མི་དབང་སངས་རྒྱས་རྒྱ་མཚོའི་བཀའ་དྲིའི་ལན་དུ་ཕུལ་བ།
༈ མི་དབང་སངས་རྒྱས་རྒྱ་མཚོའི་བཀའ་དྲིའི་ལན་དུ་ཕུལ་བ། ལགས། སློབ་སྟོན་རིན་པོ་ཆེ་སྤྱི་བོར་ཕེབས། ལམ་ལྔ། སྐྱེ་གནས་བཞི། རིགས་དྲུག་གིས་བསྡུས་པ་ལས་ལྷ་མིན་དུད་འགྲོའི་ནང་དུ་བསྡུ་བའི་ཚུལ་ནི། མངོན་པ་མཛོད་ལས། དམྱལ་བ་ཡི་དྭགས་དུད་འགྲོ་དག །འདོད་པའི་ཁམས་ཡིན། ཞེས་འགྲོ་བ་ལྔའི་མིང་བྱེ་བྲག་སོ་སོར་སྨོས་ནས་ལྷ་མ་ཡིན་མ་བཤད་ཀྱང་གྲངས་དྲུག་ཏུ་བསྡུས་པའི་དོན་ནི། མཛོད་ལས། འདིར་ནི་དམྱལ་སོགས་འགྲོ་བ་ལྔ། །ཞེས་ལྷ་མིན་ཟུར་དུ་མི་འབྱུང་བ་ནི། ལྷ་མ་ཡིན་དུད་འགྲོའི་ནང་ཚན་དུ་བསྡུ་བའི་དབང་དུ་བྱས་པ་དང་། ཡང་ན་ལྷ་མ་ཡིན་དུ་སྐྱེ་འགྱུར་གྱི་འཕེན་བྱེད་དགེ་བ་བྱས་པ་རྣམས་ལྷ་དང་། འཕེན་བྱེད་མི་དགེ་བ་བྱས་པ་རྣམས་དུད་འགྲོར་བསྡུ་བའི་དབང་དུ་བྱས་ནས། ལྷ་མིན་འགྲོ་བ་གཞན་གྱི་ཁོངས་སུ་འདུ་བའི་ཕྱིར་འགྲོ་བ་ལྔ་ཞེས་བསྡུས་པ་སྟེ། འགྲོ་བ་རྒྱུད་ལྔ་འཁོར་བའི་དཀྱིལ་འཁོར་དུ། །ཞེས་རྒྱལ་བ་སྤྱི་བསྟོད་དུ་གསུངས་པ་དང་། ལམ་རིམ་དུ་རིགས་དྲུག་གི་སྡུག་བསྔལ་ལས། དམྱལ་བ། ཡི་དྭགས། དུད་འགྲོ་གསུམ་གྱི་སྡུག་བསྔལ་བྱེ་བྲག་ཏུ་བསྒོམ་པར་གསུངས་པའི་གནད་ནི་སྐྱེས་བུ་ཆུང་ངུའི་སྐབས་སུ་རང་ཉིད་ངན་སོང་ལས་ཐར་འདོད་ཀྱིས་སྐྱབས་སུ་འགྲོ་བ་ཉིད་ལམ་གྱི་དངོས་གཞིར་གསུངས་པ་སྟེ། དེ་ཡང་ཚེ་འདིའི་ཚ་གྲང་བཀྲེས་སྐོམ་སོགས་སྡུག་བསྔལ་ཡུན་ཐུང་ངུ་འདི་ལ་དཔག་ན། ཕྱི་མ་ངན་སོང་གསུམ་གྱི་སྡུག་བསྔལ་བཟོད་གླགས་མེད་པ་ཡུན་རིང་དུ་མྱོང་དགོས་པ་ལ་ཡིད་ཆེས་ཀྱི་མྱོང་བ་སྐྱེས་ན། རང་ཉིད་དེར་ཤོར་དོགས་བླ་མ་དཀོན་མཆོག་ལ་བློ་ལིངས་བསྐྱུར་ཞེ་ཐག་པ་ནས་སྐྱེ་ཞིང་། དེ་ལྟ་བུའི་བློ་དེ་སྐྱབས་འགྲོའི་དངོས་གཞི་ཡིན་པས། སྐྱབས་འགྲོའི་གནད་དམ་པ་ངན་སོང་གི་སྡུག་བསྔལ་སྒོམ་པ་ལ་ཡོད་པས། དེ་གོམས་པས་དེར་སྐྱེ་བའི་ལས་མི་དགེ་བ་ལ་མངོན་ཞེན་ལྡོག་པར་འགྱུར་བ་ལ་དགོངས་པའོ། །སྨོན་ལམ་ནི་དེ་ལ་དམིགས་ནས་ངན་སོང་དུ་སྐྱེ་འགྱུར་གྱི་ལས་སམ། རྒྱུ་མི་དགེ་བ་ལས་ལྡོག་པ་དང་། འབྲས་བུ་ངན་སོང་དུ་མི་སྐྱེ་ཞིང་སྡུག་བསྔལ་མི་མྱོང་བར་སྨོན་ལམ་འདེབས་པ་སྟེ་གནད་གཅིག་ལགས། དེའི་རྗེས་སུ་སྐྱེས་བུ་འབྲིང་གི་ལམ་ལ་དགོངས་ནས། མི། ལྷ་མ་ཡིན། ལྷའི་སྡུག་བསྔལ་བསྒོམ་པ། སྡུག་བསྔལ་དེ་ཡང་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་གསུམ་གྱིས་བསྡུས་པ་དང་། སྡུག་བསྔལ་དེ་རྣམས་ལ་སྐྲག་སྟེ་ངེས་པར་འབྱུང་བའི་བློ་སྐྱེས་ན། སྡུག་བསྔལ་དེའི་རྒྱུ་མ་རིག་པ་སོགས་རྟེན་འབྲེལ་ལུགས་ལྡོག་གི་གནད་ཤེས་པས་བདེ་འགྲོའི་འཇིག་རྟེན་གསུམ་ལས་ཀྱང་ཐར་བར་འགྱུར་བའི་ཚུལ་བསམ་པ་ནི་སྐྱེས་བུ་འབྲིང་གི་ལམ་ཡིན་པས་ཐོག་མར་ངན་སོང་གསུམ་གྱི་སྡུག་བསྔལ་བཤད། དེ་ནས་བདེ་འགྲོ་གསུམ་གྱི་སྡུག་བསྔལ་གསུངས་པ་ལགས། དེས་ན་རིགས་དྲུག་གནས་འདྲེན་སོགས་སུ་འགྲོ་བ་རིགས་དྲུག་རིམ་པར་བཤད་པས། སྤྱིར་རིགས་དྲུག་ཏུ་གནས་ཀྱང་ལྷ་མིན་འཕེན་བྱེད་དགེ་སྡིག་གི་དབྱེ་བས་འགྲོ་བ་རིགས་གཉིས་སུ་བསྡུས་ཀྱང་། དོན་འཐོབ་རང་ལས་མྱོང་འགྱུར་གྱི་འགྲོ་བ་སྡེ་ཚན་གཅིག་ཏུ་གནས་པའི་ཕྱིར་གཉིས་ཀ་ལ་འགལ་བ་མི་ཡོང་འདྲ་ཡང་། རྣམ་གྲངས་དྲུག་ཏུ་དབྱེ་བ་ཁོ་ན་ཆོ་ག་དང་སྒོ་མཐུན་ལགས་པ་དང་། སྤྱིར་གསང་སྔགས་གསར་རྙིང་གི་ཐ་སྙད་ནི། རྒྱལ་པོ་དར་མས་བསྟན་པ་མ་བསྣུབས་ཀྱི་གོང་རོལ་དུ་བོད་དུ་འགྱུར་བའི་མདོ་སྔགས་ཐམས་ཅད་ལ་རྙིང་མ་ཞེས་འདོགས་དགོས་པ་དང་། ལོ་ཆེན་རིན་བཟང་སོགས་ཀྱིས་འགྱུར་འགོ་བཙུགས་པ་མན་ཆད་ནས་གསར་མ་ཞེས་མིང་དོན་མཚུངས་པར་གནས་པ་ཡིན་ཞིང་། རྒྱ་གར་དུ་གྲགས་ཚོད་གསར་རྙིང་གི་དབྱེ་བ་ཅི་ལ་ཡོང་ལགས་རུང་དོན་འཐོབ་ཀྱི་དབང་དུ་བྱས་ན་ཐེག་རིམ་བརྒྱད་པ་ཨ་ནུ་སྟེ་རྗེས་སུ་རྣལ་འབྱོར་དང་། དགུ་པ་ཨ་ཏི་སྟེ་ཤིན་ཏུ་རྣལ་འབྱོར་ཏེ། གཉིས་པོ་གསར་མ་ལ་མེད་པའི་ཕྱིར་རྙིང་མ་ཟབ་མི་ཟབ་ཀྱི་ཁྱད་པར་དེ་ལྟར་ཡོད་པར་གྲུབ་ཀྱང་རྒྱ་གར་དུ་གྲགས་ཚོད་གསར་རྙིང་གི་ཐ་སྙད་མེད་པའི་དབང་དུ་བྱས་ནས། བོད་དུ་འགྱུར་སྔ་ཕྱི་ལ་ལྟོས་ནས་དེ་ལྟར་གྲགས་པར་བྱས་ན་འཐད་པ་འདུག་ལགས་པ་དང་། ཡང་། གསར་མའི་བླ་མ་ལ་ལས་རྒྱལ་བློན་སྔ་དར་གྱི་དུས་སུ་འགྱུར་བའི་སྔགས་རྣམས་རྙིང་མ་ཡིན་ཡང་མདོ་དེ་ལྟར་མ་ཡིན་པའི་དབང་ཆེའི་སྟངས་ཆོད་བྱས་པ་འགའ་རེ་པཎ་ཆེན་གསེར་མདོག་ཅན་པ་སོགས་ཀྱིས་ཡི་གེར་བཀོད་འདུག་ཀྱང་། གྲགས་ཚོད་གསར་རྙིང་གི་ཁྱད་པར་རྒྱ་གར་དུ་མ་གྲགས་པ་དང་། དོན་འཐོབ་ཨ་ནུ་ཨ་ཏི་གཉིས་གསར་མ་ལ་མེད་པས་རྙིང་མར་གྲུབ་པ་དང་། བོད་དུ་རྒྱལ་བློན་སྔ་དར་གྱི་དུས་འགྱུར་བའི་མདོ་སྔགས་ཐམས་ཅད་རྙིང་མ་དང་། རིན་བཟང་མན་ཆད་ཀྱི་མདོ་སྔགས་ཐམས་ཅད་ལ་གསར་མ་ཞེས་གནང་ན་བཀའ་སྩལ་ལྟར་ཤིན་ཏུ་ལེགས་པ་ཡོང་བ་འདུག་ལགས་པ་སོགས་ཤེས་བྱ་ཐམས་ཅད་ལ་གཟིགས་པ་དྲི་མ་མེད་པའི་ཡེ་ཤེས་ཀྱི་སྤྱན་གྱིས་གཟིགས་ཆོད་བརྩེ་བས་འཛིན་པ་མཁྱེན་མཁྱེན་ལགས།