མི་དབང་ཆེན་པོའི་དྲི་ལན་དུ་གསོལ་བ།
༈ མི་དབང་ཆེན་པོའི་དྲི་ལན་དུ་གསོལ་བ། ལགས། གཙུག་ལག་ཁང་གི་རབ་གནས་ཀྱི་རྟེན་བསྐྱེད་སྤྱིར་སྒོམ་པའི་དུས་རྣམ་སྣང་གིས་བྱས་པའི་རིགས་པས་སྐུ་རྟེན་དུ་བསྡུ་བ་འཐད་འདུག་ལགས་ཤིང་། དེ་ལའང་མཆོད་རྟེན་ནི་བྱང་ཕྱོགས་སོ་བདུན་སོགས་རྟོགས་པའི་ཡེ་ཤེས་ཆོས་སྐུ་ལ་མངའ་བའི་འབྲས་བུ་མཐར་ཐུག་གི་ཡོན་ཏན་རྣམས་བསགས་པའི་ཆོས་གཟུགས་ཀྱི་སྣང་བརྙན་ཡིན་པས་ཆོས་སྐུའི་རྟེན་དུ་འཐད་ཅིང་། གསང་སྔགས་ཀྱི་མཆོད་རྟེན་བློས་བསླང་སོགས་ཀྱང་དེ་དང་འདྲ་ལགས་པ་དང་གཙུག་ལག་ནི་རྒྱལ་བའི་གསུང་རབ་ཀྱི་མིང་གི་རྣམ་གྲངས་ཏེ། དེ་གཙོ་བོར་གྱུར་པའི་རྟེན་གསུམ་བཞུགས་པའི་གནས་གཙུག་ལག་ཁང་ནི་སྐུ་གསུང་ཐུགས་ཀྱི་རྟེན་རྣམས་གང་ཞིག་མཐོང་བ་ཙམ་གྱིས་དད་པའི་གདུངས་ཤུགས་གཡོ་བས་ཐར་པའི་ས་བོན་འཇོག་པ་སྟེ་འགྲོ་བའི་དོན་མང་བྱེད་པའི་བེམ་པོའི་གཟུགས་བརྙན་རྣམས་ཀྱང་སངས་རྒྱས་ཀྱི་རྣམ་སྤྲུལ་ཁོ་ནར་སྙན་གྱི་གོང་རྒྱན་དུ། ང་ནི་སྙིགས་མའི་དུས་ཀྱི་ཚེ། །བཟོ་དང་ཡི་གེའི་གཟུགས་སུ་འདུག །ང་ཡིན་སྙམ་དུ་དད་པ་བྱོས། །ཞེས་དང་། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། སྐྱེད་མོས་ཚལ་དང་། ནོར་བུ་དང་། སྨན་དང་། རིག་སྔགས་དང་། ཉེ་བར་མཁོ་དགུའི་ཡོ་བྱད་དུ་སྣང་བས་གདུལ་བར་བྱ་བ་ཡིན་ནོ། །དེ་དང་དེའི་གཟུགས་དང་ཁ་དོག་ཏུ་སྣང་ངོ་། །ཞེས་པ་ལྟར་སྣ་ཚོགས་སྤྲུལ་སྐུའི་རྟེན་དུ་བཞག་ན་སྐྱོན་མེད་ཅིང་བདེ་བ་འདྲ་ལགས།