གཞུང་གི་དོན།

སྔོན་བྱུང་བ་སྐུ་སྐྱེ་སྔ་མའི་ཚུལ་མདོར་བསྟན་པ།

དེ་ལ་འདིར་བདག་ཅག་རྣམས་ཀྱི་སྐྱབས་མགོན་བླ་མ་དམ་པ་ལྷན་སྐྱེས་ཀྱི་ཌཱཀྐིའི་གཙོ་མོ་རིགས་བརྒྱའི་ཁྱབ་བདག་གར་གྱི་དབང་ཕྱུག་མི་འགྱུར་དཔལ་གྱི་སྒྲོན་མའམ་རྗེ་བཙུན་ཤེས་རབ་སྒྲོན་མ་ཞེས་འཇིགས་བྲལ་ཕྱོགས་ལས་རྣམ་པར་རྒྱལ་བའི་བཀའ་གསང་རྡོ་རྗེ་སྙིང་པོའི་ཐོལ་གླུ་གཞོམ་མེད་དུ་ལེན་ཅིང་སྙན་གྲགས་ཀྱི་བ་དན་སྲིད་པའི་རྩེ་མོར་སྒྲེང་ཞིང་ལྷ་དང་བཅས་པའི་འཇིག་རྟེན་དུ་མཚན་ཡོངས་སུ་གྲགས་པའི་དམ་པ་གང་གི་མཛད་པའི་ཚུལ་ཆ་ཙམ་གླེང་བ་ལ་གཉིས་ཏེ། སྔོན་བྱུང་བ་སྐུ་སྐྱེ་སྔ་མའི་ཚུལ་མདོར་བསྟན་པ་དང་། ཞིང་འདིའི་མཛད་པ་ཅུང་ཟད་སྤྲོས་ཏེ་བཤད་པའོ། །དང་པོ་ནི། འཁོར་འདས་ཀྱི་ཆོས་ཐམས་ཅད་གནས་ལུགས་ཟབ་ཞི་སྤྲོས་པ་ཐམས་ཅད་དང་བྲལ་བ་ཀ་དག་བདེ་བ་ཆེན་པོ་དེ་ཁོ་ན་ཉིད་ཀྱི་ངང་ལས་བཅོམ་ལྡན་འདས་དཔལ་ཀུན་ཏུ་བཟང་པོ་ལྷུན་གྲུབ་ཡེ་ཤེས་ཀྱི་སྐུར་བཞེངས་ཏེ་རང་སྣང་གི་ཡུམ་དབྱིངས་ཕྱུག་མ་ཀུན་ཏུ་བཟང་མོས་སྤྱིར་བསྟན་པའི་ཆོས་ཐེག་པ་ཆེ་ཆུང་སྣ་ཚོགས་པ་དང་། ཁྱད་པར་བཀའ་གསང་རྫོགས་པ་ཆེན་པོ་རྨད་བྱུང་བསྟན་པའི་སྙིང་པོ་འདི་ཉིད་འབྱུང་བར་གསོལ་བ་བཏབ་པ་ལས། སྟོན་པ་བླ་ན་མེད་པ་དེ་ཉིད་ཀྱིས་རང་རྩལ་ཡེ་ཤེས་རོལ་པའི་འཁོར་ཚོགས་རྣམས་ལ་རྫོགས་པ་ཆེན་པོ་སྒྲ་ཚིག་བྱ་རྩོལ་ལས་འདས་པ་དེ་ཁོ་ན་ཉིད་ཀྱི་ངེས་དོན་བརྗོད་མེད་དོན་གྱི་སྒོ་ནས་གསུངས་པ་ནི་རྒྱལ་བ་ཉིད་ལ་ཉིད་ཀྱིས་བརྒྱུད་པས་རྒྱལ་བ་དགོངས་པས་བརྒྱུད་པ་དང་། དེ་ལྟར་དོན་བརྡ་ཙམ་བསྟན་པ་ལས་རིག་འཛིན་རིག་པ་འཛིན་པ་རྣམས་ཀྱིས་ཆོས་ཉིད་ཀྱི་དོན་ཕྱིན་ཅི་མ་ལོག་པར་རྟོགས་པས་རིག་འཛིན་བརྡ་ཡི་བརྒྱུད་པ་དང་། ཆོས་ཉིད་རྫོགས་པ་ཆེན་པོའི་དོན་ཐུགས་ཀྱི་ཟ་མ་ཏོག་ཏུ་གཏམས་པ་མགུལ་གྱི་བུམ་པ་ལས་དྲངས་ལྗགས་ཀྱི་པདྨ་འདབ་བརྒྱད་ལས་ཐོན་པའི་དོན་སྙན་གྱི་བུ་ག་ཤིན་ཏུ་སྲབ་པ་ནས་རིམ་པར་བརྒྱུད་པའི་བཀའ་གསང་རྫོགས་པ་ཆེན་པོ་ཞེས་ཡོངས་སུ་གྲགས་པའི་བསྟན་པའི་སྙིང་པོ་འདི་ཉིད་ཉག་གཅིག་གི་བརྒྱུད་པ་ཟམ་མ་ཆད་པར་སྙན་ནས་སྙན་དུ་བརྒྱུད་དེ་གང་ཟག་བཀའ་བབས་ལས་འཕྲོ་ཅན་ལས་ད་ལྟའི་བར་རྣམ་དག་གི་བཀའ་ཁྱད་པར་ཟབ་མོ་གཏེར་དུ་རྒྱས་བཏབ་པའི་བརྒྱུད་པ་དྲུག་ལྡན་དུ་འཕགས་པ་འདི་ཉིད་ཐོག་མ་དང་། བར་མ་དང་། མཐའ་མ་གསུམ་གྱི་ཟབ་མོའི་བཀའ་བབས་ཞལ་གྱིས་བཞེས་ཤིང་དམ་བཅས་པའི་ཐོག་མའི་ཐོག་མ་ལ་ཡུམ་དབྱིངས་ཕྱུག་མ་ཀུན་ཏུ་བཟང་མོས་བསྟན་པ་འབྱུང་བར་གསོལ་བ་བཏབ་ཅིང་། བཀའ་གསང་རྡོ་རྗེ་སྙིང་བོའི་བསྟན་པ་བསྲུང་ཕྱིར་བཀའ་སྲུང་རག་གདོང་སྨུག་ནག་ཁྲོ་མོར་སྤྲུལ་ཞིང་རང་དམ་བཅས། བར་དུ་བསྐལ་བ་འདིའི་བསྟན་པ་ལ་རྨད་བྱུང་བསྟན་པའི་སྙིང་པོ་འདི་ཉིད་མི་ཉམས་ཤིང་སྤེལ་ཕྱིར་བདག་ཅག་གི་རྣམ་འདྲེན་བླ་མ་དམ་པ་བདེ་ཆེན་ཌཱཀྐིའི་གཙོ་མོ་འགྲན་ཟླ་ཐམས་ཅད་བྲལ་བ་ཡུམ་ཀུན་ཏུ་བཟང་མོ་ཉིད་དུ་སྐུ་སྤྲུལ་བཞེངས་པར་གྱུར་པ་ནི་སྙིང་ཐིག་ཆེན་མོའི་ཆོས་བདག་ལུང་བསྟན་གྱི་འཕྲོར་དཔལ་ཀུན་ཏུ་བཟང་པོའི་ལྗགས་ཀྱི་སྒྲ་ཐལ་འགྱུར་རྩ་བའི་རྒྱུད་ལས་ཀྱང་། དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ན་དར། །དེ་ནས་མི་གནས་རང་སའོ། །ཞེས་གསུངས་པས། དེ་ལ་མཁའ་འགྲོ་མ་ནི་སྐུའི་བཀོད་པ་དང་མཚུངས་པར་བསྟན་ཏེ། དོན་ལ་ཆོས་སྐུ་སྤྲོས་བྲལ་གྱི་ནམ་མཁའ་ལ་རིག་པ་ཡེ་ཤེས་ཀྱི་རང་རྩལ་མ་འགགས་པར་འགྲོ་བས་ན་མཁའ་འགྲོ་དང་། དཔལ་ནི་མི་འགྱུར་དཔལ་གྱི་སྒྲོན་མ་སྟེ་ངེས་གསང་རྡོ་རྗེ་སྙིང་པོའི་བསྟན་པ་འཛིན་པར་ལུང་གིས་བསྟན་པས་ན་མཚན་སྒྲའི་ཚིག་ཀྱང་ཤིན་ཏུ་གསལ་ཞིང་། དེ་ལ་དབྱིངས་ཀྱི་ཡུམ་ཀུན་ཏུ་བཟང་མོ་ཡིན་པའང་དངོས་སུ་བསྟན་ཏེ་རང་གཏེར་ཤ་འུག་གཏེར་བྱོན་གབ་རྒྱའི་ལུང་བྱང་དུམ་བུ་ཐ་མ་ལས་ཀྱང་། ཁྱད་པར་བདེ་གཤེགས་ཀུན་འདུས་མན་ངག་འདིའི༔འཆང་བྱེད་སྣོད་ལྡན་ཆོས་ཀྱི་བདག་པོ་ནི༔གསང་ཆེན་སྙིང་ཐིག་མན་ངག་བསྟན་པའི་བདག༔ཆོས་དབྱིངས་གནས་སུ་ཀུན་ཏུ་བཟང་མོ་དང༔པོ་ཏཱ་ལ་རུ་ཨཪྱ་ཏཱ་རེ་མ༔དཔལ་རི་པདྨར་ཡེ་ཤེས་མཚོ་རྒྱལ་ཏེ༔ཨོ་རྒྱན་གཟུང་མ་ད་ལྟའི་མཁར་ཆེན་གཟའ༔སྐྱེ་བ་འདི་ནས་ཆོ་འཕྲུལ་གྲངས་མེད་འགྱེད༔མ་གཅིག་ལབ་སྒྲོན་སྣང་ས་འོད་དེ་འབུམ༔ཟུར་མོ་དགེ་འབུམ་ལ་སོགས་དུ་མའི་མཐར༔བསམ་ཡས་ལྷོ་ཕྱོགས་གྲྭ་ཞེས་གཡོར་པོའི་ཆར༔མཚན་རྟགས་ལས་ཅན་བཻ་རོའི་སྐྱེ་མཐའ་ཡིས༔བརྒྱུད་འཛིན་ཊཱཀྐི་སྒྲོན་མའི་མིང་འཆང་མ༔མདོ་རྒྱུད་ལུང་གི་གདམས་པས་རྒྱུད་ཕྱུག་པའི༔རབ་འབྱམས་རྒྱུད་སྡེའི་ཕ་མཐར་རྒལ་བ་བྱུང༔སྔགས་ཀྱི་དོན་སྤྱོད་རྫོགས་ཆེན་རྣལ་འབྱོར་མ༔དངོས་སམ་ཉམས་སུ་ང་དང་བཀའ་ཡང་བགྲོ༔ཟླ་ཟེར་སྤྲུལ་པར་ཆད་མཐའ་མི་མངའ་ཡང༔དེ་ཕྱིར་མཚོ་རྒྱལ་དངོས་ཀྱི་སྐྱེ་མཐའ་ནི༔རེ་ཞིག་འདིས་ཆོད་སྔོན་མེད་རྫོགས་སངས་རྒྱས༔ཞེས་དང་རྒྱལ་པོ་བཀའ་ཐང་ལས༔ཡུལ་གཅིག་དབུས་ཀྱི་རྡོ་རྗེ་གདན་དྲུང་དུ༔དགེ་སློང་དཔལ་མོ་ཞེས་བྱ་འབྱུང་བར་འགྱུར༔ཞེས་གསུངས་པས་རྒྱལ་བའི་བཀའ་བསྟན་མན་ངག་མ་ལུས་པ་རྒྱ་བོད་ཀྱི་ལོ་པཎ་རྣམས་ཀྱིས་དཔལ་བསམ་ཡས་སུ་བསྒྱུར་ཅིང་བོད་དུ་མདོ་སྔགས་དར་བའི་ཐོག་མའི་ས་བོད་ཡུལ་དབུས་ཀྱི་རྡོ་རྗེ་གདན་ཡིན་པས་གཙོ་ཆེ་བའི་དབང་གིས་རགས་པ་ཙམ་དུ་ལུང་བསྟན་པ་དང་། དཔལ་ཨོ་རྒྱན་ཆེན་པོས་པད་གླིང་གཏེར་བྱོན་མཚོ་རྒྱལ་གྱི་རྣམ་ཐར་ལས། ཁྱོད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་སྤྲུལ་པ་དུས་གསུམ་སངས་རྒྱས་ཐམས་ཅད་ཀྱིས་མངའ་གསོལ་བ༔རྡོ་རྗེ་པདྨའི་མིང་ཅན་སྙིགས་མའི་འགྲོ་བ་ཐམས་ཅད་ཀྱི་དེད་དཔོན་དམ་པར་གྱུར་པ་གཅིག་བསམ་ཡས་འདིའི་ནུབ་ཕྱོགས་ཡུལ་སྒྲགས་ཞེས་པ་ནས་འབྱུང༔ཞེས་གསུངས་པའི་ཡུལ་ཕྱོགས་དངོས་སུ་བསྟན་པ་དང་། རྡོ་རྗེ་པདྨའི་མིང་ཅན་ནི། སྙིང་ཐིག་གི་ཟབ་ཁྲིད་རྗེས་སུ་མངའ་གསོལ་མཛད་དུས་མཚན་འགྲོ་འདུལ་རྡོ་རྗེ་སྙིང་པོ་ཞེས་པ་དང་། བདེ་གཤེགས་ཀུན་འདུས་ཟབ་ཁྲིད་ཀྱི་དབང་གི་དུས་པདྨའི་དབང་ཕྱུག་ཏུ་ཡབ་རྗེ་གཏེར་བདག་གླིང་པས་སྩལ་བས་དངོས་སུ་བསྟན་པ་ལྟར་ལུང་བསྟན་ཕལ་ཆེར་ཀུན་རྫོབ་དགོས་དབང་ཆེད་དུ་སྣང་ཚུལ་དུ་གནང་བའི་མཚན་རྗེ་བླ་མས་བདག་ལ་དངོས་སུ་སྩལ་བ་བཞིན་གྱ་ཚོམས་སུ་མ་བརྒལ་བར་ཁུངས་དང་ལྡན་པ་སྟེ། དེ་ཡང་མཚན་གཉིས་སུ་གསུངས་པའི་དོན་ཐོག་མ་གཉིས་སུ་ལུང་བསྟན་པ་ཡིན་ནོ། །དེས་ན་དམ་པ་འདི་ཉིད་མཚོ་རྒྱལ་དངོས་ཡིན་པ་ལྟར་ན། དོན་ལ་འོག་མིན་ཆོས་ཀྱི་དབྱིངས་སུ་ཀུན་ཏུ་བཟང་མོ་དང་། པོ་ཏཱ་ལར་རྗེ་བཙུན་སྒྲོལ་མ་དང་། དེར་མ་ཟད་པདྨ་བཀའ་ཐང་ལས། དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་གྱིས༔ཞེས་ལྷ་མོ་དབྱངས་ཅན་མའང་ཡིན་པ་དང་། བདག་ཅག་གི་སྟོན་པས་མ་གཅིག་ལབ་སྒྲོན་ལུང་བསྟན་དུས། བྱང་ཕྱོགས་ལབ་གྱི་གྲོང་ཁྱེར་དུ་ཡུམ་ཆེན་མོ་དངོས་སུ་འབྱུང་བར་མདོ་ལས་ལུང་བསྟན་པ་དང་། ཀུན་མཁྱེན་རྡོ་རྗེ་ཐོགས་མེད་ཀྱི་གཟིགས་སྣང་རྒྱ་ཅན་ལས་མཚོ་རྒྱལ་དང་མཇལ་དུས་ཌཱཀྐིའི་རྡོ་རྗེའི་ཐོལ་གླུ་ལས། ཁྱད་པར་ཁོ་མོ་རྡོ་རྗེ་རྣལ་འབྱོར་མ། །གསང་བ་ཡེ་ཤེས་རྗེ་བཙུན་སྒྲོལ་མ་སོགས། །སོ་སོར་སྣང་ཡང་དོན་ལ་དབྱེ་བ་མེད། །ཅེས་གསུངས་པ་དེ་དག་ངོ་བོ་གཅིག་ལ་སྣང་ཚུལ་ཐ་དད་པར་གསུངས་ཀྱང་དོན་ལ་དབྱིངས་ཀྱི་ཡུམ་ཀུན་ཏུ་བཟང་མོ་དངོས་ཡིན་པ་བཤད་པ་ལྟར་རོ། །དེ་ནས་ཐ་མར་བསྐལ་པ་ཚེ་ལོ་བཅུ་པའི་ཚེ་དམ་པ་འདི་ཉིད་ད་ལྟའི་བཀོད་པ་དང་མཚུངས་པར་རང་བྱུང་དུ་བྱོན་ནས་ཆོས་འཁོར་རིམ་པ་གསུམ་དུ་བསྐོར་བ་ལས། དང་པོ་དང་གཉིས་པའི་དུས་ན་གང་ཟག་ལས་འཕྲོ་ཅན་རྣམས་རྫོགས་པ་ཆེན་པོ་སྒྲ་ཐ་ཚིག་བྱ་རྩོལ་བྲལ་བའི་དོན་ཐོས་པ་ཙམ་གྱིས་ཆོས་ཐུན་རེ་རེ་བཞིན་རྫོགས་མ་ཐག་ཏུ་བྱ་བརྒྱ་འུར་རྡོས་བསྐྲད་པ་ལྟར་ཡང་དག་པར་འདུས་པའི་འཁོར་རྣམས་འཚང་རྒྱ་བ་དང་། གསུམ་པའི་དུས་འཁོར་ཚོམ་བུ་ལྷག་མེད་དུ་ཡང་དག་པར་འགྱུར་བ་ཡིན་ཏེ། ཨ་ཏི་བཀོད་པ་ཆེན་པོ་ལས། ཚེ་ལོ་བཅུ་པའི་དུས་སུ་སྙིང་པོ་འདི་ཕྱུང་ནས། །འདི་དང་གང་འཕྲད་འབྱུང་བ་རང་དེངས་འགྱུར། །ནམ་མཁར་ཡལ་ཏེ་མི་སྣང་བསྟན་པའི་བཙས། །ཡང་ནི་བསྟན་པའི་མེ་རོ་གཞན་དུ་འགྱུར། །ཞེས་གསུངས་པ་ལྟར་རོ། །དེ་ལ་ཞིང་འདིར་ཐོག་མར་པདྨའི་གཟུང་མ་མཁར་ཆེན་གཟའི་ལོ་རྒྱུས་ཅུང་ཟད་བརྗོད་ན། དེ་ཡང་པདྨ་བཀའ་ཐང་ལས། དེ་ནས་བུད་མེད་ཡེ་ཤེས་མཚོ་རྒྱལ་གྱིས༔ཨེ་མ་ཧོ༔ཡོན་ཏན་དུ་མས་བརྒྱན་པའི་པདྨ་འབྱུང༔ཞེས་སོགས་ནས། བོད་བྱོན་མི་ལོ་བཅུ་གསུམ་སོང་ཙ་ན༔སྒྲགས་པ་ནམ་མཁའ་ཡེ་ཤེས་ཡབ་ཀྱི་མཚན༔གནུབ་མོ་དགེ་བ་འབུམ་ཞེས་ཡུམ་གྱི་མཚན༔ཤིང་མོ་བྱ་ཡི་ལོ་ལ་མཚོ་རྒྱལ་འཁྲུངས༔མེ་མོ་བྱ་ཡི་ལོ་ལ་རྗེ་དང་མཇལ༔མི་བརྗེད་གཟུངས་ཐོབ་ཆོས་རྣམས་སློབ་མ་དགོས༔བརྒྱད་ཅུ་རྩ་ལྔའི་བར་དུ་ཞབས་ཏོག་བསྒྲུབས༔སྤུ་གུ་ཕོ་མོ་གང་ཡང་བདག་ལ་མེད༔དགེ་སློང་མ་ཡིན་འཁོར་བའི་སྐྱོན་མ་གོས༔ཞེས་གསུངས་པས། དེ་ལ་:དབུ་རུ་༼གཡོ་རུ༽སྒྲགས་ཀྱི་ཡུལ་ཚ་ལུ་མཁར་ཞེས་བྱ་བར་ཡབ་ནམ་མཁའ་ཡེ་ཤེས་དང་། ཡུམ་དགེ་བ་འབུམ་གཉིས་ཀྱི་སྲས་སུ་སྐུ་བལྟམས་ཏེ་མཚན་པདྨ་ལྕམ་དུ་གསོལ། དགུང་ལོ་བརྒྱད་པ་ནས་སྐུ་ལུས་མཚར་སྡུག་དང་ལྡན་པ་ཡེ་ཤེས་ཀྱི་མཁའ་འགྲོའི་གྲགས་པས་ཕྱོགས་ཐམས་ཅད་ཁྱབ་ཅིང་། དགུང་ལོ་བཅུ་གསུམ་ནས་རྒྱ་གར་བཻ་དའི་རྒྱལ་པོ་སོགས་ཕྱོགས་ཀྱི་རྒྱལ་ཕྲན་མང་པོ་དང་། དེ་ལས་བོད་ཟུར་མོ་མཁར་གྱི་རྒྱལ་བུ་ནོར་བུ་དཀར་གསལ་གྱི་ཞུ་ནན་གྱི་སློང་མི་མང་བ་ལ། དེར་ཡབ་རྒྱལ་པོས་བུ་མོ་ཁྱོད་སློང་མི་མང་བས་ཁྱོད་རང་གང་དགའ་བ་འདོམས་ཤིག་གསུངས་པས། དེར་སྲས་ཀྱིས་དམ་པའི་ཆོས་ཞིག་མ་བྱུང་ན་འཁོར་བའི་སྡུག་བསྔལ་ལས་མི་འདུག་པས་རང་དབང་ཞིག་བྱུང་ན་ཆོས་བྱེད་པ་ཡིན་གསུངས་པས། རྒྱལ་བློན་གྲོས་མཛད་པས་བདུད་བློན་ཤི་སྲ་ཞེས་ཁས་བཙན་པ་དེས། འོ་ན་བདུད་རི་ཤ་ཤང་ཀངྐ་གྲགས་སུ་སྤྱུགས་པ་དྲག་ཅིང་དེར་ཁ་འཆམ་སྟེ་ཆོས་བློན་རྣམས་ཀྱིས་ནི་བསྒྱུར་ཁ་མ་ཐུབ་པས། སྐུ་ལུས་གཅེར་བུ་བྱས་ཞགས་པས་བཅིངས། ཚེར་ལྕག་གིས་བྲབས་ཤིང་གནས་འཇིགས་རུང་མི་བཟད་པའི་ནགས་ཚལ་གཅན་གཟན་མི་བསྲུན་པ་དང་དུར་བྱ་དང་ཁྭ་ཏ་སོགས་སྒྲ་སྣ་ཚོགས་སྒྲོག་པའི་ས་དེར་སྤྱུགས་སོ། །དེར་སྐུ་ལུས་གཅེར་བུ་ཟས་སྐོམ་གྱིས་ཕོངས་པ་ལ་གཅན་གཟན་དང་བྱ་ཚོགས་རྣམས་ཀྱིས་མོས་གུས་ཀྱི་ཤིང་ཏོག་དང་ཤིང་སེ་བའི་འབྲས་བུ་དང་ཁུ་བ་སོགས་ཀྱི་ཞབས་ཏོག་ལ་བརྟེན་ཟག་མེད་ཀྱི་ཏིང་ངེ་འཛིན་ཁོ་ན་ལ་བཞུགས་སོ། །དེར་ཟུར་མོ་མཁར་གྱི་རྒྱལ་པོས་ཡབ་ཡུམ་གྱི་ཐུགས་རྒྱུད་བསྐུལ་ཏེ་བློན་འབངས་ཀྱིས་བདུད་རི་ནས་ལྷ་ལྕམ་དབང་མེད་དུ་བཀུག་ནས་ཟུར་མོ་མཁར་དུ་དར་དཀར་གྱི་ཡོལ་བའི་ནང་དུ་རྒྱལ་པོ་དང་ཟུང་དུ་བཞུགས་སོ། །དེར་རྒྱལ་བློན་ཐམས་ཅད་ནི་ལྷ་ལྕམ་འདི་ལྟ་བུ་ཁུག་རྟིང་བློ་བདེ་ནས་གཉིད་དུ་སོང་། དེའི་ཚེ་ལྷ་ལྕམ་ནམ་ཕྱེད་ན་ཐུགས་དྭངས་པའི་དཀོན་མཆོག་ལ་གདུང་ཤུགས་ཀྱི་འབོད་པ་མཛད་པས་ཁྱེའུ་ཤེལ་གྱི་ཐོར་ཚུགས་ཅན་ཞིག་བྱུང་བ་ལ། ལྷ་ལྕམ་གྱིས་ཁྱོད་སུ་ཡིན་ངས་ངོ་མི་ཤེས་གསུངས་པས། ཁྱེའུ་དེའི་ཞལ་ནས། རྣལ་འབྱོར་ང་ནི་ཨོ་རྒྱན་པདྨ་ཡིན༔གདུལ་བྱ་རྒྱ་གར་ཤར་ནུབ་ཕྱོགས་སུ་དར༔དགོས་པའི་དོན་བྱེད་ལྷ་ལྕམ་ཁྱོད་ཉིད་ཀྱི༔གདུང་ཤུགས་དད་པའི་ཆེད་དུ་ཡོང་པ་ཡིན༔ཞེས་གསུངས་པས། ལྷ་ལྕམ་གྱིས་ཁྱོད་ཨོ་རྒྱན་པདྨ་ཡིན་ན་གྲོགས་འཁོར་བའི་བཙོན་དོང་ནས་འཐོན་པའི་ཐབས་ཤིག་སྩལ་དུ་གསོལ་ཞེས་ཞུས་པས། ཨོ་རྒྱན་གྱིས་ཁྱོད་རང་གི་སོར་གདུབ་ལག་ཏུ་ཚུར་ལོངས་ལ་རྣལ་འབྱོར་ང་སྤྱི་གཙུག་ཏུ་སྒོམས་ཤིག་གསུངས་པས། དེ་ལྟར་མཛད་པས་ཕྱག་ཞབས་བསྡམས་པ་རང་གྲོལ་དུ་སོང་སྟེ་ཨོ་རྒྱན་ཉིད་ཀྱི་རྗེས་སུ་ནམ་མཁའ་ལ་འཕུར་ཏེ་མཆིམས་ཕུ་རྫའི་རི་ཁྲོད་ཀྱི་བྲག་ཕུག་ཏུ་ཕེབས་ནས་ཨོ་རྒྱན་ཉིད་ཀྱིས་རྫོགས་པ་ཆེན་པོའི་ཆོས་རྣམས་ཞུ་བ་དང་ཞུ་ལེན་གྱི་སྒོ་ནས་ཞིབ་ཏུ་སྩལ། དེ་ནས་ཨོ་རྒྱན་ཆེན་པོས་མཚོ་རྒྱལ་ལ་ང་རྒྱ་གར་དུ་གཉུག་གཅིག་འགྲོ་བས་དེ་བར་གྲུབ་པ་ཐོབ་པ་གྱིས་ཤིག་གསུངས་པས། དེར་ལྷ་ལྕམ་གྱིས་མི་ལོ་བཅུ་གཉིས་ལ་སྒྲུབ་པ་མཛད་པས། སྐབས་ཤིག་ཇག་པ་མི་བདུན་བྱུང་བས། དམ་པའི་ཆོས་ཀྱིས་བསྐུལ་ཏེ་བཞུགས་པའི་དུས། བུད་མེད་ཅིག་གིས་དོ་ལི་ལ་ལྷ་ལྕམ་བཞུགས་དགོས་ཟེར་བ་ལ་བཞུགས་པས་ཇག་པ་རྣམས་ཀྱང་སྡོད་དགོས་ཟེར་དེར་ཐོགས་མེད་དུ་མཁའ་སྤྱོད་ཀྱི་ཞིང་བགྲོད་ནས་ཇག་པ་བདུན་འོད་ལུས་སུ་ཡལ། ལྷ་ལྕམ་ཧེ་རུ་ཀའི་དུར་ཁྲོད་ཉུལ་བའི་རང་སྣང་གི་ཞིང་དུ་རིག་འཛིན་གྱི་དཔའ་བོ་སྡེ་ལྔ་དང་ཚོགས་སྤྱོད་གྱི་སྤྱོད་པ་མཛད་དེ། མཚན་རྡོ་རྗེ་གར་དབང་མ། རྡོ་རྗེ་དྲག་མོ་རྩལ། ཡེ་ཤེས་མཚོ་རྒྱལ། བདུད་འདུལ་དྲག་མོ་རྩལ། མཁར་ཆེན་གཟའ་ལ་སོགས་དཔའ་བོ་རེས་མཚན་རེ་གསོལ་ནས་ཟབ་གསང་རྫོགས་པ་ཆེན་པོའི་ཆོས་ཉིད་ཀྱི་རྟོགས་པ་མངོན་དུ་བརྙེས་ནས་གདོད་མའི་བཙན་ས་ཟིན། དེ་ནས་སླར་ཡང་མཆིམས་ཕུའི་བྲག་ཕུག་ཏུ་ཕེབས་སོ། །དེ་ནས་ཨོ་རྒྱན་ཉིད་རྒྱ་གར་ནས་ཕེབས་པའི་ཆོས་ཀྱི་བྱ་བ་མཛད། སྔར་ལྷ་ལྕམ་ཆོས་མཛད་པ་ལ་བར་གཅོད་གཏོང་མི་བདུད་བློན་ཤི་ར་ངན་སོང་དུ་འཁྱམས་པ་འདྲེན་དགོས་པའི་ལུང་གིས་དམྱལ་ཁམས་ནས་དེས་མཚོན་པའི་འགྲོ་བ་མང་པོ་དོང་སྤྲུགས་ཀྱི་སྒོ་ནས་བདེ་ཆེན་གྱི་གནས་སུ་དྲངས། དེ་ནས་ཨོ་རྒྱན་ཆེན་པོའང་ཐུགས་ཡིད་རང་བའི་མཚོ་རྒྱལ་ཉིད་ལ་གསང་མཚན་རིག་འཛིན་མཐིང་འོད་འབར་མར་གསོལ་ཏེ་བསྟོད་པ་མཛད་ཅིང་། སློབ་དཔོན་ཆེན་པོའི་སྤྲུལ་པས་གར་ཁྱབ་པའི་གནས་སུ་མཚོ་རྒྱལ་གྱིས་ཀྱང་ཆོས་ཀྱི་ཞུ་བ་པོ་དང་བཀའི་བསྡུ་བ་པོར་ཁྱབ་པར་མཛད་ཅིང་མཐར་འཇའ་ལུས་འཕོ་བ་ཆེན་པོའི་སྐུ་བརྙེས་ནས་དུས་ད་ལྟ་ཡང་རྔ་ཡབ་པདྨ་འོད་དུ་སྐུ་དངོས་བཞུགས་པ་ཡིན་ཏེ་ཀུན་མཁྱེན་རྡོ་རྗེ་ཐོགས་མེད་ཀྱི་གཟིགས་སྣང་རྒྱ་ཅན་ལས་ཀྱང་། ཕྱི་ལྟར་བུ་མོ་ཡེ་ཤེས་འཚོ་རྒྱལ་ང་། །པོ་ཏཱ་ལ་རུ་ཨཪྱ་ཏཱ་རེར་གྲགས། །ཉི་ཤུ་རྩ་བཞིའི་གནས་ཡུལ་ཀུན་ཏུ་རྒྱུ། །འདི་ནས་ནུབ་ཕྱོགས་ཟངས་མདོག་དཔལ་རི་ན། །སྲིན་པོ་འདུལ་བའི་ཆོ་འཕྲུལ་ཅིར་ཡང་སྟོན། །ཞེས་གསུངས་ཤིང་། དེར་མ་ཟད་སྐུ་སྐྱེ་བ་འདིའི་གོང་དུ་རྒྱ་གར་དུ་སངས་རྒྱས་འཁོར་བ་འཇིག་གི་ཚེ་ནའང་ནམ་མཁའ་ལ་མེ་འབར་བ་ལྟ་བུའི་ཐན་པ་ཆེན་པོ་བྱུང་ནས་ས་གཞིའི་ལོ་ཏོག་ཐམས་ཅད་སྐམས༔འབབ་ཆུ་ཕལ་ཆེར་ཡང་སྐེམ༔འགྲོ་བ་རྣམས་ཉམ་ཐག་པའི་ང་རོ་ཆེན་པོ་སྒྲོགས་པའི་དུས་སུ༔ཁོ་བོའི་རྣམ་འཕྲུལ་བྱང་ཆུབ་སེམས་དཔའ་ཆུའི་འཁོར་ལོ་བྱ་བ་གཅིག་བྱུང་སྟེ༔དེ་ལ་ཡུམ་ཀླུའི་བུ་མོ་སྒྲུབ་སྡེ་ཆུའི་དཔལ་མོ་བྱ་བ་བྱུང་ནས་ཆར་ཆེན་པོ་འབེབས་པའི་སྨོན་ལམ་བཏབ་ཚེ༔ཆར་རྒྱུན་ཆུ་གཟོ་བྱོ་བ་ལྟར་བབས་ཏེ་ས་གཞིའི་ལོ་ཏོག་ཐམས་ཅད་གསོས༔སྲོག་ཆགས་རྣམས་ཉམ་ཐག་ཤི་བ་ཐམས་ཅད་ལམ་ལ་བཀོད༔འགྲོ་བ་ཐམས་ཅད་ལོངས་སྤྱོད་ཀྱིས་ཚིམས་པར་བྱས༔དེ་ལྟར་ཡང་བྱང་ཆུབ་སེམས་དཔའ་རྟ་ཐུལ་ཅན་གྱིས་ཞུས་པའི་མདོ་ལས་རྒྱས་པར་གསུངས༔སྒྲུབ་སྡེ་ཆུའི་དཔལ་མོ་དེ་ད་ལྟའི་མཚོ་རྒྱལ་འདིའོ༔ཞེས་དཀོན་མཆོག་སྤྱི་འདུས་ཀྱི་པདྨའི་རྣམ་ཐར་ལས་གསུངས། ཡང་དེ་ལས། དེའི་དུས་ན་ཁོ་བོའི་སྤྲུལ་པ་འཕགས་པ་ཀུན་དགའ་བོར་གྱུར་ནས་ཐུབ་པ་ཆེན་པོ་ལ་དད་གུས་མོས་པས་མཆོད་བསྟོད་སོགས་གཞན་ལས་ཁྱད་པར་དུ་འཕགས་པའོ༔དེའི་ཚེ་བདག་གི་སྲིང་མོ་གདྒཱའི་ལྷ་མོ་ཞེས་བྱ་བ་ཡོན་ཏན་དུ་མ་དང་ལྡན་པའི་བུད་མེད་དེ་ད་ལྟའི་མཚོ་རྒྱལ་འདིའོ༔ཞེས་གསུངས་པས་རྒྱ་བོད་ཀུན་ཏུ་རྣམ་སྤྲུལ་བརྗོད་ཀྱིས་མི་ལང་བ་བྱུང་ངོ་། །གང་ལྟར་ཡང་དེའི་འོག་ཏུ་སྐུ་སྤྲུལ་མ་གཅིག་ལབ་ཀྱི་སྒྲོན་མ་དང་། གསུང་སྤྲུལ་མྱང་སྟོད་སྣང་ས་འོད་དེ་འབུམ་གཉིས་ནི། པད་གླིང་གཏེར་ལུང་ཀུན་གསལ་མེ་ལོང་ལས། མཁའ་འགྲོ་སྡེ་ལྔ་མཚོ་རྒྱལ་ཐུགས་ཀྱི་སྤྲུལ༔ལབ་ཀྱི་སྒྲོལ་མ་སྣང་ས་འོད་དེ་འབུམ༔བུད་མེད་ཚུལ་འཆང་འགྲོ་དྲུག་ལམ་སྣ་འདྲེན༔ཞེས་པའི་མ་གཅིག་ལབ་ཀྱི་སྒྲོལ་མ་ནི༔པད་གླིང་གཏེར་བྱོན་རྣམ་ཐར་ལས༔ཁྱད་པར་ཐུབ་པའི་བསྟན་པ་སྙིགས་མ་ལྔ་བདོ་བའི་དུས་སུ༔ཁྱོད་ཀྱི་སྐུའི་སྤྲུལ་པ་རིགས་ལྔའི་རྟགས་ཀྱི་མངའ་གསོལ་བ༔འབྲེལ་ཚད་དོན་དང་ལྡན་པ་གཅིག་གངས་ཅན་གྱི་དབུས་སུ་འབྱུང༔ཞེས་བསྟན་པ་ལྟར་བདག་ཅག་གི་སྟོན་པས་མདོའི་ལུང་བསྟན་དུ་བྱང་ཕྱོགས་ལབ་ཀྱི་གྲོང་ཁྱེར་དུ་ཡུམ་ཆེན་མོ་དངོས་སུ་འབྱུང་བར་བསྟན་ཏེ། ཡུལ་དབུས་རོང་དུ་ལབ་ཅེས་བྱ་བར་ཡབ་ཡུམ་གཉིས་ཀྱི་སྲས་སུ་བལྟམས། ཆུང་ངུ་ནས་ཐེག་པའི་ཆོས་ཀྱི་བག་ཆགས་སད་ཅིང་ངེས་འབྱུང་གི་ཐུགས་རྒྱུད་བཟང་པོ་བརྙེས། རྩེད་ཐང་དུ་དུས་སྟོན་ཞིག་ལ་བྱོན་པས་ཕྱོགས་འདུས་ཀྱི་མི་མང་པོ་འདུས་པའི་ཁྲོམ་དབུས་སུ་མི་རྣམས་ཀྱིས་ཁྲོམ་འདིའི་དཀྱིལ་ན་བུ་མོ་འདི་ལས་མཚར་བ་མི་འདུག་འདི་གང་ནས་ཡིན་ཟེར་བ་ལ། དེར་འགའ་ཞིག་རྒྱུས་ཡོད་པ་རྣམས་ཀྱིས་ཡུལ་ལབ་ནས་ཡིན། མོ་རང་གི་མིང་ལ་སྒྲོལ་མཛེས་ཟེར་སྨྲས་པར། ཁྲོམ་པ་རྣམས་ཀྱིས་འོ་ན་ལབ་སྒྲོལ་ཟེར་བ་ཡིན་འདུག་ཅེས་བསྒྲགས་པས་ཕྱིས་མཚན་ལ་ལབ་སྒྲོལ་དུ་གྲགས་པ་དེ་ལྟར་ཡིན། དེ་ནས་གྲྭ་ནང་དུ་གཏེར་སྟོན་གྲྭ་པ་མངོན་ཤེས་ཀྱི་དྲུང་དུ་རབ་ཏུ་བྱུང་སྟེ་བྱང་ཆུབ་ཆོས་སྒྲོན་དུ་མཚན་གསོལ། བཀའ་འགྱུར་གྱི་གསུང་སྒྲོག་མཛད་པས་ཆོས་ཉིད་ཀྱི་རྟོགས་པ་མངོན་དུ་བརྙེས་ནས་བཀའ་ཐོག་ནས་གྲོལ་བའི་གདེང་ཐོབ། དེའི་ཚེ་ལ་སྟོད་དིང་རི་ནས་རྗེ་དམ་པ་སངས་རྒྱས་གྲྭ་ཐང་དུ་ཕེབས་ཏེ་མ་གཅིག་དང་མཇལ་བས། དེར་དམ་པའི་ཞལ་ནས་ངའི་ཡུམ་ཆེན་མོ་ཡི་དམ་གྱི་ལྷ་དང་ད་ལམ་འདིར་མཇལ་བྱུང་ཞེས་ཕྱག་དང་གུས་བསྟོད་ཀྱི་ངང་ནས་བྱིན་རླབས་ཞུ་བར་མཛད། རོང་དུ་དད་ཅན་ཞིག་གི་སར་གསུང་སྒྲོག་མཛད་པས། དེར་དགེ་སློང་ཞིག་ཀྱང་ཆོས་སྟོན་དུ་འཛོམས་པར། དགེ་སློང་མ་གཅིག་གི་གསུང་སྒྲོག་གི་སྙན་དབྱངས་ཀྱིས་སྣང་སེམས་བདེ་བས་ཁྱབ་པས་ཆོས་སྟོན་མ་བྱུང་བར་སྦྱིན་བདག་གིས་བསྐུལ་བས་དེར་དགེ་སློང་ན་རེ། དེ་རིང་ཁྱོད་ཀྱི་མཆོད་གནས་མའི་གསུང་སྒྲས་ཆོས་དང་ཟས་སྐོམ་གྱི་འདུ་ཤེས་གང་ཡང་མི་འདུག་ཅེས་གསུངས་བས་སྦྱིན་བདག་ཀྱང་ངེད་ཚོ་ཡང་དེ་འདྲ་འདུག་ཅེས་གླེང་། དེ་ནས་སྲོད་ཀྱི་དུས་དགེ་སློང་ནས་མ་གཅིག་གི་དྲུང་དུ་ང་ལ་བྱིན་རླབས་ཤིག་ཞུ་གསོལ་བས། དེར་མ་གཅིག་གིས་ཆོས་ཀྱི་བམ་པོ་དུམ་པ་ཞིག་མགོ་ཐོག་ཏུ་སྩལ་བས། དགེ་སློང་གིས་དེ་མི་ཞུ་གསང་གནས་ཀྱི་བྱིན་རླབས་ཤིག་ཞུ་ཞུས་པས། མ་གཅིག་གིས་དེ་མི་རུང་འདུལ་བའི་བསླབ་སྡོམ་ཉམས་འགྲོ་གསུངས་པའི་ནུབ་ཡུམ་ཆེན་མོས་ཡི་དམ་གྱི་ལྷས་བསླབ་སྡོམ་བློས་ཐོངས་ལ་ཚོགས་སྤྱོད་ཀྱི་སྤྱོད་པས་སེམས་ཅན་རྣམས་མཁའ་སྤྱོད་དུ་དྲོངས་ཞེས་ལུང་བསྟན་པར་བརྟེན་དེར་དགེ་སློང་དང་ཐབས་ཤེས་ཀྱི་སྦྱོར་བ་མཛད་པས་སྲས་རྒྱལ་བ་དོན་གྲུབ་དང་། ཐོད་སྨྱོན་བསམ་གྲུབ་སོགས་གསུམ་ཙམ་འཁྲུངས། དེར་མི་རྣམས་སྔར་དད་པ་བསམ་གྱིས་མི་ཁྱབ་པ་ཡོད་པ་ལ། དུས་དེ་ནས་བསམ་པ་ཕྱིར་ལོག་ཏུ་སོང་ཡང་ཉམ་ང་མེད་པའི་བརྟུལ་ཞུགས་ཀྱི་སྤྱོད་པས་ལྟ་བ་མཐའ་བྲལ་དུ་བརྙེས་ནས་ཟབ་མོ་གཅོད་ཀྱི་གདམས་པ་བཀའ་ཕ་རོལ་ཏུ་ཕྱིན་པའི་དགོངས་པ་སྙིང་པོར་དྲིལ་བའི་ལམ་ཁྱེར་གྱི་མན་ངག་བཀའ་རྩོམ། ཡང་རྩོམ། ཉིང་རྩོམ། ལེ་ལག །ཁ་ཐོར་སོགས་གདམས་པ་གནད་ཟབ་མང་པོའི་ཡིག་ཆ་མཛད་ཅིང་། སྨྱོན་སྤྱོད་རོ་སྙོམས་ཀྱི་ལྟ་བས་བཟང་ངན་མེད་པའི་སྐྱེ་བོ་ཀུན་དང་རོལ་ཏེ་ཕྱོགས་མཐའ་སྤྱི་དང་ཁྱད་པར་ཟངས་རི་ཁང་དམར་དུ་སྐུ་ལུས་ཀྱི་ཚུལ་བཏང་ནས་འགྲོ་བ་མང་པོ་དབྱིངས་སུ་དྲངས་ཤིང་མཐར་སྐུ་ལུས་མ་སྤངས་པར་མཁའ་སྤྱོད་དུ་གཤེགས་སོ། །དེའི་འོག་ཏུ་གསུང་སྤྲུལ་སྣང་ས་འོད་དེ་འབུམ་ནི། སངས་རྒྱས་གླིང་པའི་གཏེར་ལུང་དུ། ནུབ་ཕྱོགས་མྱང་སྟོད་ཞེས་བྱའི་ཕུར༔མཚོ་རྒྱལ་ཁྱོད་ཀྱི་གསུང་སྤྲུལ་ནི༔འོད་དེ་འབུམ་ཞེས་གྲགས་པ་འབྱུང༔མ་སྐྱེས་གདོད་མའི་རྣལ་འབྱོར་མ༔ཞེས་དང་། པད་གླིང་གཏེར་བྱོན་རྣམ་ཐར་ལས། གསུང་གི་སྤྲུལ་པ་བླ་མ་མཁའ་འགྲོས་མངའ་གསོལ་བ༔མཚན་ཉིད་དང་ལྡན་པ་གཅིག་ནུབ་ཕྱོགས་གཙང་གི་ཕྱོགས་སུ་འབྱུང༔ཞེས་གསུངས་པས། དེ་ཡང་གཙང་མྱང་སྟོད་འོད་དཀར་རམ་འཇང་ཕད་ཁུད་དུ་གྲགས་པར་ཡབ་ཀུན་བཟང་བདེ་ཆེན་དང་། ཡུམ་མྱང་ས་གསལ་སྒྲོན་གཉིས་ཀྱི་སྲས་སུ་སྐུ་བལྟམས། ཆུང་ངུ་ནས་ངེས་འབྱུང་གིས་ཐུགས་རྒྱུད་བསྐུལ་བས་འཁོར་བའི་ཉེས་དམིགས་དང་བསྐལ་པ་སྙིགས་དུས་ཀྱི་ལུང་བསྟན་མགུར་དུ་གསུངས། དགུང་ལོ་བཅོ་ལྔར་རྒྱལ་རྩེའི་དུས་སྟོན་ལ་བྱོན་པས་དཔོན་པོ་སྒྲ་ཆེན་པས་དབང་མེད་དུ་བཀུག །རྗེ་ལྷོ་བྲག་མར་པ་ཨོ་རྒྱན་དངོས་སུ་བསྟན་པས་དེའི་གཟུང་མ་མཚོ་རྒྱལ་གྱི་སྤྲུལ་པ་ཡུམ་བདག་མེད་མ་དངོས་ཡིན་པར་མཁྱེན་ཏེ། སྟག་ཤམ་པའི་གཏེར་བྱོན་མཚོ་རྒྱལ་གྱི་རྣམ་ཐར་དུ་དཔལ་ཨོ་རྒྱན་ཆེན་པོས༔ང་ཡི་སྤྲུལ་པ་མར་པ་ལོ་ཙཱར་གྲགས༔མཚོ་རྒྱལ་སྤྲུལ་པ་བདག་མེད་མ་ཞེས་འབྱུང༔མི་ལ་ཞེས་བྱས་དཀའ་སྤྱད་གྲུབ་པ་ཐོབ༔ཅེས་གསུངས། རྗེ་མི་ལ་རས་པས་ཐུགས་རྒྱུད་བསྐུལ་ཏེ་འཁོར་བའི་སྡུག་བསྔལ་གྱིས་མནར། སྐུ་ཚེའི་དུས་བྱས་པས་དུར་ཁྲོད་ནས་རང་ལོག་ཏུ་བྱུང་། སླར་ཁྱིམ་དུ་ཕེབས། ཡབ་ཡུམ་གཉིས་ཀྱི་སར་ཡུམ་སྲས་གཉིས་ཕེབས་ནས་ཐགས་རར་ཐགས་ལ་བརྟེན་པའི་གདམས་པ་མགུར་དུ་བཞེས་ཏེ་ཡབ་ཡུམ་གཉིས་ལ་ཆོས་ཕྱིར་དགོངས་ཞུ་མཛད་པས། འདོད་དུ་མ་སྟེར། དེའི་ནུབ་མོ་སེ་བྲག་ཏུ་ཕེབས་ནས་བླ་མ་གཡུང་སྟོན་ཤཱཀྱ་རྒྱལ་མཚན་བྱ་བ་ཕྱག་རྫོགས་ཀྱི་བསྟན་པའི་བདག་པོའི་དྲུང་དུ་སྐྱོ་ཤས་ཀྱི་སྨྲེ་སྔགས་ཀྱི་སྒོ་ནས་གཙུག་ཕུད་ཕུལ་ཏེ་དམ་པའི་ཆོས་སྒོར་ཞུགས། གདམས་པའི་དོན་ལ་ཞུ་བ་དང་ཞུ་ལན་གྱི་སྒོ་ནས་མགུར་དུ་གསུང་སྟེ་སྒྲུབ་པ་ལ་བཞུགས། དེར་དཔོན་སྒྲ་ཆེན་པས་ཆོས་མཛད་པ་ལ་བར་གཅོད་ཀྱི་དམག་འཁྲུག་ལ་དམག་དཔུང་གི་དཀྱིལ་དུ་བྱོན་ནས་རྟ་མཐུར་ནས་བཟུང་སྟེ་འཁོར་བའི་ཉེས་དམིགས་ཀྱི་གདམས་པ་མགུར་དུ་གསུངས་པས་སྒྲ་ཆེན་ཡང་འགྱོད་དེ་ཡོ་བྱད་ཚང་མ་བླ་མ་ལ་ཕུལ་ནས་འགྱོད་བཤགས་མཛད་དེ་སྐྱབས་འགྲོའི་སྒོམ་ལུང་ཞུས་ཤིང་རང་གནས་སུ་བྱོན། དེ་ནས་བཟུང་བློ་ཁ་ཆོས་སུ་འགྱུར་ཞིང་ཡུམ་དང་རང་སྲས་མཇལ་འཕྲད་མཛད་དེ་མཐར་སྐུ་མི་མངོན་དབྱིངས་སུ་འོད་ཕུང་དུ་གཤེགས་སོ། །དེའི་འོག་ཏུ་ཐུགས་སྤྲུལ་ཀོང་མོ་སིད་དྷིར་གྲགས་པ་ནི། པད་གླིང་གཏེར་བྱོན་རྣམ་ཐར་ལས། ཐུགས་ཀྱི་སྤྲུལ་པ་དཀོན་མཆོག་གསུམ་གྱིས་མངའ་གསོལ་བ༔འབྲེལ་ཚད་དོན་དང་ལྡན་པ་གཅིག་ཤར་ཕྱོགས་ཀོང་པོའི་ཡུལ་དུ་འབྱུང༔ཞེས་གསུངས་པ་གསལ་བར་རྟོགས་དཀའ་ཡང་རཏྣ་གླིང་པ་སོགས་ཀྱི་གཏེར་ལུང་འགའ་རེར་ཀོང་མོ་སིད་དྷིའི་མཚན་ཅན་དུ་འབྱུང་གྱུར་བཞིན་དེས་ཐ་མལ་གྱི་སྣང་སྤྱོད་ཀྱིས་ཟག་མེད་ཏིང་འཛིན་ལ་མངའ་བརྙེས་པའི་མ་གཅིག་ཇོ་མོ་ལྟ་བུའི་སྐུ་ལུས་ཀྱི་འབྲེལ་བས་འགྲོ་བ་རྣམས་མཁའ་སྤྱོད་དུ་འདྲེན་པར་བཤད་དོ། །དེའི་འོག་ཏུ་ཡོན་ཏན་གྱི་སྤྲུལ་པ་ཟུར་མོ་དགེ་བ་འབུམ་མམ་མཁས་བཙུན་སངས་རྒྱས་ནི། པད་གླིང་གཏེར་བྱོན་རྣམ་ཐར་ལས། ཁྱོད་ཀྱི་ཡོན་ཏན་གྱི་སྤྲུལ་པ་མཐོང་བས་དོན་ཡོད་པ་རིགས་ལྔས་མངའ་གསོལ་བའི་ངང་རྒྱུད་ཅན་གཅིག་ལྷོ་ནུབ་མཚམས་སུ་འབྱུང༔ཞེས་བསམ་ཡས་ནས་བརྩིས་པའི་ལྷོ་ནུབ་ཅེས་ཕྱོགས་ཙམ་དུ་ལུང་བསྟན་པའི་དོན། དེ་ཡང་དངོས་སུ་རྣམ་ཐར་སོགས་སྔར་ཕན་མ་མཇལ་ཡང་གཙང་ཟུར་འུག་པ་ལུང་པའི་གདུང་འཁྲུལ་མེད་ཟུར་སྟོན་བྱམས་པ་སེང་གེའི་སྲས་སུ་སྐུ་བལྟམས། ཆུང་ངུ་ནས་སྦྱངས་པའི་ཏིང་འཛིན་གྱིས་ཐུགས་རྒྱུད་བལྟམས་པའི་བག་ཆགས་བཟང་པོ་མངའ་བས་རྫོགས་པ་ཆེན་པོ་སེང་སྡེ་མྱང་ལུགས་ཀྱི་བསྟན་པའི་བདག་པོར་གྱུར་ཅིང་མ་གཅིག་ཟུར་མོ་ཞེས་ཕྱོགས་ཐམས་ཅད་རྫོགས་པ་ཆེན་པོའི་གྲགས་པས་ཁྱབ་པར་མཛད་པ་ཡིན་ཏེ། སེང་སྡེ་མྱང་ལུགས་ཀྱི་བརྒྱུད་པའི་གསོལ་འདེབས་ལས་ཀྱང་། སྦྱངས་པ་མཐར་ཕྱིན་ཏིང་འཛིན་གདེངས་དང་ལྡན། འཁོར་བའི་སྐྱོན་སྤངས་རང་བཞིན་རྣལ་འབྱོར་མ། །མ་གཅིག་ཟུར་མོ་མཁས་བཙུན་སངས་རྒྱས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པ་བཞིན་ནོ། །དེར་མ་ཟད་མཁས་དབང་ཨཱ་ནན་ཏཱ་མ་ཏིས་གཏེར་ཆེན་རིན་པོ་ཆེའི་བཀའ་ལས། རྒྱ་གར་དུ་བྲམ་ཟེ་མ་གཟུགས་ཀྱི་ཉི་མ། གྲུབ་ཐོབ་ཀུ་ཀུ་རི་པ། མཁའ་འགྲོ་མ་སུ་ཁ་སིད་དྷི་སོགས་དང་། རྗེ་བླ་མའི་གསུངས་ལས་ཀྱང་མི་ལ་རས་པའི་དྲུང་དུ་རས་པ་ཞི་བ་འོད་དང་། ཀུན་མཁྱེན་དྲི་མེད་འོད་ཟེར་གྱི་དྲུང་དུ་གཞོན་ནུ་སངས་རྒྱས། གསང་བདག་འཕྲིན་ལས་ལྷུན་གྲུབ་ཀྱི་དྲུང་དུ་དམ་པ་ཀློང་ཡངས་འོད་གསལ། དེའི་ཡང་སྤྲུལ་ཞིག་ཀྱང་ད་ལྟ་ངེད་རང་གི་འཁོར་གྱི་ཚུལ་དུ་ཡོད་ཅེས་གསུངས་པས། དེས་ན་བདག་ཅག་གི་སྟོན་པས་ཕལ་པོ་ཆེར་ཆེ་ཆུང་མ་ངེས་པའི་སྤྲུལ་པ་མཐའ་ཡས་པས་འགྲོ་བ་འདུལ་བར་ལུང་གིས་བསྟན་པ་བཞིན་མཐའ་གཅིག་ཏུ་བཀག་པ་མེད་དོ། །དེའི་འོག་ཏུ་པད་གླིང་གཏེར་བྱོན་རྣམ་ཐར་ལས། རྗེ་ཉིད་འཕྲིན་ལས་ཀྱི་སྤྲུལ་པར་གོང་དུ་བསྟན་པ་ལྟར་དང་། ཁྱད་པར་རང་གཏེར་ཤ་འུག་གཏེར་བྱོན་གབ་བརྒྱའི་ལུང་བྱང་དུམ་བུ་གཉིས་པ་ལས་ཀྱང་། མ་འོངས་བསྐལ་པའི་ཡང་མཐའ་ལ༔གསང་སྔགས་བསྟན་པ་སྐྱོང་བའི་གཙོ༔ད་ལྟའི་བུད་མེད་མཚོ་རྒྱལ་གྱི༔འཕྲིན་ལས་སྤྲུལ་པ་སྒྲོན་མའི་མིང༔ས་ཁམས་ཡོས་ཀྱི་ལོ་མ་ནི༔པད་ཅན་བདེ་ཆེན་ཌཱཀི་མ༔བསླབ་གསུམ་ནོར་བུས་རྒྱུད་བལྟམས་པའི༔རབ་བྱུང་ཆ་བྱད་བརྟུལ་ཞུགས་ཅན༔ལས་ཅན་སློབ་མ་མང་དུ་འདུ༔ཕྱིར་མི་ལྡོག་པ་འགའ་ཡང་འབྱུང་༔རང་བཞིན་དབྱིངས་ཀྱི་རྒྱུད་བལྟམསཔའི༔གནས་ལུགས་དོན་གྱི་མཁའ་འགྲོ་མ༔གཡོ་རུ་གྲྭ་ཡི་ཕྱོགས་སུ་འབྱུང༔ཞེས་ལུང་བསྟན་པ་བཞིན་བདག་ཅག་གི་རྣམ་འདྲེན་བླ་མ་བདེ་ཆེན་མཁའ་འགྲོའི་གཙོ་མོ་དམ་པ་འདི་ཉིད་དུ་སྐུ་འཕོས་པ་ཡིན་ནོ།། །།

སྐུ་ཚེ་འདིའི་མཛད་པ་སྤྲོས་ཏེ་བཤད་པ།

དམ་པའི་རིགས་སུ་འཁྲུངས་ཤིང་ཆོས་ལ་ཐོས་བསམ་གནང་བ།

ན་མོ་གུ་རུ་ཀྵ་ར་ཤྲཱི་དཱི་པ་ཡེ། །ངོ་བོ་མི༵་འགྱུར༵་ཆོས་དབྱིངས་རྣམ་དག་ལས། །རང་བཞིན་འགག་མེད་དཔ༵ལ་གྱི་སྒྲོན༵་མའི་སྐུ། །ཐུགས་རྗེས་འགྲོ་རྣམས་སྒྲོལ་བའི་དེད་དཔོན་མཆོག །སྐུ་གསུམ་དོན་གྱི་བླ་མར་སྙིང་ནས་འདུད། །མཁའ་ཀློང་རྣམ་དག་ཆོས་དབྱིངས་འོག་མིན་ཞིང་། །མི་ཟད་གཞོམ་མེད་སྐུ་ཡི་རྣམ་འགྱུར་གྱི། །འགྲོ་ཀུན་རྡོ་རྗེའི་གར་གྱིས་འཁྲིད་མཛད་པའི། །རྣམ་ཀུན་མཆོག་ལྡན་མི༵་འགྱུར༵་དཔ༵ལ་སྒྲོན༵་རྒྱལ། །གདོད་ནས་གཞིར་རྫོགས་བདེ་གསང་འཁྱིལ་བའི་དབྱིངས། །མི་འགྱུར་རྡོ་རྗེའི་ངོ་བོར་ལྷུན་གྲུབ་པ། །རིགས་རྣམས་ཀུན་བདག་དཔལ་གྱི་སྒྲོན་མ་མཆོག །ཁྱབ་བདག་བླ་མའི་མཛད་ཚུལ་ཅུང་ཟད་བྲི། །ད་ནི་ཞིང་འདིའི་མཛད་པའི་ཚུལ་ཆ་ཙམ་བརྗོད་ན། དེ་ལ་བདག་ཉིད་ཆེན་མོ་འདིའི་སྐུ་བལྟམས་པའི་ཡུལ་ནི་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་འདི་ནས་བརྩིས་པའི་ལྷོ་ཕྱོགས་གཡོར་པོའི་ཆ་སྔར་ཀླུ་མེས་ཚུལ་ཁྲིམས་ཤེས་རབ་ཀྱི་གདན་ས་གྲ་ཕྱི་ཐར་པ་གླིང་ཞེས་དཔལ་ཨོ་རྒྱན་ཆེན་པོས་བྱིན་གྱིས་བརླབས་ཤིང་ལུང་བསྟན། བོད་ཡུལ་དགེ་བའི་བསྟི་གནས་གསང་ཆེན་རྡོ་རྗེ་ཐེག་མཆོག་གི་འབྲས་བུ་སྨིན་པའི་སར་གྱུར་པ་དེང་དུས་འོག་མིན་ཨོ་རྒྱན་སྨིན་གྲོལ་གླིང་ཞེས་ཡོངས་སུ་གྲགས་པའི་དགའ་བའི་ཚལ་ཆེན་པོ་སྟེ། དེ་ལ་སྐུ་སྐྱེད་པའི་ཡབ་ནི་ལོ་ཙཱ་ཆེན་པོ་བེ་རོ་ཙཱ་ནའི་སྐུའི་སྤྲུལ་པ་དཔལ་ལྡན་མཐིང་མ་སྨྱོས་ཀྱི་གདུང་འཁྲུལ་མེད་འགྲོ་འདུལ་རིག་པ་འཛིན་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དང་། ཡུམ་ནི་ཡར་རྒྱབ་ཆོས་རྒྱལ་གྱི་གདུང་རབས་འཕྱུགས་མེད་གྲྭ་ལྡུམ་པོ་བ་དང་གཉིས་སུ་མེད་པ་གྲྭ་ཕྱི་ཕུན་ཚོགས་རབ་བརྟན་པའི་ལྕམ་ཕུན་ཚོགས་དཔལ་འཛོམས་ཞེས་ཐུགས་ཐིག་གི་ལུང་བྱང་དུ། ཁྲོམ་པ་རྒྱན་སྤྲུལ་སྟག་བྱི་གླང་གི་ལོ༔རིགས་བཟང་ཁུངས་བཙུན་ཕྱག་རྒྱ་རྣམ་པ་ལྔ༔གསང་བ་སྔགས་ཀྱི་ཉམས་རྟོགས་ཇེ་ཆེར་སྤེལ༔ཞེས་པས་དགུང་སྙིང་བྱི་ལོ་མ་ཡིན་པ་དང་། གཟིགས་སྣང་ཆུ་ཟླའི་རོལ་རྩེད་དུ་རྗེ་གཏེར་ཆེན་བླ་མ་དང་། རྗེ་བཙུན་རྡོ་རྗེ་རྣལ་འབྱོར་གཉིས་མཇལ་དུས་རྣལ་འབྱོར་མའི་གསུང་གིས། ངའི་སྤྲུལ་པ་བཅོ་ལྔ་ཡོད། ལ་ལས་ནད་སེལ། ལ་ལས་བུ་ནོར་བསྐྱེད། ལ་ལས་ཚེ་བསྲིང་། ལ་ལས་གཏེར་འབྱིན་པའི་གྲོགས་བྱེད་པ་ཡིན་ཞེས་པས་བུ་ནོར་བསྐྱེད་པར་ལུང་གིས་བསྟན་པ་ནི་རྒྱལ་ཡུམ་འདི་ཉིད་ཡིན་ཏེ། དེ་ལྟར་ཡབ་ཡུམ་དེ་གཉིས་ལ་སྲས་གསུམ་དང་སྲས་མོ་བཞི་སྟེ་ལྕམ་སྲིང་བདུན་འཁྲུངས་པ་ལས་དམ་པ་འདི་བཞི་པ་ཡིན། དེ་ཡང་ས་མོ་ཡོས་ཀྱི་ལོ་ཧོར་ཟླ་བཅུ་པའི་ཉེར་ལྔའི་ནུབ་ཌཱ་ཀི་འདུ་བའི་དུས་ཁྱད་པར་ཅན་ལ་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོའི་གཟིམ་ཆུང་བཀྲ་ཤིས་སྣང་བར་ངོ་མཚར་བའི་ལྟས་ཕུན་སུམ་ཚོགས་པ་དང་བཅས་བསྟན་འགྲོ་སྤྱི་དང་སྒོས་བདག་སོགས་གདུལ་བྱར་གྱུར་པའི་མཆོད་སྡོང་འགྲོ་འདྲེན་དམ་པར་རྗེ་བླ་མ་དམ་པ་བདེ་ཆེན་མཁའ་འགྲོའི་གཙོ་མོ་དམ་པ་འདི་ཉིད་སྐུ་བལྟམས་པ་ཡིན་ནོ། །དེ་ཡང་ཡབ་རྗེས་བརྒྱུད་འཛིན་འདི་ཉིད་དཀྱུས་མར་མི་ཡོང་བས་གཙང་སྦྲ་ལ་འབད་དགོས་གསུངས་པ་ལྟར་སྐུ་བལྟམས་མ་ཐག་པར་ལོ་ཆེན་དྷརྨ་ཤྲཱིས་མི་གཙང་བ་སེལ་བྱེད་ཁྲོ་བོ་སྨེ་བ་བརྩེགས་པའི་བྱབ་ཁྲུས་དང་། ནངས་པར་ཡབ་རྗེ་བླ་མ་གཏེར་ཆེན་ཉིད་ཀྱི་གཏེར་གསར་དྲག་དམར་གྱི་སྐུ་གསུང་ཐུགས་དབང་དང་། འཆི་མེད་ཡང་སྙིང་ཀུན་འདུས་ཀྱི་ཚེ་དབང་བཅས་སྩལ་བ་ཡིན་འདུག་གསུངས་། དེ་ལྟར་ཡུམ་གྱི་མངལ་ནས་བལྟམས་མ་ཐག་ཧཱུྃ་གི་སྒྲ་དང་ཅུང་ཟད་ཙོག་པུར་མཛད་དེ་བཞུགས་པར་ཡུམ་དང་ཞལ་ཏ་མ་སོགས་འཇིགས་ཆོམ་ཆོམ་བྱུང་ཞེས་ཡུམ་གྱི་ཞལ་ཏ་མ་ལྷ་སྐྱིད་དཔལ་འཛོམས་དང་གང་གི་གཟིམ་དཔོན་སྐུ་བལྟམས་མ་ཐག་ནས་མཛད་པའི་སྐལ་བཟང་ཅན་འགྱུར་མེད་ཆོས་སྒྲོན་སོགས་ནས་གསུངས་ཤིང་། དེ་ལྟར་ན་རྫོགས་པ་ཆེན་པོ་ཁྲེགས་ཆོད་ཀྱི་ཐུགས་ཉམས་རྗེས་སུ་འབྲང་བ་ཞིག་ཡིན་ནམ་སྙམ། དེ་ཡང་སྐུ་བལྟམས་པ་ནས་རིང་པོར་མི་ཐོགས་པར་སྐུ་སྐྱེད་ཆེ་ཞིང་རེས་ཞག་རེ་ཉིན་རེ་ཙམ་ནུ་ཞོ་མི་བཞེས་པར་བཞུགས་པ་དང་། དམ་པའི་ངང་ཚུལ་བཟང་པོ་དང་ལྡན་ཞིང་ཁྱད་པར་ཐུགས་དྲན་གྱིས་ཆོད་མ་ཆོད་ཙམ་ནས་སྤྱིར་སྐྱེས་བུ་དམ་པའི་རིགས་དང་། ཁྱད་པར་དཔལ་ཨོ་རྒྱན་ཆེན་པོ་དང་། ཀུན་མཁྱེན་དྲི་མེད་འོད་ཟེར། གསང་བདག་འཕྲིན་ལས་ལྷུན་གྲུབ་རྣམས་ཀྱི་སྐུ་རྟེན་མཇལ་དུས་ཐུན་མོང་མ་ཡིན་པའི་ངེས་ཤེས་རྩེ་གཅིག་པ་དང་། དེ་དག་གི་སྐུ་ལ་འབྲེལ་པ་སོགས་ཞབས་རིམ་པ་རྣམས་ཀྱིས་བསླབ་དོན་ཞུ་མི་དགོས་པའི་རྗེ་ཉིད་ཀྱིས་ངོས་འཛིན་མཛད་ཅིང་བྱིན་རླབས་ཞུ་བའི་ཚུལ་དང་། ཁྱད་པར་ད་ལྟའི་དུས་ནའང་སྐྱེ་བ་སྔོན་མའི་རྟེན་གྱི་ཚེ་ཀུན་མཁྱེན་ཀློང་ཆེན་རབ་འབྱམས་པའི་སློབ་མ་ཞིག་ཡིན་ནམ་སྙམ་པའི་བག་ཆགས་ཡིད་ཡུལ་དུ་གསལ་བ་ཞིག་འདུག་གསུངས། གཞོན་ནུ་རོལ་རྩེད་དུས་ཀྱང་བྱིས་པ་ཕལ་གྱི་སྤྱོད་ཡུལ་ལས་འདས་པའི་འཁོར་འདས་རུ་ཤན་དབྱེ་བའི་རྣམ་འགྱུར་དང་། རེས་སྐྱིལ་དཀྲུང་མཛད་ཅིང་མཉམ་བཞག་གིས་ལྟ་སྟངས་དང་། ཡང་སྐབས་ཤིག་སྒའི་གལ་ལྡེ་ཆུང་ངུ་གོས་ལྗང་གིས་རྒྱན་ལྡན་ཞིག་ཕྱག་བསྟར་གྱིས་བཟོ་བ་མཛད་དེ། གཟིམ་དཔོན་འགྱུར་མེད་ཆོས་སྒྲོན་ལ་གལ་ལྡེ་འདི་དྲུང་ཉེ་གནས་མ་དང་ངེད་རང་གཉིས་ནམ་ཞིག་མཐའ་འཁོབ་ཀྱི་ཡུལ་དུ་བྲོས་ནས་འགྲོ་དགོས་ཡོང་བས་དེ་དུས་ཀྱི་འཚོ་བ་བླུགས་པའི་སྣོད་བྱེད་པ་ཡིན་ཞེས་གཅེས་སུ་མཛད་པ་ནི་འཁོར་འདས་སྒྲིབ་མེད་གསལ་ལེར་གཟིགས་པའི་ལུང་ཐོག་བབས་སུ་གཏན་ལ་ཕེབས་པ་ཡིན་ཏེ། ཕྱིས་ཡབ་རྗེ་དག་ཞིང་དུ་གཤེགས་རྟིང་ཇུན་གར་ཇུ་རིགས་ཐུ་ཧོང་ཐའི་ཇིའི་དཔུང་གིས་སྙིང་པོའི་བསྟན་པ་མིང་མེད་དུ་བཅོམ་དུས་འབྲས་ལྗོངས་སུ་སྐུ་སྲོག་འཚོ་ཕྱིར་སྟབས་ཅག་གི་ཕེབས་དགོས་བྱུང་བ་དངོས་བསྟན་དང་། དེ་སོགས་ངེས་པའི་གཏན་ཚིགས་མང་ངོ་། །དེ་ཡང་སྔོན་གྱི་ཐུགས་སྨོན་ལམ་གྱི་འབྲས་བུ་དུས་སུ་སྨིན་པའི་མཐུ་ལས་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་དང་། ཡབ་སྲས་ཀྱི་འབྲེལ་པས་སྐྱེ་སྲིད་འདི་ལ་ཡབ་ཡུམ་ཆོ་རིགས་གཙང་ཞིང་ཕུན་སུམ་ཚོགས་པའི་སྲས་སུ་བལྟམས་ཏེ་ངེས་གསང་རྡོ་རྗེ་སྙིང་པོའི་སྲོག་འཛིན་པའི་གཉེན་པོར་གྱུར་ཅིང་སྐུ་ཆུང་ངུ་ནས་སྡོམ་གསུམ་འགལ་མེད་དུ་དྲིལ་ནས་བསྟན་འགྲོའི་དཔུང་གཉེན་དམ་པར་ལུང་གིས་ཟིན་ཅིང་གཏན་ལ་ཕེབས་པ་འདི་ནི་རྗེ་བླ་མ་ཉིད་ཀྱི་རྣམ་ཐར་གསོལ་འདེབས་ཞལ་གསུང་མ་ལས་ཀྱང་། ཚེ་རབས་སྔོན་མའི་ལེགས་བྱས་བཟང་པོའི་འབྲས། །ཚོགས་གཉིས་དྲོད་གཤེར་མཐུ་ཡིས་སྨིན་པ་ལས། །རིགས་ཀུན་ཁྱབ་བདག་གཏེར་ཆེན་བླ་མ་ཡིས། །སྲས་སུ་སྐྱེ་སྲིད་བཟུང་ལ་གསོལ་བ་འདེབས། །ཞེས་དང་། སྐྱབས་ཀུན་འདུས་པ་འགྲོ་འདུལ་བླ་མ་ཡིས། །མ་དག་རང་རྒྱུད་དྲ་མ་ལྕགས་ཀྱི་ཁམས། །སྡོམ་གསུམ་གསེར་འགྱུར་རྩི་ཡིས་ལེགས་བསྒྱུར་ནས། །ཟབ་མོའི་སྣོད་དུ་གཟིགས་ལ་གསོལ་བ་འདེབས། །ཞེས་རང་ཉིད་དམན་པའི་ཚུལ་གྱིས་བླ་མའི་བཀའ་དྲིན་ཁོ་ནའི་མཐུ་ལས་གྲུབ་པར་ཡིན་ཚུལ་གསུངས་ཀྱང་། གཏེར་ལུང་ལས་རང་བཞིན་དབྱིངས་ཀྱི་རྒྱུད་བལྟམས་པའི༔གནས་ལུགས་དོན་གྱི་མཁའ་འགྲོ་མ༔གཡོ་རུ་གྲྭ་ཡི་ཕྱོགས་སུ་འབྱུང་༔ཞེས་གསུངས་པའི་མངོན་བརྗོད་ཆེ་བར་མཛད་པ་ལྟར་རོ། །དེ་ནས་དགུང་ལོ་བཅུ་གཉིས་བཞེས་པ་ལྕག །ས་སྟག་ཟླ་བ་ལྔ་པའི་ཚེས་བཅུ་དཔལ་ཨོ་རྒྱན་གུ་རུ་མཚོ་སྐྱེས་རྡོ་རྗེ་ཐོད་ཕྲེང་རྩལ་གྱི་དུས་མཆོད་ཌཱ་ཀི་འདུ་བའི་དུས་ཚེས་ཁྱད་པར་ཅན་ལ་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོའི་གཟིམ་ཆུང་ཀུན་བཟང་ཕོ་བྲང་དུ་སྐུ་ལུས་བསྒྱུར་བར་མཛད་དེ། དེ་ཡང་དོན་གྱི་སླད་དུ་མཚན་ནས་སྨོས་ན། རང་བྱུང་གཞལ་མེད་རྡོ་རྗེའི་ཕོ་བྲང་གི་དབུས་སུ་མི་ཤིགས་གཞོམ་མེད་རྡོ་རྗེའི་ཁྲི་སྟེང་དུ་རང་གི་ཡབ་གསང་བདག་རྡོ་རྗེ་ཆོས་མིའི་ཟོལ་འཛིན་པ་འགྲོ་འདུལ་རིག་པ་འཛིན་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དཔལ་ཨོ་རྒྱན་རྡོ་རྗེ་འཆང་གི་སྐུར་བཞེངས་ཏེ་ཆོས་ཉིད་རྣལ་མ་ཤེས་རབ་ཀྱི་སྤུ་གྲིས་གཙུག་ཕུད་བཞེས་ཏེ་མཚན་མི་འགྱུར་དཔལ་གྱི་སྒྲོན་མར་གསོལ་ཞིང་རབ་ཏུ་གནས་པའི་མེ་ཏོག་འཐོར་བའི་ཚེ། འོག་མིན་ཡང་རྩེའི་རྒྱ་ཕིབས་ཀྱི་རྩེར་འཇའ་འོད་མདུང་ཚུགས་སུ་ཟུག་པ་ལ། དེར་གཏེར་ཆེན་ཉིད་སྐུ་ཅུང་ཟད་ངལ་བ་ཙམ་ཡོད་པ་ལ་ཕྱི་རོལ་ན་གནས་པ་མང་པོ་འཇའ་ཟུག་པ་མ་ལེགས། སྐུ་ཞབས་པད་མི་བརྟན་པ་ནི་མིན་ལས་ཆེ་ཞེས་གླེང་། དེ་དང་དུས་མཚུངས་པར་ཀུན་བཟང་ཕོ་བྲང་གི་སྦུག་ཏུ་གར་དབང་ཚེ་དཔག་མེད་ཀྱི་ཚེའི་དཀྱིལ་འཁོར་བཤམས་ཏེ་ཡོད་པའི་བུམ་ཆུ་སོར་ཞིང་ཁོལ་བའི་ཅུང་ཟད་ལུད་པ་ལ་ཡབ་རྗེའི་བཀའ་ལས་བུ་མོ་ཁྱོད་ལ་རེ་ཆེན་པོ་ཡོད་པས་སྙིང་པོའི་བསྟན་པ་འཛིན་པའི་རྟེན་འབྲེལ་གྱི་ལ་ཉེ་བཟང་། ད་མྱུར་དུ་ལོངས་ལ་བུམ་ཆུ་འཐུང་ཤོག །གསུང་ཞིང་སླར་ཡང་ཐང་སྟོང་པའི་གཏེར་བྱོན་གྱིས། དཔོན་སློབ་མི་འབྲལ་ལྷན་གཅིག་གནས། ཞེས་མེ་ཏོག་ཀྱང་འཐོར་བ་ཡིན་འདུག་གསུངས། དེ་ནས་ཡབ་རྗེའི་དྲུང་དུ་ཟབ་ཆོས་རིག་འཛིན་ཐུགས་ཐིག་གི་དཀྱིལ་འཁོར་དུ་དབང་བཞིའི་ཆུ་བོས་སྨིན་པར་མཛད་པ་ཡིན་ཏེ་རྣམ་ཐར་གསོལ་འདེབས་ཞལ་གསུང་མ་ལས་ཀྱང་། བཅུ་གཉིས་ལོར་སོན་ཁྱབ་བདག་བླ་མ་ཉིད། །མ་ཧཱ་གུ་རུ་པདྨ་ཐོད་ཕྲེང་གི། །སྐུར་བཞེངས་གང་གི་དཀྱིལ་འཁོར་ཆེར་བཅུག་ནས། །དབང་བཞིས་སྨིན་པར་མཛད་ལ་གསོལ་བ་འདེབས། །ཞེས་གསུངས། དེ་ཡང་ཁྱད་པར་གྲོལ་བྱེད་ཁྲིད་ཀྱི་རིམ་པ་རྣམས་སྔོན་འགྲོ་ཐུན་མོང་དང་ཐུན་མོང་མ་ཡིན་པ་ནས་བཟུང་རེ་རེ་ནས་རྟགས་ཐོན་དུ་སྒོམ་ཁྲིད་དུ་འདེབས་པར་མཛད་ཅིང་། དེ་དག་གི་དུས་ལྗགས་བཤད་འཁྱོར་བའི་ཚེ་ཡབ་རྗེས་དབུ་ལ་ཕྱག་གིས་བྱིལ་བྱིལ་མཛད་ཅིང་ཁྱོད་ལ་རེ་བ་ཆེན་པོ་ཡོད། གྲུབ་པ་ཕོ་མོ་མང་པོ་མཁའ་སྤྱོད་དུ་འཁྲིད་པ་ཡོད་པས་ཕའི་ངག་བརྒྱུད་ཀྱི་བདུད་རྩི་པདྨའི་གསུང་བཤད་རྣམས་མ་བརྗེད་པ་སྦྱོངས་ལ་མཐར་སྙིང་ལ་སིམ་པ་ཞིག་བྱེད་དགོས་ཞེས་གཞོན་ནུའི་མཉེས་རྫས་སྤྲོ་བྱེད་ཀྱི་བུ་རམ་དང་ཤིང་ཏོག་བཞེས་སྤྲོ་སོགས་ཀྱི་གནང་སྦྱིན་དང་། དེ་དག་མ་འཁྱོར་བའི་ཚེ་གཟིམ་དཔོན་ཨོ་རྒྱན་རྣམ་གྲོལ་གྱིས་ཞབས་འཕོངས་སར་སློའི་མར་བཙོས་པའི་ཞབས་ཏོག་སོགས་ན་ཚའི་སྡུག་བསྔལ་མ་དྲག་པོའང་བྱེད་རྒྱུ་ཡོད་ཅེས་གསུངས་པས། དེས་ན་ཆོས་ཉིད་ཀྱི་རྟོགས་པ་མངོན་དུ་བརྙེས་པའི་ཡེ་ཤེས་ཀྱི་ཌཱ་ཀི་དེ་ལྟ་བུ་ལའང་སྦྱོངས་གཅོད་ཀྱི་སྐུ་ངལ་དེ་ཙམ་བྱུང་ན་རང་ཅག་ཐ་མལ་པ་རྣམས་འཁོར་བ་ཁོ་ན་དང་དུ་ལེན་པ་བས་ད་རེས་ཐར་པའི་སྣ་ཟིན་ངེས་པའི་དམ་པའི་ཆོས་ལ་འབད་པ་འདོན་དགོས་འདུག་པས་རྗེས་འཇུག་རྣམས་ཀྱི་ཐུགས་ལ་ཆོངས་ཤིག །ཁྱད་པར་བསྐྱེད་རིམ་དང་རྫོགས་རིམ་ལ་ནན་ཏན་གྱི་ཞལ་ཏ་ཡང་ཡང་ཕེབས་ཏེ་ལམ་འདི་ཐོས་པས་མི་གྲོལ་བས་ངེས་པར་ནན་ཏན་སྒོམ་དགོས་ཞེས་གསུངས་ཏེ་རྣམ་ཐར་གསོལ་འདེབས་ཞལ་གསུང་མ་ལས། གྲོལ་བྱེད་རིམ་གཉིས་གདམས་པ་ཟབ་མོའི་གནད། །མ་ཚང་མེད་པར་བསྩལ་ལས་གསུང་གསང་གིས། །ལམ་འདི་ཐོས་པས་མི་གྲོལ་སྒོམས་ཤིག་ཅེས། །དབུགས་དབྱུང་ནན་ཏན་མཛད་ལ་གསོལ་བ་འདེབས། །ཞེས་གསུངས་པ་ལྟར་རོ། །དེ་ཡང་བསྐྱེད་རིམ་ལ་སྒོམ་པ་ནན་ཏན་མཛད་རྗེས་རྫོགས་རིམ་ལ་གཙོ་བོར་དྲིལ་བའི་སྐབས་ཤིག་ན་དམ་པ་འདི་ཉིད་སྔོན་གོམས་བག་ཆགས་ཤིན་ཏུ་བཟང་ཞིང་ཕུལ་དུ་བྱུང་བ་ཞིག་ཡིན་པས་དེ་དག་ལ་མ་ལྟོས་ཀྱང་། རྣམ་མང་འགྲོ་བའི་ས་བོན་དུ་དགོངས་ནས་གདམས་པ་འདི་སྐོར་ལ་ཡབ་རྗེ་ཐུགས་ཤིན་ཏུ་ངལ་བ་ཡོད་གཤིས་གཞི་ནས་བསྐྱེད་རིམ་རྫོགས་རིམ་པའི་གཞི་རྟེན་ཡིན་རུང་། ད་དུང་ཆེད་དུ་གཉེར་ནས་རྫོགས་རིམ་གྱི་སྐབས་ཞི་གནས་བཙལ་བ་ལྷག་མཐོང་བསྐྱེད་པ་ཟུང་འཇུག་ཏུ་བསྒོམས་པ་ཞེས་གཞུང་དུ་བཤད་པ་ལྟར། དེས་ན་ཞི་གནས་བཙལ་སྐབས་གཏེར་ཚིག་དང་ཁྲིད་ཡིག་ཏུ་མི་གསལ་བའི། རྗེ་བླ་མ་དམ་པ་འདི་ཉིད་ངག་གཅིག་པུར་ཆིག་བརྒྱུད་དུ་སྩལ་བའི་མན་ངག་ཁྱད་པར་ཅན། སྣ་རྩེའི་ཐིག་ལེ་དཀར་པོ་ལ་སེམས་འཛིན་པ། རྡོ་རྗེའི་བཟླས་པ་ལ་སེམས་འཛིན་པ། སྨིན་མཚམས་ཀྱི་ཐད་ཀའི་ནམ་མཁར་ཧཱུྃ་སྔོན་པོའམ་ཨ་ཡིག་དཀར་པོ་ལ་སེམས་འཛིན་པ། རླུང་གི་གྲངས་ལ་སེམས་འཛིན་པ། རླུང་འགྲོ་འོང་ལ་སེམས་འཛིན་པ། སྣ་རྩེའི་ཐིག་ལེ་དཀར་པོ་འགྲོ་འོང་ལ་སེམས་འཛིན་པ། རླུང་བུམ་ཅན་སྦྱོར་བ་བཞི་ལྡན་ལ་སེམས་འཛིན་པ། སྣ་རྩེ་ཐིག་ལེ་དམར་པོ་འགྲོ་འོང་ཁྱད་ཆོས་གཉིས་ལྡན་ལ་སེམས་འཛིན་པ། དེ་ལྟར་ཁྱད་ཆོས་ཀྱི་མན་ངག་ཟབ་མོ་རྗེ་བླ་མ་བདེ་ཆེན་ཌཱ་ཀིའི་གཙོ་མོའི་ཞལ་ལུང་གྲ་ཟུར་མ་ཉམས་པ་ཀ་དག་གི་ཁྲིད་ཡིག་ནས་རིག་འཛིན་ཞལ་ལུང་ཟུར་དུ་ཁོ་བོས་བྲིས་པ་བཞིན་བཀའ་སྩལ་བ་ལྟར་ཡིན་ཞིང་། དེ་ལྟར་དང་པོ་ཞི་གནས་ཀྱི་རྒྱུ་ཉམས་ལྔའི་རིམ་པ་སྟེ། བི་མ་ལས་ཕྱག་རྒྱ་བསམ་གཏན་གྱི་འགྲེལ་པར། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །རི་གཟར་ཆུ་དང་རྩི་ཏི་མོ། །རྒན་པོ་སྦུགས་ཀྱི་ཆུ་དང་ནི། །རི་བོ་ལྟ་བུའི་དཔེ་ལྔས་བསྟན། །ཞེས་བཤད་པ་ལྟར་ཐུགས་ཉམས་སུ་འཁྲུངས་ཏེ། དེ་ཡང་ལྷག་མཐོང་རིག་བྱ་གསལ་རིག་དང་ཟུང་འཇུག་བདེ་ཆེན་སྤྲོས་བྲལ་མི་འགྱུར་བ་ཀ་དག་དེ་ཁོ་ན་ཉིད་དུ་འབྱམས་སུ་བཀླས་པའི་རང་རིག་གཞི་དབྱིངས་རྫོགས་པ་ཆེན་པོའི་ཀློང་དུ་འཕོ་འགྱུར་མེད་པའི་དོན་ལ་ངེས་ཤེས་ཁྱད་པར་ཅན་གྱི་གཏན་པ་རང་བློ་དང་འཚམས་པ་ཐོབ་པའི་བཀའ་དྲིན་ཕུལ་དུ་བྱུང་བ་ཡིན་གསུངས་ཏེ་རྣམ་ཐར་གསོལ་འདེབས་ཞལ་གསུང་མ་ལས། སྦྱངས་སྐྱེའི་ཤེས་རབ་བརྩོན་འགྲུས་མི་ལྡན་ཡང་། །དམ་པའི་བྱིན་རླབས་སྙིང་ལ་ཞུགས་པའི་མཐུས། །གང་བསྒོམས་བསྐྱེད་དང་རྫོགས་པའི་གསལ་སྣང་དག །མ་འགགས་འཆར་སྒོ་བདེ་ལ་གསོལ་བ་འདེབས། །ཞེས་པས་བསྐྱེད་རྫོགས་ཀྱི་འཆར་སྒོ་མ་འགགས་པའི་གསལ་སྣང་འཛིན་མེད་བདེ་བ་ཆེན་པོར་འཆར་ཞིང་། དེ་ཉིད་ཀྱང་རྣམ་འགྱུར་གློ་བུར་བའི་རྐྱེན་གྱིས་མི་འཕྲོག་པའི་རྣམ་ཀུན་མཆོག་ལྡན་གྱི་སྟོང་པའི་ཡེ་ཤེས་ཀྱི་འཁོར་ལོ་མི་གཡོ་བའི་གསལ་སྣང་བརྟན་པོར་ཞལ་གྱིས་བཞེས་པ་ཡིན་ཏེ། རྣམ་ཐར་གསོལ་འདེབས་ཞལ་གསུངས་མ་ལས། དབེན་རིར་བསྐྱེད་རྫོགས་བསྒོམས་པའི་ཉམས་ལེན་གནད། །མ་སྨད་སྙིད་སྟོབས་མཆོག་གིས་ལེགས་བསྐྱངས་པས། །ངོ་མཚར་མཚན་མའི་ངེས་པ་མ་ཐོབ་ཀྱང་། །ཏིང་འཛིན་བརྟན་པར་གྱུར་ལ་གསོལ་བ་འདེབས། །ཞེས་གསུངས་ཤིང་གང་ལྟར་ཡང་མཐར་གདམས་པ་དེ་ཉིད་ཀྱི་ཐོད་རྒལ་གྱི་མན་ངག་དང་། བཙན་ཐབས་འཕོ་བའི་མན་ངག་སོགས་ཀྱང་ཉམས་ཁྲིད་དུ་བསྩལ་ཞིང་། དེ་དག་གི་རྒྱབ་རྟེན་ལུང་དང་བཀའ་སྲུང་གི་སྲོག་གཏད་ཀྱང་བཀའ་དྲིན་དུ་བསྩལ་ཅིང་། དེ་རྗེས་ཀླུ་སྡིངས་ལྷ་དབང་དགའ་ཚལ་གྱི་གཟིམ་སྤྱིལ་འཆི་མེད་བདེ་ཆེན་དུ་ལོ་ངོ་གཅིག་གི་བར་བསམ་གཏན་ལ་ཆིག་སྒྲིལ་དུ་གོམས་པར་བྱས་པ་ཡིན་གསུངས། དེ་ནས་དགུང་ལོ་བཅུ་གསུམ་བཞེས་པ་ལྕགས་ཡོས་ཟླ་བ་གསུམ་པའི་ནང་དུ་བཅད་རྒྱ་གྲོལ་བསྟུན་ཡབ་རྗེ་བླ་མ་དམ་པའི་ཞབས་དྲུང་དུ་གཏེར་གསར་ཨ་ཏི་ཟབ་དོན་སྙིང་པོའི་གདམས་པ་ལྷག་མེད་དུ་ཟླ་བ་བཞིར་ཉེ་བའི་བར་དམ་པ་འདི་ཉིད་ལ་སྐུ་རྐྱང་དུ་བསྩལ་ཅིང་ཉམས་རྟོགས་ཀྱང་རང་རྒྱུད་ལ་རང་བློ་དང་འཚམས་པའི་བརྟན་པ་ཐོབ་པའི་ངེས་ཤེས་དང་། ཁྱད་པར་ཐོད་རྒལ་དུས་རིག་པ་ཚད་ཕེབས་ཀྱི་སྣང་ཆ་རྫོགས་ཉེའི་འཆར་སྒོ་ལ་ཡབ་རྗེའི་ཞལ་ནས། བུ་མོ་ཁྱོད་གཏེར་ལུང་ནས་བཤད་པ་བཞིན་ཁྱོད་རང་གི་སྔོན་མའི་བག་ཆགས་རྗེས་སུ་འབྲང་བའི་ཚད་དང་ལྡན་པ་ཞིག་འདུག །ད་རེ་ཞིག་སྒོམ་ཁང་དུ་ཟླ་ཤས་ནན་ཏན་སྒོམས་ཤིག །དེ་རྗེས་རྡོར་སེམས་དང་ཟབ་ལམ་བདེ་གཤེགས་ཀུན་འདུས་ཀྱི་གདམས་ཁྲིད་སྨིན་པར་འདེབས་དགོས་འདུག་ཅེས་བསྩལ་བས་ཟླ་བ་ལྔར་ཉེ་བའི་བར་ཨ་དོན་ལ་ནན་ཏན་བྱས་པ་ཡིན་གསུངས། དེ་གྲོལ་བསྟུན་གཏེར་གསར་རྡོར་སེམས་ཐུགས་ཀྱི་སྒྲུབ་པའི་རྩ་ཁྲིད་ཡན་ལག་དང་བཅས་པ་དང་རྒྱབ་རྟེན་ལུང་དང་བཀའ་སྲུང་གི་སྲོག་གཏད་སོགས་ཀྱང་རྫོགས་པར་བསྩལ་ལོ། །དེ་ནས་དགུང་ལོ་བཅུ་བཞི་བཞེས་པ་ཆུ་འབྲུག་ཟླ་བ་གཉིས་པའི་ནང་དུ་རང་གི་ཡབ་གསང་བདག་རྡོ་རྗེ་ཆོས་མིའི་ཟོལ་འཛིན་པ་པདྨ་གར་དབང་འགྱུར་མེད་རྡོ་རྗེ་རྩལ་གྱི་ཞབས་པད་དུ་རྗེ་བླ་མ་དམ་པ་དང་གང་གི་ཞབས་རིམ་དྲུང་ཉེ་གནས་མ་འགྱུར་མེད་ཆོས་སྒྲོན་དང་གསོལ་ཐབ་འགྱུར་མེད་གཡང་འཛོམ། དགེ་མཁན་གྲུབ་པ་མོ་སྟེ་དཔོན་གཡོག་བཞིར་ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྤྲོས་བཅས་དང་། སྤྲོས་མེད་མཆོག་དབང་གོང་མ་གསུམ་དྲོད་རྟགས་གཏོར་མའི་དབང་དང་བཅས་པ་སོ་སོའི་སྐབས་ཐོབ་ཀྱི་སྨིན་པར་བསྩལ་ཅིང་གསང་མཚན་པདྨའི་དབང་ཕྱུག་ཏུ་སྩལ་ལོ། །ཁྱད་པར་རྩ་ཁྲིད་ཀྱི་བསྐྱེད་རྫོགས་ཀྱི་གདམས་པ་རྣམས་ལ་ཞིབ་བཤད་མཛད་དེ། ཐུན་རེ་བཞིན་རྫོགས་རྗེས་ཡབ་རྗེས་ལྗགས་བཤད་ཀྱི་རྒྱུགས་བཞེས་ཏེེ་ཟབ་ཁྲིད་ཀྱི་སྤྱི་གནད་དང་ཁྱད་པར་བའི་གདམས་པའི་དགོངས་དོན་མཐར་ཐུག་པ་རྣམས་བྱང་བར་སྦྱངས་ཤིང་གདམས་པ་འདི་ཉིད་ཀྱི་སྒོམ་པའི་གནད་ལ་མ་རྨོངས་པའི་སྨིན་གྲོལ་གྱི་དོན་ལ་ངེས་ཤེས་ཁྱད་པར་ཅན་སྐྱེས་ཤིང་བླ་མ་མཉེས་པར་སྒྲུབ་པའི་བཀའ་དྲིན་ཐོབ་པ་ཡིན་གསུངས། དེ་རྗེས་ཟབ་ལམ་རྩ་བའི་ཡན་ལག་དུམ་དུམ་ཁྲིགས་ཀྱི་སྐོར་རྣམས་དང་རྩ་པོད་ཀྱི་ལུང་དང་བཀའ་སྲུང་གི་རྗེས་གནང་སོགས་ཀྱང་ཞིབ་པར་སྩལ་ཅིང་། ཁྱད་པར་འཁྲུལ་འཁོར་དུས་དགེ་མཁན་གྲུབ་པ་མོས་གོང་ནས་སྦྱོང་མཐར་སོང་གཤིས་རྗེ་ཉིད་དང་དྲུང་ཉེ་གནས་མོས་བདེ་གཤེགས་ཀུན་འདུས་ཀྱི་འཁྲུལ་འཁོར་བསླབ་སྦྱོངས་མཛད་པས། སྨན་བརྗིད་དབུ་མཛད་གོང་དཀར་བ་གྲུབ་པ་མོས་ཕག་མོ་ཟབ་རྒྱ་དང་སྤེལ་མའི་འཁྲུལ་འཁོར་ཞིག་མཛད་དེ་ཤིན་ཏུ་གཏུམ་གཤིས་རྗེ་ཉིད་ལ་ཤ་གཅུས་དང་ཐལ་བཅག་བརྒྱབ་སྟེ་ངས་བསླབ་པའི་འཁྲུལ་འཁོར་མི་རྒྱག་པ་ཅི་ཡིན་ཟེར་ཕར་ཕར་མཛད་པ་ལ་རྗེ་ཉིད་ནས་འོ་ན་ཨ་ཁུ་ལགས་ཀྱིས་ནི་འདི་བཞིན་གནང་བྱུང་ཞེས་ངེས་འདྲོངས་གསུངས་ཀྱང་ཚད་འཛིན་མེད་པའི་རྡོག་ཐོ་བརྒྱབ་པ་ལ་སྤྱན་ཆབ་བསིལ་ཞིང་ཨ་ཁུ་ཕྱག་མཛོད་ཀུན་དགའ་ཚུལ་ཁྲིམས་རྒྱ་མཚོའི་ཞབས་པད་དུ་ཕེབས་ཏེ་དེ་ཚུལ་ཞུ་བར་མཛད་པས། དེར་ཅུང་ཟད་བཞད་ཅིང་ངེད་དཔོན་སློབ་རྣམས་གྲྭ་ནང་དུ་འཁྲུངས་གཤིས་སྤྲོས་ཙམ་བཞེས་ཀྱི་མེད། ཁྱེད་རང་དཔོན་གཡོག་གཉིས་གྲྭ་ཕྱིར་འཁྲུངས་གཤིས་སྤྲོས་ཙམ་བཞེས་པ་ཡིན་འདུག །ད་དགེ་སློང་གི་བུ་མོ་དཔོན་གཡོག་གཉིས་གཙུག་ལག་ཁང་དུ་མཁན་རིན་པོ་ཆེའི་སྐུ་དྲུང་དུ་ཕུལ་མཛོད། རྗེ་གཏེར་སྟོན་རིན་པོ་ཆེ་ནི་གདུང་པ་ལས་བུ་མོ་འདི་ལ་ཐུགས་རྩིས་ཆེ་བ་ཡོད་གསུང་སྟེ། དགེ་སློང་རབ་འཕེལ་གྱིས་ལོ་ཆེན་དྷརྨ་ཤྲཱིའི་ཞབས་པད་དུ་འཆི་མེད་འོད་སྣང་དུ་གདན་ཞུ་མཛད། དེ་ནས་ལོ་ཆེན་རིན་པོ་ཆེ་ནས་རྗེ་དམ་པ་དཔོན་གཡོག་གཉིས་ལ་ཟབ་ལམ་བདེ་བཤེགས་ཀུན་འདུས་ཀྱི་འཁྲུལ་འཁོར་གྱི་སྐུ་ལུས་ཀྱི་འགྱུར་དང་སྒོ་གནད་རྩ་རླུང་ཐིག་གསུམ་གྱི་མན་ངག་ཟླ་བ་གཉིས་སུ་ཉེ་བའི་བར་བསྩལ་བས་རྒྱུད་ཐོག་ཏུ་མ་རྨོངས་པར་དྲིལ་ཐུབ་པའི་བཀའ་དྲིན་ཐོབ་པ་ཡིན་གསུངས། དེའི་ཚེ་ལོ་ཆེན་གྱི་གསུང་ལས། གཏེར་སྟོན་དར་རྒྱས་ཆོས་སྡིངས་པའི་བརྒྱུད་པ་དེ་དགོས་པའི་བུས་ནི་མ་ཁྱེར་བར་འདུག །མི་དགོས་པའི་བུ་མོ་འདིས་ཁྱེར་འདུག་ད་མཇུག་བསྐྱངས་ཏེ་མ་བརྗེད་པ་མཛོད་གསུངས་དགྱེས་བཞིན་པ་མཛད། དེ་ཡང་སྤྱིར་མཁས་བཙུན་བཟང་གསུམ་འཛོམ་པ་ལ་དགེ་མཁན་བསྟེན་དགོས་པར་བཤད་ཀྱང་། ཇི་ལྟར་འཚམས་པའི་རྣམ་འགྱུར་ལས་ཤིན་ཏུ་གལ་ཆེས་ན་རྒྱུ་འབྲས་སྤང་བླང་གི་སྐབས་དགེ་བའི་སེམས་ཀྱིས་ཀུན་ནས་ཟིན་པའི་ལས་ཁོ་ན་ཡིན་ན་རྣམ་སྨིན་ཡང་བདེ་བ་ཁོ་ན་སྟེར་བ་དང་གཞན་དུ་སྙན་གྲགས་འདོད་ནས་སྦྱིན་པ་གཏོང་བ་སོགས་བསམ་པ་གནག་ལ་སྦྱོར་བ་དཀར་བ་དང་ཕན་འདོད་ཀྱིས་བརྡེག་བརྡུངས་དང་མི་སྙན་པར་སྨྲ་བ་སོགས་བསམ་པ་དཀར་ལ་སྦྱོར་བ་གནག་པ་སྟེ། དེ་དག་གིས་ཀྱང་བདེ་སྡུག་སྤེལ་མར་བསྐྱེད་པར་བཤད་པ་ལྟར་བླང་དོར་གྱི་གནས་ལ་ཤེས་བཞིན་དུ་བག་ཡོད་ཀྱི་དྲན་ཤེས་བསྟེན་པ་གལ་ཆེ་སྟེ། དེའི་རྒྱུ་མཚན་ཡང་སྔོན་ལས་རྗེས་སུ་འབྲང་བ་དངོས་བསྟན་ལྟར་གྲུབ་པ་མོའང་སྐྱེ་བ་འདིའི་འོག་ཏུ་དོལ་ཁང་པ་རྒྱང་དུ་བུ་ཞིག་ཏུ་སྐྱེས་ཀྱང་རིག་པ་འདི་ཡིན་མེད་པའི་ཆ་མ་ཆོ་ཞིག་ཡོད་པར་གྲགས་སོ། །དེ་ནས་ཡང་གཙང་རྟ་ནག་ཕྱོགས་ནས་བྱུང་བའི་བཙུན་མ་ཁ་ཤས་དང་། སྨན་བརྗིད་ཀྱི་སྒོམ་མོ་ཁ་ཤས་བཅས་བསྡོམས་པ་ལ་ཨ་དོན་གྱི་ཟབ་ཁྲིད་རྒྱས་པར་གསུངས་པའི་སྐབས་ཤིག་ཡབ་རྗེའི་བཀའ་ལས། ཁྱེད་རང་རྟ་ནག་གི་བཙུན་མ་རྣམས་སྒོམ་ལ་ནན་ཏན་མཛོད་ཅིག །སླར་ཡང་ཁྱེད་རང་རྣམས་ཀྱི་བླ་ཚབ་ཏུ་ཁོ་བོའི་བུ་མོ་སྟེར་བ་ཡིན་གསུངས་རྗེས་དམ་པ་འདིའི་དབུ་ལ་ཕྱག་གིས་བྱིལ་བྱིལ་མཛད་ཅིང་། དེ་དག་གི་ཚེ་སྨན་བརྗིད་སྒོམ་མོ་རྣམས་ཀྱིས་གསོལ་འདེབས་ཀྱི་ངོར་རྗེ་དམ་པ་འདིའི་བརྟན་བཞུགས་གསོལ་འདེབས་བཀའ་སྩལ་མཛད་དེ། དེ་ཡང་རྡོ་རྗེའི་ཚིག་སྒྲོམ་ཆེ་བ་ཡིན་ཏེ། ཡེ་ཤེས་དབྱིངས་ལས་རྣམ་རོལ་སྒྱུ་མའི་གར། །གདུལ་བྱའི་ཉེར་མཚོར་ཤར་བ་སྤྲུལ་པའི་སྐུ། །མི༵་འགྱུར༵་བདེ་བའི་དཔ༵ལ་སྟེར་སྐལ་བཟང་གི། མུན་སེལ་སྒྲོན༵་མེ་རྟག་ཏུ་གསལ་བརྟན་གསོལ། །ཅེས་སྨན་བརྗིད་སྒོམ་མོ་རྣམས་ཀྱི་ངོར་འགྱུར་མེད་རྡོ་རྗེས་སོ། །ཞེས་བསྩལ་ཅིང་དེ་མ་ཐག་པར་ལུང་ཡང་གནང་ངོ་། །ཞེས་པའི་ཁྱད་འཕགས་ཀྱི་གདམས་པ་འདི་གསུང་འབུམ་དངོས་སུ་བཞུགས་པ་ཡིན་ཡང་ཆེར་མ་གྲགས་པ་ལ་ཕྱིས་ཤིག་ཁོ་བོ་སྨན་བརྗིད་དགོན་དུ་མང་སྐོལ་དུ་རྫོང་བདའ་གནང་སྐབས་ཕྱག་བྲིས་དངོས་ལས་ཞལ་བཤུས་ཏེ་ཕྱིས་ཀུན་ལ་གྲགས་པ་ལྟར་རོ། །དེ་སྐབས་ཁྱད་པར་ལོ་ཆེན་དྷརྨཱ་ཤྲཱི་ལ་གཏེར་ཆེན་རྗེས་བུ་མོ་ཆོས་དྲུང་དེ་ཡིས་མཁན་རིན་པོ་ཆེ་ནས་རིག་གནས་སོགས་རྒྱ་ཆེ་བ་དགོས་པ་མེད། ཕས་བཏབ་པའི་གདམས་པའི་ཉིང་ཁུ་རྣམས་ལ་ཡང་བསྐྱར་ནན་གཅགས་ཀྱི་སྐྱོར་མ་དང་། འདི་ཉིད་ཤེས་བློ་ལུང་ནས་བསྟན་པ་ལྟར་མཐའ་བྲལ་ཞིག་འདུག་པ་སླར་མཁན་རིན་པོ་ཆེ་འམ་བུ་ཆུང་བགྲེས་པ་གང་རིགས་ཀྱིས་སྙིང་པོའི་རྒྱུད་འབྲེལ་གདམས་པ་ཤེས་རྒྱུད་ལ་དཀྲི་ཐུབ་པ་ཞིག་མཛོད། མི་རིང་བར་ཕ་ལས་ལྷག་པའི་འགྲོ་དོན་ནམ་མཁའ་དང་མཉམ་པས་སྐྱེ་འགྲོ་མང་པོ་བདེ་ཆེན་གྱི་ཞིང་དུ་འཁྲིད་པ་ཡོད་ཅེས་བསྩལ། དེ་ལྟར་ཡབ་རྗེ་གཏེར་སྟོན་རིན་པོ་ཆེའི་སྐུ་དྲུང་དུ་དགུང་ལོ་བཅུ་དྲུག་ལས་མ་སོང་བས་སྐུ་ལུས་མ་བསྒྱུར་གོང་ནས་ཡབ་རྗེ་གཙོ་བོར་བསྟེན་ཏེ་རིམ་པར་གསན་པ་ལ། དྲེགས་པ་འཇོམ་བྱེད་ཀྱིས་མཚོན་ཡབ་རྗེའི་གཏེར་གསར་ཚང་མའི་དབང་ལུང་ཡབ་རྗེའི་གསུང་འབུམ་སྤོད་ཆེན་བཅུ་གསུམ་གྱི་ལུང་། མྱང་གཏེར་བཀའ་བརྒྱད་བདེ་གཤེགས་འདུས་པ་དང་། ཆོས་དབང་གི་ཕུར་པ་སྤུ་གྲིའི་དབང་ལུང་། བཀའ་བརྒྱད་ཀྱི་དབང་ལུང་། རྫོགས་འཕྲང་གི་དབང་ལུང་། གྲུབ་ཐོབ་འདར་ཕྱར་གྱི་རྟ་མགྲིན་གྱི་དབང་ལུང་། སྒྲུབ་ཐབས་འདོད་འཇོའི་བུམ་བཟང་དབང་ལུང་ཕྱག་ལེན་ཞིབ་སྤྱད། གཞན་ཡང་གྲུབ་ཐོབ་དངོས་གྲུབ་གླིང་པ་བཅུ་གཉིས་དྲི་མེད་གསུམ། བྱང་གཏེར་སྔ་ཕྱི་སོགས་གཏེར་སྟོན་གྲགས་ཆེ་བ་ཕལ་མོ་ཆེའི་གཏེར་ཆོས་ཀྱི་དབང་ལུང་། འདུས་པ་མདོའི་དབང་ལུང་། སྒྱུ་འཕྲུལ་ཞི་བ་དང་ཁྲོ་བོ། ན་རག་དོང་སྤྲུགས་རྣམས་ཀྱི་དབང་དང་སྒྲུབ་ཐབས་ཀྱི་ལུང་། མ་གཅིག་གཅོད་ཡུལ་གྱི་དབང་རྒྱས་པ་དང་། ནམ་མཁའ་སྒོ་འབྱེད་ཀྱི་ཁྲིད། སྟན་ཐོག་གཅིག་མ་དང་དཔའ་བོའི་གད་བརྒྱངས་ཀྱི་ཁྲིད། གཅོད་ཡུལ་ཟབ་མོ་དང་། མ་གཅིག་གི་མཛད་པའི་སྐོར་གྱི་ལུང་། བྱང་སྡོམ་དཀའ་འགྲེལ། གསང་བདག་འཕྲིན་ལས་ལྷུན་གྲུབ་ཀྱི་གཟིགས་སྣང་སྐོར། ཀུན་མཁྱེན་ལྔ་པའི་གཟིགས་སྣང་རྒྱ་ཅན་སྐོར་དང་། ལྷ་བཙུན་པའི་རིག་འཛིན་སྲོག་སྒྲུབ་སྐོར་སོགས་ཀྱི་དབང་ལུང་རྣམས་བསྩལ་ཅིང་། ཁྱད་པར་སེམས་སྡེ་ཀློང་སྡེ་གཉིས་ཀྱི་དབང་ཁྲིད་ལུང་དང་། དེའི་ནང་ནས་མན་ངག་གི་སྡེ་ལ་རིམ་པ་མང་ཡང་། གཙོ་བོར་སྙིང་ཐིག་རྣམ་གཉིས། བི་མ་ལའི་ཁྱད་ཆོས་བི་མ་སྙིང་ཏིག་དང་བླ་མ་ཡང་ཏིག་གཉིས་གོ་ཆུ་རུབ་ཏུ་མཛད་པའི་དཔལ་གསང་བ་སྙིང་ཏིག་མ་བུའི་དབང་དང་གདམས་ཁྲིད་ལུང་མཐར་བཀའ་གཏད་དང་། དེ་དག་གི་བཀའ་སྲུང་མ་གཟའ་རྡོར་གསུམ་གྱི་དབང་། པདྨའི་ཁྱད་ཆོས་མཁའ་འགྲོ་སྙིང་ཏིག་དང་མཁའ་འགྲོ་ཡང་ཏིག་གཉིས་ཀྱི་དབང་ཁྲིད་ལུང་བཀའ་གཏད་དང་བཀའ་སྲུང་གི་སྲོག་གཏད་བཅས་རྫོགས་པར་བསྩལ་བའི་རྗེས་སུ། ཟབ་ཆོས་ཆོས་ཀྱི་བདག་པོར་ལྷག་མེད་དུ་ཕུལ་ཡོད། དེས་ན་རྫོགས་ཆེན་སྡེ་གསུམ་པོ་ནན་ཏན་དུ་སྒོམ་དགོས། མ་འོངས་པ་ན་གཞན་ལ་འཆད་དགོས་པས་ཁྱོད་ལ་རེ་བ་ཆེན་པོ་ཡོད་ཅེས་མངའ་གསོལ་མཛད་དེ་དེ་མ་ཐག་པར་ན་བཟའ་བཅའ་རྗེས་དང་དབུ་ཞྭ་པདྨ་ཁ་འབུས་སྒྲོན་པར་མཛད་དེ་མཚན་འགྲོ་འདུལ་རྡོ་རྗེ་སྙིང་པོ་ཞེས་བསྩལ་ཏེ་ཡབ་རྗེའི་སྐུ་བརྙན་གཟུངས་རྫོང་ཕྱག་བསྟར་དང་རབ་གནས་བྱིན་ཅན་མ་རྟེན་དུ་བསྩལ་ནས་གཅེས་པར་བརྩེ་བས་བསྐྱངས་པ་ཡིན་གསུངས་ཏེ་གང་གི་བཀའ་ལས། དམ་པའི་གསུང་གིས་རྫོགས་ཆེན་སྡེ་གསུམ་པོ། །ནན་ཏན་སྒོམ་ལ་གཞན་ལ་འཆད་ནུས་པ། །དགོས་ཏེ་མ་འོངས་ཁྱེད་ལ་རེ་ཆེ་ཞེས། །བཀའ་མཆིད་སྤྱི་བོར་ལྷུང་ལ་གསོལ་བ་འདེབས། །ཞེས་གསུངས་པ་ནི་དེང་སང་རྗེ་བླ་མ་དམ་པའི་ཞལ་དངོས་སུ་མཇལ་མི་མང་ཞིང་ཞལ་སློབ་ཀྱིས་ཀྱང་དབུས་གཙང་མངའ་རིས་ལྷོ་མོན་དང་ཀོང་ཁམས་སྟོད་སྨད་བར་གསུམ་སོགས་ལ་མ་ཁྱབ་པ་མེད་པ་ནི་ཀུན་གྲགས་ཀྱིས་གཏན་ལ་ཕེབས་པ་འདིའོ། །དེ་ནས་ཆུ་མོ་སྦྲུལ་ལོ་དགུང་ལོ་བཅོ་ལྔར་ཕེབས་དུས་ཤ་འུག་གཏེར་བྱོན་མཁའ་འགྲོའི་ཆོས་སྐོར་ཤོག་སེར་ལས་འབེབས་པར་མཛད་དེ་གཅེན་རྒྱལ་སྲས་པདྨ་འགྱུར་མེད་རྒྱ་མཚོར་དབང་ལུང་གཏད་རྒྱ་དང་བཅས་བསྩལ་ཅིང་། དེ་མ་ཐག་པར་དེའི་དབང་ལུང་རྣམས་རྗེ་ཉིད་ལ་གཅེན་རྒྱལ་སྲས་རིན་པོ་ཆེ་ནས་བསྩལ་ཅིང་། དེ་ཉིན་ནས་བཟུང་ཟབ་ཁྲིད་ཀྱི་གདམས་པ་ཡབ་རྗེས་ཞག་ལྔར་རྫོགས་པར་བསྩལ་བའི་བཀའ་དྲིན་ཐོབ་པ་ཡིན་གསུངས། དེ་ལྟར་ཡབ་རྗེ་ཞལ་བཞུགས་བར་དང་། དེ་རྗེས་ཞི་བའི་དབྱིངས་སུ་གཟུགས་སྐུའི་བཀོད་པ་བསྡུས་པ་ཧོར་དམག་མ་ཤོར་བར་ཕལ་ཆེར་སྐུ་བཅད་རྒྱ་དང་། དེའི་བར་སྐབས་ཅི་རིགས་པར་ལོ་ཆེན་དྷརྨ་ཤྲཱི་ལས་རབ་ཏུ་བྱུང་སྟེ་ཡབ་རྗེའི་གཏེར་གསར་ཡོངས་རྫོགས་ཀྱི་དབང་ཁྲིད་ལུང་དང་། དེའི་གསལ་བྱེད་ལོ་ཆེན་རིན་པོ་ཆེ་ནས་མཛད་པའི་སྐོར་ཡོངས་རྫོགས་ཀྱི་ལུང་། མ་གཅིག་གཅོད་ཡུལ་ཡོངས་རྫོགས་ཀྱི་དབང་ཁྲིད་ལུང་དང་། ཕྱག་ཆེན་གཱའུ་མའི་ཁྲིད། ན་རག་དོང་སྤྲུགས་ཀྱི་དབང་དོན་ཀྱི་ཁྲིད། སྤྱན་རས་གཟིགས་སྐུ་གསུམ་སྙིང་པོའི་དོན་ཁྲིད་དང་དབང་། དཔལ་མོ་ལུགས་ཀྱི་རྗེས་གནང་དང་སྒྲུབ་ཐབས་ཀྱི་ལུང་། འདོད་འཇོའི་བུམ་བཟང་གི་དབང་ཡོངས་རྫོགས། གཞན་ཡང་འདུས་པ་མདོའི་དབང་དང་མྱང་གཏེར་བཀའ་བརྒྱད་ཀྱི་དབང་སོགས་མང་པོ་གནང་། གཅེན་རྒྱལ་སྲས་པདྨ་འགྱུར་མེད་རྒྱ་མཚོ་ལས་ཀྱང་། ཨ་ཏིའི་རྩལ་དབང་། ཕྱག་རྡོར་དྲེགས་འདུལ་གཏེར་ཁ་གསུམ་ལྡན་གྱི་དབང་ལུང་། དུས་འཁོར་དང་། བདེ་ཀྱེ་གསང་བ་འདུས་པ་རྣམས་དང་། རྡོ་རྗེ་འཕྲེང་བ་རྣམས་ཀྱི་དབང་ལུང་། གཡུ་ཐོག་སྙིང་ཐིག་གི་དབང་ལུང་རྣམས་དང་། ཁྱད་པར་ཡབ་རྗེ་གཏེར་ཆེན་བླ་མའི་བཀའ་ལུང་བཞིན་སྙིང་པོའི་རྒྱུད་ཀྱི་འགྲེལ་པ་གསང་བདག་དགོངས་རྒྱན་ཐུགས་སུ་ཆུད་དེ་དཀའ་གནད་ཀྱི་གཞུང་དོན་ལྷུག་པར་བཀྲལ་བའི་ལྗགས་བཤད་དང་། ཕྱིས་སུའང་བར་སྐབས་སུ་བདུད་ཀྱི་ཟིལ་གྱིས་རྐྱེན་དབང་དུ་ཐལ་བ་འཚོ་བྱེད་འགྱུར་མེད་ལེགས་འབྱོར་ནས་ཞབས་ཕྱི་ཞུས་པའི་གཞུང་བཤད་རྣམས་བྱང་བར་སྦྱོངས་མཐར་དང་གཅེན་རཏྣ་བི་ཛ་ལས་ཀྱང་། བྱང་གཏེར་ཐུགས་སྒྲུབ་སྒྲུབ་པ་སྡེ་བརྒྱད་དང་། སྡེ་དྲུག་གི་དབང་རྒྱས་འབྲིང་གཉིས་དང་། རྡོར་གླིང་གི་གཏེར་བྱོན་བཀའ་འདུས་ཆོས་ཀྱི་རྒྱ་མཚོའི་དབང་ལུང་ཕུར་པ་སྤུ་གྲིའི་དབང་སོགས་མང་པོ། གཞན་ཡང་འབྲས་ལྗོངས་རྫོགས་ཆེན་ཁྲག་འཐུང་འཇིགས་མེད་རྡོ་རྗེ། ཀ་ཐོག་རིག་འཛིན་༧ཞབས་དྲུང་འགྱུར་མེད་གཞན་ཕན་དབང་པོ། བཤེས་གཉེན་ཨོ་རྒྱན་རབ་བརྟན། སོ་སྟོན་མཐུ་སྟོབས་རྣམ་རྒྱལ། འདུལ་འཛིན་ཀུན་དགའ་བློ་གྲོས། གོང་དཀར་ཆོས་སྡེའི་དཔོན་སློབ་བསོད་ནམས་བློ་གྲོས་རྒྱལ་མཚན་སོགས་བཤེས་གཉེན་མཐའ་ཡས་པ་ནས་རྫོགས་པ་ཆེན་པོའི་ཀློང་གཉིས་དང་། ཡང་ཏིག་ནག་པོ་སྔ་འགྱུར་བཀའ་མའི་མན་ངག་སྣ་ཚོགས་པ་དང་། མ་གཅིག་གཅོད་ཡུལ། ཞི་བྱེད་ཀྱི་ཆོས་བཀའ་དུ་མ་དང་། ཨ་གྷོ་ར་དང་། ཕྱག་དྲུག་པའི་རྗེས་གནང་། མྱང་གཏེར་ཁྲོས་ནག །ནཱ་རོ་མཁའ་སྤྱོད་མ་དང་། ཉི་ཟླ་སངས་རྒྱས་ནས་བརྒྱུད་པའི་འཕོ་བ་འཇའ་ཚུགས་མའི་མན་ངག་གིས་མཚོན་གསང་སྔགས་ཕྱི་ནང་གི་བཀའ་གཏེར་གྱི་མན་ངག་མང་དུ་གསན་མོད་ཀྱང་གསན་ཡིག་གི་ཐོ་བྱང་ལོགས་སུ་ཡོད་པ་ལྟར་ལས་འདིར་རྒྱས་པར་མ་སྨོས་སོ། །དེ་ཡང་ཤིང་རྟ་དགུང་ལོ་བཅུ་དྲུག་ཏུ་ཕེབས་དུས་ཟླ་བ་གཉིས་པའི་ཚེས་གཉིས་ལ་ཡབ་རྗེ་བླ་མ་དམ་པ་ཡེ་ཤེས་གོང་འཕོའི་རྟགས་ངོ་མཚར་བ་དང་བཅས་དག་པའི་ཞིང་དུ་གཤེགས་པའི་ཐུགས་སྐྱོ་ངལ་ཚད་མེད་པ་ཤར་བའི་ནུབ་མོ་སྲོད་ཀྱི་དུས་མུན་པ་ནག་པོའི་མདུན་གྱི་ནམ་མཁར་འཇའ་འོད་ཀྱི་ཀློང་དུ་ཡབ་རྗེའི་སྐུའི་སྣང་བརྙན་གསལ་བར་གཟིགས་པའི་སྐུ་བརྙན་མཚོ་བྲག་གི་དག་སྣང་སོགས་ཕྱིས་འབྱུང་འགྱུར་མང་པོ་གནང་གསུངས།

དེ་ནས་མེ་བྱ་དགུང་ལོ་བཅུ་དགུར་མ་ཕེབས་བར་ལོ་གསུམ་གྱི་བཅད་རྒྱ་དམ་པར་མཛད་ཅིང་གཙོ་བོར་དཔལ་གསང་བ་སྙིང་ཏིག་གི་དགོངས་པའི་ཟབ་ཁྲིད་ཀྱི་འོད་གསལ་རྡོ་རྗེ་སྙིང་པོའི་རྫོགས་རིམ་ཁོ་ན་དང་། དེའི་ཞར་བྱུང་དུ་བདེ་གཤེགས་ཀུན་འདུས་ཀྱི་མན་ངག་རྣམས་ཀྱང་སྒོམ་པ་ཡིན་གསུངས།

ཇུན་གར་བའི་འཚེ་བ་ལས་གཡོལ་ཏེ་འབྲས་ལྗོངས་ལ་ཕེབས་པ།

ས་ཕོ་ཁྱི་ལོ་བསྟན་འགྲོའི་བགེགས་དབང་མངོན་གྱུར་ཐོག་བབས་ཀྱིས་པདྨའི་ལུང་བྱང་རྣམས་སུ་གསལ་བ་ལྟར་ཇུ་རིང་ཐུ་ཧོང་ཐའི་ཇིའི་དཔུང་གིས་བོད་ཁ་བའི་ལྗོངས་ཧོར་དམག་གིས་ཁེངས། གསང་ཆེན་སྙིང་པོའི་བསྟན་པ་མིང་མེད་དུ་བཅོམ། གཙུག་ལག་ཁང་རྣམས་བཤིག །བསྟན་པ་འཛིན་པའི་སྐྱེས་ཆེན་གཙོ་བོར་གྱུར་པ་རྣམས་བཀྲོངས། དགེ་འདུན་གྱི་སྡེ་གཏོར། བོད་ཡུལ་གངས་རིའི་ལྗོངས་འདི་སྔོན་སྤྲུལ་པའི་ལོ་པཎ་རྒྱལ་བློན་ཚོགས་ཀྱིས་རྟེན་འབྲེལ་ལས། དུས་གསུམ་ཀུན་མཁྱེན་དཔལ་ཨོ་རྒྱན་ཆེན་པོ་ནས་དཀར་པོའི་ཆོས་ཀྱིས་གང་བར་མཛད་པའི་ཞིང་ཁམས་རྔ་ཡབ་པདྨ་འོད་དང་མཚུངས་པར་མཛད་པ་འདི་མུན་པའི་སྣང་བས་གང་བ་ལ་ཕྱོགས་ཐམས་ཅད་སྒྲོན་མེ་དང་བྲལ་བའི་སྲོད་ཀྱི་མུན་པ་སྟུག་པོ་ལྟ་བུས་ཁྱབ་ཅིང་དེའི་ཚེ་ཆོས་འཕེལ་ཇི་བཟང་ཟེར་བ་སྔོན་གཏེར་ཆེན་བླ་མ་དང་མཇལ་དུས་ཨ་ཐམ་མའི་གནང་སྦྱིན་བཅས་ནམ་ཞིག་ཁྱེད་ཀྱི་ངའི་དགོན་ཆུང་འདི་ལ་ཕན་ཐོགས་པའི་དུས་ཤིག་ཡོང་བས་དེ་དུས་མ་བརྗེད་པ་དྲན་པར་མཛོད་ཅེས་གནང་ཆ་དཔངས་མཐོ་བ་སྩལ་བར་ཁོ་པས་དེ་དུས་དྲན་གསོས་པའི་སྨིན་གླིང་དགོན་པ་གཏོར་མི་ཐབས་ཇི་བྱ་བཟང་དང་། རྡོར་བྲག་གཏོར་མི་ཁམས་པ་གཉིས་ནང་རྗེས་བརྒྱབ་པའི་ཨོ་རྒྱན་སྨིན་གྲོལ་གླིང་དགོན་པའི་གཤམ་དུ་གུར་བརྒྱབ་པའི་མེ་མདའི་སྒྲ་ཙམ་ལས་དགོན་པར་ཤར་དུ་མ་ཡོངས་པའི་ཐོག །ལོ་ཆེན་རིན་པོ་ཆེ་དང་། གཅེན་རྒྱལ་སྲས་པདྨ་འགྱུར་མེད་རྒྱ་མཚོས་མཚོན་ཁུ་དབོན་མཆེད་རྣམས་ཧོར་དམག་གིས་དཔོན་ཚེ་རིང་དོན་གྲུབ་ནས་བཀའ་ལུང་ཞུ་དགོས་འདུག་ཟེར། སྔོན་ནས་ལྷ་སར་ཕེབས་དགོས་ཞེས་ཕེབས་གྲུབ་ཅིང་། དེའི་ནུབ་མོ་སྐུ་མཚམས་གྲོལ་བའི་དབུ་སྐྲ་སྦད་མགོ་དང་སྐུ་ལ་སྣམ་བུ་རྒྱ་ཁྲའི་ན་བཟའ་བཞེས་ཏེ་སྐྱ་ཆས་སུ་བསྒྱུར་ནས་ཡབ་རྗེའི་སྐུ་བརྙན་ཆུང་ངུ་དེ་སྐུ་རྒྱབ་ཏུ་བཞེས། ཞབས་རིམ་མ་འགྱུར་མེད་ཆོས་སྒྲོན་དང་། གསོལ་ཐབ་པ་འགྱུར་མེད་གཡང་འཛོམས། དགེ་སློང་བཀྲ་ཤིས་དབང་ཕྱུག །དགེ་འདུན་མཚམས་འཕེལ་ཏེ་དཔོན་གཡོག་ལྔས་ཉེར་མཁོའི་གསོལ་ཆས་བསྣམས་ནས་གསང་སྒོ་བརྒྱུད་དེ་གཏེར་བདག་གི་རྒྱབ་རིའི་རྩེ་བརྒྱུད་ནས་བཙན་ཡུལ་སྡེ་པ་དབང་འདུས་པར་ཞལ་གཟིགས་ནས་ཕེབས། དེ་སྐབས་ཧོར་དམག་གིས་དགོན་པ་བཟུང་། གསང་སྔགས་ཕོ་བྲང་མ་གཏོགས་གཙུག་ལག་ཁང་དང་ཆོས་འཁོར་ལྷུན་པོའི་སྤེན་བད་ཡན་བཤིག་ཅིང་། མཆོད་རྟེན་ཆེན་པོའི་ཆོས་འཁོར་ཡན་བཤིག །གཞན་རྣམས་སྐྱོན་མེད་རང་གནས་སུ་བཞག་པ་ཡིན་ཡང་། གྲྭ་ཕྱི་ཡུལ་མི་རྣམས་ཀྱི་སྙིང་ལ་ཧོར་དམག་གི་བྱིན་རླབས་ཞུགས་པའི་མཐུས་ཤུལ་མེད་དུ་བཏང་བཤིག །དེའི་རྐྱེན་ལས་པདྨའི་མངའ་ཞུགས་ཀྱི་ཕོ་ཉ་རྣམས་ཀྱིས་དེང་སང་ཡུལ་གཞན་དང་མི་འདྲ་བ་གྲྭ་ཕྱི་སྟོང་ཚབས་ཆེ་བའང་གཏེར་ལུང་གབ་སྦས་རྣམས་ལ་ཞིབ་མོར་དཔྱད་ན་ངེས་པ་འདྲོངས་པ་འགྱུར་རོ། །གང་ལྟར་ཡང་དེ་སྐབས་ལྕམ་དྲུང་དང་ལྕམ་དཔལ་འཛིན་གཉིས་ཧོར་སོག་གི་བྱི་ཕོའི་བྱོལ་ཉོག་གིས་འོ་བརྒྱལ་བ་ལ། དེར་ཡུམ་ནས་ང་ལ་བུ་མོ་མི་འགྱུར་དཔལ་སྒྲོན་བྱ་བའི་བཙུན་མ་བཞིན་མཚར་མོ་ཞིག་ཡོད་གསུངས་ཐལ་བས་རྨ་བྱའི་སྙིང་ལ་འབྲུག་སྒྲའི་དཔེ་བཞིན་ལྗོངས་གཞིས་ཡས་མས་ལ་གྲུ་སོགས་ལ་ཧོར་དམག་གི་དམ་རྩིས། གཏེར་བདག་གླིང་པའི་བུ་མོ་དེ་ལྟར་ཟེར་བ་ཐལ་ན་མི་འཐུས་པས་བཟུང་འཆང་བྱས་པའི་ནམ་ཉིན་མཚན་ལྟོས་མེད་ཀྱིས་ལྷ་སར་མ་འཁྱོལ་ན་སྐེ་མིག་ལ་གྱ་ཡོང་བའི་སྒྲ་གྲགས་སོ། །དེ་ནས་བཙན་ཡུལ་དུ་ཕེབས་པའི་ནུབ་སོག་པོས་བཙན་ཡུལ་མནན་པ་ན། སྡེ་པ་དབང་འདུས་ཀྱིས་ཁྲུང་བཞེས་བཙུགས་པའི་སོག་པོ་མགོ་བསྐོར་ཐབས་མཁས་ཀྱང་སྤྱོད་པས་དཀར་ཁུང་དུ་རྗེ་ཉིད་ཐག་ཤུར་ལ་གདན་དྲངས་ཏེ་མཚན་མོ་རིལ་པོར་གྲ་ནང་གཞུང་བརྒྱུད་ལྡུམ་པོ་བཀྲ་ཤིས་མཐོང་སྨོན་གྱི་གཞིས་སུ་སྐུ་ཞང་གི་སར་ཕེབས་དེང་སང་དེའི་ཉིན་ཧོར་སོག་གིས་ལྡུམ་པོ་མནན་པ་ན། ཞབས་དྲུང་ག །ཞན་ཕན་དབང་པོས་ཀྱང་ཁྲུང་བཞེས་བཙུགས་པའི་ཧོར་སོག་མགོ་བསྐོར། མངོན་དགའི་ཞལ་དཀར་ནས་མར་ཐག་བཤུར་ལ་གདན་དྲངས། དེ་ནས་ལུང་རིང་གི་ཕུའི་རྫ་ཁྲོད་དུ་ཉིན་ཞག་གཉིས་ཀྱི་བར་རྡོ་སྦས་བརྒྱབ་པའི་ཡིབ་ནས་བཞུགས་ཤིང་། ཞབས་རིམ་པ་བཞིས་ཉིན་མོ་སྐྱ་ཆས་ཀྱིས་སྨན་བརྗིད་དགོན་དུ་ཡིབ་ནས་མི་རེས་རེ་མོས་ཀྱིས་རྒྱང་བཙོས་དང་། མཚན་མོ་གསོལ་ཆས་འབུལ་དུ་ཡོང་། དེར་སོག་པོས་ལུང་རིང་གི་ཕུའི་རྫ་ཁྲོད་དུ་ཡོང་སྟེ་རྗེ་ཉིད་ཀྱི་དབུ་ཐོག་ཏུ་ཕར་འགྲོ་ཚུར་འགྲོ་བྱས་ཏེ་ཉུལ་བས། ད་ང་ཟིན་སོང་སྙམ་པའི་ཤིན་ཏུ་ཚད་པའི་སྙིང་ཁར་དོན་དོན་གྱི་འཇིགས་རྔམས་ཚད་མེད་པ་བྱུང་གསུངས། དེར་དཀོན་མཆོག་སྤྱི་དང་ཁྱད་པར་དཔལ་ཨོ་རྒྱན་གུ་རུ་ཡབ་སྲས་ཀྱི་ཐུགས་རྗེ་དང་། བདག་སོགས་གདུལ་བྱར་གྱུར་པའི་བུ་སློབ་ཀྱི་བསོད་ནམས་ཀྱི་བགོ་སྐལ་དུ་ཧོར་སོག་གི་མིག་གིས་མ་མཐོང་བར་མ་རྙེད་པས་རེ་ཐག་ཆོད་ནས་ལོག་སོང་རྗེས་སྨན་བརྗིད་དུ་དགེ་མཁན་སྒྲུབ་པ་མོའི་སར་ཕེབས། ནངས་པར་སྔ་བར་བཞེངས་ནས་དོལ་ཁང་པ་བརྒྱང་དུ་གནས་ཆུང་མ་ཞིག་གི་ཐབ་ཚང་དུ་ཡིབ་ནས་བཞུགས་སོ། །དེ་དག་གི་ཚེ་གྲོང་སྙིང་གཉེར་པ་སྤོ་བོ། འབུམ་རབ་འབྱམས་པ་ཨོ་རྒྱན་སྐལ་བཟང་། ཞབས་དྲུང་འགྱུར་མེད་གཞན་ཕན་དབང་པོ། དགེ་སློང་ཨོ་རྒྱན་རབ་བརྟན་སོགས་གྲྭ་བགྲེས་པ་རྣམས་ཀྱིས་བཀའ་གྲོས་མཛད་པའི་ཚེ། འབུམ་རབ་འབྱམས་པས་གཏེར་བདག་གླིང་པའི་སྙིང་པོའི་དྭངས་མ་ནི་སྲས་མོ་འདི་ལ་ཡོད་པས་ཆུད་ཟོས་སུ་མ་སོང་བ་གྲགས། ད་ཅི་དྲག་ཕྱོགས་གང་དུ་ཕེབས་པ་དྲག་གསུངས་པར་དགེ་སློང་ཨོ་རྒྱན་རབ་བརྟན་ནས་ཁྱེད་རྣམས་ཐབས་མཁས་ཤིང་ཐུགས་རིག་བཀྲ་བས་ས་ཆ་སོགས་གང་དུ་སོང་གཟིགས་པས་སླར་གྲྭ་གཙང་ཚུགས་དུས་ཀྱི་དོན་དུ་ཧུར་བསྐྱེད་མཛོད། ཁོ་བོས་སྲས་མོ་འདི་དབུ་བཏོན་ནས་ཆུད་ཟོས་མེད་པར་སླར་ཁྱེད་རང་རྣམས་ལ་འབུལ་རྒྱུ་ཡོད་པ་བྱེད་གསུང་ནས་དེར་ཞལ་འཆམ་སྟེ། དགེ་སློང་ནས་འཁང་རྒྱང་དུ་རྗེ་བླ་མའི་ཞབས་དྲུང་དུ་ཕེབས། ནངས་པར་ལུང་རིང་གི་ལ་རྩེ་ནས་ཡར་འབྲོག་པ་ཆོས་དང་ཁ་རོ་ལ་བརྒྱུད་དེ་འབྲས་ལྗོངས་སུ་ཡབ་རྗེའི་ལུང་བསྟན་ལྟར་ཕེབས་རྩིས་ཀྱིས་ཕག་རི་ཕྱོགས་སུ་ཞལ་གཟིགས་ཏེ་ཕེབས། དེ་ཡང་རྒྱུན་ལྡན་སྐུ་མཚམས་དང་དལ་འགྲོས་ཀྱི་ཅུང་ཟད་ཕེབས་པའང་ཆིབས་ལ་བརྟེན་གཤིས། དེ་དུས་སྤྲང་ཆས་ཀྱིས་ཉིན་མཚན་བར་མེད་ཤད་ནས་ཕེབས་དགོས་གཤིས་སྐུ་ངལ་ཞིང་ཉམས་ཞན་པས་ཕེབས་སོ། །དེར་ཕག་རིར་ཁྲོམ་དང་ཐག་ཉེའི་སར་ཚ་ཕོག་མཛད་པའི་ཚེ། དགེ་འདུན་མཚམས་འཕེལ་ནས་ཇ་ཕོར་པ་གང་བཏུང་སྟེ་ཁྲོམ་ལ་ལྟ་བར་ཕྱིན། དེ་འདྲ་ཁ་ཤས་ཀྱི་རྗེས་སུ་དགེ་སློང་རབ་བརྟན་ལགས་ནས་ཇ་འཐུང་རིང་ཡང་སྡོད་མི་ཚུགས་པ་འདུག་གམ་གསུངས་པས། མཚམས་འཕེལ་ན་རེ། ཨ་ཁ་ཅི་གསུངས། ད་ཅིའི་རྩ་ན་རྟ་གཉིས་ཤད་ནས་ལངས་སོང་། ད་ལྟ་ཤོག་བརྒྱངས་རིང་པོ་ཁྱེར་ནས་སློག་གིན་འདུག །ད་ང་ལྟ་རུ་འགྲོ་ཟེར་སོང་། དེ་མ་ཐག་པར་ཁོ་པ་ཡོང་སྟེ་ངས་ཨེ་ཟེར་ལྷ་ས་ནས་དཔོན་གྱིས་ཡི་གེ་འདུག །གཏེར་བདག་གླིང་པའི་བུ་མོ་དེ་རིགས་གློད་ཤོར་དུ་སོང་ན་མི་རུང་བས་འཕྲལ་དུ་བཟུང་འཆང་བསྐྲད་པས་ལྷ་སར་ནམ་ཉིན་ལྟོས་མེད་ཀྱིས་ཁྲིད་ཤོག་ཟེར་འདུག །ད་ཇ་འཕོ་ལ་ཕེབས་བཏོང་ཟེར་བས་དེ་མ་ཐག་པར་རྟབ་རྟབ་ཀྱིས་བྲོས་ནས་ཕེབས་སོ། །དེར་འབྲས་ལྗོངས་ལམ་བར་གཅའ་འཕྲང་བས་ཕེབས་དཀའ་ཞིང་ལམ་རྙེད་དཀའ་བ་ལ། ཡབ་རྗེའི་ཐུགས་རྗེས་དགེ་སློང་བཀྲས་དབང་དང་མཚམས་འཕེལ་གཉིས་སྔོན་ནས་རྫོགས་ཆེན་པའི་སྐུ་དྲུང་དུ་ཕེབས་མྱོང་གཤིས་ཕེབས་ལམ་བགྲོད་བདེ་བར་གནས་སྒོ་གོང་དུ་ཕེབས་སོ། །དེ་སྐབས་འགྱུར་མེད་ཆོས་སྒྲོན་སྐྲན་གྱིས་ན་ཚས་འགྲོ་མ་ཐུབ་བར་ལམ་ཐང་སྟོང་ཞིག་ཏུ་ལུས་པའི་གྲོགས་དགེ་སློང་བཀྲས་དབང་བཞུགས་པའི་ཚེ། ས་སྲིབ་ལྟ་བུའི་གངས་དང་རླུང་གི་བུ་ཡུག་འཚུབས་པའི་ཤིན་ཏུ་དཀའ་བའི་དུས་ས་གད་རིང་པོ་ཞིག་ནས་དགེ་སློང་བཀྲ་ཤིས་དབང་ཕྱུག་གར་ཡོད་ཅེས་ཟེར་བ་ལ། ས་འབུར་རྡོག་ཙམ་པ་གངས་ཀྱིས་འཁེངས་པའི་པུས་མོ་ཙམ་ཚུད་པའི་སྟེང་ནས། ང་འདིར་ཡོད་དོ་གསུངས་པས། དགེ་འདུན་མཚམས་འཕེལ་དང་ཐག་ཉེར་སོང་དུས། དགེ་སློང་ནས་ང་འདིར་ཡོད་དོ་རྩམ་པ་ཁྱེར་ཡོད་དམ་གསུངས། དེར་མཚམས་འཕེལ་ནས། ཁྱོད་བདེན་ནོ་རྩམ་པ་ཁྱེར་ཡོད་ཟེར། དེར་མཚམས་འཕེལ་གྱིས་བཙུན་མ་རྒྱབ་ཏུ་ཁུར་ཡོང་། དགེ་སློང་ཡུས་པ་ལྟ་བུས་བླ་མ་དྲན་ཏེ་སྔོན་དུ་བྱོན་པས། དེར་རྗེ་ཉིད་བཙུན་མ་ཤིའམ་དགོངས་དྲུང་ཉེ་གནས་མ་གང་དུ་ཡོད་གསུངས་བར། དགེ་སློང་ནས་རྗེས་ལ་ཡོད་ངས་སྔོན་དུ་ཡོང་པ་ཡིན་གསུངས་ཀྱང་རྗེ་ཉིད་ཞལ་མདངས་ལོག་པས་བདེན་ནམ་སྙམ་པ་རང་མི་འདུག་ཅེས་གསུངས། དེར་ལྷ་སར་ལོ་ཆེན་རིན་པོ་ཆེ་དང་། གཅེན་རྒྱལ་སྲས་པདྨ་འགྱུར་མེད་རྒྱ་མཚོ་བཀྲོངས། གཞན་ཡང་གཅེན་ཡིད་བཞིན་ལེགས་གྲུབ་ཨ་ཁུ་ཕྱག་མཛོད་དྲུང་སོགས་ཧོར་སོག་སྡིག་དཔོན་བདུད་རིགས་རྣམས་ཀྱིས་བཀྲོངས་པའི་བང་མི་འབྱོར་བས་ཐུགས་ཅག་གནང་དགོས་ཚུལ་གྱི་སྐྱར་ཤོག་འབྱོར་བར་ཐུགས་སྐྱོ་བ་ལ་ཚད་མེད་པའི་ངང་ནས་སྤྱན་ཆབ་བསིལ་ཞིང་མགུར་འདི་གསུངས་སོ། །རྗེ་ན་མོ་གུ་རུཿསྐྱབས་གནས་བསླུ་མེད་ཀྱི་བདག་ཉིད། །དྲིན་ཅན་མཚོ་སྐྱེས་ཀྱི་རྡོ་རྗེ། །ཕ་གཅིག་འགྲན་ཟླ་དང་བྲལ་བ། །ཆོས་རྒྱལ་གཏེར་བདག་གི་གླིང་པ། །ཐུགས་རྗེ་མི་མངོན་གྱི་དབྱིངས་ན། །བརྩེ་བས་ཐོགས་མེད་དུ་དགོངས་ནས། །གསོལ་འདེབས་མ་འཁོར་བ་རུ་འཁྱམ་པའི། །མི་འགྱུར་དཔལ་སྒྲོན་ལ་གཟིགས་ཤིག །ཕ་གཅིག་ཨོ་རྒྱན་གྱི་བླ་མའི། །གསང་ཆེན་མན་ངག་གི་བསྟན་པ། །ནམ་མཁའི་ཉི་ཟླ་ལྟར་གསལ་ཡང་། །མུན་པའི་སྤྲིན་རུམ་གྱིས་བསྒྲིབས་སོང་། །སྒྲུབ་བརྒྱུད་སྲོག་འཛིན་གྱི་སྙིང་པོ། །ལོ་པཎ་རྗེ་འབངས་ཀྱི་རྣམ་སྤྲུལ། །དབྱར་གུང་མེ་ཏོག་ལྟར་རྒྱས་ཀྱང་། །སྟོན་མཇུག་སད་ཁྱེར་གྱིས་བཅོམ་སོང་། །སྐྱེས་ཁང་ལྷ་དབང་གི་དགའ་ཚལ། །མི་གཙང་མཆིལ་སྣབས་བཞིན་བསྐྱུར་ནས། །འཇིགས་རུང་ནགས་ཚལ་གྱི་སྟུག་པོའི། །ཉམ་ངའི་གཅོང་རོང་དུ་སླེབས་བྱུང་། །སྒྱུ་མ་ གཡར་ཁང ་གི་ཕུང་པོ། །ལང་ཚོའི་མེ་ཏོག་གི་བསླུ་ཁྲིད། །བྲོས་བྲོས་བྲོས་པས་ཀྱང་མི་ཐར། །རྔོན་པའི་རི་དྭགས་དང་མཚུངས་བྱུང་། །སེམས་ཉིད་རང་དབང་རང་མ་ཐོབ། །སྡུག་བསྔལ་མི་ཟད་པའི་ཁུར་པོ། །སྙིང་མེད་འཇིགས་རུང་གི་གཤིན་རྗེའི། །ཕོ་ཉའི་དམག་ཚོགས་ལ་གཟིགས་ཤིག །ཀྱེ་མ་གང་འདྲ་ཞིག་བྱེད་དམ། །ཕ་གཅིག་ཨོ་རྒྱན་གྱི་བླ་མ། །ད་ལྟ་ཐོགས་མེད་དུ་དགོངས་ཤིག །འགྲོ་འདུལ་གཏེར་བདག་གི་གླིང་པ། །ཞེས་གདུང་དབྱངས་ཀྱིས་རྒྱང་འབོད་མཛད་པས་ཨོ་རྒྱན་ཡབ་ཡུམ་དང་རྗེ་བླ་མ་དམ་པའི་སྐུའི་སྣང་བརྙན་མདུན་གྱི་ནམ་མཁར་འཇའ་འོད་ཀྱི་ཀློང་དུ་གསལ་བར་གཟིགས་པས་གདུང་བ་སེལ་བའི་ལུང་དང་ཕྱིས་ལས་ཅན་གྱི་སློབ་མ་དང་། བར་གཅོད་ཀྱི་བདུད་འབྱུང་འགྱུར་སོགས་གསལ་བར་གནང་ཞེས་གསུངས། དེར་མ་ཟད་ལུང་རིང་གི་ཕུ་ནས་བཟུང་དེ་ཚུལ་གྱི་སྐྱོ་ཤས་ཀྱི་ཚུལ་མང་པོ་ཡོད་དོ། །ད་ལྟའི་དགེ་སློང་གིས་ཟིན་རིས་སུ་བྲིས་འདུག་པ་མ་གཏོགས་ད་བརྗེད་ནས་མི་དྲན་པ་འདུག་ཅེས་གསུངས་པས། གཟིམ་དཔོན་འགྱུར་གཡང་ལགས་ཀྱིས་ངེད་ཚོ་ནི་སྡུག་དྲགས་དེ་འདྲ་དྲན་མ་བྱུང་། ད་བཀའི་བསྡུ་བ་པོ་སྐུ་སྐྱེ་བཞེས་པ་ཕྱིས་འདུག་གསུངས་པར། ང་རང་དཔོན་གཡོག་གསུམ་བཞད་སྐད་དིར་ཙམ་བྱུང་། དེ་ཡང་དེ་དུས་སྐུ་རླུང་གི་བསྙུན་གཞི་དྲག་པོས་སྐུ་ཚེའི་བར་ཆད་དུ་འགྲོ་ཚད་ཚད་པའང་བྱུང་ཞེས་དགེ་སློང་བཀྲས་དབང་ལ་གསུངས། དེ་ནས་འབྲས་ལྗོངས་བླ་བྲང་ནས་རྫོགས་ཆེན་ཁྲག་འཐུང་དཔའ་བོ་འཇིགས་མེད་རྡོ་རྗེས་སེར་སྦྲེངས་ཀྱིས་བཀུར་སྟིའི་བཀོད་པ་ཕུན་སུམ་ཚོགས་པས་གསང་སྔགས་ཕོ་བྲང་དུ་གདན་དྲངས་ཏེ་ཁྲི་བཀོད་མངོན་པར་འཕགས་པའི་སྟེང་དུ་བཞུགས་སུ་གསོལ་ལ་ཞབས་ཏོག་ཚད་མེད་པས་ངལ་གསོའི་བདེ་བ་ཐོབ་པ་ཡིན་གསུངས། དེའི་སང་ཉིན་ཕོ་བྲང་གི་ཡང་ཐོག་ཏུ་དགེ་སློང་ཨོ་རྒྱན་རབ་བརྟན་གྱིས་ཞབས་ཕྱི་ཞུས་པས་དབུ་སྐྲ་བསིལ་བར་མཛད་པས་སྔར་བཞིན་རབ་བྱུང་དུ་སྐུ་ལུས་བསྒྱུར་བ་མཛད། དེ་ནས་དགེ་འདུན་མཚམས་འཕེལ་ཙམ་མ་གཏོགས་དགེ་སློང་གཉིས་དང་། བཙུན་མ་གཉིས་ཏེ་བཞིས་ཀྱང་སྐྱ་ཆས་བཞག་སྟེ་སོ་སོའི་རང་གཟུགས་སུ་བསྒྱུར་ཆོག་པའི་སྐལ་བཟང་ཐོབ་པ་ཡིན་གསུངས། དེ་ཡང་ཡུལ་ཕྱོགས་དེར་རྫོགས་ཆེན་པ་དང་རྒྱལ་པོའི་བཀས་ཟིན་ན་མ་གཏོགས་བླ་མ་གཞན་གྱིས་བསྒྱུར་ཁ་དཀའ་ཡང་རྫོགས་ཆེན་པ་དང་རྒྱལ་པོ་ཟུང་གིས་རང་རེ་འབྲས་ལྗོངས་ཀྱི་འོག་ཏུ་ཆུད་པའི་སྐྱ་སེར་མེད་པའི་སྐྱེ་བོ་ཀུན་རྩ་བའི་བླ་མ་འགྲོ་འདུལ་གཏེར་བདག་གླིང་པའི་རིགས་སྲས་མཚོ་རྒྱལ་གྱི་སྤྲུལ་པ་འཁྲུལ་མེད་མི་འགྱུར་དཔལ་གྱི་སྒྲོན་མ་ཡུལ་ཕྱོགས་འདི་དག་ཏུ་ཕེབས་པ་སྐལ་བ་ཤིན་ཏུ་བཟང་བས་དབང་ཆོས་ལུང་སོགས་སོ་སོ་གང་འདོད་དུ་ཞུ་བ་ལ་བཀག་སྡོམ་མེད་པས་སོ་སོའི་འདོད་སྦྱར་ལྟར་བྱས་ཆོག་ཅེས་བཀའ་ཤོག་བཀྲམ་པས་གཞི་ལྷོངས། དད་ཅན་གྱི་སྐྱེ་འགྲོ་ཕོ་མོ་སྟོང་ཚོ་བཞིར་བརྒལ་བ་འདུས་ཏེ་སོ་སོའི་བདོག་པས་གུས་མཆོད་འབུལ་བ་གྱ་ནོམ་པ་ཕུལ་བ་དག་ལ། གཏེར་གསར་འཆི་མེད་ཡང་སྙིང་ཀུན་འདུས་ཀྱི་ཚེ་དབང་བསྩལ་བའི་ཚེ་རྗེ་ཉིད་བཞུགས་པའི་དབུ་ཐོག་ཏུ་འཇའ་ཁ་དོག་ལྔ་ལྡན་མདུང་ཚུགས་སུ་ཟུག་ཅིང་། ཚེ་དབང་ཚུགས་ནས་མ་གྲོལ་གྱི་བར་རྗེའི་དབུ་ཐོག་གི་ནམ་མཁར་བྱ་རྒོད་ཅིག་སྐོར་བ་གཡས་སུ་བསྐོར་བས་ཀུན་ཡི་རངས་བའི་དད་པའི་ས་བོན་དུ་མཛད་ཅིང་རྗེ་ཉིད་ཀྱི་མཚན་ནས་འབོད་ཅིང་རྐྱང་ཕྱག་འཚལ་བའི་འུར་དིར་གྱི་སྣང་བ་འགྱུར་བའང་བྱུང་ཞེས་གསུངས། གཞན་ཡང་སོ་སོ་གང་འདོད་དང་འཚམས་པའི་ཆོས་དང་དམ་རྫས་ཀྱི་སྦྱིན་པས་ཚིམས་པར་མཛད་ཅིང་། ཁྱད་པར་རྫོགས་ཆེན་པ་དང་རྒྱལ་པོས་མཚོན་ཞབས་རིམ་ཐུ་བོར་གྱུར་པ་འགའ་ཞིག་ལ་ཡབ་རྗེའི་གཏེར་གསར་ཆ་ཚང་གི་དབང་ལུང་དང་། དེའི་ནང་ནས་གཏེར་གསར་ཨ་ཏིའི་དབང་ཁྲིད་ལུང་སོགས་བསྩལ་བའི་རིག་པའི་རྩལ་དབང་གི་ཚེ་གཞི་ནས་སྦས་ཡུལ་ཞོད་ཆེ་བས་ཡིན་ནམ་གང་ལྟར་ཡང་དཀྱིལ་འཁོར་དང་རྗེ་ཉིད་བཞུགས་སར་འཇའ་ཟུག་ཅིང་མེ་ཏོག་གི་ཆར་འཁོར་ལོ་རྩིབས་བཞི་པ་དང་། པད་འདབ་བཞི་པའི་རྣམ་པ་ཁ་བ་འཚུབས་པ་ལྟར་བབས་ཤིང་སྤོས་བཟང་པོའི་དྲི་ངད་ལྡང་བ་ལྟ་བུའི་དྲི་མས་ཁྱབ་པས་ཀུན་ངོ་མཚར་ཅན་དུ་གྱུར་ཏོ། །དེ་ཡང་ཆོས་བཀའ་འདི་ཙམ་དུ་མ་ཟད་གཏེར་གསར་ཚང་མ་རྗེ་བླ་མ་དམ་པ་བདེ་ཆེན་ཌཱ་ཀིའི་གཙོ་མོ་ཉིད་ཀྱི་སྐུ་ཚེ་འདི་ལ་སྦས་པའི་གནས་ཡུལ་ཁྱད་པར་ཅན་འདིར་གནང་བའི་སྐབས་འདི་ཐོག་མ་ཡིན། ཚུར་ཡང་རྫོགས་ཆེན་རིན་པོ་ཆེ་ནས་དཀོན་མཆོག་སྤྱི་འདུས་དང་། རིག་འཛིན་སྲོག་སྒྲུབ་ཀྱི་དབང་ལུང་ཚང་བར་གནང་ངོ་། །དེའི་སྐབས་ཤིག་གསང་སྔགས་ཕོ་བྲང་གི་ཡང་དབེན་དུ་ཟབ་ཆོས་རིག་འཛིན་ཐུགས་ཐིག་དང་། བདེ་གཤེགས་ཀུན་འདུས་ཀྱི་ཕྱི་ནང་གསང་གསུམ་གྱི་བསྙེན་སྒྲུབ་ཀྱང་སྨིན་པར་མཛད་པའི་དྲོད་རྟགས་ཀྱི་མཚན་མའང་ཅི་རིགས་པ་ཤར་གསུངས། དེ་དག་གི་དུས་སྐྱིད་པའི་གླུ་དང་དགའ་བའི་བྲོ་བརྡུངས་བ་ལྟ་བུའི་བདེ་བ་དཔག་ཏུ་མེད་པའི་ཚེ་ཡུམ་དང་། ལྕམ་དཔལ་འཛིན་བུ་དགའ་སྐྱིད་འཛོམ་བཅས་འབྲས་ལྗོངས་སུ་ཕེབས་པས་རྐྱེན་བླང་། ཡང་ལྷ་ས་ན་དཔོན་ཚེ་རིང་དོན་གྲུབ་ཀྱིས་ཐོས་པས་གཏེར་བདག་གླིང་པའི་བུ་མོ་བཙུན་མ་བཞིན་མཚར་པོ་དེ་འབྲས་ལྗོངས་སུ་ཡོད་འདུག་ཅེས་པའི་སྒྲ་སྦིར་ལ་བརྟེན་ཧོར་སོག་རྟ་པ་བཅུ་ལམ་རྒྱུས་པ་དང་བཅས་ཕག་རིའི་ཕྱོགས་སུ་འབྱོར་ཙ་ན་རྗེ་བླ་མ་དམ་པ་ཌཱ་ཀིའི་གཙོ་མོར་རྫོགས་ཆེན་རིན་པོ་ཆེ་ནས་ཨའུ་རྩི་སྐྱོན་མེད་ཞུས་པར་གཅའ་སོགས་ཕྲ་ཞིང་འཕྲང་དོག་ཅིང་ལ་བགྲོད་དཀའ་ཡང་ནག་པོའི་བདུད་རིགས་ཐབས་མཁས་པས་ཅི་འཆར་མི་ཤེས། འོན་ཏེ་ང་ཡང་ཕ་གཏེར་བདག་གླིང་པའི་ཐུགས་ནས་ཆད་པའི་བུ་མོ་ཞིག་ཡིན། མི་སྲུན་འབྱུང་པོ་དེ་ལ་འབྱུང་བ་རླུང་འཁོར་ཞིག་བཟོ་གསུངས་ཏེ། འཁོར་ལོ་བྲི་བའི་ཕྱག་ལེན་དང་ལས་སློབ་དགེ་སློང་དགེ་བའི་བཤེས་གཉེན་བཀྲ་ཤིས་དབང་ཕྱུག་གིས་མཛད་དེ། ཞིག་པོ་གླིང་པའི་གཏེར་བྱོན་རླུང་དམར་གྱི་འཕྲུལ་འཁོར་དྲག་པོའི་ལས་སྦྱོར་མཛད་པས་ཁོ་པ་རྣམས་ནང་འཁྲུགས་ཀྱིས་འདི་ཡིན་མེད་པའི་གཞི་མེད་དུ་སོང་བས་ཐུགས་གཡེང་མ་དགོས། ད་དུང་ཆེད་དུ་གཉེར་ནས་པདྨའི་ཡང་ཟབ་ཀྱི་གདམས་པའི་ཉིང་ཁུས་གངས་འབེབས་མཛད་པས་སྔར་མཐོང་མ་མྱོང་མ་དྲན་ཞེས་པའི་ཁ་བས་ཆོད་པས་བདེ་བ་ཐོབ་པའི་དཔལ་དུ་གྱུར་གསུངས།

བསྟན་དགོན་བསྐྱར་གསོའི་མཛད་པ་རྒྱ་ཆེར་བསྐྱངས་པ།

ས་ཕག་ལོ་སྟོད་སྒར་ཐོག་ཏུ་སྡེ་པ་སྒར་དཔོན་ཤངས་ཁང་ཆེན་ནས་ཀྱི་བོད་ཀྱི་ནང་ཆ་ཁྱེར་མི་གདུགས་དཀར་དུ་སོང་། ཐབས་ཇི་ཇ་བཟང་སོགས་ཧོར་སོག་གི་སྡེ་མིང་མེད་དུ་བཅོམ་པས་ལྷ་སར་སྡོད་མིའི་དཔོན་སོགས་ཀྱང་སྟབས་ཅག་གིས་འབྲོས་པ་བྱུང་སོང་ཞིང་། དེའི་མཐུ་དཔུང་གི་རྐྱེན་ལས་འཇམ་དབྱངས་གོང་མ་རྒྱལ་པོས་ཁང་ཆེན་གནས་ལ་སྲིད་སྐྱོང་བསྐོ་བཞག་དང་། དའི་ཆིང་བ་དུར་ཞེས་ཆོ་ལོའང་སྩལ། དཔལ་ཨོ་རྒྱན་ཆེན་པོའི་ཐུགས་རྗེའི་ཟླ་ཟེར་ལས་དཔོན་གཉིས་ནས་རྙིང་མ་ཉུང་ངུའི་སྡེ་མིང་མེད་དུ་བཏང་བའི་རང་སྡེ་རྣམས་ཚུགས་ཤིག་པའི་སོ་སོར་བཀའ་ཤོག་བཀྲམ་པ་ལ་རང་རེའི་དབུ་ཆོས་རྣམས་ཀྱིས་བསླབ་སྡོམ་སྐྱོན་མེད་རྣམས་བསྡུས་ཏེ་འདུས་སྡེའི་ས་བོན་ཚུགས་པའི་བང་ཆེན་རྗེ་བླ་མ་དམ་པ་ཌཱ་ཀིའི་གཙོ་མོའི་ཞབས་པད་དུ་འབྱོར་བར། དེར་རྗེ་ཉིད་དཔོན་གཡོག་སྔར་རྒྱུན་སྟེང་གྲྭ་རིགས་རྙིང་པ་འགའ་དང་བཅས་འབྲས་ལྗོངས་ནས་བོད་དུ་ཆིབས་བསྒྱུར། ཕག་རི་དང་ཁ་རོ་ལ་ནས་བ་བཅོས་ཀྱི་གཞུང་བརྒྱུད་ཟར་པོ་དྲ་མ་ནས། སྐུ་ཞང་ལྡུམ་པོ་བའི་གཞིས་སུ་ཕེབས་ཏེ་ཞལ་ངོ་རྣམས་དང་མཇལ་འཕྲད་མཛད་པར། དེར་བར་དོ་ནས་མི་ཡུལ་དུ་མཇལ་བ་ལྟ་བུའི་དགྱེས་ཚོར་དཔག་མེད་ཐོབ་བྱུང་གསུངས། དེ་ནས་སྐུ་ཞང་གི་ཞལ་ངོ་རྣམས་དང་ཞབས་ཕྱི་ནང་འཁོར་འགའ་ལ་ཚེ་དབང་དང་དྲག་དམར་གྱི་སྐུ་གསུང་ཐུགས་དབང་བསྩལ་ཏོ། །དེ་ནས་སྐུ་ཞང་ནས་དབང་བཞི་བཏེགས་པའི་དར་རྒྱས་ཆོས་སྡིངས་སུ་ཕེབས་ཏེ་ཡུལ་མིར་ཁྲོམ་དབང་དང་། དད་ཅན་དུ་མར་མཇལ་འཕྲད་མཛད་ཅིང་སོ་སོའི་རེ་འདོད་སྐོང་བར་མཛད། དེ་སྐབས་ཡབ་རྗེའི་མཆོད་དཔོན་ཨོ་རྒྱན་རབ་དགས་ཡབ་རྗེའི་དབང་ཆས་ཀྱི་ཕྱག་སྒམ་ཟུང་ཞལ་ངོ་སུ་སྔ་བ་ཕེབས་པར་འབུལ་རྩིས་ལ་རྗེ་ཉིད་སྔ་བས་དེར་འབུལ་བ་མཛད་པས་རྟེན་འབྲེལ་ལེགས་ཤིང་ཤིན་ཏུ་མཉེས། དེ་ནས་སྐྱིད་རུ་གཞིས་སུ་ཞག་པོ་མཛད་པའི་གྲའི་གཞུང་བརྒྱུད་རང་གི་དགོན་པར་ཆིབས་བསྒྱུར། དེའི་ཚེ་གཉེན་མཁར་རི་ཟུར་ནས་དགོན་པ་གཟིགས་པས། སྔར་ལྷའི་དགའ་ཚལ་དང་མཉམ་པའི་གནས་དེ་གསང་སྔགས་ཕོ་བྲང་ཙམ་མ་གཏོགས་བླ་བྲང་ཟུང་དང་མཆོད་རྟེན་གྲྭ་ཤག་གིས་མཚོན་གྱང་སྟོང་དུ་རོང་ངེར་འདུག་པས། སྔར་ཡབ་རྗེ་དང་ཁུ་དབོན་རྣམས་ཀྱི་སྟོབས་འབྱོར་ལོངས་སྤྱོད་རྣམས་དྲན་ཏེ་བཟོད་གླགས་མེད་པའི་སྡུག་བསྔལ་གྱིས་མནར་ཞིང་། དེའི་རྐྱེན་ལས་སྔར་སྣང་གསལ་འོད་དེ་འབུམ་གྱི་སྐྱེ་བའི་དུཿཁ་ཡང་ལམ་ལམ་དྲན་པ་ཞིག་བྱུང་གསུངས། དེ་ནས་དབུ་ཆེ་བགྲེས་པ་རྣམས་ཀྱིས་ཐོག་དྲངས་གྲྭ་གཙང་འདུས་པ་རྣམས་ཀྱིས་བཀུར་སྟིའི་ཞབས་ཏོག་དང་བཅས་གསང་སྔགས་ཕོ་བྲང་དུ་གཟིམ་ཆུང་བདེ་ཆེན་ཡང་རྩེར་སྤྱན་དྲངས་ཏེ་མཇལ་འཕྲད་མཛད་ཅིང་། གྲྭ་གཙང་དུ་མང་ཇ་སྦྱོར་དང་འབྲུ་དཀར་གྱི་བཞེས་ཐུག །ལྷོ་མོན་གྱི་ཡུལ་བབས་ཀྱི་དངོས་པོ་གང་འཚམས་ཀྱི་ཕྱག་འགྱེད་དང་བཅས་བསྩལ་ཅིང་། གྲྭ་གཙང་དུ་འཕན་རིང་གཉིས་དང་རྒྱལ་མཚན་བཅས་དང་། ཞག་བདུན་གྱི་བར་གུ་རུའི་ཕྲིན་ལས་དང་འཕྲོས་པའི་ཆོས་སྐྱོང་རྣམས་ལ་གཏང་རག་གིས་བསྐང་གསོ་རྒྱས་པར་མཛད། དེ་སྐབས་ཕོ་ལྷ་ཐའི་ཇི་འགྱུར་མེད་བསོད་ནམས་སྟོབས་རྒྱས་བཀའ་བློན་གྱི་ལས་འཁུར་གྱི་དབང་ཆེ་ཞིང་མི་ཕྱེད་པའི་དད་གདུང་དྲག་པོས་རྗེ་ཉིད་ལ་ལེགས་གསོལ་གྱི་འབུལ་བ་དང་། དབུ་ཞྭས་མཚོན་ན་བཟའ་ཆ་ཚང་། ཆིབས་དཀར་པོ་རྟ་སྒ་རྒྱན་བཅས་སྤུས་ལེགས་དང་། གྲྭ་གཙང་འདུས་ཚོགས་སུ་མང་ཇ་འགྱེད་དང་བཅས་པ་སྦྱོར། དེ་རྗེས་ཀླུ་སྡིངས་ལྷ་དབང་དགའ་ཚལ་གྱི་ཞིག་གསོ་ཚུགས་ཤིང་ལེགས་པར་གྲུབ་རྗེས་རབ་གནས་ཀྱི་ཆོ་ག་མཛད་ནས། དེར་སྤོ་བ་མཛད་དེ་ཟླ་ཤས་བཅད་རྒྱར་བཞུགས། དེའི་ཚེ་མི་རིང་བ་ཁམས་ནས་གཅེན་རཏྣ་བི་ཛ་དང་། གཅུང་རྒྱལ་སྲས་ཉེ་བའི་མགོན་པོ་དཔོན་གཡོག་རྣམས་ཕེབས་པའི་མཇལ་ཕྲད་མཛད་ཅིང་དགྱེས་པ་དང་སྤྲོ་བའི་སྐབས་སུ་ལགས། ལྕགས་བྱི་དགུང་ལོ་ཉེར་གཉིས་ལ་ཕེབས་པའི་སྐུའི་གཉན་ཆ་ཆེ་བའི་སྟེང་སྐྲན་གྱི་བསྙུན་དྲོན་ནས་མནར་བ་ལ། སྐུ་བགེགས་ཀྱི་བར་ཆད་ཞི་ཕྱིར་སྐུ་རིམ་ཐ་མ་འགགས་པ་དང་། ཁྱད་པར་ཨེམ་ཇི་བློ་འཕེལ་ནས་དཔལ་ལྡན་ཟུར་མཁར་བའི་ཁྱད་ཆོས་ཀྱི་ཐབས་སྒོ་དུ་མའི་སྨན་སྦྱོར་འབུལ་ཞིང་འཆི་མེད་ཚེའི་རིལ་བུ་ཧྲཱིཿདམ་མ་མཆོད་པས། སྐུ་བདེ་དྭངས་སུ་གྱུར་པའི་སྐལ་བཟང་ཐོབ་ཅིང་། དེ་ལྟར་འབྲས་ལྗོངས་ནས་ཕེབས་ནས་ཀོང་པོར་མ་ཕེབས་བར་དམ་པ་ཆོས་ཀྱི་སྦྱིན་པས་དབུས་གཙང་། མངའ་རིས། ལྷོ་མོན། ལྷོ་བྲག་ཡང་བཞི། དྭགས་པོ་དང་ཁམས་སྟོད་སྨད་བར་གསུམ། དབུ་རུ་དང་གཡོ་རུ་ཕྱོགས་ཀྱི་དད་ཅན་ཕོ་མོ་ཆོས་ལྡན་པ་མང་པོའི་རེ་འདོད་སྐོང་བར་མཛད་པའི་སྙན་གྲགས་ཀྱིས་ཁྱབ་པར་མཛད་དོ། །ཚུལ་དེ་ལས་བླ་བྲང་ཞབས་རིམ་པ་འགས་ཐའི་ཇིའི་སྐུ་དྲུང་བླ་བྲང་གི་ཞལ་སྒོ་ལ་ཅུང་འཛེར་བ་ཞུས་པས། དེར་ཐའི་ཇི་ནས་རེ་ཞིག་ཀོང་པོ་བདེ་ཆེན་སྟེང་དུ་ཕེབས་དགོས་པའི་སློབ་དོན་གྱིས་དེར་ཆིབས་བསྒྱུར་བས་ལོ་གཅིག་ལྷག་བརྒལ་ཙམ་སོང་རྗེས། དགེ་རྒན་དགེ་སློང་ཨོ་རྒྱན་རབ་བརྟན་དང་། དགེ་སློང་བཀྲ་ཤིས་དབང་ཕྱུག་གཉིས་རྡོ་རིང་དུ་ཐའི་ཇིའི་སར་བང་ཆེན་དུ་ཕེབས་དུས། དེར་ཐའི་ཇིས་རྗེ་བཙུན་རིག་འཛིན་ཆོས་ཀྱི་འགྲོ་དོན་ཆེ་བ་ཨེ་འདུག་གསུངས་པར། དགེ་སློང་རབ་བརྟན་ནས་སྟོད་སོག་ཕྱོགས་ནས་འཁོར་བའི་སློབ་རིས་མ་གཏོགས་ཡུལ་ཕྱོགས་དེར་ཆོས་ཀྱི་འགྲོ་དོན་ནི་གང་ཡང་མི་འདུག་ཅིང་། འགྱུར་མེད་ཆོས་སྒྲོན་ཞབས་ཕྱིར་ཡོད། འགྱུར་མེད་གཡང་འཛོམས་དང་། དགེ་སློང་གྲགས་པ་སོགས་གཞན་རྣམས་ནི་ཞིང་ལས་བྱེད་ཅིང་ཡོད་ལགས་ཞེས་གསུངས་པས། དེར་ཐའི་ཇིས་ཨ་ཁ་ཁ་དེང་སང་གི་མི་འདི་ཚོ་བདག་ལ་དོན་མེད་ཀྱི་མགོ་གཡོགས་བཏང་འདུག །ད་བླ་མ་སྙིང་པོའི་དོན་ཁོ་ན་མཛད་པ་དེ་འོ་བརྒྱལ་དེར་བཞུགས་སུ་མ་འཇུག །འཕྲལ་དུ་འདིར་གདན་དྲོངས་ཤོག་གསུངས་པས་ཀོང་པོ་ནས་ལྷ་ལྡན་དུ་ཆིབས་བསྒྱུར། དེར་ད་ཇིན་བ་དུར་ཞྭ་སེར་མ་གཏོགས་རྙིང་མ་བར་རྗེས་གཏིང་ཞིག་ནས་གཞན་སྐྱོད་ཀྱིས་ཤིན་ཏུ་བརྣག་པའི་ཀོར་པ་དགེ་ཁོང་ནས་ཀྱང་བཀག་སྟེ་གཏེར་མ་རག་ལ་ཐུག་པའི་འཇིགས་སྐྲག་མི་དཔོན་གཡོག་ཚངས་མས་དབུ་ཞྭ་སེར་པོ་བཞེས་ནས་ཕེབས་པས། ཐའི་ཇིས་དེ་འདྲའི་ཟོན་གནང་མི་དགོས་རང་ལུགས་གང་ཡོད་གནང་ཆོག་གསུངས་པར་ཚང་མས་དབུ་ཞྭ་རང་ལུགས་སུ་བསྒྱུར་བ་མཛད། རྩེར་གོང་མ་འདྲེན་མཆོག་བློ་བཟང་སྐལ་བཟང་རྒྱ་མཚོའི་ཞབས་དྲུང་དུ་མཇལ་ཕྱག་ཏུ་ཕེབས་པའི་གཙུག་ཕུད་འབུལ་བ་མཛད་དེ་མཚན་རྗེ་བཙུན་ཤེས་རབ་སྒྲོན་མ་ཞེས་བསྩལ་ཏེ་མེ་ཏོག་ཀྱང་འཐོར་བར་མཛད། དེ་ནས་རྩེའི་འཕགས་པ་ལོ་ཀེ་ཤྭ་ར་དང་མཆོད་སྡོང་འཛམ་གླིང་རྒྱན་གཅིག་གིས་དབུས་གནས་རྟེན་རྣམས་ལ་སྙན་ཤལ་མཆོད་འབུལ་བོད་འབངས་བདེ་བའི་སྨོན་ལམ་དང་བཅས་མཛད་ཅིང་། དེ་ཞོར་འཕྲུལ་སྣང་གཙུག་ལག་ཁང་དང་ར་མོ་ཆེ་བཅས་པར་ཡང་དེ་མཚུངས་སུ་མཛད་ནས། རྡོ་རིང་དུ་ཐའི་ཇིའི་སར་ཞང་ཁྲོམ་གྱི་གཏེར་བྱོན་བྱད་གྲོལ་གསེར་གྱི་ལྡེ་མིག་ལེགས་ལྡན་རྗེའི་ཕྱག་བཞེས་མ་ལས་ཡབ་རྗེའི་ཁྱད་ཆོས་གདམས་པ་རྨད་དུ་བྱུང་བའི་ལས་སྦྱོར་དང་། འཆི་མེད་ཡང་སྙིང་ཀུན་འདུས་ཀྱི་སྒོ་ནས་སྐུ་ཚེའི་སྒྲུབ་པ་དང་ཚེ་དབང་བརྒྱ་རྩ། གཏེར་གསར་དྲག་དམར་གྱི་སྨིན་བྱེད་ཀྱི་དབང་དང་པོ་ཏིའི་ལུང་། ཤ་འུག་ལྷ་ཆེན་གྱི་རྗེས་གནང་དང་མེ་མཆོད་བརྒྱ་རྩ། རྡོར་སེམས་ཐུགས་སྒྲུབ་ཀྱི་སྒོ་ནས་ཞི་བའི་བསྲེག་ཆོག་འབུམ་སྡེ་རྣམས་མཛད་ཅིང་། དེར་སྐུ་ཡོན་གྱི་དངོས་པོ་གྱ་ནོམ་པའང་སྩལ། ཆིབས་བསྒྱུར་ལམ་ཞོར་དུ་སྐྱིད་ཤོད་ཆོས་ལུང་ཏ་ར་བའི་སར་ཚེ་དབང་དང་བཀའ་བསྒོ། སྐུ་ཞབས་གྲ་གཙང་གི་དགེ་བཤེས་ངག་དབང་པདྨ་ཅན་གྱིས་བརྟན་བཞུགས་ཕུལ་ཞིང་རྗེ་ཉིད་ཀྱི་བརྟན་བཞུགས་གསོལ་འདེབས་ཞུས་པའང་དོན་དཔག་པར་དཀའ་བའི་བཀའ་རྩོམ་མཛད་ནས་དལ་འགྲོས་ཀྱིས་རང་གནས་སུ་ཆིབས་བསྒྱུར། དེ་ནས་སྐུ་ཞང་ལྡུམ་པོ་བས་གདན་དྲངས་པས་ཞག་ཁ་ཡར་བཞུགས་ནས་དབང་བྱད་གྲོལ་ཆོས་སྲུང་གི་བསྐང་གསོ་དང་སྟེང་ཤོད་ཚང་མར་རབ་གནས་ཀྱི་མེ་ཏོག་འཐོར་ཞིང་ཆིབས་བསྒྱུར། དེ་སྐབས་ཆིབས་ལམ་དུ་བདག་གི་མ་རྒན་མོས་མཚོན་ཚང་མས་རྗེ་ཉིད་ཀྱི་མཇལ་ཕྱག་ཏུ་ཕྱིན་པར་ཁྲབ་མོ་རང་མགོར་ཞལ་མཇལ། དེར་བདག་ལོ་བརྒྱད་པར་ངོ་མཐོང་བས་ཚེ་འདི་ལ་རྗེ་བླ་མ་དམ་པ་བདེ་ཆེན་མཁའ་འགྲོའི་གཙོ་མོ་འདི་ཉིད་ཞལ་མཇལ་བའི་སྐལ་བཟང་གི་ཐོག་མ་ཡིན། དེར་ཕྲན་བུ་མོ་གཞོན་ཡང་ཞལ་ཁྱིམ་ཤིན་ཏུ་མཚར་ཞིང་ལྟ་ན་སྡུག་པའི་སྐུའི་གཟི་བྱིན་བལྟ་མི་བཟོད་པའི་ངང་ནས་མཆི་མ་མང་དུ་ཤོར་ཏེ་རྗེས་སྙེགས་ནས་ཕྱིན་ན་བསམ་པའི་དད་པ་རང་དབང་མེད་པ་བྱུང་། དེ་ནས་སྐྱབས་རྗེ་དཔོན་གཡོག་རྣམས་གྲྭའི་གཞུང་བརྒྱུད་དགོན་པར་ཕེབས། ཞལ་ངོ་རྣམས་དང་མཇལ་འཕྲད་མཛད་དེ་ཀླུ་སྡིངས་སུ་ལོ་གཅིག་བར་བསམ་གཏན་ལ་བཞུགས་སོ། །དེ་ནས་བཅད་རྒྱ་གྲོལ་བསྟུན་སྐལ་ལྡན་འགའ་ལ་ཐུགས་ཐིག་དང་། ཨ་ཏིའི་ཟབ་ཁྲིད་སྡེ་ཕུག་ནས་འགྱུར་མེད་ཚེ་དབང་ཕུན་ཚོགས་ལ་བྱད་གྲོལ་དང་ཚེ་དབང་རྣམས་སྩལ། མེ་རྟ་ལོ་དཱ་ཆིང་བ་དུར་དང་ལུམ་པ་བས་མཚོན་བཀའ་བློན་རྣམས་ནང་དུ་ཟིན་ཤིག་འཁོས་སུ་མ་ཕེབས་པའི་རྒྱུ་ལས་དབུས་གཙང་དུས་ཟིང་གིས་སྤྲེལ་ལོ་གཏེར་ལུང་དུས་བབས་དང་གསལ་གྱིས་དེ་ཡང་ཇི་སྐད་དུ། ལ་སྟོད་འབངས་མི་རྗེ་བོར་འཐོན། །ཞེས་པའི་མི་དབང་ཆེན་པོ་ཁྲི་ཐོག་ཏུ་ཕེབས་པའི་མངའ་དབང་རིན་ཆེན་རྒྱས་པའི་རྐྱེན་སེལ་ལ་མོས་གུས་ཆེན་པོའི་སྤྱན་ཞུ་དབང་འབུལ་ལ་རྗེ་གཅེན་རཏྣ་བི་ཛ་ཕེབས་བསྒྱུར། རྗེ་ཉིད་ནས་ཀྱང་ལེགས་འབུལ་རྒྱས་པར་སྩལ། དེ་ནས་སྐབས་ཤིག་མི་རྗེའི་སྲས་རྣམས་ཀྱི་ཡུམ་ལྷ་ལྕམ་ལྔ་ལམ་དུ་གཤེགས་པ་ལ་བོད་ཀྱི་བླ་མ་སངས་རྒྱས་དངོས་དང་མཚུངས་པའི་གྲགས་ཆེ་བ་རྣམས་དང་། སྡིངས་ཆེ་སྤྲུལ་སྐུ་དགེ་ལེགས་དཔལ་མགོན་རབ་བརྟན། བི་མའི་རྣམ་རོལ་རྗེ་རཏྣ་བི་ཛ། སྐྱབས་རྗེ་བླ་མ་བདེ་ཆེན་མཁའ་འགྲོའི་གཙོ་མོ་བཅས་པ་ལ་མི་རྗེས་ཚང་གྲུའི་ལུང་བསྟན་གྱི་ས་བོན་སྩལ་པས། ངེད་ཀྱི་ཨོ་ལོ་རྣམས་ཀྱི་མ་ཅུང་ཟད་མ་བདེ་བ་ལ་རིམ་གྲོ་ཇི་ལྟར་བྱས་ན་བཟང་སྩལ་པར་བླ་མ་གྲགས་ཆེ་བ་རྣམས་ཀྱིས་ལུང་དུ་རིམ་གྲོ་འདི་ལྟར་གནང་ན་བགེགས་མེད། སྐུ་བདེ་དྭངས་སུ་འགྱུར་བའི་ལུང་ལ་འཁེངས་པའི་རྫ་རི་འདིར་བས་ཐུགས་འཚེངས་བར་གྱུར་ཅིང་། སྡིངས་ཆེ་སྤྲུལ་སྐུ་དང་ཁྲི་ཆེན་རཏྣ་ཞབས་རྗེ་དམ་པ་འདི་གསུམ་གྱིས་ཞལ་མི་འཚོ་བའི་ལུང་གིས་བར་དོ་བགྲོད་པའི་བསགས་སྦྱངས་སོགས་མཛད་ན་རུང་བ་དང་། ཁྱད་པར་སྐྱབས་རྗེ་བླ་མ་བདེ་ཆེན་ཌཱ་ཀིའི་གཙོ་མོས་ཞི་བའི་སྦྱིན་སྲེག་འབུམ་ཚོ་དང་། རྡོར་སེམས་ཀྱི་སྐུ་འབུམ་ཚོ། ཨོ་རྒྱན་གྱི་སྐུ་པདྨ་མཐོང་གྲོལ་འབུམ་ཚོ་བཞེངས་པ་སོགས་གནང་ཚེ་བདེ་འགྲོའི་རྟེན་བཟང་ཐོབ་པ་ཤར་སྩལ་པར། མི་རྗེ་རང་དབང་མེད་པའི་དད་པས་སྡིངས་ཆེ་སྔར་ནས་དམ་ཕྲུག་ནག་པོ་ཡིན་པ་ལ་འདི་ལོ་ནས་དམར་པོ་གནང་ཆོག་པའི་ལུང་དང་ལེགས་སྐྱེས་བཟང་པོས་དབུགས་དབྱུང་བར་མཛད། ཁྲི་ཆེན་བླ་མར་བཀའ་དྲིན་འཇལ་བྱེད་དུ་མི་རྗེས་དབུ་གཙུག་ཏུ་ཁུར་བའི་འདུས་སྡེ་རྨད་དུ་བྱུང་བའི་བསྟི་གནས་བླ་བྲང་ཁག་གི་ཞིག་གསོ་ཁྱད་འཕགས་ཀྱི་བཀུར་གསོལ་དང་བླ་གྲྭ་ཚང་མར་མཆོད་བསྟོད། བཀུར་སྟིའི་ཞབས་ཏོག །སྐྱབས་རྗེ་དུས་གསུམ་ས་ལེར་མཁྱེན་པའི་ཡེ་ཤེས་མཁའ་འགྲོའི་གཙོ་མོ་བཀའ་དྲིན་མཉམ་མེད་མཆོག་ལ། མི་རྗེས་ཨོ་ལོའི་མ་ཁ་སྡིང་འདས་མོའི་ལུང་བསྟན་ཤིན་ཏུ་གསལ་ལ་བཙན་ས་འཕེལ་བའི་ལུང་རྣམས་སྒྲུབ་ཏུ་ཅིས་ཀྱང་ཆིབས་སྐྱོད་དགོས་པའི་ཞུ་བར་དེ་དོན་བཞིན། ཆོག་རོགས་ཞབས་ཕྱིར་གྲྭ་གཙང་གི་བགྲེས་གྲྭ་འགའ་བཅས་ཁྱོན་དཔོན་གཡོག་ཉི་ཤུ་སྐོར་དགའ་ལྡན་ཁང་གསར་དུ་ཆིབས་བསྒྱུར་བས་གོང་གི་རིམ་གྲོ་སོགས་མཛད། གཞན་ཡང་ཞབས་བརྟན་རིམ་གྲོ་སྣ་མ་འགགས་པ་བཅས་སྒྲུབ་ཏུ་ཟླ་གཅིག་ཞག་བཅོ་ལྔར་ཉེ་བའི་བར་སྒྲུབ་པ་གནང་ཞིང་། སྐུ་ཡོན་གྱི་དངོས་པོ་དཔངས་མཐོ་བའི་ཚུར་མི་འདྲོངས་པ་ལྟ་བུའི་སྐུར་གསོལ་བྱུང་ཞེས་དགེ་སློང་བཀྲས་དབང་སོགས་ཞབས་རིམ་པས་གསུངས་ཤིང་། ཁྱད་པར་བཀའ་བརྒྱད་སྨད་པའི་གྲྭ་ཕྱི་ཇུའི་མི་སེར་རྣམས་སྤྱིར་དཔལ་རི་བོ་དགའ་ལྡན་པའི་བསྟན་པ་ནམ་གནས་བར་དང་། གཙོ་བོར་རྗེ་བླ་མའི་སྐུའི་སྐྱེ་ཕྲེང་དང་བསྟན་ལར་འཇགས་གནས་གཡོ་མེད་ཀྱི་བཀའ་ཤོག་གོང་ས་ཡས་ཕྱིན་གཉིས་ཀས་བསྩལ་ཏོ། །དེ་ནས་རང་གནས་སུ་ཆིབས་བསྒྱུར་ཏེ་ཆོས་སྲུང་རྣམས་ལ་བསྐང་གསོ་དང་། གྲྭ་གཙང་དུ་མང་ཇ་འགྱེད་བཅས་བསྩལ་ནས་ལོ་གཅིག་བར་བཅད་རྒྱར་བཞུགས་སོ། །དེ་སྐབས་ཨོ་རྒྱན་སྨིན་གྲོལ་གླིང་གི་ཞིག་གསོའི་ཨར་ལས་ཚུགས་པས་མཆོད་རྟེན་ཙམ་མ་གཏོགས་གྲུབ་ཉེར་ཡོད། དེ་ནས་མཁའ་སྤྱོད་བདེ་ཆེན་གླིང་དུ་ཡུམ་དྲུང་ཕུན་ཚོགས་དཔལ་འཛོམས་ཀྱི་གཟིམ་སྤྱིལ་ཕྱིས་ལོ་ཆེན་དྷརྨ་ཤྲཱིས་བདེ་གཤེགས་ཀུན་འདུས་ཀྱི་བསྙེན་སྒྲུབ་མཛད་པ་ཉིད་ཧ་ཅང་རང་ཆུང་དྲགས་པས་རྗེ་བླ་མ་ཌཱ་ཀིའི་གཙོ་མོ་མཆོག་བཞུགས་བཞེད་ཀྱིས་གཟིམ་སྤྱིལ་གྱི་ཨར་ལས་ཚུགས་པའི་ཨར་དཔོན་དགེ་སློང་གྲགས་པས་མཛད་ཅིང་། དེ་གྲུབ་རྗེས་གཅེན་ཁྲི་རཏྣ་བི་ཛ་དང་། རྗེ་བླ་མ་དམ་པ་འདིས་དབུས་གྲྭ་གཙང་གི་དགེ་བཤེས་ཞལ་གྲངས་ཁ་ཤས་ཀྱིས་གཏེར་གསར་བླ་མ་ཞི་བའི་སྒོ་ནས་རབ་གནས་ཀྱི་ཆོ་ག་མཛད་ཅིང་མེ་ཏོག་འཐོར་བའི་ཚེ་ནམ་མཁའ་དྭངས་ཤིང་ཉི་ཁྱིམ་གྱི་འཇའ་སྐོར་འཆར་བ་སོགས་དགེ་བའི་མཚན་མའང་ཤར། དེ་ནས་གཙོ་བོར་གྲྭ་གཙང་ཚོགས་ཆེན་དང་སྐུ་ཞང་ཟུང་སྐུ་ཉེ་སོགས་ཀྱིས་མཚོན་མི་སེར་དང་ཡོན་བདག་དད་ཅན་རྣམས་ཀྱིས་ལེགས་འབུལ་རྒྱས་པར་བསྟབས། དེ་ནས་ལོ་གསུམ་གྱི་བར་སྐུ་གསུམ་གྱི་སྤྱོད་པ་ལས་མི་གཡོ་བའི་བཅད་རྒྱ་དམ་པར་བཞུགས་སོ། །དེའི་བར་ལ་གཏེར་གསར་དྲག་དམར་གྱི་ལྗགས་བསྙེན་སྐྱར་འདབ་དང་། གཙོ་བོར་རྫོགས་རིམ་ལ་མི་གཡེལ་བའི་ངང་ནས་ཐུན་མཚམས་ཀྱི་སྤྱོད་པ་དང་འབྲེལ་བའི་ཤ་འུག་གཏེར་བྱོན་ཐུགས་གཏེར་ཟབ་ལམ་བདེ་གཤེགས་ཀུན་འདུས་ཀྱི་ཕྱི་ནང་གསང་གསུམ་གྱི་བསྙེན་སྒྲུབ་སྨིན་པར་མཛད་ཅིང་། དེ་དག་གི་ཚེ་དགེ་བའི་མཚན་མ་བཟང་པོ་ཤར་བ་ནི་རྗེ་ཉིད་ཀྱི་སྐུའི་སྐྱེ་ཕྲེང་རྒྱ་བོད་གང་དང་གང་དུ་ཇི་ལྟར་འཁྲུངས་ཚུལ་གསལ་བར་གཟིགས་ཤིང་ཁྱད་པར་ཕྱི་སྒྲུབ་དང་། གསང་སྒྲུབ་ཀྱི་དུས་དཀྱིལ་འཁོར་གྱི་ལྷའི་ངོ་བོར་ལྷུན་གྱིས་འབྱམས་པའི་སྔ་དགོང་གི་ཐུན་འབྲེལ་བ་དང་། དཔལ་ཨོ་རྒྱན་ཆེན་པོ་དང་མཚོ་རྒྱལ་གྱིས་ཞལ་གཟིགས་པའི་སྔ་ཕྱིའི་སྐྱེ་ཕྲེང་གི་ལུང་དང་དེ་སྐབས་ཀྱི་གྲོགས་སོགས་ཀྱང་གསལ་བར་བསྟན་གསུངས། དེ་ལྟར་ལོ་གསུམ་གྱི་བཅད་རྒྱ་གྲོལ་རྗེས། སྐལ་བ་དང་ལྡན་པ་ལ་ཟབ་ལམ་བདེ་གཤེགས་ཀུན་འདུས་ཀྱི་ཟབ་ཁྲིད་ཐུགས་ཐིགམཁའ་འགྲོའི་སྙིང་ཐིག་རྣམས་ཀྱི་ཁྲིད་བཀའ་ཡང་བསྩལ་བ་ཡིན་གསུངས། དེ་ནས་རྗེ་བླ་མ་དམ་པ་མཆོག་དང་ལྕམ་ཡུམ་དང་ལྕམ་དཔལ་འཛིན་བཅས་དཔོན་གཡོག་ཚང་མས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་མཁའ་འགྲོའི་གནས་གཟིགས་སུ་ཕེབས། ཚོགས་བརྒྱ་དང་བོད་འབངས་བདེ་བའི་སྨོན་ལམ་མཛད་ཅིང་། དེར་མོན་བོད་ཀྱི་སྐྱེ་འགྲོ་དད་ཅན་མང་པོ་འདུས་པ་ལ་འཆི་མེད་ཡང་སྙིང་ཀུན་འདུས་ཀྱི་སྒོ་ནས་ཚེ་དབང་བསྩལ་ཅིང་སོ་སོའི་རེ་འདོད་སྐོང་བའི་ཆོས་དང་དམ་རྫས་ཀྱི་སྦྱིན་པས་ཚིམ་པར་མཛད་ནས་རང་གནས་སུ་ཆིབས་བསྒྱུར། དེ་ནས་སྐབས་ཤིག་རྗེ་བླ་མ་མཆོག་དང་གང་གི་ཡུམ་དང་ལྕམ་དཔལ་འཛིན་དཔོན་གཡོག་བཅས་པས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྟེན་བརྟེན་པར་བཅས་པ་ལ་ཕྱག་མཆོད་སྐོར་བཅས་དང་། མཆིམས་ཕུ་དང་གཡའ་མ་ལུང་རྣམས་ཀྱི་གནས་གཟིགས་སུ་ཕེབས་ཏེ་སྙན་ཤལ་མཆོད་འབུལ་བོད་འབངས་བདེ་བའི་སྨོན་ལམ་སོགས་མཛད་ཅིང་། དེའི་ཚེ་བསམ་ཡས་པེ་ཧར་ལྕོག་ཏུ་ཕེབས་དུས་རྡོ་སྐས་ཀྱི་གཤམ་དུ་ཆོས་སྐྱོང་ཐོག་བབས་སུ་ཕེབས་བསུར་བསྐྱོད་པའི་མཇལ་དར་ཕུལ་ཏེ་ཨོ་རྒྱན་ཆེན་པོའི་གཟུངས་མ་མཁར་ཆེན་བཟའ་འདྲེའི་གནས་རྟེན་དུ་ཕེབས་པ་ལེགས། བསྟན་འགྲོའི་དོན་དུ་ཞབས་པད་བརྟན་ཅིང་། དེའི་གདོང་གྲོགས་གཟུགས་མེད་ཀྱིས་ཀྱང་ཞུ་ཞེས་གུས་བསྟོད་ཞུས་ཏེ་བསམ་ཡས་ནས་རྡོའི་མདའ་བརྒྱུད་དེ་གདན་ས་མཐིལ་དང་། ཟངས་རི་ཁང་དམར་གྱི་གནས་གཟིགས་མཛད་པའི་ཚེ། ཁང་དམར་གྱི་གནས་སུ་སྔར་ཡུན་རིང་དུ་བཞུགས་པའི་བག་ཆགས་ཡལ་ཡུལ་དང་། གནས་ཚུལ་མ་ངེས་པའི་སྤྱོད་པ་ཡ་མཚར་བ་རྣམས་ཐུགས་དྲན་སོས་པའི་གད་མོ་ཤོར་བའང་བྱུང་གསུངས། དེ་ནས་འོལ་ཁ་ཆབ་ཚན་དུ་ཕེབས་པའི་ཞག་ཁ་ཡར་སོང་བ་ན། སླེ་ལུང་རྗེ་དྲུང་རིན་པོ་ཆེ་བློ་བཟང་ཕྲིན་ལས་གྲགས་ཆེ་བས་ཨོ་རྒྱན་ཡབ་ཡུམ་དངོས་ཀྱི་འདུ་ཤེས་དབུ་བརྙེས་པའི་བོད་འབངས་སྐྱེ་འགྲོ་མ་ལུས་རེ་ལྟོས་འཆའ་གྲགས་པའི་དབུ་ཚུགས་པས་སླེ་ལུང་ནས་སྤྱན་འདྲེན་ནན་གཅགས་ཞུས་པར་ཆིབས་བསྒྱུར་བའི་ཞག་གཉིས་སུ་བཞུགས་པའི་དུས་རྗེ་དྲུང་རིན་པོ་ཆེ་ནས་དེ་རིང་ཡེ་ཤེས་ཀྱི་མཁའ་འགྲོ་མ་རྣམས་འདུ་བའི་དུས་ཁྱད་ཀྱིས་བདུད་རྩི་མཆོད་པ་གནང་དགོས་ཞེས་གསུངས་པའི་ཆང་ནན་གྱིས་གྲངས་མི་མཆོད་པའི་ངང་ནས་བདུད་རྩིའི་མཆོད་པ་མཛད་སོང་བས་ཁོང་པ་རྣམས་ཆང་གིས་ར་རོ་ནས། དེར་རྗེ་དྲུང་དང་ལྷ་གཅིག་གཉིས་ནས་གཞས་དཔོན་མཛད་པའི་བཙུན་པ་དང་། བཙུན་མ། སྐྱེས་པ་དང་། བུད་མེད་བཅས་སྐྱ་སེར་མ་ངེས་པའི་གླུ་དང་བྲོའི་གཟིགས་མོ་ངོ་མཚར་ཅན་ཕུལ་བ་ལ་གཟིགས་ཤིང་། དེར་རྗེ་བླ་མ་དམ་པ་ཉིད་ནས་བདུད་རྩི་ཞལ་ཧུབ་གང་ཡང་མ་བཞེས་པ་ལ་ཆང་ཚབ་ཡིན་ཞེས་ཇ་རྒྱ་ཕོར་ཆེན་པོ་ཞིག་ལ་ཟངས་སྐྱོགས་ཤིག་བཙུག་སྟེ་ནན་གྱིས་ཞུས། དེར་དགེ་རྒན་དབུ་རབ་དང་། དགེ་སློང་བཀྲས་དབང་ནན་གྱིས་ཞུས་པས་བདུད་རྩི་མཆོད་ཅན་དེ་མི་བཞེས་ཀ་མེད་བྱུང་བར། དེའི་ཚུལ་ལས་ཕྱིས་དགོན་པར་སྒོམ་ཆེན་དོན་གྲུབ་དང་གསུང་ལེན་བྱུང་དུས་སྒོམ་ཆེན་ནས་དགེ་སློང་རབ་བསྟན་ལགས་འཚོ་ཆེ་ཞིང་། ཆང་བཏུང་པ་རང་གི་བླ་མའི་ཞབས་དྲངས། དོན་མེད་ལ་ངའི་བླ་མ་འགྲན་བྲལ་ནོར་ཉན་པ་དེ་འཆལ་པོའི་སར་ཁྲིད་ནས་ཅི་བྱེད་རྒྱུ་ཡིན་ཞེས་ཕར་ཕར་མཛད་པར། དེར་དགེ་སློང་ནས་རྗེ་དྲུང་རིན་པོ་ཆེ་དབུ་ཚུགས་ཆེས་པའི་ཁར་དེ་རིང་ཡེ་ཤེས་ཀྱི་མཁའ་འགྲོ་མ་རྣམས་སྤྲིན་ལྟར་འདུ་བའི་དུས་ཆེན་ཡིན་པས་བདུད་རྩི་མ་བཞེས་ན་ངན་སོང་དུ་འགྲོ་ཚུལ་གསུངས་པས། དེ་ནས་ཆང་ཕོར་པ་དོ་འོ་ན་འཐུང་དགོས་གསུངས་ཤིང་གཟིམ་དཔོན་འགྱུར་མེད་ཆོས་སྒྲོན་དང་འགྱུར་མེད་གཡང་འཛོམ་སྟེ་ཉེ་གནས་བཙུན་མ་གཉིས་ཙམ་མ་གཏོགས་ཡུམ་དྲུང་དང་། ལྕམ་དཔལ་འཛིན་སོགས་དཔོན་གཡོག་དེ་བྱིངས་རྣམས་སྦིར་རོ། །ནངས་པར་སྔ་བར་བཞེངས་ནས་ཉང་པོ་གྲུ་བརྒྱུད། དཔལ་ཁྲ་འབྲུག་དང་། ཡར་ཀླུང་རྒྱུད་ཀྱི་ཚེ་ཆུ་འབུམ་པ་དང་། ཤེལ་བྲག་སོགས་ཀྱི་གནས་གཟིགས་དང་ཁྱད་པར་ཤེལ་ཕུག་ཏུ་རང་གཏེར་བླ་མ་ཞི་བ་ཚོམ་བུ་ཚོགས་སྒྲུབ་ཀྱི་དཀྱིལ་འཁོར་ཞལ་དབྱེ་བའི་སྐོར་དང་འབྲེལ་བའི་ཚོགས་བརྒྱ་དང་། བོད་འབངས་བདེ་བའི་སྨོན་ལམ་མཛད་ཅིང་ཁྱད་པར་པདྨ་ཤེལ་ཕུག་ཏུ་དག་པའི་སྣང་བ་ངོ་མཚར་ཅན་དང་ཕྱིས་བོད་འབངས་ཇི་ལྟར་འབྱུང་གྱུར་གྱི་ལུང་རྣམས་ཅུང་ཟད་ཤར་གསུངས། དེ་ལྟར་གནས་ཆེན་དེ་ཉིད་དུ་ཞག་གསུམ་བཞུགས་ནས་རང་གནས་སུ་ཆིབས་བསྒྱུར་བ་ཡིན་ནོ། །དེ་དུས་སྟོད་ནས་ཡབ་རྗེའི་ཞལ་བློན་གསེར་ཟངས་གྲུབ་ཆེན་འགྱུར་མེད་ཀློང་གྲོལ་གྱི་ལྕམ་ཡུམ་དང་སྲས་ལྕམ་སྲིང་གཉིས་བཅས་དགོན་པར་ཕེབས་པར་མཇལ་འཕྲད་མཛད་ཅིང་གཏེར་གསར་ཚང་མའི་ཟབ་ཁྲིད་ལུང་བཅས་པའང་སྩལ། ཆུ་ཕོ་བྱི་ལོ་དགུང་ལོ་སོ་བཞིར་ཕེབས་དུས་ཡབ་རྗེའི་ཞལ་སློབ་ལ་སྟོད་ཕྱོགས་ནས་བྱ་བཏང་རྣལ་འབྱོར་གྱི་དབང་ཕྱུག་འགྱུར་མེད་རྣམ་གྲོལ་དང་། འགྱུར་མེད་མཐར་ཕྱིན་སོགས་བྱ་བཏང་མང་པོས་ལ་སྟོད་ཀྱི་དངོས་ཆས་ཀྱི་འབུལ་བ་བཟང་པོ་བཅས་འབྱོར་བར་མཇལ་ཁ་དང་། ཤ་འུག་གཏེར་བྱོན་མཁའ་འགྲོའི་ཟབ་ཁྲིད་གསུང་བའི་ཚེ། ཡབ་རྗེའི་ཞལ་སློབ་ཡང་གྲོང་ནས་སྡེ་པ་འགྱུར་མེད་བསམ་གཏན་མཆོག་གྲུབ་ཀྱིས་གསོལ་བ་བཏབ་པའི་ངོར་མཁའ་འགྲོ་གསང་བ་ཡེ་ཤེས་ཀྱི་ཁྲིད་ཡིག་ཟབ་གནད་གསལ་སྒྲོན་བཀའ་རྩོམ་མཛད་ཅིང་བཀའ་ཁྲིད་གྲོལ་བསྟུན་སྟོད་དུ་ཐོན་མིའི་བྱ་བཏང་རྣམས་ལ་འདི་དང་ཕྱི་མའི་ཞལ་ཏ་དཔྱིས་ཕྱིན་པ་ལྷུག་པར་བསྩལ་ནས་ལོ་གསུམ་གྱི་བར་སྒོ་གསུམ་ལས་མི་འདའ་བའི་བཅད་རྒྱ་དམ་པར་བཞུགས་སོ། །མེ་འབྲུག་ལོ་མི་དབང་འགྱུར་མེད་བསོད་ནམས་སྟོབས་རྒྱས་ཀྱིས་གཅེན་རཏྣ་བི་ཛའི་ཞབས་དྲུང་དུ་བདག་གི་བསྟན་པའི་དུས་འོལ་ཁ་རྗེ་དྲུང་འདི་ཕན་ཐོགས་པ་ལ་དགེ་ལུགས་པས་ཀྱང་སྤྱན་འདྲེན་གྱི་འདུག་པར་ཆོས་ལུགས་ནི་ཁྱེད་རང་ཚོའི་ཡིན་མོད་སྤྱན་མི་འདྲེན་པ་ཅི་ཡིན་གསུངས་པར། དེར་གཅེན་གྱི་ཞལ་ནས་གྲྭ་གཙང་ཆུད་ཟོས་དོགས་པ་བྱུང་། འོ་ན་གདན་དྲངས་ཆོག་གསུངས་ཏེ་དགོན་པར་ཕེབས་གྲུབ་མ་ཐག་པར་གྲ་འགྲིག་གནང་བའི་ཟླ་བ་གསུམ་པའི་ཚེས་འགོར་སྤྱན་འདྲེན་གནང་རྩིས་ཀྱིས་ཐུགས་སྲས་དང་བཅས་གདན་དྲངས་པའི་སེར་སྦྲེངས་ཀྱི་བཀུར་སྟི་དང་བཅས་པའི་ཕེབས་བསུས་ཆོས་འཁོར་ལྷུན་པོའི་གཟིམ་ཆུང་ཀུན་བཟང་ཕོ་བྲང་དུ་སྤྱན་དྲངས་པའི་ཁྲི་བཀོད་ཕུན་སུམ་ཚོགས་པ་ལ་རྗེ་དྲུང་ཡབ་ཡུམ་བཞུགས་སུ་གསོལ། རྗེ་གཅེན་རཏྣ་བི་ཛས་དབུས་གཅུང་ཉེ་བའི་མགོན་པོ་དང་བཅས་བླ་གྲྭ་ཚང་མས་ལེགས་གསོའི་མཇལ་དར་གྱིས་སྣ་དྲངས་ཕྱག་མཆོད་གུས་བསྟོད་ཀྱི་ངང་ནས་བདུད་རྩིའི་མཆོད་པ་མཛད་པར། དེར་ཁོང་དཔོན་གཡོག་སྐྱ་སེར་བུད་མེད་བཅས་མ་ངེས་དྲུག་ཅུ་སྐོར་ཙམ་གྱིས་ཐུགས་སྤྲོའི་གླུ་གཞས་ཀྱིས་དགོན་པ་ཁྱབ་ཅིང་། དེ་དག་གི་ཚེ་སྐྱབས་རྗེ་བླ་མ་ཌཱཀིའི་གཙོ་མོ་སྐུ་བཅད་རྒྱ་གྲོལ་བའི་ཞབས་ཕྱིར་དགེ་མཁན་རབ་བརྟན་རྒྱའུ། དགེ་སློང་བཀྲས་དབང་དང་། དགེ་སློང་གྲགས་པ། གཟིམ་དཔོན་འགྱུར་མེད་ཆོས་སྒྲོན་དང་། འགྱུར་མེད་གཡང་འཛོམ་བཅས་རྫུ་བག་སྤངས་པའི་མཇལ་ཁར་ཕེབས་པར། དེར་རྗེ་དྲུང་རིན་པོ་ཆེ་ནས་སྐྱབས་རྗེ་བླ་མ་དམ་པར་ཆོས་འབྲེལ་ཞིག་དགོས་གསུངས་པར་གུ་རུའི་བླ་མའི་རྣལ་འབྱོར་གྱི་ལུང་དང་འབྲེལ་བའི་དམིགས་ཁྲིད་ཞིབ་པར་བསྩལ། དེར་རྗེ་དྲུང་ནས་སྨིན་གླིང་རྗེ་བཙུན་རིན་པོ་ཆེ་དང་ང་རང་གཉིས་སྐུ་ཚེ་འདི་ལ་ཐབས་ཤེས་ཟུང་འཇུག་གི་རྟེན་འབྲེལ་འགྲིག་ན་མཐའ་དམག་མི་ལོ་ལྔ་བརྒྱའི་བར་དུ་བཟློག་པའི་རྟེན་འབྲེལ་གྱི་ལུང་བསྟན་ངེས་པ་ཅན་ཡོད་གསུངས་པར། སྐྱབས་རྗེ་བླ་མ་དམ་པ་བདེ་ཆེན་ཌཱ་ཀིའི་གཙོ་མོས་ངས་དེ་འདྲ་མི་ཡོང་། གཏེར་ཆེན་དེ་ཉིད་དེས་གཞན་ཁྱོད་རང་གིས་གང་ཡང་མི་ཡོང་ལུས་ཟུངས་ཐུབ་པ་གྱིས་ལ་རྫོགས་པ་ཆེན་པོའི་ཉམས་ལེན་སྙིང་ལ་བཅང་སྟེ་བསྒོམ་པས་དད་ལྡན་གྱི་འགྲོ་བ་ཕོ་མོ་རྣམས་དམ་པའི་ཆོས་ལ་དཀྲི་བའི་འདུན་པ་ཡང་དག་གྱིས་ཕེབས་བྱུང་ཞེས་སྐུ་ཧར་གྱིས་བཞེངས་པའི་ཚེ། རྗེ་དྲུང་ནས་འོ་ན་བདེ་ཆེན་གླིང་མཇལ་དུ་ཡོང་དགོས་འདུག་ཅེས་གསུངས་པར། སྐྱབས་རྗེ་བླ་མས་ཕེབས་གཞན་འདྲ། དགེ་སློང་གྲགས་པས་ལྕི་བུ་རང་ཤོག་བརྒྱབ་པ་མ་གཏོགས་མཇལ་དུ་གང་ཡང་མེད་གསུངས་ཏེ་དེ་མ་ཐག་པར་རང་གནས་སུ་ཕེབས་སོ། །དེ་དག་གི་ཚེ་ཡབ་རྗེའི་ཞལ་སློབ་ཟླ་བྲལ་བ་སྒོམ་ཆེན་འགྱུར་མེད་དོན་འགྲུབ་འབྲས་བུ་ནས་སྐུ་མཚམས་གྲོལ་ཏེ་སྒྲུབ་སྡེ་བསམ་གཏན་རྩེའི་འོག་བསྟན་མའི་སྐུ་མཁར་གྱི་སར་གཟིགས་རྟོག་ཏུ་ཕེབས་པར། ཐོག་མར་རྗེ་དྲུང་དཔོན་གཡོག་རྣམས་དགོན་གཤམ་ནས་ཡར་ཕེབས་དུས་ནམ་མཁའ་དྭངས་བ་ཡོད་ཀྱང་སྤང་ཆུང་ཤར་གྱི་ལྷ་མོའི་སྐུ་མཁར་གྱི་ཐོག་གི་ནམ་མཁར་སྦྲིན་ནག་ཞྭ་སྒོར་ཙམ་འདུག་པར། དེ་མ་ཐག་པར་ཆེར་ཆེར་པའི་བྱ་ཕོ་ལ་ཉག་ནས་དེའི་བར་གྱི་ཕན་ཚུན་སྤྲིན་གྱིས་ཁེབས་པའི་སེར་དྲག་དྲག་པོ་གློ་བུར་བབས་པ་ཞག་གཉིས་ཙམ་མ་ཞུ་བས་སེར་སྦྲེངས་ཀྱི་སྐུ་ཆས་སོགས་ཀྱང་ཆུད་ཟོས་པའི་འབྲུག་སྒྲ་སྒྲོག་ཅིང་ཐོག་སེར་དྲག་པོས་བརྡུངས། དེ་རྗེས་བདེ་ཆེན་ཌཱ་ཀིའི་གཙོ་མོ་དཔོན་གཡོག་རྣམས་ལྷ་དྲུག་སྒང་འཁྱིལ་གྱི་སར་མཇལ་ཁར་ཕེབས་བྱུང་བར་སྒོམ་ཆེན་ནས། འོ་གཏེར་བདག་གླིང་པའི་སྙིང་པོའི་བསྟན་པ་འཛིན་པ་ལ་བཙུན་མ་ནོར་ཉན་པ་གཅིག་རང་འདུག །དེ་དེ་རིང་ཐག་གཅོད་ཀྱི་ཡིན་འདུག་ཅེས་བྲང་གསུམ་བཞི་ཞིག་གི་བརྡུང་ངུས་ནས་སྡོད། ད་དུང་བལྟ་ཞིང་བསྡད་པར་ཇ་ཡུན་གཅིག་མ་སོང་ཙ་ན་བཙུན་མ་མོ་ནི་སྐུ་འབུམ་ཚད་སྒང་གི་སར་དམར་གཙུག་དོན་བྱུང་བས་བློ་བདེ་ནས་ད་ཨའུ་ཙི་འདུག་སྙམ་ནས་ང་རང་གི་སྒོམ་ཁང་དུ་ལོག་ཡོང་གསུངས། དེའི་ནུབ་མོ་ནས་རྗེ་ཉིད་སྐུ་བཅད་རྒྱར་བཞུགས་སོ། །དེའི་སང་ཉིན་གྲྭ་གཙང་ནས་ཚེས་བཅུའི་འཆམས་ཕུད་ཀྱི་གཟིགས་མོ་དང་། ནང་རྟེན་ཁྱད་པར་བའི་གཟིགས་རྟོག་འབུལ་བར་མཛད་པའི་རྗེ་རཏྣ་བི་ཛས་ཤ་འུག་གཏེར་བྱོན་གྱི་གཏེར་སྒྲོམ་ཞལ་དབྱེ་བར་མཛད་དེ། ཨ་དམ་མ་བཅོ་ལྔ་འབུལ་བར་མཛད་ནས་ཤོག་སེར་འདི་ནས་ཐུགས་ལ་གང་དགའ་གཅིག་བཞེས་པ་ཞུ་གསུངས་པར། དེར་རྗེ་དྲུང་ནས་རྟེན་འབྲེལ་གྱི་ཁྱད་བཅས་ལོངས་སྐུ་ལུང་བསྟན་འདི་ཞུ་གསུངས་ཏེ་མཚོ་རྒྱལ་གྱི་ཕྱག་བྲིས་མའི་ཤོག་སེར་མ་ཡིག་ལོངས་སྐུ་ལུང་བསྟན་དུས་གསུམ་གསལ་བྱེད་དེ་བཞེས་སོང་བས་རང་རེའི་གྲྭ་བགྲེས་རྣམས་ཤིན་ཏུ་འཕྲེང་བའི་ཁྲི་ཆེན་ཉིད་ལ་ཞབས་བརྟན་ལྐོག་མའང་མང་དུ་གསུངས་སོ། །འདི་སྐབས་ཆོས་སྲུང་མཐུན་མིན་གྱི་རྐྱེན་ལས་ཁྲི་ཆེན་ཉིད་གློ་བུར་དུ་སྐུ་རྟེན་པའི་ཚ་འཇིགས་ལྟ་བུའི་བླ་གྲྭ་ཚང་མར་འཇིགས་སྐྲག་དང་སྙེང་མདོ་དཔོན་སློབ་སོ་སྟོན་མཐུ་སྟོབས་རྣམ་རྒྱལ་ལ་གཏེར་བདག་དྲག་བཙན་དམར་པོ་ཁོག་བརླམས་ཀྱིས་དམ་རྩིའི་གཏུམ་རྔམས་ཀྱང་བསྩལ་ཏོ། །དེ་ནས་དེའི་ནམ་ཞོགས་རྗེ་དྲུང་དཔོན་གཡོག་རྣམས་གླུ་སྒྲ་རྒྱུན་མ་ཆད་པར་ཆིབས་བསྒྱུར་བའི་དགོན་གཤམ་ནས་རྗེ་བླ་མ་དམ་པའི་བཞུགས་གནས་མཁའ་སྤྱོད་བདེ་ཆེན་གླིང་གཟིགས་པ་ན། དེར་རྗེ་དྲུང་སྤྲུལ་སྐུས་ཚེ་འདི་ལ་མཁའ་སྤྱོད་བདེ་ཆེན་གླིང་མཇལ་བའི་སྐལ་བ་མི་འདུག་ཅེས་རྒྱང་ཕྱག་མཆོད་འབུལ་མཛད་དེ་ཆིབས་བསྒྱུར་ཏོ། །དེའི་དུས་གྲྭ་གཙང་ཚོགས་ཆེན་དུ་ཉི་གཞོན་མའི་གསོལ་ཁ་འཛུགས་པས་དེའི་རྐྱེན་ལས་གྲྭ་གཙང་ཤག་ཆད་མང་ཞིང་དེ་དུས་བསླབ་པར་སྐྱོན་བྱུང་བའི་གྲྭ་པ་བཅུ་སྐོར་ཙམ་ཕྱིར་ཕེབས་དགོས་པ་དང་། ཟངས་མཚོའི་རུ་བ་རྣམས་ལ་གློ་བུར་དུ་གོར་ཤོར་བའི་རྫི་བ་སོགས་གཉེར་ཚང་དུ་ཡོང་ཆོག་པ་ལ་རྗེ་བླ་མ་བདེ་ཆེན་ཌཱ་ཀིའི་གཙོ་མོའི་གཟིགས་སྣང་དུ་སྲོད་དྲག་པོའི་གདོང་ཞིང་སྐྱོང་མ་མོས་སྔོན་རིག་འཛིན་གོང་ནས་བསྟེན་པའི་སྲུང་མས་མི་ཆོག་པ་འདུག་ན་ངེད་རྣམས་མཁའ་སྤྱོད་དུ་ལོག་ཕྱིན་པས་ཆོག་ཅེས་གསུངས་པས། དེ་ནས་འཇོག་པ་གནང་བས་གྲྭ་གཙང་ཤག་ཆད་ཆུང་ལ་ནང་བཀྲ་ཤིས་པ་ཞིག་བྱུང་སོང་། འདི་དུས་དཀྲི་ཞིང་ཞོང་སྟེ་སྤྲུལ་སྐུ་དཔོན་པོ་ལ་གཏེར་གསར་ཨ་ཏི་ཟབ་དོན་སྙིང་པོ་དང་། རྡོར་སེམས་ཀྱི་གཅོད་ཁྲིད། དཀོན་མཆོག་སྤྱི་འདུས་རྣམས་ཀྱི་ཟབ་ཁྲིད་སྩལ་ཅིང་། དཀོན་མཆོག་སྤྱི་འདུས་ཀྱི་ཁྲིད་ཡིག་གསར་རྩོམ་ཞུས་པའང་བཀའ་རྩོམ་མཛད། དེ་ནས་རྒྱ་རིར་སྤྱན་འདྲེན་ཞུས་པའི་བདུད་རྩི་སྨན་གྱི་སྒྲུབ་པ་མཛད་ཅིང་སྐུ་ཡོན་གྱི་དངོས་པོ་བཀུར་སྟི་གཟེངས་བསྟོད་མཛད། དེ་ཞོར་སྒང་ཐོག་ཏུ་སྤྱན་དྲངས་པས་དབང་ཆོས་སོགས་སྩལ་ཏེ་རང་གནས་སུ་ཕེབས་ཏེ་བཅད་རྒྱར་བཞུགས། མེ་སྦྲུལ་ལོ་རྗེ་བླ་མ་བཀའ་དྲིན་མཚུངས་མེད་དགུང་ལོ་སོ་དགུར་ཕེབས་ཚེ་མི་རྗེས་གསོལ་བ་བཏབ་པའི་ངོར་སླར་ཡང་ཤ་འུག་སྟག་སྒོར་ཆིབས་བསྒྱུར་བའི་བསྟན་འགྲོའི་བདེ་ཐབས་ཀྱི་ཆེད་དུ་བདེ་གཤེགས་ཀུན་འདུས་ཀྱི་སྒོ་ནས་ཞི་རྒྱས་ཀྱི་སྦྱིན་བསྲེག་དང་ཚོགས་བརྒྱ་རབ་གནས་ཐོག་མཐའ་དབུས་བདེ་བའི་ཐུགས་སྨོན། མཁའ་འགྲོའི་མེ་མཆོད། བརྒྱགས་བརྔན་དང་འབྲེལ་བའི་བཀའ་གནན་རབ་འཇིགས། ཆོས་སྲུང་སྤྱི་དང་ཁྱད་པར་ལྷ་ཆེན་སྨན་བཙུན་རྡོར་ལེགས་རྣམས་ཀྱི་བསྐང་གསོ། འཕྲིན་བཅོལ་གཉེར་གཏད། གཏེར་གནས་ཀྱི་བྲག་རྩེར་རྒྱལ་མཚན་དང་ཕན་ཚུན་འབྲེལ་བའི་དཀར་པོ་རྒྱང་གྲགས། བདེ་གཤེགས་ཞི་ཁྲོ་འདུས་པའི་མཚོ་ལ་གསེར་སྲང་གང་དང་རྒྱ་དངུལ་སྲང་གསུམ་གྱིས་མཚོན་པའི་རིན་ཆེན་སྣ་ལྔ་དང་། དར་ཡུག་ཁ་དོག་ལྔ་ལྡན་སོ་སོ་ནས་ཡུག་རེ་བཅས་པས་སྣ་དྲངས་པའི་བསྟན་འགྲོ་སྤྱི་དང་ཁྱད་པར་རྒྱལ་དབང་མཆོག་དང་མི་རྗེ་ཡབ་སྲས་ཀྱི་བདེན་སྨོན་བོད་འབངས་བདེ་བའི་མངའ་གསོལ་གྱི་དར་དཀར་ཡུག་ལ་བཀའ་རྩོམ་དང་། གསེར་སྐྱེམས་སྨོན་ལམ་དང་བཅས་པ་སྩལ་ཅིང་། དེར་ཚོགས་མོན་བོད་ཀྱི་སྐྱེ་འགྲོ་དད་ཅན་རྣམས་ལ་འཆི་མེད་ཚེ་དབང་དང་། ཆོས་དང་དམ་རྫས་ཀྱི་སྦྱིན་པས་ཚིམས་པར་མཛད་ནས་ཆུར་ལས་ཆིབས་བསྒྱུར། མཚོ་སྣ་ལས་དཔོན་གསུམ་གྱིས་བཏུད་དེ་གསོལ་བ་བཏབ་པའི་ངོར་ཚེ་དབང་སོགས་སོ་སོ་གང་འདོད་ཀྱི་ཆོས་སྩལ་རེ་འདོད་སྐོང་བར་མཛད། ཁྱད་པར་མདོ་མཁར་ཕྱག་མཛོད་ནས་བྱང་ཆུབ་བར་གྱི་སྐྱབས་གནས་ཞུས་པའི་འབྲི་གཡག་གི་འབུལ་བ་སོགས་དཔག་མེད་ཕུལ་བའི་དགེ་ཚོགས་བྱང་བསྔོ་མཛད། དེ་ནས་དལ་འགྲོས་ཀྱི་ཆིབས་བསྒྱུར་བའི་ཞར་བྱུང་སྨན་བརྗིད་དགོན་དུ་གདན་དྲངས་པར་བརྟན་བཞུགས་རྒྱས་པར་ཕུལ་ཞིང་། དེ་ནས་དུར་ཁྲོད་དུ་ཆིབས་བསྒྱུར་ཏེ་རབ་གནས་ཀྱིས་མེ་ཏོག་འཐོར་ཞིང་། དེའི་ཕྱི་དྲོ་བདག་ལ་གཏེར་གསར་དྲག་དམར་གྱི་གཏེར་གཞུང་གི་ལུང་སྩལ་བའི་བཀའ་དྲིན་ཐོབ། མར་ལམ་ལྡུམ་པོར་དབང་དང་ཆོས་སྲུང་གི་བསྐང་གསོ་མཛད་ཅིང་། ཆིབས་ལམ་དུ་ཕུག་དཔོན་པ་ཨ་སྙིང་ནས་གདན་དྲངས་པའི་ཚེ་དབང་སྩལ་ཅིང་དེ་ནས་རང་གནས་སུ་ཆིབས་བསྒྱུར་བའི་གྲྭ་གཙང་དུ་མང་འགྱེད་དང་། ཆོས་སྲུང་རྣམས་ལ་གཏང་རག་གི་བསྐང་གསོ་དང་། མི་རྗེར་དེ་ཚུལ་གྱི་འཚམས་ཞུ་ཞུ་འཕྲིན་སྩལ་བར་ཆིབས་སྒ་བཅས་སྤུས་ལེགས་ཀྱིས་མཚོན་པའི་ལེགས་སོའི་འབུལ་སྩལ་ཅིང་བཅད་རྒྱར་ལོ་གཅིག་བཞུགས་སོ། །ས་རྟ་དགུང་ལོ་བཞི་བཅུར་ཕེབས་ཚེ་བཅད་རྒྱ་གྲོལ་བའི་ཟླ་བ་གསུམ་པའི་ཚེས་བརྒྱད་ནས་ལྔ་པའི་ཚེས་བཅོ་བརྒྱད་ཀྱི་བར་བདག་སོགས་སྐལ་ལྡན་གྱི་རྡོ་རྗེའི་སྤུན་གྲོགས་ཉིས་བརྒྱ་དང་བདུན་ཅུ་སྐོར་ལ་བཀའ་གསང་རྫོགས་ཆེན་རྡོ་རྗེའི་ཐོལ་གླུ་ཨ་ཏི་ཟབ་དོན་སྙིང་པོའི་དབང་ཁྲིད་ལུང་དང་བཅས་སྩལ་བའི་བཀའ་དྲིན་ཐོབ་ཅིང་། དེ་རྗེས་ཐུགས་ཐིག་དང་། རྡོར་སེམས་ཐུགས་སྒྲུབ། བདེ་གཤེགས་ཀུན་འདུས་དང་བཅས་པའི་དབང་ཁྲིད་ལུང་བཅས་གདམས་པ་ཆ་ལག་ཚང་བར་སྩལ་ནས་བདག་ལ་ཁྲིད་གཉེར་བྱེད་དགོས་ཀྱི་བཀའ་ཕེབས་ཤིང་། འཕྲུལ་འཁོར་བསླབ་སྦྱོང་སྩལ་ཏེ་འཕྲུལ་འཁོར་ནུབ་པ་ལ་དཀའ་ཚེགས་མེད་པས་ཁྱོད་ཤེས་རབ་དང་བརྩོན་འགྲུས་ཆེ་བས་ས་བོན་བྱེད་དགོས་འདུག །དེ་ནས་སྒོམ་ཆེན་ལགས་སྐུ་ན་ཕེབས་སྟབས་རེ་ཞིག་ཀླུ་ཁང་གྲུབ་ཆེན་པའི་སར་སློབས། སླར་ང་རང་ནས་ཞུས་དག་གཏོང་གི་ཡིན་ཕེབས། དེར་འབྲས་ཕུར་ཀླུ་ཁང་པའི་སར་ཟླ་གཅིག་ཙམ་བསླབས་རྗེས་རྗེའི་ཞབས་པད་དུ་འཕྲུལ་འཁོར་གྱི་རྒྱུགས་ཕུལ་བས། བཀའ་ལས་དེ་ག་བསླབས་བྱུང་ངམ་ཀླུ་ཁང་པ་འཕྲུལ་འཁོར་ལེགས་པོ་འདུག་ཅེས་པ་མ་གཏོགས་ངས་མ་མཐོང་། རིག་འཛིན་སྲོག་སྒྲུབ། ཕག་མོ་ཟབ་རྒྱ་བདེ་གཤེགས་བཅས་ཟློས་ནས་མི་འདུག །ད་རེ་ཞིག་སྒོམ་ཆེན་ལགས་སུ་མི་ཞུ་ཀ་མེད་འདུག་གསུངས། གསོལ་ཇ་དང་ཕྱག་བྲིས་བཅས་རྫོང་བདའ་སྩལ་བས་ཞག་ཉི་ཤུ་ཙམ་རྩལ་སྦྱོང་བྱས་ནས་རྒྱུགས་ཕུལ་བར་དེ་ཉིན་རྗེ་ཉིད་ཤིན་ཏུ་མཉེས་པས་ད་རེས་དེ་ག་ཡིན་འདུག་གསུངས། དཔའ་དར་གྱི་གནང་སྦྱིན་ཡང་སྩལ་ཅིང་བཀའ་ལས། ད་ཁྱོད་རང་བདེ་འདུས་འདི་རང་གཏེར་ཕ་ཆོས་ཀྱི་གཙོ་བོ་ཡིན་པས་འཕྲུལ་འཁོར་གཞན་མ་བསླབས་པར་འདི་གཙོ་བོར་གཟུང་ལ་གཞན་དང་མ་འདྲེས་པ་བྱེད་དགོས་ཞེས་རྗེས་གནོན་ཆེ་ཙམ་བཀའ་ཕེབས། དེ་དུས་བདག་སོགས་འགས་བླ་མ་ཇི་ལྟར་བསྟེན་ཚུལ་གྱི་སྤང་བླང་རྣམས་ཞུས་པར་ཞིབ་ཏུ་སྩལ་རྗེས། ངེས་དོན་སྟོན་པའི་རང་སེམས་དབྱེར་མེད་ཀྱི་བླ་མ་དེ་དངོས་འཛིན་བརྡོས་བཅས་ད་ལྟའི་རྣམ་པར་བལྟས་ན་ལྟུང་བ་ངེས་པར་འཕོག་པར་གསུངས་པས། དེ་ནས་ལས་དང་པོ་བས་ཐོག་མར་དེ་དག་དཀའ་ཡང་། ངོ་བོ་ད་ལྟའི་སྐུའི་རྣམ་པ་དེ་མོས་པས་ཡེ་ཤེས་ཀྱི་སྐུར་རྒྱས་འདེབས་དགོས་པས་དེ་དག་གི་སྤང་བླང་མ་བརྗེད་པར་སེམས་ལ་ཞོག་གསུངས་ཤིང་། བདག་ལ་འཆི་མེད་ཡང་སྙིང་ཀུན་འདུས་ཀྱི་སྒྲུབ་ཐབས་ཀྱི་ལུང་དམར་ཁྲིད་ཕྲ་ཞིབ་ཏུ་སྩལ་ཅིང་། དེ་ཞོར་ཐུགས་ཐིག་རིན་ཆེན་བླ་མའི་ལས་བྱང་གི་དམིགས་ཁྲིད་ཀྱང་སྩལ། འདི་སྐབས་འབྲས་ལྗོངས་རྫོགས་ཆེན་པ་ཕེབས་ཏེ་མཇལ་འཕྲད་མཛད། དེ་ནས་མདོ་ཁམས་ནས་ཏྲེ་བོ་བླ་མ་རྟ་མགྲིན་ཕེབས་པའི་གཏེར་གསར་ཚང་མའི་དབང་ཁྲིད་ལུང་དང་། བི་སྙིང་དང་བླ་མ་ཡང་ཐིག་མཁའ་འགྲོ་སྙིང་ཐིག་ཡང་ཐིག་རྣམས་ཀྱི་དབང་ཁྲིད། མ་གཅིག་གཅོད་ཡུལ་དབང་དང་ནམ་མཁའ་སྒོ་འབྱེད་ཀྱི་ཁྲིད། དོང་སྤྲུགས་དང་ཁྲོས་ནག་གི་དབང་བཅས་རྒྱས་པར་སྩལ་ཏེ་ལོ་གཅིག་བར་བཅད་རྒྱར་བཞུགས་སོ། །དེ་ཕྱི་སྨན་བརྗིད། ཤོངས་དགའ་སྒང་། སོག་ཕུ་བསམ་གཏན་གླིང་གི་བཙུན་མ། ཕྱོགས་མཐའ་ངེས་མེད་ཀྱི་བྱ་བཏང་བཅས་འདུས་པ་སུམ་བརྒྱ་སྐོར་ལ་གཏེར་གསར་ཨ་དོན། ཐུགས་ཐིག་མ་གཅིག་གཅོད་ཡུལ་སྟན་ཐོག་གཅིག་མ་བཅས་སྩལ། དེ་རྗེས་གྲྭ་གཙང་གི་གྲྭ་པ་ཞིག་དང་བསམ་རྩེའི་བའི་བཙུན་མ་གཉིས་སྐྱོན་ཉེས་ཀྱིས་སྦྲུམ་པའི་ཆར་ནན་གྱིས་ཞུས་པའི་བཀའ་བསྒོ་མཛད་པ་ཉམས་གྲིབ་ཀྱིས་སྐུ་མ་བདེ་བས་ཟླ་བ་གཉིས་སུ་གཟིམ་སྒྲོམ་དུ་ལྷུང་པའི་སྐུ་ནད་ལྕི་བས་སྐུ་ཞབས་རིན་པོ་ཆེ་ནང་འཁོར་དང་བདག་དངོས་ངན་བཅས་མྱ་ངན་གྱིས་ནོན་པའི་མིག་མཆི་མ་དང་འབྲལ་མེད་ལ། ཕྱག་མཛོད་ལེགས་འབྱོར་ཐབས་མཁས་ཀྱི་སྤྱོད་པས་གཙོ་བོར་སྐུ་ཞབས་ཁྲི་རིན་པོ་ཆེ། རབ་འབྱམས་པ་ཆོས་གྲགས། སྒོམ་ཆེན་དོན་འགྲུབ། སོ་སྟོན་མཐུ་སྟོབས་རྣམ་རྒྱལ། རབ་འབྱམས་པ་དཔལ་མགོན་སོགས་བླ་གྲྭ་ཚང་མས་སྐུ་ཚེའི་སྒྲུབ་པ། མཁའ་འགྲོ་བསུན་བཟློག །ཁྲོ་རོལ་དང་དྲག་དམར་འཇོམས་བྱེད་རྣམས་ཀྱི་གཏོར་བཟློག །བླ་བསླུ་བཅུ་གསུམ། གར་དབང་ཚེ་དཔག་མེད་ཀྱི་སྒོ་ནས་སྐུ་འཆི་བསླུ། ཡང་བཟློག་མེའི་སྤུ་གྲིའི་འཕྲུལ་འཁོར། བཀའ་འགྱུར་དང་རྙིང་རྒྱུད་ཀྱི་གསུང་སྒྲོག །བཤགས་རྒྱུད་སྟོང་ཚར། ཚོགས་ཆེན་དུ་མགོན་ཆོས་ཀྱི་བསྐངས་བཤགས་བྱད་འགྲོལ་དང་། སྨེ་བརྩེགས་ཀྱི་བྱབ་ཁྲུས། བདེ་གཤེགས་ཀུན་འདུས་ཀྱི་སྒོ་ནས་ཞི་རྒྱས་ཀྱི་སྦྱིན་བསྲེག་འབུམ་ཚོགས་དང་ཚོགས་བརྒྱ། བརྒྱ་བཞི་དང་རྒྱལ་རྫོངས་རྟ་ཐོད་མ་མཆོད་རྟེན་སྐུ་ལ་ན་བཟའ། ཟམ་འཛུགས་ལམ་བཟོ། གུང་ཉོག་གི་སྒོ་ནས་བྱུང་བའི་ཞབས་བརྟན་སྐུ་རིམ། ཡུམ་དྲུང་དང་ལྕམ་དཔལ་འཛིན་བུ་དགའ་ལགས་གསུམ། བསྡོམས་པའི་མཁའ་འགྲོའི་སུན་ཟློག་དང་འབྲེལ་བའི་བརྟན་བཞུགས་རྣམས་མཛད། དེ་ནས་དགེ་རྒན་སྒོམ་ཆེན་དོན་འགྲུབ་ལགས་སྐྱབས་རྗེ་བླ་མ་དམ་པའི་སྐུ་མདུན་དུ་ཕེབས་དུས་སྤྱན་གྱེན་དུ་སྒྲིལ་བའི་དགོངས་པ་ཆོས་དབྱིངས་སུ་གཏད་པ་ལ། སྤྱན་ཆབ་བསིལ་ཞིང་བུ་སློབ་གཞོན་པ་རྣམས་ལམ་ཁར་ལུས་པའི་སྙིང་མི་རྗེ་བ་འདུག་གམ། ཁྱེད་རང་དབང་ཐོབ་པའི་མཁའ་འགྲོ་མ་ཞི་བའི་དབྱིངས་སུ་མ་གཤེགས་པར་ཞེས་ཞབས་པད་བརྟན་པའི་གསོལ་འདེབས་མཛད་པར་སྤྱན་ཅུང་ཟད་མར་གཟིགས་པས་དེའི་སང་ཉིན་ནས་རིམ་པར་སྐུ་བདེ་དྭངས་སུ་གྱུར་པའི་སྐལ་བཟང་ཐོབ་པ་ཡིན་ནོ། །དེ་ནས་ལྡུམ་པོར་ལྕམ་དཔལ་འཛིན་ལགས་ཀྱི་དྲུང་ཡུམ་སྐུ་ཞབས་ཕེབས་པས་ཅུང་ཟད་སྐུ་མ་བདེ་བའི་སྐུའི་འཚམས་དྲི་ཞུ་བར་བདག་རྫོང་བདའ་གནང་། དེའི་བཀའ་ལན་གྱི་ཞུ་ཡིག་རྗེར་ཕུལ་བས་འགྱུར་གཡང་ལགས་ཀྱིས་ཁྱེད་རང་ལ་སྐུ་ཞབས་ནས་ཤོག་གནང་གི་འདུག་གསུངས་པས། ཞབས་པད་དུ་ཕྱིན་པར་སྔར་ཞལ་ཁྱིམ་མཚར་སྡུག་གཟི་བྱིན་ལྡན་པ་དེ་ཉིད་དེ་དུས་དམར་ཁོགས་སོགས་ཞིག་གི་སྐུ་ཤ་རྣམས་ཤོར་བའི་མཆི་མ་རང་དབང་མེད་པ་ཤོར་བྱུང་། དེར་ཕྱག་ཕུལ་ད་རེས་སྙུང་གཞིའི་བབས་ཀྱིས་ཞལ་མཇལ་རྒྱུའི་སྐལ་བ་ཟད་པ་ཡིན་འདུག་སྙམ་པ་བྱུང་། ད་སྐྱེ་བ་འདི་ནས་བྱང་ཆུབ་བར་དུ་ཁྱེད་གཅིག་བུའི་སློབ་པུར་སྐྱེ་བ་ཤོག་ཅེས་ཞུས་པར། བཀའ་ལས་ལེགས་འབྱོར་དང་འགྱུར་གཡང་གཉིས་ནས་ཁྱོད་སེམས་ཁ་ཡངས་ཤིང་བཀོལ་བདེ་བའི་རོགས་ལ་ཕན་ཐོགས་པོ་བྱུང་ཟེར་བས། དེས་ན་རྒྱུན་གྱི་རོགས་དང་ད་རེས་མི་གཅིག་པ་བཅས་རང་ཅག་གཉིས་ནམ་ཡང་མི་འབྲལ་བའི་སྨོན་ལམ་འདེབས་ཞེས་མགོ་བོར་ཕྱག་གཉིས་ཀྱིས་བྱིལ་བྱིལ་མཛད་པའི་སྐལ་བཟང་ཐོབ་བོ། །དེ་ནས་སྐུ་ངལ་ཅུང་ཟད་སོས་པའི་སྐབས་བཅད་རྒྱར་བཞུགས་པའི་ཁོག་ནས་བདག་དང་ཆོས་འཕེལ་གཉིས་ལ་གསེར་དངུལ་དང་སྣམ་ཁྲེས་ཀྱི་དངོས་པོ། རྒྱ་རའི་བཞེས་ཁུར་གྱི་སྐྲོང་རྩེ་དང་བཀའ་ཤོག་བཅས་ཡབ་རྗེའི་གསུང་འབུམ་པོད་ཆེན་བཅུ་གསུམ། སྙིང་ཐིག་ཡ་བཞིའི་པོ་ཏི་བཅས་བཞེངས་བཞེད་ཐུགས་ལ་དགོངས་ཏེ་རྒྱ་རི་རྫོང་དུ་ཞབས་དྲུང་སྐུ་འབྲིང་གི་སར་རྫོང་བདའ་གནང་། གསེར་དངུལ་བཏུལ་ཚར་བའི་བང་མི་འབྱོར་ཕྲལ་བདག་དཔེ་ཡིག་པ་འབོད་དུ་རྒྱ་རིར་རྫོང་བདའ་གནང་བའི་བཟོ་གྲྭ་ཚུགས། དེ་རྣམས་གྲུབ་རྗེས་སྔར་གསར་བཞེངས་གནང་བའི་རྩ་གསུམ་བྲིས་ཐང་མང་ཙམ་ལ་གཅེན་ཁྲི་ཆེན་བི་ཛའི་ཞབས་དང་རྗེ་འདིས་དབུས་གྲྭ་གཙང་གི་དགེ་བཤེས་བགྲེས་གྲས་ཉི་ཤུ་ཙམ་གྱིས་རབ་གནས་རྒྱས་པ་མཛད། དེ་ནས་སྔར་གྱི་རབ་གནས་གནང་བའི་དཔོན་གཡོག་བླ་གྲྭ་ཚང་མས་ཆོས་སྲུང་རྣམས་ཀྱི་བསྐང་གསོ་རྒྱས་པར་མཛད་ཅིང་། རབ་གནས་མངའ་དབུལ་དུས་ལེགས་སྐྱེས་འབུལ་མི་རྣམས་ལ་ཉིན་གསུམ་གྱི་བར་ཞབས་ཏོག་རྒྱས་པར་སྩལ། དེར་དཔོན་གཡོག་བླ་གྲྭ་མང་གཤིས་བདག་ཅིག་པུར་འོ་བརྒྱལ་ཡོང་བ་འདུག་དགོངས། ཆུ་ཐག་རིང་བས་མི་ལོན་པ་འདུག་ཚེ་ཨ་མ་ལགས་སུ་བསླབ་དོན་ཞུས་པའི་ཞལ་ཏ་མ་རྣམས་བསྐུལ་ཞེས་སྩལ། འདི་དུས་ཤེལ་བྲག་བླ་མ་དབྱངས་འབྱོར་ལྔ་ལམ་དུ་གྱུར་པའི་གསལ་འདེབས་སུ་རྗེ་བླ་མ་དམ་པ་ཆེད་དམིགས་ཀྱིས་སྤྱན་འདྲེན་ཞུས་པས་དེ་དུས་འབྲུམ་ནད་སོགས་ལ་འཛེམ་མེད་ཀྱིས་ཨེ་རོང་དུ་ཆིབས་བསྒྱུར་ཞིང་ཕྱིར་འཁོར་གྲུབ་རྗེས་ལོ་གཅིག་བར་བཅད་རྒྱ་དམ་པོར་བཞུགས་སོ། །ལྕགས་སྤྲེལ་དགུང་ལོ་ཞེ་གཉིས་བཞེས་པ་ཟླ་བ་གསུམ་པའི་ཚེས་གསུམ་ནས་ལྔ་པའི་ཚེས་ལྔའི་བར་བདག་སོགས་རྡོ་རྗེའི་ཞལ་སློབ་ལྔ་བརྒྱ་དང་དྲུག་ཅུ་སྐོར་ལ་དཔལ་གསང་བ་སྙིང་ཐིག་མ་བུའི་དབང་དང་ཟབ་ཁྲིད་སྨིན་པར་སྩལ་བའི་སྐལ་བཟང་ཐོབ་ཅིང་། དེ་རྗེས་བདག་དང་མདོ་མཁར་འགྱུར་མེད་བསྟན་འཛིན་ལ་རྡོར་སེམས་ཐུགས་སྒྲུབ་ཀྱི་བསྙེན་སྒྲུབ་ཡན་ལག་ཚང་མ་དང་། མཆོད་སྦྱིན་བསིལ་གཏོར་བཅས་པའི་ལུང་ཕྱག་ལེན་དམིགས་ཁྲིད་ཕྲ་ཞིབ་ཏུ་སྩལ་ཏོ། །དེ་རྗེས་སྐྱབས་མཆོག་རྗེ་བླ་མ་བདེ་ཆེན་ཌཱཀིའི་གཙོ་མོ་མཆོག་དང་ལྕམ་དཔལ་འཛིན་དང་བུ་དགའ་སྐྱིད་འཛོམས་བཅས་དཔོན་གཡོག་རྣམས་དགའ་འདྲ་ཆབ་ཚན་དུ་ཕེབས་པའི་ཕྱིར་ལམ་བདེ་སྐྱིད་གླིང་དུ་དབང་སྩལ་བའི་སང་ནུབ་ལྡུམ་པོར་ཕེབས། དེའི་ཚེ་ལྕམ་དྲུང་དང་སྐྱེས་བཟང་གཉིས་གྲ་མ་ཕུང་སྦྱོར་བས་ལབ་གཞི་མང་བར་ཐུགས་ཚིག་པས་དེའི་ནུབ་མོ་སྔ་ཆར་སྐུ་བཞེངས་གནང་བའི་སླད་ནས་དེ་ཕྱོགས་སུ་མི་ཡོང་ཞེས་སྐྱི་རུ་གཞིས་སུ་ཆིབས་བསྒྱུར། ནང་ཞོགས་རང་གནས་སུ་ཕེབས་སོ། །དེ་ནས་རྡོ་རྗེ་ཕུར་པ་ཡང་གསང་སྤུ་གྲིའི་བསྙེན་སྒྲུབ་ལོ་གཅིག་བར་མཛད་པའི་དངོས་གྲུབ་བཞེས་དུས་སུ་གནང་བའི་དར་ལྗང་གི་ཕུར་མདུད་འགུག་དར་དམར་གྱི་ཕྱག་མདུད་སྐྱང་པར་འབྲེལ་བ་བདག་ལ་ཆེད་དམིགས་ཀྱིས་སྩལ་ཏོ། །དེར་མ་ཟད་སྔ་ཕྱིར་བསྙེན་སྒྲུབ་མཛད་པ་ལ། ཆོས་དབང་གི་བླ་མ་གསང་འདུས། གཏེར་གསར་བླ་མ་ཞི་བ་དང་དྲག་དམར་དཔལ་རྡོར་སེམས་ཐུགས་སྒྲུབ། མྱང་གཏེར་བཀའ་བརྒྱད་བདེ་འདུས་དང་མཁའ་འགྲོ་ཆེན་མོ། འཇམ་དཔལ་དྲེགས་འཇོམ། དབྱངས་ཅན་དཀར་མོ། སྒྱུ་འཕྲུལ་ཞི་བ་ཕྱག་རྒྱ་གཅིག་པ། ན་རག་དོང་སྤྲུགས། སྔགས་རྒོད་ལོཀ་ཏྲི་པཱ་ལ་རྣམས་ཀྱི་བསྙེན་སྒྲུབ་སྨིན་པར་མཛད་པས་དེ་དག་གི་མཚན་མའི་དགེ་ལྟས་བཟང་པོ་ཅི་རིགས་ཤར་གསུངས། ཁྱད་པར་རིག་པའི་རྒྱལ་པོའི་ལྗགས་བསྙེན་མཛད་པར་སྲོད་ཐུན་ཞིག་གི་སྐབས་མདུན་གྱི་ནམ་མཁར་རིག་པའི་རྒྱལ་པོའི་སྐུ་གཡོ་མེད་ཆུ་ཚོད་གཅིག་གི་བར་བརྟན་ཅིང་སྔོན་རྒྱ་གར་དུ་བྲམ་ཟེ་མ་གཟུགས་ཀྱི་ཉི་མ་དང་། དགེ་སློང་མ་དཔལ་མོ་རྣམས་ཀྱི་སྐྱེ་འཕྲེང་རྗེ་ཉིད་ཡིན་ཚུལ་གསལ་བར་བསྟན་གསུངས། གཞན་ཡང་ཉིན་ཞག་ཕྲུགས་གཅིག་ལ་གུ་རུའི་ཐུན་དྲུག་གསོལ་འདེབས་དང་འབྲེལ་བའི་ཡབ་རྗེའི་གསོལ་འདེབས་དང་རྗེས་འཛིན་སྨོན་ལམ། ཞོགས་པ་ཆུ་གཏོར་གདྒཱའི་རྒྱུན་དང་ཡན་ལག་བདུན་པ་རྒྱས་པར་མཛད་དེ་བཟང་སྤྱོད་སྨོན་ལམ་དང་། དེ་རྗེས་རྣམ་འཇོམ། སྔ་དགོང་གཙོ་བོར་རྫོགས་པ་ཆེན་པོའི་ངང་དུ་ལ་ཟློ་བ་དང་། དེ་རྗེས་སྟར་ཆགས་བསྙེན་སྒྲུབ་མཛད་པ་རྣམས་ཀྱི་སྒོམ་བཟླས་དུམ་པ་རེ། མཚན་མོ་དྲག་དམར་གྱི་སྒོམ་བཟླས་དམ་ཅན་སྤྱི་གཏོར་དང་རྗེས་འབྲང་། སྒོས་སུ་དྲག་པོ་སྡེ་ལྔ། སྔགས་སྲུང་མ། ལྷ་ཆེན་དུར་ཁྲོད་མ་མོ། ཨ་གྷོ་ར་དང་། ཕྱག་དྲུག་པ། མཁའ་འགྲོ་སྤྱི་གཏོར། བསྟན་ཕུག་རྒྱལ་གསོལ་ཉུང་བསྡུས་རྣམས་མཛད་ཅིང་། དུས་གཏོར་རྣམས་ལ་བཀའ་བརྒྱད་དམ་དཔལ་ཆེན་ཕུར་པའི་གཞུང་དྲང་སྲོང་གི་དཔལ་མགོན་ལྕམ་དྲལ་གྱི་འཕྲིན་ལས་རྒྱས་པར་མཛད། ཚེས་གཉིས་ཀྱི་ཡབ་རྗེའི་དུས་དྲན་སྐུ་མཆོད་དང་། ཡར་མར་གྱི་ཨོ་རྒྱན་ཆེན་པོའི་དུས་ཀྱི་མཆོད་པ་གཏེར་གསར་བླ་མ་ཞི་བ་སྔོོན་འགྲོ་དྲག་དམར་རམ། གསང་འདུས་རྡོར་སེམས་སམ། བདེ་གཤེགས་ཀུན་འདུས། ན་རག་དོང་སྤྲུགས་སམ། བཀའ་བརྒྱད་དང་ཕུར་པ་རྣམས་ཅི་རིགས་པའི་སྒྲུབ་མཆོད་ཆགས་མེད། ནངས་ནུབ་མཚན་བཅས་སམ་ཕལ་ཆེར་གཏོར་བསྔོ་རྣམས་དང་ཐུན་དྲུག་གསོལ་འདེབས་སོགས་གྲུབ་རྗེས་བདེ་གཤེགས་ཀུན་འདུས་དང་ཕུར་པ་ཡང་གསང་གི་སྒོམ་བཟླས་མཛད་ནས་ནམ་ཕྱེད་ལ་ཉེ་བའི་བར་འོད་གསལ་རྫོགས་པ་ཆེན་པོའི་ངང་ལས་མི་གཡོ་བའི་མཉམ་བཞག་དང་འབྲེལ་བའི་མཚན་མོ་འོད་གསལ་གྱི་འཁོར་ལོར་འབྱམས་ཀླས་པའི་རྣལ་འབྱོར་གྱི་ངང་ནས་མནལ་བ་དང་། ཐོ་རེངས་ཀྱི་ཐུན་ལ་ཐུག་པ་ན་སྐད་ཅིག་གིས་ལྡང་བའི་རྣལ་འབྱོར་གྱི་ལྷའི་འཁོར་ལོར་བཞེངས་པའམ། ཕལ་ཆེར་རྫོགས་པ་ཆེན་པོའི་རིག་པ་གསལ་སྟོང་གི་ཨ་ཏིའམ། དཔལ་གསང་བ་སྙིང་ཐིག་ཆེན་མོའི་སྔོན་འགྲོ་རྣམས་མཛད་རྗེས་ནམ་སེང་གི་བར་དུ་རྫོགས་པ་ཆེན་པོའི་ངང་དུ་འཕོ་འགྱུར་མེད་པའི་མཉམ་བཞག་དང་། དེ་རྗེས་བླ་མ་ཞི་བའི་སྒོམ་བཟླས་ཉུང་ངུ་རེ་དང་ཕད་བཅིང་གཏུམ་མོའི་རླུང་སྦྱོར་ཡང་མཛད། ཁྱད་པར་ཐུན་བཞི་ཆགས་མེད་ཀྱིས་རྫོགས་པ་ཆེན་པོའི་ངང་དུ་གཡོ་མེད་ཀྱི་ཏིང་ངེ་འཛིན་དང་མི་འབྲལ་བའི་མཉམ་བཞག་དང་ཐོད་རྒལ་གྱི་མན་ངག་ལས་ནམ་ཡང་མི་འདའ་བའི་ཞེ་དམ་དང་། སྐུ་མཚམས་གྲོལ་བའི་དུས་འགའ་རེ་རྣམས་སུ་དད་ཅན་གྱི་སྐལ་ལྡན་ཕོ་མོ་རྣམས་མཇལ་འཕྲད་མཛད་དེ་དགེ་བའི་ལས་ལ་བསྐུལ་ཞིང་བྱ་བ་ལས་ཀྱི་འཁོར་ལོའི་ཞལ་བཀོད་དང་། སྐྱ་སེར་ཆེ་ཆུང་མེད་པ་དང་དབུལ་ཕོངས་ཅན་གྱི་དད་ཅན་ཅི་ཡོད་གཉིས་སམ་གསུམ་གྱི་མཐའ་བརྟེན་པ་ལའང་སོ་སོའི་བློ་དང་བསྟུན་པའི་རིམ་གཉིས་ཀྱི་མན་ངག་སྟོན་ཅིང་བཀའ་རྩོམ་མཛད་པ་དང་རྒྱུད་ལུང་མན་ངག་རྣམས་ལ་ཞིབ་གཟིགས་ཀྱི་ཁགས་རྟོག་དང་། དྲག་ཞན་མེད་པའི་ཞལ་སློབ་ཇི་ཡོད་ལ་མཛེས་སྤྱོད་སྤངས་པའི་ཉམ་ང་མེད་པའི་བརྟུལ་ཞུགས་ཀྱི་སྤྱོད་པས་ཐར་ལམ་འགོད་ཕྱིར་དེང་སང་གི་བླ་མ་འགའི་སྤྱོད་པ་ལྟ་བུའི་མཛེས་སྤྱོད་མི་མཛད་པར་བརྩེ་གདུང་ཆེན་པོས་ལས་མི་སོགས་པའི་རྟེན་དུ་ཐུགས་ཤིན་ཏུ་མྱུར་བའི་བརྩེ་བ་ཆེན་པོས་འཁོར་བའི་འཇིགས་པ་བསལ་ཕྱིར་ཐབས་མཁས་ཀྱི་སྤྱོད་པས་འགྲོ་ཆགས་ཟ་ཉལ་གྱི་རྣམ་འགྱུར་དང་དམ་པ་ཆོས་ཀྱི་ཉམས་ལེན་མཐར་ཐུག་པའི་ཞལ་གདམས་རྡོ་རྗེའི་བདེན་ཚིག་རྗེས་སུ་གདམས་ཤིང་། ཁྱད་པར་སྐྱིད་ཆོས་བདེ་བར་རྣམ་པ་ཀུན་ཏུ་ནམ་ཡང་བཞུགས་པ་མི་སྲིད་ཅིང་། དེའི་ནང་ནས་གཙོ་བོར་མཉམ་རྗེས་རིས་མེད་བྱ་སྤྱོད་ལམ་ཁྱེར་གྱིས་ཐ་མལ་དུ་མི་འཁྱམས་པ་མེད་པ་ཡིན་གསུངས་ཏེ་རྡོ་རྗེའི་ཐ་ཚིག་གོ། ཆུ་ཁྱི་ལོ་སྟོད་ནས་གསེར་བཟང་སྤྲུལ་སྐུ་འགྱུར་མེད་བསྟན་འཛིན་དོན་ལྡན་དང་། ཁྲི་རིན་པོ་ཆེ་གཅེན་རཏྣ་བི་ཛའི་ཞབས་དང་། ཐུགས་སྲས་སྤྲུལ་སྐུ་རྣམས་ཀྱིས་གསོལ་འདེབས་མཛད་པའི་ངོར་སྒྲ་ཐལ་འགྱུར་ནས་ལུང་གིས་བསྟན་པ་ལྟར་བཀའ་བབས་ཆོས་བདག་གི་དོན་གྱིས་གཞན་གྱིས་མཛད་དཀའ་ལ་རྗེ་དམ་པ་འདིས་སྙིང་ཐིག་མ་བུ་གཅིག་དྲིལ་གྱི་གདམས་པ་ཁྲིད་ཡིག་བདེ་ཆེན་ལམ་བཟང་བཀའ་རྩོམ་མཛད། དེའི་སྔོན་འགྲོ་ཆོས་སྤྱོད་དང་། དེར་མ་ཟད་སྔ་ཕྱིར་བཀའ་རྩོམ་མཛད་པ་ལ། རྗེ་ཉིད་ལ་བརྟེན་པའི་བླ་མའི་རྣལ་འབྱོར་གདུང་བའི་མུན་སེལ་ལེ་ཚན་སྣ་ཚོགས། རྗེ་ཉིད་ལ་བརྟེན་པའི་རྣམ་ཐར་གསོལ་འདེབས་བརྟན་བཞུགས་བཅས་རེ་འདོད་མཆོག་སྦྱིན། བཤེས་གཉེན་གཞན་གྱི་གསོལ་འདེབས་བྱིན་རླབས་ཀྱི་ཆུ་བོ། རྗེ་ཉིད་ཀྱི་སློབ་བུའི་རིགས་ལ་གདམས་པའི་ཞལ་གདམས་མགུར་མ་སོགས་སྙིང་གི་མུན་སེལ། ཞུས་ལན་སྐོར་ཕྱོགས་གཅིག་ཏུ་བསྡོམ་པའི་དྭངས་གསལ་མེ་ལོང་སྣང་བརྙན། རྒྱབ་བྱང་སྐོར་ཕྱོགས་གཅིག་ཏུ་བསྡེབས་པ་ཡིད་བཞིན་ལྷུན་གྲུབ། མཆོད་འབུལ་སྙན་ཤལ་སྐོར་ཕྱོགས་གཅིག་ཏུ་བསྡེབས་པ་འདོད་དགུའི་སྙེ་མ། བདེ་གཤེགས་ཀུན་འདུས་ཀྱི་བླ་བརྒྱུད་ཕྱག་འཚལ་སྨོན་ལམ་དང་བཅས་པ། གར་དབང་ཚེ་དཔག་མེད་ཀྱི་བརྒྱུད་འདེབས། གསང་བ་ཡེ་ཤེས་མཁའ་འགྲོ་མའི་ལམ་རིམ་དང་འབྲེལ་བའི་སྨོན་ལམ། དེའི་ལམ་རིམ་དང་འབྲེལ་བའི་གསོལ་འདེབས། རྡོར་སེམས་ཐུགས་སྒྲུབ་ཀྱི་གཅོད་ཁྲིད་ཀྱི་བརྒྱུད་འདེབས། ཐུགས་ཐིག་སོགས་གཏེར་གསར་ཚང་མའི་བརྒྱུད་འདེབས་སོགས་ཀྱི་ཁ་སྐོང་ལེ་ཚན་མང་པོ། ན་རག་དོང་སྤྲུགས་དཀྱིལ་འཁོར་དུ་དབང་བསྐུར་ཚུལ་བདེ་ཆེན་ལམ་བཟང་། གཏེར་གསར་བླ་མ་དྲག་པོའི་བདག་འཇུག་དབང་གི་ཆོ་ག་དབང་དྲག་གྲུབ་པའི་ལམ་བཟང་། གཏེར་གསར་བླ་མ་དྲག་པོའི་ལས་བྱང་གི་དམིགས་རིམ་སྒོས་ཆོས་ཟིན་ཐོར་བའི་རྣམ་ངེས། དེའི་ལྷ་ཁྲིད་ཀྱི་དམིགས་རིམ་རྫོགས་རིམ་དང་འབྲེལ་བ་གཏེར་ཆེན་བླ་མས་རྗེ་བླ་མ་དམ་པ་མཆོག་ལ་དགུང་ལོ་བཅུའི་ལོར་ཆེད་དུ་གདམས་པ། རྫོགས་ཆེན་ཨ་ཏི་ཟབ་དོན་སྙིང་པོའི་ཐོད་རྒལ་དབང་གི་ཆོ་གའི་ལྷན་ཐབས། དེའི་ལམ་རིམ་དང་འབྲེལ་བའི་སྨོན་ལམ། དེའི་ལམ་རིམ་དང་འབྲེལ་བའི་ཞལ་གདམས་ཐུགས་ཐིག་གི་འཕོ་བའི་གསོལ་འདེབས་དང་། དེའི་དམིགས་རིམ་ཟིན་བྲིས། གར་དབང་ཚེ་དཔག་མེད་ཀྱི་རྒྱུན་ཁྱེར། དཀོན་མཆོག་སྤྱི་འདུས་ཀྱི་དབང་ཆོག་སྐལ་བཟང་དགའ་བྱེད། དེའི་ཁྲིད་ཡིག་མན་ངག་གསལ་སྒྲོན་སྙིང་པོ། རྡོ་རྗེའི་ཆོས་སྐྱོང་རྣམས་ཀྱི་བསྐང་གསོ་ཀུན་བཟང་རོལ་མཚོ་རྣམས་སོ། །དེ་ཡང་ཕྱིས་སུ་ཁོ་བོས་གསུང་འབུམ་རྣམས་བསྡུས་པ་མ་གཏོགས་སྐུ་ཚེ་ཐོག་མ་ནས་མཛད་པ་རྣམས་ཞབས་རིམ་པ་རྣམས་ལེ་ལོ་ཆེ་སྟབས་ཟིན་ཐོར་མ་བཀོད་པ་མ་གཏོགས་གསོལ་འདེབས་དང་ཞལ་གདམས་གསུང་མགུར་དཀར་ཕྱོགས་ཀྱི་ལྷའི་གསོལ་མཆོད་སོགས་འབྲས་ལྗོངས་དང་མངའ་རིས་སོགས་ཀྱིས་མཚོན་མང་པོ་ཡོད་ཅེས་རྗེ་བླ་མ་ཉིད་ནས་གསུངས། ཆུ་ཕག་ལོ་སྐུ་ཞང་ལྡུམ་པོ་བའི་སྲས་རབ་བརྟན་ལགས་དང་། ཁྱད་པར་གདུང་བརྒྱུད་རིན་པོ་ཆེ་འགྱུར་མེད་པདྨ་བསྟན་འཛིན་སོགས་ཀྱི་དབུས་བདག་ནང་འཁོར་ཉུང་འདུས་ལ་གཏེར་གསར་བླ་མ་དྲག་པོའི་སྨིན་བྱེད་ཀྱི་དབང་། མཐའ་རྟེན་དྲེགས་པའི་སྲོག་གཏད་དང་བཅས་བཀའ་དྲིན་དུ་སྩལ། འདི་སྐབས་རྫོགས་ཆེན་མཁན་པོ་དང་། ལྷ་རྩེ་གྲུབ་ཆེན་ཀུན་བཟང་ཀློང་གྲོལ་སོགས་དོན་གཉེར་གྱི་འདུས་པ་མང་པོར་ཟབ་ལམ་བདེ་གཤེགས་ཀུན་འདུས་ཀྱི་ཟབ་ཁྲིད་ཡན་ལག་དང་བཅས་སྨིན་པར་སྩལ། དེར་མ་ཟད་རྩ་པོད་ཀྱི་ལུང་དང་རི་ཆོས་སོགས་ཀྱི་ལུང་ཡང་སྩལ། དེ་རྗེས་ཤ་འུག་གཏེར་བྱོན་མཁའ་འགྲོའི་དབང་ཁྲིད་ལུང་དང་བཅས་པའང་སྩལ་ཅིང་། ཁོང་དཔོན་ཨོ་རྒྱན་གྱི་འཕྲུལ་འཁོར་བསླབ་སྦྱོང་དང་ཁྲིད་སྐྱོར་དུ་བདག་རྫོང་བདའ་གནང་། དེ་ནས་གཅེན་རཏྣ་བི་ཛའི་ཞབས་སུ་སེམས་ཀློང་གཉིས་ཀྱི་དབང་དང་ཁྲིད། མྱང་གཏེར་ཁྲོས་ནག་གི་དབང་ཁྲིད་ལོ་ཆེན་དྷརྨ་ཤྲཱིས་མཛད་པའི་ཡིག་ཆའི་སྟེང་ནས་འབུལ་བ་གནང་། ཤིང་བྱི་ཟླ་བ་བཞི་པའི་ཚེས་འགོར་སྐྱབས་རྗེ་བླ་མས་བདག་ལ་པདྨའི་ཐུགས་བཅུད་ཁྱད་འཕགས་ཟབ་ལམ་བདེ་གཤེགས་ཀུན་འདུས་ཀྱི་ཕྱི་ནང་གསང་གསུམ་གྱི་དམིགས་ཁྲིད་ཕྱག་ལེན་སྩལ་དུས་ཟིལ་གནོན་མཁན་པོ་ཕེབས་པས་སྐེ་ཆད་དུ་ལུས་པའི་སང་ཉིན་ཚེས་བཅུ་སྒྲུབ་སྡེར་ཆིབས་བསྒྱུར་གྱིས་དེ་འཕྲོས་ཆུ་བོ་རིར་དམིགས་ཁྲིད་ཆེ་ཕྲ་ཞིབ་ཏུ་སྩལ་ཏེ་ད་རེས་བསྟན་པ་འདི་ལ་མི་ལུས་ལན་གཅིག་ཐོབ་པ་དོན་མེད་དུ་མ་སོང་བའི་སྙིང་རུས་བསྐྱེད་དགོས་ཞེས་གདམས་པ་འདིའི་བསྙེན་སྒྲུབ་ལས་གསུམ་ལ་ལོ་གསུམ་གྱི་དམ་བཅའ་བཞེས་པའི་བྱིན་རླབས་དང་བཀའ་དྲིན་སྐལ་བཟང་དུ་ཐོབ་བོ། །ཟླ་བ་དགུ་པའི་ཚེས་འགོར་རང་གནས་སུ་ཆིབས་བསྒྱུར་བའི་གོང་ཞབས་རིན་པོ་ཆེའི་ཞབས་བརྟན་དམིགས་བསལ་རྣམས་བསྒྲུབས་རྗེས། དབུས་གཙང་གི་སྐལ་ལྡན་དུ་མར་ཨ་ཏི་དང་ཐུགས་ཐིག །རས་རྐྱང་སོགས་སོ་སོའི་རེ་འདོད་སྐོང་བར་མཛད་ནས་ལོ་གསུམ་གྱི་བར་བཅད་རྒྱར་བཞུགས་སོ། །དེ་ནས་བཅད་རྒྱ་གྲོལ་རྗེས་སློབ་དཔོན་ཆོས་རྫོང་འགྱུར་མེད་རྣམ་རྒྱལ་དང་། འབྲས་པ་དགེ་སློང་འགྱུར་མེད་བཟང་པོ། བདག་ཅག་གསུམ་ལ་ཤ་འུག་གཏེར་བྱོན་མཁའ་འགྲོའི་དབང་ཁྲིད་སྨིན་པར་སྩལ་ཅིང་། དེ་རྗེས་སྲོག་སྒྲུབ་ཀྱི་ཕག་མོའི་དབང་དང་རས་རྐྱང་གི་གདམས་པ་བདག་ལས་ཅན་བདུན་ལ་སྩལ་ཏོ། །མེ་ཡོས་ཧོར་ཟླ་བཅུ་པའི་ནང་དུ་བཅད་རྒྱར་ཤིན་ཏུ་དམ་པའི་ཁོག་ཏུ་བདག་ལ་བདེ་གཤེགས་ཀུན་འདུས་ཀྱི་བཀའ་སྲུང་ལེགས་ལྡན་ལྷ་ཆེན་དབང་ཕྱུག་ཆེན་པོའི་རྗེས་གནང་ཐུན་མོང་མ་ཡིན་པ་སྩལ་རྗེས་བཀའ་ལས། ཕྱི་མ་དམ་པའི་ཆོས་དང་མཇལ་བའང་དཀའ་བས་ཚེ་འདི་ཁོ་ན་ལ་གྲོལ་བའི་ཧུར་ཐག་བྱེད་དགོས། སྤྱིར་སྤྲོས་མེད་ཀྱི་གདམས་པ་ཤ་ཐག་ཀྱང་དུས་སྤྲོས་བཅས་ཀྱི་དགེ་སྦྱོར་གནོད་པར་གསུང་ཞིང་། ཁྱད་པར་མཚན་མོའི་མན་ངག་དུས་ཉིན་པར་ངག་འཆལ་གྱི་ཅ་ཅོའི་སྒྲ་མང་ན་ནུབ་མོ་རྨི་ལམ་གྱི་མན་ངག་ལ་ཤིན་ཏུ་གནོད་པ་ཡོང་བས་ཚུལ་དེ་ངེས་པ་གྱིས་ཞེས་སྩལ་ནས་ཟླ་བ་གསུམ་པའི་ཚེས་འགོའི་བར་བཅད་རྒྱར་བཞུགས་སོ། །དེ་ནས་ས་འབྲུག་ལོར་མངའ་རིས་གུང་ཐང་རྒྱལ་པོའི་གདུང་ཐའི་སྲས་ལྕམ་སྐུ་ཞབས་དཔོན་གཡོག་རྣམས་ལ་མཇལ་ཁ་དང་། ཚེ་དབང་དྲག་དམར་གྱི་དབང་། སྤྱན་རས་གཟིགས་ཡི་གེ་དྲུག་པའི་ལྷ་ཁྲིད་ཀྱང་སྩལ། དེ་ནས་གཡུ་ཐོག་དབུས་མདའ་དཔོན་གྱི་སྲས་དངོས་གྲུབ་རྣམ་རྒྱལ་ཕེབས་པའི་མཇལ་ཁ་དང་གཏེར་གསར་དྲག་དམར་གྱི་དབང་དང་ལས་བྱང་གི་ལུང་། རྗེ་ཉིད་ཀྱིས་མཛད་པའི་ལས་བྱང་རྣམ་ངེས་ཀྱི་ལུང་ཡང་སྩལ། དེ་ནས་འབྲས་ལྗོངས་རྫོགས་ཆེན་སྤྲུལ་སྐུའི་ཡང་སྲིད་དཔོན་གཡོག་རྣམས་རྗེ་ཉིད་ཀྱི་ཞབས་པད་དུ་ཆེད་དམིགས་ཀྱིས་ཕེབས་པ་ལ། སྙིང་ཐིག་ཆེན་མོ་དང་མཁའ་འགྲོ་སྙིང་ཐིག །དཀོན་མཆོག་སྤྱི་འདུས། རིག་འཛིན་སྲོག་སྒྲུབ། ཡབ་རྗེ་བླ་མའི་གཏེར་གསར་བཅས་པའི་དབང་དང་ཟབ་ཁྲིད་སྨིན་པར་སྩལ། བདེ་གཤེགས་ཀུན་འདུས་ཀྱི་ཟབ་ཁྲིད་དུས་བདག་ཁོང་དཔོན་གཡོག་གི་འཕྲུལ་འཁོར་སློབ་སྦྱོང་དུ་རྫོང་བདའ་གནང་། དེ་དུས་ལྷོ་བྲག་སྨྲ་བོ་ལྕོག་གི་བླ་ཡབ་སྐུ་གཤེགས་པའི་སར་རྗེ་ཉིད་ཆེད་དམིགས་ཀྱིས་སྤྱན་འདྲེན་ཞུས་པའི་བར་ལམ་གློ་བུར་དུ་ང་ད་ལྟ་ཕོབས་ཞེས་སྩལ་བར་ཞབས་རིམ་པ་ཐམས་ཅད་ཀྱི་ཙབ་ཙབ་ཀྱི་བློས་ཆིབས་ཐོག་ནས་གདན་དྲངས་མ་ཐག་ཆིབས་ཆེན་དེ་མ་ཐག་ཤི་བ་ལ་འཕོ་དམིགས་དང་བསྔོ་སྨོན་གྱིས་མཚམས་སྦྱོར་ནན་ཏན་མཛད་ཅིང་ཕྱི་མའི་མཚམས་སྦྱོར་གྱི་ལུང་ཡང་སྩལ་ནས་ཕྱིར་འཁོར་གྲུབ་བསྟུན་ལོ་གཅིག་བར་བཅད་རྒྱར་བཞུགས་སོ། །དེ་ནས་འབྲས་ཕུར་སྒོམ་ཆེན་དེ་ཉིད་དེ་ཞིང་གཤེགས་མཇུག་མགོ་མཇུག་ནས་རྗེས་གནོན་མེད་པའི་རི་ཁྲོད་གླུ་གཞས་ཀྱིས་ཁེངས་པའི་ཅ་ཅོའི་སྒྲས་བསམ་གཏན་ལ་ཤིན་ཏུ་གནོད་པའི་སྡོད་ཐབས་དཀའ་བ་ལ། ས་སྦྲུལ་ལོ་སྐྱབས་རྗེ་དམ་པ་བཅད་རྒྱར་བཞུགས་པའི་ཞབས་དྲུང་དུ་དེ་ཚུལ་གྱི་མི་ཚེ་སྟོང་ཟད་དུ་འགྲོ་བ་འདུག་པས་རེ་ཞིག་པདྨས་ཞབས་བཅགས་ཀྱི་གནས་ཆེན་ཞིག་ཏུ་འགྲོ་དགོས་ཀྱི་བསླབ་དོན་ནན་ཅག་ཞུས་པར་བཀའ་ལས། དངོས་གཞི་བདེན་པ་ཙམ་འདུག་སྟེ། གཏེར་ཆེན་དེ་ཉིད་དེས་དགོན་ཆེ་ཕྲ་གང་དུའང་རི་ཁྲོད་རེ་ཡོང་གི་འདུག་པས་རི་ཁྲོད་འདི་ཀ་ཨེ་ཚུགས་སྙམ་ཐུགས་ལ་དགོངས་གཤིས་རང་གི་བསླབ་གཉེར་ཐོབ་ཟིན་སྙམ་ཁ་ཕྱིར་བལྟ་མ་བྱེད་པར་རེ་ཞིག་སྡོད་དགོས། ཆོས་འཆད་སྤེལ་སོགས་ཀྱི་དུས་ངེད་ཀྱི་རམ་གཏེགས་ལ་ནང་སྣོད་པ་འདུག་ཅེས་འབྲུ་ཆས་ཆ་ཚང་། ཇ་སྦག་མར་རྫིས་དང་བཅས་པའི་གནང་ཆ་སྩལ་ནས། འབྲས་ཕུར་ཨུ་ཚུགས་བསྐྱེད་ནས་སྡོད་དགོས་བྱུང་། དེ་ནས་ལྕགས་ལུག་ལོར་སྔར་ལས་ཀྱང་ལོད་དུ་སོང་བའི་བུད་མེད་སྨད་ཚོང་མ་མང་པོ་དང་། སྐྱེས་པ་དང་བཅས་པའི་གླུ་སྒྲ་ཉིན་མཚན་བར་མེད་དང་། རེས་འཐབ་མོའི་གཞི་ལྷོངས་པའི་ཀུ་སྒྲ་ཆེ་བར་ཡང་དེ་ཚུན་གྱི་ཞུ་བ་ནན་ཏན་ཞུས་པས་བཀའ་ལས། ད་རྒན་པ་རྣམས་དངོས་ཆས་ཤིན་ཏུ་བཟང་བའི་ཆོས་ཉིད་ཀྱི་རྟོགས་པ་མངོན་དུ་མ་གྱུར་ཞིང་། ངེས་འབྱུང་གི་གཏིང་ནས་མ་བསྡམས་པའི་རིག་པ་ཚོ་མ་ཟིན་པས་ལན་འདུག །དེ་ནས་སྒོམ་ཆེན་སྟོབས་རྒྱལ་ལ་གཏེར་ཆེན་གནས་ཤ་འུག་ཏུ་སོང་ལ་སྒོམ་ནན་ཏན་གྱིས་གསུངས་འདུག་པར། ཁོང་པ་ཐ་སྙད་ཀྱི་རིག་གནས་སོགས་རྒྱ་ཆེ་བས་བསླབ་གྲྭ་མང་པོ་འདུས་པས་མགོ་བོ་འཁོར། དེ་རྗེས་ནག་མོ་དང་འབྲེལ་བ་ཞིག་གིས་བླ་མའི་བཀའ་དང་འགལ་:མེད༼མོད༽། དེས་ན་ཁྱོད་ཤེས་རབ་དང་བརྩོན་གྲུས་ཆེ་གཤིས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་འདི་རང་གཏེར་ཕ་ཆོས་ཀྱི་གཏེར་གནས་ཀྱི་གཙོ་བོ་ཡིན་པས་སླད་ནས་མིག་ལྟོས་ལ་ཕན་པའི་རྫོགས་རིམ་ཁོ་ན་ལ་འབད་པ་གཙོར་བཏོན་གྱིས་བསྟན་འགྲོ་སྤྱི་དང་བྱེ་བྲག་ངེས་གསང་རྡོ་རྗེ་སྙིང་པོའི་བསྟན་པ་སྙིང་ལ་དུང་དུང་བཅངས་པའི་སྒྲུབ་པ་སྙིང་ལ་བཟུང་སྟེ་ངའི་བླ་མ་རྒན་མོ་དེས་དེ་ལྟར་ཟེར་བཞིན་ཡོད་སྙམ་པ་སེམས་ལ་ཞོག །སླར་ང་རང་གཉིས་འཕྲད་དུས་ང་ཡང་ངའི་སློབ་མ་མགྱོགས་པ་བྱུང་བསམ་པ་དང་ཁྱོད་རང་ཡང་ངའི་བླ་མ་དང་འཕྲད་བྱུང་བསམ་པའི་སེམས་དགའ་ལྷང་ལྷང་བྱས་ཆོག་པ་བྱེད། དེ་བར་གྱི་ཕོགས་ང་རང་གིས་རྒྱག་པ་ཡིན་གསུང་བར། འཚོ་རྟེན་གནང་མི་དགོས་ང་རང་གིས་འགྲིག་ཡོང་ལགས་ཞུས་པས། མོན་པ་རྣམས་ཀྱི་སྐད་དེ་གོ་དཀའ་བས་རེ་ཞིག་ཁྱེར་ཅིག་གསུངས་ཇ་ཆུང་ཇ་སྦག །དངུལ་སྲང་བཅོ་བརྒྱད་བཅས་དང་། རྗེ་ཉིད་ཀྱི་དབུ་ལོ་བམ་པོ་གཅིག །གསང་ཆབ་ཕུར་མདུད་དམར་པོ་ནང་མཛོད་ཀྱི་དཔའ་དར་བཅས་རྫོང་བདའ་གནང་། དེར་སླར་ཡང་ཕྱག་ཕུལ་བས། ཞབས་གཡས་པ་སྤྱི་གཙུག་ཏུ་ཚ་ཕྱིར་གྱིས་སྩལ་ཏེ་ངའི་བུའི་སྒྲུབ་པ་མཐར་ཕྱིན་པར་ཤོག །ལམ་གྱི་བར་གཅོད་རྣམས་དཔའ་བོ་མཁའ་འགྲོ་རྣམས་ཀྱིས་སེལ་མཛོད་གསུངས་དགྱེས་ཤིང་བརྩེ་བས་བསྐྱངས་པ་ཡིན་ནོ། །ཤ་འུག་ཏུ་སླེབས་ནས་ལོ་གཉིས་ཙམ་སོང་དུས་ཡབ་རྗེའི་ཞལ་སློབ་ཀྱི་ཐ་མར་གྱུར་པ་སག་སྟེངས་ན་ཨ་ཎི་ཀུན་བཟང་སྒྲོན་མ་རྗེའི་མཇལ་ཕྱག་ཏུ་འཐོན་རྒྱུར་སྐུའིི་འཚམས་འདྲིའི་ཞུ་ཡིག་ཅིག་ཕུལ་བར། དེར་རྗེའི་ཞབས་པད་དུ་ཁོང་རྣམས་མཇལ་དུས་བཀའ་ལས་དེ་ཕྱོགས་སུ་ངེད་ཀྱི་སློབ་བུ་འགྱུར་མེད་འོད་གསལ་ཟེར་བ་ཞིག་ཕེབས་ཨེ་འདུག་སྩལ་བར་ཨ་ཎིས་འདུག་འདུག །ཤ་འུག་བདེ་ཆེན་འཁོར་ལོ་སྤྱིལ་བུ་གསར་རྒྱག་གིས་མཚམས་དམ་པར་འདུག །ཁྱེད་ཀྱིས་དངུལ་ཕོགས་བརྒྱབ་ཀྱང་སྐོར་མ་མཐོང་པའི་ཞོལ་ཁང་པས་རྩམ་པ་མ་གཏོགས་གང་ཡང་མི་འདུག་ཅེས་ཞུས་པར། བཀའ་ལས་དེ་འདྲས་བསྡད་འགྲོ་ཞེས་སྩལ་ཟེར། དེ་ནས་ཨ་ཎིས་གྲུབ་ཆེན་གྱིས་ཁྱེད་རང་ལ་ཡི་གེ་ཞིག་བསྐུར་བྱུང་དེ་གནས་ཚང་དུ་དེ་རིང་ལུས་པས་སང་ཉིན་ཁྱེད་རང་ལ་སྤྲོད་དོ་ཞེས་མོན་ལྐུག་གིས་ཞེ་ས་མེད་པར་ཞུས་པས། དེར་རྗེ་ཉིད་ཞལ་འཛུམ་དང་བཅས་ཅུང་ཟད་བཞད་ཟེར། དེ་ནས་ཁོང་རྣམས་ཐོན་གདོང་བདེ་འདུས་ཀྱི་ཐང་སྐུ་རྒྱབ་བྱང་བཀའ་རྩོམ་ཕྱག་བྲིས་དབུ་ཆེན་དང་བཅས་པའི་བཀའ་ཤོག་བྱིན་རྟེན་བཅས་པ་ཞིག་སྩལ་ཕེབས། དེ་ནས་ལོ་གསུམ་འཐེན་པའི་ཤིང་ཁྱི་ལོ་རྗེ་བླ་མ་མཆོག་གི་ཞབས་པད་དུ་ཆུ་བོ་རིར་ནངས་པར་སླེབས་རྒྱུའི་ཞོགས་པ་སྐུ་བཞེངས་གནང་དུས་སྐུ་གཤམ་དཀྲི་བ་དང་བསྟུན། དེ་རིང་འགྱུར་མེད་འོད་གསལ་ཡོང་བ་ཡོད་གསུངས་འདུག །ཞབས་པད་དུ་ཕྱིན་དུས་ཁྱོད་ད་རེས་ཧུར་ཐག་བྱུང་ཞེས་ཤིན་ཏུ་མཉེས་པའི་བསྐྱེད་རྗོགས་ཀྱི་ལམ་བསྒོམས་པའི་རྟགས་སྣང་སོགས་ཅི་འདྲ་བྱུང་ཞེས་ཕེབས་པར་དེ་ལན་ཞིབ་པར་ཞུས་ཏེ། གེགས་སེལ་བོགས་འདོན་ཕྲ་ཞིབ་ཏུ་སྩལ་ཅིིང་། དེ་ནས་ཅུང་ཟད་བཞད་ཅིང་ཁྱོད་ཀྱིས་ཚུར་ལམ་ང་ལ་དམར་ཙག་ལ་གཤམ་དུ་འོག་རླུང་དྲི་ཞིམ་བུ་ཞིག་བྱིན་བྱུང་ཞེས་གསུངས་པར། བླ་མ་རིན་པོ་ཆེ་དགོངས་དག་ཕྲན་ལ་འབྲོག་པ་རྣམས་ཀྱིས་ཞོ་དར་ཆུར་བ་སྦྱིན་པས་གྲོད་པ་མ་བདེ་བས་དེ་འདྲ་ལ་རྐྱེན་ཡོང་བསམ་པ་མ་བྱུང་། ང་རང་གཅིག་པོ་ཉམས་མཚར་གྱིས་ངའི་རྩ་བའི་བླ་མ་མི་འགྱུར་དཔལ་སྒྲོན་མཆོད་ཞུས་ཐལ་ཐག་ཆོད་ཡིན་ཞེས་མཐོལ་བཤགས་ཕུལ། ད་རེ་ཞིག་ལྷོད་ཀྱིས་སྡོད་གསུངས། ཞག་བཅོ་ལྔའི་བར་བཟའ་བཏུང་ལོངས་སྤྱོད་ཀྱི་སྐྱིད་ཉལ་དང་དབང་ཆོས་ཀྱང་མང་དུ་བསྐྱངས་ཤིང་། དེ་ནས་བདག་ཐོན་གདོང་བླང་དོར་གྱི་ཞལ་བཀོད་སྤྱི་དང་ཁྱད་པར་རྟག་པར་བསྐྱེད་རིམ་གྱིས་ལམ་མི་བགྲོད་པར་རྫོགས་པ་ཁོ་ན་རིམ་དུ་བསྒོམ་དགོས། སྒོམ་དུས་ནན་ཏན་དུ་བསྒོམས་ཀྱང་རྗེས་ཐོབ་ཏུ་ཐ་མལ་དུ་ཤོར་ན་གར་ཡང་མི་ཕྱིན་པས། རེ་ཞིག་ང་རང་རྣམས་གདམས་པ་ལ་ཕར་འཆང་དགོས་མོད། ནམ་ཞིག་ཕར་འཆང་ཆེ་མི་དགོས་གདམས་ངག་གིས་ཚུར་བཅུན་ཡོང་། དོན་ལ་འཁོར་བའི་སྡུག་བསྔལ་དྲན་པས་རྟག་ཏུ་སྲིད་སྲེད་ལ་མ་ཆགས་པར་ཚེ་འདི་བློས་ཐོངས་ལ་གནས་ངེས་པ་མེད་པ་གྱིས། གཙོ་བོར་ཟབ་ལམ་གྱི་སྙིང་པོ་ལ་མཉམ་རྗེས་རིས་མེད་བྱ་སྤྱོད་དང་བསྲེ་ཞིང་། ཁྱད་པར་ནང་དུ་སྤངས་རྟོགས་ཀྱི་ཡོན་ཏན་གང་ཡང་མེད་ཅིང་ལུས་རྟེན་དམན་ཡང་སྔོན་ལས་ཀྱི་འབྲེལ་པས་ང་ལ་མོས་གུས་ཀྱི་དད་པ་གཏིང་ཐུག་པ་བཅས། དེས་ན་གང་ཤར་གྱིས་རྟོག་པ་ཆོས་སྐུར་གྲོལ་བ་དང་། དེ་མིན་ང་དང་ཁྱོད་རང་དབྱེར་མེད་དུ་བསྲེས་ལ་མོས་གུས་ཀྱི་བློ་དེ་སྐྱེ་མེད་སྤྲོས་བྲལ་ཀ་དག་གི་ཀློང་དུ་ཞོག །དེས་འཆི་ཀ་འོད་གསལ་དུ་མ་གྲོལ་ན་བར་དོ་བར་པའམ། བར་དོ་ཐ་མ་བླ་མའི་སྣང་བས་འདྲེན་པའི་དགོས་པ་ཡོད་པ་སེམས་ལ་ཞོགདེ་ཡང་རང་ཅག་རྣམས་བསྐྱེད་རྫོགས་ཀྱི་གདམས་པ་གང་སྒོམ་ཡང་སྦྱོར་དངོས་རྗེས་གསུམ་ཚང་བ་ཞིག་དགོས། སྦྱོར་བ་སེམས་ཅན་ཐམས་ཅད་ཕ་མར་ཤེས་པའི་བྱང་ཆུབ་ཀྱི་སེམས་བསྐྱེད་ལ། དམན་པའི་ས་བཟུང་ལ་ཕན་ཐོགས་ཀྱི་བྱ་བ་རླབས་པོ་ཆེ་ལ་དཔའ་བསྐྱེད། དངོས་གཞི་བསྐྱེད་རྫོགས་གང་སྒོམ་ཡང་སེམས་ཅན་ཐམས་ཅད་རང་སེམས་དབྱེར་མེད་ཀྱི་དངོས་གཞི་སྐྱེ་མེད་ཀྱི་ངང་དུ་བསྲེས་རྗེས། རྒྱལ་བའི་བསྟན་པ་སྤྱི་དང་བྱེ་བྲག་སྔ་འགྱུར་གྱི་བསྟན་པ་རིན་པོ་ཆེ་མཐའ་མེད་པར་དར་ཞིང་རྒྱས་པ་དང་། སེམས་ཅན་ཐམས་ཅད་ཚེ་རབས་ལན་ཆགས་འབྲེལ་པར་བསམ་པས་འཁོར་བའི་རྒྱ་མཚོ་ལས་རྫོགས་པའི་སངས་རྒྱས་ཀྱི་ས་ལ་འགོད་པའི་སྨོན་ལམ་རྒྱ་ཆེ་ཞིང་། བདག་ཀྱང་སྐྱེ་བ་ནས་བྱང་ཆུབ་བར་རྩ་བའི་བླ་མ་དང་སྙིང་པོའི་བསྟན་པ་འདི་དང་ནམ་ཡང་མི་འབྲལ་ཞིང་འགྲོ་དྲུག་འཁོར་བའི་རྒྱ་མཚོ་མ་སྟོངས་བར་དུ་དལ་འབྱོར་གྱི་རྟེན་གཙང་མ་ཐོབ་པའི་གཞན་དོན་ནུས་ཕྱིར་ས་སྐྱོང་སྡིག་གསོག་པ་དང་ངན་སོང་གི་རྟེན་གསོག་པའི་རིགས་སུ་ནམ་ཡང་མི་སྐྱེ་བར་ངེས་འབྱུང་སྐྱོ་ཤས་ཀྱིས་དཀོན་མཆོག་གསུམ་སྐྱབས་སུ་བསྟེན་པའི་ཕ་མ་དད་ཅན་འབྱོར་ལྡན་གྱི་བུར་སྐྱེས་ནས་འགྲོ་ཀུན་སྒྲོལ་ནུས་པར་སྐྱེ་བར་ཤོག་སྙམ་པའི་འདུན་པ་ཡང་དག་གིས་ཆོས་བྱས་པ་རང་གིས་རང་མི་བསླུ་ཞིང་མི་ཁྲེལ་བའི་བྱ་བ་བྱེད་དགོས། རང་བཙན་ས་ཟིན་ནས་སེམས་ཅན་རྣམས་དོར་བ་མ་བཤད་དེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རང་དོན་དོར་ནས་སེམས་ཅན་གྱི་དོན་ཁོ་ན་མཛད་པ་ཡིན་མོད། ད་དུང་ཧུར་ཐག་བྱེད་དགོས་གསང་ཆེན་སྙིང་པོའི་བསྟན་པ་ནུབ་མ་རག་ལ་ཐུག་པའི་ཉག་ཤིན་ཏུ་ཕྲ་བ་འདིར་གཞིགས་པའི་སྙིང་ལ་རུས་པ་བསྐྱེད་ཅིག་ཅེས་སྩལ་བའི་ངུ་ངག་གིས་ངང་ནས་སེམས་འཕྲེང་ཤིན་ཏུ་ཆེ་བ་ནས་ལོག་ཡོང་། དེར་ཤ་འུག་སྟག་སྒོ་བདེ་ཆེན་དུ་ལོ་བཞི་སོང་དུས་ཚོགས་པ་རྣམས་ལ་འཕྲལ་ལ་ལོག་ཡོང་དགོས་པའི་བཀའ་ཤོག་སྩལ་བའི་ཞབས་པད་དུ་ལོག་ཡོང་། འདི་ཕྱི་དགེ་བའི་ཞལ་ཏ་ལྷུག་པར་བརྩེ་བས་སྩལ་བ་ཡིན་ནོ། །དེ་ནས་གངས་རི་ཐོད་དཀར་ནས་ཡེར་པའི་ལོ་གསུམ་བཏོང་དུས་འགྲོ་ཞོར་ཆུ་བོ་རིར་རྗེའི་ཞབས་པད་དུ་ཡོང་བར་ཆུ་བོ་རིར་གཟིམ་ཆུང་དུ་རྗེ་ཉིད་ཅུང་ཟད་བཞད་པར། འགྱུར་གཡང་ནས་རྗེ་ཉིད་དོན་མེད་ལ་བཞད་པ་ཅི་ཡིན་ཞུས་པར། བཀའ་ལས་ཡངས་པའི་རྟོགས་ལྡན་དེ་ཆུ་ཤུར་རྫོང་གི་མ་ཚད་དེ་ནས་ཡར་ཡོང་གི་འདུག །ཁ་སྐོམ་པ་ལ་ལམ་བར་གྱིས་རྫབ་དོང་ནང་ནས་ཆུ་ཐུང་གྲབས་བྱས་སོང་བར་བྱིས་པ་ཞིག་གིས་སྐྱུག་བྲོ་ཞེས་འཐུང་དུ་བཅུག་མ་སོང་། ད་ཆང་མ་ཞིག་གི་ནང་ན་ཆང་འཐུང་གིན་འདུག །སང་འདིར་ཡོང་བ་འདུག་ཅེས་གསུངས་ཤིང་། དེའི་སང་ཉིན་ཞབས་པད་དུ་ཡོང་དུས་གཙང་དཔལ་རྣམ་དཔལ་རི་སྤྲུལ་སྐུ་དང་བསྟུན་པའི་བྱང་གཏེར་ཐུགས་སྒྲུབ་མཐིང་ག་དྲག་པོ་རྩལ་གྱི་དབང་རྒྱས་འབྲིང་གཉིས་དང་ཀློང་སྡེ་རྡོ་རྗེ་ཟམ་པའི་རྩ་དབང་རྒྱས་པ་དང་ཁྲིད་ཡིག་སྐལ་བཟང་མིག་འབྱེད་ལྟར་ཤར་ཁྲིད་དང་། དེ་རྗེས་ཆུ་བོ་རི་འདུས་ཚོགས་དང་། ཆུ་ཤུར་ཐར་པ་གླིང་འདུས་ཚོགས་བཅས་པ་ལ་གར་ཚེའི་དབང་བཅས་སྩལ་བའི་བཀའ་དྲིན་ཐོབ། ཐར་གླིང་འདུས་ཚོགས་ཀྱིས་བརྟན་བཞུགས་རྒྱས་པར་ཕུལ། དེ་རྗེས་བདག་ལ་ཉང་གཏེར་ཞིང་སྐྱོང་མ་མོའི་རྗེས་གནང་དང་། གར་དབང་ཚེ་དཔག་མེད་ཀྱི་ཕྱི་སྒྲུབ་ཀྱི་དམིགས་ཁྲིད་ཕྱག་ལེན་དང་བཅས་ཕྲ་ཞིབ་དུ་སྩལ་བ་ཡིན་ནོ། །ལྕགས་ལུག་ལོར་ལ་མོ་ཆོས་སྐྱོང་གི་ཁོག་གཞི་མ་བདེ་བར་རྗེ་ཉིད་ཆོས་སྐྱོང་ནས་ཞབས་སྐྱོད་དགོས་པའི་ཞུ་བར་ཕེབས་པའི་ཚེ་དབང་སོགས་རིམ་གྲོ་དུ་མ་མཛད་པས་སྐུ་རྟེན་པ་གཞི་མེད་དུ་དྭངས་པ་ལ། དེར་མགོན་ཁང་དུ་ཆོས་སྐྱོང་ནས་རྗེ་ཉིད་སྤྱན་འདྲེན་ཞུས་པར་ཕེབས་ལམ་ཕར་ཐོགས་སྐབས་གྲྭ་པ་རྣམས་ལང་པ་ཙམ་ཡང་མི་བྱེད་པར། མགོན་ཁང་དུ་ཕེབས་ཚེ་ཆོས་སྐྱོང་ཁྲི་སྟེང་ནས་བབས་པའི་ཞབས་སུ་བསྐྱོད་དེ་མཚོ་རྒྱལ་གྱི་སྤྲུལ་པ་འདྲེའི་གནས་རྟེན་དུ་ཕེབས་པ་ལེགས་ཞེས་མཇལ་དར་ཕུལ་ནས། སྙིང་པོའི་བསྟན་པར་འཕོ་འགྱུར་མི་ཡོང་ཞེས་གསུངས་པས་ཚུར་ལམ་གྲྭ་མང་རྣམས་འུར་ཞོགས་ཀྱིས་བྱིན་རླབས་ཞུ་བར་ཕེབས་ལམ་འགགས་པ་ཙམ་བྱུང་། དེ་ནས་ཆིབས་ལམ་དུ་ཕོ་བྲང་ཆེན་མོའི་ལྟག་སྒོ་ལས་བརྒྱུད་དེ་རྩེར་གོང་མ་རྒྱལ་དབང་དམ་པའི་ཞབས་པད་དུ་བཅར་བར་མཛད། སྨིན་གླིང་། རྡོར་བྲག །བྱང་ཆུབ་གླིང་རྣམས་ལ། ཕོ་ལྷའི་བསྟན་པའི་རྗེས་ཁྲི་ནུབ་མོ་ནན་གྱི་དགོངས་ཚོམས་ཀྱི་དམ་རྩི་ཆེ་བར། དེར་རྗེ་ཉིད་ནས་དེ་སྐོར་གྱི་སྔར་རྒྱལ་པོ་ལྷ་བཟང་ནས་བཟུང་དཔོན་པོ་ན་རིམ་གྱི་སྐུ་རིམ་ཕེབས་ཀྱི་འདུག་ཅིང་། དཔོན་ཐོག་འགྱུར་རེས་བཞིན་ཕྲན་ཚོར་སྦྱོང་གཅོད་ཀྱི་ཉེས་ཆད་འདི་བཞིན་ཡོང་གི་འདུག་པས། དེས་ན་ད་ནས་བཟུང་དཀར་པོའི་དགེ་ཆོས་ཀྱི་ཞི་བའི་ལས་བཙུན་མ་ལྟ་བུའི་བྱ་བཞག་ལས། མངོན་སྤྱོད་དྲག་ལས་སུ་གྱུར་པའི་ཕྲན་རྣམས་རྔ་ལག་ཏུ་ལོན་མི་དགོས་པ་ཞིག་གི་དམ་བཅའི་ཚུལ་སོགས་བཀའ་ནན་ཆེ་ཙམ་ཞུ་གནང་ལ། རྒྱལ་དབང་མཆོག་ནས་སྨིན་གླིང་རྗེ་བཙུན་དྲུང་རང་དེ་འདྲ་གནང་མི་དགོས་ལྷོད་དེ་བཞུགས་པ་ཞུ། ངས་ནི་གང་ཡང་མ་བྱས་དགེ་རྒན་པ་དྲི་བ་ཅུང་ཟད་བཏང་བ་ཡིན་འདུགསྙིང་པོའི་བསྟན་པར་འཕོ་འགྱུར་མི་ཡོངས་ཞེས་སྩལ་ཏེ། ཆད་འགྲོས་སོགས་ཀྱང་མར་འབེབས་པར་མཛད། དེའི་སང་ཉིན་ནས་གཅེན་རཏྣ་བི་ཛ་མཇལ་བཀའ་ཡང་སྩལ་ཏེ། མི་སྲུན་ནམ་མཁའ་སྤྲིན་བྲལ་བཞིན་དྭངས་ཏེ་ཐམས་ཅད་བདེ་འཇགས་སྐལ་བཟང་གི་བདེ་བ་ཐོབ་ནས་རང་གནས་སུ་ཕེབས་ཏེ་ཆོས་སྐྱོང་རྣམས་ལ་གྲྭ་སྒྲོས་བཅོ་ལྔས་གཏང་རག་གི་བསྐང་གསོ་མཛད་དེ་བཅད་རྒྱར་བཞུགས། ལྕགས་ལུག་ནས་བཟུང་མེ་ཁྱིའི་བར་ཤ་འུག་སོགས་ཕྱོགས་འགྲོའི་དབེན་རི་རྣམས་སུ་སྒྲུབ་པ་ལ་ཕྱིན་པས་ཞིབ་པ་ཞིག་རྗེ་སྐུ་ན་སྨིན་སྟབས་ཞུ་མ་ཐུབ་ཅིང་། ཞབས་རིམ་པ་རྣམས་ལའང་ངེས་འབྱོར་ཞིག་མི་འདུག་ཀྱང་། ཕྱིས་སྒྲུབ་སྡེ་འཆི་མེད་བཀོད་དུ་ཕེབས་ཏེ་ལོ་ལྟར་ཧོར་ཟླ་བཞི་པ་ནས་དགུ་པའི་བར་སྙིང་པོའི་རྒྱུད་ཀྱི་བཤད་པ་ཆག་མེད་ཀྱིས་བློ་གསར་རྣམས་ལ་ཐོལ་བྱུང་གི་ཤེས་རབ་བསྐྱེད་པར་མཛད་དེ་སྐུ་ངལ་ཡང་། རང་རེའི་མ་དགོན་དུ་དོན་མཐར་སྐྱེལ་ལྟ་བུ་ཤིན་ཏུ་དཀོན་ཞིང་བྱེད་བློ་ཙམ་ལས་མི་འདུག་ཅེས་སྩལ་ཅིང་། གང་ལྟར་ཡང་སྒྲུབ་སྡེར་ཕེབས་པའི་སྐོར་མ་གཏོགས་རང་གནས་སུ་ཕེབས་ཏེ་རྣམ་ཀུན་ཏུ་ཕལ་ཆེར་སྐུ་བཅད་དང་ཟླ་བ་གསུམ་པ་ཤར་མཚམས་ལོ་ལྟར་འཆར་ཅན་གྱི་ཕྱོགས་འདུས་ཀྱི་ཆོས་ཞུ་བ་རྣམས་ལ་གང་ལ་གང་འཚམས་པའི་སོ་སོའི་རེ་འདོད་སྐོང་བའི་དམ་པ་ཆོས་ཀྱི་སྦྱིན་པས་ཚིམ་པར་མཛད་པ་ཡིན་ནོ། །དེ་དག་གི་དུས་སྐབས་ཤིག་ལ་མདོ་ཁམས་པ་རྫོགས་ཆེན་བླ་མ་ཟུང་དཔོན་གཡོག་རྣམས་ལ་བདེ་གཤེགས་ཀུན་འདུས་ཀྱི་ཟབ་ཁྲིད་དང་རི་ཆོས་ཟབ་དོན་གསལ་བའི་ཉི་མའི་ལུང་ཡང་སྩལ། དེའི་རྗེས་མི་དབང་འགྱུར་མེད་བསོད་ནམས་སྟོབས་རྒྱས་དང་སྲས་ལྕམ་བདེ་ལྡན་སྒྲོལ་མ་དང་། དགའ་བཞི་གུང་ཡབ་ཡུམ་སྟེང་ཞལ་སྲས་བཅས་དགོན་པར་ཕེབས་པའི་མཇལ་ཁ་དང་། དབང་ཆོས་ཀྱི་སྦྱིན་པས་ཚིམ་པར་མཛད་དོ། །དེ་རྗེས་བསམ་འགྲུབ་ཕོ་བྲང་ནས་མི་རྗེའི་ཚངས་སྲས་གུང་བཀྲ་ཤིས་རྣམ་རྒྱལ་སྟེང་ཞལ་སྲས་བཅས་ཕེབས་པར་མཇལ་ཁ་དང་འཆི་མེད་ཡང་སྙིང་ཀུན་འདུས་ཀྱི་ཚེ་དབང་དང་དམ་རྫས་ཞལ་ཆེམས་ཀྱིས་ཚིམ་པར་མཛད་དོ། །དེ་ནས་ཨར་དགེ་དགོན་གསར་བསམ་གཏན་འཕེལ་རྒྱས་གླིང་དུ་གདན་དྲངས་ཏེ་རབ་གནས་ཀྱི་མེ་ཏོག་འཐོར་ཞིང་ཡུལ་པར་ཁྲོམ་དབང་དང་སོ་སོའི་རེ་འདོད་སྐོང་བ་མཛད་ཅིང་། ཕེབས་ལམ་དུ་ཕུག་དཔོན་ས་ཨ་སྙིང་ནས་དཔལ་འབྱོར་ལྷུན་གྲུབ་ཏུ་གདན་དྲངས་པའི་ཞབས་ཏོག་ཞུས་ཏེ་རང་གནས་སུ་ཆིབས་བསྒྱུར་ཏེ་བཅད་རྒྱར་ཞུགས། མེ་ཁྱི་ཟླ་བ་ལྔ་པའི་ཚེས་འགོ་ནས་བཟུང་གྲྭ་གཙང་འདུས་གྲངས། དབུས་ཀྱི་བྱ་བཏང་མང་པོ་དང་། སྙིང་མདོ་ཞབས་དྲུང་མེ་ཏོག་ལགས། འཇུན་པ་ཆོས་དྲུང་། བསམ་རྩེ་དང་། འོད་གསལ་གླིང་གི་མ་ཇོ་ཁ་ཤས་སོགས་འདུས་པ་ཉིས་བརྒྱ་སྐོར་ལ་ཟབ་ལམ་བདེ་གཤེགས་ཀུན་འདུས་ཀྱི་ཟབ་ཁྲིད་མན་ངག་དང་བཅས་རྫོགས་པར་སྩལ། དེ་དུས་བདག་གཙང་ཉང་སྟོད་ཡོལ་བའི་གནས་སྣང་ས་འོད་དེ་འབུམ་གྱི་སྒྲུབ་གནས་སུ་ལོ་གསུམ་ཐེམས་པས་རྗེ་བླ་མ་མཆོག་གི་ཞབས་པད་དུ་མཇལ་ཕྱག་ཏུ་ཡོང་བས་ཐུགས་དགྱེས་པའི་ངང་ནས་བླང་དོར་གྱི་ཞལ་ཏ་ཞིབ་པར་སྩལ། དེ་ནས་བདེ་གཤེགས་ཀུན་འདུས་འཕྲུལ་འཁོར་འདི་རྒྱག་མི་དཀོན་པ་ཙམ་འདུག །ཅུང་ཟད་ཡོད་པ་སྲོག་སྒྲུབ་དང་ཕག་མོ་ཟབ་རྒྱ་སོགས་དང་འབྲེལ་ནས་མི་འདུག །རྗེ་དམ་པ་ཁྲི་རིན་པོ་ཆེ་ལའང་ཆོས་རྒྱུན་ནུབ་པར་དཀའ་ཚེགས་མེད་པས་མི་ནུབ་པ་དར་རྒྱས་ཀྱི་སྙན་ཞུ་ཞུས་ཡོད་ཅིང་། དེས་ན་ཁྱོད་ནས་འཕྲུལ་འཁོར་གནད་དུ་གང་འགྲོ་ཞིག་བསླབ་སྦྱོང་གྱིས་སྩལ་བས་ཕྱོགས་འདུས་ཀྱི་བྱ་བཏང་བཅོ་ལྔ་སྐོར་དང་། འཇུན་པའི་ཆོས་དྲུང་། ཁྱད་པར་གྲྭ་གཙང་གི་གྲྭ་པ་བཅོ་ལྔ་སྐོར་བཅས་ལ་ཇི་ལྟར་བཀའ་སྩལ་རྗེས་གྲུབ་ཀྱི་ངོས་ནས་ནན་ཏན་བསླབས་ཤིང་། ཡང་སྐབས་ཤིག་ཁྲིད་པ་འདུས་ཚོགས་སུ་ད་ལམ་མ་བསྒྲིགས་རང་འགྲིག་གི་རྟེན་འབྲེལ་ཡང་བཟང་། གྲུབ་ཆེན་འགྱུར་མེད་འོད་གསལ་ངེད་ནས་སྒོམ་ཆེན་དོན་གྲུབ་ལགས་ཀྱི་དྲུང་ཆེད་གཉེར་གྱི་འཕྲུལ་འཁོར་བསླབ་ཏུ་བཏང་ཞིང་ངེད་རང་ནས་ཀྱང་ཞུས་དག་ནན་ཏན་སོང་བས། དེས་ན་འཕྲུལ་འཁོར་ངེས་པོ་ཡོད་པས་ཀུན་གྱིས་ནན་ཏན་བྱེད་དགོས། ཞེས་བཀའ་ཕེབས་ཀྱང་འཕྲལ་གྱི་ལྟར་སྣང་ཙམ་མ་གཏོགས་སྙིང་པོའི་བསྟན་རྒྱུན་ལ་བསམ་པའི་གང་ཟག་ཤིན་ཏུ་དཀོན་པས་དེས་ན་ད་བར་བདེ་གཤེགས་ཀུན་འདུས་འཕྲུལ་འཁོར་འདི་ལྷོ་ནུབ་རྔ་ཡབ་པདྨ་འོད་དུ་གཤེགས་འགྲོ་བར་སེམས་སོ། །དེར་མ་ཟད་ཁྲིད་བཀའ་རྫོགས་དུས་བཀའ་ལས། ངས་ལུས་དམན་ཞིང་ཤིན་ཏུ་ངལ་ཡང་སྙིང་པོའི་བསྟན་ལ་བསམ་པའི་ཆོས་རྒྱུན་རེ་རེ་བཞིན་ཕྲ་ཞིང་ཞིབ་པ་དོགས་གཅོད་སོགས་ལ་མ་ལྟོས་པར་བཤད་ཀྱང་། ཇི་བཞིན་ཉམས་སུ་མ་བླངས་ཤིང་འཆད་སྤེལ་གང་ཡང་མ་ནུས་ན་དེ་འདྲའི་སློབ་མས་ཅི་བྱེད་རྒྱུ་ཡིན། ད་འགྱུར་མེད་འོད་གསལ་གྱིས་འཆད་སྤེལ་ཡོང་གི་ཡོད་མོད། ཁྱོད་གྲྭ་པ་དང་རྟོགས་ལྡན་རྣམས་མི་ཡར་འདྲེན་གྱི་འཕོ་བ་སོགས་ལས་གང་དང་གང་གི་ཚེ་ཡང་། ད་ང་ལ་ལྟོ་ཅི་སྦྱིན་ཡོང་། ཡོན་ཅི་བརྒྱབ་ཡོང་{མ་}བསམ་པའི་ཟ་འདོད་ལྟོག་འདོད་ཀྱི་རང་འདོད་ཁོ་ནའི་བསམ་པ་གཏིང་དུ་བཅགས་ནས་གཞན་དོན་བྱང་སེམས་ཀྱི་རྣམ་བཞག་དོར་ན་མི་ཡར་འདྲོངས་པ་ལས་མིར་མི་ཕན་པའི་སྟེང་བླ་མའི་བཀའ་དང་འགལ་ཞིང་དཀོན་མཆོག་ལ་རྒྱབ་གྱེས་པས་རང་ཆོས་གཟུགས་འཁོར་བ་ངན་སོང་གི་གནས་ལས་མ་འདས། ཁྱད་པར་དུས་དབང་ཞིག་ཡིན་ནམ་གང་ལྟར་ཡང་ང་རང་དམན་གཟུགས་པ་ཡིན་ཡང་དེང་སང་རྟོགས་ལྡན་ལས་ཟོབ་ཚ་བ་མི་འདུག །ཆང་མང་པོ་བཏུང་ན་ཆོས་ཉིད་ཀྱི་རྟོགས་པ་མཐོ་ཞིང་བཟང་ཟེར་ཡང་། དེ་ཟོབ་ཁོ་ན་ཡིན། ཆང་མང་པོ་བཏུང་བས་རིག་པ་ཚོ་མ་ཟིན་པར་ཤེས་པ་ཧོལ་ཤིང་རྨུགས་པ་དང་འཐིབས་པ་སོགས་བག་ཡངས་སུ་འཆལ་འགྲོ། འདི་ནས་བླ་མས་ཟབ་ཆོས་བློས་བླངས་ཀྱི་དོ་གལ་གྱི་ངལ་བ་ཁྱད་དུ་བསད་ནས་བཤད་ཀྱང་སྒོམ་མེད་བག་ཡངས་སུ་ལུས་ན་ཆོས་སྒོར་ཚུད་ནས་གནས་སྐབས་སུ་མཁའ་འགྲོའི་བཀའ་ཆད་དང་། མཐར་ཐུག་ངན་སོང་གསུམ་དང་ཁྱད་པར་འཇིག་རྟེན་དམྱལ་བའི་ཚ་གྲང་འགྱུར་འབྱེད་ཀྱིས་བསྐུལ་བཟོད་དཀའ་བ་མྱང་དགོས་མོད། དམྱལ་བ་ལས་ཀྱི་ཆོ་འཕྲུལ་དུ་ངེས་པར་ཡོད་ངེས་པས་རང་གིས་རང་མི་བསླུ་བ་ཐམས་ཅད་ཀྱིས་བྱེད་དགོས། ཡང་སྡིག་སྒྲིབ་མ་དག་པར་ཉེ་ཚེ་རང་གི་བླ་མར་ཡང་དད་པ་ཆུང་དུ་འགྲོ་ཞིང་། རྒྱུ་འབྲས་ལ་རྩིས་མེད་དུ་འགྲོ་བ་སོགས་བྱུང་ཚེ་བླ་མར་བཀའ་དྲིན་རྗེས་དྲན་གྱི་དད་པ་གཏིང་ནས་བསྐྱེད། ཉམས་ལེན་ལ་སྙིང་རུས་དང་། རྒྱུ་འབྲས་ལ་ངན་སོང་གི་བསྐུལ་བས་རྟོག་སྤྱོད་ཞིབ་ཏུ་བྱེད། བླ་མར་མི་ཕྱེད་པའི་དད་པས་གསོལ་བ་འདེབས་ཤིང་མཐར་རང་སེམས་དང་བསྲེ་བ་སོགས་བྱ། ཡང་ཆོས་འཆད་སྤེལ་སོགས་ཀྱི་ཚེ་ན་ཡང་གཏེར་ཆེན་དེ་ཉིད་དེས་སློབ་མའི་རྒྱུད་ལ་སིམ་པ་ཐོབ་པའི་སྒྲ་གསལ་ཞིང་དག་པ་མ་གཏོགས་ནོག་ནོག་དུ་བརྗོད་ན་རང་ལ་ཉེས་པ་མྱང་དགོས་མདོ་སྔགས་ཐམས་ཅད་ནས་བཤད་མོད་ཅེས་གནང་ཞིང་། ཁྱེད་བཙུན་མ་རྣམས་རང་མགོ་འཐོན་ངེས་པའི་ཆོས་དང་མཐུན་པའི་བྱ་བ་ལས་འཆད་སྤེལ་དཀའ་མོད། འོན་ཀྱང་ཁྱེད་ཆེ་བཙན་གྱི་བཙུན་མ་རྣམས་རང་དོན་ཅུང་ཟད་ཟིན་ནས་འཆད་སྤེལ་ནུས་པ་བྱེད་དགོས། སྔར་འདི་འདྲ་ཞིག་གི་དབོན་མོ་ཡིན་འདུག་ཅེས་འགའ་རེ་འདུག་པ་ཐམས་ཅད་ཀྱིས་ཤེས་མོད། ད་ཁྱེད་རྣམས་ཀྱི་བསམ་པར་ཆོས་གཤའ་མ་བྱེད་པ་ལ་འཚོ་བས་ཕོངས་འདུག་སྙམ་ན། བསླབ་སྡོམ་དང་དམ་ཚིག་ལས་མ་འགལ་ཞིང་། རང་གི་བླ་མར་མོས་གུས་དང་། གདམས་ངག་ལ་ལྟེམས་རྐྱང་མེད་པར་ངེས་ཤེས་བསྐྱེད་ལ་བརྩོན་ན་སྔོན་གྱི་ལས་སྒྲིབ་དག་ཕྱིན་འདོད་ཡོན་ལྷའི་བུའི་མགོ་སྐོར་དུ་ལས་ཀྱིས་འབྱུང་ཞིང་། ཁྱད་པར་གཏེར་ཆེན་དེ་ཉིད་ཀྱིས་ངའི་གཏེར་ཆོས་ལ་བརྩོན་ན་འཚོ་བས་འཕོངས་དོགས་མི་དགོས་ཞེས་གནང་བས། དེས་ན་འཚོ་བ་བྱུང་བསྟུན་རང་ཚོད་ཟིན་པའི་རྒྱུ་འབྲས་རྗེས་དྲན་གྱིས་དཀོན་མཆོག་མཆོད་ཅིང་། ངན་སློང་༼ལ་༽སྦྱིན་པ་ལ་ཐམས་ཅད་ཀྱིས་བརྩོན་དགོས། ད་ཁྱེད་ཚང་མས་འཆི་བ་རྗེས་དྲན་དང་། འཇིག་རྟེན་ངན་སོང་གསུམ་གྱི་སྡུག་བསྔལ་བཀའ་བསྟན་མན་ངག་རྣམས་སུ་བཤད་པ་བདེན་ངེས་ཀྱིས་སེམས་ལ་བཞག་པའི་ཧུར་ཐག་བྱེད་དགོས། ཞེས་བསྩལ་ནས་རྗེ་བླ་མ་བཅད་རྒྱར་བཞུགས། དེ་གདོང་མཇལ་ཕྱག་ཏུ་ཕྱིན་པར་བཀའ་ལས། ད་ཁྱོད་འགྱུར་མེད་འོད་གསལ་འདི་ཁར་སྡོད་དམ་ཅི་བྱེད་རྒྱུ་ཡིན་ཕེབས་པར། དེར་བདག་གིས་རྗེ་ཉིད་ཞབས་པད་བརྟན་རིང་གང་དུའང་མི་འགྲོ་ཞེས་ཞུས་ཏེ། ཁོ་བོས་གཏེར་གསར་ཨ་ཏིའི་རིག་པའི་རྩལ་དབང་འདི་ལ་ལྷན་ཐབས་ཤིག་མེད་ན་བསྐུར་ཐུབ་པ་མི་འདུག་ཅེས་ཞུས་པར། བཀའ་ལས་ཕྱག་ལེན་ཞིབ་ཏུ་ཁྲིད་ན་ཤེས་ཡོང་བ་ཕེབས། དེར་བདག་གིས་ཕྱག་ལེན་དང་རྗེ་ཉིད་ཀྱི་ཐུགས་རྗེས་ཤེས་པ་འདུག་སྟེ། གཏེར་གཞུང་ནས་མི་ཐོན་པའི་ཞལ་ཤེས་མཚམས་སྦྱོར་གྱི་ཚིག་དོན་རྣམས་ཁ་ནས་ར་ཐོན་ལུག་ཐོན་བྱེད་ན་མ་གཏོགས་ཤེས་པ་མི་འདུག་ལགས་ཞེས་ཞུས་པར། དེར་བཞད་མོ་མང་དུ་བཞེས་རྗེས་འོ་ན་ད་རེས་མཚམས་ཁོངས་འདིར་བརྩམ་གྱིས། ཁྱོད་རང་གྲྭ་ནས་བསོད་སྙོམས་གྲུབ་བསྟུན་དཔེ་ཐོག་ཏུ་ཕབ་ཆོག་པ་བྱེད་༼ཅེས་༽བཀའ་ཕེབས་ཏེ། དེ་ནས་སྐུ་བཅད་རྒྱར་བཞུགས་པའི་སྒྲུབ་སྡེ་འཆི་མེད་བཀོད་སོགས་ལའང་། སྐུ་ཚེའི་སྨད་འདིར་ཆེར་མ་ཕེབས་པ་ཡིན་ནོ། །མེ་ཕག་ཧོར་ཟླ་བཞི་པའི་ཚེས་འགོར་བཅད་རྒྱ་གྲོལ་བའི་ཚེས་བརྒྱད་ནས་བཟུང་དོ་ནང་པད་གླིང་སྤྲུལ་སྐུ་དཔོན་གཡོག་གསུམ། སྨིན་གླིང་གྲྭ་གཙང་འདུས་གྲངས། སྨན་བརྗིད་དང་སོག་ཕུ་བསམ་གཏན་ཆོས་གླིང་གི་བཙུན་མ་མང་པོ། དབུས་གཙང་གི་ཞལ་སློབ་བྱ་བཏང་སོགས་འདུས་པ་བརྒྱ་དང་ཞེ་བདུན་སྐོར་ལ་ཐུགས་ཐིག་གི་ཟབ་ཁྲིད་སྨིན་པར་སྩལ། འདི་སྐབས་གཏེར་ཆེན་ཆོས་ཀྱི་རྒྱལ་པོའི་སྐུ་སྐྱེད་ཡུམ་ཤེལ་དཀར་རྡོ་རྗེའི་སྤྲུལ་པ་ལྷ་འཛིན་དབྱངས་ཅན་སྒྲོན་མའི་ཡང་སྲིད་ལྕམ་འཛམ་གླིང་དཔལ་འཛིན་གྱི་རིགས་སྲས་མོ་ལགས་ཀྱི་ལེགས་གླིང་སྦུ་ག་བས་མཐུན་མིན་ཅུང་ཟད་ལ་ཚ་ནན་གྱི་ཙ་ར་དྲག་པོའི་ཁྲིམས་གཅོད་ལ། དེར་རྗེ་ཉིད་ནས་ཁོང་རང་འབོད་པ་གནང་བའི་ཞུ་གསོལ་གྱིས་བར་གཟུ་མཛད་པར་མི་ཉན་པའི་ཨུ་ཚུགས་ལ་རྗེ་ཉིད་སྐུ་རླུང་བཞེངས་པའི་བཀའ་ལས། ངས་སྔར་བོད་ཀྱི་དཔོན་ཆེན་རྣམས་ལ་བདེན་གསོལ་གྱི་ཞུ་གསོལ་ཞུས་པར་དང་བླངས་ཀྱིས་གསན་པ་ལ། ད་ཁྱོད་ཙམ་གྱིས་མི་ཉན་ན་ང་རང་གཉིས་ད་ནས་བཟུང་ང་ཁྱོད་ཚ་མོ་ཡིན་བསམ་པ་དང་། ཁྱོད་རང་སྲུ་མོ་ཡིན་བསམ་པ་བྱེད་རིགས་དུས་དེ་རིང་ནས་རྩ་གསུམ་ལྷ་ཚོགས་སྤང་ཞེས་དབུ་སྙུང་བཞེས་ཤིང་། དེར་ཅུང་ཟད་སྐུ་:གཏོན་༼རྟེམ་༽པས་ཞག་བཅུ་སྐོར་ཙམ་ཁྲིད་བཀའ་ཆད་པར། ཞལ་སློབ་རྣམས་ཁོང་རང་ལ་ཞབས་བརྟན་ཐོལ་བྱུང་དུ་མ་མཛད་ཅིང་། དེའི་སྐྱོན་ལས་ཁོང་རང་སྟེང་ཞལ་མི་རིང་བར་འདས་མོད། རྡོ་རྗེ་མཚོའི་སྤྲུལ་པ་ཡིན་ཚུལ་ཡང་ལྕམ་དེ་ཉིད་གཤེགས་དུས་སྐུ་གདུང་ཤེལ་བྲག་དུར་ཁྲོད་དུ་གདན་དྲངས་པའི་ཕུང་པོ་ཚོགས་མཆོད་ཁྲོས་ནག་གི་སྒོ་ནས་མཛད་པའི་གསུང་ཆོག་པའི་གྲལ་འབྲས་པ་དགེ་སློང་བཟང་པོ་ཕྱི་འཁོར་གྲུབ་བསྟུན་བདག་ཉིད་རྗེ་བླ་མ་དམ་པའི་མཇལ་ཕྱག་ཏུ་ཕྱིན་དུས་བཀའ་ལས། ཁྱོད་རང་ད་རེས་སྐལ་བ་བཟང་པོ་བྱུང་སོང་། བུ་མོ་དཔལ་འཛིན་དེ་ཁ་ཐོལ་ཐོལ་ལབ་དུས། གཟིམ་ཆུང་ཀུན་བཟང་ཕོ་བྲང་དུ་གཏེར་ཆེན་དེ་ཉིད་དེས་མགོ་ལ་ཕྱག་གིས་བྱིལ་བྱིལ་མཛད་པའི་བུ་མོ་འདི་ཨ་མ་དེ་ཉིད་དེའི་ཡང་སྲིད་འཁྲུལ་མེད་ཡིན་ཞེས་ཡུམ་དེ་ཉིད་ཀྱིས་གསེར་གྱི་སོར་གདུབ་ཅིག་སྩལ་སོང་བས་ཕྱིས་མོ་རང་ལ་མ་ལེན་པར་ཡོད་ཅེས་གནང་། གང་ལྟར་ཡང་དེར་དབང་གི་དུས་འདུས་པ་མང་པོ་དང་། གནས་སྐབས་གདུལ་བྱའི་ལྟར་སྣང་དུ་ཅུང་ཟད་སྐུ་ན་སྨིན་སྟབས་དབང་ཉིན་གཉིས་འདས་ཏེ་མཛད་པས་སྐུ་ངལ་ཡང་བར་མཚམས་མེད་པར་ཆོས་འཁོར་རྒྱུན་མི་ཆད་དུ་བསྐོར་ཞིང་། གང་ཟག་སོ་སོ་ལ་དཔག་ཚོད་ཀྱི་ཞལ་ཏ་ཞིབ་པར་སྩལ་ཅིང་། ཁྱད་པར་རྒྱུད་ཐོག་ཏུ་མ་ཁེལ་བའི་ཆོས་ནི་ཀུན་མཁྱེན་ཆེན་པོས་རྡོ་རྗེའི་ཕུང་པོ་ལ་ཆོས་བཤད་པ་དང་མཚུངས་ཞེས་གསུངས་ཡོད། སྐུ་ཞབས་གཏེར་ཆེན་དེ་ཉིད་དེས་སྐྲ་བྲེགས་ཚད་སངས་རྒྱ་ན་སོག་པོ་ཐམས་ཅད་སངས་རྒྱ་མོད། གོས་དམར་པོ་གྱོན་ཚད་སངས་རྒྱ་ན་སྤྲང་པོ་ཐམས་ཅད་སངས་རྒྱ་ཞིང་། ཆོས་ཟབ་པ་མང་པོ་ཐོབ་ཀྱང་ཉམས་ལེན་མཐར་ཁྱོལ་མ་བྱས་ན་གནས་སྐབས་ལྟར་སྣང་གི་སྐལ་བ་བཟང་བ་ཙམ་ལས་མཐར་ཐུག་གི་འབྲས་བུ་མི་འབྱུང་བ་ཟོ་ཁོག་ལ་ཐིག་པ་བརྒྱབ་ཀྱང་ཐོབ་ཐོབ་ཟེར་ཡོང་ཞེས་གནང་བས་ཐམས་ཅད་ཀྱིས་ནན་ཏན་བྱེད་དགོས་ཕེབས། འདི་དུས་གྲྭ་ནང་གུང་སྐུ་ཞབས་དཔོན་གཡོག་ཉིས་བརྒྱ་ལྷག་བརྒལ་བ་ལ་ཚེ་དབང་དང་དམ་རྫས་ཀྱི་སྦྱིན་པས་ཚིམས་པར་མཛད་ཅིང་། རྗེའི་སྐུ་ཚ་མོ་ཨེ་རྒང་ཐོག་ཏུ་ཕེབས་པས་འདི་ལོ་ཞབས་པད་དུ་བཅར་ཏེ་ཕྱིར་ཕེབས་སྐབས་བླང་དོར་གྱི་ཞལ་འཁོས་ཞིབ་པར་སྩལ་བའི་ད་ཕྱིས་ཕྲད་པ་ཞིག་དཀའ་བས་སེམས་ལ་ཞོག་སྩལ། འདི་སྐབས་རྣམ་ཐར་འདིའི་ས་བོན་བདག་ལ་སྩལ་དུས་ཀྱི་ཞབས་པད་དུ་ཕལ་ཆེར་གནས་ཤིང་དཔེར་མ་འཁོད་ཀྱང་ཡིད་བཅགས་བྱེད་པའི་སྐབས་སུ་ཡོད། འདི་ལོ་སྒྲུབ་སྡེ་འཆི་མེད་བཀོད་བླ་བྲང་གཞུང་དུ་རྩིས་འབུལ་གནང་བཞིན་ཟླ་བ་བཞི་པའི་ཆུ་བོ་རིའི་དབང་མོ་ཆེའང་ཁྲི་རིན་པོ་ཆེ་འགྱུར་མེད་པདྨ་བསྟན་འཛིན་གྱིས་མཛད། རྗེས་དཔོན་གཡོག་ཕྱིར་འཁོར་གྲུབ་བསྟུན་ཞབས་བརྟན་རྒྱས་པར་སྩལ་བའི་བཅད་རྒྱར་བཞུགས། ས་བྱི་ཧོར་ཟླ་གཉིས་པའི་ཡབ་རྗེ་འགྲོ་འདུལ་གཏེར་བདག་གླིང་པའི་དུས་མཆོད་ཉང་གཏེར་བཀའ་བརྒྱད་བདེ་གཤེགས་འདུས་པའི་སྒྲུབ་མཆོད་བོད་ཡུལ་གངས་རིའི་ལྗོངས་འདིར་གཞན་དུ་མ་གྲགས་པའི་ཕྱག་བཞེས་ཁྱད་འཕགས་གཏེར་བྱང་དུ་དཔལ་ཨོ་རྒྱན་གུ་རུའི་ལུང་གི་བསྟན་པ་གདམས་པ་འདི་སྐོར་ལ་རྨད་བྱུང་སྲོག་རྩ་འཛིན་པར་གྱུར་པའི་གསང་བདག་རྡོ་རྗེ་ཆོས་མི་གཟུགས་སུ་བསྟན་པའི་དུས་ཀྱི་མཆོད་པ་འདི་ཉིད་སྔར་ནས་ལན་མང་ཙམ་གསོར་བ་གནང་ཡང་འདི་ལོའང་རིགས་སྲས་རྗེ་བླ་མ་བདེ་ཆེན་ཌཱ་ཀིའི་གཙོ་མོ་ཉིད་ཀྱིས་འགན་བཞེས་གནང་བའི་ཞབས་ཏོག་དང་འབུལ་ཡོན་གྱ་ནོམ་པའི་སྟ་གོན་དང་དངོས་གཞིའི་ཉིན་ཚོགས་སུ་ཕེབས་པའི་ཕྱག་འགྱེད་འབུལ་བ་སྦྱོར་འཇགས་རྒྱས་པར་སྩལ། དེ་རྗེས་ཀླུ་སྡིངས་སུ་བླ་གྲྭ་ཚང་མས་ལེགས་སོའི་མགུལ་དར་དང་། དེ་མཚུངས་མི་སེར་དང་དགོན་མ་ལག་ཞལ་སློབ་དང་བཅས་པས་ཕུལ། དེའི་སང་ཉིན་མགུལ་དར་འབུལ་མི་རྣམས་ལ་ཞབས་ཏོག་རྒྱས་པར་སྩལ་ནས་བཅད་རྒྱར་བཞུགས། ས་བྱི་ཟླ་བ་གསུམ་པའི་ཚེས་ཉེར་གསུམ་ལ་བཅད་རྒྱ་གྲོལ་བའི་ཉེར་བརྒྱད་ནས་དོ་ནང་སྤྲུལ་སྐུ་པདྨ་དབང་རྒྱལ་དཔོན་གཡོག་སྨིན་གླིང་གྲྭ་གཙང་འདུས་གྲངས་རོང་པ་རྫོགས་ཆེན་པ་སོགས་འདུས་པ་བཞི་བརྒྱར་ཉེ་བ་ལ། ཐུགས་ཐིག་ཨ་དོན་མཁའ་འགྲོ་སྙིང་ཐིག་དང་བཅས་པའི་དབང་ཁྲིད་སྨིན་པར་སྩལ་ཅིང་། བདག་ལ་ཁྲིད་སྐྱོར་དང་ཁྱད་པར་སེམས་ཚོལ་ལ་རུ་གང་ང་བྱེད་དགོས་ཕེབས། བཀའ་ཁྲིད་རྫོགས་རྗེས་པད་སྤྲུལ་དཔོན་གཡོག་དང་གྲོང་སྙིང་སྨིན་གྲོལ་སོགས་ལ་ཡང་སྙིང་ཀུན་འདུས་ཀྱི་ཚེ་ཁྲིད་སྩལ་རྗེས་བཀའ་ལས། པད་སྤྲུལ་ཉིད་སྔ་ཐོག་ཆུང་དུས་ཆུ་བོ་རིར་ཡབ་སོགས་ཞལ་ངོ་རྣམས་ཕེབས་དུས་བདག་གི་རྡོར་དྲིལ་འཁྲོལ་བ་སོགས་བག་ཆགས་བཟང་ཞིང་བདག་ལ་དགྱེས་ཉམས་ཀྱིས་གཡས་གཡོན་ཐད་ཀྱི་གཟན་བཟུང་བ་སོགས་ཕྱིས་བསམ་ཚེ་བདག་གི་རྗེས་སུ་བཟུང་དོགས་པར་འདུག་སོགས་བཀའ་ལྷུག་པར་སྩལ། ཟླ་བ་ལྔ་པའི་ཟླ་སྨད་ལ་ཁྲིད་བཀའ་རྫོགས་རྗེས་བཅད་རྒྱར་བཞུགས་པའི་བར་སེང་དུ་བདག་གིས་གར་དབང་ཚེ་དཔག་མེད་ཀྱི་ནང་དང་ཁྱད་པར་གསང་སྒྲུབ་ལས་རྒྱར་བསྟེན་པ་ཡིན་ཡང་ཡིད་རྒྱར་བསྟེན་པའི་ཕྱག་ལེན་ཡོད་དམ་ཞེས་ཞུས་པས་བཀའ་ལས། ཡོད་གྲགས་ད་ལམ་ཁྱོད་ཀྱིས་ཞུ་བ་དེ་ལེགས་པོ་བྱུང་གཞན་ལས་འགྲོ་བས་ཆོས་རྒྱུན་ནུབ་འགྲོ་མོད། ཁྱོད་ཀྱིས་གྲོང་སྙིང་ཨེམ་ཇི་སྨོན་གྲོལ་བོས་ཤོག །ཁྱེད་རང་གཉིས་ལ་ཁྲིད་པ་ཡིན་གསུངས། ནང་གསང་གི་གདམས་པ་ཞིབ་པར་སྩལ། དེ་རྗེས་བདག་ལ་ད་ཚར་ཅིག་སྐྱོར་དང་སྩལ། སྐྱོར་བས་དེ་ག་ཡིན་པ་འདུག་གཏེར་ཆེན་རྗེས་གདམས་པ་ཡིག་ཐོག་ཏུ་མི་འབེབས་པ་ཡིན་ཏེ། ནམ་ཞིག་ནུབ་པའང་འཚོལ་དགོས་དེས་ན་ཁྱོད་རང་གི་ཚེའི་མཐར་ཐུག་པ་ན་དད་ཅན་གྱི་སློབ་བུ་བྱ་བཏང་ཞིག་འོང་བས་དེར་སྤྲོད་ལ་ཟིན་ཐོར་ཕབ་ཏུ་ཆུག་གནང་བས་ད་རེས་ཟིན་བྲིས་བྱས་པ་འདིར་ཁྱེར་ཤོག་སྩལ། ཟིན་བྲིས་བྱས་པ་སྤྱན་ལམ་དུ་བསྟར་བས་ཞུས་དག་མཛད་ཅིང་བཀའ་མཆན་ཡང་སྩལ། དེའི་དུས་འགྱུར་དབང་དང་དགེ་སློང་བཀྲས་དབང་གཉིས་ལ་ཆོས་རྒྱུན་ལ་ཕན་པའི་ང་ལ་བུ་ཉི་ཟླ་ལྟ་བུ་གཉིས་ཡོད། ཉི་མ་ལྟ་བུ་དེ་མུ་ཏོའི་ཆས་ཅན་ཤེས་རབ་མེ་ལྕེ་ལྟ་བུ་དང་། ཟླ་བ་ལྟ་བུ་དེ་རབ་བྱུང་ཞིག་ཅེས་སྐུ་རྩེད་ལྟ་བུ་གནང་ཞིང་། ཁྱད་པར་ཕྱི་ལོ་ཟླ་བ་བཅུ་གཉིས་པའི་ཚེས་འགོ་བར་བཅད་རྒྱར་བཞུགས་ཤིང་། བཅད་རྒྱ་གྲོལ་རྗེས་མེ་རག་པདྨ་འཕྲིན་ལས་དབང་ཕྱུག་གིི་ཡང་སྲིད་ངག་དབང་བློ་བཟང་བསྟན་འཛིན་དཔོན་གཡོག་རྣམས་ལ་མཇལ་ཁ་དང་བདེ་:ཆེན་༼གཤེགས་ཀུན་༽འདུས་ཀྱི་ཟབ་ཁྲིད་སྨིན་པར་སྩལ། ཆོས་བཀའ་ལྷག་ལུས་པའི་རྡོར་སེམས། ཐུགས་ཐིག་ཨ་དོན་སོགས་ཀྱི་ཁྲིད། དྲག་པོ་སྡེ་ལྔ། གཏེར་གསར་སྔགས་སྲུང་མ། གཏེར་གསར་ལྷ་ཆེན་རྣམས་ཀྱི་རྗེས་གནང་། ལུང་ཁ་འཐོར་སྣ་ཚོགས་བཅས་འབུལ་བར་ཁོང་དཔོན་གཡོག་ལྷ་སར་སྟབས་ཤུར་ཕེབས་དགོས་པ་བདག་རྫོང་བདའ་གནང་།

ཞིང་འདིའི་མཛད་པ་ཟིན་ནས་སྐུ་ཞི་བར་གཤེགས་པ།

དེ་ནས་བདག་སོགས་རྣམས་ཀྱི་འཕེན་པ་ཟད་པའི་ཚུལ་ནི། ས་གླང་ཟླ་བ་དང་པོའི་ཚེས་གཅིག་གི་ཐོ་རེངས་ཆར་བདག་གིས་རྗེ་བླ་མ་དམ་པའི་ཞབས་དྲུང་དུ་ལེགས་སོའི་མགུལ་དར་འབུལ་ཕྱིར་ཚུར་ལམ་གཏེར་བདག་གི་སྐུ་མཁར་སར་ནམ་སེང་ལ་ཐུག་དུས་བྱོ་བོ་ལ་ཉག་ནས་དེའི་བར་གྱི་ཕན་ཚུན་ཡན་ཁ་བ་མིན་པའི་ན་བུན་ལྟ་བུའི་ས་ལི་སི་ལི་ཞིག་གིས་དགོན་པ་ཁེངས་ཤིང་། འབྲས་བུ་ལ་རྫས་འོག་གི་རི་ཉི་ཤར་ཙམ་གླང་སྐད་ལྟ་བུའི་སྒྲ་ཆེ་བ་དང་། བདེ་ཆེན་གླིང་ཆིབས་རི་ནང་དུ་གླ་བ་ཡོངས་ཤིང་། ཐོ་རེངས་སྐར་མ་མཇུག་ཕོད་ཅན་ཐགས་ཤད་དོ་ཙམ་ཤར་ཞིང་། ཕོ་རོག་གཤོག་པ་སྒྲོ་དཀར་གྱིས་བརྒྱན་པས་འདི་ལོ་སྟར་ཆགས་སྡོད་པ་སོགས་པྲ་ལྟས་ངན་ཞིང་། དེར་མ་ཟད་བདག་ཙམ་ལ་ངེས་པ་དཀའ་ཡང་དེ་གོང་ས་བྱི་ལོར་ནད་ཀྱིས་ལྕི་བའི་དུས་ཟླ་བ་དང་པོའི་ཚེས་བཅོ་བརྒྱད་ཀྱི་ཆའི་རྨི་ལམ་དུ་མཁའ་སྤྱོད་བདེ་ཆེན་གླིང་གི་གསོལ་ཐབ་ཀྱི་གསང་སྒོའི་ཕྱིར་རང་འདུག་པར་རྗེ་ཉིད་ཕྱིར་ཕེབས་པའི་ཞབས་ཕྱིར་རྣམ་རྒྱལ་ཆོས་སྐྱིད་འདུག་པ། དེ་མ་ཐག་ཐུར་དུ་ཕེབས་སོང་བའི་དགོན་གཤམ་གཙང་པོ་ལྟ་བུའི་ཆུས་ཁེངས་འདུག་པར་དེར་རང་གི་བསམ་པར། ད་བླ་མ་སྐུ་ན་སྨིིན་པོ་འདིར་ཞབས་ཕྱི་གཅིག་ལས་མེད་པ་འདི་མི་བྱུང་བ་འདུག་པས་ང་རང་ཞབས་ཕྱིར་འགྲོ་སྙམ་པ་ན། དེ་མ་ཐག་པར་རྗེ་ཉིད་བར་སྣང་ལ་ཡོར་གྱིས་གཤེགས་སོང་བའི་བྲག་པོ་ཆེ་ནས་བསམ་རྩེའི་བར་བར་སྣང་འཇའ་འོད་ཁ་དོག་ལྔ་ལྡན་སྣམ་བུ་བསྐྱངས་པ་ལྟར་ཏ་ལེ་འདུག་པའི་སྟེང་རྗེ་ཉིད་ཞལ་ཁྱིམ་སྔར་གྱི་སྐུ་དར་མའི་དུས་བཞིན་མཚར་སྡུག་དང་ལྡན་པའི་སྐུ་གཅེར་བུ་དར་དམར་གྱི་ཨང་རག་དང་། རུས་པའི་རྒྱན་ཅན་དབུ་སྐྲ་གནག་སྣུམ་སྐུ་རྒྱབ་ཏུ་སིལ་བུར་འཆང་ཞིང་སེདྒེ་དཀར་མོ་ཞིག་ལ་ཆིབས། ཕྱག་གཡས་སྡིགས་མཛུབ་ནམ་མཁའ་དང་། གཡོན་བདག་ལ་ཐུར་དུ་བརྐྱངས་པའི་སྐྱབས་བྱིན་གྱི་ཕྱག་རྒྱ་མཛད་དེ་ཞལ་ཕྱིར་ལོག་གིས་གཟིགས་ཤིང་གསུངས་དྭངས་ཤིང་སྙན་པས་འདི་སྐད་དོ། །མ་བཅོས་སེམས་ཉིད་ཐོག་མ་མཐའ་བྲལ་ཞིང་། །རང་སེམས་དོན་གྱི་རྡོ་རྗེ་སེམས་པའི་ཞལ། །མངོན་སུམ་རང་ཞལ་མཇལ་ནས་འཁོར་བའི་ཆོས། །ཡོད་སྣང་དབྱིངས་སུ་གྲོལ་བར་བྱིན་གྱིས་རློབས། །ཞེས་གསུངས་ཤིང་ནུབ་ཕྱོགས་ཀྱི་ནམ་མཁའ་ལ་ཡེར་གྱིས་གཤེགས་པའི་སྐྱོ་ངར་གྱི་མཆི་མ་ཤོར་བའི་ངང་ལ་གཉིད་སད་ཅིང་། འདི་ལས་ན་རྗེ་བླ་མ་དམ་པ་མཁར་ཆེན་ཡེ་ཤེས་མཚོ་རྒྱལ་སྐུ་དངོས་ཡིན་པར་བསྟན་པས་རྫུ་འཕྲུལ་ལ་མངའ་མཉེས་པས་རྣམ་པ་གཟུགས་སྐུར་བཞུགས་པ་ཙམ་ལས་ངོ་བོ་ཡེ་ཤེས་པ་བདེ་ཆེན་དག་པའི་ཞིང་ཁམས་སུ་གཤེགས་པ་ཡིན་ནམ་སྙམ་སྟེ་རྗེས་སུ་གོ། ཡང་ནུབ་ཅིག་ཉི་མ་ཤར་བའི་ཉིན་གུང་ཙམ་ན་ཤོར་པོ་ལུང་གི་ཐད་ཀྱི་ནམ་མཁའི་གུང་དུ་ཉི་མ་ནམ་མཁའ་ལ་ཐིམ་པས་ས་རུབ་པ་སོགས་རྨི་ལྟས་ཀྱང་ངན་ནོ། །འདི་སྐབས་གནམ་ལོ་གསར་ཚེས་ཀྱི་ཉིན་གཟིམ་དཔོན་འགྱུར་གཡང་གི་ཚ་མོའི་དཔོན་པོ་བྱ་རྒྱུད་དགོན་པར་སྡོད་མ་བདེ་བའི་བརྟག་པ་ཞུས་པའི་རིམ་གྲོར་ཞི་བའི་སྦྱིན་བསྲེག་དང་ལན་ཆགས་གཏོར་མ་གཏོང་བར་བདག་རྫོང་བདའ་སྩལ་བའི་ཕྱི་ཉིན་ཆུ་གཏོར་གཏོང་སྐབས་ཁ་ཤིན་ཏུ་སྐོམ་པར་ཆང་བཏུང་བས་ཡར་ལམ་དད་ཅན་རྣམས་ཀྱིས་སྦྱིན་པའི་བལ་ཊམ་གསུམ་ཡོད་པ་རྗེར་འབུལ་དུ་ཡོང་བའི་ཐུན་སེང་དུས་བཞེས་ཐུག་མཆོད་དུས་བདག་སྐུ་མདུན་དུ་ཡོད་པར་གང་ཅིའི་སློབ་དོན་དང་། ཁྱོད་ཀྱིས་དེ་རིང་ཆུ་གཏོར་གཏོང་སྐབས་ཆང་བཏུང་སོང་བ། ནང་རྟགས་ཀྱིས་ཆུན་པའི་གང་ཟག་ལ་ལྟོས་པ་ཆེར་མེད་ཀྱང་། ཕྱིས་ཁྱོད་རང་གི་སློབ་མ་རྣམས་ངན་ལམ་དུ་འགྲོ་བས་ཚུལ་དེ་འདྲ་ད་ནས་མ་བྱེད་གསུངས་པས། དེས་ན་འཁོར་འདས་སྒྲིབ་མེད་ས་ལེར་གཟིགས་པའི་བཀའ་ལུང་ཐོག་བབས་སུ་ཕེབས་པ་ཡང་མང་ངོ་། །ཡང་ཉིན་ཞིག་སྐུ་མདུན་དུ་འགྱུར་གཡང་དང་དགེ་སློང་བཀྲས་དབང་། ཨེམ་ཇི་ཡར་འཕེལ། བདག་བཅས་ཡོད་པར་དེར་བདག་ལ་ངེད་ཀྱི་ཁྲིད་གཉེར་དུ་བསྐོ་བཞག་བྱས་སྟབས་སླར་དོགས་གཅོད་བྱེད་མི་བྱུང་ན་ལྗགས་ལ་དཔའ་ལྕོག་བརྒྱབ་ཡོང་། ད་དུང་དོགས་གཅོད་བྱེད་རྒྱུ་འདུག་ན་གྱིས། གཞན་མ་ད་རྫོགས་པ་ཆེན་པོའི་བསྟན་པ་འདི་རྒན་མོ་ང་འདས་པའི་རྗེས་ཇེ་ཞན་དུ་སོང་སྟེ་རླུང་ནང་གི་མར་མེ་བཞིན་འགྲོ་ཡོད་ཕེབས་པར། དེར་བདག་གིས་དེ་འདྲ་མི་དྲན་པ་འདུག་སྐུ་ན་སྨིན་སྟབས་ཞབས་པད་བརྟན་པར་དཀའ་ཡང་ལོ་ཤས་ཤིག་རང་ཞབས་པད་བརྟན་དགོས། དེ་མིན་སྐུ་སྐྱེ་འདིར་རེ་ཞིག་རྫོགས་པར་ལུང་ལས་བསྟན་ཀྱང་བསྟན་འགྲོ་སྤྱི་དང་ཁྱད་པར་ངེས་གསང་རྡོ་རྗེ་སྙིང་པོའི་བསྟན་པ་དང་བདག་སོགས་གདུལ་བྱའི་བུ་སློབ་རྣམས་ལ་གཟིགས་པའི་སྐུ་སྐྱེ་ཚར་གཅིག་ཅིས་ཀྱང་ཕེབས་དགོས་ཞེས་ནན་གྱིས་ཞུས་པས་དེར་འཁོད་ཐམས་ཅད་ཀྱིས་ཀྱང་ཞུས་སོང་བར། དར་ཅིག་ཅི་ཡང་མི་གསུངས་བར་བཞུགས། དེ་ནས་དར་རྒྱས་ཆོས་སྡིངས་པའི་བླ་རབས་ནས་ང་ལས་ཚེ་རིང་བ་མེད་ད་ནི་བཙུན་མ་རྒན་མོའི་བྱེད་ལུགས་དེ་ཙམ་ཡིན། དེ་སྔར་རྒྱ་བོད་གཉིས་སུ་ཕལ་ཆེར་བུད་མེད་ཀྱི་སྐྱེ་བ་རྐྱང་པ་ལེན་དགོས་བྱུང་བ་ལ། རེ་ཞིག་སྐྱེ་རྒྱུན་འདིས་ཆོད་པ་ཡིན་ཡང་། སྐྱེ་བ་འདིའི་འོག་ཏུ་རྟེན་དགེ་སློང་ཞིག་གི་སྐྱེ་བ་ལེན། དེ་ཡང་སྔར་དགེ་བའི་བཤེས་གཉེན་མཚན་ལྡན་ཞིག་ལ་གཏུགས་ཏེ་ངེས་གསང་བསྟན་པའི་སྙིང་པོ་འདི་ལ་ལག་རྗེས་འཇོག་ཐུབ་པ་ཞིག་སླེབས་ཡོང་། ཕྲལ་དུ་ཡོང་བའི་ངེས་པ་མེད། དེ་དུས་ང་རང་རྣམས་འཛོམས་ཡོང་གསུངས། དེ་ཡང་ཟླ་བ་གསུམ་པའི་བར་བཅད་རྒྱར་བཞུགས་པའི་བཅད་རྒྱ་གྲོལ་རྗེས་གྲ་ཕྱི་ནང་གི་དགོན་ཚང་མ་དང་། མོན་མཁར་གྱི་དགོན་བཅས་པར་སེར་ཚོགས་རྒྱས་པ་དང་། དེ་ཞོར་དྭགས་པོ་གྲྭ་ཚང་ལའང་ཞབས་ཏོག་རྒྱས་པར་སྩལ། དེ་དུས་རྗེ་ཉིད་ངོས་ཀྱི་ཞབས་བསྐྱོད་པས་ཨོ་རྒྱན་སྨིན་གྲོལ་གླིང་གི་གནས་རྟེན་རྣམས་ལ་མཆོད་འབུལ་སྙན་ཤལ་བཅས་བསྟན་འགྲོ་སྤྱི་དང་ཁྱད་པར་རྡོ་རྗེ་སྙིང་པོའི་འདུས་སྡེ་འདིའི་དེར་འཛིན་བཅས་པར་ཐུགས་སྨོན་ལམ་རྣམ་དག་དང་། གཙུག་ལག་ཁང་གི་རྟེན་གཙོ་བོ་ཐུབ་དབང་དྲུང་དུ་རྗེ་ཉིད་ལ་དད་ཅན་དབུ་མཛད་སྙིང་པོ་སོགས་གྲྭ་བགྲེས་པ་འགའ་དང་བཅས་མཆོད་འབུལ་མཛད་དུས་བཀའ་ལས། ད་ངེད་ན་མཐོ་ཞིང་རྟེན་འདིར་འགྲོ་དོན་འབྱུང་བར་དཀའ་བས། དེས་ན་རྟེན་འདིའི་འོག་ཏུ་དམན་པ་མིན་པའི་ཕོ་ལུས་ཀྱི་རྟེན་ལས་བསྙེན་པར་རྫོགས་ཏེ། རྒྱལ་བའི་བསྟན་པ་སྤྱི་དང་ཁྱད་པར་ངེས་གསང་རྡོ་རྗེ་སྙིང་པོའི་བསྟན་པ་ལ་ལག་རྗེས་མི་དམན་ཙམ་འཇོག་ནུས་པ་ཡོང་བའི་ཐུགས་སྨོན་གནང་དགོས་ཞེས་གདུལ་བྱ་ཕྱི་མར་དགོངས་པའི་བཀའ་སྩལ་ཏེ་གནས་གཟིགས་ལྷ་ཁང་ཐམས་ཅད་མཇལ་ཟིན་རྗེས། རྣམ་གྲོལ་ཡང་རྩེར་ཞག་གསུམ་གྱི་བར་བཞུགས་ནས་ཞལ་ངོ་རྣམས་ལ་ཕྱི་མཐའ་གཟིགས་པའི་ཞལ་ཆེམས་ཞིབ་པར་སྩལ་ཏེ་བདེ་ཆེན་གླིང་དུ་ཆིབས་སྒྱུར་ཕེབས་ལམ་སར་སྤྲུལ་སྐུ་དོན་གྲུབ་ཀྱི་ནང་གསར་གཟོ་བྱས་པར་མིང་ཞུས་པ་དཔལ་འབྱོར་བདེ་ལྡན་སྩལ་ཅིང་ལྷུན་གྲུབ་སྒང་དཀྱིལ་དུ་ལེགས་གླིང་ཆོས་དྲུང་གིས་སྤྱན་འདྲེན་ཞུས་པར་རེ་འདོད་སྐོང་བར་མཛད་དེ་རང་གནས་སུ་ཕེབས་ཏེ་བཅད་རྒྱར་བཞུགས། དེ་ཡང་སྤྱིར་ས་གླང་ལོ་ཤར་བ་ནས་བརྩམས་ཐམས་ཅད་ལ་ཕྱི་མཐའ་གཟིགས་པའི་ཞལ་ཆེམས་དང་། སྤྱན་རྟེན་ལྟུང་བཤགས་ཀྱི་ཐང་སྐུ་གསར་བཞེངས་གནང་བའི་རྒྱབ་བྱང་གནང་དུས་ད་རེས་རྫོགས་པའི་སངས་རྒྱས་ཀྱི་གསོ་སྦྱོང་སྐབས་ཀྱི་གསུང་དེ་བྱིན་རློབས་ཁྱད་བྲིས་དགོས་གསུངས་ཤིང་། བརྩམ་པར་བྱ་ཞིང་དབྱུང་བར་བྱ། །ཞེས་སོགས་གནང་ཞིང་རབ་ཏུ་གནས་པར་མཛད། དེ་ཞོར་ཁོ་བོའི་རྗེའི་སྐུ་ཐང་ལ་ཡང་དེ་བཞིན་དུ་སྩལ། དེ་ཡང་འདི་ལོ་ནས་སྤྱིར་རྩ་ལོག་དང་སྐུ་རླུང་འཁྲེང་པ་དང་སྤྱན་ལྟས་ལོག་པ་སོགས་ལ་ཆེད་དམིགས་ཀྱི་སྐུ་སྤོང་ཐག་གིས་སེར་ཚོགས་ལན་གཉིས་བསྟུད་མར་མཛད་ཅིང་གཟིམ་ཆུང་སྦུག་སྒོ་སྔར་མེད་གསར་འདོན་དང་། དེ་ཡང་ས་གླང་དགུང་ལོ་དོན་གཅིག་བཞེས་པ་ཟླ་བ་བཞི་པའི་ཟླ་འགོར་བཅད་རྒྱ་གྲོལ་བའི་གྲ་གཙང་འདུས་གྲངས། བསམ་རྩེ། སོག་ཕུ་བསམ་གཏན་ཆོས་གླིང་དང་། ཨར་དོག་དགོན་གསར་གྱི་བཙུན་མ། ཕྱོགས་མཐའ་ངེས་མེད་ཀྱི་བྱ་བཏང་སོགས་བདག་སོགས་འདུས་པ་བརྒྱ་དང་དྲུག་ཅུ་སྐོར་ལ་ཨ་དོན་གྱི་ཟབ་ཁྲིད་རྒྱས་པར་སྩལ། དེར་འདུས་གྲོལ་སྟོན་སྐབས་དོན་གདམས་པའི་ཞལ་ཆེམས་ཕྲ་ཞིབ་ཏུ་སྩལ་རྗེས། ཁྱེད་རྣམས་ཀྱིས་ཆོས་དང་མཐུན་པའི་བྱ་བས་རང་གིས་རང་མི་བསླུ་བ་ཞིག་བྱེད་དགོས། སྤྱིར་བཟང་ངན་གྱི་རྣམ་འགྱུར་གང་བྱས་རྒྱལ་བས་སྒྲིབ་མེད་དུ་དབྱིངས་ནས་ས་ལེར་གཟིགས་མོད། དེས་ན་ཅུང་ཟད་འགལ་བྱར་གྱུར་ན་རང་གིས་མ་བྱུང་བ་ཡིན་འདུག་སྙམ་དུ་དེ་མ་ཐག་བཤགས་ཤིང་སྡོམ་སེམས་དང་། ཡང་ཟས་སྐོམ་མཐུན་རྐྱེན་ཚོགས་པའི་ཚེ་ན་ཡང་བླ་མ་དང་དཀོན་མཆོག་གི་ཐུགས་རྗེ་ཡིན་སྙམ་དུ་མཆོད་སྦྱིན་གཏོང་ཞིང་། དགེ་སྦྱོར་གྱི་འཆུན་པ་བྱེད། དབུལ་ཞིང་འཕོངས་པའམ་ན་ཚ་དང་སྡུག་བསྔལ་སོགས་ཀྱི་རྐྱེན་ངན་ཅི་བྱུང་ཡང་། ངའི་རྩ་བའི་བླ་མ་མཁྱེན་སྔོན་ལས་རྗེས་སུ་འབྲངས་བ་ལས་རྒྱུ་འབྲས་མི་བསླུ་བའི་བདེན་པ་ཡིན། ད་ཅི་བྱུང་ནའང་བྱུང་བླ་མ་དཀོན་མཆོག་མཁྱེན། བདག་སོགས་སེམས་ཅན་ཐམས་ཅད་ཀྱི་ལས་ངན་སྡིག་སྒྲིབ་ཐམས་ཅད་དག་པར་མཛད་དུ་གསོལ་སྙམ་དུ་མཐར་དེ་ཐམས་ཅད་སྟོང་ཉིད་སྤྲོས་པ་དང་བྲལ་བའི་ངང་དུ་ཞོག་སོགས་བླང་དོར་ཞིབ་དུ་སྩལ། དེ་ནས་ཟླ་བ་ལྔ་པའི་ཚེས་བཅུ་གཉིས་ནས་དོ་ནང་པད་གླིང་སྤྲུལ་སྐུ་སོགས་དོན་གཉེར་གྱི་སྐལ་ལྡན་བརྒྱ་ཕྲག་ཙམ་ལ་ཟབ་ལམ་བདེ་གཤེགས་ཀུན་འདུས་ཀྱི་ཟབ་ཁྲིད་མ་བུ་ཚང་བར་སྩལ་བའི་འཕྲུལ་འཁོར་བསླབ་སྦྱོང་དུས་བདག་ལ་ཞལ་ཏ་ཡང་སྩལ། དབང་གི་དུས་སྐུ་སྨིན་སྟབས་སྐུ་རྟེན་པའི་ངལ་བ་ལ་ཞབས་དྲུང་མཁན་རིན་པོ་ཆེས་གནང་ན་ཞེས་ཞུས་གནང་ལ་བཀའ་ལས། གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་འཇལ་བྱེད་གདམས་ངག་རོའི་སྟེང་དུ་བཞག་པ་ལ་དགོས་པ་ཅི་ཡོད་ཅེས་སྩལ་བས་དབང་ཁྲིད་རྫོགས་པར་སྩལ་ཁྲིད་བཀའ་རྫོགས་ཚེ་བཀའ་ལས། སྤྱིར་རྒྱལ་བའི་བསྟན་ཞབས་དང་སྒོས་སྙིང་པོའི་བསྟན་པ་ནི་ཉག་ཤིན་ཏུ་ཕྲ་བའི་ནུབ་མ་རག་ལ་ཐུག་འདུག་པས། ཁྱེད་རྣམས་ཀྱིས་ཉམས་ལེན་ནན་ཏན་མཛད་དགོས། ཁྱད་པར་རང་རེའི་ཆོས་བརྒྱུད་རྗེ་གཏེར་ཆེན་བླ་མའི་ཞལ་སློབ་འཆད་སྤེལ་ནུས་པ་ད་རང་ངེད་ཙམ་ལས་མེད་པ་ལྟར་འདུག་པས། ངེད་རྒས་གཤིས་དཀའ་སྦྱོང་ཆེ་ཡང་ཆོས་རྒྱུན་བསམ་པས་ངལ་བ་ཁྱད་དུ་བསད་ནས་ད་རེས་གདམས་པ་ལྷག་མ་ལུས་པར་ཕུལ་བ་ཡིན་པས། ད་ནི་ལུས་ངལ་ཞིང་མིག་དབང་ཡང་མགྱོགས་མྱུར་འགྲིབས་འགྲོ་བ་འདུག་པས་རེ་ཞིག་སྡོད་སྲིད་ཀྱང་ད་རེས་ལྟ་བུའི་སྨིན་ཁྲིད་བྱེད་པ་ཞིག་ཡོང་མི་འགྲོ། དེས་ན་གཞན་དོན་གྱི་སྔོན་དུ་རང་རྒྱུད་སྨིན་དགོས་པས་ཐམས་ཅད་ཀྱིས་གཙོ་བོར་ཉམས་ལེན་ལ་རང་བྱན་ཆུད་པ་ཞིག་མཛད་ངོས། དེ་ཐོག་ནས་འཆད་སྤེལ་གང་ནུས་ཀྱི་འབད་པ་ཐམས་ཅད་ཀྱིས་འདོན་དགོས་ཞེས་བཀའ་སྩལ་བས་དེར་འདུས་ཚོགས་མིག་མཆི་མས་བརྣངས་ཤིང་ཡིད་དྲན་པ་སྟོར་བ་ལྟར་གྱུར། དེ་ནས་ཟླ་བ་དྲུག་ནང་དུ་ཉམས་གྲིབ་ལ་བརྟེན་པའི་མགུལ་ཆམ་གྱིས་སྐུ་ངལ་ཡང་པད་གླིང་སྤྲུལ་སྐུར་ཤ་འུག་ལྷ་ཆེན་གྱི་རྗེས་གནང་དང་། གྲྭ་གཙང་གཉེར་པ་ཀུན་ཁྱབ་ལ་ཡང་སྙིང་ཀུན་འདུས་ཀྱི་ཚེ་དབང་དང་། དྲག་དམར་སྐུ་གསུང་ཐུགས་དབང་ཡང་སྩལ། དེ་རྗེས་རྗེ་ཉིད་ཀྱི་གཅུང་རྗེ་བཙུན་དྲུང་གི་སར་ཕེབས་པས་སྐུ་ཚེའི་སྨད་འདིར་ཐུགས་དམ་ལ་ཆིག་སྒྲིལ་གནང་དགོས་ཞེས་བཀའ་དང་རྗེ་ཉིད་ཀྱི་ཕྱག་འཕྲེང་བྱིན་རྟེན་དུ་སྩལ། དེ་ནས་ཡར་གཟིམ་ཆུང་དུ་ཕེབས་པའི་ཞབས་རིམ་པ་སེར་སྐྱ་མེད་པ་ཐམས་ཅད་ལ་མཇལ་ཁ་དང་སོ་སོར་གནང་ཆ་སྩལ་ཅིང་འདི་ཕྱིར་དགེ་བའི་ཞལ་ཆེམས་ཞིབ་པར་སྩལ། དེ་ནས་པད་གླིང་སྤྲུལ་སྐུ་དང་བདག་སོགས་སྐལ་ལྡན་མང་པོར་རྡོར་སེམས་ཐུགས་སྒྲུབ་ཀྱི་ཟབ་ཁྲིད་སྩལ། དེ་རྗེས་སྨོན་གྲུབ་ནས་སྡེ་པ་དངོས་གྲུབ་རབ་བརྟན་སྔར་ནས་དམ་སེལ་ཆེ་ཙམ་ཡོད་ཀྱང་སླར་ཡང་སྐུའི་འགལ་རྐྱེན་ཟློག་ཕྱིར་ཐུགས་ཐིག་གི་ཟབ་ཁྲིད་ཞུས་པར། དེ་ཉིན་ནས་ཞལ་ཁྱིམ་སྔར་དང་མི་འདྲ་བའི་དམར་སྨུག་ལ་སྔོ་མདངས་ཡོད་པའི་ཐུགས་གཏུམ་ཞིང་སའི་སྔོན་འགྲོ་སོགས་རགས་བསྡུས་དང་། དབང་གི་ཉིན་ཤངས་ཚལ་མང་དུ་ཕེབས་པས་སྐུ་ངལ་ཡང་བསྐྱེད་རྫོགས་ཀྱི་གདམས་པ་མདོར་བསྡུས་སུ་སྩལ་ཅིང་། ཟླ་བ་བདུན་པའི་ཚེས་གཅིག་ནས་སྙུན་གྱིས་ཟིན་པ་ལ་དེར་ཞབས་བརྟན་སྐུ་རིམ་སྣ་མ་འགགས་པ་དང་། འཚོ་བྱེད་ཀྱིས་སྨན་དཔྱད་སོགས་ཞུས་པར་མི་བཞེས་ཤིང་། སྐུ་རིམ་སོགས་ལའང་ད་རིམ་གྲོ་མ་བྱེད་ཅི་བྱེད་པ་ཡིན་གསུངས་ཤིང་། གཟིམ་དཔོན་འགྱུར་གཡང་ངའི་རྗེས་སྤྱོད་ཁྱོད་ཀྱིས་གྱིས། ང་རང་གཉིས་ལ་འབྲལ་བ་ནམ་ཡང་མི་ཡོང་ཞེས་གསུངས་ཤིང་། དེ་ནས་གསུང་བཅད་པའི་ཏིང་ངེ་འཛིན་ཁོ་ནས། སྤྱན་གྱེན་དུ་དྲིལ་བའི་ལྟ་གདེང་ལ་མི་གཡེལ་བར་བཞུགས་སོ། །དེར་སྐུ་ཡར་བསྐྱེད་མ་བྱུང་བའི་ཚེས་དགུ་ནས་གསོལ་བ་ཐེབས་པའི་རེ་ཐག་ཆོད་ཀྱང་། ཞབས་དྲུང་སྐུ་མཆེད་གཉིས་ནས་བདག་ལ་བསམ་ཡས་རྩི་དམར་ཐང་དུ་ཞབས་བརྟན་སྐུ་རིམ་དུ་དམིགས་ཕོགས་བཟང་པོ་སྩལ་ཏེ་གཉིས་འཛིན་འཁྲུལ་གཅོད་གསང་གཅོད་གཏང་དུ་རྫོང་བདའ་གནང་བའི་ཚེས་བཅུའི་ནངས་ཞོག་བདག་འབོད་མིའི་བང་ཆེན་སྩལ་ཅིང་སྒབ་པའི་བཀའ་ཕེབས་འདུག་ཀྱང་ད་རང་མ་ལེགས་ཚར་སྙམ་ཇ་མར་སོགས་ཚོང་འདུས་སུ་མང་བསྐོལ་དུ་བཏང་སྟེ་ལོག་ཡོང་། དེ་དུས་ཚེས་བཅུའི་ཐོ་རེངས་ཀྱི་ཆར་སྐྱབས་རྗེ་བླ་མ་དམ་པ་བདེ་ཆེན་མཁའ་འགྲོའི་གཙོ་མོ་སྐུ་གཞོན་ཉམས་རྒྱས་པའི་གཟི་བྱིན་ལྡན་པའི་སྐྱིལ་ཀྲུང་དང་ཕྱག་གཡས་སྙན་གཡས་ཀྱི་ཐད་སེ་གོལ་མཛད་པའི་བརྡ་དང་། གཡོན་མཉམ་བཞག་གི་ཕྱག་རྒྱ་ཅན། སྤྱན་གྱེན་དུ་ཧྲིལ་གྱིས་དྲིལ་བའི་འཛུམ་མདངས་དང་ལྡན་པའི་ངང་ནས་ཆོས་སྐུའི་ལྟ་སྟངས་བཅས་པའི་དབུ་གཙུག་ཆེར་འཕགས་པའི་དྭངས་མའི་ཟིལ་པ་རླུང་དང་བཅས་ཁོལ་ཞིང་ལུད་པ་སོགས་ཡེ་ཤེས་གོང་འཕོའི་རྟགས་ངོ་མཚར་བ་ཀུན་གྱི་སྤྱོད་ཡུལ་དུ་བསྟན་ནས་བདག་སོགས་གདུལ་བྱར་གྱུར་པའི་སྐལ་ལྡན་རྣམས་ལ་གསང་ཆེན་རྫོགས་པ་ཆེན་པོའི་གདམས་པའི་གསུང་གི་བདུད་རྩི་ཇི་སྙེད་ཅིག་སྩལ་བའི་སྐལ་བ་ཉམས་སུ་མྱོང་བའི་མཐར་རྟག་འཛིན་ཅན་རྣམས་ཆོས་ལ་བསྐུལ་ཕྱིར་འཆི་མེད་རྡོ་རྗེ་ལྟ་བུའི་སྐུ་བཤིག་ནས་མི་རིང་བའི་མོད་ལ་ཕྱི་ནང་གི་མངོན་པར་བྱང་ཆུབ་པ་ལྔས་གདུལ་བྱའི་མཐུན་འཇུག་ཙམ་དུ་རགས་པ་རང་བཞིན་ཉི་ཤུ་དང་། ཕྲ་བ་ནང་གི་འབྱུང་བའི་ཐིམ་རིམ་རྣམས་རྫོགས་པའི་རྣམ་ཐར་བཞི་ལྡན་གྱི་ཡེ་ཤེས་འོད་གསལ་ཆོས་སྐུ་ཀ་དག་ཆེན་པོའི་ཀློང་དུ་གཟུགས་སྐུའི་བཀོད་པ་བསྡུས་ཏེ་སྤྲོས་པ་དང་བྲལ་བའི་གཤིས་བདེ་བ་ཆེན་པོ་སྒྲིབ་བྲལ་མི་འགྱུར་ཆོས་སྐུའི་དབྱིངས་སུ་མྱ་ངན་ལས་འདའ་བའི་ཚུལ་བསྟན་ཅིང་། དེ་ཉིད་ཀྱང་རང་རྩལ་མ་འགགས་པའི་རྣམ་རོལ་འགགས་མེད་ལོངས་སྐུ་དང་སྤྲུལ་སྐུའི་རོལ་པ་མཐའ་ཡས་པས་འགྲོ་བའི་དོན་དེ་སྲིད་དུ་མཛད་ཅིང་། ལྷན་སྐྱེས་བདེ་ཆེན་མངོན་དུ་གྱུར་པའི་ཞིང་ཁམས་སུ་ཧེ་རུ་ཀ་སོགས་དཔའ་བོ་རྣལ་འབྱོར་མ་རྣམས་ཀྱིས་མཆོད་རྫས་ཀྱི་བཀུར་སྟི་དང་བཅས་མཁའ་སྤྱོད་དུ་སྤྱན་འདྲེན་པར་བཤད་དེ་རྣལ་འབྱོར་མ་ཀུན་སྤྱོད་ཀྱི་རྒྱུད་ལས། ཁྲག་འཐུང་ལ་སོགས་རྣལ་འབྱོར་མ། །མེ་ཏོག་སྣ་ཚོགས་ལག་ན་ཐོགས། །རྒྱལ་མཚན་བ་དན་སྣ་ཚོགས་དང་། །སིལ་སྙན་སྒྲ་ནི་སྣ་ཚོགས་ཀྱིས། །འཆི་བ་ཞེས་པ་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་བྱེད། །ཅེས་བཤད་པས་རིག་འཛིན་གྱི་དཔའ་བོ་རྣལ་འབྱོར་མ་རྣམས་ཀྱི་ཚོགས་དཔོན་དུ་གཤེགས་པར་བཤད་ལ། དེ་ནས་གང་གི་སྐུའི་ཞལ་ཁྱིམ་དང་གསུང་གི་བདུད་རྩི་མྱང་བའི་སྐལ་བས་འཕོངས་པར་གྱུར་ཀྱང་། ཞབས་དྲུང་སྐུ་མཆེད་དགེ་སློང་ཆོས་ལྡན་སོགས་གདུང་མཆོད་པ་རྣམས་ཀྱིས་མི་ཕྱེད་པའི་དད་པས་བླ་མའི་སྐུ་ལས་དབང་བཞི་བཞེས་ནས་ཐུགས་ཡིད་དབྱེར་མེད་དུ་བསྲེས་ནས་མཉམ་བཞག་མཛད་ཅིང་། སྐུ་གདུང་རིན་པོ་ཆེ་གར་དབང་ཐུགས་རྗེ་ཆེན་པོའི་སྐུར་བསྐྱེད་པའི་གཙུག་ཏོར་སོགས་ལྷ་གནས་རྣམས་སུ་ནང་སྒྲུབ་ཀྱི་ལྷ་རྣམས་གསལ་བཏབ་པའི་རྩ་སྔགས་ཤམ་བུ་ཅན་བྲིས་པ་ཕུལ་ཏེ་དཀྱིལ་འཁོར་གྱི་ལྷའི་ངོ་བོར་བསྒྲུབས་ནས་བླ་མའི་ཐུགས་གཉིས་མེད་ཀྱི་ཡེ་ཤེས་པ་སྤྱན་དྲངས་ནས་མཆོད་རྗེས་དགེ་སློང་ཟུང་དང་ཨེམ་ཇི་བཅས་ཀྱིས་ཞབས་ཕྱི་ཞུས་པའི་པུར་སྦྱངས་ཞུ་བའི་ཐོག་མར་སྐུ་ཁྲུས་གསོལ་ཏེ་ག་པུར་དང་གུར་གུམ་སོགས་དྲི་བཟང་པོས་ཁྱབ་པར་བྱུགས་ཤིང་། དེ་ནས་ནང་ཚས་དར་དཀར་སྲིད་དུ་རིང་བའི་ཕྱིར་གན་གོས་དམར་པོ་ཡུག་དང་ཀ་ཤི་ཀའི་རས་ཀྱི་ན་བཟའ་དྲི་བཟང་གིས་སྦགས་པས་དྲིལ་བ་རིན་པོ་ཆེའི་ཟ་མ་ཏོག་ཏུ་བཞུགས་གསོལ་བའི་ནང་སྐོར་རྣམས་དྲི་བཟང་གི་ཕུར་མས་གཏམས། ཕྱི་རོལ་ན་སྟོད་གཡོགས་དང་སྨད་གཡོགས་སོགས་དར་དམར་གྱི་ཆས་དང་། རིན་པོ་ཆེའི་རྒྱན་བརྒྱན་ཏེ་ལྷའི་ཆས་སུ་བཅུག་སྟེ་ཁྲི་ལ་བཞུགས་སུ་གསོལ་བའི་སྤྱན་སྔར་སྐུའི་ཉེར་སྤྱད་དང་མཆོད་པའི་བྱེ་བྲག་སོགས་དཀྱིལ་འཁོར་གྱི་ལྷའི་མཆོད་རྫས་བཟང་ཞིང་བཀོད་ལེགས་པར་བཤམས་ཏེ། དེའི་ནངས་ཞོག་གསང་རྒྱ་བཀྲོལ་ཞིང་གཙོ་བོར་ཚོགས་ཆེན་གྱི་དབུས་གྲ་ཕྱི་ནང་གི་དགོན་ཆེ་གྲར་གསང་བཏོལ་གྱི་མང་ཇ་བཏང་། དེ་དུས་ནམ་མཁའ་དྭངས་ཤིང་འཇའ་སྤྲིན་ཚོམ་བུ་ཆེས་བཀྲ་བའང་བྱུང་ངོ་། །སྐུ་གདུང་གི་སྤྱན་སྔར་ཞབས་དྲུང་སྐུ་མཆེད་ཀྱིས་མཚོན་གྲྭ་གཙང་གི་དགེ་བཤེས་བཅས་བཅོ་བརྒྱད་ཀྱིས་བླ་མ་ཞི་བ་དང་། བདེ་གཤེགས་ཀུན་འདུས་ཀྱི་སྒྲུབ་མཆོད། ཚོགས་ཆེན་དུ་བླ་མ་ཞི་བ་དང་ཞི་ཁྲོ་དོང་སྤྲུགས་བཅས་ཆོག་ཁག་སོ་སོས་མཆོད་འབུལ་གསོལ་འདེབས། དབང་བླང་བ་སོགས་གདུང་མཆོད་ཞག་ཉེར་གཅིག་གི་བར་མཛད་ཅིང་། སྐུ་དངོས་གཞིར་གྲྭ་གཙང་གིས་རྗེས་འབྲེལ་དུ་གྲ་ཕྱི་ནང་མོན་མཁར་བཅས་པའི་དགོན་ཚང་མ་བསྡུས་པའི་སེར་ཚོགས་རྒྱས་པར་མཛད་དེ་བསྙེན་བཀུར་ཞབས་ཏོག་འབུལ་བ་སོགས་གྱ་ནོམ་པ་དང་། མི་སེར་དུད་ཆེ་ཆུང་ཚང་མ་དང་སྐུ་ཉེ་ཡོན་བདག་སློང་མོ་བ་སོགས་ལ་བཟའ་བཏུང་འགྱེད་བཅས་ཕུལ་དུ་ཕྱིན་པ་དང་། རང་ཞབས་རྣམས་སུ་སྦྱོར་འཇགས་དང་། ཁྱད་པར་གོང་ས་མཆོད་ཡོན་གྱིས་མཚོན་དབུས་ཀྱི་བླ་མ་ཆེ་ཕྲ་ཐམས་ཅད་ལ་བསྔོ་རྟེན་དང་། དགོན་ཆེ་ཆུང་མེད་པ་ཐམས་ཅད་ལ་མང་བཀོལ་དང་འགྱེད་བཅས་གནང་ཞིང་གཙོ་ཆེར་གོང་ས་ཡས་ཕྱིན་ནས་གདུང་འབུལ་གྱི་གནང་སྐྱེས་བཟང་བ་དང་། གཞན་ཡང་གྲྭ་གཙང་ཚོགས་ཆེན་གྱི་གྲྭ་མང་། དགོན་ལག་ཚང་མ་སྐུ་ཉེ་ནང་ཟན་གྲ་ཕྱི་ནང་གིས་མཚོན་དད་ཅན་གྱི་ཡོན་བདག་ཆེ་ཕྲ་ཚང་མ། ལྷག་པར་དགའ་བཞི་གུང་དང་ལྕམ་བདེ་ལྡན་སྒྲོན་མ། མི་རྗེ་གུང་སྐུ་ཞབས་གཡུ་ཐོག་མདའ་དཔོན། སྡེ་དཔོན་ཆེ་ཕྲ་མེད་པ་སོགས་མཆོག་གི་ལམ་མཁན་པདྨའི་གཟུངས་མ་མཁར་ཆེན་བཟའམ་བདུད་འདུལ་དྲག་མོ་རྩལ་ཞེས་ཌཱ་ཀི་ཡེ་ཤེས་མཚོ་རྒྱལ་གྱི་འཕྲིན་ལས་ཀྱི་སྤྲུལ་པ་སྐྱེ་མཐར་གྱུར་པ་བདེ་ཆེན་ཌཱཀིའི་གཙོ་མོ་ཉིད་ལ་སྐྱབས་སུ་མཛད་པ་རྣམས་དང་། དེའི་ནང་ནས་རྗེ་བླ་མ་དམ་པ་ལྷན་སྐྱེས་ཀྱི་མཁའ་འགྲོའི་གཙོ་མོ་མཆོག་གིས་རྗེས་སུ་བཟུང་བའི་གནས་ལུགས་ཟབ་མོའི་རྟོགས་པ་སྤྲོས་བྲལ་གྱི་ལྟ་བ་མངོན་དུ་རྟོགས་པའི་བྱ་བཏང་རྣལ་འབྱོར་པས་མཚོན་ཞལ་སློབ་ཚང་མས་སོ་སོའི་ཡོ་བྱད་དངོས་གཙང་གྱ་ནོམ་པའི་གདུང་འབུལ་བཀའ་ཐེགས་མཆོད་ཐེགས་སོགས་བདག་ཉིད་ཆེན་མོ་དེའི་ཐུགས་དགོངས་རྫོགས་པར་མཛད་ཅིང་། ཟླ་བ་བདུན་པའི་ཚེས་གནམ་གང་གི་ཉིན་གདུང་མཆོད་བསྡུ་བར་མཛད། དེ་ཡང་སྐུ་གདུང་རིན་པོ་ཆེ་བཞུགས་ཀྱི་བར་རྒྱུན་ལྡན་ཡང་བརྒྱ་མཆོད་གསུམ་རེ་ཆག་མེད་དང་། སྐུ་ཚིགས་སོ་སོར་འཕར་མ་སོགས་མི་ཆད་པ་ཡིན་ཡང་རུལ་དྲི་སོགས་དྲི་མི་སྡུག་པའི་རྣམ་པ་མེད་པར་དྲི་བཟང་པོས་དྲི་ཕལ་གྱིས་མཚོན་དུ་མེད་པའི་དྲི་མར་སྣང་ལ། ཟླ་བ་བརྒྱད་པའི་ཚེས་གཅིག་གི་ཉིན་སྐུ་གདུང་རིན་པོ་ཆེ་ཞུགས་ཀྱིས་སྦྱོང་བའི་སླད་དུ་སེར་སྦྲེངས་ཀྱི་བཀུར་སྟི་དང་བཅས་དོ་ལི་ལ་སྤྱན་དྲངས་ཏེ་གཟིམ་ཆུང་ཉི་འོད་ཀྱི་མཐོངས་སུ་མྱང་འདས་མཆོད་རྟེན་གྱི་རྣམ་པའི་ཐབ་ཁུང་དུ་བཞུགས་སུ་གསོལ་ནས། སྔར་གྱི་གདུང་མཆོད་པ་རྣམས་ཀྱིས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཆོ་གའི་སྒོ་ནས་མཆོག་གི་སྦྱིན་བསྲེག་གི་མཆོད་པ་མཛད་ཅིང་། དེའི་ཚེ་མེ་ཕུལ་མ་ཐག་པར་དུ་བ་དཀར་པོ་མདུང་ཚུགས་པ་ལྟ་བུ་ནམ་མཁའི་དབྱིངས་མཐོན་པོར་སོང་རྗེས་དུ་བ་དཀར་པོ་ཞྭ་སྒོར་ཙམ་པ་ཞིག་དེ་ལས་མཆེད་ནས་ནུབ་ཕྱོགས་ཀྱི་ནམ་མཁའི་དབྱིངས་སུ་ཡེར་གྱིས་སོང་ཞིང་། དེ་ཡང་སྤྱིར་སྐུ་ཚིགས་རྣམས་སུ་ནམ་མཁའ་དྭངས་ཤིང་འཇའ་དཀར་ངོ་མཚར་ཅན་མང་པོ་ཆད་མེད་དང་། གྲྭ་ཚང་ཚོགས་ཆེན་ནས་གདུང་མཇལ་དུ་ལན་གསུམ་ཕེབས་དུས་ཀྱང་འཇའ་ཁ་དོག་ལྔ་ལྡན་འཆར་བ་དང་། ཁྱད་པར་དེ་ཉིན་ནམ་མཁའ་ཤིན་ཏུ་དྭངས་པའི་ཕྱི་མ་བྲག་པོ་ཆེའི་རི་རྩེ་ནས་ཆོས་སྡིངས་དང་། ནང་མ་བྲག་པོ་ཆེའི་གཟིམ་ཕུག་ནས་མཁའ་སྤྱོད་བདེ་ཆེན་གླིང་གི་གཟིམ་སྤྱིལ་ཐོག་ཏུ་འཇའ་འོད་ཁ་དོག་ལྔ་ལྡན་ཉིས་བརྩེགས་ཤིན་ཏུ་དྭངས་པ་དང་འཇའ་སྤྲིན་དཀར་པོ་འདོད་ཡོན་ལྔའི་རྣམ་པ་དང་ཁ་ཅིག་འཁོར་ལོ་རྩིབས་བཞི་དང་རྟ་མཆོག་གི་དབྱིབས་དང་། པདྨ་འདབ་མ་བཞི་པའི་རྣམ་པ་ཅན་སོགས་བསམ་གྱིས་མི་ཁྱབ་པའི་ངོ་མཚར་ཅན་མང་པོ་སྣང་བས་ཀུན་དད་པའི་ས་བོན་དུ་མཛད་དོ། །ཁྱད་པར་ཁྲི་ཆེན་རྗེ་པདྨ་བསྟན་འཛིན་རིན་པོ་ཆེ་ནས་ཞུན་ཕུལ་བརྒྱ་རྩ་མ་རྫོགས་གོང་ནས་ཞུན་བཞེས་པའི་བར་སྐབས་ཤིག་ཏོག་སྒྲ་ཤིན་ཏུ་ཆེ་བའི་ཐུགས་ཞུན་གྱིས་མ་ཟོས་པར་མངོན་གྱུར་ཐོགས་བབས་སུ་ཞབས་དྲུང་མཁན་ཆེན་ཨོ་རྒྱན་བསྟན་འཛིན་རྡོ་རྗེའི་སྐུ་པང་དུ་མེ་སྒོ་ནས་རྒྱངས་མར་ཕེབས་ཤིང་། དེ་དག་གི་ཚེ་དུ་བའི་རྩེ་མོ་ཕལ་ཆེར་ནུབ་ཕྱོགས་ཀྱི་ནམ་མཁར་འགྲོ་ཞིང་། ཕོ་རོག་གིས་མཚོན་བྱ་ཚོགས་མང་པོ་གཏེར་བདག་གི་རི་བརྒྱུད་ནས་ཡར་དུ་བའི་རྗེས་སྙེག་ཅིང་། ནེའུ་ལེ་གཉིས་དུ་བ་ལ་ཐོག་མ་ཉིད་ནས་མཇུག་མ་རྫོགས་བར་སྐོར་བ་བསྐོར་བ་སོགས་བྱུང་ངོ་། །དེ་ནས་ཞག་བདུན་གྱི་བར་པུར་ཁང་ཞལ་མ་ཕྱེ་བའི་ཞོགས་ལྟར་མཁན་ཆེན་གྱིས་མཆོད་འབུལ་དུ་ཕེབས། འདི་སྐབས་ཞལ་སློབ་ཁ་རག་སྒོམ་ཆེན་འགྱུར་མེད་གློ་བུར་དུ་གདུང་མཇལ་དུ་འབྱོར། དེ་ནས་པུར་ཁང་ཞལ་ཕྱེ་བས་དབུ་ཐོད་རིལ་པོར་བཞུགས་ཤིང་། གདུང་རུས་རྣམས་ལ་ལྷ་སྐུ་དང་ཡིག་འབྲུའི་རྣམ་པ་དཔག་མེད་དང་། གདུང་ཐལ་ཕལ་ཆེར་དག་པའི་རྟགས་ངོ་མཚར་ཅན་སྣང་ངོ་། །དེ་ནས་གདུང་འབུམ་མཆོད་རྟེན་བཞེངས་ཤིང་གདུང་ཐལ་རྣམས་ལ་དགེ་སློང་ཆོས་ལྡན་ནས་སཱཙྪ་མཛད་པ། བསྟན་འགྲོའི་མཆོད་སྡོང་དུ་དངུལ་གདུང་རིན་པོ་ཆེ་བཞེངས་ཏེ་དེ་དག་ལ་གར་དབང་བདེ་གཤེགས་ཀུན་འདུས་ཀྱི་སྒོ་ནས་རབ་གནས་ཆོ་ག་སོགས་བླ་གྲྭ་ཚང་མས་མི་ཕྱེད་པའི་དད་གདུང་དྲག་པོས་གདུལ་བྱའི་འགྲོ་བ་རྣམས་ཀྱི་སྐྱབས་ཀྱི་མཆོད་སྡོང་དུ་སྒྲུབ་པར་མཛད་དོ། །དེ་ཡང་ལོ་ལྔ་ཙམ་གྱི་བར་སྐུའི་ལོ་དུས་ཀྱི་དུས་ཆེན་ལ་གཙོ་བོ་ཚོགས་ཆེན་དང་གྲ་ཕྱི་ནང་གི་དགོན་ཚང་མ་ཚོགས་པའི་སེར་ཚོགས་དང་། སླད་ཀྱི་ཆར་ལོ་ཟླ་བའི་དུས་མཆོད་ལ་རིག་འཛིན་འདུས་སྡེའི་ཚོགས་ཆེན་དུ་དཔལ་ཨོ་རྒྱན་ཆེན་པོའི་དུས་མཆོད་དང་བསྟུན་པའི་གཏེར་གསར་བླ་མ་ཞི་དྲག་དང་། ཁྱད་པར་ཇི་སྲིད་རྒྱལ་བསྟན་ནམ་གནས་བར་དང་དུས་ཀྱི་སྒྲུབ་མཆོད་ལ་རྡོ་རྗེ་ཕུར་པ་ཡང་གསང་སྤུ་གྲི་ཉིད་རྗེ་བླ་མ་དམ་པའི་ལྷག་པའི་ལྷའི་གཙོ་བོར་མཛད་པས་དེའི་སྒྲུབ་མཆོད་ཀྱི་མཆོད་པ་ཆག་མེད་ཀྱིས་བདག་ཉིད་ཆེན་མོ་དེའི་ཐུགས་དགོངས་ཡོངས་སུ་རྫོགས་པར་མཛད་ཅིང་། དེ་དག་གི་འགན་བཞེས་ཐམས་ཅད་གཙོ་བོར་ཞབས་དྲུང་སྐུ་མཆེད་དང་། བླ་མ་ལ་གུས་ཤིང་གཏོང་བ་ལ་མ་རྨོངས་པའི་ལས་དང་སྐལ་པར་ལྡན་པའི་སྐུ་ཚེ་དུ་མར་འབྲེལ་བའི་སྐལ་ལྡན་གཟིམ་དཔོན་འགྱུར་མེད་གཡང་འཛོམ་གྱིས་མཛད་དོ། །ལྷག་པར་རྡོ་རིང་ནས་མི་རྗེ་དགའ་བཞི་ཡབ་ཡུམ་གཉིས་ཀྱི་དངུལ་གདུང་གི་བཟོ་པ་དོན་གཉེར་ཆེན་པོས་སྩལ་ཅིང་། ཁྱད་པར་དངུལ་གདུང་མཆོད་སྡོང་ཆེན་པོའི་བཟོ་བཀོད་ཆེ་ཆུང་ད་ལྟ་མཐོང་བྱེད་ཡུལ་གྱུར་འདི་ཉིད་མཁན་ཆེན་བླ་མའི་ཡོངས་འཛིན་དགེ་བཤེས་མདྒ་ལའི་མཚན་ཅན་གྱིས་མཛད་པ་དེ་དག་གེགས་མེད་དུ་འགྲུབ་པར་གྱུར་བ་ནི་སྐྱབས་ཀྱི་མཆོག་གྱུར་རྗེ་བླ་མ་དམ་པ་བདེ་ཆེན་ཌཱ་ཀིའི་གཙོ་མོ་མཆོག་གི་བཀའ་དྲིན་གྱི་མཐུ་ཁོ་ན་ལས་གྲུབ་པ་ཡིན་པའི་ཕྱིར་རོ། །