ས་སྐྱ་བདག་ཆེན་གྱི་དྲི་ལན།
༈ ས་སྐྱ་བདག་ཆེན་གྱི་དྲི་ལན། ལགས། དམ་པ་ཉིད་ཀྱི་ཡེ་ཤེས་ཀྱི་གཟིགས་ཡུལ་དུ་མ་གྱུར་པ་ཞིག་རྨོངས་པ་བདག་ལྟའི་ཞུ་སྤོབས་མ་མཆིས་རུང་། འདི་ལོ་ཟླ་བ་དང་པོ་ནས་སྐུ་ཁམས་མ་བདེ་བ་ཇེ་དྭངས་མེད་པའི་བབས་ཡུལ་དེ་བཞིན་སེམས་འཁོལ་ཆེ་བ་དམ་སེལ་འཁོན་གྲིབ་རྒྱལ་པོས་སྣེ་བསླང་བའི་འཚུབ་ངོ་ཙམ་གསལ་ལགས་པ། གཙོ་བོར་དམ་པ་ཉིད་རང་ནས་བསྟན་འགྲོ་བརྩེ་བས་མི་གཏོང་བའི་དགོངས་པ་གཏད་པ་རང་དམིགས་སུ་འགྱུར་མོད། ཉེར་ལེན་གྱི་སྐུ་རིམ་བུ་སློབ་བསྙེན་སོང་དམ་གཙང་གིས་རྣམ་འཇོམས་དང་ཡིག་བརྒྱའི་གཟུངས་སྒྲུབ་གནང་བའི་བུམ་ཆུས་སྐུ་དངོས་དང་མགོན་ཁང་གནས་རྟེན་རྣམས་ལ་སྐུ་ཁྲུས་གསོལ་ཞིང་མཁའ་འགྲོ་གྲིབ་སེལ་དང་ཆོས་བསྲུང་ལ་བསྐང་གསོ་འཁོན་སྦྱོང་གནང་། སྒྲོལ་མ་འབུམ་ཐེར། བཀའ་ཐང་། བརྒྱད་སྟོང་པ་དང་གསེར་འོད་གསུམ་བརྒྱ་རྩ། མཁའ་འགྲོ་བསུ་བཟློག་སོགས་ཞབས་བརྟན་གྱི་རིགས། ལན་ཆགས་གཏོར་མ་གང་མང་དང་རྒྱལ་པོར་མདོས་རྫོང་གནང་། འཆི་ངེས་སེམས་ཅན་གྱི་སྲོག་བླུ་དང་ཚེའི་གཟུངས་མདོ་གང་མང་སྒྲོག་པ་རྣམས་ཀྱིས་ལེགས་ཚོགས་སུ་འགྱུར་བ་དང་། བཀའ་ཕེབས་ལྟར་ཚེ་འཁོར་དང་ཀླུང་བསྐྱེད་འཁོར་ལོ། བདེ་གཤེགས་ཀུན་འདུས་ཀྱི་ཚེའི་ལས་རིམ་བཅུད་ལེན་རིལ་བུ་དང་སྒྲུབ་རྫས་རིལ་བུ། ཡང་སྙིང་ཀུན་འདུས་ཀྱི་ཚེ་རིལ་ནུས་ལྡན་དུ་བསྒྲུབས་པ་བཅས་ཁ་བྱང་ལྟར་སྐུ་ཚེ་རྡོ་རྗེའི་རང་གཟུགས་སུ་བརྟན་པར་མོས་འདུན་རྩེ་གཅིག་པས་ཕུལ་ལགས་པ་དང་། བཅུད་ལེན་རིལ་བུ་འདི་བཞིན་ཆེས་པས་ལྗགས་ཐོག་ཏུ་བཞེས་མ་བདེ་ན་སྦྲང་རྩི་དུག་མེད་ཀྱིས་སླར་ཡང་རིལ་བུ་ཆུང་ངུར་གནང་ན་ཡང་ཆོག་ལགས། བསྟན་འགྲོའི་མགོན་དུ་ཞབས་ཟུང་གཡོ་མེད་བརྟན་པར་མཆོག་གསུམ་དཔུང་དུ་སྦྲན་ནས་གསོལ་བ་འདེབས་པ་རེ་བ་ཡིད་བཞིན་དུ་སྐོང་བར་ཐུགས་རྗེས་བཟུང་དུ་གསོལ།