གསེར་ཟངས་པ་འགྱུར་མེད་ཀློང་གྲོལ་གྱི་དྲི་ལན།
༈ གསེར་ཟངས་པ་འགྱུར་མེད་ཀློང་གྲོལ་གྱི་དྲི་ལན། ཁྱེད་ཀྱི་གནས་ཚུལ་ཡིག་ཆུང་དུ་བསྲིངས་པ་འབྱོར། ད་རེས་སྟེས་དབང་གིས་རྙེད་པའི་མི་ལུས་འདི་འདྲ་ཐོབ་དུས་ཆོས་མ་བྱས་ན་དོན་མེད་སྟོང་ལོག་ཏུ་འགྲོ་བས་དམ་པའི་ཆོས་ཀྱིས་དོན་ལྡན་དུ་བསྒྲུབ་དགོས། འཆི་བ་ནམ་ཡོང་མི་ཤེས་པས་སང་བྱ་གནངས་བྱའི་ལེ་ལོས་མི་འདྲིད་པ་གལ་ཆེ། འཁོར་བའི་སྣང་ཚུལ་ལ་བལྟས་ན་བཟོད་མེད་སྡུག་བསྔལ་གྱི་རང་བཞིན་མངོན་སུམ་དུ་གྱུར་པ་འདིར་གདའ། དེ་ལས་ཐར་དགོས། རང་ཐར་བས་མི་ཆོག་གཞན་ཕན་གྱི་བསམ་སྦྱོར་བསྐྱེད་དགོས། དེས་ན་ཚེ་འདིའི་ཞེན་པ་དོར་ནས་ཕྱི་མ་དོན་དུ་གཉེར། འཁོར་བའི་བདེ་བ་ལ་མ་ཞེན་པར་ཐར་པ་དོན་དུ་གཉེར། རང་དོན་གྱི་འཛིན་པ་ཐོང་ནས་གཞན་དོན་གྱི་ཁུར་འཁུར། སྐྱབས་དཀོན་མཆོག་ལ་ཞུས། དག་སྣང་སེམས་ཅན་ལ་སྦྱོངས། རང་རིག་སྤྲོས་པ་དང་བྲལ་བའི་ངོ་བོ་གསལ་ཧྲིག་བརྗོད་ཡུལ་ལས་འདས་པ་དེ་ལས་བླ་མ་གཞན་ན་མི་གདའ། དེའི་ངོ་བོ་ལ་འདུ་འབྲལ་མེད་པས་རང་ངོ་ཤེས་པའི་གསོལ་འདེབས་ལ་རེམས། བྱིན་རླབས་ཕྱི་ནས་འཚོལ་དོན་མེད། ནམ་ཟླ་དྲོས་པའི་ས་ཆུ་བཞིན་ནང་ནས་རྙེད་འོང་། འོན་ཀྱང་དག་སྣང་མོས་པའི་བློ་འདྲིད་དུ་ངོས་འཕྲད་ཀྱི་འདུན་པ་ཡང་ཅིས་ཀྱང་བྱེད་པ་ཡིན་ནོ། །