ལེའུ་གཉིས་པ་སོ་ཐར།

༈ ན་མསྶརྦ་ཛྙཱ་ཡ། གང་ཞིག་མཚན་དཔེའི་གཟུགས་སྐུ་ཞི་བའི་དབྱིངས། །སྙོམས་པར་ཞུགས་ཀྱང་སྡོམ་བརྩོན་འདུས་པའི་དབུས། །གནང་བཀག་འདོམས་པའི་ཆོས་འདུལ་སྐུར་བཞེངས་པ། །སྟོན་དང་བསྟན་པ་གཉིས་གྱུར་ཕྱག་གི་གནས། །ལུང་རིགས་སྦྲང་རྩིས་མྱོས་པའི་བྷྲ་མ་ར། །ཆོས་འདུལ་འདབ་བརྒྱ་བཞད་པའི་སྐྱེད་ཚལ་དུ། །ལེགས་བཤད་རྣམ་པར་འགྲེལ་བའི་སྙན་འགྱུར་སྒྲ། །དཔྱོད་ལྡན་རྣ་བའི་བཅུད་དུ་དེ་རིང་ལེན། །

གཉིས་པ་སྡོམ་པ་གསུམ་སོ་སོའི་རང་བཞིན་དང་བསླབ་བྱ་རྒྱས་པར་བཤད་པ་ལ་གསུམ་སྟེ། སོ་ཐར། བྱང་སེམས། སྔགས་ཀྱི་སྡོམ་པ་བཤད་པའོ། །དེ་གསུམ་ག་ལ་སྔར་ལུས་རྣམ་བཞག་གི་སྐབས་སུ། ཁོག་དབུབ་གླེང་གཞི། མ་ཐོབ་པ་འཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། ཉམས་ན་ཕྱིར་བཅོས་ཚུལ་དང་བཞིའི་སྡོམ་གྱིས་བསྡུས་ནའང་། འདིར་བློ་གསར་རྣམས་ཀྱི་བློ་ལ་འཆར་བདེ་བའི་ཕྱིར། རྩ་བའི་ས་བཅད་གསུམ་དུ་བསྡུས་ཏེ་འཆད་པར་བྱའོ། །

དེ་ལ་དང་པོ་སོ་ཐར་གྱི་སྡོམ་པ་བཤད་པ་ལ་གསུམ་སྟེ། སྟོན་པས་འདུལ་བའི་དམ་ཆོས་གསུངས་ཚུལ། དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ། དེ་ལྟར་བཟུང་བའི་འདུལ་བའི་བརྗོད་བྱ་གཏན་ལ་དབབ་པའོ། །དང་པོ་ནི། གླེང་གཞི་སྟོན་པས་ཝཱ་ར་ཎཱ་སཱི་རུ། །ལྷག་པའི་ཚུལ་ཁྲིམས་གཙོར་སྟོན་བདེན་པ་བཞི། །ལྔ་སྡེར་གསུངས་པ། ཞེས་པ་སྟེ། སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འདིས། སྔོན་བྱང་ཆུབ་མཆོག་ཏུ་ཐུགས་བསྐྱེད་པ་ནས་བརྩམས་ཏེ། བསྐལ་པ་གྲངས་མེད་གསུམ་དུ་ཚོགས་གཉིས་རྫོགས་པར་མཛད་ནས། མི་རྣམས་ཚེ་ལོ་ཉི་ཁྲི་པའི་དུས་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ་བྲམ་ཟེའི་ཁྱེའུ་བླ་མར་གྱུར། དེའི་ཕྱི་མ་ལ་དགའ་ལྡན་དུ་དམ་པ་ཏོག་དཀར་པོར་སྐྱེ་བ་བཟུང་ཞིང་། དེ་ནས་ཚེ་ལོ་བརྒྱ་པའི་དུས་སུ་དགའ་ལྡན་ནས་འཕོ་བ་སོགས་ཞིང་འདིར་མཛད་པ་བཅུ་གཉིས་ཀྱིས་དོན་མཛད་པ་ལས། གང་གི་ཚེ་དགུང་ལོ་ཉེར་དགུའི་བར་ཁབ་ཏུ་བཞུགས་པའི་མཐར་རབ་ཏུ་བྱུང་ཞིང་། དཀའ་བ་ལོ་དྲུག་སྤྱད་ནས། དགུང་ལོ་སོ་ལྔ་ལ་བབས་པ་ན་རྡོ་རྗེ་གདན་དུ་ས་ག་ཟླ་བའི་ཚེས་བཅོ་ལྔའི་སྲོད་ལ་བདུད་བཏུལ་ཞིང་། ཐུན་དང་པོའི་སྐབས་དེ་ཉིད་དུ་མཉམ་པར་བཞག་སྟེ། རབ་མཐའི་བསམ་གཏན་ལ་བརྟེན་ནས་རྫུ་འཕྲུལ་གྱི་མངོན་ཤེས་དང་ལྷའི་རྣ་བ་བསྒྲུབས། གུང་ཐུན་ལ་གཞན་སེམས་ཤེས་པ། སྔོན་གནས་རྗེས་དྲན། ལྷའི་མིག་རྣམས་བསྒྲུབས། ཐུན་ཐ་མ་སྐྱ་རེངས་འཆར་ཀ་ལ་ཟག་ཟད་ཀྱི་མངོན་ཤེས་བསྒྲུབས་པས། བླ་ན་མེད་པའི་ཡེ་ཤེས་བརྙེས་ནས་མངོན་པར་རྫོགས་པ་སངས་རྒྱས་ཏེ། དེའི་ཚེ་འཇིག་རྟེན་ན་དགྲ་བཅོམ་པ་གཅིག་གོ །དེ་ནས་ཞག་བདུན་ཕྲག་བདུན་འདས་པ་ཆུ་སྟོད་ཟླ་བའི་ཚེས་བཞི་ནས་བརྩམས་ཏེ། འདུལ་བའི་དམ་ཆོས་གསུངས་པའི་གླེང་གཞི་ནི། ཡུལ་ཝཱ་ར་ཎཱ་སཱིའི་དྲང་སྲོང་ལྷུང་བ་རི་དྭགས་ཀྱི་ནགས་སུ། སྟོན་པ་ཐུབ་པའི་དབང་པོས། འཁོར་ལྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ། ཆོས་ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་སྟོན་པ་ལས་བརྩམས་ཏེ། འདུལ་བའི་འདུལ་བ་བཅས་པ་དང་རང་བཞིན་གྱི་རྣམ་བཞག་ཆེ་ལོང་ཙམ་དང་། འདུལ་བའི་མདོ་སྡེ་ཏིང་ངེ་འཛིན་དང་ཚངས་པར་སྤྱོད་པའི་རྣལ་འབྱོར་དུ་བྱ་བའི་རིམ་པ་དང་། འདུལ་བའི་མངོན་པ་དེ་རྣམས་ཀྱི་རབ་དབྱེ་རྒྱ་ཆེར་བཤད་པ་སོགས་སྤོང་གཉེན་གྱི་རིམ་པས་ཉམས་སུ་ལེན་པའི་ཐབས་བདེན་བཞིའི་ཆོས་ཀྱི་རྣམ་གྲངས་གསུངས་པས། ལྔ་སྡེས་དགྲ་བཅོམ་པ་ཐོབ། ལྷ་བརྒྱད་ཁྲིས་བདེན་པ་མཐོང་། དེའི་ཚེ་འཇིག་རྟེན་ན་དགྲ་བཅོམ་པ་དྲུག་གོ །དེ་ནས་ཉེ་བའི་ལྔ་སྡེ་ལ་སོགས་པ་ནས་རབ་བཟང་གི་བར་བཏུལ་ཏེ། དགུང་ལོ་བརྒྱད་ཅུ་པ་ལ་གྱད་ཡུལ་རྩྭ་ཅན་དུ་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདའ་བ་སྟོན་པར་མཛད་དོ། །དེ་ཡང་ལུང་བཞིས་བསྡུས་པའི་འདུལ་བའི་སྡེ་སྣོད་ནི། སྟོན་པ་སངས་རྒྱས་ནས་མྱ་ངན་ལས་མ་འདས་ཀྱི་བར་དུ་བྱུང་བ་དང་བཅས་པའི་རྣམ་པར་བཞག་པ་ཐམས་ཅད་སྟོན་པའི་ཕྱིར། ཆོས་འཁོར་དང་པོ་ཁོ་ནའི་མཚན་གཞིར་ངེས་པ་མ་ཡིན་ཡང་། འཁོར་བའི་མཚན་ཉིད་སྤང་བྱ་ལས་ལྡོག་པའི་ལམ་སྟོན་པའི་ཕྱིར། གཙོ་ཆེ་བའི་དབང་དུ་བྱས་ཏེ། འདིར་འཁོར་ལོ་དང་པོའི་མཚན་གཞིར་མཛད་པ་ཡིན་ནོ། །

གཉིས་པ་ནི། འོད་སྲུང་སོགས་ཀྱིས་བསྡུས། །བྱེ་བྲག་བཤད་མཛོད་ལ་སོགས་འཕགས་པས་བརྩམས། །ཡོན་ཏན་འོད་དང་ཤཱཀྱ་འོད་ཀྱིས་སྤེལ། །སྔ་འགྱུར་སྡོམ་རྒྱུན་ཞི་བ་འཚོ་དང་ནི། །ཕྱིས་ནས་ཤཱཀྱ་ཤྲཱི་ལས་ཀྱང་དར། །ཞེས་པ་སྟེ། བཀའ་བསྡུ་ལ་གསུམ་ལས། དང་པོ་ནི། ཤཱ་རིའི་བུ་དང་ལྷན་ཅིག་དགྲ་བཅོམ་པ་བརྒྱད་ཁྲི། མཽངྒལ་གྱི་བུ་དང་ལྷན་ཅིག་དགྲ་བཅོམ་པ་བདུན་ཁྲི། བཅོམ་ལྡན་འདས་དང་ལྷན་ཅིག་དགྲ་བཅོམ་པ་ཁྲི་བརྒྱད་སྟོང་མྱ་ངན་ལས་འདས་པས། དེའི་ཚེ་ལྷ་རྣམས་ཀྱིས། དགེ་སློང་དབང་ཡོད་པ་དག་ཀྱང་མྱ་ངན་ལས་འདས་ཏེ། དམ་པའི་ཆོས་ནི་དུད་པ་ཙམ་དུ་གྱུར། དགེ་སློང་རྣམས་སྡེ་སྣོད་གསུམ་གྱི་སྒྲ་ཡང་མི་སྒྲོག་གོ །ཞེས་འཕྱ་བ་བསལ་བའི་ཕྱིར། གནས་རྒྱལ་པོའི་ཁབ་ཀྱི་ནྱ་གྲོ་དྷའི་ཕུག་ཏུ། མ་སྐྱེས་དགྲས་གནས་མལ་དང་ཡོ་བྱད་ཐམས་ཅད་སྦྱར་ཏེ། དགྲ་བཅོམ་པ་ལྔ་བརྒྱ་འདུས་ནས་དབྱར་གནས་པའི་དུས་སུ། འཕགས་པ་ཀུན་དགའ་བོས་མདོ་སྡེ། ཉེ་བ་འཁོར་གྱིས་འདུལ་བ། འོད་སྲུང་ཆེན་པོས་མངོན་པའི་སྡེ་སྣོད་མཐའ་དག་བསྡུས་པས། ལྷ་རྣམས་ནི་འཕེལ། ལྷ་མིན་རྣམས་ནི་འགྲིབ། སངས་རྒྱས་ཀྱི་བསྟན་པ་ཡུན་རིང་བར་གནས་སོ། །ཞེས་ལྷ་རྣམས་ཀྱིས་འོག་མིན་གྱི་བར་དུ་གོ་བར་བྱས་ཤིང་ཆེད་དུ་བརྗོད་དོ། །བསྡུ་བ་གཉིས་པ་ནི། སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན། ཡངས་པ་ཅན་གྱི་དགེ་སློང་རྣམས་ཀྱིས་རུང་བ་མ་ཡིན་པའི་གཞི་བཅུ་བྱས་པ་དེ། གྲགས་པ་ལ་སོགས་པ་དགྲ་བཅོམ་པ་བདུན་བརྒྱས་སུན་ཕྱུང་ཞིང་། སྡེ་སྣོད་གསུམ་ག་ཚང་བ་ཚར་གཅིག་ལེགས་པར་བཏོན། མཐུན་པ་དང་བཀྲ་ཤིས་པའི་གསོ་སྦྱོང་ཡང་མཛད་པའོ། །བསྡུ་བ་གསུམ་པ་ནི། རྒྱལ་པོ་མྱ་ངན་བྲལ་གྱི་བུ་རྒྱལ་པོ་དཔའ་བོའི་སྡེའི་དུས་ནས་བརྩམས་ཏེ། བདུད་ཀྱིས་བྱིན་གྱིས་བརླབས་པའི་དགེ་སློང་ལྷ་ཆེན་པོ་དང་། བཟང་པོ་དང་། གནས་བརྟན་ཀླུ་དང་། ཡིད་བརྟན་རྣམས་རིམ་པར་བྱུང་བས། གཞི་ལྔ་གཞན་ལན་གདབ་དང་མི་ཤེས་པ། །ཡིད་གཉིས་དང་ནི་ཡོངས་སུ་བརྟག །བདག་ཉིད་གསོ་བར་བྱེད་པ་སྟེ། །འདི་ནི་སྟོན་པའི་བསྟན་པ་ཡིན། །ཞེས་སོ། །བསྒྲགས་ཏེ་ཆོས་ལོག་བསྟན་པས། རྒྱལ་པོ་དཔའ་བོའི་སྡེའི་ཚེ་སྨད། དགའ་བོ་དང་། པདྨ་ཆེན་པོའི་ཚེ་རིལ་པོ། ཀ་ནིཥྐའི་ཚེ་སྟོད་ཡན་ཏེ་རྒྱལ་པོ་བཞིའི་རིང་དགེ་འདུན་རྣམས་རྩོད་པར་གྱུར་ཅིང་། སྟོན་པས་འདུལ་བ་ཡི་གེར་འབྲི་བར་མ་གནང་བས་ཡུན་རིང་སོང་བ་ན་སོ་སོ་ཐར་པའི་མདོའི་འདོན་ཚུལ་མ་མཐུན་པའི་དབང་གིས་སྡེ་པ་བཅོ་བརྒྱད་དུ་གྱེས་ཏེ། ཇི་ལྟར་ན་གནས་བརྟན་ཀླུས་རྩོད་པ་སྤེལ་བའི་རྒྱུས་རྩ་བའི་སྡེ་པ་བཞིར་གྱེས། དེ་རྗེས་ཡིད་བརྟན་གྱིས་རྩོད་པ་རྒྱ་ཆེར་སྤེལ་བས་སྡེ་པ་བཞི་ཡང་བཅོ་བརྒྱད་དུ་རིམ་གྱིས་གྱེས་རྗེས། ཕན་ཚུན་རྩོད་པ་ཅུང་ཟད་ཞི་ནས་སོ་སོར་གནས་པའི་དུས་སུ། རྒྱལ་པོ་ཀ་ནིཥྐས་སྦྱིན་བདག་བྱས་ནས་བཀའ་བསྡུ་གསུམ་པ་མཛད། དེ་ཡང་ཁ་ཆེའི་ཡུལ་རྣ་རྒྱན་གྱི་གཙུག་ལག་ཁང་དུ། འཕགས་པ་རྩིབས་ལོགས་སོགས་དགྲ་བཅོམ་པ་ལྔ་བརྒྱ་དང་། བ་སུ་མི་ཏྲ་སོགས་བཙུན་པ་ཆེན་པོ་བཞི་བརྒྱ་དང་། བྱང་ཆུབ་སེམས་དཔའ་ལྔ་བརྒྱ་རྣམས་ཀྱིས་བསྡུས་ཞེས་ཁ་ཆེ་བ་རྣམས་འདོད། ཛ་ལནྡྷ་རའི་དགོན་པ་ཀུ་བ་ནའི་གཙུག་ལག་ཁང་དུ་དགྲ་བཅོམ་པ་ལྔ་བརྒྱ་དང་། བཙུན་པ་ཆེན་པོ་ལྔ་སྟོང་ཞིག་གིས་བསྡུས་སོ། །ཞེས་འཕགས་ཡུལ་གྱི་པཎྜི་ཏ་ཕལ་ཆེར་བཞེད་གསུངས། དེང་སང་བོད་དུ་གྲགས་པ་ལྟར་ན། སྟོན་པ་མྱ་ངན་ལས་འདས་ནས་ལོ་བཞི་བརྒྱར་ཉེ་བ་ན་དགྲ་བཅོམ་པ་ལྔ་བརྒྱ་དང་། བྱང་ཆུབ་སེམས་དཔའ་ལྔ་བརྒྱ་དང་། སོ་སྐྱེའི་བཙུན་པ་ཆེན་པོ་ལྔ་བརྒྱའམ་ཁྲི་དྲུག་སྟོང་འདུས་ནས་བསྡུས་ཟེར། གང་ལྟར་ཡང་གསེར་ཕྲེང་ཅན་གྱི་རྟོགས་བརྗོད་ཅེས་པར་རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་དྲངས་ནས་གྱེས་པ་བཅོ་བརྒྱད་པོ་ཐམས་ཅད་སངས་རྒྱས་ཀྱི་བཀར་བསྒྲུབས་ཤིང་། འདུལ་བའི་ཚོགས་ཡི་གེར་བཀོད། མདོ་སྡེ་དང་མངོན་པ་སྔར་ཡི་གེར་མ་འཁོད་པ་རྣམས་ཀྱང་དུས་དེར་ཡི་གེར་བྲིས་པ་ཡིན་ནོ། །

དགོངས་འགྲེལ་ཀྱི་བསྟན་བཅོས་བྱུང་ཚུལ་ལ་གཉིས་ཏེ། ཉན་ཐོས་ཀྱི་ཐུན་མོང་མ་ཡིན་པ་དང་ཐེག་པ་ཐུན་མོང་གིའོ། །དང་པོ་ནི། བསྟན་བཅོས་བྱེ་བྲག་བཤད་མཛོད་ཡིན་ལ། འདི་ནི་ཉེར་སྦས་ཀྱི་དུས་དགྲ་བཅོམ་པ་རྣམས་ཀྱིས་སྤྱི་མཐུན་དུ་བརྩམས་ཟེར་བ་དང་། ཁ་ཅིག་དགྲ་བཅོམ་པ་གྲགས་པ་དང་ཐམས་ཅད་འདོད་སོགས་ཀྱིས་བརྩམས་པར་གྲགས་ཤིང་། བོད་རྣམས་གཏམ་དེ་གཉིས་བསྲེས་ཏེ། བྱང་ཕྱོགས་རི་བོ་འབིག་བྱེད་གར་མཁན་གྱི་གཙུག་ལག་ཁང་དུ་ཉེར་སྦས་དང་། ཐམས་ཅད་འདོད་དང་། རྒུར་བོ་སོགས་དགྲ་བཅོམ་པ་ལྔ་བརྒྱས་མཛད་ཅེས་འབྱུང་ངོ་། །གཉིས་པ་ནི། འོད་བྱེད་ཀྱི་ས་བརྙེས་པ་བྲམ་ཟེའི་བཙུན་པ་སློབ་དཔོན་ཡོན་ཏན་འོད་ཀྱིས་མདོ་རྩ་བ་དང་ཀརྨ་ཤ་ཏཾ་ལ་སོགས་པ་དང་། སློབ་དཔོན་ཤཱཀྱ་འོད་ཀྱིས་སུམ་བརྒྱ་པ་རྩ་འགྲེལ་སོགས་མཛད་ཅིང་སྤེལ་བས། དེང་སང་གི་བར་དུ་སློབ་དཔོན་འདི་གཉིས་ཀྱི་གསུང་ལ་གཙོ་བོར་བརྟེན་པར་བྱེད་དོ། །

སོ་སོ་ཐར་པའི་སྡོམ་རྒྱུན་ཇི་ལྟར་བྱུང་ཚུལ་ནི། གངས་ཅན་གྱི་ཁྲོད་འདིར་སྡེ་པ་གཞི་ཐམས་ཅད་ཡོད་པར་སྨྲ་བའི་ལུགས་གཅིག་པུ་ལས་གཞན་མ་བྱུང་། དེ་ལྟ་ནའང་སྡོམ་རྒྱུན་རིམ་པ་གསུམ་སྟེ། སྔ་འགྱུར་གྱི་སྡོམ་རྒྱུན་སྨད་འདུལ་བའི་བརྒྱུད་པ་ནི། ཡང་དག་པར་རྫོགས་པའི་སངས་རྒྱས། ཤཱ་རིའི་བུ། སྲས་སྒྲ་གཅན་འཛིན། བྲམ་ཟེ་སྒྲ་གཅན་འཛིན། འཕགས་མཆོག་ཀླུ་སྒྲུབ། སློབ་དཔོན་ལེགས་ལྡན་འབྱེད། དཔལ་སྦས། ཡེ་ཤེས་སྙིང་པོ། མཁན་པོ་ཞི་བ་འཚོ། རྦ་རཏྣ། གཙང་རབ་གསལ། བླ་ཆེན་དགོངས་པ་རབ་གསལ། ཀླུ་མེས་ཚུལ་ཁྲིམས་ཤེས་རབ། གཟུས་རྡོ་རྗེ་རྒྱལ་མཚན། སྣེ་པོ་གྲགས་པ་རྒྱལ་མཚན། འབྲེེ་ཤེས་རབ་འབར། བྱ་འདུལ་བརྩོན་འགྲུས་འབར། རྩིས་འདུལ་འཛིན་གཞོན་ནུ་སེང་གེ །གྲོ་སྟོན་བདུད་རྩི་གྲགས། མཆིམས་ནམ་མཁའ་གྲགས། ཟེའུ་གྲགས་པ་ཤེས་རབ། མཆིམས་བློ་བཟང་གྲགས་པ། གྲོ་སྟོན་ཀུན་དགའ་རྒྱལ་མཚན། དཔང་གྲུབ་པ་ཤེས་རབ། པཎ་ཆེན་དགེ་འདུན་གྲུབ། གནས་རྙིང་པ་ཀུན་དགའ་བདེ་ལེགས། ཐམས་ཅད་མཁྱེན་པ་དགེ་འདུན་རྒྱ་མཚོ། བདེ་བ་ཅན་པ་དགེ་ལེགས་དཔལ་བཟང་། རྒྱལ་ཁང་རྩེ་པ་དཔལ་འབྱོར་རྒྱ་མཚོ། གླིང་སྨད་ཁྲི་ཆེན་དཀོན་མཆོག་ཆོས་འཕེལ། མཁན་ཆེན་དཀོན་མཆོག་བསྟན་འཛིན། དེ་ལ་བདག་གིས་ཚིགས་གསུམ་དུས་གཅིག་ལ་བར་མ་ཆད་པའི་ཆོ་གས་བསྙེན་པར་རྫོགས་པ་ཐོབ་བོ། །ཕྱི་འགྱུར་གྱི་སྡོམ་རྒྱུན་ལ་གཉིས་ལས། སྟོད་འདུལ་བ་ནི། ཤར་ཕྱོགས་ཀྱི་པཎྜི་ཏ་དྷརྨ་པཱ་ལའི་མཁན་བུ་པཱ་ལ་རྣམ་གསུམ་སོགས་ནས་བརྒྱུད་པ་སྟེ། དེང་སང་རྒྱུན་ཡོད་པ་མ་ཐོས་ལ། ཁ་ཆེ་བརྒྱུད་པ་ནི། ཀླུ་སྒྲུབ་ནས། གུ་ཎ་མི་ཏྲ། རཏྣ་མི་ཏྲ། ཤྲཱི་དྷརྨ་པཱ་ལ། གུ་ཎ་པ་ཏི། དྷརྨ་མཱ་ལ། ཨཱ་ཀ་ར་གུཔྟ། པཎ་ཆེན་ཤཱཀྱ་ཤྲཱི། དེས་འཇམ་དབྱངས་ས་སྐྱ་པཎྜི་ཏ། བྱང་ཆུབ་དཔལ། རྡོ་རྗེ་དཔལ་རྣམས་བསྙེན་པར་རྫོགས་པར་མཛད་པས། དེ་གསུམ་ལས་རྒྱུན་འཕེལ་ནས་དར་བར་གྱུར་ཏོ། །ཞར་བྱུང་འདུལ་བའི་བཤད་རྒྱུན་ནི། སྟོན་པ་སངས་རྒྱས། འཕགས་པ་ཉེ་བ་འཁོར། འོད་སྲུང་ཆེན་པོ་ནས་ལེགས་མཐོང་གི་བར་སངས་རྒྱས་དང་འདྲ་བའི་ཉན་ཐོས་བདུན། ཕྱིར་མི་འོང་བློས་མི་ཕེབས་པ། ཁ་ཆེ་འདུས་བཟང་། མཁས་མཆོག་དབྱིག་གཉེན། འཕགས་པ་ཡོན་ཏན་འོད། སློབ་དཔོན་ཆོས་ཀྱི་བཤེས་གཉེན། ཞི་བ་འོད་དང་། བསོད་ནམས་གྲགས། དེ་གཉིས་ལས་སློབ་དཔོན་ཤཱཀྱ་འོད། པཎྜི་ཏ་སེང་གེའི་གདོང་ཅན། དཱ་ན་ཤཱི་ལ། ཛི་ན་མི་ཏྲ། ཅོག་རོ་ཀླུའི་རྒྱལ་མཚན། རྨ་གཡོ་གཙང་གསུམ། བླ་ཆེན། ཀླུ་མེས། གཟུས། སྣེ་པོ། སོག་འདུལ་འཛིན། རྒྱ་འདུལ། རྨ་ཚོ། བྱ་འདུལ། རྩིས་འདུལ། རོག་ཆོས་དབང་། ཆོས་བྱང་། ཆོས་བརྩོན། ཆོས་གྲགས་རིན་ཆེན། ཀ་བཞི་པ་གྲགས་གཞོན། བསོད་ནམས་གྲགས། ཀུན་མཁྱེན་བུ་སྟོན། དམར་སྟོན་རྒྱ་མཚོ་རིན་ཆེན་ནམ། ཡང་ན་རྨ་ཚོའི་སློབ་མ་སྐྱིད་ཤོད་པ་ཚུལ་ཁྲིམས་འཕགས་ནས། དམར་སྟོན་དཔལ་ལྡན་རིན་ཆེན་གྱི་བར་བླ་མ་བརྒྱད་བརྒྱུད་དེ་དམར་སྟོན་རྒྱ་མཚོ་རིན་ཆེན་ནོ། །དེ་ནས་ཀུན་མཁྱེན་སངས་རྒྱས་འཕེལ། འཇམ་དབྱངས་ཀུན་དགའ་ཆོས་བཟང་། གྲུབ་ཆེན་ནོར་བུ་ཕུན་ཚོགས། ཤངས་སྟོན་བྱམས་པ་ཆོས་བཤེས། འཇམ་གསར་ཤེས་རབ་རྒྱལ་མཚན། གུང་སྟོན་བཀྲ་ཤིས་གྲགས་པ་རྒྱལ་མཚན། མཁས་གྲུབ་རབ་བརྟན་དཔལ་འབར། འབུམ་རབ་འབྱམས་པ་ཐར་པ་རྒྱལ་མཚན། འདུལ་འཛིན་ཆོས་རྣམ་རྒྱལ། འབུམ་རབ་འབྱམས་པ་བྱམས་པ་དགེ་འདུན། དེ་གཉིས་ཀྱི་སློབ་མ་བཀྲ་ཤིས་རྒྱལ་མཚན་དང་། བྱམས་པ་རྒྱལ་མཚན་གཉིས་ལ། ལུང་རིགས་སྨྲ་བའི་དབང་ཕྱུག་སངས་རྒྱས་ཆོས་དར་གྱིས་གསན། དེ་ལ་བདག་གིས་ལེགས་པར་ཐོས་སོ། །གཞན་ཡང་ཁོ་བོས། ལུང་མང་བ་གྲུབ་པ་རྡོ་རྗེ་ལ་འདུལ་ལུང་སྡེ་བཞི་ཕྲན་འགའ་དང་བཅས་པ། རབ་འབྱམས་པ་སངས་རྒྱས་ཆོས་དར་ལ་མདོ་རྩ་བ་དང་ལུང་རིགས་གཏེར་མཛོད། སྡོམ་བརྩོན་ཀུན་དགའ་དར་རྒྱས་ལ་མེ་ཏོག་ཕྲེང་རྒྱུད་དང་། སུམ་བརྒྱ་པ་རྩ་འགྲེལ། མཁྱེན་བརྩེ་ནུས་པའི་བདག་ཉིད་རིག་འཛིན་ཆེན་པོ་པདྨ་ཕྲིན་ལས་ལ་ཀུན་མཁྱེན་བུའི་ལས་ཆོག་སོགས་ཀྱི་བཀླགས་ལུང་ཀྱང་ལེགས་པར་ཞུས་ཤིང་། འདུལ་བའི་བརྡའ་ཆད་དང་ལག་ལེན་རགས་ཙམ་གཞོན་ནུའི་དུས་ནས་གཅེན་སྡོམ་བརྩོན་མཁས་པ་ཆེན་པོ་རྒྱལ་བའི་སྲས་པོ་དང་། གུང་ཐང་པཎ་ཆེན་གཉིས་ལ་བསྟེན་ཏེ་ཅུང་ཟད་སྦྱངས་སོ། །

གསུམ་པ་དེ་ལྟར་བཟུང་བའི་བརྗོད་བྱ་གཏན་ལ་དབབ་པ་ལ་བདུན་ཏེ། འཐོབ་བྱ་སྡོམ་པའི་ངོ་བོ། དེའི་དབྱེ་བ། མ་ཐོབ་པ་འཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཚུལ། སྐྱེ་བའི་ལུས་རྟེན། ཉམས་ན་གསོ་བའི་ཐབས། བསྲུངས་པའི་ཕན་ཡོན་ནོ། །དང་པོ་ནི། ངོ་བོ་ངེས་འབྱུང་བསམ་པས་ཀུན་བསླངས་ནས། །གཞན་གནོད་གཞི་བཅས་ལྡོག་པ་ལུས་ངག་ལས། །སྐྱེ་ཕྱིར་གཟུགས་ཅན་ཡིན་ཞེས་འདོད་པ་དང་། །སྤོང་སེམས་རྒྱུན་ཆགས་ས་བོན་ལ་འདོད་པ། །རང་གི་སྡེ་པ་གོང་འོག་སོ་སོའི་ལུགས། །ཞེས་པ་སྟེ། སོ་ཐར་གྱི་སྡོམ་པའི་ངོ་བོ་ལ། མཚན་ཉིད་ནི། ངེས་འབྱུང་གི་བསམ་པས་ཟིན་པའི་ཉེས་སྤྱོད་སྡོམ་པའི་ཚུལ་ཁྲིམས་གང་ཞིག །འདོད་པའི་སས་བསྡུས་པའོ། །ཟུར་དང་པོས་ཕྱི་རོལ་པའི་ཚུལ་ཁྲིམས་དང་། ཟུར་གཉིས་པས་བར་མའི་ཚུལ་ཁྲིམས་དང་། ཟུར་གསུམ་པས་བསམ་གཏན་དང་ཟག་མེད་ཀྱི་སྡོམ་པ་བསལ་ལོ། །འདིར་བྱེ་བྲག་ཏུ་སྨྲ་བ་ལྟར་ན། སྡོམ་པ་དེ་གསུམ་འགལ་བར་འདོད་དེ། འདོད་པའི་སས་བསྡུས་པ་སོ་ཐར་དང་། གཟུགས་ཀྱི་སས་བསྡུས་པ་བསམ་གཏན་དང་། ཁམས་གསུམ་གང་རུང་གི་སས་མ་བསྡུས་པ་ཟག་མེད་དོ། །ཐེག་ཆེན་ལྟར་ན་དེ་གསུམ་མི་འགལ་ཏེ། ཐེག་ཆེན་འཕགས་རྒྱུད་ཀྱི་བསམ་གཏན་དངོས་གཞིའི་ངོ་བོར་གྱུར་པའི་སྡོམ་པ་དེ། ཉེས་སྤྱོད་སྤོང་བ་བསམ་གཏན་གྱི་དངོས་གཞིས་བསྡུས་པ། འཕགས་ལམ་གྱི་ངོ་བོ་ཡིན་པའི་ཆ་ནས་དེ་དང་དེ་ཡིན་པའི་ཕྱིར། དེ་ལ་ངེས་འབྱུང་ནི། ལྷག་མེད་ཀྱི་མྱང་འདས་ཏེ། ཐེག་པ་གསུམ་གྱི་དབྱེ་བས་གསུམ་མོ། །དེ་གསུམ་གང་ཡང་རུང་བའི་ཀུན་སློང་གི་བསམ་པས་ཟིན་པའི་སྒོ་ནས། གཞན་གནོད་གཞི་བཅས་ལས་ལྡོག་པ་ལུས་ངག་གི་ཉེས་པ་བདུན་སྤོང་བའི་ལས་ལམ་དངོས་གཞི་དང་། དེས་དྲངས་པའི་མཇུག་གང་རུང་གི་ངོ་བོར་སྐྱེ་བའི་ཕྱིར། སྡོམ་པའི་ངོ་བོ་གཟུགས་ཅན་ཏེ། དེ་ཡང་བྱེ་བྲག་ཏུ་སྨྲ་བ་ལྟར་ན། རྣམ་པར་རིག་བྱེད་མ་ཡིན་པའི་གཟུགས་སུ་གནས་པར་འདོད་དེ། མཛོད་ལས། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །སྡོམ་པ་སོ་སོར་ཐར་ཞེས་བྱ། །དེ་བཞིན་ཟག་མེད་བསམ་གཏན་སྐྱེས། །ཞེས་དང་། རབ་དབྱེ་ལས། ཉན་ཐོས་སྡོམ་པ་རྣམ་རིག་མིན། །ཞེས་གསུངས་པའི་ཕྱིར། འོ་ན་མཛོད་འགྲེལ་ལས། ཡང་དག་པར་བླངས་པའི་ཚུལ་ཁྲིམས་ནི་རྣམ་པར་རིག་བྱེད་ལ་རག་ལས་པའི་ཕྱིར་ལས་ཀྱི་ལམ་གཟུགས་ཅན་བདུན་ནི་གདོན་མི་ཟ་བར་རྣམ་པར་རིག་བྱེད་དང་རིག་བྱེད་མ་ཡིན་པ་གཉིས་ཀ་ཡོད་དོ། །ཞེས་པས་གནོད་དོ་སྙམ་ན། མི་གནོད་དེ། དེ་དུས་རིག་བྱེད་ཡོད་པར་སྟོན་གྱི། དེ་ཉིད་ལས་ལམ་གྱི་དངོས་གཞིར་འཆད་པ་མ་ཡིན་ཏེ། སྦྱོར་བ་དང་མཇུག་ཉིད་དུ་ངེས་པའི་ཕྱིར་རོ། །མདོ་སྡེ་པ་ནི། རྒྱུད་ཡོངས་སུ་འགྱུར་བའི་ཁྱད་པར་ལ་འདོད་དེ། མཛོད་འགྲེལ་ལས། ལས་སྔོན་དུ་འགྲོ་བའི་སེམས་ཕྱིར་ཞིང་འབྱུང་བ་གང་ཡིན་པ་དེ་ནི་རྒྱུད་ཡིན་ནོ། །དེ་གཞན་དང་གཞན་དུ་སྐྱེ་བ་ནི་ཡོངས་སུ་འགྱུར་བ་ཡིན་ནོ། །ཞེས་སོ། །སེམས་ཙམ་པ་ནི། འཆལ་ཚུལ་སྤོང་བའི་སེམས་པ་རྒྱུན་ཆགས་ས་བོན་དང་བཅས་པ་ལ་འདོད་དེ། སེམས་པ་རྐྱང་པ་ལ་བྱས་ན་རྒྱུན་མེད་ཅིང་། བག་ཆགས་ཙམ་ལ་བྱས་ན་གཏོང་རྒྱུ་བྱུང་བའི་གནས་སྐབས་སུའང་རྗེས་སུ་འབྲང་བའི་ཕྱིར་ཏེ། ལས་གྲུབ་པར། གལ་ཏེ་སེམས་པ་ཁོ་ན་ལུས་ཀྱི་ལས་སུ་འགྱུར་ན། སེམས་གཡེང་བ་དང་སེམས་མེད་པ་དག་ལ་སེམས་པ་དེ་མེད་ན་སྡོམ་པ་དང་སྡོམ་པ་མིན་པ་གཉིས་ཇི་ལྟར་ཡོད་ཅེ་ན། སྡོམ་པའི་ཁྱད་པར་གྱི་བག་ཆགས་མ་བཅོམ་པའི་ཕྱིར་སྡོམ་པ་དང་སྡོམ་པ་མ་ཡིན་པ་གཉིས་ཀ་ཡོད་དོ། །ཞེས་སོ། །དབུ་མ་པ་ནི་སྤོང་སེམས་མཚུངས་ལྡན་དང་བཅས་པ་ལ་འདོད་དེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གསུངས་པའི་ཕྱིར། དེ་ལྟར་ན་རང་སྡེའི་གྲུབ་མཐའ་གོང་འོག་ལ་སོ་སོའི་བློ་ཁྱད་ཀྱིིས་འདོད་ལུགས་མཐོ་དམའ་བྱུང་བ་ཡིན་ནོ། །

གཉིས་པ་དབྱེ་བ་ནི། དབྱེ་བ་བསྙེན་གནས་དགེ་བསྙེན་ཕ་མ་གཉིས། །ཁྱིམ་པའི་ཕྱོགས་ཡིན་དགེ་ཚུལ་ཕ་མ་དང་། །དགེ་སློབ་མ་དང་དགེ་སློང་ཕ་མ་ལྔ། །རབ་བྱུང་ལ་ཡིན་སོ་ཐར་རིགས་བརྒྱད་པོ། །རྫས་སུ་བསྡུ་ན་བཞིར་འདོད་མཛོད་ཀྱི་ལུགས། །ཞེས་པ་སྟེ། སོ་ཐར་ལ་དབྱེ་ན་རིགས་བརྒྱད་དེ། ཁྱིམ་པའི་ཕྱོགས་ཀྱི་གསུམ་དང་། རབ་ཏུ་བྱུང་བའི་ཕྱོགས་ཀྱི་ལྔ་རྣམས་སུ་ཡོད་པའི་ཕྱིར། བརྒྱད་པོ་དེ་དག་ཀྱང་རྫས་སུ་བསྡུ་ན་བཞིར་འདུ་སྟེ། དགེ་སློང་ཕ་མ་གཉིས། དགེ་ཚུལ་ཕ་མ་དགེ་སློབ་མ་དང་གསུམ། དགེ་བསྙེན་ཕ་མ་གཉིས་རྣམས་མཚན་ཕན་ཚུན་དུ་གྱུར་པ་ལས་མིང་འཕོ་བ་ཙམ་ཡིན་པས་རྫས་རིགས་གཅིག་པ་གང་ཞིགབསྙེན་གནས་ཀྱི་སྡོམ་པ་དང་རྫས་རིགས་བཞིར་ངེས་པའི་ཕྱིར། དེ་ལྟར་ཡང་མཛོད་ལས། སོ་སོ་ཐར་ཞེས་བྱ་རྣམས་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །ཅེས་སོ། །བསྙེན་གནས། དགེ་བསྙེན། དགེ་ཚུལ། དགེ་སློང་བཞིའི་སྡོམ་པའི་མཚན་ཉིད་རིམ་བཞིན། རང་གི་སྡོམ་པར་འགྲུབ་བྱེད་ཀྱི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་པའི་ངེས་འབྱུང་གི་ཚུལ་ཁྲིམས་གང་ཞིག །ཅེས་པ་བཞི་གའི་མགོར་སྦྱར་ཏེ། བསྙེན་གནས་ཀྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་བརྒྱད་ཉིན་ཞག་ཕྲུགས་གཅིག་ཏུ་སྤོང་བར་ཁས་བླངས་པའི་སྡོམ་པ་དང་པོའི་མཚན་ཉིད། འདི་ལ་དུས་ཁྲིམས་སམ་གསོ་སྦྱོང་ཞེས་བྱ་སྟེ། ཁྱིམ་པ་རྣམས་ཀྱིས་ཉ་སྟོང་ཚེས་བརྒྱད་ཀྱི་དུས་སུ་བླངས་ནས་བསྲུང་བའི་ཕྱིར་དང་། འདི་དགེ་བསྙེན་གྱིས་བླངས་ན་དེའི་བསླབ་བྱ་གསོ་ཞིང་སྤང་བྱ་སྦྱོང་བའི་གསོ་སྦྱོང་དུ་འགྲོ་བས་སོ། །དགེ་བསྙེན་གྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་ཇི་སྲིད་འཚོའི་བར་དུ་སྤོང་བར་ཁས་བླངས་པ་གཉིས་པའི་མཚན་ཉིད། འདི་ལ་འདུལ་བར་ཡོངས་རྫོགས་དགེ་བསྙེན་ལས་གཞན་པའི་འབོགས་ཆོག་མ་བཤད་ཀྱང་། མངོན་པ་ལས་སྐྱབས་གསུམ་འཛིན་པ་དང་སྣ་གཅིག་སྤྱོད་པ་སོགས་དབྱེ་བ་མང་ངོ་། །དགེ་ཚུལ་གྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་བཅུ་ཇི་སྲིད་འཚོའི་བར་དུ་སྤོང་བར་ཁས་བླངས་པ་གསུམ་པའི་མཚན་ཉིད། དགེ་སློབ་མའི་བསླབ་བྱ་རྣམས་ནི་ཇི་སྲིད་འཚོ་དང་ཉིན་ཞག་གི་མཐའ་གང་དུའང་མི་རུང་བས་སོ་ཐར་གྱི་སྡོམ་པ་མཚན་ཉིད་པར་མི་རུང་ངོ་། །སྤོང་བདུན་འཁོར་དང་བཅས་པ་མཐའ་དག་ཇི་སྲིད་འཚོའི་བར་དུ་སྤོང་བར་ཁས་བླངས་པའི་རིགས་གནས་བཞི་པའི་མཚན་ཉིད། སྤོང་བདུན་ནི་ལུས་ངག་གི་ཉེས་པ་བདུན་པོའི་རང་བཞིན་གྱི་ཁ་ན་མ་ཐོ་བའི་ཆ་སྤོང་བའི་དབང་དུ་བྱས་ལ། འཁོར་བཅས་ཞེས་པ་ལུས་ངག་གི་བཅས་རྐྱང་གི་དབང་དུ་བྱས་སོ། །གལ་ཏེ་དགེ་བསྙེན། དགེ་ཚུལ། དགེ་སློང་གི་སྡོམ་པ་གསུམ་གང་ཟག་གཅིག་གི་རྒྱུད་ལ་ཇི་ལྟར་ལྡན་ཞེ་ན། སྡོམ་པ་གཟུགས་ཅན་དུ་འདོད་པའི་ལུགས་ལྟར་ན། ཚིགས་གསུམ་རིམ་པར་ནོད་པའི་གང་ཟག་གི་རྒྱུད་ལ་རྫས་ཐ་དད་དུ་ལྡན་པར་འདོད་དེ། མཛོད་ལས། ཐ་དད་དེ་དག་འགལ་བ་མེད། །ཅེས་སོ། །སྡོམ་པ་ཤེས་པར་འདོད་པའི་ལུགས་ལྟར་ན། ངོ་བོ་གཅིག་ལ་ལྡོག་པ་ཐ་དད་པ་ཡིན་ཏེ། གཙོ་སེམས་གཅིག་གི་འཁོར་དུ་སེམས་པ་རིགས་མཐུན་རྫས་གཞན་གཉིས་མི་འབྱུང་བས་ངོ་བོ་གཅིག་པ་གང་ཞིག །འཐོབ་བྱེད་ཀྱི་རྒྱུ་དང་སྤང་བྱ་དང་བླང་བྱ་སོ་སོར་ངེས་པས་གསུམ་པོ་ལ་གཞི་མཐུན་མི་སྲིད་པའི་ཕྱིར་ལྡོག་པ་ཐ་དད་པའོ། །

གསུམ་པ་མ་ཐོབ་པ་འཐོབ་པར་བྱེད་པའི་ཐབས་ལ། བསྟན་བཤད་གཉིས་ལས། དང་པོ་མདོར་བསྟན་ནི། དང་པོ་སྡོམ་པ་མ་ཐོབ་འཐོབ་ཚུལ་ལ། །ལེན་ཚུལ་གཉིས་ཏེ། ཞེས་པས་ཚེགས་ཆུང་ངུས་རྫོགས་པ་སྔོན་གྱི་ཆོ་ག་དང་། ཚེགས་དང་བཅས་པས་རྫོགས་པ་ད་ལྟར་གྱི་ཆོ་ག་སྟེ་ལེན་ཚུལ་གཉིས་སུ་ངེས་སོ། །གཉིས་པ་རྒྱས་བཤད་ལ་གཉིས་ལས། དང་པོ་སྔོན་གྱི་ཆོ་ག་ནི། རང་བྱུང་ཡེ་ཤེས་ཁོང་ཆུད་འཕྲིན་གྱིས་རྫོགས། །སྟོན་པར་ཁས་བླངས་ཚུར་ཤོག་གསོལ་བཞི་དང་། །དྲིས་པའི་ལན་ལྡོན་ལྕི་ཆོས་ཁས་བླངས་སོགས། །གདུལ་བྱ་བློ་དག་མཁན་པོ་འཕགས་པས་ཡིན། །ཞེས་པ་སྟེ། ད་ལྟར་གྱི་ཆོ་ག་ལ་མ་ལྟོས་པར་བསྒྲུབ་བྱ་བསྙེན་པར་རྫོགས་པར་བྱེད་པའི་ཆོ་ག་དེ་སྔོན་ཆོག་གི་མཚན་ཉིད། དབྱེ་ན་མཛོད་འགྲེལ་ལས། བྱེ་བྲག་ཏུ་སྨྲ་བ་འདུལ་བ་པ་རྣམས་ན་རེ། རྣམ་པ་བཅུས་བསྙེན་པར་རྫོགས་སོ། །ཞེས་པ་ལྟར་བཅུ་སྟེ། རྫོགས་པའི་སངས་རྒྱས་དང་རང་སངས་རྒྱས་གཉིས་ཟད་མི་སྐྱེ་ཤེས་པའི་བྱང་ཆུབ་བརྙེས་པའི་ཚེ་རང་བྱུང་གིས་དང་། ལྔ་སྡེ་བཟང་པོ་མཐོང་ལམ་སྐྱེས་ཚེ་ཡེ་ཤེས་ཁོང་ཆུད་ཀྱིས་ཏེ། དེ་གསུམ་ནི་རང་རྒྱུད་ལ་ངང་གིས་དོན་དམ་པའི་དགེ་སློང་སྐྱེས་པས་བསྙེན་པར་རྫོགས་པའོ། །ཤཱ་རིའི་བུ་སོགས་ཚུར་ཤོག་གིས་དང་། འོད་སྲུང་ཆེན་པོ་སྟོན་པར་ཁས་བླངས་པས་དང་། བཟང་སྡེའི་ཚོགས་དྲུག་ཅུ་ལ་སྐྱབས་གསུམ་ཁས་བླངས་པས་དང་། སྐྱེ་དགུའི་བདག་མོ་སོགས་ལ་ལྕི་ཆོས་བརྒྱད་སྤོང་བར་ཁས་བླངས་པས་དང་། ལེགས་བྱིན་དྲིས་པའི་ལན་ལ་དགྱེས་པས་བསྙེན་པར་རྫོགས་པ་དང་ལྔ་ནི་སྟོན་པའི་བྱིན་རླབས་ཀྱིས་རྫོགས་པའོ། །མཆོད་སྦྱིན་མ་ཕ་མའི་དབང་དུ་སོང་བ་ལ་དགེ་སློང་མ་ཨུཏྤ་ལས་ཕོ་ཉ་བྱས་ཏེ་དགེ་འདུན་གྱིས་འཕྲིན་ཆོག་ལ་བརྟེན་ནས་དང་། དགེ་འདུན་གྱི་གྲངས་མ་མཐའ་ཡུལ་དབུས་སུ་བཅུ་དང་མཐའ་འཁོབ་ཏུ་ལྔ་ཚོགས་ཀྱིས་གསོལ་བཞིའི་ལས་ཀྱིས་རབ་བྱུང་བསྙེན་རྫོགས་ཅིག་ཅར་དུ་བྱེད་པའོ། །འདི་དག་ལ་སྔོན་གྱི་བསྙེན་པར་རྫོགས་ཚུལ་ཞེས་བྱ་སྟེ། སྔོན་གྱི་གང་ཟག་ལས་ཉོན་རྣམ་སྨིན་གྱི་སྒྲིབ་པ་གསུམ་ཤས་ཆུང་ཞིང་། ཤེས་རབ་དང་རྒྱུད་དང་དབང་པོ་སྨིན་པའི་གདུལ་བྱ་བློ་དག་པ་ཤ་སྟག་གི་རྒྱུད་ལ་བྱུང་བའི་བསྙེན་རྫོགས་ཡིན་པའི་ཕྱིར་དང་། གང་གིས་རྫོགས་པར་མཛད་མཁན་གྱི་མཁན་པོའང་འཕགས་པ་ཁོ་ནའི་ཁྱད་ཆོས་ཡིན་པས་སོ། །དེ་ལྟར་ན་སྔོན་ཆོག་རྣམས་མཁན་སློབ་ལ་ལྟོས་མི་དགོས་པར་བཤད་པ་དང་འགལ་ཞེ་ན། དེ་དག་རྒྱུད་སྒྲིབ་གསུམ་ཤས་ཆེ་ཞིང་སྨིན་ཤས་ཆུང་བ་ད་ལྟར་གྱི་གདུལ་བྱ་བཞིན་དུ་ཚེགས་ཆེན་པོའི་སྒོ་ནས་མཁན་སློབ་ཀྱིས་ཁྲིད་ཅིང་སྐྱོང་བ་ལ་ལྟོས་མི་དགོས་པས་དེ་སྐད་བཤད་ཀྱི། གཞན་དུ་ན། ཚུར་ཤོག་སོགས་ཀྱི་ཚེ་སྟོན་པ་སངས་རྒྱས་མཁན་པོ་ཡིན་པར་གྲུབ་ལ། གསོལ་བཞིའི་ལས་ཀྱི་སྔོན་ཆོག་བྱས་ཚེ་ལས་བྱེད་པ་པོ་དེའི་དོན་གྲུབ་པ་ན་སློབ་དཔོན་དུ་འགྱུར་དགོས་པའི་ཕྱིར་རོ། །དེ་ཡང་དང་པོ་བདུན་ལ་གསོལ་བཞིའི་ཆོ་ག་མཚན་ཉིད་པ་མེད་པས་སྔོན་ཆོག་བཏགས་པ་བ་དང་། འཕྲིན་ནི་ད་ལྟར་གྱི་ཆོ་ག་ཡིན་མོད། གསོལ་བཞིའི་ལས་ཀྱི་སྔོན་ཆོག་ལ་བརྟེན་པའི་འཕྲིན་ཆོག་ཀྱང་འབྱུང་རུང་བས་མཐའ་གཅིག་ཏུ་མ་ངེས་པའི་ཕྱིར། འདིར་སྔོན་ཆོག་མཚན་ཉིད་པ་ནི། བཅུ་ཚོགས་སམ་ལྔ་ཚོགས་ཀྱི་དགེ་འདུན་ལ་གསོལ་བཏབ་སྔོན་དུ་འགྲོ་བས། གསོལ་བཞིའི་ལས་ཀྱིས་ཅིག་ཅར་རབ་ཏུ་བྱུང་བ་དང་བསྙེན་པར་རྫོགས་པར་བྱེད་པའི་ཆོ་ག་ཉིད་ཡིན་ནོ། །དེ་ལ་རང་བྱུང་ནི་སྟོན་པ་སངས་མ་རྒྱས་པའི་སྔོན་རོལ་ཏུ་བྱུང་ཞིང་། ཚུར་ཤོག་ནི་སངས་རྒྱས་ནས་མྱ་ངན་ལས་འདའ་ཁའི་བར་དུའང་མཛད། འདི་ལ་ཉེས་དམིགས་འགའ་ཞིག་བྱུང་བ་ལ་བརྟེན་ནས་གསོལ་བཞིའི་སྔོན་ཆོག་གནང་ལ། གཞན་རྣམས་སངས་རྒྱས་ནས་རིང་པོ་མ་ལོན་པར་ད་ཆོག་མ་བྱུང་གི་བར་དུ་བྱུང་བས་སྔོན་གྱི་རྫོགས་ཚུལ་ཞེས་བྱའོ། །

གཉིས་པ་ད་ལྟར་གྱི་ཆོ་ག་ལ། སྤྱིའི་དོན་དང་། གཞུང་གི་དོན་ནོ། །དང་པོ་ནི། སྔོན་ཆོག་གི་རྗེས་སུ་བཅས་པ་མཛད་པའི་གསོལ་བཞིའི་ཆོ་ག་འཁོར་དང་བཅས་པ་དེ་ད་ལྟར་གྱི་ཆོ་གའི་མཚན་ཉིད། དབྱེ་ན། བཅུ་ཚོགས་དང་། ལྔ་ཚོགས་སམ་དམིགས་བསལ་ལ་བཞི་ཚོགས་དང་། དགེ་འདུན་སྡེ་གཉིས་ལས་རྫོགས་པ་དང་། འཕྲིན་གྱིས་ཚིགས་སྔ་ཕྱི་རིམ་ཅན་དུ་སྒྲུབ་པར་བྱེད་པ་རྣམས་སོ། །དགེ་སློང་གྲངས་མང་ཉུང་རྙེད་དཀའ་སླའི་ཁྱད་པར་གྱིས་བཅུ་ཚོགས་དང་ལྔ་ཚོགས་སུ་འཇོག་པའི་ཡུལ་དབུས་མཐའི་ས་ཚིགས་ནི། ཚིག་ལེའུར་བྱས་པ་ལས། ལི་ཁ་ར་ན་ཚང་ཚིང་ནགས། །ལི་ཁར་ཤིང་འཕེལ་ཤར་ཕྱོགས་ཉིད། །ཨུ་ཤི་རི་ཞེས་བརྗོད་པ་ཡི། །རི་བོ་མུན་པ་ཅན་ནི་བྱང་། །ཀ་བ་ཉེ་བའི་ཀ་བ་ཡི། །གྲོང་ཁྱེར་ནུབ་ན་གནས་པ་ཡིན། །གྲོང་ཁྱེར་འདམ་བུ་ཅན་གྱི་དྲུང་། །ཆུ་ཀླུང་འདམ་བུ་ཅན་ནི་ལྷོ། །འདི་དག་གི་ནི་བར་རྣམས་ལ། །ཡུལ་དབུས་སུ་ནི་ཤེས་བྱ་སྟེ། །ཕྱི་རོལ་མཐའ་འཁོབ་ཅེས་བྱར་ནི། །མཐའ་ཡས་མཁྱེན་པས་གསུངས་པ་ཡིན། །ཞེས་ས་ཚིགས་ཀྱིས་ཕྱེ་བ་སྟེ། ཆོས་ཚིགས་ཀྱིས་ཕྱེ་ན། ལུང་རྟོགས་ཀྱི་བསྟན་པ་གནས་པའི་ས་ཕྱོགས་ནི་དབུས་སོ། །ད་ཆོག་གི་སྒོ་ནས་སྡོམ་པ་ལེན་པའི་ཆོ་ག་ལ་གཉིས་ཏེ། དུས་ཁྲིམས་དང་། གཏན་ཁྲིམས་སོ། །དང་པོ་ནི། མཛོད་ལས། དམའ་བར་འདུག་སྨྲས་བཟླས་པ་ཡི། །མི་བརྒྱན་ནམ་ནི་ལངས་བར་དུ། །བསྙེན་གནས་ཡན་ལག་ཚང་བར་ནི། །ནངས་པར་གཞན་ལས་ནོད་པར་བྱ། །ཞེས་གསུངས་པ་ལྟར་རོ། །དེ་ལ་བྱེ་བྲག་ཏུ་སྨྲ་བ་ནི། ལེན་པ་པོ་གླིང་གསུམ་གྱི་སྐྱེས་པའམ་བུད་མེད་གང་རུང་གིས། བླང་ཡུལ་ལ་དགེ་སློང་ཁོ་ན་ལས་ལེན་པར་བཞེད། མདོ་སྡེ་པ། དུད་འགྲོའི་རྟེན་ལའང་སྐྱེ་བར་འདོད་ཅིང་། བླང་ཡུལ་ཡང་དགེ་བསྙེན་གསོ་སྦྱོང་ལ་གནས་པ་ཡན་ཆད་ལས་ལེན་པར་འདོད་དོ། །གཉིས་ཀ་དེ་རིང་ཉི་མ་མ་ཤར་གོང་དུ་བླངས་ནས། ཞག་ཕྱི་མའི་ཉི་མ་མ་ཤར་བར་དུ་བསྲུང་བར་བཞེད་པ་མཐུན་མོད། འོན་ཀྱང་དམིགས་བསལ་ལ། ཟླ་བ་བྱུང་ངོ་ཅོག་གི་ཉ་སྟོང་ཚེས་བརྒྱད་ལ་བསྲུང་བར་ཁས་བླངས་པའི་གང་ཟག་དེས་ཀྱང་ཕྱིས་གང་བསྲུང་བའི་དུས་དེ་དང་དེར་ལེན་དགོས་ནའང་། སྔར་སྟབས་གཅིག་ཏུ་བླངས་པའི་དགོས་པ་ནི། བྱེ་སྨྲ་ལྟར་ན་ཟས་ཟོས་རྗེས་བླངས་ཀྱང་སྐྱེ་བ་དང་། མདོ་སྡེ་པ་ལྟར་ན་རྟེན་གྱི་དྲུང་དུ། རང་ཉིད་ཀྱིས་བླངས་ཀྱང་སྐྱེ་བའི་དོན་དུ་འདོད་དོ། །གཉིས་པ་གཏན་ཁྲིམས་ལ། སྐྱེས་པའི་བསླབ་ཚིགས་གསུམ་ལེན་པའི་ཆོ་ག་དང་། དེ་བུད་མེད་ཀྱི་བསླབ་ཚིགས་ལྔ་ལ་ཇི་ལྟར་སྦྱོར་ཚུལ་ལོ། །དང་པོ་ལ་གཉིས་ཏེ། ཚིགས་སྔ་མའི་དང་། ཕྱི་མའི་ཆོ་གའོ། །དང་པོ་ནི། ཀརྨ་ཤ་ཏཾ་ལས། དྲི་དང་དགེ་བསྙེན་བསླབ་པ་དང་། །ཞུ་དང་མཁན་པོ་དང་པོ་དང་། །རབ་བྱུང་དགེ་ཚུལ་གྲིབ་ཚོད་དང་། །བསླབ་པ་བརྗོད་པ་ཐ་མ་ཡིན། །ཞེས་པ་སྟེ། ཐོག་མར་སྔོན་དང་ཞེས་འབྱུང་བས་སྔོན་ཆོག་བསྟན་ཀྱང་། སྔར་བཤད་ཚར་བས་འདིར་དྲི་དང་ཞེས་སྦྱར་རོ། །སྡོམ་གྱི་དོན་འཆད་པ་ལ། དགེ་བསྙེན་གྱི་དང་། དགེ་ཚུལ་གྱི་ཆོ་གའོ། །དང་པོ་ནི། རབ་བྱུང་གི་མཁན་པོ་ཉིད་དུ་ཕྱོགས་པའི་དགེ་སློང་དེས་རབ་ཏུ་དབྱུང་བར་རུང་མི་རུང་བརྟག་པའི་ཕྱིར་བར་ཆད་དྲིས་ནས། དག་གོ་ཟེར་ན། བསྒྲུབ་བྱ་དེ་བསྟན་པ་ལ་རིམ་གྱིས་གཞུག་པའི་ཕྱིར་དགེ་བསྙེན་ཉིད་དུ་བསྒྲུབ་པར་བྱ་སྟེ། མདོ་རྩར། སྐྱབས་སུ་འགྲོ་བ་ཁས་བླངས་པའི་ཚིག་རྩོམ་པ་དང་དགེ་བསྙེན་ཉིད་དུ་ཁས་བླང་བའི་ཚིག་བྱའོ། །དེའི་འོག་ཏུ་བསླབ་པ་བརྗོད་པ་ཁས་བླང་བའི་ཚུལ་གྱིས་བྱའོ། །ཞེས་སོ། །སྤྱིར་དགེ་བསྙེན་ནི། ཡུལ་དགེ་བསྙེན་ལས་ཀྱང་ལེན་དུ་རུང་བར་སྡོམ་པ་བརྒྱད་པར་བཤད་ཀྱང་། འདིར་རབ་བྱུང་གི་མཁན་པོའི་སྟ་གོན་ཉིད་དུ་གནས་པར་མ་ཟད། གཞི་ཐམས་ཅད་ཡོད་པར་སྨྲ་བའི་ལུགས་ཀྱིས་དགེ་སློང་ཉིད་ལས་ལེན་དགོས་པར་བཤད། དགེ་བསྙེན་གྱི་སྡོམ་པ་ལའང་སྣ་གཅིག་སྤྱོད་པ་སོགས་ཉི་ཚེ་བ་དང་། ཡོངས་རྫོགས་གཉིས་ལས། འདིར་ཕྱི་མ་སྟེ། རིགས་བརྒྱད་ཀྱིས་ཟླས་ཕྱེ་བའི་དགེ་བསྙེན་དུ་འགྱུར་བ་ལ། བསླབ་གཞི་ལྔ་འཛིན་པའི་ཡོངས་རྫོགས་དགེ་བསྙེན་ཉིད་བགྲང་དགོས་པའི་ཕྱིར་རོ། །

གཉིས་པ་དགེ་ཚུལ་ལ། སྦྱོར་དངོས་རྗེས་གསུམ་ལས། སྦྱོར་བ་ནི། བར་མ་རབ་བྱུང་གི་ཆོ་ག་སྟེ། མཁན་པོར་ཕྱོགས་པའི་དགེ་སློང་རང་ཉིད་ཀྱིས་བསྒྲུབ་བྱ་དེ་དགེ་བསྙེན་དུ་བསྒྲུབས་ཟིན་པའི་འོག་ཏུ། མི་བརྐུས་སོ་ཞེས་པའི་སྐུར་པ་སྤང་ཞིང་ངོ་ཚ་ཁྲེལ་ཡོད་ཀྱི་བསམ་པ་བསྐྱེད་པའི་ཕྱིར། དགེ་འདུན་ལ་རབ་ཏུ་བྱུང་བར་ཞུ་བ་བྱེད་པའི་དགེ་སློང་ལ་གཏད་ཅིང་། དེས་ཀྱང་ཡོངས་སུ་དག་གམ་ཞེས་དྲིས་པས། དག་ན་མཁན་པོ་མ་གཏོགས་པའི་དགེ་འདུན་ཐམས་ཅད་འདུས་པའམ། གནས་ཁང་སོ་སོར་འཁོད་པ་ལའང་རུང་། བསྒྲུབ་བྱ་དེ་ཁྲིད་ནས་ཞུ་བ་ཡིན་ལ། དགེ་འདུན་གྱིས་གནང་ན་སྔར་སྟ་གོན་དུ་གནས་པའི་དགེ་སློང་དེ་ལ་མཁན་པོར་གསོལ་བ་འདེབས་ཏེ། མཁན་པོ་དེ་རབ་བྱུང་གི་མེད་ན་མི་འབྱུང་བའི་རྒྱུ་ཡིན་པ་གང་ཞིག །གསོལ་བ་མ་བཏབ་ན་མཁན་པོར་མི་འགྱུར་བའི་ཕྱིར་རོ། །དེའི་འོག་ཏུ་ཆོས་འདི་པའི་བསམ་པ་བསྐྱེད་པའི་ཕྱིར་བརྗེ་བ་གསུམ་བྱ་སྟེ། མཁན་པོས་བསྐོས་པའི་དགེ་སློང་ཞིག་གིས་སྤྱིར་སྐྲ་དང་ཁ་སྤུ། བྱེ་བྲག་གཙུག་ཕུད་འབྲེག་ཏུ་འཇུག་ན་བྲེགས་ཏེ། ཁྲུས་བྱས། མཁན་པོས་ཡོ་བྱད་ལྔ་བྱིན་ནས། རང་ངམ་བསྐོས་པས་བསྐོན་ཞིང་མཚན་བརྟག །དེ་ནས་མིང་སྤོ་ཞིང་། རབ་བྱུང་གི་བསམ་པ་གསལ་བཏབ་ནས། མཁན་པོ་རང་ཉིད་ཀྱིས་བསྒྲུབ་བྱ་དེ་བར་མ་རབ་བྱུང་དུ་སྒྲུབ་སྟེ། སྐྱབས་སུ་འགྲོ་བ་རྩོམ་པས་རབ་ཏུ་བྱུང་བ་ཉེ་བར་བསྒྲུབ་པར་བྱའོ། །ཞེས་སོ། །དངོས་གཞི་ནི། མཁན་པོས་དགེ་ཚུལ་ཉིད་དུ་སྒྲུབ་པར་བྱེད་པའི་དགེ་སློང་ལ་གཏད། དེས་བསྒྲུབ་བྱ་དེ། འགལ་རྐྱེན་བར་ཆད་ཀྱི་ཆོས་བཞི་དང་བྲལ་ཞིང་། མཐུན་རྐྱེན་ལྔ་ཚང་བའི་སྒོ་ནས། སྐྱབས་འགྲོ་རྩོམ་བྱེད་དུ་བྱས་ཏེ་དགེ་ཚུལ་ཉིད་དུ་ཉེ་བར་བསྒྲུབ་པར་བྱ་སྟེ། དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་དགེ་སློང་ལ་གཏད་པར་བྱའོ། །ཅི་ཡོངས་སུ་དག་གམ་ཞེས་དྲིས་ནས། དག་ན་ཉེ་བར་བསྒྲུབ་པར་བྱའོ། །ཞེས་སོ། །རྗེས་ནི། དགེ་སློང་གཞན་ཞིག་གིས་གྲིབ་ཚོད་གཞལ་ཏེ་དགེ་ཚུལ་ཐོབ་པའི་དུས་གོ་བརྗོད་ཅིང་། སློབ་དཔོན་གྱིས་དགེ་ཚུལ་གྱི་བསླབ་གཞི་བཅུ་བརྗོད་པ་ཁས་བླང་དུ་གཞུག་གོ །

༈ གཉིས་པ་ཚིགས་ཕྱི་མ་དགེ་སློང་དུ་སྒྲུབ་པའི་ཆ་ོག་ནི། དང་པོར་བྱ་དང་མཁན་པོ་དང་། །ཆོས་གོས་གཉིས་དང་ལྷུང་བཟེད་གཉིས། །སྤྲོ་བྱ་གསོལ་བ་གསང་སྟོན་དང་། །ཞུ་དང་གསོལ་དང་གསོལ་བ་དང་། །དྲི་དང་ལས་དང་གྲིབ་ཚོད་དང་། །ཉིན་མཚན་དུས་ཚོད་གནས་རྣམས་དང་། །ལྟུང་དང་དགེ་སྦྱོང་མཆོག་འདོད་དང་། །ཚུལ་ཁྲིམས་མཉམ་དང་ཚུལ་འབྲེལ་དང་། །དུལ་དང་དགོས་དང་མ་བརྗོད་དང་། །གུས་པ་དང་ནི་བསྒྲུབ་བྱ་ལ། །མུ་སྟེགས་གནས་པ་སྦྱིན་པ་ཡི། །སྡེ་ཚན་ཡང་དག་བསྡུས་པ་ཡིན། །ཞེས་པའི་དོན་འཆད་པ་ལ། སྦྱོར་དངོས་རྗེས་གསུམ་གྱི། སྦྱོར་བ་ལ་དྲུག་ལས། དང་པོ་བསྒྲུབ་བྱ་དེ་ལོ་ཉི་ཤུ་ལོན། ཆོས་གོས་གསུམ་དང་ལྷུང་བཟེད་ཚང་། བསྙེན་པར་རྫོགས་པར་འདོད་ན། ཡོ་བྱད་རྣམས་ཚགས་སུ་བཅུག་ནས། དཀོན་མཆོག་གསུམ་དང་སློབ་དཔོན་མངོན་དུ་འགྱུར་བར་བྱ་བའི་ཕྱིར་དང་པོར་བྱ་བ་ནི། སྤྱིར་དཀོན་མཆོག་གསུམ་ལ། སྐྱབས་འགྲོའི་ཡུལ་དུ་གྱུར་པ་ནི། དོན་དམ་པའི་དཀོན་མཆོག་གསུམ་སྟེ། མཛོད་ལས། གང་ཞིག་གསུམ་ལ་སྐྱབས་འགྲོ་སྟེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་པ་ལ་ཡིད་ཆེས་ཀྱི་དད་པ་དང་ལྡན་པས། འདིར་གཙོ་ཆེ་བ་ནི། བརྡར་བཏགས་པའི་དཀོན་མཆོག་གསུམ་སྟེ། སངས་རྒྱས་སྟོན་པའི་སྐུ་གཟུགས། ཆོས་ལས་ཀྱི་ཆོ་ག་ནན་ཏན་བྱེད་པ་པོའི་རྒྱུད་ལ་བཞུགས་པ། དགེ་འདུན་སྤྱིར་བཏང་བཅུ་ཚོགས་སམ་ལྔ་ཚོགས། དམིགས་བསལ་ལ་བཞི་ཚོགས་ཀྱང་གསུངས། དེའི་གོ་དོན་མཁན་པོ་དང་གསང་སྟོན་མེད་མི་རུང་གི་ཡན་ལག་མ་ཡིན་ཏེ། མཁན་པོའི་བྱ་བ་རྣམས་དེར་གསོལ་བ་མ་བཏབ་པའི་དགེ་སློང་ཞིག་གིས་བསྒྲུབས་ཀྱང་འགྲུབ་པ་དང་། བར་ཆད་མ་དྲིས་ཀྱང་ཆོག་པའི་བསྒྲུབ་བྱ་སྲིད་པའི་ཕྱིར། དེ་ལྟར་ཡང་། མཁན་པོར་མ་གསོལ་བ་ལ་ཡང་ངོ་། །བར་ཆད་མ་དྲིས་པར་ཡང་ངོ་། །ཞེས་སོ། །དེས་ན་མཁན་པོར་འོས་པ་དེས། དགེ་འདུན་དང་། སློབ་དཔོན་ཁ་སྐོང་གི་ཆོས་དང་ལྡན་པའི་དགེ་སློང་གང་ཞིག །དགེ་འདུན་གྱི་དབུས་སུ་ལས་ཀྱི་ཆོ་ག་བརྡ་སྤྲོད་པ་ལ་མཁས་པའི་ལས་སློབ་དང་། འགྲོ་བ་བཞི་བྲལ་ལྐོག་ཏུ་བར་ཆད་དྲིས་ནས་ནང་དུ་འོང་བ་ཞུ་བ་ལ་མཁས་པའི་གསང་སྟོན་དུ་འོས་པ་གཉིས་ལ་ཚིག་གིས་གསོལ་བ་བཏབ། དེ་རྣམས་ཀྱིས་ཀྱང་རང་རྒྱུད་ལ་བརྟགས་ཏེ། ལྟུང་བ་ཡོད་ན་བཤགས་བསྡམས་བྱིན་བརླབས་བྱས་ནས་ལས་གྲལ་དུ་འདུས་པའོ། །གཉིས་པ་མཁན་པོ་མངོན་དུ་གྱུར་པ་ནི། སྤྱིར་བརྟན་མཁས་ཀྱི་ཡོན་ཏན་དང་ལྡན་ཞིང་། ཁྱད་པར་བསྒྲུབ་བྱའི་ངོས་ནས་མཐོང་ཐོས་དོགས་གསུམ་གྱི་སྐྱོན་མེད་པའི་དགེ་སློང་ལ་མཁན་པོར་གསོལ་བ་བཏབ་ཅིང་ཁས་བླངས་པའོ། །གསུམ་པ་ཡོ་བྱད་མངོན་གྱུར་ནི། མཁན་པོས་ཆོས་གོས་གསུམ་བྱིན་གྱིས་བརླབས་ནས་གནང་བའམ། དྲུབས་ཟིན་མེད་ན་རྒྱུར་རུང་བ་བྱིན་གྱིས་བརླབས་ནས་གནང་བ་སྟེ། ཆོས་གོས་གཉིས་དང་། ལྷུང་བཟེད་དགེ་འདུན་ལ་བསྟན་པ་དང་མཁན་པོས་བྱིན་གྱིས་བརླབས་ནས་གནང་བ་སྟེ་ལྷུང་བཟེད་གཉིས་སོ། །བཞི་པ་ཡོངས་སུ་དག་པ་མངོན་དུ་གྱུར་པ་ནི། ལས་སློབ་ཏུ་ཕྱོགས་པའི་དགེ་སློང་དེས་ཐོག་མར་འཁྲུལ་བཅས་དང་མ་འདུས་པའི་ཉེས་པ་ཁེགས་པའི་ཕྱིར་ལྟུང་མཐུན་བྱིན་བརླབས་དང་། གནས་ལ་བློ་མཐུན་སྔོན་དུ་འགྲོ་བས། གསང་སྟོན་གང་ཡིན་དྲིས་ནས། སྤྲོ་བ་དྲི། དེ་སྤྲོ་ན་གསོལ་བ་འབའ་ཞིག་པའི་ལས་ཀྱིས་གསང་སྟོན་དུ་བསྐོ། བསྐོས་པ་དེས་ཀྱང་བར་ཆད་ཡོད་མེད་བདེན་པར་སྨྲ་བའི་ཕྱིར་དགེ་འདུན་གྱི་ལྐོག་ཏུ་བར་ཆད་དྲི་ཞིང་། བསྒྲུབ་བྱ་བར་ཆད་ཀྱིས་དག་ཚུལ་དགེ་འདུན་ལ་བརྗོད་ནས་ནང་དུ་འོང་བར་ཞུ་བའོ། །ལྔ་པ་གསོལ་བ་མངོན་དུ་གྱུར་པ་ནི། སྟོད་འདུལ་བ་རྣམས་བརྗོད་པ་གསུམ་གྱི་ཐོག་མར་བྱུང་བའི་གསོལ་བ་ལ་འཆད་པ་ནི་མི་རིགས་ཏེ། ལས་མངོན་དུ་གྱུར་པའི་ཚད་གསོལ་བཞིའི་ལས་ལ་འཆད་དགོས་པས་གནོད་པའི་ཕྱིར་རོ། །དེས་ན་སྨད་འདུལ་བ་ལྟར་གསོལ་བ་འདེབས་པའི་ཚིག་ལན་གསུམ་བརྗོད་པའོ། །འདིར་གང་ལ་གསོལ་བ་འདེབས་པའི་ཡུལ་ནི། མཚན་ཉིད་གསུམ་དང་ལྡན་པའི་དགེ་འདུན་ཏེ་གྲངས་ཚང་བ། འགྲེང་ཡུལ་འདུན་སོགས་ཕུལ་བ་མིན། །མ་རྫོགས་ཉམས་དང་མཚམས་མེད་མིན། །སྡིག་ས་ཐ་དད་འཁྲུལ་བཅས་མིན། །མཚམས་མཚན་དཀོན་མཆོག་གཞན་མིན་པའོ། །ཞེས་ཁ་སྐོང་གི་ཆོས་དང་ལྡན་པ། མ་འདུས་པ་དང་འདུས་པ་ཕྱིར་ལོག་གི་མི་མཐུན་པ་གཉིས་དང་བྲལ་བའོ། །གང་གིས་འདེབས་པ་པོ་ནི། བསྙེན་པར་རྫོགས་འདོད་མངོན་དུ་གྱུར་པ་ཞེས་བསྒྲུབ་བྱ་སྟེ། བསམ་པ་ཐག་པ་ནས་ནོད་པར་འདོད་པ། ངེས་འབྱུང་གི་བསམ་པ་བརྟན་པ། དོན་གོ་ཞིང་ངེས་པ་ལྔ་དང་བྲལ་བ། རྒྱུད་ཚོགས་སུ་མ་ཚང་བ་ཞིག་དགོས་སོ། །དྲུག་པ་ཡོངས་སུ་དག་པར་དགེ་འདུན་ཐུགས་ཡིད་ཆེས་པར་བྱ་བའི་ཕྱིར་ནང་དུ་བར་ཆད་དྲི་བ་ནི། ལས་སློབ་ཏུ་ཕྱོགས་པས་གསོལ་བ་འབའ་ཞིག་པའི་ལས་སྔོན་དུ་འགྲོ་བས་དགེ་འདུན་གྱི་དབུས་སུ་བར་ཆད་དྲི་བའོ། །དེ་ཡང་ཡུལ་རྟེན་གཉིས་ཀའི་ངོས་ནས་བར་ཆད་དང་མི་ལྡན་པར་ཤེས་པ་ཙམ་གྱིས་ཆོག་གི །དོན་ལ་བར་ཆད་དང་མི་ལྡན་པར་དགོས་པའི་ཁྱབ་པ་མེད་དེ། ལོ་ཉི་ཤུ་མ་ལོན་པ་ལ་ལོན་པར་འདུ་ཤེས་པ་བཞིན། གཉིས་པ་དངོས་གཞི་ནི། ལས་མངོན་དུ་གྱུར་པ་སྟེ། ལས་སློབ་ཏུ་ཕྱོགས་པའི་དགེ་སློང་དེས་བསྒྲུབ་བྱ་ལ། སངས་རྒྱས་ཆོས་དང་དགེ་འདུན་དང་། །མཁན་པོ་སློབ་དཔོན་བསྙེན་རྫོགས་འདོད། །ཡོ་བྱད་ཡོངས་སུ་དག་པ་དང་། །གསོལ་དང་ལས་ནི་མངོན་སུམ་མོ། །ཞེས་བསྡུས་པའི་དོན་ལྟར་གདམས་ངག་གི་བཤད་པ་རྒྱས་བསྡུས་ཅི་རིགས་ཀྱིས་བརྡའ་སྤྲད་ནས། ཆད་ལྷག་ནོར་འཁྲུགས་མེད་པའི་ཆོ་ག་རྣམ་པར་དག་པས་གསོལ་བཞིའི་ལས་བྱས་ཤིང་ཆགས་པའི་སྒོ་ནས་དགེ་འདུན་ལས་བསྙེན་པར་རྫོགས་པའོ། །དེ་ཡང་གཞི་ཐམས་ཅད་ཡོད་པར་སྨྲ་བའི་ལུགས་ལ། མངོན་དུ་གྱུར་པ་བཅུས། རྒྱུའི་རྐྱེན་རང་རྒྱུད་ཀྱི་འབྱུང་བ་བཞི། བདག་རྐྱེན་གཞན་གྱི་རྣམ་རིག །བྱེད་རྒྱུ། ལྷན་ཅིག་འབྱུང་བའི་རྒྱུ། སྐལ་མཉམ་གྱི་རྒྱུ་གསུམ་གྱིས་དགེ་སློང་གི་སྡོམ་པ་རིག་བྱེད་མ་ཡིན་པའི་གཟུགས་ཀྱི་ངོ་བོར་སྐྱེ་བར་འདོད། མདོ་སྡེ་པ་ཡན་ཆད། ངེས་འབྱུང་གི་བསམ་པས་ཉེར་ལེན་གྱི་རྒྱུ་དང་། མངོན་གྱུར་བཅུས་ལྷན་ཅིག་བྱེད་རྐྱེན་བྱས་ཏེ་སྡོམ་པ་སེམས་པའི་ངོ་བོར་སྐྱེ་བར་འདོད་དོ། །གསུམ་པ་རྗེས་ལ་གཉིས་ལས། དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་དུས་གོ་ནི། དུས་འགྱུར་སྐྱེེན་པས་ཕྲ་རིམ་ནས་གཞལ་དགོས་ཏེ། ཐུར་མ་སོར་བཞི་པས་གྲིབ་ཚོད་གཞལ། ཉིན་མཚན་གྱི་ཆ་ཉི་ཤུ་རྩ་གཉིས་དང་། དུས་ཚོད་རྣམས་ངེས་པར་བྱས་ལ་བརྗོད་དོ། །དུས་ཚོད་ནི། འཇིག་རྟེན་གྱི་གྲགས་པ་ལྟར་ན་བཞི་སྟེ། དགུན། དཔྱིད། དབྱར། སྟོན་བཞི་རེ་རེ་ལ་ར་འབྲིང་ཐ་གསུམ་དུ་ཕྱེ་བའོ། །ཕྱག་དར་ཁྲོད་ཀྱི་གོས་ངོས་བཟུང་བའི་ཆེད་དུ་དགུན། དཔྱིད། དབྱར་གསུམ་དུ་ཕྱེ་སྟེ། རེ་རེ་ལ་ཟླ་བ་བཞི་བཞིའོ། །འདི་ལའང་དབྱར་ལ་གསུམ་དུ་ཕྱེ་ན་དུས་ཚིགས་ལྔར་འགྱུར་ཏེ། དབྱར་ཙམ་གྱི་དུས་ཟླ་བ་གཅིག །དབྱར་ཐུང་ངུ་ཉིན་ཞག་གཅིག །དབྱར་རིང་པོ་ཉིན་ཞག་གཅིག་གིས་མ་ཚང་བའི་ཟླ་བ་གསུམ་མོ། །དགོས་པ་ནི། དབྱར་ཕྱི་མ་ཁས་ལེན་གྱི་དུས་རྟོགས་བྱེད་དེ། དབྱར་ཐུང་ངུའི་ཉིན་ཞག་གཅིག་པོ་དེ་ལ་ཁས་མ་བླངས་ན་གཞན་ལ་བླང་དུ་མེད་པའི་ཕྱིར་རོ། །ཡང་གསོ་སྦྱོང་ཞག་མི་ཐུབ་ཀྱི་དུས་ངོ་ཤེས་པའི་ཆེད་དུ། དགུན་དཔྱིད་དབྱར་གསུམ་པོ་རེ་རེ་ལ་གཉིས་གཉིས་སུ་ཕྱེ་ནས་དྲུག་ཏུ་བཤད་དེ། དུས་ཚིགས་རེ་ལ་ཟླ་བ་གཉིས་གཉིས་ཡོད་པའི་ཕྱེད་དང་གཉིས་འདས། ཕྱེད་ལུས་པ་ན་ཞག་མི་ཐུབ་འདོར་བས་གསོ་སྦྱོང་བཅུ་བཞི་པ་གོ་ནུས་པའི་ཕྱིར་རོ། །འོ་ན་དུས་ཚིགས་ཀྱི་འགོ་གང་ནས་འཛིན་ཞེ་ན། རྒྱལ་སྲས་མ་ལས། སངས་རྒྱས་པ་རྣམས་ཀྱི་དུས་ཀྱི་དང་པོ་ནི་དགུན་དག་ཡིན་ལ། ཟླ་བ་ཐམས་ཅད་ཀྱི་མར་གྱི་ངོ་སྔ་སྟེ། ཞེས་པས་མར་ངོ་སྔོན་འགྲོའི་དགུན་ནས་འགོ་འཛིན་ཅིང་། དགུན་གྱི་དང་པོ་ནི། སྟོན་ཟླ་ཐ་ཆུང་རྫོགས་པའི་ཕྱི་དེ་མ་ཐག་པ་ཡིན་ལ། སྟོན་ཟླ་ཐ་ཆུང་གང་ལ་ངོས་འཛིན་ན། ཉི་སྙིང་ལས། བདག་གིས་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །འདིར་ནི་རབ་ཏུ་བརྗོད་པ་ཡིན། །ཞེས་པས་ཧོར་ཟླ་བཅུ་པ་སྨིན་དྲུག་གི་ཕྱེད་ཕྱི་མ་ནས་དུས་འགོ་འཛིན་ནོ། །དེ་ཡང་སྐབས་འདིར་དུས་ཚིགས་ལ་ལྔར་ཕྱེ་བ་ཉིད་བཟུང་ལ། བརྗོད་པའི་ཚེ་བསྒྲུབ་བྱའི་བློ་ཡུལ་དུ་འཆར་བདེ་བའི་ཕྱིར་ལོ་དང་། ཟླ་བ་དང་། ངོ་དང་། ཞག་དང་། ཉིན་མཚན་གྱི་ཆ་དང་། ཉིན་མོ་ཡིན་ན་གྲིབ་ཚོད་འདི་ཙམ་གྱི་དུས་སུ་ཞེས་རགས་རིམ་ནས་བརྗོད་དེ་གོ་བར་བྱའོ། །

གཉིས་པ་ཐོབ་པ་མི་ཉམས་ཤིང་འཕེལ་བར་བྱ་བའི་ཕྱིར་གདམས་ངག་བཅུ་གཅིག་བརྗོད་པ་ལ། བསླབ་བྱ་ཡུལ་དང་། སློབ་བྱེད་ཡུལ་ཅན་ལ་གདམས་པ་གཉིས། དང་པོ་ལ། བསླབ་བྱའི་གཙོ་བོ་དངོས་སུ་བརྗོད་པ་དང་། མ་བརྗོད་པ་ཡོངས་སུ་ཤེས་པའི་ཐབས་ལ་གདམས་པའོ། །དང་པོ་ལ་རྣམ་དག་རྣམ་པ་བཞི་སྟེ། རྟེན་ས་འཚོ་བ་རྣམ་དག་གནས་བཞི་ལ་བརྟེན་པར། བསྲུང་བྱ་ཚུལ་ཁྲིམས་རྣམ་དག་རྩ་བའི་ལྟུང་བ་ཆ་བཅས་སྤོང་བར། ཉམས་ལེན་སྤྱོད་པ་རྣམ་དག་ལ། དགེ་སྦྱོང་གི་ཆོས་ལ་བརྟེན་པར། མཆོག་ཏུ་འདོད་པའི་དོན་གྲུབ་པར། གནས་བརྟན་རྣམས་དང་ཚུལ་ཁྲིམས་མཉམ་པར། འཇིག་རྟེན་གྱི་ཕ་བུའི་ཚུལ་དང་འབྲེལ་བར་མཁན་སློབ་ལ་གུས་པར། གྲོགས་ལ་སེམས་དུལ་བས་གུས་པ་དང་ལྔར་གདམས་པ་དང་། རྟོགས་དོན་ལྟ་བ་རྣམ་དག་རང་གི་དགོས་པ་རྗེས་སུ་སྒྲུབ་པ་ལུང་རྟོགས་ཀྱི་ཡོན་ཏན་དང་ལྡན་པར་གདམས་པ། གཉིས་པ་འདིར་མ་བརྗོད་པ་སླད་ནས་ཤེས་པར་གདམས་པ་རྣམས་སོ། །གཉིས་པ་ཡུལ་ཅན་ནི། བསླབ་པ་ལ་གུས་པར་སྦྱར་བ་དང་། གུས་པ་བསྐྱེད་དེ་སློབ་པའི་ཐབས་བག་ཡོད་ལ་སྦྱར་བའོ། །འདིར་སྡོམས་སུ། མུ་སྟེགས་གནས་པ་སྦྱིན་པ་ཞེས་པ་ནི། ཤཱཀྱ་དང་མུ་སྟེགས་རལ་པ་ཅན་ལས་གཞན་པའི་མུ་སྟེགས་ཅན་ལ་སེམས་མགུ་བ་བརྟག་པའི་ཆེད་དུ་ཟླ་བ་བཞིར་གནས་པ་སྦྱིན་པའི་གསོལ་བཞིའི་ལས་ཏེ། སྦྱོར་ཆོག་གི་སྤྲོས་པའོ། །

གཉིས་པ་ནི། དགེ་བསྙེན་མ་དང་དགེ་ཚུལ་མར་སྒྲུབ་པའི་ཆོ་ག་ནི། སྒྲུབ་བྱེད་དགེ་སློང་གི་ཚབ་ཏུ་དགེ་སློང་མ་དང་། བསྒྲུབ་བྱ་སྐྱེས་པའི་ཚབ་ཏུ་བུད་མེད་ཅེས་སྦྱར་བ་མ་གཏོགས་ཕ་ཆོག་དང་འདྲ་ཞིང་། དེ་རྗེས་ཁྱིམ་སོ་མ་བཟུང་ན་ལོ་བཅོ་བརྒྱད་མ་དང་། བཟུང་ན་ལོ་བཅུ་ལོན་པའི་བསྒྲུབ་བྱ་མོ་ལ། ཡུལ་དབུས་མཐའི་ཁྱད་པར་ལས། དགེ་སློང་མའི་དགེ་འདུན་བཅུ་གཉིས་དང་དྲུག་ཚོགས་ཀྱིས་གསོལ་བ་དང་གཉིས་ཀྱི་ལས་ཀྱིས་དགེ་སློབ་མའི་སྡོམ་པ་སྦྱིན། དེ་ནས་དགེ་སློང་མར་སྒྲུབ་པ་ལ་སྦྱོར་དངོས་རྗེས་གསུམ་ལས། སྦྱོར་བ་ནི། བསྒྲུབ་བྱ་མོ་ཁྱིམ་སོ་བཟུང་མ་བཟུང་གི་ཁྱད་པར་ལས་ལོ་བཅུ་གཉིས་དང་ཉི་ཤུ་ལོན་པ་ལ། དགེ་སློང་མའི་དགེ་འདུན་བཅུ་གཉིས་སམ་དྲུག་གི་ཚོགས་ཀྱི་དབུས་སུ་མཁན་མོར་ཕྱོགས་པ་དེས་རྔུལ་གཟན་དང་ཤིང་ང་དཔུང་ཆད་གཉིས་བསྣན་ཏེ་ཆོས་གོས་ལྔ་སོགས་རྟགས་སྦྱིན། སློབ་དཔོན་མ་གཉིས་བསྐོས་ཏེ། གསང་སྟོན་མས་བར་ཆད་དྲིས་པའི་རྗེས་སུ་བསྒྲུབ་བྱས་ཚངས་སྤྱོད་ལ་ཉེར་གནས་ཀྱི་སྡོམ་པ་ནོད་པའི་ཆེད་དུ་གསོལ་བ་བཏབ་ཅིང་། དེ་སྒྲུབ་བྱེད་ཀྱི་ལས་སློབ་མས་བར་ཆད་མངོན་དུ་དྲིས་ནས་གསོལ་བ་དང་གཉིས་ཀྱི་ལས་ཀྱིས་ཚངས་སྤྱོད་ལ་ཉེར་གནས་ཀྱི་སྡོམ་པ་སྦྱིན། དེ་ནས་དངོས་གཞི་ནི། དབུས་མཐའི་ཁྱད་པར་གྱིས་དགེ་སློང་ཕའི་དགེ་འདུན་བཅུའམ་ལྔའི་ཚོགས་བསྣན་ནས། གཉིས་ཀའི་དགེ་འདུན་ལ་གསོལ་བ་བཏབ་ལ། ལས་སློབ་ཏུ་ཕྱོགས་པའི་དགེ་སློང་དེས་གསོལ་བཞིའི་ལས་ཀྱིས་དགེ་སློང་མའི་སྡོམ་པ་སྦྱིན་ནོ། །རྗེས་ནི་གཞན་འདྲ་བ་ལས། གདམས་ངག་གི་སྐབས་སུ་གནས་ཤིང་དྲུང་མི་བརྗོད། ལྟུང་བའི་སྐབས་སུ་ཐུན་མོང་མ་ཡིན་པའི་ཕམ་བཞི་བསྣན་ནས་ཕམ་པ་བརྒྱད་དང་། ལྕི་བའི་ཆོས་བརྒྱད་རྗོད་པར་བྱེད་པའོ། །འོ་ན་དགེ་ཚུལ་མ་དང་དགེ་སློང་མའི་བར་དུ་ཐུན་མོང་མིན་པའི་བསླབ་ཚིགས་གཉིས་མེད་པར་ཕའི་དགེ་འདུན་ཙམ་ལ་བརྟེན་ནས་དགེ་སློང་མའི་སྡོམ་པ་སྐྱེ་བ་ཡོད་དམ་ཞེ་ན། སྐྱེ་ལ་ཉེས་བྱས་ཀྱི་དབང་དུ་བྱས་ན་སྐྱེ་བ་ཡོད་དེ། ཚིགས་སྔ་མ་མེད་པ་ལ་ཉེས་བྱས་ཙམ་དུ་ཟད་པའི་ཕྱིར་དང་། དགེ་སློང་དང་དགེ་སློང་མ་ཉིད་དག་གི་ལས་གཞན་བྱེད་པས་ན་མི་ཆགས་པ་མ་ཡིན་ནོ། །ཞེས་བཤད་པས་སོ། །སྤྱིའི་དོན་བཤད་ཟིན་ཏོ། །

གཉིས་པ་གཞུང་གི་དོན་ནི། ད་ལྟའི་ཆོ་ག་ངེས་པ་ལྔ་བྲལ་ཞིང་། །མ་ནིང་ལ་སོགས་སྐྱེ་བའི་བར་ཆད་དང་། །རྒྱལ་པོས་མ་གནང་ལ་སོགས་གནས་པ་དང་། །བྱ་རོག་སྐྲོད་མི་ནུས་སོགས་ཁྱད་པར་དང་། །སྐྲ་སེར་ཅན་སོགས་མཛེས་པའི་བར་ཆད་མེད། །ངེས་འབྱུང་བློ་ཅན་སྐལ་བཟང་སྐྱེས་བུ་དེ། །ལེགས་གསུང་འདུལ་བ་རྒྱ་མཚོ་མཐའ་དག་དང་། །བརྒྱ་རྩ་གཅིག་པའི་ལས་ཕྲན་ལ་བྱང་བའི། །མཁན་པོར་བཅས་པས་རིམ་བཞིན་བསྙེན་པར་རྫོགས། །སྔ་མ་མ་བྱས་རྫོགས་པའང་མདོ་སྡེར་སྣང་། །ཐོབ་མཚམས་བརྗོད་པ་གསུམ་གྱི་ཐ་མར་འདོད། །ཅེས་པ་སྟེ། ད་ལྟར་གྱི་ཆོ་གས་རབ་ཏུ་བྱུང་བའི་ཚིགས་སྔ་ཕྱི་ལེན་པ་ལ། འགལ་རྐྱེན་སྤང་ཞིང་མཐུན་རྐྱེན་ཚང་དགོས་པར་བསྟན་པ། ཚིགས་གསུམ་རིམ་པར་ནོད་མི་ནོད་ཀྱི་ཁྱད་པར། སྡོམ་པའི་ཐོབ་མཚམས་ངོས་བཟུང་བའོ། །དང་པོ། སྡོམ་པ་ལེན་པའི་ཚེ་རང་རང་གི་བསླབ་བྱ་ལ་ལྟོས་ནས་ངེས་པ་ལྔ་བྲལ་དགེ་སློང་ལ་དངོས་དང་། དགེ་ཚུལ་ལའང་ཆ་འདྲ་ཞིག་དགོས་ཏེ། མཐུན་རྐྱེན་ཚང་བའི་ཡུལ་འདིར་བསྲུང་གི་གཞན་དུ་བསྲུང་མི་ནུས་སྙམ་པ་ལྟ་བུ་ཡུལ། ལོའམ་ཟླ་བ་གཅིག་ཙམ་དུ་སྤོང་གི་དེ་ཕན་ཆད་བསྲུང་མི་ནུས་སྙམ་པ་ལྟ་བུ་དུས། འཐབ་རྩོད་ཀྱི་སྐབས་མ་གཏོགས་གཞན་དུ་བསྲུང་སྙམ་པ་ལྟ་བུ་ཚེ། དགྲ་མ་གཏོགས་པ་གཞན་གྱི་སྲོག་མི་གཅོད་སྙམ་པ་ལྟ་བུ་སེམས་ཅན། བསླབ་བྱ་རགས་པ་འགའ་ཞིག་ལས་ཕྲ་བ་རྣམས་བསྲུང་མི་ནུས་སྙམ་པ་ལྟ་བུ་ཡན་ལག་ངེས་པ་སྟེ། ཡན་ལག་རྒྱུ་ལ་དབྱེ་བ་ཡོད། །ཅེས་དགེ་ཚུལ་ལ་ཡན་ལག་ངེས་པར་མ་བཤད་པས་ངེས་པ་ལྔ་བྲལ་ཆ་འདྲ་ཞེས་བྱའོ། །དེར་མ་ཟད་འགལ་རྐྱེན་བར་ཆད་གྱི་ཆོས་དང་བྲལ་བ་ཞིག་དགོས་ཏེ། མ་ནིང་དང་མཚམས་མེད་བྱས་པ་སོགས་ནི་སྐྱེ་བའི་བར་ཆད་དེ། དེ་དག་ལ་སྡོམ་པ་ཕོག་ཀྱང་མི་སྐྱེ་བའི་ཕྱིར། རྒྱལ་པོ་དང་ཕ་མས་མ་གནང་བ་སོགས་གནས་པའི་བར་ཆད་དེ། དེ་དག་ལ་སྡོམ་པ་སྐྱེས་སུ་ཟིན་ཀྱང་རང་དབང་དུ་མ་གྱུར་པས་འབབ་དགོས་པ་སོགས་ཀྱིས་ཡུན་རིང་མི་གནས་པའི་ཕྱིར། བྱ་རོག་སྐྲོད་མི་ནུས་པའམ་ནད་དང་སྡུག་བསྔལ་གྱིས་གཟིར་བ་སོགས་ཁྱད་པར་དུ་འགྱུར་བའི་བར་ཆད་དེ། སྡོམ་པ་གནས་ཀྱང་བསླབ་པ་ལ་སྦྱོར་མི་བཟོད་པས་ཡོན་ཏན་ཁྱད་པར་དུ་འཕགས་མི་ནུས་པའི་ཕྱིར། སྐྲ་སེར་ཅན་དང་ལག་རྡུམ་སོགས་ལུས་ལ་སྐྱོན་ཆགས་པ་དང་གདོལ་པ་སོགས་རིགས་ལ་སྐྱོན་ཆགས་པ་རྣམས་རྟེན་མཛེས་པའི་བར་ཆད་དེ། དེ་དག་ལ་སྡོམ་པ་སྐྱེ་བས་བསྒྲུབ་བྱ་ལ་ཕན་པར་འགྱུར་ནའང་ཁྱིམ་པ་རྣམས་བསྟན་པ་ལ་མ་དད་པའི་རྒྱུ་བྱེད་པའི་ཕྱིར། དེས་ན་དེ་བཞི་དང་བྲལ་བས་རྒྱུད་དག་པ་ཞིག་དགོས་ཏེ། དང་པོ་ལ་མི་སྐྱེ་བ་དང་། གཉིས་པ་ལ་མི་གནས་པས་བསྒྲུབ་བྱར་ཕན་མི་ཐོགས་ཤིང་། ཕྱི་མ་གཉིས་ལ་སྐྱེ་བ་དང་གནས་པའི་སྒོ་ནས་བསྒྲུབ་བྱར་ཕན་པས་འབོགས་རིགས་ནའང་། སྒྲུབ་པར་བྱེད་པ་པོ་ལ་བཅས་འགལ་གྱི་ཉེས་པ་ཅུང་ཟད་འབྱུང་བའི་ཕྱིར་རོ། །དེ་ལྟར་དགག་ཕྱོགས་ནས་ངེས་པ་ལྔ་དང་བྲལ་ཞིང་བར་ཆད་བཞི་མེད་ལ། སྒྲུབ་ཕྱོགས་ནས་སྔར་བཤད་པའི་མཐུན་རྐྱེན་ཐམས་ཅད་ཚོགས་ཤིང་། ཁྱད་པར་མྱང་འདས་གསུམ་གང་རུང་ཐོབ་འདོད་ཀྱི་ངེས་འབྱུང་གི་བསམ་པས་ཟིན་པ་ཞིག་དགོས་ཏེ། གཞན་དུ་ན་འཇིགས་སྐྱོབ་དང་ལེགས་སྨོན་ཙམ་དུ་ཟད་པའི་ཕྱིར་རོ། །དེས་ན་འགལ་རྐྱེན་སྤངས་ཤིང་མཐུན་རྐྱེན་ཚང་བའི་བསྒྲུབ་བྱ་སྐལ་པ་ཅན་དེ་ཉིད་དགེ་སློང་དུ་སྒྲུབ་པར་བྱེད་པ་ལ། སྒྲུབ་བྱེད་མཁས་བཙུན་གྱི་ཡོན་ཏན་དང་ལྡན་པ་ཞིག་དགོས་ཏེ། དེ་ལ་བཙུན་པའི་ཡོན་ཏན་ལས་གྲལ་དུ་འདུས་པའི་དགེ་འདུན་ཐམས་ཅད་རང་རྒྱུད་ལ་ཉེས་པ་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་དང་ལྡན་པ་ཞིག་དགོས་ལ། དེའི་ཡན་ལག་ལས་ལ་འདུ་བའི་སྔོན་དུ། ཐུན་མོང་མ་ཡིན་པའི་ལྟུང་བ་རྣམས་བཤགས་པར་བྱ་ཞིང་། ཐུན་མོང་པ་རྣམས་ལ་བྱིན་བརླབས་དང་། བཤགས་ཡུལ་དུ་འོས་པ་ཡོད་ཀྱང་། བཤགས་བྱ་ལ་ལྟོས་པའི་གྲངས་མ་ལོངས་པ་དང་། ཆད་ལས་སྔོན་དུ་འགྲོ་དགོས་པའི་རིགས་རྣམས་ལས་ལ་འདུ་བའི་གོང་དུ་བཤགས་ཆོག་མི་ཚར་བ་སོགས་ཀྱིས་མ་གྲུབ་པ་རྣམས་བྱིན་གྱིས་རློབ་པ་སོགས་གང་ལ་གང་འོས་ཀྱིས་ཕྱིར་བཅོས་པའི་སྒོ་ནས་དག་པར་བྱས་པའོ། །མཁས་པའི་ཡོན་ཏན་སྤྱིར་སྡེ་སྣོད་གསུམ་དང་། ཁྱད་པར་འདུལ་བ་ལ་མཁས་པ། དེའི་ནང་ནས་ཀྱང་ལས་བྱེད་པ་ལ་འདུལ་བ་འཛིན་པ་ཞེས་གསུངས་ཏེ། དེའི་ཚད་འདུལ་བའི་དོན་ཤེས་པས་ཆོག་པ་མ་ཡིན་གྱི། ལས་བརྒྱ་རྩ་གཅིག་ལས་ཕྲན་སོ་སོ་དང་བཅས་པའི་སྔགས་ཀྱི་ཆོ་ག་དེ་ཉིད་བཟུང་ནས་ཚིག་ཕྱེད་ཀྱང་མ་འཁྲུལ་བར་ཁ་ཏོན་དུ་བྱ་ནུས་པ་ཞིག་དགོས་པ་ཡིན་ནོ། །དེ་ལྟར་སྔགས་ཚིག་དང་ལག་ལེན་ལ་བྱང་བའི་མཁན་སློབ་དགེ་འདུན་དང་བཅས་པ་མཚན་ཉིད་ཚང་བར་ཚོགས་པའོ། །

གཉིས་པ་ནི། ཉེས་མེད་ཕུན་ཚོགས་ཀྱི་དབང་དུ་བྱས་ན། ཚིགས་གསུམ་རིམ་བཞིན་བླང་བའི་སྒོ་ནས་བསྙེན་པར་རྫོགས་པ་བྱ་དགོས་ཏེ། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ། །ཞེས་གསུངས་པའི་ཕྱིར། གལ་ཏེ་ཚིགས་སྔ་མ་གཉིས་སྔོན་དུ་མ་བྱས་ནའང་བསྙེན་རྫོགས་ཀྱི་སྡོམ་པ་མི་སྐྱེ་བ་མ་ཡིན་ཏེ། ལུང་ལས། ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱིའམ་མ་རྫོགས་ཞེས་བགྱི། ཉེ་བ་འཁོར་བསྙེན་པར་རྫོགས་ཞེས་བྱའོ། །ཞེས་གསུངས་པའི་ཕྱིར། འོན་ཀྱང་འབོགས་བྱེད་མཁན་སློབ་དགེ་འདུན་དང་བཅས་པ་ལ་བཅས་འགལ་གྱི་ཉེས་པ་འབྱུང་བས། སྐྱེ་ལ་ཉེས་བྱས་ཀྱི་དབང་དུ་བྱས་པ་སྟེ། ཚིགས་སྔ་མ་མེད་པ་ལ་ཉེས་བྱས་ཙམ་དུ་ཟད་དོ། །ཞེས་སོ། །གཞན་དུ་མདོ་སྡེ་ལས་ཚིགས་ཕྱི་མ་བླངས་པས་སྔ་མ་ཞར་ལ་ཐོབ་ཀྱིས་ཆེད་དུ་བླང་མི་དགོས་པའང་གནང་སྟེ། དྲིན་ལན་གསབ་པའི་མདོ་ལས། མ་འགགས་པས་ཡང་གསོལ་པ། གལ་ཏེ་ཁྱིམ་པ་ཁྲིམས་ལྔ་མ་ནོས་པར་ཐལ་བྱུང་དུ་ཁྲིམས་བཅུ་ནོས་ན་ཁྲིམས་ཐོབ་པར་འགྱུར་རམ། བཀའ་སྩལ་པ། དུས་གཅིག་ཏུ་དགེ་བསྙེན་གྱི་ཁྲིམས་དང་། དགེ་སྦྱོང་གི་ཁྲིམས་རྣམ་པ་གཉིས་ཐོབ་བོ། །གལ་ཏེ་ཁྲིམས་ལྔ་ཡང་མ་ནོས། ཁྲིམས་བཅུ་ཡང་མ་ནོས་པར་ཐལ་བྱུང་དུ་ཁྲིམས་རྫོགས་པར་ནོས་ནའང་། དུས་གཅིག་ཏུ་ཁྲིམས་གསུམ་ཆར་ཐོབ་པར་འགྱུར་རོ། །ཞེས་གསུངས་པའི་ཕྱིར།

གསུམ་པ་ནི། ཚིགས་སྔ་མ་གཉིས་ལ་སྔགས་ཚིག་ལན་གསུམ་བཟླས་པའི་ཐ་མར། སྐྱབས་བརྗོད། བདག་བརྗོད། གཞན་བརྗོད་གསུམ་གྱི། བདག་བརྗོད་རྫོགས་པ་དགེ་བསྙེན་དུའམ། དགེ་ཚུལ་དུ་ཞེས་རྫོགས་མ་ཐག །དེ་དང་དེའི་སྡོམ་པ་སྐྱེ་ཞིང་། ཚིགས་ཕྱི་མ་དགེ་སློང་ནི། དགེ་འདུན་གྱིས་གསོལ་བཞིའི་ལས་ཉམས་སུ་མྱོང་བ་ལ་རག་ལས་པས་ན། ལས་བརྗོད་པ་གསུམ་པ་ལ། མཆི་སྟེ་ཡན་ཆད་ངོ་བོ་བརྗོད་པ་སྟེ། སྡོམ་པའི་རྒྱུ་རྐྱེན་ཚང་བས་བསྙེན་པར་རྫོགས་རིགས་པའི་ངོ་བོ་བརྗོད་པའི་ཕྱིར། གསོལ་ན་ཞེས་པ་ཡན་ཆད་བྱ་བ་བརྗོད་པ་སྟེ། བསྙེན་པར་རྫོགས་པར་བྱ་བ་བརྗོད་པའི་ཕྱིར། དེའི་སླད་དུ་མན་ཆད་བྱེད་པ་བརྗོད་པ་སྟེ། བྱེད་པ་པོ་དགེ་འདུན་བརྗོད་པའི་ཕྱིར། དེས་ན་བྱ་བ་བརྗོད་པ་རྫོགས་མ་ཐག་དེར་སྡོམ་པ་སྐྱེ་བ་ཡིན་ཏེ། བརྗོད་པ་ཐ་མ་གང་ཡིན་པའི་ཆ་གསུམ་པ་ལ་གྲུབ་པ་ཉིད་དོ། །ཞེས་གསུངས་པའི་ཕྱིར། དེ་དང་དེའི་ཚེ་བྱེད་པ་པོ་དེ་ཡང་སློབ་དཔོན་དུ་འགྱུར་བ་ཡིན་ཏེ། དོན་གྲུབ་པ་ན་གྱུར་པ་ཉིད་དོ། །ཞེས་དགེ་བསྙེན་སོགས་དོན་གྲུབ་པ་ཉིད་ཀྱིས་སློབ་དཔོན་དུ་འགྱུར་བའི་ཕྱིར་རོ། །

བཞི་པ་ཐོབ་པ་མི་ཉམས་པར་བསྲུང་བའི་ཚུལ་ལ། བསྟན་བཤད་གཉིས་ལས། དང་པོ་མདོར་བསྟན་ནི། བར་དུ་ཐོབ་པ་མི་ཉམས་བསྲུང་བ་ལ། །ཞེས་པ་སྟེ། མ་ཐོབ་པ་འཐོབ་པར་བྱེད་པའི་ཆོ་གས་སྡོམ་པ་དང་པོར་ཐོབ་པ་ཙམ་གྱིས་མི་ཆོག་གི །དེ་བར་དུ་ཐོབ་ཟིན་མི་ཉམས་པར་བསྲུང་བ་ལ་བསླབ་དགོས་ཏེ། མ་བསྲུངས་ན་ཉེས་དམིགས་དང་། བསྲུངས་ན་ཕན་ཡོན་ཆེན་པོ་དང་ལྡན་པའི་ཕྱིར། དགེ་སློང་ལ་རབ་ཏུ་གཅེས་པའི་མདོ་ལས། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་སྡུག་བསྔལ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་སྡུག་བསྔལ་ཡིན། །ཞེས་གསུངས་པས་སོ། །

གཉིས་པ་རྒྱས་བཤད་ལ་གཉིས་ཏེ། དངོས་བསྟན་བླང་དོར་གྱི་བསླབ་བྱ་རྒྱས་པར་བཤད། ཤུགས་བསྟན་དེའི་རུང་མཐུན་བསྡུས་ཏེ་བསྟན་པའོ། །དང་པོ་ལ་གཉིས་ཏེ། ཁྱིམ་པའི་ཕྱོགས་སུ་གཏོགས་པའི་དང་། རབ་ཏུ་བྱུང་བའི་ཕྱོགས་སུ་གཏོགས་པའི་བསླབ་བྱའོ། །དང་པོ་ལ་གསུམ་སྟེ། སྐྱབས་འགྲོའི། བསྙེན་གནས་ཀྱི། དགེ་བསྙེན་གྱི་བསླབ་བྱའོ། །དང་པོ་ལ། ཐུན་མིན་དཀོན་མཆོག་གསུམ་སོ་སོ་ལ་སྐྱབས་སུ་སོང་བའི་བསླབ་བྱ་དང་། གསུམ་ཀའི་ཐུན་མོང་གི་བསླབ་བྱའོ། །དང་པོ་ནི། བསླབ་བྱ་སྐྱབས་འགྲོ་ཐུན་མོང་མིན་གསུམ་ནི། །སྐྱབས་གཞན་མི་འཚོལ་སེམས་ཅན་འཚེ་བ་སྤོང་། །མུ་སྟེགས་མི་འགྲོགས་སོ་སོར་གུས་བསྐྱེད་དོ། །ཞེས་པ་སྟེ། འདི་ལ་དགག་སྒྲུབ་གཉིས་ལས། དགག་པའི་བསླབ་བྱར། སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་སོང་ནས་སོ་སོའི་བསླབ་བྱ་ནི་རིམ་པ་ཇི་ལྟ་བར། སྐྱབས་གཞན་འཇིག་རྟེན་པའི་ལྷ་ལ་རེ་ལྟོས་བཀལ་ནས་སྐྱབས་འགྲོ་མི་བྱ། སེམས་ཅན་ལ་གནོད་འཚེ་སྤོང་། གྲོགས་མུ་སྟེགས་ཅན་དང་མི་འགྲོགས་པ་སྟེ། དེ་དག་དང་འགལ་ན་དཀོན་མཆོག་གསུམ་པོ་དེ་དང་དེའི་སྐྱབས་འགྲོ་གཏོང་བའི་ཕྱིར། མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་སོ། །སྒྲུབ་པའི་བསླབ་བྱར། སངས་རྒྱས་ཀྱི་སྐུའི་རྟེན་སཱཙྪའི་ཆག་དུམ་ཙམ་དང་། ཆོས་ཀྱི་རྟེན་ཡིག་འབྲུ་གཅིག་ཙམ་དང་། དགེ་འདུན་གྱི་གཟུགས་ལྷན་པ་སེར་པོ་བཏབ་པ་ཡན་ཆད་ལ་དཀོན་མཆོག་དེ་དང་དེའི་འདུ་ཤེས་བཞག་ནས་གུས་པར་བྱ་བའོ། །

གཉིས་པ་ནི། སྲོག་དང་བྱ་དགར་དཀོན་མཆོག་གསུམ་མི་སྤང་། །དགོས་གལ་ཆེ་ཡང་ཐབས་གཞན་མི་འཚོལ་ཞིང་། །དུས་མཆོད་མི་བཅག་རང་གཞན་སྐྱབས་འགྲོར་འགོད། །གར་འགྲོའི་ཕྱོགས་ཀྱི་སངས་རྒྱས་ལ་ཕྱག་འཚལ། །ལྔ་རྣམས་ཐུན་མོང་བསླབ་བྱར་ཇོ་བོ་བཞེད། །ཅེས་པ་སྟེ། སྲོག་དང་རྒྱལ་སྲིད་ལ་སོགས་པའི་ཆེད་དུའང་དཀོན་མཆོག་མི་སྤོང་བ་དང་། དགོས་གལ་ཇི་ལྟར་ཆེ་ཡང་དཀོན་མཆོག་ལ་བློ་གཏོད་པ་ལས་འཇིག་རྟེན་པའི་ཐབས་གཞན་མི་འཚོལ་བ་དང་། རྟག་ཏུ་ཡོན་ཏན་དྲན་པས་དུས་ཀྱི་མཆོད་པ་མི་བཅག་པ་དང་། ཕན་ཡོན་ཤེས་པས་རང་སྐྱབས་སུ་འགྲོ་ཞིང་གཞན་དག་ཀྱང་འགྲོར་གཞུག་པ་དང་། གར་འགྲོའི་ཕྱོགས་ཀྱི་སངས་རྒྱས་དང་དེའི་སྐུ་གཟུགས་ལ་ཕྱག་འཚལ་བ་དང་ལྔའོ། །

གཉིས་པ་ལ། དུས་ཁྲིམས་བསྙེན་གནས་དངོས་ཀྱི་བསླབ་བྱ་དང་། དེ་གཏན་ཁྲིམས་སུ་བྱས་ན་གོ་མིའི་དགེ་བསྙེན་དུ་འགྲོ་ཚུལ་ལོ། །དང་པོ་ནི། རྩ་བཞི་སྤོང་བ་ཚུལ་ཁྲིམས་ཡན་ལག་བཞི། །ཆང་སྤོང་བག་ཡོད་ཡན་ལག་མལ་ཆེ་མཐོ། །གར་ཕྲེང་ལ་སོགས་ཕྱི་དྲོའི་ཁ་ཟས་གསུམ། །བརྟུལ་བཞུགས་ཡན་ལག་བསྙེན་གནས་སྡོམ་པ་ཡིན། །ཡན་ལག་འདི་བརྒྱད་གཏན་དུ་མ་ཡིན་པས། །ཡོན་ཏན་རྟེན་མིན་དེ་ཕྱིར་སོ་ཐར་ནི། །མཚན་ཉིད་ལྡན་པ་རིགས་བདུན་ཁོ་ན་ཡིན། །ཞེས་པ་སྟེ། མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་དེ་བཞིན་གསུམ་རིམ་བཞིན། །ཞེས་པ་ལྟར་མི་ཚངས་སྤྱོད་སོགས་རྩ་བའི་ལྟུང་བ་བཞི་སྤོང་བ་ཚུལ་ཁྲིམས་ཀྱི། ཆང་སྤོང་བ་བག་ཡོད་ཀྱི། མལ་ཆེ་མཐོ་དང་། གར་སོགས་ཕྲེང་སོགས་དང་། དུས་མ་ཡིན་པའི་ཁ་ཟས་ཏེ་གསུམ་སྤོང་བ་བརྟུལ་ཞུགས་ཀྱི་ཡན་ལག་སྟེ། ཡན་ལག་འདི་བརྒྱད་པོ་ཉིན་ཞག་གི་མཐའ་ཚུན་ཆད་དུ་ཁས་བླངས་པའི་དུས་ཁྲིམས་ཡིན་གྱི་གཏན་ཁྲིམས་མ་ཡིན་པས་སྡོམ་པ་གོང་མ་རྣམས་ཀྱི་ཡོན་ཏན་གྱི་རྟེན་དུ་མི་རིགས་པའི་ཕྱིར་མ་ཡིན་ལ། དེས་ན་གོང་མའི་ཡོན་ཏན་གྱི་རྟེན་དུ་གྱུར་པའི་མཚན་ཉིད་ཅན་ནི་རིགས་བདུན་ཉིད་དུ་ངེས་ཏེ། ལམ་སྒྲོན་ལས། སོ་སོ་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་གསུངས་པ་ལྟར་རོ། །

གཉིས་པ་ནི། འདི་བརྒྱད་ཇི་སྲིད་འཚོ་ཡི་བར་བསྲུངས་ན། །གོ་མིའི་དགེ་བསྙེན་ཡིན་ཡང་ཡོད་སྨྲའི་མིན། །གནས་བརྟན་སྡེ་བའི་ལུགས་སུ་དབྱིག་གཉེན་བཞེད། །ཅེས་པ་སྟེ། གསོ་སྦྱོང་ཡན་ལག་བརྒྱད་ཇི་སྲིད་འཚོའི་བར་དུ་ཁས་ལེན་པ་གོ་མིའི་དགེ་བསྙེན་ཏེ། འདི་གཞི་ཐམས་ཅད་ཡོད་པར་སྨྲ་བའི་འདུལ་བ་ལས་མ་བཤད་ནའང་། འཕགས་པ་གནས་བརྟན་པའི་སྡེ་པའི་ལུགས་སུ་དབྱིག་གཉེན་བཞེད་དེ། གོ་མིའི་དགེ་བསྙེན་ཞེས་བྱ་བ་འདི་ནི་འཕགས་པ་གནས་བརྟན་པའི་མན་ངག་བརྒྱུད་པ་ལས་ཐོས་ཀྱི་བདེ་བར་གཤེགས་པས་གསུངས་པ་ནི་མ་མཐོང་ངོ་། །ཞེས་གསུངས་པའི་ཕྱིར། འོན་ཀྱང་ཐེག་ཆེན་གྱི་སྡེ་སྣོད་ལས་གསུངས་ཏེ། རྒྱལ་བུ་སྙིང་རྗེ་ཆེར་སེམས་ཀྱིས་བསྙེན་གནས་ཡན་ལག་བརྒྱད་ཇི་སྲིད་འཚོའི་བར་དུ་བླངས་པར་དཀོན་བརྩེགས་ལས་བཤད་པའི་ཕྱིར་རོ། །

གསུམ་པ་དགེ་བསྙེན་གྱི་བསླབ་བྱ་ལ་གསུམ་སྟེ། དགེ་བསྙེན་གྱི་སྤང་བྱ་ལྔ་ངོས་བཟུང་། དེ་བསྲུང་ཚུལ་གྱི་གྲངས་ལས་དགེ་བསྙེན་གྱི་དབྱེ་བ་བཤད། ཕྱོགས་མཐུན་གྱི་བསླབ་བྱ་བསྟན་པའོ། །དང་པོ་ནི། གསོད་རྐུ་རྫུན་སྨྲ་འདོད་པས་ལོག་པར་ གཡེམ། །མྱོས་འགྱུར་སྤོང་རྣམས་དགེ་བསྙེན་སྡོམ་པ ་སྟེ། །ཞེས་པས་དགེ་བསྙེན་གྱི་སྤང་བྱ་ལ་རྩ་བ་དང་། ཡན་ལག་གཉིས་ལས། རྩ་བ་ནི་བཞི་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་ གཡེམ་པ ་དང་། རྫུན་དུ་སྨྲ་བའོ། །འདི་དག་ལ་ཡུལ་གྱི་ཡན་ལག་ཏུ་མི་ཡིན་པ་དགོས་ཏེ། དེ་མ་ཚང་ན་རྩ་བར་གཏོགས་པའི་ཉེས་པ་ཙམ་དུ་ཟད་ཀྱི། རྩ་བ་དངོས་མ་ཡིན་པས་སྡོམ་པ་ཉམས་པར་མི་འགྱུར་ཞིང་། འདིར་བསླབ་གཞིར་མི་ཚངས་སྤྱོད་མི་འཇོག་པར་འདོད་ལོག་འཇོག་ པ་ནི། ཁྱིམ་པས་བསྲུང་སླ་བ་སོགས་ཀྱི་ཕྱིར་ཏེ། མཛོད་ལས། ལོག་གཡེམ ་ཤིན་ཏུ་དམད་ཕྱིར་དང་། །སླ་ཕྱིར་མི་བྱེད་ཐོབ་ཕྱིར་རོ། །ཞེས་སོ། །ཡན་ལག་ནི། མྱོས་འགྱུར་སྤོང་བ་སྟེ། དེ་མ་སྤངས་ན་བསླབ་པ་གཞན་རྣམས་བསྲུང་མི་ནུས་པའི་ཕྱིར། དེ་ལས། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་སྲུང་ཕྱིར་རོ། །ཞེས་སོ། །

གཉིས་པ་ལ། དེ་ལས་ཕྱེ་བ་ཉན་ཐོས་སྡེ་པའི་ལུགས་དང་། དེ་ལས་གཞན་པ་སྡེ་པ་གཞན་གྱི་ལུགས་སོ། །དང་པོ་ནི། གང་འདོད་ཁས་ལེན་གྲངས་ལྟར་སྣ་གཅིག་སྤྱོད། །སྣ་འགའ་ཕལ་ཆེར་སྤྱོད་དང་ཡོངས་རྫོགས་སྤྱོད། །གཅིག་གཉིས་གསུམ་དང་ལྔ་སྤོང་། ཞེས་པ་སྟེེ། སྐྱབས་འགྲོ་བླངས་ནས་དེའི་བསླབ་བྱ་ཙམ་བསྲུང་བ་སྐྱབས་གསུམ་འཛིན་པའི་དགེ་བསྙེན་ཞེས་སྔར་བཤད་པ་དེ་ལ། ཉི་འོག་པ་དང་མདོ་སྡེ་པ་དག །དེ་དགེ་བསྙེན་གྱི་སྡོམ་པ་མ་ཡིན་ཡང་དགེ་བསྙེན་མཚན་ཉིད་པ་ཡིན་ཟེར། བྱེ་བྲག་ཏུ་སྨྲ་བ། དགེ་བསྙེན་གྱི་སྡོམ་པ་མེད་ན། དེ་དགེ་བསྙེན་མཚན་ཉིད་པ་མ་ཡིན་པར་འདོད། བཤད་མ་ཐག་པའི་དགེ་བསྙེན་གྱི་སྤང་བྱ་ལྔ་ལས། སྲོག་གཅོད་ཙམ་སྤོང་བ་སྣ་གཅིག་སྤྱོད་པ་དང་། དེའི་སྟེང་མ་བྱིན་ལེན་ཙམ་སྤོང་བ་སྣ་འགའ་སྤྱོད་པ་དང་། དེ་གཉིས་ཀྱི་སྟེང་རྫུན་དང་གསུམ་སྤོང་བ་ཕལ་ཆེར་སྤྱོད་པ་དང་། དེ་གསུམ་གྱི་སྟེང་དུ་འདོད་ལོག་དང་ཆང་སྟེ་ལྔ་ཆར་སྤོང་བ་ཡོངས་རྫོགས་དགེ་བསྙེན་ནོ། །དེ་བཞི་ལ་བྱེ་བྲག་ཏུ་སྨྲ་བ་ལྟར་ན། སྡོམ་པ་ལེན་པའི་ཚེ་དགེ་བསྙེན་ཙམ་དུ་ཁས་བླངས་ནས་ཕྱིས་བསྲུང་དུས་སྣ་གཅིག་སོགས་གང་འདོད་བསྲུང་བ་ལ་དེ་དག་སྤྱོད་ཅེས་འདོད་དེ། མཛོད་ལས། སྣ་གཅིག་སྤྱོད་སོགས་ཇི་ལྟ་བུ། །དེ་བསྲུང་བ་ལ་བསྲུང་ཞེས་གྲགས། །ཞེས་སོ། །མདོ་སྡེ་པ་ལྟར་ན། ལེན་པའི་ཚེ་བདག་སྣ་གཅིག་སྤྱོད་པའི་དགེ་བསྙེན་དུ་བཟུང་དུ་གསོལ་ཞེས་པ་ལྟ་བུ་གང་འདོད་ཁས་བླངས་ནས་དེ་བསྲུང་བ་སྟེ། དེ་ལས་གཞན་དུ་ཡོངས་རྫོགས་བླངས་ནས་ཕྱིས་དེ་མ་བསྲུངས་ན་ཚུལ་འཆལ་དུ་འགྱུར་བའི་ཕྱིར། ཅེས་འདོད་དོ། །

གཉིས་པ་ནི། དེ་ཡི་སྟེང་། །མི་ཚངས་སྤྱོད་སྤོང་ཚངས་སྤྱོད་དགེ་བསྙེན་ནོ། །འདི་དང་གོ་མི་གཉིས་ནི་ཁྱིམ་པ་དང་། །རབ་བྱུང་གཉིས་ཀ་མིན་ཞེས་མཁས་རྣམས་བཞེད། །ཅེས་པ་སྟེ། ཡོངས་རྫོགས་དགེ་བསྙེན་གྱི་སྤང་བྱའི་སྟེང་མི་ཚངས་སྤྱོད་སྤོང་བ་ནི་ཚངས་སྤྱོད་ཀྱི་དགེ་བསྙེན་ཏེ། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ལ། །ཞེས་སོགས་ཀྱིས་བསྟན་པར་མདོ་སྡེ་པ་འདོད་ཅིང་། འདི་དང་གོ་མིའི་དགེ་བསྙེན་གཉིས་ཆོ་འཕྲུལ་བསྟན་པའི་མདོ་ལས་ཀྱང་གསུངས་ཏེ། ཇི་སྐད་དུ། རབ་བྱུང་ཡོན་ཏན་དུ་མ་ལྡན་པ་ཞེས། །དེ་བཞིན་གཤེགས་པ་རྣམས་ཀྱིས་བསྔགས་མོད་ཀྱི། །སེམས་ཅན་ཀུན་ལ་སྙིང་རྗེར་གྱུར་པས་ན། །འགྲོ་ལ་ཕན་ཕྱིར་བདག་གིས་རྒྱལ་སྲིད་སྒྲུབ། །ཇི་སྲིད་འཚོའི་བར་ཚངས་པར་སྤྱོད་བྱེད་ཅིང་། །གསོ་སྦྱོང་ཡན་ལག་བརྒྱད་པའང་བླང་བར་བགྱི། །ཞེས་གསུངས་པའི་ཕྱིར། འདི་གཉིས་ཁྱིམ་པ་དང་རབ་བྱུང་གཉིས་ཀ་མ་ཡིན་ཏེ། ཁྱིམ་ཐབ་སྤངས་པས་འདོད་པ་འཁྲིག་བཅས་ཀྱི་ཁྱིམ་པ་མ་ཡིན་པ་གང་ཞིག །རབ་བྱུང་གི་རྟགས་མ་བླངས་པས་དེ་ཡང་མ་ཡིན་པའི་ཕྱིར་རོ། །

གསུམ་པ་དགེ་བསྙེན་གྱི་ཕྱོགས་མཐུན་གྱི་བསླབ་བྱ་ལ། དངོས་དང་། སྔགས་པ་ཁྱིམ་པས་ཀྱང་འདུལ་བའི་བསླབ་བྱ་ལ་གཅེས་སྤྲས་བྱ་དགོས་པར་གདམས་པའོ། །དང་པོ་ནི། མི་དགེ་ལྷག་དྲུག་ཕྱོགས་མཐུན་སྤང་བྱ་དང་། །ཞེས་པ་སྟེ། སྤྱིར་མི་དགེ་བ་བཅུ་ལས་མི་གསོད་པ་སོགས་ལུས་ཀྱི་ལས་གསུམ་དང་། ངག་གི་རྫུན་སྨྲ་བ་རྣམས་ནི་རྩ་བ་ཡིན་པའི་ཕྱིར། དེ་བཞི་བྱུང་ན་སྡོམ་པ་གཏོང་བས་སླར་བླང་བར་བྱ་ཞིང་། མི་མ་ཡིན་གསོད་པ་སོགས་བཞི་དང་ཆང་འཐུང་བའི་ཉེས་པ་སྟེ་ལྔ་བྱུང་ན་སྡོམ་ལྡན་གྱི་དྲུང་དུ་བཤགས། དེ་ལས་གཞན་པ་ཕྲ་མ་སོགས་ངག་གི་ལས་གསུམ་དང་ཡིད་ཀྱི་ལས་གསུམ་སྟེ་མི་དགེ་བ་ལྷག་མ་དྲུག་ནི་ཕྱོགས་མཐུན་གྱི་སྤང་བྱ་སྟེ། དེ་དག་ཀྱང་འགྱོད་སྡོམ་གྱི་སེམས་ཀྱིས་ཕྱིར་འཆོས་པར་བྱ་བ་ཡིན་ནོ། །

གཉིས་པ་ནི། དགེ་བསྙེན་སྡོམ་ལྡན་རིག་པ་འཛིན་པས་ཀྱང་། །རབ་བྱུང་རྟགས་དང་ཆོ་ག་མ་གཏོགས་པ། །ལྷག་རྣམས་ཉམས་སུ་ལེན་པར་དཔུང་བཟང་བཤད། །ཅེས་པ་སྟེ། དགེ་བསྙེན་གྱི་སྡོམ་ལྡན་སྔགས་ལ་ཞུགས་པ་ཡིན་ན། དེ་ལྟ་བུའི་དགེ་བསྙེན་རིག་པ་འཛིན་པ་དེས་ཀྱང་། ངུར་སྨྲིག་བགོ་བ་དང་ལྷུང་བཟེད་འཆང་བ་སོགས་རབ་བྱུང་གི་རྟགས་ཀྱི་སྐོར་དང་། ལས་ཀྱི་ཆོ་ག་དང་བཅས་རྐྱང་འགའ་ཞིག་མ་གཏོགས་ལྷག་རྣམས་འདུལ་བ་ནས་ཇི་ལྟར་འབྱུང་བ་བཞིན་དུ་ཉམས་སུ་ལེན་དགོས་པར་གསུངས་ན་སྔགས་པ་རབ་བྱུང་གིས་ལྟ་སྨོས་ཀྱང་ཅི་དགོས་ཏེ། དཔུང་བཟང་ལས། རྒྱལ་བ་ངས་གསུངས་སོ་སོ་ཐར་པ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤང་། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་གསུངས་པའི་ཕྱིར་རོ། །

གཉིས་པ་རབ་ཏུ་བྱུང་བའི་ཕྱོགས་སུ་གཏོགས་པའི་བསླབ་བྱ་ལ་གསུམ་སྟེ། དགེ་ཚུལ་ཕ་མའི། དགེ་སློབ་མའི། དགེ་སློང་གི་བསླབ་བྱའོ། །དང་པོ་ལ་གསུམ་སྟེ། དགེ་ཚུལ་གྱི་བླངས་འདས་དངོས། ཕྱོགས་མཐུན་བསྡམ་བྱའི་ཉེས་བྱས། རབ་བྱུང་གི་དུས་སུ་བླངས་པ་ལས་འདས་པའི་ཕྱོགས་མཐུན་ནོ། །དང་པོ་ནི། སྲོག་གཅོད་རྐུ་དང་མི་ཚངས་སྤྱོད་དང་རྫུན། །ཆང་འཐུང་གར་སོགས་ཕྲེང་སོགས་མལ་ཆེ་མཐོ། །ཕྱི་དྲོའི་ཁ་ཟས་གསེར་དངུལ་སྤོང་བ་སྟེ། །ཞུམ་པ་སྤོང་ཕྱིར་རགས་པ་བཅུར་དྲིལ་གསུངས། །ཞེས་པ་སྟེ། འདི་ལ། དངོས་སུ་བཤད་པ་རགས་པ་བཅུ། དེ་ལས་ཞིབ་མོར་རྩིས་ན་སུམ་ཅུ་རྩ་གསུམ་དུ་འགྱུར་བའོ། །དང་པོ་ནི་བྲྀ་ཛིའི་བུ་བཞིན་དུ་བསླབ་གཞི་མང་པོ་ཐོས་པས་ཞུམ་སྟེ། སྡོམ་པ་ལེན་པ་ལས་ལྡོག་པ་སྤང་བའི་ཆེད་དུ་རགས་པ་བཅུར་དྲིལ་ནས་གསུངས་པའང་གཉིས་སུ་འདུ་སྟེ། རྩ་བ་དང་། ཡན་ལག་གོ །དང་པོ་བཞི་ལ་རྩ་བ་ཞེས་བྱ་སྟེ། བསྲུངས་ན་ཚུལ་ཁྲིམས་སུ་འགྱུར་ཞིང་མ་བསྲུངས་ན་ཁྲིམས་འཆལ་དུ་འགྱུར་བས་སོ། །ཕྱི་མ་དྲུག་ལ་ཡན་ལག་ཅེས་བྱ་སྟེ། རྩ་བ་བཞི་པོ་དེ་བསྲུང་བའི་ཐབས་སུ་གྱུར་པས་དེ་སྐད་ཅེས་བྱའོ། །དེ་ཡང་ཆང་གིས་དྲན་པ་ཉམས་པར་བྱེད་པས་དེ་སྤོང་བ་བག་ཡོད་ཀྱི་ཡན་ལག་དང་། གཞན་ལྔ་བརྟུལ་ཞུགས་ཀྱི་ཡན་ལག་སྟེ། གར་སོགས་ཀྱིས་དྲེགས་པ་བསྐྱེད་ཅིང་གསེར་དངུལ་ལེན་པ་གསོག་འཇོག་གི་རྩ་བར་གྱུར་པའི་ཕྱིར་རོ། །དེ་ལ་དགེ་ཚུལ་གྱི་ལྟུང་བ་ཐམས་ཅད་ཉེས་བྱས་ཁོ་ནར་འདུས་པས་ཕམ་འདྲའི་ཉེས་བྱས་ནི། མིའམ་མིར་ཆགས་པའི་སྲོག་བཅད་པ། རིན་ཐང་ཚང་བའི་དངོས་པོ་རྐུ་བ། མི་ཚངས་པར་སྤྱོད་པ། མི་ཆོས་བླ་མའི་རྫུན་སྨྲ་བ་སྟེ། འདི་བཞི་ལ་དགེ་སློང་གི་སྐབས་སུ་འཆད་འགྱུར་ལྟར་གཞི་བསམ་སྦྱོར་བ་མཐར་ཐུག་གི་ཡན་ལག་ཚང་ན་ཕམ་འདྲའི་ཉེས་བྱས་སུ་འགྱུར་ཞིང་། འཆབ་མེད་ལ་གསོར་རུང་དང་འཆབ་བཅས་བྱུང་ན་གསོར་མི་རུང་བའང་དགེ་སློང་དང་འདྲ་སྟེ། སུམ་བརྒྱ་པ་ལས། མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་ན། །དགེ་སློང་བཞིན་དུ་དགེ་ཚུལ་ལའང་། །ཕྱི་ནས་སྡོམ་སྐྱེའི་སྐལ་བ་མེད། །ཅེས་སོ། །བཤགས་བྱའི་ཉེས་བྱས་ལ་དྲུག་སྟེ། མྱོས་འགྱུར་འཐུང་བ། རྒོད་བག་གིས་རང་དགར་གླུ་གར་རྩེ་ཞིང་རོལ་མོ་འཁྲོལ་བ་སྟེ་གར་སོགས་གསུམ་དང་། འཕྱོར་སྒེག་གིས་རྒྱན་ཕྲེང་འདོགས་པ་ཁ་དོག་འཆང་བ་སྤོས་བྱུག་པ་སྟེ་ཕྲེང་སོགས་གསུམ། རྒྱུ་རིན་ཐང་ཅན་དང་ཁྲུ་གང་ལས་ལྷག་པའི་མལ་ཆེ་མཐོ། ཕྱི་དྲོ་དུས་རུང་གི་ཟས་ལ་སྤྱོད་པ། གསེར་དངུལ་ལེན་པ་སྤོང་བའོ། །གཉིས་པ་ནི། རྩ་བཞི་གསོད་གསུམ་བཞི་མེད་ནས། །སུན་འབྱིན་བར་ལྔ་ཤེས་བཞིན་བཤེས། །འཕྱ་དང་ཟས་ཅུང་ལྷག་མས་སྐུར། །ཉེར་འཇོག་འབྲས་ཆན་འགེབས་དང་ཆང་། །གར་གསུམ་ཕྲེང་གསུམ་མལ་ཆེ་མཐོ། །དུས་མིན་རིན་ཆེན་བར་མ་གསུམ། །དེ་ལྟར་སུམ་ཅུ་རྩ་གསུམ་མོ། །ཞེས་པ་ལྟར། རྩ་བ་བཞི་དང་། སྲོག་གཅོད་ཀྱི་ཕམ་འདྲའི་ཆར་གཏོགས་དུད་འགྲོ་གསོད་པ། སྲོག་ཆགས་དང་བཅས་པའི་རྩྭ་དང་ཆུར་འདེབས་པ། སྲོག་ཆགས་དང་བཅས་པའི་ཆུར་སྤྱོད་པ་སྟེ་གསོད་པ་གསུམ། རྫུན་གྱི་ཆར་གཏོགས། གཞི་མེད་དང་། བག་ཙམ་གྱིས་ཕམ་པའི་སྐུར་འདེབས། དགེ་འདུན་དབྱེན། དེ་རྗེས་ཕྱོགས། ཁྱིམ་སུན་འབྱིན་པ། ཤེས་བཞིན་དུ་རྫུན་དུ་སྨྲ་བ། བཤེས་ངོར་འཕྱ་བ། ཞལ་ཏ་པར་འཕྱ་བ། ཟས་ཅུང་ཟད་ཀྱི་ཕྱིར་ཆོས་སྟོན་ཅེས་སྐུར་འདེབས། ལྷག་མའི་སྐུར་འདེབས། བསླབ་པ་ལ་ཁྱད་གསོད་ཀྱིས་སྤོང་བ། ལྷག་པོ་ལེན་ཕྱིར་འབྲས་ཆན་འགེབས་པ་སྟེ་བཅུ་གཉིས། དེ་ལྟར་རྩ་བཞི་དང་དེའི་ཆར་གཏོགས་བཅོ་ལྔ་སྟེ་བཅུ་དགུ། ཆང་། གར་སོགས་གསུམ། ཕྲེང་སོགས་གསུམ། མལ་ཆེ་མཐོ་རྣམས་སོ་སོར་བགྲངས་པ་དང་། ཕྱི་དྲོའི་ཁ་ཟས། གསེར་དངུལ་ལེན་པ་རྣམས་བསྣན་པས་སུམ་ཅུ་དང་། འོག་ནས་འབྱུང་བའི་ཉམས་པ་གསུམ་དང་བཅས་པས་བླངས་འདས་སུམ་ཅུ་རྩ་གསུམ་མོ། །ལུང་རིགས་གཏེར་མཛོད་དུ། སྲོག་གཅོད་གསུམ་དང་། རྫུན་ལས་འབྲས་ཆན་འགེབས་པ་དོར་བའི་ལྷག་བཅུ་གཅིག་སྟེ་བཅུ་བཞི་པོ་སྔར་ལྟར་ལས། དེའི་སྟེང་དུ་མ་བྱིན་ལེན་གྱི་ཆར་གཏོགས་ཁང་པ། ཁང་ཆེན། རིན་པོ་ཆེའི་ཁབ་རལ་བྱེད་པ་གསུམ་དང་། མི་ཚངས་སྤྱོད་ཀྱི་ཆར་གཏོགས་དགེ་འདུན་གྱིས་སྤངས་པའི་མཚན་མི་མཐུན་པ་དང་ལྷན་ཅིག་ཉལ་བ་སྤོང་བ། རྩ་བ་བཞི་གའི་ཆར་གཏོགས་གསོ་སྦྱོང་། དབྱར་གནས། དགག་དབྱེ། གནས་སློབ་ལ་བརྟེན་ནས་གནས་པ་རྣམས་ཏེ། རྩ་ལྟུང་བཞིའི་ཆར་གཏོགས་ཉེར་གཉིས་སུ་བཞེད་དོ། །

གཉིས་པ་ཕྱོགས་མཐུན་བསྡམ་བྱའི་ཉེས་བྱས་ནི། ཆོས་གོས་ལྷུང་བཟེད་འཆང་བ་འབྲལ་བ་དང་། །ས་རྐོ་རིན་ཆེན་རེག་དང་མེ་ལ་རེག །བཏང་ནས་ཟ་དང་ཤིང་འཛེག་ཤིང་གཅོད་དང་། །བྱིན་ལེན་རྩྭ་སྔོན་ཁྲོད་དུ་མི་གཙང་འདོར། །གསོག་འཇོག་ཟ་དང་ས་བོན་འཇོམས་པ་རྣམས། །གནང་བས་ཉེས་མེད་བཅུ་གསུམ་མ་གཏོགས་པ། །དགེ་སློང་ཇི་བཞིན་སྤང་བླང་མཐའ་དག་གཅིག །འཆང་བའི་ཟླར་བསྡུ་གོས་རྒྱུ་ཟླ་བར་འཇོག །འབྲལ་བའི་ཟླར་བསྡུ་དགོན་པའི་འབྲལ་སྤང་བྱེད། །གསོག་འཇོག་ཟླར་བསྡུ་གསོག་འཇོག་བྱེད་པའང་གནང་། །ཞེས་པ་སྟེ། ཉེས་མེད་བཅུ་གསུམ་པོ་འདི་ནི་བསྟན་བཅོས་བྱེ་བྲག་བཤད་པ་ལས། འཆང་བ་དང་ནི་འབྲལ་བ་དང་། །དེ་བཞིན་ས་ནི་རྐོ་བ་དང་། །རིན་ཆེན་རེག་དང་མེ་ལ་རེག །སྤངས་ནས་ཟ་བར་བྱེད་པ་དང་། །ལྗོན་ཤིང་འཛེག་དང་ཤིང་གཅོད་དང་། །བྱིན་ལེན་མ་བྱས་ཟ་བ་དང་། །རྩྭ་སྔོན་མི་གཙང་འདོར་བ་དང་། །དེ་བཞིན་གསོག་འཇོག་ཟ་བ་དང་། །ས་བོན་འཇོམས་དང་བསླབ་པའི་གཞི། །བཅུ་པོ་རྣམས་ནི་མ་གཏོགས་པ། །སོ་སོ་ཐར་པར་བསྟན་པ་དག །བླངས་པའི་ཕྱོགས་མཐུན་ཤེས་པར་བྱ། །ཞེས་གསུངས་པའི་འཆང་བ་ལ་གཉིས་སུ་ཕྱེ་བས་ཉེས་མེད་བཅུ་གསུམ་དང་། དེའི་སྟེང་དུ་བོད་ཀྱི་འདུལ་འཛིན་རྣམས་ཀྱིས་རུང་མཐུན་སྦྱར་བ་ལ། ཟླ་འཇོག་གསོག་འཇོག་དགོན་པ་འབྲལ། །མ་སྨྲས་འདུན་སྒྱུར་མ་རྫོགས་ཉལ། །ཞེས་པ་ལྟར་དྲུག་བསྣན་ནས་ཉེས་མེད་བཅུ་དགུར་འདོད་ཅིང་། འདི་ནི་ཟླ་འཇོག །དགོན་པའི་འབྲལ་སྤང་། གསོག་འཇོག་གི་སྤང་བ་རྣམས་ཉེས་མེད་དུ་ཞུ་བ་ཁ་ཆེ་བ་ལས་དངོས་སུ་བཤད་ཅེས་མཁས་མཆོག་བུ་སྟོན་རིན་པོ་ཆེས་གསུངས་པ་ལྟར་མཛད་ལ། འདུལ་འཛིན་འགའ་ཞིག །འདུན་པ་ཕྱིར་སྒྱུར་དོར་ནས་ལས་ཀྱི་གནས་ནས་མི་སྨྲ་བར་འགྲོ་བ་དང་། དགེ་ཚུལ་ནང་དུ་ནུབ་ལྷག་ཉལ་བསྲུང་མི་དགོས་ཀྱང་ཁྱིམ་པ་དང་བསྲུང་དགོས་པའི་ཕྱེད་དེ། དེ་ལྟར་ཉེས་མེད་ཕྱེད་དང་བཅོ་བརྒྱད་དོ་ཞེས་བཞེད། གང་ལྟར་ཡང་བསླབ་པའི་གཞི། བཅུ་པོ་རྣམས་ནི་མ་གཏོགས་པ། །ཞེས་སྔར་དྲངས་པ་ལྟར་གྱི་དངོས་སུ་བླངས་འདས་རྣམས་ཕམ་འདྲ་དང་བཤགས་བྱའི་ཉེས་བྱས་ཅི་རིགས་སུ་འགྱུར་བའི་ཕྱིར་དེ་རྣམས་དང་། གནང་བའི་ཉེས་མེད་རྣམས་མ་གཏོགས་པའི་གཞི་དང་རྣམ་འབྱེད་ནས་བཤད་པའི་སྤང་བླང་ཕལ་ཆེར་དགེ་སློང་ལྟར་ལས། དེ་ཐམས་ཅད་དགེ་ཚུལ་གྱི་སྐབས་འདིར་ཕྱོགས་མཐུན་གྱི་ཉེས་བྱས་སུ་འགྱུར་ཞིང་། དེ་དག་བཤགས་ཡུལ་ལ་མི་ལྟོས་པར་ཡིད་ཀྱིས་བསྡམས་པ་ཙམ་གྱིས་འདག་པ་ཡིན་ཏེ། མདོ་རྩར། དེའི་ཕྱོགས་དང་མཐུན་པ་ལ་ནི་ཡིད་ཀྱིའོ། །ཞེས་སོ། །

གསུམ་པ་རབ་བྱུང་གི་དུས་སུ་བླངས་པ་ལས་འདས་པའི་ཕྱོགས་མཐུན་ནི། ཁྱིམ་རྟགས་སྤོང་ཉམས་རབ་བྱུང་རྟགས་ལེན་ཉམས། །བརྙས་པས་མཁན་པོར་ཉམས་ཏེ་ཉམས་པ་གསུམ། །སྤང་བ་དགེ་ཚུལ་སྡོམ་པའི་བསླབ་བྱའོ། །ཞེས་པ་སྟེ། ཁྱིམ་པའི་རྟགས་སྤོང་བ། རབ་བྱུང་གི་རྟགས་ལེན་པ། མཁན་པོར་གསོལ་བ་བཏབ་པ་རྣམས་ལས་ཉམས་པའི་ཕྱོགས་མཐུན་གྱི་ཉེས་པའོ། །གལ་ཏེ་འདི་གསུམ་རབ་བྱུང་གི་བླངས་འདས་དངོས་དང་ཁྱད་པར་ཡོད་དམ་མེད། མེད་ན་དགེ་ཚུལ་གྱི་བླངས་འདས་སུ་ཇི་ལྟར་འགྱུར། ཡོད་ན་ཁྱད་པར་གང་ཡིན་ཞེ་ན། དེའི་ཁྱད་པར་ཡོད་ཚུལ་འདི་ཡིན་ཏེ། རབ་བྱུང་གི་སྡོམ་པས་མ་བསྡམས་པའི་རབ་བྱུང་བར་མ་ཙམ་ཞིག་བླངས་པ་དེས་ནི་བར་མའི་དུས་ཐོབ་པའི་བླངས་འདས་དངོས་གསུམ་པོ་དེ་བསྲུངས་པས་ཆོག་ལ། གལ་ཏེ་དེ་མ་བསྲུངས་ན་རབ་བྱུང་གཏོང་བྱེད་ཀྱི་རྒྱུར་ཡང་གསུངས་ཏེ། བསམ་པ་ཐག་པ་ནས་ཁྱིམ་པའི་རྟགས་ཉིན་གཅིག་ཙམ་བླངས་པས་ཀྱང་དེ་གཏོང་བའི་ཕྱིར། མཛོད་ལས། བར་མ་ཤུགས་བླངས་བྱ་བ་དང་། །དོན་ཚེ་རྩ་བ་ཆད་པ་ལས། །ཞེས་སོ། །དགེ་ཚུལ་གྱིས་ནི་བར་མའི་དུས་དངོས་སུ་བླངས་པ་གསུམ་དུ་མ་ཟད། དེའི་ཕྱོགས་མཐུན་སུམ་བརྒྱ་པར་རྒྱས་པར་བཤད་པ་རྣམས་ཀྱང་བསྲུང་དགོས་པའི་ཁྱད་པར་ཡོད་ཅིང་། ཕྱོགས་མཐུན་རྣམས་ཀྱིས་ནི་བར་མ་གཏོང་བའང་མ་ཡིན་ཏེ། འདིར་བཤགས་བྱ་དང་བསྡམ་བྱའི་ཉེས་བྱས་ཅི་རིགས་སུ་བཤད་པའི་ཕྱིར་རོ། །

གཉིས་པ་དགེ་སློབ་མའི་བསླབ་བྱ་ནི། དགེ་སློབ་མ་ནི་དགེ་ཚུལ་ཐོབ་པའི་སྟེང་། །ཞེས་པས་དགེ་ཚུལ་གྱི་བསླབ་གཞི་བཅུ་ཐོབ་པའི་སྟེང་དུ་དགེ་སློབ་མའི་སྡོམ་པ་བླངས་ནས་ལོ་གཉིས་སུ་དེའི་བསླབ་བྱ་ལ་སློབ་པ་སྟེ། དེ་ལ་གཉིས། རྩ་བའི་ཆོས་དྲུག་དང་། རྗེས་མཐུན་གྱི་ཆོས་དྲུག་གོ །དང་པོ་ནི། གཅིག་འགྲོ་ཆུར་རྐྱལ་སྐྱེས་རེག་ལྷན་ཅིག་འདུག །སྨྱན་བྱ་ཉེས་འཆབ་རྩ་བའི་ཆོས་དྲུག་གོ །ཞེས་པ་སྟེ། འདི་རྣམས་ནི་ས་གའི་ལྷས། གཅིག་པུར་ལམ་དུ་མི་འགྲོ་ཞིང་། །ཆུ་བོའི་ཕ་རོལ་རྐྱལ་མི་བྱ། །སྐྱེས་པ་ལ་ནི་མི་རེག་ཅིང་། །དེ་དང་ལྷན་ཅིག་འདུག་མི་བྱ། །ཁ་ན་མ་ཐོ་མི་འཆབ་ཅིང་། །གཉེན་དུ་འགྱུར་བར་མི་བྱ་སྟེ། །རྩ་བའི་ཆོས་དྲུག་འདི་དག་ནི། །དགེ་སློབ་མ་ལ་གསུངས་པ་ཡིན། །ཞེས་སོ། །

གཉིས་པ་ནི། གསེར་བཟུང་འདོམས་སྤུ་འདྲེག་དང་ས་རྐོ་སྤང་། །བྱིན་ལེན་མེད་དང་གསོག་འཇོག་བྱས་མི་ཟ། །རྩྭ་སྔོན་མི་གཅོད་འདི་རྣམས་རྗེས་མཐུན་དྲུག །ཅེས་པ་སྟེ། དེ་ལས། ས་ལེ་སྦྲམ་ནི་ལེན་པ་དང་། །གསང་བའི་གནས་ཀྱི་སྤུ་འདྲེག་དང་། །ས་རྣམས་རྐོ་བར་བྱེད་པ་དང་། །རྩྭ་སྔོན་ལ་སོགས་གཅོད་པ་དང་། །བྱིན་ལེན་མ་བྱས་ཟ་བ་དང་། །གསོག་འཇོག་བྱས་པ་ཟ་བ་ལས། །ལྡོག་པ་ཞེས་བྱ་དེ་བཞིན་གཞན། །རྗེས་མཐུན་ཆོས་ནི་དྲུག་ཏུ་འདོད། །ཅེས་གསུངས་ཤིང་། དེ་དག་དགེ་སློབ་མའི་བླངས་པ་ལས་འདས་པའི་ཉེས་བྱས་ཡིན་ལ། ཕྱོགས་མཐུན་བསྡམ་བྱ་ནི། ཉེས་མེད་བདུན་མ་གཏོགས་པ་དགེ་སློང་མའི་བསླབ་གཞི་གཞན་དག་ནི་འདིར་བླངས་པའི་ཕྱོགས་མཐུན་ཡིན་པས། དེ་དག་ལས་འདས་ན་ཡིད་ཀྱི་བསྡམ་བྱའོ། །དེ་ལ་ཉེས་མེད་བདུན་ནི། འཆང་དང་འབྲལ་དང་མེ་རེག་དང་། །སྤངས་པ་ཟ་དང་ས་བོན་འཇིག །རྩྭ་སྔོན་ཡོད་པའི་ཕྱོགས་དག་ཏུ། །མི་གཙང་འདོར་དང་ཤིང་ལ་འཛེག །ཅེས་སོ། །

གསུམ་པ་དགེ་སློང་གི་བསླབ་བྱ་ལ་གསུམ་སྟེ། གང་ཟག་གཞན་ལ་བརྟེན་ནས་བསྲུང་བ། རང་གི་བསམ་སྦྱོར་ཕུན་སུམ་ཚོགས་པས་བསྲུང་བ། ཇི་ལྟར་བསྲུང་བའི་བསླབ་བྱ་བཤད་པའོ། །དང་པོ་ནི། དགེ་ཚུལ་དང་བསྙེན་རྫོགས་བྱས་མ་ཐག་པ་དེས། རང་ཉིད་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་དང་ལྔ་ཕྲུགས་དང་ལྡན་པ་སྟེ་བརྟན་མཁས་ཀྱི་ཡོན་ཏན་གཉིས་དང་ལྡན་པ་མ་བྱུང་གི་བར་དུ་གནས་ཀྱི་བླ་མ་ཁྱད་པར་ཅན་ལ་བརྟེན་ནས་བླང་དོར་མ་ནོར་བར་བྱེད་པ་སྟེ། དེ་ལ་གནས་དང་གནས་པའི་མཚན་ཉིད་ནི། སུམ་བརྒྱ་པ་ལས། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་དག་བླ་མར་བསྔགས། །ཞེས་པས་བརྟན་མཁས་ཕན་འདོགས་ཀྱི་ཡོན་ཏན་དང་ལྡན་པ་གནས་ཀྱི་མཚན་ཉིད། དེ་ལས། སློབ་དཔོན་ལ་གུས་ཚུལ་ཁྲིམས་ཡང་དག་དང་། །བསམ་གཏན་དང་ནི་འདོན་ལ་རྟག་བརྩོན་དང་། །གྲིམས་ཤིང་དུལ་ལ་བཟོད་དང་ལྡན་པ་ནི། །སྡོམ་བརྩོན་གནས་པའི་ཆོས་ལྡན་ཤེས་པར་བྱ། །ཞེས་གནས་པ་སློབ་མའི་མཚན་ཉིད་དོ། །གནས་ཇི་ལྟར་བཅའ་ཚུལ་ནི། མཁན་པོ་ཡོད་ན་དེར་གྱུར་པ་ཉིད་ཀྱིས་གནས་ཀྱི་བླ་མར་ཡང་གྱུར་ཟིན་ཡིན་པས་གནས་གསར་དུ་འཆའ་མི་དགོས་ཏེ། མཁན་པོ་དེ་ཉིད་གནས་ཉིད་ཡིན་ནོ། །ཞེས་གསུངས་པའི་ཕྱིར། མཁན་པོ་མེད་ན་བླ་མར་འོས་པའི་དགེ་སློང་ཞིག་ལ་གནས་འཆའ་བའི་ཆོ་ག་བྱས་ཏེ། ལྷན་ཅིག་གནས་ནས་ཞག་གཉིས་པའི་སྐྱ་རེངས་ཤར་བའི་ཚེ་དེ་ཉིད་གནས་ཀྱི་སློབ་དཔོན་དུ་འགྱུར་ཞིང་། བླ་མ་གཅིག་གི་འཁོར་དུ་གནས་པ་དགེ་སློང་གི་ཚོགས་མང་པོ་དག་རུང་མོད། དགེ་ཚུལ་ནི་གཅིག་ལས་བཞག་ཏུ་མི་རུང་བར་བཤད་ལ། དེ་ཡང་ནུབ་གསུམ་ལས་ལྷག་པར་ལྷན་ཅིག་གནས་སུ་མི་རུང་བས། ལྷན་ཅིག་གནས་པ་ཞེས་ནི་མི་བྱ་སྟེ། ཉེ་གནས་ཞེས་བྱའོ། །གནས་ཀྱི་སློབ་དཔོན་ལ་བརྟེན་ཚུལ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ། །ཞེས་པས་ཉེ་འཁོར་གྱི་མཆོད་རྟེན་ལ་ཕྱག་བྱ་བ་དང་གཤང་གཅི་འདོར་བ། ཞག་གཅིག་གནས་གཞན་དུ་ཕྱིན་པ་ལ་སོགས་པའི་བྱ་བ་དང་དུས་ཀྱི་དམིགས་བསལ་གསུངས་པ་རྣམས་མ་གཏོགས་བྱ་བ་ཐམས་ཅད་རང་ཉམས་སུ་མི་གཏོང་བར་དེ་ལ་ཞུ་ཞིང་། དེས་ཀྱང་ལེགས་པར་འདོམས་པའི་སྒོ་ནས་ཚུལ་བཞིན་དུ་བསྟེན་པ་ཡིན་ནོ། །གནས་བཅས་པ་འཇིག་པའི་རྒྱུ་ནི། གཉིས་ཀ་ལ་ལྟོས་མེད་ཀྱི་འདུ་ཤེས་སྐྱེས་པའོ། །གཉིས་པ་ལ། བསམ་པ་དང་སྦྱོར་བའོ། །དང་པོ་ནི། བླང་དོར་ལ་སྤྲོ་བའི་བརྩོན་འགྲུས་དང་། འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་དང་། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་རྣམས་ལ་རྟག་ཏུ་བསྟེན་དགོས་ཏེ། ཉེས་པ་འབྱུང་བའི་རྒྱུའི་གཙོ་བོ་ནི། མི་ཤེས་པ་དང་། མ་གུས་པ་དང་བག་མེད་པ་དང་། ཉོན་མོངས་པ་མང་བ་རྣམས་ཡིན་པས། དེ་དག་རྣམ་པར་སུན་འབྱིན་པའི་གཉེན་པོ་བསྟེན་པར་བྱ་དགོས་པའི་ཕྱིར་རོ། །

གཉིས་པ་ནི། རང་གིས་ཇི་ལྟར་ཁས་བླངས་པའི་བླང་དོར་གྱི་གནས་རྣམས་ཤེས་པའི་ཆེད་དུ་འདུལ་བའི་སྡེ་སྣོད་ལ་ཐོས་བསམ་ལེགས་པར་བྱ་དགོས་ཏེ། རིན་ཆེན་ཕྲེང་བ་ལས། དེ་ནས་རབ་ཏུ་བྱུང་བ་ཡིས། །དང་པོར་བསླབ་ལ་རབ་གུས་བྱ། །སོ་སོར་ཐར་པ་འདུལ་བཅས་པ། །མང་ཐོས་དོན་གཏན་དབབ་ལ་བསྒྲིམས། །ཞེས་གསུངས་པའི་ཕྱིར།

གསུམ་པ་ལ་གཉིས་ཏེ། དགག་པའི་དང་། སྒྲུབ་པའི་བསླབ་བྱའོ། །དང་པོ་ལ། སྤྱི་དང་། ཡན་ལག་གི་དོན་གཉིས་ལས། དང་པོ་ལའང་། བསླབ་པ་འཆའ་བའི་རྒྱུ། བཅས་པའི་ཕན་ཡོན། ཕན་ཡོན་ཅན་གྱི་བསླབ་བྱའོ། །དང་པོ་ནི། སྟོན་པས་གང་ལ་བརྟེན་ནས་བསླབ་པ་འཆའ་བར་མཛད་པ་བྱུང་བ་དང་བཅས་པའི་གླེང་གཞི་རྣམས་ཏེ། ཡུལ་གང་དུ། གང་ཟག་གང་གིས། ཉོན་མོངས་པ་ཇི་ལྟ་བུས་ཉེས་པ་གང་བྱས་པ་རྣམས་ཀྱིས་ཤེས་པར་བྱའོ། །འོ་ན་བཅས་པ་མཛད་པ་དུས་ནམ་གྱི་ཚེ་ཡིན་ཞེ་ན། ཁ་ཅིག་ད་ལྟར་གྱི་ཆོ་ག་དང་དུས་མཚུངས་པར་བྱུང་བ་དང་བཅས་པ་མཛད་ཟེར་ཡང་། མི་འཐད་དེ། སྟོན་པ་སངས་རྒྱས་ནས་ལོ་དྲུག་པ་ལ་འཆར་ཀ་ད་ཆོག་གིས་རྫོགས་པར་བཤད་ཅིང་། བཅས་པ་མཛད་པ་ནི་ལོ་བཅུ་གཉིས་འདས་ནས་ཡིན་པར་གསུངས་པའི་ཕྱིར། དེ་ལྟར་ཡང་། ས་གའི་ལྷས། སྟོན་ཀའི་ཆུ་བཞིན་དྲི་མེད་པར། །སྟོན་པའི་བསྟན་པ་བཅུ་གཉིས་ལོར། །ལྟུང་བ་མེད་པར་ལེགས་གནས་ཏེ། །ཉོན་མོངས་སྤོང་བར་བྱེད་པ་ཡིན། །ཞེས་སོ། །

གཉིས་པ་ནི། བསླབ་པ་བཅས་པ་ལ་ཕན་ཡོན་བཅུ་གསུངས་ཏེ། དེའི་སྡོམས་ནི། དགེ་འདུན་བསྡུ་དང་ལེགས་པར་བསྡུ། །བདེར་གནས་གནོད་མི་འཁུར་ཚར་གཅོད། །ངོ་ཚ་ཤེས་རྣམས་བདེར་གནས་དང་། །མ་དད་དད་དང་དད་རྣམས་འཕེལ། །འདི་ཡི་ཟག་བསྡམ་ཕྱི་མའི་ལྡོག །བསྟན་པ་ཡུན་རིང་གནས་པའོ། །ཞེས་པའི་དོན་ནི། རྣམ་པར་བཤད་པའི་སྒོ་བསྡུ་བ་ལས། དང་པོ་ནི་མདོར་བསྟན་ནོ། །གཉིས་པ་ནི་འདོད་པ་བསོད་ཉམས་ཀྱི་མཐའ་སྤོང་བའོ། །གསུམ་པ་ནི་ངལ་ཞིང་དུབ་པའི་མཐའ་སྤོང་བའོ། །བཞི་པ་ནི་ཚུལ་འཆལ་རྣམས་ནན་ཏུར་བྱ་བའི་ཕྱིར་རོ། །ལྔ་པ་ནི་ཚུལ་ལྡན་རྣམས་སྡིག་པའི་འགྱོད་པ་མེད་པའི་ཕྱིར་རོ། །དྲུག་པ་ནི་མ་ཞུགས་པ་རྣམས་གཞུག་པའི་ཕྱིར་རོ། །བདུན་པ་ནི་ཞུགས་པ་རྣམས་སྨིན་པའི་ཕྱིར་རོ། །བརྒྱད་པ་ནི་ཀུན་དཀྲིས་རྣམ་པར་གནོན་པ་དང་མཐུན་པའི་ཕྱིར་རོ། །དགུ་པ་ནི་ལེགས་སྨོན་གྱི་ཚངས་སྤྱོད་རྣམས་བསལ་བའི་ཕྱིར་རོ། །བཅུ་པ་ནི་བསྟན་པ་རྒྱུན་མི་ཆད་པར་བྱ་བའི་ཕྱིར་རོ། །ཞེས་བཤད་དོ། །

གསུམ་པ་ལ། ལྟུང་བའི་རྒྱུ། ངོ་བོ། མཚན་ཉིད། དབྱེ་བའོ། །དང་པོ་ལ་གསུམ་སྟེ། སྡེ་ལྔའི་དངོས་གཞི་ཇི་ལྟ་བ་བཞིན་སྐྱེད་པའི་རྒྱུ་རྟེན་གྱི་གང་ཟག་ནི། སྡོམ་པ་གསོར་རུང་ཡན་ཆད་དང་ལྡན་པ། སྟོན་པའི་བཅས་པ་དང་འབྲེལ་བ། ཤེས་པ་རང་བཞིན་དུ་གནས་པ་དང་གསུམ་ཚང་བ་ཞིག་དགོས་སོ། །ཀུན་སློང་ཐུན་མོང་པའི་རྒྱུ་ནི། འདུལ་བའི་མ་མོ་བསྡུ་བར། དེ་ཡི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པའོ། །ཞེས་སོ། །བྱེད་རྒྱུ་ཐུན་མོང་མ་ཡིན་པ་ནི། གཞི་གང་ལ་ལྟུང་བ་འབྱུང་བ་གཙོ་བོའི་རྒྱུ་སྟེ། མིའམ་མིར་ཆགས་པ་ལ་དེར་འདུ་ཤེས་པ་ནི་སྲོག་གཅོད་ཀྱི་ཕམ་པའི་བྱེད་རྒྱུ་ཡིན་པ་བཞིན་ནོ། །གཉིས་པ་ནི། སྟོན་པས་རབ་བྱུང་གི་རྟེན་ལ་བཅས་པའི་བསླབ་པ་ལས་འདས་པའི་ལུས་ངག་གི་ལས་ནི་ལྟུང་བའི་ངོ་བོ་སྟེ། སྤོང་བདུན་གྱི་རང་བཞིན་ཚུལ་ཁྲིམས་ཀྱི་མི་མཐུན་ཕྱོགས་སུ་གྱུར་པའི་ལྟུང་བ་ཡིན་པའི་ཕྱིར། མཛོད་ལས། འཆལ་པའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །སངས་རྒྱས་ཀྱིས་ནི་བཅད་པ་ཡང་། །ཞེས་སོ། །གསུམ་པ་ནི། སོ་ཐར་གྱི་སྡོམ་ལྡན་དུ་ཁས་འཆེ་བའི་གང་ཟག་གིས་ལུས་ངག་གི་བཅས་པ་ལས་འདས་པའི་ཁ་ན་མ་ཐོ་བའོ། །འོ་ན་དགེ་སློང་མས་ཟླ་བོའི་ཕམ་པ་འཆབ་པ་དང་། གསོ་སྦྱོང་གི་དུས་སུ་ཅི་འདི་ལ་ཁྱོད་ཡོངས་སུ་དག་གམ་ཞེས་དྲིས་པ་ན་ལྟུང་བ་ཤེས་བཞིན་དུ་འཆབ་པ་དག་ལྟུང་བ་མ་ཡིན་པར་ཐལ། ལུས་ངག་གི་བཅས་པ་ལས་འདས་པ་མ་ཡིན་པའི་ཕྱིར་ཞེ་ན། དེ་དག་ལ་ལུས་ངག་གི་རིག་བྱེད་རགས་པ་མེད་ཀྱང་ཁ་འགྱུར་བ་དང་བ་སྤུ་གཡོ་བ་སོགས་ཀྱི་རིག་བྱེད་ཕྲ་མོ་དང་ལྡན་པའི་གཟུགས་ཡོད་པའི་ཕྱིར་སྐྱོན་མེད་དོ། །དེས་ན། ཡིད་ཀྱི་སྡོམ་པ་ལེགས་པ་སྟེ། །ཞེས་པའང་བླང་དོར་མི་བརྗེད་པའི་དྲན་ཤེས་ལ་ཡིད་ཀྱི་སྡོམ་པའི་མིང་གིས་བཏགས་པ་ཙམ་དུ་ཟད་དེ། ཡིད་ཁོ་ན་ལ་ལྟུང་བ་རྣམ་པར་བཞག་པ་མེད་པའི་ཕྱིར། ལུང་གཏམ་གྱི་གཞི་ལས། སེམས་ལས་བྱུང་བ་འབའ་ཞིག་གི་ལྟུང་བ་མེད་དོ། །ཞེས་སོ། །བཞི་པ་ལ། ངོ་བོའི། ཡན་ལག་གིརྒྱུ་འབྲས་ཀྱི། སྡེ་ཚན་གྱི་སྒོ་ནས་དབྱེ་བའོ། །དང་པོ་ལ། རང་བཞིན་དང་བཅས་པའི་ཁ་ན་མ་ཐོ་བ་གཉིས་ཏེ། སྤྱིར་བཅས་པ་མེད་པའི་རྒྱུད་ལ་འབྱུང་བའི་མི་དགེ་བ་ལ་རང་བཞིན་གྱི་ཁ་ན་མ་ཐོ་བ་ཞེས་གྲགས་ཀྱང་འདིར་འཆད་པའི་སྐབས་མ་ཡིན་ལ། འདིར་ལྟུང་བར་གྱུར་པའི་རང་བཞིན་གྱི་ཁ་ན་མ་ཐོ་བའི་མཚན་ཉིད། བཅས་ལྡན་དགེ་སློང་གི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །ལྟུང་བ་ཁྱོད་ཀྱི་དུས་ཀྱི་ཀུན་སློང་དེ་ཉོན་མོངས་པ་ཅན་གྱིས་ངེས་པར་བྱེད་དགོས་པའོ། །དེ་གང་ཞིག །ལྟུང་བ་ཁྱོད་ཀྱི་དུས་ཀྱི་ཀུན་སློང་གི་རིགས་ལ་ཉོན་མོངས་པ་ཅན་ཡང་སྲིད་ལུང་མ་བསྟན་ཡང་སྲིད་པ་དེ་བཅས་རྐྱང་གི་མཚན་ཉིད་དོ། །དེས་ན་མ་བྱིན་ལེན་གྱི་ཕམ་པ་ལྟ་བུ་རང་བཞིན་དང་འབྲེལ་པའི་བཅས་ལྟུང་དང་། སྐྱེ་བ་གཅོད་པའི་ལྟུང་བྱེད་ལྟ་བུ་བཅས་རྐྱང་གི་ལྟུང་བ་ཡིན་ལ། དེ་གཉིས་འགལ་བ་མ་ཡིན་ཏེ། བསྙེན་པར་རྫོགས་པའི་རྒྱུད་ཀྱི་མ་བྱིན་ལེན་གྱི་ཕམ་པ་དེ། རྣམ་སྨིན་སྡུག་བསྔལ་བསྐྱེད་པའི་ཆ་ནས་རང་བཞིན་དང་། སྟོན་པའི་བཅས་འགལ་གྱི་ཆ་ནས་བཅས་ལྟུང་དུ་བཞག་པའི་ཕྱིར་རོ། །དེ་ལ་བྱེ་བྲག་ཏུ་སྨྲ་བས་ནི། ལྟུང་བའི་ངོ་བོ་གཟུགས་ཅན་དུ་འདོད་དེ། སོ་ཐར་གྱི་སྡོམ་པའི་འགལ་ཟླའི་ཉེས་པ་ཡིན་ན་ལུས་ངག་གི་ལས་ཡིན་དགོས་པ་གང་ཞིག །དེ་ལ་རིག་བྱེད་ཡིན་མིན་གྱི་དབྱེ་བས་གཉིས་སུ་འབྱེད་དོ། །ཇི་ལྟར་ན། རང་བཞིན་གྱི་ཁ་ན་མ་ཐོ་བའི་སྦྱོར་མཇུག་གི་ལྟུང་བ་ལ་རིག་བྱེད་ཡིན་མིན་གཉིས་ཀ་ཡོད་ཅིང་། དངོས་གཞིའི་ལྟུང་བ་ལ་རིག་བྱེད་མ་ཡིན་པས་ཁྱབ་པ་དང་། བཅས་པའི་ཁ་ན་མ་ཐོ་བའི་དབང་དུ་བྱས་པའི་དངོས་གཞི་ལའང་རིག་བྱེད་ཀྱི་གཟུགས་འདོད་པའི་སྐབས་ཡོད་དེ། དགྲ་བཅོམ་པའི་རྒྱུད་ཀྱི་བཅས་ལྟུང་བཞིན་ནོ། །དེ་ཡང་ལུང་གཏམ་གྱི་གཞི་ལས། དགེ་སློང་དགྲ་བཅོམ་པས་བྱེད་ན་ཉེས་པ་དེ་ཐམས་ཅད་ཀྱང་ལུང་དུ་མ་བསྟན་པའི་སེམས་ཀྱིས་བྱེད། ཅེས་གསུངས་པ་ལྟར་དེ་འདྲ་དེ་ལུང་མ་བསྟན་ཡིན་པས་རིག་བྱེད་མིན་པའི་གཟུགས་སུ་མི་འཐད་དེ། མཛོད་ལས། རྣམ་རིག་མིན་ལུང་བསྟན་མིན་མེད། །ཅེས་གསུངས་པའི་ཕྱིར།

གཉིས་པ་ཡན་ལག་གི་སྒོ་ནས་དབྱེ་ན། དངོས་པོ་གཙོ་བོར་གྱུར་པ་དང་། འདུ་ཤེས་གཙོ་བོར་གྱུར་པ་གཉིས། དང་པོ་ནི། མི་ཚངས་སྤྱོད་ཀྱི་ཕམ་པ་ལྟ་བུ། གཉིས་པ་ནི། རྫུན་སྨྲ་བའི་ལྟུང་བ་ལྟ་བུའོ། །གསུམ་པ་རྒྱུ་འབྲས་ཀྱི་སྒོ་ནས་ཕྱེ་ན་གསུམ་སྟེ། སྦྱོར་བའི་སྦྱོར་བ་དང་། སྦྱོར་བ་དང་། དངོས་བཞིའི་ལྟུང་བའོ། །དང་པོ་ནི། བྱ་བ་དེ་རྩོམ་པའི་ཕྱིར་སེམས་བསྐྱེད་པ་དང་སྟན་ལས་ལྡང་བ་ལ་སོགས་པ་སྟེ། ཉེས་བྱས་ཁོ་ན་ཡིན་ལ། དེ་ཡང་ཡིད་ལ་འགྱུ་བ་ཙམ་ལ་བསྡམ་བྱ་དང་། ལུས་ངག་ཏུ་འཐོན་ནས་བཤགས་བྱའི་ཉེས་བྱས་སོ། །གཉིས་པ་ནི་བྱ་བ་དེ་ལ་དངོས་སུ་སྦྱོར་བར་བྱེད་པའི་ལུས་ངག་གི་ལས་ཏེ། དབྱེ་ན། ཕམ་ལྷག་གི་སྦྱོར་བ་ནི་སྦོམ་པོ་དང་། གཞན་རྣམས་ཀྱི་སྦྱོར་བ་ནི་ཉེས་བྱས་ཁོ་ན་ཡིན་ནོ། །གསུམ་པ་ནི། བྱ་བ་དེ་མཐར་ཐུག་པའོ། །འཕྲོས་དོན་སྦོམ་པོ་ལ། སྤྱིར་ཡོན་ཏན་གྱི་སྒྲའི་སྦོམ་པོ་ཞེས་ཕམ་ལྷག་ལྟ་བུ་ལྕི་བ་དང་ལྟུང་བྱེད་མན་ཆད་ལྟ་བུའི་ཉེས་པ་མང་བ་ལ་ཟེར་བའི་ལུགས་ཀྱིས་སྡེ་ལྔ་ག་ལ་དེའི་མིང་གིས་བཏགས་ནས་བསྟན་པས་ན་སྦོམ་པོ་བཏགས་པ་བ་ཡིན་ལ། འདིར་མིང་དུ་ཆགས་པའི་སྦོམ་པོ་ཞེས་པ་སྦོམ་པོ་མཚན་ཉིད་པ་སྟེ། དབྱེ་ན། ཕམ་ལྷག་གང་རུང་གི་དངོས་གཞི་སྐྱེད་ངེས་པའི་སྔོན་འགྲོའ་ིསྦོམ་པོ་ལྟ་བུ་སྦྱོར་བའི་སྦོམ་པོ་དང་། དངོས་གཞིའི་དུས་སུ་ཕམ་ལྷག་གང་རུང་སྐྱེད་པར་མི་བྱེད་ཀྱང་རང་གི་ངོ་བོ་ཕམ་ལྷག་གང་རུང་གི་སྦྱོར་བ་དང་ཆ་འདྲ་བ་སྦྱོར་བའི་རྣམ་པའི་སྦོམ་པོ་སྟེ། དཔེར་ན་མིའིི་འགྲོ་བ་པ་ལ་འཆི་ངེས་ཀྱི་མཚོན་བསྣུན་ནས་གསོད་སེམས་ལོག་པའི་སྦྱོར་བ་ལྟ་བུའོ། །ཕམ་ལྷག་གང་རུང་གི་མཐར་ཐུག་གི་རིགས་སུ་གནས་ཀྱང་རྒྱུ་ཚོགས་འགའ་ཞིག་མ་ཚང་བས་རང་གི་ངོ་བོ་ཕམ་ལྷག་གི་དངོས་གཞིའི་ཆར་གཏོགས་པའི་ཉེས་པ་རྣམས་ནི་དངོས་གཞིའི་རྣམ་པའི་སྦོམ་པོ་སྟེ། དཔེར་ན་ལྷའི་རྟེན་གྱི་དགྲ་བཅོམ་པ་བསད་པ་དང་། གསོད་སེམས་མེད་ཀྱང་ཞེ་སྡང་གིས་མིའི་འགྲོ་བ་པའི་ལག་པ་གཅོད་པའི་དངོས་གཞིའི་ལྟུང་བ་ལྟ་བུའོ། །བཞི་པ་སྡེ་ཚན་གྱི་སྒོ་ནས་ཕྱེ་ན། སྡེ་ལྔ་སྟེ། ཕམ་པ་དང་། ལྷག་མ་དང་། ལྟུང་བྱེད་དང་། སོར་བཤགས་དང་། ཉེས་བྱས་སོ། །ལྟུང་བྱེད་ལ་གཉིས་ཏེ། དངོས་པོ་དེ་སྤངས་ནས་བཤགས་དགོས་པ་སྤང་ལྟུང་དང་། དེ་འདྲའི་ཆད་ལས་ལ་མི་ལྟོས་པ་འབའ་ཞིག་པའོ། །དེ་ཡང་སྦོམ་པོ་ནི་ཕམ་ལྷག་གང་རུང་དང་། སྦྱོར་བའི་ཉེས་བྱས་རྣམས་ཀྱང་རང་རང་གི་སྡེ་ཚན་དེ་དང་དེར་གཏོགས་ལ། གཞི་བཅུ་བདུན་ནས་བཤད་པའི་ཉེས་བྱས་རྣམས་ཀྱང་ཉེས་བྱས་ཀྱི་སྡེ་ཚན་ལས་གཞན་མ་ཡིན་པས་སྡེ་ལྔའི་རིགས་སུ་མ་འདུས་པའི་ལྟུང་བ་མེད་ཅིང་དེས་ན་ཉེས་བྱས་ཡིན་ན་སོ་ཐར་གྱི་མདོའི་སྡོམ་ཚིག་གིས་བསྡུས་པའ་ིཉེས་བྱས་ཡིན་པས་མ་ཁྱབ་བོ། །སྡེ་ཚན་ལྔ་པོའི་ཁྱད་པར་ཡང་ཀུན་སློང་གི་སྒོ་ནས་འབྱེད་དགོས་ཏེ། དཔེར་ན་བུད་མེད་ལ་རེག་པ་ལྟ་བུ་མི་ཚངས་སྤྱོད་ཀྱི་ཀུན་སློང་གིས་བསླངས་ན་དེའི་སྦྱོར་བ་དང་། དེས་མ་བསླངས་ན་དགེ་འདུན་ལྷག་མར་འགྲོ་བ་བཞིན་ཏེ། དེའི་ཆ་ནས་དེར་རྟོགས་སོ། །ཞེས་གསུངས་པའི་ཕྱིར། །གཉིས་པ་ཡན་ལག་གི་དོན་ལ་གཉིས་ཏེ། དགེ་སློང་ཕའི་བསླབ་བྱ་དང་། དགེ་སློང་མའི་བསླབ་བྱ་བཤད་པའོ། །དང་པོ་ནི། དགེ་སློང་ཁྲིམས་ལ་ཉིས་བརྒྱ་ལྔ་བཅུ་གསུམ། །ཞེས་པ་སྟེ། ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་ཏེ། ཉིས་བརྒྱ་དང་ལྔ་བཅུ་རྩ་གསུམ་མོ། །དང་པོ་ལ། བསྟན་བཤད་བསྡུ་གསུམ་ལས། དང་པོ་ནི། སྡོམ་པའི་རྩ་བ་ཕམ་པ་བཞི་ཞེས་པ། །ཞེས་པས་བཅས་ལྡན་དགེ་སློང་གིས་འདི་བཞི་གང་རུང་ལ་སྤྱད་ནས་སྐད་ཅིག་མ་གཅིག་བཅབས་ཀྱང་སྡོམ་པ་ལྷག་མ་མེད་པར་གཅོད་པར་བྱེད་པས་ན་རྩ་བའི་ལྟུང་བ་སྟེ། མི་མཐུན་ཕྱོགས་ཀྱིས་གཉེན་པོ་མཐུ་མེད་པར་བཅོམ་པའི་ཕྱིར་ཕམ་པ་བཞི་ཞེས་བྱའོ། །མཚན་ཉིད་ནི། བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིགརང་གི་དག་བྱེད་བསླབ་པ་བྱིན་ནས་སྤྱོད་པའི་རིགས་གནས་ཕམ་པ་ཙམ་གྱི་མཚན་ཉིད། ཕམ་པ་གང་ཞིག །རྟེན་དེ་ལ་རྒྱུད་གསོར་རུང་དུ་བྱས་པ་འཆབ་མེད་དང་། སོར་ཆུད་པ་མི་སྲིད་པ་ཕམ་པ་འཆབ་བཅས་ཀྱི་མཚན་ཉིད་དོ། །

གཉིས་པ་རྒྱས་བཤད་ལ་བཞི་ལས། དང་པོ་མི་ཚངས་སྦྱོད་ཀྱི་ཕམ་པ་ནི། གཞི་ཡི་ཡན་ལག་ཆ་ཀུན་བཟུང་འོས་པ། །སྐྱེ་གནས་ལམ་དུ་ཕོ་དབང་ལས་རུང་ནི། །བསམ་པ་ངོ་ཚ་འཇིགས་མེད་ཆགས་སེམས་ཀྱིས། །སྦྱོར་བ་དྲུད་པ་མཐར་ཐུག་སིམ་པ་ཐོབ། །དེས་ནི་ཚངས་པར་སྤྱོད་ལས་རྣམ་པར་ཉམས། །ཞེས་པ་སྟེ། གླེང་གཞི་སྟོན་པ་མངོན་པར་རྫོགས་པ་སངས་རྒྱས་ནས་ལོ་བཅུ་གསུམ་པ་ལ་ཡུལ་སྤོང་བྱེད་དུ་གང་ཟག་དགེ་སློང་བཟང་བྱིན་གྱིས་ཉོན་མོངས་པ་འདོད་ཆགས་ཀྱིས་ཉེས་པ་སྔར་གྱི་ཁྱིམ་ཐབ་ལ་མི་ཚངས་སྤྱོད་སྤྱད་པ་ལ་བརྟེན་ནས་བཅས་པ་མཛད་དོ། །དེ་ཡང་གཞི་བསམ་སྦྱོར་བ་མཐར་ཐུག་གི་ཡན་ལག་བཞི་ལས། གཞི་ནི་བརྟེན་བྱ་ཡུལ་འཁྲིག་པའི་རོའི་བདེ་བ་བསྐྱེད་ནུས་ཀྱི་ཡན་ལག་དེ་ཉིད་ཚང་བ་ནི་ཡན་ལག་གི་ཆ་ཀུན་བཟུང་བར་འོས་པ་སྟེ། ལུས་ཕྱེད་དུ་ལོངས་པ་ཡན་ཆད་ཀྱི་སྐྱེ་གནས་སུ་གཏོགས་པའི་ཁའམ་གཤང་ལམ་མམ་ཆུ་ལམ་གསུམ་པོ་གང་ཡང་རུང་བ་མ་ཉམས་པ་དོན་བྱེད་ནུས་པའོ། །རྟེན་བྱེད་རང་གི་ཕོ་དབང་ནད་མེད་ལས་སུ་རུང་བའོ། །བསམ་པ་ངོ་ཚ་དང་འཇིགས་སྐྲག་མེད་ཅིང་ཆགས་པར་གྱུར་པས་ཀུན་སློང་རེག་བདེ་ཉམས་སུ་མྱོང་འདོད་ཀྱིས། སྦྱོར་བ་བརྟེན་བྱར་སྩལ་ཞིང་དྲུད་པས། མཐར་ཐུག་ལམ་གསུམ་གྱི་མཚམས་ལས་འདས་ནས་སིམ་པ་ཐོབ་པ་སྟེ། བདེ་བ་ལུས་ཀྱིས་མྱོང་ཞིང་ཡིད་ཀྱིས་བདག་གིར་བྱས་པའོ། །དེ་ལྟ་བུའི་ཡན་ལག་ཚང་ན་མི་ཚངས་སྤྱོད་ཀྱི་ཕམ་པའི་དངོས་གཞིར་འགྱུར་ཏེ། ས་གའི་ལྷས། ཁ་ཤུན་སོ་དང་པགས་པ་ལས། །ནོར་བུ་འདས་ན་ཕས་ཕམ་སྟེ། །ཕྱི་རོལ་ཆར་ནི་ཅི་རིགས་པར། །སྦོམ་པོའམ་དགེ་འདུན་ལྷག་མའོ། །ཞེས་སོ། །

གཉིས་པ་མ་བྱིན་ལེན་གྱི་ཕམ་པ་ནི། བརྐུ་བའི་གཞི་ནི་མི་གཞན་ནོར་ཡིན་པ། །བསམ་པ་རང་ཉིད་འཚོ་ཕྱིར་རྐུ་སེམས་ཀྱིས། །ཡུལ་དུས་རིན་ཐང་ཚང་བ་སྦྱོར་བས་བརྐུས། །མཐར་ཐུག་བརྐུས་སམ་བརྐུར་བཅུག་རྩད་ནས་ཐོབ། །ཅེས་པ་སྟེ། གླེང་གཞི་རྒྱལ་པོའི་ཁབ་ཏུ་དགེ་སློང་ནོར་ཅན་གྱིས་རང་གི་ཁང་པ་བརྩིག་པའི་ཕྱིར་མ་སྐྱེས་དགྲའི་ཤིང་བརྐུས་པ་ལ་བརྟེན་ནས་བཅས་སོ། །ཡན་ལག་ལ་བཞི་ལས། གཞི་ནི་ཡུལ་རང་དང་ནོར་མི་གཅིག་པའི་མིའི་འགྲོ་བ་པས་བདག་ཏུ་བཟུང་བའི་རྫས། དངོས་པོ་ཁ་ཟས་དང་དུར་ཁྲོད་ཀྱི་རྫས་སོགས་དམན་པ་མ་ཡིན་པ། ཡུལ་གང་དུ་དུས་དེར་སྦྱོར་བ་གཅིག་གི་ནང་དུ་བརྐུ་བྱ་རྐུ་བྱེད་གཉིས་ཀ་ལ་ལྟོས་པའི་རིན་ཐང་ཚང་བ་སྟེ། དེའི་ཚད་ནི་ཀཱ་རི་ཀཱ་ལྔ་བཅུ་པ་ལས། ཀར་ཤ་པ་ནའི་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་པའི་ཀར་ཤ་པ་ནའི་བཞི་ཆ་རིན་ཐང་གི་ཚད་ཡིན་ལ། དེ་ཡང་རྒྱ་གར་དུ་མགྲོན་བུ་བསྲེགས་པའི་ཐལ་བ་ལ་རྩིས་པོ་ཆེར་བྱེད་པས་མགྲོན་བུའི་རིན་ཐང་དང་སྦྱར་ན། ཀ་ཀ་ནི་རེ་ལ་མགྲོན་བུ་ཉི་ཤུ། ཀ་ཀ་ནི་བཞི་ལ་མ་ཤ་ཀ་གཅིག་སྟེ་མགྲོན་བུ་བརྒྱད་ཅུ། མ་ཤ་ཀ་ཉི་ཤུ་ལ་ཀར་ཤ་པ་ན་གཅིག་སྟེ་མགྲོན་བུ་སྟོང་དྲུག་བརྒྱ་ཡིན། དེའི་བཞི་ཆ་མགྲོན་བུ་བཞི་བརྒྱའི་ཚད་མ་ཤ་ཀ་ལྔ་རིན་ཐང་གི་ཚད་དེ། སྤྱིར་མ་ཤ་ཀ་ཇི་ཙམ་ལ་ཀར་ཤ་པ་ནར་བྱེད་པའི་ཚད་མཐའ་གཅིག་ཏུ་མ་ངེས་ཀྱང་། འདིར་མདོ་རྩ་བ་ལས་འབྲིང་ཚད་མ་ཤ་ཀ་ལྔ་ལ་མཛད་པ་ལྟར་རོ། །དེ་གསེར་གྱི་རིན་ཐང་དུ་རྩིས་ན། ཀ་ཀ་ནི་ཞེས་གུཉྩ་སྟེ་མ་རུ་མགོ་ནག །དེ་བཞི་ལ་མ་ཤ་ཀ་སྟེ་གསེར་སེ་བ་དོ། དེ་ལྔ་ལ་ཀར་ཤ་པ་ནའི་བཞི་ཆ་སྟེ་གསེར་སེ་བ་བཅུ་ཡིན་པས། འདིར་ནས་ཁལ་ལྔ་ཙམ་རིན་ཐང་གི་ཚད་དུ་རིགས་ཏེ། མུ་གེ་མེད་པའི་དུས་སུ་གསེར་སེ་བ་ཉི་ཤུ་ལ་དབུས་ཞོ་གང་དུ་བྱས་པའི་ཞོ་རེ་ལ་ནས་ཁལ་བཅུ་མ་བྱེད་པའི་ཕྱིར། བསམ་པ་མིའི་རྫས་ལ་དེ་ཡིན་པར་འདུ་ཤེས་པའམ་ཡིད་གཉིས་ཟ་བས་ཀུན་སློང་རང་འཚོ་བའི་ཆེད་དུ་བརྐུ་འདོད་ཀྱིས། སྦྱོར་བ་རིན་ཐང་ཚང་བའི་དངོས་པོ་ལུས་ངག་གི་རིག་བྱེད་དུ་གྲུབ་པས་རྐུ་བར་རྩོམ་པ། མཐར་ཐུག་རང་གིས་བརྐུས་སམ་གཞན་བརྐུར་བཅུག་པའམ་རྩད་པ་གང་ཡང་རུང་བས་བརྐུ་བྱའི་རྫས་བདག་པོ་དང་ཕྲལ་ནས་བདག་གིར་བྱས་པའི་ཚུལ་གྱིས་ཐོབ་བློ་སྐྱེས་པའོ། །

གསུམ་པ་སྲོག་གཅོད་ཀྱི་ཕམ་པ་ནི། སྲོག་གཅོད་གཞི་ནི་མི་གཞན་མ་འཁྲུལ་བར། །བསམ་པ་གསོད་སེམས་གསད་བྱ་དེར་ཤེས་པ། །སྦྱོར་བ་གསོད་པར་བརྩམས་ནས་མ་བཟློག་པ། །མཐར་ཐུག་སྲོག་གི་དབང་པོ་འགགས་པ་དང་། །གསོད་བཅུག་ཡི་རང་བསྔགས་སོགས་རྐྱེན་བྱས་ཀྱང་། །ཞེས་པ་སྟེ། གླེང་གཞི་ཡུལ་སྤོང་བྱེད་དུ་དགེ་སློང་མང་པོ་མི་སྡུག་པའི་ཏིང་ངེ་འཛིན་བསྒོམས་པས་ལུས་མི་གཙང་བས་ཡིད་བྱུང་ནས་དགེ་སྦྱོང་སྦེད་ལ་གསོད་དུ་བཅུག་པ་ལ་བརྟེན་ནས་བཅས་སོ། །ཡན་ལག་ལ་བཞི་ལས། གཞི་ནི་མིའམ་མིར་ཆགས་པ་རང་ལས་རྒྱུད་གཞན་པ། བསད་དོ་བསམ་པ་དེ་ཉིད་མ་འཁྲུལ་པའོ། །བསམ་པ་གསད་བྱ་དེར་འདུ་ཤེས་པས་ཀུན་སློང་གསོད་སེམས་རྒྱུན་མ་ཆད་པ། སྦྱོར་བ་དུག་མཚོན་སོགས་ཀྱིས་གསོད་པར་བརྩམས་པ་ལས་མ་བཟློག་པས། མཐར་ཐུག་དེའི་ཚེའམ་གཞན་གྱི་ཚེ་གསོད་པ་པོ་རང་ཉིད་མ་ཤི་བའི་སྔ་རོལ་ཏུ་གསད་བྱའི་སྲོག་འགགས་པ་སྟེ། སུམ་བརྒྱ་པར། གང་ཞིག་རང་བཞིན་གནས་ལ་བསླབ་བཅས་པས། །མི་གཞན་ཡིན་ལ་མིར་ནི་འདུ་ཤེས་དང་། །བསད་པའི་བསམ་པས་འཁྲུལ་མེད་གསོད་བྱེད་ཅིང་། །མི་ཤི་རྨི་ལམ་མ་གཏོགས་དེས་བརླག་འགྱུར། །ཞེས་སོ། །དེ་ཡང་རང་གིས་བསད་པ་ཙམ་དུ་མ་ཟད། གཞན་གསོད་དུ་བཅུག་པ་དང་གསོད་པ་ལ་ཡི་རང་བའི་བསྔགས་པ་བརྗོད་པ་ལ་སོགས་པས་རྐྱེན་བྱས་ཏེ་ཤི་ནའང་འདྲ་ཞིང་། དགེ་སློང་མང་པོས་གྲོས་བྱས་ནས་གཅིག་གིས་བསད་ཀྱང་ཐམས་ཅད་ལ་ཕམ་པ་འབྱུང་སྟེ། མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་པའི་ཕྱིར།

བཞི་པ་རྫུན་སྨྲའི་ཕམ་པ་ནི། རྫུན་གྱི་གཞི་ནི་སྨྲ་ཤེས་དོན་གོའི་མིར། །བསམ་པ་འདུ་ཤེས་བསྒྱུར་ནས་བརྗོད་བློ་སྐྱེས། །སྦྱོར་བ་མངོན་ཤེས་ལ་སོགས་ཡོན་ཏན་ཚོགས། །མེད་ཀྱང་ཡོད་ཅེས་བླ་མའི་རྫུན་སྨྲས་པ། །མཐར་ཐུག་གཞན་གྱིས་རྫུན་དེ་གོ་ན་ཉམས། །ཞེས་པ་སྟེ། གླེང་གཞི་ཡུལ་ཡངས་པ་ཅན་དུ་ཉ་པ་ལས་རབ་ཏུ་བྱུང་བའི་དགེ་སློང་ལྔ་བརྒྱས་མི་ཆོས་བླ་མའི་རྫུན་སྨྲས་པ་ལ་བརྟེན་ནས་བཅས་སོ། །ཡན་ལག་ལ་བཞི་ལས། གཞི་ནི་གང་ལ་སྨྲ་བའི་ཡུལ་རང་ལས་རྒྱུད་གཞན་པའི་མི་ཐ་སྙད་ལྔ་ལྡན་ཏེ། སྨྲ་ཤེས་པ། དོན་གོ་བ། ཤེས་པ་རང་བཞིན་དུ་གནས་པ། མ་ནིང་དང་མཚན་གཉིས་པ་མ་ཡིན་པའོ། །གང་སྨྲ་བའི་དངོས་པོ་ནི་འདོད་ཁམས་ལས་གོང་དུ་འཕགས་པ་བསམ་གཏན་དང་པོ་ནས་སངས་རྒྱས་ཀྱི་བར་གྱི་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གང་རུང་སྟེ། ས་གའི་ལྷས། འདིར་ནི་སྒྲིབ་པ་རྣམ་པ་ལྔ། །མི་རྣམས་ཀྱི་ནི་ཆོས་སུ་ཐོས། །དེ་ཟད་བླ་མའི་ཆོས་སུ་འདོད། །ཅེས་སོ། །བསམ་པ་འདུ་ཤེས་བསྒྱུར་ནས་རྫུན་བརྗོད་འདོད་ཀྱི་བློ་སྐྱེས་པ། སྦྱོར་བ་མངོན་ཤེས་སོགས་གཞན་ལས་ཁྱད་པར་དུ་གྱུར་པའི་ཡོན་ཏན་གྱི་ཚོགས་མེད་ཀྱང་ཡོད་ཅེས་ངག་མཚན་ཉིད་དྲུག་ལྡན་གྱིས་མི་ཆོས་བླ་མའི་རྫུན་མངོན་པའི་ང་རྒྱལ་མེད་པར་སྨྲ་བའམ། གཞན་གྱིས་སྨྲས་པ་དང་དུ་ལེན་པར་རྩོམ་པའོ། །ངག་མཚན་ཉིད་དྲུག་ལྡན་ནི། ངག་ཡིན་པ། རང་གི་ཡིན་པ། བདག་ཉིད་དང་འབྲེལ་བ། མ་ནོར་བ། གསལ་པོར་དང་། མངོན་སུམ་དུ་སྨྲ་བའོ། །མཐར་ཐུག་གཞན་གྱིས་དེ་ལྟར་གོ་ན་ཕམ་པའོ། །

གསུམ་པ་དོན་སྡུ་བ་ནི། འདི་བཞི་གང་སྤྱད་དགེ་སློང་དེ་ཕམ་ཕྱིར། །ཕས་ཕམ་བཞི་ཞེས་ཐམས་ཅད་མཁྱེན་དེས་གསུངས། །ཞེས་པ་སྟེ། དེ་ལྟར་བཤད་མ་ཐག་པའི་ཆོས་བཞི་པོ་འདི་གང་ལ་སྤྱད་ཀྱང་རང་རང་གི་རྒྱུ་ཚོགས་སུ་བཤད་པ་ལྟར་གྱི་ཡན་ལག་མཐའ་དག་མ་ཚང་ན་སྦོམ་པོ་དང་། ཚང་ན་ཕམ་པ་དངོས་གཞི་སྟེ། མི་མཐུན་ཕྱོགས་ཀྱིས་གཉེན་པོ་བཅོམ་པས་དགེ་སློང་དེ་ཕམ་པར་བྱས་པའི་ཕྱིར་ཕས་ཕམ་བཞི་ཞེས་སྟོན་པ་ཐམས་ཅད་མཁྱེན་དེས་གསུངས་སོ། །དེ་ལྟར་ཡང་སོ་སོ་ཐར་པ་ལས། དགེ་སློང་དག་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན། ཐོག་མ་ཇི་ལྟ་བར་ཕྱིས་ཀྱང་དེ་བཞིན་དུ་ཕམ་པར་འགྱུར་བ་ཡིན་ཏེ་དགེ་སློང་རྣམས་དང་ལྷན་ཅིག་གནས་པ་དང་ལོངས་སྤྱོད་དུ་མི་དབང་གིས་གནས་པར་མི་བྱའོ། །ཞེས་སོ། །

གཉིས་པ་དགེ་འདུན་ལྷག་མའི་སྡེ་ལ་བསྟན་བཤད་གཉིས་ལས་དང་པོ་ནི། དགེ་འདུན་ལྷག་མ་བཅུ་གསུམ་ཞེས་གྲགས་པ། །ཞེས་པ་སྟེ། གསོ་བ་དགེ་འདུན་ལ་རག་ལས་ཤིང་སྡོམ་པ་རྣམ་དག་གི་ལྷག་ལུས་པས་ན་དགེ་འདུན་ལྷག་མ་ཞེས་བྱ་སྟེ། དེའི་མཚན་ཉིད། བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །ལྷག་མའི་མིང་གིས་ཕྱིར་བཅོས་ན་དག་ཏུ་རུང་བའོ། །དབྱེ་ན། ནང་སེམས་ཅན་ལ་ཆགས་པ་ལྔ་དང་ཕྱི་རོལ་ཡོ་བྱད་ལ་ཆགས་པ་གཉིས་ཏེ་འདོད་པ་ལས་གྱུར་པ་བདུན། གནོད་པ་ལས་གྱུར་པ་གཉིས། བསྒོ་བ་ལས་གྱུར་པ་བཞི་སྟེ་བཅུ་གསུམ་མོ། །

གཉིས་པ་རྒྱས་བཤད་ནི། བསྒྲོད་མིན་གནས་སུ་ཁུ་བ་འབྱིན་པ་དང་། །ཆགས་པས་བུད་མེད་ལུས་ཀྱི་ཆ་ཤས་འཛིན། །འཁྲིག་ཚིག་རྗེན་སྨྲ་བུད་མེད་ཆགས་ཕྱིར་བཀུར། །ཕོ་མོ་ཕན་ཚུན་སྨྱན་བྱས་འདུས་ཏེ་འཕྲད། །རང་དོན་ཚད་ལྷག་ཁང་པ་ཁང་ཆེན་བརྩིགས། །བརྗོད་གཞི་མེད་དང་སྙད་ཀ་བག་ཙམ་ལ། །བརྟེན་ནས་དགེ་སློང་སྐུར་བཏབ་དགེ་འདུན་དབྱེན། །དབྱེན་དེའི་རྗེས་ཕྱོགས་བསླབ་པ་དང་འགལ་བ། །ཁྱིམ་སུན་འབྱིན་ཚེ་སྐྲོད་བྱེད་ལ་སྙོན་པ། །ལྟུང་བྱུང་བསྐུལ་ཚེ་བཀའ་བློ་མི་བདེ་བའོ། །ཞེས་པ་ལྟར་བཅུ་གསུམ་ལས། དང་པོ་འབྱིན་པའི་ལྷག་མ་ནི། འདི་ནས་བསྙེན་བཀུར་གྱི་བར་བཞིའི་གླེང་གཞི་གཉན་ཡོད་དུ་འཆར་ཀ་ལ་བཅས་ཏེ། བསྒྲོད་བྱའི་ཡུལ་ལམ་གསུམ་མིན་པའི་རང་ངམ་གཞན་གྱི་ཡན་ལག་གི་གནས་སུ་དབྱུང་འདོད་ཀྱི་བསམ་པས་རང་གི་ནོར་བུ་རེག་ཅིང་རྩོལ་བ་ལས། ཁུ་བ་གནས་ནས་འཕོས་ཤིང་བདེ་བ་མྱོང་བའོ། །གཉིས་པ་འཛིན་པའི་ལྷག་མ་ནི། ཡུལ་ལུས་བརྟེན་རུང་གི་བུད་མེད་ལ་ཆགས་སེམས་ཀྱིས་རེག་པར་འདོད་པས། དེའི་ལུས་དངོས་སམ་སྐྲ་སོགས་ཆ་ཤས་ལ་བར་དུ་ཆོད་པ་མེད་པར་རེག་པ་ལས་བྱུང་བའི་བདེ་བ་མྱོང་བའོ། །གསུམ་པ་འཁྲིག་ཚིག་ནི། ཡུལ་བརྡ་འཕྲོད་པའི་བུད་མེད་བརྟེན་རུང་ལ་ཆགས་སེམས་ཀྱིས་ཡུལ་དུས་དེར་འཁྲིག་པའི་དངོས་མིང་དུ་གྲགས་པའི་ཚིག་རྗེན་པར་སྨྲས་པ་ཡུལ་དེས་གོ་བའོ། །བཞི་པ་བསྙེན་བཀུར་བསྔགས་པ་ནི། ཡུལ་བུད་མེད་ལ་ཆགས་སེམས་ཀྱིས་འཁྲིག་པ་དོན་དུ་གཉེར་ཕྱིར་བདག་ལྟ་བུའི་དགེ་སློང་ལ་འཁྲིག་པས་བསྙེན་བཀུར་ན་བསྙེན་བཀུར་རྣམས་ཀྱི་ནང་ནས་མཆོག་གོ་ཞེས་རང་གིས་སྨྲས་སམ་ཡུལ་གྱིས་སྨྲས་པ་དང་དུ་བླངས་ཀྱང་རུང་སྟེ། གོ་ཡུལ་དེ་ལ་བརྡ་འཕྲོད་པའོ། །ལྔ་པ་སྨྱན་བྱེད་པ་ནི། གཉན་ཡོད་དུ་དྲུག་སྡེ་ལ་བཅས་ཏེ། སྤྲད་བྱ་རང་ལས་གཞན་པའི་ཕོ་མོ་སྤྲད་དུ་རུང་བ་ཕན་ཚུན་སྦྱོར་འདོད་ཀྱིས་རང་ངམ་བསྐོས་པས་འཕྲིན་གསུམ་གྱི་སྒོ་ནས་སྨྱན་བྱས་པས་དེ་གཉིས་འདུས་ཏེ་དབང་པོ་འཕྲད་པའོ། །དྲུག་པ་ཁང་པའི་ལྷག་མ་ནི། འདི་དང་ཁང་ཆེན་གཉིས་སྟོན་པ་ཀཽ་ཤམྦྷིར་བཞུགས་པའི་ཚེ་དྲུག་སྡེ་ལ་བཅས། དེ་ཡང་བཞི་སྲོག་ཆགས་མང་ཞིང་རྩོད་པ་ཅན་དང་འཇིག་རྐྱེན་ཡོད་པས་མི་རུང་བའི་སར་གཞན་ལ་འབད་པས་བཙལ་བའི་ཡོ་བྱད་ཀྱིས་དགེ་འདུན་ལས་གནང་བ་མ་ཐོབ་པར་རང་དོན་དུ་ཁང་པ་རྩིག་འདོད་ཀྱིས་སྲིད་དུ་མིའི་ཁྲུ་བཅོ་བརྒྱད་དང་ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་ལྷག་པའི་ཁང་པ་རང་ངམ་གཞན་ལ་བསྐོས་ཀྱང་རུང་སྟེ། རྩིག་པས་ཀུན་ནས་བསྐོར་ཞིང་ཐོག་ཕུབ་ཟིན་པའོ། །བདུན་པ་ཁང་ཆེན་ནི། གང་ཟག་བཞིར་ལོངས་པ་ཡན་ཆད་ཀྱི་དོན་དུ་བརྩིགས་པ་སྟེ་འདི་ལ་བཙལ་བ་དང་ཚད་ལྷག་ཡན་ལག་ཏུ་མི་དགོས་ཤིང་། གཞན་ཐམས་ཅད་སྔར་དང་འདྲ་བའོ། །བརྒྱད་པ་གཞི་མེད་ཀྱི་སྐུར་འདེབས་ནི། འདི་དང་བག་ཙམ་གྱི་སྐུར་འདེབས་གཉིས་རྒྱལ་པོའི་ཁབ་དུ་མཛའ་བོ་དང་ས་ལས་སྐྱེས་ལ་བཅས། ཡུལ་དགེ་སློང་གཞན་ལ་བརྗོད་པའི་གཞི་མཐོང་ཐོས་དོགས་གསུམ་མེད་པར་ཕམ་བཞི་གང་རུང་གི་སྒོ་ནས་སྐུར་འདེབས་ཀྱི་ཚིག་གསལ་པོར་སྨྲས་པ་ཡུལ་གྱིས་གོ་བའོ། །དགུ་པ་བག་ཙམ་གྱི་སྐུར་འདེབས་ནི། ཡུལ་དགེ་སློང་གཞན་ལ་གླེང་བའི་སྙད་ཀ་བག་ཙམ་ཡོད་པ་ལ་བརྟེན་ནས་ཚིག་ཟུར་གྱི་ཤུགས་ཀྱིས་ཕམ་པའི་སྒོ་ནས་སྐུར་པ་བཏབ་ཅིང་གོ་བའོ། །བཅུ་པ་དགེ་འདུན་གྱི་དབྱེན་ནི། རྒྱལ་པོའི་ཁབ་ཏུ་ལྷས་སྦྱིན་ལ་བཅས་ཏེ། མཚམས་ནང་གཅིག་ཏུ་བཅས་ལྡན་དགེ་སློང་གིས་རང་མི་ཐེ་བའི་དབྱེ་བྱ་དགེ་འདུན་དུ་ལོངས་པ་གཉིས་ཆོས་མིན་གྱི་ལྟ་བས་ཕན་ཚུན་འབྱེད་པ་ལ་ཟློག་བྱེད་ལྔས་བཟློག་ཀྱང་དེའི་ཐ་མ་བརྗོད་པ་གསུམ་པའི་མཐའ་ལ་མ་བཏང་བའོ། །ཟློག་བྱེད་ལྔ་ནི། གཞམས་སྒོ་དང་། དགེ་འདུན་གྱི་གསོལ་བ་དང་། བརྗོད་པའི་ལས་གསུམ་མོ། །དེ་ལས་ལྟུང་བ་བསྐྱེད་ཚུལ་ནི། དང་པོ་བཞིའི་མཐར་སྦོམ་པོ་རེ་རེ་དང་། བརྗོད་པ་གསུམ་པའི་མཐར་མི་གཏོང་ན་ལྷག་མའི་དངོས་གཞི་སྟེ། འོག་མ་གསུམ་ལའང་འགྲེའོ། །འདིར་དབྱེན་གྱི་ལྷག་མ་དང་། དེའི་མཚམས་མེད་ལ་ཁྱད་པར་ཡོད་དམ་མེད་ཅེ་ན། ཡོད་དེ། མཚམས་མེད་ལ་དགེ་འདུན་བྱེེ་བ་ཞིག་ངེས་པར་དགོས་ཤིང་། འབྱེད་པ་པོའང་དགེ་སློང་དུ་ངེས་ལ་ལྷག་མ་ལ་ནི་དགེ་འདུན་ཕྱེ་བར་མ་ནུས་ཀྱང་། དེའི་སྦྱོར་བར་ཞུགས་པ་ལ་ཟློག་བྱེད་ལྔའི་མཐར་མ་བཏང་བ་ཉིད་ཀྱིས་ཆོག་ཅིང་། འབྱེད་པ་པོའང་དགེ་སློང་ཉིད་དུ་མ་ངེས་ཏེ། དགེ་སློང་མ་ལའང་དབྱེན་གྱི་ལྷག་མ་འབྱུང་བའི་ཕྱིར་རོ། །བཅུ་གཅིག་པ་དབྱེན་དེའི་རྗེས་སུ་ཕྱོགས་པ་ནི། རྒྱལ་པོའི་ཁབ་ཏུ་ལྷས་སྦྱིན་གྱི་གྲོགས་བྱེད་པའི་དགེ་སློང་ཀོ་ཀ་ལི་ཀ་སོགས་བཞི་ལ་བཅས་ཏེ། དགེ་སློང་གང་དགེ་འདུན་གྱི་དབྱེན་ལ་ཞུགས་པའི་དགེ་སློང་དེའི་གྲོགས་བྱེད་འདོད་ཀྱིས་རྗེས་སུ་ཞུགས་ཤིང་ཟློག་བྱེད་ལྔའི་མཐའ་ལ་མ་བཏང་བའོ། །བཅུ་གཉིས་པ་ཁྱིམ་སུན་འབྱིན་པ་ནི། གཉན་ཡོད་དུ་ནབས་སོ་དང་འགྲོ་མགྱོགས་ལ་བཅས་ཏེ། བུད་མེད་དང་ལྷན་ཅིག་རྩེད་འཇོ་དང་བཟའ་བཏུང་ལ་སྤྱོད་པ་སོགས་བསླབ་པ་དང་འགལ་བའི་ངན་སྤྱོད་ཀྱིས་ཁྱིམ་པའི་སེམས་སུན་ཕྱུང་སྟེ་མ་དད་པར་བྱེད་པ་པོའི་དགེ་སློང་གང་དགེ་འདུན་གྱིས་བསྐྲད་པ་ན། སྐྲོད་བྱེད་དགེ་འདུན་ལ་འགྲོ་མིན་བཞིའི་སྙོན་ཚིག་གིས་སྐུར་འདེབས་ལ་ཞུགས་ཤིང་ཟློག་བྱེད་ལྔའི་མཐར་མ་བཏང་བའོ། །བཅུ་གསུམ་པ་བཀའ་བློ་མི་བདེ་བ་ནི། ཀཽ་ཤམྦྷིར་འདུན་པ་ལ་བཅས་ཏེ། ལྟུང་བ་བྱུང་བར་གླེང་དྲན་བྱས་ལ་ཆགས་པའི་དགེ་སློང་ལ་ལྷག་པའི་ཚུལ་ཁྲིམས་ཀྱི་དབང་དུ་བྱས་ཏེ་དགེ་འདུན་གྱིས་ཕྱིར་བཅོས་བྱ་བར་བསྐུལ་བ་ན། ཁྱེད་ཅག་དགེ་ཡང་རུང་སྡིག་ཀྱང་རུང་ཁོ་བོ་ལ་ཅི་ཡང་མ་སྨྲ་ཞིག་ཅེས་བཀའ་བློ་མི་བདེ་བའི་གཞིར་ཞུགས་པ་ཉིད་ཟློག་བྱེད་ལྔ་བའི་མཐའ་ལ་མ་བཏང་བའོ། །འཕྲོས་དོན་རྩ་བའི་མདོར། དབེན་པ་སྐྱབས་ཡོད་འདུག་པའོ། །ཞེས་མ་ངེས་པ་གཉིས་གསུངས་ཏེ། ཁྲིམས་གྲོགས་མེད་པའི་དབེན་པ་སྒྲིབ་བྱེད་ཀྱི་སྐྱབས་ཡོད་པའི་གནས་སུ་དགེ་སློང་དང་བུད་མེད་ལྷན་ཅིག་ཏུ་འདུག་པའི་ཚེ། གནས་དེ་མི་ཚངས་སྤྱོད་བྱར་རུང་མི་རུང་གི་ཁྱད་པར་ལས། དགེ་སློང་དེ་ལ་ཕམ་ལྷག་ལྟུང་བྱེད་གསུམ་གང་རུང་ངམ། ལྷག་མ་དང་ལྟུང་བྱེད་གཉིས་གང་བྱུང་མ་ངེས་པའམ་དངོས་པོ་ལ་མཐའ་གང་དུ་འགྱུར་མ་ངེས་པའོ། །མ་ངེས་པ་གཉིས་གཞུང་འདིར་ཚིག་ཟིན་ལ་མི་འབྱུང་བ་ནི། གནས་དེར་འདུག་ཙམ་ལྟུང་བྱེད་དང་དེའི་འབྲས་བུར་གྱུར་པ་ཕམ་ལྷག་གང་རུང་གི་ནང་དུ་འདུས་པས་ལོགས་སུ་མ་གསུངས་སོ། །

གསུམ་པ་སྤང་བ་ལྟུང་བྱེད་ཀྱི་སྡེ་ལ་བསྟན་བཤད་གཉིས་ལས། དང་པོ་ནི། སྤང་བ་ལྟུང་བྱེད་སུམ་ཅུའི་སྡེ་བཤད་པ། །ཞེས་པ་སྟེ། གང་ལ་ལྟུང་བ་བྱུང་བའི་དངོས་པོ་དེ་སྤངས་པའི་སྒོ་ནས་ཕྱིར་བཅོས་དགོས་ཤིང་། མ་བཅོས་ན་རྣམ་སྨིན་ངན་སོང་དུ་ལྟུང་བར་བྱེད་པས་ན་སྤང་ལྟུང་ཞེས་བྱ་སྟེ། དེའི་མཚན་ཉིད་ནི་བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །སྤང་བ་ལྟུང་བྱེད་ཀྱི་མིང་གིས་ཕྱིར་བཅོས་ན་དག་ཏུ་རུང་བའོ། །དབྱེ་ན། གོས་ཀྱི་སྡེ། སྟན་སོགས་ཀྱི་སྡེ། ལྷུང་བཟེད་སོགས་ཀྱི་སྡེ་གསུམ་རེ་རེ་ལ་བཅུ་བཅུ་སྟེ། སྤང་ལྟུང་སུམ་ཅུའོ། །

གཉིས་པ་རྒྱས་བཤད་ལ། བཅུ་ཚན་གསུམ་ལས། དང་པོ་ནི། རང་གི་གོས་ལྷག་ཞག་བཅུ་འདས་པར་འཆང་། །ཆོས་གོས་དང་བྲལ་ཞག་གཅིག་ལོན་པ་དང་། །གོས་རྒྱུ་ཟླ་གཅིག་འཇོག་དང་དགེ་སློང་མར། །ཆོས་གོས་འཁྲུར་འཇུག་དེ་ལ་གོས་རྒྱུ་ལེན། །ཉེ་མིན་ཁྱིམ་པར་གོས་རྒྱུ་སློང་བ་དང་། །སྟེར་ན་སྟོད་གཡོགས་སྨད་གཡོགས་ལྷག་པོར་ལེན། །རང་ལ་སྟེར་བསམ་ཆོས་གོས་གནས་དཔགས་པ། །རིན་དང་ཁྲུ་ཚད་ཀྱིས་སློང་རྟགས་དྲན་སློང་། །གོས་རིན་རིན་ཆེན་བསྐུར་བ་ལེན་རྣམས་སོ། །ཞེས་པ་ལྟར་བཅུ་ལས། དང་པོ་འཆང་བའི་སྤང་བ་ནི། འཆང་འབྲལ་འཇོག་གསུམ་གཉན་ཡོད་དུ་དགེ་སློང་མང་པོ་ལ་བཅས། དེ་ཡང་སྲ་བརྐྱང་མ་བཏིང་བའི་གང་ཟག་གིས། རང་དབང་ཞིང་བདག་ཏུ་བཟུང་བའི་གོས་ལྷག་པོ། ཚད་འཁོར་གསུམ་ཁེབས་པའི་མཐའི་ཚད་དུ་ལོངས་པའམ། གལ་ཏེ་བྱིན་གྱིས་བརླབ་རུང་གི་ཆོས་གོས་རྣམ་གསུམ་ཡོད་པ་དང་མེད་ཀྱང་ཆོས་གོས་ཀྱི་ཁ་བསྐང་བའི་རེ་བ་མེད་ན་ཁྲུ་གང་གི་ཚད་དུ་ལོངས་པ། རང་མིང་ངམ་རྣམ་བརྟགས་གང་རུང་གིས་བྱིན་གྱིས་མ་བརླབས་པའམ་བརླབས་ཀྱང་ཤན་དང་རྗེས་སུ་འབྲེལ་བས། རང་སྟོབས་སམ་ཤན་སྟོབས་གང་རུང་གིས་ཞག་བཅུ་འདས་ནས་བཅུ་གཅིག་པའི་སྐྱ་རེངས་དང་པོ་ཤར་བའོ། །འདི་ལ་གོས་ལྷག་པོ་ལྟ་ཅི་སྨོས། རང་དབང་ཞིང་གནས་སྐབས་དབང་བྱར་ཡོད་པའི་གོས་རྙེད་ནས་ཞག་བཅུའི་ནང་དུ། གོས་བྱིན་བརླབས་ཅན་སྔར་མེད་ན་འཚོ་བའི་ཡོ་བྱད་བཅུ་གསུམ་པོ་གང་རུང་དུ་རང་མིང་གིས་བྱིན་གྱིས་རློབ་ཅིང་། གལ་ཏེ་བྱིན་བརླབས་ཅན་སྔ་མ་ཡོད་ན། ཕྱིས་རྙེད་པ་དེ་ཞེ་ཐག་པ་ནས་གཞན་ལ་བསྔོ་བ་དང་། ལྷག་པོའམ་མཁོ་བའི་ཡོ་བྱད་དུ་རྣམ་བརྟགས་ཀྱིས་བྱིན་གྱིས་བརླབས་པ་གང་རུང་བྱ་དགོས་པ་ཡིན་ནོ། །འོ་ན་སྤང་བ་བསྐྱེད་པ་ལ་བྱིན་གྱིས་མ་བརླབས་པའི་གོས་དེས་རང་སྟོབས་རང་ཉིད་ཀྱིས་ཞག་བཅུ་འདས་དགོས་སམ་སྙམ་ན་མི་དགོས་ཏེ། བྱིན་གྱིས་མ་བརླབས་པའི་གོས་སྔ་མས་ཞག་གཅིག་ནས་དགུའི་བར་གང་རུང་ལོན་ལ། དེའི་རྗེས་སུ་གོས་གཉིས་པ་ཞིག་རྙེད་ན། དེ་ཉིད་ཀྱི་ཉིན་པར་སྔ་མའི་ཞག་ཤན་ཕྱི་མ་ལ་འབྱུང་བས། སྔ་མས་ཞག་གང་ལོན་དེ་ཕྱི་མས་ཀྱང་ལོན་པར་འཇོག་དགོས་པའི་ཕྱིར་ཏེ། འདི་ལ་གཞན་ཡོད་ན་བྱིན་གྱིས་མ་བརླབས་པ་དེའི་ཤན་ཚུན་ཆད་ནས་སོ། །ཞེས་གསུངས་པའི་ཕྱིར། བྱིན་གྱིས་བརླབས་པ་ཙམ་གྱིས་ཉེས་པ་དེ་ཁེགས་སམ་ཞེ་ན། སྔ་ཕྱི་གཉིས་ཀ་བརླབས་པའམ། ཤན་མ་འདྲེས་གོང་དུ་སྔ་མ་དེ་བརླབས་ན་ཁེགས་མོད། སྔ་མ་བྱིན་གྱིས་མ་བརླབས་ན་ཕྱི་མ་བརླབས་ཀྱང་སྔ་མའི་ཤན་སྟོབས་ཀྱིས་དེའི་ཉེས་པ་མི་ཁེགས་ཏེ། འབྲེལ་ཡང་རྗེས་སུ་ཞུགས་པ་དང་བཅས་པ་ལའོ། །ཞེས་སོ། །སྔ་མ་བརླབས་པས་རྟིང་མ་ལ་ཤན་མི་འབྱུང་ནའང་། དེས་རྟིང་མ་བྱིན་གྱིས་བརླབས་པའི་གོ་མི་ཆོད་དེ། རྟིང་མས་ཞག་བཅུ་ལོན་པའི་ཚེ་རང་སྟོབས་ཀྱིས་ལྟུང་བ་བསྐྱེད་པ་ཡིན་ནོ། །སྤྱིར་ཤན་གྱི་རྣམ་གྲངས་ལ་བཞི་སྟེ། གོས་ཀྱི། ལྷུང་བཟེད་ཀྱི། སྨན་གྱི། ལྟུང་བའི་ཤན་ནོ། །དང་པོ་ལ། ཞག་བཅུ་པའི་དང་། ཟླ་འཇོག་གི་ཤན་གཉིས་ཡོད། དེ་གཉིས་སྤྱིར་བཏང་ལ་བརྡེག་བྱ་རྡེག་བྱེད་དུ་མི་རུང་མོད། དམིགས་བསལ་ལ་མུ་བཞི་ཡོད་དེ། སྔར་རྙེད་པའི་ཟླ་འཇོག་གི་གོས་ཏེ། ཕྱིས་ཆོས་གོས་ཡོངས་རྫོགས་རྙེད་པའི་སྟོབས་ཀྱིས་ཞག་བཅུ་པའི་གོས་སུ་རིགས་ལོག་ཅིང་། གོས་ཕྱི་མ་དེ་སྔ་མའི་ཕྱི་དྲོ་དེ་ཀ་རྙེད་པ་ཡིན་ན་ཤན་མི་འབྱུང་ལ། ཞག་ཕྱི་མ་རྣམས་ལ་རྙེད་ན་ཤན་ཡང་འབྱུང་བ་དང་། ཡང་གོས་སྔ་རྟིང་གཉིས་ཀ་ཟླ་བར་བཞག་ཏུ་རུང་བའི་གོས་ཡིན་ན་རིགས་མ་ལོག་མོད། རྟིང་མ་རྙེད་པའི་གོས་དེ་ཞག་ཕྱི་མའམ་ཞག་དེ་ཀའི་ནང་དུ་རྙེད་པའི་ཁྱད་པར་ལས་ཤན་འབྱུང་མི་འབྱུང་སྟེ། དེ་ལྟར་མུ་བཞིའོ། །དེས་ན་གོས་དང་ལྷུང་བཟེད་ཀྱི་ཤན་ནི། རྡེག་བྱེད་བྱིན་གྱིས་མ་བརླབས་པ་ཉིད་ཀྱིས། བརྡེག་བྱ་རང་དང་དུས་མཉམ་པའམ་རྟིང་ལ་རྙེད་པའི་གོས་དང་ལྷུང་བཟེད་བྱིན་གྱིས་བརླབས་མ་བརླབས་གང་ཡིན་ཡང་འདྲ་སྟེ་ཤན་འཇུག་པ་ཡིན་ནོ། །སྨན་གྱི་ཤན་ནི་རྡེག་བྱེད་བྱིན་གྱིས་བརླབས་པ་ཉིད་ཀྱིས། བརྡེག་བྱ་བྱིན་གྱིས་བརླབས་པ་དང་མ་བརླབས་པ་གཞན་ལ་ཤན་རྡེག་པ་ཡིན་ཞིང་། དེ་ཡང་སྔ་དྲོ་ཐུན་ཚོད་དུ་རུང་བའི་སྨན་གཉིས་དང་ཞག་དང་པོ་ལ་ཞག་བདུན་པའི་སྨན་བུ་རམ་ལྟ་བུ་གཉིས་རྙེད་པ་ལས་སྨན་གཅིག་བྱིན་གྱིས་བརླབས། གཅིག་མ་བརླབས་པར་བཞག་པ་ན། ཐུན་ཚོད་ཀྱི་མཐའ་དང་ཞག་བདུན་པ་འདས་ནས་བརྒྱད་པའི་སྐྱ་རེངས་ཤར་བའི་ཚེ་བྱིན་གྱིས་བརླབས་པས་རང་སྟོབས་དང་། མ་བརླབས་པས་ཤན་སྟོབས་ཀྱིས་གསོག་འཇོག་གི་སྤང་བ་བསྐྱེད་ལ། ཡང་དུས་མི་མཉམ་པའི་དབང་དུ་བྱས་ན། ཐུན་ཚོད་ཀྱི་སྨན་སྔ་དྲོ་རྙེད་པ་དང་། ཚེས་གཅིག་ལྟ་བུར་བུ་རམ་གྱི་སྨན་རྙེད་པ་བྱིན་གྱིས་བརླབས་ནས་བཞག །ཕྱི་དྲོ་ཐུན་ཚོད་ཀྱི་སྨན་གཉིས་པ་དང་། ཞག་གཉིས་སམ་བདུན་གྱི་བར་བུ་རམ་གྱི་སྨན་གཉིས་པ་རྙེད་པ་བྱིན་གྱིས་བརླབས་སམ་མ་བརླབས་ཀྱང་འདྲ་སྟེ། རང་རང་གི་དུས་འདས་པའི་ཚེ་སྔ་མས་རང་སྟོབས་དང་ཕྱི་མས་ཤན་སྟོབས་ཀྱིས་ལྟུང་བ་བསྐྱེད་ཅིང་། ཁྱད་པར་ཞག་བདུན་པའི་སྨན་ཤན་ནི་བུ་རམ་གྱིས་བུ་རམ་ལ་རྡེག་པ་ལྟ་བུ་སྨན་སྔ་ཕྱི་རིགས་མཐུན་པ་དགོས་ཏེ། ཞག་བདུན་པ་ནི་རིགས་མཐུན་པ་ལའོ། །ཞེས་གསུངས་པའི་ཕྱིར། གཞན་རྣམས་ལ་ནི་བཅས་པ་རིགས་འདྲ་བས་ཆོག་གི་རྫས་སྔ་ཕྱི་རིགས་མཐུན་པ་མི་དགོས་ཤིང་། འཚོ་བཅངས་ཀྱི་སྨན་ནི་ཇི་སྲིད་འཚོའི་བར་དུ་གནང་བས་ཤན་མི་འབྱུང་ངོ་། །ལྟུང་བའི་ཤན་ནི། སྤང་ལྟུང་སུམ་ཅུ་ལས་གང་རུང་བྱུང་བ་ཕྱིར་བཅོས་མ་བྱས་པའི་བར་ལ་གོས་སོགས་འཚོ་བའི་ཡོ་བྱད་གང་རྙེད་ཀྱང་རུང་སྟེ། ལྟུང་བ་སྔ་མ་དེ་ཕྱིར་བཅོས་བྱེད་པའི་ཚེ་དེའི་རྒྱུར་གྱུར་བའི་རྫས་དེ་ཉིད་དུ་མ་ཟད། ཡོ་བྱད་རྟིང་མ་དེ་རྣམས་ཀྱང་སྔ་མའི་ཤན་གྱིས་སྤོང་དགོས་པ་ཡིན་ཏེ། ལྟུང་བ་དེ་ཡོད་ན་ཡོ་བྱད་ཙམ་བདག་གིར་བྱས་པ་ལ་སྤང་བ་ཉིད་དོ། །ཞེས་སོ། །འཆང་འབྲལ་འཇོག་གསུམ་གྱི་ཉེས་པ་འདི་ནི། སྲ་བརྐྱང་བཏིང་ཆགས་ཀྱི་གང་ཟག་ལ་མི་འབྱུང་སྟེ། དེ་ལ་དེ་གསུམ་བག་ཡངས་ཀྱི་ཚུལ་དུ་གནང་བའི་ཕྱིར་རོ། །གཉིས་པ་འབྲལ་བའི་སྤང་བ་ནི། སྣམ་སྦྱར་ལ་འབྲལ་བའི་གནང་བ་མ་ཐོབ་ཅིང་སྲ་བརྐྱང་མ་བཏིང་བའི་གང་ཟག་གིས་འཇིགས་བཅས་ཀྱི་དགོན་པ་ལས་གཞན་དུ་བྱིན་གྱིས་བརླབས་པའི་ཆོས་གོས་གསུམ་པོ་ཐམས་ཅད་དམ་གང་རུང་བཞག་པའི་གནས་ཉེ་འཁོར་དང་བཅས་པ་ལས་ཞག་གཅིག་ཐལ་ནས་ཞག་ཕྱི་མའི་སྐྱ་རེངས་ཤར་བའོ། །གསུམ་པ་ཟླ་འཇོག་གི་སྤང་བ་ནི། སྲ་བརྐྱང་མ་བཏིང་ཞིང་ཆོས་གོས་གསུམ་གང་རུང་མེད་པའི་གང་ཟག་གིས་ཁ་བསྐང་བའི་རེ་བ་དང་བཅས་པའི་ཆོས་གོས་ཀྱི་རྒྱུ་ཁྲུ་གང་གི་ཚད་དུ་ལོངས་ཤིང་འཁོར་གསུམ་མི་ཁེབས་པ། བྱིན་གྱིས་མ་བརླབས་པའམ། བརླབས་ཀྱང་ཤན་དང་རྗེས་སུ་འབྲེལ་བས། རང་སྟོབས་སམ་ཤན་སྟོབས་གང་རུང་གིས་ཞག་སུམ་ཅུ་འདས་ནས་སོ་གཅིག་པའི་སྐྱ་རེངས་ཤར་བའོ། །བཞི་པ་འཁྲུར་འཇུག་པའི་སྤང་བ་ནི། གཉན་ཡོད་དུ་འཆར་ཀ་ལ་བཅས་ཏེ། བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པའི་དགེ་སློང་མ་ལ་རང་གི་ཆོས་གོས་གསུམ་དང་གདིང་བ་རྙིང་པ་ལས་གང་རུང་འཁྲུར་བཅུག་པ་ན། གོས་ཀྱི་ཕྱོགས་གཅིག་ཙམ་འཁྲུ་བའི་ལས་བྱས་པའོ། །ལྔ་པ་གོས་ལེན་པའི་སྤང་བ་ནི། འདི་ནས་བསྐུར་བའི་བར་དྲུག་ཀ་གཉན་ཡོད་དུ་ཉེར་དགའ་ལ་བཅས་ཏེ། ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་དུ་མ་ཡིན་པའི་དགེ་སློང་མ་ལ་འཁོར་གསུམ་ཁེབས་པའི་མཐའི་ཚད་དུ་ལོངས་པ་ཡན་ཆད་ཀྱི་གོས་བསླངས་པས་ལག་ཏུ་ཐོབ་པའོ། །དྲུག་པ་སློང་བའི་སྤང་བ་ནི། ཆོས་གོས་རྣམ་གསུམ་ཡོད་པའི་དགེ་སློང་གིས་ཉེ་དུ་མ་ཡིན་པའི་ཁྱིམ་པ་ལ་འཁོར་གསུམ་ཁེབས་པའི་ཚད་དུ་ལོངས་པའི་གོས་བསླངས་ཏེ་ཐོབ་པའོ། །བདུན་པ་སློང་བར་རིགས་པའི་སྤང་བ་ནི། ཆོས་གོས་རྣམ་གསུམ་མེད་པའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་ལ་བསླངས་པས་གོས་མང་པོ་སྟེར་ནའང་སྟོད་གཡོགས་དང་སྨད་གཡོགས་ཙམ་བླང་རིགས་ཀྱིས། དེ་ལས་ལྷག་པ་ལེན་ན་ལྟུང་བའོ། །བརྒྱད་པ་དཔགས་པ་སློང་བའི་སྤང་བ་ནི། ཁྱིམ་པ་ཉེ་དུ་མ་ཡིན་པས་སྦྱིན་གནས་དགེ་སློང་རང་ཉིད་ལ་སྟེར་བར་བསམ་པའི་གོས་འདི་འབུལ་ཞེས་བློས་དཔགས་པ་ལས། དངོས་སུ་འབུལ་ལོང་མེད་པར་སྔ་ཚོམས་སུ་རིན་དང་ཁྲུ་ཚད་ཀྱིས་དྲན་པ་བརྗོད་ནས་བསླངས་པས་ཐོབ་པའོ། །དགུ་པ་སོ་སོ་ནས་དཔགས་པ་སློང་བའི་སྤང་བ་ནི། ཉེ་དུ་མ་ཡིན་པའི་ཁྱིམ་བདག་ཕོ་མོ་སོ་སོ་ནས་གོས་རེ་རེའམ་མང་པོ་དགེ་སློང་རང་ལ་འབུལ་བར་དཔགས་པ་དེ་ཐོས་ནས་འབུལ་མི་འབུལ་བརྟགས་པའི་བསམ་པས་དྲན་པ་བརྗོད་དེ་བསླངས་པས་ཐོབ་པའོ། །འདི་གཉིས་རང་ལ་བསྔོས་ཚོད་ལས་ལྷག་པའི་དངོས་པོ་ཐོབ་པ་ཞིག་དགོས་གསུངས་ནའང་། མདོའི་དངོས་བསྟན་ལ་འབུལ་ལོང་མེད་པར་སྔ་ཚོམས་སུ་བླངས་པའི་ཉེས་པ་ཉིད་གསལ་ལོ། །བཅུ་པ་བསྐུར་བའི་སྤང་བ་ནི། སྦྱིན་བདག་ཕོ་ཉ་བ་ཞལ་ཏ་པ་སྟེ་ཁྱིམ་པ་གསུམ་ལས། སྦྱིན་བདག་གིས་གོས་རིན་རུང་བ་མ་ཡིན་པ་གསེར་དངུལ་ལྟ་བུ་ཞིག་བསྐུར་བ་ཕོ་ཉས་དགེ་སློང་ལ་ཕུལ་བས། དེ་ལེན་དུ་མི་རུང་ཞེས་སྤངས་པ་ན། ཕོ་ཉ་དེས་དགེ་སློང་རང་གི་ཞལ་ཏ་པ་ལ་གཏད་ནས་གོས་སྒྲུབ་ཏུ་བཅུག་པ་ལས། གོས་དུས་སུ་མ་བྱུང་ན་དགེ་སློང་གིས་ཞལ་ཏ་པ་ལ་དངོས་སུ་བསྐུལ་བ་གསུམ་བྱ། དེ་ལ་མ་བྱུང་ན་ལན་གསུམ་མཐོང་སར་ཅང་མི་སྨྲ་བས་བསྡད་ནས་བསླངས་པ་ལ་ཉེས་པ་མེད་ཅིང་། དེ་ལས་ལྷག་པར་བྱས་པས་གོས་ཐོབ་ན་སྤང་བར་འགྱུར་རོ། །

བཅུ་ཚན་གཉིས་པ་ནི། སྲིན་བལ་ནང་ཚངས་བྱས་པའི་སྟན་བྱེད་དང་། །དཀོན་སར་བལ་ནག་འབའ་ཞིག་སྟན་དུ་འདིང་། །བལ་ནག་ཆ་གཉིས་སྟན་བྱེད་ལོ་དྲུག་ནི། །མ་སོང་སྟན་གསར་བྱེད་དང་ཚད་ལྡན་གྱི། །གདིང་བ་ཡོད་ཀྱང་སླར་བཟོ་བལ་ནག་ནི། །རྙེད་ནས་ལམ་གྱི་དཔག་ཚད་གསུམ་མཐར་བྱེད། །དགེ་སློང་མ་ལ་བལ་འཁྲུ་རྨེལ་བཅུག་དང་། །གསེར་དངུལ་ལེན་དང་ཚོང་བུན་མངོན་མཚན་ཅན། །ཆེད་དུ་ཚོང་བྱེད། ཅེས་པ་ལྟར་བཅུ་ལས། སྟན་གྱི་སྤང་བ་ལྔ་པོ་གཉན་ཡོན་དུ་དགེ་སློང་མང་པོ་ལ་བཅས། དེ་ལ་དང་པོ་རིན་ཐང་ཆེ་བའི་དངོས་པོ་སྲིན་བལ་སོགས་དང་། གཉིས་པ་གང་དུ་བལ་ནག་དཀོན་སར་བལ་ནག་འབའ་ཞིག་དང་། གསུམ་པ་བལ་ནག་པོ་སྟན་གྱི་ཆ་གཉིས་ལས་ལྷག་པ་སྟེ། དེ་ལྟར་རྒྱུ་དེ་གསུམ་ལས་རང་ངམ་གཞན་ལ་བསྐོས་པས་སྟན་ནང་ཚངས་ཅན་གསར་དུ་བྱེད་ན། དེ་དག་བཀྲམ་པ་ཙམ་གྱིས་དེ་དང་དེའི་སྤང་བའོ། །བཞི་པ་ལོ་དྲུག་གི་སྤང་བ་ནི། སྟན་སྔ་མ་ཡོད་བཞིན་དུ་གནང་བ་མ་ཐོབ་པར་ལོ་དྲུག་གི་ནང་དུ་སྟན་ནང་ཚངས་ཅན་གཉིས་པ་བྱས་ཤིང་ཟིན་པའོ། །ལྔ་པ་མཐོ་གང་གི་སྤང་བ་ནི། ཚད་ལྡན་གྱི་འདིང་བ་རྙིང་པ་ཡོད་ན་གསར་དུ་བཟོ་བའི་ཚེ་རྙིང་པ་ནས་ཆུང་ཐ་ཡང་བདེ་བར་གཤེགས་པའི་མཐོ་གང་སྟེ་མིའི་ཁྲུ་ཕྱེད་དོ་ག །སར་པ་ལ་མ་བསླན་པར་ལོངས་སྤྱད་པའོ། །དྲུག་པ་ལམ་དུ་བལ་ཐོགས་པའི་སྤང་བ་ནི། འདི་ནས་ཉོ་ཚོང་གི་བར་ལྔ་དྲུག་སྡེ་ལ་བཅས་ཏེ། རང་དབང་བའི་དངོས་པོ་བལ་ལ་སོགས་པའི་ཁུར་ཆེན་པོ་ཆགས་སེམས་ཀྱིས་ཁྱེར་ནས་ཉི་མ་གཅིག་གི་ནང་དུ་རྒྱང་གྲགས་ལས་འདས་པ་སྟེ། དེ་ཡང་དགེ་ཚུལ་ལྟ་བུ་ཁུར་ཁྱེར་གྲོགས་གཞན་མེད་ན་དཔག་ཚད་གསུམ་ཚུན་ཆད་གནང་བས། དེ་ནས་བརྩམས་ཏེ་རྒྱང་གྲགས་གཅིག་གི་མཐར་ཕྱིན་པའམ། ཁྱེར་གྲོགས་ཡོད་ན་དང་པོ་ནས་བརྩམས་ཏེ་རྒྱང་གྲགས་འདས་པའོ། །བདུན་པ་འཁྲུར་འཇུག་པའི་སྤང་བ་ནི། ཉེ་དུ་མ་ཡིན་པའི་དགེ་སློང་མ་ལ་དགེ་སློང་གིས་བལ་འཁྲུ་བ་དང་རྨེལ་བ་དང་འཚེད་དུ་བཅུག་པ་ལས་དེས་དེ་དང་དེ་བྱས་པའོ། །བརྒྱད་པ་རིན་ཆེན་ལ་རེག་པའི་སྤང་བ་ནི། དགེ་སློང་གིས་གསེར་དངུལ་སོགས་རུང་བ་མ་ཡིན་པ་ལ་རུང་བ་མ་བྱས་པའི་རིན་པོ་ཆེ་ཆུད་ཟ་བ་སོགས་ཀྱི་ཉེས་པ་མེད་བཞིན་དུ་ཆགས་སེམས་ཀྱིས་རེག་གམ་རེག་ཏུ་བཅུག་སྟེ་བདག་གིར་བྱས་པའོ། །རུང་བ་བྱ་ཚུལ་ལ་གསུམ་སྟེ། སྦྱིན་བདག་བདག་པོ་ཉིད་དུ་མོས་སུ་གཞུག་པ་དང་། ཞལ་ཏ་བྱེད་པ་བདག་པོ་ཉིད་དུ་ཁས་ལེན་དུ་གཞུག་པ་དང་། བྱིན་གྱིས་བརླབས་པའོ། །དགུ་པ་མངོན་མཚན་ཅན་གྱི་སྤང་བ་ནི། དགེ་སློང་གིས་ཉེ་དུ་མ་ཡིན་པའི་ཁྱིམ་པར་འདོད་ཞེན་གྱིས་ཁེ་སྤོགས་འདོད་པས་ཚོང་ཟོག་རིན་པོ་ཆེ་སོགས་མངོན་མཚན་ཅན་བུན་བསྐྱེད་དུ་བཏང་བས། དེ་ལས་བསྐྱེད་གོས་ཁྲུ་གང་དུ་ལོངས་པ་ཐོབ་པའོ། །བཅུ་པ་ཉོ་ཚོང་བྱེད་པའི་སྤང་བ་ནི། དགེ་སློང་གིས་ཁེ་སྤོགས་འདོད་པའི་ཆེད་དུ་ཁྱིམ་པ་ཉེ་དུ་མ་ཡིན་པ་ལ་རིན་པོ་ཆེ་ལས་གཞན་པའི་དངོས་པོ་འབྲུ་དང་གོས་སོགས་མོད་ན་ཉོ་ཞིང་དཀོན་ན་འཚོང་བར་བྱེད་པས་བསྐྱེད་ཐོབ་པའོ། །

བཅུ་ཚན་གསུམ་པ་ནི། ལྷུང་བཟེད་བྱིན་མ་རླབས། །ཞག་བཅུ་འདས་འཆང་ལྷུང་བཟེད་ཟུང་འཆང་བ། །གླ་རྔན་མེད་པར་འཐག་འཇུག་ཐགས་རྒྱ་བསྐྱེད། །དགེ་སློང་གོས་བྱིན་སླར་ཕྲོགས་གཏད་བྱུང་གོས། །སྦྱིན་དུས་བཤད་ལས་སྔ་བར་བདག་གིར་བྱས། །དགོན་པར་འཇིགས་བཅས་གོས་བྲལ་ཞག་བདུན་འདས། །རས་ཆེན་དགག་དབྱེ་ཟིན་ཀྱང་ཟླ་ཕྱེད་འདས། །དགེ་འདུན་བསྔོས་པའི་རྙེད་པ་བདག་ཏུ་བཟུང་། །ན་སྨན་ཞག་བདུན་འདས་ནས་ག །སོག་འཇོག་གོ །ཞེས་པ་ལྟར་བཅུ་ལས། དང་པོ་ལྷུང་བཟེད་འཆང་བའི་སྤང་བ་ནི། དྲུག་སྡེ་ལ་བཅས་ཏེ། རང་གི་ལྷུང་བཟེད་ཚད་ལྡན་བྱིན་གྱིས་མ་བརླབས་པའམ་བརླབས་ཀྱང་ཤན་སྟོབས་ཀྱིས་ཞག་བཅུའི་བར་བཅངས་ནས་བཅུ་གཅིག་པའི་སྐྱ་རེངས་ཤར་བའོ། །གཉིས་པ་ལྷུང་བཟེད་ལྷག་པོ་ཚོལ་བའི་སྤང་བ་ནི། འདི་ནས་བྱིན་ཕྲོགས་ཀྱི་བར་བཞི་ཉེར་དགའ་ལ་བཅས་ཏེ། རྒྱུ་དབྱིབས་ཁ་དོག་གིས་རུང་ཞིང་མཐེ་བོའི་ལྟོ་གང་གི་ལྷག་མར་ཕུར་དགུ་ཤོང་པ་ཡན་ཆད་ཀྱི་ལྷུང་བཟེད་སྤྱད་བཟོད་རང་ལ་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལ་བསླངས་པས་ལག་ཏུ་ཐོབ་པའོ། །འདི་ཡང་བྱིན་གྱིས་མ་བརླབས་པར་ཞག་བཅུ་འདས་ན་ལྟུང་བ་སྔ་མར་འགྱུར་རོ། །གསུམ་པ་འཐག་ཏུ་འཇུག་པའི་སྤང་བ་ནི། ཉེ་དུ་མ་ཡིན་པའི་ཐགས་མཁན་ལ་གླ་རྔན་མེད་པར་རང་ངམ་བསྐོས་པས་གོས་འཐག་ཏུ་བཅུག་སྟེ་ལག་ཏུ་ཐོབ་པའོ། །བཞི་པ་འཐག་པ་འགྱེེད་པའི་སྤང་བ་ནི། ཉེ་དུ་མ་ཡིན་པའི་ཁྱིམ་པས་རང་ལ་འབུལ་རྒྱུའི་གོས་འཐག་པ་ན། བདག་པོས་མ་གནང་བར་བསྔོས་ཚོད་ལས་ལྷག་པ་འགྱེེད་དུ་བཅུག་སྟེ་ཐོབ་པའོ། །ལྔ་པ་བྱིན་ཕྲོགས་ཀྱི་སྤང་བ་ནི། དགེ་སློང་གིས་རང་དང་ལྟ་མཚན་མཐུན་པའི་དགེ་སློང་གཞན་ལ་གོས་སམ་ལྷུང་བཟེད་སོགས་ཡོ་བྱད་སྔར་བྱིན་པ་ཕྲོགས་ཏེ་ཕ་རོལ་པོ་ལས་བྲལ་བའོ། །དྲུག་པ་གཏད་པ་ལས་བྱུང་བའི་སྤང་བ་ནི། འདི་དང་དགོན་པའི་འབྲལ་སྤང་གཉིས་གཉན་ཡོད་དུ་དྲུག་སྡེ་ལ་བཅས། དེ་ཡང་དབྱར་གནས་པའི་དགེ་འདུན་ལ་ཕུལ་བའི་རྙེད་པ་དབྱར་ནང་དུ་བདག་གིར་བྱས་པ་དང་། སོ་སོར་བགོས་པ་དང་། དགག་དབྱེའི་ཕྱི་དེ་ཉིན་མ་བགོས་པ་སྟེ། དེ་ལྟར་སྔས་ཕྱིས་ཀྱི་ལྟུང་བ་གསུམ་མོ། །གལ་ཏེ་ལུང་ལས། གཏད་པ་ལས་བྱུང་བའི་གོས་ལྔ་པོ། ནད་པ་དང་། ནད་པའི་ཕྱིར་དང་། འཆི་བ་དང་། འཆི་བའི་ཕྱིར་དང་། འགྲོ་བར་ཆས་པ་ལ་སྦྱིན་པ། ཞེས་གསུངས་པ་ལྟར་དགག་དབྱེའི་གོང་རོལ་ཏུ་སྦྱིན་བདག་གིས་གཏད་པའི་རྙེད་པ་རྐྱེན་ལྡན་དེ་དག་ལ་རྐྱེན་དབང་གིས་དབྱར་མཐའི་ཞག་བཅུའི་ནང་དུ་སོ་སོར་སྦྱིན་པ་ལ་ཉེས་པ་མེད་ཅིང་། དབྱར་ནང་དུ་ཆོས་སྨྲ་བའི་རྙེད་པ་དང་། ནད་པའི་རིམ་གྲོ་ལ་སོགས་པའི་ཆེད་དུ་སྦྱིན་པའི་རྙེད་པ་ནི་འདིར་མི་གཏོགས་སོ། །བདུན་པ་དགོན་པའི་འབྲལ་སྤང་ནི། དགེ་སློང་དགོན་པ་བས་བྱིན་རླབས་ཅན་གྱི་ཆོས་གོས་རྣམ་གསུམ་དང་ཞག་དྲུག་ཚུན་ཆད་བྲལ་ཡང་ཉེས་པ་མེད་པར་གནང་ལ། གལ་ཏེ་འཇིགས་པ་དང་བྲལ་ཡང་ཞག་དྲུག་ན་མ་སླེབས་པར་བདུན་པའི་སྐྱ་རེངས་ཤར་བའི་ཚེ་སྤང་བའོ། །བརྒྱད་པ་རས་ཆེན་གྱི་སྤང་བ་ནི། གཉན་ཡོད་དུ་དགེ་སློང་རབ་ཏུ་མང་པོ་ལ་བཅས་ཏེ། དབྱར་གྱི་གོས་རས་ཆེན་རང་ཉིད་དབྱར་སྔ་ཕྱི་གང་ཁས་ལེན་པ་དེའི་ཟླ་གཅིག་གི་སྔ་རོལ་དུ་བཙལ་ཞིང་རྙེད་ན་ཚོལ་སྔས་པའི་སྤང་བ་དང་། དགག་དབྱེ་ཟིན་པའི་འོག་ཏུ་ཟླ་ཕྱེད་ལས་འདས་པར་བཅངས་ན་བཞག་འཕྱིས་ཀྱི་སྤང་བའོ། །དགུ་པ་སྔོས་སྒྱུར་གྱིས་སྤང་བ་ནི། མཉན་ཡོད་དུ་ཉེར་དགའ་ལ་བཅས་ཏེ། ཁྱིམ་པས་དགེ་འདུན་ནམ་དགེ་སློང་གཞན་ལ་བསྔོས་པའི་གོས་དང་ལྷུང་བཟེད་ལྟ་བུའི་རྙེད་པ་རང་ཉིད་ལ་བསྒྱུར་ཏེ་བདག་གིར་བཟུང་བའོ། །བཅུ་པ་གསོག་འཇོག་གི་སྤང་བ་ནི། རྒྱལ་པོའི་ཁབ་ཏུ་འཕགས་པ་པི་ལིནྟའི་ལྷན་ཅིག་གནས་པ་ལ་བཅས་ཏེ། ཞག་བདུན་པའི་སྨན་སྨོས་པ་ནི་མདོའི་དངོས་བསྟན་ལྟར་དཔེ་ཙམ་དུ་ཟད་པས། འདིར་སྨན་བཞི་གང་རུང་རང་དུས་ལས་འདས་པར་བཅངས་པ་ལ་གསོག་འཇོག་གི་སྤང་བ་སྟེ། རང་རང་གི་དུས་ནི། བྱིན་གྱིས་མ་བརླབས་ན་སྨན་བཞི་པོ་གང་ཡིན་ཡང་། སྔ་དྲོ་བྱིན་ལེན་བྱས་པ་གུང་ཚིགས་ལས་འདས་པ་དང་། དེ་བཞིན་དུ་ཕྱི་དྲོ་དང་། འོད་དམར་གྱི་མཐའ་དང་། སྲོད་ཀྱི་མཐའ་དང་། མཚན་མོའི་ཐུན་ཐ་མ་བཞི་པོ་རེ་རེ་བཞིན། སྔ་མ་སྔ་མར་བྱིན་ལེན་བྱས་པ། ཕྱི་མ་ཕྱི་མའི་དུས་ལས་འདས་ནའོ། །བྱིན་གྱིས་བརླབས་ན། དུས་རུང་ལ་ནི་བྱིན་རླབས་མ་བཤད་ཀྱང་བྱིན་ལེན་སྔ་དྲོ་བྱས་པ་ཕྱི་དྲོ་མ་ཞིག་པར་བཅངས་པ་དང་། ཐུན་ཚོད་དུ་རུང་བ་སྔ་དྲོ་བརླབས་པ་ཞག་དེའི་མཚན་མོའི་མཐའ་འདས་པ་དང་། ཞག་བདུན་པའི་སྨན་བརླབས་པ་བརྒྱད་པའི་སྐྱ་རེངས་ཤར་བའི་ཚེ་ན་དང་། འཚོ་བཅངས་གྱི་སྨན་ནི་ནད་སོས་ཀྱི་བར་དུ་བརླབས་པ་ནད་ལས་གྲོལ་ནས་ཀྱང་བཅངས་པ་སྟེ། འདིར་ཇི་སྲིད་འཚོའི་བར་དུ་བརླབས་པ་ལ་ནི་གསོག་འཇོག་ཏུ་མི་འགྱུར་རོ། །དེ་ལྟར་སྤང་ལྟུང་སུམ་ཅུ་ལས་ཕྱིར་བཅོས་ཀྱི་ཚེ་བྱིན་ཕྲོགས་དང་ལྷུང་བཟེད་ཚོལ་བ་གཉིས་ཀྱི་རྫས་རྩ་བ་ནས་སྤང་དགོས་ཤིང་། གཞན་རྣམས་ཞག་གཅིག་གི་རིང་སྤང་བ་སྔོན་དུ་བཏང་བས་ཆོག་གོ །

བཞི་པ་ལྟུང་བྱེད་འབའ་ཞིག་པའི་སྡེ་ལ་བསྟན་བཤད་གཉིས་ལས། དང་པོ་ནི། ལྟུང་བྱེད་འབའ་ཞིག་དགུ་བཅུ་ཐམ་པ་ནི། །ཞེས་པ་སྟེ། སྤྱད་ན་ངན་སོང་དུ་ལྟུང་བར་བྱེད་ཅིང་། དེ་དག་བཤགས་པ་ལ་སྤང་བྲལ་སྔོན་དུ་གཏོང་མི་དགོས་པས་ན་འབའ་ཞིག་པ་ཞེས་བྱ་སྟེ། དེའི་མཚན་ཉིད་ནི། བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །ལྟུང་བྱེད་འབའ་ཞིག་པའི་མིང་གིས་ཕྱིར་བཅོས་ན་དག་ཏུ་རུང་བའོ། །དབྱེ་ན། རྩ་བའི་མདོར། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་དང་ཡང་། །ཆུ་དང་ཁྱིམ་དང་བསམ་བཞིན་དང་། །མགྲོན་མང་རྐུན་མ་ཆོས་སྟོན་ནོ། །ཞེས་སྤྱི་བསྡོམས་ཀྱིས་མགོ་དྲངས་པའི་སྡེ་ཚན་དགུ་པོ་རེ་རེ་ལའང་བཅུ་བཅུ་སྟེ་དགུ་བཅུ་ཐམ་པའོ། །

གཉིས་པ་རྒྱས་བཤད་ལ། བཅུ་ཚན་དགུ་ལས། དང་པོ་ཤེས་བཞིན་གྱི་སྡེ་ཚན་ནི། ཤེས་བཞིན་རྫུན་སྨྲ་དགེ་སློང་སྐྱོན་བརྗོད་པ། །ཕྲ་མས་འབྱེད་དང་སྐྱོ་སྔོགས་བཟླུམས་ཀྱང་དབྱེ། །བུད་མེད་ཆོས་སྟོན་བསྙེན་པར་མ་རྫོགས་དང་། །ལྷན་ཅིག་ཆོས་འདོན་གནས་ངན་ལེན་ལྟུང་བརྗོད། །མི་ཆོས་བླ་མ་བདེན་སྨྲ་བཤེས་ངོར་འཕྱ། །བསླབ་གཞི་ཁྱད་གསོད། ཅེས་པ་ལྟར་བཅུ་ལས། དང་པོ་རྫུན་སྨྲའི་ལྟུང་བྱེད་ནི། གཉན་ཡོད་དུ་ཤཱཀྱ་ལག་རྒྱུད་ལ་བཅས་ཏེ། དངོས་པོ་ཕམ་ལྷག་སྦོམ་པོ་ཉེས་བྱས་སུ་གྱུར་པའི་རྫུན་བཞི་དང་། ལྟུང་བྱེད་རང་གི་ནང་ཚན་གྱི་རྫུན་དྲུག་བཤད་པ། དེ་རྣམས་ལས་གཞན་པའི་དགེ་སློང་གིས་ཤེས་བཞིན་དུ་རྫུན་སྨྲས་པ་ཉན་པ་པོས་བརྡའ་འཕྲོད་ཅིང་དོན་གོ་བའོ། །དེ་ལ་རྫུན་བཞི་ནི། རྫུན་སྨྲའི་ཕམ་པ། གཞི་མེད་དང་བག་ཙམ་གྱི་ལྷག་མ། ཤེས་བཞིན་དུ་ཆོས་མ་ཡིན་པ་ལ་ཆོས་སུ་དང་། ཆོས་ཡིན་པ་ལ་མ་ཡིན་པར་སྨྲ་བ་སྦོམ་པོར་གྱུར་པའི་རྫུན་དང་། གསོ་སྦྱོང་གི་དུས་སུ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིས་པ་ལ་ཅང་མི་སྨྲ་བས་འདའ་བར་བྱེད་པའི་ཉེས་བྱས་རྣམས་སོ། །ལྟུང་བྱེད་ཀྱི་ནང་ཚན་གཞན་པ་དྲུག་ནི། བཤེས་ངོར། འཕྱ་བ། ཟས་ཅུང་། སྐུར་འདེབས། ཉེར་འཇོག །ཁྱད་གསོད་རྣམས་སོ། །གཉིས་པ་སྐྱོན་བརྗོད་ཀྱི་ལྟུང་བྱེད་ནི། འདི་ནས་ལྔ་བརྒྱད་དགུ་གསུམ་པོ་མ་གཏོགས་དྲུག་སྡེ་ལ་བཅས་ཏེ། དགེ་སློང་གིས་ཡུལ་དགེ་སློང་གཞན་ལ་ཡུལ་དུས་དེར་སྐྱོན་དུ་གྲགས་པའི་ཚིག་ཕན་སེམས་མ་ཡིན་པར་བརྗོད་པ་ཕ་རོལ་པོས་གོ་བའོ། །གསུམ་པ་ཕྲ་མ་བྱེད་པའི་ལྟུང་བྱེད་ནི། དགེ་སློང་གིས་ཡུལ་དགེ་སློང་མཐུན་པ་དག་ཕྲ་མའི་ཚིག་གིས་འབྱེད་པར་བྱེད་པའོ། །བཞི་པ་སྐྱོ་སྔོགས་བྱེད་པའི་ལྟུང་བྱེད་ནི། དགེ་སློང་གཉིས་རྩོད་པ་དགེ་འདུན་གྱིས་ཆོས་ཕྱོགས་སུ་ཞི་བར་བྱས་ཟིན་ཅིང་། རང་དང་གོ་བྱ་ཞི་བྱེད་ཀྱི་ལས་དེ་བྱེད་པ་ལ་གཏོགས་པས་བཟླུམས་པ་སླར་དབྱེ་འདོད་ཀྱིས་རྩོད་པ་དེ་ལེགས་པར་མ་ཞི་བས་ཡང་ཞི་བར་བྱེད་དགོས་སོ་ཞེས་སྔར་བྱས་ཀྱི་ལས་སྐྱོ་སྔོགས་ཀྱིས་བཤིག་པར་རྩོམ་པའི་ཚིག་སྨྲས་ཤིང་དོན་གོ་བའོ། །ལྔ་པ་བུད་མེད་ལ་ཆོས་སྟོན་པའི་ལྟུང་བྱེད་ནི། འཆར་ཀ་ལ་བཅས་ཏེ། ཁྲིམས་གྲོགས་མེད་པར་ཡུལ་ཉན་འདོད་ཀྱི་བུད་མེད་ལ་དེས་མི་ཤེས་པའི་ཆོས་འདུས་བྱས་མི་རྟག་ཅེས་པ་ལྟ་བུའི་ཚིག་ལྔའམ་དྲུག་ལས་ལྷག་པར་བསྟན་པའོ། །དྲུག་པ་འདོན་པའི་ལྟུང་བྱེད་ནི། དགེ་སློང་གིས་རྒོད་བག་གི་བསམ་པས་བསྙེན་པར་མ་རྫོགས་པ་དང་ལྷན་ཅིག་ཏུ་ཆོས་ཀྱི་ཚིག་གདངས་སྣ་ཚོགས་ཀྱིས་འདོན་པར་བྱས་ནའོ། །བདུན་པ་གནས་ངན་ལེན་བརྗོད་པའི་ལྟུང་བྱེད་ནི། ཕམ་ལྷག་གང་རུང་བྱུང་བའི་དགེ་སློང་ལ་གནས་ངན་ལེན་གླེང་བར་མ་བསྐོས་བཞིན་དུ་བརྗོད་ཡུལ་དགེ་སློང་མིན་པའི་གང་ཟག་བསླབ་བྱ་ལ་མི་མཁས་པའི་དྲུང་དུ་ཕམ་ལྷག་གི་ལྟུང་བ་བརྗོད་ཅིང་གོ་བའོ། །བརྒྱད་པ་མི་ཆོས་བླ་མ་བདེན་པར་སྨྲ་བའི་ལྟུང་བྱེད་ནི། ཉ་པའི་རིགས་ཀྱི་དགེ་སློང་ལྔ་བརྒྱ་ལ་བཅས་ཏེ། མི་ཆོས་བླ་མའི་ཡོན་ཏན་ཐོབ་པའི་དགེ་སློང་གིས་ཡུལ་བསྙེན་པར་མ་རྫོགས་པ་ལ་དགོས་པ་ཁྱད་པར་ཅན་མེད་བཞིན་དུ་དེ་ཐོབ་བོ་ཞེས་སྨྲས་པ་ཡུལ་གྱིས་གོ་བའོ། །དགུ་པ་བཤེས་ངོར་བྱེད་ཅེས་སྐུར་པ་འདེབས་པའི་ལྟུང་བྱེད་ནི། མཛའ་བོ་དང་ས་ལས་སྐྱེས་ལ་བཅས་ཏེ། དགེ་འདུན་གྱི་བྱ་བ་བྱེད་པའི་དགེ་སློང་ལ་ཟས་ལས་གཞན་པའི་རུང་བ་ཚད་ལྡན་གྱི་ཡོ་བྱད་ཅུང་ཟད་བྱིན་པ་ལ་མི་བཟོད་པས། དགེ་འདུན་གྱི་རྫས་གང་ཟག་ལ་བཤེས་ངོར་བྱས་ནས་སྦྱིན་ནོ་ཞེས་འཕྱས་པ་ཕ་རོལ་པོས་གོ་བའོ། །བཅུ་པ་ཁྱད་དུ་གསོད་པའི་ལྟུང་བྱེད་ནི། གསོ་སྦྱོང་གི་དུས་ལྟ་བུ་སོ་ཐར་གྱི་མདོ་འདོན་པའི་ཚེ་བསླབ་པའི་གཞི་ཕྲ་ཞིང་ཕྲ་བ་འདི་དག་འདོན་པས་ཅི་བྱ་ཞེས་ཁྱད་དུ་གསོད་པའི་ཚིག་སྨྲས་པ་གཞན་གྱིས་གོ་བའོ། །

བཅུ་ཚན་གཉིས་པ་ས་བོན་གྱི་སྡེ་ཚན་ནི། ས་བོན་སྐྱེ་བ་གཅོད། །བདག་གི་ངོར་འཕྱ་བསྒོ་པ་རྣར་གཟོན་ནི། །ལྟུང་བྱུང་གླེང་ལ་མ་ཐོས་ལན་གཞན་འདེབས། །ཁྲི་དང་གདིང་བ་མ་བསྡུས་བཏིང་སོང་དང་། །དགེ་སློང་སྐྲོད་དང་ཐོ་འཚམས་ཕྱིས་གནོན་བྱས། །མལ་ཁྲིས་བུག་དབྱུང་སྲོག་ཆགས་ལྡན་པའི་ཆུ། །རྩྭར་འདེབས་གཙུག་ལག་ཕ་གུ་རིམ་གཉིས་བརྩིག །ཤེས་བཞིན་བགྱིས་སོ། ཞེས་པ་ལྟར་བཅུ་ལས། དང་པོ་ས་བོན་དང་སྐྱེ་བ་འཇིག་པའི་ལྟུང་བྱེད་ནི། འདི་དང་བཅུ་པ་དག་དྲུག་སྡེ་ལ་བཅས་ཏེ། དགེ་སློང་གིས་ནས་སོགས་ས་བོན་དང་། མྱུ་གུ་སོགས་སྐྱེ་བ་གང་རུང་། རང་གི་ཆོས་སུ་གྲུབ་པ། མ་ཉམས་པ། རུང་བ་མ་བྱས་པ། རང་རྩྭས་བཅིངས་པ་སོགས་ཀྱི་རྐྱེན་དང་ལྡན་པ་མ་ཡིན་པར། རང་གིས་ཉམས་པར་བྱེད་དམ་གཞན་བྱེད་དུ་འཇུག་ཀྱང་རུང་སྟེ། ཉམས་པའི་ཚེ་ཤིང་རེ་རེ་དང་། རྩྭ་ཉག་མ་རེ་རེ་དང་། ས་བོན་རེ་རེ་ལ་དེ་དང་དེ་འཇོམས་པའི་ལྟུང་བྱེད་རེ་རེར་འགྱུར་ཞིང་། སྟར་ཀ་ལ་སོགས་པའི་འབྲས་བུ་སྨིན་པ་སྡོང་བུ་ལས་བྲལ་བར་བྱས་པ་སོགས་ལ་ཉེས་བྱས་སོ། །འདིར་རུང་བར་བྱས་པ་ནི། ཤིང་ཐོག་སོགས་ལ་མེས་རེག་པ་དང་། མཚོན་དང་སེན་མོ་དང་ནེ་ཙོ་སོགས་ཀྱིས་རྨ་གཏོད་པ་སོགས་ཀྱིས་རུང་བ་དང་། དུས་རུང་མ་གཏོགས་པའི་སྨན་གཞན་གསུམ་ཕྱི་དྲོ་ལོངས་སྤྱོད་པའི་ཚེ་ཆུ་གྲང་མོ་གཏོར་བས་རུང་བར་བྱས་པའོ། །གཉིས་པ་འཕྱ་བའི་ལྟུང་བྱེད་ནི། མཛའ་བོ་དང་ས་ལས་སྐྱེས་དག་ལ་བཅས་ཏེ། དགེ་འདུན་གྱི་ཞལ་ཏ་ཆོས་དང་མཐུན་པར་བྱས་སམ་བྱེད་བཞིན་པའི་དགེ་སློང་རང་ལ་གནས་མལ་སོགས་ངན་པ་སྟོབ་པ་པོ་མ་ཡིན་ཡང་བདག་གི་ངོར་འདིས་ངན་པ་སྟོབ་བོ་ཞེས་སོགས་དངོས་སུའམ་ཁ་ཅིག་འདི་ལྟར་བྱེད་དོ་ཞེས་ཟུར་གྱིས་འཕྱ་ནའང་རུང་སྟེ་འཕྱས་པ་གོ་བའོ། །བགྲངས་པ་ལས་དངོས་གཞིའོ། །ཞེས་པས་འཕྱ་བ་པོ་དེ་ཉིད་དགེ་འདུན་གྱིས་གསོལ་པའི་ལས་ཀྱིས་ངན་པའི་གྲངས་སུ་བཅུག་པ་དེའི་ཚེ་དངོས་གཞིར་འགྱུར་བའོ། །གསུམ་པ་བསྒོ་བ་རྣར་གཟོན་པའི་ལྟུང་བྱེད་ནི། འདི་དང་དགུ་པ་ཀཽ་ཤམྦིར་འདུན་པ་ལ་བཅས་ཏེ། དགེ་སློང་ལྟུང་བ་བྱུང་བ་ཕྱིར་བཅོས་ལ་འགོད་པའི་ཕྱིར་ལྟུང་བ་གླེང་བ་ལྟ་བུ་ཆོས་མཐུན་གྱི་བསྒོ་བ་དང་དྲི་བ་དྲིས་པ་ན། དེ་མ་ཐོས་པ་ལྟར་རམ་ཁྱད་གསོད་ལྟ་བུས། དེའི་ལན་མི་སྨྲ་བར་ལན་གཞན་ལོག་པར་འདེབས་པའི་ཚིག་སྨྲས་པ་ཡུལ་གྱིས་གོ་བའོ། །བཞི་པ་ཁྲི་དང་ཞེས་པ་གནས་མལ་གྱི་ལྟུང་བྱེད་ནི། མཉན་ཡོད་དུ་དགེ་སློང་རབ་ཏུ་མང་པོ་ལ་བཅས་ཏེ། ཁྲི་དང་ཁྲིའུ་སོགས་དགེ་འདུན་གྱི་གནས་མལ་ལ་སྤྱད་ནས་རང་གིས་མ་བསྡུས་ཤིང་གཞན་ལའང་མ་བཅོལ་བར་བླ་གབ་མེད་སར་བོར་བས་ཆུད་ཟོས་པའམ། མ་ཟོས་ཀྱང་གནས་མལ་གྱི་ཉེ་འཁོར་ནས་འདོམ་ཞེ་དགུ་འདས་ཏེ་ཕྱིན་པའོ། །ལྔ་པ་གདིང་བའི་ལྟུང་བྱེད་ནི། ལྷོ་ལམ་ནས་འོངས་པའི་དགེ་སློང་གཉིས་ལ་བཅས་ཏེ། དགེ་འདུན་གྱི་གཙུག་ལག་ཁང་སྲོག་ཆགས་སྐྱེ་བའི་ཉེས་དམིགས་ཡོད་སར་རྩྭ་ཱལ་སོགས་པའི་གདིང་བ་བཏིང་བ་རང་ངམ་གཞན་བསྐོས་པས་མ་བསྡུས་པར་བོར་བས་སྲོག་ཆགས་སྐྱེས་པ་སོགས་ཆུད་ཟོས་སམ། མ་ཟོས་ཀྱང་ཉེ་འཁོར་ལས་འདས་ཏེ་སོང་བའོ། །དྲུག་པ་སྐྲོད་པའི་ལྟུང་བྱེད་ནི། འདི་དང་ཕྱི་མ་གཉིས་ཀ་འཆར་ཀ་ལ་བཅས་ཏེ། དགེ་འདུན་གྱི་གཙུག་ལག་ཁང་ནས་དགེ་སློང་གཞན་ཞེ་སྡང་གིས་སྐྲོད་དམ་སྐྲོད་དུ་བཅུག་པས་ཕྱི་རོལ་དུ་འཐོན་པའོ། །བདུན་པ་ཕྱིས་གནོན་བྱེད་པའི་ལྟུང་བྱེད་ནི། དགེ་འདུན་གྱི་གཙུག་ལག་ཁང་དུ་སྔར་ཞུགས་པའི་དགེ་སློང་གཞན་ལ་ཐོ་འཚམས་པའི་བསམ་པས་ལུས་ངག་གང་རུང་གིས་གནོད་པ་བརྩམས་ཏེ་ཟིལ་གྱིས་མནན་པའོ། །བརྒྱད་པ་རྩ་བ་འབྱུང་བའི་ལྟུང་བྱེད་ནི། མཉན་ཡོད་དུ་ཉེར་དགའ་ལ་བཅས་ཏེ། དགེ་འདུན་གྱི་གཙུག་ལག་ཁང་གི་སྟེང་ཐོག་སྙི་བ་ལ་གནས་མལ་གྱི་ཁྲི་རྐང་རྣོན་པོ་བཙུགས་ཏེ་འདུག་པས་བུག་པ་ཐལ་བྱུང་དུ་བརྡོལ་བའོ། །དགུ་པ་འདེབས་པའི་ལྟུང་བྱེད་ནི། སྲོགས་ཆགས་དང་བཅས་པའི་ཆུ་དང་རྩྭ་ཤིང་སོགས་ལ་དེར་ཤེས་བཞིན་དུ་འདེབས་པ་དང་སྤྱོད་པ་གང་རུང་བྱེད་དམ་བྱེད་དུ་བཅུག་པས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །བཅུ་པ་རིམ་པ་ལྷག་པར་རྩིག་པའི་ལྟུང་བྱེད་ནི། གཞི་མི་བརྟན་པ་དང་ཆུ་ཁུང་མ་གཏོད་པ་སོགས་འཇིག་རྐྱེན་ཡོད་སར་ཤེས་བཞིན་ཏུ་སྤྱོད་ལམ་བཞི་ཤོང་ཡན་ཆད་ཀྱི་གཙུག་ལག་ཁང་རང་ངམ་བསྐོས་པས་ཉིན་གཅིག་ལ་ཕ་གུའི་རིམ་པ་འཇིམ་པ་དང་བཅས་པ་གཉིས་སམ་གསུམ་ལས་ལྷག་པ་བརྩིགས་པའོ། །

བཅུ་ཚན་གསུམ་པ་མ་བསྐོས་པའི་སྡེ་ཚན་ནི། འདི་མན་དགེ་སློང་མར། །མ་བསྐོས་ཆོས་སྟོན་བསྐོས་ཀྱང་ཉི་ནུབ་དང་། །ཁ་ཟས་ཕྱིར་སྟོན་གོས་བཙེམས་ཆོས་གོས་སྦྱིན། །དོན་མཐུན་ལམ་འགྲོགས་གྲུ་དེ་གྱེན་ཐུར་འགྲོ། །དབེན་པར་གཅིག་འདུག་པ་དང་འགྲེང་བ་དང་། །སྦྱོར་བཅུག་ཟས་ཟ་རྣམས་ནི་སྤང་བར་བྱ། །འདི་མན་ཞེས་པ་བཅུ་ཚན་གཅིག་པུ་འདི་དགེ་སློང་མ་ཉིད་ལ་བརྟེན་པར་ཤེས་པའི་ཆེད་དུའོ། །དེ་ལ་བཅུ་ལས། དང་པོ་མ་བསྐོས་པར་སྟོན་པའི་ལྟུང་བྱེད་ནི། འདི་དང་དྲུག་པ་བདུན་པ་བཅུ་པ་རྣམས་དྲུག་སྡེ་ལ་བཅས་ཏེ། དགེ་སློང་མའི་སྟོན་པར་མ་བསྐོས་སམ། བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས་དགེ་སློང་མ་ལ་ཆོས་བསྟན་ཅིང་དེས་གོ་བའོ། །གཉིས་པ་ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་ནི། འདི་དང་གསུམ་པ་དགའ་བྱེད་ལ་བཅས་ཏེ། དགེ་སློང་མའི་སྟོན་པར་བསྐོས་ཀྱང་འཇིགས་པ་དང་བཅས་པའི་གནས་སུ་དགེ་སློང་མ་ལ་ཉི་མ་ནུབ་ནས་ཀྱང་ཆོས་བསྟན་ཅིང་དེས་གོ་བའོ། །གསུམ་པ་ཟས་ངོར་སྟོན་པའི་ལྟུང་བྱེད་ནི། དགེ་སློང་མའི་སྟོན་པར་འོས་ཤིང་བསྐོས་པས་རྙེད་པའི་ཕྱིར་ཆོས་མི་སྟོན་ཀྱང་། ཕྲག་དོག་གིས་ཟས་ཅུང་ཟད་ཙམ་གྱི་ཕྱིར་ཆོས་སྟོན་པར་བྱེད་དོ་ཞེས་སྐུར་པ་བཏབ་པ་ཡུལ་གྱིས་གོ་བའོ། །བཞི་པ་གོས་བྱེད་པའི་ལྟུང་བྱེད་ནི། འདི་དང་བརྒྱད་པ་དང་དགུ་པ་རྣམས་འཆར་ཀ་ལ་བཅས་ཏེ། ཉེ་དུ་མ་ཡིན་པའི་དགེ་སློང་མའི་གོས་བཙེམས་ཏེ་བཟོ་གྲུབ་པའོ། །ལྔ་པ་གོས་སྦྱིན་པའི་ལྟུང་བྱེད་ནི། དེད་དཔོན་ལས་རབ་ཏུ་བྱུང་བའི་དགེ་སློང་ལ་བཅས་ཏེ། ཉེ་དུ་མ་ཡིན་པའི་དགེ་སློང་མ་ལ་བཤེས་ངོ་ཙམ་གྱི་ཕྱིར་རང་གི་ཆོས་གོས་རུང་བ་ཚད་ལྡན་བྱིན་པ་དེས་ལག་ཏུ་ཐོབ་པའོ། །དྲུག་པ་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། དགེ་སློང་གང་འཇིགས་པ་མེད་པའི་ལམ་དུ་ཉེ་དུ་མ་ཡིན་པའི་དགེ་སློང་མ་དང་ལྷན་ཅིག་དོན་མཐུན་པས་མགྲོན་ཐབས་སུ་འགྲོགས་ཏེ་འགྲོ་ན་རྒྱང་གྲགས་རེ་རེ་འདས་པ་ལ་ལྟུང་བ་རེ་རེ་དང་། རྒྱང་གྲགས་ཕྱེད་རེ་ལ་ཉེས་བྱས་སོ། །བདུན་པ་ལྷན་ཅིག་གྲུར་འཇུག་པའི་ལྟུང་བྱེད་ནི། སྔར་བཞིན་དགེ་སློང་མ་དང་ལྷན་ཅིག་གྲུར་ཞུགས་ནས་ཐད་ཀ་མིན་པར་རྒྱུན་ལས་བཟློག་སྟེ་གྱེན་དང་རྒྱུན་ཕྱོགས་སུ་ཐུར་དུ་ཕྱིན་ནས་རྒྱང་གྲགས་ལས་འདས་པའོ། །བརྒྱད་པ་ལྷན་ཅིག་འདུག་པའི་ལྟུང་བྱེད་ནི། ཡུལ་ཉེ་དུ་མ་ཡིན་པའི་བུད་མེད་དང་དབེན་པ་སྐྱབས་ཡོད་དུ་ཁྲིམས་གྲོགས་མེད་པར་འདོམ་གང་ཙམ་གྱིས་བར་ཆོད་ཀྱང་གཉིས་ཀ་ས་ལ་འདུག་ནའོ། །དགུ་པ་ལྷན་ཅིག་འགྲེང་བའི་ལྟུང་བྱེད་ནི། དབེན་པར་བུད་མེད་དམ་ཁྱད་པར་དགེ་སློང་མ་དང་བར་འདོམ་གང་ཙམ་དུ་གཉིས་ཀ་འགྲེངས་ཏེ་གནས་ནའང་ལྟུང་བའོ། །བཅུ་པ་ཟས་སྦྱོར་དུ་འཇུག་པའི་ལྟུང་བྱེད་ནི། དགེ་སློང་གིས་དགེ་སློང་མ་ཉེ་དུ་མ་ཡིན་པ་སྦྱིན་བདག་ཁྱིམ་པ་ལ་དགེ་སློང་རང་ཡོན་ཏན་དང་མི་ལྡན་ཡང་ལྡན་ནོ་ཞེས་རྫུན་གྱི་སྒོ་ནས་དུས་རུང་གི་ཟས་སྦྱོར་དུ་བཅུག་སྟེ་ཟོས་པའོ། །

བཅུ་ཚན་བཞི་པ་ཡང་དང་ཡང་གི་སྡེ་ཚན་ནི། ཡང་ཡང་ཟས་ཟ་མུ་སྟེགས་འདུག་པའི་སར། །ཞག་གཅིག་ལྷག་བསྡད་ཟ་དང་ལྷུང་བཟེད་དོ། །ཟ་དང་ཟོས་རྗེས་བཟའ་བཅའ་ཟ་བ་དང་། །སྤངས་ཟས་ལྟུང་འབྱུང་ཆེད་དུ་རྫུན་གྱིས་སྟོབ། །གནང་མིན་མཚམས་ནང་ལོགས་སུ་འདུས་ནས་ཟ། །དུས་མིན་ཕྱེད་ཡོལ་ཟ་དང་གསོག་འཇོག་ཟ། །བྱིན་ལེན་མ་བྱས་སྨན་བཞི་ཁར་མིད་པ། །བསོད་པ་ཞིམ་པའི་ཟས་སློང་། ཞེས་པ་ལྟར་བཅུ་ལས། དང་པོ་ཡང་ཡང་ཟ་བའི་ལྟུང་བྱེད་ནི། འདི་ནས་བཞི་པའི་བར་དང་དགུ་པ་དང་བཅུ་པ་རྣམས་དྲུག་སྡེ་ལ་བཅས་ཏེ། བསོད་སྙོམས་ལན་གཅིག་གིས་གསོ་མི་ནུས་པའི་ནད་ཀྱིས་བཏབ་པ་དང་། དགེ་འདུན་དང་མཆོད་རྟེན་གྱི་ལས་དང་། མུ་གེའི་དུས་དང་། དཔག་ཚད་ཕྱེད་དུ་ཕྱིན་པ་མ་ཡིན་ཞིང་། སྲ་བརྐྱང་མ་བཏིང་པའི་དགེ་སློང་གིས། ཁྱིམ་པ་ཉེ་དུ་མ་ཡིན་པ་ལ་ཁྲུ་གང་ཡན་ཆད་ཀྱི་གོས་ཀྱི་རྙེད་པ་མེད་པའི་དུས་རུང་གི་ཁ་ཟས་དུས་ཉི་མ་གཅིག་ལ་ཁྱིམ་གཞན་དུ་ཟོས་ཟིན་ནས་ཡང་ཟས་ཀྱི་བསོད་སྙོམས་གཉིས་དང་གསུམ་སོགས་བསླངས་ཏེ་ཡང་ཡང་ཟོས་པའོ། །གཉིས་པ་འདུག་གནས་སུ་ཟ་བའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་པའི་གནས་མུ་སྟེགས་པའི་འདུག་གནས་སུ་ཞག་གཅིག་ལས་ལྷག་པར་བསྡད་ནས་སྦྱིན་བདག་གིས་མ་སྟབས་པར་ཉི་མ་གཉིས་པའི་ཟན་ཟོས་པའོ། །གསུམ་པ་ལྷུང་བཟེད་དོ་གསུམ་ལས་ལྷག་པ་ལེན་པའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་ནས་ཅི་བདེར་སྟོབ་པ་མ་ཡིན་པར་དུས་རུང་གི་ཟས་ལྷུང་བཟེད་ཆེ་ཚད་གང་ངམ། འབྲིང་ཚད་དོ། ཆུང་ཚད་གསུམ་སྟེ་བྲེ་ཕྱེད་དང་ལྔ་བསླང་དུ་རུང་ལ། དེ་ལས་ལྷག་པ་བསླངས་ཏེ་གནས་གཞན་དུ་ཁྱེར་ནས་ཟོས་པའོ། །བཞི་པ་སྤངས་པ་ཟ་བའི་ལྟུང་བྱེད་ནི། མུ་གེའི་དུས་དང་ནད་པ་མ་ཡིན་པའི་དགེ་སློང་གིས་དུས་རུང་གི་ཟས་བཟའ་བཅའ་གང་རུང་ཟོས་རྗེས། ད་དེ་རིང་མི་ཟའོ་སྙམ་དུ་བློས་བཅད་ཅིང་ངག་ཏུ་བརྗོད་ནས། སླར་ཡང་ལྷག་པོར་མ་བྱས་བར་དེ་ཉིད་ཟོས་པའོ། །གལ་ཏེ་སྤངས་པ་ཟ་ན། ཡུལ་དགེ་སློང་གནས་མ་བཏང་བའི་མདུན་དུ་ཙོག་པུས་བཟུང་ནས་གསོལ་བ་བཏབ་པས། ཡུལ་དེས་བླངས་ནས་ཁམ་གཉིས་སམ་གསུམ་གྱིས་ཕུད་ཟ་ཞིང་། ཟས་སྤངས་པ་ཡིན་ན་ཟ་མི་དགོས། གང་ལྟར་ཡང་དེས་ཟ་བ་པོ་ལ་གཏད་ནས་ཟར་རུང་ངོ་། །ཟས་བརྩམས་པས་ལྡང་བར་མི་བྱའོ། །ཞེས་པའི་དོན་ཟས་ཟ་བའི་འཕྲོ་མ་རྫོགས་པ་ལ་ལངས་ནས་ལྷག་མ་ཕྱིས་ཟ་ན་བརྩམས་ལྡང་ངོ་། །ལྔ་པ་སྤངས་བ་སྟོབ་པའི་ལྟུང་བྱེད་ནི། མཉན་ཡོད་དུ་དགེ་སློང་རྒན་ཞུགས་ཤིག་ལ་བཅས་ཏེ་ཡུལ་དགེ་སློང་གཞན་གྱིས་སྤངས་པའི་ཟས་ལྷག་པོར་མ་བྱས་བཞིན་དུ་དེ་ལ་ངན་སེམས་ཀྱིས་ལྟུང་བ་འབྱུང་བའི་ཆེད་དུ་ལྷག་པོར་བྱས་སོ་ཞེས་རྫུན་གྱིས་སྟོབ་པའི་ཚིག་སྨྲས་པ་དེས་གོ་ནས་ཟོས་ན་སྟོབ་པ་པོ་ལ་ལྟུང་བའོ། །དྲུག་པ་འདུས་ཤིང་ཟ་བའི་ལྟུང་བྱེད་ནི། རྒྱལ་པོའི་ཁབ་ཏུ་ལྷས་སྦྱིན་འཁོར་བཅས་ལ་བཅས་ཏེ། ཡང་ཡང་ཟ་བའི་སྐབས་ལྟར་ན་བ་སོགས་གནང་བའི་དུས་མ་ཡིན་པར་མཚམས་ནང་དུ་བསམ་པ་མི་མཐུན་པས་ཀུན་ནས་བསླངས་ཏེ་དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་དང་ལྷན་ཅིག་འདུས་ནས་དུས་རུང་གི་ཟས་ཟོས་པའོ། །བདུན་པ་དུས་མ་ཡིན་པར་ཟ་བའི་ལྟུང་བྱེད་ནི། མཉན་ཡོད་དུ་གཞོན་ནུ་བཅུ་བདུན་སྡེ་ལ་བཅས་ཏེ། དུས་རུང་གི་ཟས་ཟ་བའི་དུས་མ་ཡིན་པ་གང་ཞེ་ན། དགེ་སློང་རང་གང་དུ་གནས་པའི་གླིང་གི་ཉི་མ་ཕྱེད་ཡོལ་ནས་སྐྱ་རེངས་དང་པོ་མ་ཤར་གྱི་བར་ཏེ། དུས་དེར་ན་བ་སོགས་ཀྱི་རྐྱེན་མེད་པར་ཟོས་ན་མགུལ་དུ་ཇི་ཙམ་མིད་པ་དེ་སྙེད་ཀྱི་ལྟུང་བར་འགྱུར་ཞིང་། ནད་པས་ཀྱང་ཟ་བའི་ཚེ་ནད་པ་ལ་འདི་ལྟར་གནང་བ་ཡིན་སྙམ་དུ་དུས་དྲན་བྱ་དགོས་སོ། །བརྒྱད་པ་གསོག་འཇོག་བྱས་པ་ཟ་བའི་ལྟུང་བྱེད་ནི། དགེ་སློང་ནག་པོ་པ་ལ་བཅས་ཏེ། ན་བ་སོགས་ཀྱི་རྐྱེན་མེད་པར་སྨན་བཞི་པོ་གང་རུང་བྱིན་ལེན་བྱས་པ་རང་དུས་ལས་འདས་པས་གསོག་འཇོག་ཏུ་སོང་ཞིང་མ་ཞིག་པ་མུ་གེའི་དུས་མིན་པར་ཟོས་པའོ། །འདིར་གསོག་འཇོག་ལས་འཕྲོས་པ་བཞི་སྟེ། ལག་ཉ། མཚམས་བཙོས། ཞག་ལོན། དགེ་སློང་གིས་བཙོས་པའོ། །དང་པོ་ནི། ཆུད་ཟ་བ་སོགས་ཀྱི་རྐྱེན་མེད་པར་ཟས་གང་ལ་བྱིན་ལེན་མ་བྱས་པའི་གོང་དུ་དགེ་སློང་རང་གིས་རེག་པའོ། །གཉིས་པ་ནི། དགེ་སློང་རང་དབང་བའི་མཚམས་དངོས་སམ་དེའི་ཉེ་འཁོར་གྱི་ནང་དུ་ཟས་རྗེན་པ་ཞིག་བཙོས་པ། གསུམ་པ་ནི། མཚམས་ནང་དེར་དེ་འདྲའི་དངོས་པོས་ཞག་ལོན་པ། བཞི་པ་ནི། དེ་འདྲའི་དངོས་པོ་མཚམས་ཀྱི་ཕྱི་ནང་གང་རུང་དུ་དགེ་སློང་གིས་བཙོས་པའོ། །དེ་བཞི་ནད་ལ་ཕན་པའམ་མུ་གེའི་དུས་མིན་པར་ཟོས་ན་ཉེས་བྱས་སུ་འགྱུར་རོ། །དགུ་པ་བྱིན་ལེན་མ་བྱས་པར་ཟ་བའི་ལྟུང་བྱེད་ནི། གནས་སྒྲ་མི་སྙན་ནམ་དེ་དང་འདྲ་བ་མ་ཡིན་པ། བདག་ཉིད་ཟན་ཆད་པ་དང་ནད་ལ་ཕན་པ་སོགས་ཀྱི་རྐྱེན་མེད་པར་ཆུ་དང་སོ་ཤིང་མ་གཏོགས་སྨན་བཞི་གང་རུང་བྱིན་ལེན་མ་བྱས་པ་ལ་དེར་འདུ་ཤེས་པས་ཁམ་གཅིག་ཡན་ཆད་མིད་པ་ནའོ། །བྱིན་ལེན་ནི། ནོད་པ་པོ་སྟོབ་པ་པོའི་གློ་དང་རྒྱབ་ན་གནས་པ་མ་ཡིན་པ་ལ་མཚམས་གཞན་གྱིས་བར་མ་ཆོད་པར་སྟོབ་ཅིང་། ནོད་པ་པོས་ཀྱང་ལག་གཉིས་གན་རྐྱལ་དུ་བཀན་པས་བླང་ངོ་། །བྱིན་ལེན་འཇིག་པའི་རྒྱུ་ནི། ལུང་རྣམ་འབྱེད་ལས། ཕྲོགས་དང་འདྲིལ་དང་རེག་པ་དང་། །བསྔོས་དང་དགེ་སློང་མིན་གྱུར་དང་། །ངོ་བོ་འགྱུར་དང་སྐྱེ་བ་འགྱུར། །དོར་བ་ཡིས་ནི་བྱིན་ལེན་འཇིག །ཅེས་སོ། །བཅུ་པ་ཟས་བསོད་པ་སློང་བའི་ལྟུང་བྱེད་ནི། རང་ཉིད་ན་བ་ལ་སོགས་པའི་རྐྱེན་མེད་ཅིང་དངོས་པོ་འོ་མ་སོགས་ཡུལ་དུས་དེར་བསོད་པར་གྲགས་པ་ཞིམ་པའི་ཟས་བཟང་པོ་ཁྱིམ་པ་ཉེ་དུ་མ་ཡིན་པས་ཅི་བདེར་མ་བསྟབས་ཀྱང་ཆོག་མི་ཤེས་པར་བསླངས་ཏེ་ཟོས་པའོ། །

བཅུ་ཚན་ལྔ་པ་ཆུ་དང་གི་སྡེ་ཚན་ནི། སྲོག་ཆགས་བཅས། །ཆུར་སྤྱོད་ཉལ་པོ་བྱེད་པའི་ཤུལ་དུ་ཉལ། །དབེན་པའི་སྐྱབས་སུ་འགྲེང་དང་གཅེར་བུར་རྒྱུ། །དམག་བལྟ་དམག་སར་ཞག་གཉིས་ལྷག་པར་བསྡད། །དམག་གི་རུ་བཀོད་བྱེད་དང་དགེ་སློང་བརྡེག །བརྡེག་བརྩམས་གནས་ངན་ལེན་གྱི་ལྟུང་བ་འཆབ། །ཅེས་པ་ལྟར་བཅུ་ལས། དང་པོ་སྲོག་ཆགས་དང་བཅས་པའི་ཆུར་སྤྱོད་པའི་ལྟུང་བྱེད་ནི། ཀཽ་ཤམྦྷིར་འདུན་པ་ལ་བཅས་ཏེ། རང་དོན་དུ་སྲོག་ཆགས་དང་བཅས་པའི་ཆུ་ལ་ཁྲུས་དང་བཏུང་བ་དང་གོས་འཁྲུད་པ་དང་འགོག་ཅིང་བསྒྱུར་བ་སོགས་དང་། རྩྭ་ཤིང་གཅོད་ཅིང་མེར་འཇུག་པ་སོགས་སེམས་ཅན་འཆི་བར་མཐོང་ཡང་ལྟོས་མེད་དུ་ལོངས་སྤྱོད་ན་ཤི་བ་དེ་སྙེད་ཀྱི་ལྟུང་བའོ། །དེས་ན་མར་མེའི་འོད་ཁང་བྱ་བ་དང་། ཆུ་ཚགས་བཅང་བར་བྱ་ཞིང་། ཆུ་ཚགས་ཀྱི་དབྱེ་བ་ལ། དཔྱངས་ཚགས་དང་། བུམ་ཚགས་ལྕེའུ་ཅན་དང་། ཆུ་ཚགས་གྲུ་གསུམ་དང་། རིལ་བ་ཞབས་ཚགས་ཅན་དང་། གསལ་ཚགས་རྣམས་སོ། །གཉིས་པ་ཉལ་པོ་བྱེད་པའི་ཁྱིམ་དུ་འདུག་པའི་ལྟུང་བྱེད་ནི། འདི་དང་གསུམ་པ་བརྒྱད་པ་དགུ་པ་བཅུ་པ་རྣམས་འཆར་ཀ་ལ་བཅས་ཏེ། ཁྱིམ་པ་ཕོ་མོ་རང་ཁྱིམ་དུ་ཉལ་པོ་བྱེད་པ་ལ་ཞུགས་པའམ་དེར་ཕྱོགས་པ་ལ། དེ་དང་ཉེ་བའི་སར་ཉལ་ལམ་འདུག་སྟེ། དེ་དག་གིས་དགེ་སློང་དེར་ཡོད་པ་ཚོར་བའོ། །གསུམ་པ་ཉལ་པོ་བྱེད་པའི་ཁྱིམ་དུ་འགྲེང་བའི་ལྟུང་བྱེད་ནི། ཉེ་བའི་སར་ཞེས་པའི་གནས་སུ་དགེ་སློང་གི་བར་ན་སྐྱབས་ཡོད་པར་ཞེས་དང་། ཉལ་ལམ་འདུག་སྟེ་ཞེས་པའི་གནས་སུ་འགྲེངས་ཏེ་གནས་པ་ཞེས་བརྗེ་བ་མ་གཏོགས་པ་སྔར་ལྟར་རོ། །བཞི་པ་གཅེར་བུ་པ་ལ་ཟས་བྱིན་པའི་ལྟུང་བྱེད་ནི། ཀུན་དགའ་བོ་ལ་བཅས་ཏེ། མུ་སྟེགས་གཅེར་བུ་པ་ཕོ་མོ་གང་རུང་ལ་ནད་པ་དང་ཉེ་དུ་དང་དགེ་བ་ལ་སྦྱོར་བའི་དོན་མ་ཡིན་པར་རང་དང་དེ་གཉིས་ཀས་ཟར་རུང་བའི་དུས་རུང་གི་ཟས་རང་གིས་ལག་གིས་བྱིན་ཞིང་དེས་ཐོབ་པའོ། །ལྔ་པ་དམག་ལ་བལྟ་བའི་ལྟུང་བྱེད་ནི། འདི་དང་དྲུག་པ་དང་བདུན་པ་རྣམས་དྲུག་སྡེ་ལ་བཅས་ཏེ། རྒྱལ་པོས་བོས་པ་སོགས་རྐྱེན་དགོས་དང་མི་ལྡན་པའི་དགེ་སློང་གིས་རང་གི་གནས་ཀྱི་ཉེ་འཁོར་ལས་འདས་ཏེ་དམག་གི་དཔུང་ལ་བལྟས་པས་མཐོང་བ་ན་ལྟུང་བྱེད་དོ། །དྲུག་པ་དམག་གི་ནང་དུ་གནས་པའི་ལྟུང་བྱེད་ནི། སྔར་བཞིན་རྐྱེན་དགོས་མེད་པར་དམག་གི་ནང་དུ་ཞག་གཅིག་གམ་གཉིས་ལས་ལྷག་པར་བསྡད་པའོ། །བདུན་པ་དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་ནི། རྐྱེན་དགོས་ཀྱི་དམག་ནང་དུ་སྡོད་དགོས་པའི་ཚེ་ཡང་རང་དགར་གོ་མཚོན་ལ་རེག་པ་དང་དམག་དཔུང་གི་རུ་བཤམ་དཀོད་སོགས་བྱས་པའོ། །བརྒྱད་པ་བརྡེག་པའི་ལྟུང་བྱེད་ནི། ཁྲོ་བས་དགེ་སློང་གཞན་ལ་བརྡེག་གམ་བརྡེག་ཏུ་བཅུག་པས་ཕོག་པ་ན་བརྡེག་ཐེངས་དེ་སྙེད་ཀྱི་ལྟུང་བ་རེ་རེ་འོ། །དགུ་པ་བརྡེག་པར་གཟས་པའི་ལྟུང་བྱེད་ནི། ཁྲོ་བས་དགེ་སློང་གཞན་ལ་བརྡེག་པར་བརྩམས་པ་སྟེ་བརྡེག་ཚུལ་བྱེད་པ་དེས་གོ་བའོ། །བཅུ་པ་གནས་ངན་ལེན་འཆབ་པའི་ལྟུང་བྱེད་ནི། མཐོལ་ཡུལ་མཚན་ཉིད་དང་ལྡན་པ་ཡོད་པའི་དབུས་སུ་དགེ་སློང་གཞན་ལ་གནས་ངན་ལེན་གྱི་ལྟུང་བ་ཕམ་ལྷག་གང་རུང་འབྱུང་བ་ངོ་ཤེས་སམ་ཡིད་གཉིས་ཟ་བ་དགོས་པ་ཁྱད་པར་ཅན་མེད་པར་བཅབས་ཏེ་མཚན་མོ་འདས་ན་ལྟུང་བྱེད་དོ། །ཕམ་ལྷག་ལས་གཞན་པའི་ལྟུང་བ་འཆབ་ན་ཉེས་བྱས་སོ། །

བཅུ་ཚན་དྲུག་པ་ཁྱིམ་དང་གི་སྡེ་ཚན་ནི། དགེ་སློང་ཟས་གཅོད་མེ་ལ་རེག་ཏུ་བཅུག །དགེ་འདུན་ལས་ལ་འདུན་ཕུལ་ཕྱིར་ལྡོག་སྨྲ། །བསྙེན་མ་རྫོགས་དང་ནུབ་གཉིས་ལྷག་པར་ཉལ། །སྡིག་ལྟའི་ཆོས་ལུགས་མི་གཏོང་ཕེབས་པར་སྨྲ། །དགེ་ཚུལ་སྡིག་ལྟ་མི་གཏོང་ལྷན་ཅིག་ཉལ། །རུང་བའི་ཚོན་མིན་ཁ་དོག་ཅན་གོས་གྱོན། །རིན་ཆེན་དམག་ཆས་རོལ་མོའི་ཆས་ལ་རེག །ཚ་དུས་རང་དགར་ཁྲུས་བྱེད། ཅེས་པ་ལྟར་བཅུ་ལས། དང་པོ་ཟན་གཅོད་དུ་འཇུག་པའི་ལྟུང་བྱེད་ནི། འདི་དང་བཞི་པ་དྲུག་པ་བདུན་པ་རྣམས་ཉེར་དགའ་ལ་བཅས་ཏེ་ཁྱིམ་པས་དགེ་སློང་གཞན་ལ་དུས་རུང་གི་ཟས་འདྲེན་པ་ན་དགེ་སློང་ལ་ངན་སེམས་ཀྱིས་དེ་འགོག་པའི་ཚིག་སྨྲས་ནས་གཅོད་དུ་བཅུག་སྟེ་ཁྱིམ་པས་དོན་གོ་བའོ། །གཉིས་པ་མེ་ལ་རེག་པའི་ལྟུང་བྱེད་ནི། འདི་དང་བརྒྱད་པ་དགུ་པ་བཅུ་པ་རྣམས་དྲུག་སྡེ་ལ་བཅས་ཏེ། རྒོད་བག་གི་བསམ་པས་མེ་ལ་རེག་གམ་རེག་ཏུ་བཅུག་ནས་རེག་པའི་ཚེ་ནའོ། །དེ་ཡང་ཆོས་ལྡན་གྱི་བྱ་བའི་ཆེད་དུ་མེ་ལ་རེག་དགོས་ན། དུས་འདིའི་ཚེ་སྟོན་པས་གནང་བ་ཡིན་སྙམ་དུ་དུས་དྲན་བྱས་ནས་རེག་ན་ལྟུང་བར་མི་འགྱུར་རོ། །གསུམ་པ་འདུན་པ་ཕྱིར་བསྒྱུར་གྱི་ལྟུང་བྱེད་ནི། དགའ་བོ་ལ་བཅས་ཏེ། དགེ་འདུན་གྱིས་དགེ་སློང་གི་ཆེད་དུ་ལས་བྱས་ཤིང་ཆགས་པ་ལ་དང་པོར་འདུན་པ་ཕུལ་ནས། སླར་བདག་གི་འདུན་པ་ཕྱིར་བྱིན་ཅིག་ཅེས་ལྡོག་པའི་ཚིག་སྨྲས་ཏེ་དོན་གོ་བའོ། །ལས་མ་ཟིན་གོང་དུ་ཕྱིར་སྒྱུར་ན་ནི། ལས་ཏེ་མི་ཆགས་པར་ཟད་ཀྱི། དེ་ལ་ལྟུང་བ་འདི་འབྱུང་བ་མ་ཡིན་ནོ། །བཞི་པ་ནུབ་ལྷག་ཉལ་གྱི་ལྟུང་བྱེད་ནི། དགེ་སློང་གིས་བསྙེན་པར་མ་རྫོགས་པའི་གང་ཟག་དང་ལྷན་ཅིག་གནས་གཅིག་ཏུ་ནུབ་གཉིས་ཉལ་དུ་རུང་ལ། དེ་ལས་ལྷག་པར་ན་བ་སོགས་ཀྱི་རྐྱེན་དགོས་མེད་པར་ནུབ་གསུམ་འདས་ནས་བཞི་པའི་སྐྱ་རེངས་ཤར་བའོ། །གལ་ཏེ་གནས་ཁང་གཅིག་ཏུ་ཉལ་ཡང་བར་དུ་ཁྲུ་ཕྱེད་དང་དགུས་ཆོད་ན་ལྟུང་བ་མེད་དེ། མདོར། འདི་ལ་བྱ་གག་འཕུར་ནས་འབབ་པའི་ལམ་ནི་བར་དུ་ཆོད་པ་ཉིད་ཡིན་ནོ། །ཞེས་པས་གནས་གཅིག་པར་མི་འགྱུར་བའི་ཕྱིར་རོ། །ལྔ་པ་སྡིག་ལྟ་མི་གཏོང་བའི་ལྟུང་བྱེད་ནི། དགེ་སློང་འཆི་ལྟས་ལ་བཅས་ཏེ། ཆང་འཐུང་བ་དང་ཕྱི་དྲོ་ཟ་བ་སོགས་ལ་ཉེས་པ་མི་འབྱུང་ངོ་ཞེས་སྡིག་ལྟའི་ཆོས་ལུགས་སྨྲ་བ་ཉིད་ཟློག་བྱེད་ལྔ་པའི་མཐའ་ལ་མ་བཏང་བའོ། །དྲུག་པ་སྤངས་པའི་རྗེས་ཕྱོགས་ཀྱི་ལྟུང་བྱེད་ནི། དགེ་འདུན་གྱིས་གནས་ནས་ཕྱུང་པའི་དགེ་སློང་དང་ལྷན་ཅིག་གཏམ་ཕེབས་པར་སྨྲ་བ་སོགས་སྤྱོད་ལམ་མཐུན་པར་བྱས་ནས་མཚན་དེའི་མཐའི་སྐད་ཅིག་མ་འདས་པའོ། །བདུན་པ་བསྙིལ་བ་སྡུད་པའི་ལྟུང་བྱེད་ནི། སྡིག་ལྟ་མི་བཏོང་བའི་དགེ་ཚུལ་དགེ་འདུན་གྱིས་བསྙིལ་བ་དང་ལྷན་ཅིག་ཉལ་བ་སོགས་སྤྱོད་ལམ་མཐུན་པར་བྱས་ནས་མཚན་མཐའ་འདས་པའོ། །བརྒྱད་པ་ཁ་མ་བསྒྱུར་བའི་གོས་གྱོན་པའི་ལྟུང་བྱེད་ནི། ཆུ་ཚགས་མ་བཏོགས་རུང་བའི་ཚོན་གསུམ་གྱིས་ཁ་མ་བསྒྱུར་བའི་གོས་ཁྲུ་གང་ཡན་ཆད་ཁ་དོག་དཀར་པོ་ཅན་གཞན་གྱིས་གཡོགས་མེད་པར་གྱོན་ན་ལྟུང་བྱེད་དང་། ནག་པོ་དང་ཁྲ་བོ་དང་ཚོན་ཆེན་བརྒྱད་ཀྱིས་ཁ་བསྒྱུར་བ་ལ་ཉེས་བྱས་སོ། །དགུ་པ་རིན་པོ་ཆེ་ལ་རེག་པའི་ལྟུང་བྱེད་ནི། ཆུད་འཛའ་བ་དང་སྦྱིན་བདག་བསོད་ནམས་འདོད་པས་བསྟབས་པ་དང་ཆོས་འཆད་པ་སོགས་དོན་ཁྱད་པར་ཅན་སྒྲུབ་པའི་སྐབས་མ་ཡིན་པར་རང་མི་དབང་བའི་ནོར་བུ་དང་མུ་ཏིག་སོགས་རིན་པོ་ཆེ་འམ། དེར་མིང་གིས་སྨོས་པ་མདའ་མདུང་སོགས་དམག་ཆས་དང་། རྔ་བོ་ཆེ་སོགས་རོལ་མོའི་ཆས་ལ་རྒོད་བག་གི་བསམ་པས་རང་ངམ་བསྐོས་པས་རེག་པའོ། །བཅུ་པ་ཁྲུས་བྱེད་པའི་ལྟུང་བྱེད་ནི། ཚ་བའི་དུས་དབྱར་ཟླ་གསུམ་དང་ནད་ལ་ཕན་པ་སོགས་གནང་བའི་དུས་མ་ཡིན་པར་སྔར་ཁྲུས་བྱས་ནས་ཟླ་བ་ཕྱེད་མ་འདས་པའི་སྔ་རོལ་དུ་ཆུ་ལ་རང་དགར་ཁྲུས་བྱས་ཏེ་ལུས་ཕྱེད་ཆུར་ནུབ་པའོ། །

བཅུ་ཚན་བདུན་པ་བསམ་བཞིན་གྱི་སྡེ་ཚན་ནི། དུད་འགྲོ་གསོད། །དགེ་སློང་བྱས་ལ་འགྱོད་བསྐྱེད་གག་ཚིལ་སྒོག །ཆུར་རྩེ་བུད་མེད་གནས་གཅིག་ཉལ་བ་དང་། །དགེ་སློང་དངངས་བྱེད་དེ་ཡི་ཡོ་བྱད་སྦེད། །སྔར་བྱིན་གདིང་མེད་སླར་བླངས་སྤྱོད་པ་དང་། །ག །ཞི་མེད་སྐུར་བཏབ་བུད་མེད་ལྷན་ཅིག་ཏུ། །སྐྱེས་པ་མེད་པར་ལམ་འགྲོ། ཞེས་པ་ལྟར་བཅུ་ལས་དང་པོ་དུད་འགྲོ་གསོད་པའི་ལྟུང་བྱེད་ནི། འདི་དང་གཉིས་པ་དང་དྲུག་པ་རྣམས་འཆར་ཀ་ལ་བཅས་ཏེ། གསོད་འདོད་ཀྱི་བསམ་པས་དུད་འགྲོའི་རིགས་སུ་གཏོགས་པ་གསོད་དམ་གསོད་དུ་བཅུག་སྟེ་རང་མ་ཤི་བའི་གོང་དུ་ཤི་ན་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །གཉིས་པ་འགྱོད་པ་བསྐྱེད་པའི་ལྟུང་བྱེད་ནི། དགེ་སློང་གཞན་ཡིད་མི་བདེ་བར་བྱ་བའི་ཕྱིར་ཁྱོད་ལ་སྡོམ་པ་མ་སྐྱེས་ཞེས་སམ་ཉམས་སོ་ཞེས་སོགས་འགྱོད་པ་བསྐྱེད་པའི་ཚིག་སྨྲས་པ་དེས་གོ་བའོ། །གསུམ་པ་གག་ཚིལ་བྱེད་པའི་ལྟུང་བྱེད་ནི། འདི་དང་བཞི་པ་བཅུ་བདུན་སྡེ་ལ་བཅས་ཏེ། དགེ་སློང་གཞན་གྱི་ལུས་ལ་སྐྱི་གཡའ་བར་བྱ་བའི་བསམ་པས་མཆན་ཁུང་སོགས་ལ་རེག་སྟེ་གག་ཚིལ་སྒོག་པའོ། །བཞི་པ་ཆུ་ལ་རྩེ་བའི་ལྟུང་བྱེད་ནི། རྒོད་བག་གི་བསམ་པས་ལུས་ཕྱེད་ནུབ་པའི་ཆུ་ལ་རྩེས་སམ་རྩེར་བཅུག་པ་ལས་གྱུར་པའོ། །ལྔ་པ་བུད་མེད་དང་ལྷན་ཅིག་ཉལ་བའི་ལྟུང་བྱེད་ནི། མ་འགགས་པ་ལ་བཅས་ཏེ་དགེ་སློང་གིས་ཁྲིམས་གྲོགས་མེད་པར་བུད་མེད་དང་ལྷན་ཅིག་གནས་གཅིག་ཏུ་གཉིས་ཀ་ཉལ་བའི་སྤྱོད་ལམ་གྱིས་མཚན་མོའི་མཐའ་འདས་པའོ། །དྲུག་པ་དངངས་པར་བྱེད་པའི་ལྟུང་བྱེད་ནི། དགེ་སློང་གིས་དགེ་སློང་གཞན་དངངས་པར་བྱེད་འདོད་པས་ཡིད་དུ་མི་འོང་བའི་འཇིགས་པ་སྣ་ཚོགས་སྟོན་ནམ་སྟོན་དུ་བཅུག་པས་དེ་སྐྲག་པ་སྐྱེས་པའོ། །བདུན་པ་སྦེད་པའི་ལྟུང་བྱེད་ནི། དྲུག་སྡེ་ལ་བཅས་ཏེ། དགེ་སློང་གིས་རབ་བྱུང་སྡེ་ལྔ་གང་ཡང་རུང་བ་དེའི་ཆོས་གོས་དང་ལྷུང་བཟེད་སོགས་འཚོ་བའི་ཡོ་བྱད་རྐུ་འདོད་དང་ཕན་སེམས་མ་ཡིན་པར་སྦེད་དམ་སྦེད་དུ་བཅུག་སྟེ་སྦས་པའོ། །བརྒྱད་པ་གདེངས་མེད་པར་སྤྱོད་པའི་ལྟུང་བྱེད་ནི། ཉེར་དགའ་ལ་བཅས་ཏེ། དགེ་སློང་གཞན་གྱི་གོས་སྔར་རང་གིས་བྱིན་པ་རྐུ་སེམས་དང་ཡིད་གཅུགས་མིན་པར་དེས་གནང་བའི་གདེངས་མེད་བཞིན་དུ་སླར་བླངས་ནས་ཅི་དགར་ལོངས་སྤྱོད་པའོ། །དགུ་པ་སྐུར་འདེབས་ཀྱི་ལྟུང་བྱེད་ནི། མཛའ་བོ་དང་ས་ལས་སྐྱེས་ལ་བཅས་ཏེ། མཐོང་ཐོས་དོགས་གསུམ་གྱི་གཞི་མེད་པའི་དགེ་སློང་གཞན་ལ་ལྷག་མ་བཅུ་གསུམ་གང་རུང་གིས་སྐུར་པ་བཏབ་ཅིང་དེས་གོ་བའོ། །བཅུ་པ་བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། མཉན་ཡོད་དུ་འགྲོ་བའི་དགེ་སློང་ཞིག་ལ་བཅས་ཏེ། དགེ་སློང་གིས་ཉེ་དུ་མ་ཡིན་པའི་བུད་མེད་དང་ལྷན་ཅིག་སྐྱེས་པའི་ཁྲིམས་གྲོགས་མེད་པར་ལམ་དུ་འགྲོ་ན་རྒྱང་གྲགས་རེ་རེ་འདས་པ་ལྟུང་བ་རེ་རེ་དང་། དེའི་ཕྱེད་ལ་ཉེས་བྱས་སོ། །

བཅུ་ཚན་བརྒྱད་པ་མགྲོན་མང་རྐུན་མ་ཞེས་པའི་སྡེ་ཚན་ནི། རྐུན་མའང་མཚུངས། །ཉི་ཤུ་མ་ལོན་པ་ལ་བསྙེན་རྫོགས་ཕོག །ས་བརྐོ་མགྲོན་བོས་ཟླ་བཞི་ལྷག་པར་ཟོས། །མི་ཤེས་བརྗོད་དང་འཐབ་པའི་ཉན་རྣ་བྱེད། །ཉེས་མེད་མི་སྨྲ་འགྲོ་དང་མི་གུས་འགལ། །ཆང་འཐུང་དུས་མིན་ཕྱི་དྲོ་གྲོང་དུ་རྒྱུ། །ཞེས་པ་ལྟར་བཅུ་ལས། དང་པོ་རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། མགྲོན་ལམ་དུ་འགྲོ་བའི་དགེ་སློང་ལ་བཅས་ཏེ། དགེ་སློང་གིས་ཆོམ་རྐུན་ནམ་ཤོ་གམ་མ་བྱིན་པའི་ཚོང་པ་དང་ལྷན་ཅིག་ལམ་དུ་འགྲོ་ནའང་སྔ་མ་དང་མཚུངས་ཏེ། རྒྱང་གྲགས་རེ་རེ་ལ་ལྟུང་བའོ། །གཉིས་པ་ཉི་ཤུ་མ་ལོན་པ་རྫོགས་པར་བྱེད་པའི་ལྟུང་བྱེད་ནི། མཽངྒལ་གྱི་བུ་ལ་བཅས་ཏེ། བསྒྲུབ་བྱ་སྐྱེས་པ་མངལ་ཤོལ་བརྩིས་ཀྱང་ལོ་ཉི་ཤུ་མ་ལོན་པ་ལ་དེར་འདུ་ཤེས་སམ་ཐེ་ཚོམ་ཟ་བས་བསྙེན་རྫོགས་ཕོག་ན། ལས་བརྗོད་པ་གསུམ་པའི་བྱ་བ་བརྗོད་པ་རྫོགས་ནས་བྱེད་པ་བརྗོད་པའི་མགོ་རྩོམ་པའི་ཚེ་མཁན་པོ་ལ་ལྟུང་བྱེད་དང་། སློབ་དཔོན་དང་དགེ་འདུན་ལ་ཉེས་བྱས་སོ། །གསུམ་པ་ས་བརྐོ་བའི་ལྟུང་བྱེད་ནི་འདི་དང་བཞི་པ་དང་ལྔ་པ་རྣམས་དྲུག་སྡེ་ལ་བཅས་ཏེ། དགེ་སློང་གིས་འཇིག་རྟེན་ལ་གྲགས་པའི་ས་སྲ་ཞིང་འཐས་པར་གནས་པ་དགོས་པ་ཁྱད་པར་ཅན་མེད་པར་བརྐོའམ་བརྐོར་བཅུག་སྟེ་སོར་བཞི་ཡན་ཆད་བརྐོས་པའོ། །བཞི་པ་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ནི། སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལས་ལྷག་པ་འདུག་པའམ། ཚིགས་བཞག་པ་མེད་ན་ཟླ་བ་བཞི་ལས་ལྷག་པར་བསྡད་ནས་ཟས་ཟོས་པའོ། །ལྔ་པ་བསླབ་པ་ཉེ་བར་འཇོག་པ་སྤོང་བའི་ལྟུང་བྱེད་ནི། དགེ་སློང་གཞན་གྱིས་རང་ཉིད་བསླབ་པ་ལ་སློབ་པར་བསྐུལ་བ་ན། སྐུལ་བ་པོ་ལ་ཁྱོད་ཀྱིས་མི་ཤེས་པས་གཞན་ཤེས་པ་ལ་མ་དྲིས་ཀྱི་བར་དུ་མི་སློབ་བོ་ཞེས་པ་ལྟ་བུའི་ཁྱད་གསོད་ཀྱིས་སྤོང་བའི་ཚིག་བརྗོད་ཅིང་གོ་བའོ། །དྲུག་པ་ཉན་རྣ་བྱེད་པའི་ལྟུང་བྱེད་ནི། ཉེར་དགའ་ལ་བཅས་ཏེ། དགེ་སློང་རང་དང་རྩོད་ཟླར་གྱུར་པའི་དགེ་སློང་གཞན་གཉིས་མན་ཆད་གྲོས་བྱེད་པ་ལ་རྩོད་པ་ཞི་འདོད་མ་ཡིན་པར་འཐབ་མོ་དེ་སྦར་བའི་ཆེད་དུ་ཉན་རྣ་བྱས་པས་རང་གིས་དོན་གོ་བའོ། །བདུན་པ་མི་སྨྲ་བར་འགྲོ་བའི་ལྟུང་བྱེད་ནི། དགའ་བོ་ལ་བཅས་ཏེ། རང་ཁ་སྐོང་དུ་འོས་པའི་དགེ་སློང་གིས་གསོ་སྦྱོང་སོགས་དགེ་འདུན་གྱི་ཆོས་ལྡན་གྱི་ལས་གྲལ་དུ་དང་པོར་འདུས་ནས་གསོལ་བ་ཙམ་ཡང་མ་བྱས་པའི་གོང་དུ་དགེ་འདུན་མཐུན་པ་སྒྲུབ་བྱེད་ཀྱི་འདུན་པ་མ་ཕུལ་བའམ་ལྟག་འོག་གི་དགེ་སློང་ལ་འགྲོ་བ་མི་སྨྲ་བར་ཐོས་པའི་ཉེ་མཁོར་ལས་འདས་ཏེ་ཕྱིན་པའོ། །གསོལ་བ་ཐོས་ནས་ཕྱིན་ན་ཉེས་བྱས་དང་། རང་ཁ་སྐོང་དུ་མི་འོས་པ་སོགས་ལ་ལྟུང་བ་མེད་དོ། །བརྒྱད་པ་མ་གུས་པའི་ལྟུང་བྱེད་ནི། གླང་ཆེན་ལྷས་ཀྱི་བདག་པོའི་བུ་ནག་པ་ལ་བཅས་ཏེ། དགེ་སློང་གིས་སངས་རྒྱས་དངོས་སུ་བཞུགས་པ་དང་དགེ་སློང་གི་དགེ་འདུན་དང་། དགེ་འདུན་གྱི་ཐ་སྙད་པ་དགེ་བསྐོས་ཏེ་གསུམ་པོ་གང་ཡང་རུང་བས་ཆོས་ལྡན་གྱི་བཀའ་བསྒོ་བའི་དོན་ལ་ཁོ་བོས་སྒྲུབ་མི་ནུས་སོ་ཞེས་ཤད་སྦྱང་མེད་པར་མ་གུས་པས་དེ་ལས་བཟློག་སྟེ་འགལ་བར་བྱས་པའོ། །དགུ་པ་ཆང་འཐུང་བའི་ལྟུང་བྱེད་ནི། ལེགས་འོངས་ལ་བཅས་ཏེ། ཕབས་བཏབ་པ་འབྲུའི་ཆང་དང་རྒུན་ཆང་སོགས་བཅོས་པའི་ཆང་དང་། དེ་དག་གི་སྦང་མ་དང་ཚིགས་མ་སོགས་མྱོས་པའི་ནུས་པ་ཅན་རྣམས་འཐུང་ངམ་ཟ་བར་འདོད་པས་མགུལ་དུ་མིད་པ་ན་ལྟུང་བྱེད་དེ། བསྐོལ་བས་ཆང་གི་རོ་ནུས་ཉམས་པར་བྱས་པ་དང་། ནད་པ་ལ་ཕན་པའི་ཕྱིར་ཁར་བསྲེལ་པ་ཙམ་དང་ལུས་ལ་བཀུད་པ་ཙམ་ལ་ཉེས་པ་མེད་དོ། །བཅུ་པ་དུས་མིན་པར་གྲོང་དུ་འགྲོ་བའི་ལྟུང་བྱེད་ནི། དུས་མ་ཡིན་པའི་ཕྱི་དྲོ་སྟེ། རང་གླིང་གི་ཉི་མ་ཕྱེད་ཡོལ་ནས་སྐྱ་རེངས་མ་ཤར་གྱི་བར་དུ་རྐྱེན་དགོས་མེད་ཅིང་དེར་འཁོད་ཀྱི་གྲོགས་ལ་མ་སྨྲས་པར་ཁྱིམ་པའི་གྲོང་དུ་རྒྱུ་བར་བྱེད་པས་སྒོ་གཏན་དང་ཉེ་འཁོར་ལས་འདས་པའོ། །

བཅུ་ཚན་དགུ་པ་ཆོས་སྟོན་གྱི་སྡེ་ཚན་ནི། ཟས་བཅས་ཕྱི་དྲོ་རྒྱུ་དང་ཁྱིམ་གསུམ་འདས། །རྒྱལ་པོ་བཙུན་མོར་རྩེ་བའི་ཁབ་ཏུ་ཉལ། །མདོ་སོགས་འདོན་ལ་ད་གདོད་ཤེས་ཟེར་དང་། །རིན་ཆེན་ཁབ་རལ་ཁྲི་རྐང་ཚད་ལྷག་བཟོས། །ངན་སེམས་ཤིང་བལ་ཁྲི་སྟེང་བརྡལ་ཏེ་བགོས། །གདིང་གཡན་རས་ཆེན་ཆོས་གོས་ཚད་ལྷག་གོ །ཞེས་པ་ལྟར་བཅུ་ལས། དང་པོ་གྲོང་གཞན་དུ་རྒྱུ་བའི་ལྟུང་བྱེད་ནི། འདི་དང་དྲུག་པ་དང་བཅུ་པ་རྣམས་ཉེར་དགའ་ལ་བཅས་ཏེ། དགེ་སློང་གིས་སྔ་དྲོ་རང་ཚིག་གིས་སྦྱིན་བདག་ཁྱིམ་པའི་གནས་སུ་ཟས་ལ་སྤྱན་དྲངས་ནས། དུས་ལ་བྲིམ་ཞེས་མ་བསྒོས་པར་རང་ཉིད་ཁྱིམ་གཅིག་ནས་གཅིག་ཏུ་རྒྱུ་བས་ཁྱིམ་གསུམ་འདས་ཏེ་དགེ་འདུན་གྱི་གདུགས་ཚོད་ལ་གནོད་པ་དང་། ཕྱི་དྲོ་ཁྱིམ་བཞི་ཕན་ཆད་འདས་པས་དགེ་འདུན་གྱི་ཆོས་ཀྱི་ལོངས་སྤྱོད་ལ་གནོད་པའོ། །གཉིས་པ་རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ནི། འཆར་ཀ་ལ་བཅས་ཏེ། ཆོས་ལྡན་གྱི་དོན་དུ་བོས་པ་སོགས་དགོས་པ་ཁྱད་པར་ཅན་མེད་བཞིན་དུ་རྒྱལ་པོ་བཙུན་མོ་དང་ལྷན་ཅིག་རྩེ་བའི་ཁབ་སྟེ་བཙུན་མོ་དང་བཅས་པའི་ཕོ་བྲང་དུ་ཉི་མ་དམར་ཐག་ཆོད་ནས་སྐྱ་རེངས་ཐ་མ་མ་ཤར་གྱི་བར་འགྲོ་ན་གནས་དེའི་སྒོ་གཏན་ནམ། དེའི་ཉེ་འཁོར་འདས་པར་སླེབ་པའོ། །ནུབ་མོར་མ་ཟད་ཉིན་མོ་ཕྱིན་ནས་མཚན་ལ་དེར་ཉལ་ཡང་འདྲའོ། །གསུམ་པ་བསླབ་གཞི་ཁྱད་དུ་གསོད་པའི་ལྟུང་བྱེད་ནི། འདི་དང་ལྔ་པ་དག་དྲུག་སྡེ་ལ་བཅས་ཏེ། སོ་ཐར་གྱི་མདོ་ལན་གཉིས་ཡན་ཆད་ཐོས་ཤིང་མདོ་དེ་ལ་དོན་དེ་ཡོད་པ་སྔར་ནས་ཤེས་ཀྱང་ཤེས་རིན་མི་ཆོག་པར་སྟོན་པའི་ཕྱིར། གསོ་སྦྱོང་གི་དུས་སུ་དོན་འདི་ཡོད་པར་ད་གདོད་ཤེས་སོ་ཞེས་འདུལ་བར་གཏོགས་པའི་བསླབ་པ་ཁྱད་གསོད་ཀྱི་ཚིག་སྨྲས་པ་ཕ་རོལ་པོས་གོ་ན་ལྟུང་བྱེད་དང་། མདོ་སྡེ་སོགས་ལ་ཉེས་བྱས་སོ། །བཞི་པ་ཁབ་རལ་འཆོས་པའི་ལྟུང་བྱེད་ནི། འདི་དང་བདུན་པ་དང་བརྒྱད་པ་དང་དགུ་པ་རྣམས་དགེ་སློང་རབ་ཏུ་མང་པོ་ལ་བཅས་ཏེ། དཀོན་ཞིང་རིན་ཐང་ཆེ་བའི་རྫས་བ་སོ་སོགས་ལ་ཁབ་རལ་བྱེད་དམ་བྱེད་དུ་བཅུག་སྟེ་ཟིན་པའོ། །ལྔ་པ་ཁྲི་རྐང་འཆོས་པའི་ལྟུང་བྱེད་ནི། དགེ་སློང་གིས་དགེ་འདུན་གྱི་ཁྲིའམ་ཁྲིའུའི་རྐང་པ་བུ་གར་གཞུག་པ་མན་ཆད་ཁྲུ་གང་ཚད་ཡིན་པས་དེ་ལས་ལྷག་པ་བཟོའམ་བཟོར་བཅུག་སྟེ་ཟིན་པའོ། །དྲུག་པ་ཤིང་བལ་གྱི་གོས་པར་བྱས་པའི་ལྟུང་བྱེད་ནི། དགེ་འདུན་གྱི་ཁྲི་དང་ཁྲིའུའི་སྟེང་དུ་དགེ་སློང་གི་ངན་སེམས་ཀྱིས་ཤིང་བལ་བརྡལ་ཏེ་གོས་པར་བྱས་པའོ། །བདུན་པ་གདིང་བ་དང་། བརྒྱད་པ་གཡན་དགབ་དང་། དགུ་པ་དབྱར་གྱི་གོས་རས་ཆེན་རྣམས་ཚད་ལྷག་བྱེད་པའི་ལྟུང་བྱེད་ནི། དགེ་སློང་གིས་རང་དོན་དུ་དེ་གསུམ་རང་རང་གི་ཚད་ལས་ལྷག་པ་བྱེད་དམ་བྱེད་དུ་བཅུག་སྟེ་ཟིན་པ་ན་དེ་དང་དེའི་ལྟུང་བྱེད་དོ། །ཚད་ནི། གདིང་བ་སྲིད་དུ་ཁྲུ་གསུམ་དང་ཞེང་དུ་ཁྲུ་དོ་དང་སོར་དྲུག །གཡན་དགབ་ཀྱི་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ། རས་ཆེན་གྱི་སྲིད་དུ་ཁྲུ་དགུ་དང་། ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །དེ་ཡང་ཁྲུ་དང་སོར་གྱིས་འཇལ་བ་ཐམས་ཅད་ལ་རང་རང་གི་འཇལ་བྱེད་ཀྱིས་ཕྱེད་ཀྱིས་ལྷག་ན་ལྟུང་བའོ། །འདི་དག་གི་ལྟུང་བ་བཤགས་པའི་ཚེ། ཁབ་རལ་བཅག་ཅིང་ཁྲིའི་ཤིང་བལ་བསྡུས་ནས་དང་། ཁྲི་རྐང་གདིང་གཡན་རས་ཆེན་བཞིའི་ལྷག་པོ་བཅད་ནས་བཤགས་དགོས་ཤིང་། བཤགས་ཡུལ་གྱིས་བཅག་གམ། བསྡུས་སམ། བཅད་དམ་ཞེས་མ་དྲིས་ན་ཉེས་བྱས་སོ། །བཅུ་པ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ནི། སྟོན་པའི་ལུས་ཚད་ཙམ་མེད་པར་དེའི་ཆོས་གོས་ཀྱི་ཚད་དམ། དེ་ལས་ལྷག་པ་བྱེད་དམ་བྱེད་དུ་བཅུག་སྟེ་ཟིན་པ་ལས་གྱུར་བའོ། །དེ་ལ་སྟོན་པའི་ཆོས་གོས་ཀྱི་ཚད་ནི། སྲིད་དུ་སྟོན་པ་རང་གི་ཁྲུ་ལྔ་ཡིན་པས་མི་ཕལ་བའི་ཁྲུ་བཅོ་ལྔ་དང་། ཞེང་དུ་སྟོན་པའི་ཁྲུ་གསུམ་ལ་ཕལ་བའི་ཁྲུ་དགུ་ཡོད་དེ། སྟོན་པའི་ཁྲུ་རེ་ལ་མི་འབྲིང་པོའི་ཁྲུ་གསུམ་རེ་ཡོད་པའི་ཕྱིར་རོ། །

ལྔ་པ་སོར་བཤགས་ལ་བསྟན་བཤད་གཉིས་ལས། དང་པོ་ནི། སོ་སོར་བཤགས་བྱའི་སྡེ་ནི་བཞི་ཡིན་ཏེ། །ཞེས་པ་སྟེ། སྨྲེ་སྔགས་ཀྱི་རྣམ་པས་སོ་སོར་བཤགས་དགོས་པས་ན་སོར་བཤགས་ཀྱི་སྡེ་ཞེས་བྱ་སྟེ། དེའི་མཚན་ཉིད་ནི། བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །སོར་བཤགས་ཀྱི་མིང་གིས་ཕྱིར་བཅོས་བྱས་ན་དག་ཏུ་རུང་བའོ། །དབྱེ་ན། རབ་ཏུ་བྱུང་བའི་དང་། ཁྱིམ་པའི་གཞི་ལས་གྱུར་པ་གཉིས་གཉིས་ཏེ་བཞིའོ། །

གཉིས་པ་རྒྱས་བཤད་ནི། དགེ་སློང་མ་ལས་གྲོང་དུ་ཟས་བསླངས་ཟོས། །ཁྱིམ་དུ་དགེ་སློང་མས་བསྒོས་མ་བཟློག་ཟོས། །བསླབ་སྡོམ་སྦྱིན་ལས་རུང་མིན་བསླངས་ཏེ་ཟོས། །ནགས་མ་མྱུལ་བར་དགོན་པར་བསླངས་ཟོས་བཞིའོ། །ཞེས་པ་ལྟར་བཞི་ལས། དང་པོ་ཉེར་དགའ་དང་ཕྱི་མ་གསུམ་དྲུག་སྡེ་ལ་བཅས། དེ་ལ་དང་པོ་དགེ་སློང་མ་ལ་ཟས་ལེན་པའི་སོར་བཤགས་ནི། ཉེ་དུ་མ་ཡིན་པའི་དགེ་སློང་མས་རང་ཉིད་བཟའ་བའི་ཆེད་དུ་བསྒྲུབ་པའི་དུས་རུང་གི་ཟས་གྲོང་ངམ། དེའི་ཉེ་འཁོར་རམ། ལམ་པོ་ཆེ་གང་རུང་དུ་དགེ་སློང་གིས་བསླངས་ཏེ་ཟོས་པའོ། །གཉིས་པ་དགེ་སློང་མས་ངོས་མགྲོན་བྱེད་པ་མ་བཟློག་པར་ཟོས་པའི་སོར་བཤགས་ནི། དགེ་སློང་གསུམ་ཡན་ཆད་ཁྱིམ་པས་མགྲོན་དུ་བོས་པ་ནི་དགེ་སློང་མས་བསྐོ་བཤམ་སྟེ་གྲལ་རིམ་པར་འབྲིམ་དུ་མི་འཇུག་པར་ངོས་མགྲོན་གྱིས་འདི་ལ་ཕུལ་ཅིག་ཅེས་བསྒོ་བ་དེ་དགེ་སློང་གཅིག་གིས་མ་བཟློག་པར་དགེ་སློང་ཇི་སྙེད་པས་ཟོས་པ་དེ་ཐམས་ཅད་ལ་སོར་བཤགས་ཀྱི་ཁ་ན་མ་ཐོ་བར་འགྱུར་རོ། །གསུམ་པ་བསླབ་པ་བྲལ་ཏེ་ཁྱིམ་དུ་འཇུག་པའི་སོར་བཤགས་ནི། དགེ་འདུན་བློ་མཐུན་པས་གསོལ་བའི་ལས་ཀྱིས་ཁྱིམ་པ་ཅི་རིགས་ལས་དགག་བྱ་དང་དགོས་པའི་དབང་གིས་ཟས་མི་སློང་བའི་བསླབ་སྡོམ་སྦྱིན་པ་ན། ཁྲིམས་དེར་གཏོགས་པའི་དགེ་སློང་གིས། དེ་ལས་ལེན་རུང་བ་ལོ་མ་སོགས་མོད་པ་མ་ཡིན་པའི་དུས་རུང་གི་ཟས་བསླངས་ཏེ་ཟོས་པའོ། །བཞི་པ་ནགས་མ་བརྟགས་པ་ལས་གྱུར་བའི་སོར་བཤགས་ནི། གྲོང་ནས་རྒྱང་གྲགས་སྤགས་པའི་འཇིགས་བཅས་ཀྱི་དགོན་པར་དགེ་འདུན་གྱིས་ནགས་མྱུལ་བར་བསྐོས་པའི་དགེ་སློང་གིས། དགེ་འདུན་དང་སྦྱིན་བདག་གི་གནོད་པ་བསྲུང་བའི་བྱ་བ་འདིས་ཅི་བྱ་སྙམ་པས་ནགས་མ་མྱུལ་བར་ཁྱིམ་པ་ལས་དུས་རུང་གི་ཟས་བསླངས་ཏེ་ཟོས་པའོ། །

དྲུག་པ་ཉེས་བྱས་ལ་བསྟན་བཤད་གཉིས་ལས། དང་པོ་ནི། ཉེས་བྱས་བརྒྱ་དང་བཅུ་གཉིས་ཞེས་གྲགས་པ། །ཞེས་པ་ཉེས་པ་ཕྲ་མོའི་རང་བཞིན་ཡིན་པས་ན་ཉེས་བྱས་ཏེ། དེའི་མཚན་ཉིད། བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག །ཉེས་བྱས་ཀྱི་མིང་གིས་ཕྱིར་བཅོས་བྱས་ན་དག་ཏུ་རུང་བ། དབྱེ་ན། མདོའི་སྡོམས་ཀྱིས་བསྡུས་པ་ལ་བརྒྱ་དང་བཅུ་གཉིས་ཏེ། འདི་རྣམས་ཕལ་ཆེ་བ་དྲུག་སྡེ་ལ་བཅས་སོ། །

གཉིས་པ་རྒྱས་བཤད་ལ་དགུ་ལས། དང་པོ་གོས་བགོ་བའི་སྡེ་ནི། ཤམ་ཐབས་ཟླུམ་མིན་བརྩེངས་འཇོལ་གླང་སྣ་འདྲ། །ལྟེབ་དང་ཕུར་མ་གདེངས་ཀ་ལྟ་བུ་བདུན། །ཟླུམ་མིན་རིང་ཐུང་སྟོད་གསུམ་གོས་ཀྱི་བཅུའོ། །ཞེས་པ་སྟེ། ཤམ་ཐབས་ཀྱི་གྱོན་ལུགས་ལ། ཡ་མཐའ་དང་མ་མཐའ་མཐོ་དམན་མི་མཉམ་པས་ཟླུམ་པོར་མ་བགོས་པ་དང་། ཧ་ཅང་བརྩེངས་པས་པུས་མོར་མ་སླེབས་པ་དང་། ཧ་ཅང་འཇོལ་བས་ལོང་བུ་ལ་རེག་པ་དང་། གླང་པོའི་སྣ་ལྟར་མས་ཟུར་གྱི་གྲྭ་མདུན་དུ་འཕྱང་བ་དང་། སྐ་རགས་ཀྱི་གོང་དུ་ཏ་ལའི་ལོ་མ་ལྟར་ལྟེབ་པ་དང་། སྐ་རགས་ཀྱི་བར་ནས་འབྲུའི་ཕུར་མ་ལྟར་འབུར་བ་དང་། སྐ་རགས་ཀྱི་སྟེང་དུ་སྦྲུལ་གྱི་གདེངས་ཀ་ལྟར་མཐོ་དམན་དུ་འདུག་པ་མ་ཡིན་པ་སྟེ་བདུན་དང་། སྟོད་གཡོགས་ཀྱི་གྱོན་ལུགས་ལ། སྣམ་སྦྱར་དང་བླ་གོས་ཟླུམ་པོར་མ་བགོས་པ་དང་། ཧ་ཅང་རིང་བ་དང་། ཧ་ཅང་ཐུང་བ་མ་ཡིན་པ་གསུམ་སྟེ། དེ་ལྟར་བཅུ་ལ་བསླབ་པར་བྱའོ། །

གཉིས་པ་སྤྱོད་ཡུལ་དུ་འགྲོ་བའི་སྡེ་ནི། མ་བསྡམས་བགོ་བ་ཅ་ཅོ་མིག་གཡེངས་དང་། །རིང་བལྟ་མགོ་བསྟུམས་གོས་བརྫེས་ཕྲག་ལ་གཟར། །ལག་པ་གཉའ་གོང་བསྣོལ་དང་ལྟགཔར་བསྣོལ། །མཆོང་རྐྱང་རྐང་པའི་བྲང་དང་རྟིང་བཙུགས་འགྲོ། །ལག་པ་དཀུར་བརྟེན་ལུས་བསྒྱུར་ལག་པ་གཡུག །མགོ་བསྒྱུར་ཕྲག་པ་སྤྲད་དང་ལག་སྦྲེལ་རྣམས། །མི་བྱེད་ཁྱིམ་འགྲོའི་སྤྱོད་ཡུལ་ཉི་ཤུའོ། །ཞེས་པ་སྟེ། ཁྱིམ་དུ་འགྲོ་བའི་ཚེ་དྲན་ཤེས་ཀྱིས་ལུས་ངག་མ་བསྡམས་པར་འཇུག་པ། བླ་གོས་དང་མཐང་གོས་ལེགས་པར་བགོ་བ་མ་ཡིན་པ། ཅ་ཅོའི་སྒྲ་དང་བཅས་པ། མིག་གཡས་ག །ཡོན་དུ་གཡེངས་པས་བལྟ་བ། མིག་གཉའ་ཤིང་གང་ལས་རིང་བར་བལྟ་བ། མགོ་གོས་ཀྱིས་བསྟུམས་པ། ཤམ་ཐབས་འདོམས་སྣང་བར་བརྫེས་པ། བླ་གོས་ཕྲག་པའི་ཕྱོགས་གཉིས་ཀར་གཟར་བ། ལག་གཉིས་མདུན་ནས་གཉའ་གོང་དུ་བསྣོལ་བ། ལག་གཉིས་རྒྱབ་ནས་ལྟག་པར་བསྣོལ་བ། རང་དགར་མཆོང་ཞིང་འགྲོ་བ། ཧ་ཅང་གོམ་པ་ཆེ་བས་སྒྱིད་པ་བརྐྱང་བསྐུམ་བྱེད་ཅིང་འགྲོ་བ། རྟིང་པ་བཏེགས་ནས་རྐང་པའི་བྲང་གིས་འགྲོ་བ། རྟིང་པ་བཙུགས་ཏེ་ཙོག་པུས་འགྲོ་བ། ལག་དཀུར་བརྟེན་ནས་གྲུ་རྒྱངས་ཏེ་འགྲོ་བ། ལུས་སྐྱོག་པོར་བསྒྱུར་ཞིང་འགྲོ་བ། ལག་པ་གཡོབ་ཅིང་འགྲོ་བ། མགོ་ལྕོག་ཅིང་བསྒྱུར་ནས་འགྲོ་བ། གཞན་དང་ཕྲག་པ་སྤྲད་དེ་འགྲོ་བ། གཞན་དང་ལག་པ་སྦྲེལ་ནས་འགྲོ་བ་རྣམས་ཏེ། དེ་ལྟར་སྐྱོན་ཉི་ཤུ་པོ་དེ་རྣམས་མི་བྱེད་པ་སྟེ་སྤངས་ནས་སྤྱོད་ཡུལ་གྱི་ཁྱིམ་དུ་ཞི་དུལ་གྱི་སྤྱོད་པས་འགྲོ་བ་ལ་བསླབ་པར་བྱའོ། །

གསུམ་པ་སྟན་ལ་འདུག་པའི་སྡེ་ནི། སྟན་ལ་མ་བསྒོས་མ་བརྟགས་འཕོངས་རྡེབ་དང་། །རྐང་བརྐྱང་བསྣོལ་དང་བརླ་བསྣོལ་ལོང་བུ་བརྩེགས། །ཁྲིའི་འོག་རྐང་དགུག་རྐང་པ་གདངས་ཏེ་འདུག །འདོམས་མཐོང་རྣམས་སྤང་འདུག་ཚུལ་དགུ་ཡིན་ནོ། །ཞེས་པ་སྟེ། ཁྱིམ་གཞན་དུ་ཁྱིམ་བདག་གིས་མ་བསྒོས་པར་སྟན་ལ་འདུག་པ། དེ་བཞིན་དུ་སྟན་ལ་སྲོག་ཆགས་ཡོད་མེད་མ་བརྟགས་པ། ལུས་ཀྱི་ལྕིད་ཕབ་ལ་འཕོངས་རྡེབ་པ། རྐང་པ་བརྐྱངས་ཏེ་བསྣོལ་བ། བརླ་བསྣོལ་བ། ལོང་བུའི་སྟེང་དུ་ལོང་བུ་བརྩེགས་ཏེ་འདུག་པ། ཧོར་འདུག་གི་རྣམ་པས་ཁྲིའི་འོག་ཏུ་རྐང་པ་བཀུག་པ། རྐང་པ་ཕན་ཚུན་གདངས་པ། འདོམས་སྣང་བར་བྱས་ནས་སྡོད་པ་སྟེ། དེ་ལྟར་འདུག་ཚུལ་གྱི་སྐྱོན་དགུ་སྤངས་ནས་ཁྱིམ་དུ་མཉམ་བཞག་གི་འདུག་སྟངས་སྐྱིལ་ཀྲུང་གིས་འདུག་གོ །

བཞི་པ་ཟས་བླང་བའི་སྡེ་ནི། ལེགས་པར་མི་ལེན་མུ་ཁ་མཉམ་པར་ལེན། །མཐར་ཆགས་མི་ལེན་ལྷུང་བཟེད་ཟུར་མིག་བལྟ། །བཟེད་སྔས་སྔར་བྱུང་སྦས་ནས་བཟེད་པ་དང་། །སྣོད་གཞན་སྟེང་བཟེད་སྤང་བ་ཟས་བླང་བརྒྱད། །ཅེས་པ་སྟེ། གྲོང་དང་གཙུག་ལག་ཁང་སོགས་ཐམས་ཅད་དུ་འདུལ་བ་དང་མི་འགལ་བར་ཟས་ལེགས་པར་མི་ལེན་པ། སྣོད་ཀྱི་མུ་དང་ཁ་ད་ཆད་དུ་ལེན་པ། འབྲས་ཆན་དང་ཚོད་མ་སྟེ་ཟན་དང་བྱན་མཉམ་པར་ལེན་པ། གྲལ་རིམ་ལྟར་མཐར་ཆགས་སུ་མི་ལེན་པ། ལྷུང་བཟེད་ལ་ཡིད་གཏད་དེ་མི་ལེན་པར་ཟུར་མིག་གིས་བལྟ་བ། ཟས་འདྲེན་པ་མ་སླེབས་པར་སྣོད་བཟེད་སྔས་པ། ལྷག་པོ་འདོད་པས་ཟས་སྔར་བྱུང་སྦས་ནས་ཡང་བཟེད་པ། སྣོད་གཞན་ཟས་ཀྱི་སྟེང་དུ་བཟུང་ནས་བཟེད་པ་སྟེ། དེ་ལྟར་ཟས་བླང་པའི་སྐྱོན་བརྒྱད་སྤང་བ་ལ་བསླབ་པར་བྱའོ། །

ལྔ་པ་ཟས་ཟ་བའི་སྡེ་ནི། འགལ་ཟ་ཁམ་ཆེ་ཆུང་དང་རན་པར་མིན། །ཁ་གདངས་ཟ་བཞིན་སྨྲ་དང་ཙུག་ཙུག་དང་། །ཅག་ཅག་ཧུ་ཧུ་ཕུ་ཕུ་ལྕེ་ཕྱུང་ཟ། །འབྲུ་ནས་གུད་ཕྱེ་ཟས་ལ་སྐྱོན་འཕྱ་དང་། །ཁམ་གཅིག་མཁུར་སྤོ་རྐན་ཏོག་ཁམ་འཕྲོ་བཅད། །ལག་པ་འདག་འབྱོག་ལག་སྤྲུག་སྐྱོམ་སྐྱོམ་བྱེད། །མཆོད་རྟེན་འདྲར་བྱེད་ཉེར་གཅིག་ཟ་ཚེ་སྤང་། །ཞེས་པ་སྟེ། ཐམས་ཅད་དུ་འདུལ་བ་དང་འགལ་བས་ལེགས་པར་མི་ཟ་བ། ཁམ་ཧ་ཅང་ཆེ་བ། ཧ་ཅང་ཆུང་བ། རང་ངམ་འཇིག་རྟེན་དང་མཐུན་པའི་ཁམ་རན་པ་མ་ཡིན་པ། ཁམ་ཁའི་སྒོར་མ་སླེབས་པར་ཁ་གདངས་པ། ཟ་བཞིན་དུ་གཏམ་སྨྲ་བ། ཟ་བའི་ཚེ་སྐྱུར་བ་ལ་ཙུག་ཙུག །མངར་བ་ལ་ཅག་ཅག །གྲང་བ་ལ་ཧུ་ཧུ། ཚ་བ་ལ་ཕུ་ཕུའི་སྒྲ་དང་བཅས་ཟ་བ། ལྕེ་ཕྱིར་ཕྱུང་སྟེ་ཟ་བ་ནས་ཡོས་སོགས་འབྲུ་རེ་ནས་གུད་དུ་ཕྱེ་ནས་ཟ་བ། སྦྱིན་བདག་གི་ཟས་ལ་སྐྱོན་ཁའོ་སྐྱུར་རོ་སོགས་འཕྱ་སྨོད་བྱེད་པ། ཁམ་གཅིག་མཁུར་བ་གཡས་གཡོན་དུ་སྤོ་ཞིང་ཟ་བ། རྐན་ཏོག་ཅིང་ཟ་བ། དུད་འགྲོ་ལྟར་ཁམ་འཕྲོ་བཅད་དེ་ཟ་བ། ལག་པ་ལ་ཟས་ཆགས་པ་འདག་པ། ལྷུང་བཟེད་དང་ཕོར་བུ་སོགས་ལྕེས་འདག་པ། ལག་པ་ལ་ཟས་ཆགས་པ་སྤྲུག་པ། ཟས་དང་བཅས་པའི་ལྷུང་བཟེད་སོགས་སྐྱོམ་སྐྱོམ་བྱེད་པ། ཟས་ལ་མཆོད་རྟེན་གྱི་གཟུགས་འདྲ་བ་བཅོས་ཏེ་གཞོམ་ཞིང་ཟ་བར་བྱེད་པ་རྣམས་ཏེ། དེ་ལྟར་སྐྱོན་ཉེར་གཅིག་པོ་དེ་རྣམས་ཟ་བའི་ཚེ་སྤང་བ་ལ་བསླབ་པར་བྱའོ། །

དྲུག་པ་ལྷུང་བཟེད་ལ་སྤྱོད་པའི་སྡེ་ནི། ལྷུང་བཟེད་ལ་འཕྱ་ཕྱིར་བལྟ་ལག་པ་ནི། །ཟས་འབགས་ཆུ་སྣོད་མི་རེག་ཆུ་མི་གཏོར། །མ་དྲིས་འབགས་ཆུ་འབོ་དང་ཟས་ལྷག་བཞག །ས་རྗེན་གད་ཁ་རི་གཟར་བང་རིམ་བཞིར། །མི་བཞག་གད་གཡང་རྐན་གཟར་དུ་མི་འཁྲུ། །ལངས་དང་ཆུ་དྲག་མི་བཅུ་བཅུ་བཞིའོ། །ཞེས་པ་སྟེ། གཞན་གྱི་ལྷུང་བཟེད་ལ་འཕྱ་བའི་ཕྱིར་བལྟ་བར་མི་བྱ། ལག་པ་ཟས་ཀྱིས་འབགས་པས་ཆུ་སྣོད་ལ་མི་རེག །ཟས་དང་བཅས་པའི་འབགས་ཆུ་དྲུང་ན་གནས་པའི་དགེ་སློང་ལ་མི་གཏོར། ཁྱིམ་བདག་ལ་མ་དྲིས་པར་ཟས་དང་འབགས་པའི་ཁྲུད་ཆུ་དེའི་ཁྱིམ་དུ་འབོ་བར་མི་བྱ། ཟས་ལྷག་ལྷུང་བཟེད་དུ་བཞག་ནས་མི་འདོར། ལྷུང་བཟེད་འོག་གཞི་མེད་པའི་ས་རྗེན་དང་། གད་ཁ་དང་། རི་དོ་ཆད་ཀྱི་གཡང་གཟར་པོ་དང་། བང་རིམ་གཞོལ་པོའི་རྐན་ཏེ་བཞིར་མི་བཞག་གོ །དེ་བཞིན་དུ་ལྷུང་བཟེད་གད་ཁ་དང་། གཡང་ས་དང་། རྐན་གཟར་དུ་དང་། ལངས་ཏེ་ལམ་གྱི་གཞི་མདོ་རྣམས་སུ་མི་བཀྲུ། འབབ་ཆུ་དྲག་པོའི་རྒྱུན་ལས་ལྡོག་སྟེ་ལྷུང་བཟེད་ཀྱིས་ཆུ་མི་བཅུ་བ་སྟེ། དེ་ལྟར་ལྷུང་བཟེད་ལ་སྤྱོད་པའི་བསླབ་བྱ་བཅུ་བཞིའོ། །

བདུན་པ་ཆོས་འཆད་པའི་སྡེ་ནི། ཆོས་སྟོན་སྡེ་ནི་ལངས་ཉལ་རང་དམར་འདུག །མདུན་ནས་འགྲོ་ལ་ཕྱི་བཤད་ལམ་པོའི་འགྲམ། མགོ་གཡོགས་བརྫེས་གཟར་ལག་པ་གཉའ་ལྟག་བསྣོལ། །དོ་ཀེར་བཅིངས་དང་ཞྭ་གྱོན་ཅོད་པན་བཏགས། །ཕྲེང་བ་དང་ནི་མགོ་དཀྲིས་གླང་རྟ་ཞོན། །ཁྱོགས་དང་བཞོན་པ་མཆིལ་ལྷྭམ་གྱོན་པ་དང་། །འཁར་བ་གདུགས་མཚོན་རལ་གྲི་དགྲ་ཆ་མདའ། །གོ་ཆ་གྱོན་ལ་མི་བཤད་ཉེར་དྲུག་གོ །ཞེས་པ་སྟེ། ཉན་པ་པོ་མི་ན་བཞིན་དུ་འདུག་པ་ལ་འཆད་པ་པོས་ལངས་ཏེ་ཆོས་མི་འཆད། དེ་བཞིན་དུ་ཉལ་བ་ལ་འདུག་པས་མི་འཆད། སྟན་མཐོན་པོར་འདུག་པ་ལ་འཆད་པ་པོ་རང་དམའ་བར་འདུག་པས་མི་འཆད། མདུན་ནས་འགྲོ་བ་ལ་ཕྱི་བཞིན་འོང་བས་མི་འཆད། ལམ་གྱི་དབུས་ནས་འགྲོ་བ་ལ་ལམ་པོའི་འགྲམ་ནས་འགྲོ་ཞིང་མི་འཆད་དོ། །མི་ན་བར་མགོ་གཡོགས་པ། གོས་བརྫེས་པ། གོས་ཕྲག་པར་གཟར་བ། ལག་པ་གཉའ་གོང་དུ་བསྣོལ་བ། ལག་པ་ལྟག་པར་བསྣོལ་བ། སྐྲ་སྤྱི་བོར་བསྡུས་ཏེ་དོ་ཀེར་བཅིངས་བ། ཞྭ་གྱོན་པ། མགོ་ལ་ཅོད་པན་བཏགས་པ། མགོ་ལ་ཕྲེང་བ་བཅིངས་པ། མགོ་ཐོད་ཀྱིས་དཀྲིས་པ། གླང་པོ་ཆེ་དང་རྟ་ལ་ཞོན་པ། ཁྱོགས་ཀྱིས་བཏེག་པ། གཞོན་པ་གཞན་ཤིང་རྟ་སོགས་ལ་ཞོན་པ། མཆིལ་ལྷྭམ་གྱོན་པ། ལག་ན་འཁར་བ་ཐོགས་པ། གདུགས་ཐོགས་པ། མདུང་སོགས་མཚོན་ཆ་ཐོགས་པ། རལ་གྲི་ཐོགས་པ། དགྲ་ཆ་སྟེ་མདའ་གཞུ་ཐོགས་པ། གོ་ཆ་གྱོན་པ་སྟེ། དེ་ལྟར་ཉེར་དྲུག་ལ་དགེ་སློང་གིས་ཆོས་མི་བཤད་དེ། ཉན་པ་པོ་ན་བའི་རྐྱེན་དབང་དུ་གྱུར་པ་ལ་ནི་ཉེས་པ་མེད་དོ། །

བརྒྱད་པ་སྒྲུབ་པའི་སྡེ་ནི། སྒྲུབ་ཚུལ་གསུམ་ནི་འགྲེངས་ཏེ་བཤང་གཅི་འདོར། །ཆུ་དང་རྩྭ་ལ་བཤང་གཅི་སྣབས་མི་འདོར། །ཞེས་པ་སྟེ། མི་ན་བར་འགྲེངས་ཏེ་བཤང་གཅི་མི་འདོར། གཞན་དུ་འདོར་ས་མ་རྙེད་པའི་རྐྱེན་མེད་པར་ཆུའི་ནང་དང་། རྩྭ་སྔོན་ཡོད་པའི་ས་ཕྱོགས་སུ་བཤང་གཅི་དང་མཆིལ་སྣབས་སྐྱུགས་པ་སོགས་མི་འདོར་བ་སྟེ་གཙང་སྦྲ་སྒྲུབ་པའི་ཚུལ་གསུམ་མོ། །

དགུ་པ་རྒྱུ་བའི་བསླབ་བྱ་གཅིག་ནི། ཤིང་ལ་མི་གང་མཐོར་འཛེག་རྒྱུ་གཅིག་གོ །ཞེས་པ་སྟེ། སྟག་ལ་སོགས་པའི་གནོད་པ་མེད་པར་ཤིང་ལ་མི་གང་ཙམ་ལས་མཐོ་བར་འཛེག་པར་མི་བྱའོ། །

གཉིས་པ་དགེ་སློང་མའི་བསླབ་བྱ་བཤད་པ་ནི། དགེ་སློང་མ་ལ་ཕམ་བརྒྱད་ལྷག་ཉི་ཤུ། །སྤང་ལྟུང་སོ་གསུམ་ལྟུང་བྱེད་བརྒྱ་བརྒྱད་ཅུ། །སོར་བཤགས་བཅུ་གཅིག་ཉེས་བྱས་བརྒྱ་བཅུ་གཉིས། །སུམ་བརྒྱ་དྲུག་ཅུ་རྩ་བཞི་མདོ་ཙམ་མོ། །ཞེས་པས་དགེ་སློང་མའི་བསླབ་བྱ་ལ་ཁྲིམས་སུམ་བརྒྱ་དྲུག་ཅུ་རྩ་བཞི་སྟེ། དང་པོ་ཕམ་པ་ལ་བརྒྱད་ལས། མི་ཚངས་སྤྱོད་རྐུ་གསོད་དང་རྫུན། །ཞེས་པ་བཞི་ནི་ཐུན་མོང་པ་སྟེ། དགེ་སློང་དང་འདྲའོ། །ཐུན་མོང་མིན་པ་བཞི་ནི། རེག་པ་ལུས་བཀན་འཆབ་དང་བཟློག་པའོ། །ཞེས་སོ། །དེ་ལྟར་ན་དགེ་སློང་མ་ལ་མི་ཚངས་སྤྱོད་ཀྱི་ཕམ་པ་མི་འབྱུང་བར་ཐལ། དེའི་སྔོན་རོལ་དུ་རེག་ཕམ་བྱུང་ཟིན་པའི་ཕྱིར་ཞེ་ན། སྐྱོན་མེད་དེ། སྐྱེས་པའི་ལུས་ཡོངས་རྫོགས་དང་མ་འཕྲད་པར་དབང་པོ་ཉིད་འཕྲད་པ་ཙམ་གྱི་མི་ཚངས་སྤྱོད་འབྱུང་བ་སྲིད་པས་སོ། །གཉིས་པ་ལྷག་མ་ཉི་ཤུ་ལ། བདུན་ནི་ཐུན་མོང་པ་སྟེ། སྨྱན་བྱེད་པ། གཞི་མེད་ནས་བཀའ་བློ་མི་བདེ་བའི་བར་རོ། །ཐུན་མིན་ནི་བཅུ་གསུམ་སྟེ། ཅི་ཡང་ལེན་དང་ལེན་འཇུག་དང་། །མཚན་བྲལ་ཉིན་བྲལ་ལམ་དུ་འཇུག །ཆུ་བརྒལ་རབ་འབྱིན་ཤི་ནོར་ལེན། །བཟོད་བྱེད་སྤོང་དང་འཐབ་ཀྲོལ་བྱེད། །བསྟེན་དང་བསྟེན་དུ་འཇུག་པའོ། །ཞེས་པ་རྣམས་སོ། །གསུམ་པ་སྤང་ལྟུང་སོ་གསུམ་ལ། ཐུན་མོང་པ་ནི་བཅུ་དགུ་སྟེ། བཅུ་ཚན་དང་པོ་དང་། བཅུ་ཚན་གཉིས་པ་ནས་གསེར་དངུལ་ལ་རེག་པ་སོགས་གསུམ་དང་། བཅུ་ཚན་གསུམ་པ་ནས། ལྷུང་བཟེད་འཆང་བ། སྔས་ཕྱིས། དགོན་པ་བ། རས་ཆེན་བཞི་མ་གཏོགས་དྲུག་པོ་རྣམས་སོ། །ཐུན་མིན་ནི་བཅུ་བཞི་སྟེ། ལྷུང་བཟེད་ཞག་གཅིག་འདས་འཆང་བྱིན་མ་བརླབས། །སྲ་བརྐྱང་འབྱིན་དང་མི་འབྱིན་རིན་ཆེན་སློང་། །གོས་དང་གོས་རྒྱུ་དང་ནི་མལ་ཆའི་རྒྱུ། །དབྱར་ཁང་རྒྱུ་རྣམས་ཟས་སུ་བསྒྱུར་བ་དང་། །མང་ལ་བསྔོས་དང་དགེ་འདུན་བསྔོས་བྱིན་བརླབས། །བཅིངས་པ་འགྲོལ་འཇུག་གོས་ལྕི་ཡང་བ་བརྟེན། །ཞེས་པ་རྣམས་སོ། །བཞི་བ་ལྟུང་བྱེད་བརྒྱ་དང་བརྒྱད་ཅུ་ལ། ཐུན་མོང་པ་ནི། དགེ་སློང་གི་འབའ་ཞིག་པ་དགུ་བཅུ་ལས། མ་བསྐོས་པ་ལ་སོགས་པའི་བཅུ་ཚན་དང་། སྐྲོད་པ། ཡང་ཡང་ཟ་བ། ཟས་བསོད་པ་སློང་བ། ཉལ་སར་འདུག །འགྲེང་། ཕྱིར་མ་བསླངས་བར་སྤྱོད་པ། མ་ལོན་པ། དབྱར་གྱི་རས་ཆེན་ལས་གྱུར་པ་སྟེ་བཅོ་བརྒྱད་ནི་དགེ་སློང་མ་ལ་མེད་ཅིང་། དེ་ལྷག་བདུན་ཅུ་རྩ་གཉིས་ནི་ཐུན་མོང་པའོ། །ཐུན་མིན་ལ་བརྒྱ་རྩ་བརྒྱད་དེ། སྡོམ་ནི། མ་ལོན་པས་འཇོག་འཁོར་འཇོག་འཁོར་མང་འཇོག །ཁྱིམ་སོ་བཟུང་དང་མ་བཟུང་བྱེ་བྲག་ལས། །བཅུ་གཉིས་ཉི་ཤུ་མ་ལོན་རྫོགས་པར་བྱེད། །ཚིགས་ལས་འདས་པ་གཉིས་དང་མ་བསླབ་རྫོགས། །བསླབ་ཟིན་མི་རྫོགས་ཆོས་ཚོང་འདྲིད་པ་དང་། །འཁོར་མང་གསོག་དང་མ་གནང་སྡུད་པ་དང་། །འཁྲུལ་མོ་སྦྲུམ་མ་མྱ་ངན་གྱིས་གཟིར་དང་། །འཐབ་ཀྲོལ་ཅན་ཏེ་སྐྱོན་ཅན་སྡུད་པ་བཞི། །མི་འདོགས་མི་འདྲེན་མི་སློབ་ནད་པའི་གཡོག །མི་བྱེད་པ་སྟེ་ཡལ་བར་འདོར་བ་བཞི། །འདོད་རྟེན་འདོད་རྟེན་ལྟར་བཅོས་ལྟར་གནོད་དང་། །བརྟེན་པར་བྱ་བ་འཆོས་པའི་ལྟུང་བྱེད་དོ། །ཁྱིམ་པ་དང་ནི་དགེ་སློང་ཡུལ་དག་ལ། །བརྟེན་ནས་བླ་གབ་ཡོད་མེད་འགྲེང་བ་བཞི། །དེ་བཞིན་ཕན་ཚུན་ཤུབ་ཅིང་སྨྲ་བ་བཞི། །ཁྱིམ་པ་ལས་ནི་རིག་པ་ལེན་དང་ཀློག །རྨ་བཅིངས་འགྲོལ་དུ་འཇུག་དང་བུ་འཚོ་དང་། །མཚན་མོ་ཁྱིམ་གཞན་ཉལ་དང་མ་བཏགས་ཉལ། །གཅིག་ཉལ་སྟན་གཅིག་སྤྱོད་ཅིང་གནས་པ་བཏང་། །རང་ལུས་དགེ་སློང་མ་དང་དགེ་སློབ་མ། །དགེ་ཚུལ་མོ་དང་ཁྱིམ་མོ་མུ་སྟེགས་མོ། །དྲིལ་ཕྱིས་ལྔ་སྟེ་བཀྲུ་བཤལ་བྱེད་དུ་འཇུག །དྲི་ཞིམ་འབྲུ་མར་ཚིགས་སྐུད་ཆུར་ལོངས་སྤྱོད། །སྤུ་ཤེལ་རྩི་དང་སོ་མངས་སྨྱིག་ཤད་གསུམ། །སོ་སོའམ་གསུམ་གས་སྐྲ་ཤད་སྐྲ་ཚབ་དང་། །ཁྱིམ་པའི་རྒྱན་ཐོགས་བྲོ་གླུ་རོལ་མོ་བྱེད། །གདུགས་ཐོགས་མཆིལ་ལྷྭམ་གྱོན་དང་ཁྲིའུར་འདུག །ཕྱིས་གནོན་ལོག་ཐབས་བྱེད་དང་སྐུད་པ་འཁལ། །དགེ་འདུན་མའི་གོས་བདག་གིར་བྱེད་པ་དང་། །ཟས་འཚོང་ཁྱིམ་གྱི་བྱ་བ་རྗེན་པ་འཚོད། །ལྟོ་འདུན་སྒོག་ཟ་རྨེ་གབ་མི་བསྟེན་དང་། །ཆུ་གོས་མི་འཆང་བཀྲུ་བཤལ་གོས་འཁྲུར་འཇུག །རུང་བའི་གོས་ལ་མ་གུས་སྟེར་དང་བརྗེ། །གཞན་བསྔགས་ཁྱིམ་གནས་རྙེད་ཆོས་སེར་སྣ་ལྔ། །དབྱར་ཁང་ཁྱིམ་གཞན་ནས་སྐྲོད་ཐོ་འཚམས་པ། །ལོག་པར་སྟོན་དང་རྣམ་འགྱུར་བརྙས་ཐབས་བྱེད། །སྤྱོ་དང་ཆུ་འཐོར་འཁྲུག་ལོང་ཡལ་བར་འདོར། །བློ་མཐུན་མི་བྱེད་གདམས་ངག་མྱོང་མི་བྱེད། །དགེ་སློང་མེད་པར་གསོ་སྦྱོང་དབྱར་གནས་བྱེད། །གཉིས་ཀའི་ཚོགས་ལ་དགག་དབྱེ་མི་བྱེད་དང་། །དབུལ་བོ་སྲ་བརྐྱང་སྦྱོར་འཇུག་དབྱུང་འགྱེད་ཕྱིར། །ཚོགས་པ་མི་སྦྱིན་དབྱར་ཁང་ཡལ་བར་འདོར། །ལྗོངས་རྒྱུར་འགྲོ་དང་མི་འགྲོ་དོགས་བཅས་འགྲོ། །བཀག་པའི་ཕྱོགས་འགྲོ་གཞན་གནས་འཐབ་ཀྲོལ་བྱེད། །སྐབས་མ་ཕྱེ་འདྲི་ཕྱི་སར་གཅིག་པུར་འགྲོ། །རྩྭ་སྔོན་སྟེང་དང་མ་བལྟས་བཤང་གཅི་འདོར། །ཞེས་པ་རྣམས་སོ། །ལྔ་པ་སོར་བཤགས་ལ་བཅུ་གཅིག་སྟེ། ཐུན་མོང་པ་ནི་བསླབ་པ་བྲལ་ཏེ་ཁྱིམ་དུ་འཇུག་པ་ཉིད་ཡིན་ལ། ཐུན་མིན་བཅུ་ནི། འོ་ཞོ་མར་ཞུན་འབྲུ་མར་སྦྲང་རྩི་དང་། །བུར་ཁུ་ཉ་ཤ་ཤ་དང་ཤ་སྐམ་རྣམས། །ཁྱིམ་ནས་མི་ན་བཞིན་བསླང་ཟོས་སམ་འཐུངས། །ཞེས་པའོ། །དྲུག་པ་ཉེས་བྱས་ལ་བརྒྱ་དང་བཅུ་གཉིས་ལས། ཐུན་མིན་ནི་གཉིས་ཏེ། ཤམ་ཐབས་སྐེད་པར་སྣང་བར་མི་བགོ་བ་དང་། ཆགས་པར་གྱུར་ཅིང་ཁྱིམ་གཞན་དུ་མི་འགྲོ་བའོ། །ཐུན་མོང་པ་ནི་བརྒྱ་དང་བཅུ་སྟེ། མའི་སྐབས་འདིར་ཕྱིས་གནོན་བྱེད་པ་ཞེས་མ་བསྒོས་པར་སྟན་ལ་འདུག་པ་དང་། རྩྭ་སྔོན་གྱི་སྟེང་དུ་བཤང་གཅི་འདོར་བ་གཉིས་ལྟུང་བྱེད་དུ་བཤད་ཟིན་པས། དེ་གཉིས་མ་རྟོགས་པའི་ལྷག་རྣམས་དགེ་སློང་དང་འདྲ་བའི་ཕྱིར་རོ། །དེ་དག་ནི་སྤང་བར་བྱ་བ་དགག་པའི་བསླབ་བྱ་སྟེ། མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བའི་ཐབས་སོ།། །།

གཉིས་པ་བསྒྲུབ་པའི་བསླབ་བྱ་ནི། ལུང་བཞི་ལས་གསུངས་པ་རྣམས་ཡིན་ཞིང་། དེ་ལ་ཝརྟུའི་སྒྲ་ལས་གཞི་ཞེས་བྱ་སྟེ། བསླབ་པ་གསུམ་གྱི་རྟེན་བྱེད་པའི་ཕྱིར་རོ། །དབྱེ་ན། གཞི་བཅུ་བདུན་ཏེ། ལུང་ལས། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་གཞི། །སྨན་དང་གོས་དང་སྲ་བརྐྱང་དང་། །ཀཽ་ཤམྦྷི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་བཞག་པ་དང་། །གནས་མལ་དང་ནི་རྩོད་པ་དང་། །དགེ་འདུན་དབྱེན་རྣམས་བསྡུས་པ་ཡིན། །ཞེས་སོ། །དེ་ཡང་ཀཽ་ཤམྦྷི་ནི་ལས་བྱེ་བའི་གཞི། དམར་སེར་ཅན་ནི་ཕྱིར་བཅོས་ཀྱི་གཞི། གང་ཟག་ནི་དུས་དང་དུས་མ་ཡིན་པ་བསྡུས་པ་འབྱུང་བའི་གཞི། སྤོ་བ་ནི་ས་གཞན་ན་གནས་པ་སྤྱོད་པའི་གཞི། གསོ་སྦྱོང་བཞག་པ་ནི་ཡོངས་སུ་སྦྱོང་བའི་གཞི། གཞན་གོ་སླའོ། །གཞི་བཅུ་བདུན་པོ་དེ་རྣམས་བསྡུ་ན་གསུམ་སྟེ། སྡོམ་པ་མ་ཐོབ་པ་འཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། ཉམས་ན་ཕྱིར་བཅོས་པ་དང་གསུམ་དུ་འདུ་བའི་ཕྱིར། །དང་པོ་ནི། རབ་བྱུང་གི་གཞི་ཡིན་ཏེ། སྔར་བཤད་གྲུབ་ཅིང་། གསུམ་པ་ནི། ཕྱིར་བཅོས་ཀྱི་གཞི་བདུན་ཏེ། རྩ་བའི་ས་བཅད་དྲུག་པར་འཆད་པར་འགྱུར་ལ། འདིར་གཉིས་པ་བཤད་པར་བྱ་སྟེ། བསླབ་པ་ཡོངས་སྦྱོང་གི་གཞི་གསུམ། བདེ་བར་གནས་པའི་རྐྱེན་གྱི་གཞི་ལྔ། འཐོབ་བྱེད་བསྲུང་ཐབས་ཕྱིར་བཅོས་ཐམས་ཅད་ལ་ཁྱབ་པ་ལས་ཀྱི་གཞིའོ། །དང་པོ་ནི། བསྒྲུབ་པའི་བསླབ་བྱ་ཡོངས་སུ་སྦྱོང་བའི་ཚུལ། །གསོ་སྦྱོང་དབྱར་གནས་དགག་དབྱེ། ཞེས་པ་ལྟར་གསུམ་ལས། དང་པོ་གསོ་སྦྱོང་ནི། རྒྱལ་པོའི་ཁབ་ཀྱི་འོད་མའི་ཚལ་དུ་དགེ་བསྙེན་མང་པོས་ཞུས་པ་ལ་བརྟེན་ནས་གནང་ངོ་། །མཚན་ཉིད་ནི། གཞི་གསུམ་གྱི་ནང་ཚན་བསླབ་གསུམ་རྣམ་པར་དག་བྱེད་ཀྱི་ཐབས་གང་ཞིག །ཞི་མཐུན་གང་རུང་གིས་བསྡུས་པའི་རིགས་གནས། དབྱེ་ན་གཉིས་ཏེ། སྔར་བསགས་ཀྱི་སྒྲིབ་པ་སྦྱོང་ཞིང་ལྷག་པའི་སེམས་དང་ཤེས་རབ་དག་པར་བྱ་བའི་ཕྱིར་ཞི་གནས་ཀྱི་གསོ་སྦྱོང་དང་། ཕྱིས་འབྱུང་གི་རྒྱུན་ཚེ་འདིའི་ཟག་པ་སྡོམ་ཞིང་ལྷག་པའི་ཚུལ་ཁྲིམས་དག་པར་བྱ་བའི་ཕྱིར་མཐུན་པའི་གསོ་སྦྱོང་བཤད་པའོ། །དང་པོ་ནི། མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པ་ལྟར་གཞི་ཚུལ་ཁྲིམས་རྣམ་པར་དག་པ་ལ་གནས་པའི་གང་ཟག །དེ་ལས། མ་ཆགས་འཕགས་རིགས་ཞེས་པས་འདོད་ཆུང་ཆོག་ཤེས་དང་ལྡན་པ་དེས། ལམ་གྱི་རྒྱུ་སྡེ་སྣོད་ཀྱི་ལུང་ཐོས་ཤིང་། ཐོས་དོན་བསམ། བསམ་དོན་སྒོམ་པར་བྱེད་པ་སྟེ། དེ་ལ་སྤོང་བའི་གནས་དང་། དེར་འགལ་སྤོང་མཐུན་སྒྲུབ་ཀྱི་རྐྱེན་སྒྲུབ་ཅིང་། སྤོང་བའི་ཞལ་ཏ་པ་བསྐོས་ལ། དེས་བསམ་གཏན་ལས་ལྡང་བའི་དུས་སྦྲོན་པ་སོགས་བྱ་བའོ། །ཇི་ལྟར་བསྒོམ་བྱའི་ལམ་གྱི་ངོ་བོ་ལ། ཞི་ལྷག་གཉིས་ལས། དང་པོ་ནི། མཛོད་ལས། དེ་ལ་འཇུག་པ་མི་སྡུག་དང་། །དབུགས་རྔུབ་འབྱུང་བ་དྲན་པ་ཡིས། །འདོད་ཆགས་རྣམ་རྟོག་ལྷག་རྣམས་སོ། །ཞེས་པས་འདོད་ཆགས་ཤས་ཆེ་བའི་གཉེན་པོར་མི་སྡུག་པའི་སྒོམ་ཚུལ་གསུམ་དང་། རྣམ་རྟོག་ཤས་ཆེ་བའི་གཉེན་པོར་རླུང་འབྱུང་འཇུག་དྲན་པའི་སྒོམ་ཚུལ་དྲུག་སྟེ། དམིགས་པ་གཉིས་པོ་དེ་དམིགས་པ་ལ་སེམས་འཇོག་པ་སོགས་སེམས་གནས་པའི་ཐབས་དགུས་ཞི་གནས་འགྲུབ་པར་བྱེད་པའོ། །གཉིས་པ་ནི། དེ་ལས། ཞི་གནས་གྲུབ་པར་གྱུར་བ་ཡིས། །དྲན་པ་ཉེར་བཞག་བསྒོམ་པར་བྱ། །ཞེས་པས་ལུས་ཚོར་སེམས་ཆོས་བཞི་ལ་གཙང་བདེ་རྟག་བདག་ཏུ་ལྟ་བའི་གཉེན་པོར། རང་མཚན་མི་གཙང་བ་སོགས་དང་། སྤྱི་མཚན་མི་རྟག་པ་སོགས་བཞིར་སྒོམ་པའི་རྣལ་འབྱོར་ལ་སྤྱོད་ཅིང་། དེ་ལྟར་ཚོགས་ལམ་ལ་སོགས་པའི་ལམ་ལྔ་བྱང་ཕྱོགས་སོ་བདུན་གྱི་རིམ་པས་བགྲོད་དེ། རྒྱུན་ཞུགས་ལ་སོགས་པའི་འབྲས་བུ་བཞི་འཐོབ་པར་བྱེད་པའོ། །གཉིས་པ་མཐུན་པའི་གསོ་སྦྱོང་ནི། ཀརྨ་ཤ་ཏཾ་ལས། མཐུན་པའི་གསོ་སྦྱོང་ནི་རྣམ་པ་ལྔ་སྟེ། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་པའི་གསོ་སྦྱོང་དང་། གནོད་པ་བྱུང་བའི་གསོ་སྦྱོང་དང་བསྡུམ་པའི་གསོ་སྦྱོང་དང་ལྔའོ། །ཞེས་པ་ལྟར་ལྔ་ལས། དང་པོ་ནི། ཚེས་ཞག་ཆུ་ཚོད་ང་དགུ་རྗེས་འབྲང་དང་བཅས་པ་དེས་ཉིན་ཞག་ཆུ་ཚོད་དྲུག་ཅུའི་དོད་མ་ཐུབ་པས། ཉིན་ཞག་ལྔ་བཅུ་ང་དགུ་ན་ཚེས་ཞག་དྲུག་ཅུར་ལོངས་པའི་ཕྱིར། དེས་ན་ཧོར་ཟླ་བཅུ་པའི་མར་ངོའི་ཚེས་གཅིག་ནས་དགུན་ར་མགོ་ཟླར་བྱས་ཏེ་དུས་འགོ་བཟུང་བས། དེ་ནས་ཟླ་བ་ཕྱེད་དང་གཉིས་འདས་པ་ཧོར་ཟླ་བཅུ་གཅིག་པའི་མར་ངོ་ལ་རྒྱལ་ཟླའི་བཅུ་བཞི་པ་འབྱུང་བ་ནས། ཧོར་ཟླ་དགུ་པའི་མར་ངོ་ལ་སྨིན་དྲུག་ཟླ་བའི་གསོ་སྦྱོང་བཅུ་བཞི་པར་འབྱུང་བའི་བར་བགྲངས་པས། ལོ་རེ་ལ་གསོ་སྦྱོང་བཅུ་བཞི་པ་དྲུག་སྟེ། ལོ་དྲི་ལས། རྒྱལ་དང་དབོ་དང་ས་ག་དང་། །ཆུ་སྟོད་ཁྲུམས་སྨད་སྨིན་དྲུག་བཅས། །འདི་རྣམས་ཀྱི་ནི་ནག་པོའི་ཕྱོགས། །ཟླ་བྱེད་གསོ་སྦྱོང་བཅུ་བཞི་པའོ། །ཞེས་གསུངས་པའི་ཕྱིར། གཉིས་པ་ནི། ཡར་ངོའི་ཉ་བཅུ་གཉིས་དང་། ཧོར་ཟླ་བཅུ་པ་ནས་བརྒྱད་པའི་བར་གྱི་མར་ངོ་དྲུག་སྟེ་བཅོ་བརྒྱད་དོ། །དེ་ལྟར་ཉིན་ཚེས་ཀྱི་བར་ནས་ཞག་མི་ཐུབ་འཐོན་པ་ལྟར། ཚེས་ཞག་གིས་ཁྱིམ་ཞག་ཆུ་ཚོད་དྲུག་ཅུ་དང་ཆུ་སྲང་ང་གཉིས་ལྷག་བཅས་ཀྱི་དོད་མ་ཐུབ་པས་ཁྱིམ་ཞག་ཕྱེད་བཅས་སོ་གཉིས་ན་ཚེས་ཞག་གཅིག་ཐེབ་ཏུ་དོན་ཏེ་ཚེས་ཞག་ཕྱེད་དང་སོ་གསུམ་དུ་ལོངས་པའི་ཕྱིར། དེ་བསགས་པས་ལོ་གཅིག་གི་བར་ཁྱད་ལ་ཞག་བཅུ་གཅིག་ལྷག་ཙམ་འོང་བས་ལོ་གཉིས་དང་ཟླ་བ་ཕྱེད་དང་དགུ་ན་ཟླ་བ་གཅིག་བཤོལ་དུ་འཐོན་པ་ཡིན་ཞིང་། དེ་འདོན་ཚུལ་འདུལ་བར་དངོས་སུ་མ་གསུངས་ལ། འོན་ཀྱང་རྒྱལ་པོའི་འཁོར་དུ་རྩིས་མཁན་མཁས་པ་ཕལ་ཆེར་འབྱུང་བར་དགོངས་ཏེ། ཟླ་བཤོལ་དོར་བ་ནི་རྒྱལ་པོའི་རྗེས་སུ་འབྲང་བས་སོ། །རྒྱུ་སྐར་ནི་སྐར་མཁན་གྱི་རྗེས་སུ་འབྲང་བར་ཤེས་པར་བྱའོ། །ཞེས་གསུངས་པའི་ཕྱིར། གང་དག །ཟླ་ཤོལ་གྱི་མར་ངོའི་གསོ་སྦྱོང་ནི་རང་ཐུབ་མི་ཐུབ་གང་ཡིན་དེ་དང་འདྲ་བར་བྱེད་ཅེས་གསུངས་པ་མི་རིགས་ཏེ། མི་ཐུབ་པའི་རྗེས་སུ་མི་ཐུབ་པ་བྱེད་ན་ཉིན་ཞག་སུམ་ཅུ་ན་ཚེས་ཞག་སོ་གཅིག་ཏུ་ལོངས་པར་ཐལ་བའི་ཕྱིར་རོ། །གསུམ་པ་ནི། མི་རུང་བའི་གཞི་བཅུ་ལྟ་བུ་སེལ་བ་དང་། རབ་གནས་སོགས་བཀྲ་ཤིས་པའི་དུས་སུའོ། །བཞི་པ་ནི། ནད་ཡམས་སོགས་གནོད་པ་བྱུང་ཟིན་ལྡོག་པའམ་སླར་མི་འབྱུང་བའི་ཕྱིར་བྱེད་པའོ། །ལྔ་པ་ནི། དགེ་འདུན་བྱེ་བ་བསྡུམ་པའི་ཕྱིར་གསོ་སྦྱོང་བྱེད་པའོ། །དེ་ལྟར་བཀྲ་ཤིས་པ་སོགས་དུས་མ་ངེས་པའི་གསོ་སྦྱོང་གསུམ་ཡང་། གསོལ་བའི་ལས་ཀྱི་ཚེ་རང་རང་གི་དུས་བརྗོད་དགོས་པའི་ཁྱད་པར་ཙམ་མ་གཏོགས་གཞན་ཆོ་ག་ཐམས་ཅད་དུས་ངེས་པའི་གསོ་སྦྱོང་དང་འདྲའོ། །འདིིར་སྐབས་སུ་བབ་པ་བསླབ་པ་སྦྱོང་བྱེད་ནི་དུས་ངེས་པའི་གསོ་སྦྱོང་སྟེ། དེ་ལ་གནས་གང་དུ། གང་ཟག་གང་གིས། གསོ་སྦྱོང་ཇི་ལྟར་བྱ་བའི་ཚུལ་དང་གསུམ་ལས། དང་པོ་ནི། མཚམས་ཆེན་བཅད་ན་དེ་ཉིད་དུ་དང་། ཆེ་ཆུང་གཉིས་ཀ་བཅད་ན་ཆུང་བ་ནས་འཐོན་ནས་ཆེ་བར་དང་། ཆུང་བ་བཅད་ན་གསོ་སྦྱོང་སོགས་ལས་ཐམས་ཅད་དེར་བྱ་ཞིང་། རྩིག་པས་བསྐོར་ན་དེ་ཉིད་མཚམས་ཡིན་ལ། མ་བསྐོར་ན་ཝ་ཁ་ནས་ཆུ་འཛག་པ་གང་དུ་འབབ་པ་ཚུན་ཆད་ཡིན་པར་བཤད་དོ། །གཉིས་པ་ནི། རབ་བྱུང་སྡེ་ལྔ་ཀས་སོ། །གསུམ་པ་ལ་སྦྱོར་དངོས་གཉིས་ལས། དང་པོ་ལ། ལས་གྲལ་དུ་མ་འདུས་གོང་གི་བྱ་བ་དང་། འདུས་ནས་བྱ་བའོ། །དང་པོ་ནི། གསོ་སྦྱོང་སྔ་མ་ཟིན་ནས་དེ་རིང་གི་བར་རང་རྒྱུད་ལ་ལྟུང་བ་བྱུང་མ་བྱུང་བརྟགས་ཏེ། བྱུང་ན་བཤགས་བསྡམས་བྱིན་རླབས་གང་ལ་གང་འོས་བྱ་བའོ། །གཉིས་པ་ནི། ཐོག་མར་གཎྜིའི་སྒྲས་དགེ་འདུན་བསྡུ་སྟེ། དེ་ལ་གཎྜིའི་རྒྱུ་ནི། མདོ་ལས། ཙནྡན་བིལྦ་པ་ལ་ཤ །ཨ་ཤྭཏྠ་དང་ཙནྡན་དམར། །རྒྱ་སྟར་ཏཱ་ལ་ཀིམ་ཤུ་ཀ །ཤིང་ཤ་པ་དང་ཏ་མཱ་ལ། །ཨ་མྲ་སྟར་བུ་སྐྱུ་རུ་ར། །ཏིན་ཏི་སཱ་ར་ཨ་ཤོ་ཀ །འདི་དག་ཐམས་ཅད་མེད་ན་ཡང་། །འོར་སེ་ལ་ནི་འབད་དེ་བྱ། །ཞེས་དང་། ཚད་ནི་ཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་དུ་སོར་ནི་དྲུག་པ་སྟེ། །དཔངས་སུ་ཡང་ནི་གཉིས་བྱའོ། །སོར་མོའི་ཚིགས་ཀྱི་ཚད་དག་གིས། །ཟུར་བཞི་ཚད་ནི་གཉིས་པ་ཡིན། །ལེགས་མཉམ་ཉིད་ནི་ཤིན་ཏུ་གསལ། །རྩེ་གཉིས་སྦལ་བའི་མགོ་བཞིན་ནོ། །དེ་ནས་རྡུང་བར་བྱེད་པ་ཡང་། །ཤིང་དེ་ཉིད་ལས་བཅད་དེ་བྱ། །སོར་བཅུ་གཉིས་ཀྱི་ཚད་དག་ལ། །ཟླུམ་ཞིང་རྩེ་གཉིས་ནེའུ་ལེའི་མགོ །འཆང་བཟུང་ཚད་ཀྱང་དེ་བཞིན་ཏེ། །ཞེས་སོ། །བརྡུང་བ་ནི་རབ་བྱུང་སྡེ་ལྔའམ། གསོ་སྦྱོང་ལ་གནས་པའི་དགེ་བསྙེན་གྱིས་ཀྱང་རུང་སྟེ། རྒྱ་དཔེར་ཥཌ་ད་ཞེས་ཥཌཛ་འང་འདུག་མཆན། ཤད་ཙར་གྲགས་པ་ཤད་གསུམ་སྔོན་དུ་འགྲོ་བ་གཞིར་བཞག་ནས། སྤྱིར་དགེ་འདུན་བསྡུ་བའི་དོན་དུ་རྒྱུད་གསུམ་དང་ཏོག་གསུམ་ལས་བྱ་བའི་དོན་དུ་རྒྱུད་གཅིག་དང་ཏོག་གསུམ། ཕུང་པོ་དབྱུང་བའི་དོན་དུ་ཏོག་མེད་པའི་བྱི་བོ། གནོད་པ་བཟློག་པའི་དོན་དུ་ཅི་ཙམ་ཆོག་པ་སྟེ། དེ་ཡང་རྒྱུད་རེ་ལ་བརྡེག་ཐེངས་སོ་དྲུག་གི་གཅིག་ནས་བཅོ་བརྒྱད་བར་ཇེ་ཆེ་དང་བཅུ་དགུ་ནས་སོ་དྲུག་བར་ཇེ་ཆུང་དུ་བརྡུང་ངོ་། །དེ་ལས་འདིར་ལས་ཀྱི་གཎྜིས་བསྡུས་ཏེ། དགེ་འདུན་རྣམས་འདུས་ནས་ཉིན་རེ་བཞིན་གྱི་བྱ་བ་རྒྱུད་ཆགས་གསུམ་དང་གཏོར་མ་བཏང་བ། དུས་བཟང་པོ་ལ་ཆོས་འཆད་ཉན་བྱེད་པའི་དོད་མདོ་འདོན་པ་རྣམས་གསོ་སྦྱོང་གི་མེད་མི་རུང་བའི་སྦྱོར་བ་མ་ཡིན་ཡང་ཕྱག་བཞེས་ལྟར་སྔོན་ལ་གཏང་ནས། དགེ་ཚུལ་གྱི་བཤགས་པ་སྔར་མ་གྲུབ་ན་འདིར་བྱ་ཞིང་། ཡོངས་དག་བླང་ནས་ལོགས་སུ་བཀར་ལ། འདིར་མེད་དུ་མི་རུང་བའི་སྦྱོར་བ་ལ་གསུམ་ལས། དང་པོ་རྒྱུད་དག་པར་བྱེད་པ་ནི། དགེ་འདུན་གྱི་ནང་དུ་ལྟུང་བ་དྲན་ན་དྲུང་ན་མོ་ལ་བྱིན་གྱིས་བརླབ་ཅིང་། ལས་བྱེད་པས་ནི་སེམས་ཀྱིས་བརླབ་སྟེ། ལྟུང་བ་ཐུན་མིན་རྣམས་ཏེ་ཡན་ཆད་ཀྱིས་དག་པར་བགྱིས་ནས། ཐུན་མོང་པ་རྣམས་གསོལ་བ་འབའ་ཞིག་པས་བྱིན་གྱིས་བརླབ་པར་བྱ་བའོ། །གཉིས་པ་གནས་ཀྱི་བློ་མཐུན་ནི། གསོལ་བ་དང་གཉིས་ཀྱི་ལས་ཀྱིས་གནས་ལ་བློ་བསྟུན་པའམ། མཚམས་ཆེ་ཆུང་གང་རུང་གཅོད་པའོ། །གསུམ་པ་དགེ་འདུན་མཐུན་པ་སྒྲུབ་པ་དང་འདུ་བར་མི་ནུས་པའི་གསོ་སྦྱོང་ཉམས་སུ་མྱོང་བ་སྒྲུབ་པ་ནི། གནས་བརྟན་གྱིས་སོ་ཐར་གྱི་མདོའི་བསྟོད་ར་དང་། དུས་བརྗོད་པ། བག་ཡོད་པར་གདམས་པ་རྣམས་བཏོན་ལ། དགེ་བསྐོས་ཀྱིས་བརྟགས་ནས་ནད་པ་ལྟ་བུ་མ་ལྷགས་པ་ཡོད་ན་འདུན་པ་བླངས་ནས་ནང་དུ་བརྗོད་པའོ། །གཉིས་པ་དངོས་གཞི་ནི། གནས་བརྟན་གྱིས་སོ་ཐར་གྱི་མདོ་ཉན་པར་གདམས་ནས། གསོལ་བ་འབའ་ཞིག་པའི་ལས་ཀྱིས་དགེ་འདུན་ཐུགས་བསྟུན་པ། ཚེ་དང་ལྡན་པ་དག་བདག་ཅག་གསོ་སྦྱོང་བྱ་སྟེ། ཞེས་སོགས་ཀྱིས་རྣམ་པར་གཞག་པ་འཛིན་དུ་བཅུག་སྟེ། དེ་ནས་མདོ་འདོན་པ་དངོས་ནི། གླེང་གཞི་དང་། ཕམ་པ་དང་། ལྷག་མ་དང་། མ་ངེས་པ་དང་། རིལ་གྱིས་འདོན་པ་དང་ལྔ་སྟེ། རེ་རེའི་རྗེས་ལ་ཡོངས་སུ་དག་པ་ལན་གསུམ་དྲིའོ། །དེ་ལྟ་མོད་ཀྱི་གླེང་གཞི་ཙམ་ལས་མི་འདོན་ན། དེའི་མཇུག་སྡུད་བརྗོད་ནས་ཡོངས་དག་འདྲི་བ་ཉིད་དངོས་གཞིའོ། །དེ་ལྟར་ཡང་། གླེང་གཞི་འདོན་པ་དང་གསོལ་བ་བརྗོད་པ་ནི་ཚིག་ཏུ་བརྗོད་པ་ཉིད་ཀྱིས་བསྒྲུབ་པར་བྱ་བ་ཉིད་ཡིན་ནོ། །ལྷག་མ་ནི་ཐོས་པ་བསྒྲགས་པས་ཀྱང་ངོ་། །ཞེས་སོ། །གལ་ཏེ་གནས་དེར་དགེ་སློང་གསུམ་མན་ཆད་ལས་མེད་ན་དུས་ཀྱི་བར་དུ་སྒུག་པའམ། ཡང་ན་གསོ་སྦྱོང་ཡོད་པའི་གནས་སུ་འགྲོ། དེ་ལྟར་མ་གྲུབ་ན་དམིགས་བསལ་གྱི་ཆོ་ག་ནི། ཕན་ཚུན་གཅིག་གི་མདུན་དུ་གཅིག་འདུག་ནས་བྱིན་གྱིས་བརླབ་ཅིང་རང་གཅིག་པུ་ལས་མེད་ན་ཡིད་ཀྱིས་བསམ་ཞིང་བརྗོད། དེ་ཙམ་ཡང་མ་གྲུབ་ན་ཐུབ་པའི་སྔོན་གྱི་གསོ་སྦྱོང་ཚིགས་སུ་བཅད་པ་ཕྱེད་དང་བཞི་ཙམ་འདོན་པར་བྱའོ། །གཞན་ཡང་གནས་དེར་དགེ་སློང་བཞི་ཁོ་ན་ཡོད་པ་དེས་ནི་གསོལ་བ་བྱས་ཏེ་གསོ་སྦྱོང་བྱ་ཞིང་ནད་པའི་ཡོངས་དག་མི་ལེན་པ་དང་། གཞི་མགྲོན་ཚེས་གྲངས་མ་མཐུན་ཞིང་གློ་བུར་བ་མང་ན་དེ་དག་གི་འདོད་པ་དང་བསྟུན་ནས་གསོ་སྦྱོང་བྱ་བ་དང་། གཞི་མགྲོན་གང་རུང་གི་དགེ་འདུན་གསོ་སྦྱོང་བྱེད་འཕྲོ་ལ་ཕྱིས་དེ་དག་དང་གྲངས་མཉམ་པའམ་ལྷག་པའི་དགེ་སློང་བྱུང་ན་སླར་ཡང་སྔ་མ་རྣམས་ཀྱིས་གསོ་སྦྱོང་བཟླས་ཏེ་བྱ་བ་དང་། གསོ་དགག་དགོས་པ་གཅིག་པས་དགག་དབྱེ་བྱས་ནས་སླར་གསོ་སྦྱོང་བྱ་མི་དགོས་པ་སོགས་ཀྱི་དམིགས་བསལ་རྣམས་ཀྱང་ཤེས་པར་བྱའོ། །

གཉིས་པ་དབྱར་གནས་ནི། སྟོན་པ་རྒྱལ་བྱེད་ཚལ་ན་གཞུགས་པའི་ཚེ་དགེ་སློང་དག་དབྱར་ལྗོངས་རྒྱུ་བ་ལ་མུ་སྟེགས་པ་རྣམས་འཕྱ་བས་དབྱར་སྔ་མ་བཅས། གང་གི་ཚེ་རི་བོར་གྱི་གཙུག་ལག་ཁང་ཞིག་ཏུ་དབྱར་གནས་པ་ལས་འཇིགས་པ་བྱུང་ནས་དགག་དབྱེ་མ་བྱས་པར་མཉན་ཡོད་དུ་འོངས་པས་དབྱར་ཕྱི་མ་རྗེས་སུ་བཅས་སོ། །མཚན་ཉིད་ནི། གཞི་གསུམ་གྱི་ནང་ཚན་གང་ཞིག །གསོ་སྦྱོང་དང་དགག་དབྱེ་གང་རུང་རྣམ་པར་བཅད་པའི་ཚུལ་རྣམ་པར་དག་བྱེད་ཀྱི་རིགས་གནས། དབྱེ་ན། དབྱར་སྔ་མ་དང་། ཕྱི་མའོ། །དེ་གཉིས་ཀྱི་ཁྱད་པར། དབྱར་སྔ་མ་ཡིན་ན་གྲོ་ཞུན་ཟླ་བ་དབྱར་ཟླ་ཐ་ཆུང་གི་མར་ངོའི་ཚེས་གཅིག་དང་། ཕྱི་མ་ཡིན་ན་ཁྲུམས་ཟླ་སྟོན་རའི་མར་ངོའི་ཚེས་གཅིག་ནས་དབྱར་ཟླ་གསུམ་དུ་ཁས་ལེན་པ་སྟེ། ས་གའི་ལྷས། གྲོ་ཞུན་ཟླ་བའི་ཚེ་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་ཉིད་ཁྲུམས་ཀྱི་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཞེས་དང་། མདོ་རྩར། དབྱར་གནས་པར་ཁས་བླང་བར་བྱའོ། །ཟླ་བ་གསུམ་དུའོ། །ཞེས་སོ། །འདི་ལ་གཉིས་ཏེ། ཕན་ཡོན་དང་། དེ་ལྡན་གྱི་དབྱར་གནས་ཇི་ལྟར་བྱ་བའོ། །དང་པོ་ནི། ལུང་ལས། འཕྱ་དང་སྲོག་ཆགས་གནོད་སྤོང་དང་། །ལས་སྲོག་གནོད་སྤོང་རལ་གྲུམ་འཆོས། །དོན་བྱ་ཉུང་དང་ཐོས་སོགས་འཕེལ། །དགག་དབྱེ་སྲ་བརྐྱང་འབྱུང་བའོ། །ཞེས་སོ། །གཉིས་པ་ལ། ཁས་ལེན་པའི་ཆོ་ག་དང་། ཁས་བླངས་པའི་དམ་ཚིག་བསྲུང་བའོ། །དང་པོ་ལ། སྦྱོར་དངོས་གཉིས་ལས། སྦྱོར་བ་ལའང་། རིང་སྦྱོར་དང་། ཉེ་སྦྱོར་རོ། །དང་པོ་ནི། འཐབ་ཀྲོལ་ཅན་སོགས་མེད་ཅིང་སྡེ་སྣོད་འཛིན་པ་སོགས་ཡོད་པས་བདེ་བར་གནས་པའི་རྐྱེན་ཚང་བ། སྟེང་གཡོགས་སྒོ་གླེགས་དང་བཅས་པའི་གཙུག་ལག་ཁང་རལ་གྲུམ་བཅོས་པ་དང་བྱི་དོར་བྱ་བ་སོགས་ཞག་བཅུའམ་ཟླ་ཕྱེད་ཙམ་གྱི་སྔ་རོལ་ནས་སྟ་གོན་བྱའོ། །གཉིས་པ་ནི། དབྱར་སྔ་མ་ཡིན་ན་དབྱར་འབྲིང་ཧོར་ཟླ་དྲུག་པའི་ཉ་དང་། ཕྱི་མ་ཡིན་ན་དབྱར་ཐ་ཧོར་ཟླ་བདུན་པའི་ཉ་ལ་གསོ་སྦྱོང་བྱས་ནས། གནས་དང་གནས་མལ་དག་སྟོབ་རྒྱུ་ཡོད་ན། དེ་སྟོབ་པ་པོ་དགེ་སློང་གཅིག་གམ་དུ་མ་བསྐོ་ཞིང་། མེད་ན་ཚུལ་ཤིང་བྲིམ་པ་པོ་ཉིད་བསྐོ་བར་བྱ་སྟེ། ལས་བྱེད་པ་པོས་བསྐོ་བྱར་སྤྲོ་བ་དྲི། སྤྲོ་ན་གསོལ་བ་དང་གཉིས་ཀྱི་ལས་ཀྱིས་བསྐོས་ལ་དེས་ཁྲིམས་སུ་བྱ་བ་བསྟན་པར་བརྗོད་ནས། ཚུལ་ཤིང་བླང་བའི་ཕྱིར་ལས་བྱེད་པས་གསོལ་བ་འབའ་ཞིག་པའི་ལས་ཀྱིས་ཐུགས་བསྟུན་ལ། བསྐོས་པས་ཚུལ་ཤིང་བྲིམ་ཞིང་བླང་པའི་གྲངས་གོ་བར་བྱ་བ་དང་། གནས་དང་གནས་མལ་སྟོབ་ཅིང་། གནས་མལ་ལ་ལོག་པར་མི་སྤྱད་པ་དང་སང་ནངས་པར་གནས་པར་ཁས་བླང་བ་དག་གོ་བར་བྱ་བ་རྣམས་སོ། །གཉིས་པ་དངོས་གཞི་ནི། ཚེས་བཅུ་དྲུག་གི་ནངས་པར་གནས་སྟེང་གཡོགས་དང་བཅས་པར་དགེ་སློང་གི་མདུན་དུ་སྔགས་ལན་གསུམ་བརྗོད་པས་ཁས་བླང་ངོ་། །དམིགས་བསལ་ཡུལ་མེད་ན་འདིར་གནས་པར་བྱའོ་སྙམ་དུ་དམ་བཅས་པས་ཀྱང་གནས་པའི་གོ་ཆོད་དེ། གནས་པར་ཁས་མ་བླངས་པས་གནས་མི་གཏོང་ན་གནས་པ་ཉིད་ཡིན་ནོ། །ཞེས་གསུངས་པའི་ཕྱིར། གཉིས་པ་དམ་ཚིག་བསྲུང་བ་ནི། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ། །ཞེས་པས་རྐྱེན་དབང་གིས་འདས་ཀྱང་ཉེས་པ་མེད་པའི་དམིགས་བསལ་གསུངས་པ་རྣམས་མ་གཏོགས་བྱིན་གྱིས་མ་བརླབས་པར། གང་དུ་གནས་པར་ཁས་བླངས་པའི་གནས་དེའི་ཉེ་འཁོར་གྱི་མཚམས་ལས་འདས་ནས་ཕྱི་རོལ་དུ་སྐྱ་རེངས་ཤར་ན་དབྱར་རལ་བའི་ཉེས་པ་འབྱུང་བས། གལ་ཏེ་འགྲོ་དགོས་ན་བྱིན་གྱིས་བརླབ་པར་བྱ་སྟེ། གནང་བ་མ་ཐོབ་པས་ཞག་གཅིག་ནས་བདུན་གྱི་བར་བརླབས་ནས་འགྲོ་བ་དང་། དགེ་འདུན་ལས་ཞག་བཞི་བཅུའི་གནང་བ་ཐོབ་ན། དེས་ཞག་བཞི་བཅུ་མན་ཆད་ཅི་རིགས་པར་བྱིན་གྱིས་བརླབས་ནས་འགྲོ་བར་བཤད་ཅིང་། བདུན་པའི་བྱིན་རླབས་ལན་དུ་མ་བཟླས་སུ་རུང་ཡང་ཐམས་ཅད་བསྡོམས་པ་ལ་ཞག་བཞི་བཅུ་ལས་ལྷག་པ་མི་རུང་ངོ་། །མཐའི་ཞག་དྲུག་ལ་བྱིན་རླབས་མི་ཆགས་སོ། །ཞེས་གསུངས་པའི་དོན་ལ་བྱ་འདུལ་ཆེན་པོ་ནི། དེའི་ཚེ་ཞག་བདུན་ཉིད་མི་ཆགས་པ་ཡིན་གྱི། ཞག་གཅིག་གཉིས་སོགས་ཀྱི་བྱིན་བརླབ་བྱར་རུང་བར་བཞེད་དོ། །

གསུམ་པ་དགག་དབྱེ་ནི། སྟོན་པ་མཉན་ཡོད་ན་བཞུགས་པའི་ཚེ་ལྗོངས་ཤིག་ཏུ་དགེ་སློང་རྣམས་མི་སྨྲ་བའི་ཁྲིམས་བྱས་ཏེ་དབྱར་གནས་པ་ལ་བརྟེན་ནས་མཐོང་ཐོས་དོགས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བྱེད་པར་གནང་ངོ་། །མཚན་ཉིད་ནི། གཞི་གསུམ་གྱི་ནང་ཚན་ཆོས་རྣམ་པར་དག་བྱེད་གང་ཞིག །དབྱར་ཚུལ་ལ་བརྟེན་ནས་བྱུང་བའི་དེ་མ་ཐག་གི་རིགས་གནས། དབྱེ་ན། དུས་དང་། དུས་མིན་གྱི་དགག་དབྱེའོ། །དང་པོ་ལ། སྦྱོར་དངོས་གཉིས་ལས། སྦྱོར་བ་ལའང་། རིང་སྦྱོར་དང་། ཉེ་སྦྱོར་རོ། །དང་པོ་ནི། ཞག་བདུན་ལ་སོགས་པའི་སྔ་རོལ་ནས་སྤྱོད་ཡུལ་དུ་གོ་བར་བྱ་ཞིང་འཁོན་རྣམས་སྦྱོང་བ་དང་། གཙུག་ལག་ཁང་བརྒྱན་པ་སོགས་ཚེས་བཅུ་གསུམ་ཡན་ཆད་ལ་ཚར་བ་བྱས་ནས་བཅུ་བཞིའི་མཚན་ཐོག་ཐག་ཆོས་རྣམ་པར་གཏན་ལ་དབབ་པར་བྱའོ། །གཉིས་པ་ནི། དབྱར་སྔ་མ་ཁས་བླངས་ན་སྟོན་འབྲིང་དབྱུག་ཟླ་དང་། ཕྱི་མ་ལ་སྟོན་ཟླ་ཐ་ཆུང་སྨིན་དྲུག་ཟླ་བ་གང་རུང་གི་ཚེས་བཅོ་ལྔའི་སྔ་དྲོ་དགེ་འདུན་ཐམས་ཅད་འདུས་ནས་ཕན་ཚུན་ཕྱག་བྱས་ལ་དབྱར་ནང་དུ་ཐུགས་དང་འགལ་བ་བཟོད་པར་གསོལ་ཞིང་། རྒྱུད་ཆགས་གསུམ་པ་ནས་དགེ་ཚུལ་གྱི་བཤགས་པའི་བར་གསོ་སྦྱོང་ལྟར་བྱས་ལ་དགེ་ཚུལ་རྣམས་ལོགས་སུ་བཀར་ཏེ། འདུ་བར་མ་ནུས་པའི་འདུན་པ་དང་དགག་དབྱེ་ལེན་དགོས་ན་བླངས་ཏེ་དགེ་འདུན་ལ་བརྗོད། ལྟུང་བ་ཐུན་མོང་མ་ཡིན་པ་རྣམས་གསོ་སྦྱོང་གི་སྐབས་ལྟར་ལས་གྲལ་ལ་མ་འདུས་གོང་དུ་ཕྱིར་བཅོས་བྱ་ཞིང་། འདིར་ལས་བྱེད་པས་ལྟུང་མཐུན་བྱིན་གྱིས་བརླབས་ནས། བསྐོ་བྱ་ལ་སྤྲོ་བ་དྲི། སྤྲོ་ན་གསོལ་བ་དང་གཉིས་ཀྱི་ལས་ཀྱིས་དགག་དབྱེ་བྱེད་པ་པོ་བསྐོས་ནས། དགག་དབྱེ་བྱ་བའི་ཕྱིར་གསོལ་བའི་ལས་ཀྱིས་ཐུགས་བསྟུན་པ་རྣམས་སོ། །གཉིས་པ་དངོས་གཞི་ནི། བསྐོས་པ་དེས་རྩྭ་དརྦྷ་བྲིམ་ཞིང་། དེ་ཡུལ་རྟེན་གཉིས་ཀས་བཟུང་ནས་སྔགས་ལན་གསུམ་མམ་གཅིག་གིས་ལྟུང་བའི་དགག་དབྱེ་བྱས་ཏེ། བསྐོས་པས་དགག་དབྱེ་ལེགས་པར་བྱས་པ་དགེ་འདུན་ལ་གོ་བར་བྱ་བ་དང་། རྫས་ཀྱི་དགག་དབྱེ་བྱ་བའོ། །དེའི་འོག་ཏུ་དགེ་ཚུལ་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་རྣམས་ཀྱི་དགག་དབྱེ་བྱེད་པར་གསུངས་སོ། །དེ་ལྟར་སྤྱིར་བཏང་ནས། དངོས་པོའི་དམིགས་བསལ་ནི། ལྟུང་བ་གླེང་བའི་ཚེ་གཞི་དང་གང་ཟག་གང་རུང་རེ་རེའམ་གཉིས་ཀ་བཞག་པའི་དགག་དབྱེ་བྱར་རུང་བར་བཤད་དོ། །གཉིས་པ་དུས་མིན་གྱི་དགག་དབྱེ་ནི། རྐྱེན་དབང་གིས་ཟླ་བ་གཅིག་གམ། ཕྱེད་དང་གཉིས་འདུས་པའི་ཉ་ཤི་གང་རུང་ལ་དགག་དབྱེ་བྱར་རུང་ཞིང་། གལ་ཏེ་གསོ་སྦྱོང་གཉིས་སོགས་མ་སོང་བ་དང་ཉ་སྟོང་མ་ཡིན་པའི་དུས་སུའང་དམག་འཁྲུག་ལ་སོགས་པའི་རྐྱེན་གྱིས་དགེ་འདུན་ཐམས་ཅད་འགྱེ་དགོས་ན་ཕན་ཚུན་གཅིག་གིས་གཅིག་ལ་ཚོགས་ཀྱིས་དགག་དབྱེ་བྱ་སྟེ། དགེ་སློང་གང་རུང་རྐྱེན་དབང་གིས་འགྲོ་དགོས་ནའང་འདི་བྱར་རུང་ངོ་། །དེ་དག་ནི་དུས་ཀྱི་དམིགས་བསལ་ལོ། །ཡང་གང་ཟག་གི་དམིགས་བསལ་ནི། དགེ་སློང་བཞི་ལས་མེད་ན་དགག་དབྱེ་བྱེད་པ་པོ་མི་བསྐོ་བར། གསོལ་བའི་ལས་དང་དགག་དབྱེ་དངོས་བྱ་ཞིང་། དགེ་སློང་གསུམ་མམ་གཉིས་ལས་མེད་ན་དགག་དབྱེ་བྱིན་གྱིས་བརླབ། རང་གཅིག་པུ་ལས་མེད་ན་དངོས་གཞི་ཙམ་ལན་གསུམ་བརྗོད་དོ། །གཞན་ཡང་དབྱར་བྱིན་གྱིས་བརླབས་ཏེ་སོང་བས་མཚམས་གཞན་དུ་དགག་དབྱེ་བྱེད་པ་དང་ཐུག་ན་དེ་དག་དང་ལྷན་ཅིག་དགག་དབྱེ་བྱས་ཀྱང་ཆགས་པར་བཤད་ཅིང་། དབྱར་དྲལ་བའམ་དེ་ཉིན་གློ་བུར་དུ་ལྷག་པའི་རབ་བྱུང་གཞན་གྱིས་ཀྱང་དགག་དབྱེ་བྱ་དགོས་སོ། །

གཉིས་པ་བདེ་བར་གནས་པའི་རྐྱེན་གྱི་གཞི་ནི། གོས་ཀྱི་གཞི། ཀོ་ལྤགས་གནས་མལ་སྨན་སོགས་གཞན་དུ་ཤེས། །ཞེས་པ་སྟེ། འདི་ལ་གསུམ། གོས་དང་། སྨན་དང་། གནས་མལ་བསྟེན་པའོ། །དང་པོ་ལ། བག་ཡངས་དང་འབྲེལ་བ་སྲ་བརྐྱང་། འཚོ་བའི་ཡོ་བྱད་དང་འབྲེལ་བ་གོས། དམིགས་བསལ་དང་འབྲེལ་བ་ཀོ་ལྤགས་ཀྱི་གཞིའོ། །དང་པོ་ནི། སྟོན་པ་མཉན་ཡོད་ན་བཞུགས་པའི་ཚེ་གནས་བཅས་སུ་དབྱར་གནས་པ་འཐོན་ནས་ཕྱག་འཚལ་དུ་འོང་པའི་དགེ་སློང་རྣམས་ཚེགས་ཆེན་པོས་ངལ་བར་གྱུར་པ་ལ་བརྟེན་ནས་གནང་བའོ། །དེ་ལ་ཀ་ཐི་ན་ཞེས་པ་གཏན་པའམ་སྲ་རྐྱང་སྟེ། དངོས་མིང་ཆོས་གོས་དྲས་དྲུབ་བྱེད་པའི་ཚེ་འདིང་བའི་གཞི་པང་ལེབ་ཀྱི་མིང་ཡིན་ལ། དེ་འདིར་དགེ་འདུན་སྤྱི་༼ལ༽དབང་བའི་ཆོས་གོས་སུམ་ཕྲུག་ལ་འདྲ་བ་རྒྱུ་མཚན་དུ་བྱས་ནས་བཏགས་པ་སྟེ། ཇི་ལྟར་འདྲ་ན། གཏན་པས་ཆོས་གོས་ལ་ཁྱབ་པས་དང་། འཁུམས་པ་བརྐྱང་བ་དང་། དེའི་སྟེང་དུ་ཆོས་གོས་ཀྱི་དངོས་པོ་གཅིག་ཏུ་འགྱུར་བ་ལྟར། འདིས་ཀྱང་འདིང་བ་པོ་ཐམས་ཅད་ལ་ཁྱབ་ཅིང་། གནང་བ་བག་ཡངས་དང་འབྲེལ་པས་བག་རྐྱོང་པ་དང་། འདིང་བ་པོ་རྣམས་བློ་གཅིག་ཏུ་མཐུན་པར་བྱེད་པས་སོ། །ཅིའི་ཕྱིར་འདིང་ཞེ་ན། སྲ་བརྐྱང་བཏིང་ཆགས་ཀྱི་དགེ་སློང་གིས་ཕན་ཡོན་རྣམ་པ་བཅུ་ཐོབ་པའི་ཕྱིར་ཏེ། འཆང་འབྲལ་འཇོག་གསུམ། ཡང་ཡང་དང་། འདུས་ཟ། མ་སྨྲས་པར་འགྲོ་བ། གོས་སློང་པའི་ཉེས་པ་རྣམས་ཁེགས་ཤིང་། འདིང་བ་ལ་གཏོགས་པའི་དགེ་སློང་ཡུལ་གང་ན་འདུག་ཀྱང་རྙེད་པ་ཐུན་མོང་དུ་དབང་བ་དང་། རུང་བ་མ་བྱས་པའི་གོས་འཆང་དུ་རུང་བ་དང་། སྣམ་སྦྱར་མེད་པར་ལྗོངས་རྒྱུར་རུང་བ་རྣམས་སོ། །འདིང་བའི་ཚུལ་ལ་ལྔ་ལས། གང་དུ་འདིང་བའི་གནས་ནི། དབྱར་ཁས་བླངས་པའི་གནས་དེའི་འདིང་ཁར་མཚམས་གཅིག་ཏུ་བྱས་པར་ཡང་རུང་ངོ་། །གང་གི་ཚེ་འདིང་བའི་དུས་ནི། སྨིན་དྲུག་ནས་ནི་ཁྲ་ཡི་བར། །སྲ་བརྐྱང་འདིང་བ་རྗེས་སུ་གནང་། །ཞེས་པས་དགག་དབྱེ་འཐོན་པའི་ཕྱི་དེ་ནས་སྤྱིར་བཏང་ལ་ཡུན་ཟླ་བ་ལྔའོ། །གང་གིས་འདིང་བའི་གང་ཟག་ནི། དབྱར་སྔ་མ་ཁས་བླངས་ཤིང་མ་རལ་བའི་དགེ་སློང་རྣམ་དག་གིས་སོ། །གང་འདིང་བའི་དངོས་པོ་ནི། དབྱར་རྙེད་ཀྱི་རྒྱུ་ལས་བྱུང་ཞིང་དགེ་འདུན་དབང་བའི་ཆོས་གོས་སུམ་ཕྲུགས་གཅིག་ཡན་ཆད་དུ་ཚང་བའོ། །ཇི་ལྟར་འདིང་བའི་ཆོ་ག་ལ་སྦྱོར་དངོས་རྗེས་གསུམ་ལས། དང་པོ་ནི། དགེ་སློང་རྣམས་རང་རང་གི་ཆོས་གོས་ཀྱི་བྱིན་རླབས་ཕྱུང་སྟེ། གདིང་རྒྱུའི་ཆོས་གོས་དབྱར་ནང་གི་ཉི་མ་གང་ལ་གྲུབ་པ་དེ་ནས་ཞག་མ་ལོན་པར་དགེ་སློང་ཐམས་ཅད་མཚམས་ནང་དུ་ཚོགས་པས་དེ་དེར་གདིང་ངོ་ཞེས་མོས་པར་བྱས་ལ། གསོལ་བ་དང་གཉིས་ཀྱི་ལས་ཀྱིས་བློ་བསྟུན་ཏེ། འདིང་བ་པོ་བསྐོས་ཏེ། གསོལ་བ་བྱས་ནས་དེ་ལ་གཏད། དེས་ཀྱང་སེམས་གསུམ་བསྐྱེད་ནས་དགེ་འདུན་ལ་སང་གདིང་བར་འགྱུར་གྱི་ཞེས་བརྗོད། གལ་ཏེ་ཆོས་གོས་ཏེ་སྔར་མ་ཟིན་ན་བསྐོས་པས་བཀྲུ་བ་ཁ་བསྒྱུར་བ་དྲུབ་པ་སོགས་སྔོན་དུ་བཏང་ནས། གཉིས་པ་ནི། སྟོན་ཟླ་འབྲིང་པོའི་ཚེས་བཅུ་དྲུག་གི་ནངས་པར་དགེ་འདུན་བསྡུས་ལ། བསྐོས་པས་སྲ་བརྐྱང་འདིང་བའི་སྔགས་ལན་གསུམ་བརྗོད། དེ་ནས་སྲ་བརྐྱང་ཐོགས་ཏེ་རྒན་རིམ་བཞིན་དགེ་སློང་རེ་རེའི་མདུན་དུ་འདུག་ནས་བཏིང་ངོ་ཞེས་གོ་བར་བྱ། གསུམ་པ་ནི། དེ་ལྟར་བརྗོད་པ་ལ་དགེ་འདུན་གྱིས་ལེགས་པར་གདིང་ངོ་ཞེས་སོགས་རྗེས་སུ་ཡི་རང་བར་བྱའོ། །དེ་ལྟར་བཏང་ནས་དུས་དུས་སུ་གསེང་བ་སོགས་དང་། བསྐོས་པ་དེས་ཞག་གིས་ཆོད་པར་མི་འབྲལ་ཞིང་གཞན་དུ་མི་ཁྱེར། བསྲུང་བ་པོ་མེད་པར་མི་འཇོག་པ་སོགས་ཀྱིས་བསྐྱང་ཞིང་། དབྱུང་བ་ལ་གཉིས་ལས། རང་འཇུག་བྲལ་ནི། སྲ་བརྐྱང་གིས་མཚམས་གཞན་དུ་ཕྱིན་པ་དང་། བསྐོས་པའི་དགེ་སློང་མཚམས་གཞན་དུ་སྐྱ་རེངས་ཤར་བ་དང་། མཚམས་དེར་གཏོགས་ཐམས་ཅད་མཚམས་ཁོངས་སུ་མི་གཏོགས་པར་ཆད་པ་ལ་སོགས་པའོ། །བཅོས་མོས་དབྱུང་བ་ནི། ཆོ་གས་དབྱུང་བ་སྟེ། དེ་ལའང་དབོ་ཟླའི་ཉ་ལ་དབྱུང་བ་དུས་ཅན་དང་། རྐྱེན་དབང་གིས་དེའི་སྔ་རོལ་དུས་མིན་དུ་དབྱུང་བ་གཉིས་སོ། །

གཉིས་པ་གོས་ཀྱི་གཞི་ནི། སྟོན་པས་དབྱར་རྙེད་ཀྱི་རས་རྣམས་དྲས་ནས་ཁ་དོག་ངན་པར་བྱས་ཏེ་བཅངས་བར་གནང་བ་ལས། གཟུགས་ཅན་སྙིང་པོས་འཚོ་བ་པོ་མཐོང་བ་ཉན་ཐོས་སུ་འཁྲུལ་ནས་མཚན་མ་གདབ་པར་ཞུས་པས་དྲས་ཤིང་དྲུབ་པའི་གོས་རྗེས་སུ་གནང་ངོ་། །འདི་ལ་ལྔ་སྟེ། རྒྱུའི་ཁྱད་པར་གོས་སྒྲུབ་ལུགས། གོས་ཀྱི་དབྱེ་བ། དབྱེ་བ་སོ་སོའི་རྣམ་བཞག །ཇི་ལྟར་བཅང་བའི་ཚུལ་ལོ། །དང་པོ་ནི། ལོག་འཚོས་མ་བསྒྲུབས་ཤིང་རྒྱུ་ཧ་ཅང་ངན་པ་དང་བཟང་བ་མ་ཡིན་པའི་རྒྱུར་རུང་བ་བདུན་ཏེ། ས་གའི་ལྷས། བལ་གོས་ཤ་ན་ཉི་འོག་དང་། །རས་གོས་དང་ནི་ཟར་མ་དང་། །ཀོ་ཏཾ་པ་དང་དཱུ་ཀུ་ལ། །ཆོས་གོས་རྒྱུ་ནི་རྣམ་པ་བདུན། །ཞེས་གསུངས་ཤིང་། དེ་ཡང་སྤུ་ཤིན་ཏུ་ཆེ་བ་དང་ཁ་ཚར་ཕུན་ཚར་མ་བཅད་པ་སོགས་མ་ཡིན་པའོ། །གཉིས་པ་སྒྲུབ་ལུགས་ནི། རྒྱུ་རུང་བ་ཉིད་ལེགས་པར་བཀྲུས་ལ། མི་རུང་བའི་ཚོན་ཆེན་བརྒྱད་སྤངས་ཏེ་རུང་བའི་ཚོན་གསུམ་གྱིས་ཁ་བསྒྱུར་བར་བྱའོ། །དེ་ལྟར་ཡང་རྒྱ་སྐྱེགས་ལེ་བརྒན་རྩི་དང་བཙོད། །སྨན་ཤིང་རྩི་དང་མཐིང་ཤིང་མཚལ། །སིནྡྷུ་ར་དང་གུརྒུཾ་སྟེ། །འདི་དག་ཚོན་ཆེན་བརྒྱད་དུ་འདོད། །ཅེས་དང་། སྔོན་པོ་བཙག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཞེས་སོ། །དེ་ལ་སྤྱིར་བཏང་དུ་གོས་མཚོན་གྱིས་དྲས་པ་ཞིག་དགོས་ཏེ། མཚོན་གྱིས་མ་དྲས་པའི་གོས་བཅང་བར་མི་བྱའོ། །ཞེས་པས་གྲིས་དྲས་ནས། དྲུབ་པར་འོས་པ་རྣམས་དྲུབ་པར་བྱ་སྟེ། དྲས་ཤིང་དྲུབ་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ། །མཐང་གོས་དང་བླ་གོས་དང་སྣམ་སྦྱར་ལའོ། །དགེ་སློང་མས་ཤིང་ང་དཔུང་ཆད་དང་རྔུལ་གཟན་སྣམ་པ་གང་ཡང་རུང་བའོ། །ཞེས་པས་འབྱོར་ན་དེ་ཐམས་ཅད་དྲས་དྲུབ་དང་། མ་འབྱོར་ན་ལྷན་ཐབས་བྱ་ཞིང་། སྣམ་སྦྱར་མ་གཏོགས་པ་ལ་ཐང་ཐང་པོ་ཡང་རུང་བར་བཤད་དོ། །གང་དག་སྣམ་སྦྱར་ལ་ངེས་པར་དྲས་དྲུབ་དགོས་གསུངས་པ་མི་རིགས་ཏེ། རྒྱུའི་བྱིན་རླབས་ཀྱི་སྔགས་ཆོག་ཏུ། ཡང་ན་འདི་ལ་ལྷན་ཐབས་སུ་བསླན་ནོ། །ཞེས་དང་། རྒྱ་ཆེར་འགྲེེལ་དུ། ཆོས་གོས་རླག་པ་ཉིད་དང་། ཆོས་གོས་འཚིག་པ་ཉིད་ལ་སོགས་པའི་རྐྱེན་དེ་ལྟ་བུ་དག་ཡོད་ན་སྣམ་སྦྱར་ལའང་དྲས་ཤིང་དྲུབ་པ་ཆོས་གོས་ཉིད་དུ་བྱིན་གྱིས་བརླབ་བོ་ཞེས་བྱ་བའི་ངེས་པ་མེད་དོ། །ཞེས་གསུངས་པའི་ཕྱིར། དྲས་དྲུབ་བྱ་ཚུལ་ནི། སྣམ་ཕྲན་སྣྲེལ་གཞི་ཉིད་དང་ལྷག་མ་མཉམ་པ་ཉིད་དང་དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བ་ཉིད་དང་མཐའ་བསྐོར་བ་ཉིད་དག་གིས་སོ། །ཞེས་སོ། །འདི་ལ་གླེགས་བུའི་འཕྲོ་ཞེས་པ་འགྱུར་སྐྱོན་ཏེ། འགྲེལ་པ་ཁ་ཅིག་ཏུ་ཚལ་བུའི་འཕྲོ་ཞེས་འབྱུང་བ་དག་གོ །ཞེས་རྣམ་བཤད་དྲི་མེད་རྒྱན་པ་བཞེད་དོ། །གསུམ་པ་དབྱེ་བ་ལ་གསུམ་སྟེ། འཚོ་བའི། ལྷག་པའི། མཁོ་བའི་ཡོ་བྱད་ཀྱི་གོས་རྣམས་སོ། །བཞི་པ་སོ་སོའི་རྣམ་བཞག་ལ་གསུམ་ལས། དང་པོ་འཚོ་བའི་ཡོ་བྱད་ཀྱི་གོས་ལ། མཚན་ཉིད། དབྱེ་བ། སོ་སོའི་རང་བཞིན། བྱིན་གྱིས་བརླབ་ཚུལ་ལོ། །དང་པོ་ནི། བཅས་ལྡན་དགེ་སློང་གི་ལས་འཚོ་བའི་ཆེད་དུ་གནང་བའི་གོས་རུང་བ་ཚད་ལྡན་རེ་རེར་ངེས་པ་གང་ཞིག །རང་མིང་གིས་བྱིན་གྱིས་བརླབ་རུང་གི་རིགས་གནས། གཉིས་པ་ལ། དངོས་སུ་གྲུབ་པ་དང་། དེའི་བྱིན་རླབས་ཆགས་རུང་གཉིས། དང་པོ་ནི། ཡོ་བྱད་བཅུ་གསུམ་པོ་གང་རུང་ཚད་དང་ལྡན་པར་གྲུབ་པ་སྟེ། སྣམ་སྦྱར། བླ་གོས། མཐང་གོས། ཤམ་ཐབས། ཤམ་ཐབས་ཀྱི་གཟན། རྔུལ་གཟན། རྔུལ་གཟན་གྱི་གཟན། གདོང་བྱས། རྣག་གཟན། གཡན་དགབ། སྐྲ་བཟེད། གདིང་བ། དབྱར་གྱི་གོས་རས་ཆེན་རྣམས་སོ། །གཉིས་པ་ནི། རྒྱུའི་བྱིན་བརླབ་འབྲལ་སྤང་ཁེགས་པའི་སྔགས་རྟེན། ཆོས་གོས་གསུམ་གང་རུང་གི་རྒྱུར་རུང་བའི་གོས་དང་། ཁྱིམ་པའི་གོས་ལྟ་བུ་གང་རུང་ཁྲུ་གང་ཡན་ཆད་དོ། །གསུམ་པ་སོ་སོའི་རང་བཞིན་ལ། སྣམ་སྦྱར་ནི་སྣམ་ཕྲན་དགུ་ནས་ཉེར་ལྔའི་བར་ཏེ། དགུ་མ། བཅུ་གཅིག །བཅུ་གསུམ་མ་གསུམ་ནི་གླེགས་བུ་ཕྱེད་དང་གསུམ་པའོ། །བཅོ་ལྔ། བཅུ་བདུན། བཅུ་དགུ་གསུམ་ནི་གླེགས་བུ་ཕྱེད་དང་བཞི་པའོ། །ཉེར་གཅིག །ཉེར་གསུམ། ཉེར་ལྔ་གསུམ་ནི་གླེགས་བུ་ཕྱེད་དང་ལྔ་པའོ། །ཚད་ནི་ཆེ་སྐོར་གསུམ་དཔངས་སུ་ཁྲུ་གསུམ་དང་སྲིད་དུ་ཁྲུ་ལྔ། ཆུང་གསུམ་དེ་ལས་ཁྲུ་ཕྱེད་ཕྱེད་ཕྲི་བ། འབྲིང་གསུམ་དེ་གཉིས་ཀྱི་བར་རོ། །བླ་གོས་ནི་སྣམ་ཕྲན་བདུན་དང་གླེགས་བུ་ཕྱེད་དང་གསུམ་པ། ཚད་སྣམ་སྦྱར་ལྟར་གསུམ་མོ། །མཐང་གོས་ནི་རྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ། ཚད་དཔངས་སུ་ཁྲུ་དོ་དང་། སྲིད་དུ་ཁྲུ་ལྔའམ་བཞི། ཐ་ན་འཁོར་གསུམ་ཁེབས་པས་ཀྱང་རུང་ཞིང་། ལུས་སྦོམ་པས་མི་ཡོགས་ན་རལ་ཁ་དཔུང་ཆད་སྣོན་པར་བཤད་དོ། །སྤྱིར་ཁྲུ་ལ་རྡུལ་ཁྲུ། ལག་ཁྲུ། ལུས་ཁྲུ་གསུམ་ལས། འདིར་ལུས་ཁྲུ་སྟེ། མདོ་རྩར་ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ། །ཞེས་གསུངས་པའི་ཕྱིར། ཤམ་ཐབས་དང་དེའི་གཟན་མཐང་གོས་དང་ཚད་འདྲ་ཞིང་། རྔུལ་གཟན་དང་དེའི་གཟན་བླ་གོས་དང་ཚད་འདྲ་སྟེ། དེ་དང་དེ་ཉིན་མོ་དང་མཚན་མོ་མཐང་གོས་དང་བླ་གོས་ཀྱི་འོག་ཏུ་གྱོན་པའི་གོས་ཡིན་པའི་ཕྱིར། གདོང་ཕྱིས་སྲིད་དང་ཞེང་དུ་ཁྲུ་གང་བ་རྣག་གཟན་བླ་གོས་དང་མཉམ་པ། སྐྲ་བཟེད་སྲིད་དུ་ཁྲུ་གསུམ་དང་ཞེང་དུ་ཁྲུ་ཕྱེད་དང་གཉིས་པ། གཡན་དགབ། གདིང་བ། རས་ཆེན་གསུམ་གྱི་ཚད་ནི་ལྟུང་བྱེད་ཀྱི་སྐབས་སུ་བཤད་ཟིན་མོད། འོན་ཀྱང་གདིང་བའི་འཇལ་བྱེད་རྡུལ་ཁྲུ་ཡིན་ཞེས་གཉག་དབོན་རིན་པོ་ཆེས་གསུངས་ཤིང་། དབྱིབས་ནི་གླེགས་བུ་ཕྱེད་དང་གཉིས་པའོ། །བཞི་པ་ནི། འཚོ་བའི་ཡོ་བྱད་རྣམས་སོ་སོ་རང་མིང་གིས་ངེས་པར་བྱིན་གྱིས་བརླབ་ཅིང་། ཁྱད་པར་ཆོས་གོས་གསུམ་ནི་དངོས་མེད་ན་རྒྱུའི་བྱིན་རླབས་དང་། དངོས་སམ་རྒྱུའི་བྱིན་རླབས་གང་རུང་མི་ཆགས་ན་རྐྱེན་དབང་གིས་བྱིན་གྱིས་བརླབ་པར་བྱའོ། །དེ་ལྟར་བྱིན་གྱིས་བརླབས་པའི་དགོས་པ་ནི། དངོས་སུ་འཆང་འབྲལ་གྱི་ཉེས་པ་ཁེགས་ཤིང་ཤན་མི་འབྱུང་བ་སོགས་དང་། བརྒྱུད་ནས་དངོས་ཞེན་དང་བྲལ་བའི་ཕན་ཡོན་འབྱུང་སྟེ། འོག་མ་གཉིས་ལའང་ཤེས་པར་བྱའོ། །གཉིས་པ་ལྷག་པའི་ཡོ་བྱད་ཀྱི་གོས་ལ་གསུམ་ལས། མཚན་ཉིད་ནི། དགེ་སློང་གི་འཚོ་མཁོ་གང་རུང་གི་ཡོ་བྱད་དུ་གྱུར་པའི་གོས་ལྷག་པོ་གང་ཞིག །གཞན་མིང་ཉིད་ཀྱིས་བརླབ་པའམ་ཡིད་བརྟན་ཏེ་བཅང་རུང་གི་རིགས་གནས། དབྱེ་ན། སྣམ་སྦྱར་གཉིས་པ་ལྟ་བུ་འཚོ་བའི་ཡོ་བྱད་གང་རུང་གི་དབྱིབས་སུ་གྲུབ་པའི་ལྷག་པོ་དང་། སྐ་རགས་གཉིས་པ་ལྟ་བུ་མཁོ་བའི་ཡོ་བྱད་ཀྱི་གོས་ལྷག་པོ་དག་གོ །བྱིན་གྱིས་བརླབ་པ་ནི། གཞན་ཁོ་ནའི་མིང་གིས་བརླབ་པའམ། ཡོ་བྱད་རུང་བ་ནི་མཁན་པོ་སོགས་དང་མི་རུང་བ་ནི་སྦྱིན་བདག་ལ་ཡིད་བརྟན་ཏེ་བཅིང་བའོ། །གསུམ་པ་མཁོ་བའི་ཡོ་བྱད་ཀྱི་གོས་ལའང་གསུམ་ལས། མཚན་ཉིད་ནི། འཚོ་བའི་ཡོ་བྱད་གང་རུང་གི་དབྱིབས་སུ་མ་གྲུབ་པའི་གོས་ཀྱི་ཁྱད་པར་ཁྲུ་གང་ཡན་ཆད་མ་ངེས་པ་གང་ཞིག །རང་གཞན་གཉིས་ཀའི་མིང་གིས་བརླབས་ཏེ་བཅང་རུང་གི་རིགས་གནས། དབྱེ་ན། དར་གོས་སྣམ་བུ་ལྟ་བུ་ནོར་གྱི་འདུ་ཤེས་སྐྱེ་བ་དང་། ཞྭ་དང་སྐ་རགས་སོགས་གོས་ཀྱི་འདུ་ཤེས་སྐྱེ་བའི་ཡོ་བྱད་དག་གོ །བྱིན་གྱིས་བརླབ་པ་ནི། བདག་དང་ཚངས་པ་མཚུངས་པར་སྤྱོད་པ་གཉིས་ཀའི་དོན་དུ་བྱིན་གྱིས་བརླབས་པའོ། །ལྔ་པ་བཅང་ཚུལ་ལ་བཞི་ལས། གང་གིས་ན། སྤྱིར་རབ་བྱུང་ཚུལ་ལྡན་གྱིས་བཅང་ཞིང་། ཁྱད་པར་སྣམ་སྦྱར་ནི་དགེ་སློང་གིས་བཅང་ངོ་། །བསམ་པ་ཇི་ལྟ་བུས་ན། ལུས་ལ་རྨ་དང་གོས་ལ་རྨ་དཀྲིས་ཀྱིས་དགབ་པ་སོགས་ཀྱི་འདུ་ཤེས་དང་། སྤྱིར་ཡོ་བྱད་ཐམས་ཅད་ལ་མི་རྟག་པས་ཉེན་པའི་བསམ་པས་བཅང་ངོ་། །གང་གི་ཕྱིར་ན། སྤྱིར་ཁྱིམ་པའམ་མུ་སྟེགས་ཅན་དང་། ཁྱད་པར་སྣམ་སྦྱར་ནི་དགེ་ཚུལ་མན་ཆད་ཀྱི་རྟགས་ལས་འཕགས་པར་བྱ་བའི་ཕྱིར་དང་། རང་ཉིད་སྟོན་པའི་རྣམ་ཐར་གྱི་རྗེས་སུ་འཇུག་ཅིང་དགེ་སྦྱོང་གི་དྲན་པ་གསོ་བའི་ཆེད་དུ་བཅང་བའོ། །མཇུག་ཏུ་ཇི་ལྟར་སྒྲུབ་པ་ནི། གོས་རྙིང་ན་ལྷན་པ་གདབ་པ་སོགས་ཀྱིས་བཅོས་ཤིང་། བཅོས་སུ་མི་རུང་ན་སྦྱིན་བདག་གི་བསོད་ནམས་སྤེལ་བ་ལ་སོགས་པའི་ཆེད་དུ་ས་དང་ལྕི་བ་སོགས་ལ་བསྲེས་ནས་མཆོད་རྟེན་དང་གཙུག་ལག་ཁང་གི་སེར་ཁ་ལ་བསླན་པར་བཤད་དོ། །

གསུམ་པ་ཀོ་ལྤགས་ཀྱི་གཞི་ནི། ཀཱ་ཏྱ་ནའི་སློབ་མ་གྲོ་ཞུན་སྐྱེས་བྱེ་བ་ནི་ཉི་ཤུ་པས་མཐའ་འཁོབ་རྡོ་ཅན་ནས་སྟོན་པ་བལྟར་འོངས་ཏེ་ཞེས་པས་གནང་ངོ་། །དེ་ཡང་གནང་བཀག་གི་མཚམས་ཤེས་པའི་ཕྱིར་དབུས་མཐའི་ས་ཚིགས་ནི། སྔར་རབ་བྱུང་གི་གཞིར་བཤད་པ་བཞིན་ནོ། །སྤྱིར་ཡུལ་དབུས་སུ་གནས་མལ་སྐྱོབ་པའི་ཕྱིར་ཀོ་ལྤགས་ཀྱི་ལྷྭམ་ཙམ་དང་། གཙུག་ལག་ཁང་ལས་གཞན་པའི་ཁྱིམ་དུ་སྟན་གཞན་མེད་ན་ཀོ་ལྤགས་ལ་འདུག་པ་ཙམ་གནང་གིཉལ་བར་མ་གནང་ལ། མཐའ་འཁོབ་ཏུ་ནི་གྲང་བ་སྐྱོབ་པའི་ཕྱིར་གནང་བས་ལྷྭམ་དང་མལ་སྟན་གཉིས་ཀ་བསྟེན་དུ་རུང་ཞིང་། དེའི་ཁྱད་པར་ཁྲ་བོ་དང་གསེར་དངུལ་གྱི་རྒྱན་ཅན་སོགས་སྒེག་རྫས་དང་སྒྲ་སྒྲོག་པའི་འཆིལ་ལྷྭམ་བསྟེན་དུ་མི་རུང་། གླང་པོ་ཆེ་དང་སྟག་སེང་རྟ་བོང་སོགས་ཀྱི་ཀོ་ལྤགས་བཅང་དུ་མི་རུང་བའོ། །བྱེ་བྲག་ཡུལ་ཨསྨྲ་པ་རཱནྟར་ནི་ཀོ་ལྤགས་ཀྱི་གོས་ཅི་དགར་བསྟེན་པ་སྒྲུབ་པའི་བསླབ་བྱར་གསུངས་ལ། སྤྱིར་ཆུ་ལ་ཆབ་རོམ་ཙམ་ཆགས་པའི་ཡུལ་དུ་ཞྭ་དང་ལྷྭམ་ཡུ་ཅན་གཉིས་ཀ་གནང་བའི་བསླབ་བྱར་གསུངས་སོ། །

གཉིས་པ་སྨན་གྱི་གཞི་ནི། སྟོན་པ་གཉན་ཡོད་ན་བཞུགས་པའི་ཚེ་དགེ་སློང་རྣམས་སྟོན་ཀའི་ནད་ཀྱིས་ཐེབས་ནས་རིད་པས་སྨན་བསྟེན་པར་གནང་ཞིང་། དེ་ཡང་དུས་མ་ཡིན་པར་མ་ཟོས་པས་རིད་པ་ན་སྨན་བཞིར་ཕྱེ་ནས་རྗེས་སུ་གནང་ངོ་། །འདི་ལ་བཞི་སྟེ། སྨན་གྱི་རྒྱུ། སྨན་དངོས། གང་ཟག་གང་གིས་སྤྱོད་པ། བཞག་པའི་གནས་རུང་ཁང་བསྟེན་ཚུལ་ལོ། །དང་པོ་ནི། ལོག་འཚོ་དང་བྲལ་ཞིང་མཐའ་གཉིས་སྤངས་པའི་སྒོ་ནས་བསྒྲུབ་པར་བྱའོ། །གཉིས་པ་ལ། མཚན་ཉིད། དབྱེ་བ། སྒྲ་དོན། བསྟེན་ཚུལ་ལོ། །དང་པོ་ནི། བཅས་ལྡན་དགེ་སློང་གིས་བསྟེན་དུ་རུང་བའི་སྨན་གང་ཞིག །དྲི་རོ་རེག་བྱ་གསུམ་གྱི་བདག་ཉིད་དུ་གྱུར་པའི་ཁམ་ཟས་ཏེ། མཛོད་ལས། ཁམ་གྱི་ཟས་ནི་འདོད་པ་ན། །སྐྱེ་མཆེད་གསུམ་གྱི་བདག་ཉིད་དོ། །ཞེས་སོ། །གཉིས་པ་ལ། དུས་རུང་། ཐུན་ཚོད་དུ་རུང་བ། ཞག་བདུན་པ། འཚོ་བའི་བར་དུ་བཅང་བའོ། །དང་པོ་དུས་རུང་ལ། མཚན་ཉིད་དང་། དབྱེ་བའོ། །དང་པོ་ནི། བཀྲེས་པའི་ནད་སེལ་བ་ལ་གཙོ་བོར་གནང་བའི་སྨན་གང་ཞིག །དགེ་སློང་གིས་སྤྱིར་བཏང་ལ་ཕྱི་དྲོ་ལོངས་སྤྱོད་དུ་མི་རུང་བའོ། །གཉིས་པ་ལ། བཟའ་བ་ལྔ་དང་། བཅའ་བ་ལྔའོ། །དང་པོ་ནི། ས་གའི་ལྷས། སྣ་ཚོགས་འབྲས་ཆན་ཟན་དང་ཤ །ཕྱེ་དང་ཁུར་བ་བཟའ་བ་ལྔ། །ཞེས་སོ། །གཉིས་པ་ནི། རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །ཞེས་སོ། །གཉིས་པ་ཐུན་ཚོད་དུ་རུང་བ་ལ། མཚན་ཉིད། ངོ་བོ། དབྱེ་བའོ། །དང་པོ་ནི། སྐོམ་པའི་ནད་སེལ་བ་ལ་གཙོ་བོར་གནང་བའི་སྨན་གང་ཞིག །དགེ་སློང་གིས་ཐུན་ཚོད་ཀྱི་མཐའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བའོ། །གཉིས་པ་ནི། དྲང་སྲོང་ཀེ་ནའི་བུས་བཏུང་བའི་རྒྱུ་བརྒྱད་ཕུལ་ཏེ། སྨན་གྱི་གཞི་ལས། ཆུ་ཤིང་འབྲས་དང་ཀུ་ཤུ་གོ་ལ་དང་། །ཨ་ཤྭཏྠ་དང་ཨུདུམྦ་ར་དང་། །པ་རུ་ཤ་ཀ་དང་ནི་རྒུན་འབྲུམ་དང་། །བརྒྱད་པ་འབྲ་གོ་དག་ནི་ཡིན་པར་བཤད། །ཅེས་དང་། གཞན་ཡང་བཅོས་པའི་ཚྭ་སྟེ་རྒུན་ཆང་སོགས་ཀྱི་སངས་པོ། །འབྲུའི་ཚྭ་སྟེ་ནས་ཆང་གྲོ་ཆང་སོགས་ཀྱི་ཤུལ་ནས་བྱུང་བའི་སངས་པོ། ཞོ་ཁ་ཆུ་སྟེ་ཞོའི་ཁུ་བ་དར་བའི་དྭངས་མ་སྟེ་ཆུར་ཁུ། རྩབ་མོ་སྟེ་འབྲས་དང་ཁྲེ་སོགས་བཙོས་ནས་ཕབས་མ་བཏབ་པར་མནན་པའི་ཙད་ཤུ་ཞེས་བོད་དུ་རྩབས་སུ་གྲགས་པ། དེ་དག་ཀྱང་བཏུང་བ་མཚན་ཉིད་ལྔ་ལྡན་ཏེ། ཆུས་བཏབ་པ། ཚགས་ཀྱིས་བཙགས་པ། ཤིན་ཏུ་སླ་བ། གཞིན་སྣང་བ། འདམ་བུ་ཉག་མའི་མདོག་ལྟ་བུའི་བཏུང་བ་རྣམས་སོ། །གསུམ་པ་ལ། རྒྱུ་དུས་རུང་དང་། ཞག་བདུན་པ་དང་། འཚོ་བཅངས་ལས་སྦྱར་བའི་ཐུན་ཚོད་དུ་རུང་བའི་སྨན་གསུམ་སྟེ། རིམ་བཞིན་རྒུན་ཆུ་དང་། བུར་ཁུ་དང་། སྐྱུ་རུ་རའི་ཁུ་བ་ཤིན་ཏུ་སླ་བ་ལྟ་བུའོ། །གསུམ་པ་ཞག་བདུན་པ་ལ་མཚན་ཉིད་དང་། དབྱེ་བའོ། །དང་པོ་ནི། རླུང་ནད་སེལ་བ་ལ་གཙོ་བོར་གནང་བའི་སྨན་གང་ཞིག །དགེ་སློང་གིས་ཞག་བདུན་པའི་མཐའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བའོ། །གཉིས་པ་ནི། ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་སྟེ། དེས་འཕངས་པ་བུ་རམ་དང་། བུ་རམ་གྱི་ཁ་ཤུན་བསྡུས་པའི་ཕྱེ་མ་ཧྭགས་དང་། དེ་བརྡོག་པོར་བྱས་པ་ལི་ཁར་སོགས་དང་། ཞུན་མར་དང་ངོ་བོ་འདྲ་བ་བདུད་རྩི་དང་། འབྲུ་མར་དང་འདྲ་བ་ཉ་སོགས་སེམས་ཅན་ལྔའི་ཞག་བསྐོལ་ཞིང་བཙགས་པ་རྣམས་དང་། ས་གའི་ལྷས་མར་གསར་ཡང་ཞག་བདུན་པར་བཤད་པ། ལུང་སྨན་གྱི་གཞི་ལས་ཞག་བདུན་པ་ནི་མར་དཀར་དང་། ཏིལ་མར་དང་། སྦྲང་རྩིའོ། །ཞེས་གསུངས་པ་དང་མཐུན་ནོ། །བཞི་པ་འཚོ་བཅངས་ལ། མཚན་ཉིད་དང་། དབྱེ་བའོ། །དང་པོ་ནི། འདུས་པའི་ནད་སེལ་བ་ལ། གཙོ་བོར་གནང་བའི་སྨན་གང་ཞིག །ཇི་སྲིད་ནད་དེ་འཚོའི་བར་བྱིན་གྱིས་བརླབས་ནས་ལོངས་སྤྱད་དུ་རུང་བའོ། །གཉིས་པ་ལ་ལྔ་སྟེ། རྩ་བའི་སྨན་གླ་སྒང་དང་ཡུང་བ་ལྟ་བུ། སྡོང་བུའི་སྨན་ཙནྡན་དང་སླེ་ཏྲེས་ལྟ་བུ། འདབ་མའི་སྨན་ནིམ་པའི་ལོ་མ་ལྟ་བུ། མེ་ཏོག་གི་སྨན་བ་ཤ་ཀའི་མེ་ཏོག་ལྟ་བུ། འབྲས་བུའི་སྨན་ཨ་བར་སྐྱུར་གསུམ་ལྟ་བུ་སྟེ། དེ་དག་ཀྱང་གཙོ་བོར་ཟས་ཀྱི་དོན་དུ་ཁྱད་པར་བྱེད་པ་མ་ཡིན་པ་རྣམས་སོ། །གསུམ་པ་སྒྲ་དོན་ནི། སྤྱིར་ནད་སེལ་བར་བྱེད་པས་ན་སྨན། བྱེ་བྲག་ཏུ་སྔ་དྲོའི་དུས་ཁོ་ནར་རུང་བའི་དུས་རུང་། རང་མིང་གིས་དུས་ཀྱི་མཐའི་བར་བྱིན་གྱིས་བརླབ་ཏུ་རུང་བས་ན་ཐུན་ཚོད་དང་། ཞག་བདུན་པ་དང་འཚོ་བཅངས་ཞེས་བྱའོ། །བཞི་པ་བསྟེན་ཚུལ་ལ་གཉིས་ལས། ལུས་ཀྱིས་བསྟེན་པ་ནི། མིག་སྨན་གྱི་དོམ་ལྤགས་ལ་སོགས་པའོ། །ཁར་བསྟེན་པའི་སྨན་ལས། དུས་རུང་གི་སྨན་སྔ་དྲོའི་དུས་ཁོ་ནར་བསྟེན་དུ་རུང་བ་སྟེ། ནད་པར་ཕན་ན་དུས་མིན་དུ་བསྟེན་པའང་གནང་ཞིང་། རང་དུས་ལས་འདས་ན་བྱིན་གྱིས་བརླབས་ཀྱང་གསོག་འཇོག་མི་ཁེགས་པའི་ཕྱིར་བྱིན་བརླབ་མ་གསུངས་ལ། སྨན་གཞན་གསུམ་བྱིན་གྱིས་མ་བརླབས་པ་ནི་གང་ཟག་ནད་པ་ཡིན་མིན་ཐམས་ཅད་ལ་གནང་ཞིང་། དུས་ཐམས་ཅད་དུ་བསྟེན་དུ་རུང་མོད། འོན་ཀྱང་བྱིན་གྱིས་མ་བརླབས་ན་བྱིན་ལེན་བྱས་པ་ཉིན་ཐུན་གཉིས་མཚན་ཐུན་གསུམ་སྟེ་ལྔ་པོ་དེ་དང་དེའི་མཐར་གསོག་འཇོག་ཏུ་འགྱུར་བས་དེ་ཁེགས་པའི་ཕྱིར་བྱིན་གྱིས་བརླབ་དགོས་སོ། །དེ་ལྟར་བྱིན་གྱིས་བརླབས་པའི་སྨན་དེ་ནི་ནད་པ་ཁོ་ནས་བསྟེན་དུ་རུང་ཞིང་། དེས་ཀྱང་སྤྱིར་རང་མིང་གི་དུས་ཀྱི་མཐའི་བར་དང་། བྱེ་བྲག་ཐུན་ཚོད་ཀྱི་སྨན་ལ་གསུམ་ལས། རྒྱུ་དུས་རུང་ལས་སྦྱར་བ་ཏེ་མཚན་གྱི་ཐུན་ཐ་མའི་བར་དང་། ཞག་བདུན་པ་ལས་སྦྱར་ཏེ་བརྒྱད་པའི་སྐྱ་རེངས་མ་ཤར་བར་གསོག་འཇོག་ཏུ་མི་འགྱུར་ཞིང་། རྒྱུ་འཚོ་བཅངས་ལས་སྦྱར་བ་དེ་ལ་གསོག་འཇོག་འབྱུང་མི་སྲིད་དོ། །འོ་ན་བྱིན་གྱིས་བརླབས་པའི་སྨན་རང་དུས་ལས་མ་འདས་ཀྱི་བར་དུ་གསོག་འཇོག་མི་འབྱུང་བས་ཁྱབ་བམ་སྙམ་ན། མ་ཁྱབ་སྟེ། རོ་གཞན་དུ་འགྱུར་ན་བྱིན་རླབས་འཇིག་པས་གསོག་འཇོག་ཏུ་འགྱུར་བ་གང་ཞིག །ཤན་རྡེག་བྱེད་ཡོད་ཀྱང་དེར་འགྱུར་བས་ཕྱིར། ཇི་ལྟར་བསྟེན་པའི་ཆོ་ག་ནི། བདག་ཉིད་ལ་ནད་པ་དང་ཟས་ལ་སྨན་གྱི་འདུ་ཤེས་བཞག་སྟེ་དྲན་ཤེས་དང་ལྡན་པས་དཀོན་མཆོག་གསུམ་རྗེས་སུ་དྲན་པའི་སྒོ་ནས། ཟས་ལ་ཆ་བཞིར་བགོ་བྱ་སྟེ། །དང་པོར་ལྷ་ལ་བཤོས་གཙང་འབུལ། །དེ་རྗེས་ཆོས་སྐྱོང་སྲུང་མ་ལ། །གཏོར་མ་ཤིན་ཏུ་རྒྱ་ཆེར་བྱ། །རང་གིས་ཟོས་ཤིང་འཐུངས་པ་ཡི། །ལྷག་མ་འབྱུང་པོ་རྣམས་ལ་བྱིན། །ཞེས་པའི་ཆོ་གས་ཟས་ལ་རན་པར་ལོངས་སྤྱད་དེ་ཡོན་སྦྱོང་མདོ་བསྔོ་རྣམས་བྱ་ཞིང་། སྨན་ཕྱི་མ་གསུམ་དང་། ཞར་བྱུང་སྨན་སྣོད་ལྷུང་བཟེད་བྱིན་གྱིས་བརླབས་པ་དང་། དེ་དང་དེ་དབྱུང་བའི་ཆོ་ག་རྣམས་སོ། །གསུམ་པ་གང་ཟག་གང་གིས་སྤྱོད་པ་ནི། སྤྱིར་བཏང་དུ་ཚུལ་ཁྲིམས་དང་ལྡན་པའི་རབ་བྱུང་མྱང་འདས་ཀྱི་བསམ་པ་ཅན་གྱིས་སྤྱོད་ཅིང་། དམིགས་བསལ་ཕ་མ་དང་སློང་པ་པོ་སོགས་ལ་སྦྱིན་ནོ། །

བཞི་པ་སྨན་བཞག་པའི་གནས་རུང་ཁང་བསྟེན་ཚུལ་ནི། མདོ་རྩར། རུང་བ་ཉིད་དུ་བྱིན་གྱིས་བརླབས་པར་བཙོས་པ་དང་གནས་པ་དག་ནི་ཕྱི་རོལ་དང་འདྲའོ། །ཞེས་པས་མཚམས་ནང་ཡིན་ཡང་དེར་རྗེན་བཙོས་དང་ཞག་ལོན་སོགས་བྱར་རུང་བས་ན་རུང་ཁང་ཞེས་བྱའོ། །དེ་ཡང་ཁྱིམ་པའི་གནས་ཁང་དང་གཙུག་ལག་ཁང་ཉེ་འཁོར་དང་བཅས་པ་ལས་ཕྱི་རོལ་ཏུ་གྱུར་བའི་གནས་སུ་མཚམས་བཙོས་དང་ཞག་ལོན་གྱི་ཉེས་པ་མི་འབྱུང་བས་དེ་དག་ཏུ་རུང་ཁང་བྱིན་གྱིས་བརླབ་མི་དགོས་ཤིང་། དེ་ལས་གཞན་གཙུག་ལག་ཁང་ཉེ་འཁོར་དང་བཅས་པའི་ནང་དུ་མ་ཟད། ཁྱིམ་པའི་གནས་ཡིན་ཡང་དེར་ཁྱིམ་པ་མི་སྡོད་པར་དགེ་སློང་ཉིད་དབང་བའི་ཁང་པ་ཡིན་ན། རུང་ཁང་བྱིན་བརླབ་དགོས་པ་ཡིན་ནོ། །ཇི་ལྟར་བྱིན་གྱིས་བརླབ་པའི་ཚུལ་ལ་བཞི་སྟེ། དང་པོ་སོ་ཕག་འགྲེམ་པའི་དུས་སུ་དགེ་སློང་ལག་གིས་བླས་དེའི་འགྲམ་རྡོ་གཏོང་བ་ན་བཏེགས་པའི་མཐའ་ལས་བྱུང་བའི་བྱིན་རླབས་དང་། གཉིས་པ་རྩིག་པའི་མགོ་བརྩམས་ནས་མཇུག་མ་ཟིན་པའི་བར་གང་ཡང་རུང་བའི་དུས་སུ་ལག་གི་བླས་སེམས་བསྡུས་པའི་མཐའ་ལས་བྱུང་བའི་བྱིན་རླབས་དང་། གསུམ་པ་རུང་ཁང་དུ་འོས་པའི་ཁང་པ་དེ་གྲུབ་ཟིན་ནས་དེར་དགེ་སློང་གནས་པ་ཉིད་དང་མ་བྲལ་བའི་དུས་སུ་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བརླབ་པ་དང་། བཞི་པ་སྔར་རུང་ཁང་དུ་བྱིན་གྱིས་བརླབས་སམ་མ་བརླབས་ཀྱང་རུང་སྟེ་གཙུག་ལག་ཁང་སྟོང་པར་དགེ་སློང་དག་གསར་དུ་ཕྱིན་པའི་ཚེ་དེར་སླེབ་མ་ཐག་འཕྲལ་ལས་བྱུང་བའི་བྱིན་བརླབ་བྱ་བའོ། །ཕྱི་མ་གཉིས་པོ་འདི་རུང་ཁང་གསར་དུ་རྩིག་པའམ་ཁང་པ་བྱས་ཟིན་རུང་ཁང་དུ་སྒྲུབ་པ་གཉིས་ཀ་ལ་འཇུག་གོ །ཡང་བདག་པོ་སོ་སོའི་བ་ལང་རྣམས་ལྷས་གཅིག་ཏུ་འཇུག་པ་ལྟར་མཚམས་ནང་གཅིག་ཏུ་གཙུག་ལག་ཁང་དུ་མའི་རུང་ཁང་གི་བྱ་བ་ཁང་པ་གཅིག་གིས་བྱས་པ་ལ། ལུང་ལས་བ་ལང་གི་ལྷས་ལྟ་བུའི་རུང་ཁང་ཞེས་གསུངས་སོ། །

གསུམ་པ་གནས་མལ་གྱི་གཞི་ནི། ཝཱ་ར་ཎཱ་སཱིར་ཁྱིམ་བདག་དགེ་བཟང་གིས་སྟོན་པ་ལ་གཙུག་ལག་ཁང་དུ་བརྩིག་པར་ཞུས་པས་གནང་ངོ་། །འདི་ལ་གཉིས་ཏེ། ཕྱག་བྱ་བ་དང་མི་བྱ་བའི་ཚུལ་དང་། གཙུག་ལག་ཁང་བརྩིག་ཅིང་ལོངས་སྤྱོད་པའི་ཆོ་གའོ། །དང་པོ་ནི། སོ་སོ་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ། །མཉམ་ན་རྒན་པ་ལའོ། །ཞེས་དང་། ཁྱིམ་པས་རབ་ཏུ་བྱུང་བ་ལའོ། །ཐམས་ཅད་ཀྱིས་སངས་རྒྱས་ལའོ། །ཞེས་སོགས་རྒྱས་པར་གསུངས་པ་ལྟར་རོ། །གཉིས་པ་ནི་གཙུག་ལག་ཁང་བྱའོ། །ངོས་གཅིག་གི་དབུས་སུ་དྲི་གཙང་ཁང་བྱ་བ་ཉིད་དོ། །དེའི་མདུན་དུ་སྒོ་ཁང་ངོ་། །གྲུ་བཞི་བཟང་བ་ཉིད་དོ། །ཞེས་སོགས་ཀྱི་གཙུག་ལག་ཁང་བརྩིག་པའི་ཆོ་ག་དང་། བརྩིགས་ནས་སྒོར་གནོད་སྦྱིན་ལག་ན་རྡོ་རྗེ་དང་སྒོ་ཁང་དུ་འཁོར་བའི་འཁོར་ལོ་ཆ་ལྔ་པ་སོགས་རི་མོ་འདྲི་བའི་ཚུལ་དང་། གཙུག་ལག་ཁང་ཡལ་བར་མི་དོར་རོ། །ཞེས་སོགས་ཀྱིས་ཇི་ལྟར་བསྐྱང་བའི་སྒོ་ནས་གནས་པར་བྱ་བ་དང་། སྤྱོད་ལམ་ཅི་འདོད་པས་ལུང་དབོག་གོ །ཞེས་སོགས་ཀྱིས་དེར་ཆོས་དང་ཟང་ཟིང་གི་ལོངས་སྤྱོད་ལ་ཇི་ལྟར་སྤྱོད་པའི་ཚུལ་རྒྱས་པར་གསུངས་པ་བཞིན་ཤེས་པར་བྱའོ། །དེ་ལྟར་གནས་ཁང་དང་གནས་མལ་ལ་མཐའ་མཉིས་སྤངས་ཏེ་ཆགས་མེད་ཞེན་མེད་ཀྱི་ཚུལ་གྱིས་སྤྱོད་པར་གསུངས་ཤིིང་། མདོར་ན་བདེ་བར་གནས་པའི་རྐྱེན་གོས་དང་སྨན་དང་གནས་མལ་བསྟེན་པའི་སྐབས་འདིར་ཡོངས་སུ་སྤྱད་པ་རྣམ་པ་ལྔ་ཤེས་པར་བྱ་སྟེ། ཇི་སྐད་དུ། མྱ་ངན་ལས་འདས་པའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་། ཟས་རོ་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །དགེ་འདུན་གྱིི་རྫས་ཀྱང་ངོ་། །མི་སློབ་པ་མན་ཆད་ཀྱིའོ། །སོ་སོའི་སྐྱེ་བོ་ལ་ཡང་ངོ་། །ཚུལ་ཁྲིམས་འཆལ་བ་ལ་ནི་མ་ཡིན་ནོ། །ལེ་ལོ་ཅན་ལ་ནི་བླངས་པ་དང་ཉེ་བར་སྤྱད་པ་བུ་ལོན་དུ་འགྱུར་རོ། །ཞེས་དང་། ས་གའི་ལྷས། མི་སློབ་པ་ནི་བདག་པོར་སྤྱོད། །སློབ་པ་བྱིན་པ་སྤྱོད་པ་སྟེ། །བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ལྷག་མ་ལེ་ལོས་བཅོམ་པ་ཡི། །བདག་ཉིད་རྣམས་ནི་བུ་ལོན་སྤྱོད། །ཁྲིམས་འཆལ་རྣམས་ནི་ནམ་དུ་ཡང་། །གཙུག་ལག་ཁང་སོགས་ཉེར་སྤྱོད་བཀག །ཅེས་པ་ལྟར་མི་སློབ་པའི་གང་ཟག་གིས་གཞན་གྱི་ཡོ་བྱད་རང་དབང་བའི་ཚུལ་དང་། སློབ་པ་འཕགས་པས་རང་ལ་བྱིན་པ་རྣམས་ལོངས་སྤྱོད་དུ་རུང་སྟེ། དེ་དང་དེས་ཡོན་སྦྱོང་ནུས་པའི་ཕྱིར། སོ་སྐྱེ་ཁྲིམས་དག་ཀློག་སྤོང་ལ་བརྩོན་པའི་གང་ཟག་གིས་སྤྱད་ཀྱང་ཉེས་པ་མེད་དེ། དེ་ལྟར་སྟོན་པས་གནང་བའི་ཕྱིར། གལ་ཏེ་ཚུལ་ཁྲིམས་དག་ཀྱང་ཐོས་བསམ་སྒོམ་གསུམ་མི་ནུས་པའི་ལེ་ལོ་ཅན་གྱིས་སྤྱད་དུ་མི་རུང་སྟེ། གང་བླངས་བུ་ལོན་དུ་འཕེལ་ནས་སྐྱེ་བ་ཕྱི་མར་འཇལ་དགོས་པའི་ཕྱིར། ཁྲིིམས་འཆལ་གྱིས་ནི་དད་རྫས་ལ་ནམ་ཡང་སྤྱོད་པ་བཀག་སྟེ། སྤྱད་ན་དམྱལ་བར་ལྟུང་ནས་སྡུག་བསྔལ་ཉམས་སུ་མྱོང་བར་གསུངས་པའི་ཕྱིར། དེ་ལྟར་ཡང་སྙིང་གི་ཐུར་མ་ལས། ཚུལ་ཁྲིིམས་འཆལ་བས་ས་ནི་གོམ་པ་གང་། །ཟས་ནི་ཁམ་གཅིག་བཏུང་བ་ཆུ་ཕོར་གང་། །ཙམ་ཞིག་དགེ་འདུན་རྫས་ལ་ལོངས་སྤྱད་ན། །ལོག་འཚོ་ཡིན་ཏེ་དམྱལ་བར་སྐྱེ་བར་གསུངས། །ཞེས་སོ། །

གསུམ་པ་ཐམས་ཅད་ལ་ཁྱབ་པ་ལས་ཀྱི་གཞི་ལ་ལྔ་སྟེ། ལས་ཆགས་པའི་གཞི་དང་། བསམ་པ་དང་། ལས་ཀྱི་ངོ་བོ་དང་། ཉམས་སུ་མྱོང་བ་དང་། ཆགས་པའི་དུས་སོ། །དང་པོ་ལ། དགེ་འདུན། ལས་མཁན། བསྒྲུབ་བྱ་དང་གསུམ། དང་པོ་ནི། མཚན་ཉིད་གསུམ་ལྡན་ཏེ། བཞི་བཅུ་ཉེར་གཉིས་ཉི་ཤུ་དང་། །བཅུ་གཉིས་བཅུ་གཅིག་བཅུ་དང་དགུ། །བརྒྱད་དྲུག་ལྔ་བཞི་དགོས་པ་ཡི། །ལས་ནི་རྣམ་པ་བཅུ་གཅིག་གོ །ཞེས་པ་ལྟར། ཡུལ་དབུས་སུ་དགེ་སློང་མ་དབྱུང་བ་ལ་ཕ་ཚོགས་ཉི་ཤུ་མ་ཚོགས་ཉི་ཤུ་སྟེ་བཞི་བཅུ་དགོས་པ་སོགས་ལས་བཅུ་གཅིག་པོ་རང་རང་ལ་ལྟོས་པའི་གྲངས་ཚང་བ། མི་འདུག་པར་འགྲེང་བ་མ་ཡིན་པ་སོགས་ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བའོ། །གཉིས་པ་ལས་མཁན་ནི། སྤྱིར་བཏང་ལ་ཁ་སྐོང་དང་ལྡན་ཞིང་ཆོ་ག་ཤེས་པ་དང་། དམིགས་བསལ་ལ་ཆོ་ག་ཤེས་པ་ཙམ་མོ། །གསུམ་པ་བསྒྲུབ་བྱ་ལ། སེམས་ཅན་མ་ཡིན་པ་དང་། སེམས་ཅན་ལ་བྱ་བའོ། །དང་པོ་ནི། མཚམས་ཆེ་ཆུང་བཅད་པ་སོགས་བརྒྱད་དོ། །གཉིས་པ་ལ། ཁྱིམ་པ་དང་། རབ་བྱུང་ལ་བྱ་བའོ། །དང་པོ་ནི། ལྷུང་བཟེད་ཁ་སྦུབ་སོགས་ལྔའོ། །གཉིས་པ་ལ། མ་རྫོགས་པ་དང་། རྫོགས་པའི་རྟེན་ལ་བྱ་བའོ། །དང་པོ་ལ། སྦྱིན་ལས་དང་། ཆད་པས་བཅད་པའི་ལས་གཉིས་ཏེ། འདི་ལ་བསྐོ་བའི་ལས་ནི་མེད་དོ། །གཉིས་པ་རྫོགས་པའི་རྟེན་ལ་བྱ་བ་ནི། ཁང་པའི་གནང་བ་སྟེར་བ་སོགས་སྦྱིན་ལས་ཉེར་གཅིག །གསང་སྟོན་བསྐོ་བ་སོགས་བསྐོ་བའི་ལས་དྲུག །ནན་ཏུར་དགུ། བསྒོ་གྱུར་བཅུ། གྲངས་སུ་འཇུག་པ་བཞི་སྟེ་མི་མཐུན་པའི་ལས་ཉི་ཤུ་རྩ་གསུམ་རྣམས་སོ། །

གཉིས་པ་བསམ་པ་ལ། འདུ་ཤེས་དང་། ཀུན་སློང་གཉིས། དང་པོ་ནི། སེམས་ཅན་མ་ཡིན་པ་ལ་བྱ་བ་དང་མི་མཐུན་པའི་ལས་ལ་དགེ་འདུན་གྱི་འདུ་ཤེས་དང་། སྦྱིན་པ་དང་བསྐོ་བ་ལ་ཡུལ་གྱི་འདུ་ཤེས་གཙོ་བ་ཡིན་ནོ། །གཉིས་པ་ནི། ཞེ་ཐག་པ་ནས་ལས་བྱེད་པའོ། །གསུམ་པ་ལས་ཀྱི་ངོ་བོ་ལ། ངོ་བོ་དང་། དབྱེ་བའོ། །དང་པོ་ནི། ལས་མཁན་གྱིས་ཆད་ལྷག་ནོར་འཁྲུགས་མེད་པའི་ཆོ་ག་བྱས་ཤིང་ཆགས་པའོ། །གཉིས་པ་ནི། དགེ་སློང་གིས་བྱ་བའི་ལས་རིགས་ལ་བརྒྱ་རྩ་གཅིག་ཡོད་དེ། ལུང་ལས། བཙུན་པ་ལས་དུ་དག་འཆིས། ཉེ་བ་འཁོར་བརྒྱ་རྩ་གཅིག་གོ །ཞེས་པ་ནས། གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ། །ཞེས་པའི་བར་གསུངས་པའི་ཕྱིར་རོ། །བཞི་པ་ཉམས་སུ་མྱོང་བ་ནི། ལས་ཀྱི་ཚིག་ཐོས་ཤིང་དོན་གོ་བའོ། །ལྔ་པ་ཆགས་པའི་དུས་ནི། འབའ་ཞིག་པ་དང་གསོལ་གཉིས་ཀྱི་ལས་ལ་དེ་དང་དེ་རྫོགས་མ་ཐག་ཏུ་དང་། གསོལ་བཞིའི་ལས་ཀྱི་བརྗོད་པ་གསུམ་པ་ལ་ངོ་བོ་བྱ་བྱེད་གསུམ་ལས། བྱ་བ་བྱེད་པ་རྫོགས་མ་ཐག་ཏུ་ལས་ཆགས་པའོ། །

གཉིས་པ་ཤུགས་བསྟན་རུང་མཐུན་བསྡུས་ཏེ་བསྟན་པ་ནི། མདོར་ན་ཡེ་ནས་གནང་དང་བཀག་པ་མེད། །བྱར་རུང་དང་ཉེ་མི་རུང་ཟློག་བྱེད་ན། །དེ་དག་སྤྱོད་ཅིག་མི་རུང་དང་ཉེ་ཞིང་། །རུང་བ་ཟློག་ན་ཀུན་ཏུ་སྤོངས་ཞེས་གསུངས། །ཞེས་པ་སྟེ། དངོས་སུ་མ་སྨོས་པའི་གནང་བཀག་གི་བསླབ་བྱ་ཐམས་ཅད་མདོར་བསྡུ་ན་འདི་ཉིད་དུ་འདུས་ཏེ། གཞི་གང་ལ་སྟོན་པས་ཡེ་སྟེ་ཐོག་མ་ཉིད་ནས་དངོས་སུ་གནང་བ་དང་བཀག་པའི་གསལ་ཁ་དོད་པ་མེད་པ་རྣམས་ནི། གང་ཞིག་བྱར་རུང་བར་གསུངས་པ་དང་ཉེ་ཞིང་མི་རུང་བ་ལས་བཟློག་ན་དེ་དག་ཐེ་ཚོམ་མེད་པར་སྤྱོད་པར་གྱིས་ཤིག །དཔེར་ན་དགེ་ཚུལ་ལ་དགག་དབྱེ་གསུངས་པས་མཚོན་ནས་གསོ་སྦྱོང་བྱ་དགོས་པ་བཞིན་ནོ། །གང་སྤྱད་དུ་མི་རུང་བར་གསུངས་པ་དང་ཉེ་ཞིང་རུང་བ་ལས་བཟློག་ན་དེ་དག་ཀུན་ཏུ་སྤོངས་ཤིག །དཔེར་ན་སྲིན་བལ་ལ་སྟན་བྱེད་པ་བཀག་པས་དེ་དང་མཉམ་པ་དང་ལྷག་པ་ལ་སྟན་བྱ་མི་རུང་བར་མཐུན་པ་བཞིན་ནོ། །དེ་ལྟར་ཡང་ལུང་ཕྲན་ཚེགས་ལས། བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདའ་བའི་དུས་དེའི་ཚེ་ཉིད་ན་དགེ་སློང་རྣམས་ལ་བཀའ་སྩལ་པ་དགེ་སློང་དག་ངས་ཁྱེད་ལ་འདུལ་བ་རྒྱ་ཆེར་ནི་བསྟན་ན། མདོར་བསྡུས་ཏེ་མ་ཡིན་ནོ། །འོན་ཀྱང་མདོར་བསྡུས་པ་ཡང་ཉོན་ཅིག །དགེ་སློང་དག་ངས་ཁྱེད་ལ་གང་ཞིག་ཐོག་མ་ཉིད་ནས་གནང་བ་ཡང་མེད། བཀག་པའང་མེད། གལ་ཏེ་རུང་བ་དང་ཉེ་བ་ཡིན་ཞིང་མི་རུང་བ་ཟློག་པར་བྱེད་པ་ཡིན་ན་ནི་རུང་བ་ཡིན་པར་གཟུང་བར་བྱའོ། །གལ་ཏེ་མི་རུང་བ་དང་ཉེ་བ་ཡིན་ཞིང་རུང་བ་ཟློག་པར་བྱེད་པ་ཡིན་ན་མི་རུང་བ་ཡིན་པས་ཀུན་ཏུ་སྤྱད་པར་མི་བྱའོ། །ཞེས་གསུངས་པ་ཡིན་ནོ། །

ལྔ་པ་སྐྱེ་བའི་ལུས་རྟེན་ནི། སྐྱེ་བའི་རྟེན་ནི་མུ་སྟེགས་མཚམས་མེད་བྱས། །སྒྲ་མི་སྙན་དང་ཟ་མ་མཚན་གཉིས་དང་། །མ་ནིང་རིགས་ལྔ་མཚན་གསུམ་གྱུར་པ་དང་། །སྤྲུལ་པ་མ་གཏོགས་གླིང་གསུམ་སྐྱེས་པ་ཡི། །སྐྱེས་པ་བུད་མེད་སྡོམ་པའི་རྟེན་དུ་འདོད། །ཅེས་པ་སྟེ། ལས་ཀྱི་སྒྲིབ་པ་ཤས་ཆེ་བ་མུ་སྟེགས་ཅན་ནམ་དེ་ཞུགས་པ། ཕ་མ་དགྲ་བཅོམ་བསད་པ་དང་དགེ་འདུན་གྱི་དབྱེན་དང་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་ལྔ་བྱས་པ་ལ་སོགས་པ་དང་། རྣམ་སྨིན་གྱི་སྒྲིབ་པ་ཤས་ཆེ་བ་སྒྲ་མི་སྙན་ལྟ་བུ་གནས་རིགས་ཉམས་པ། གང་ཞིག་གྲོང་པའི་ཆོས་མེད་པ། །དེ་ནི་ཟ་མ་ཞེས་སུ་བརྗོད། །ཅེས་པ་ལྟར་ཟ་མ་དང་། སྐྱེ་གནས། ཟླ་ཕྱེད། འཁྱུད་ནས་ལྡང་བ། ཕྲག་དོག་ཅན། ཉམས་པ་སྟེ་མ་ནིང་རིགས་ལྔ་དང་། མཚན་གཉིས་ཅིག་ཅར་དུ་བྱུང་བ། མཚན་ལན་གསུམ་དུ་གྱུར་པ་སོགས་མཚན་ཉམས་པ། མི་མ་ཡིན་པ་མིའི་རྣམ་པར་སྤྲུལ་པ་དང་། མི་མ་ཡིན་པའི་འགྲོ་བ་པ་སོགས་ནི་འགྲོ་བ་ཉམས་པ་ཞེས་དེ་རྣམས་སྡོམ་པ་སྐྱེ་བའི་བར་ཆད་ཅན་ཡིན་པས་ན་མ་གཏོགས་པ་སྟེ། དེ་ལས་གཞན་ཤར་ནུབ་ལྷོའི་གླིང་གསུམ་དུ་སྐྱེས་པའི་སྐྱེས་པ་དང་བུད་མེད་རྣམས་སོ་ཐར་གྱི་སྡོམ་པ་སྐྱེ་བ་དང་གནས་པ་གཉིས་ཀའི་རྟེན་དུ་འདོད་དེ། མཛོད་ལས། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །སྡོམ་མིན་སྡོམ་པའང་དེ་བཞིན་ལ། །ཞེས་དང་། རབ་དབྱེར། གླིང་གསུམ་སྐྱེས་པ་བུད་མེད་ལས། །འགྲོ་བ་གཞན་ལ་སྡོམ་པ་བཀག །ཅེས་གསུངས་པའི་ཕྱིར། །

དྲུག་པ་ཉམས་པ་གསོ་བའི་ཐབས་ལ་བསྟན་བཤད་གཉིས་ལས། དང་པོ་ནི། ཐ་མར་ཉམས་ན་གསོ་བའིཚུལ་གཤད་པ། །ཞེས་པ་སྟེ། སྡོམ་པ་ཐོབ་ནས་མ་ཉམས་པར་བསྲུང་ཞིང་། གལ་ཏེ་ཉམས་ན་ཕྱིར་བཅོས་པའི་སྒོ་ནས་དག་པར་བྱ་དགོས་ཏེ། ལུང་ལས། གཉིས་ནི་རྣམ་པར་བྱང་བར་འགྱུར་ཞིང་། ཉོན་མོངས་པར་མི་འགྱུར་བ་དང་། གཉིས་ཀྱི་ཟག་པ་འཕེལ་བར་མི་འགྱུར་བ་སྟེ། གཉིས་གང་ཞེ་ན། ལྟུང་བ་མི་འབྱིན་པ་གང་ཡིན་པ་དང་། ལྟུང་བ་བྱུང་ནས་ཆོས་བཞིན་དུ་ཕྱིར་འཆོས་པ་གང་ཡིན་པའོ། །ཞེས་གསུངས་པས་གསོ་ཚུལ་བཤད་པར་བྱའོ། །

གཉིས་པ་རྒྱས་བཤད་ལ་གཉིས་ཏེ། སྡོམ་པ་གཏོང་བའི་རྒྱུ་དང་། ཕྱིར་བཅོས་དངོས་བཤད་པའོ། །དང་པོ་ལ། ཐུན་མོང་དང་། ཐུན་མོང་མ་ཡིན་པ་གཉིས། དང་པོ་ནི། ལྟུང་བ་བསླབ་པ་ཕུལ་དང་ཤི་འཕོས་དང་། །མཚན་གཉིས་ཅིག་ཅར་བྱུང་དང་ལན་གསུམ་གྱུར། །རྒྱུ་འབྲས་མེད་བལྟས་རྩ་བ་ཆད་རྣམས་ལྕི། །ཞེས་པ་སྟེ། སོ་ཐར་གྱི་སྡོམ་པ་སྤྱིའི་གཏོང་རྒྱུ་ནི་བཞི་སྟེ། བརྡ་འཕྲོད་པའི་དྲུང་དུ་བསམ་པ་ཐག་པ་ནས་བསླབ་པ་ཕུལ་བས་གཏོང་སྟེ། ཡང་དག་པར་བླངས་པ་དང་འགལ་བའི་རྣམ་རིག་བསྐྱེད་པའི་ཕྱིར། ཇི་ལྟར་འབུལ་བ་ནི། སྡོམ་པ་རང་གི་ངོ་བོ། རྩ་བ་དཀོན་མཆོག་གསུམ། རྒྱུ་སྡེ་སྣོད་གསུམ། སྦྱོར་བྱེད་མཁན་སློབ། སློབ་པའི་གནས་རྟེན། སློབ་པའི་གྲོགས་རྣམས་འབུལ་ཚུལ་གསུངས་པ་ལྟར་ཡིན་ལ། ཚངས་པར་སྤྱད་དཀའོ་ཞེས་སོགས་ནི་འབུལ་བའི་རྒྱུ་བསྟན་པས་ཉམས་པར་བྱས་པ་ཡིན་གྱིས་ཕུལ་བ་མ་ཡིན་ཡང་སྡོམ་པ་གཏོང་བ་ལ་ཁྱད་པར་མེད་དེ། ལུང་ལས། བསླབ་པ་མ་ཕུལ་བསླབ་པ་ཉམས་པར་མ་བྱས་པར། ཞེས་གསུངས་པའི་ཕྱིར། དེ་བཞིན་དུ་ཤི་འཕོས་པས་གཏོང་སྟེ། རྟེན་བོར་བའི་ཕྱིར། མཚན་གཉིས་གཅིག་ཅར་བྱུང་བ་དང་མཚན་ལན་གསུམ་གྱུར་པས་གཏོང་སྟེ། རྟེན་ཉམས་པའི་ཕྱིར། རྒྱུ་འབྲས་མེད་ལྟའི་ལོག་ལྟ་སྐྱེས་པས་གཏོང་སྟེ། དགེ་བའི་རྩ་བ་ཆད་པས་སྡོམ་པའི་རྟེན་གཞི་མེད་པའི་ཕྱིར། འདི་ནི་ཐེག་པ་ཆེ་ཆུང་ཐམས་ཅད་ཀྱི་སྡོམ་པའི་གཏོང་རྒྱུར་བཤད་པས་ཤིན་ཏུ་ལྕི་བའོ། །དེ་ལྟར་སྤྱིའི་གཏོང་རྒྱུ་བཞིའི་སྟེང་བསྙེན་གནས་ཀྱི་གཏོང་རྒྱུ་བསྣན་པས་ལྔར་བཤད་དེ། མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །སོ་སོ་ཐར་པའི་འདུལ་བ་གཏོང་། །ཞེས་དང་། རང་འགྲེལ་ལས། དེ་དག་ནི་མདོར་བསྡུ་ན་གཏོང་བའ་ིརྒྱུ་ལྔ་ཡིན་ནོ། །ཞེས་གསུངས་པའི་ཕྱིར། །

གཉིས་པ་ལ། བྱེ་བྲག་སོ་སོའི་གཏོང་རྒྱུ། སྤྱི་ལ་འདོད་པ་མི་འདྲ་བའི་ཁྱད་པར། རྩ་ལྟུང་གཏོང་རྒྱུ་ཡིན་མིན་ལས་འཕྲོས་ཏེ་སྡེ་ལྔའི་དངོས་གཞི་མི་བསྐྱེད་པའི་རྒྱུ་བཤད་པའོ། །དང་པོ་ནི། ཉི་ཤུ་མ་ལོན་བསྙེན་རྫོགས་རྗེས་སུ་ཤེས། །དགེ་སློང་སྡོམ་གཏོང་རྟེན་ཕྱིར་ཁས་བླངས་འདས། །དགེ་སློབ་མའོ་མཚན་འདས་བསྙེན་གནས་ཀྱི། །སྡོམ་པ་གཏོང་རྣམས་སོ་སོའི་ཐུན་མོང་མིན། །ཞེས་པ་སྟེ། ལོ་ཉི་ཤུ་མ་ལོན་པ་ལ་ལོན་པར་འདུ་ཤེས་ནས་བསྙེན་རྫོགས་བླངས་པ་དེ། ཕྱིས་ཉི་ཤུ་མ་ལོན་གོང་དུ་དེ་ལྟར་ངོ་ཤེས་ན། དེའི་ཚེ་མངལ་ཤོལ་གྱི་ཟླ་བས་ཁ་བསྐང་བར་བྱ་ཞིང་། དེ་ལྟར་བསྐང་ཡང་མ་ཚང་ན་བསྙེན་རྫོགས་ཀྱི་སྡོམ་པ་གཏོང་སྟེ། མདོར། ཤེས་ན་ནི་དེ་ཞིག་གོ །གལ་ཏེ་དེ་སྐྱེས་པ་ན་མ་ལོན་པའི་འོ། །མངལ་ན་གནས་པ་དང་ཤོལ་གྱི་ཟླ་བ་དག་དང་ཡང་བཅས་ཏེའོ། །ཞེས་སོ། །མི་ཚངས་སྤྱོད་བསྟེན་པར་བྱེད་པའི་ཕྱིར་ཁས་བླངས་པ་དགེ་སློབ་མའི་སྡོམ་པ་གཏོང་སྟེ། བསྟེན་པའི་ཕྱིར་གཞན་ལ་ཁས་བླངས་པ་ན། བསླབ་པ་འཁྲུགས་པ་ཉིད་དོ། །ཞེས་སོ། །མཚན་མོ་མཐའི་སྐད་ཅིག་མ་འདས་པས་བསྙེན་གནས་ཀྱི་སྡོམ་པ་གཏོང་སྟེ། དེ་སྲིད་དུ་འཕངས་པའི་ཕྱིར་རོ། །དེ་ལྟར་གསུམ་པོ་སྔར་གྱི་སྤྱིའི་གཏོང་རྒྱུ་བཞིས་གཏོང་བར་མ་ཟད། རང་རང་གི་གཏོང་རྒྱུ་སོ་སོས་སྡོམ་པ་དེ་དང་དེ་གཏོང་བས་ན་ཐུན་མོང་མ་ཡིན་པའི་གཏོང་ཚུལ་ལོ། །

གཉིས་པ་ནི། རྩ་ལྟུང་བྱུང་དང་དམ་ཆོས་ནུབ་ནའང་གཏོང་། །ཁ་ཆེའི་ཡུལ་གྱི་བྱེ་བྲག་སྨྲ་བ་རྣམས། །སྡོམ་ལྡན་རྩ་ལྟུང་བྱུང་བ་གཉིས་ལྡན་ན། །ནོར་ལྡན་བུ་ལོན་ཅན་བཞིན་འདོད་པ་དང་། །ཁ་ཅིག་རྩ་བཞི་གཅིག་སྤྱད་ཀུན་ཉམས་ཟེར། །ཞེས་པ་སྟེ། མདོ་སྡེ་པ་ན་རེ། རྩ་ལྟུང་འཆབ་བཅས་བྱུང་བས་གཏོང་སྟེ་རྒྱུད་ངོ་ཚ་ཁྲེལ་མེད་ཆེན་པོས་ཉམས་པའི་ཕྱིར་ཟེར། གོས་དམར་བའི་སྡེ་པ་ན་རེ། ལུང་གི་དམ་ཆོས་ནུབ་པས་གཏོང་སྟེ། བསླབ་པའི་མཚམས་རྣམ་པར་བཞག་པ་མེད་པའི་ཕྱིར་ཟེར། དེ་ལ་ཐོགས་མེད་སྐུ་མཆེད་ལུང་ཆོས་ནུབ་པ་ཙམ་གྱིས་སྡོམ་པ་སྔར་ཡོད་མི་གཏོང་སྟེ། རྟོགས་པའི་དམ་ཆོས་མ་ནུབ་པའི་ཕྱིར། འོན་ཀྱང་དེ་ཚེ་སྔར་མེད་གསར་སྐྱེ་མེད་དེ། འབོགས་བྱེད་ཀྱི་ཆོ་གའི་རྣམ་བཞག་མེད་པའི་ཕྱིར་གསུངས། ཁ་ཆེ་བྱེ་བྲག་ཏུ་སྨྲ་བ་རྣམས་ན་རེ། རྩ་ལྟུང་འཆབ་བཅས་བྱུང་ཡང་སྡོམ་པ་མི་གཏོང་སྟེ། ཕྱོགས་གཅིག་ཉམས་པས་སྡོམ་པ་ཟད་པར་གཏོང་བ་མི་རིགས་པའི་ཕྱིར། དེ་འདྲ་དེ་སྡོམ་ལྡན་དང་ཚུལ་འཆལ་གཉིས་ཀ་ཡིན་ཏེ། མི་འགའ་ཞིག་ལ་ནོར་ཡང་ལྡན་ལ་བུ་ལོན་ཡང་ཆགས་པ་བཞིན་ནོ་ཞེས་འདོད། དེ་ལྟར་ཡང་མཛོད་ལས། ཁ་ཅིག་ལྟུང་བར་གྱུར་ལས་སྨྲ། །གཞན་དག་དམ་ཆོས་ནུབ་པ་ལས། །ཁ་ཆེ་རྣམས་ནི་བྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཅེས་གསུངས་པའི་ཕྱིར། འདུལ་འཛིན་ཁ་ཅིག །ཕམ་པ་སྡོམ་པའི་གཏོང་རྒྱུ་མ་ཡིན་ཏེ། ཕམ་པ་བྱུང་བའི་དགེ་སློང་ལ་དགེ་སློང་གི་སྡོམ་པའི་རྫས་ཚང་བར་ཡོད་པའི་ཕྱིར། ཉམས་ཚུལ་ལ་ལྟོས་ན་ཀུན་ཉམས་ཡིན་ཏེ། རྩ་བཞི་ལས་སྲོག་གཅོད་ཀྱི་ཕམ་པ་འཆབ་བཅས་ལྟ་བུ་གཅིག་སྤྱད་པའི་ཚེ། སྡོམ་པ་མཐའ་དག་དགོས་པ་བསྒྲུབ་ནུས་ལས་ཉམས་པའི་ཕྱིར་ཏེ། རྒྱ་ཆེར་འགྲེལ་ལས། དགེ་སློང་ཕམ་པར་གྱུར་པ་ལ་ནི་སྡོམ་པ་ཡོད་དུ་ཟིན་ཀྱང་། དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་གནས་པ་དང་ལོངས་སྤྱོད་པ་མེད་པའི་ཕྱིར་དང་། སྡོམ་པ་ཡང་དག་པར་བླངས་པ་ནི་རྣམ་པར་གྲོལ་བ་ཐོབ་པའི་ཆེད་ཡིན་ལ། དེས་རྣམ་པར་གྲོལ་བ་ཐག་རིང་དུ་བྱས་པའི་ཕྱིར། དེས་ན་དེའི་སྡོམ་པ་ནི་མེད་པ་དང་འདྲ་བའོ། །ཞེས་གསུངས་པའི་ཕྱིར། །

གསུམ་པ་ནི། དང་པོའི་ལས་ཅན་སེམས་འཁྲུགས་ཚོར་བས་གཟིར། །སྒྲུབ་པར་མ་ནུས་པ་ལ་ཉེས་པ་མེད། །ཅེས་པ་སྟེ། བཤད་མ་ཐག་པ་ལྟར་ཕམ་པ་འཆབ་བཅས་ཀྱིས་སྡོམ་པ་གསོར་མི་རུང་དུ་སོང་བའི་གང་ཟག་གིས་སྤྱད་ཀྱང་སྡེ་ལྔའི་དངོས་གཞི་ཇི་ལྟ་བ་བཞིན་མི་བསྐྱེད་དེ། ཉམས་པ་དང་མ་ཆགས་པ་གཉིས་ལྟུང་བ་ལ་སྦྱོར་ན་ཉེས་བྱས་སོ། །ཞེས་པས་ཉེས་བྱས་ཙམ་ལས་མི་བསྐྱེད་པའི་ཕྱིར་དེ་བཞིན་དུ་ལས་དང་པོ་པས་སྤྱད་ཀྱང་མི་བསྐྱེད་དེ། སྟོན་པའི་བཅས་པ་དང་མ་འབྲེལ་བའི་ཕྱིར། དགེ་སློང་བཟང་སྦྱིན་ལ་མི་ཚངས་སྤྱོད་ཀྱི་ཕམ་པ་མ་བྱུང་བ་བཞིན་ནོ། །སེམས་འཁྲུགས་ཚོར་བས་གཟིར་ནས་སེམས་རྣལ་དུ་མ་ཕེབས་པས་སྤྱད་ཀྱང་མི་བསྐྱེད་དེ། བསམ་པ་རང་བཞིན་དུ་གནས་པ་མ་ཡིན་པའི་ཕྱིར། སྨྱོན་པས་མི་བསད་པ་བཞིན་ནོ། །སྒྲུབ་མ་ནུས་པའི་གནས་སྐབས་སུ་སྤྱད་ཀྱང་མི་བསྐྱེད་དེ། རྨི་ལམ་དུ་མི་ཚངས་སྤྱོད་ཀྱང་ཕམ་པ་མི་འབྱུང་བའི་ཕྱིར། དེས་ན་དེ་འདྲའི་རྟེན་གྱི་གང་ཟག་གིས་ལྟུང་བ་ལ་སྤྱད་ཀྱང་དངོས་གཞིའི་ཉེས་པ་ཇི་ལྟ་བ་བཞིན་བསྐྱེད་པ་མེད་དོ། །

གཉིས་པ་ཕྱིར་བཅོས་དངོས་ལ། ལྟུང་བ་ཕྱིར་བཅོས། དེ་ལས་འཕྲོས་ནས་རྩོད་པ་ཕྱིར་བཅོས། ཉེས་ལྟུང་སྦྱོང་བའི་ཐབས་སྟོབས་བཞིར་འདུ་ཚུལ། ཉེས་དམིགས་ཤེས་པའི་ནན་ཏན་དུ་བསྲུང་བར་གདམས་པའོ། །དང་པོ་ལ། མི་སྤྲོ་བ་ནན་ཏུར་གྱིས་ཕྱིར་བཅོས་པ་དང་། སྤྲོ་བ་མཐོལ་བཤགས་སོགས་ཀྱིས་ཕྱིར་བཅོས་པའོ། །དང་པོ་ནི། འོག་ཏུ་གཞུག་ཅིང་བཤུང་བའི་དོན་གྱིས་ནན་ཏུར་ཞེས་བྱ་བ་སྟེ། དབྱེ་ན། བསྡིགས་དམད་བསྐྲད་པ་ཕྱིར་འགྱེད་བཞི། གནས་དབྱུང་བདུན། གསོ་དགག་བཞག་པ་གཉིས་ཏེ་བཅུ་གསུམ་མམ། གནས་དབྱུང་བདུན་པོ་གཅིག་ཏུ་བྱས་ན་ནན་ཏུར་བདུན་ནོ། །དེ་ལ་བསྡིགས་པ་ནི། འཐབ་ཀྲོལ་བྱེད་པ་ལ་བྱ་བ་འདི་ཐོང་ཞིག་མི་གཏོང་ན་གནས་ནས་དབྱུང་ངོ་ཞེས་བསྡིགས་པའོ། །དམད་པ་ནི་ལྷག་མ་ཕྱིར་མི་འཆོས་པར་རྒྱུན་དུ་བྱེད་པ་ལ་གང་ཟག་རང་དབང་ཅན་ཡིན་ཡང་གཞན་ལ་གནས་ཆོས་ཤིག་ཅེས་སྨོད་པའོ། །བསྐྲད་པ་ནི་ཁྱིམ་སུན་འབྱིན་པ་གནས་དེ་ནས་སྐྲོད་པའོ། །ཕྱིར་འགྱེད་ནི་ཁྱིམ་པ་སོགས་ལ་བརྙས་ཐབས་བྱེད་པ་ལ་མཛའ་གཅུགས་ཀྱི་དངོས་པོས་སྦྱང་ན་ཕྱིར་འགྱེད་པའོ། །གནས་དབྱུང་བདུན་ནི། མ་མཐོང་བ་གནས་ནས་དབྱུང་བ། ཕྱིར་མི་འཆོས་པ། སྡིག་ལྟ་ཅན། འཐབ་ཀྲོལ་བྱེད་པ། འཐབ་ཀྲོལ་གྱི་རྒྱུ་ཉེ་བར་སྒྲུབ་པ། དགེ་སློང་མ་དང་འདྲིས་ཤིང་གནས་པ། ཆོས་རྣམ་པར་གཏན་ལ་ཕབ་པས་ཞི་བར་མ་གྱུར་པ་གནས་ནས་དབྱུང་བའོ། །གདམས་ངག་བཞག་པས་མ་ཐུལ་བ་ལ་དགེ་འདུན་དང་ལྷན་ཅིག་གསོ་སྦྱོང་དང་དགག་དབྱེ་བྱེད་དུ་མི་འཇུག་པ་ནི་དེ་དང་དེ་བཞག་པའོ། །ལྷུང་བཟེད་ཁ་སྦུབ་ནི་སྤྱིར་ནན་ཏུར་ཡིན་ཡང་ཡུལ་ཁྱིམ་པ་ལ་བྱ་བ་ཡིན་པས་འདིར་མི་བགྲང་ངོ་། །དེ་ཡང་ནན་ཏུར་གང་ལ། གང་གིས། གང་གི་ཚེ། ཇི་ལྟར་བྱ་བ། བྱས་པའི་དགོས་པའོ། །དང་པོ་ནི། ནན་ཏུར་སོ་སོའི་གཞི་མ་ཞི་བར་ཡོད་ཅིང་དགེ་འདུན་བྱེ་འགྱུར་གྱི་དགག་བྱ་མེད་པའི་གང་ཟག་མངོན་དུ་འདུག་པ་ལའོ། །གཉིས་པ་ནི། དགེ་འདུན་མཚན་ཉིད་དང་ལྡན་པས་སོ། །གསུམ་པ་ནི། དབྱར་གྱི་ནང་མ་ཡིན་པའོ། །བཞི་པ་ལ་སྦྱོར་བ་གླེང་དྲན་དང་གཞམས་བསྒོ། དངོས་གཞི་གསོལ་བཞིའི་ལས། རྗེས་ལས་ཀྱི་མཇུག་སྡུད་དང་། འདི་ཉིད་དུ་ལྟུང་བ་ཕྱིར་བཅོས་པར་གྱིས་ཤིག །དགེ་འདུན་གྱིས་ཁྱོད་བག་ཡངས་སུ་བྱེད་པར་འགྱུར་རོ། །ཞེས་གོ་བར་བྱའོ། །ལྔ་པ་ནི། བྱ་བ་ངན་པ་རྒྱུ་བཅས་ལ་བཟློག་པ་དང་ལྟུང་བ་ཕྱིར་བཅོས་སུ་གཞུག་པའོ། །དེ་ལྟར་ནན་ཏུར་བྱས་པ་ལ་བརྟེན་ནས་བཟོད་པ་འབུལ་ན། དེ་རང་བཞིན་དུ་གནས་པ་ཐོབ་པའི་ཕྱིར་དགེ་འདུན་མཚན་ཉིད་དང་ལྡན་པས་བཟོད་པ་བླང་བ་ནི། སྦྱོར་བ་གསོལ་བཏབ་སྔོན་དུ་འགྲོ་བས། དངོས་གཞི་ལས་དང་། མཇུག་སྤྲོ་བ་སྐྱེད་པར་བྱེད་པའོ། །དེ་ཡང་ནན་ཏུར་བཅུ་གསུམ་ལས། དང་པོ་བཅུ་གཅིག་པོ་ས་གཞན་ན་གནས་པ་ཡིན་ལ། གསོ་དགག་བཞག་པ་ནི་ནན་ཏུར་ཡིན་ཡང་གཞན་ན་གནས་པ་མ་ཡིན་ནོ། །

གཉིས་པ་སྤྲོ་བ་མཐོལ་བཤགས་སོགས་ཀྱིས་ཕྱིར་བཅོས་པ་ལས། ལྷག་མེད་འཆབ་བཅས། ལྷག་མེད་འཆབ་མེད། ལྷག་མ་ཅན་གྱི་ཕྱིར་བཅོས་དང་གསུམ། དང་པོ་ལ། འཆབ་ཉེས་ངོས་བཟུང་བ། ལྷག་མེད་དེ་ལྡན་ལ་ཇི་ལྟར་བྱ་བའོ། །དང་པོ་ནི། འཆབ་པ་ཞེས་གྲགས་གསང་སྟེ་མི་བརྗོད་པ། །ཞེས་པ་སྟེ། ལྟུང་བ་བྱུང་བ་གསང་འདོད་ནི་འཆབ་སེམས་ཡིན་ལ། དེས་ཀུན་ནས་བསླངས་ཏེ་མི་བརྗོད་པར་གསང་བའི་ལུས་ངག་གི་ལས་ནི་འཆབ་པའི་ལྟུང་བ་སྟེ། དེ་ལའང་གང་གིས་ཉེས་པར་བྱེད་པ་རིག་བྱེད་དང་། གང་ཉེས་པར་བྱ་བའི་ངོ་བོ་རིག་བྱེད་མ་ཡིན་པའོ། །གང་ལ་འབྱུང་བའི་རྟེན་ནི་ལྟུང་བ་དང་ལྟུང་མིན་གྱི་རྣམ་དབྱེ་ཤེས་ཤིང་དྲན་ནུས་པའི་དགེ་སློང་ཉིད་ལས་གཞན་ལ་མི་འབྱུང་ཞིང་། སྤྱིར་འཆབ་ཉེས་ཙམ་གྱི་དབང་དུ་བྱས་ན་འཆབ་སེམས་སྐད་ཅིག་མ་གཅིག་སྐྱེས་ཀྱང་ལྟུང་བ་དེ་འཆབ་བཅས་སུ་འགྱུར་ལ། ཁྱད་པར་དགེ་འདུན་ལྷག་མའི་སྤོ་སྤྱོད་ལ་ཞག་ཏུ་བཅབས་པ་དགོས་ཏེ། ཉིན་མཚན་གྱི་མཐའ་མ་ཡིན་པ་ལ་འཆབ་ཉེས་མི་འབྱུང་ངོ་། །ཞེས་སོ། །

གཉིས་པ་ནི། ཕམ་པ་འཆབ་བཅས་ཚེ་འདིར་གསོར་མི་རུང་། །ཞེས་པ་སྟེ། བསླབ་པ་མ་ཕུལ་བར་ཕམ་པ་བཞི་གང་རུང་བྱུང་ནས་སྐད་ཅིག་མ་གཅིག་བཅབས་ཀྱང་ཚེ་འདིར་ལྟུང་བ་ཕྱིར་བཅོས་སུ་ཡོད་པ་མ་ཡིན་ཏེ། རྒྱུད་གསོར་མི་རུང་དུ་སོང་བའི་ཕྱིར། དེ་ལྟར་ཡང་། ཉེས་རྩོམ་བྱེད་དང་ཁྱིམ་སུན་འབྱིན་པ་དང་། །འདིར་ནི་གསུམ་པ་ཚུལ་ཁྲིམས་འཆལ་བ་དག །འཐབ་མོ་སྤངས་ཏེ་གཎྜི་བརྡུངས་བྱས་ནས། །ཆུ་ཤིང་རུལ་བ་བཞིན་དུ་དེ་བསྐྲད་བྱ། །ཞེས་སོ། །ཉེས་དམིགས་ནི། ཚུལ་འཆལ་དང་ལྷན་ཅིག་ཞག་ལོན་དུ་ཉལ་ན་ལོ་བྱེ་བ་ཕྲག་བཅུ་བཞི་དང་སྟོང་ཕྲག་བཅུ་བཞིར་དམྱལ་བར་སྐྱེ་བར་བཤད་དོ། །གལ་ཏེ་བསྐྲད་པ་དེ་སྡེ་སྣོད་འཛིན་པ་ཡིན་ན་དགེ་འདུན་དང་ལྷན་ཅིག་ལོངས་སྤྱོད་དུ་མི་དབང་ཡང་གནས་ལོངས་སྦྱིན་པ་སོགས་ཀྱིས་རྗེས་སུ་གཟུང་བར་བྱ་ཞིང་། དེ་འདྲ་དེས་བཟོད་པ་གསོལ་བའི་དུས་སུ་མ་བླངས་ན། དེ་ནས་བཟུང་སྟེ་གནས་ཆོས་ཀྱི་རྙེད་པའི་རིན་ཐང་རྩིས་ནས་ཚང་ན་དགེ་འདུན་ལ་ཕམ་པ་འབྱུང་བར་གསུངས་སོ། །

གཉིས་པ་ལྷག་མེད་འཆབ་མེད་ནི། འཆབ་པ་མེད་ན་དངོས་པོ་བརྗོད་པ་ཡིས། །དགེ་འདུན་ལ་བཤགས་མཐོང་སྡོམ་བར་གྱིས་འདག །སྡོམ་པ་སླར་ནོད། ཅེས་པ་སྟེ། འདིར་དགེ་འདུན་ལ་བཤགས་ནས་སྡོམ་པ་སླར་ནོད་པ་ལྟ་བུར་གསུངས་པ་ནི་སེམས་ཙམ་པ་ཡན་ཆོད་སླར་ཡང་གསོལ་བཞིའི་ལས་ཀྱིས་དགེ་སློང་གི་སྡོམ་པ་སྦྱིན་རྗེས་ཆད་པ་ལས་ཀྱིས་བསླབ་པ་སྟེར་བར་བཞེད་པ་དང་དགོངས་པ་མཐུན་ནམ་སྙམ་སྟེ་དཔྱད་པར་བྱ་ཞིང་། མདོའི་དགོངས་པ་ལྟར་ན། ཕམ་པ་བྱུང་ནས་སྐད་ཅིག་ཙམ་ཡང་མ་བཅབས་པ་ལ་ཆད་པ་ལས་ཀྱི་བསླབ་པ་སྦྱིན་ཏེ་སྤྱོད་པའི་སྒོ་ནས་ཕྱིར་བཅོས་པའོ། །ཇི་ལྟར་ན། དེས་གནོང་འགྱོད་དྲག་པོ་དང་བཅས་པས་དགེ་འདུན་གྱི་དྲུང་དུ་ཕྱིན་ནས་རྗེས་སུ་བཟུང་བར་ཞུས་ཏེ། སྦྱོར་བ་གསོལ་གདབ་སྔོན་དུ་འགྲོ་བས། དངོས་གཞི་གསོལ་བཞིའི་ལས་ཀྱིས་བསླབ་པ་སྦྱིན་ནས་ཇི་སྲིད་འཚོའི་བར་དུ་དམན་པའི་སྤྱོད་པ་ལྔ་དང་དུ་ལེན་ཞིང་ཁྱད་པར་གྱི་སྤྱོད་པ་ལྔ་སྤོང་བར་བསླབ་པའོ། །གང་གི་ཚེ་དགྲ་བཅོམ་པ་ཐོབ་ན་དེ་རང་བཞིན་དུ་གནས་པར་འགྱུར་ཏེ། འཁྲུལ་བའི་རྒྱུ་ཐམས་ཅད་སྤངས་པའི་ཕྱིར། དེར་མ་ཟད་རྩ་ལྟུང་ཐུན་མིན་བྱུང་སྟེ་བསླབ་པ་སྦྱིན་པ་མཚན་གྱུར་ནའང་བསླབ་པ་སྤྱད་མི་དགོས་སོ། །གལ་ཏེ་ཕམ་པ་འཆབ་མེད་ཅན་གྱིས་བསླབ་པ་ཕུལ་ཏེ་བླངས་ན་བསྙེན་རྫོགས་ཀྱི་སྡོམ་པ་སྐྱེ་ཞིང་། དགེ་ཚུལ་ལའང་བསླབ་སྦྱིན་རུང་བར་གསུངས་སོ། །

གསུམ་པ་ལྷག་མ་ཅན་གྱི་ཕྱིར་བཅོས་ནི། ལྷག་མ་བཅུ་གསུམ་སོགས། །ལྕི་ཡང་ལ་ལྟོས་བཤགས་ཏེ་རིམ་པར་ལྡང་། །ཞེས་པ་སྟེ། འདི་ལ་གཉིས། ནུས་པ་ཕྱིར་བཅོས་ཚུལ་དང་། མི་ནུས་པ་བྱིན་གྱིས་བརླབ་ཚུལ་ལོ། །དང་པོ་ལ་བཞི་ལས། དགེ་འདུན་ལྷག་མའི་ཕྱིར་བཅོས་ནི། ཞག་དང་མ་འབྲེལ་བའི་འཆབ་ཉེས་རྣམས་བསྒོ་གྱུར་ཡིན་ན་མཚམས་ནང་གི་དགེ་སློང་ཐམས་ཅད་དང་། མ་ཡིན་ན་དགེ་སློང་གཅིག་གི་དྲུང་དུ་མཐོལ་ལ། དངོས་གཞི་དག་བྱེད་དུ་མགུ་བ་ནོད་ནས་དབྱུང་བས་ཆོག་ཅིང་། གལ་ཏེ་ཞག་ཏུ་ལོངས་པའི་བཅབས་ཉེས་ནི། གང་ཟག་ཁྱད་པར་ཅན་མིན་པས་ཇི་ཙམ་བཅབས་པའི་གྲངས་དང་མཉམ་པའི་སྤོ་བ་མ་སྤྱད་པར་བཅབས་ཉེས་མི་འདག་པས་སྤོ་བ་ནོད་དགོས་ཏེ། སྦྱོར་བ་གསོལ་བ་གདབ་པ། དངོས་གཞི་གསོལ་བཞིིའ་ིིལས་ཀྱིས་སྤོ་བའམ། གཞི་ནས་སྤོ་བའམ། ཡང་གཞི་ནས་བསླང་བའི་སྤོ་བ་གསུམ་གང་རུང་སྟེར་བ་སྟེ། དེ་ལྟར་གསུམ་ནི་སྤོ་བ་བྱེད་བཞིན་པ་ལ་རིགས་འདྲའི་ལྷག་མ་གཉིས་པ་དང་གསུམ་པ་བྱུང་བའི་དབང་དུ་བྱས་པ་སྟེ། མགུ་བ་ལའང་འདྲ་ཞིང་། རིགས་འདྲ་བཞི་པ་བྱུང་ན་དམད་པ་ནན་ཏུར་བྱ་བའོ། །དེ་ལྟར་སྤོ་བ་སྤྱད་ཚར་བའམ། མ་བཅབས་ན་སྤོ་སྤྱོད་མི་དགོས་པས། ལྷག་མའི་དངོས་གཞི་འདག་པའི་ཆེད་དུ་དགེ་སློང་གིས་ཞག་དྲུག་དང་དགེ་སློང་མས་ཟླ་ཕྱེད་ཀྱི་བར་མགུ་བ་སྤྱད་དགོས་ཏེ། སྦྱོར་བ་གསོལ་གདབ། དངོས་གཞི་གསོལ་བཞིའི་ལས་ཀྱིས་མགུ་བ་གསུམ་གང་རུང་བྱིན། སྤོ་མགུ་གཉིས་ཀྱི་ལས་སུ་བྱ་བ་ནི་ཕལ་ཆེར་བསླབ་བྱིན་དང་འདྲ་བ་ལས། ཁྱད་པར་བྱིན་ལེན་སྟོབ་ཏུ་མི་རུང་། གཞན་མེད་ན་གསོ་སྦྱོང་གི་མདོ་འདོན་དུ་རུང་། གྲལ་ནི་སྤོ་བ་སྤྱོད་པས་བསླབ་བྱིན་གྱི་གོང་དང་མགུ་སྤྱོད་ཀྱི་འོག །མགུ་བ་སྤྱོད་པས་དགེ་སློང་རང་བཞིན་དུ་གནས་པ་རྣམས་ཀྱི་འོག་དང་སྤོ་སྤྱོད་ཀྱི་གོང་དུ་སྡོད་ཅིང་། དེ་གཉིས་ཀ་ལ་ཞག་རེ་བཞིན་དུ་འདས་འབྱུང་བརྗོད། གལ་ཏེ་སྤོ་བ་སྤྱོད་བཞིན་པའམ་སྤྱད་ཚར་ནས་མགུ་བའི་བར་དང་མགུ་བ་སྤྱོད་བཞིན་པའམ་ཟིན་ནས་དབྱུང་བའི་བར་རྣམས་སུ་འཐབ་ཀྲོལ་ཅན་འོང་པ་སོགས་ཀྱིས་རེ་ཞིག་འཕྲོ་འཇོག་དགོས་ན་བཞག་པས། དེ་དག་ལ་སྤོ་ལྡན་དང་མགུ་ལྡན་ཞེས་བྱ་ཞིང་། རྐྱེན་གྲོལ་རྗེས་སླར་འཕྲོ་ནས་སྤྱད། དེ་ལྟར་སྤོ་མགུ་སྤྱོད་པ་པོ་ཕ་མའི་ཁྱད་པར་གྱིས་གནས་དེའི་དགེ་སློང་རང་བཞིན་དུ་གནས་པ་བཞི་དང་། དགེ་སློང་ཕ་མ་བཞི་བཞི་སྟེ་བརྒྱད་ཡན་ཆད་ལ་སྤྱད་དགོས་སོ། །མགུ་བ་སྤྱད་ཟིན་ནས་དེ་ཉིད་ས་རང་བཞིན་དུ་གནས་པ་ཐོབ་པའི་ཕྱིར་དབྱུང་བ་བྱ་སྟེ། གནས་དེར་དགེ་སློང་དབྱུང་བ་ལ་དགེ་སློང་རང་བཞིན་དུ་གནས་པ་ཉི་ཤུ་དང་། དགེ་སློང་མ་དབྱུང་བ་ལ་ཕ་མ་ཉི་ཤུ་ཉི་ཤུ་སྟེ་བཞི་བཅུ་ཡན་ཆད་ཚང་བ་ལ་གསོལ་གདབ་སྔོན་དུ་བཏང་ནས། དངོས་གཞི་གསོལ་བཞིའི་ལས་བསྡིགས་པ་དང་བཅས་པ་བྱས་ལ། མཇུག་ཏུ་གཟེངས་བསྟོད་ཅིང་ཡི་རང་བས་རང་བཞིན་གྱི་གནས་སུ་དབྱུང་སྟེ། གཞན་གྱི་དཀུར་གནས་སུ་བྱེད་པའོ། །དམིགས་བསལ་གང་ཟག་ཁྱད་པར་ཅན་གྱི་ལྷག་མའི་ཕྱིར་བཅོས་ནི། ཇི་སྐད་དུ། ངོ་ཚ་དང་ལྡན་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དང་ཤེས་པས་ནི་གཅིག་གི་མདུན་བཤགས་པས་དགེ་འདུན་ལྷག་མ་ལས་ལྡང་ངོ་། །ཞེས་སོ། །གཉིས་པ་སྦོམ་པོ་ཕྱིར་བཅོས་ལ། ཕམ་པར་གཏོགས་པའི་སྦོམ་པོ་ལྕི་བ་ལ་ཡུལ་དགེ་སློང་དྲུག །ཡང་བ་ལ་ལྔ། ལྷག་མར་གཏོགས་པའི་སྦོམ་པོ་ལྕི་བ་ལ་བཞི། ཡང་བ་ལ་དགེ་སློང་གཅིག་གི་དྲུང་དུ་བཤགས་པས་འདག་གོ །གསུམ་པ་སྤང་ལྟུང་ནི། གང་ལ་བརྟེན་ནས་ལྟུང་བ་བྱུང་བའི་རྫས་ཏེ། ཆགས་པའི་ཞག་གཅིག་གི་གོང་རོལ་དུ་གཞན་ལ་སྤངས་ནས་བཤགས་པར་བྱ་བའོ། །བཞི་པ་འབའ་ཞིག་པ་སོགས་ནི་ཡུལ་དགེ་སློང་གཅིག་གི་དྲུང་དུ་རང་མིང་གིས་བཤགས་པར་བྱ་ཞིང་། ཁྱད་པར་སོར་བཤགས་མཚམས་ཀྱི་ཕྱིར་སོང་སྟེ་བཤགས་སོ། །སྤྱིར་ལྟུང་བ་གང་དང་གང་ཡིན་ཡང་འདྲ་སྟེ། ལུས་ངག་ཏུ་མ་འཐོན་པའི་ཡིད་ཀྱི་ཉེས་པ་རྣམས་ནི་འགྱོད་སྡོམ་གྱི་སེམས་བརྟེན་པ་ཙམ་གྱིས་ལྟུང་བ་ལས་ལྡང་བར་འགྱུར་ལ། ལུས་ངག་ཏུ་འཐོན་ནས་རང་རང་གི་ཕྱིར་བཅོས། ཐོག་མར་བཅབས་ཉེས་བཤགས་རྗེས་དངོས་གཞིའི་ཉེས་ལྟུང་དང་། ཡུལ་ཡོད་བཞིན་དུ་ཕྱིར་མ་བཅོས་པའི་ཉེས་པ་བཤགས་པ་སོགས་ལྟུང་བ་རང་རང་གི་མིང་རིགས་ཕྱེ་ནས་ཕྱིར་བཅོས་ཚུལ་ལ་མཁས་པར་བྱའོ། །མདོར་ན་ལྟུང་བ་བྱུང་རེས་ཀྱིས་མཐོལ་བ་དང་བཤགས་པ་དང་བསྡམས་པ་ལ་ཉིན་རེ་བཞིན་འབད་པར་བྱ་ཞིང་འཆི་ཁའི་ཚེ་ལྟུང་བ་མ་དག་པ་ཡོད་ན། ལུས་ངག་གིས་བཤགས་སྡོམ་བྱ་དགོས་མོད། དེ་ཙམ་མ་གྲུབ་ན་ཡིད་ཀྱིས་བཤགས་པས་ཀྱང་འདག་པར་འགྱུར་ཏེ། མདོར། མཐར་དེ་ལ་རྩལ་བ་རྐྱེན་མ་འབྱོར་བ་ཉིད་ན་ལས་བྱས་པ་དང་འདྲའོ། །ཞེས་གསུངས་པའི་ཕྱིར།

གཉིས་པ་མི་ནུས་པ་བྱིན་གྱིས་བརླབ་ཚུལ་ལ་གཉིས་ལས། ལས་གྲལ་དུ་མ་འདུས་གོང་དུ་བྱ་བ་ནི། ཕམ་པར་གཏོགས་པའི་སྦོམ་པོ་དང་དགེ་འདུན་ལྷག་མ་མན་ཆད་ཀྱི་ལྟུང་བ་རྣམས་ཆད་ལས་དགོས་པ་དག་སྔོན་དུ་མ་གྲུབ་པ་དང་། བཤགས་ཡུལ་མེད་པ་དང་། ལྟུང་ཕྱིར་རྩོད་པ་སོགས་ཀྱི་རྐྱེན་དབང་གིས་དུས་དེར་བཤགས་མ་ནུས་པ་རྣམས་བྱིན་གྱིས་བརླབས་པ་ཙམ་གྱིས་དག་པར་འཇོག་པ་ཡིན་ཏེ། བྱིན་གྱིས་བརླབས་པས་དག་པ་ཉིད་དུ་འགྱུར་རོ། །ཞེས་སོ། །གཉིས་པ་ལས་གྲལ་དུ་འདུས་ནས་བྱིན་གྱིས་བརླབ་པ་ནི། དེར་འདུས་ནས་བཤགས་པར་བྱ་བ་མི་རུང་བས་ལྟུང་བ་གང་དྲན་ཡང་ཐུན་མིན་གྱི་བྱིན་བརླབ་དང་། ཐུན་མོང་བ་གསོལ་བ་འབའ་ཞིག་པའི་ལས་ཀྱི་བྱིན་གྱིས་བརླབ་པ་ཡིན་ནོ། །

ཞར་བྱུང་དགེ་ཚུལ་གྱི་ཕྱིར་བཅོས་ལ། རྩ་བ་འཆབ་བཅས་ལ་ཕྱིར་བཅོས་མེད། འཆབ་མེད་ནི་དགེ་སློང་གི་དགེ་འདུན་ལས་བསླབ་པ་ནོས་ནས་སྤྱོད། རྩ་བ་མིན་པའི་བླངས་འདས་ཀྱི་ཉེས་པ་གང་བྱུང་དེ་དང་དེའི་མིང་རིགས་བརྗོད་ནས་དགེ་སློང་གཅིག་གི་དྲུང་དུ་མཐོལ་བཤགས་ལྷན་ཅིག་ཏུ་བྱ། བླངས་པ་དངོས་དང་གནང་བའི་ཉེས་མེད་རྣམས་མིན་པའི་ཉེས་པ་རྣམས་ཡིད་ཀྱིས་བསྡམས་པ་ཙམ་གྱིས་འདག་པ་ཡིན་ཞིང་། སྡིག་ལྟ་མི་གཏོང་བ་སོགས་ལ་དགེ་སློང་གི་དགེ་འདུན་གྱིས་ནན་ཏུར་གྱི་ལས་ཀྱང་བྱ་བ་ཡིན་ཏེ། རབ་ཏུ་བྱུང་ཞིང་བསྙེན་པར་མ་རྫོགས་པ་ལའང་དེ་དག་བྱ་བ་ཉིད་ཡིན་ནོ། །ཞེས་གསུངས་པའི་ཕྱིར། དེ་དག་གིས་ནི་ཕྱིར་བཅོས་དངོས་གཞི་དང་། དུས་དང་དུས་མིན་བསྡུས་པའི་གཞི་དང་། ས་གཞན་ན་གནས་པ་སྤྱོད་པའི་གཞི་རྣམས་ཀྱི་དོན་མདོ་ཙམ་བསྡུས་ནས་བཤད་པ་ཡིན་ལ། དེ་ལྟར་ནན་ཏུར་དང་བཤགས་པ་གཉིས་ཀྱིས་རང་ཉིད་ཀྱི་ལྟུང་བ་ཕྱིར་བཅོས་ཚུལ་བཤད་ཟིན་ནས། ད་ཡོངས་སུ་སྦྱང་བའི་གཞི་ལས་བྱུང་བ་གང་ཟག་གཞན་གྱི་ལྟུང་བ་ཕྱིར་བཅོས་ཚུལ་ནི། ཡུལ་ལྟུང་བ་གླེང་བའི་གཞི་ཡོད་ཅིང་དགེ་འདུན་བྱེ་འགྱུར་གྱི་དགག་བྱ་མེད་པའི་གང་ཟག་ལ། གླེང་བ་པོ་ཀུན་གྱི་མཐུན་སྣང་དུ་གྲུབ་པའི་དགེ་སློང་རྣམ་པར་དག་པས། ཕྱིར་བཅོས་ལ་འགོད་པར་འདོད་པའི་ལྷག་བསམ་གྱིས། དབྱར་ནང་ལ་སོགས་པ་མ་ཡིན་པའི་དུས་སུ། དངོས་པོ་ཚུལ་ཁྲིམས་ལྟ་སྤྱོད་འཚོ་བ་ཉམས་པ་བཞི་ལས་གང་རུང་། ཆོ་ག་ལྟུང་བ་ཡོད་མེད་རྣམ་པར་བརྟགས་ནས་གླེང་བའི་སྐབས་ཕྱེ་སྟེ་གླེང་བར་བྱེད་པའོ། །དེ་ལྟར་གླེང་ནས་ཇི་ལྟར་བསྒྲུབ་པ་ནི། ཁས་ལེན་ན་ཕྱིར་འཆོས་སུ་གཞུག །མི་དྲན་ནོ་ཞེས་ཁྱད་དུ་གསོད་ན་ངོ་བོ་ཉིད་འཚོལ་བ་བྱིན། རྫུན་གྱིས་ཁྱད་དུ་གསོད་ན་མ་མཐོང་བའི་གནས་དབྱུང་བྱེད། གླེང་ཡང་དེའི་སྐབས་མི་འབྱེད་ན་བརྗོད་བཅས་དང་། མཉན་པར་མི་བྱེད་ན་ཕུར་བཅས་བྱ་ཞིང་། གལ་ཏེ་དགེ་འདུན་ཐམས་ཅད་ལ་མི་ཉན་པའི་བཀའ་བློ་མི་བདེ་བ་བྱེད་ན་གླེང་དྲན་ལ་སོགས་པའི་སྒོ་ནས་གཞམས་བསྒོ་བྱེད། དེས་མ་དུལ་ན་གདམས་ངག་གི་འཕྲོ་དང་གསོ་དགག་འཇོག་པ་སྟེ། དེ་ཐམས་ཅད་ཀྱི་མཐའ་ལ་མ་བཏང་ན་གནས་དབྱུང་བྱ་བའོ། །

གཉིས་པ་རྩོད་པ་ཕྱིར་བཅོས་ལ་གསུམ་སྟེ། ལས་ཀྱི། འཁོར་ལོའི། དེ་ལས་གཞན་པའི་རྩོད་པ་ཞི་བྱེད་དོ། །དང་པོ་ནི། མཚམས་ནང་གཅིག་ཏུ་ཆོས་མ་ཡིན་པར་སྨྲ་བའི་དགེ་སློང་བཞིར་ལོངས་པས་ཆོས་སྨྲ་བའི་དགེ་འདུན་ལས་ལོགས་སུ་གསོ་སྦྱོང་སོགས་ལས་བྱས་པ་ཟིན་པ་ན་ལས་བྱེད་པའི་དབྱེན་དུ་འགྱུར་ཏེ། མཛོད་ལས། ལས་ཀྱི་དབྱེན་ནི་གླིང་གསུམ་ན། །དེ་ནི་བརྒྱད་དག་ཡན་ཆད་ཀྱིས། །ཞེས་དང་། ལུང་ལས། སུ་དག་གིས་ཀཽ་ཤམྦྷི་པའི་དགེ་འདུན་ཕྱེ་བར་གྱུར། ཆོས་མ་ཡིན་པ་སྨྲ་བ་དག་གིས་མཚམས་ཀྱི་ནང་དུ་གནས་གཅིག་ཏུ་གསོ་སྦྱོང་མ་འདྲེས་པར་བྱས། ཞེས་གསུངས་པའི་ཕྱིར། ཞི་བྱེད་ལ་གཉིས་ལས། རྒྱུ་སྤོང་བ་ནི། དགེ་འདུན་བྱེ་བའི་དགག་བྱ་ཡོད་པའི་ལྟུང་བ་གླེང་བ། ནན་ཏུར། བསྒོ་གྱུར། གྲངས་སུ་འཇུག་པ་སོགས་སྤང་ཞིང་། གཉེན་པོ་བསྟེན་པ་ནི། ནང་གི་གཉེན་པོ་དགེ་སྦྱོང་གི་ཆོས་བཞི་ལས་མི་འདའ་ཞིང་། ཕྱིའི་གཉེན་པོ་ལས་བྱེ་བའི་རྩོད་པ་བྱུང་ན་དགེ་འདུན་ལ་བཟོད་པ་གསོལ་ནས། དགེ་འདུན་གྱིས་གསོལ་བཞིའི་ལས་ཀྱིས་བཟོད་པ་དང་། མཐུན་པ་དང་། མཐུན་པའི་གསོ་སྦྱོང་བྱིན་ནས། དེའི་རྗེས་སུ་ཕན་ཚུན་མཉམ་དུ་མཐུན་པའི་གསོ་སྦྱོང་བྱ་བའོ། །གཉིས་པ་ནི། ཆོས་ཀྱི་འཁོར་ལོའི་མི་མཐུན་ཕྱོགས་སུ་བྱེ་བ་སྟེ། ལས་བྱེ་བ་དང་མི་འདྲ་བའི་ཁྱད་པར་ནི། འདིར་འབྱེད་པ་པོ་གཅིག་གིས་དགེ་འདུན་གཉིས་སོ་སོར་ཕྱེ་ཞིང་། དེའང་སྟོན་པ་དང་ལམ་གཞན་ལ་བཟོད་པས་ཚུལ་ཤིང་བྲིམ་ཞིང་བླངས་པ་ཡིན་ལ། ལས་བྱེ་བའི་གཞི་ནི་འབྱེད་པ་པོ་དགེ་འདུན་དུ་ལོངས་པས་དབྱེ་བྱ་དང་དབྱེ་བྱེད་ཐ་དད་དུ་ཕྱེ་བ་སྟེ། ཆོས་མིན་སྨྲ་བ་དག་གིས་མཚམས་ནང་གཅིག་ཏུ་ལས་ཐ་དད་དུ་བྱས་པ་ཙམ་དུ་ཟད་པའི་ཕྱིར། དེས་ན་དབྱེན་ལ་གཉིས་ཏེ། དགེ་འདུན་ལྷག་མར་གྱུར་བ་དང་། མཚམས་མེད་དུ་གྱུར་པའོ། །དང་པོ་ནི། སྟོན་པ་དང་མཆོག་ཟུང་གཅིག་འདས་པའི་འོག་ཏུ་ལས་དང་པོ་པ་མ་ཡིན་པའི་དགེ་སློང་གིས། བསླབ་ཚིགས་ལྔ་ལྟ་བུ་སློབ་པའི་ཆེད་དུ་ཚུལ་ཤིང་བྲིམས་པའི་ལས་བྱས་པ་སྟེ། དེའི་ཚེ་ལྡོག་བསྒོའི་མཐར་མ་བཏང་ན་བྲིམ་པ་པོ་ལ་དབྱེན་གྱི་ལྷག་མ་དང་། ལེན་པ་པོ་ལ་དེ་རྗེས་ཕྱོགས་ཀྱི་ལྷག་མར་འགྱུར་རོ། །གཉིས་པ་ནི། མཛོད་ལས། དགེ་སློང་ལྟ་སྤྱོད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས། །སྟོན་དང་ལམ་གཞན་ལ་བཟོད་པ། །བྱེ་བའོ་དེ་ནི་མི་གནས་སོ། །དེ་ནི་འཁོར་ལོའི་དབྱེན་དུ་འདོད། །འཛམ་བུའི་གླིང་ནའོ་དགུ་སོགས་ཀྱིས། །ཞེས་དང་། དང་པོ་མཐའ་སྐྱོན་ཟུང་གཅིག་གི །སྔ་རོལ་ཐུབ་པ་ནོངས་པ་དང་། །མཚམས་མ་བཅད་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །ཞེས་པས་འབྱེད་པ་པོ་དགེ་སློང་ལྟ་སྤྱོད་ཚུལ་ལྡན་གྱིས། གནས་སྟོན་པའི་མདུན་ལས་གཞན་དུ། དབྱེ་བྱ་བྱིས་པའི་དགེ་འདུན། མཐར་ཐུག་སངས་རྒྱས་ལས་གཞན་པའི་སྟོན་པ་ལྷས་བྱིན་དང་། དམ་ཆོས་ལས་གཞན་པ་ལྷས་བྱིན་གྱི་བརྟུལ་ཞུགས་ལྔ་ལ་ལམ་དུ་བཟོད་ཅིང་ཚུལ་ཤིང་བླངས་པ་ན་བྱེ་བའོ། །ཕྱེ་ནས་ཞག་རངས་པར་མི་གནས་ཤིང་། གླིང་འཛམ་བུ་གླིང་ལས་གཞན་ན་མེད་ལ། དབྱེ་བྱ་ཕན་ཚུན་དགེ་སློང་བཞི་བཞི་དང་འབྱེད་པ་པོ་གཅིག་སྟེ་དགུ་ཚང་བ་དགོས་སོ། །དུས་ནི་སྟོན་པ་བཞུགས་ཤིང་མྱ་ངན་ལས་འདའ་ཁ་མ་ཡིན་པ་དང་། བསྟན་པ་ལ་སྐྱོན་བྱུང་བའི་དུས་མ་ཡིན་པ། མཆོག་ཟུང་གཅིག་བསྐོས་པའི་དུས་སུ་མཚམས་ནང་གཅིག་ཏུ་བྱུང་བའོ། །འདི་ལ་ལྟུང་བ་ནི་དབྱེན་དུ་གཏོགས་པའི་སྦོམ་པོ་དང་། སྡིག་པ་མཚམས་མེད་པའོ། །འདིའི་ཕྱིར་བཅོས་ནི་ལུང་ལས་མཆོག་ཟུང་གཅིག་གིས་འདུམས་མཛད་པར་བཤད་པ་དེའོ། །སྔ་མ་ལ་བཟོད་གསོལ་དང་མཐུན་པ་བྱིན་རྗེས་མཐུན་པའི་གསོ་སྦྱོང་དང་ཉ་ཤིའི་གསོ་སྦྱོང་ལྷན་ཅིག་ཏུ་བྱ་ཞིང་། སྤོ་མགུ་སོགས་ལྷག་མའི་ཕྱིར་བཅོས་ཆོ་ག་བཞིན་དུ་བྱ་བ་སྟེ། འདི་བཟློག་བསྒོའི་མཐར་མ་བཏང་ཞིང་དགེ་འདུན་མ་བྱེ་བའི་དབང་དུ་བྱས་ལ། དེས་དགེ་འདུན་བྱེ་བར་གྱུར་ན་འབྱེད་པ་པོ་ལ་མཚམས་མེད་དུ་འགྱུར་རོ། །དབྱེན་གྱི་ཉེས་དམིགས་ནི། དགེ་འདུན་ཕྱེས་ནས་མ་འདུམས་ཀྱི་བར་དུ་སྟོན་པ་གཅིག་གི་ཞིང་ཁམས་སུ་ལམ་ལྔ་གང་ཡང་མི་སྐྱེའོ། །ཞེས་སོ། །

གསུམ་པ་དེ་ལས་གཞན་པའི་རྩོད་པ་ལ། ཞི་བྱ་དང་། ཞི་བྱེད་གཉིས། དང་པོ་ལ། ངོ་བོ། རྒྱུ། དབྱེ་བའོ། །དང་པོ་ནི། ཕ་རོལ་པོས་མི་མཐུན་པར་སྨྲས་པའི་ཚིག་གི་ཕྱིར་སེམས་གཞོལ་བའི་འཁོན་དུ་འཛིན་པའི་འཁྲུགས་ལོང་། གཉིས་པ་ནི། ནང་གི་རྒྱུ་བདག་འཛིན་དང་ཕྱིའི་རྒྱུ་དངོས་པོའི་དེ་བཞིན་ཉིད་ལ་ལོག་པར་སྒྲུབ་པ། གདམས་ངག་སྤོང་བ། ལྟུང་བ་དང་བཅས་པ། ལས་ལ་མཐུན་པ་མི་སྦྱིན་པ་སྟེ་འཁྲུགས་ལོང་གི་རྒྱུ་བཞིའོ། །གསུམ་པ་དབྱེ་བ་ལ། རྒྱུ་བཞི་པོ་དེའི་རིམ་པ་དང་མཐུན་པའི་རྩོད་པ་བཞི་ཡོད་དེ། འདུས་བྱས་རྟག་མི་རྟག་ལྟ་བུར་རྒོལ་ཕྱིར་རྒོལ་རྩོད་པ་ལྟ་བུ་འགྱེད་ཕྱིར་གྱི་རྩོད་པ་དང་། གདམས་ངག་གསོ་དགག་བཞག་པ་ལ་འཇོག་པ་པོ་དང་གཞག་བྱ་རྩོད་པ་ལྟ་བུ་མི་གདམས་པའི་ཕྱིར་གྱི་རྩོད་པ་དང་། ལྟུང་བ་གླེང་པས་ཁས་མི་ལེན་པ་གླེང་བྱ་གླེང་བྱེད་རྩོད་པ་ལྟུང་ཕྱིར་རྩོད་པ་དང་། རྩོད་པ་དེ་གསུམ་གྱི་དབང་གིས་གསོ་སྦྱོང་སོགས་ཀྱི་ལས་ལ་མཐུན་པ་མི་སྦྱིན་པས་རྩོད་པར་གྱུར་པ་བྱ་ཕྱིར་གྱི་རྩོད་པ་དང་བཞིའོ། །གཉིས་པ་ཞི་བྱེད་ལ་གཉིས་ལས། སྤྱིར་རང་གི་ངང་གིས་ཞི་བ་ནི། རྩོད་པ་བྱེད་པ་པོ་རྣམས་ཤི་བའམ། བབས་པའམ། ཤེས་རབ་དང་སྙིང་རྗེ་ཁྱད་པར་ཅན་རྒྱུད་ལ་སྐྱེས་པའི་སྟོབས་ཀྱིས་རྩོད་པ་རང་ཞིར་སོང་བའོ། །གཉིས་པ་སོ་སོའི་ཞི་བྱེད་ཀྱི་ཆོས་ནི། རྩ་བའི་ལུང་ལས། མངོན་སུམ་དྲན་པ་མ་མྱོས་དང་། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླངས་པར་ནི་བྱ་བའོ། །ཞེས་པ་ལྟར་ཞི་བྱེད་བདུན་འཇུག་སྟེ། དེ་ལ་འགྱེད་ཕྱིར་རྩོད་པ་ནི། མངོན་སུམ་དང་གང་མང་གིས་ཞི་བར་བྱེད་པའོ། །མངོན་སུམ་ནི་བརྒྱད་དེ། རྒོལ་དང་གཟུ་དང་དགེ་འདུན་གཞི་བོ་དང་། །གསལ་བ་དང་ནི་གསལ་བའི་གསལ་བ་དང་། །དགེ་འདུན་གཞན་དང་སྡེ་སྣོད་འཛིན་པ་དང་། །གནས་བརྟན་མཐུ་དང་ལྡན་པའི་མངོན་སུམ་མོ། །དེ་དག་སྔ་མ་སྔ་མས་མ་ཞི་ན་ཕྱི་མ་ཕྱི་མས་ཞི་བར་བྱེད་པའོ། །གང་མང་ནི། མངོན་སུམ་གྱིས་ཞི་བར་མ་ནུས་ན། དགེ་འདུན་གྱིས་ཚུལ་ཤིང་བྲིམས་ཏེ་གང་མང་གི་ཕྱོགས་ལ་དག་པ་བྱིན་ནས་ཞི་བར་བྱེད་པའོ། །མི་གདམས་པའི་ཕྱིར་རྩོད་པ་ཞི་བྱེད་ནི། གང་ཟག་དེ་ལ་ལྟུང་བ་གླེང་རྒྱུ་ཡོད་པ་ལ་སྔར་བཞིན་མངོན་སུམ་པས་ཞི་བར་བྱེད། དེའི་ཚེ་གླེང་རྒྱུ་མེད་པ་ལ་བཞི་སྟེ། གཞི་མེད་པར་གླེང་བ་དང་། གཞི་གཞན་ལ་གཞན་གྱིས་གླེང་བ་དང་། ཕྱིར་བཅོས་ཟིན་གླེང་བ་དང་། སྨྱོན་པས་བྱས་པ་ལ་གླེང་བ་དང་བཞི་ལས། དང་པོ་གསུམ་ལ། གང་ཟག་འདི་ནི་དྲན་པ་དང་ལྡན་པ་ཡིན་པས་འདི་ལ་ལྟུང་བ་མེད་དོ་ཞེས་གསོལ་བཞིའི་ལས་ཀྱིས་དྲན་པས་འདུལ་བ་བྱིན་པ་དང་། བཞི་པ་ལ་འདི་མ་སྨྱོས་པའི་དུས་སུ་ཉེས་པ་མ་བྱས་པས་སྨྱོས་པ་ལ་ལྟུང་བ་མེད་དོ་ཞེས་གསོལ་བཞིའི་ལས་ཀྱིས་མ་སྨྱོས་པས་འདུལ་བ་བྱིན་ནོ། །ལྟུང་ཕྱིར་གྱི་རྩོད་པ་ཞི་བྱེད་ལ་གཉིས་ཀྱི། ཉེས་པ་རང་གི་ངོ་བོ་མི་ཤེས་པ་ལ་ངོ་བོ་ཉིད་འཚོལ་བ་གསོལ་བཞིས་བྱིན་ནོ། །རང་གི་ངོ་བོ་ཤེས་པ་ལའང་གཉིས་ཀྱི། གླེང་བྱ་གླེང་བྱེད་གཉིས་ཁོ་ན་ལས་གཞན་ལ་ཕྱིར་འཕྲོས་པ་མེད་པ་ཁས་བླངས་ཀྱིས་ཞིའོ། །གཞན་ལ་ཕྱིར་འཕྲོས་པ་དང་བཅས་པ་ལའང་གཉིས་ལས། གང་ཟག་ཉི་ཚེ་བ་དང་འབྲེལ་བ་ལ་མངོན་སུམ་གྱིས་འདུལ་བ་དང་། དགེ་འདུན་མཐའ་དག་དང་འབྲེལ་བ་ནི་རྩྭ་བཀྲམ་པ་ལྟར་ཕན་ཚུན་འདུད་དེ་ཐམས་ཅད་བློ་རྩེ་མཐུན་པས་ཞི་བར་བྱེད་དོ། །བྱ་ཕྱིར་གྱི་རྩོད་པ་ནི། ལས་ལ་མཐུན་པ་སྦྱིན་པས་དངོས་སུ་ཞི་བར་བྱེད་ཅིང་། བརྒྱུད་ནས་ཞི་བྱེད་བདུན་པོ་ཐམས་ཅད་འཇུག་པ་ཡིན་ཏེ། རྩོད་པ་སྔ་མ་གསུམ་ལ་བརྟེན་ནས་ལས་ལ་མཐུན་པ་མི་སྦྱིན་པ་འབྱུང་བའི་ཕྱིར་རོ། །

གསུམ་པ་ཉེས་ལྟུང་སྦྱོང་བའི་ཐབས་སྟོབས་བཞིར་འདུ་ཚུལ་ནི། མདོར་ན་སྟོབས་བཞིར་མ་འདུས་བཤགས་པ་མེད། །སྔར་བྱས་འགྱོད་བཤགས་དུག་འཐུངས་སྐྱུག་པ་ལྟར། །འགྱོད་པ་སྙིང་ནས་རྣམ་པར་སུན་འབྱིན་སྟོབས། །དུག་ལ་སྨན་བཞིན་འཇུག་པ་དྲག་པོ་ཡིས། །ཉེས་ཕྱིར་དགེ་བའི་གཉེན་པོ་ཀུན་སྤྱོད་སྟོབས། །དུག་མི་འཐུང་ལྟར་ཕྱིས་ནས་ཉེས་སྡོམ་ལ། །ངེས་ཤེས་དྲག་པོ་རྣམ་པར་སོར་ཆུད་སྟོབས། །སྨན་པ་བསྟེན་ལྟར་སྐྱབས་སེམས་ལྟུང་བཤགས་སོགས། །དད་པ་དྲག་པོས་རྟེན་གྱི་སྟོབས་བཞིན་སྤྱད། །ཅེས་པ་སྟེ། སྡིག་ལྟུང་གང་ཡིན་ཡང་སྦྱོང་བའི་གཉེན་པོ་མདོར་བསྡུ་ན་སྟོབས་བཞིར་མ་འདུས་པ་མེད་དེ། དཔེར་ན་སྐྱེས་བུ་དུག་བཏུངས་པས་དུག་ནད་ཀྱིས་ཉེན་པ་ཞིག །སྔར་བཏུངས་པ་ལ་འགྱོད་པ་དང་། ཕྱིས་མི་འཐུང་བའི་སྡོམ་སེམས་དང་། དུག་ནད་སྦྱོང་བའི་གཉེན་པོར་སྨན་དང་སྨན་པ་བསྟེན་པ་བཞིན་ནོ། །དེ་ལྟར་ཡང་། ཆོས་བཞི་བསྟན་པའི་མདོ་ལས། བྱམས་པ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང་། གཉེན་པོ་ཀུན་ཏུ་སྤྱོད་པ་དང་། སོར་ཆུད་པའི་སྟོབས་དང་། རྟེན་གྱི་སྟོབས་སོ། །ཞེས་གསུངས་པའི་ཕྱིར་རོ། །དེ་ཡང་བཤགས་པས་འདག་པའི་རྒྱུའི་གཙོ་བོ་ནི་འགྱོད་སྡོམ་གྱི་སེམས་དྲག་པོ་སྟེ། བསམ་པས་ལྟུང་བ་ལས་ལྡང་གི །ཆད་པ་ལས་ཀྱི་ནི་མ་ཡིན་ནོ། །ཞེས་དང་། རྒྱ་ཆེར་འགྲེལ་ལས། བཤགས་པར་བྱ་བའི་ལྟུང་བ་ལས་ནི་བསྡམ་པར་བྱ་བ་དེ་དང་བཅས་པའི་བཤགས་པ་བྱས་ན་ལྡང་བ་སྟེ། དག་པ་དང་མ་དག་པ་ནི་བསམ་པའི་གཞི་ལས་བྱུང་བ་ཡིན་པས། བསྡམ་པར་བྱ་བ་མེད་ན་བཤགས་པས་ཅིར་ཡང་མི་འགྱུར་རོ། །འདིར་གཞུང་ནི། ཕྱིན་ཆད་སྡོམ་མམ། སྡོམ་མོ་ཞེས་གསུངས་པ་ཡིན་ནོ། །ཚིག་ཏུ་བརྗོད་པ་ནི་སེམས་ལྡོག་པ་སྔོན་དུ་བཏང་བས་ཡིན་གྱི། གཞན་དུ་རྫུན་སྨྲ་བ་ཁོ་ནར་འགྱུར་རོ། །ཞེས་སོ། །དེས་ན་སྔར་སྨོས་པ་ལྟར་འགྱོད་སྡོམ་དྲག་པོས་རང་རང་གི་ཆོ་གའི་ལྟུང་བ་ལས་ལྡང་བའི་ཐབས་ལ་མཁས་པར་བྱ་ཞིང་། དེ་ལས་གཞན་དུ་ལྟུང་བཤགས་སོགས་ཐེག་པ་གཞན་གྱི་སྟོབས་བཞི་ཚང་བའི་བཤགས་པས་ནི་ཆོས་འདི་པའི་ལུགས་ཀྱི་རྒྱུ་ལྟུང་བ་ལས་ལྡང་མི་ནུས་ལ། དེ་ལྟ་ནའང་ལྟུང་བའི་འབྲས་བུ་ཕྱི་མའི་སྡུག་བསྔལ་བསྐྱེད་ནུས་རྣམས་འདག་ནུས་པའི་ཕྱིར་འབད་པར་བྱས་ན་དོན་དང་ལྡན་པ་ཁོ་ནའོ། །

བཞི་པ་ཉེས་དམིགས་ཤེས་པས་ནན་ཏན་དུ་བསྲུང་བར་གདམས་པ་ནི། འོན་ཀྱང་སྡིག་ལྟུང་སྟོབས་ལྡན་རེས་སྤྱོད་ན། །ས་ཐོབ་ཡུན་དུ་འགོར་བས་མིག་ལྟར་བསྲུང་། །ཞེས་པ་སྟེ། དཔེར་ན་རྩ་ལྟུང་འཆབ་མེད་ལ་བསླབ་པ་སྦྱིན་ནས་ཕྱིར་བཅོས་སུ་ཡོད་མོད། འོན་ཀྱང་ཇི་སྲིད་དགྲ་བཅོམ་པ་མ་ཐོབ་ཀྱི་བར་དེ་སྲིད་དུ་ཕམ་པའི་དངོས་གཞི་འདག་མི་ནུས་ཤིང་། དེ་འདྲ་དེས་དགྲ་བཅོམ་པ་ཐོབ་པ་ཡང་གཞན་ལས་ཆེས་དཀའ་བ་བཞིན་དུ། སྦྱང་བྱ་སྡིག་ལྟུང་སྟོབས་ལྡན་རེ་རེ་ཙམ་ལ་སྤྱད་ནས། དེའི་གཉེན་པོར་སྦྱོང་བྱེད་ལ་འབད་དུ་ཟིན་ཀྱང་རྒྱུད་ཉེས་པས་བསྒྲིབས་པ་དེས་རྣམ་གྲོལ་གྱི་ས་ཐོབ་པ་ལ་ཡུན་རིང་དུ་འགྱངས་ཏེ་འགོར་བ་ཡིན་ནོ། །དེ་ལྟར་ཡང་སྤྱོད་འཇུག་ལས། དེ་ལྟར་ལྟུང་བ་སྟོབས་ལྡན་དང་། །བྱང་ཆུབ་སེམས་སྟོབས་ལྡན་པ་དག །འཁོར་བར་རེས་ཀྱིས་འདྲེ་བྱེད་ན། །ས་ཐོབ་པ་ལ་ཡུན་རིང་ཐོགས། །ཞེས་དང་། འདུལ་ལུང་དུ་ཚུལ་ཁྲིམས་མ་བསྲུངས་པའི་ཉེས་དམིགས་བཅུ་གསུམ་པའི་ནང་ཚན་དུ། དམ་ཆོས་ཐོས་པར་མི་འགྱུར་ལ། །ཐོས་པ་མྱུར་དུ་བརྗེད་པར་འགྱུར། །ས་ལམ་རྟོགས་པའང་ཡོངས་མི་སྐྱེ། །ཞེས་དང་། འཇམ་དཔལ་རྩ་རྒྱུད་ལས། ཟློས་པ་འདི་ལ་ཚུལ་ཁྲིམས་ཉམས། །དེ་ལ་གྲུབ་པ་མཆོག་མེད་ཅིང་། །གྲུབ་པ་འབྲིང་པོའང་ཡོད་མིན་ཏེ། །གྲུབ་པ་ཐ་མའང་ཡོད་མ་ཡིན། །ཚུལ་ཁྲིམས་འཆལ་ལ་ཐུབ་དབང་གིས། །སྔགས་འགྲུབ་པ་ནི་མ་གསུངས་ཏེ། །མྱ་ངན་འདས་གྲོང་འགྲོ་བ་ཡི། །ཡུལ་དང་ཕྱོགས་ཀྱང་མ་ཡིན་ནོ། །ཞེས་གསུངས་པའི་ཕྱིར། དེས་ན་ལྟུང་བ་ཕྲ་ཞིང་ཕྲ་བ་ནས་མིག་གི་འབྲས་བུ་ལྟར་བཅེས་སྤྲས་ཀྱིས་བསྲུང་དགོས་ཏེ། ཉེས་པ་ཆུང་ངུས་ཀྱང་རྣམ་སྨིན་ཆེན་པོ་བསྐྱེད་ནུས་པའི་ཕྱིར་ཏེ། ལུང་ལས། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལ་རྒྱལ་པོའི་ཚིག་ཆེན་པོ། །ལན་འགའ་འདས་ནའང་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདས་བྱས་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་གསུངས་ཤིང་། མདོར་ན་ཕམ་ལྷག་སྦོམ་པོ་ལྟུང་བྱེད་སོར་བཤགས་ཉེས་བྱས་རྣམས་ལས་འདས་ན་རིམ་པར་ཚ་བའི་དམྱལ་བ་ནས་ཡང་སོས་ཀྱི་བར་དུ་སྐྱེ་བར་མདོ་ལས་བཤད་དོ། །

བདུན་པ་བསྲུངས་པའི་ཕན་ཡོན་ལ་གསུམ་སྟེ། ཚུལ་ཁྲིམས་ཙམ་གྱི་ཕན་ཡོན། སོ་ཐར་གྱི་སྡོམ་པའི་ཕན་ཡོན། དེ་ཡོན་ཏན་ཐམས་ཅད་ཀྱི་གཞི་རྟེན་དུ་འགྱུར་བའི་ཕན་ཡོན་ནོ། །དང་པོ་ནི། ཕན་ཡོན་ནད་དང་རྒྱལ་པོའི་ཆད་ཕྱིར་བླངས། །རྐྱེན་འགའ་སེལ་ཡང་འཇིགས་སྐྱོབ་ཚུལ་ཁྲིམས་ཡིན། །ཕྱི་མའི་ཆེད་བླངས་ལེགས་སྨོན་ཚུལ་ཁྲིམས་ཞེས། །ལྷ་མིའི་བདེ་འབྲས་ཐོབ་ཀྱང་ཐར་པ་མིན། །ཞེས་པ་སྟེ། ཚེ་འདིར་ནད་དང་རྒྱལ་པོའི་ཆད་པ་སོགས་ལས་ཐར་བའི་ཕྱིར་བླངས་པ་འཇིགས་སྐྱོབ་ཀྱི་ཚུལ་ཁྲིམས་དང་། ཕྱི་མར་ལྷ་མིའི་བདེ་འབྲས་ཙམ་ཐོབ་པའི་ཕྱིར་བླངས་པ་ནི་ལེགས་སྨོན་གྱི་ཚུལ་ཁྲིམས་ཞེས་བྱ་སྟེ། དེ་དང་དེས་རང་རང་གི་འདོད་འབྲས་ཚེ་འདིའི་འག །ལ་རྐྱེན་སེལ་བ་དང་ཕྱི་མར་ལྷ་མིའི་བདེ་འབྲས་ཙམ་ཐོབ་པར་འགྱུར་ཡང་། ངེས་འབྱུང་གི་བསམ་པས་མ་ཟིན་པས་འཁོར་བ་ལས་ཐར་བའི་ཐབས་མ་ཡིན་ནོ། །

གཉིས་པ་ནི། ངེས་པར་འབྱུང་བའི་ཚུལ་ཁྲིམས་སྡོམ་ལྡན་ན། །དགྲ་བཅོམ་ཐོབ་པ་དགའ་བོའི་རྣམ་ཐར་བཞིན། །ཞེས་པ་སྟེ། འཁོར་བ་ལས་ངེས་པར་འབྱུང་བ་མྱང་འདས་གསུམ་གང་རུང་གི་བསམ་པས་ཟིན་པའི་སྒོ་ནས་ལེགས་པར་བླངས་པའི་ཚུལ་ཁྲིམས་རིགས་བརྒྱད་པོ་གང་ཡིན་ཡང་སོ་ཐར་གྱི་སྡོམ་པ་སྟེ། འཁོར་བ་ལས་ངེས་པར་ཐར་བར་བྱེད་པའི་སྡོམ་པ་ཡིན་པའི་ཕྱིར། སྡོམ་པ་དེ་དང་ལྡན་ན་བསླབ་བྱ་ཕྲ་མོ་གཅིག་ལ་བསླབས་པ་ཡན་ཆད་མྱང་འདས་ཀྱི་རྒྱུར་འགྲོ་བས་ཚེགས་མེད་པར་དགྲ་བཅོམ་པའི་འབྲས་བུ་ཐོབ་པར་འགྱུར་ཏེ། དཔེར་ན་གཅུང་དགའ་བོས་དང་པོར་སྟོན་པའི་བཀས་དབང་མེད་དུ་སྡོམ་པ་བླངས། དེ་རྗེས་སྟོན་པའི་རྫུ་འཕྲུལ་གྱིས་ཁྲིད་དེ་ལྷའི་བུ་མོ་བསྟན་པས་ཕྱི་མ་དེ་དང་ལྷན་ཅིག་སྐྱེ་བར་འདོད་ནས་བསླབ་པ་ལ་བརྩོན་པས་སྔར་གྱི་སྡོམ་རྒྱུན་དེ་ལེགས་སྨོན་གྱི་ཚུལ་ཁྲིམས་སུ་གྱུར། དེའི་འོག་ཏུ་དམྱལ་བའི་སྡུག་བསྔལ་བསྟན་པས་ངེས་འབྱུང་སྐྱེས་ཏེ། དེ་ཕྱིན་ཆད་སོ་ཐར་གྱི་སྡོམ་པར་གྱུར་ནས་ལེགས་པར་བསླབས་པས་དགྲ་བཅོམ་པའི་འབྲས་བུ་ཐོབ་པ་བཞིན་ནོ། །དེར་མ་ཟད་གནས་སྐབས་ཀྱི་ཕན་ཡོན་ཡང་། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་བསྔགས་པར་འོས་པ་དང་། འཕགས་ནོར་བདུན་གྱིས་ཕྱུག་པ་དང་། འགྱོད་པ་མེད་པར་འཆི་བའི་དུས་བྱས་ནས། སྐྱེ་བ་ཕྱི་མར་ཕམ་པ་བསྲུངས་པས་གཞན་འཕྲུལ་དབང་བྱེད། དགེ་འདུན་ལྷག་མས་འཕྲུལ་དགའ། སྦོམ་པོས་དགའ་ལྡན། ལྟུང་བྱེད་ཀྱིས་འཐབ་བྲལ། སོར་བཤགས་དང་ཉེས་བྱས་རྣམས་བསྲུངས་པས་རི་རབ་ལ་གནས་པའི་ལྷའི་གནས་སུ་སྐྱེ་བར་འགྱུར་ཞིང་། མཐར་ཐུག་འགྱོད་པ་མེད་པའི་ཚུལ་ཁྲིམས་རྣམ་པར་དག་པ་ལ་བརྟེན་ནས་དམིགས་པ་ལ་རྩེ་གཅིག་པའི་ཏིང་ངེ་འཛིན་འགྲུབ་ཅིང་། དེ་ལ་བརྟེན་ནས་རྣམ་པར་མི་རྟོག་པའི་ཤེས་རབ་ཀྱིས་འཁོར་བའི་རྩ་བ་བདག་ཏུ་འཛིན་པ་བཅད་ནས་ངེས་པར་འབྱུང་བ་ལྷག་མེད་ཀྱི་མྱང་འདས་ཐོབ་པར་འགྱུར་ཏེ། ས་གའི་ལྷས། རབ་སྔགས་ནོར་ནི་ཕུན་ཚོགས་ཤིང་། །ལྷ་ཡི་ཁང་བཟང་དམ་པར་སྐྱེ། །ཏིང་ངེ་འཛིན་དང་ངེས་འབྱུང་ཐོབ། །ཚུལ་ཁྲིམས་འདི་ནི་འབྲས་བུ་ཆེ། །ཞེས་དང་། དགེ་སློང་ལ་རབ་ཏུ་གཅེས་པའི་མདོ་ལས། ཤིན་ཏུ་ལེགས་པར་ཚུལ་ཁྲིམས་གང་། །བསྡམས་པའི་མི་དེ་མཛེས་པའི་གཟུགས། །འདུལ་བ་ལ་ནི་ཉེ་བར་གནས། །ཚུལ་ཁྲིམས་བསླབ་པ་རང་ཡིད་ཆེས། །མི་དེ་ཉི་མ་གཅིག་ལ་ཡང་། །བསོད་ནམས་ཕུང་པོ་དཔག་ཏུ་མེད། །གསོག་ཅིང་སངས་རྒྱས་འབྲས་བུ་འགྲུབ། །ཅེས་དང་། སྨན་གཞི་ལས། དགེ་སློང་དག་ཚུལ་ཁྲིམས་གོམས་པར་བྱས་ན། ཏིང་ངེ་འཛིན་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་གོམས་པར་བྱས་ན་ཤེས་རབ་ཡུན་རིང་དུ་གནས་པར་འགྱུར་རོ། །ཤེས་རབ་གོམས་པར་བྱས་ན་འདོད་ཆགས་དང་ཞེ་སྡང་དང་གཏི་མུག་ལས་སེམས་ཡང་དག་པ་ཁོ་ནར་རྣམ་པར་གྲོལ་བར་འགྱུར་རོ། །ཞེས་སོ། །

གསུམ་པ་ནི། སྐྱབས་གསུམ་འཛིན་སོགས་ཡོན་ཏན་ཕྱི་མ་མཆོག །སྔ་མ་ཕྱི་མའི་ཐུན་མོང་ལམ་ཡིན་ཕྱིར། །སེམས་བསྐྱེད་སྔགས་ཀྱི་གདུལ་བྱའང་དེ་དང་མཚུངས། །དེ་ཕྱིར་ཡོན་ཏན་ཀུན་གྱི་གཞི་རྟེན་ཡིན། །ཞེས་པ་སྟེ། མྱང་འདས་ལས། གང་སུ་གསུམ་ལ་སྐྱབས་འགྲོ་བ། །དེ་དག་མྱུར་དུ་སངས་རྒྱས་འགྱུར། །ཞེས་གསུངས་པ་ལྟར་གྱི་སྐྱབས་གསུམ་འཛིན་པའི་ཕན་ཡོན་དེས་ཡོངས་རྫོགས་དགེ་བསྙེན་དང་། དེས་དགེ་ཚུལ་དང་། དེས་དགེ་སློང་གི་སྡོམ་པའི་ཕན་ཡོན་གྱི་བརྒྱའམ་སྟོང་ལ་སོགས་པའི་ཆར་ཡང་མི་འགྲོ་བས་ཕྱི་མ་ཕྱི་མ་མཆོག་ཏུ་གྲུབ་ཅིང་། སྔ་མ་སྔ་མ་ཕྱི་མ་ཕྱི་མའི་ལམ་སྟེགས་ཡིན་པས་ཐུན་མོང་གི་ལམ་དུ་རིམ་པར་འགྲོ་བའི་ཕྱིར། སོ་ཐར་གྱི་སྡོམ་པ་དེ་དག་ཀྱང་བྱང་སེམས་དང་སྔགས་སྡོམ་གྱི་རྟེན་དུའང་འགྲོ་བར་མཚུངས་ཤིང་། རྒྱུ་མཚན་དེའི་ཕྱིར་ན་ངེས་འབྱུང་གི་ཚུལ་ཁྲིམས་ནི་ཐེག་པ་ཀུན་གྱི་ལུང་རྟོགས་ཀྱི་ཡོན་ཏན་བསྐྱེད་པའི་གཞི་དང་། སྐྱེས་པ་གོང་དུ་འཕེལ་བར་བྱེད་པའི་གཞི་རྟེན་དུ་འགྱུར་བ་ཡིན་ཏེ། བཤེས་སྤྲིངས་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་སོ། །མདོར་ན་སྔོན་བསྟན་པ་དར་བའི་དུས་སུ་ལོ་དཔག་ཏུ་མེད་པར་བསླབ་གཞི་ཡོངས་སུ་རྫོགས་པའི་ཚུལ་ཁྲིམས་རྣམ་པར་དག་པ་བསྲུངས་པ་ལས། ད་ལྟ་བསྟན་པ་ནུབ་པ་ལ་ཉེ་བ་འདི་ལྟ་བུའི་དུས་སུ་ཉིན་ཞག་གཅིག་གི་བར་དུ་བསླབ་གཞི་གཅིག་ཙམ་ཞིག་བསྲུངས་པ་ཕན་ཡོན་ཆེ་བར་གསུངས་ཏེ། ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་ཞིག་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་གསུངས་པའི་ཕྱིར་རོ། །

དེ་ལྟར་མཐར་ཕྱིན་ནས་ལེའུའི་སྐབས་བསྡུ་བ་ནི། འདུལ་བ་སོ་ཐར་གྱི་རིམ་པར་ཕྱེ་བ་སྟེ་གཉིས་པའོ། །ཞེས་པ་སྟེ། བསྟན་བཅོས་འདི་ལ་ལེའུ་ལྔ་ལས། ཉན་ཐོས་ཀྱི་འདུལ་བ་དང་ཐུན་མོང་བའི་བསྟན་པའི་ཉམས་ལེན་སོ་ཐར་གྱི་རིམ་པར་ཕྱེ་བ་སྟེ་ལེའུ་གཉིས་པའི་འགྲེལ་པའོ། །འདིར་སྨྲས་པ། ཚོགས་མཆོག་འདུས་པའི་གངས་རི་ལ་གནས་ཤིང་། །འཇིགས་མེད་བླང་དོར་སྟོན་པའི་གདོང་ལྔ་ཅན། །ཆོས་འདུལ་སེང་གེའི་སྐུར་སྟོན་སྟོན་པ་ཆེ། །ལུང་རིགས་རྗེས་འགྲོའི་ལེགས་བཤད་འདིས་མཆོད་དོ། །མཁས་པའི་ངག་སྒྲོས་བདུད་རྩི་དད་རྩོན་གྱིས། །འཐུངས་ལས་ཤེས་རབ་དབང་པོ་རབ་རྒྱས་པས། །སྐྱེ་བར་ཚུལ་གནས་དམ་ཆོས་ལེགས་བཟུང་སྟེ། །འགྲོ་ལ་ཅི་དགར་སྟེར་བའི་དཔལ་ཐོབ་ཤོག། །།