དྲུག་ཡིག་ཆང་ཁྱིམ་པའི་ལྐོག་ལན།
༈ དྲུང་ཡིག་ཆང་ཁྱིམ་པའི་ལྐོག་ལན་དུ། ལགས། སྨྱུག་འཛིན་དབང་པོ་མཁྱེན་རབ་ཀྱི་སྤྱན་སྟོང་རྣམ་པར་བཀྲ་བ་གང་གི་བཀའ་མཆིད་ལས་རྣམ་པར་མ་དག་པ་དང་ཐ་སྙད་མེད་པའི་ཁྱབ་མཐར་རྙིང་མ་ཞེས་བཀའ་སྩལ་འདུག་པ་དེ་ལྟ་ན། སྲོང་བཙན་སྒམ་པོའི་དུས་གསང་སྔགས་ཀྱི་སྒྲུབ་སྐོར་འགའ་ཞིག་བྱུང་འདུག་པ་དང་། ཁྱད་པར་ཁྲི་སྲོང་ལྡེའུ་བཙན་གྱི་དུས་སློབ་དཔོན་ཆེན་པོས་རྒྱལ་བློན་སྐལ་ལྡན་འགའ་ལ་དབང་བསྐུར་ཞིང་ལམ་དེ་ཉིད་ལས་མཆོག་ཐུན་གྱི་དངོས་གྲུབ་ཐོབ་པ་མང་ཞིག་བྱུང་ཚུལ་གྱི་ལོ་རྒྱུས་དུ་མ་ཞིག་འདུག་པས་མཚོན། ལོ་ཆེན་རིན་བཟང་གིས་ཕྱི་འགྱུར་འགོ་མ་བཙུགས་པའི་གོང་དེ་སྲིད་དུ་ཡོད་པའི་ཆོས་དེ་རྣམས་གསར་མ་ཡིན་པར་བསྒྲུབས་པས་ནི་མ་བྱུང་། དེ་རྣམས་མ་དག་པའི་ཕྱོགས་སུ་ཕུད་པས་ནི་གངས་ཅན་གྱི་ལྗོངས་འདིར་རྒྱལ་བའི་བསྟན་པ་དྲི་མ་མེད་པའི་ངོས་འཛིན་བྱེད་རྒྱུ་ཟད་ཅིང་། དེ་དག་ཀྱང་མ་དག་པའི་ཕྱོགས་སུ་བཞེད་ན་ནི་རིན་བཟང་ཡན་ཆད་དུ་མཁས་ཤིང་གྲུབ་པ་བརྙེས་པའི་སྐྱེས་ཆེན་མང་པོ་བྱོན་པ་དེ་དག་གི་ཉམས་ལེན་ཡང་འཁྲུལ་པ་དང་ལོག་པར་ཞལ་གྱིས་བཞེས་དགོས་མ་ཟད། བསྟན་པ་སྔ་དར་ཞེས་ཡོངས་ལ་གྲགས་པའི་མཚན་གཞི་ཡང་མི་སྣང་བས་བདག་གིས་རྣམ་པར་དག་ཅེས་ཞུ་བའི་རྔོ་ཅི་ཐོག །ཇོ་བོ་རྗེས་སྔ་འགྱུར་གྱི་བསྟན་པའི་འཕེལ་རྒྱས་བོད་དུ་བྱུང་བ་ལྟ་བུ་རྒྱ་གར་དུ་ཡང་མ་བྱུང་ཞེས་རྣམ་ཐར་ཚད་ཐུབ་ཏུ་བྲིས་འདུག་པར་གུར་གུམ་གྱི་ཚོས་ཀྱིས་བཀུ་བར་བྱ་བའི་གནས་སུ་མི་འགྱུར་རམ། འོན་ཀྱང་ཆོས་ཚན་འགའ་ཞིག་རྣམ་པར་དག་ལ་འགའ་ཞིག་རྣམ་པར་མ་དག་ཅེ་ན་ནི། དེ་འདྲ་གསར་མ་བ་ལ་ཡང་ཡོད་པས་རྙིང་མ་བ་ཁོ་ན་ཁྱབ་མཐར་སྩོལ་བ་ཅི་ཞིག །དེ་ལྟ་མིན་ཏེ་རྙིང་མའི་རྒྱུད་ཁོ་ན་ལྷད་ཅན་ནོ་ཞེ་ན། དེ་ཡང་གོང་དང་མཚུངས་པ་ཉིད་དོ། །དྲི་མེད་ཁྲོས་པའི་རྒྱུད་ལས་ཡི་གེ་གཞན་རྣམས་ལྷད་ཅན་དུ་དགོངས་ན་ནི། བསྟོད་པ་ལ་སོགས་པ་འགའ་ཞིག་ནི་སངས་རྒྱས་ཀྱི་གསུང་དང་། རྩ་བའི་སྒྲུབ་ཐབས་ལེ་ཚན་རྣམས་མགོན་པོ་མི་ཕམ་པ་ཉིད་ཀྱི་གསུང་ཡིན་ཞིང་། ཁ་སྐོང་དང་ཆོག་སྒྲིག་ཁ་ཤས་ལུགས་འདི་རང་ལ་མཁས་ཤིང་གྲུབ་བརྙེས་བརྒྱུད་མར་བྱོན་པ་རྣམས་ཀྱིས་བསྒྲིགས་པར་སྣང་ཞིང་། འོན་ཀྱང་ཐེ་ཚོམ་གྱི་གནས་རེ་གཉིས་ཡོད་སྲིད། དེ་འདྲ་ནི་རྒྱ་གར་མཁས་པའི་གཞུང་ཆེན་མོ་དག་ལ་ཡང་བོད་ཀྱི་མཁས་པར་གྲགས་པ་འགའ་ཞིག་གི་ལུང་རིགས་ལྟར་སྣང་བ་དུ་མས་འགེབས་པ་ཡང་འདུག་མོད། ཡི་གེའི་སྡེབ་སྦྱོར་མ་དག་པ་སོགས་ནི་གཞུང་དེའི་དངོས་སྐྱོན་མིན་ཞིང་ཡི་གེ་པའི་རྣམ་དཔྱོད་ཀྱི་སྐྱོན་དེ་རྒྱལ་བའི་བཀའི་ཡི་གེ་དག་ལ་ཡང་དེ་འདྲ་ཡོད་པ་མང་བས་རྒོལ་བ་ནུས་སམ། སྤྱིར་སྒྲུབ་ཐབས་འདི་རྣམས་ཀྱི་བབས་དང་གསར་མའི་གུར་ཞལ་ཕྱག་དྲུག་པ་སོགས་ཀྱི་སྒྲུབ་ཡིག་སྙན་བརྒྱུད་པུསྟི་སོགས་སུ་གྲགས་པ་དང་ཡོང་བབས་མི་གཅིག་པ་མེད་འདྲ་ཡང་། དེ་དག་རྡུལ་མུན་དུ་གཟིམས་པས་སྤྱན་སྔར་མ་སོན་པ་ལེགས་འདུག །སོན་ན་མ་དག་པའི་བཀའི་ཟུར་གནམ་ལྕགས་ཀྱི་སོ་སྟར་རྣོ་བ་འདི་ཁོང་རྣམས་ལ་ཡང་འཕོག་ཉེན་འདུག་ལགས། གཞི་ནས་ཞི་རྫོགས་གཉིས་པོ་འདི་རྒྱལ་བའི་གསུང་རབ་ངེས་དོན་མཐའ་དག་གི་སྙིང་པོར་གྲུབ་ཅིང་། སྨིན་གྲོལ་གྱི་ཆོག་གཞུང་། ལམ་གྱི་རྩ་བ་དང་ཡན་ལག་ཐམས་ཅད་བབས་གཅིག་པར་འདུག་གཤིས། དྲང་དོན་གཙོ་གྱུར་གྱི་ལམ་ལ་ཨ་འཐས་པས་ཆགས་ལོ་དང་སྨྱལ་པ་ཧྲུལ་པོ་སོགས་མཁས་པའི་མཚན་གྱིས་མཛེས་པ་དུ་མ་ཞིག་གིས་ཟུར་ཟའི་གླན་ཀ་མཛད་འདུག་པ་དང་། འཇིགས་བྲལ་བོ་དོང་པ་ཞེས་མཁས་པ་དེས་ཀྱང་དེང་འདིར་ཞི་བྱེད་ཀྱི་གཞུང་རྣམས་ཐོག་མར་གཟིགས་ཚེ་མདོ་རྒྱུད་ཀྱི་ཐེག་པ་གཞན་དང་ཆོས་སྐད་མི་མཐུན་པ་སྣ་ཚོགས་འདུག་པ་ཐུགས་སུ་མ་ཤོང་ནས་རྩོད་པའི་ཡི་གེ་རྩོམ་པའི་སྦྱོར་བ་ལ་ཞུགས་པ་ན། དེ་འོས་སུ་མི་འགྱུར་བའི་རྟགས་དུ་མ་མངོན་སུམ་དུ་བྱུང་ཞིང་གཞུང་ལུགས་དེ་ཡང་རྡོ་རྗེ་ཕ་ལམ་དང་མཚུངས་པས་ལྟར་སྣང་གི་ལུང་དང་རིགས་པའི་མཚོན་རྩེས་མ་ཕིག་ནས། སླར་ཡང་གཞུང་དེ་ངེས་དོན་གྱི་མཐར་ཐུག་ཏུ་ངེས་པ་འཁྲུངས་ནས་དགོངས་འགྲེལ་གྱི་ཡི་གེ་དེ་ཁོ་ན་ཉིད་འདུས་པའི་རྒྱ་མཚོར་ཡང་བཞུགས་འདུག་ཅིང་། ཞི་བྱེད་ཀྱི་བཀའ་བསྲུང་ཨ་གྷོ་རའི་སྒྲུབ་ཐབས་ཕྱག་བཞི་དྲུག་སོགས་མགོན་པོ་གཞན་གྱི་སྒྲུབ་ཐབས་དང་བརྗོད་ཚུལ་མི་འདྲ་བ་འདི་ཐུགས་སུ་མ་ཤོང་ན། བརྒྱུད་པ་སྔ་ཕྱི་བར་གསུམ་ནས་བརྒྱུད་པའི་ལམ་གྱི་རྩ་བ་ཐུན་མོང་གི་ཐེག་པ་གཞན་དང་བརྗོད་བབས་མི་འདྲ་བ་དེ་ཉིད་སྤྱན་སྔར་སོན་ན་ཐུགས་མཚོར་འགལ་འདུའི་ཟླ་གཟུགས་བརྒྱ་ཕྲག་ཙམ་ཤར་ཉེན་འདུག་ལགས། སྤྱིར་ཆོས་སྐྱོང་དགྱེས་ཤིང་འགོ་བའི་རྩ་བ་ལྷ་དང་བླ་མ་ལ་གུས་ཤིང་གདམས་ངག་ལ་ཡིད་ཆེས་པ་རྣམས་གཅེས་གནད་དུ་གསུངས་འདུག་པ་ཆོས་སྐྱོང་བསྟེན་པའི་གང་ཟག་ལ་གལ་ཆེ་བ་ལགས། ཞི་བྱེད་ཀྱི་བརྒྱུད་འཛིན་དུ་ཞལ་འཆེས་ནས་ལམ་འདི་ལ་ཡིད་མ་ཆེས་ན་གྲུབ་མཐའ་གཞན་པ་རྣམས་དབང་ལུང་དང་ཆོས་རྒྱུན་མ་ཆད་ཙམ་འཛིན་པ་ནི་ངལ་བའི་གནས་ཁོ་ནར་མི་འགྱུར་ལགས་སམ། ཇི་ལྟར་བསླབ་སྟོན་སྩལ་བ་བཞིན་རྒྱལ་མཆོག་རིགས་ཀྱི་བདག་པོ་ཇི་ལྟ་བ་དང་ཇི་སྙེད་པའི་ཆོས་ཐམས་ཅད་མཁྱེན་ཅིང་གཟིགས་པ་ཆེན་པོའི་སྤྱན་སྔར་ཀུནྡའི་འདབ་མ་ལྟར་དཀར་ཞིང་མཛེས་པའི་ལྷ་རྫས་ལས་མེ་ཏོག་གསེར་གྱི་གེ་སར་བཞད་པས་བཏུད་དེ་མང་ཉུང་གི་མཐའ་གཉིས་སུ་མ་ལྷུངས་ཤིང་། ཡིད་ལ་འདོད་པ་དེ་ཁོ་ན་ལྟར་འཇོ་བའི་དཔག་བསམ་གྱི་ལྗོན་པ་ལྟ་བུའི་ཆོས་ཀྱི་རྣམ་གྲངས་སྩོལ་བར་མཛད་དུ་གསོལ་བ་བཏབ་པ་ལས་གདུལ་བྱའི་བསམ་པ་དང་རྗེས་སུ་མཚུངས་པར་དེ་དེ་བཞིན་ནོ། །ཞེས་ཚིག་དང་དོན་བཟང་པོ་ཅན་གྱི་ཕྲིན་ལས་ཀྱི་རིམ་པ་ལེགས་པར་བཤད་པ་མཐའ་དག་གི་ཆུ་གཏེར་བསྲུབས་པ་ལས་ཟབ་དོན་ཉི་མའི་དཀྱིལ་འཁོར་མཐའ་བྲལ་གདུལ་བྱའི་མཁའ་ལ་ཤར་བ་འདི་བཞིན་ཡིན་འདུག་ལགས།