ས་བྱི་ཆབ་མདོར་ཕུལ་བ།
༈ ས་བྱི་ཆབ་མདོར་ཕུལ་བ། ལགས། ཤེས་བྱ་ལྐོག་གྱུར་ཐིངས་པ་ནི་འཕགས་ཆེན་རྣམས་ཀྱི་སྤྱོད་ཡུལ་ཡིན་གཤིས་ཞུ་སྤོབས་མ་མཆིས་མོད། འོན་ཀྱང་མཆོག་བསླུ་མེད་ཀྱི་ཐུགས་རྗེ་གདུལ་བྱ་མོས་པའི་གསོལ་འདེབས་ཀྱི་རྗེས་སུ་འཇུག་པ་ཁོ་ན་ཡིད་གདེངས་སུ་བཅས་ནས་མཆོད་འབུལ་གསོལ་འདེབས་དམོད་བོར་ཞུས་པར། དམ་པ་མཆོག་གི་སྐུ་ཚེ་དྲུག་ཅུ་རེ་དྲུག་རེ་བདུན་ལ་ཕྲེང་ཆ་འདུག་པ་སེལ་ཕྱིར་ཚེ་དཔག་མེད་ཀྱི་སྐུ་སྟོང་ཚོ་བཞེངས་པར་རབ་གནས་མཆོད་འབུལ་དང་འབྲེལ་བར་དམ་གཙང་བུ་སློབ་ཀྱིས་ཚེ་ཆོག་དབང་རྒྱུན་ཡོད་པའི་ཚེ་སྒྲུབ་ཟླ་བས་ཉུང་མཐའ་བྱས་པ་དང་། དེ་དང་འབྲེལ་བར་འཆི་སླུའི་ཆོ་ག་གང་མང་དང་ཚེ་གཟུངས་འབུམ་ཚོ་བཅོ་ལྔ། རྗེ་བཙུན་སྒྲོལ་དཀར་གྱི་སྐུ་ཉིན་ཐང་དུ་བཞེངས་ནས་དེའི་ཆོ་ག་དང་འབྲེལ་བར་སྙིང་པོ་འབུམ་ཚོ་བཅོ་ལྔ། རྒྱས་པའི་སྦྱིན་སྲེག་འབུམ་ཚོ་འཁའ་འགྲོ་བསུན་བཟློག་དང་འབྲེལ་བའི་བརྟན་བཞུགས། འཆི་ངེས་སེམས་ཅན་གྱི་སྲོག་བླུ་ཅི་མང་། དབུལ་ཕོངས་ལ་ཟས་གོས་ཀྱིས་མཚོན་ཟང་ཟིང་གི་སྦྱིན་གཏོང་། ཆོས་སྐྱོང་ལ་བསྐང་བ་གསོལ་མཆོད། སྒྲོལ་མ་མཎྜལ་བཞི་པའི་ཆོ་ག་དང་འབྲེལ་བའམ་དེ་མིན་རྗེ་བཙུན་མའི་སྐུ་བྱིན་ཅན་ལ་མཆོད་འབུལ་དང་འབྲེལ་བར་རྗེ་བཙུན་མའི་བསྟོད་པ་འདོད་དོན་གསོལ་འདེབས་དང་བཅས་པ་ཅི་འགྲུབ། བརྒྱད་སྟོང་པ་བརྒྱ་རྩ། ཚེ་མདོ་སྟོང་ཚོ་བཅས་བསག་ཅིང་དམ་སེལ་སོགས་སྐུ་གྲིབ་ལ་ཐུགས་ཟོན་དང་གེགས་སེལ་ལ་དགོངས་གཏད་གནང་བས་བར་ཆད་ཀྱི་འཕྲང་སེལ་ཞིང་། སྐུ་འཕྲང་སྒྲོལ་ནས་བདུན་ཅུའི་བར་ལ་གེགས་ཆུང་ཞིང་ས་གཉན་ཤིང་གཉན་སོགས་ལ་ཐོ་རེག་འཛེམ་ཞིང་། སྐུ་རིམ་སྔ་མ་རྣམས་བསྐྱར་ལྡབ་ཏུ་གནང་བས་དམིགས་སུ་འགྱུར་ཞིང་། དེ་ལས་སྒྲོལ་རྗེས་རེ་ཞིག་རྐྱེན་གེགས་ཡོད་པའི་དམིགས་བསལ་མ་བྱུང་ཡང་སྐུ་ཚེ་སྤེལ་བའི་སྲི་ཞུ་སྐུ་རིམ་དང་ཕྱི་ནང་གི་ཚེ་སྒྲུབ་གང་འོས་རྣམས་ཉམས་བཞེས་ཀྱི་དགོངས་གཏད་ཞབས་བརྟན་གསོལ་འདེབས་འབད་རྩོལ་གནང་བས་ལེགས་ཚོགས་སུ་འགྱུར་བ་དང་། དཔོན་སློབ་ཞི་བ་བཟང་པོའི་སྐུ་ཚེ་ལ་བར་ཆད་གློ་བུར་བ་ཡོད་པ་ད་ལྟ་ནི་མི་གསལ་ཡང་འཆི་ངེས་སེམས་ཅན་གྱི་སྲོག་བླུ་དགུང་གྲངས། ཚེ་སྒྲུབ་གང་འོས་དང་ཚེ་གཟུངས་འབུམ་ཐེར། བརྒྱད་སྟོང་པ་དང་གསེར་འོད་དགུང་གྲངས་བཅས་བསགས་པ་གནང་ན་དམིགས་སུ་འགྲོ་ཞིང་། ཕྱག་མཛོད་དྲུང་རང་གི་སྐུ་ཚེའི་ཆར་འཕྲང་ཞེ་ལྔ་ལ་འཛེར་བས་འཆི་ངེས་སེམས་ཅན་གྱི་སློག་བླུ་དགུང་གྲངས། དབང་དང་ལག་ལེན་ཡོད་པའི་ཆོ་ག་དང་འབྲེལ་བའི་ཚེ་སྒྲུབ་ཚེ་གཟུངས་འབུམ་ཐེར། སྒྲོལ་མ་དཀར་མོའི་ཆོ་ག་དང་འབྲེལ་བའི་སྙིང་པོ་འབུམ་ཚོ་བཅོ་ལྔ། ཁ་འབར་མས་མཚོན་ལན་ཆགས་སྦྱོང་བའི་གཏོར་མ་གང་མང་། བསྐལ་བཟང་ཕལ་ཆེན་སོགས་ཀྱི་གསུང་སྒྲོག་བཅས་གནང་བས་འཕྲང་སེལ་ངོ་དང་། དེ་ལས་སྒྲོལ་ན་ལྔ་བཅུ་ང་གསུམ་གྱི་བར་ལ་ཉེན་གེགས་ཆུང་། སྐབས་དེར་སྔ་མ་རྣམས་བསྐྱར་ལྡབ་དང་། དེ་སྐབས་དམིགས་སུ་འགྲོ་བའི་སྐུ་རིམ་ཅི་རིགས་གནང་བས་རྐྱེན་སེལ་བའི་ངོ་དང་། ལར་རྒྱའི་ཆོས་སྲིད་མངའ་ཐང་གི་ཆར་ད་ལྟའི་དུས་བཞིན་སྤྱི་སྙོམས་ཀྱི་འཛིན་སྐྱོང་གནང་བས་ཉམས་ཆག་འགལ་རྐྱེན་ཆེ་བ་ཡོད་པ་མི་གསལ་ཞིང་། འོན་ཀྱང་རྒྱལ་པོའི་གདོན་བསྐྱེད་ཀྱི་འཚུབ་འཛེར་ཅུང་ཟད་སྣང་བ་སེལ་བྱེད་རྒྱལ་པོར་མདོས་རྫོང་དང་ལན་ཆགས་གཏོར་མ་གང་མང་བརྒྱ་བཞི་གཏོང་། གདུགས་དཀར་གྱི་མདོས་དང་ཁྲོ་རོལ་གྱི་གཏོར་བཟློག །གདུགས་དཀར་དང་ཤེར་སྙིང་གི་བཟློག་པ་འབུམ་ཐེར། བརྒྱད་སྟོང་པ་དང་གསེར་འོད་བཀའ་ཐང་རྣམས་བརྒྱ་རྩ། འབུམ་ཚར་ལྔ། བཀའ་འགྱུར་ཚར་གཅིག་སྒྲོག །སྒྲོལ་མ་དང་མཚན་བརྗོད་འབུམ་ཐེར། བསྟེན་པའི་ལྷ་བསྲུང་ལ་བསྐང་བཤགས། གསོལ་མཆོད་ཕྲིན་བཅོལ་ཡུལ་ལྷར་བསངས་དང་དགྲ་ལྷའི་དཔང་བསྟོད། རྟེན་བྱིན་ཅན་ལ་མཆོད་འབུལ་དང་འབྲེལ་བར་དགེ་འདུན་སྡེར་ལོངས་ཀྱིས་སྨན་བླའི་མདོ་ཆོག་གང་མང་། དབུལ་འཕོངས་ངན་ལོང་ལ་སྦྱིན་གཏོང་བཅས་གནང་བས་དམིགས་སུ་འགྱུར་ཞིང་། ཆོས་སྲིད་ཀྱི་མངའ་ཐང་འཕེལ་རྒྱས་བརྟན་ཅིང་མི་འགྱུར་བའི་ངོ་གསལ་དུ་ཤར་བ། སྤྱིར་ཀུན་རྫོབ་ཀྱི་རྣམ་པ་ཐམས་ཅད་རྟེན་འབྲེལ་གྱི་བསྒྱུར་ཁ་ཕྲ་མོས་ཀྱང་ཕན་གནོད་ཀྱི་འབྲས་བུ་ཆེན་པོར་འགྱུར་བའི་ཕྱིར་ད་ལྟའི་ཆ་གོང་ཞུས་བཞིན་ལགས་པ། སླད་ནས་ཀྱང་ལོ་རེ་བཞིན་གོང་དུ་གསུང་བརྟགས་ཞུ་གནང་གིས་མཚོན། དུས་དང་གནད་དུ་དམིགས་སུ་གང་འགྲོའི་སྐུ་རིམ་སོགས་ལེགས་ཚོགས་གོང་སྤེལ་གྱི་རྟེན་འབྲེལ་སྒྲིག་ཕྱོགས་གཡེལ་བ་མེད་པ་དང་བཞེས་གནང་བ་ཞིག་མཁྱེན་མཁྱེན་ལགས།