ས་གླང་ཆབ་མདོར་ཕུལ་བ།
༈ ས་གླང་ཆབ་མདོར་ཕུལ་བ། ལགས། དོན་འགངས་ཆེ་བ་འདི་རིགས་ལ་མོ་ཆ་རྨི་ལྟས་སོགས་ལ་ཁ་དམར་གདགས་རྒྱུ་ཅི་རིགས་ཡོང་བར་གཞིར་བཅས་ཀྱང་གདེངས་ཁེལ་བློ་ཆོད་ཤིན་ཏུ་དཀའ་བ་ཡིན་འདུག་པས་གནང་བདེའི་གསལ་ཆ་འབུལ་སྤོབས་མ་མཆིས་ཀྱང་། སྐུ་ཞབས་ཉིད་བསྟན་འགྲོ་སྤྱི་དང་བྱེ་བྲག་གི་ཕན་བདེའི་རྩ་བར་བཞུགས་ཤིང་རང་ལ་བཀའ་དྲིན་ཆེ་བའི་མོས་དུངས་ཀྱིས་དཀོན་མཆོག་གསུམ་ལ་དམོད་བོར་གྱི་པྲ་བརྟགས་ནི། ད་དུང་དགུང་གྲངས་རེ་དྲུག་དང་རེ་བདུན་གཉིས་སྐུ་ཚེའི་འཕྲང་དུ་ཤར་བར་སྔ་སོར་རྟེན་གཞིའི་ཐོག་མའང་སྐུ་གེགས་ཀྱི་ལོ་དང་མཚུངས་པར་བྱུང་འདུག་པ། དེར་དམིགས་ཀྱི་སྐུ་རིམ་ཞབས་བརྟན་སོགས་ཡོ་བྱད་འཕང་མེད་ཀྱི་མཆོད་སྦྱིན་རྒྱ་ཆེར་གནང་བ་སོགས་ཀྱིས་སྔར་ཕན་བདེ་དྭངས་རིགས་མ་བྱུང་ཡང་འཚོ་གཞེས་བྱུང་བས་མཚོན། སྐུ་རིམ་རྣམས་ཀྱིས་དམིགས་འགྱུར་ལེགས་ཚོགས་ཆེ་བ་རེ་འདོད་གང་བ་ཞིག་ཡོང་ལ་ཆེ་བ་དེ་བཞིན་གསོལ་འདེབས་སྨོན་པ་ཞུ་བ་ལགས་ཀྱང་། ལར་འབབ་ལོ་ཁོངས་འདི་རང་ཉེན་གེགས་ཆེ་བ་ཞིག་འདུག་པ་འདི་ལ་ལྟོས་བཅས་བསོད་ནམས་སུ་ཞབས་པད་བརྟན་པ་ཙམ་བྱུང་ན་དེ་ནས་རེ་ཞིག་འཚུབ་གསལ་བ་རང་མ་བྱུང་བས་དགའ་རབ་ཡོང་ལ་ཆེ་བ་དང་། གཞི་ནས་ད་རེས་ཀྱི་རྟེན་བབས་དེ་བཞིན་གྲིབ་ངོ་དང་གདོན་ངོ་གཉིས་ཀ་ཆེ་བ་དང་འཕྲལ་རྐྱེན་ནི་གྲིབ་ཅན་ཞིག་གི་བསྲུང་མ་ནོན་པས་གཡེལ་བ་དང་། ཡོ་བྱད་ཀྱི་རྗེས་འབྲང་རྒྱལ་པོས་སྣ་དྲངས་གཟའ་གདོན་མངོན་གྱུར་དེ་བཞིན་ཡིན་འདུག་པ་དང་དེ་རྗེས་བསྐྱར་མ་རྣམས་ཀྱང་རྒྱལ་པོའི་འབྲང་དང་མི་ངོ་གསར་གྱི་རྐྱེན་བྱས་པ་རང་དུ་འདུག་པས། སྐུ་རིམ་འཕྲོད་བཞེས་གནང་བའི་ལོང་ཡོད་པ་བྱུང་འདུག་དགའ་རབ་ཡོང་ལ་ཆེ་ཡང་ལར་ནས་གཟའ་གདོན་གྱིས་ཉེན་པ་འདི་རིགས་རང་བཞིན་གྱི་ལས་སུ་གྲུབ་པ་ཞིག་ཡིན་ན་ནི་བཅོས་ཀྱང་ཕན་པ་མི་འབྱུང་མོད། འཕྲལ་རྐྱེན་ཡིན་ན་འཕོག་མ་ཐག་བཙོན་འཛིན་དང་དེ་རྗེས་མེ་ཆུ་འཕོག་པ་སོགས་ལ་གཞིགས་པའི་རྫས་སྔགས་ཀྱི་བཅོས་ཀ་རྟེན་འབྲེལ་གདོན་འགྲོལ་སོགས་ཀྱིས་མོད་ལ་གདོན་གྱིས་བཏང་བ་ཞིག་བྱུང་ཕྱིན། དེར་བརྟེན་ན་རྐྱེན་མེད་པར་སངས་དྲག་གིས་སླར་ཟོན་སྐྱོར་བསྲུང་བ་ཙམ་ལས་མི་དགོས་པ་ཞིག་ཡོང་གི་འདུག་ཀྱང་། དེ་ལྟར་གདོན་ལས་འཕྲལ་གྲོལ་མ་བྱུང་ན་ནད་གདོན་རྩར་གྲམས་ཉམས་ཀྱིས་ཕྱིས་རིམ་བདེ་ཙམ་ལས་གཞི་མེད་ཐང་ཐུབ་ཅིག་མི་ཡོང་འདུག་པ་ལྟར་ད་ལྟ་ཕན་དྭངས་བསྐྱེད་ཆེར་མ་བྱུང་བ་དེ་བཞིན་བློ་ཁོལ་སེམས་འཛངས་ཆེ་བ་རང་ཞིག་འདུག་པ་ནས། ད་ཆ་སྔགས་པ་ནུས་ལྡན་ཐབས་བཅོས་མཁས་པའི་རིགས་ཀྱང་འཕྲལ་དུ་ཕན་ངོ་ཡོད་པ་དཀའ་བ་བཞིན་བརྟག་པར་ཡང་འདི་ཕན་གྱིས་དམིགས་བྱེད་པ་མ་ཤར་བ་དང་། སྨན་པ་ནི་ད་ལྟ་སྐུ་ལ་བཅར་བཞིན་པ་དེ་ག་ལས་གཞན་འཕྲོད་པའི་ངོ་མ་བྱུང་ཞིང་། དེས་ན་སྐུ་རིམ་གྱིས་ཕན་པ་ཅི་ཡོང་གི་ཐབས་བློས་གསོད་མ་ནུས་གཤིས་རང་བློའི་ཤར་ཚོད་འདི་བཞིན་གྱི་དམིགས་འགྱུར་ཡོང་ལ་ཆེ་བ། ད་ཆ་སྔགས་པ་དང་སྨན་པར་མ་ཟད་ད་ལྟ་སྐུ་ལ་གང་བཅར་ལས་ངོ་གསར་གྱི་རིགས་ལ་ཞལ་མཇལ་མེད་ངོས་བླ་མ་བགྲེས་གཞོན་ལྟ་བུའི་ཕྱག་རྡོར་དང་རྣམ་འཇོམས་ལྟ་བུའི་ལྗགས་བསྙེན་སོང་ན་དང་། དེ་མིན་ཡི་དམ་གང་རིགས་ཀྱི་བསྙེན་སོང་དམ་ཚིག་གཙང་བ་ཞིག་གིས་ཕྱག་ལེན་གནང་བའི་ཐོག་མར་འབྱུང་བཞི་ལྟ་བུའི་ཆབ་གཏོར་སྐུ་གླུད་དང་བཅས་པ་ཞིག་ས་མཚམས་སྒྲོལ་བའི་བར་དུ་གནང་རྗེས། རྣམ་འཇོམས་བྱབ་ཁྲུས་ཀྱི་བཅའ་གཞི་སྤྱི་མཐུན་དུ་བསྒྲིགས་བདག་བསྐྱེད་བུམ་བཟླས་འདས་གཏོར་དང་འཇིག་རྟེན་པའི་གཏོར་མ་ཆ་གསུམ་སྔོན་དུ་འགྲོ་བས། ཐོག་མར་སྐུ་ལ་བགེགས་སྦྱོང་ཞི་བ་ཕྱེད་དྲག་པོའི་སྦྱང་བས་བགེགས་བསལ་རྗེས་སྤོས་དཀར་ནག་སྔགས་ཀྱིས་བཏབ་པ་ཁ་བྱང་བཞིན་ཤངས་བུག་གཡས་སུ་སྤོས་དཀར་དང་། གཡོན་དུ་གུ་གུལ་གྱིས་བདུག་ཅིང་མི་བདུག་པའི་ཕྱོགས་ཀྱི་ཤངས་བུག་དར་རས་ལྟ་བུས་དགག་པ་གནང་། དེ་སྐབས་དུད་པ་སོ་སོ་ལ་བརྟེན་ནས་རཱ་ཧུ་ལ་དཀར་པོ་དང་ནག་པོས་རང་གི་དུག་རླངས་ནས་སླར་ཕྱིར་འཐོན་པར་དཔོན་སློབ་གཉིས་ཀས་བསམ་ཞིང་། ༀ་ཏུཾ་པོ་ལི་ཏུཾ་པོ་ལི་སུ་སུ་མེ་མེ་ཤིག་ཤིག་སྭཱ་ཧཱ། ཞེས་པ་ནན་ཏན་དུ་བཟླ། དེ་རྗེས་གུར་གུམ་འདི་ལ་དུག་འབྱིན་གྱི་སྔགས་མང་དུ་བཏབ་ཡོད་པ་རྣམ་འཇོམས་ཀྱི་བུམ་ཆུ་དང་མཉམ་དུ་བཀྲུ་བ་དང་བྱབ་པ་དང་བསྲུང་བའི་བར། གཞུང་གི་ཆོ་ག་ལྟར་གནང་རྗེས་བཞེས་ཡིག་ལེ་ཚན་གཉིས་པོ་ནས་རེ་རེ་མར་གྱིས་དྲིལ་བ་དང་བསྲུང་རྫས་རིལ་བུ་འདི་ནས་གཅིག་ཞལ་དུ་བཞེས། དེ་རྗེས་སྐུ་བསྲུང་ལ་གྲིལ་མ་འདི་གཟའ་ལ་ཆེད་དམིགས་དང་འདི་ཀུན་ཐུབ་ཡིན་པ་སྐུ་ལ་བཅངས། མེ་ལོང་དར་ཚན་ཅན་འདི་གང་དུ་བཞུགས་པའི་ནམ་མཁའ་མཐོང་བའི་སར་འདོགས་ཤིང་། ཁྱད་པར་དྲང་སྲོང་རྒྱུ་དུས་དང་སྦྱར་ནས་ཚེས་བཞིའི་སྲོད་ལ་ཤར་དུ་རྒྱུ། དེ་བཞིན་དུ་བརྒྱད་ཀྱི་སྔ་དྲོ་ནུབ་བྱང་། བཅུ་གཅིག་གི་སྲོད་ཡོལ་ལ་ལྷོར། བཅོ་ལྔའི་ཉི་བྱེད་ལ་བྱང་ཤར་དུ། བཅོ་བརྒྱད་ཀྱི་ནམ་ཕྱེད་ལ་ནུབ་ཏུ། ཉི་ཤུ་གཉིས་ཀྱི་ཉི་མ་ཕྱེད་ཡོལ་ལ་ཤར་ལྷོར། ཉེར་ལྔའི་སྐྱ་རེངས་ཤར་བ་ལ་བྱང་དུ། ཉི་ཤུ་དགུའི་མྱུར་སྨད་ལ་ལྷོ་ནུབ་ཏུ་རྒྱུ་བའི་དབང་དུ་བྱས་ནས་དུས་དེར་དྲང་སྲོང་གི་གཏོར་འབུལ་ཟུར་དུ་ཕུལ་བ་འདི་ནང་བཞིན་བཤམས་ནས། བདག་བསྐྱེད་ཕྱག་རྡོར་རྣམ་འཇོམས་གང་འོས་དང་མདུན་བསྐྱེད་ནས་བཟུང་རྗེས་གཏོར་འབུལ་གྱི་བར་བཏང་རྗེས་གཏོར་མ་ཚེས་བཞི་ལ་ཤར་དུ་རྒྱུ་བའི་ཚེ་གཏོར་མ་ཁ་ནུབ་ཏུ་དུས་དེ་ཉིད་དུ་འབུལ་བས་མཚོན། གང་དུ་རྒྱུ་བའི་ཕྱོགས་ལོག་ཏུ་གཏོར་མ་དུས་དེ་ཉིད་དུ་འབུལ་བ་དང་བཞེས་ཡིག་རྫས་རིལ་དང་བཅས་པ་དང་སྔགས་ཀྱི་ཆབ་ལྗགས་ཐོག་ཏུ་འབུལ་བ་རྣམས་བསྟར་ཆགས་གནང་བ་དང་། རྒྱུན་གྱི་སྤྱོད་ལམ་ཉི་ཟླའི་ཟེར་དང་ནམ་མཁའི་མཐོངས་གསལ་སྤང་། ཤ་དམར་སོགས་མི་གཙང་བའི་གྲིབ་ཅན་དང་རོལ་མོའི་སྒྲ་སོགས་འཛེམ་ཞིང་གཙང་སྦྲ་ལ་ཅི་གནས་གནང་བ་དང་། སྐབས་སྐབས་སུ་རྣམ་འཇོམས་ཀྱི་བྱབ་ཁྲུས་ཀྱང་གནང་། སྤྱི་ཁྱབ་དཔུང་བསྐྱེད་ཀྱི་སྐུ་རིམ་རྟེན་བྱིན་ཅན་ལ་ཞལ་གསེར་མཆོད་འབུལ་དང་འབྲེལ་བར་དགེ་སློང་ཐུགས་བསམ་དག་པ་གཙོར་བསྡུས་ཀྱིས་སྨན་བླ་དང་འབྲེལ་བའི་གསོལ་འདེབས་ཅི་འགྲུབ། གཞན་ཡང་སྒྲོལ་མ། ཤེར་སྙིང་འབུམ་ཐེར། བརྒྱད་སྟོང་བརྒྱ་རྩ། བཀའ་འགྱུར་ཚར་གཅིག །བདེ་མཆོག་ཕག་མོ་ལྟ་བུའམ་གུ་རུའི་ལས་གཞུང་གང་རིགས་དང་སྦྱར་བའི་ཚོགས་བརྒྱ་དང་བསྟེེན་པའི་ལྷ་བསྲུང་རྣམས་ལ་བསྐང་བ་གསོལ་མཆོད། ཞི་བའི་སྦྱིན་སྲེག་ཁྲི་ཚར། འཆི་ངེས་སེམས་ཅན་གྱི་སྲོག་བླུ། ངན་སློང་ལ་སྦྱིན་གཏོང་། སཱཙྪ་འབུམ་ཚོ་འདེབས་པ་རྣམས་གནང་ན་དམིགས་འགྱུར་ཡོང་ལ་ཆེ་བ་དགོངས་གཅགས་དང་། བཀའ་ཕེབས་བཞིན་དམ་རྫས་ལེ་ཚན་ཡང་ཁ་བྱང་གིས་མཚོན་པ་ལྟར་ཕུལ་ལགས་པ་སྤྱན་སྔར་སྨིན་ངོས། རིས་མེད་བསྟན་པ་དང་སེམས་ཅན་གྱི་ཕན་བདེ་བརྩེ་བས་མི་གཡེལ་བའི་དགོངས་པ་གཏོད་པར་གསོལ་བ་འདེབས་པ་ལགས།