གསེར་ཟངས་ནས་བྱ་བཏང་འགྱུར་མེད་ཀློང་གྲོལ་གྱི་དྲི་ལན་དུ།

༈ གསེར་ཟངས་ནས་བྱ་བཏང་འགྱུར་མེད་ཀློང་གྲོལ་གྱི་དྲི་ལན་དུ། ཕྱག་བྲིས་བུ་ཡིག་ཏུ་མཛད་པ་རྣམས་ཀྱི་དོན་ཡིད་ལ་སིམ་པ་བྱུང་། དེ་ཡང་སངས་རྒྱས་སྒྲུབ་པའི་ཉེ་བར་ལེན་པའི་རྒྱུ་ནི་ཁམས་བདེ་བར་གཤེགས་པའི་སྙིང་པོའམ། གཞི་གནས་ཀྱི་རིག་པ་ཞེས་གྲགས་པ་དེ་ཡིན། ལྷན་ཅིག་བྱེད་པའི་རྐྱེན་ནི་སངས་རྒྱས་ཀྱི་བྱིན་རླབས་ཡིན་ཞིང་། བྱིན་རླབས་དེ་རང་རྒྱུད་ལ་འཇུག་པའི་ཉེར་ལེན་ནི་མོས་གུས་ཁོ་ན་ལ་རག་ལུས། དེས་ན་རང་ལ་དངོས་སུ་སྣང་བའི་སངས་རྒྱས་ནི་བླ་མ་ཉིད་ཡིན་ཞིང་། བླ་མ་དེ་ལ་མོས་གུས་སྐྱེ་ཚུལ་ནི། རང་རྒྱུད་ལ་རྟོགས་པ་ཇེ་བཟང་དུ་སོང་རིམ་བཞིན་མཐོང་ཚུལ་དེ་བཞིན་དུ་འབྱུང་བ་ཡིན། དཔེར་ན་མཁྲིས་ནད་ཅན་ལ་དུང་སེར་པོ་སྣང་བ་བཞིན་རང་རྒྱུད་ཉོན་མོངས་ཀྱིས་གང་བའི་ཚེ་བླ་མ་ལ་ཡང་ཐ་མལ་པ་དང་། སོ་སྐྱེ་ཡོན་ཏན་གྱིས་ཁྱད་པར་དུ་བྱས་པ་ཙམ་དང་། བྱང་ཆུབ་སེམས་དཔའ་དང་སངས་རྒྱས་རྣམས་སུ་མཐོང་བར་འགྱུར་ཞིང་། དེའི་ཚེ་དེ་དང་དེའི་བྱིན་རླབས་ཀྱི་འཇུག་ཚུལ་ཡང་མཐུན་པར་འབྱུང་བ་ཡིན་པས་ན། ངེད་ལ་གཞན་རྒྱུད་བྱིན་གྱིས་བརླབ་ནུས་པའི་ཡོན་ཏན་མ་མཆིས་ཀྱང་། ཁྱེད་རང་གི་རྒྱུད་དག་པའི་ངོ་ན་ཇི་ལྟར་མཐོང་ཞིང་མོས་གུས་སྐྱེས་པ་དེ་དང་མཐུན་པའི་བྱིན་རླབས་འཇུག་པ་ནི་མཐའ་མ་བཀག་སྟེ། སངས་རྒྱས་ཉིད་ཀྱིས། ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་ཀྱི་ཚུལ་བཟུང་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་བཞིན་ཡིན་པས་ཁྱེད་རང་གི་མོས་འདུན་བཞིན་དུས་རྟག་ཏུ་བྱིན་གྱིས་རློབ་པའི་སྨོན་ལམ་ནན་ཏན་དུ་བྱེད་པ་ཡིན། ནུབ་མོ་གཉིད་ལ་དུས་ཚོད་ཤེས་པ་ཡང་གཉིད་དགེ་སྦྱོར་དུ་འདྲེར་ཉེ་བ་ཡིན། གཉིད་ཀྱི་གནས་སྐབས་ཉིད་དུ་འོད་གསལ་དང་རྨི་ལམ་ལྷ་སྐུར་སྦྱོང་བ་ལ་ནན་ཏན་མཛད་པས་ཉིན་མཚན་རིས་མེད་དགེ་སྦྱོར་དུ་འགྲོ་བ་ཡོང་། དབེན་པ་བསྟེན་པའི་ཚེ་དགེ་སྦྱོར་རྩལ་ཆེ་ཞིང་། མི་སོགས་དང་འཕྲད་སྐབས་དགེ་སྦྱོར་བྱིང་རྒོད་ཀྱི་དབང་དུ་འགྲོ་བ་དེ། དཔེར་ན་ནགས་རི་ལ་མེ་ཤོར་ན་རླུང་གྲོགས་སུ་འགྱུར་ཡང་། མེ་སྟག་ཕྲ་མོའི་དུས་རླུང་གིས་གནོད་པ་བཞིན་ད་དུང་རྐྱེན་དང་དགེ་སྦྱོར་བསྲེ་དགོས་པ་ཡིན། དེ་ཡང་དགེ་སྦྱོར་ལ་གནོད་པའི་རྐྱེན་གང་དམིགས་པ་དེའི་ངོ་བོ་ལ་བལྟས་ཚེ་ལྟ་རྒྱུ་དང་བལྟ་མཁན་གཉིས་སུ་འདུག་ན་དེས་བདེ་སྡུག་གི་སྣང་བ་འདྲེན་ཅིང་། དེ་ལ་བརྟེན་ནས་ཆགས་སྡང་ཡང་འདྲེན་པས། བདེ་སྡུག་གང་ཤར་དེ་ཀའི་ངོ་བོ་ལ་བལྟས་པས་རང་རིག་སྤྲོས་བྲལ་དུ་ཤར་ནས་ངོ་བོ་ལ་སྒྲོ་འདོགས་ཆོད་པར་འགྱུར། ཡང་སྣང་ཐོག་ཏུ་མ་བདེ་ན། སེམས་ཀྱི་ངོ་བོ་ནི་སངས་རྒྱས་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་ན། མཚན་ཉིད་མཚོན་པར་བྱེད་པ་ནི་ལམ་མེར་སྣང་བའི་སྣང་བ་འདི་ཡིན་པས། དེའི་ངོ་བོ་ལ་བལྟས་པས་སྣང་བ་ཕྱིར་མ་ལུས་རིག་པ་ནང་དུ་མ་ལུས་པའི་སྣང་སྟོང་ཟུང་འཇུག་ཏུ་འཆར། དེའི་ཚེ་སེམས་ཀྱི་ངོ་བོ་སྐྱེ་འགག །རྟག་ཆད། གནས་འགྱུ་ཡུལ་ཡུལ་ཅན་གང་དུའང་མ་གྲུབ་པའི་རིག་པ་རྗེན་པ་ཧྲིག་གེ་བ། དེ་ཀའི་ངང་ཡེངས་མེད་དུ་བསྐྱངས་པས་བོགས་འཐོན་པར་མ་ཟད། གཪྴ་སོགས་ཕྱི་རོལ་གནས་ཆེན་དེ་དག་ཏུ་བྱོན་པས་ནང་གི་དགེ་སྦྱོར་ལྷོངས་པའི་རྐྱེན་སྣ་ཚོགས་སུ་འཆར་བ་སྲིད་ཀྱང་། ཤར་བ་ཉིད་ལ་རེ་དོགས་དང་དགག་སྒྲུབ་མེད་པའི་རིག་པའི་ངོ་བོ་རང་ངོ་སྤྲོས་བྲལ་འཛིན་མེད་དུ་བསྐྱངས་པས་བོགས་འཐོན་པར་འགྱུར་ཞིང་། གཉན་ས་དུར་ཁྲོད་སོགས་སུ་ཡང་སྤྲོས་བྲལ་དེ་བཞིན་ཉིད་ཀྱི་ལྟ་བས་མ་ཟིན་ན་ནི་གཅོད་ཀྱང་གནད་དུ་མི་འགྲོ། དེས་ཟིན་ཕྱིན་དགེ་སྦྱོར་གྱི་བོགས་སུ་གང་འཐོན་པ་དེ་ཀ་ལ་ཉམས་ལེན་མཛད་པ་འགབ། ལྷ་འདྲེ་སོགས་ལ་གཅོད་ཡུལ་ལམ་དུ་མ་སོང་བར་མི་དང་རང་ལུས་ཀྱི་འཚོ་ཐབས་ཁྱད་གསོད་སོགས་ལམ་དུ་འགྲོ་དཀའ་བས། ཆོས་སྒྲུབ་པའི་རྟེན་འདི་འཚོ་ཞིང་གནས་པའི་ཐབས་ལ་འབད་པ་ཁོ་ན་ལེགས་པ་ཡོང་། སྤྱིར་དགེ་སྦྱོར་གྱི་ཉམས་རྟོགས་དེ་ཙམ་དུ་སླེབ་ནས་རྣམ་གཡེང་གི་རྐྱེན་གང་དམིགས་དགེ་སྦྱོར་གྱི་གནད་ཀྱིས་ཟིན་པར་བྱས་པས་ཉིན་སྣང་དགེ་སྦྱོར་དུ་འདྲིལ་བ་བཞིན་མཚན་མོའི་གཉིད་དང་རྨི་ལམ་ཡང་དགེ་སྦྱོར་དུ་རིམ་གྱིས་འགྱུར་བ་ཡིན། འདི་དག་གི་གནད་རྣམས་ཐུགས་རྗེ་ཆེན་པོའི་ཁྲིད་ཡིག་གི་སྐབས་སུ་སྨོས་པ་དེ་ལ་གཟིགས་པས་ཁྲོལ་བར་འགྱུར། གདམས་ངག་མགུར་མའི་ཚུལ་དུ་བརྗོད་པ་འདི་ཐུགས་ལ་འཕྲོད་པ་ཡོང་རྩིས་ཡིན། ཉིད་ཀྱི་ཕུ་བོ་སྡིག་པའི་ལས་ལ་འགྱོད་སྡོམ་གྱི་བསམ་པ་ལྡན་པ་ནི་རྗེས་སུ་ཡི་རང་། ད་སྔ་བྱས་ལ་འགྱོད་པས་ཕྱིན་ཆད་རང་དབང་འདུས་ཕྱིན་སྡིག་པ་སྤོང་བར་གདམས་དགོས་པ་སྐྱེས་ བུ་དམ་པ་དང་འཕྲད་པའི་དགོས་པ་ཡིན། དམ་རྫས་གཏེར་མ་ཁྲོལ ་ཆེན་མི་སྣང་ཡང་གལ་ཆེ་གཤིས་འདི་ལྟར་ཕུལ་ཡོད། ངེད་རང་གི་བདུད་རྩི་དང་དྲི་ཆུའི་ཟན་ཡང་བཞེད་པ་བཞིན་ཕུལ་བ་དང་། ཉིད་ཀྱི་ཡབ་དང་ཞང་པོས་མཚོན་པའི་འབྲེལ་ཐོགས་ཐམས་ཅད་ཀྱང་སྨོན་ལམ་གྱི་འབྲེལ་པ་ཅན་དུ་བསམ་པས་སྐྱབས་འཇུག་དམིགས་ཁོངས་ནས་མ་བོར་བ་ཅིས་ཀྱང་བྱེད་ཅིང་། དེ་ཕྱོགས་ཐག་རིང་བ་ལས་ཀྱང་རིང་པོར་སོང་བས་ཁས་ཉེ་འདི་ཕྱོགས་སུ་འབྱོན་ཐུབ་པ་དཀའ་ཡང་། ཉམས་ལེན་གྱི་གནད་ལ་འབྱོན་བཞུད་ཀྱི་རྐྱེན་ཁས་མི་འཕྲོག་པ་ཞིག་རྩིས་ཁྱུར་བཅུག་ནས་འཕྲལ་གྱི་སྤྱོད་ལམ་ཡང་ལུས་ཀྱི་འཚོ་ཐབས་ལ་འགལ་རྐྱེན་དུ་མི་འགྲོ་བ་གལ་ཆེ་ཞིང་། ཚུལ་དེ་ལྟ་བུས་འཆོས་བཞིན་པའི་རྣམ་ཐར་བླ་མ་དང་གདམས་ངག་ལ་ཡིད་ཆེས་པས། དེ་ཉིད་ཀྱི་ཉམས་ལེན་ལ་བརྟེན་ནས་རང་ལ་རང་ཡིད་ཆེས་པ་ཞིག་མཛད་པས་དོན་རང་སེམས་སྤྲོས་བྲལ་གྱི་དབྱིངས་ན་ངེད་ཀྱི་ཤེས་རྒྱུད་ཀྱང་རྣམ་དབྱེ་དང་འདུ་འབྲལ་མེད་པའི་ཚུལ་དུ་བཞུགས་པ་དེ་ཀ་ཡིན་མོད། དེ་ཡིན་ཕྱིན་བླ་མ་ཕྱི་ནས་འཚོལ་འདོད་ཀྱང་རྣམ་རྟོག་གི་རྣམ་འགྱུར་ཡིན་ཡང་མི་རིང་བ་ངོས་འཕྲད་ཀྱི་བཞེད་པ་འགྲུབ་པ་ཡང་སྨོན་པ་ཅིས་ཀྱང་བགྱིད་པ་ཡིན། མིང་དང་ཡུལ་གྱི་སྤྲོས་པའི་རྣམ་འགྱུར་ཀུན། །རེ་དང་དོགས་པ་གཉིས་ཀྱི་མཐའ་བསལ་ནས། །མཉམ་ཡངས་ཁྱབ་གདལ་ཆེན་པོའི་གུ་ཡངས་ལ། །བདེ་བར་ངལ་གསོ་མཛོད་ཅིག་སྐལ་བ་ཅན། །ཞེས་ཀྱང་སྨྲས་སོ། །