དར་རྩེ་མདོ་པ་ཚངས་དབྱངས་ཕྲིན་ལས་ཀྱི་ལན་དུ།
༈ གྲྭ་ཚང་ཆེན་མོའི་གྲྭ་པ་དར་རྩེ་མདོ་པ་ཚངས་དབྱངས་ཕྲིན་ལས་ཀྱི་ལན་དུ། ཇི་ལྟར་ཕེབས་བཞིན་འཇམ་དཀར་གྱི་ལྗགས་བསྙེན་གནང་རྒྱུ་ཤིན་ཏུ་ལེགས་འདུག་ཅིང་། སྒྲུབ་ཐབས་འདི་ཉིད་མདོ་རྒྱས་འཚམས་ཤིང་ཞལ་གསལ་བ་འདུག་པས་མི་དགོངས་པའི་དཀའ་གནད་ཆེར་མི་སྣང་བས་ཞུ་འོས་མ་མཆིས་ཀྱང་། སྤྱིར་འདི་ཉིད་བྱ་རྒྱུད་ཀྱི་དབང་དུ་བྱས་པས་གཙང་སྦྲ་ལ་གནས་པ་གཞིར་བྱས་ནས། བཅའ་གཞི་ནི་མདུན་དུ་སྟེགས་བུ་ཁེབས་ལྡན་གྱི་ཁར་འབྲས་དཀར་སིལ་མ་བཀྲམ། ཐུན་མཚམས་སུ་འབུལ་རྒྱུའི་གཏོར་མ་དཀར་གསུམ་མངར་གསུམ་ལ་ཞིབ་དང་མར་དཀར་སྦྱར་བའི་རྒྱུ་ལས་མཆོད་གཏོར་དཀར་ཟླུམ་དེང་སང་གཏོར་ཅོག་ཏུ་གྲགས་པ་མཐེབ་ཀྱུ་བཞིས་བསྐོར་བ་རིན་པོ་ཆེའི་སྣོད་དུ་བཞག་པ་བཀོད། དེའི་མདུན་དུ་གཡོན་ནས་བརྩམས་ཏེ་ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྔ་བྲེང་ཚར་དུ་བཤམས། གནས་ཁང་རང་དབང་འདུས་ན་དེ་དང་ཁ་སྤྲོད་ཀྱི་གདན་འོག་ཏུ་ཀུ་ཤ་བཀྲམ་པ་དང་། མདུན་དུ་དྲིལ་བུའམ་ཏིང་ཤག་ལྟ་བུའི་རོལ་མོ་དང་མཎྜལ་མེ་ཏོག་དང་བཅས་པའང་བཤམས། མཚམས་ལ་འཇུག་ཁར་གཞི་བདག་ལ་དཀར་གཏོར་བཏང་ནས་བར་ཆད་མི་འབྱུང་བའི་ཕྲིན་བཅོལ་དང་བགེགས་ལ་གཏོར་མ་བཏང་ནས་ཕྱིར་བསྐྲད། འདི་སྐབས་གཞུང་ན་གསལ་ཁ་མེད་ཀྱང་ཡི་དམ་གཤིན་རྗེ་གཤེད་ལྟ་བུའི་རིགས་མཐུན་གྱི་ཁྲོ་བོའི་ང་རྒྱལ་ལ་གནས་པར་མཛད་ནས་སྲུང་བའི་འཁོར་ལོ་ཡང་བསྒོམ། དེ་ནས་ཉམས་ལེན་དངོས་གཞི་ཐོ་རེངས། སྔ་དྲོ། དགོང་དྲོ། སྲོད་དེ་ཐུན་བཞིར་བྱེད། མཚམས་ལ་ཐོག་མར་འཇུག་སྐབས་དྲི་བཟང་གི་ཆུས་ལུས་རིལ་པོའམ་ཁ་ལག་ཙམ་འཁྲུ་བ་དང་། རྒྱུད་སྡེ་འོག་མ་ནས་ཉེ་རེག་ཅེས་ཁྲུས་ཀྱི་བྱ་བ་བྱེད་ཚུལ་ཁྱད་པར་བ་གསུངས་ཀྱང་འདིར་མི་མཛད་པ་འདུག །དེས་ན་ཐུན་སོ་སོའི་ཐོག་མར་བཙུན་པའི་ཆབ་ལེན་ལྟ་བུའི་ཕྱི་ཁྲུས་དང་། སེམས་དུག་གསུམ་གྱི་རྣམ་རྟོག་སྤངས་པའི་ནང་ཁྲུས་ཀྱིས་དག་པར་བྱས་ནས་སྐྱབས་འགྲོ་ནི། དེང་སང་ཡོངས་གྲགས་ཀྱི་ཆོས་སྤྱོད་ཀྱི་འགོར་ཡོད་པའི་བདག་དང་འགྲོ་བ་སོགས་ནས། བླ་མ་སངས་རྒྱས་ཆོས་དགེ་འདུན་བཞི་ལ་དམིགས་པའི་ཕྱིར་བཞི་སྐོར་གྱི་ཐ་སྙད་མཛད། བསྒྲུབ་བྱའི་ལྷ་ནི་སངས་རྒྱས་ཀྱི་ཁོངས་སུ་འདུ་བ་དང་། ཡང་ཇོ་བོ་རྗེས་མཛད་པའི་སངས་རྒྱས་ཆོས་ཚོགས་མ་འདིར་ཡང་སྐྱབས་སེམས་ཐམས་ཅད་འདུས་ཤིང་ཚིག་ཉུང་བ་དང་བྱིན་རླབས་ཆེ་བ་འདིས་ཀྱང་ཆོག །སེམས་བསྐྱེད་དང་ཡུལ་མཆོག་ལ་ཚོགས་བསོག་རྒྱུན་བཤགས། དམན་པ་ལ་ཚོགས་བསོག་ཚད་མེད་བཞི་ནི་འདི་ཁར་ས་ཁོངས་སུ་གནང་འདུག་པ་སྤྱིས་ཁོག་ཕུབས་པ་དེར་འདུག །དེ་ནས་དངོས་གཞི་སྟོང་ཉིད་དུ་སྦྱང་བ་སོགས་ནས་སྙིང་གའི་འཁོར་ལོ་ཡིག་འབྲུ་བསྒོམ་པའི་བར་ནི་དཀྱུས་བཞིན་ལས་ཁྱད་པར་སྙིང་རྩེ་མོ་གྱེན་བསྟན་པདྨ་འདབ་བརྒྱད་ཁ་འབུས་ཀྱི་རྣམ་པར་ཁ་བྱེ་བའི་དབུས་སུ་འཁོར་ལོ་དཀར་པོ་རྩིབས་དྲུག་པ་རྩེ་མོ་རྣོ་བ་ལེབ་ཆགས་གདན་ཐབས་སུ་གནས་པའི་ལྟེ་བར་ཟླ་བའི་དཀྱིལ་འཁོར་གྱི་དབུས་སུ་ཨ་དང་རྩིབས་དྲུག་ལ་མདུན་ནས་གཡས་བསྐོར་གྱིས་ཡི་གེ་དྲུག་ལངས་ཐབས་སུ་རེག་ལ་མ་འབྱར་བར་གནས་པ་དེ་ཡང་འཁོར་ལོ་གཡས་བསྐོར་དང་ཡིག་འབྲུ་གཡོན་དུ་འཁོར་བའི་རྐྱེན་གྱིས་འོད་ཟེར་དཀར་དམར་དུ་འཕྲོས་པས་མི་ཤེས་རྨོངས་པའི་སྡིག་སྒྲིབ་བག་ཆགས་དང་བཅས་པ་སངས་སངས་དག་པར་བསམ་པ་ཉིད་དམིགས་པའི་རྐང་ཡིན་པ་དང་། འཁོར་ལོ་དང་ཡིག་འབྲུ་བསྣོལ་མར་འཁོར་དགོས་པས་འཁོར་ལོ་གདན་ཐབས་ལ་འཁྲུལ་སོ་མེད། དེས་ན་ལྷ་སྐུ་སྙིང་གའི་འཁོར་ལོ་འོད་ཟེར་དང་བཅས་པ་འདི་ཁོ་ན་ལ་སེམས་གསལ་སྣང་གང་ཐོན་ཉིད་གཞིར་བྱས་ནས། དེ་ལྟ་བུའི་ཏིང་ངེ་འཛིན་དང་མ་བྲལ་བའི་ངང་ནས་བཟླས་པ་ལ་འཇུག་སྟེ། ཕྲེང་བ་ནི་བོ་དྷི་ཙེ་ལྟ་བུ་དང་། བཟླས་པའི་སྐབས་གཡལ། སྦྲིད་པ། འོག་རླུང་ཤོར་བ་སོགས་ལ་སྔགས་གྲངས་བསྐྱར་ལྡབ་ཀྱང་མཛད་དགོས་ཤིང་། གང་ལྟར་ཡང་ཐུན་བཞིའི་མཆོད་པ་བྱིན་རླབས་ཀྱི་ཐུན་གསུམ་གྱི་མཐར། མཆོད་ཡོན་དང་ཉེར་སྤྱོད་ཀྱིས་བདག་ལ་མཆོད་ཅིང་། ཐུན་མཚམས་ཐ་མ་ལྟ་བུའི་གང་འོས་གཅིག་ལ་བདག་བསྐྱེད་ཀྱི་ལྷ་མདུན་གྱི་ནམ་མཁར་ཕྱེ་བ་རང་ཉིད་ལ་ཞལ་ཚུར་གཟིགས་སུ་བཞུགས་པ་ལ་བཤམས་པའི་མཆོད་པ་རྣམས་རྣམ་འཇོམས་སམ་རྣམ་རྒྱལ་མ་ལྟ་བུའི་ཆོ་གས་བྱིན་གྱིས་བརླབས་ནས་ཆུ་གཉིས་ཉེར་སྤྱོད་རོལ་མོར་བཅས་པས་མཆོད། མཎྜལ་ཚོམ་བུ་བདུན་མ་བཀོད། འཛམ་བུའི་གླིང་དང་གླིང་གཞན་རྣམས། །ཞེས་པའམ་ས་གཞི་སྤོས་ཀྱིས་བྱུགས་པས་ཕུལ་ཡང་རུང་། མཚན་བརྗོད་འདོན་པ་སྐབས་འདིར་མི་ལྕོགས་པས་བསྙེན་རྒྱབ་ལྟ་བུའི་གཞན་འདོན་མི་ཡོད་ན་བསག་ཏུ་གཞུག་པ་ལས་འོས་མེད། དེ་ནས་བསྟོད་པ་གང་འོས་ཀྱི་རྗེས་སུ་གཏོར་མ་ཡང་སྔར་བཞིན་བྱིན་གྱིས་བརླབས་པ་སརྦ་ཏ་ཐཱ་ག་ཏ་ཨཱཪྱ་མཉྫུ་ཤྲཱི་ཨེ་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི་གསུམ་མམ་བདུན་གྱིས་ཕུལ། སླར་ཡང་མཆོད་བསྟོད་བསྡུས་པ་ཞིག་བྱས་ནས་འདོད་དོན་ལ་གསོལ་བ་གདབ། ཡིག་བརྒྱས་ལྷག་ཆད་འགེང་བ་དང་ནོངས་པ་བཤགས། ཡེ་ཤེས་པ་གཤེགས་ཤིང་དམ་ཚིག་པའི་ང་རྒྱལ་དུ་གནས་པས་གནས་གསུམ་དུ་འབྲུ་གསུམ་གནས་པས་ལུས་བསྲུང་། སྤྱིར་མ་ཏིའི་གཞུང་ན་བདག་བསྐྱེད་ལ་ཡེ་ཤེས་པ་སྤྱན་འདྲེན་མེད་པས། ལྷ་མདུན་དུ་དབྱེ་བ་མི་དགོས་པའི་ཕྱོགས་ཀྱང་འདུག །དེས་ན་མཆོད་པ་རྣམས་བདག་སྐྱེད་ལ་འབུལ་བ་ཡིན། འཛམ་བུ་གླིང་ཞེས་པའི་མཎྜལ་འདི་ཡང་། རིན་ཆེན་བདུན་ཀ་འབུལ་བའི་དབང་དུ་བྱས་ཀྱི། ཚིག་འདི་ཁ་གནང་ན་རིན་ཆེན་བདུན་ཀ་ལ་རིགས་འགྲེ་དགོས་ཤིང་། བསྡུ་ན། རིན་ཆེན་བདུན་གྱིས་ཡོངས་བཀང་སྟེ། །ཞེས་བསྒྱུར་ན་འཐད། བདག་བསྐྱེད་ལ་མཆོད་པ་འབུལ་བ་ཉིད་ལག་ལེན་དུ་སྣང་ན། གཏོར་འབུལ་ངེས་པར་དགོས་པ་མ་ཡིན་ཡང་། ཐུན་གང་རུང་ཞིག་གི་མཐར་གཏོར་མ་སྔར་བཞིན་བྱིན་གྱིས་བརླབས་པ་གཏོར་མགྲོན་གློ་བུར་དུ་མདུན་གྱི་ནམ་མཁར་སྤྱན་དྲངས་པར་ཕུལ་ལ་མཆོད་བསྟོད་འདོད་དོན་ཡང་གསོལ་ནས་རང་བཞིན་གྱི་གནས་སུ་གཤེགས་སུ་གསོལ། ཐུན་མཚམས་ཐམས་ཅད་དུ་འཕགས་པ་འཇམ་དཔལ་གྱི་སྐུ་བརྙན་ལྷར་བསྒོམ་པ་ལ་ཕྱག་མཆོད་བསྟོད་པ་དང་། མཚན་བརྗོད་ཀྱང་ཀློག་འདོན་ཐུབ་ན་རང་ངམ་གཞན་བསྐུལ་བས་གང་འཐོན་མཛད། བཟླས་པའི་གྲངས་ཚད་སོགས་ནི་རྩོད་དུས་ཀྱི་རྒྱལ་བ་གཉིས་པའི་གསུང་འདི་ཁར་ཤིན་ཏུ་གསལ་ཆ་ཆེ་བ་འདུག་པ་དགོངས་པས་ཞིབ་དཔྱོད་གནང་བ་ཞུ།