བློ་བཟང་བཟོད་པའི་དོགས་སེལ།
༈ ཐུ་བཙུན་བློ་བཟང་བཟོད་པའི་དོགས་སེལ་ལན་དུ། ཟབ་རྒྱ་བཅུ་གཅིག་པའི་ནང་ཚན་འཁོར་ལོ་ལྔའི་བུམ་ཅན་འཛིན་ཚུལ། རླུང་གི་རྣལ་འབྱོར་ལ་བརྟན་པ་ཐོབ་པ་རྣམས་ཀྱིས་ཇི་ལྟར་བསྒོམས་ཀྱང་རུང་མོད། ལས་དང་པོ་པས་ནི། དེ་ལྟར་བྱས་ན་གེགས་ལྡང་བས། ཐོག་མར་ལྟེ་བའི་བུམ་ཅན་ཉི་ཤུ་ཙམ་སོང་ནས་སྙིང་གའི་བུམ་ཅན་གཅིག་གཉིས་ཙམ་བྱེད་ཅིང་། དེ་ཡང་ལྟེ་བའི་བུམ་ཅན་དེ་ཉིད་སྙིང་གར་དྲངས། སླར་ལྟེ་བར་ཕབ་ནས་གཏོང་། མགྲིན་པ་དང་སྤྱི་བོ་སོགས་ལ་ལྟེ་བའི་བུམ་ཅན་ཡར་མི་འདྲེན་ཡང་། རླུང་གཏོང་ཁར་བུམ་ཅན་ལྟེ་བར་འབེབས་དགོས་ཤིང་། རླུང་གཅུང་གཅོད་ཅེས་འདུག །མཆན། འཁྱིམས་ཀྱིས་དོགས་ན་སྙིང་གི་བུམ་ཅན་གྱི་མཐར་རོ་སྟོད་གཅུ་ཞིང་ཧ་འདོན་གྱིས་འབུད། མགྲིན་པའི་མཐར་ཁ་བཙུམ་ནས་མགྲིན་པའི་རླུང་དྲངས་ཏེ་འབུད། སྤྱི་བོའི་མཐར་སྣ་བཀག་ནས་ཐོད་པའི་རླུང་དྲངས་ཏེ་འབུད་པ་སོགས་དགོས་ཤིང་། གཞུང་གི་འདར་དང་འཁོར་བ་འབིགས་པ་ཡི༔རྟགས་གསུམ་བྱུང་ནས་དམིགས་པ་བསྒྱུར༔ཞེས་པས། རླུང་གནས་དེ་རྣམས་སུ་སྟོབས་འབར་བས་ལུས་འདར་བ་དང་། མགོ་འཁོར་བ་དང་། ནད་དམིགས་ཕུབ་པ་ལྟར་གཟེར་བ་རྣམས་བྱུང་ན། དེ་ནས་བསྒོམ་འཕྲོ་གཤོལ་ལ། འཁོར་ལོ་གཞན་རྣམས་སུ་བསྒོམ་པ་ལ་ཁམས་ཀྱིས་ལྕོགས་ཚོད་དུ་བསྒྱུར་དགོས་པའི་དོན་ཡིན་པས་ཚུལ་དེ་ལྟར་རིམ་བཞིན་ཉམས་ལེན་མཛད་པ་ལས་གོམས་པ་ཇེ་ཐོབ་ཇེ་བརྟན་དུ་འགྱུར་ངེས་པའོ། །