དད་ལྡན་བློ་བཟང་དགྲ་འདུལ་ལ་སྤེལ་བ།
༈ དད་ལྡན་བློ་བཟང་དགྲ་འདུལ་ལ་སྤེལ་བ། སྔོན་གོམས་ཀྱི་རིགས་སད་པས་དབང་པོ་ཡོངས་སུ་སྨིན་པ་གཞན་དབང་གི་རྐྱེན་ཁ་རང་གི་མཐུས་གཅོད་པའི་ཆབ་ཤོག་ཞིབ་མོར་འཁོད་པ་འབྱོར་བས་སྤྲོ་བ་འཕེལ། ལས་རླུང་གིས་དཀྲུགས་པའི་རྣམ་སྨིན་གྱི་སྤྲིན་རུམ་ནས་བག་ཆགས་ཆོས་སུ་སད་པས་ཉི་མ་རབ་རིབ་ཏུ་གསལ་ཞིང་རེས་འགའ་དྲག་ཤུལ་གྱི་ཐོག་སེར་འབབ་པ་ལྟ་བུ་སྐབས་འགར་འདོད་སྲེད་ཀྱི་ཐན་པས་གདུང་བ་སྙམ་བྱེད་པའི་རྣམ་འགྱུར་རིས་སུ་མ་ཆད་པ་འཇའ་ཚོན་ལྟར་བཀྲ་ནས་ངོ་མཚར་གྱི་ག་ཞ་ཅི་ཡང་འཕེལ་བར་འགྱུར་མོད། ཅིར་སྣང་ཐམས་ཅད་ཀྱི་རྩ་བ་སེམས་ཡིན། སེམས་ཅི་ཡང་མ་ཡིན་ཞིང་གང་དུའང་མ་གྲུབ་པ་དེ་ཉིད་ཅིར་ཡང་འཆར་གང་དུའང་སྣང་བ་བསམ་བརྗོད་ཀྱི་ཡུལ་ལས་འདས་པས་རྨི་ལམ་དང་སྒྱུ་མའི་འཁྲུལ་འཁོར་ལྟ་བུ་ལ་བདེན་འཛིན་ཨ་འཐས་ཀྱི་ཞེན་པས་ཅི་བྱ། སེམས་ཀྱི་གཤིས་ལ་འཁྲུལ་མ་འཁྲུལ་གཉིས་ཀ་ལ་ངོ་བོ་ལ་གྲུབ་པ་མེད་མོད། འོན་ཀྱང་སྟེང་རླུང་དང་འཁོར་བ་ཐོག་མེད་ནས་འགྲོགས་པའི་གཞན་དབང་གི་འཁྲུལ་པས་བསླད་པ་ཡིན། དེ་ལ་བཟོ་བཅོས་མེད་པར་རང་སར་བཞག་ན་རླུང་གི་རྙོག་མ་ཞི་ནས་དང་པོ་རང་རིག་ཏུ་རྗེན་པར་འཆར། དེ་ལ་མཐོང་ཚོར་འདུག་ན་ལྷོད་ཀྱིས་ཀློད། ཞེན་པ་འདུག་ན་རྦད་ཀྱིས་ཆོད། མྱོང་བ་འདུག་ན་ཤིག་གེས་བཤིག་དང་བློ་བྲལ་གྱི་ངང་གསལ་སྟོང་རྗེན་པ་དེ་ག་མ་ཡེངས་པའི་དྲན་པ་བསྟེན་པ་ལས་གཞན་ཅི་ཡང་མེད། སྟོང་པ་ཕྱལ་བ་བཏང་བ་དེ་བཅོས་མ་ཡིན་གཏོང་མཁན་དེ་ལ་ཅེར་གྱིས་གཟིགས་དང་རྩ་བྲལ་རང་རིག་རྗེན་པར་འཆར་བར་འགྱུར་མོད། དེའི་ཚེ་དགེ་སྡིག་གི་བློ་དང་དམིགས་བཅས་དམིགས་མེད་ཐམས་ཅད་རོ་མཉམ་དུ་ཤིག་གེས་སོང་། དེ་ངོ་ཐོག་ཏུ་སླེབ་པ་ཡིན་པས་རེ་ཞིག་དེ་གས་དགེ་སྦྱོར་གྱི་མཚམས་སྦྱོར་མཛད་ནས་སྤྱོད་པ་མཐོ་དམའི་འགྱུ་བ་མི་བསྟེན་པར་ཁོང་གྲིམས་ཕྱི་ལྷོད་པས་ལེགས་ཉེས་ཀྱི་མཐའ་བརྟགས་ནས་མདོ་དོན་དཀར་ཕྱོགས་ལ་ཅི་འདྲིལ་དུ་མཛད། ཚེ་འདིའི་བྱ་བཞག་རང་དོན་ཡིད་བྱེད་འདི་ཁོ་ནས་མཆོག་དམན་མཐའ་དག་འཆིང་གི་གདའ་བས་སྐྱབས་དཀོན་མཆོག་གསུམ་ལ་བརྟེན་ནས་གཞན་ཕན་གྱི་བསམ་སྦྱོར་གཡམ་འཆལ་མིན་པ་ཞེ་ལ་བརྣགས་བསྟན་པ་དང་སེམས་ཅན་ལ་ཕན་བདེར་ཅི་འགྱུར་རང་གི་ཤེད་མོང་ཅི་ཡོད་ཀྱི་བྱས་རྗེས་དོད་པ་ཞིག་ཡོང་བ་མཛོད། སྡིག་ཅན་འགའ་རེའི་བསམ་སྦྱོར་ཕྲ་མོས་ཀྱང་བསྟན་འགྲོའི་ཕན་བདེ་ལ་གནོད་པ་སྣ་རེ་ཙམ་བྱུང་བའི་སྡིག་ལ་བསམ་ཡང་སྙིང་སྐྱུར་མོར་འགྲོ་ཞིང་ལས་འབྲས་ལ་རྟོག་པ་ཞིབ་མོར་འཇུག་ལྡོག་གཟབ་དགོས། ལྷག་བསམ་བཟང་པོ་དེའི་བོགས་དགེ་བའི་བཤེས་གཉེན་ལ་བརྟེན་ནས་འཕྲལ་ཡུན་གྱི་ཁེ་ཉེན་ཞིབ་མོར་བརྟགས་པས་འདོན་དགོས། རྒྱལ་པོའི་ཆོས་ལུགས་ཁྲིམས་དྲང་པོ་ལུགས་མཐུན་དུ་སྐྱོང་བ་འདི་ཡིན་པས་དེའི་ཚུལ་རྣམས་བློ་ལྡན་ཁྱེད་ཀྱིས་མི་ཤེས་པ་མ་ཡིན་པས་ཤེས་ཤིང་ཁྱད་གསོད་ཡལ་བོར་མེད་པའི་ཕྱག་ལེན་ལ་ཐེབས་པ་ཞིག་མཛད་ན་སྤྱང་པོ་ཡིན་གྲུང་པོ་ཡིན། མདོ་དོན་དུ་ཆེ་བ་ཡིན་པས་དགོངས་འཚལ། ཞལ་གདམས་ཚིགས་བཅད་དུ་བགྱིས་ཀྱང་སྙིང་པོ་དེ་དག་ཏུ་མ་འདུས་པ་མ་མཆིས་པས་དགོངས་བདེ་གང་ཤར་དུ་སྤེལ་བ་ལགས།