ཏྲེ་བོ་དཔོན་གྱི་དྲི་ལན།
༈ ཏྲེ་བོ་དཔོན་གྱི་དྲི་ལན། ལགས། ཞོ་ཟན་དང་ཟས་མཆོག་ཅེས་པ་མིང་གི་ཐ་སྙད་སོ་སོར་བསྙད་ཀྱང་རང་ལུགས་དེ་གཉིས་དོན་གཅིག་མིང་གི་རྣམ་གྲངས་སུ་བཞེད་ཅིང་། གང་ལྟར་ཞོ་ཟན་ནི་མངར་གསུམ་ཕྱེ་དང་བསྲེས་པ་བགྲུས་པའི་ཟན་རིལ་བུའམ་ཕྱེ་མ་གང་བདེར་བྱེད་པ་ཡིན། འབྲུ་གསུམ་གྱི་བར་དུ་རང་སྔགས་འཇུག་ཚུལ། གཏེར་གསར་རྡོར་སེམས་ལྟ་བུ་ལ་མཚོན་ན་ༀ་ཨཱཿༀ་བཛྲ་ས་ཏྭ་ཨཱཿཧཱུྃ་ཞེས་པ་ལྟ་བུ་ༀ་ཨཱཿགཉིས་གོང་དང་ཧཱུྃ་སྔགས་ཀྱི་མཐར་འགོད་པ་ཡིན། བསྙེན་པའི་ཁ་གསོའི་སྦྱིན་སྲེག་གི་ཡམ་ཤིང་དང་མར་ཁུ་གཉིས་ཏིལ་མ་ཡིན་པའི་རྫས་གཞན་རྣམས་ཐུན་རེར་བཅུ་ཚན་རེ་ཙམ་ལས་ཆེར་མི་འབུལ་བར་རྫས་གཞན་ལས་མང་ཙམ་དང་བརྒྱ་སྟོང་ཙམ་གྱི་མཚམས་སུ་བཅུ་ཚན་རེ་ཙམ་འབུལ་བ་གནང་ཚེ་གཞན་རྣམས་དང་འདྲ་བ་གནང་ན་རྣམ་པ་གསལ་བ་ཡོང་ཞིང་དེ་ལས་གཞན་པའི་བར་སྐབས་གྲངས་བཅད་རང་མི་དགོས། གཏོར་འབུལ་གྱི་ཆར་བདག་བསྐྱེད་ཀྱི་གཏོར་མ་ནི་འཛུགས་གཏོར་དུ་མོད། སྲེག་གཏོར་ལ་འདས་མ་འདས་གཉིས་ཀར་ཐུན་རེ་རེ་བཞིན་གསར་པ་རེ་བཤམས་ནས་གཏོར་སྔགས་དང་བསྟུན་བླུགས་གཟར་གྱིས་མེ་ནང་དུ་འབུལ་བ་གནང་དགོས་ཤིང་རྒྱུ་མར་ལ་བཟོས་ནས་འབུལ་བའི་ལག་ལེན་འདུག་པ་ཧོམ་ནང་དུ་འབུལ་བར་དངོས་གཙང་ཁྱད་ལེགས་པ་ཡོང་། ཐུགས་རྗེ་ཆེན་པོའི་སྦྱིན་སྲེག་ལ་ཞི་རྫས་སྐབས་མེ་ཏོག་དཀར་པོ་ལ་ཙམ་པ་ཀ་དང་གཞན་ཡང་གངས་ལ་སོགས་དུག་རིགས་མ་ཡིན་པའི་མེ་ཏོག་དཀར་པོ་གང་འབྱོར་བསག་པ་ལས་དམིགས་བསལ་རྩོལ་སྒྲུབ་མི་དགོས། བཅུ་ཆའི་གྲངས་ལོངས་ཀྱི་སྦྱིན་སྲེག་བསག་ཚུལ་ཕྱི་ནང་གསང་གསུམ་གའི་བསྙེན་པའི་གྲངས་བསྡོམས་གནང་ཡང་ལེགས་ཆ་ཆེ་བ་ནི་གཞིར་བཅས་མོད། འོན་ཀྱང་སྐབས་འདིའི་བཅུ་ཆའི་གྲངས་ལོངས་ཚད་ཕྱི་སྒྲུབ་ཀྱི་བསྙེན་པ་དངོས་གཞིའི་ལྗགས་བསྙེན་ཇི་ཙམ་སོང་བའི་བཅུ་ཆ་རེ་གནང་བ་ཡིན། མ་ཐ་ཡང་བསྙེན་སྒྲུབ་ཚད་ཐེམས་གནང་བའི་སྐབས་འདིར་གྲངས་བསྙེན་གྱི་དབང་དུ་བྱས་ན་གཙོ་བོ་ཆིག་འབུམ་ཆིག་ཁྲི། རྟ་ཡུམ་སོ་སོར་ཆིག་ཁྲི་ཆིག་སྟོང་རེ། འཁོར་སྔགས་ལ་སུམ་སྟོང་སུམ་བརྒྱ་རེས་མཐའ་བརྟེན་པ་རེ་བསག་པ་གནང་དགོས། གཞན་བྱིན་བསྡུ་དང་གཅེས་གནད་ཀྱི་སྔགས་སོགས་ལ་ༀ་མ་ཎི་པདྨེ་ཧཱུྃ་ར་ཙ་ཧྲི་ཡ་ༀ་བཛྲ་དྷ་ཀ་ཞེས་སོགས་སྦྱར་བ་ལྟ་བུ་ནི་བྱེད་སྲོལ་མེད་པས་དགོངས་གཅགས་ཞུ།