཏེར་གསར་དྲག་དམར་གྱི་སྐུ་གསུང་ཐུགས་དབང་དང་། འཆི་མེད་ཡང་སྙིང་ཀུན་འདུས་ཀྱི་ཚེ་དབང་བཅས་སྩལ་བ་ཡིན་འདུག་གསུངས་། དེ་ལྟར་ཡུམ་གྱི་མངལ་ནས་བལྟམས་མ་ཐག་ཧཱུྃ་གི་སྒྲ་དང་ཅུང་ཟད་ཙོག་པུར་མཛད་དེ་བཞུགས་པར་ཡུམ་དང་ཞལ་ཏ་མ་སོགས་འཇིགས་ཆོམ་ཆོམ་བྱུང་ཞེས་ཡུམ་གྱི་ཞལ་ཏ་མ་ལྷ་སྐྱིད་དཔལ་འཛོམས་དང་གང་གི་གཟིམ་དཔོན་སྐུ་བལྟམས་མ་ཐག་ནས་མཛད་པའི་སྐལ་བཟང་ཅན་འགྱུར་མེད་ཆོས་སྒྲོན་སོགས་ནས་གསུངས་ཤིང་། དེ་ལྟར་ན་རྫོགས་པ་ཆེན་པོ་ཁྲེགས་ཆོད་ཀྱི་ཐུགས་ཉམས་རྗེས་སུ་འབྲང་བ་ཞིག་ཡིན་ནམ་སྙམ། དེ་ཡང་སྐུ་བལྟམས་པ་ནས་རིང་པོར་མི་ཐོགས་པར་སྐུ་སྐྱེད་ཆེ་ཞིང་རེས་ཞག་རེ་ཉིན་རེ་ཙམ་ནུ་ཞོ་མི་བཞེས་པར་བཞུགས་པ་དང་། དམ་པའི་ངང་ཚུལ་བཟང་པོ་དང་ལྡན་ཞིང་ཁྱད་པར་ཐུགས་དྲན་གྱིས་ཆོད་མ་ཆོད་ཙམ་ནས་སྤྱིར་སྐྱེས་བུ་དམ་པའི་རིགས་དང་། ཁྱད་པར་དཔལ་ཨོ་རྒྱན་ཆེན་པོ་དང་། ཀུན་མཁྱེན་དྲི་མེད་འོད་ཟེར། གསང་བདག་འཕྲིན་
ལས་ལྷུན་གྲུབ་རྣམས་ཀྱི་སྐུ་རྟེན་མཇལ་དུས་ཐུན་མོང་མ་ཡིན་པའི་ངེས་ཤེས་རྩེ་གཅིག་པ་དང་། དེ་དག་གི་སྐུ་ལ་འབྲེལ་པ་སོགས་ཞབས་རིམ་པ་རྣམས་ཀྱིས་བསླབ་དོན་ཞུ་མི་དགོས་པའི་རྗེ་ཉིད་ཀྱིས་ངོས་འཛིན་མཛད་ཅིང་བྱིན་རླབས་ཞུ་བའི་ཚུལ་དང་། ཁྱད་པར་ད་ལྟའི་དུས་ནའང་སྐྱེ་བ་སྔོན་མའི་རྟེན་གྱི་ཚེ་ཀུན་མཁྱེན་ཀློང་ཆེན་རབ་འབྱམས་པའི་སློབ་མ་ཞིག་ཡིན་ནམ་སྙམ་པའི་བག་ཆགས་ཡིད་ཡུལ་དུ་གསལ་བ་ཞིག་འདུག་གསུངས། གཞོན་ནུ་རོལ་རྩེད་དུས་ཀྱང་བྱིས་པ་ཕལ་གྱི་སྤྱོད་ཡུལ་ལས་འདས་པའི་འཁོར་འདས་རུ་ཤན་དབྱེ་བའི་རྣམ་འགྱུར་དང་། རེས་སྐྱིལ་དཀྲུང་མཛད་ཅིང་མཉམ་བཞག་གིས་ལྟ་སྟངས་དང་། ཡང་སྐབས་ཤིག་སྒའི་གལ་ལྡེ་ཆུང་ངུ་གོས་ལྗང་གིས་རྒྱན་ལྡན་ཞིག་ཕྱག་བསྟར་གྱིས་བཟོ་བ་མཛད་དེ། གཟིམ་དཔོན་འགྱུར་མེད་ཆོས་སྒྲོན་ལ་གལ་ལྡེ་འདི་དྲུང་ཉེ་གནས་མ་དང་ངེད་རང་གཉིས་ནམ་ཞིག་མཐའ་འཁོབ་ཀྱི་ཡུལ་དུ་བྲོས་ནས་འགྲོ་དགོས་ཡོང་བས་དེ་དུས་ཀྱི་འཚོ་བ་བླུགས་པའི་སྣོད་བྱེད་པ་ཡིན་ཞེས་གཅེས་སུ་མཛད་པ་ནི་འཁོར་འདས་སྒྲིབ་མེད་གསལ་ལེར་གཟིགས་པའི་ལུང་ཐོག་བབས་སུ་གཏན་ལ་ཕེབས་པ་ཡིན་ཏེ། ཕྱིས་ཡབ་རྗེ་དག་ཞིང་དུ་གཤེགས་རྟིང་ཇུན་གར་ཇུ་རིགས་ཐུ་ཧོང་ཐའི་ཇིའི་དཔུང་གིས་སྙིང་པོའི་བསྟན་པ་མིང་མེད་དུ་བཅོམ་དུས་འབྲས་ལྗོངས་སུ་སྐུ་སྲོག་འཚོ་ཕྱིར་སྟབས་ཅག་གི་ཕེབས་དགོས་བྱུང་བ་དངོས་བསྟན་དང་། དེ་སོགས་ངེས་པའི་གཏན་ཚིགས་མང་ངོ་། །དེ་ཡང་སྔོན་གྱི་ཐུགས་སྨོན་ལམ་གྱི་འབྲས་བུ་དུས་སུ་སྨིན་པའི་མཐུ་ལས་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་དང་། ཡབ་སྲས་ཀྱི་འབྲེལ་པས་སྐྱེ་སྲིད་འདི་ལ་ཡབ་ཡུམ་ཆོ་རིགས་གཙང་ཞིང་ཕུན་སུམ་ཚོགས་པའི་སྲས་སུ་བལྟམས་ཏེ་ངེས་གསང་རྡོ་རྗེ་སྙིང་པོའི་སྲོག་འཛིན་པའི་གཉེན་པོར་གྱུར་ཅིང་སྐུ་ཆུང་ངུ་ནས་སྡོམ་གསུམ་འགལ་མེད་དུ་དྲིལ་ནས་བསྟན་འགྲོའི་དཔུང་གཉེན་དམ་པར་ལུང་གིས་ཟིན་ཅིང་གཏན་ལ་ཕེབས་པ་འདི་ནི་རྗེ་བླ་མ་ཉིད་ཀྱི་རྣམ་ཐར་གསོལ་འདེབས་ཞལ་གསུང་མ་ལས་ཀྱང་། ཚེ་རབས་སྔོན་མའི་ལེགས་བྱས་བཟང་པོའི་འབྲས། །ཚོགས་གཉིས་དྲོད་གཤེར་མཐུ་ཡིས་སྨིན་པ་ལས། །རིགས་ཀུན་ཁྱབ་བདག་གཏེར་ཆེན་བླ་མ་ཡིས། །
སྲས་སུ་སྐྱེ་སྲིད་བཟུང་ལ་གསོལ་བ་འདེབས། །ཞེས་དང་། སྐྱབས་ཀུན་འདུས་པ་འགྲོ་འདུལ་བླ་མ་ཡིས། །མ་དག་རང་རྒྱུད་དྲ་མ་ལྕགས་ཀྱི་ཁམས། །སྡོམ་གསུམ་གསེར་འགྱུར་རྩི་ཡིས་ལེགས་བསྒྱུར་ནས། །ཟབ་མོའི་སྣོད་དུ་གཟིགས་ལ་གསོལ་བ་འདེབས། །ཞེས་རང་ཉིད་དམན་པའི་ཚུལ་གྱིས་བླ་མའི་བཀའ་དྲིན་ཁོ་ནའི་མཐུ་ལས་གྲུབ་པར་ཡིན་ཚུལ་གསུངས་ཀྱང་། གཏེར་ལུང་ལས་རང་བཞིན་དབྱིངས་ཀྱི་རྒྱུད་བལྟམས་པའི༔གནས་ལུགས་དོན་གྱི་མཁའ་འགྲོ་མ༔གཡོ་རུ་གྲྭ་ཡི་ཕྱོགས་སུ་འབྱུང་༔ཞེས་གསུངས་པའི་མངོན་བརྗོད་ཆེ་བར་མཛད་པ་ལྟར་རོ། །དེ་ནས་དགུང་ལོ་བཅུ་གཉིས་བཞེས་པ་ལྕག །ས་སྟག་ཟླ་བ་ལྔ་པའི་ཚེས་བཅུ་དཔལ་ཨོ་རྒྱན་གུ་རུ་མཚོ་སྐྱེས་རྡོ་རྗེ་ཐོད་ཕྲེང་རྩལ་གྱི་དུས་མཆོད་ཌཱ་ཀི་འདུ་བའི་དུས་ཚེས་ཁྱད་པར་ཅན་ལ་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོའི་གཟིམ་ཆུང་ཀུན་བཟང་ཕོ་བྲང་དུ་སྐུ་ལུས་བསྒྱུར་བར་མཛད་དེ། དེ་ཡང་དོན་གྱི་སླད་དུ་མཚན་ནས་སྨོས་ན། རང་བྱུང་གཞལ་མེད་རྡོ་རྗེའི་ཕོ་བྲང་གི་དབུས་སུ་མི་ཤིགས་གཞོམ་མེད་རྡོ་རྗེའི་ཁྲི་སྟེང་དུ་རང་གི་ཡབ་གསང་བདག་རྡོ་རྗེ་ཆོས་མིའི་ཟོལ་འཛིན་པ་འགྲོ་འདུལ་རིག་པ་འཛིན་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དཔལ་ཨོ་རྒྱན་རྡོ་རྗེ་འཆང་གི་སྐུར་བཞེངས་ཏེ་ཆོས་ཉིད་རྣལ་མ་ཤེས་རབ་ཀྱི་སྤུ་གྲིས་གཙུག་ཕུད་བཞེས་ཏེ་མཚན་མི་འགྱུར་དཔལ་གྱི་སྒྲོན་མར་གསོལ་ཞིང་རབ་ཏུ་གནས་པའི་མེ་ཏོག་འཐོར་བའི་ཚེ། འོག་མིན་ཡང་རྩེའི་རྒྱ་ཕིབས་ཀྱི་རྩེར་འཇའ་འོད་མདུང་ཚུགས་སུ་ཟུག་པ་ལ། དེར་གཏེར་ཆེན་ཉིད་སྐུ་ཅུང་ཟད་ངལ་བ་ཙམ་ཡོད་པ་ལ་ཕྱི་རོལ་ན་གནས་པ་མང་པོ་འཇའ་ཟུག་པ་མ་ལེགས། སྐུ་ཞབས་པད་མི་བརྟན་པ་ནི་མིན་ལས་ཆེ་ཞེས་གླེང་། དེ་དང་དུས་མཚུངས་པར་ཀུན་བཟང་ཕོ་བྲང་གི་སྦུག་ཏུ་གར་དབང་ཚེ་དཔག་མེད་ཀྱི་ཚེའི་དཀྱིལ་འཁོར་བཤམས་ཏེ་ཡོད་པའི་བུམ་ཆུ་སོར་ཞིང་ཁོལ་བའི་ཅུང་ཟད་ལུད་པ་ལ་ཡབ་རྗེའི་བཀའ་ལས་བུ་མོ་ཁྱོད་ལ་རེ་ཆེན་པོ་ཡོད་པས་སྙིང་པོའི་བསྟན་པ་འཛིན་པའི་རྟེན་འབྲེལ་གྱི་ལ་ཉེ་བཟང་། ད་མྱུར་དུ་ལོངས་ལ་བུམ་ཆུ་འཐུང་
ཤོག །གསུང་ཞིང་སླར་ཡང་ཐང་སྟོང་པའི་གཏེར་བྱོན་གྱིས། དཔོན་སློབ་མི་འབྲལ་ལྷན་གཅིག་གནས། ཞེས་མེ་ཏོག་ཀྱང་འཐོར་བ་ཡིན་འདུག་གསུངས། དེ་ནས་ཡབ་རྗེའི་དྲུང་དུ་ཟབ་ཆོས་རིག་འཛིན་ཐུགས་ཐིག་གི་དཀྱིལ་འཁོར་དུ་དབང་བཞིའི་ཆུ་བོས་སྨིན་པར་མཛད་པ་ཡིན་ཏེ་རྣམ་ཐར་གསོལ་འདེབས་ཞལ་གསུང་མ་ལས་ཀྱང་། བཅུ་གཉིས་ལོར་སོན་ཁྱབ་བདག་བླ་མ་ཉིད། །མ་ཧཱ་གུ་རུ་པདྨ་ཐོད་ཕྲེང་གི། །སྐུར་བཞེངས་གང་གི་དཀྱིལ་འཁོར་ཆེར་བཅུག་ནས། །དབང་བཞིས་སྨིན་པར་མཛད་ལ་གསོལ་བ་འདེབས། །ཞེས་གསུངས། དེ་ཡང་ཁྱད་པར་གྲོལ་བྱེད་ཁྲིད་ཀྱི་རིམ་པ་རྣམས་སྔོན་འགྲོ་ཐུན་མོང་དང་ཐུན་མོང་མ་ཡིན་པ་ནས་བཟུང་རེ་རེ་ནས་རྟགས་ཐོན་དུ་སྒོམ་ཁྲིད་དུ་འདེབས་པར་མཛད་ཅིང་། དེ་དག་གི་དུས་ལྗགས་བཤད་འཁྱོར་བའི་ཚེ་ཡབ་རྗེས་དབུ་ལ་ཕྱག་གིས་བྱིལ་བྱིལ་མཛད་ཅིང་ཁྱོད་ལ་རེ་བ་ཆེན་པོ་ཡོད། གྲུབ་པ་ཕོ་མོ་མང་པོ་མཁའ་སྤྱོད་དུ་འཁྲིད་པ་ཡོད་པས་ཕའི་ངག་བརྒྱུད་ཀྱི་བདུད་རྩི་པདྨའི་གསུང་བཤད་རྣམས་མ་བརྗེད་པ་སྦྱོངས་ལ་མཐར་སྙིང་ལ་སིམ་པ་ཞིག་བྱེད་དགོས་ཞེས་གཞོན་ནུའི་མཉེས་རྫས་སྤྲོ་བྱེད་ཀྱི་བུ་རམ་དང་ཤིང་ཏོག་བཞེས་སྤྲོ་སོགས་ཀྱི་གནང་སྦྱིན་དང་། དེ་དག་མ་འཁྱོར་བའི་ཚེ་གཟིམ་དཔོན་ཨོ་རྒྱན་རྣམ་གྲོལ་གྱིས་ཞབས་འཕོངས་སར་སློའི་མར་བཙོས་པའི་ཞབས་ཏོག་སོགས་ན་ཚའི་སྡུག་བསྔལ་མ་དྲག་པོའང་བྱེད་རྒྱུ་ཡོད་ཅེས་གསུངས་པས། དེས་ན་ཆོས་ཉིད་ཀྱི་རྟོགས་པ་མངོན་དུ་བརྙེས་པའི་ཡེ་ཤེས་ཀྱི་ཌཱ་ཀི་དེ་ལྟ་བུ་ལའང་སྦྱོངས་གཅོད་ཀྱི་སྐུ་ངལ་དེ་ཙམ་བྱུང་ན་རང་ཅག་ཐ་མལ་པ་རྣམས་འཁོར་བ་ཁོ་ན་དང་དུ་ལེན་པ་བས་ད་རེས་ཐར་པའི་སྣ་ཟིན་ངེས་པའི་དམ་པའི་ཆོས་ལ་འབད་པ་འདོན་དགོས་འདུག་པས་རྗེས་འཇུག་རྣམས་ཀྱི་ཐུགས་ལ་ཆོངས་ཤིག །ཁྱད་པར་བསྐྱེད་རིམ་དང་རྫོགས་རིམ་ལ་ནན་ཏན་གྱི་ཞལ་ཏ་ཡང་ཡང་ཕེབས་ཏེ་ལམ་འདི་ཐོས་པས་མི་གྲོལ་བས་ངེས་པར་ནན་ཏན་སྒོམ་དགོས་ཞེས་གསུངས་ཏེ་རྣམ་ཐར་གསོལ་འདེབས་ཞལ་གསུང་མ་ལས། གྲོལ་བྱེད་རིམ་གཉིས་གདམས་པ་ཟབ་མོའི་གནད། །མ་ཚང་མེད་པར་བསྩལ་ལས་གསུང་གསང་གིས། །ལམ་འདི་ཐོས་པས་མི་གྲོལ་སྒོམས་ཤིག་ཅེས། །དབུགས་དབྱུང་ནན་
ཏན་མཛད་ལ་གསོལ་བ་འདེབས། །ཞེས་གསུངས་པ་ལྟར་རོ། །དེ་ཡང་བསྐྱེད་རིམ་ལ་སྒོམ་པ་ནན་ཏན་མཛད་རྗེས་རྫོགས་རིམ་ལ་གཙོ་བོར་དྲིལ་བའི་སྐབས་ཤིག་ན་དམ་པ་འདི་ཉིད་སྔོན་གོམས་བག་ཆགས་ཤིན་ཏུ་བཟང་ཞིང་ཕུལ་དུ་བྱུང་བ་ཞིག་ཡིན་པས་དེ་དག་ལ་མ་ལྟོས་ཀྱང་། རྣམ་མང་འགྲོ་བའི་ས་བོན་དུ་དགོངས་ནས་གདམས་པ་འདི་སྐོར་ལ་ཡབ་རྗེ་ཐུགས་ཤིན་ཏུ་ངལ་བ་ཡོད་གཤིས་གཞི་ནས་བསྐྱེད་རིམ་རྫོགས་རིམ་པའི་གཞི་རྟེན་ཡིན་རུང་། ད་དུང་ཆེད་དུ་གཉེར་ནས་རྫོགས་རིམ་གྱི་སྐབས་ཞི་གནས་བཙལ་བ་ལྷག་མཐོང་བསྐྱེད་པ་ཟུང་འཇུག་ཏུ་བསྒོམས་པ་ཞེས་གཞུང་དུ་བཤད་པ་ལྟར། དེས་ན་ཞི་གནས་བཙལ་སྐབས་གཏེར་ཚིག་དང་ཁྲིད་ཡིག་ཏུ་མི་གསལ་བའི། རྗེ་བླ་མ་དམ་པ་འདི་ཉིད་ངག་གཅིག་པུར་ཆིག་བརྒྱུད་དུ་སྩལ་བའི་མན་ངག་ཁྱད་པར་ཅན། སྣ་རྩེའི་ཐིག་ལེ་དཀར་པོ་ལ་སེམས་འཛིན་པ། རྡོ་རྗེའི་བཟླས་པ་ལ་སེམས་འཛིན་པ། སྨིན་མཚམས་ཀྱི་ཐད་ཀའི་ནམ་མཁར་ཧཱུྃ་སྔོན་པོའམ་ཨ་ཡིག་དཀར་པོ་ལ་སེམས་འཛིན་པ། རླུང་གི་གྲངས་ལ་སེམས་འཛིན་པ། རླུང་འགྲོ་འོང་ལ་སེམས་འཛིན་པ། སྣ་རྩེའི་ཐིག་ལེ་དཀར་པོ་འགྲོ་འོང་ལ་སེམས་འཛིན་པ། རླུང་བུམ་ཅན་སྦྱོར་བ་བཞི་ལྡན་ལ་སེམས་འཛིན་པ། སྣ་རྩེ་ཐིག་ལེ་དམར་པོ་འགྲོ་འོང་ཁྱད་ཆོས་གཉིས་ལྡན་ལ་སེམས་འཛིན་པ། དེ་ལྟར་ཁྱད་ཆོས་ཀྱི་མན་ངག་ཟབ་མོ་རྗེ་བླ་མ་བདེ་ཆེན་ཌཱ་ཀིའི་གཙོ་མོའི་ཞལ་ལུང་གྲ་ཟུར་མ་ཉམས་པ་ཀ་དག་གི་ཁྲིད་ཡིག་ནས་རིག་འཛིན་ཞལ་ལུང་ཟུར་དུ་ཁོ་བོས་བྲིས་པ་བཞིན་བཀའ་སྩལ་བ་ལྟར་ཡིན་ཞིང་། དེ་ལྟར་དང་པོ་ཞི་གནས་ཀྱི་རྒྱུ་ཉམས་ལྔའི་རིམ་པ་སྟེ། བི་མ་ལས་ཕྱག་རྒྱ་བསམ་གཏན་གྱི་འགྲེལ་པར། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །རི་གཟར་ཆུ་དང་རྩི་ཏི་མོ། །རྒན་པོ་སྦུགས་ཀྱི་ཆུ་དང་ནི། །རི་བོ་ལྟ་བུའི་དཔེ་ལྔས་བསྟན། །ཞེས་བཤད་པ་ལྟར་ཐུགས་ཉམས་སུ་འཁྲུངས་ཏེ། དེ་ཡང་ལྷག་མཐོང་རིག་བྱ་གསལ་རིག་དང་ཟུང་འཇུག་བདེ་ཆེན་སྤྲོས་བྲལ་མི་འགྱུར་བ་ཀ་དག་དེ་ཁོ་ན་ཉིད་དུ་འབྱམས་སུ་བཀླས་པའི་རང་རིག་གཞི་དབྱིངས་རྫོགས་པ་ཆེན་པོའི་ཀློང་དུ་འཕོ་འགྱུར་མེད་པའི་དོན་ལ་ངེས་ཤེས་ཁྱད་པར་ཅན་གྱི་གཏན་
པ་རང་བློ་དང་འཚམས་པ་ཐོབ་པའི་བཀའ་དྲིན་ཕུལ་དུ་བྱུང་བ་ཡིན་གསུངས་ཏེ་རྣམ་ཐར་གསོལ་འདེབས་ཞལ་གསུང་མ་ལས། སྦྱངས་སྐྱེའི་ཤེས་རབ་བརྩོན་འགྲུས་མི་ལྡན་ཡང་། །དམ་པའི་བྱིན་རླབས་སྙིང་ལ་ཞུགས་པའི་མཐུས། །གང་བསྒོམས་བསྐྱེད་དང་རྫོགས་པའི་གསལ་སྣང་དག །མ་འགགས་འཆར་སྒོ་བདེ་ལ་གསོལ་བ་འདེབས། །ཞེས་པས་བསྐྱེད་རྫོགས་ཀྱི་འཆར་སྒོ་མ་འགགས་པའི་གསལ་སྣང་འཛིན་མེད་བདེ་བ་ཆེན་པོར་འཆར་ཞིང་། དེ་ཉིད་ཀྱང་རྣམ་འགྱུར་གློ་བུར་བའི་རྐྱེན་གྱིས་མི་འཕྲོག་པའི་རྣམ་ཀུན་མཆོག་ལྡན་གྱི་སྟོང་པའི་ཡེ་ཤེས་ཀྱི་འཁོར་ལོ་མི་གཡོ་བའི་གསལ་སྣང་བརྟན་པོར་ཞལ་གྱིས་བཞེས་པ་ཡིན་ཏེ། རྣམ་ཐར་གསོལ་འདེབས་ཞལ་གསུངས་མ་ལས། དབེན་རིར་བསྐྱེད་རྫོགས་བསྒོམས་པའི་ཉམས་ལེན་གནད། །མ་སྨད་སྙིད་སྟོབས་མཆོག་གིས་ལེགས་བསྐྱངས་པས། །ངོ་མཚར་མཚན་མའི་ངེས་པ་མ་ཐོབ་ཀྱང་། །ཏིང་འཛིན་བརྟན་པར་གྱུར་ལ་གསོལ་བ་འདེབས། །ཞེས་གསུངས་ཤིང་གང་ལྟར་ཡང་མཐར་གདམས་པ་དེ་ཉིད་ཀྱི་ཐོད་རྒལ་གྱི་མན་ངག་དང་། བཙན་ཐབས་འཕོ་བའི་མན་ངག་སོགས་ཀྱང་ཉམས་ཁྲིད་དུ་བསྩལ་ཞིང་། དེ་དག་གི་རྒྱབ་རྟེན་ལུང་དང་བཀའ་སྲུང་གི་སྲོག་གཏད་ཀྱང་བཀའ་དྲིན་དུ་བསྩལ་ཅིང་། དེ་རྗེས་ཀླུ་སྡིངས་ལྷ་དབང་དགའ་ཚལ་གྱི་གཟིམ་སྤྱིལ་འཆི་མེད་བདེ་ཆེན་དུ་ལོ་ངོ་གཅིག་གི་བར་བསམ་གཏན་ལ་ཆིག་སྒྲིལ་དུ་གོམས་པར་བྱས་པ་ཡིན་གསུངས། དེ་ནས་དགུང་ལོ་བཅུ་གསུམ་བཞེས་པ་ལྕགས་ཡོས་ཟླ་བ་གསུམ་པའི་ནང་དུ་བཅད་རྒྱ་གྲོལ་བསྟུན་ཡབ་རྗེ་བླ་མ་དམ་པའི་ཞབས་དྲུང་དུ་གཏེར་གསར་ཨ་ཏི་ཟབ་དོན་སྙིང་པོའི་གདམས་པ་ལྷག་མེད་དུ་ཟླ་བ་བཞིར་ཉེ་བའི་བར་དམ་པ་འདི་ཉིད་ལ་སྐུ་རྐྱང་དུ་བསྩལ་ཅིང་ཉམས་རྟོགས་ཀྱང་རང་རྒྱུད་ལ་རང་བློ་དང་འཚམས་པའི་བརྟན་པ་ཐོབ་པའི་ངེས་ཤེས་དང་། ཁྱད་པར་ཐོད་རྒལ་དུས་རིག་པ་ཚད་ཕེབས་ཀྱི་སྣང་ཆ་རྫོགས་ཉེའི་འཆར་སྒོ་ལ་ཡབ་རྗེའི་ཞལ་ནས། བུ་མོ་ཁྱོད་གཏེར་ལུང་ནས་བཤད་པ་བཞིན་ཁྱོད་རང་གི་སྔོན་མའི་བག་ཆགས་རྗེས་སུ་འབྲང་བའི་ཚད་དང་ལྡན་པ་ཞིག་འདུག །ད་རེ་ཞིག་སྒོམ་ཁང་དུ་ཟླ་ཤས་ནན་ཏན་
སྒོམས་ཤིག །དེ་རྗེས་རྡོར་སེམས་དང་ཟབ་ལམ་བདེ་གཤེགས་ཀུན་འདུས་ཀྱི་གདམས་ཁྲིད་སྨིན་པར་འདེབས་དགོས་འདུག་ཅེས་བསྩལ་བས་ཟླ་བ་ལྔར་ཉེ་བའི་བར་ཨ་དོན་ལ་ནན་ཏན་བྱས་པ་ཡིན་གསུངས། དེ་གྲོལ་བསྟུན་གཏེར་གསར་རྡོར་སེམས་ཐུགས་ཀྱི་སྒྲུབ་པའི་རྩ་ཁྲིད་ཡན་ལག་དང་བཅས་པ་དང་རྒྱབ་རྟེན་ལུང་དང་བཀའ་སྲུང་གི་སྲོག་གཏད་སོགས་ཀྱང་རྫོགས་པར་བསྩལ་ལོ། །དེ་ནས་དགུང་ལོ་བཅུ་བཞི་བཞེས་པ་ཆུ་འབྲུག་ཟླ་བ་གཉིས་པའི་ནང་དུ་རང་གི་ཡབ་གསང་བདག་རྡོ་རྗེ་ཆོས་མིའི་ཟོལ་འཛིན་པ་པདྨ་གར་དབང་འགྱུར་མེད་རྡོ་རྗེ་རྩལ་གྱི་ཞབས་པད་དུ་རྗེ་བླ་མ་དམ་པ་དང་གང་གི་ཞབས་རིམ་དྲུང་ཉེ་གནས་མ་འགྱུར་མེད་ཆོས་སྒྲོན་དང་གསོལ་ཐབ་འགྱུར་མེད་གཡང་འཛོམ། དགེ་མཁན་གྲུབ་པ་མོ་སྟེ་དཔོན་གཡོག་བཞིར་ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྤྲོས་བཅས་དང་། སྤྲོས་མེད་མཆོག་དབང་གོང་མ་གསུམ་དྲོད་རྟགས་གཏོར་མའི་དབང་དང་བཅས་པ་སོ་སོའི་སྐབས་ཐོབ་ཀྱི་སྨིན་པར་བསྩལ་ཅིང་གསང་མཚན་པདྨའི་དབང་ཕྱུག་ཏུ་སྩལ་ལོ། །ཁྱད་པར་རྩ་ཁྲིད་ཀྱི་བསྐྱེད་རྫོགས་ཀྱི་གདམས་པ་རྣམས་ལ་ཞིབ་བཤད་མཛད་དེ། ཐུན་རེ་བཞིན་རྫོགས་རྗེས་ཡབ་རྗེས་ལྗགས་བཤད་ཀྱི་རྒྱུགས་བཞེས་ཏེེ་ཟབ་ཁྲིད་ཀྱི་སྤྱི་གནད་དང་ཁྱད་པར་བའི་གདམས་པའི་དགོངས་དོན་མཐར་ཐུག་པ་རྣམས་བྱང་བར་སྦྱངས་ཤིང་གདམས་པ་འདི་ཉིད་ཀྱི་སྒོམ་པའི་གནད་ལ་མ་རྨོངས་པའི་སྨིན་གྲོལ་གྱི་དོན་ལ་ངེས་ཤེས་ཁྱད་པར་ཅན་སྐྱེས་ཤིང་བླ་མ་མཉེས་པར་སྒྲུབ་པའི་བཀའ་དྲིན་ཐོབ་པ་ཡིན་གསུངས། དེ་རྗེས་ཟབ་ལམ་རྩ་བའི་ཡན་ལག་དུམ་དུམ་ཁྲིགས་ཀྱི་སྐོར་རྣམས་དང་རྩ་པོད་ཀྱི་ལུང་དང་བཀའ་སྲུང་གི་རྗེས་གནང་སོགས་ཀྱང་ཞིབ་པར་སྩལ་ཅིང་། ཁྱད་པར་འཁྲུལ་འཁོར་དུས་དགེ་མཁན་གྲུབ་པ་མོས་གོང་ནས་སྦྱོང་མཐར་སོང་གཤིས་རྗེ་ཉིད་དང་དྲུང་ཉེ་གནས་མོས་བདེ་གཤེགས་ཀུན་འདུས་ཀྱི་འཁྲུལ་འཁོར་བསླབ་སྦྱོངས་མཛད་པས། སྨན་བརྗིད་དབུ་མཛད་གོང་དཀར་བ་གྲུབ་པ་མོས་ཕག་མོ་ཟབ་རྒྱ་དང་སྤེལ་མའི་འཁྲུལ་འཁོར་ཞིག་མཛད་དེ་ཤིན་ཏུ་གཏུམ་གཤིས་རྗེ་ཉིད་ལ་ཤ་
གཅུས་དང་ཐལ་བཅག་བརྒྱབ་སྟེ་ངས་བསླབ་པའི་འཁྲུལ་འཁོར་མི་རྒྱག་པ་ཅི་ཡིན་ཟེར་ཕར་ཕར་མཛད་པ་ལ་རྗེ་ཉིད་ནས་འོ་ན་ཨ་ཁུ་ལགས་ཀྱིས་ནི་འདི་བཞིན་གནང་བྱུང་ཞེས་ངེས་འདྲོངས་གསུངས་ཀྱང་ཚད་འཛིན་མེད་པའི་རྡོག་ཐོ་བརྒྱབ་པ་ལ་སྤྱན་ཆབ་བསིལ་ཞིང་ཨ་ཁུ་ཕྱག་མཛོད་ཀུན་དགའ་ཚུལ་ཁྲིམས་རྒྱ་མཚོའི་ཞབས་པད་དུ་ཕེབས་ཏེ་དེ་ཚུལ་ཞུ་བར་མཛད་པས། དེར་ཅུང་ཟད་བཞད་ཅིང་ངེད་དཔོན་སློབ་རྣམས་གྲྭ་ནང་དུ་འཁྲུངས་གཤིས་སྤྲོས་ཙམ་བཞེས་ཀྱི་མེད། ཁྱེད་རང་དཔོན་གཡོག་གཉིས་གྲྭ་ཕྱིར་འཁྲུངས་གཤིས་སྤྲོས་ཙམ་བཞེས་པ་ཡིན་འདུག །ད་དགེ་སློང་གི་བུ་མོ་དཔོན་གཡོག་གཉིས་གཙུག་ལག་ཁང་དུ་མཁན་རིན་པོ་ཆེའི་སྐུ་དྲུང་དུ་ཕུལ་མཛོད། རྗེ་གཏེར་སྟོན་རིན་པོ་ཆེ་ནི་གདུང་པ་ལས་བུ་མོ་འདི་ལ་ཐུགས་རྩིས་ཆེ་བ་ཡོད་གསུང་སྟེ། དགེ་སློང་རབ་འཕེལ་གྱིས་ལོ་ཆེན་དྷརྨ་ཤྲཱིའི་ཞབས་པད་དུ་འཆི་མེད་འོད་སྣང་དུ་གདན་ཞུ་མཛད། དེ་ནས་ལོ་ཆེན་རིན་པོ་ཆེ་ནས་རྗེ་དམ་པ་དཔོན་གཡོག་གཉིས་ལ་ཟབ་ལམ་བདེ་བཤེགས་ཀུན་འདུས་ཀྱི་འཁྲུལ་འཁོར་གྱི་སྐུ་ལུས་ཀྱི་འགྱུར་དང་སྒོ་གནད་རྩ་རླུང་ཐིག་གསུམ་གྱི་མན་ངག་ཟླ་བ་གཉིས་སུ་ཉེ་བའི་བར་བསྩལ་བས་རྒྱུད་ཐོག་ཏུ་མ་རྨོངས་པར་དྲིལ་ཐུབ་པའི་བཀའ་དྲིན་ཐོབ་པ་ཡིན་གསུངས། དེའི་ཚེ་ལོ་ཆེན་གྱི་གསུང་ལས། གཏེར་སྟོན་དར་རྒྱས་ཆོས་སྡིངས་པའི་བརྒྱུད་པ་དེ་དགོས་པའི་བུས་ནི་མ་ཁྱེར་བར་འདུག །མི་དགོས་པའི་བུ་མོ་འདིས་ཁྱེར་འདུག་ད་མཇུག་བསྐྱངས་ཏེ་མ་བརྗེད་པ་མཛོད་གསུངས་དགྱེས་བཞིན་པ་མཛད། དེ་ཡང་སྤྱིར་མཁས་བཙུན་བཟང་གསུམ་འཛོམ་པ་ལ་དགེ་མཁན་བསྟེན་དགོས་པར་བཤད་ཀྱང་། ཇི་ལྟར་འཚམས་པའི་རྣམ་འགྱུར་ལས་ཤིན་ཏུ་གལ་ཆེས་ན་རྒྱུ་འབྲས་སྤང་བླང་གི་སྐབས་དགེ་བའི་སེམས་ཀྱིས་ཀུན་ནས་ཟིན་པའི་ལས་ཁོ་ན་ཡིན་ན་རྣམ་སྨིན་ཡང་བདེ་བ་ཁོ་ན་སྟེར་བ་དང་གཞན་དུ་སྙན་གྲགས་འདོད་ནས་སྦྱིན་པ་གཏོང་བ་སོགས་བསམ་པ་གནག་ལ་སྦྱོར་བ་དཀར་བ་དང་ཕན་འདོད་ཀྱིས་བརྡེག་བརྡུངས་དང་མི་སྙན་པར་སྨྲ་བ་སོགས་བསམ་པ་དཀར་ལ་སྦྱོར་བ་གནག་པ་སྟེ། དེ་དག་གིས་ཀྱང་བདེ་སྡུག་སྤེལ་མར་བསྐྱེད་པར་བཤད་པ་ལྟར་བླང་དོར་གྱི་གནས་ལ་ཤེས་བཞིན་དུ་བག་
ཡོད་ཀྱི་དྲན་ཤེས་བསྟེན་པ་གལ་ཆེ་སྟེ། དེའི་རྒྱུ་མཚན་ཡང་སྔོན་ལས་རྗེས་སུ་འབྲང་བ་དངོས་བསྟན་ལྟར་གྲུབ་པ་མོའང་སྐྱེ་བ་འདིའི་འོག་ཏུ་དོལ་ཁང་པ་རྒྱང་དུ་བུ་ཞིག་ཏུ་སྐྱེས་ཀྱང་རིག་པ་འདི་ཡིན་མེད་པའི་ཆ་མ་ཆོ་ཞིག་ཡོད་པར་གྲགས་སོ། །དེ་ནས་ཡང་གཙང་རྟ་ནག་ཕྱོགས་ནས་བྱུང་བའི་བཙུན་མ་ཁ་ཤས་དང་། སྨན་བརྗིད་ཀྱི་སྒོམ་མོ་ཁ་ཤས་བཅས་བསྡོམས་པ་ལ་ཨ་དོན་གྱི་ཟབ་ཁྲིད་རྒྱས་པར་གསུངས་པའི་སྐབས་ཤིག་ཡབ་རྗེའི་བཀའ་ལས། ཁྱེད་རང་རྟ་ནག་གི་བཙུན་མ་རྣམས་སྒོམ་ལ་ནན་ཏན་མཛོད་ཅིག །སླར་ཡང་ཁྱེད་རང་རྣམས་ཀྱི་བླ་ཚབ་ཏུ་ཁོ་བོའི་བུ་མོ་སྟེར་བ་ཡིན་གསུངས་རྗེས་དམ་པ་འདིའི་དབུ་ལ་ཕྱག་གིས་བྱིལ་བྱིལ་མཛད་ཅིང་། དེ་དག་གི་ཚེ་སྨན་བརྗིད་སྒོམ་མོ་རྣམས་ཀྱིས་གསོལ་འདེབས་ཀྱི་ངོར་རྗེ་དམ་པ་འདིའི་བརྟན་བཞུགས་གསོལ་འདེབས་བཀའ་སྩལ་མཛད་དེ། དེ་ཡང་རྡོ་རྗེའི་ཚིག་སྒྲོམ་ཆེ་བ་ཡིན་ཏེ། ཡེ་ཤེས་དབྱིངས་ལས་རྣམ་རོལ་སྒྱུ་མའི་གར། །གདུལ་བྱའི་ཉེར་མཚོར་ཤར་བ་སྤྲུལ་པའི་སྐུ། །མི༵་འགྱུར༵་བདེ་བའི་དཔ༵ལ་སྟེར་སྐལ་བཟང་གི། མུན་སེལ་སྒྲོན༵་མེ་རྟག་ཏུ་གསལ་བརྟན་གསོལ། །ཅེས་སྨན་བརྗིད་སྒོམ་མོ་རྣམས་ཀྱི་ངོར་འགྱུར་མེད་རྡོ་རྗེས་སོ། །ཞེས་བསྩལ་ཅིང་དེ་མ་ཐག་པར་ལུང་ཡང་གནང་ངོ་། །ཞེས་པའི་ཁྱད་འཕགས་ཀྱི་གདམས་པ་འདི་གསུང་འབུམ་དངོས་སུ་བཞུགས་པ་ཡིན་ཡང་ཆེར་མ་གྲགས་པ་ལ་ཕྱིས་ཤིག་ཁོ་བོ་སྨན་བརྗིད་དགོན་དུ་མང་སྐོལ་དུ་རྫོང་བདའ་གནང་སྐབས་ཕྱག་བྲིས་དངོས་ལས་ཞལ་བཤུས་ཏེ་ཕྱིས་ཀུན་ལ་གྲགས་པ་ལྟར་རོ། །དེ་སྐབས་ཁྱད་པར་ལོ་ཆེན་དྷརྨཱ་ཤྲཱི་ལ་གཏེར་ཆེན་རྗེས་བུ་མོ་ཆོས་དྲུང་དེ་ཡིས་མཁན་རིན་པོ་ཆེ་ནས་རིག་གནས་སོགས་རྒྱ་ཆེ་བ་དགོས་པ་མེད། ཕས་བཏབ་པའི་གདམས་པའི་ཉིང་ཁུ་རྣམས་ལ་ཡང་བསྐྱར་ནན་གཅགས་ཀྱི་སྐྱོར་མ་དང་། འདི་ཉིད་ཤེས་བློ་ལུང་ནས་བསྟན་པ་ལྟར་མཐའ་བྲལ་ཞིག་འདུག་པ་སླར་མཁན་རིན་པོ་ཆེ་འམ་བུ་ཆུང་བགྲེས་པ་གང་རིགས་ཀྱིས་སྙིང་པོའི་རྒྱུད་འབྲེལ་གདམས་པ་ཤེས་རྒྱུད་ལ་དཀྲི་ཐུབ་པ་ཞིག་མཛོད། མི་རིང་བར་ཕ་ལས་ལྷག་པའི་འགྲོ་དོན་ནམ་མཁའ་དང་མཉམ་པས་སྐྱེ་འགྲོ་མང་པོ་བདེ་ཆེན་གྱི་ཞིང་དུ་འཁྲིད་པ་ཡོད་ཅེས་བསྩལ། དེ་ལྟར་ཡབ་རྗེ་གཏེར་སྟོན་རིན་པོ་
ཆེའི་སྐུ་དྲུང་དུ་དགུང་ལོ་བཅུ་དྲུག་ལས་མ་སོང་བས་སྐུ་ལུས་མ་བསྒྱུར་གོང་ནས་ཡབ་རྗེ་གཙོ་བོར་བསྟེན་ཏེ་རིམ་པར་གསན་པ་ལ། དྲེགས་པ་འཇོམ་བྱེད་ཀྱིས་མཚོན་ཡབ་རྗེའི་གཏེར་གསར་ཚང་མའི་དབང་ལུང་ཡབ་རྗེའི་གསུང་འབུམ་སྤོད་ཆེན་བཅུ་གསུམ་གྱི་ལུང་། མྱང་གཏེར་བཀའ་བརྒྱད་བདེ་གཤེགས་འདུས་པ་དང་། ཆོས་དབང་གི་ཕུར་པ་སྤུ་གྲིའི་དབང་ལུང་། བཀའ་བརྒྱད་ཀྱི་དབང་ལུང་། རྫོགས་འཕྲང་གི་དབང་ལུང་། གྲུབ་ཐོབ་འདར་ཕྱར་གྱི་རྟ་མགྲིན་གྱི་དབང་ལུང་། སྒྲུབ་ཐབས་འདོད་འཇོའི་བུམ་བཟང་དབང་ལུང་ཕྱག་ལེན་ཞིབ་སྤྱད། གཞན་ཡང་གྲུབ་ཐོབ་དངོས་གྲུབ་གླིང་པ་བཅུ་གཉིས་དྲི་མེད་གསུམ། བྱང་གཏེར་སྔ་ཕྱི་སོགས་གཏེར་སྟོན་གྲགས་ཆེ་བ་ཕལ་མོ་ཆེའི་གཏེར་ཆོས་ཀྱི་དབང་ལུང་། འདུས་པ་མདོའི་དབང་ལུང་། སྒྱུ་འཕྲུལ་ཞི་བ་དང་ཁྲོ་བོ། ན་རག་དོང་སྤྲུགས་རྣམས་ཀྱི་དབང་དང་སྒྲུབ་ཐབས་ཀྱི་ལུང་། མ་གཅིག་གཅོད་ཡུལ་གྱི་དབང་རྒྱས་པ་དང་། ནམ་མཁའ་སྒོ་འབྱེད་ཀྱི་ཁྲིད། སྟན་ཐོག་གཅིག་མ་དང་དཔའ་བོའི་གད་བརྒྱངས་ཀྱི་ཁྲིད། གཅོད་ཡུལ་ཟབ་མོ་དང་། མ་གཅིག་གི་མཛད་པའི་སྐོར་གྱི་ལུང་། བྱང་སྡོམ་དཀའ་འགྲེལ། གསང་བདག་འཕྲིན་ལས་ལྷུན་གྲུབ་ཀྱི་གཟིགས་སྣང་སྐོར། ཀུན་མཁྱེན་ལྔ་པའི་གཟིགས་སྣང་རྒྱ་ཅན་སྐོར་དང་། ལྷ་བཙུན་པའི་རིག་འཛིན་སྲོག་སྒྲུབ་སྐོར་སོགས་ཀྱི་དབང་ལུང་རྣམས་བསྩལ་ཅིང་། ཁྱད་པར་སེམས་སྡེ་ཀློང་སྡེ་གཉིས་ཀྱི་དབང་ཁྲིད་ལུང་དང་། དེའི་ནང་ནས་མན་ངག་གི་སྡེ་ལ་རིམ་པ་མང་ཡང་། གཙོ་བོར་སྙིང་ཐིག་རྣམ་གཉིས། བི་མ་ལའི་ཁྱད་ཆོས་བི་མ་སྙིང་ཏིག་དང་བླ་མ་ཡང་ཏིག་གཉིས་གོ་ཆུ་རུབ་ཏུ་མཛད་པའི་དཔལ་གསང་བ་སྙིང་ཏིག་མ་བུའི་དབང་དང་གདམས་ཁྲིད་ལུང་མཐར་བཀའ་གཏད་དང་། དེ་དག་གི་བཀའ་སྲུང་མ་གཟའ་རྡོར་གསུམ་གྱི་དབང་། པདྨའི་ཁྱད་ཆོས་མཁའ་འགྲོ་སྙིང་ཏིག་དང་མཁའ་འགྲོ་ཡང་ཏིག་གཉིས་ཀྱི་དབང་ཁྲིད་ལུང་བཀའ་གཏད་དང་བཀའ་སྲུང་གི་སྲོག་གཏད་བཅས་རྫོགས་པར་བསྩལ་བའི་རྗེས་སུ། ཟབ་ཆོས་ཆོས་ཀྱི་བདག་པོར་ལྷག་མེད་དུ་ཕུལ་ཡོད། དེས་ན་རྫོགས་ཆེན་སྡེ་གསུམ་པོ་ནན་ཏན་དུ་སྒོམ་དགོས། མ་འོངས་པ་ན་གཞན་ལ་འཆད་དགོས་པས་ཁྱོད་ལ་རེ་
བ་ཆེན་པོ་ཡོད་ཅེས་མངའ་གསོལ་མཛད་དེ་དེ་མ་ཐག་པར་ན་བཟའ་བཅའ་རྗེས་དང་དབུ་ཞྭ་པདྨ་ཁ་འབུས་སྒྲོན་པར་མཛད་དེ་མཚན་འགྲོ་འདུལ་རྡོ་རྗེ་སྙིང་པོ་ཞེས་བསྩལ་ཏེ་ཡབ་རྗེའི་སྐུ་བརྙན་གཟུངས་རྫོང་ཕྱག་བསྟར་དང་རབ་གནས་བྱིན་ཅན་མ་རྟེན་དུ་བསྩལ་ནས་གཅེས་པར་བརྩེ་བས་བསྐྱངས་པ་ཡིན་གསུངས་ཏེ་གང་གི་བཀའ་ལས། དམ་པའི་གསུང་གིས་རྫོགས་ཆེན་སྡེ་གསུམ་པོ། །ནན་ཏན་སྒོམ་ལ་གཞན་ལ་འཆད་ནུས་པ། །དགོས་ཏེ་མ་འོངས་ཁྱེད་ལ་རེ་ཆེ་ཞེས། །བཀའ་མཆིད་སྤྱི་བོར་ལྷུང་ལ་གསོལ་བ་འདེབས། །ཞེས་གསུངས་པ་ནི་དེང་སང་རྗེ་བླ་མ་དམ་པའི་ཞལ་དངོས་སུ་མཇལ་མི་མང་ཞིང་ཞལ་སློབ་ཀྱིས་ཀྱང་དབུས་གཙང་མངའ་རིས་ལྷོ་མོན་དང་ཀོང་ཁམས་སྟོད་སྨད་བར་གསུམ་སོགས་ལ་མ་ཁྱབ་པ་མེད་པ་ནི་ཀུན་གྲགས་ཀྱིས་གཏན་ལ་ཕེབས་པ་འདིའོ། །དེ་ནས་ཆུ་མོ་སྦྲུལ་ལོ་དགུང་ལོ་བཅོ་ལྔར་ཕེབས་དུས་ཤ་འུག་གཏེར་བྱོན་མཁའ་འགྲོའི་ཆོས་སྐོར་ཤོག་སེར་ལས་འབེབས་པར་མཛད་དེ་གཅེན་རྒྱལ་སྲས་པདྨ་འགྱུར་མེད་རྒྱ་མཚོར་དབང་ལུང་གཏད་རྒྱ་དང་བཅས་བསྩལ་ཅིང་། དེ་མ་ཐག་པར་དེའི་དབང་ལུང་རྣམས་རྗེ་ཉིད་ལ་གཅེན་རྒྱལ་སྲས་རིན་པོ་ཆེ་ནས་བསྩལ་ཅིང་། དེ་ཉིན་ནས་བཟུང་ཟབ་ཁྲིད་ཀྱི་གདམས་པ་ཡབ་རྗེས་ཞག་ལྔར་རྫོགས་པར་བསྩལ་བའི་བཀའ་དྲིན་ཐོབ་པ་ཡིན་གསུངས། དེ་ལྟར་ཡབ་རྗེ་ཞལ་བཞུགས་བར་དང་། དེ་རྗེས་ཞི་བའི་དབྱིངས་སུ་གཟུགས་སྐུའི་བཀོད་པ་བསྡུས་པ་ཧོར་དམག་མ་ཤོར་བར་ཕལ་ཆེར་སྐུ་བཅད་རྒྱ་དང་། དེའི་བར་སྐབས་ཅི་རིགས་པར་ལོ་ཆེན་དྷརྨ་ཤྲཱི་ལས་རབ་ཏུ་བྱུང་སྟེ་ཡབ་རྗེའི་གཏེར་གསར་ཡོངས་རྫོགས་ཀྱི་དབང་ཁྲིད་ལུང་དང་། དེའི་གསལ་བྱེད་ལོ་ཆེན་རིན་པོ་ཆེ་ནས་མཛད་པའི་སྐོར་ཡོངས་རྫོགས་ཀྱི་ལུང་། མ་གཅིག་གཅོད་ཡུལ་ཡོངས་རྫོགས་ཀྱི་དབང་ཁྲིད་ལུང་དང་། ཕྱག་ཆེན་གཱའུ་མའི་ཁྲིད། ན་རག་དོང་སྤྲུགས་ཀྱི་དབང་དོན་ཀྱི་ཁྲིད། སྤྱན་རས་གཟིགས་སྐུ་གསུམ་སྙིང་པོའི་དོན་ཁྲིད་དང་དབང་། དཔལ་མོ་ལུགས་ཀྱི་རྗེས་གནང་དང་སྒྲུབ་ཐབས་ཀྱི་ལུང་། འདོད་འཇོའི་བུམ་བཟང་གི་དབང་ཡོངས་རྫོགས། གཞན་ཡང་འདུས་པ་མདོའི་དབང་དང་མྱང་གཏེར་བཀའ་
བརྒྱད་ཀྱི་དབང་སོགས་མང་པོ་གནང་། གཅེན་རྒྱལ་སྲས་པདྨ་འགྱུར་མེད་རྒྱ་མཚོ་ལས་ཀྱང་། ཨ་ཏིའི་རྩལ་དབང་། ཕྱག་རྡོར་དྲེགས་འདུལ་གཏེར་ཁ་གསུམ་ལྡན་གྱི་དབང་ལུང་། དུས་འཁོར་དང་། བདེ་ཀྱེ་གསང་བ་འདུས་པ་རྣམས་དང་། རྡོ་རྗེ་འཕྲེང་བ་རྣམས་ཀྱི་དབང་ལུང་། གཡུ་ཐོག་སྙིང་ཐིག་གི་དབང་ལུང་རྣམས་དང་། ཁྱད་པར་ཡབ་རྗེ་གཏེར་ཆེན་བླ་མའི་བཀའ་ལུང་བཞིན་སྙིང་པོའི་རྒྱུད་ཀྱི་འགྲེལ་པ་གསང་བདག་དགོངས་རྒྱན་ཐུགས་སུ་ཆུད་དེ་དཀའ་གནད་ཀྱི་གཞུང་དོན་ལྷུག་པར་བཀྲལ་བའི་ལྗགས་བཤད་དང་། ཕྱིས་སུའང་བར་སྐབས་སུ་བདུད་ཀྱི་ཟིལ་གྱིས་རྐྱེན་དབང་དུ་ཐལ་བ་འཚོ་བྱེད་འགྱུར་མེད་ལེགས་འབྱོར་ནས་ཞབས་ཕྱི་ཞུས་པའི་གཞུང་བཤད་རྣམས་བྱང་བར་སྦྱོངས་མཐར་དང་གཅེན་རཏྣ་བི་ཛ་ལས་ཀྱང་། བྱང་གཏེར་ཐུགས་སྒྲུབ་སྒྲུབ་པ་སྡེ་བརྒྱད་དང་། སྡེ་དྲུག་གི་དབང་རྒྱས་འབྲིང་གཉིས་དང་། རྡོར་གླིང་གི་གཏེར་བྱོན་བཀའ་འདུས་ཆོས་ཀྱི་རྒྱ་མཚོའི་དབང་ལུང་ཕུར་པ་སྤུ་གྲིའི་དབང་སོགས་མང་པོ། གཞན་ཡང་འབྲས་ལྗོངས་རྫོགས་ཆེན་ཁྲག་འཐུང་འཇིགས་མེད་རྡོ་རྗེ། ཀ་ཐོག་རིག་འཛིན་༧ཞབས་དྲུང་འགྱུར་མེད་གཞན་ཕན་དབང་པོ། བཤེས་གཉེན་ཨོ་རྒྱན་རབ་བརྟན། སོ་སྟོན་མཐུ་སྟོབས་རྣམ་རྒྱལ། འདུལ་འཛིན་ཀུན་དགའ་བློ་གྲོས། གོང་དཀར་ཆོས་སྡེའི་དཔོན་སློབ་བསོད་ནམས་བློ་གྲོས་རྒྱལ་མཚན་སོགས་བཤེས་གཉེན་མཐའ་ཡས་པ་ནས་རྫོགས་པ་ཆེན་པོའི་ཀློང་གཉིས་དང་། ཡང་ཏིག་ནག་པོ་སྔ་འགྱུར་བཀའ་མའི་མན་ངག་སྣ་ཚོགས་པ་དང་། མ་གཅིག་གཅོད་ཡུལ། ཞི་བྱེད་ཀྱི་ཆོས་བཀའ་དུ་མ་དང་། ཨ་གྷོ་ར་དང་། ཕྱག་དྲུག་པའི་རྗེས་གནང་། མྱང་གཏེར་ཁྲོས་ནག །ནཱ་རོ་མཁའ་སྤྱོད་མ་དང་། ཉི་ཟླ་སངས་རྒྱས་ནས་བརྒྱུད་པའི་འཕོ་བ་འཇའ་ཚུགས་མའི་མན་ངག་གིས་མཚོན་གསང་སྔགས་ཕྱི་ནང་གི་བཀའ་གཏེར་གྱི་མན་ངག་མང་དུ་གསན་མོད་ཀྱང་གསན་ཡིག་གི་ཐོ་བྱང་ལོགས་སུ་ཡོད་པ་ལྟར་ལས་འདིར་རྒྱས་པར་མ་སྨོས་སོ། །དེ་ཡང་ཤིང་རྟ་དགུང་ལོ་བཅུ་དྲུག་ཏུ་ཕེབས་དུས་ཟླ་བ་གཉིས་པའི་ཚེས་གཉིས་ལ་ཡབ་རྗེ་བླ་མ་དམ་པ་ཡེ་ཤེས་གོང་འཕོའི་རྟགས་ངོ་མཚར་བ་དང་བཅས་དག་པའི་ཞིང་དུ་
གཤེགས་པའི་ཐུགས་སྐྱོ་ངལ་ཚད་མེད་པ་ཤར་བའི་ནུབ་མོ་སྲོད་ཀྱི་དུས་མུན་པ་ནག་པོའི་མདུན་གྱི་ནམ་མཁར་འཇའ་འོད་ཀྱི་ཀློང་དུ་ཡབ་རྗེའི་སྐུའི་སྣང་བརྙན་གསལ་བར་གཟིགས་པའི་སྐུ་བརྙན་མཚོ་བྲག་གི་དག་སྣང་སོགས་ཕྱིས་འབྱུང་འགྱུར་མང་པོ་གནང་གསུངས། དེ་ནས་མེ་བྱ་དགུང་ལོ་བཅུ་དགུར་མ་ཕེབས་བར་ལོ་གསུམ་གྱི་བཅད་རྒྱ་དམ་པར་མཛད་ཅིང་གཙོ་བོར་དཔལ་གསང་བ་སྙིང་ཏིག་གི་དགོངས་པའི་ཟབ་ཁྲིད་ཀྱི་འོད་གསལ་རྡོ་རྗེ་སྙིང་པོའི་རྫོགས་རིམ་ཁོ་ན་དང་། དེའི་ཞར་བྱུང་དུ་བདེ་གཤེགས་ཀུན་འདུས་ཀྱི་མན་ངག་རྣམས་ཀྱང་སྒོམ་པ་ཡིན་གསུངས།