གསེར་ཟངས་པ་འགྱུར་མེད་ཀློང་གྲོལ་གྱི་དྲི་ལན།
༈ གསེར་ཟངས་པ་འགྱུར་མེད་ཀློང་གྲོལ་གྱི་དྲི་ལན། དད་ནོར་གྱི་དབང་ཕྱུག་འགྱུར་མེད་ཀློང་གྲོལ་པའི་གསུང་བྲིས་མ་བུ་ཞིབ་འཁོད་ཁ་བཏགས་དངུལ་སྲང་གསུམ་གུར་གུམ་བཟང་པོའི་ཕུར་མའི་རྟེན་དང་བཅས་རྒྱ་མ་ཉམས་པར་འཕྲོད་པས་སྤྲོ་བ་འཕེལ། ཉིད་ལམ་བར་དུ་བསྐྱོད་པ་བདེ་ཞིང་སྔར་གྱི་འབྲེལ་ཅན་རྣམས་དང་འཕྲད་མཇལ་སོགས་མཐུན་པར་འཇུག་པས་གཞན་ཡིད་བསྲུང་བ་ཙམ་ལས་རིང་པོར་སྲེད་ཞེན་ཨ་མ་འཐས་པར་དབེན་པའི་རི་ངོགས་སུ་སྒོ་གསུམ་དམ་པའི་ཆོས་བཞིན་སྤྱོད་པའི་སྒྲུབ་ཚུགས་ཀྱི་རྣམ་ཐར་བཟང་པོར་བཟུང་བ་ཤིན་ཏུ་ལེགས་ཤིང་རྗེས་སུ་ཡི་རངས། སྐབས་དེར། རང་བཞིན་གཉུག་མ་ཆོས་ཉིད་ཀྱི་ངང་དུ་ཡིད་འདྲེས། སེམས་ཀྱི་འཆར་སྒོ་དད་པ་དང་སྙིང་རྗེ་སྒྱུ་མ་ལྟ་བུར་ཤར། འདོད་ཡོན་ལ་ཞེན་པའི་འཆིང་བ་ལྷོད་པོར་གྲོལ་བས་དུག་བདུད་རྩིའི་བཅུད་དུ་ལོངས། ལས་སྣང་གི་འཆར་སྒོ་ཐམས་ཅད་ཆུ་དང་ཆུ་རླབས་བཞིན་རང་སར་གྲོལ་བ་སོགས་དགེ་སྦྱོར་ལ་བོགས་འཐོན་པ་དེ་བཞིན་བྱུང་སྣང་ཡང་མེ་དང་དུ་བ་རྟེན་འབྲེལ་གྱི་ཚོགས་པ་གཅིག་པ་བཞིན་རྨི་ལམ་གྱི་འཁྲུལ་ངོ་ཡིད་དུ་མི་འོང་བར་ཤར་བས་རྐྱེན་བྱས་རྣམ་རྟོག་ཐ་མལ་དུ་ཤོར་བའི་རང་གཟུགས་ཀྱིས་དད་པ་དང་སྙིང་རྗེ་འགྲིབ། བཟོད་མེད་ཀྱི་སྡུག་བསྔལ་འཁོར་མོས་དགེ་སྦྱོར་ལམ་དུ་མི་འགྲོ་བ་དེ་བཞིན་བྱུང་སྣང་བ། རྨི་ལམ་གྱི་འཕྲུལ་ངོ་ལ་གཏད་སོ་ཅི་ཡོད། མདང་རྙེད་པའི་ཟས་ནོར་དེ་རིང་སྤྱོད་རྒྱུར་མཆིས་སམ། མཚོན་ཆས་སྣད་པའི་རྨ་དེ་རིང་གསོ་རྒྱུ་ཨེ་མཆིས་འདི་བདེན་པར་བཟུང་ན་བདེན་མེད་ཀྱི་དཔེ་གང་ལ་འཆོལ་དེས་ན་དགེ་སྦྱོར་རྐྱེན་དང་བསྲེ་བ་གལ་ཆེ། གཡེངས་རྐྱེན་མེད་པའི་དུས་སྲིད་པ་དཀའ་མོར་གདའ། བདེ་སྡུག་ལ་སོགས་པ་རྐྱེན་གང་ཤར་དེ་ཀའི་རང་ངོ་ལ་ཆེར་གྱིས་བལྟས་པས་འདི་ཞེས་གྲུབ་པ་མེད་པའི་སེམས་ངོ་བོ་ངོས་བཟུང་དང་བྲལ་བ་ཧྲིག་གེ་བ་ཞིག་འཆར། དེའི་རང་ངོ་བསྐྱངས་པས་མ་ཡེངས་པ་དེ་ཀ་ཆོས་ཡིན། དེ་ཡང་སེམས་སྒོམ་དུ་སོང་ན་སེམས་གང་ཡོད་ན་སྒོམ་ཡོད། སྒོམ་ཞེས་མིང་དུ་བཏགས་ཀྱང་སེམས་མ་ཡེངས་པ་ཙམ་ལས་གཞན་དུ་མེད། རྐྱེན་སྣང་ཐམས་ཅད་རང་ངོ་རང་ཤེས་འཛིན་མེད་དུ་སྣ་བསྐྱངས་པས་བོགས་འཐོན་པ་ཡིན་མོད། དེས་ན་སེམས་ཙབ་ཙུབ་ཀྱི་རེ་དོགས་མ་མང་བར་རང་སར་ལྷོད་ཀྱིས་ཞོག་དང་བདེ་བའི་རྐང་ཚུགས་པར་འགྱུར་ཡང་། རྐྱེན་ངན་གྱི་རྣམ་རྟོག་དེ་ངོས་ཟིན་པས་བར་ཆད་དངོས་གྲུབ་གྱི་ལམ་དུ་ལོངས་པར་གསོལ་འདེབས་དང་རང་སྐྱོན་མཚང་འདྲུའི་དགེ་སྦྱོར་ལ་འབད་རྩོལ་མཛད་འདུག་པ་ངེད་ལ་རྒྱུད་བྱིན་གྱིས་རློབས་པའི་ནུས་པ་མེད་མོད། འོན་ཀྱང་གང་ལ་མོས་པ་ཡིད་ཆེས་པ། །དེ་ཡི་མདུན་ན་ཐུབ་པ་གནས། །ཞེས་པ་བཞིན་ངེད་རང་དཔོན་སློབ་དམ་ཚིག་ལ་སེལ་མེད་པས་བྱིན་རླབས་ཀྱི་འཇུག་སྒོའི་རྣམ་པ་རྨི་ལམ་དུ་བཀའ་བསྒོ་བྱས་པ་དེ་བར་ཆད་སེལ་བའི་རྟགས་དང་། བུམ་པ་ནས་ཞལ་བཤལ་བའི་ཆུས་ཁྲུས་བྱས་པ་སྡིག་སྒྲིབ་བྱང་བ་དང་། ངེད་ཁྱུང་དུ་བྱས་ནས་སྤྱི་བོ་ནས་བཟུང་ལུས་ཐམས་ཅད་འཇིབས་ཤིང་འཇིགས་སྐྲག་གི་ཟིལ་ཆེན་པོ་སྐྱེས་པ་དེ་ལས་རླུང་དབུ་མར་འཇུག་པའི་ལྟས་མཚན་དུ་གོ་བ་དང་། ཁྱད་པར་རང་གི་བླ་མས་རྡོ་རྗེ་དྲིལ་བུ་དང་བུམ་པ་བཅུད་ལྡན་གཏད་ཅིང་བྱིན་རླབས་བྱས་པ་སོགས་ནི་དཔོན་སློབ་ཀྱི་འབྲེལ་བྱས་ལོ་དོན་མེད་དུ་མ་སོང་བའི་ལྟས་མཚན་ཡིན་ཚུལ་ཁུངས་ལྡན་གྱི་ཡི་གེ་ལས་བཤད་འདུག་གོ །དེ་རྗེས་བྲག་ལྡན་གཟིམས་ཕུག་ཏུ་བསྙུན་བབས་ལྕི་བ་བྱུང་འདུག་ཀྱང་སྔར་གྱི་དགེ་སྦྱོར་གྱིས་ལས་ངན་བག་ལ་ཉལ་དུ་གནས་པ་དེ་ལྷོངས་པའང་ཡིན་མཆི། འོན་ཀྱང་དགེ་སྦྱོར་གྱི་དྲན་པ་ཡེངས་མེད་དང་འཕྲལ་གྱི་འཚོ་སྐྱོང་སོགས་ཉེ་བར་ལེན་པའི་རྐྱེན་གྱིས་དེང་སང་བདེ་བར་སོར་ཆུད་ཡོད་འདུག་པ་ལེགས། འོན་ཀྱང་ན་ཚ་ལ་སོགས་པ་རྐྱེན་གང་ཤར་དེ་ཀའི་སྟེང་དུ་ཡེངས་མེད་ཀྱི་དྲན་པ་བསྟེན་པས་ན་ཟུག་གི་རྣམ་པ་མ་འགགས་ཀྱང་སེམས་སྡུག་བསྔལ་གྱི་ཚོར་བ་དང་བྲལ་བའི་དགེ་སྦྱོར་དུ་འཆར། དེ་གོམས་ནས་ཟུག་གཟེར་བདེ་བའི་རྩལ་སྣང་དུ་འཆར་བ་ཡང་བཤད་འདུག །འོན་ཀྱང་ཤིག་ནད་ཀྱི་རྣམ་པ་བྱུང་བ་དེ་ལ་འགྲོ་ཀུན་ཕ་མར་ཤེས་པའི་སྙིང་རྗེ་བྱང་སེམས་ཀྱི་རྩལ་སྦྱོང་དང་། ངོ་བོ་སྟོང་ཉིད་དུ་ཤེས་པའི་བོགས་འདོན་བྱས་པས་སངས་འགྲོ། གཉན་ཁྲོད་དུ་གཅོད་ཀྱི་ལམ་ཁྱེར་གྱིས་བོགས་འཐོན་པ་འདུག་ན་དེ་བཞིན་མཛད་ཆོག །འོན་ཀྱང་བརྟན་པ་མ་ཐོབ་ཀྱི་བར་དུ་ཉེས་དམིགས་ཀྱི་མཐའ་བསྲུང་བར་བཤད་འདུག་པས་སྐབས་དང་སྦྱོར། སྔར་དམ་བཅའ་མཛད་པ་རྣམས་དགེ་སྦྱོར་གྱིས་གྲོགས་སུ་གང་འགྲོ་བསྟེན་པ་ལས་ཐམས་ཅད་མ་འགྲུབ་ཀྱང་སྐྱོན་མེད་ཅིང་། བཤགས་པ་མཛད་པ་བཞིན་འདུན་པ་གཏོད་པ་ཡིན། དེས་ན་ཐུགས་རྗེ་ཆེན་པོའི་གྲོལ་ལམ་རྡོ་རྗེ་གསུམ་གྱི་རྣལ་འབྱོར་ལ་ཆིག་དྲིལ་དུ་མཛད་པ་ཉིད་ཀྱིས་ཁྱབ་ཅིང་། ཐུགས་རྡོ་རྗེ་དང་ཉིན་མོའི་རྣལ་འབྱོར་གྱི་སྐབས་སུ་སྟོང་ཉིད་ལ་མཉམ་པར་བཞག་དུས་ཀྱི་རིག་པའི་ངོ་བོ་རྟག་ཆད་ཀྱི་མཐར་མ་ལྷུངས་པའི་ངོ་བོ་གསལ་རིག་སྤྲོས་པ་དང་བྲལ་བ་དེ་ཀ་ཨ་ཏིའི་ལམ་ཁྱེར་གྱི་ངོ་བོ་ཡིན་པས་དེ་གཉིས་ཟུང་འབྲེལ་དུ་འགྱུར་བས་ཐུགས་རྗེ་ཆེན་པོའི་རྣལ་འབྱོར་ཁོ་ན་ལ་ཆིག་དྲིལ་དུ་མཛད་པས་ཁྱབ། དེས་ན་བླང་དོར་ལ་ཞེན་པ་བྲལ་བའི་ངང་ནས་བླང་དོར་ཚུལ་བཞིན་དུ་བྱས་པས་བདེན་གཉིས་ཡ་མ་བྲལ་བའི་ལྟ་བས་གཞི་བཟུང་། ཚོགས་གཉིས་ཀྱི་སྤྱོད་པས་བོགས་བཏོན། གནས་ལུགས་ཀྱི་རྩལ་སྣང་རྟེན་འབྲེལ་དུ་ཤར་བའི་སྒོམ་པ་ལྷུན་གྲུབ་ཏུ་བྱུང་བས་དོན་གཉིས་ཀྱི་འབྲས་བུ་འགྲུབ་པར་ངེས་པས་དལ་འབྱོར་དོན་ལྡན་དུ་མཛད་པ་ལ་གཡེལ་བ་མེད་པ་གལ་ཆེ། འདི་ལོ་ཟླ་བ་བཅུ་གཅིག་པ་ལ་ངོས་འཕྲད་བཞེད་སྦྱར་མཛད་ཆོག །ཆོས་སྐྱོང་གི་གཏོར་འབུལ་དེ་ཀ་བཞིན་མཛད་པས་ཁྱབ། རྒྱུན་དུ་གཏོར་མ་གསར་པ་མ་འབྱོར་ན་མཐེབ་ཀྱུ་སྦྲན་པས་ཁྱབ། དེ་ཡང་མ་འབྱོར་ན་རྩམ་ཚུགས་ཀྱིས་ཡོང་། རྒྱུན་དུ་ཚོགས་འཁོར་རང་གི་ཟས་དང་སྦྲེལ་ནས་མཛད་པས་དམིགས་སུ་འགྱུར་བ་ཡོང་། དེ་ལྟར་དགེ་སྦྱོར་གྱི་དྲན་པ་ཡེངས་མེད་ཀྱི་ངང་ནས་འཕྲལ་རྐྱེན་སེལ་ཕྱིར་མཁའ་འགྲོ་ཆོས་སྐྱོང་ལ་གཏོར་འབུལ་ཚོགས་མཆོད། ལན་ཆགས་ཀྱི་འབྱུང་པོ་ལ་གཏོར་མ་གཏོང་། སྨན་བཅོས་ཀྱི་འཚོ་སྐྱོང་དགོས་པ་ཡང་གནས་སྐབས་དང་བསྟུན་དགོས་པ་ཐུགས་ལ་ཞོག །དོན་ཧྲིལ་གྱིས་དྲིལ་ན། ད་ནི་རྣལ་འབྱོར་པ་ཡིན་པས་གནས་སྐབས་ཀྱི་འཚོ་ཆས་ཁོ་ནས་མི་ཆོག །ལྟ་བ་མཐོ་དགོས། སྤྱོད་པ་ཞིབ་དགོས། རྟོགས་པ་ཞིབ་དགོས། རྐྱེན་དང་བསྲེ་དགོས། རང་ངོ་ཤེས་དགོས། མཉམ་ཉིད་དུ་སྐྱོང་དགོས། ལྷོད་དེ། ཤིག་གེ་ཡེངས་མེད་དུ་སྐྱོངས། གང་ཤར་ཡེངས་མེད་དུ་སྐྱོངས་ཤིག །འདི་ནས་ཀྱང་དུས་གནས་ཀུན་ཏུ་རྡོ་རྗེའི་སློབ་བུ་དམ་ཚིག་དང་དད་པ་ལ་ཟོལ་ཟོག་མེད་པ་འགྱུར་མེད་ཀློང་གྲོལ་སེམས་ཀྱི་ཡུལ་དུ་བརྗེད་པ་མེད་པའི་སྐྱབས་འཇུག་དང་དམིགས་འདུན་བྱེད་པ་ཡིན། དེ་ལས་རིང་མིན་དུ་འཕྲད་ནས་ཞིབ་པར་གླེང་སྤྲོ་བ་ཡིན། ཞེས་བསྲུང་མདུད་དམ་རྫས་ལེ་ཚན་དང་། ངེད་རང་གི་གྱོན་འཕྲོའི་པུས་འཁྱུད་གཅིག་གི་དྲིལ་ཚས་ལ་རྒྱས་བཏབ་པ་ཚེས་དགེ་བར་སྤེལ།