མི་དབང་ཆེན་པོའི་དྲི་ལན།
༈ མི་དབང་ཆེན་པོའི་དྲི་ལན། བྱིན་འབེབས་ཀྱི་སྐབས་འདིར་ལུས་གནད་བསྲང་བ། མིག་དར་འཆིང་བ། རྫས་དུད་བདུག་པ། རོལ་མོ་འཁྲོལ་བ། རླུང་འཛིན་པ། དམིགས་རྟེན་ལ་སེམས་བརྟེན་པ་སོགས་ནི་ཤེས་པ་ཡུལ་ལ་འཕྲོ་བའི་དབང་ཤེས་འགག་པས་དེར་འཛིན་གྱི་རྟོག་པ་འགག་པས་རྣམ་པར་མི་རྟོག་པའི་ཡེ་ཤེས་ཤུགས་འབྱུང་དུ་སྐྱེ་བར་བྱེད་པའི་དགོས་པ་ཡིན་གསུངས་བར་འདུག་ལགས། བྱིན་འབེབས་ཀྱི་རྫས་འདི་ལ་རྒྱུད་དང་སྒྲུབ་ཐབས་དབང་ཆོག་སོ་སོ་ལས་ནང་གསེས་མི་འདྲ་བ་རེ་གཉིས་སྣང་ཡང་། གསང་སྔགས་བླ་མེད་ལ་སྤྱིར་ཐུན་མོང་དུ་འཇུག་པ་ནི་ཕྱག་ལེན་ལྟར་ན་སྐྱེས་བུ་གཙང་མའི་བྱང་སེམས་དཀར་པོ། བུད་མེད་རིགས་བཟང་གི་བྱང་སེམས་དམར་པོ། སྔགས་པ་ནུས་ལྡན་ནམ། དགེ་སློང་གཙང་མའམ། སྐྱེས་པ་གཞོན་ནུ་གཙང་མ་ལྟ་བུའི་དྲི་ཆེན་དང་དྲི་ཆུ། མི་ནད་རིམས་ངན་པས་ཤི་བ་ལྟ་བུ་མ་ཡིན་པའི་ཀླད་པ་ཤ་ཆེན་གྱི་དྭངས་མ་ཡིན་པས་དེ་ལྔ་ལ་བདུད་རྩི་ལྔ་ཞེས་རྩ་བའི་རྫས་དང་། བྱི་ལ་ནག་པོ་སྟེ་ཞི་མི་ནག་པོའི་བྲུན། རའི་རྐང་ལག་གི་ཉ་བཞིའི་ཤ །སྒྲུབ་པ་པོའི་སྐྲ་དང་སེན་མོ་ཕྲན་བུ། གུ་གུལ་དང་བཅས་པ་རྣམས། དེང་སང་ཕྱག་ལེན་ལ་གོང་གི་རྫས་རྣམས་སྣེ་འཛོམ་ཙམ་བྱས་ནས་དྲི་ཤུགས་བསྐྱེད་པའི་ཕྱིར། ག་པུར། ཛ་ཏི་གུརྒུམ་རྣམས་ཕྲན་བུ་རེ་དང་། ཙནྡ་དཀར་དམར། ཨ་ཀ་རུ། ཁྱད་པར་སྟོད་ཀྱི་ཨར་ནག་དང་། ན་གི་རྣམས་གང་མང་། དེ་ཐམས་ཅད་ལས་འཕར་བའི་གུ་གུལ་བོངས་བསྐྱེད་པ་རྣམས་སྦྱར་བ་ཕྱེ་མ་རིལ་བུ་གང་བྱེད་ཀྱང་བྱིན་གྱིས་བརླབས་པའི་ནང་མཆོད་ཀྱིས་ཁ་ཕྲུ་ཅུང་ཟད་བཏབ། བྱིན་འབེབས་ཀྱི་སྔགས་སྒྲུབ་པ་ཡུན་བསྲིངས་པའམ་མ་མཐའ་བརྒྱ་རྩ་ཙམ་བཟླས་ནས། བྱིན་འབེབས་ཀྱི་སྐབས་ཡི་དྭགས་ཀྱི་མེ་ཞེས་རོ་སོལ་གྱི་མེའམ། མ་འབྱོར་ན་སོལ་མེ་གང་རུང་ལ་བསྲེགས་པའི་དུད་པ་དབང་གྲལ་ལ་སྤོས་བསྐོར་བྱེད་པ་ཡིན་ཞིང་། རྫས་སྒྲུབ་པ་ཚར་བའི་ཕབས་རྒྱུན་འདི་བཞིན་ལགས།