ཐང་འབྲོག་སྤྲུལ་སྐུ་རིན་པོ་ཆེའི་དྲི་ལན།
༈ ཐང་འབྲོག་སྤྲུལ་སྐུ་རིན་པོ་ཆེའི་དྲི་ལན། ལྕེ་སོག་གི་ངོས་འཛིན་ནི་བྱེ་བྲག་རྟོགས་བྱེད་ཀྱི་སྤོས་མིང་གི་སྡེ་ཚན་དུ་གུལྐུ་ལུཿགུ་གུལ་སོགས་རྫས་དང་། ས་རྩི་སོག་ཅེས་མིང་གི་རྣམ་གྲངས་སུ་སྨོས་པའི་ཕྱིར་གུ་གུལ་ལོ། །རང་གཞུང་བདུད་རྩི་གསལ་སྒྲོན་གྱི་འགྲེལ་པ་དགེ་བསྙེན་རིན་ཆེན་དབང་ཕྱུག་གིས་མཛད་པར་ཡང་ལྕེ་སོག་དཀར་པོ་སྟེ་གུ་གུལ་དཀར་པོར་བཤད་ཅིང་། ལམ་རིམ་མཆན་རྙིང་ལས་ཀྱང་དེ་ལྟར་བཤད་པ་དང་གཞན་ཡང་སྤོས་སྣོད་ལ་པོག་ཕོར་ཞེས་སྔོན་གྱི་གནས་སྐད་དུ་ཡིག་རྙིང་མང་པོར་འབྱུང་བའི་ཕྱིར་སོམ་མི་ཉིའོ། །དུ་རུ་ཀ་ནི་འགའ་ཞིག་ཨ་ཀ་རུ་འབའ་ཞིག་ཏུ་ངོས་འཛིན་ཡང་སྤོས་ཀྱི་སྡེ་ཚན་དུ་རྣམ་གྲངས་སུ་མིན་པར་སོ་སོར་བཤད་པ་དང་། ད་ལྟ་ཁུངས་ཅན་གྱི་ངོས་འཛིན་གར་ལོག་ཙནྡན་དུ་གྲགས་པ་ཙནྡན་དམར་པོ་ལས་ཅུང་ཟད་མི་དམར་ཞིང་རྩིང་བ་དྲི་ཤུགས་སྐྱུར་ཉམས་ཡོད་པ་འདི་ཕལ་པ་དང་། དེ་ལས་མཁྲེགས་ཤིང་ཞིབ་པ་དྲི་ཕྱོགས་འདྲ་འདི་མཆོག་ཏུ་བྱེད་འདུག་པའི་སྤུས་ཚད་ཁ་བྱང་ལྟར་ལགས། སྲོག་འཁོར་གྱི་ལྟེ་བར་ཕ་ཝཾ་ལོང་བུ་གཞུག་དགོས་ཕ་ཝཾ་ལོང་བུ་མ་ཉམས་པ་ཆུང་བ་ཡི་གེ་སོགས་བཤད་ཚོད་བཞིན་བྲིས་དར་གོས་ལྟ་བུས་གཏུམ། འཁོར་ལོ་དར་ལྟེབ་སྤྱི་ལྟར་བྱས་པའི་ལྟེ་བའི་ས་བོན་དང་ཕ་ཝཾ་ལོང་བུའི་ཡི་གེ་མགོ་ཕྱོགས་གཅིག་པ་བྱེད་པ་ལགས། མགྲོན་བཞིའི་གཏོར་མ་དཀར་ཟླུམ་གཏོར་ཅོག་ཏུ་གྲགས་པའམ་རིལ་བུ་གནང་ཡང་ཆོག །བརྟན་མའི་སྤྱན་འདྲེན་སྐབས་དུང་དམར་གྱི་རྒྱ་ནི་རྡོར་ཐལ་གྱེན་དུ་ཁ་ཕྱེ་བ་དེ་ལགས།