ཉང་པོ་གྲུ་གྲྭ་ཚང་གི་སློབ་དཔོན་པའི་དྲི་ལན་དུ།
༈ ཉང་པོ་གྲུ་གྲྭ་ཚང་གི་སློབ་དཔོན་པའི་དྲི་ལན་དུ། ཕྱི་ནང་གསང་བའི་ཕོ་ཉ་མཆོག་འབྲིང་ཐ་མ་གསུམ་གྱི་རྣམ་གཞག་འདི་ནི་བདེ་མཆོག་སོགས་མ་རྒྱུད་ཀྱི་ཆོས་སྐད་ཁྱད་པར་བའི་རྐང་ལྟ་བུ་ཡིན་པས་རྒྱུད་འགྲེལ་དང་སྒྲུབ་ཐབས་ཀྱི་རྣམ་བཤད་མཁས་པ་རྣམས་ཀྱིས་མཛད་པའི་བསྟན་བཅོས་ལས་མཁྱེན་དགོས་ཤིང་། ངོ་བོ་གསང་བའི་ཕོ་ཉ་ནི། རང་སེམས་གསལ་སྟོང་ཟུང་འཇུག་ཕྱི་ནང་གི་ཕོ་ཉ་ལ་སོགས་པ་བརྟན་གཡོ་འཁོར་འདས་ཀྱི་ཆོས་ཐམས་ཅད་ཀྱི་གནས་ལུགས་བརྗོད་པའི་མཐའ་ལས་འདས་པ་དེ་ཁོ་ན་ཡིན་པ་ཁྱོད་རང་གསུངས་པ་ལྟར་ཡིན་འདྲ་བ་ཚར་ཆེན་ཆོས་རྗེས། ཁྱོད་ནི་སེམས་ཉིད་སྟོང་པའི་རང་རྩལ་ཏེ། །རྡོ་རྗེའི་གྲོང་ན་ཨེ་ཡིག་ཝཾ་གྱི་དངོས། །ཞེས་པས་ཚིག་གིས་སེམས་ཉིད་གསལ་སྟོང་ཐབས་ཤེས་ཨེ་ཝཾ་ཟུང་འཇུག་གི་སྒྲས་མཚོན་པ་དང་། དེ་ལྟ་བུའི་ཆོས་ཉིད་ཁྱབ་བྱེད་དེ་ཕྱི་ནང་གི་ཕོ་ཉ་མཆོག་འབྲིང་ཐ་མའི་ཁྱབ་བྱ་རང་བཞིན་ལྷུན་གྲུབ་ཏུ་བཞུགས་པའི་ཕྱིར་དེ་དང་དེ་ལ་ལྟོས་པས་མཆོག་འབྲིང་གི་དབྱེ་བས་མཚོན་པར་ནུས་ཤིང་། གསང་བའི་ཕོ་ཉ་དེའི་གནས་ལུགས་ལྷན་ཅིག་སྐྱེས་པའི་ཕོ་ཉ་མོའི་འདུ་བ་ལ་བརྟེན་ནས་དག་པའི་ཡེ་ཤེས་མངོན་དུ་བྱེད་པའི་ཚུལ་ཏེ། དེ་ཡང་སྔགས་སྐྱེས་ལྷན་ཅིག་སྐྱེས་པའི་རྣལ་འབྱོར་ལ་བརྟེན་པའི་སྔགས་ཀྱི་སྤྱོད་པ་དེས། ཕྱིའི་གནས་ཡུལ་དེར་རྒྱུས་པས་དེའི་ཕོ་ཉ་མོའི་འདུ་བ་ཐོབ་པའི་རྐྱེན་དང་ནང་ལུས་གནས་ཉེར་བཞིའམ་སུམ་ཅུ་སོ་བདུན་སྔགས་ཀྱི་སྐུར་གྱུར་པ་ན་རིམ་བཞིན་ཐུན་མོང་དང་རིག་པ་འཛིན་པའི་གོ་འཕང་རྣམས་ཐོབ་པར་སྣང་ངོ་། །