སྐྱེ་སྤྲུལ་གྱི་ཁྱད་པར་སོགས་ལས་བརྩམས་པའི་མི་དབང་ཆེན་པོའི་དྲི་ལན།

༈ སྐྱེ་སྤྲུལ་གྱི་ཁྱད་པར་སོགས་ལས་བརྩམས་པའི་མི་དབང་ཆེན་པོའི་དྲི་ལན་དུ་ཕུལ་བ། ལགས། སྤྱིར་སྐྱེ་སྤྲུལ་གྱི་ཁྱད་པར་ནི། སྐུའི་བཀོད་པ་སྔ་མ་བསྡུས་ཏེ་ཕྱི་མ་འཛིན་པ་སྐྱེ་བ་དང་། སྤྲུལ་གཞི་མ་བསྡུས་པ་ལས་སྐུའི་བཀོད་པ་གཞན་དག་སྟོན་པ་སྤྲུལ་པ་ཞེས་གྲགས་ཤིང་། སྔ་མ་ལ་རྒྱུད་གཅིག་པ་ངེས་པར་དགོས་ཀྱང་སྤྲུལ་པ་ཡིན་མིན་གཉིས་ཀ་སྲིད་དེ། དཔེར་ན། རྒྱལ་བུ་དོན་གྲུབ་སྐྱེ་བ་སྤྲུལ་སྐུ་ཡིན་ཡང་། དེ་དང་རྒྱུད་གཅིག་པའི་བྲམ་ཟེའི་ཁྱེའུ་སྣང་བྱེད་སྐྱེ་བ་སྤྲུལ་སྐུར་མི་འགྱུར་བ་བཞིན་དང་། ཕྱི་མ་ལ་རྒྱུད་གཅིག་པ་ཞིག་ཡིན་ཡང་སྤྲུལ་གཞི་གཅིག་ཁོ་ནར་མ་ངེས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་བདག་ཉིད་ཕྱག་ན་རྡོ་རྗེ་ལྟ་བུས་གདུལ་བྱ་པདྨའི་རིགས་ཀྱིས་འདུལ་བར་འོས་པ་ལ་སྤྱན་རས་གཟིགས་ཀྱི་སྤྲུལ་པར་བསྟན་ནས་དོན་མཛད་པའི་ཕྱིར། ཡང་། སྤྱན་རས་གཟིགས་ཀྱང་སྙིང་རྗེ་པད་དཀར་དུ། ཡབ་རྒྱལ་པོ་རྩིབས་ཀྱི་མུ་ཁྱུད་བདེ་བ་ཅན་དུ་སངས་རྒྱས་ཚེ་དཔག་མེད་ཅེས་བྱ་བར་འཚང་རྒྱ་བར་ལུང་བསྟན་པ། དེའི་ཆོས་སྲོད་ལ་ནུབ་པའི་ཐོ་རེངས་རྒྱལ་བུའི་ཐུ་བོ་མིག་མི་འཛུམ་སངས་རྒྱས་འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོར་འཚང་རྒྱ་བར་ལུང་བསྟན་པ་སོགས་འཚང་རྒྱ་འགྱུར་དུ་གསུངས་པ་དང་། རྒྱལ་པོ་བཀའ་འབུམ་སོགས་ནས་སངས་རྒྱས་ཟིན་དུ་གསུངས་པ་གཉིས་ལའང་ནང་འགལ་བའི་ཉེས་པ་མེད་པ་འདྲ་ལགས་ཏེ། དཔེར་ན། རྒྱུད་བླ་མར། ཆོས་ཀྱི་སྐུ་ལས་མ་གཡོས་ཀྱང་། །ཞེས་སོགས་དང་། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་བཟང་ལོངས་སྤྱོད་རྫོགས་པ་ལས། །འདུལ་བའི་སྤྲུལ་པ་གྲངས་མེད་ཅིང་། །ཁྱད་པར་མི་མཇེད་འཇིག་རྟེན་དུ། །སྟོང་རྩ་གཉིས་ཀྱི་སྐུར་སྣང་ངོ་། །ཞེས་ཆོས་ཀྱི་སྐུ་ལས་ལོངས་སྐུར་བཞེངས་པའི་ཐུགས་རྗེ་ཆེན་པོའི་ངང་དེ་ལས་གང་འདུལ་གྱི་སྤྲུལ་སྐུར་རང་ཤར་བར་གསུངས་ཀྱང་། འོ་སྐོལ་གྱི་སྟོན་པ་ཐུབ་པའི་དབང་པོས་སླར་རྒྱལ་བུ་དོན་གྲུབ་ཀྱི་རྟེན་ལ་སངས་རྒྱས་པའི་ཚུལ་བསྟན་པ་བཞིན་ནོ། །རྒྱུ་མཚན་དེའི་ཕྱིར་ན། འཕགས་པ་སྤྱན་རས་གཟིགས་དབང་ཕྱུག་ཀྱང་། བདེ་བར་གཤེགས་པ་ཐམས་ཅད་ཀྱི་ཐུགས་རྗེའི་ཡེ་ཤེས་གཅིག་ཏུ་བསྡུས་པའི་བདག་ཉིད། རྣམ་པ་རྒྱལ་སྲས་ཐུ་བོའི་ཚུལ་བཟུང་ནས་དེ་བཞིན་གཤེགས་པ་ཐམས་ཅད་ཀྱི་དགོངས་པ་སྒྲུབ་པ་ཞིག་ཡིན་ལ། རྒྱུད་སྡེ་རྣམས་ལས་ཀྱང་དེ་ལྟ་བུའི་སྣང་ཚུལ་དང་མཐུན་པར་བྱང་སེམས་སློབ་པའི་ཚུལ་དུ་སྒྲུབ་པ་དང་། ཡང་། གནས་ཚུལ་ལ་སངས་རྒྱས་ཀུན་གྱི་སྤྱི་གཟུགས་ཡིན་པ་ལྟར་དཀྱིལ་འཁོར་གྱི་དབང་ཕྱུག་རིགས་བདག་རྡོ་རྗེ་འཆང་ཆེན་པོའི་ཚུལ་དུ་སྒྲུབ་པ་གསང་འདུས་འཇིག་རྟེན་དབང་ཕྱུག་ལྟ་བུས་མཚོན་ནས་མང་བའི་ཕྱིར། འདི་ཡང་སྔོན་ནས་སངས་རྒྱས་ཟིན་པར་གསུངས་པ་གནས་ཚུལ་དང་། སླར་ཡང་རྒྱ་འགྱུར་དུ་གསུངས་པ་སྣང་ཚུལ་དུ་ངེས་ལགས་པ་དང་རྒྱལ་པོ་བཀའ་འབུམ་ནས་བཤད་པའི་སངས་རྒྱས་པའི་དུས་ད་ལྟའི་སྔོན་སོང་གི་བསྐལ་པ་དགུ་བཅུ་རྩ་གཅིག་དང་། པད་དཀར་ལས་བདེ་བ་ཅན་དུ་ཚེ་དཔག་མེད་ཀྱི་རྒྱལ་ཚབ་དུ་འཚང་རྒྱ་བར་གསུངས་པའི་དུས་གཉིས་པོའི་སྔ་ཕྱི་ཡང་མཐའ་གཅིག་ཏུ་དཀའ་བ་འདུག་ལགས་རུང་དོན་གནས་ཚུལ་ལ་དཀྱིལ་འཁོར་གྱི་ཁྱབ་བདག་རྡོ་རྗེ་འཆང་ཆེན་པོར་གདོད་ནས་བཞུགས་པར་ཐུན་མོང་མ་ཡིན་པའི་རྒྱུད་རྣམས་ནས་གསུངས་པ་ལྟར་ན་བསྐལ་པ་གོ་གཅིག་གི་སྔོན་རོལ་དུ་སངས་རྒྱས་པ་དང་། བདེ་བ་ཅན་དུ་འཚང་རྒྱ་འགྱུར་གཉིས་ཀ་ཚུལ་བསྟན་དུ་མཚུངས་པར་འགྱུར་ལ། འོན་ཀྱང་བསྐལ་པ་གོ་གཅིག་གི་སྔོན་རོལ་དུ་སངས་རྒྱས་ནས་སླར་ཡང་བདེ་བ་ཅན་དུ་འཚང་རྒྱ་ཚུལ་སྟོན་ཅེས་བཤད་ན་གནས་སྐབས་སུ་འཆད་བདེའམ་སྙམ་མོད། གཉིས་ཀ་ཚུལ་བསྟན་དུ་འདོད་པའི་ཕྱོགས་ལ་གང་ལྟར་བཤད་ཀྱང་འགལ་བ་ནི་མ་མཐོང་ལགས། ཡང་། རྒྱལ་པོ་འཇིག་རྟེན་དབང་ཕྱུག་བསྐལ་པ་དཔག་ཏུ་མེད་པའི་སྔོན་རོལ་དུ་བྱུང་བ་དང་། སྤྱན་རས་གཟིགས་འཇིག་རྟེན་གྱི་ཁམས་འདིར་བསྐལ་པ་ཆེན་པོ་འཛིན་པ་ཞེས་བྱ་བ་ལ་རྒྱལ་བུ་མིག་མི་འཛུམ་དུ་སྐྱེས་ཏེ་སེམས་བསྐྱེད་པ་སོགས་གསུངས་པས་རྒྱལ་པོ་འཇིག་རྟེན་དབང་ཕྱུག་སྔོན་དུ་འཐད་པ་ལྟ་བུ་བྱུང་ཡང་། དོན་ལ་འཕགས་པ་སྤྱན་རས་གཟིགས་གནས་ཚུལ་ལ་བསྐལ་པ་དཔག་ཏུ་མེད་པའི་སྔོན་རོལ་སོགས་ཀྱིས་ཀྱང་ཚད་བཟུང་དུ་མེད་པ་ཐོག་མ་མེད་པའི་དུས་ནས་སངས་རྒྱས་པའི་ཕྱིར་ན། འདིར་རྒྱལ་པོ་དེས་ལམ་བསྒྲུབས་ནས་སྤྱན་རས་གཟིགས་ཀྱི་གོ་འཕང་བརྙེས་པ་ལྟ་བུ་མ་ཡིན་པར་སྤྲུལ་གཞི་སྤྱན་རས་གཟིགས་དང་། སྤྲུལ་པ་རྒྱལ་པོ་འདིར་འབྲེལ་བས་གོ་རིམ་དཀྱུས་སུ་གནང་བ་འདི་བཞིན་འཐད་པ་དང་བཅས་པ་ལགས། གླེགས་བམ་ལས་གསུངས་པའི་རྒྱ་གར་གྱི་འཁྲུངས་རབས་རྣམས་ཇི་ལྟར་ཕེབས་གནང་བཞིན། ཞུ་ལན་ནོར་བུའི་ཕྲེང་བའི་ནང་ནས་རྔོག་གིས་ཡོན་ཏན་གྱི་ཚིག་རེ་བཏོན་ནས་འབྲོམ་གྱིས་སྔོན་དེ་ཇི་ལྟར་གནས་ཚུལ་ཞུས་པའི་ལན་གྱི་གོ་རིམ་ལྟ་བུ་ལས་སྔ་ཕྱི་བབས་བསྒྲིགས་ནས་གསུངས་པ་མི་འདྲ་ཞིང་། རྒྱལ་པོ་དཔལ་ཡང་། སྔོན་ཚེ་བསྐལ་པ་མང་པོའི་དུས། །ཡུལ་དེར་རྒྱལ་པོ་དཔལ་བཟང་ཞེས། །ཁྱོད་གྱུར་ཅེས་རྒྱལ་པོ་དད་པ་རབ་བརྟན་སྔོན་བསྐལ་པ་མང་པོའི་གོང་དུ། ཁམས་དྷའི་ཡུལ་དེར་རྒྱལ་པོ་དཔལ་དུ་སྐྱེས་པ་ཙམ་ལས་བསྐལ་པའི་གྲངས་སོགས་མ་སྨོས་པས་འདི་ཙམ་ནས་བྱུང་ཞེས་དཔྱད་དཀའ་བར་མ་ཟད། འདི་དག་གླེགས་བམ་རིན་པོ་ཆེ་ཁོ་ན་ལས་གཏམ་རྒྱུད་གཞན་དང་གུང་བསྒྲིག་རྒྱུ་མ་རྙེད་པ་བཅས། འདི་ལྟར་གླེགས་བམ་གྱི་གོ་རིམ་བཞིན་གནང་བ་འདི་ཀ་ལེགས་པ་འདྲ་ལགས། རྒྱལ་པོ་གཙུག་ལག་འཛིན་གྱིས་སློབ་དཔོན་ཆེན་པོ་གསོན་བསྲེགས་བྱས་པའི་དགོས་པ་སློབ་དཔོན་གྱིས་འདུལ་བའི་དུས་ལ་བབ་པས་ཐུགས་རྗེ་ཡུལ་ལ་འཇུག་པའི་ཉེར་བསྡོགས་ཀྱིས་བསྐུལ་ཞིང་། རྒྱལ་པོ་རང་གི་རིགས་ཀྱི་ནུས་པ་སད་པར་ཉེ་བས་མཚམས་སྦྱར་བར་སྣང་མོད་ཀྱི་དེ་ལས་གཞན་དུ་དགོས་པ་འདི་དང་འདི་ཞེས་པའི་གཏམ་རྒྱུད་ངོ་མཚར་བ་གཞན་དུ་འདུག་པ་མ་མཐོང་ལགས། བོད་ཀྱི་རྒྱལ་རབས་ལྟ་བུ་ཡབ་སྲས་འཁྲུངས་རབས་སུ་བྱུང་བ་དང་། བླ་མ་ཞང་དང་གཡའ་བཟང་པ། ཆོས་རྒྱལ་འཕགས་པ་དང་གུ་རུ་ཆོས་དབང་། མངའ་རིས་པཎ་ཆེན་བྱང་བདག་པ་གཉིས་པོ་ཐམས་ཅད་མཁྱེན་པ་སྐུ་ན་རིམ་འགའ་དང་ཐོག་མཚུངས་པ་སོགས་བྱུང་ཡང་འགལ་ཆར་མི་འགྱུར་བ་འདྲ་ལགས་ཏེ། སོ་སྐྱེའི་སྐྱེ་བརྒྱུད་ལྟ་བུ་ཡིན་ན་དེ་འདྲ་མི་སྲིད་ཀྱང་། འདིར་འཕགས་པའི་རྣམ་སྤྲུལ་ཚད་མེད་པས་དུས་གཅིག་ལ་སྐུའི་བཀོད་པ་དུ་མ་སྟོན་པ་མི་འགལ་བ་ཡིན་ཏེ། འཕགས་པའི་མཛད་པ་གདུལ་བྱའི་སྣང་བ་ལ་གོ་མི་འགག་པར་ཐུགས་རྗེ་ཆེན་པོའི་འབྲེལ་པས་སྣང་བར་གྲུབ་པའི་ཕྱིར། དཔེར་ན། མཁའ་ཟླ་ཉིད་ཆུ་དྭངས་པའི་སྣོད་ཇི་སྙེད་པར་བར་སྣང་ལ་སྒྲིབ་གཡོགས་མེད་པའི་རྐྱེན་གྱིས་དེ་སྙེད་དུ་སྣང་བ་བཞིན་དང་། མདོར་ན་འཕགས་པ་སྤྱན་རས་གཟིགས་དབང་ཕྱུག་ལྟ་བུ་སྣང་ཚུལ་དུའང་ས་བཅུའི་བྱང་ཆུབ་སེམས་དཔའི་རྣམ་པར་སྟོན་པའི་ཕྱིར་སྐུའི་བཀོད་པ་དུ་མ་བསྟན་ནས་དོན་མཛད་པ་ལ་སྐྱོན་དུ་འགྱུར་བ་ལྟ་སྨོས་ཀྱང་ཅི་དགོས་ཏེ། ས་དང་པོ་ལ་གནས་པའི་བྱང་ཆུབ་སེམས་དཔས་ཀྱང་སྐུའི་བཀོད་པ་བརྒྱ་ཕྲག་ཏུ་སྟོན་པ་སོགས་ཡོན་ཏན་བརྒྱ་ཕྲག་བཅུ་གཉིས་སྟོན་ནུས་པའི་རྒྱུ་མཚན་གྱིས་སོ། །དེ་ཡང་ཕལ་པོ་ཆེ་ལས། ཏིང་འཛིན་བརྒྱ་དང་སངས་རྒྱས་བརྒྱ་རྣམས་མཐོང་བྱེད་ཅིང་། །ཞིང་བརྒྱ་བསྐྱོད་ཅིང་རབ་ཏུ་སྣང་བྱེད་ཀུན་ཏུ་འགྲོ། །སེམས་ཅན་བརྒྱ་སྟོང་ཆོས་ཀྱི་སྒོ་ལ་འགོད་པར་བྱེད། །རྒྱལ་བའི་སྲས་ཀྱང་བརྒྱ་ཡི་གྲངས་ཚད་རབ་ཏུ་སྟོན། །དེ་ཡི་གོང་ན་སྨོན་མཆོག་སྟོབས་ལྡན་ཚད་ཀྱང་མེད། །ཅེས་གསུངས། དེས་ན་འདིར་སྐྱེ་བ་དངོས་དང་། སྤྲུལ་པ་དང་། ཐུགས་རྒྱུད་གཅིག་པ་དང་། བྱིན་གྱིས་བརླབས་པ་སོགས་ཀྱི་ཚིག་གི་གསལ་བྱེད་མ་གནང་ཡང་ཆོག་འདྲ་ལགས་ཏེ། དཔེར་ན་ཆོས་རྒྱལ་ཁྲི་སྟོང་ལྡེའུ་བཙན་དུ་འཁྲུངས་པ་ལྟ་བུ་ལ། དེ་ཚེ་དེའི་དུས་ན་སྐུའི་བཀོད་པ་གཅིག་ནི་རང་གི་སྲས་སད་ན་ལེགས་ཀྱི་ཚུལ་དུ་བསྟན་ནས། ཞེས་པ་ལྟ་བུ་གནང་ཡང་འགལ་བ་ཅི་ཡང་མེད་པའི་ཕྱིར་རོ། །དེས་ཁ་ཆེ་དགོན་པ་བ་ནས་མཁྱེན་རབ་རྗེའི་བར་གྱི་བརྒྱད་པོ་སོགས་སྐྱེ་སྤྲུལ་དངོས་སུ་འགྲོ་དཀའ་བ་དང་། འགྲོ་མགོན་འཕགས་པ་སོགས་རང་གི་རྣམ་ཐར་དང་བསྟུན་ན་སྐུ་སྐྱེ་དངོས་གྲས་སུ་འགྲིག་མདོག་མི་ཁ་བ་སོགས་ཀྱི་དགོངས་ཕྱོགས་རྣམས་སེལ་བར་ནུས་ལགས་ཤིང་། མདོར་ན་འཕགས་ཆེན་རྣམས་ལ་སེམས་ཅན་འདི་དང་འདིའི་མདུན་དུ་ངས་གཟུགས་འདི་ལྟ་བུ་བསྟན་ནས་འདུག་པར་བྱ་སྙམ་དུ་རྣམ་པར་མི་རྟོག་ནའང་། སེམས་ཅན་རྣམས་ཀྱིས་རང་རང་གི་བསམ་པ་དང་དབང་པོའི་ཁྱད་པར་དེ་དང་མཐུན་པའི་སྤྲུལ་པའི་སྐུའི་བཀོད་པ་དེ་ཉིད་ཀྱང་རང་རང་གི་ངོ་ན་སྣང་ཞིང་། དེ་དག་ཀྱང་ལ་ལར་ཐུགས་རྒྱུད་དང་། སྤྲུལ་གཞི་དང་། ཕྲིན་ལས་ཀྱི་འཇུག་པ་སོགས་གཅིག་པ་དང་། ལ་ལར་ཐ་དད་དུ་སྟོན་པ་སོགས་བསམ་གྱིས་མི་ཁྱབ་པའི་ཆོ་འཕྲུལ་གྱི་སྒོ་མཐའ་ཡས་པར་སྟོན་པ་ཆོས་ཉིད་ཡིན་པས་ཆུ་སྣོད་ཀྱི་ཟླ་བ་ཇི་སྙེད་པ་ཡང་མཁའ་ཟླའི་ཀློང་དུ་གཅིག་པ་ལྟར། འདིར་སྐྱེ་སྲིད་དང་། སྤྲུལ་པ་དང་། སྐུའི་བཀོད་པ་དུ་མའི་ཚུལ་དུ་རྣམ་པར་རོལ་པ་འདི་ཐམས་ཅད་འཕགས་པ་སྤྱན་རས་གཟིགས་དབང་ཕྱུག་ཀུན་མཁྱེན་བླ་མ་འདི་ཉིད་ཀྱི་རྨད་དུ་བྱུང་བའི་ཆོ་འཕྲུལ་ཁོ་ནར་གདོན་མི་ཟ་བ་ཉིད་དུ་གྲུབ་པ་ལགས་སོ། །དེ་ལྟར་ཡང་ཕལ་པོ་ཆེ་ལས། ཇི་སྙེད་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །དེ་བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཚང་རྒྱ་བར། །ཞིང་རྣམས་ཀུན་ན་རབ་ཏུ་སྣང་། །སངས་རྒྱས་ལ་ནི་གཉིས་སྣང་མེད། །འདི་ལ་གཅིག་ཀྱང་ཡོད་མ་ཡིན། །སྐུ་ནི་གཉིས་སམ་གསུམ་དུ་མེད། །ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། །སྐུ་ནི་འདས་པ་མ་ཡིན་ཏེ། །མ་འོངས་པ་ཡང་སྐུ་མ་ཡིན། །སྐྱེ་དང་བྱང་ཆུབ་མྱ་ངན་འདས། །སྐད་ཅིག་གཅིག་གིས་རབ་ཏུ་སྣང་། །ཇི་ལྟར་སྒྱུ་མར་གྱུར་པའི་གཟུགས། །སྐྱེས་པ་མ་ཡིན་འོངས་པ་མིན། །དེ་ལྟར་དེ་བཞིན་གཤེགས་པའི་སྐུ། །སྐྱེ་བ་མེད་ལས་ཤིན་ཏུ་བསྟན། །ཅེས་དང་། གཞན་ཡང་འགགས་པ་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། བཀའ་སྩལ་པ། འཇམ་དཔལ་འདི་ལྟ་སྟེ། དཔེར་ན་ཟླ་བ་ཡར་གྱི་ངོའི་དཀྱིལ་འཁོར་ནམ་ཕྱེད་ཀྱི་དུས་ན་འཛམ་བུ་གླིང་གི་སེམས་ཅན་ཐམས་ཅད་ཀྱི་སོ་སོའི་མདུན་ན་ཟླ་བའི་དཀྱིལ་འཁོར་འདུག་པར་ཤེས་ཀྱང་། ཟླ་བའི་དཀྱིལ་འཁོར་ནི་སེམས་ཅན་དེ་དག་གིས་བདག་ཅིའི་ཕྱིར་ཟླ་བའི་དཀྱིལ་འཁོར་དུ་ཤེས་པར་འགྱུར་བ་བདག་གི་མདུན་ན་འདུག་པར་བྱའོ་སྙམ་དུ་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་འཇམ་དཔལ། ཟླ་བའི་དཀྱིལ་འཁོར་ནི་མ་འདྲེས་པའི་ཆོས་དང་ལྡན་པས་ལྷུན་གྱིས་གྲུབ་ཅིང་རྣམ་པར་མི་རྟོག་པས་དེ་ལྟ་བུའི་བྱ་བ་འདི་འབྱུང་ངོ་། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འཁོར་དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་པའི་སྒྲས་བརྗོད་དུ་མེད་པའི་དབུས་ན་དེ་བཞིན་གཤེགས་པ་བཞུགས་པར་མཐོང་མོད་ཀྱི། འཇམ་དཔལ། དེ་བཞིན་གཤེགས་པ་ནི་སེམས་ཅན་དེ་དག་གི་དེ་བཞིན་གཤེགས་པ་མདུན་ན་བཞུགས་པར་འགྱུར་བར། ང་སེམས་ཅན་དེ་དག་གི་མདུན་ན་འདུག་པར་བྱའོ་སྙམ་དུ་མི་རྟོག །རྣམ་པར་མི་རྟོག་སྟེ། འོན་ཀྱང་སེམས་ཅན་གྱིས་མཐོང་བ་དེ་བཞིན་དུ། དེ་བཞིན་གཤེགས་པ་མདུན་ན་བཞུགས་སོ། །འཇམ་དཔལ། དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་གདུལ་བར་བྱ་བ་ཡིན་ན། དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། །དེ་བཞིན་དུ་བཻཊཱུཪྱ་དང་། ཨནྡ་རྙིལ་དང་། སྤུག་དང་། མུ་ཏིག་དམར་པོའི་ཁ་དོག་གིས་གདུལ་བར་བྱ་བ་ཡིན་ན། དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང་། བརྒྱ་བྱིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་པས་གདུལ་བར་བྱ་བ་ཡིན་ན། དེ་དག་གིས་གཟུགས་སུ་བཞུགས་ནས་ཆོས་སྟོན་ཏོ། །ཞེས་དང་། བི་མ་ལས་མཛད་པའི་རྩ་རྒྱུད་གསང་བ་སྙིང་པོའི་འགྲེལ་ཆུང་ལས་ཀྱང་། དཔེར་ན་བར་སྣང་ཟླ་བ་གཅིག་ཤར་བ། །འཛམ་གླིང་ཆུ་རྣམས་ཀུན་ཏུ་ཆུ་ཟླ་སྣང་། །ཆུ་གཅིག་ནང་གི་ནམ་མཁའི་ཟླ་བ་ཡང་། །འགྲོ་བ་སོ་སོ་རང་གི་མདུན་དུ་སྣང་། །དེ་བཞིན་སྤྲུལ་སྐུ་གཅིག་ལ་གླིང་རྣམས་སྣང་། །གླིང་རྣམས་གཅིག་ལ་འགྲོ་བ་དྲུག་ཏུ་སྣང་། །ཐ་དད་དེ་ཀུན་སྤྲུལ་སྐུ་གཅིག་ཏུ་གྲགས། །དེ་འདྲའི་སྟོང་གསུམ་མཐའ་ཡས་མུ་མེད་ན། །དེ་འདྲའི་སྤྲུལ་སྐུ་རེ་རེས་འགྲོ་དོན་མཛད། །ཅེས་གསུངས་པ་ལགས། ཁ་ཆེ་དགོན་པ་བ་དང་། པཎྜི་ཏ་བཛྲ་མ་ཏིའི་རྣམ་ཐར་དང་། ཟ་ཧོར་གྱི་རྒྱལ་རབས་ཀྱི་ལོ་རྒྱུས་གཞན་མ་མཐོང་ལགས་ཤིང་། ལུང་བསྟན་དང་མཛད་པ་འགངས་ཆེ་བའི་ཆད་ལུས་འདྲ་རང་བློས་གང་ཤེས་སོ་སོའི་ཐད་དུ་ཤོག་འཛར་ཞུས་ཡོད།