མེད་རྒན་བླ་མའི་དྲི་ལན།
༈ མེད་རྒན་བླ་མའི་དྲི་ལན། ལགས། ཇི་ལྟར་བཀའ་ཕེབས་ཀྱི་འཁྲུངས་བརྟག་གི་ཆ་འཕགས་མཆོག་རྒྱལ་བའི་དབང་པོའི་བཀའི་ལུང་ཕེབས་ཀྱིས་མཚོན་བསག་སྦྱང་གི་དགེ་ཚོགས་ཟབ་རྒྱས་དམིགས་སུ་འགྱུར་བ་གནང་འདུག་པ་བཞིན་འཁྲུངས་སྲིད་བཟང་ཐོབ་གོང་འཕེལ་བ་ལས་འགྱུར་བ་མ་མཆིས་མོད། དགེ་ཚོགས་ཀྱི་སྟོངས་རྒྱ་ཆེར་མཐའ་ཚད་མེད་པ་བཞིན་གང་གནང་ལེགས་ཚོགས་སུ་འགྱུར་བ་ནས་ད་དུང་རྣམ་སྣང་རྡོར་སེམས་རྗེ་བཙུན་སྒྲོལ་མ་བཅས་ཀྱི་སྐུ་བརྒྱ་རྩ་བཞེངས། རྟེན་བྱིན་ཅན་ལ་མཆོད་འབུལ་དང་འབྲེལ་བར་དགེ་སློང་ཞིང་དག་ཐུགས་ཆོས་དག་སྣང་འབྱོངས་པ་བཞི་གྲས་ཉུང་མཐའ་གནང་བས་བཟང་སྤྱོད་གང་མང་བསགས། སྒྲོལ་མ་མཎྜལ་བཞི་པའི་ཆོ་ག་ཅི་མང་དང་ཕྱག་འཚལ་ཉེར་གཅིག་གི་བསྟོད་པ་འབུམ་ཐེར་བསགས། ལན་ཆགས་སྦྱོང་བའི་ཆབ་གཏོར་དང་ངན་སློང་ལ་སྦྱིན་གཏོང་། འཆི་ངེས་སེམས་ཅན་གྱི་སྲོག་བླུ། སཱཙྪ་འབུམ་ཐེར། བརྒྱད་སྟོང་པ། བསྐལ་བཟང་། གསེར་འོད་རྣམས་ཀྱི་གསུང་སྒྲོག །ཡེ་ཤེས་ཀྱི་མགོན་པོ་སོགས་ཆོས་སྐྱོང་ཡེ་ཤེས་པའི་ཚོགས་ལ་བསྐང་བ་ཕྲིན་བཅོལ་རྣམས་གནང་ངོས་གཙོ་བོར་གང་གིས་དགེ་ཚོགས་དེ་དག་གི་ནུས་མཐུ་ལ་བརྟེན་ནས་དཀོན་མཆོག་སྐྱབས་དཔུང་དུ་སྦྲན་ཏེ་རང་ཉིད་ཀྱི་ཐུགས་འདོད་གང་དུ་གཏད་པ་དེར་འཁྲུངས་པ་དང་། བཞེད་དོན་གེགས་མེད་འགྲུབ་པའི་སྨོན་ལམ་གྱི་འཕེན་པ་ཉིན་རེ་བཞིན་ལན་རེས་ཉུང་མཐའ་བྱས་པ་གཏའ་མ་ཆད་པ་དང་གོང་དུ་མ་འཐུས་པའི་དགེ་བའི་རྒྱ་ཆེ་ཆུང་གང་གནང་ཐམས་ཅད་བཞེད་དོན་གྱི་དངོས་རྒྱུར་དམིགས་ནས་སྨོན་ལམ་གནང་བ་དང་། སྐབས་རེ་དེ་དག་གི་རྒྱབ་རྟེན་དུ་ཇོ་ཤཱཀ་སོགས་ལ་མཆོད་འབུལ་དང་དགེ་སློང་རྣམ་དག་གིས་བཟང་སྤྱོད་དང་དམིགས་བསྒྱུར་གྱི་སྨོན་ལམ་ཡང་ཅི་འགྲུབ་རེ་གནང་ན་བཞེད་པའི་དོན་གང་དུ་གཏད་པ་དེར་འཁྲུངས་ཤིང་བསྟན་འགྲོའི་ཕན་བདེ་རླབས་ཆེན་ཕྲིན་ལས་འགྲུབ་པར་གསལ་བ་དགོངས་དབྱིངས་སུ་གཅགས་པ་མཁྱེན་ལགས།