ལྷ་བུ་སྐུ་སྐྱེའི་དྲི་ལན།
༈ ལྷ་བུ་སྐུ་སྐྱེའི་དྲི་ལན། ལོཀྟྲིའི་བསྙེན་ཐབས་ཀྱི་གཞུང་ངེད་རང་གི་སྒྲུབ་ཐབས་གསར་བཀོད་དེའི་དཔེ་ཕྱག་ཏུ་ཡོད་ཚོད་ཡིན་པ། དེ་ལྟར་ན་མཚམས་སྤྱིའི་ཁོག་འབུབས་གཤིན་རྗེ་གཤེད་དང་གུར་དྲག་གི་བསྙེན་ཡིག་ལྟ་བུས་མཚོན་ཞིང་། འདི་ཁའི་སྒོས་ཆོས་མདུན་དུ་གཏོར་མ་བྲིས་སྐུས་བརྒྱན་པ་དང་མཆོད་པ་རྣམས་བཤམས་ནས། སྐྱབས་སེམས་སྔོན་དུ་བྱས་ལ། རང་ལུས་ཐ་མལ་དྷཱུ་ཏིའི་ནང་། སོགས་ཀྱི་དམིགས་རིམ་དང་སྦྱར་ནས། ཐོག་མར་ཞི་བསྙེན་ཁོ་ན་འབུམ་ཕྲག་གཅིག་དང་ཁྲི་ཕྲག་གཅིག་ཐུན་བཞིའི་རིམ་པས་གྲངས་མ་རྫོགས་བར་དུ་བཟླ་ཞིང་། ཐུན་བསྡུ་བ་ན་ལྷ་འོད་གསལ་དུ་བསྡུས་ནས་སླར་ཡང་ཐུན་མཚམས་ཀྱི་ལྷ་སྐུར་ལྡང་ཞིང་སྨོན་ལམ་གདབ། ཐུན་བཞི་ཀའམ། ཐུན་གཅིག་གི་མཐར་གཏོར་མ་འབུལ་བ་འདི་གའི་ཆོ་ག་བཞིན་དང་། དེ་ལྟར་ཞི་བསྙེན་སོང་ནས་དྲག་སྒྲུབ་ཀྱི་ཁོག་འབུབས་སྔ་མ་ལྟ་བུ་ལས། ཐོག་མར་ཞི་བར་སྔར་བཞིན་བསྒོམས་ནས་ཏྲཾ་དུ་བརྒྱ་རྩ་ཙམ་བཟླས་རྗེས་ཞི་བ་འོད་དུ་ཞུ་བ་ལས་སྐད་ཅིག་གིས་གསེར་གྱི་ཙཀྲ་རྩིབས་བརྒྱད་དབུས་ཞེས་སོགས་ཀྱི་དོན་བཞིན་བསྒོམ་ནས་ཡེ་ཤེས་པ་སྤྱན་འདྲེན་མཆོད་བསྟོད་ཆེ་བ་བསྐྱེད་པ་རྣམས་དཀྱུས་བཞིན་བྱས་ནས། བཟླས་པའི་དམིགས་པ་གསལ་བཏབ་ལ་ༀ་ལོཀྟྲི་པ་ལ་ནནཿཞེས་པ་ནས། ཀཱ་ཝཱ་ཙཱི་རླག་རླག༔ཅེས་པའི་བར་གྱི་རྩ་སྔགས་གྲངས་འབུམ་ཕྲག་གསུམ་དང་ཁྲི་ཕྲག་གསུམ་ཉུང་མཐའ་དང་། དུས་བདུན་གསུམ་ཉུང་མཐའ་དང་། དེ་ལས་མང་བ་གང་འབྱོར་ལས་ཚད་མེད་ཅིང་། དེ་ལྟར་གྲངས་དང་ཞག་གང་ཡིན་ཡང་ཐུན་བཞིའི་རིམ་པས་བཅད་ནས་བཟླ་ཞིང་ཐུན་བསྡུ་བ་དང་ཐུན་མཚམས་ཀྱི་གཏོར་འབུལ་སྔར་དང་འདྲ། སྤུ་གྲིའི་དྲག་སྔགས་དང་། ཐུན་སྔགས་སྤུ་གྲི་རིང་མོ་ནི་གཙོ་བོར་ལས་སྦྱོར་གྱི་བཟླས་པ་ཡིན་པས་རྒྱུན་དུ་བཟླ་མི་དགོས་ཤིང་། འོན་ཀྱང་དམིགས་བསལ་གདོན་བགེགས་ལྟ་བུ་ལ་མངགས་པའི་དབང་དུ་བྱེད་ན། སྔར་གྱི་བསྙེན་སྒྲུབ་ཚར་བའི་རྗེས་སུ་བདུན་ཕྲག་གཅིག་ཙམ་སྒྲུབ་པ་དྲག་སྔགས་བཅས་བཟླས་པའི་ཐུན་རེ་རེའི་གཤམ་དུ། ༀ་ལོཀྟྲི་པཱ་ལ་ནནཿརྦད་ཐུམས་འཇིག་རྟེན་འགོང་པོའི་སྲོག་ཆོད་སྙིང་ཕྱུངས་ཙིཏྟ་མཱ་ར་ཡ་ཐུན་བྷྱོ་རྦད༔ཅེས་པ་ནས་རྦད་ཤག་རྒྱལ་པོའི་སྲོག་ཆོད་སྙིང་ཕྱུངས་ཙིཏྟ་མཱ་ར་ཡ་ཐུན་བྷྱོ་རྦད༔ཅེས་པའི་བར་གྱི་སྤུ་གྲིའི་དྲག་སྔགས་ཉེར་གཅིག་རེ་ཙམ་བཟླ་ཞིང་། རྒྱལ་པོའི་སྲོག་ལ་དུང་དུང་སོགས་ཐུན་སྔགས་རིང་མོ་བདུན་རེ་ཙམ་བཟླ་བ་ལས་མང་བ་མི་དགོས་ཤིང་། སྔགས་ཕྱི་མ་འདི་གཉིས་དམིགས་བསལ་གྱི་གདུལ་བྱ་དང་། རྨི་ལམ་ལ་གདོན་འཚུབ་ཀྱི་རྣམ་པ་གསལ་བ་སོགས་ལ་བཟླ་ཡི། གཞན་དུ་རྒྱུན་བཟླས་ལ་གཙོ་མི་ཆེ། ལས་སྦྱོར་མཆོད་རྟེན་དཀར་ནག་སོགས་དང་འབྲེལ་ན་ནི་འདིས་དཔེར་མི་མཚོན་ནོ། །