འབྲུག་པ་མཆོག་སྤྲུལ་གྱི་བཀའ་ལན་དང་པོ།
༈ འབྲུག་པ་མཆོག་སྤྲུལ་གྱི་བཀའ་ལན། ལྷ་མིའི་འདྲེན་པ་མཆོག་གི་ཞབས་དྲུང་དུ། དད་པ་རྒྱ་མཚོའི་དཔྱིད་ལས་འཐོན་པའི་ལག་པའི་པདྨོ་འཛུམ་པས་ཞུ་བ། བརྩེ་བས་མ་བསྐྱུད་པའི་བཀའ་སམ་ལྷ་རྫས་ཀྱི་འཆིང་བ་ཕྱག་རྒྱས་བཀྲ་བ་སྤྱི་བོར་ཕེབས་པ་བཀའ་དྲིན་དུ་འཁུམས། ཐུགས་དོགས་སེལ་བའི་ཚིག་དོན་འབྲེལ་ཆགས་འབུལ་འོས་ནི་སྤྲང་པོའི་དོར་འཇོལ་གྱི་དཔེར་ལགས་པ་དང། ཕྱག་རྒྱ་དྲུག་ལ། རྒྱུ། དབྱིབས། མཚོན་བྱེད། མཚོན་བྱ་དག་སྦྱོར་སོགས་རྒྱུད་སྡེ་སོ་སོའི་བཤད་སྲོལ་ལས་འདྲ་མིན་ཅི་རིགས་སྣང་བ། ས་ལུགས་ལ་རྗེ་བཙུན་གྲགས་པའི་རྒྱན་དང་ཆ་བྱད་ཀྱི་རྣམ་ངེས་དང་། དགེ་ལུགས་ལ་དགའ་ལྡན་མཁས་གྲུབ་པའི་རྣལ་འབྱོར་རོལ་པའི་དགའ་སྟོན་དུ་གྲགས་པ་འདི་དག་ཏུ་རྒྱས་བཤད་མཐའ་གཅོད་མང་བ་འདུག་པ་སོགས་སྤྱན་ལམ་དུ་ཐོགས་པ་ལྟར་ལགས་པས་ཞུ་གསོལ་མ་དགོས་ཤིང་། གསང་སྔགས་ལ་དབང་བསྐུར་སྔོན་དུ་སོང་ནས་རིམ་གཉིས་ལ་འཇུག་པ་དགོངས་པ་ཕྱོགས་གཅིག་ཏུ་མཐུན་ཡང་། ས་པཎ་གྱིས་སྡོམ་གསུམ་དུ། རྡོ་རྗེ་ཐེག་པའི་སྒོར་ཞུགས་ནས། །དབང་བསྐུར་ལས་གཞན་ཆོས་མེད་དོ། །གསུངས་པ་ནི། སྤྱིར་བཀའ་བརྒྱུད་རྣམས་ཕྱག་ཆེན་གྱི་སྔོན་དུ་དབང་བསྐུར་མེད་ཀྱང་རུང་བའི་ཕྱག་ལེན་དང་། ཡང་སྒོས་འབྲི་གདན་རྣམས་དབང་མཛད་ནའང་། ཕག་མོ་བརྡ་བཞིའི་དབང་གིས་ཆོས་སྒོ་དབྱེ་བ་ཞེས་པ་འདི་ལ་ཟུར་ཟ་བ་སྟེ་དབང་བསྐུར་ཆོས་སྒོ་ཙམ་མ་ཡིན་ཞེས་རྡོ་རྗེ་ཐེག་པའི་ལམ་གྱི་ངོ་བོ་ཡིན་གསུང་རྒྱུར་འདུག་པ། གང་ཟག་དབང་རྣོན་ལ་དབང་དུས་སུ་བྱིན་ཕོབ་པ་སོགས་བཙན་ཐབས་ཀྱི་སྦྱོར་བས་ཆོས་ཉིད་མངོན་གྱུར་དུ་ངོ་འཕྲོད་ནས་རིམ་གཉིས་ཀྱི་ལམ་ཅིག་ཆར་དུ་རྫོགས་པར་བཤད་ཀྱང་། དབང་བརྟུལ་ལ་ཐོག་མར་དབང་གིས་སྨིན་པར་བྱས་ནས། དེ་རྗེས་རིམ་གཉིས་ཀྱི་ལམ་མཐར་ཆགས་སུ་བསྒོམ་དགོས་ཏེ། སྔ་མ་སྔ་མ་ལ་བརྟེན་ནས། །ཕྱི་མ་ཕྱི་མ་བསྒྲུབ་པར་བྱ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །ཞེས་གསུངས་པ་བཞིན་དང་། དབང་ལ་ཆོས་སྒོ་ཞེས་སྨོས་པས། འཇུག་སྒོ་ཙམ་ལས་ལམ་གྱི་ངོ་བོ་མིན་པར་འགྱུར་ན། ཆོས་སྒོ་བརྒྱད་ཁྲི་བཞི་སྟོང་གསུངས་པ་ཡང་དེ་དང་མཚུངས་པར་འགྱུར་རོ་སྙམ་པ་དང་། བཀའ་བརྒྱུད་རང་བཞེད་ལ་ཡང་། གནས་ལུགས་ཕྱག་ཆེན་དབང་ལ་མ་ལྟོས་པ་དང་། བདེ་སྟོང་ཕྱག་ཆེན་དབང་ལ་ལྟོས་པར་བཞེད་པ་ལ། ས་པཎ་གྱིས་འཐིང་སླད་མཛད་པའི་སྐྱོན་སྤོང་ལུང་རིགས་ཁྱད་པར་ཅན་གྱིས་སྒྲུབ་བྱེད་འགོས་ལོ་ཡབ་སྲས་ཀྱིས་རྩལ་བཤད་དུ་མཛད་པའི་རྗེས་སུ། བཀའ་བརྒྱུད་ཀྱི་མཁས་པ་ཕལ་ཆེར་འབྲེང་བར་སྣང་ཡང་། ཀརྨ་པ་ཆོས་གྲགས་རྒྱ་མཚོ་དང་། རྗེ་མི་བསྐྱོད་རྡོ་རྗེ། ཕྱིས་ཀྱི་རྗེ་བཙུན་ཏཱ་ར་ནཱ་ཐ་རྣམས་ཀྱིས་ནི། དེས་ཀྱང་བཀའ་བརྒྱུད་གོང་མའི་དགོངས་པའི་གནད་མ་ལོན་པས་འཕྲལ་གྱི་སྐྱོན་སེལ་ཉི་ཚེ་བ་ཙམ་ལས་མིན་ཚུལ་གསུང་བ་སོགས་མཁས་པ་རྣམས་ལ་ཡང་དགོངས་པ་མི་མཐུན་པ་མང་བས་སྐྱོང་དཀའ་བ་ལྟ་བུར་འདུག་ཀྱང་། རང་རེ་ནི་བཀའ་བརྒྱུད་གོང་མའི་བཞེད་པ་དེ་དོན་ལ་གནས་སམ་སྙམ་པའི་མོས་བློ་ལམ་བྱེད་ལས་སོ་སྐྱེའི་བློ་ལ་ངེས་པ་མ་མཆིས་པ་སོགས་འདི་སྐོར་ལ་རྗེ་པད་དཀར་དང་། རྗེ་སངས་རྡོར་བ། བྱ་གཤོངས་ཀླུ་སྒྲུབ་པ། ཐུབ་བསྟན་ཆོས་རྣམ་པ་སོགས་ཀྱི་བརྒལ་ལན་སོགས་རྒྱ་ཆེར་འདུག་པ་གཟིགས་ཚོད་ལྟར་ལགས་པ་དགོངས་པར་གཅགས་པའི་ཕེབས་མཆིད་ཀྱང་མཁྱེན་མཁྱེན་ལགས་པ་དང་། བཀའ་བརྒྱུད་ཅེས་པའི་བརྡ་འདི་ལ་ཡང་དྭགས་ཤངས་སོགས་བརྒྱུད་སྲོལ་གཞན་ཐམས་ཅད་བཀའ་བརྒྱུད་ཅེས་གསུང་བར་སྣང་ནའང་། འབྲུག་ལུགས་སུ་ཁ་དོག་གི་བརྡས་ཕྱེ་བའི་དཀར་བརྒྱུད་ཅེས་གསུང་པ་ལ་གཞན་གྱི་གླན་ཀ་སེལ་བའི་སྒྲུབ་བྱེད་བཀོད་འདུག་ནའང་། གོང་མ་ཞིག་གིས་རྟོག་དཔྱོད་མེད་པར་རང་གར་གསུངས་པའི་ཉི་ཚེའི་སྐྱོན་བསྲུབ་མིན་ལས་ཆེ་སྙམ་པ། དྲི་མ་མེད་པའི་དཔེས་དཀར་པོར་མཚོན་ན། འགྱུར་བ་མེད་པའི་དཔེར་ནག་པོར་བྱས་ཀྱང་ཆོག་གམ་སྙམ་པ་ནི་ཀུ་རེའི་ཚུལ་དུ་ཕུལ་བ་ལགས། ད་ལྟ་ཕུལ་བའི་ཞུ་སམ།