སྤ་གྲོ་བླ་མ་རྟ་མགྲིན་དབང་རྒྱལ་གྱི་དྲི་ལན།
༈ སྤ་གྲོ་བླ་མ་རྟ་མགྲིན་དབང་རྒྱལ་གྱི་དྲི་ལན། འཕོ་བའི་མན་ངག་གི་དགོས་དོན་ནི། འཆི་བ་དྲན་པས་རྒྱུད་འཁུལ་བ་ཡིན་གཤིས་དགེ་སྦྱོར་གྱི་བསྐུལ་མར་འགྲོ་བ་ཞིག་དགོས་ལ། འཕོ་བ་རབ་སེམས་གནས་ལུགས་ཀྱི་རང་ཐོག་ཏུ་འཇོག་པ་དེ་ཡིན་ཞིང་། དེའི་དོན་འཁོར་མོར་བསྐྱངས་པས་འཆི་དུས་ཀྱི་ཐིམ་རིམ་ངེས་ཅན་གྱི་མཐར་འཆར་བའི་འོད་གསལ་དེ་ཉིད་ལམ་དུ་ལོངས་འོང་བས་རབ་ཆོས་སྐུར་འཕོ་བ་ཟེར། སྨོན་ལམ་གྱི་འཕེན་པས་མཚམས་སྦྱར་ནས་ལྷག་པའི་སྐུ་གསུང་ཐུགས་ཀྱི་དག་སྣང་ལ་རྩལ་སྦྱངས་པས་བར་དོའི་སྲིད་པ་དག་སྣང་དུ་འཆར། འདི་ལ་མཁའ་སྤྱོད་གྲུབ་པ་སོགས་སྲིད་པར་གསུངས་འདུག །ཐ་མ་སྦྱངས་ཏེ་འཕོ་བ་ལ། ད་ལྟ་སྦྱོང་དུས་སུ་འདི་ལྟར་བྱ་བ་ཡིན་ཏེ་སྔོན་འགྲོ་ཐུན་མོང་གི་རྒྱུད་སྦྱང་བ་སྔོན་དུ་འགྲོ་བས་རང་ལུས་ཡི་དམ་གང་བྱེད་དེའི་སྟོང་རའི་དབུས་སུ་རྩ་གསུམ་གསལ་བཏབ། མགྲིན་པར་ༀ་དཀར་པོ། ལྟེ་འོག་གི་ཨེ་གནས་སུ་ཨཱཿདམར་པོ། སྙིང་གར་ཧཱུྃ་སྔོན་པོ་རྣམས་སྐུ་ལྔ་མི་ཤིགས་པའི་ངོ་བོར་གསལ་བཏབ་རླུང་རོ་ཁ་སྦྱར་བ་སྔོན་དུ་བཏང་ནས་མཉམ་རྒྱུའི་ངང་ནས་ལྟེ་འོག་གི་ཨཱཿལ་བུམ་པ་ཅན་ཁ་སྦྱར་དུ་འཛིན། རླུང་ཕྱིར་འབྱིན་ཚེ་ལྟེ་བའི་ཨཱཿསྙིང་གི་ཧཱུྃ་ལ་ཐིམ། ཧཱུྃ་མགྲིན་པའི་ༀ་ལ་ཐིམ། ༀ་སྤྱི་བོའི་ཚངས་བུག་གི་བར་དུ་བསྐྱལ། རླུང་མི་བདེ་བ་མེད་ཀྱི་བར་ཕྱིར་མནན། ཤེས་པ་དམིགས་མེད་དུ་བཞག །སླར་རླུང་ནང་དུ་རྔུབས་པའི་ༀ་མགྲིན་པའི་བར་དུ་སླར་བྱུང་། དེ་ལས་ཧཱུྃ་སྙིང་གར་ཆད་དེ་ལས་ཨཱཿལྟེ་འོག་གི་རང་གནས་སུ་གནས་པ་ལ་སེམས་བཞག་ནས་བུམ་ཅན་ཁ་སྦྱར་ནས་རང་བཞིན་བསྐྱངས། ངལ་གསོ་བའི་ཚེ་རླུང་འབྱུང་འཇུག་རང་ག་ལའང་དམིགས་པ་སྔ་མའི་རྩལ་སྦྱོང་། འདི་ལས་རླུང་སྟོད་དུ་རེངས་པའི་རྣམ་པ་བྱུང་ན་འབེབས་བྱ་ཞིང་ལྟེ་བའི་ཨཱཿགསང་གནས་ཀྱི་བར་དུ་ཕབ་ནས་བུམ་ཅན་གསང་བར་འཆང་དམིགས་པ་འོག་ཏུ་གཏོད། འཕོ་བའི་རྟགས་བྱུང་ནས་དམིགས་པ་མ་བརྗེད་ཙམ་སྐབས་སུ་སྦྱང་བ་ལས་ཧ་ཅང་བརྩོན་པ་མི་བྱེད། ལས་ལ་སྦྱོར་ཚེ་ཕྱི་ནང་གི་ཆགས་ཞེན་བཅད་སྨོན་ལམ་གྱི་འདུན་པས་མཚམས་སྦྱར་སྤྱི་བོའི་ནམ་མཁར་བླ་མ་དང་ཡི་དམ་ཐ་མི་དད་པར་བཞུགས་པར་བསམ་ཞིང་ཚངས་བུག་གི་སྒོ་བསལ་ནས་ལུས་ཀྱི་དཀར་དམར་རླུང་གསུམ་གྱི་ཁམས་ཐམས་ཅད་ཡི་གེ་གསུམ་ལ་བསྡུས་ནས། ཧིཀ་དྲག་པོར་བརྗོད་ཅིང་ཡི་གེ་གསུམ་སྔར་བཞིན་གྱེན་དུ་སྤར་བའི་ཐིག་ལེ་གཅིག་ཏུ་གྱུར་པ་སྐར་མདའ་ལྟར་སྤྱི་བོའི་བུ་ག་ནས་འཐོན་བླ་མའི་ཐུགས་ཀར་འཕོ་དམིགས་མེད་སྤྲོས་བྲལ་གྱི་ངང་བསྐྱང་ངོ་། །འདི་ནི་འཕོ་བའི་མན་ངག་ཟབ་པ་ཞིག་ཡིན་པ་དང་གཏེར་གསར་ཐུགས་རྗེ་ཆེན་པོ་དང་རྡོར་སེམས་ཀྱི་འཕོ་བ་གཞུང་རྩ་བ་དང་དམིགས་རྐང་ངག་འདོན་དུ་བྱས་པ་འདི་བཞིན་སྔར་ཁྱེད་རང་གི་གསན་ཚོད་ཡིན་པ་བཞིན་དཔེ་འདི་ཐོག་ནས་ཉམས་བཞེས་མཛད་ན་ཡང་དོན་ལྡན་བཞེད་པ་འགྲུབ་པ་ཡོང་ལགས།