དགེ་སློང་ཕྱག་རྡོར་དབང་ཕྱུག་གི་དྲི་ལན།
༈ དགེ་སློང་ཕྱག་རྡོར་དབང་ཕྱུག་གི་དྲི་ལན། ལོཀྟྲིའི་དོགས་པ་ཕྲན་བུ་ཞུ་རྒྱུ་ལ། གླང་སྨྱོན་སྣ་རྩེའི་ནང་དུ། བཟློག་བསད་བྱ་དུས་སྔགས་སྡེབ་བཞིན་མགོ་ཅན་མགོ་བོ་གཅོད་པའི་བཟླ་ལུགས་བྱེད་ཕེབས་འདུག་པའི་བཟླ་ལུགས་ཅི་འདྲ་ལགས། སྔགས་དཀྱུས་བཞིན་བཟླས་པས་རྟགས་མཚན་མ་མཐོང་ན། ༀ་ལོཀྟྲི་པཱ་ལ་ནན༔ཞེས་སོགས་ཀྱི་མགོ་བོའི་ༀ་བཞག་ནས་ལོཀ་ཏྲི་ཞེས་པ་ནས་འགོ་འཛིན་པ་ཡིན། ཡང་། ཕ་རོལ་ལྷས་སྐྱོབ་ཆེ་ན་དབྱེ་བའི་མན་ངག་ཟབ་མོ་བྱ་གནང་འདུག་པའི་བྱེད་ལུགས་ཅི་འདྲ་ལགས། ལྷས་སྐྱོབ་ཆེ་བའི་རྟགས་སྤྱི་ཙམ་ལ་ལྷ་དབྱེ་དཀྱུས་བཞིན་བྱས་པས་ཕྲོལ་རྟགས་མ་མཐོང་ན་གུ་གུལ། སྦྲུལ་ཤ །མུ་ཟི། མཛེ་ཕོའི་ལྷམ་འབོག །ར་ཐུག་དང་གླང་རུའི་གཞོབ། ཕག་ཚིལ། རྟ་བོན་རྣམས་གཏེར་ཁ་འདི་ག་དང་ཕྱོགས་མཐུན་པའི་རྫས་སྦྱོར་ཡིན་པས་དེའམ། ཡང་ན་འོག་ཏུ་བཤད་པའི་རྫས་སྡེབ་སྦྱོར་གྱིས་ནུབ་ཕྱོགས་ཀྱི་རྫིང་ཡུར་རྫ་སྣོད་ཀྱི་བཅས་ལྡན་དུ་མེ་ལ་བསྲེགས་པས་ལིངྒ་ལ་བདུག་ཅིང་རང་ལ་དྲི་མ་མ་འཕོག་པ་དཀྱུས་བཞིན་བྱེད་ཅིང་། དབྱེ་རྫས་སྒྲོ་གཉིས་ཀྱིས་འབྱེད་པ་དང་། སྒྲུབ་པ་པོ་རྣམས་ཀྱིས་འོག་ཏུ་བཤད་པའི་སྔགས་ཚན་དྲུག་ཀར་བཟླ་བ་སོགས་རྟགས་མ་མཐོང་གི་བར་དུ་བྱེད་པ་ཡིན། སོ་སོས་སྐྱོབ་པའི་རྟགས་རྣམས་ལས༔སད་འཁྱེར་འབོབ་དང་རྒྱ་ཚིལ་གྱིས༔ཆོས་དང་བོན་གྱི་བསྲུང་མ་སྐྲོད༔ༀ་དགྲ་བོ་སྙིང་ཤ་ཕཊ༔ༀ་དགྲ་བོ་ལྷ་ཤ་ཕཊ༔གླང་སྐྱེས་གཞོབ་དང་དྲི་ཚིལ་བདུག༔དུད་པས་ཕོ་ལྷ་དགྲ་ལྷ་འབྱེད༔ༀ་དགྲ་བོ་དགྲ་ཤ་ཕཊ༔རྟ་བོང་བངས་དང་རྟ་གསེབ་བོན༔གསུམ་གྱིས་མ་ལྷ་ཞང་ལྷ་འབྱེད༔ༀ་དགྲ་བོ་མོ་ཤ་ཕཊ༔ཡུགས་དོར་ཡུལ་ལྷའི་གཉེན་པོ་སྟེ༔ༀ་དགྲ་བོ་ཡུལ་ཤ་ཕཊ༔ཏིལ་དང་ཡུངས་ནག་སྲོག་ལྷའི་གཤེད༔ༀ་དགྲ་བོ་སྲོག་ཤ་ཕཊ༔ཅེས་པའི་རྫས་རྣམས་ཀྱིས་དམིགས་ཕྱེད་པར་བདུགས་ཤིང་སྔགས་རྣམས་བརྒྱ་རྩ་རེས་ཉུང་མཐའ་བྱས་པ་བཟླ་བ་སོགས་སོ། །རྟགས་ནི། སློབ་དཔོན་དང་སྔགས་པ་བྱུང་ན་ཆོས་བསྲུང་། བོན་པོ་དང་བྱིའུ་བྱུང་ན་བོན་ལྷ། བྱ་ཆེ་བའི་རིགས་བྱུང་ན་མཁར་གྱི་རྩེ་ལྷ། མི་དཀར་བྱུང་ན་ལྷན་སྐྱེས་ལྷ། ལུག་ཁྱུ་དང་གཡག་དཀར་བྱུང་ན་ཕོ་ལྷ། རྟ་དཀར་དང་བྱིང་རྨུགས་བྱུང་ན་སྲོག་ལྷ། ཁྲ་སྤྱང་བྱུང་ན་དགྲ་ལྷ། སྐྱེས་པ་ཞུབ་ཅན་བྱུང་ན་ཕ་ལྷ། བྱ་རོག་བྱུང་ན་ཞང་ལྷ། བུད་མེད་དང་ཤ་བ་ཡུ་མོ་བྱུང་ན་མ་ལྷ་ཡིན་པར་བཤད་ཅིང་། སྔགས་ཀྱང་གོང་མ་དང་མི་འདྲ་ཙམ་གཏེར་ཁྱིམ་ནས་བཤད། དབྱེ་རྫས་ཀྱི་ཐུམ་བུ་ལིངྒའི་སྙིང་གར་འཇོག་ཅིང་སྒྲུབ་ཁང་གི་ཐེམ་འོག་ཏུ་ཞག་གསུམ་ཙམ་མནན་པས་ཀྱང་ལྷ་དང་ཕྲོལ་བར་བཤད་དོ། །བླ་སྲོག་འཛོམ་ཐ་དད་དུ་རྒྱུ་ཞིང་འཛོམ་པའི་དུས་ཡོད་པ་ཞལ་ལས་དྲི་བ་གལ་ཆེའོ། །མཆན། པའི་དུས་ཐུན་ཟོར་དང་བདེན་པ་བརྗོད་དགོས་པའི་གནད་འགག་ཟབ་མོ་ཞལ་ལས་བྲིས་ཕེབས་འདུག་པའི་ཞིབ་ཆ་ཇི་ལྟར་ལགས། སྟག་ཡོས་གཉིས་ཀྱི་བླ་ཆུ་སྲོག་ཤིང་། རྟ་སྦྲུལ་གཉིས་ཀྱི་བླ་ཤིང་སྲོག་མེ། བྱ་སྤྲེལ་གཉིས་ཀྱི་བླ་ས་སྲོག་ལྕགས། བྱི་ཕག་གཉིས་ཀྱི་བླ་ལྕགས་སྲོག་ཆུ། ཁྱི་འབྲུག་གླང་ལུག་བཞིའི་བླ་མེ་སྲོག་ས། དེ་ནས་ལུས་ནི་ཤིང་བྱི་གླང་གི་ལུས་ལྕགས། མེ་བྱི་གླང་གི་ལུས་ཆུ། ས་བྱི་གླང་གི་ལུས་མེ། ལྕགས་བྱི་གླང་གི་ལུས་ས། ཆུ་བྱི་གླང་གི་ལུས་ཤིང་། ཤིང་སྟག་ཡོས་ཀྱི་ལུས་ཆུ། མེ་སྟག་ཡོས་ཀྱི་ལུས་མེ། ས་སྟག་ཡོས་ཀྱི་ལུས་ས། ལྕགས་སྟག་ཡོས་ཀྱི་ལུས་ཤིང་། ཆུ་སྟག་ཡོས་ཀྱི་ལུས་ལྕགས། ཤིང་འབྲུག་སྦྲུལ་གྱི་ལུས་མེ། མེ་འབྲུག་སྦྲུལ་གྱི་ལུས་ཤིང་། ས་འབྲུག་སྦྲུལ་གྱི་ལུས་ཤིང་། ལྕགས་འབྲུག་སྦྲུལ་གྱི་ལུས་ལྕགས། ཆུ་འབྲུག་སྦྲུལ་གྱི་ལུས་ཆུ། ཤིང་རྟ་ལུག་གི་ལུས་ལྕགས། མེ་རྟ་ལུག་གི་ལུས་ཆུ། ས་རྟ་ལུག་གི་ལུས་མེ། ལྕགས་རྟ་ལུག་གི་ལུས་ས། ཆུ་རྟ་ལུག་གི་ལུས་ཤིང་། ཤིང་སྤྲེལ་བྱའི་ལུས་ཆུ། མེ་སྤྲེལ་བྱའི་ལུས་མེ། ས་སྤྲེལ་བྱའི་ལུས་ས། ལྕགས་སྤྲེལ་བྱའི་ལུས་ཤིང་། ཆུ་སྤྲེལ་བྱའི་ལུས་ལྕགས། ཤིང་ཁྱི་ཕག་གི་ལུས་མེ། མེ་ཁྱི་ཕག་གི་ལུས་ས། ས་ཁྱི་ཕག་གི་ལུས་ཤིང་། ལྕགས་ཁྱི་ཕག་གི་ལུས་ལྕགས། ཆུ་ཁྱི་ཕག་གི་ལུས་ཆུ། དབང་ཐང་འབྱུང་བ་གང་ཤར་ཡིན། ཀླུང་རྟ་ནི། བྱི་འབྲུག་སྤྲེལ་གསུམ་ཀླུང་རྟ་ཤིང་། བྱ་གླང་སྦྲུལ་གསུམ་ཀླུང་རྟ་ཆུ། ཡོས་ལུག་ཕག་གསུམ་ཀླུང་རྟ་མེ། སྟག་རྟ་ཁྱི་གསུམ་ཀླུང་རྟ་ལྕགས། བླ་ཞེས་བྱ་བ་ནི་སྤྱི་ཙམ་དུ། སྲོག་གི་འབྱུང་བའི་ཁམས་གང་ཡིན། དེ་ལྟར་ལོ་རྒན་དྲུག་ཅུ་བརྩིས་ནས། གང་དགྲ་གཤེད་དུ་བབས་པའི་དུས་ལས་སྦྱོར་དང་། དགུག་བསྐྲད་མནན་གཟིར་གྱི་ལས་བརྩམས་པ་ཡིན་ཏེ། དཔེར་ན་དགྲ་ཕག་ལོ་པ་ཡིན་ན་གསོད་གཟིར་གྱི་ལས། དྭ་བླ་གཤེད་འདི་དུས་ཚོད་མཚོན་ཆའི་དཔེ། ཡང་། དགྲ་ཡོས་ལོ་པ་ལ། ཉི་མ་བྱ་སྤྲེལ། གཟའ་ཉི་མ་མིག་དམར་ལྟ་བུ་དུས་ཚོད་བྲུབ་ཁུང་ཟེར་བ་ཡིན་ཏེ་དུས་དགྲའི་ལོ་དང་སྒྲིག་པའོ། །མཆན། ནམ་ཕྱེད་ཡོལ་གླང་གི་དུས་སུ་བྱེད་པ་ལྟ་བུས་མཚོན་ནོ། །ཕུར་འདེབས་དུས་བོ་དྷི་ཙིཏྟ་ཞེས་པའི་མཇུག་གི་བསམ་བྱར། ཟུང་འཇུག་ལ་དམིགས་པ་ཤིན་ཏུ་གསལ་བར་བྱའོ། །ཕེབས་འདུག་པར་སྒོམ་དོན་ཁྱེར་བདེ་བ་ཞིག་དང་། རྣམ་ཤེས་སྤར་ས་ཡང་སྐབས་འདི་ཁར་ཡིན་ནམ། འདི་འཇུག་རྡོ་རྗེ་ཕུར་བུ་ཀི་ལ་ཡ། ཞེས་པ་ནས། སྔགས་མཇུག་རྦད་རྦད་ཅེས་པའི་དུས་གཉིས་གང་སྤར་རྒྱུ་ཡིན། ཕུར་བུ་བསྐྱེད་པ་ཡང་། ལས་བྱང་དུ། དྲེགས་འདུལ་དྲང་སྲོང་སྤྲུལ་པའི་སྲས། །ཞེས་པ་ཙམ་ལས་གསལ་བ་ཞིག་མི་འདུག་པས། སྐུ་མདོག་དང་ཞལ་ཕྱག་ཅི་འདྲ་ཞིག་ཡིན་ལགས་པ་དང་། འདི་ཁ་ལ་ཚེ་ཁྲུས་རྫོང་འཕྲང་སྲོག་གསུམ་གསོ་བ་རྣམ་གསུམ་དང་བཅས་པའི་སྐོར་རྣམས་ཞལ་གསལ་བ་ཞིག་མི་འདུག་པས་ཡང་བཟློག་སོགས་ཀྱི་རྒྱས་འགེབས་བྱས་པས་འཐུས་སམ། དེ་མིན་སྙིང་པོར་དྲིལ་བ་ཞིག་མཁྱེན་ལགས། བདག་དང་ལྷ་བསྒྲལ་བྱ་གསུམ་ག་གཉིས་སུ་མེད་པ་སྤྲོས་བྲལ་བློ་འདས་ཆོས་སྐུ་ཐིག་ལེ་ཉག་གཅིག་དེ་ཁོ་ན་ཉིད་ཀྱི་ངང་ལ་བློ་འཇོག་ཅིང་། རྣམ་ཤེས་སྤར་བ་ཡང་སྐབས་འདི་ཉིད་རང་དུ་ཡིན་ཏེ། ངོ་བོ་བརྟེན་པ་སེམས་ཀྱི་ཆོས་ཉིད་བསྒྲལ་བའོ། །རྡོ་རྗེ་ཕུར་བུ་ཞེས་པ་མན་ཆད་ནི་རྟེན་ནམ་རྟེན་གཞི་བག་ཆགས་ཀྱི་གཟུགས་རྟེན་བསྒྲལ་བ་ཡིན། ཕུར་བུ་བསྐྱེད་པའི་དམིགས་བསལ་གཞུང་དུ་མི་འདུག་ཀྱང་། གཞན་གྱི་རིགས་འགྲེ་ལྟར་ན། སྲས་མཆོག་ཞལ་གཅིག་ཕྱག་གཉིས་མཐིང་ནག་ཕུར་བུ་འདྲིལ་བ་སྨད་ཕུར་བུར་བསྒོམ་པས་ཁྱབ་ཅིང་། ཡང་ཕྱག་གིས་ཐོ་རལ་འཛིན་པར་བྱས་ཀྱང་འགལ་བ་ནི་མ་མཐོང་། རྫོང་འཕྲང་སྲོག་གསུམ་གྱི་གནད་ནི་དྲག་སྔགས་སྤྱི་ལ་གཅེས་པའི་ཁོག་ཡིན་པས་རྒྱ་འབག་གི་མིག་ལྟར་འཕྲུལ་ཤེས་དགོས་གསུངས་པ་བཞིན། ཡང་བཟློག་སོགས་ཀྱི་གཞུང་ནས་བཤད་པ་བཞིན་གནང་བས་ཤིན་ཏུ་ཁྱབ་ཅིང་། གཞུང་ལ་ལར་དམིགས་གནད་འདྲ་མིན་སྔ་ཕྱིར་ཁ་ཤས་བྱུང་ཡང་བཤད་ཚུལ་ཡིན་གྱི་བཤད་གཞིའི་དགོངས་དོན་ལ་མི་མཐུན་པ་མེད་དོ། །གྲོལ་ཉིན་གཏོར་ཆེན་ཟོར་བསྒྱུར་བྱས་རྗེས། སླར་གཏོར་མ་གསལ་འདེབས་མན་ངག་ལྟར་བྱ་གནང་འདུག་པ་བུ་པོད་ཀྱི་ཟིན་བྲིས་སུ་འདུག་པ་དེ་ཁ་ཡིན་ནམ། དེ་མིན་ཇི་ལྟར་ལགས། དྲག་གཏོར་གནས་གྱུར་རྫུས་སྐྱེས་སུ། །ཞེས་སོགས་ཟོར་གྱི་མན་ངག་ཏུ་བཤད་པ་ལྟར་ཡིན། ལྕེ་རྩར་ཞི་སྔགས་བཟླ་དུས་མན་ངག་བཞིན་བྱེད་ཟེར་བ་ཆོས་ཚན་དུ་འདུག་པས་ཇི་ལྟར་ལགས། མགྲིན་པའི་ཟླ་བའི་དབུས་སུ་ཨཱཿཡིག་ལ་ཏྲཾ་དུས་སྔགས་ཀྱིས་བསྐོར་བར་སྔར་ནས་བསྒོམས་པར་འདི་དུས་དེ་ལ་དམིགས་པ་རྩེ་གཅིག་ཏུ་གཏོད་པའི་དོན་ཡིན། རང་ལུས་རྡོ་རྗེར་བསྒོམ་པའི་ཡར་རྩེ་ནམ་མཁའ་ཞེས་གདུགས་འོག་དང་། མར་རྩེ་དབང་ཆེན་གཞི་ལ་རེག་ཅེས་པ་བུམ་ཞབས་ཡིན་ཚུལ་འདུག་པ་དེ་ཁ་ཡིན་ནམ། ཇི་ལྟར་ལགས། འདི་ལ་རྩ་བའི་ཡི་གེ་རྡོ་རྗེ་སྒོམ་པའི་སྐབས་སུ་མཆོད་རྟེན་གྱི་བཤད་གཞི་ཡོད་ཚོད་མིན། དེས་ན་ཡར་རྩེ་ནམ་མཁའ་དང་མར་རྩེ་ས་གཞིར་དོགས་པ་མི་དགོས་མཆོད་རྟེན་བསྒོམས་ཕྱིན་ཚིག་དོན་མི་འབྲེལ་ཡང་ཇི་ལྟར་གསུངས་པ་བཞིན་མཛད་པ་ལས་འོས་མེད་པ་འདྲ། མངོན་སྤྱོད་ཀྱི་སྐབས་འདིར་ཐུན་ཐག་མ་ཡན་པ་གལ་ཆེ་ཕེབས་འདུག་པ། ངེས་པར་ཐུན་བར་མ་ཆད་པའི་ལག་པས་འཛིན་དགོས་རང་ཡིན་ནམ། སྤོམ་རག་པའི་ཞལ་གདམས་སུ། མདུན་དུ་ལྕགས་ཕུར་ལ་བརྟོད་ལ་འཇོག་གསུངས་པ་བཞིན་བྱས་ཆོག་པ་ཅི་འདྲ་ལགས། ལྕགས་ཕུར་འདི་དང་། ལས་ཁུང་གི་བསད་ལིང་གི་སྙིང་གར་སེང་ཕུར་སོར་བཞི་པར་ཐུན་ཐག་བཏགས་འདུག་པའི་འདི་གཉིས་ལྷ་རུ་བསྐྱེད་རྒྱུ་ཡོད་དམ་མེད། ཡོད་ཚེ་ཅི་འདྲ་ཞིག་ཏུ་བསྐྱེད་རྒྱུ་ཡིན་ལགས་པ་དང་། ཐུན་ཐག་བརྒྱུད་ནས་འོད་ཟེར་སྤྲོ་བ་ལྕེའི་སྔགས་ཕྲེང་རང་ནས་ཡིན་ནམ། ཐུགས་ཀ་ནས་ཡིན་ཇི་ལྟར་ལགས། ཐུན་ཐག་མི་ཡན་པའི་དོན་ནི། སྒྲུབ་གྲོགས་དང་བཅས་པའི་ཚེ་ན་སྔགས་གསུང་མི་ཆད་ཡིན་པས། སྒྲུབ་པ་པོས་བཟུང་ཕྱིན་ཐུན་ཐག་མི་ཡན་པ་ཡིན་ལ། གྲོགས་མེད་ན་མདུན་གྱི་ཐུན་ཕུར་ལ་བརྟོད་པར་བཤད་ཅིང་། སྒོམ་དོན་ནི་དམིགས་སུ་མི་གསལ་ཡང་ཞེ་སྡང་རྡོ་རྗེ་ཉིད་དུ་སྒོམ་པའོ། །ཡང་ན་ངོ་བོ་ལྷ། རྣམ་པ་ཕུར་བུ་ཉིད་དུ་བསྒོམ་པས་ཀྱང་རུང་ངོ་། །འོན་ཀྱང་རྒྱུན་དུ་ཐུན་ཕུར་ཉིད་ལ་བརྟོད་བཞིན་པའི་སྣེ་མོ་ནས་སྒྲུབ་པ་པོས་འཛིན་པ་ཕྱག་ལེན་ལ་འདུག་གོ །བསྲུང་བཟློག་དུས་བུམ་ནང་དུ་ལྷ་རྣམས་བསྒོམས་པའི་ཕྱི་རོལ་དུ་སྔགས་ཕྲེང་ཚར་གཅིག་བསྒོམ་དགོས་པ་ཡིན་ནམ་ལགས། བཟླས་དམིགས་སུ་ཞེས་པའི་སྔགས་ཕྲེང་རང་ཉིད་ལྷར་གསལ་བའི་ཕྱི་རོལ་འོད་ཟེར་གཡས་སུ་ཡོད་པ་བསྐོར་ཞིང་ཞེས་པ་འདུག་པར་དོགས་པ་བྱུང་ལགས། འདི་རྣམས་ལ་བཀའ་མཆན་གསལ་བ་ཞིག་མཁྱེན་ལགས། ལྷའི་ཕྱི་རོལ་དུ་སྔགས་ཀྱི་ཕྲེང་བ་འོད་ཟེར་འཕྲོ་བ་དང་བཅས་སྒོམ་དགོས་པ་ཅིས་ཀྱང་ཡིན་ནོ། །ཡང་བཟློག་གི་ནྲིཿརཀྴ་སོགས་ལ་ཡང་གོ་བདེའི་བསླབ་སྟོན་ཞུ། ནྲིཿརཀྴ་སེམས་ཆགས། ཤ་རཀྴ་ཤ་ཆགས། ཁམས་རཀྴ་ཁྲག་ཆགས། ཀེཾ་རཀྴ་རུས་ཆགས། རཾ་རཀྴ་དྲོད་དང་ལྡན། ཡཾ་རཀྴ་དབུགས་དང་ལྡན། ཞེས་པའི་དོན་ནི་བསྒྲལ་བྱའི་དམིགས་རྟེན་ལུས་དེ། ནམ་མཁས་གོ་ཕྱེ་ནས། ས་ཆུ་མེ་རླུང་སྟེ་འབྱུང་བ་ལྔ་སེམས་ཤ་ཁྲག་དྲོད་དབུགས་སུ་སྣང་བ་ཡིན་པས། དེའི་རྟེན་ཡང་འབྱུང་བ་ལྔ་ལས་གྲུབ་པར་དགོངས་པས་དམིགས་པའི་འབེན་ངོས་བཟུང་ནས་དེ་ལ་འབྱུང་བ་ལྔའི་ལས་ཀྱི་སྦྱོར་བ་རྣམས་གཤེད་དུ་འབེབས་པའོ། །ཡང་། མནན་པའི་སྐབས་འབྱུང་བའི་རྒྱས་འདེབས་ནི། ཨེ་ནྲི་ཏྲི་མཱ་ར་ཡ་སྟམྦྷ་ཡ་ནན། དེ་བཞིན་དུ། ཡཾ། རཾ། བཾ། ལཾ། སུཾ་སོགས་རིམ་བཞིན་ནམ་མཁའ་ཆོས་འབྱུང་གྲུ་གསུམ། རླུང་གཞུ་དབྱིབས། མེ་གྲུ་གསུམ། ཆུ་ཟླུམ་པོ། ས་གྲུ་བཞི། རི་རབ་སྤྱི་མཐུན་རྣམས་རིམ་པ་ཅན་བསྒོམས་པས་འབྱུང་བ་རིམ་ཅན་དུ་ཆགས་པའི་སྣོད་བཅུད་ཆེན་པོ་གཅིག་གིས་ཅིས་ཀྱང་མི་ཐར་བར་གནན་པར་བསམ་མོ། །སཱཙྪ་ཆུ་ཀླུང་དུ་སྦྱར་བ་ལ་ཉེས་པ་མེད་ཅིང་ཕན་པའི་ཁུངས་ནི། ངན་སོང་སྦྱོང་རྒྱུད་སོགས་ནས་སྦྱིན་སྲེག་བྱས་པའི་རུས་བུ་ལས་སཱཙྪ་བཏབ་སྟེ་ལམ་གྱི་གཞི་མདོར་མཆོད་རྟེན་སོགས་སུ་བཞུགས་སུ་གསོལ་ནས་ཚེ་འདས་ཀྱི་མིང་ནས་སྨོས་པའི་གཟུངས་བཟླས་པས་ངན་སོང་ལས་ཐར་བ་དང་། གཟུངས་ཀྱི་རྟོག་པ་དག་ལས་སཱཙྪ་ཆུ་བོར་གཤེགས་སུ་གསོལ་བས་སྡིག་སྒྲིབ་སྦྱོང་བར་གསུངས་པ་སོགས་ཀྱང་གསལ་པོར་འདུག་པས། དེང་སང་ཆུ་བོར་གཤེགས་པའི་ཁུངས་ཀྱང་དེ་བཞིན་ཡིན་འདུག །