མི་དབང་སངས་རྒྱས་རྒྱ་མཚོའི་བཀའ་ལན།
༈ མི་དབང་སངས་རྒྱས་རྒྱ་མཚོའི་བཀའ་ལན། ལགས། གདམས་ངག་འབོག་པའི་རྒྱལ་པོ་ཞེས་པའི་མདོའི་ལུང་རེ་ཙམ་བུ་སྟོན་ཆོས་འབྱུང་སོགས་ན་དྲངས་ཀྱང་། མདོ་དེ་ག་གང་ཡིན་གྱི་ཁུངས་མ་དམིགས་པ་དང་། འགོས་ལོས་རྙིང་མའི་མདོ་དགོངས་འདུས་ཡིན་ཞིང་སྔར་དྲངས་པའི་ལུང་ཡང་འགྱུར་ཁྱད་ཙམ་མ་གཏོགས་འདིར་དོན་གྱིས་ཚང་བ་དང་། རོང་ཟོམ་གྱིས་ཀྱང་མདོ་སྡེ་དེ་ཉིད་ཀྱི་མཚན་ནས་སྨོས་པའི་གསང་སྔགས་བྱུང་ཚུལ་ལུང་ཁུངས་སུ་དྲངས་པ་དེ་རྣམས་མདོ་འདིར་སྣང་བས་མདོ་སྡེའི་ངོས་འཛིན་འགོས་ལོའི་བཞེད་པ་དོན་ལ་གནས་ཀྱང་དེར་འདི་སྐབས་ཀྱི་ལུང་བསྟན་དངོས་སུ་མེད་པར་མ་ཟད་འདི་དང་ཚིག་རིས་ཀྱང་མི་མཐུན་པས་མེད་ངེས་དང་། མཁའ་འགྲོ་གསང་རྒྱུད་སོགས་ཀྱི་ལུང་ཁུངས་ཀྱང་རྩད་ཆོད་པ་ཞིག་མ་བྱུང་། འདིར་མ་འཁོད་པའི་ལུང་བསྟན་གྱི་རིགས་ངོས་ཟིན་ཆེ་བ་ཞིག་མ་བྱུང་ཞིང་པདྨ་ཐང་ཡིག་གི་ཁུངས་སྨོས་པ་འདི་ཡང་ཨོ་རྒྱན་གླིང་པའི་ཤེལ་བྲག་མ། རྡོར་གླིང་གི་གནམ་ལྕགས་མ། སངས་རྒྱས་གླིང་པའི་གསེར་ཕྲེང་མ་གསུམ་ག་ནས་མ་བྱུང་པ་པདྨ་བཀའ་ཆེམས་ཀྱི་ཁུངས་སྨོས་པ་འདི་རཏྣའི་སྤྱི་ལུང་དུ། འཇམ་དབྱངས་སྤྲུལ་པ་གདུལ་བྱ་བསྟན་པའི་བདག༔མདོ་སྔགས་བསྟན་འཛིན་བློ་བཟང་གྲགས་པ་འབྱུང༔ཞིང་འདི་འདས་ནས་བྱམས་པའི་དྲུང་དུ་འགྲོ༔ཞེས་རྐང་པ་གསུམ་ལས་མི་རབས་བརྒྱད་ཅེས་པ་སོགས་མི་འབྱུང་ཞིང་བསྐུལ་བྱང་ཡང་མ་རྙེད། མགོན་པོ་རིན་ཆེན་འདི་ལྷོ་ཟངས་ཡིག་གཏེར་སྟོན་རུས་ལས་ཤུད་བུ་ཆོས་གྲགས་དང་མགོན་པོ་རིན་ཆེན་གུ་རུ་ཇོ་རྩེ་སོགས་སུ་གྲགས་པ་ཨོ་རྒྱན་གྱི་ཚེས་བཅུའི་ཕན་ཡོན་སོགས་འདོན་མི་དེ་ཡིན་འདུག་པ་སྐྱིད་ཤོད་ཇོ་རྩེ་དང་མི་གཅིག །དེའི་གཏེར་ལུང་ན་ཡོད་ཚུལ་ད་རེས་ཟུར་བཀོལ་དུ་ཕེབས་པ་ལས་སྔར་མ་མཐོང་། བཀའ་ཆེམས་དགེ་སློང་བྱང་སེམས་ཞེས་སོགས་དང་གླེགས་བམ་གྲུབ་ཆེན་ཕྱག་རྡོར་གྱི་ལུང་བསྟན་རྣམས་ཡོངས་གྲགས་དང་། མ་གཅིག་གི་ལུང་བསྟན་ཡོད་ཚུལ་ཡང་སྔར་ནས་གྲགས་འདུག་ལགས་ཤིང་ད་རེས་གནང་བ་འདིར་མ་འཁོད་པ་རཏྣའི་སྤྱི་ལུང་དུ། འཇམ་དཔལ་སྤྲུལ་པ་གསང་སྔགས་བསྟན་འཛིན་པ༔བློ་གྲོས་སྟོབས་ལྡན་གྲགས་པའི་མིང་ཅན་འབྱུང༔ཞེས་པ་ཡང་རྗེ་རིན་པོ་ཆེར་འབྲེལ་ཆགས་པ་འདྲ་བ་དང་། གཞི་ནས་རྗེ་བདག་ཉིད་ཆེན་པོ་མཁྱེན་བརྩེ་ནུས་པའི་ཕྲིན་ལས་འགྲན་ཟླ་དང་བྲལ་བ་ནམ་མཁའི་ཁོངས་ཁྱབ་པས་བློ་ཆུང་ཁྲོན་པའི་སྦལ་པ་ལྟ་བུ་འགའ་རེ་ནས་ལོག་པའི་སྐུར་འདེབས་དང་རྐྱེན་བསྒྱུར་གྱི་ལུང་བསྟན་ཅལ་སྒྲོག་ལ་བརྟེན། རྙིང་མའི་གྲུབ་ཐོབ་རྩོད་མེད་འཕོ་བ་འཇག་ཚུགས་མའི་འབྱུང་ཁུངས་ཉི་ཟླ་སངས་རྒྱས་ཀྱི་དག་སྣང་དུ་ཨོ་རྒྱན་ལ་ལུང་བསྟན་དོགས་སེལ་ཞུས་པ་འདི་བཞིན་ཁུངས་བཙུན་དུ་བླ་མ་དམ་པ་རྣམས་གནང་གཤིས་དཔེ་འདི་བཞིན་ལགས་པ་སླར་ཕྱིར་གནང་བརྩེ་བས་འཛིན་པ་དང་། ཡང་རྡོར་གླིང་གསེར་ཡིག་ཏུ། བསྟན་པའི་སྲོག་ཤིང་ཤར་དུ་གྲགས་པ་ཞིག༔སྐུ་ཚེ་མཐར་འཁྱོལ་བདེ་བ་ཅན་དུ་གཤེགས༔ཞེས་སྣང་བ་ཡང་ཤར་ཙོང་ཁ་པ་ཞེས་པའི་མཚན་ལས་འབྲེལ་བ་འདྲ་ལགས་པ་དང་། གོང་ཞབས་ཡས་ཕྱིན་གྱི་སྒོས་ལུང་ཁྱབ་ཆེ་བ་ནི། རྡོར་གླིང་། རཏྣ་གླིང་པ། པད་གླིང་གསུམ་གའི་གཏེར་ལུང་དུ་ཚིག་ཟུར་ཙམ་མ་གཏོགས་ཕལ་ཆེར་མཐུན་པར། དེ་ནས་སྔོན་གྱི་ཐུགས་བསྐྱེད་རྒྱལ་པོ་ནི༔ཞེས་སོགས་རྣམ་ཐར་རིན་པོ་ཆེར་སྔར་ཕེབས་པ་ལྟར་གོ་ཕྱོགས་ཀྱི་འབྲེལ་ཕུལ་བ་བཅས་དེ་བཞིན་ལགས་པ་དང་། ཡང་རྡོར་གླིང་ཀློང་ཡངས་ཀྱི་རབ་འབྱེད་ལས། དེ་ནས་ཡུལ་དབུས་ལྷ་སའི་རྩར༔རྒྱལ་པོའི་ཚུལ་ལྡན་འབྱོར་པར་ལྡན༔དེ་ཡིས་འདི་ཉིད་བཙལ་ནས་རྙེད༔འཕྲད་པ་ཙམ་གྱིས་མེ་མཆེད་འདྲ༔དེ་ནས་ལོ་བརྒྱར་དར་བར་འགྱུར༔ཞེས་དང་། དེ་ནས་ཡང་ནི་བོད་ཡུལ་དབུས༔སེང་ལྡེང་དམར་པོའི་རི་བོ་ལ༔རྒྱལ་པོ་དགེ་བའི་སྟོབས་ལྡན་འབྱུང༔ཁ་དོག་དམར་ལ་སོ་སེར་བ༔རྒྱལ་ཁྲིམས་བསྲུང་བ་རིགས་ལྡན་འབྱུང༔དེ་ཡིས་བླ་དཔེ་རྙེད་པར་འགྱུར༔དེ་ཚེ་བཻ་རོའི་སྤྲུལ་པ་པོ༔བཛྲ་མིང་ཅན་ཚེ་འཕོས་པ༔འཆིང་ཕུ་ལ་སོགས་གཏེར་མང་ཕྱུངས༔ཞེས་སོགས་འབྲེལ་ཆགས་སུ་འབྱུང་བ་ནི་ལྟ་བ་ཀློང་ཡངས་ཀྱི་ཆོས་བཀའ་ཆད་མ་རག་པ་ལྟ་བུ་ཐུགས་རྩོལ་ཆེན་པོས་བཙལ་བ་བཀའ་དྲིན་ཆེ་དོན་བཞིན་ཕྲན་བུ་ནས་དབང་ལུང་རྣམས་འབུལ་ལོ་བགྱིས་པ་དང་དམར་པོ་རི་དངོས་མིང་དང་རྒྱལ་པོ་དགེ་བའི་སྟོབས་ལྡན་ནི་དམ་པ་ཉིད་དེ་སྐྱབས་མགོན་བླ་མ་མཆོག་གི་ཐུན་མོང་མ་ཡིན་པའི་སྙན་བརྒྱུད་ཀྱི་ཟབ་དོན་རྣམས་དམ་པ་ཉིད་ལ་བཀའ་བབས་པ་ནི་བླ་དཔེ་རྙེད་པ་དང་འབྲེལ་བ་དང་། དེ་ཚེ་བཻ་རོའི་སྤྲུལ་པ་རྡོར་གླིང་སྐྱེ་བ་འཕོས་པ་སོགས་ད་ལྟའི་གནས་དུས་ཐམས་ཅད་ལ་འབྲེལ་ཆགས་འདྲ་སེམས་པ་དང་། གཏེར་གསར་ལུང་བསྟན་གྱི་ལེ་ཚན་རྣམས་ནི་མ་ཕུལ་ཞིང་ད་རེས་ཤོག་འཛར་གནང་བའི་ཐང་ཡིག་ལེ་ཚན་གྱི་ལུང་བསྟན་རྣམས་ནི་དམ་པ་ཡབ་སྲས་རྣམ་གཉིས་རང་འབྲེལ་ཆགས་པར་གོ་བའི་རང་རེའི་བསམ་ཚོད་གང་ཡིན་ཤོག་བུ་སྦྱར་མཆན་དུ་ཕུལ་བ་འདི་བཞིན་ལགས་པ་བཅས་ཟབ་ཐུགས་ཆོས་དབྱིངས་ཁྲེལ་བ་མེད་ངོས་བཀའ་དྲིན་གྱིས་རྗེས་སུ་འཛིན་པ་ཞིག་མཁྱེན་ལགས།