མི་དབང་སངས་རྒྱས་རྒྱ་མཚོའི་བཀའ་ལན་དུ་ཕུལ་བ།
༈ མི་དབང་སངས་རྒྱས་རྒྱ་མཚོའི་བཀའ་ལན་དུ། སྤྱིར་དགེ་བ་ལ་དམན་མཆོག་གི་དབང་དུ་བྱས་ན། འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་དགེ་བ་ཐམས་ཅད་ནི་རྣམ་པ་ཅི་ལྟར་ཡང་ཟག་མེད་དམ་འཇིག་རྟེན་ལས་འདས་པའི་དགེ་བ་དང་། དེས་མ་ཟིན་པའི་དགེ་བ་རྣམས་ཅི་ལྟར་སྣང་ཡང་ཟག་བཅས་སམ་འཇིག་རྟེན་པའི་དགེ་བ་ཞེས་བྱ་སྟེ། ཡུམ་ལས། སྦྱིན་པ་ནི་འཇིག་རྟེན་པ་ལའང་ཡོད། འཇིག་རྟེན་ལས་འདས་པ་ལའང་ཡོད་དོ། །དེ་ཡང་འཇིག་རྟེན་གྱི་སྦྱིན་པ་གང་ཞེ་ན། གང་སྦྱིན་པ་བྱིན་པས་འཇིག་རྟེན་ལས་མི་འཕགས་མི་འདའ་ན་འཇིག་རྟེན་པའི་སྦྱིན་པ་ཞེས་བྱའོ། །གང་སྦྱིན་པ་བྱིན་པས་འཇིག་རྟེན་ལས་གཡོ། འཕགས། འདའ་ན། འཇིག་རྟེན་ལས་འདས་པའི་སྦྱིན་པ་ཞེས་བྱའོ། །ཞེས་སོགས་གསུངས་པས་དེ་ལྟ་བུའི་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་དགེ་བ་ཐར་པ་ཆ་མཐུན་རྣམས་རྫོགས་ཆེན་པས་ཀྱང་ཐུན་མཚམས་ཀྱི་བྱ་བ་ཉིད་དུ་བླང་བྱ་ཡིན་ཞིང་། ཁྱད་པར་གྱི་དབང་དུ་བྱས་ནས་མཉམ་བཞག་གི་དོན་ཟབ་མོ་ལ་འཇོག་པའི་ཚེ་ན་བཟང་རྟོག་ངན་རྟོག་གཉིས་ཀ་བྱར་མེད་སྤྲོས་བྲལ་གྱི་དོན་ལ་སྒྲིབ་པ་ཡིན་པས་དོར་བར་གསུངས་པ་སྟེ་རྫོགས་པ་ཆེན་པོ་རྒྱུད་བཅུ་བདུན་གྱི་ནང་ཚན་ནོར་བུ་ཕྲ་བཀོད་ལས། བྱ་བ་མི་བྱ་བྱེད་པ་སྤང་། །སྒྲུབ་པ་མི་བྱ་སྔགས་མི་བཟླ། །ཆོས་ལ་མི་དཔྱད་དྲན་པ་དོར། །ཡིད་ལ་རྟོག་པ་རྣམས་སྤངས་ཏེ། །རང་སྣང་གཅིག་ལས་མེད་པར་གསུངས། །ཞེས་པ་དང་། སྙིང་ཐིག་འདས་རྗེས་ལས། གནས་བརྟན་གྲོལ་བའི་གདེངས་ཐོབ་ནས། །ཕྱི་ནང་བྱ་བ་ཀུན་བཏང་སྟེ། །ཞེས་གསུངས་པས། དེ་ཡང་ཀ་དག་ཁྲེགས་ཆོད་ཀྱི་ལྟ་བ་ལ་གདེངས་ཐོབ་ནས། ལུས་ངག་ཡིད་གསུམ་གྱི་བྱ་བ་དགུ་ཕྲུགས་སུ་བཏང་སྟེ། ཞེས་པའི་གྲངས་ཀྱི་ངོས་འཛིན་ནི། སྙིང་ཐིག་ཐོད་རྒལ་གྱི་དོན་ཁྲིད་ལས། དང་པོ་ལུས་ཀྱི་བྱ་བ་ཕྱི་ནང་གསང་གསུམ་ནི། ཕྱིའི་བྱ་བ་འཇིག་རྟེན་གྱི་བྱ་བ་མཐའ་དག་བཏང་། ནང་ཆོས་སྤྱོད་ཀྱི་བྱ་བ་བཏང་། གསང་བ་གཅིག་པུར་སྡོད་པའོ། །ངག་གི་ཕྱིའི་བྱ་བ་འཇིག་རྟེན་གྱི་གཏམ་ཐམས་ཅད་སྤང་། ནང་ཆོས་སྤྱོད་བཟླས་བརྗོད་ཐམས་ཅད་བཏང་། གསང་བ་ལྐུག་པ་ལྟར་གནས་པའོ། །ཡིད་ཀྱི་ཕྱིའི་བྱ་བ་འཇིག་རྟེན་གྱི་འཁྲུལ་རྟོག་ཐམས་ཅད་སྤང་། ནང་ཆོས་སྤྱོད་ཀྱི་རྟོག་པ་ཐམས་ཅད་སྤང་། གསང་བ་སྔ་ཕྱིའི་བསམ་མནོ་ཐམས་ཅད་སྤང་ངོ་། །དགོས་པ་ནི་གནས་སྐབས་སུ་བྱ་བ་ཐོངས་པ་དང་སྒོ་གསུམ་འཁྲུལ་པའི་ཕྱིར་མི་འབྲང་། མཐར་ཐུག་ཟག་མེད་ཀྱི་ཡེ་ཤེས་རྒྱུད་ལ་མྱུར་དུ་འཆར་བའི་དགོས་པ་ཡོད་དོ། །ཞེས་གསུངས་པ་དང་། དེར་མ་ཟད་ངེས་དོན་ཟབ་མོའི་གནས་ལུགས་སྟོན་པའི་སྐབས་སུ་གསར་རྙིང་ཐམས་ཅད་དགོངས་པ་མཐུན་ཏེ། བརྟག་གཉིས་ལས། སྒོམ་མེད་སྒོམ་པ་པོ་ཡང་མེད། །ལྷ་མེད་སྔགས་ཀྱང་ཡོད་མ་ཡིན། །ཞེས་གསུངས་པ་ལྟར། དོ་ཧ་སོགས་བྱར་མེད་ཀྱི་དོན་གཙོ་བོར་སྟོན་པའི་བསྟན་བཅོས་རྣམས་ནས་ཀྱང་རྒྱས་པར་གསུངས་པ་དང་། དམ་པ་སངས་རྒྱས་ལ། དམ་པ་ཀུན་དགས་རྫོགས་ཆེན་རྒྱུ་འབྲས་ལས་འདས་ཟེར་བ་བདེན་ནམ་ཞུས་པས་ལན་དུ། རྫོགས་ན་བདེན་གསུངས་པ་སོགས་དགོངས་པའི་གཞི་གཅིག་པ་ཁོ་ན་ལགས། བསྐོར་བ་སོགས་ཐུན་མོང་གི་ཆོས་སྤྱོད་འདི་དག་ནི་ཚེ་རབས་འདིར་ལྟ་བ་དངོས་སུ་རྟོགས་པའི་མཐུ་མེད་ན་ཚེ་རབས་ཕྱི་མ་རྣམས་སུ་རྟོགས་པའི་ཐབས་ལ་རྟེན་འབྲེལ་སྙིང་པོའི་གཟུངས་མཆོད་རྟེན་དུ་བཅུག་ནས་རྟེན་འབྲེལ་སྙིང་པོ་བཟླ་བཞིན་དུ་བསྐོར་བ་བྱ་ཞིང་སྨོན་ལམ་གདབ་པར་བྱའོ་ཞེས་སྔོན་གྱི་སྒྱུ་འཕྲུལ་མཁན་པོ་རྣམས་གསུང་ཞིང་། དེའི་ཁུངས་རྒྱལ་པོ་ཛཿས་མཛད་པའི་སྒྱུ་འཕྲུལ་ལམ་རྣམ་བཀོད་ལས། དེ་མིན་རྒྱུ་ཙམ་གསོག་བྱེད་པ། །རྒྱུད་ལས་འདི་སྐད་གསུངས་པ་སྟེ། །ཆོས་ཉིད་རྟེན་ཅིང་འབྲེལ་བྲིས་ན། །ཆོས་ཉིད་དོན་རྣམས་རྟོགས་འགྱུར་ཏེ། །ཞེས་པ་འདི་ཡིན་གསུངས་ཤིང་། འཇམ་དཔལ་བཤེས་གཉེན་གྱི་དྲང་དོན་རྣམ་པར་བཀོད་པའི་འགྲེལ་པ་བི་མ་ལས་མཛད་པར། ཁྱད་པར་དུ་བཞུགས་པའི་སངས་རྒྱས་ཐམས་ཅད་ཀྱི་སྐུའི་རྟེན་རིས་སུ་བྲིས་པ་དང་། འབུར་དུ་བཏོད་པ་དང་། ལུགས་སུ་བླུག་པ་ལ་སོགས་དང་། གསུང་གི་རྟེན་པུསྟི་གླེགས་བམ་རྣམས་དང་། ཐུགས་ཀྱི་རྟེན་རྡོ་རྗེ་དྲིལ་བུ་ལ་སོགས་པ་དང་། ཁྱད་པར་དུ་སྐུ་གསུང་ཐུགས་འདུས་པའི་རྟེན་རང་གི་བླ་མ་ལ་ལུས་མི་དལ་བའི་ཕྱག་བྱ་བ་དང་། བསྐོར་བ་དང་། བླ་མའི་བྱ་བ་ཇི་ལྟར་རིགས་པ་རང་གི་ཆོས་སུ་འགྲོ་བས་བཟུང་ཞིང་། དེ་ཉིད་ལས་མི་འདའ་བར་བྱའོ། །ཞེས་གསུངས་པ་དང་། སངས་རྒྱས་གླིང་པའི་ཐུགས་རྗེ་ཆེན་པོ་ན་བསྐོར་བའི་རྒྱུ་མཚན་ཞིག་ཡོད་ཚོད་ཡིན་ཡང་འདིར་དཔེ་མེད་པས་འབུལ་རྒྱུ་མ་བྱུང་ལགས་པ་དང་། མདོ་མང་ཁྲོད་དུ་མཆོད་རྟེན་བསྐོར་བའི་ཚིགས་སུ་བཅད་པ་ཞེས་པའི་མདོ་ཆུང་ཞིག་འདུག་པ་ནི་དགོངས་པར་མངའ་བས་མ་ཕུལ་བ་ལགས། བསླབ་བཏུས་ལས། འཇིག་རྟེན་མགོན་གྱི་མཆོད་རྟེན་ལ། །མི་གང་བསྐོར་བ་བྱེད་པ་ཡི། །བསྔགས་པས་བསྐལ་པ་བྱེ་བར་ཡང་། །བརྗོད་པས་ཟད་པར་བྱ་མི་ནུས། །ཞེས་དང་། མཆོད་རྟེན་བསྐོར་བ་བྱས་ན་ནི། །བརྩོན་འགྲུས་བརྟེན་ཅིང་མཐུ་བརྟེན་པ། །བརྟེན་ཅིང་རྣམ་པར་མཆོག་བརྟེན་དང་། །དེ་ནི་མྱུར་དུ་མཁས་པར་འགྱུར། །ཞེས་སོགས་ཀྱང་སྣང་ལགས། ཡན་ལག་བརྒྱད་པ་ནི། སངས་རྒྱས་གསང་བའི་ལམ་རིམ་དུ། ཡན་ལག་བརྒྱད་པའི་ཚུལ་བཟུང་ལ། ཞེས་པའི་དོན་སྒེག་པ་རྡོ་རྗེའི་རྒྱུན་བཤགས་རྩ་བར། རྒྱལ་བ་འཁོར་བཅས་སྤྱན་དྲངས་ཏེ། །བླ་མ་སྙིང་པོར་བཞུགས་པ་ལ། །ཕྱག་སྐྱབས་མཆོད་དང་བཤགས་པ་དང་། །ཡི་རངས་སེམས་བསྐྱེད་ལུས་དབུལ་དང་། །བྱང་ཆུབ་ཆེན་པོར་ཡོངས་སུ་བསྔོ། །ཞེས་དང་། དེའི་ལས་བྱང་དུ། རྡོ་རྗེ་སློབ་དཔོན་སངས་རྒྱས་དཔལ། །ཞེས་འབྱུང་བས་ཡན་ལག་བརྒྱད་པ་འདི་ཡིན་པ་ལ་སོམ་ཉི་མ་མཆིས་ལགས། ཡན་ལག་བཅུ་པ་ནི། བཀའ་བརྒྱད་ཡོངས་རྫོགས་ཡང་དྲིལ་ཧཱུྃ་གི་སྒྲུབ་པར། ཡན་ལག་བཅུ་ཡི་དགེ་སྦྱོར་ནི༔བླ་མ་ཡི་དམ་མཁའ་འགྲོ་གཤེགས༔ཉི་ཟླ་པདྨའི་གདན་ལ་བཞུགས༔ལུས་ངག་ཡིད་གསུམ་གུས་ཕྱག་འཚལ༔ཕྱི་ནང་གསང་བའི་མཆོད་ཚོགས་འབུལ༔ཉམས་ཆག་སྡིག་སྒྲིབ་ཐམས་ཅད་བཤགས༔གསང་སྔགས་སྒྲུབ་ལ་རྗེས་ཡི་རངས༔སྨིན་གྲོལ་གསང་སྔགས་ཆོས་འཁོར་བསྐུལ༔མྱ་ངན་མི་འདར་གསོལ་བ་འདེབས༔སྙིང་པོ་སེམས་ཅན་དོན་དུ་བསྔོ༔ཡང་དག་རྡོ་རྗེའི་དོན་རྟོགས་ཤོག༔ཅེས་གསུངས་པས། ཡན་ལག་བརྒྱད་པའི་སྐབས་སུ་མྱ་ངན་ལས་མི་འདའ་བར་གསོལ་བ་འདེབས་པ་དང་། ཆོས་འཁོར་བསྐུལ་བ་གཉིས་མི་འབྱུང་བ་ནི་སྔགས་ཀྱི་སྟོན་པ་ངེས་པ་ལྔ་ལྡན་ཡིན་ཕྱིར་མྱ་ངན་ལས་མི་འདའ་བར་སྟོན་པ་དང་། དེ་བཞིན་ཆོས་དུས་གསུམ་དུས་མེད་དུ་སྟོན་པ་ལས་བསྐུལ་བ་ལ་མི་ལྟོས་པས་ཐུན་མོང་མ་ཡིན་པའི་སྐབས་འདིར་དེ་གཉིས་མི་དགོས་ཞེས་པ་གཞན་དུ་འཆད་པ་ཡང་འདི་དང་ཕྱོགས་མཚུངས་པ་དང་། གཉིས་པོའི་འཚོབ་ཏུ་སྐྱབས་སེམས་ལུས་དབུལ་བསྣན་པས་ཡན་ལག་བརྒྱད་དང་། བཅུ་པ་ནི། སྤྱི་མཐུན་བདུན་པོའི་སྟེང་དུ་སྤྱན་འདྲེན་བཞུགས་གསོལ། བསྔོ་བ་སྨོན་ལམ་ཁྱད་པར་ཕྱེ་བས་བཅུར་བརྩིས་པ་ལགས། ཞེས་འཇམ་མགོན་ཆོས་ཀྱི་རྒྱལ་པོ་སངས་རྒྱས་རྒྱ་མཚོའི་གསུང་ལན་དུ་ཕུལ་བའོ། །