ཞབས་བརྟན་ཚོགས་མཆོད་ཆེན་མོའི་སྐོར་གྱི་འཆར་གཞི་ཕུལ་བ།

༈ ཞབས་བརྟན་ཚོགས་མཆོད་ཆེན་མོའི་མཆོད་སྐོར་གྱི་འཆར་གཞི་ཕུལ་བ། དེ་ཡང་འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་འདི་ཉིད་ཐོག་མ་མེད་པའི་དུས་ནས་མངོན་པར་བྱང་ཆུབ་པའི་གོ་འཕང་བླ་ན་མེད་པ་ལ་བདག་གིར་མཛད་ནས་འགྲོ་བ་མཐའ་དག་རང་གིས་བརྙེས་པའི་རྣམ་གྲོལ་གྱི་ལམ་བཟང་པོ་དེ་ལ་དཀྲི་བར་དགོངས་པ་ཡང་དམིགས་པ་མེད་པའི་ཐུགས་རྗེ་ཆེན་པོའི་ཕྲིན་ལས་རིས་མེད་དུ་བསྒྲུབ་པའི་ཡེ་ཤེས་ཆེན་པོའི་རྣམ་པར་རོལ་པ་ཚད་མེད་པས་གང་ལ་གང་འདུལ་གྱི་སྒྲོན་མ་རྣམ་པར་བཀོད་པ་ཉིད་ལས་ནམ་དུ་ཡང་རྣམ་པར་གཡོ་བའི་རྩོལ་རྟོག་མེད་དུ་ཟིན་ཀྱང་། ཚུལ་བསྟན་ཙམ་དུ་མཆོད་རྟེན་བརྒྱད་བསྟོད་ལས། དང་པོ་བྱང་ཆུབ་མཆོག་ཏུ་སེམས་བསྐྱེད་ནས། །བསྐལ་པ་གྲངས་མེད་གསུམ་དུ་ཚོགས་བསགས་ཏེ། །བར་དུ་གཅོད་པའི་བདུད་བཞི་འདུལ་མཛད་པ། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །ཞེས་གསུངས་པ་ལྟར་ཐོག་མར་བྱང་ཆུབ་མཆོག་ཏུ་ཐུགས་བསྐྱེད་དེ། བསྐལ་པ་གྲངས་མེད་གསུམ་གྱི་བར་དུ་བསོད་ནམས་དང་ཡེ་ཤེས་ཀྱི་ཚོགས་ཕུལ་དུ་བྱུང་བ་ལ་སྤྱོད་པས་གོམས་ཤིང་མཐར་ཕྱིན་པར་མཛད་ནས་ཞིང་ཁམས་འདིར་སྤྲུལ་པའི་སྐུའི་གཟུགས་བཟུང་སྟེ་རྡོ་རྗེ་གདན་གྱི་སྤོ་ལ་སྲོད་ལ་བདུད་བཏུལ། གུང་ལ་མཉམ་པར་བཞག །ཐོ་རེངས་རྔ་བརྡུང་དུ་ཉེ་བ་ན་བླ་ན་མེད་པའི་བདུད་རྩི་མངོན་དུ་བརྙེས་ནས་གདུལ་བྱ་གང་ལ་གང་འདུལ་གྱི་རྣམ་པ་ཀུན་དང་ལྡན་པར་ཆོས་ཀྱི་འཁོར་ལོ་སྣ་ཚོགས་པ་ཞིག་བསྐོར་བའི་མཐར་རྩྭ་ཅན་གྱི་གྲོང་ཁྱེར་དུ་མྱ་ངན་ལས་འདའ་བའི་ཚུལ་བསྟན་པ་མཛད་ཅིང་། དེ་དག་གི་ནང་ནས་ཀྱང་ངོ་མཚར་རྨད་དུ་བྱུང་བའི་མཛད་པ་ཁྱད་པར་བ་དག་གང་གི་ཚེ་བསྟན་པའི་དུས་དེ་ཉིད་བཟང་པོར་བྱིན་གྱིས་བརླབས་པའི་དུས་ཆེན་ཡང་གཙོ་ཆེ་ཞིང་གྲགས་ཆེ་བ་ནི། མངོན་བྱང་ཆུབ་དང་ཆོས་འཁོར་བསྐོར། །ལྷ་བབས་ཆོ་འཕྲུལ་ཆེན་པོ་སྟེ། །དད་ལྡན་བསོད་ནམས་གསོག་བྱེད་པའི། །ཁྱད་པར་ཅན་གྱི་དུས་ཆེན་ཡིན། །ཞེས་དུས་ཆེན་བཞི་མདོ་དང་བསྟན་བཅོས་རྣམས་ནས་རྒྱ་ཆེར་བཤད་ཅིང་འཕགས་ཡུལ་གྱི་ཡུལ་གྲུ་སོ་སོར་ཡང་དུས་སྟོན་གྱི་སྲོལ་རྒྱ་ཆེར་དར་བར་གྲགས་ལ། དེའི་དུས་ངོས་འཛིན་ཚུལ་ཡང་། མཆུ་ཟླ་བ་ལ་ཆོ་འཕྲུལ་མཆོད་པ་དང་། ས་ག་ཟླ་བར་མངོན་བྱང་། ཆུ་སྟོད་ཟླ་བར་ཆོས་འཁོར། དབྱུག་པ་ཟླ་བར་ལྷ་བབས་དུས་ཆེན་ཡིན་པར་ཐམས་ཅད་ཞལ་མཐུན་མོད་ཀྱི། འོན་ཀྱང་སྐར་མ་དེ་དག་ཟླ་བའི་ར་འབྲིང་གང་ལ་སྦྱོར་བ་ལ་བཞེད་སྲོལ་ཐ་དད་པ་གཉིས་བྱུང་སྟེ་ཤོང་རྡོར་རྒྱལ་གྱི་ཡི་གེ་དང་། པཎྜི་ཏ་བི་མ་ལ་ཤྲཱིའི་ངག་རྒྱུན་ཙམ་ལ་བརྟེན་ནས་མཁས་པ་བུ་སྟོན་ཁ་ཆེ་ལ་སོགས་པས་མ་བརྟགས་པར་སྲོལ་བཏོད་པར་མཛད་པ་སྟེ། ལུགས་དེ་ལ་ཉ་སྐར་རྣམས་བོད་སྤྱི་ལས་ཟླ་བ་རེས་སྔ་བསྒྱུར་ནས་མཆུ་ཟླ་དགུན་འབྲིང་ཧོར་ཟླ་བཅུ་གཉིས་པར་ངོས་བཟུང་ནས་སྔོན་འཁྱགས་མཆོད་ཅེས་ཁ་སྐད་དུ་གྲགས་པ་ཆོ་འཕྲུལ་མཆོད་པ་དང་། ས་ག་ཟླ་བ་དཔྱིད་འབྲིང་ཧོར་ཟླ་གསུམ་པ་ལ་ངོས་བཟུང་ནས་སྔོན་གནམ་ས་འདེབས་པ་དང་འགྲིག་པས་མཐོང་མཆོད་དུ་གྲགས་པ་མངོན་བྱང་མཆོད་པ་དང་། ཆུ་སྟོད་ཟླ་བ་དབྱར་ར་ཧོར་ཟླ་ལྔ་པར་བཟུང་ནས་སྔོན་ཡུར་མཆོད་དུ་གྲགས་པ་ཆོས་འཁོར་དུས་མཆོད། དབྱུག་པ་ཟླ་བ་སྟོོན་ར་ཧོར་ཟླ་བརྒྱད་པ་ལ་བྱས་ནས་སྔོན་དགག་དབྱེ་མཆོད་པར་གྲགས་པ་ལྷ་བབས་དུས་མཆོད་དུ་བཞེད་པ་དང་། གཞན་ཡང་རྒྱ་བོད་ཀྱི་མཁས་པ་ཕལ་ཆེ་བའི་དགོངས་པ་ནི། མཆུ་ཟླ་དགུན་ཟླ་ཐ་ཆུང་ཧོར་ཟླ་དང་པོ། ས་ག་ཟླ་བ་དཔྱིད་ཟླ་ཐ་ཆུང་ཧོར་ཟླ་བཞི་པ། ཆུ་སྟོད་ཟླ་བ་དབྱར་འབྲིང་ཧོར་ཟླ་དྲུག་པ། དབྱུག་པ་ཟླ་བ་སྟོན་འབྲིང་ཧོར་ཟླ་དགུ་པ་ལ་ངོས་འཛིན་པའི་ལུགས་གཉིས་ལས། དོན་ལ་གནས་པ་ནི་བཞེད་པ་ཕྱི་མ་ཉིད་ཡིན་པར་མངོན་ཏེ་ལུགས་སྔ་མ་དེའི་ཁུངས་ཤོང་སྟོན་གྱི་ཡི་གེའི་རྗེས་སུ་འབྲང་བར་རློམ་ཡང་། ཤོང་ནས་རིམ་པར་བརྒྱུད་པའི་སྐར་རྩིས་ཀྱི་ལག་རྒྱུན་མཁས་པ་བརྒྱུད་མས་རིམ་པར་བཟུང་བའི་སྲོལ་ལས་ཀྱང་དཔྱིད་འབྲིང་ནག་པ་ཟླ་བར་བྱས་ཏེ་འདས་ཟླ་བསྲེ་བར་བྱེད་པས་གནོད་ཅིང་། པཎྜི་ཏའི་ངག་རྒྱུན་དེ་ཡང་ཡར་ངོ་མར་ངོའི་འགོ་འཛིན་ལུགས་སོ་སོ་ལས་ནག་ཟླའི་ནག་ཕྱོགས་དེ་ནག་པ་ས་གའི་གཞི་མཐུན་དུ་འགྱུར་བ་ལྟར་དེ་འདྲ་ལས་འཁྲུལ་བ་སྲིད་ལ། གཞན་དུ་བསམ་ཡས་ཀྱི་མདོ་སྡེ་མཆོད་པ་དེང་སང་ཧོར་ཟླ་ལྔ་པར་བྱས་པས། རྒྱལ་བློན་སྔ་དར་གྱི་དུས་ཀྱི་ཟླ་བའི་ངོས་འཛིན་ཚུལ་ཡང་དེ་ལྟར་ཡིན་ནོ་སྙམ་ན། ད་ལྟའི་མདོ་སྡེ་མཆོད་པའི་དུས་འདི་ནི་བར་སྐབས་ནས་འཆུགས་པར་མངོན་གྱི། སྔོན་ལྷ་སྲས་ཀྱི་དུས་མཆོད་བཙུགས་དུས་སྦ་བཞེད་ཞབས་བཏགས་མར། དབྱར་ཟླ་འབྲིང་པོ་ཚུལ་འཇུག་གི་ཟླ་བ་ལ་མདོ་སྡེ་མཆོད་པ་བགྱིས་ཏེ། ཞིང་པ་རྣམས་ཡུར་གྲ་བཤིག་ནས་མཆོད་པ་བྱེད་དུ་འོང་། ཞེས་དབྱར་འབྲིང་གསལ་བར་སྨོས་པས་གནོད་ཅིང་། ཚུལ་གཞུག་ནི་དབྱར་གནས་ལ་ཞུགས་པའི་དོན་ཡིན་པས་དབྱར་སྔ་མ་ཁས་ལེན་ཟླ་བ་དྲུག་པ་ལ་བྱས་པས་ཧོར་ཟླ་དགུ་པ་ལ་དབྱར་ཟླ་གསུམ་རྫོགས་པའི་ཕྱིར། དེའི་བཅོ་ལྔ་ལ་དགག་དབྱེ་འབྱུང་ལ། དེ་ཡང་ཡུམ་བདེན་པ་ལ་འགོད་ཕྱིར་སུམ་ཅུ་རྩ་གསུམ་དུ་དབྱར་ཟླ་གསུམ་གནས་པར་མཛད་པས་དགག་དབྱེ་སྔ་དྲོ་གྲོང་ཁྱེར་གསལ་ལྡན་དུ་བབས་པར་ཁ་ཅིག་བཞེད་ཀྱང་། དགག་དབྱེའི་ཉིན། ད་སྟེ་ཞག་བདུན་ན་མི་ཡུལ་དུ་འབྱོན་པར་ཞལ་གྱིས་བཞེས་པར་ལུང་ལས་བཤད་པས་ཧོར་ཟླ་དགུ་པའི་ཉེར་གཉིས་ལ་དོན་གྱིས་འགྲིག་པ་ཡིན་ནོ། །དེའི་རིགས་པས་ཆོས་འཁོར་དུས་ཆེན་ཡང་ཚུལ་ཞུགས་ཀྱི་ཟླ་བ་དེའི་ཉ་ལ་བྱེད་པ་ཡང་ཅུང་ཟད་འཆུགས་པ་སྟེ། ས་གའི་ཉ་ལ་སངས་རྒྱས་ནས་ཞག་བདུན་ཕྲག་བདུན་དུ་ཆོས་མ་གསུངས་པར་བཤད་པས་ཚེས་བཞི་ལ་རིགས་པ་ཡིན་ཞིང་། མངོན་བྱང་གི་དུས་ཀྱང་ཧོར་ཟླ་གསུམ་པར་མི་རིགས་པ་རྣམ་པར་དག་པའི་ཡར་ལོག་གི་རིགས་པ་ལ་བརྟེན་ནས་ཟླ་བར་སྒྲ་གཅན་འཇུག་པ་རི་མོས་རྟོགས་པའི་ཕྱིར་རོ། །གཞན་ཡང་ཧོར་ཟླ་བཞི་པ་ལྷུམས་ཞུགས་དང་མྱང་འདས་ཀྱི་དུས་ཀྱང་ཡིན་པས། དུས་ཆེན་གསུམ་འཛོམ་དུ་འགྱུར་ལ། བལྟམས་པ་ནི་མདོ་རྩའི་འགྲེལ་ཆུང་གི་རྗེས་སུ་འབྲངས་ནས་ས་གའི་ཚེས་བདུན་ལ་བྱེད་པ་ཡང་ཡོད་མོད། ལུང་རིགས་གཏེར་མཛོད་པ་སོགས་འདུལ་འཛིན་ཕལ་ཆེར། རྒྱ་ཆེ་རོལ་པ་ལས། དགེ་སློང་དག་དེ་ལྟར་དགུན་འདས་ཏེ་དཔྱིད་ཀྱི་དུས་དཔྱིད་ཟླ་ཐ་ཆུང་གི་ཚེ། ཞེས་པའི་མདོ་ཚིག་འདི་ལྷུམས་ཞུགས་ཀྱི་དུས་ལ་ངོས་བཟུང་ནས། ཚིག་གཏེར་ལས། འདི་ན་དཔྱིད་ཟླ་ར་བ་སོགས། །སུམ་མཚན་བཞི་རུ་ཕྱེ་སྟེ་སྨྲ། །ཞེས་བོད་རྒྱལ་པོའི་ལུགས་ཀྱི་ལོ་འགོ་ཤར་བའི་དུས་སྟོན་ཧོར་ཟླ་གཉིས་པ་དབོས་ཉ་ཟླ་བ་ལ་སྐུ་བལྟམས་པའི་དུས་ཆེན་དུ་བཞེད་དེ། དེ་དང་མཐུན་པར་གོང་མ་རྒྱལ་བའི་དབང་པོ་ཐམས་ཅད་མཁྱེན་གཟིགས་ཆེན་པོས་ཀྱང་། དབོ་ཟླའི་ཚེས་བཅུར་གློ་གཡས་ནས་བལྟམས་ཚེ། །ཞེས་གསུངས་པ་ལྟར་རོ། །སྤྱིར་ཟླ་བ་གང་རུང་སྟེ་ཐུན་མོང་གི་དུས་ཀྱང་ཉ་སྟོང་བརྒྱད་ལ་སོགས་པ་དང་། ཐུན་མོང་མ་ཡིན་པ་ཇི་སྐད་དུ། དགུན་ཟླ་འབྲིང་པོ་ལ་སོགས་པའི། །ཚེས་བཅུ་ལ་ནི་དད་པས་མཆོད། །ཅེས་པ་ལྟར་ཡར་ངོ་མར་ངོའི་ཚེས་བཅུ་ལ་སོགས་པ་དད་པ་ཅན་རྣམས་ཀྱི་བསོད་ནམས་རྒྱ་ཆེར་སྤེལ་བའི་དུས་དགེ་བ་དེ་དག་ལ་དུས་མཆོད་ཀྱི་སྲོལ་ཇི་ལྟར་དར་བའི་ཚུལ་ཡང་། སྔོན་འཕགས་ཡུལ་དུ་ཆོ་འཕྲུལ་མཆོད་པ་མཉན་ཡོད། མངོན་བྱང་མ་གྷ་དྷ། ཆོས་འཁོར་ཝ་ར་ཎ་སི། ལྷ་བབས་ཡངས་པ་ཅན་གྱི་གྲོང་ཁྱེར་དུ་གཙོ་བོར་དར་བར་བཤད་ཅིང་། གངས་ཅན་གྱི་ལྗོངས་འདིར་ཡང་སྦ་བཞེད་ལས། སྲས་མུ་ནེ་བཙན་པོ་དགུང་ལོ་བཅོ་ལྔ་ལོན་ཙ་ན་ཇོ་མོ་ཡོང་བཟའ་མདོ་ཁབ་ཏུ་བཞེས་ཏེ་རྒྱལ་སྲིད་ཤིན་ཏུ་རྒྱ་ཆེ་བས་ཡབ་ཀྱི་ཞལ་ཆེམས་ཐུན་ཚགས་སྐར་མ་དང་མཐུན་པར་འབངས་ཀྱི་མཆིས་བགྱི་བར་དགོངས་ནས་བླའི་མཆོད་གནས་རབ་ཏུ་བྱུང་བའི་མངའ་ཐང་དང་ཆོས་འཁོར་སྟོད་སྨད་ཀྱི་ཞབས་ཏོག་ཡབ་ཀྱི་སྲོལ་བཞིན་དུ་མཛད། དཔལ་བྲག་དམར་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དུ་དུས་ཀྱི་མཆོད་པ་བཞི་བཙུགས། ཞེས་གསུངས་པ་ལྟར་སྔོན་མངའ་བདག་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་ཞལ་ཆེམས་བཞིན་ལྷ་སྲས་མུ་ནེ་བཙན་པོས་དུས་ཆེན་བཞིའི་མཆོད་པའི་སྲོལ་ཟླ་མེད་པ་བཏོད། དེ་ཡང་སྦ་བཞེད་དུ་ཆོ་འཕྲུལ་ཆེན་པོའི་དུས་མཆོད་ཀྱི་མིང་དངོས་སུ་མ་སྨོས་ཀྱང་། མདོར་བསྟན་ལ། དུས་མཆོད་བཞི་བཙུགས་ཚུལ་དང་། རྒྱས་བཤད་དུ་བཀྲེན་ཕྱུག་དང་པོ་སྙོམ་པ་དེ་ཆོ་འཕྲུལ་ཆེན་པོ་ཡིན་པར་དོན་གྱིས་འགྱུར་ཏེ། དེ་ནས་མངོན་པར་བྱང་ཆུབ་པའི་ཟླ་བ་ལ་ཞེས་པའི་མཚམས་སྦྱོར་དང་། ལྷ་བབས་ལ་ཆོ་འཕྲུལ་ཆུང་བར་བཏགས་པས་ཆོ་འཕྲུལ་ཆེན་པོའི་དུས་མཆོད་ཀྱང་བསྟན་པས་མཚོན་ཞིང་། དེ་དག་ལ་མིང་གི་ཐ་སྙད་ཀྱང་སྔར་གྱི་ཁ་སྐད་ལས་བྱུང་བ་ལྟར་ཞང་བློན་རྣམས་ཀྱི་ངོ་བསྲུང་བའི་ཕྱིར། གཅིག་ལ་ཡབ་མེས་ཀྱི་མཆོད་པ་ཞེས་བཏགས་ནས། གཞན་གསུམ་ལ་མདོ་སྡེ་དང་། མངོན་པ། འདུལ་བའི་མཆོད་པ་ཞེས་འདོགས་པའི་རྒྱུ་མཚན། མཆོད་པའི་ཡུལ་དམ་པ་མཉེས་པར་བྱེད་པའི་རྣམ་དཀར་གྱི་ལས་ཤིག་ཡིན་པས་དུས་དེ་དང་དེའི་ཚེ་སྡེ་སྣོད་གསུམ་སོ་སོའི་ཆོས་གྲྭའི་ཉན་བཤད་ཀྱང་རྩལ་དུ་འདོན་པའི་སྲོལ་དར་བ་ལས་བཏགས་པར་མངོན་ལ། སྤྱིར་ན་མཆོད་པའི་ངོ་བོ་ནི། མཆོད་ཡུལ་དུ་གྱུར་པའི་ཞིང་དམ་པ་རྣམས་བླར་བཀུར་ཞིང་མཆོད་པའི་བསམ་པ་ཕུན་སུམ་ཚོགས་པའི་སྒོ་ནས་ལུས་ངག་ཡིད་གསུམ་གྱི་རྣམ་པར་དགེ་བའི་བྱ་བ་དང་། དངོས་པོ་ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པ་ཡིན་ལ། ངེས་ཚིག་ནི། པཱུ་ཛའི་སྒྲ་ལས་དྲངས་ན། སྔོན་དུ་བསྐྱེད་པ་དང་། ཡང་ནས་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱི་གནས་སུ་སྟོབ་པར་བྱེད་པའི་དོན་གྱིས་མཆོད་པ་ཞེས་གྲགས་ཤིང་། དེ་ལ་དབྱེ་ན། སྤྱིར་འཇིག་རྟེན་དང་འཇིག་རྟེན་ལས་འདས་པའམ། བླ་ན་ཡོད་པ་དང་བླ་ན་མེད་པའི་མཆོད་པ་ཞེས་པའི་དབྱེ་བ་རྣམ་པ་གཉིས་སུ་ངེས་ཤིང་། དེ་ཡང་མཆོད་ཡུལ་ཞིང་གི་སྒོ་ནས་དབྱེ་ན། དཀོན་མཆོག་མཆོད་པ་ནི་འཇིག་རྟེན་ལས་འདས་པའམ། བླ་ན་མེད་པའི་མཆོད་པ་དང་། ལྷ་ཆེན་པོ་དྲག་པོ་དང་། དབང་ཕྱུག་སོགས་ལ་མཆོད་པ་ནི་འཇིག་རྟེན་པའི་མཆོད་པའམ་བླ་ན་ཡོད་པའི་མཆོད་པ་ཞེས་བྱ། ཡང་བསམ་པའི་ཁྱད་པར་གྱིས་དབྱེ་ན། མཐོ་རིས་ཀྱི་རྒྱུ་ཙམ་ལ་དམིགས་ནས་འབུལ་བ་ནི་འཇིག་རྟེན་པའི་མཆོད་པ་དང་། ཐར་པའི་རྒྱུར་དམིགས་ནས་འབུལ་བ་ནི་འཇིག་རྟེན་ལས་འདས་པའི་མཆོད་པའོ། །ཡང་དངོས་པོའི་སྒོ་ནས་དབྱེ་ན། ཡོ་བྱད་ཀྱི་དངོས་པོས་མཆོད་པ་དང་། ཐོས་བསམ་སྒོམ་གསུམ་སོགས་རྒྱལ་བ་མཉེས་པའི་ཐབས་བསྒྲུབ་པས་འདས་མ་འདས་དང་། རྣམ་པའི་སྒོ་ནས་དབྱེ་ནའང་རང་བཞིན་མེད་རྟོགས་ཀྱི་ཤེས་རབ་ཟབ་མོས་ཟིན་པའི་སྒོ་ནས་འབུལ་བ་འཇིག་རྟེན་ལས་འདས་པའི་མཆོད་པ་སྟེ་ཐར་པ་ཆ་མཐུན་དང་། དེས་མ་ཟིན་ན་བསོད་ནམས་ཆ་མཐུན་ཞེས་འཇིག་རྟེན་པའི་མཆོད་པར་འགྱུར་ཏེ་སྤྱིར་དབྱེ་བའོ། །སྐབས་དོན་བྱེ་བྲག་ཏུ་དབྱེ་ན། དཀོན་མཆོག་གི་རྟེན་མཆོད་པའི་ཡུལ་ཡིན་ཚུལ། མཆོད་པའི་ཕན་ཡོན། ཕན་ཡོན་དེ་ལྡན་གྱི་མཆོད་ཤོམས། ཇི་ལྟར་འབུལ་བའི་ཆོ་ག་དང་བཞི་ལས། དང་པོ་ནི། ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་འགའ་ཡོད་མིན་པས། །དངོས་པོ་ཀུན་གྱིས་དེ་ལ་མཆོད། །ཅེས་གསུངས་པ་ལས་མཚོན་བྱ་དོན་གྱི་དཀོན་མཆོག་གསུམ་ནི་ཐར་འདོད་རྣམས་ཀྱིས་སྐྱབས་སུ་བསྟེན་བྱར་གྱུར་པ་སྟེ། སྐྱབས་ཡུལ་གྱི་དཀོན་མཆོག་གསུམ་དང་། དེ་ཉིད་མཚོན་བྱེད་བརྡར་བཏགས་པའི་དཀོན་མཆོག་གསུམ་ནི་བདེ་བར་གཤེགས་པ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་དུ་གྲགས་པ་རྣམས་ཡིན་པ་ལ། ད་རེས་སྐབས་སུ་བབ་པ་སངས་རྒྱས་དཀོན་མཆོག་ལ་སྐུ་གཉིས་ཀྱི་དབྱེ་བས་ཆོས་སྐུའི་རྟེན་ཞབས་བརྟན་མཆོད་སྡོང་ཆེན་པོ་དཔེ་ཟླ་ཐམས་ཅད་ལས་འདས་པས་མཚོན་བདེ་བར་གཤེགས་པའི་མཆོད་རྟེན་ཆེན་པོ་བརྒྱད། གཟུགས་ཀྱི་སྐུའི་རྟེན་དེ་བཞིན་གཤེགས་པ་འཁོར་ལོས་སྒྱུར་བ་དང་། མཆོག་གི་སྤྲུལ་སྐུའི་ཆ་བྱད་ཅན་གསར་དུ་འདུ་མཛད་པ་རྣམས་དང་། ར་ས་འཕྲུལ་སྣང་གི་ལྷ་ཁང་དུ་དེ་བཞིན་གཤེགས་པ་དངོས་ཀྱི་ཞལ་སྐྱིན་ཇོ་བོ་ཤཱཀྱ་མུ་ནེས་མཚོན་མཐའ་ཡས་པ་དང་། དམ་ཆོས་དཀོན་མཆོག་གི་རྟེན་རིན་ཆེན་སྣ་བཞིའི་བཀའ་བསྟན་གྱི་གླེགས་བམ། དགེ་འདུན་གྱི་རྟེན་དེ་བཞིན་གཤེགས་པའི་ཐུགས་ཀྱི་སྲས་ས་བཅུའི་བྱང་ཆུབ་སེམས་དཔའ་རྣམས་དང་། གསུང་གི་སྲས་ཉན་རང་འཕགས་པའི་སྐུ་བརྙན་ལ་སོགས་ཏེ། མདོར་ན་བྲིས་པ་དང་། ལུགས་སུ་བྱས་པ་དང་། བརྡུངས་པ་ལ་སོགས་པ་བཟོའི་ཁྱད་པར་དུ་མས་བསྒྲུབས་པའི་རྟེན་ངོ་མཚར་དཔག་ཏུ་མེད་པ་མཆོད་པའི་ཚོགས་སྦྱར་བའི་དཀྱིལ་འཁོར་གྱི་ཁྱམས་ཆེན་པོར་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་རྣམས་དང་། འཕགས་པ་ཆོས་སྐྱོང་བ་ཐམས་ཅད་བསོད་ནམས་ཀྱི་ཞིང་དུ་གདན་མངོན་པར་འཛོམ་པ་ལྟར་བཞུགས་པ་འདི་དག་མདུན་བཞག་གི་དཀོན་མཆོག་གསུམ་ཞེས་བྱ་སྟེ་མཆོད་པའི་ཡུལ་དུ་བཟང་བ་ཡིན་ནོ། །གཉིས་པ་ནི། དེ་ལྟ་བུའི་དཀོན་མཆོག་གསུམ་གྱི་རྟེན་བཞེངས་སུ་གསོལ་བ་དང་། ཕྱག་འཚལ་ཞིང་བསྐོར་བ་བྱ་བ་དང་། མཆོད་པ་འབུལ་བ་དང་། ཐ་ན་སེམས་དང་བ་ཙམ་བགྱིས་པའི་ལེགས་སྤྱད་ཀྱི་ཕན་ཡོན་ཡང་བསམ་གྱིས་མི་ཁྱབ་པ་ཡིན་ཏེ། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་རྒྱལ་སྲིད་ངེས་པར་ཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པར་སངས་རྒྱས་གོ་འཕང་ཐོབ་། །ཅེས་དང་། སུ་དག་བདེ་བར་གཤེགས་པའི་མཆོད་རྟེན་ལ། །མཆོད་པའི་ཁྱད་པར་ཅི་འདོད་ཅི་འབྱོར་བ། །འཚམས་པར་འབུལ་བྱེད་དེ་དག་དྲི་མེད་ཅིང་། །མྱ་ངན་མེད་པའི་བྱང་ཆུབ་ངེས་པར་ཐོབ། །མི་རྣམས་གང་དག་སངས་རྒྱས་མཆོད་རྟེན་ནམ། །སྐུ་གཟུགས་དག་ལ་མགོས་བཏུགས་གུས་ཕྱག་འཚལ། །དེ་དག་ལྷ་རྣམས་དང་ནི་མི་རྣམས་ཀྱིས། །ཆེས་ཆེ་བར་ནི་བཀུར་བའི་གནས་སུ་འགྱུར། །སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་སྐོར་བ་བྱེད་པ་དེ། །ཕྱི་མའི་ཚེ་ལ་དགྲ་བཅོམ་རྣམས་ཀྱིས་བཀུར། །བཟང་པོའི་སྣོད་གྱུར་ཡོན་ཏན་རྣམས་དང་ལྡན། །ཞེས་སོགས་དང་། མཁས་པ་སུ་དག་རབ་ཏུ་སེམས་དང་བས། །རྒྱལ་བའི་མཆོད་རྟེན་ལ་ནི་གོམ་འདོར་ན། །འཛམ་བུའི་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་མིན་གསུངས། །ཞེས་སོགས་མདོ་རྒྱུད་དུ་མ་ནས་ཕན་ཡོན་རྒྱ་ཆེར་གསུངས་པ་བཞིན་ནོ། །གསུམ་པ་ནི། སྔོན་དུས་ཆོས་རྒྱལ་ཡབ་སྲས་ཀྱི་ཕྱག་རིས་རྣམ་ཐར་བཟང་པོ་ཇི་ལྟ་བ་བཞིན་དུ་ལྷ་སྲས་ཆོས་ཀྱི་རྒྱལ་པོ་དཔལ་སངས་རྒྱས་རྒྱ་མཚོ་ཕྱོགས་ཐམས་ཅད་ལས་རྣམ་པར་རྒྱལ་བའི་དགོངས་པ་མཁའ་ལྟར་ཡངས་པ་ལྟ་བུས་ཕན་ཡོན་གྱི་དགོས་པ་བླ་ན་མེད་པ་དག་གཟིགས་ནས། དེ་བཞིན་གཤེགས་པ་ཐམས་ཅད་ཀྱི་གསུང་གི་རྡོ་རྗེ་ས་བཅུའི་དབང་ཕྱུག་འཇིག་རྟེན་མགོན་པོས་རྟག་ཏུ་སྐྱོང་བའི་གནས་གངས་ཅན་གྲུ་འཛིན་གྱི་ཕོ་བྲང་ཆེན་པོ་དང་། བོད་ཀྱི་རྡོ་རྗེ་གདན་འཕྲུལ་སྣང་གི་གཙུག་ལག་ཁང་ཆེན་པོ་ཟུང་དུ་འབྲེལ་བར་ལྷ་མིའི་སྟོན་པ་རྒྱལ་བ་ཐམས་ཅད་ཀྱི་ཁྱབ་བདག་ཀུན་མཁྱེན་རྒྱལ་བའི་དབང་པོ་མགོན་པོ་འོད་མཚན་མཐའ་ཡས་ཚེ་དང་ཡེ་ཤེས་དཔག་ཏུ་མེད་པའི་ངོ་བོར་མི་ཤིགས་པར་རྡོ་རྗེ་གཡུང་དྲུང་གི་ཁྲི་ལ་བརྟན་པར་བཞུགས་པ་ཉིད་དང་། ཞབས་བརྟན་མཆོད་སྡོང་ཆེན་པོས་མཚོན་ཆོས་ཀྱི་སྐུ་དང་གཟུགས་ཀྱི་སྐུའི་རྟེན་ངོ་མཚར་གཞལ་དུ་མེད་པ་རྣམས་དང་། སྟོན་པའི་ཞལ་སྐྱིན་ཇོ་ཤཱཀ་རྣམ་གཉིས་ལ་སོགས་ཏེ། དཀོན་མཆོག་རྒྱལ་བ་རྒྱ་མཚོའི་དཀྱིལ་འཁོར་གྱི་འདུན་ས་ཡངས་པོར་རིག་པ་དང་གྲོལ་བར་ལྡན་ཞིང་། སྡེ་སྣོད་རིན་པོ་ཆེ་རྣམས་དང་རིག་པ་འཛིན་པ་སྔགས་ཀྱི་རིང་ལུགས་སྨྲ་བའི་དགེ་འདུན་གྱི་སྡེ་ཕྱོགས་དང་རིས་སུ་མ་ཆད་པ་བགྲང་བ་ལས་འདས་པ་རྣམས་ཞབས་བརྟན་ཚོགས་མཆོད་ཆེན་མོར་ཚོགས་གཉིས་རྒྱ་མཚོའི་ཞིང་དུ་གདན་འཛོམ་པའི་སྤྱན་སྔར་ཕུན་སུམ་ཚོགས་པའི་མཆོད་པའི་སྤྲིན་དང་བསྙེན་ཅིང་བཀུར་བའི་ཡོ་བྱད་བཟང་ཞིང་རྣམ་པར་དག་པ་ཀུན་ཏུ་བཟང་པོའི་འབྱོར་པ་རྒྱ་མཚོའི་རྗེས་སུ་འགྲོ་བའི་ངོ་མཚར་གྱི་སྒོ་འཕར་ཡངས་པོར་ཕྱེ་ནས་བསྟན་འགྲོ་མཐའ་དག་གི་ཕན་དང་བདེ་བ་མ་ལུས་པ་འབྱུང་བའི་གནས་གཅིག་པུར་གྱུར་པ། རབ་འབྱམས་རྒྱལ་བ་རྒྱ་མཚོའི་འདུས་ཞལ་ཀུན་མཁྱེན་རྒྱལ་བའི་དབང་པོ་ཉིད་འཇིག་རྟེན་གསུམ་གྱི་མགོན་པོར་ཞབས་པད་བསྐལ་པ་རྒྱ་མཚོར་གཡོ་མེད་དུ་བརྟན་ཅིང་། ཟབ་པ་དང་རྒྱ་ཆེ་བའི་ཕྲིན་ལས་མཁའ་ཁྱབ་མཁའི་རྡོ་རྗེ་ཅན་དུ་གསལ་ཞིང་བརྟན་པར་གསོལ་བ་འདེབས་པ་དང་རྗེས་འབྲེལ་ཁྱད་པར་དུ་གྱུར་པའི་དུས་བཟང་པོ་ལ་མཆོད་བསྐོར་གྱི་སེར་ཕྲེང་ཇི་ལྟར་གནང་བའི་མཆོད་བསྒྲིགས་ཀྱི་འཆར་གཞི་ཇི་ལྟར་སྩལ་བ་རྣམས་ངོ་མཚར་གཞལ་དུ་མེད་པའི་ལེགས་ཚོགས་ཕུན་སུམ་ཚོགས་པ་འདུག་ལགས་པར། སྤྱིར་དངོས་སུ་འབྱོར་པ་དང་ཡིད་སྤྲུལ་གྱི་མཆོད་པ་ཐམས་ཅད་རྣམ་གྲངས་ཀྱི་སྒོ་ནས་དབྱེ་བསྡུའི་ཚུལ་མདོ་རྒྱུད་རྣམས་ནས་མི་འདྲ་ཙམ་མང་དུ་འབྱུང་བ་ནི། བཟང་སྤྱོད་ཀྱི་ཡན་ལག་བདུན་པའི་སྐབས་སུ། མེ་ཏོག་དམ་པ་ཕྲེང་བ་དམ་པ་དང་། ཞེས་སོགས་ཀྱི་རིམ་པ་དང་། སྤྱོད་འཇུག་ཏུ། རིན་ཆེན་སེམས་དེ་བཟུང་བར་བྱ་བའི་ཕྱིར། ཞེས་སོགས་སུ་བསྟན་པ་ལ། བདག་པོས་མ་བཟུང་བ་དང་། ལུས་དབུལ་བ་དང་། བློས་སྤྲུལ་པའི་མཆོད་པ་དང་གསུམ་ལས། ཕྱི་མ་ལ་ས་བཅད་བཅུས་བསྟན་པར་འགྲེལ་ཊཱིཀ་རྣམས་སུ་གསུངས་པ་བཞིན་བཀའ་ཐོར་ཡང་སྩལ་འདུག་པ་དང་། ཆོ་ག་ལ་ལག་ལེན་དུ་འདེབས་ན་བདག་པོས་མ་བཟུང་བའི་མཆོད་པའི་སྔོན་དུ་དངོས་འབྱོར་གྱི་མཆོད་པ་ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པས་མཆོད་ནས། གཟོད་བདག་པོས་མ་བཟུང་བའི་མཆོད་པ་ལ་འཇུག་པར་ཚད་ལྡན་དུ་མས་བསྟན་པ་དང་། དེའི་ཚུལ་ཡང་། འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མེ་ཏོག་དང་། འབྲས་བུ་དང་། སྨན་དང་། རིན་པོ་ཆེ་དང་། ཆུ་གཙང་དང་། རིན་པོ་ཆེའི་རི་བོ་དང་། ནགས་ཚལ་དང་། ས་ཕྱོགས་དབེན་ཞིང་ཉམས་དགའ་བ་ལ་སོགས་ཏེ་བློས་དམིགས་ཏེ་མཆོད་ཙམ་ལ་དགོངས་པ་དང་། དེ་བཞིན་དུ་ལུས་འབུལ་བ་ཡང་བདག་གི་ལུས་འདི་རྒྱལ་བ་རྣམས་ཀྱི་བྲན་དུ་ཕུལ་ནས་བྱ་བ་སེམས་ཅན་གྱི་དོན་འབའ་ཞིག་བསྒྲུབ་པར་བྱའོ་སྙམ་པ་ལ་སློབ་པར་གསུངས་པ་ཡང་བྲིས་སོགས་ཀྱིས་མི་མཚོན་པ་དང་། གསུམ་པ་བློས་སྤྲུལ་པ་ལ་ཡང་ཁྲུས་ཁང་ལ་སོགས་པ་རྣམས་ཚིགས་བཅད་ལས་ཇི་ལྟར་འབྱུང་བ་བཞིན་ལམ་ལམ་བློས་སྤྲུལ་ཏེ་མོས་པ་ལས་འགའ་ཞིག་ནི་བཤམ་མི་བདེ་བ་དང་། འགའ་ཞིག་བདེ་བ་རྣམས་ལས། ཁྲུས་གསོལ། སྐུ་དབྱེའི་དྲིས་བྱུག་པ། ན་བཟའ་དང་རྒྱན་འབུལ་བ་རྣམས་ནི་ཁྲུས་གསོལ་གྱི་སྐབས་ཉིད་དུ་རིམ་ཅན་དུ་འབྱུང་བ་དང་། བླ་ན་མེད་པའི་མཆོད་པ། ཇི་ལྟར་འཇམ་དབྱངས་ལ་སོགས་པ་དང་། ཞེས་སོགས་ནི་སེམས་དཔའ་ཆེན་པོ་རྣམས་ཀྱིས་མཆོད་བྱ་མཆོད་བྱེད་དམིགས་སུ་མ་གྲུབ་པའི་འཁོར་གསུམ་ཡོངས་དག་གི་མཆོད་པ་སྟེ་མཆོད་པ་ཐམས་ཅད་ལ་རྒྱས་འདེབས་པ་ལས་རྣམ་པས་མཚོན་པར་མི་ནུས་པ་བཀའ་ཐོར་ཕེབས་པ་བཞིན་དང་། སྤྱོད་འཇུག་གི་མཆོད་པའི་ལེའུ་གོ་རིམ་བཞིན་གནང་བ་ཤར་ཚེ། ཕལ་ཆེར་དངོས་སུ་བཤམས་བདེ་ཡང་། ལུས་དབུལ་དང་། བླ་མེད་མཆོད་པ་སོགས་དངོས་བཤམས་ཀྱི་རྣམ་པས་མཚོན་མི་བདེ་བས་སྐབས་དེ་དང་དེའི་ཧོལ་ཁོངས་སུ་ལུས་པ་ལྟ་བུ་དང་། རི་མོ་སོགས་མཚོན་བྱེད་ཀྱིས་ཁ་སྐོང་བ་ཡང་རྣམ་པ་མི་གསལ་བ་འདྲ་ཞིག་འཆར་བར་འདིར་བསྟན་གྱི་མཆོད་རྫས་དངོས་སུ་བཤམ་འོས་པ་ཐམས་ཅད་ཀྱང་ཡོངས་སུ་ཚང་ཞིང་རྣམ་གྲངས་དང་གོ་རིམ་གྱི་དབྱེ་བསྡུ་ཡང་མདོ་དང་སྔགས་ཀྱི་ཆོ་ག་སྤྱི་འགྲོས་གུ་རུ་ལུགས་སུ་མཐུན་པ་རྣམས་གུང་བསྡེབས་པའི་ཕྱག་ལེན་ཚད་ལྡན་དུ་མ་ལ་གྲགས་ཤིང་གྲུབ་པ་དང་། གནས་སྐབས་ལག་ཏུ་ལེན་པ་ན་ཡང་གོ་རིམ་མི་འཁྲུག་ཅིང་རྣམ་པ་འཆར་བདེ་བ་བཅས་མཆོད་ཕྲེང་གི་ཆོ་ག་སྤྱིར་བསྟན་པ་ལྟར་ན། ད་རེས་མཆོད་ཡུལ་གྱི་སྒོ་ནས་རྣམ་པ་དབྱེ་བ་མེད་མོད་ཀྱང་། མཆོད་པ་པོ་གསང་སྔགས་ནང་གི་རྣལ་འབྱོར་པ་ཁོ་ནར་མ་ངེས་པའི་ཕྱིར་དང་། དོན་དུ་ཐོབ་ཐང་གི་ཁུངས་དང་འབྲེལ་ཞིང་གནས་སྐབས་འགྲོ་བ་ཐུན་མོང་བ་རྣམས་ཀྱི་ངོར་རྣམ་པ་གསལ་ཞིང་མཛེས་བརྗིད་ལྷུན་ཆགས་པ་ཞིག་ཀྱང་དགོས་པར། སྔ་སོར་ལུགས་གཉིས་མངོན་མཐོ་བསམ་འདས་འདི་རིགས་སུ་སྲོལ་དོད་ཀྱི་དཔེའི་རྗེས་སུ་བློ་ནུས་འཇུག་པའི་གནས་མ་དམིགས་པ་དང་། ཁྱད་པར་རྒྱལ་ཐབས་ཀྱི་མངའ་ཐང་དང་མ་སྨད་པའི་ཐུགས་སྟོབས་ཕུལ་དུ་བྱུང་བ་ནམ་མཁའ་ལྟར་ཡངས་པ་འདི་ལྟ་བུ་སོ་སྐྱེ་བློ་རྨོངས་སྦྲང་བུའི་བགྲོད་པས་གཞལ་བར་མི་ནུས་པའི་ཕྱིར་འོལ་ཚོད་ཞུ་སྤོབས་པར་མ་ནུས་མོད། འོན་ཀྱང་རང་བློ་ཕྱོགས་གཅིག་པའི་ཤར་ཚོད་ཀྱི་དབང་དུ་ན་དེ་ཡང་སེར་སྦྲེངས་སོགས་ཐོག་མའི་རྒྱུ་མཚོན་བཀྲ་ཤིས་ཀྱི་སྣ་འདྲེན་པའི་ཕྱིར་འཕྱར་དར་དཀར་པོས་བྱེད་སྲོལ་འདུག་པ་བཞིན། དེ་ཉིད་ཁ་དོག་དཀར་པོ་སྔོན་དུ་འགྲོ་བའི་རྗེས་སུ་ཁ་དོག་སྣ་ཚོགས་པའི་འཕྱར་དར་མང་ཉུང་ཅི་རིགས་ཚར་དུ་དངར་བའི་རྗེས་སུ། གདུགས་དང་། རྒྱལ་མཚན་དང་། བ་དན་དང་། ཕྱེ་མའི་འཕུར་མ་སྣ་ཚོགས་པའི་བྲེང་ཚར་དང་། བཀྲ་ཤིས་ཀྱི་རོལ་མོའི་ཐོག་མ་དུང་དཀར་གྱི་འདྲེན་པར་གྲགས་པ་བཞིན་དུང་དཀར་དང་། རྒྱ་གླིང་། ཀ་ལིང་། སྦུ་ཧག་སོགས་ཟངས་དུང་གི་རིགས་དང་། རྔ་བོ་ཆེ་སོགས་རྒྱ་བོད་ཀྱི་རོལ་ཆའི་རྣམ་གྲངས་ཇི་སྙེད་པ་རྣམས་དང་། ལྷན་སྐྱེས་དང་སྦྱར་བ་ལས་བྱུང་བའི་བདུག་སྤོས་ཀྱི་ཕོར་པ་དང་། རེང་བུ་སྣ་ཚོགས་བསྲེགས་པ་སོགས་བྲེང་ཚར་དུ་སྤེལ་བ་རྣམས་ནི་ཐོག་མར་སྤྱན་འདྲེན་པའི་བརྡར་སྔོན་དུ་བཏང་ནས། དེའི་རྗེས་སུ། རབ་ཏུ་བྱུང་བ་གཙང་སྦྲ་དང་ལྡན་པ་རྣམས་ཀྱིས་ཁྲུས་ཀྱི་ཆས་ཁྲུས་བུམ་དྲི་བཟང་པོའི་ཆུས་གང་བ་དང་། ཁྲུས་གཞོང་དང་། མེ་ལོང་དང་། ཁྲུས་རས་དཀར་པོ་ཁ་ཚར་མ་ཉམས་པ་ལ་དྲི་བཟང་པོས་རིགས་ལྔའི་ས་བོན་བྲིས་པ་དང་། བྱུག་པོས་དྲི་སྣ་ཚོགས་སྦྱར་བ་དུང་ཆོས་སུ་བླུག་པ་དང་། གོས་གཟུངས་ཁ་དོག་སྣ་ཚོགས་པའི་རྟེན་ཁེབས་དང་། སྣམ་སྦྱར་གྱི་རིགས་དང་། རིན་པོ་ཆེའི་དབུ་རྒྱན་དང་དོ་ཤལ་ཕྱག་ཞབས་ཀྱི་གདུ་བུ་སོགས་ཏེ་རིམ་པ་བཞིན་རྟེན་ཁེབས་ལ་སོགས་པའི་ལྕིབས་མ་བཏེག་ནས་མཛེས་པར་འཁུར་བ་རྣམས་འོག་ཏུ་ཁྲུས་ཀྱི་ལས་ལ་འཇུག་པའི་ཡོ་བྱད་རྣམས་སོ། །དེ་ནས་མཆོད་པ་ཀུན་གྱི་ཐོག་མར་འགྲོ་བ་ཆུ་བཞིའམ་གཉིས་ལས། དང་པོ་ནི། ཞི་བ་ལ་ཆེད་དུ་བསྔགས་པའི་སྣོད་དུང་ཆོས་སམ་ཉ་ལྕིབས་སུ་དྲི་དཀར་པོ་འོ་མ་དང་སྦྱར་བ་ལ་མེ་ཏོག་དཀར་པོ་དང་། ཏིལ། ཀུ་ཤ །འབྲས་ཡོས་རྣམས་བཏབ་པ་དང་། རྒྱས་པ་ལ་གསེར་རམ་དངུལ་གྱི་སྣོད་དུ་ཞོ་དང་མེ་ཏོག་སེར་པོ་དྲི་སེར་པོ་དང་སྦྱར་བ་དང་། དེ་བཞིན་དུ་དུང་ཆོས་སུ་ཆུ་གཙང་ལ་མེ་ཏོག་བཏབ་པའི་ཞབས་བསིལ་སོགས་ཆུ་གཉིས་སམ། ཞལ་བསིལ་དང་། བསངས་གཏོར་རྣམས་དུང་ཆོས་སམ། གསེར་དངུལ་ལ་སོགས་ཀྱི་སྣོད་དུ་བླུག་པ་ལས་ཕྱི་མར་འཐོར་ཡབ་དང་བཅས་པའོ། །དེ་ནས་ཉེར་སྤྱོད་ལྔ་ནི། མེ་ཏོག །བདུག་སྤོས། མར་མེ། དྲི་ཆབ། བཟའ་བཅའ་སྣ་ཚོགས་པའི་ཞལ་ཟས་རྣམས་རེ་རེ་བཞིན་ཡང་མང་ཉུང་ཇི་ལྟར་འོས་པ་དང་། སིལ་སྙན་དང་། རྔ་ཟླུམ། དུང་དཀར་སོགས་དཀྲོལ་བ་དང་། བརྡུངས་པ་དང་། བུས་པའི་སྒྲའི་བྱེ་བྲག་སྣ་ཚོགས་པའི་རོལ་མོ་རྣམས་དང་། འདོད་ཡོན་ལྔ་ལས་གཟུགས་ནི། བཀའ་བརྒྱད་བདེ་འདུས་སོགས་སུ། གཟུགས་ལ་རྣམ་གསུམ་ཤེས་བྱ་སྟེ༔ཞེས་པའི་རྫས་མེ་ལོང་ལ་བརྟེན་པའི་ཕྱིར་འདིར་ཡང་མེ་ལོང་འཐད་འདྲ་བ་དང་། སྒྲ་ནི་ཏིང་ཤག་དང་། གླིང་བུ་དང་། པི་ཝང་སོགས་རོལ་མོའི་བྱེ་བྲག་སྣ་ཚོགས། དྲི་ནི་བྱུག་སྤོས་དྲི་བཟང་སྦྱར་བའི་ཁུ་བས་གང་བའི་དུང་ཆོས་དང་། བདུག་སྤོས་ལྷན་སྐྱེས་དང་སྦྱར་བ་བསྲེགས་པའི་དུད་སྤྲིན། རོ་ནི་རོའི་བྱེ་བྲག་སྣ་ཚོགས་ཁྱད་པར་དུ་སྦྱར་བའི་ཞལ་ཟས་ཀྱིས་གཏམ་པའི་སྣོད། རེག་བྱ་ནི་རྣམ་པར་བཀྲ་བའི་རྟེན་ཁེབས་དང་། སྣམ་སྦྱར་རྣམས་མང་ཉུང་ཅི་རིགས་སྤེལ་ལེགས་སུ་བསྟར་བ་དང་། རྒྱལ་སྲིད་བདུན་ལས། འཁོར་ལོ། ནོར་བུ། བཙུན་མོ། བློན་པོ། གླང་པོ། རྟ་མཆོག །དམག་དཔོན་རྣམས་ཏེ། འཁོར་ལོ་དང་ནོར་བུ་ནི་གསེར་ཟངས་ལས་གྲུབ་པ་ལྷའི་ཆ་བྱད་ཅན་གྱིས་ཁུར་བ་དང་། བཙུན་མོ་དང་བློན་པོ་དམག་དཔོན་རྣམས་ཀྱང་སོ་སོའི་ཆ་ལུགས་མཛེས་ཤིང་བརྗིད་པའི་ཆས་སུ་ཞུགས་ཤིང་རྒྱན་གྱིས་བརྒྱན་པ་དང་། གླང་པོ་ནི་གསོབ་ལ་བརྟེན་པ་དང་། རྟ་མཆོག་ནི་རྟ་སྔོན་པོ་རིན་པོ་ཆེའི་སྒ་སྲབ་ཀྱིས་བརྒྱན་པ་རྣམས་སོ་སོར་སྣ་འཁྲིད་རྒྱ་དཀར་ནག་གི་སྐྱེས་བུའི་ཆས་ཞུགས་ཇི་ལྟར་མཛེས་པར་བསྒྱུར་བ་རྣམས་ཀྱིས་འཁྲིད་པའི་ཚུལ་དང་། ཉེ་བའི་རིན་པོ་ཆེ་བདུན་ནི། རལ་གྲི་པགས་པ་སྐྱེད་ཚལ་ཁང་ཁྱིམ་དང་། །གཟིམས་ཆ་གོས་དང་མཆིལ་ལྷམ་རིན་པོ་ཆེ། །ཞེས་པ་རྣམས་ནི་དེ་དག་གིས་གཟུགས་ཕུན་སུམ་ཚོགས་ཤིང་། བཟོ་ཁྱད་ཀྱིས་འཕགས་པ་རྣམས་སྐྱེས་བུ་ཆ་ལུགས་དང་རྣམ་འགྱུར་སྣ་ཚོགས་པས་ཐོགས་པའི་ཚུལ་ཅན་དང་། སྐབས་འདིར་བཀྲ་ཤིས་རྟགས་བརྒྱད་དང་རྫས་བརྒྱད་ཀྱང་གཤོམ་པ་གནང་ན་སྐབས་སུ་འབྲེལ་བ་སྟེ། རྟགས་བརྒྱད་ནི། སངས་རྒྱས་རྣམས་ལ་སྐྱེ་བས་ཐོབ་པའི་བཀྲ་ཤིས་ཀྱི་མཚན་བཟང་སུམ་ཅུ་རྩ་གཉིས་མངའ་བའི་གཙོ་བོ་བརྒྱད་ལས་བཀྲ་ཤིས་རྟགས་ཀྱི་ལྷ་མོ་བརྒྱད་སྤྲུལ་བར་བཤད་ཅིང་། སྟོན་པས་བདུད་སྡེ་ཕམ་པར་མཛད་ཚེ་བདུད་ལས་རྒྱལ་བའི་བཀྲ་ཤིས་པའི་རྟགས་ཀྱི་མཚན་མར་ཡང་གྱུར་པ་སྟེ། པདྨ་ཅན་དང་འཇིགས་བྱེད་མ། །འཇིགས་བྲལ་མ་དང་རྣམ་རྒྱལ་མ། །འོད་ལྡན་མ་དང་མདངས་ལྡམ་མ། །དྲི་མེད་མ་དང་ཡིད་བཟང་མའོ། །ཞེས་བཤད་པ་དང་། མིང་གི་འདོགས་ཚུལ་ཁྱད་པར་ཙམ་ལས། དོན་བྱ་རྒྱུད་མི་འཁྲུགས་པའི་ལྷ་མོ་རྣམས་ཏེ། དཔལ་བེའུ། འཁོར་ལོ། པདྨ། རྒྱལ་མཚན། གདུགས་དཀར། བུམ་པ། དུང་དཀར། གསེར་ཉ་རྣམས་ལྷ་མོ་བརྒྱད་པོ་ཚེས་བཅུ་ཆེན་མོའི་དུས་ཀྱི་དཔའ་མོའི་ཆ་ལུགས་ལྟ་བུར་བསྒྱུར་བས་རིམ་པ་བཞིན་ཐོགས་པའོ། །རྫས་བརྒྱད་ནི། མེ་ལོང་། གིའུ་ཝཾ། ཞོ། དུར་ཝ། བིལ་བ། དུང་། ལི་ཁྲི། ཡུངས་དཀར་རྣམས་ཏེ་སྔོན་སྟོན་པ་བཅོམ་ལྡན་འདས་ལ་ཇི་ལྟར་ཕུལ་བའི་གླེང་གཞི་དང་མཐུན་པར་འབུལ་ཚུལ་གྱི་རྣམ་འགྱུར་ལྷ་མོ་འོད་འཆང་མས་མེ་ལོང་འབུལ་བ་སོགས་སོ་སོའི་ཆ་ལུགས་ཀྱིས་རྫས་དེ་དག་ཐོགས་པ་རིམ་པ་བཞིན་བསྟར་བ་དང་། རྫས་འབུལ་བ་པོ་ལ་མི་འདྲ་ཙམ་ཡོང་འདུག་པ་ལུགས་གཅིག་ནི་སྐུ་ཞབས་གྲྭ་ཚང་གི་ཞབས་བརྟན་སྐབས་སུ་གནང་བ་དང་མཐུན་ཞིང་། ལུགས་གཅིག་བུ་སྟོན་གྱི་རབ་གནས་བཀྲ་ཤིས་རྒྱས་བྱེད་སོགས་སུ་བཤད་པ་ལྟར་རོ། །སྐབས་འདིར་སྤྱོད་འཇུག་ལས་འབྱུང་བའི་མཆོད་པ་དངོས་འབྱོར་རྣམས་སྐབས་སུ་ཇི་ལྟར་བབས་པ་སྔོན་ཞུས་བཞིན་དགོངས་སྤྱོད་དང་། དེ་ནས་མཎྜལ་འབུལ་བའི་ཆས་མཎྜལ་ཉིད་དང་། ཚོམ་བུ་འགོད་པའི་མེ་ཏོག་དྲིས་གཤེར་བ་གང་བའི་སྣོད་གཞོང་དང་། གསེར་དངུལ་གྱི་མཎྜལ་རི་གླིང་སོགས་ཚོམ་བུའམ་གཟུགས་འགྲོས་སྣ་ཚོགས་ཀྱིས་མཛེས་པ་རྣམས་སྤེལ་ལེགས་སུ་འཁུར་བ་དང་། གཞན་ཡང་སྒེག་སོགས་བརྒྱད་དང་རིག་མ་བཅུ་དྲུག་སོགས་ནི་གར་གྱི་ཆས་སུ་ཞུགས་ཤིང་དེ་དག་གི་རྣམ་འགྱུར་འགྲོས་གར་དུ་བྱེད་པ་སོགས་ཞ་ལུ་དང་གོང་དཀར་ཆོས་སྡེ་སོགས་ན་རྒྱུན་ཡོད་འདུག་པ་བཞིན་གནང་ན་ལེགས་པ་འདྲ་བ་དང་། གཞན་ཡང་ཕྱི་ནང་གི་རྒྱུད་སྡེ་སོ་སོ་ནས་བཤད་པའི་མཆོད་པའི་རྣམ་གྲངས་བཀའ་ཐོར་སྩལ་བ་རྣམས་ཀྱང་ཤིན་ཏུ་ལེགས་ཤིང་རྣམ་པར་འཆར་བ་ཡོང་འདུག་ལགས་པ་དང་། དེ་ལས་གཞན་དུ་དབང་པོ་ལྔའི་མེ་ཏོག་སོགས་ཐུན་མོང་མ་ཡིན་པའི་མཆོད་པའི་ཚོགས་རྣམས་ཀྱང་ཁྱད་པར་གྱི་དུས་ཤིན་ཏུ་ཕན་ཡོན་ཆེ་བར་འགྱུར་ཞིང་དེ་དག་གི་འབུལ་ཚིག་ཧེ་རུ་ཀ་གལ་པོའི་རྒྱུད་ཀྱི་རྟག་པ་དགུ་པ་སོགས་སུ་རྒྱས་པར་འབྱུང་ཡང་། ད་རེས་ལྟ་བུའི་ཐུན་མོང་པའི་མངོན་གྱུར་དུ་ནི་སྐབས་སུ་མི་བབས་པ་འདྲ། རབ་གནས་མངའ་དབུལ་གྱི་སྐབས་སུ་འབྱུང་བའི་མཆོད་པ་ཕལ་ཆེར་ཡང་གོང་དུ་དངོས་ཤུགས་ཅི་རིགས་པར་ཚང་ཞིང་། བྱེ་བྲག་གི་སྤུ་གྲི་འདྲེག་སྤྱད་སོགས་དང་། སྲོག་ཤིང་འཁོར་ལོ་སོགས་ནི་རབ་གནས་ཁོ་ནའི་སྐབས་མ་གཏོགས་མི་དགོས་པར་གོ་བ་ལགས། སྐབས་འདིར་མཆོད་རྟེན་ལ་བཀུར་སྟི་བྱ་བའི་ལས་དང་ཉེ་བར་འབྲེལ་བའི་ཕྱིར་སྐབས་སུ་བབས་པ་ནས་འཇིག་རྟེན་གྱི་ལྷ་ཆེན་པོ་གསུམ་དང་། སྔོན་མར་མེ་ལྡན་གྱི་གྲོང་ཁྱེར་དུ་སྟོན་པ་འཁོར་བཅས་མཆོད་པའི་ཚེ་ན་ལྷ་ཆེན་པོ་གསུམ་ལ་སོགས་པའི་འབག་གྱོན་ནས་ཨརྒྷཾ་སྒྲེང་བ་སོགས་ཀྱིས་མཆོད་པར་གྲགས་པ་བཞིན། ཚངས་པས་ཁྲུས་ཆབ་འབུལ་བ། བརྒྱ་བྱིན་གྱིས་བསིལ་ཡབ་གཡོབ་པ། ཁྱབ་འཇུག་གིས་ཨརྒྷཾ་སྒྲེང་བ་སོགས་སོ། །རྒྱལ་པོ་ཆེན་པོ་བཞི་གནོད་སྦྱིན་གྱི་སྡེ་དཔོན་ལ་སོགས་པ་རྣམས་ཀྱང་རང་རང་གི་སྐུ་མདོག་དང་ཕྱག་མཚན་རྒྱན་དང་ཆ་ལུགས་འཁོར་གཡོག་དང་བཅས་པའི་ཟློས་གར་མཆོད་སྤྲིན་རྣམ་པ་བརྒྱད་སོགས་སུ་འབྱུང་བ་དང་ཆ་འདྲ་བ་སོ་སོའི་མཆོད་རྫས་རྣམས་ཐོགས་པའི་ཚུལ་དང་བཅས་པ་ཡང་སེར་སྦྲེངས་ཀྱི་སྔ་ཕྱིའི་བར་མཚམས་སྐབས་སུ་གང་བབ་ཙམ་དུ་རིམ་པ་བཞིན་གྲལ་རིམ་དུ་གནང་ན་ཡང་ཤིན་ཏུ་འོས་པ་དང་། གང་ལྟར་ན་ཡང་མཆོད་པའི་བཅའ་བསྒྲིག་གནང་རྒྱུ་རྣམས་རྒྱུ་ཕུན་སུམ་ཚོགས་ཤིང་། རྐྱེན་འཚམས་པར་འབབ་པའི་རྣམ་འགྱུར་མཐའ་ཡས་པའི་ངོ་མཚར་གྱི་བཀོད་པས་འཕགས་པ་གཙང་སྦྲ་ལ་སོགས་པའི་ཀུན་ཏུ་སྤྱོད་པ་རྣམ་པར་དག་པས་གཞི་བཟུང་སྟེ། རིས་མེད་པའི་འདུས་པ་རྒྱ་མཚོའི་དགེ་འདུན་གྱི་ཚོགས་རྣམས་ཞི་ཞིང་དེས་པའི་ངང་ཚུལ་བཟང་པོས་མཆོད་རྫས་ཀྱི་རྣམ་པ་དུ་མ་ཐོགས་པས་མཆོད་ཅིང་བསྐོར་བའི་ལས་ལ་ཉེ་བར་འཇུག་པའོ། །བཞི་པ་ནི། ད་རེས་དགེ་འདུན་ཧ་ཅང་ཚོགས་ཆེས་པས་བསྐོར་བ་དང་རྗེས་འབྲེལ་མཆོད་པའི་ཆོ་ག་སྟབས་ཅིག་ཏུ་འགྲིག་དཀའ་བའི་ཕྱིར། དགེ་འདུན་གསུང་གི་ང་རོ་བཟང་ཞིང་རྣམ་དཔྱོད་ཀྱི་ཟུར་འཐོན་པའི་རིགས་ཞལ་གྲངས་ཇི་ལྟར་འོས་པ་བཟང་བསྡུས་སྣམ་སྦྱར་སོགས་ཆས་གོས་བཟང་པོ་དང་ལྡན་པ་རོལ་མོའི་རྣམ་གྲངས་དུ་མ་ཐོགས་པས། ཕོ་བྲང་ཆེན་མོའི་མདུན་ངོས་གོས་སྐུ་ལ་སོགས་པ་གང་དུ་བཤམས་པའི་དྲུང་དུ། ཐམས་ཅད་དུ་ནི་ས་གཞི་དག །ཅེས་སོགས་ཀྱིས་ས་གཞི་བྱིན་བརླབ་དང་། སྤྱན་འདྲེན་ཁྲུས་གསོལ་མཆོད་འབུལ་སོགས་ཇི་ལྟར་རིགས་པ་ལས་རྒྱས་བསྡུས་བཟང་སྤྱོད་ཀྱི་ཡན་ལག་བདུན་པས་མཐའ་བརྟེན་པ་ཙམ་ཕྱོགས་སོ་སོ་ན་འབུལ་བ་དང་ཕྱོགས་གང་ཡིན་དེའི་རྒྱལ་ཆེན་ལ་གཏོར་མ་བསྔོ་ཞིང་ཕྲིན་ལས་བཅོལ་བ་དང་། བཀྲ་ཤིས་ཀྱི་ཚིགས་བཅད་བརྗོད་པ་སོགས་དང་། བསྐོར་བའི་ཚེ་ན་དྲི་མེད་ལས་བཤད་པའི་བསྐོར་བའི་སྔགས་ཟློས་པ་སོགས་བགྱིད་དུ་སྩལ་ན་ཤིན་ཏུ་ལེགས་ཤིང་སྐབས་སུ་བབས་པར་གོ་བ་བློ་ཆུང་གཅིག་པའི་ཤར་ཚོད་ལགས་པ་ཤེས་བྱ་ཐམས་ཅད་ལ་ཆགས་ཐོགས་མི་མངའ་བའི་ཡེ་ཤེས་ཀྱི་གཟིགས་པས་དཔྱད་ངོས་རྨོངས་པས་ནོངས་གྱུར་ལ་ཁྲེལ་བ་མི་འཇུག་པར་གསོལ་བ་འདེབས་པ་ལགས་ཤིང་བསྐོར་བའི་དུས་ཀྱི་མཆོད་འབུལ་གནང་ཚུལ་ཡང་ཆོས་སྤྱོད་རབ་གསལ་ནས་ངག་འདོན་སྙིང་པོར་དྲིལ་བ་གཟུང་བདེ་བ་ཞིག་སྐུ་ཞབས་ཉིད་ནས་ལྗགས་བསྒྲིགས་གནང་ན་ལེགས་པ་ཡོང་བ་འདུག་ལགས་པའང་བརྩེ་དབྱིངས་སུ་གཅགས་པ་མཁྱེན་མཁྱེན་ལགས།