དད་ལྡན་གྲ་ལྔ་དོན་འགྲུབ་ལ་སྤེལ་བ།

༈ དད་ལྡན་གྲ་ལྔ་དོན་འགྲུབ་ལ་སྤེལ་བ། ལགས། ཉིད་སྔོན་གྱི་དགེ་བའི་ས་བོན་སད་པས་རྣམ་དཀར་གྱི་ལས་ལ་ངོམ་པ་མེད་པའི་ཐུགས་ཀྱི་གཏན་པ་མི་ལྷོད་ཀྱང་། དཔོན་ཁུང་གིས་གཟིགས་པ་ཡངས་པའི་ཁྲིམས་གཉིས་ཀྱི་བྱེད་པོར་བཀས་གནང་བ་གནས་སྐབས་ཐུགས་བྲེལ་འགངས་ཆེའི་གཡེངས་རྐྱེན་གྱིས་ཉམས་བཞེས་རང་དབང་དུ་སྤྱོད་པ་དཀའ་བར་མཆིས་ན་ཡང་། ལྷག་པའི་བསམ་པ་བརྟན་པོར་བཟུང་ན་ཕྱག་ལས་ཀྱི་འཇུག་སྒོའང་བསྟན་པ་དང་སེམས་ཅན་ལ་ཕན་ཐོགས་ཆེ་བའི་དངོས་རྒྱུར་ཆེ་བ་ཡིན་ཏེ། སྙིང་རྗེ་ལྡན་ཕྱིར་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་གསུངས་པ་དང་། སངས་རྒྱས་ཐེག་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱད་ཀྱང་། །པདྨ་ལ་ནི་འདམ་བཞིན་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་ཐེག་པ་ཆེན་པོའི་མདོ་སྡེ་རྣམས་ལས་གསུངས་པས་སྤྱིར་སྔར་ཟབ་ལམ་གྱི་སྒོ་མཐའ་མ་འགགས་པ་གསན་པའི་གནས་ལུགས་སྤྲོས་བྲལ་དེ་བཞིན་ཉིད་ཀྱི་ལྟ་བས་སྲོག་བཟུང་། ནང་རེ་བཞིན་རྩལ་སྣང་འགག་པ་མེད་པའི་སྙིང་རྗེ་ཆེན་པོས་དེ་རིང་གི་གནས་སྐབས་སུ་བྱ་བཞག་ཐམས་ཅད་དངོས་དང་བརྒྱུད་པའི་སྒོ་ནས་སེམས་ཅན་ལ་ཕན་པ་འབའ་ཞིག་བགྱིད་དོ་སྙམ་པའི་བསམ་པ་བཟང་པོས་བཟུང་ན། དེ་ནས་བརྩམས་ཏེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འཇུག །ཅེས་བྱང་ཆུབ་སེམས་ཀྱིས་རྒྱས་བཏབ་པས་ཉིན་གང་གི་བྱ་བ་ལོག་ལྟ་སོགས་སྡིག་པ་མི་དགེ་བ་ཚན་པོ་ཆེས་བར་མ་ཆོད་ན་དགེ་བ་རྒྱུན་ཆགས་སུ་གསུངས་པ་དང་། ཁྲིམས་ཀྱི་ཞལ་ལྕེ་གཅོད་པའི་ཚེ་ཡང་ཉེས་ཅན་རྣམས་ལ་བྱམས་པའི་མས་བུ་སྡུག་གཡང་ཁར་འཕྱན་པ་འཐབ་བརྡེག་སོགས་སྤྱོ་བས་བསྡིགས་པ་བཞིན་དུ་འཕྲལ་གྱི་ཉེས་པའི་སྒོ་དེ་ཉིད་འགོག་པ་ཙམ་ལས། ཕུགས་བསམ་བཟང་གི་འདུན་པས་མ་བོར་བ་ཉིད་ཀྱིས་གང་འཁྱོངས་དང་ཉེས་ཅན་ཆད་པས་གཅོད་འོས་རྣམས་ཀྱང་འཕྲལ་དུ་ངན་སྤྱོད་དེའི་གོ་འགེགས་ཙམ་ལས་ཕུགས་བྱམས་པས་གཏོང་སེམས་མེད་ན་དགེ་བའི་རྩ་བ་མི་ཆད་པར་གསུངས་འདུག །དེས་ན་རྒྱལ་ཁྲིམས་ཀྱི་བྱ་བ་གང་ལ་ཡང་བསམ་པ་བཟང་པོས་གཞི་བཟུང་སྦྱོར་བ་ཅི་སྙོམས་བསྙེན་བསྲིང་མི་མངའ་བ་ཞིག་མཛད་པས་ཚུལ་དེ་དགེ་བའི་ལས་ཐབས་སུ་བསྒྱུར་ཐབས་ཤོགས་ཆེ་བར་མ་ཟད། དེ་དག་གི་གསེང་དབར་རྣམས་སུ་སྤྲོས་བཅས་སྤྲོས་མེད་ཀྱི་བཟླས་སྒོམ་སོགས་ཀྱང་ཅི་ནུས་སུ་བོགས་གང་ཆེ་དང་། འདུན་མའི་རྩ་བ་ཡང་དགེ་སྦྱོར་མཛད་པ་དེ་ཐམས་ཅད་འཕྲལ་གྱི་ནད་གདོན་ཞི་བ་དང་ལོངས་སྤྱོད་རྒྱས་པ་སོགས་ཀྱི་ཆེད་དུ་དམིགས་ན་རིན་ཐང་དང་བྲལ་བའི་ཡོ་བྱད་བཟང་པོ་དོན་ཆུང་ངུ་ཙམ་གྱི་ཆེད་དུ་བཏང་བ་ལྟར་ཆུད་ཟོས་སུ་འགྲོ་བས། བདག་གཞན་སེམས་ཅན་ཐམས་ཅད་ཀྱི་དོན་དུ་ཆབས་ཅིག་པར་བསྒྲུབས་ན་འབྲས་ལོ་ལེགས་ན་རྩྭ་ཕུག་ཞོར་ལ་འབྱུང་བའི་དཔེ་ལྟར་དོན་ཆེན་པོར་འགྱུར་བར་མཁྱེན་པས་ཆོད་པ་ལྟར་དང་། རྒྱུན་ཆགས་ཀྱི་གཏོར་མའི་གཤོམ་ཚུལ་ཉིད་རང་གི་མཛད་ཚུལ་བཞིན་སོ་སོར་སྒོས་ཅན་དུ་འབྱོར་ན་ལེགས་པ་གཞིར་བཅས་དེ་ཙམ་མ་འབྱོར་ཡང་རྒྱུན་གཏོར་ཙམ་ལ་བླ་མ་ཞི་དྲག་གཉིས་གཅིག་ཏུ་བསྡུས། ཐུགས་རྗེ་ཆེན་པོ་ཡི་དམ་སྤྱི་འདུས་སུ་ཞལ་བཞི་པ་དང་སྔགས་བསྲུང་མར་གཏོར་མ་སོ་སོ་རེ་དང་དེའི་འཁོར་དུ་གཏེར་བསྲུང་རྣམས་བསྡུས་ཀྱང་རུང་། ཤིན་ཏུ་བསྡུ་ན་བླ་མ་ཡི་དམ་རྣམས་བསྡོམས་པར་གཏོར་ཟླུམ་མཐེབ་ཀྱུ་བཞིས་བསྐོར་བ་གཅིག་དང་། ཆོས་སྐྱོང་སྤྱི་སྤུངས་སུ་གཏོར་མ་གྲུ་གསུམ་པ་ཞིག་ལ་ལྷ་གྲངས་དང་མཉམ་པའི་མཐེབ་ཀྱུས་བསྐོར་བར་འབུལ་གཏོར་དུ་བྱས་པའམ། རྒྱུན་གཏོར་རྐང་ཚུགས་སུ་ཡོད་ན་སྔོན་ནས་མཐེབ་ཀྱུ་འདུ་བྱས་པ་ནུབ་རེ་བཞིན་རེ་རེ་སྦྲན་པས་ཀྱང་ཆོག །གཞན་སྨན་རཀ་མཆོད་པ་སོགས་ཕྱག་བྲིས་སུ་འཁོད་པ་ལྟར་ཤིན་ཏུ་ལེགས་པ་འདུག །ཐུགས་བྲེལ་ཤིན་དུ་ཆེ་བའི་སྐབས་ཐུགས་དམ་གྱི་སྙིང་པོ་ཐུགས་རྗེ་ཆེན་པོ་ཡིན་གཤིས་དེའི་བཟླས་པ་གྲུབ་མཚམས་སུ་ལྷའི་སྣང་ཆ་འོད་གསལ་དུ་བསྡུས་ནས་བླ་མ་ཞི་དྲག་སོགས་སྐད་ཅིག་མའི་ཏིང་ངེ་འཛིན་གྱིས་དེ་དང་དེའི་བཟླས་པ་གང་འོས་རེ་མཛད་རྗེས་ཆོས་སྐྱོང་རྣམས་ཀྱི་གཏོར་བསྔོ་གཏོར་འབུལ་གྱི་བར་དང་། དེ་ནས་ཁྲིད་ཀ་རྣམས་སྐྱོང་དུས་སྔོན་འགྲོའི་དམིགས་སྐོར་རྣམས་སོ་སོར་མ་བྱུང་ཡང་ཉམས་ལེན་བདེ་བ་ཞིག་གིས་རྐང་དྲིལ། གཙོ་བོར་སྒོམ་མཁན་གྱི་ཤེས་པ་རང་རིག་རང་གསལ་རང་ངོ་ཤེས་ཙམ་དུ་སྐྱོང་བ་དང་། རྩལ་སྣང་མ་འགགས་པའི་སྣང་ཆ་སྒྱུ་མ་རྨི་ལམ་ལྟར་ཤེས་པས་མཐའ་དཔྱད་པའི་ངང་ལ་མཉམ་པར་ཀུན་ཏུ་སྐྱོང་བ་ཐུགས་དམ་གྱི་གཙོ་བོར་བཟུང་བས་དགོངས་པ་འགྲུབ། ཐུགས་ཐིག་གི་ཚེ་སྒྲུབ་ཧྲཱིཿགཅིག་མ་འདི་སྤྲོས་མེད་ཀུ་སཱ་ལིའི་ཉམས་ལེན་སྙིང་པོར་དྲིལ་བ་ཡིན་པས་འདི་ལ་འདོན་ཆ་སོགས་ཀྱི་སྤྲོས་པ་ཞུས་ཀྱང་དགོས་པ་མེད་པས་ཐུགས་གཡེང་གི་རྒྱུ་ལས་མི་ཡོང་བས་གཏེར་གཞུང་བབས་བསྒྲིགས་པའི་ཉམས་བཞེས་བདེ་བ་ཡོང་ཁུལ་འདི་བཞིན་དང་། སྲོག་རྟེན་གསར་བཟོས་རབ་གནས་དང་བཅས་ནུས་ལྡན་དུ་བསྒྲུབས་པ་འདི་བཞིན་གང་གི་སྒྲུབ་པ་དང་བསྟུན་སྐུ་ལ་བཅང་བ་དང་། ཐུགས་རྗེ་ཆེན་པོ་དང་གུར་དྲག་གཉིས་ལ་རྒྱུན་གྱི་ལས་བྱང་སྙིང་པོར་དྲིལ་བ་སྔར་བརྩམས་འདི་བཞིན་ཡང་ཕུལ་ཡོད་གང་ཅིའི་དགེ་སྦྱོར་གནང་ལུགས་དེ་ག་ནས་ཆོས་མཛད་ཕྲིན་ལས་སུ་གནང་བའི་ཐོ་ནང་ཇི་བཞིན་གནང་བ་རང་གིས་ཁྱབ་འདུག་ལགས་པ་དགོངས་གཅགས་ཞུ།