མི་དབང་ཆེན་པོས་བཀའ་སྩལ་བའི་ལན་དུ་ཕུལ་བ།
༈ མི་དབང་ཆེན་པོས་བཀའ་སྩལ་བའི་ལན་དུ་ཕུལ་བ། ལགས། བཀའ་ཤོག་རིན་པོ་ཆེ་ལྷ་རྫས་བཟང་པོའི་གནང་རྟེན་དང་བཅས་པ་ཚེས་༡༥ལ་སྩལ་བ་ཚེས་༡༦གི་མུན་མཚམས་ལ་སྤྱི་བོར་ཕེབས་པ་བཀའ་དྲིན་བླ་མེད་དུ་ཆེ་ལགས། ཇི་ལྟར་སྩལ་ཕེབས་ཀྱི་བསྡུས་པའི་སྒྲ་དོན་མཚན་གཞི་སོགས་ཚུལ་འདི་ལ་ཐོས་བསམ་གྱི་འཇུག་པ་ཅི་ཡང་བྱེད་མ་མྱོང་གཤིས་འབྲེལ་ཆགས་བསྙེངས་ཐག་ཆོད་པའི་རྒྱུ་མཚན་འབུལ་རྒྱུ་མ་མཆིས་རུང་། གོ་ཚོད་ལམ་ཙམ་ལ། སྤྱིར་རྒྱ་གར་དང་བོད་དུ་ཡང་རྔོག་ལོ་ཆེན་པོ་དང་དེའི་དངོས་སློབ་གངས་པ་ཤེའུ་དང་། ཁྱུང་རིན་གྲགས། གྲོ་ལུང་པ་བློ་གྲོས་འབྱུང་གནས་ལ་སོགས་པ་ཡན་ཆད་དུ། པྲ་ཀ་ར་ཎ་སྡེ་བརྒྱད་ཀྱི་ནང་ཚན་ཕུང་པོ་ལྔའི་རབ་བྱེད་སོགས་ཡོད་པས་དོན་གྱིས་ཡོད་པར་གྲུབ་ལ། མིང་འདོགས་ཀྱི་སྒོ་ནས་ཐ་སྙད་ཀྱི་གྲགས་ཚོད་ཇེ་རྒྱས་སུ་གྱུར་པ་ནི་རྔོག་ལོའི་ཡང་སློབ་ཕྱ་པ་ཆོས་ཀྱི་སེངྒེས་སྲོལ་བཏོད་པར་གྲགས་པ་དེ། སློབ་དཔོན་འདིའི། དབུ་མ་བདེན་གཉིས། རྒྱན། སྤྱོད་འཇུག་སོགས་ཀྱི་ཊཱི་ཀ་དང་། དེ་དག་སོ་སོའི་བསྡུས་པའང་མང་དུ་མཛད། ཁྱད་པར་ཚད་མའི་བསྡུས་པ་ཡིད་ཀྱི་མུན་སེལ་ཞེས་བྱ་བ་རང་འགྲེལ་དང་བཅས་པ་དང་། ཡིད་ཀྱི་མུན་སེལ་རྐྱང་པ་སྟེ་གཉིས་མཛད། དབུ་མ་ལའང་བསྡུས་པ་ཆེ་ཆུང་གཉིས་ཙམ་མཛད་པར་གྲགས་པ་དང་། བསྡུས་པ་ཞེས་པའི་མིང་དེ་དོན་གང་ལ་འཇུག་པའི་གཞི་ནི། གསུང་རབ་མཐའ་དག་གི་སྙིང་པོ་གཅེས་བསྡུས་གོ་བདེ་མིང་དོན་བརྡའ་སྤྲོད་ཀྱི་དབང་དུ་བྱས་པས་བསྡུས་པ་ཞེས་བཏགས་པར་སྣང་སྟེ། སྔོན་གྱི་ཁ་སྐད་དུ། རྒྱལ་བའི་བཀའ་དང་དེ་འགྲེལ་བསྟན་བཅོས་ཀྱི། །དགོངས་དོན་མ་ལུས་ལེགས་པར་བསྡུས་པས་ན། །བསྡུས་པ་ཞེས་སུ་མཁས་པས་མཚན་དུ་བཏགས། ཞེས་ཟེར་བ་སྣང་བས། དེས་ན་བསྡུས་པ་ཞེས་བརྗོད་བྱའི་མིང་དངོས་དང་། གྲྭ་ཞེས་པ་ནི། དེ་ཉིད་སློབ་པའི་སྡེ་ཚན་གྱི་གྲྭ་སྟེ། དཔེར་ན་སྔགས་གྲྭ། བཤད་གྲྭ། ལུང་གྲྭ། རིགས་གྲྭ་ཞེས་པ་རྣམས་ཀྱིས་མཚོན་པ་སྟེ། དེང་སང་བསྡུས་ར་ཞེས་པ་ནི་ཟུར་ཆག་པར་སྣང་ངོ་། །འོན་ཀྱང་ཕྱ་གཙང་སོགས་ཀྱིས་བསྡུས་པའི་རྣམ་གཞག་མཛད་པ་ལས་ཀྱང་། ཕྱིས་ས་དགེའི་མཁས་པ་རྣམས་ཀྱིས་རིགས་པའི་འགྲོས་འདེད་ཕྲ་ཞིབ་ཀྱི་གནད་ཟབ་མོ་མཐའ་ཡས་པ་ཞིག་མཛད་པ་གྲྭ་སྡེ་སོ་སོ་ན་དར་རྒྱས་སུ་ཡོད་པ་འདྲ་ཞིང་། རོང་སྟོན་ཆེན་པོ་དུས་དེ་ཙམ་ན་ལུང་རིགས་སྨྲ་བ་ཐམས་ཅད་ཀྱི་བསྟོད་ཡུལ་མཐུན་སྣང་དུ་གྲུབ་པ་ཡིན་འདུག་པས། སྡེ་སྣོད་ཀྱི་གཞུང་ལ་དཀྲིས་པའི་ལུང་རིགས་ཀྱི་འཆད་ཉན་སྐུ་ཚེ་རིལ་པོར་མཛད་པ་ཡིན་འདུག་ཀྱང་། ད་ལྟའི་བསྡུས་པ་ཕྲ་ཞིབ་འདི་རང་གཙོ་བོར་མཛད་པ་ཞིག་མེད་འདྲ་སྟེ། རྣམ་ཐར་དུ་ཞལ་ཆེམས་བཞག་པར་ཉིན་མོ་མདོ་དང་བསྟན་བཅོས་ཆེན་པོ་རྣམས་ལ་བཤད་ཉན་མཛད་དགོས། ཁྱོད་ཁྱོད་རང་དང་། ཁྱོད་མ་ཡིན་ཁྱོད་ཅེས་མ་ཟེར། མཚན་མོ་ལུང་དང་རིགས་པའི་རྣམ་གཞག་འུར་ཆི་ལི་གྱིས་ཟེར་བ་གསུངས་འདུག་ཅིང་། ཇི་ལྟར་ཕེབས་པ་བཞིན་བསྡུས་པའི་སྒྲ་བཤད་རོང་པོས་མཛད་ཟེར་བ་དེ་སྒྲ་དོན་མི་འབྱོར་བ་བསླབ་སྟོན་ལྟར་ཡིན་འདུག་གཤིས། ངག་སྒྲོས་འཁྱམ་པོ་ལས་རོང་པོས་གསུངས་པ་མིན་འདྲ་ལགས་པ་དང་། ལར་གསང་ཕུར་རྔོག་ལོ་ཆེན་པོ་ནས་བཟུང་རྗེ་བདག་ཉིད་ཆེན་པོའི་སྐུ་དངོས་ཀྱི་ཕྲིན་ལས་ཕྱོགས་ཁྱབ་དང་དུས་རགས་པ་ཙམ་མཚུངས་པ་ཡན་ཆད་དུ་ཚད་མ་རྣམ་ངེས་ཀྱི་བཤད་ཉན་ཁོ་ན་གཙོ་བོར་གྲགས་ཤིང་། རྣམ་འགྲེལ་ནི་ས་པཎ་གྱིས་ཐོག་མར་རྣམ་ངེས་བསྡུས་པ་དང་བཅས་པ་ཕྱ་པའི་ལུགས་དེ་ཉིད་ལ་སྦྱངས་ནས། ཕྱིས་ཁ་ཆེ་པཎ་ཆེན་ལ་ཚད་མ་ཆོས་མཆོག་གསན་པ་ནས་བཟུང་། སྡེ་བདུན་ལ་བཤད་སྒྲོས་རྙིང་པ་དང་མི་འདྲ་བ་པཎྜི་ཏ་གཞན་དག་ལའང་གསན། ཁྱད་པར་རྣམ་འགྲེལ་ལ་འགྱུར་བཅོས་དང་བཤད་པ་བར་མ་ཆད་དུ་མཛད་པ་འུ་ཡུག་པ་དང་། ཞང་མདོ་སྡེ་དཔལ་ལ་སོགས་ལས་རྣམ་འགྲེལ་གྱི་བཤད་ཉན་གཙོ་བོར་དར་ཞིང་། ཚད་བསྡུས་ཀྱི་བཤད་པ་སྔར་བྱུང་རྣམས་གཞན་དང་མི་མཐུན་ཞེས། མདོ་སེམས་ཀྱི་གཞུང་ཐད་སོར་བཞག་ནས་བསྡུས་པའི་སྲོལ་ཐོག་མར་ཕྱེ་བའི་བསྟན་བཅོས་རིགས་གཏེར་རང་འགྲེེལ་དང་བཅས་པ་མཛད་ནས་རྣམ་འགྲེལ་གྱི་སྲོལ་བཏོད། བོད་ཀྱི་བཤད་སྒྲོས་སྔ་མ་ལ་ཟུར་ཟའི་ཚུལ་དུ། ཆོས་ཀྱི་གྲགས་པས་བོར་བ་ཡི། །ངན་སྐྱུག་ཕལ་ཆེར་བླུན་པོས་ལེན། །སྐྱུག་སྨན་བཏང་ནས་སྐྱུག་པ་དག །ཁྱི་ལས་གཞན་པ་སུ་ཞིག་ལེན། །ཞེས་དང་། གངས་རིའི་ཁྲོད་འདིར་མཁས་པའི་རྒྱུ་སྐར་བྱེ་བ་བརྒྱས། །དཔལ་ལྡན་གྲགས་པའི་གསུང་རབ་པདྨོ་ཁ་ཕྱེ་མོད། །གང་བློའི་ཉི་འོད་སྣང་བས་མ་ཁྱབ་དེ་སྲིད་དུ། །གཞུང་ལུགས་དགོངས་དོན་གེ་སར་སྙིང་པོ་གསལ་མ་ནུས། །ཞེས་ཟུར་ཟ་བར་མཛད་པ་དང་། དེ་དང་མཐུན་པར་སྟག་ཚང་ལོ་ཙཱ་བས་ཀྱང་ཁོང་རང་གི་རྣམ་ཐར་དུ་ཕྱ་གཙང་གི་ལུགས་ལ་ཟུར་ཟ་བའི་ཚིག་ཏུ་བྲིས་འདུག་པ་དང་། གང་ལྟར་རྣམ་འགྲེལ་ནི་རྗེའི་སྐུ་ཚེའི་བར་ཡན་ཆད་དུ། ས་སྐྱ། རྩེ་ཐང་སོགས་སུ་དར་རྒྱས་ཆེ་བ་ལས། གསང་ཕུ་ཉིད་དུ་རྣམ་ངེས་ལ་ལྟོས་ནས་རྣམ་འགྲེལ་བཤད་པ་མ་ནུབ་ཙམ་ལས། གསང་ཕུར་རྣམ་འགྲེལ་རང་རྐང་གི་བཤད་པ་དར་རྒྱས་སུ་གྱུར་པ་ནི་སྐབས་དེ་ཙམ་དུ་མ་བྱུང་བར་གྲགས་པ་དང་། རྗེ་བདག་ཉིད་ཆེན་པོའི་རྣམ་འགྲེལ་གསན་ས་རེད་མདའ་བ་ཡིན་འདུག་པ་དང་། རྒྱལ་ཚབ་མཁས་གྲུབ་གཉིས་ཀྱང་ཡབ་སྲས་དེ་གཉིས་ཀའི་སློབ་མར་འདུག་པ་དང་། དེ་བཞིན་དུ་ཐམས་ཅད་མཁྱེན་པ་དགེ་འདུན་གྲུབ་ཀྱིའང་རྣམ་འགྲེལ་གསན་ཡུལ་དང་། ར་བ་སྟོད་ཀྱི་བཤེས་གཉེན་གྲ་ཆུང་ཡོན་ཏན་རྒྱ་མཚོ་སོགས་ཀྱང་གསན་ཡུལ་གྱི་གོ་འབྲེལ་གྱི་དབང་ལས་བསྡུས་པ་དང་། རྣམ་འགྲེལ་གྱི་བཤད་པའི་འགངས་ས་པཎ་གྱི་རིགས་གཏེར་དང་མཐུན་པ་ཡོང་རིགས་འདྲ་བ་དང་། འོན་ཀྱང་ཟབ་མོའི་གནད་འགག་གི་ལེགས་བཤད་ཁྱད་པར་ཅན་དུ་མ་ནི་རྗེ་ཉིད་ཀྱིས་སྲོལ་ཐོག་མར་བཏོད་པར་མཛད་པ་བཞིན། དེའི་རྗེས་སུ་ཕེབས་པའི་མཁས་གྲུབ་ཁྱད་པར་ཅན་དུ་མ་ཡོད་པ་གཞིར་བཅས་ཤིང་། དེས་ན་སྔོན་ཞུས་བཞིན་སྤྱིར་པུསྟི་ཐམས་ཅད་ལ་དོན་གྱི་གནད་ཟུངས་སུ་བཏུས་པའི་བསྡུས་པ་ཇི་སྙེད་ཅིག་ཡོད་པ་ལས། ཁྱད་པར་ཚད་བསྡུས་ཉིད་དེང་སང་དར་རྒྱས་སུ་གྱུར་ཅིང་། བཤད་ཉན་གྱི་གྲྭ་ཕལ་ཆེར་དུ་དོན་གྱི་འགངས་མི་མཐུན་པ་ཞིག་མེད་ལས་ཆེ་ཡང་གནས་སྐབས་ཁས་ལེན་ཕྲ་མོའི་བཟེ་ཁྱད་སྐྱོང་བ་ནི་མི་མཐུན་པའི་རྣམ་གྲངས་མང་པོ་ཡོད་པ་འདྲ། དཔེར་མཚོན་ན་སྐྱེད་ཚལ་བ་རྣམས། ཁ་དོག་དཀར་དམར་རྫས་ཆོས་ལྡོག་ཆོས་གཉིས། །འགལ་དང་མི་འགལ་སྤྱི་དང་བྱེ་བྲག་གཉིས། །འབྲེལ་དང་མི་འབྲེལ་ཐ་དད་ཐ་མིན་གཉིས། །རྗེས་སུ་འགྲོ་ལྡོག་རྒྱུ་དང་འབྲས་བུ་གཉིས། །སྔ་བཙན་བར་བཙན་ཕྱི་བཙན་མཚན་མཚོན་གཉིས། །རྟགས་མང་གསལ་མང་དགག་པ་འཕར་ཚུལ་གཉིས། །དངོས་འགལ་བརྒྱུད་འགལ་ཁྱབ་མཉམ་རྣམ་པ་གཉིས། །ཡིན་གྱུར་མིན་གྱུར་ཡིན་ལོག་མིན་ལོག་གཉིས། །ཡོད་རྟོགས་མེད་རྟོགས་དངོས་རྟོགས་རྟག་རྟོགས་གཉིས། །ཞེས་བསྡུས་ཚན་བཅོ་བརྒྱད་དུ་བསྡུ་ཚུལ་སོགས་ཡོད་པར་སྣང་བ་དང་། བསྡུས་པ་དེ་ཉིད་བརྩིས་པའི་དགོས་པ་ནི། བློ་གྲོས་གསར་བུ་རྣམས་ཤེས་བྱའི་གནས་ལ་འཁྲིད་བདེ་བའི་ཕྱིར་ཏེ། དེ་ཡང་རྩོད་གཞིའི་ཆོས་ཅན་ཐུན་མོང་མ་ཡིན་པ་ཞིག་མ་བཞག་ན། ཐོག་མར་རྩོད་གཞི་དེ་གཅེར་མཐོང་དུ་ངོས་མི་ཟིན། དེ་མ་ཟིན་ན་དགག་སྒྲུབ་ཀྱི་གནད་མི་ལོངས། དེས་ན་ཐོག་མར་ཁ་དོག་དཀར་དམར་ལྟ་བུ་རྩོད་གཞིར་བྱས་པས། མིང་དེ་བརྗོད་མ་ཐག་པ་ནས་དོན་གྱི་བརྡ་འཕྲོད། དེས་ཆོས་ཅན་དེ་ལ་དམིགས་པའི་དགག་སྒྲུབ་ཀྱི་གནད་ཐིངས། ཚུལ་དེ་ལྟ་བུས་རིམ་གྱིས་བློ་གྲོས་ཇེ་འཕེལ་དུ་གྱུར་པ་ལས་རང་གིས་བཅས་པའི་དམ་བཅའ་ལ་གཞན་གྱིས་རྒོལ་བ་ན། རྟགས་མ་གྲུབ། ཁྱབ་པ་མེད། འདོད་ལན་གསུམ་གང་རུང་མ་འདྲེས་པར་འདེབས་ནུས་པ་རྒོལ་བ་པོའི་སྤོབས་པ་འཕྲོག་ནུས་ཤིང་། གཞན་གྱིས་དམ་བཅས་པ་ལ་ལུང་རིགས་ཀྱི་འགྲོ་ཁྱབ་དམིགས་ཐིངས་པར་འགྱུར་བ་དང་། འོན་ཀྱང་དེང་སང་གོང་གི་ལན་གསུམ་པོ་དེ་དག་གང་རུང་འདེབས་པ་ལས་མ་འདས་པར་གྲགས་ཀྱང་དེ་གསུམ་གང་རུང་དུ་མ་འདུས་པའི་རྩོད་ངག་ལ་མ་ངེས་པའི་ལན་འདེབས་བྱ་ཡོད་ཅེས་རྣམ་ཐར་བཞ་ིལྡན་གྱི་ལན་གདབ་དགོས་པར་ས་པཎ་གྱིས་གསུངས་པ་སོགས། གང་ལྟར་ཐོག་མར་བསྡུས་པའི་རྩོད་ངག་གིས་དགག་སྒྲུབ་ཀྱི་གནད་ལ་དངོས་པོ་སྟོབས་ཞུགས་ཀྱི་རིགས་པའི་བློ་གྲོས་སྒོ་དང་པོར་ཕྱེ་ནས། ཕྱིས་གཞུང་འགྲེལ་རྣམས་ཀྱི་འགངས་གཤོག་པའི་ཚེ་ན་དེ་ཉིད་རིགས་ལམ་ནས་ཐོགས་མེད་དུ་སྨྲ་བའི་མཐུ་རྙེད་པར་འགྱུར་བ་ལ་དགོངས་པ་སྟེ། དཔེར་ན་བོད་ཡིག་གསལ་བྱེད་སུམ་ཅུ་དབྱངས་བཞི་དང་བཅས་པ་དང་པོར་བརྡའ་སྤྲད་ནས་བྱང་བར་བྱས་པས་ཕྱིས་ཡི་གེ་དེ་རྣམས་རྐྱེན་ཕྲད་གང་དང་ཐུག་པ་ལས་མིང་ཚིག་གི་དོན་དེ་དང་དེར་བརྡའ་འབྱོར་བ་ལ་ཚེགས་མེད་པར་འགྱུར་བ་བཞིན་ནོ་སྙམ་པ་ལགས་ཏེ། སྔོན་ཞུས་རྣམས་རྣ་ཐོས་བོན་གྱེར་གྱི་ཞུ་བ་ལས་རང་ལུགས་ཀྱི་གྲུབ་མཐའ་གྱ་གྱོལ་སྐྱོང་བ་ལ་གནས་སྐབས་མཁོ་ཁེབས་ཆུང་བ་དང་། བློ་གྲོས་ཀྱི་ཁྱོན་དོག་པས་ཚུལ་འདི་ལ་ཐོས་བསམ་གྱི་ལྟ་རྟོག་གང་ཡང་བྱེད་མ་མྱོང་བས་ངེས་ཁུངས་འདྲོངས་པའི་རྒྱུ་མཚན་བསྙེངས་ཐག་ཆོད་པ་འབུལ་མ་སྤོབས་ཀྱང་བསླབ་སྟོན་གྱེན་ལྡོག་མ་སྤོབས་པའི་སྤྱི་བརྟོལ་གྱིས་ཞུ་གསོལ་བ་ཆོས་དབྱིངས་མཆོག་ནས་ཁྲེལ་བ་མི་མངའ་བ་མཁྱེན་མཁྱེན་ལགས།