བུང་བ་བཅུད་འཐུང་གི་སྐོར་ལ་མི་དབང་ཆེན་པོའི་བཀའ་དྲིའི་ལན།
༈ བུང་བ་བཅུད་འཐུང་གི་སྐོར་ལ་མི་དབང་ཆེན་པོའི་བཀའ་དྲིའི་ལན་དུ་ཕུལ་བ། ལགས། བུང་བ་བཅུད་འཐུང་གི་ཐོག་མར་འགུགས་པ་དང་མདུན་དུ་འཁོད་པའི་བར་སྔར་ལྟར་ལགས། ས་བོན་འགོད་ལུགས་གནས་གསུམ་བྱིན་བརླབ་ཀྱི་ཧཱུྃ་ཡིག་བསྒོམ་པ་སྙིང་གི་ཕྱི་བྲང་གི་ནང་རོལ་དུ་བསྒོམ་པ་དང་། འདིའི་སྙིང་གི་པདྨ་འདབ་མ་བརྒྱད་པ་ནི་རྣམ་ཤེས་ཚོགས་བརྒྱད་ཀྱི་རྟེན་སྙིང་གའི་རྩ་འདབ་བརྒྱད་པོ་ཡིན་ཞིང་། ཁམས་དྲུག་དང་སྦྱར་ན་པདྨའི་རྣམ་པ་ནི་ས་ཆུའི་དྭངས་མ། སྔགས་ཕྲེང་དྭངས་ཤིང་འོད་འབར་བ་མེ་རླུང་། དྭངས་མའི་ཐིག་ལེ་ས་བོན་དང་བཅས་པ་ནི་སེམས་དང་ནམ་མཁའ་སྟེ། རིམ་པ་བཞིན་ལུས་ངག་ཡིད་གསུམ་གྱི་འཆར་གཞི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོ་ཡིན་ལ། འདི་ས་བོན་དངོས་སུ་མ་བཤད་ཀྱང་། གཏེར་གསར་གྱི་ས་བོན་ༀ་འབྱུང་བའང་ལྷ་ཐམས་ཅད་ཀྱི་གནས་སྲོག་ཨ་ཡིན་ཞིང་། དེ་ལ་ཐིག་ལེས་བརྒྱན་པ་ཞིག་འདིར་ཡང་གནང་ཆོག་ཅིང་། སྔགས་ཕྲེང་འདིར་མི་གསལ་བས་མི་དགོས་ཤིང་། དེ་བཞིན་དབྱངས་བཅུ་དྲུག་ཀྱང་འདིར་མ་བཤད་པས་མི་དགོས་ལགས། འདིར་བསྒྲུབ་བྱའི་ལུས་ངག་ཡིད་གསུམ་གྱི་དྭངས་མའི་བཅུད་དབང་དུ་འདུས་པས་བསྒྲུབ་བྱ་དབང་དུ་འདུ་བར་འགྱུར་ཏེ། ཁྱབ་བྱེད་དྭངས་མ་གསུམ་དབང་དུ་འདུས་པས་ཁྱབ་བྱ་རགས་པའི་སྒོ་གསུམ་ཉེར་སྤྱོད་དང་བཅས་པ་དབང་དུ་འདུ་བར་འགྱུར་རོ། །ཞེས་མེ་བྱི་རྒྱལ་ཟླའི་ཉེར་ལྔའི་ཉིན་འཇམ་མགོན་མི་དབང་སངས་རྒྱས་རྒྱ་མཚོའི་བཀའ་ལན་དུ་གནང་བ་ལས་བཤུས་སོ། །མེ་བྱ་ཞེས་པའང་འདུག །མཆན།