འཇུག་གི་དོན།
བདེ་ཆེན་གདལ་བ་མཁའ་སྤྱོད་འོག་མིན་དབྱིངས། །འཕོ་བྲལ་གཞོམ་ཞིག་བྲལ་བའི་སྐུ་བརྙེས་ནས། །རྣམ་འགྱུར་རྩལ་སྣང་རོལ་པ་རྡོ་རྗེའི་གཟིས། །ཟིལ་གནོན་གྲུབ་པའི་རྣལ་འབྱོར་མ་དེས་སྐྱོངས། །མི་འགྱུར་མི་ཤིགས་གསང་ཆེན་རྡོ་རྗེའི་མཁའ། །འགྲོ་ལ་བདེ་བའི་དཔལ་སྟེར་སྒྲོན་མེ་མཆོག །ཁྱབ་གདལ་འགྱུར་བ་མེད་པ་རྡོ་རྗེའི་ཞལ། །མངོན་སུམ་རང་ངོ་སྤྲོད་མཛད་མ་དེར་འདུད། །རྒྱལ་ཀུན་སྤྱི་གཟུགས་ཁྱབ་བདག་འགྲོ་བའི་མགོན། །རིགས་ཀུན་བདག་ཉིད་མི་འགྱུར་དཔལ་གྱི་སྒྲོན། །མགོན་ཁྱོད་མི་འགྱུར་རྡོ་རྗེའི་སྐུ་བརྙེས་ནས། །ཞིང་འདིར་མི་བཞུགས་གདོད་མའི་དབྱིངས་སུ་གཤེགས། །བདག་སོགས་གདུལ་བྱ་སྤྱི་དང་མགོན་ཁྱོད་ཀྱི། །གསུང་གི་བདུད་རྩི་མྱང་བའི་བུ་སློབ་རྣམས། །སྐྱབས་མེད་ཉམ་ཐག་མིག་གི་འབྲས་བུ་ཟུམ། །ཁོང་པའི་སྙིང་དོར་མེད་འདི་མི་གཟིགས་སམ། །འོན་ཀྱང་ངེས་གསང་མན་ངག་སྙིང་པོའི་གནད། །མི་ཤིགས་ཟག་མེད་མཚོར་འཁྱིལ་ཆོས་ཀྱི་རྗེ། །སྨྱོས་རིགས་མི་འགྱུར་དཔལ་གྱི་སྒྲོན་མ་ཡིས། །ཐུགས་ཀྱི་དགོངས་པ་བདག་གིས་སྐོང་བར་ཤོག །བདག་ཀྱང་སྐྱེ་བར་དལ་འབྱོར་རྟེན་བཟང་ལས། །གང་འདུལ་ཞིང་དུ་མགོན་ཁྱོད་མི་འབྲལ་ཞིང་། །གསང་ཆེན་ལམ་མཆོག་སྙིང་པོའི་གཞུང་བཟུང་སྟེ། །འགྲོ་ཀུན་སྒྲོལ་བའི་དཔའ་བོར་ལྷུན་གྲུབ་ཤོག །ཁྱད་པར་མགོན་ཁྱོད་རྣམ་འདྲེན་བཅུ་པའི་ཚེ། །རང་བཞིན་སྐུ་ཡིས་རྡོ་རྗེ་གདན་གྱི་སྤོར། །གསང་ཆེན་དཀྱིལ་འཁོར་འབྱེད་ཚེ་རབ་སྐྱེས་ནས། །ཟག་མེད་ཐུགས་ཀྱི་ཀློང་དུ་དབྱེར་མེད་ཤོག །མི་ཤིགས་འགྱུར་མེད་འཁོར་ལོའི་ཕོ་བྲང་དུ། །དཔལ་ལྡན་བདེ་ཆེན་ཡེ་ཤེས་ཌཱ་ཀི་མའི། །ངོ་མཚར་སྒྲོན་མེའི་སྙིང་པོར་བྱང་ཆུབ་ནས། །དོན་གཉིས་འབྲས་བུ་ལྷུན་གྱིས་གྲུབ་པར་ཤོག །དེ་ལྟར་རིགས་བརྒྱའི་ཁྱབ་བདག་གར་གྱིི་དབང་ཕྱུག་མི་འགྱུར་དཔལ་གྱི་སྒྲོན་མའི་རྣམ་པར་ཐར་པ་དད་པའི་གདུང་སེལ་ཞེས་བྱ་བ་འདི་ཡང་། དང་པོར་བོད་རྗེ་མི་དབང་འགྱུར་མེད་བསོད་ནམས་སྟོབས་རྒྱས་དང་། ལྷ་རྒྱ་རི་ཞབས་དྲུང་ཕྱག་རྡོར་དབང་ཆེན་གཉིས་ཀྱིས་རྗེ་བླ་མ་དམ་པའི་ཞབས་པད་དུ་གསོལ་འདེབས་མཛད་ཅིང་། དགུང་ལོ་ཞེ་གཅིག་ཕེབས་པ་ནས་བཟུང་དེ་རྗེས་ཞི་བའི་དབྱིངས་སུ་མ་གཤེགས་བར་ཁོ་བོས་སྔ་ཕྱིར་སྙན་ཞུ་ཚར་བཅུ་གཉིས་ཙམ་གསོལ་འདེབས་ཞུས་པའི་རྣམ་ཐར་གྱི་ས་བོན་བདག་ལ་སྩལ་ཏེ་བླ་མའི་རྣམ་ཐར་སློབ་བུས་རྩོམ་དགོས་པར་ཁྱོད་རང་ནས་གྱིས་ཕེབས་ཤིང་། སླར་ནན་གྱིས་ཞུས་པའི་བཀའ་རྩོམ་གྱི་དབུ་ཚུགས་ཀྱང་དམ་སྲིའི་བར་གཅོད་ཀྱིས་ལུས་པ་ལ་གཡས་རུ་གཙང་གི་ཕྱོགས་ནས་དད་ལྡན་རྡོ་རྗེའི་སློབ་བུ་བྱ་བཏང་འགྱུར་མེད་ཆོས་འཕེལ་གྱིས་རྣ་བའི་བུ་ག་ཡང་ནས་ཡང་དུ་གཙེར་ཞིང་། འགྲོ་བའི་བླ་མ་རིག་འཛིན་པདྨ་གླིང་པའི་སྲས་རིགས་ཆོས་རྗེ་གྲགས་རྒྱལ་བའི་ཡང་སྲིད་རིག་འཛིན་པདྨ་དབང་རྒྱལ་རྡོ་རྗེ་དཔལ་བཟང་པོ་ཞེས་པས་ལྷ་རྫས་ཀྱི་གནང་སྐྱེས་དང་བཅས་གསུང་གིས་བསྐུལ་ཞིང་ཁྱད་པར་བདག་ཉིད་ཀྱིས་མི་ཕྱེད་པའི་དད་གདུང་དྲག་པོས་བསྐུལ་བའི་ཕྱི་རབས་སྐལ་ལྡན་རྣམས་ཀྱི་མོས་པའི་ས་བོན་དུ་རིང་མོ་ཉིད་ནས་མི་འགྱུར་དམ་བཅའི་རི་མོ་ཡིད་ལ་བཅངས་ཤིང་བཀའི་གནང་བ་ཐོབ་པ་ལ་བརྟེན་རྒྱལ་དབང་པདྨའི་གཟུང་མ་མཁར་ཆེན་བཟའི་ཡང་སྲིད་འཁྲུལ་མེད་བདེ་ཆེན་མཁའ་འགྲོའི་གཙོ་མོ་དམ་པ་དེ་ཉིད་ཀྱི་བཀའ་དྲིན་ཆེན་པོས་འཚོ་ཞིང་ཞབས་རྡུལ་སྤྱི་བོས་ལེན་པ་སྐལ་ལྡན་འདུས་པའི་ཚོགས་ལ་བཀའ་གསང་རྫོགས་པ་ཆེན་པོའི་ཆོས་ཀྱི་འཁོར་ལོ་བསྐོར་བའི་ཁྲིད་གཉེར་དུ་བྱིན་གྱིས་བརླབས་ཤིང་དབང་བསྐུར། ཤངས་སྟོད་ཁྱུང་པོའི་རིགས་ལས་རྒྱལ་ཁམས་པ་རྒན་པོ་ཁྱུང་པོ་རས་པ་གྲུབ་དབང་འགྱུར་མེད་འོད་གསལ་དུ་འབོད་པ་རང་ལོ་དྲུག་ཅུ་རྩ་བརྒྱད་སོན་པ་དགེ་བྱེད་ཅེས་པ་ཆུ་སྟག་ནག་ཟླའི་ཚེས་བཅུ་རྗེ་བླ་མ་དམ་པའི་དུས་དྲན་སྐུ་མཆོད་ཀྱི་ཉིན་བཤེས་གཉེན་གྲྭ་སྟོན་དབང་ཕྱུག་འབར་གྱི་བྱིན་གྱིས་བརླབས་པའི་གྲ་ནང་སའི་ཐིག་ལེ་གནམ་བསྐོས་ཡང་རྩེའི་སྒོམ་ཁང་དུ་གྲུབ་པར་བགྱིས་པ་ལ་རྗེས་སུ་སྨྱོས་རིགས་ཀརྨ་བི་ཛས་ཚིག་སྦྱོར་གྲོང་ཚིག་ཕལ་སྐད་སྣ་ཚོགས་པའི་སྐབས་སུ་འབབ་མིན་ལ་ཞུ་དག་དང་བཟོ་བཅོས་མཛེས་བྱ་ཕྲན་ཚེགས་བགྱིས་པ་འདིས་ཀྱང་སེམས་ཅན་ཐམས་ཅད་ཀྱི་རྒྱུད་ལ་བླ་མ་དམ་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག །དགེའོ།། །