བློ་བཟང་ལྷུན་གྲུབ་ཀྱི་ལན་དུ།
༈ གྲྭ་ཚང་ཆེན་མོའི་གྲྭ་པ་བློ་བཟང་ལྷུན་གྲུབ་ཀྱི་ལན་དུ། ངག་བྱིན་རླབས་ནི། རྒྱུན་གྱི་དགེ་སྦྱོར་གྱི་རིགས་ལ་ངག་གི་ནུས་སྟོབས་བསྐྱེད་པའི་ཆེད་དུ་བླ་མ་དགོངས་འདུས་ནས་གསུངས་པའི་བཟླས་བརྗོད་ནུས་པ་སྟོབས་འབྱིན་སོགས་མཛད་སྲོལ་འདུག་ཀྱང་། བསྙེན་པར་ཆིག་དྲིལ་འདི་རིགས་ལ། རྩ་བའི་ལྷ་གང་ཡིན་དེའི་བསྐྱེད་རིམ་ལ་གསལ་སྣང་ང་རྒྱལ་བཟུང་བ་ཉིད་ཀྱིས་ངག་བྱིན་རླབས་ཚང་བའི་ཕྱིར་གཞན་ནས་སྦྱོར་མི་དགོས། ཕྲེང་བ་ནི་འདི་ཉིད་གཤིན་རྗེའི་གཤེད་ཀྱི་རིགས་ཡིན་ཕྱིར་རཀྴ་ལྟ་བུ་འོས་ཤིང་། བྱིན་བརླབ་ནི། རྡོར་ཐལ་ཁ་གྱེན་དུ་ཕྱེ་བའི་སྙིམ་པར་ཕྲེང་བ་བཟུང་ནས། བསངས་སྦྱངས་སྟོང་པའི་ངང་ལས་ཕེཾ་ནག་པོ་ཡོངས་སུ་གྱུར་པ་ལས་རིག་པའི་རྒྱལ་པོ་ནཱ་ག་རཀྴའི་སྐུར་གྱུར། དེའི་སྤྱི་བོར་ༀ། མགྲིན་པར་ཨཱཿསྙིང་གར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས་ཛཿཧཱུྃ་བྃ་ཧོཿཞེས་བསྟིམ། དེ་འོད་དུ་ཞུ་བ་ལས་བགྲང་ཕྲེང་དུ་བསམ་སྟེ། ༀ་རུ་ཙི་ར་མ་ཎི་པྲ་ཝརྡྷ་ཡེ་ཧཱུྃ་ཕཊ་ཅེས་པ་བདུན་བཟླས་ནས་ཕུས་འདེབས། སླར་ཡང་དབྱངས་གསལ་ལན་གསུམ་བརྗོད་ནས་བཟླས་པ་ལ་འཇུག །ཐུན་མཚམས་སུ་གཞན་དུ་འགྲོ་འདུག་བྱེད་དགོས་པ་བྱུང་ན་ཕྲེང་བ་སྟན་གྱི་ཁར་བཞག་པ་སྐད་ཅིག་གིས་ལྷར་བསྐྱེད། དེ་ལས་རང་ཉིད་ལྷ་སྐུ་གཉིས་པར་ཕྱེ་ནས་སྤྱོད་ལམ་གང་བྱེད་ལ་འཇུག་པ་ཡིན་ནོ། །