རྣམ་སྤྲུལ་རིན་པོ་ཆེའི་དྲི་ལན།
༈ རྣམ་སྤྲུལ་རིན་པོ་ཆེའི་དྲི་ལན་དུ། རྣམ་འདྲེན་མཆོག་སྤྲུལ་དམ་པའི་ཞབས་དྲུང་དུ། གུས་པས་ཞུ་བ། གསང་གསུམ་ལྷ་སྔགས་ཆོས་ཉིད་ཀྱི་རོལ་པ་ལས་གཡོ་བ་མེད་པའི་ས་མ་དྷིར་འབྱམས་སུ་ཀླས་པའི་ཡེ་ཤེས་ཀྱི་སྣང་བས་སྣོད་བཅུད་དག་པའི་འཁོར་ལོར་སད་པ་ནས་ཕྱག་བྲིས་ལྷ་རྫས་ཀྱི་གནང་རྟེན་བཟང་པོ་བཅས་སྩལ་བ་ཕེབས་པས་དངོས་མཇལ་གདུང་སེལ་གྱི་བཀའ་དྲིན་དུ་ཆེ། ངོས་ཅག་ཀྱང་ཁམས་བབས་སྙོམས་མུས་ནས་ཆོས་ལྟར་བཏགས་པའི་རྣམ་གཡེང་ཟིན་མེད་ཟ་ཟིའི་སྨིག་རྒྱུ་ལ་སྤྱོད་བཞིན་པ་ལགས། ཉེ་ལམ་གུ་རུ་ཕྱི་སྒྲུབ་ཀྱི་བཅད་རྒྱར་བཞུགས་པ་བཀའ་དྲིན་ཆེ་འདུག་ཅིང་། དྲག་པོ་གསང་སྒྲུབ་ལ་ཕྱག་ལེན་མི་འདྲ་བའི་རྣམ་དབྱེ་ཙམ་འདུག་རུང་། ཕྱི་སྒྲུབ་ལ་མི་མཐུན་པའི་གནས་དཀའ་བ་རང་ཡང་མི་འདུག་པ་དང་། གསང་སྒྲུབ་ཀྱི་ཕྱག་བཞེས་སྤྲུལ་སྐུ་སྣ་ཚོགས་རང་གྲོལ་གྱིས་རིག་འཛིན་ཆེན་པོའི་ཞལ་ལུང་གི་དོན་ལྟར་སྙན་བརྒྱུད་གསུང་རྒྱུན་དུ་ཇི་ལྟར་ཡོད་པ་སྔ་སོར་རྡོ་རྗེ་བྲག་ཞབས་དྲུང་རིན་པོ་ཆེའི་གསུང་གིས་བསྐུལ་ངོར་བྲིས་པ་འདིས་གཞིའི་ཁོག་ཕུབས་པ་ཡོད་གཤིས་ཕུལ་བ་དང་། ཕྱི་སྒྲུབ་རང་ལ་རྐྱང་པར་འཇུག་སྐབས། ཐོག་མར་མཚམས་ལ་འཇུག་སྐབས་ཀྱི་དུས་དང་ཡོ་བྱད་འདུ་བྱ་བ་མཚམས་གཅོད་པ་དང་བསྲུང་འཁོར་བསྒོམ་པ་སོགས་གསང་སྒྲུབ་བསྙེན་ཡིག་ཏུ་བཀོད་པ་ལྟར་དང་། ཁྱད་པར་གྱི་བཅའ་གཞི་ནི། འདི་ལ་བསྙེན་པ་དང་དངོས་མདུན་བསྐྱེད་ལ་བལྟོས་པ་མིན་ཡང་། གཏོར་གདན་དང་དངོས་གྲུབ་ཀྱི་ལྷའི་རྟེན་ཙམ་དུ། སྟེགས་བུ་གྲུ་བཞི་པའི་ཁར་རྡུལ་ཚོན་ནམ་རས་བྲིས་ཀྱི་པདྨ་འདབ་མ་བརྒྱད་པ་བྲི། དེའི་སྟེང་དུ་མཉྫི་ལ་སྒྲུབ་གཏོར་དང་དེའི་མཐའི་གཡས་གཡོན་དུ་ཆོས་སྐྱོང་སྤྱི་དང་བྱེ་བྲག་གི་གཏོར་མ་སྨན་དང་རཀྟ། མདུན་དུ་ཉེར་སྤྱོད་ལྔ་སོགས་མཆོད་པ་བཤམས་པའི་རྒྱབ་ཏུ་བྲིས་སྐུ་བཀྲམ་པ་སོགས་ཡིད་མཐུན་བག་དྲོ་བར་བྱས་ལ། གཞི་བདག་ལ་གཏོར་མ་བཏང་ནས་ཕྲིན་ལས་བཅོལ་བགེགས་གཏོར་བཏང་ནས་བསྐྲད། སྒོ་དྲུང་དུ་མཐོ་རྩིགས་ལ་མངའ་གསོལ། དེ་ནས་སྒྲུབ་པའི་སྟན་ལ་འཁོད་ནས་མཚམས་གཅོད་ཀྱི་བསྲུང་འཁོར་བསྒོམ། ལས་བྱང་བཞིན་སྐྱབས་སེམས་ཡན་ལག་བདུན་པ་རྣམས་ཚིག་བཤར་ཙམ་མིན་པ་ལན་གསུམ་གྱི་ཉུང་མཐའ་བྱས་པ་རེ་ནན་ཏན་དུ་བྱ། དངོས་གཞི་རང་རིག་སྐད་ཅིག་གིས་ཧཱུཾ་དུ་བསྒོམ། དེ་ལས་ཡེ་ཤེས་ཀྱི་མེ་འབར་བས་རང་ལུས་སྣོད་བཅུད་སོགས་ཀུན་རྫོབ་རྣམ་ཤེས་ཀྱིས་བསྡུས་པའི་ཆོས་ཐམས་ཅད་བསྲེགས་ཤིང་སྦྱངས་ནས་སྟོང་ཉིད་སྤྲོས་བྲལ་གྱི་ངང་ལ་འཇོག་པ་དེ་བཞིན་ཉིད་ཀྱི་ཏིང་ངེ་འཛིན་ཡིན། དེ་ལས་འགྲོ་དྲུག་གི་སེམས་ཅན་ཐམས་ཅད་ལ་ཚད་མེད་པའི་སྙིང་རྗེ་བྱང་སེམས་ཚད་མེད་བཞི་ལྡན་བསྒོམ་པ་ཀུན་སྣང་གི་ཏིང་ངེ་འཛིན། སྟོང་ཉིད་སྙིང་རྗེ་དབྱེར་མེད་ཀྱི་རིག་པ་ཧཱུཾ་དཀར་པོར་བསྒོམ་པ་རྒྱུའི་ཏིང་ངེ་འཛིན། དེ་ལས་འོད་ཟེར་འཕྲོས་པས་རང་བཞིན་ལྷུན་གྲུབ་ཀྱི་གཞལ་ཡས་ཁང་དྭངས་གསལ་སྒྲིབ་མེད་ཀྱི་དབུས་སུ་ཐེམས་མེད་ཡིག་ཆུང་ལས་བཤད་པའི་པདྨ་འདབ་སྟོང་གེ་སར་ཟི་ཕོལ་དང་བཅས་པའི་དབུས་སུ་ལྷ་གནས་ཀྱི་པདྨ་འདབ་བཞིའི་ལྟེ་བར་དར་ཁྲི་པདྨ་ཉི་ཟླའི་སྟེང་དུ་རྒྱུའི་རིག་པ་ཧཱུྃ་ཡིག་ལས་རང་ཉིད་ཕྱི་སྒྲུབ་ཀྱི་སྐུར་བསྐྱེད་པའི་གནས་ལྔར་ཡིག་ཆུང་ལས་བྱུང་བའི་གུ་རུ་རིགས་ལྔ་སོ་སོའི་ས་བོན་དང་བཅས་པ་བསྐྱེད། རང་གི་ཕྱོགས་བཞིར་མཁའ་འགྲོ་རིགས་བཞི་དཀྱུས་བཞིན་དང་། ཐུགས་ཀའི་སློབ་དཔོན་གྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་གསེར་གྱི་རྡོ་རྗེ་རྩེ་དགུ་པ་སྦུབས་སྟོང་གི་དབུས་སུ་ཉི་ཟླའི་སྟེང་དུ་ཧཱུཾ་དཀར་པོ། དེའི་མཐའ་སྐོར་དུ་བཟླ་བྱའི་སྔགས་འབྲུས་བསྐོར་ཏེ་རང་སྒྲ་དང་བཅས་འཁོར་བར་བསམ། དེ་ནས་སྙིང་གའི་ཧཱུཾ་ལས་འོད་ཟེར་འཕྲོས་པས་ལྷོ་ནུབ་པདྨ་འོད་ཀྱི་གཞལ་ཡས་ནས་རང་འདྲའི་ཡེ་ཤེས་པ་པདྨ་འབྱུང་གནས་འཁོར་མཁའ་འགྲོའི་ཚོགས་དང་བཅས་པ་མདུན་གྱི་ནམ་མཁར་སྤྱན་དྲངས་པར་བསམ་ལ། ཨོ་རྒྱན་ཡུལ་གྱི་ནུབ་བྱང་མཚམས༔སོགས་ཚིག་བདུན་གསོལ་འདེབས་ཀྱིས་སྤྱན་དྲངས་ཏེ་ནམ་མཁར་བཞུགས་པ་ལ་མཆོད་པ་རྒྱས་བསྡུས་ཅི་རིགས་པ་དང་། མ་བཅོས་སྤྲོས་བྲལ་ཤོ་ལོ་ཀ་གཅིག་གིས་བསྟོད་པ་དང་། དེ་ནས་ཛཿཧཱུྃ་བྃ་ཧོ༔ཞེས་མདུན་གྱི་ལྷ་ཚོགས་རང་ལ་གཉིས་སུ་མེད་པར་བསྟིམས་ནས་རང་ཉིད་རྟེན་དང་བརྟེན་པར་བཅས་པ་སྤྱི་དང་ཁྱད་པར་གཙོ་བོའི་རྣམ་པ་གསལ་བ་དང་རང་ཉིད་པདྨ་འབྱུང་གནས་དངོས་ཡིན་སྙམ་པའི་ང་རྒྱལ་ཤུགས་དྲག་ཏུ་བསྒོམ་པ་ལ་ཅི་གནས་སུ་མཉམ་པར་བཞག་ནས་བཟླས་པ་ལ་འཇུག་ཅིང་། དེའི་ཚེ་ཐུགས་ཀའི་ས་བོན་སྔགས་ཕྲེང་གི་མཐར་ཨཱ་ལི་ཐབས་ཀྱི་རང་བཞིན་འོད་ཟེར་དཀར་པོ་གཡས་བསྐོར། ཀཱ་ལི་ཤེས་རབ་ཀྱི་རང་བཞིན་འོད་ཟེར་དམར་པོ་གཡོན་བསྐོར། དེའི་ཕྱིར་ཡིག་བརྒྱ་དང་རྟེན་འབྲེལ་སྙིང་པོའི་རང་བཞིན་ཅན་གྱི་འོད་ཟེར་སྣ་ལྔའི་གུར་གྱིས་བསྐོར་བར་བསམ་ནས། གཙོ་བོར་ཧཱུཾ་དང་བཟླ་བྱའི་སྔགས་ཕྲེང་ཁོ་ན་ལ་སེམས་རྩེ་གཅིག་ཏུ་གཏད་ནས། དེ་ལས་འོད་ཟེར་འཕྲོས་པས་ལུས་ཐམས་ཅད་ཡེ་ཤེས་རྣམ་ལྔའི་འོད་ཟེར་གྱིས་གང་བར་བསམ་ཞིང་། ཡང་ས་བོན་སྔགས་ཕྲེང་དང་བཅས་པ་ལས་འོད་ཟེར་ཁ་དོག་སྣ་ཚོགས་པ་འཕྲོས་པས་ཕྲིན་ལས་རྣམ་པ་བཞི་བསྒྲུབ་པ་རྩེ་གཅིག་ཏུ་དམིགས་ནས་བཟླས་པ་བྱ་ཞིང་། བཟླས་པ་འཇོག་པ་ན་དབྱངས་གསལ་གྱི་མཐར་གྲུབ་པར་གྱུར་ཅིག་སྭཱ་ཧཱ་ཞེས་བཏགས་པ་ལན་གསུམ་རེ་བཟླ། ཐུན་བསྡུ་བ་ན་ཐུགས་ཀའི་ཧཱུཾ་ལས་འོད་ཟེར་འཕྲོས་སྣོད་བཅུད་གཞལ་ཡས་ཁང་ལ་ཐིམ། དེ་མཁའ་འགྲོ་བཞི་ལ། དེ་རང་ལ། རང་གི་གནས་ལྔའི་ལྷ་དང་བཅས་པ་ཡང་ཐུགས་ཀའི་སློབ་དཔོན་ལ། དེ་ཏིང་ངེ་འཛིན་སེམས་དཔའི་རྡོ་རྗེ་ལ། དེ་སྔགས་ཕྲེང་ལ། སྔགས་ཕྲེང་ས་བོན་གྱི་ཧཱུྃ་ལ། ཧཱུྃ་ནཱ་དའི་བར་དུ་བསྡུས་ནས་རྟག་མཐའ་བསལ། སླར་ཡང་ཆུ་ལས་ཆུ་བུར་བརྡོལ་བ་ལྟར་སློབ་དཔོན་གཙོ་རྐྱང་གི་སྐུར་ལངས་ནས་ཆད་མཐའ་བསལ། དགེ་བ་བསྔོ་ཞིང་ཐུན་མཚམས་ལ་འཇུག །ཚུལ་དེ་ལྟ་བུས་ཐོ་རེངས་ནས་ནམ་ལངས་བར་ཐོར་ཐུན། ཞོགས་པ་ནས་ཉིན་ཕྱེད་ཡན་སྔ་ཐུན། གསོལ་ཚིགས་རྗེས་ནས་ཉི་ནུབ་བར་དགོང་ཐུན། ས་སྲོད་ནས་སྲོད་ཕྱེད་ཡོལ་བར་སྲོད་ཐུན་ཏེ་ཐུན་བཞི་མ་དང་། ཡང་ཐུན་གཉིས་མ་བྱེད་ན་ཐོ་རེངས་ནས་ཉི་ཕྱེད་ཡན་ལ་སྔ་ཐུན། ཕྱེད་ཡོལ་ནས་སྲོད་ཀྱི་མཐའ་ཡན་ལ་ཕྱི་ཐུན་གྱི་ཐ་སྙད་བྱེད་ཅིང་། དེ་ཡང་དམིགས་པ་གསལ་ཐེབས་པ་དང་ཐུན་མཚམས་ཀྱི་དགེ་སྦྱོར་བཟའ་བཏུང་སོགས་སྐབས་ཕྱེེད་པར་འདོད་ན་ཐུན་བཞི་མ་དང་། སྔགས་འགྲོ་ཆེ་བ་གཙོ་བོར་བྱེད་ན་ཐུན་གཉིས་མ་བྱེད་པར་བཤད་ཅིང་། འདིར་ནི་ཐུན་བཞི་མ་འཇུག་པ་བདེ་བར་བྱེད་ཀྱི་ཡོད། སྔར་གྱི་ཕྱག་ལེན་ཐུན་གཉིས་མ་གནང་བ་ཤས་ཆེ། གང་ལྟར་ཐུན་བཞི་མ་གནང་ན། ཐོར་ཐུན་གྱི་རྗེས་སུ་ཞོགས་པའི་ཐུགས་དམ་གཏོར་མ་དང་ལྗགས་བཟླས་ཆག་མེད་གནང་དགོས་གཞན་རྣམས་གནང་། དེ་རྗེས་བཞེས་ཐུག་ལ་ལོངས་སྤྱོད་པ་སོགས་ཚར་ནས་སྔ་ཐུན་ལ་འཇུག །སྔ་ཐུན་གྱི་རྗེས་སུ་ཉིན་མོའི་གསོལ་ཚིགས་དང་། བསླབ་སྟོན་བརྒྱུད་འཕེན་སོགས་གནང་། དེ་རྗེས་དགོང་ཐུན་གྲོལ་རྗེས་ཡིག་ཆུང་ལྟར། ཐུན་བར་ཚོགས་དང་གཏོར་མ་བྱ། ཞེས་གསུངས་པས། ཡི་དམ་ཆོས་སྐྱོང་གི་གཏོར་འབུལ་རྣམས་དང་ཚོགས་འཁོར་གནང་ན་སྐབས་འདིར་གནང་། ཡང་མི་གནང་ཡང་གཏོར་བསྔོ་རྣམས་གནང་རྗེས་དགོང་མོའི་བཞེས་ཐུག་སོགས་གཡེང་བ་སྤྱད། དེ་རྗེས་སྲོད་ཐུན་གནང་ངོས་ཆད་མཐའ་བསལ་བའི་ལྷ་སྐུའི་ཐུགས་ཀའི་ཧཱུྃ་ལ་སེམས་བཟུང་ནས་ཉལ་བའི་རྣལ་འབྱོར་ལ་འཇུག་ཅིང་། དེ་ལས་ནངས་པར་ལྡང་བའི་རྣལ་འབྱོར་ལ་འཇུག་པ་སོགས་གསང་སྒྲུབ་བསྙེན་ཡིག་ལྟར་དང་། དེ་ཡང་མཚམས་ལ་ཐོག་མར་ཞུགས་པའི་ཉིན་དགོང་ཐུན་ནས་མགོ་བཟུང་སྲོད་ཐུན་ཡན་དང་། འགྲོལ་རྒྱུའི་ཉིན་ཐོར་ཐུན་དང་སྔ་ཐུན་གཉིས་མཛད་ཚུལ་དེ་ལྟ་བུས་སང་འགྲོལ་རྒྱུའི་དགོང་ཐུན་ནས་བཟུང་མདུན་གྱི་སྒྲུབ་གཏོར་ཡང་ལྷར་བསྐྱེད། བདག་གི་ཐུགས་ཀའི་འོད་ཟེར་མཆོད་པའི་ཚུལ་དུ་སྤྲོས། གཏོར་མའི་ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་དངོས་གྲུབ་ཐམས་ཅད་སྐུ་དང་ཡིག་འབྲུ་ཕྱག་མཚན་འོད་ཟེར་དཀར་དམར་མཐིང་གསུམ་ལ་སོགས་པའི་རྣམ་པར་ཐིམ་པའི་དངོས་གྲུབ་ཐོབ་པར་བསམ་ནས་བཟླས་པ་བྱ་ཞིང་ཐུན་མཚམས་སོ་སོར་ཚོགས་ལ་སོགས་པ་ཅི་འགྲུབ་དང་། ཁྱད་པར་གྲོལ་རྒྱུའི་སྔ་ཐུན་དེ་ལ་ཚོགས་འཁོར་མེད་དུ་མི་རུང་བས་རྒྱས་པར་བྱ་ཞིང་། དངོས་གྲུབ་ལེན་པ་གསང་སྒྲུབ་བསྙེན་ཡིག་བཞིན་བྱ། དེ་ལྟ་བུའི་རིམ་པས་གྲངས་བསྙེན་འབུམ་ཚོར་གསུངས་ཀྱང་ཁ་སྐོང་ཁྲི་ཚོ་མེད་ཐབས་མེད། དུས་བསྙེན་བདུན་ཕྲག་གསུམ། མཚན་མའི་བསྙེན་པ་ནི་དུས་ཚོད་མ་ངེས། འགའ་ཞིག་ལ་སྔ་མོ་ནས་ཡོང་བའང་ཡོད། འགའ་ཞིག་ལ་ཡུན་རིང་འགོར་བའང་ཡོད། རྟགས་ནི་བརྡ་རྟགས་སོགས་ལས་འབྱུང་ཞིང་། ཡང་བཟླས་པའི་ཚེ་རླུང་གི་ཉམས་ལེན་ཡོད་ན་ངག་བཟླས་ཀྱི་གོང་དུ་རླུང་ཁ་སྦྱོར་དུ་བཟུང་ནས་ཡིད་བཟླས་བརྒྱ་རྩ་དང་ཉེར་གཅིག་སོགས་འགྲུབ་ན་ཕན་ཡོན་ཤིན་ཏུ་ཆེ། ཡིག་ཆུང་དུ། ཞག་རེ་དག་ལ་ཐུན་རེ་གྱིས༔ཞེས་གསུངས་ཀྱང་དེ་ལྟ་བུ་འགྲུབ་དཀའ་བས་ཐུན་གཉིས་སམ་བཞི་གང་འོས་དང་། ཐ་མ་ལན་རེ་ཆག་མི་རུང༔ཞེས་པ་ནི། འདི་ལན་གཅིག་བསྙེན་ནས་ཡི་དམ་དུ་བཟུང་ཕྱིན་རྒྱུན་བསྙེན་ཆག་མེད་བྱེད་པའི་དོན་ཡིན་ཞིང་། ནང་སྒྲུབ་གསང་སྒྲུབ་སོང་ནས་ནི་གསང་སྒྲུབ་ཀྱི་རྒྱུན་བསྙེན་མ་ཆག་ན་འདི་ཉིད་ཆག་ཀྱང་སྐྱོན་མི་འབྱུང་གསུང་། གང་ལྟར་བསྒོམ་ཐབས་གསལ་བའི་ཤོག་དྲིལ་ལས། ཡིད་གཉིས་ཐེ་ཚོམ་མེད་པར་སྒྲུབ༔བར་ཆད་བདུད་ནི་ཐེ་ཚོམ་ཡིན༔སྤྱིར་ནི་སྒྲུབ་པ་གང་བྱེད་ཀྱང༔ཐེ་ཚོམ་མེད་ན་འགྲུབ་པར་འགྱུར༔ཞེས་གསུངས་པས་བསྙེན་པ་གང་གནང་གི་ཐུན་གྱི་རིང་སྐུ་མི་གཡོ། གསུང་བཟླས་པའི་རྒྱུན་མི་ཆད་ཅིང་མི་ཚིག་གིས་བར་མ་ཆོད་པས། ཐུགས་ཏིང་ངེ་འཛིན་དང་མི་འབྲལ་བ་ལ་ནན་ཏན་རྩེ་གཅིག་ཏུ་བཀའ་དྲིན་ཆེ་བ་དང་། གཞིའི་ཁོག་འབུབས་གསང་སྒྲུབ་ཀྱི་བསྙེན་ཡིག་འདི་ཁས་ཁོག་ཕུབ་པར་ཡོད་ལགས་པ་དང་། རྩ་བ་ནས་ཐེམས་ཅན་ཕྱི་སྒྲུབ་དང་། ཐེམས་མེད་ཡིག་ཆུང་གཏེར་གཞུང་དངོས་དང་། ཡིག་ཆུང་ལ་བླ་མའི་གསུང་རྒྱུན་ཟིན་རིས་གཅིག་མ་གཏོགས་ཡང་ཡི་གེ་ཟུར་པ་མེད་ཀྱང་། ཐེམས་ཅན་ཐེམས་མེད་ཀྱི་བསྙེན་སྒྲུབ་ལ་དགོས་པའི་ཆོས་ཚན་ཐོར་བུ་རྣམས་ཀྱི་དགོངས་དོན་བླ་མའི་མན་ངག་གི་གསུང་རྒྱུན་བཅས་པ་ནི་དགོངས་དོན་ལས་མི་འདའ་ཞིང་། ཕྱི་སྒྲུབ་ཀྱི་མཐར་སྦྱིན་སྲེག་གནང་ནའང་ལེགས་པ་གཞིར་བཅས་ཀྱང་། ད་ལྟ་གསང་སྒྲུབ་ལ་མ་གཏོགས་མི་གནང་བ་འདུག་ལགས། གོང་ཞུས་རྣམས་རྗེ་གསུང་སྤྲུལ་དང་། རིག་འཛིན་ཕྲིན་ལས་ལྷུན་གྲུབ་གཉིས་ཀར་གསུང་རྒྱུན་ཞུས་ཤིང་བླ་མ་གཉིས་རང་བཞུགས་སྐབས་མཚམས་ཀྱིས་ཀྱང་གཏན་ལ་ཕབ་པས་དོན་འཁྲུལ་མེད་ཡིན་ལགས།