ཀོང་པོ་རྫོགས་ཆེན་པའི་སྤྲུལ་སྐུའི་དྲི་ལན།
༈ ཀོང་པོ་རྫོགས་ཆེན་པའི་སྤྲུལ་སྐུའི་དྲི་ལན། རྣམ་འདྲེན་སྤྲུལ་པའི་སྐྱེས་མཆོག་དམ་པ་གང་དེའི་དྲུང་དུ། དང་བས་ཞུ་བ། དེང་དུས་སྔོན་གོམས་ཀྱི་ས་བོན་གདུལ་བྱའི་གདུང་སེལ་དུ་གྲུབ་པའི་སྐུའི་འཚོ་བ་བདེ་ཞིང་རང་སྣང་རིས་མེད་འོད་གསལ་ཡེ་ཤེས་ཀྱི་འཁོར་ལོ་འབྱམས་ཀླས་པའི་ཕྲིན་ལས་འཁོས་སུ་ཕེབས་པ་ཉིད་དུ་བཞུགས་པ་ནས་ཕྱག་བྲིས་གནས་ཚུལ་ཞིབ་མོར་གསལ་བ་ལྷ་རྫས་ཀྱིས་འཁྱུད་པར་ཕེབས་པས་དངོས་སུ་མཇལ་བ་དང་མི་གཉིས་པར་བརྡའ་འཕྲོད་པས་རབ་དགའི་ཚོར་བས་སིམ་པ་ཐོབ་པར་གྱུར། དངོས་ཅག་ཀྱང་ལོ་ཚོགས་ཀྱི་ཁུར་ལྕིས་ལུས་ཟུངས་རང་བཞིན་གྱིས་གུད་པ་ལས་གློ་བུར་བའི་ཉེར་འཚེས་མ་གོས་ཙམ་ནས་འབྲུམ་ཟོན་དང་དགེ་སྦྱོར་འཇུག་པ་གཅིག་པའི་མཚམས་བཅད་དམ་མུས་ན་གནས་མུས་ལགས། ཆེད་དུ་དམ་པ་གོང་མའི་བག་ཆགས་གཞན་ངོར་གསལ་བ་ཞིག་ཡོང་བར་རེ་བ་བཞིན་ཉེ་ཆར་ཐུགས་དམ་ཟབ་མོའི་ཉམས་ལེན་ལ་བརྩོན་པ་མཛད་པའི་རིགས་སད་པའི་ཉམས་རྟོགས་དྲོད་རྟགས་ཕུན་སུམ་ཚོགས་པར་ངེས་པའི་ཡི་རང་གི་དང་བ་ཐོབ། ཉིད་རང་གིས་ཇི་ལྟར་དགོངས་པ་ལས་གཞན་པའི་གེགས་སེལ་དང་བོགས་འཐོན་པའི་གནད་རང་རེ་བླ་མ་དམ་པའི་བཀའ་དྲིན་ལས་ཟབ་མོའི་ལམ་ལ་ཐོས་བསམ་སྤྱིའི་གོ་ཡུལ་ཙམ་ལས་རྟག་ཏུ་གཞན་ཕན་དུ་བཏགས་པའི་གཡེང་བ་འབའ་ཞིག་གིས་སྒོམ་པའི་ཉམས་ལེན་མོས་པ་ལམ་བྱེད་དུ་སོང་བས་གནད་ཐོག་ཏུ་འགྲོ་བ་དཀའ་ཡང་། གོ་བ་ཙམ་གྱི་དབང་དུ་བྱས་ན་སྤྱིར་གནས་ལུགས་དོན་གྱི་སངས་རྒྱས་གཞན་ནས་བཙལ་དུ་མེད་པ་རང་ལ་གདོད་མ་ནས་བཞུགས་པར་གདའ། རང་དུ་མ་ཟད་འཁོར་འདས་ཐམས་ཅད་འདིའི་རང་བཞིན་དུ་འདུག་པས་གཞི་ཀ་དག །ཅེས་བརྗོད་པ་ལགས། དེ་ཉིད་བླ་མའི་བྱིན་རླབས་དང་ཁྲེགས་ཆོད་ཀྱི་ཟབ་ལམ་ལ་བརྟེན་ནས་རང་ཞལ་ལྟ་ཤེས་ན་ཡེ་ནས་ཀ་དག་ཆོས་སྐུར་གནས་པས་གོ་ཆོད། དེ་ལྟ་མ་ཤེས་ན་ཡོད་ཀྱང་མི་ཕན་པ་ས་བོན་སྨིན་བྱེད་དྲོད་གཤེར་གྱི་རྐྱེན་དང་མ་འཕྲད་པ་དང་འདྲ། དེ་ཉིད་རྟོགས་པའི་ཐབས་ནི་ནང་འཛིན་པའི་སེམས་རང་དག་ཏུ་བྱས་པས་འཛིན་བྱེད་སྦྲུལ་མདུད་བཞིན་རང་གྲོལ་དུ་འགྲོ་བ་ཞིག་དགོས་དེ་བྱུང་ན་ཕྱི་གཟུང་བ་རང་སར་དག་པ་དེར་འདུག །དེ་ཡང་རང་ངོ་རང་ཤེས་ཀྱི་རིག་པའི་ངོ་བོ་དྲན་འཛིན་དང་གཉེན་པོའི་བཅོས་བསླད་སྤང་བླང་དང་བྲལ་བའི་ཟུང་འཇུག་གཉིས་མེད་ཀྱི་ཡེ་ཤེས་འཁོར་འདས་གང་དུའང་མ་ཕྱེ་བའི་རིག་པ་གསལ་ཧྲིག་རྗེན་ནེ་བ་དེ་ཆོས་ཉིད་ཀྱི་ཡུལ་ལ་འགག་མེད་དུ་ཤར་ཡང་མྱོང་བ་དང་མཐུན་པ་ཇི་ལྟར་བྱས་ཀྱང་བརྗོད་མི་ཤེས་པ་འདི་ལ་གནས་ལུགས་དང་། སྟོང་ཉིད་དང་། ཀ་དག་སོགས་མིང་གིས་བཏགས་པ་ཡིན་རང་བཞིན་ངོས་བཟུང་མེད་པ་དེ་རང་སེམས་དང་དབྱེར་མི་ཕྱེད་པའི་སྤྲོས་བྲལ་དུ་རྟོགས་ན་གནད་དུ་སོང་བ་ལགས། འདི་ལྟར་ཡིན་པ་འདུག་སྙམ་ན་གོ་ཡུལ་ཙམ་སྟེ་ཤེས་རབ་དུག་ཏུ་སོང་བ་ཡིན་ལགས། རང་བཞིན་ངོས་བཟུང་དང་བྲལ་བ་དེའི་འཆར་སྒོ་དད་པ་དང་སྙིང་རྗེ་སོགས་དགེ་བའི་རྣམ་རྟོག་སྐྱེས་སམ་འདོད་ཆགས་ཞེ་སྡང་སོགས་ཉོན་མོངས་པ་དུག་ལྔར་ཤར་རམ་ལུང་མ་བསྟན་གྱི་འཆར་སྒོ་ཡིན་ཡང་རུང་སྟེ། གང་ཤར་དེ་ག་ཤར་ཙམ་ནས་ངོས་ཟིན་དགོས་ཟིན་པ་ཟེར་བ་ཡང་སྐད་ཅིག་དང་པོར་རྣམ་རྟོག་སྐྱེས་པ་ལ་སྐད་ཅིག་གཉིས་པར་རྣམ་རྟོག་སྐྱེས་སོང་སྙམ་པའི་རྗེས་སྙེག་དེ་ཡང་མིན། དུས་མཉམ་དུ་རྣམ་རྟོག་ཡིན་པ་འདུག་སྙམ་པའི་བློས་བྱས་ཀྱིས་ཀྱང་མི་ཆོག །རྗེས་སྙེག་དང་བློས་བཅས་ཀྱི་གཉེན་པོས་མ་བསླད་པར། གང་ཤར་དེ་གའི་སྐད་ཅིག་གཅིག་པོ་དེ་ཉིད་བཟོ་བཅོས་མེད་པར་རང་སོ་བཟུང་བས་རང་ངོ་རང་ཤེས་བྱ་ལམ་རྗེས་མེད་ཉོན་མོངས་རང་གྲོལ་ཡིན། འདི་ལ་ཡང་ཡུལ་ཅན་གྱི་དབང་ལས་རྟོག་པའི་འཆར་སྒོ་གསལ་གསལ་འདྲ་ལ་ངོས་བཟུང་མེད་ཡུལ་ཡུལ་པོ་ཆུ་ནང་དུ་ཟླ་གཟུགས་ཤར་བ་ལྟ་བུ་ཞིག་དང་། དབྱིངས་དེས་ཁྱབ་པའི་གདངས་འཇའ་ཚོན་ལྟར་སྣང་ཡང་ངོས་བཟུང་མེད་པ་ཞིག་སྟེ། འཆར་ཚུལ་མི་འདྲ་ཡང་ངོ་བོ་ལ་ཁྱད་པར་མེད། དེས་ན་འཆར་སྒོ་ཐམས་ཅད་གདོད་མའི་རྩལ་མ་འགགས་ཙམ་ལས་རང་མཚན་པ་བཙལ་བས་མི་རྙེད། ཇི་ལྟར་སྣང་བ་ཐམས་ཅད་ཡུལ་འཛིན་གྱིས་མ་བསླད་པར་རང་ཤེས་རང་གྲོལ་དུ་ཐག་བཅད་པས། རྨི་ལམ་གྱི་ཡུལ་སྣང་དང་མེ་ལོང་གི་གཟུགས་བརྙན་ལྟར་དངོས་འཛིན་ལས་གྲོལ་བར་འགྱུར། རྣམ་རྟོག་ངོས་ཟིན་ཡང་དམིགས་གཏད་སྤང་གཉེན་གྱི་བློས་བྱས་དྲན་འཛིན་དུག་ཏུ་འགྲོ་བས། འཛིན་མེད་ཀྱི་ཤེས་པ་རང་རིག་རང་གསལ་དེ་ག་བཅར་ཕོག་སྟེ་ངོས་བཟུང་ལ་ཟང་ཐལ་རྗེན་པར་སྐྱོང་བ་ནི་ཁྲེགས་ཆོད་ཀྱི་ངོ་བོ་ཡིན། ཡིན་ལུགས་ཡེ་སངས་རྗེན་པ་རང་བྱུང་གི་ཡེ་ཤེས་རང་གནས་ཆོས་ཉིད་ཀྱི་དགོངས་པ་ཉིད་འཁོར་བ་ཆོས་སྐུར་གཞི་གྲོལ་ཡིན་པས་རྣམ་རྟོག་ཆོས་སྐུར་བརྗོད་པ་ཡང་མི་འགལ་བར་སེམས། ལྷུན་གྲུབ་ཀྱི་ཡེ་ཤེས་རང་གནས་སྒོ་གསུམ་སོགས་ཀྱི་གནད་དུ་གཅུན་པ་ཡང་འཁོར་འདས་གང་དུ་ཡང་མ་ཕྱེ་བའི་རིག་པ་ཉིད་ཆོས་ཉིད་ཀྱི་ཡུལ་ལ་མངོན་སུམ་དུ་ཤར་བས་རང་རིག་ལུ་གུ་རྒྱུད་ཀྱི་སྐུར་སྨིན་ཅིང་གྲོལ་བར་བྱེད་པ་སྟེ། སྒོ་གསུམ་ཕྲ་བ་དང་རགས་པ་ཡུལ་དང་ཡུལ་ཅན་ཐམས་ཅད་སྐུ་དང་ཡེ་ཤེས་ཀྱི་ངང་དུ་ཡིད་དཔྱོད་དུ་མ་ལུས་པར་མངོན་སུམ་གཞི་མེད་དུ་དྭངས་པ་ཡིན་པས་ལམ་གཞན་ཐམས་ཅད་ཀྱི་གོང་དུ་གནས་པའི་ཕྱིར་ཐོད་རྒལ་ཏེ། དེ་ཕྱི་དབྱིངས་སྟོང་པས་སྣང་བའི་གོ་ཕྱེ་རིག་པའི་སྣང་ཆ་གཤིས་སྟོང་ཉིད་དུ་དྭངས་པས་སྣང་སྟོང་ཟུང་འཇུག་དབྱིངས་རིག་དབྱེར་མེད་རང་སོ་ཕྱི་ནང་བར་མེད་ཀྱི་རིག་པ་རང་གསལ་སྙིང་པོར་བྱས་པས་ཀ་དག་དང་ལྷུན་གྲུབ་གཉིས་ཀའི་ཉམས་ལེན་གྱི་སྙིང་པོར་གྱུར་པ་སྟེ། ད་ལྟའི་ཉམས་ལེན་ཀ་དག་གི་གནས་ལུགས་ལ་མྱོང་བ་ཅུང་ཟད་འཐོན་ནས་ལྷུན་གྲུབ་ལ་རྩལ་སྦྱོང་གི་ཉམས་ལེན་ཟུང་འབྲེལ་དུ་བྱས་ན་བོགས་འཐོན་པར་འགྱུར་བ་ཀུན་མཁྱེན་ཆེན་པོའི་གསུང་ཡང་ཐིག་སོགས་ཀྱིས་ཁྲོལ་བ་ལགས། ཡང་རེས་འགའ་བླ་མ་ལ་དད་དུང་གི་མོས་གུས་གསོལ་འདེབས་དང་སེམས་ཅན་གྱི་སྡུག་བསྔལ་བཟོད་དུ་མེད་པའི་སྙིང་རྗེ་ལྷོངས་པས་དེའི་ཕན་བདེའི་ཆེད་དུ་བདག་གིས་སྡུག་བསྔལ་དང་དཀའ་སྤྱད་ཐམས་ཅད་བཟོད་དགོངས་པ་དེ། སངས་རྒྱས་ཐོབ་པའི་ཐབས་ལ་མེད་ཐབས་མེད་པས་ཕན་ཐབས་ཀྱང་ལམ་ཟབ་མོའི་དོན་ལ་རྩེ་གཅིག་པའི་ཉམས་ལེན་གདོད་མའི་ཆོས་ཉིད་ཀྱི་ངང་མ་གཡོས་པ་ཉིད་ལས། དད་པ་དང་སྙིང་རྗེ་སོགས་མཚན་འཛིན་དམིགས་གཏད་བློས་བྱས་ཀྱིས་མ་གོས་པ་སྒྱུ་མ་མཁན་གྱི་སྒྱུ་མའི་རྣམ་འགྱུར་ཇི་སྙེད་པ་སྤྲུལ་པ་ལྟར་སྦྱངས་པས་སེམས་ཅན་གྱི་དོན་ཆེན་པོ་འགྱུར་པ་ལགས། སྤྱིར་དམ་པ་རྣམས་ཀྱི་འགྲོ་དོན་གདུལ་བྱའི་ཡུལ་ལ་ཕན་པ་དང་བདེ་བ་འབའ་ཞིག་པར་སྨིན་པ་དེ་ཡང་ལྟ་བ་མཐོ་བ་དང་སྒོམ་པ་ཡེངས་མེད། སྤྱོད་པ་ཞི་དུལ་དག་པ་ཉིད་ཀྱིས་བསྟན་པ་དང་སེམས་ཅན་ལ་ཅི་ཕན་གྱི་ཐུགས་བསྐྱེད་སྔར་བཞིན་ཆོས་བརྒྱད་ཀྱི་འཆིང་བས་མ་གོས་པར་བསྐྱངས་ན་དོན་གཉིས་ཕུལ་དུ་འགྱུར་བ་ལགས། སྦས་ཡུལ་གྱི་གནས་གཞི་བྱིན་བརླབ་ཀྱི་ཆེད་དུ་ཕེབས་རྒྱུ་ཡང་ཡོན་བདག་གུ་རུ་རིན་པོ་ཆེ་རྗེས་འབྲང་དང་བཅས་པར་སྨོན་ལམ་གྱི་མཐུ་ལས་བྱུང་བའི་དད་ཅན་དུ་འདུག་པས་དད་ཅན་སུན་འབྱིན་དུ་མི་འགྲོ་བའི་ཆེད་དུ་སྐོར་གཅིག་ཕེབས་པ་ལེགས་པ་འདུག་ཅིང་། དེའི་བཞེད་དོན་འགྲུབ་བྱེད་བསྙེན་སྒྲུབ་གནང་བ་ལ་ཐོག་མར་ལྷོངས་དང་རྗེས་སུ་དག་པའི་གཟིགས་སྣང་གིས་ཆོད་ཅིང་དགེ་མཚན་དུ་ཤར་བ་ཡང་ཡིད་བདེར་གྱུར་པ་དང་། སྦས་ཡུལ་ཉིད་དུ་ཡང་སློབ་དཔོན་ཆེན་པོའི་ལུང་བཞིན་ཕྱི་ནང་གི་འཛིན་སྐྱོངས་སྤྱོད་ལམ་མཐའ་དག་ཞིབ་གཟིགས་མི་ལོད་པ་དང་། རྒྱལ་སྲས་ཀྱི་ཐུགས་བཞེད་ཀྱང་རེ་བ་ཡིད་བཞིན་དུ་སྐོང་བས་རྒྱལ་སྲིད་གཏན་འཇགས་སུ་གནས་པའི་ཐབས་དང་བོད་ཡུལ་གྱི་བསྟན་པ་དང་སེམས་ཅན་གྱི་ཕན་བདེ་གོང་འཕེལ་གྱི་རྟེན་འབྲེལ་སྒྲིག་ཐབས་དང་བཞེས་ནན་ཏན་ཡོད་པ་མཁྱེན་ཅིང་། དངོས་ཅག་ཀྱང་ཐུགས་ལ་གཅགས་པའི་བརྩེ་བ་ཡིད་ལ་སེམས་བདེར་ཐོབ་པ་ད་ཆ་ལོ་ཚོགས་དང་ནད་སྣ་དུ་མའི་རྐྱེན་དབང་སོགས་ཀྱིས་རེ་ཞིག་འགལ་རྐྱེན་དུ་མ་གྱུར་ན་སླད་མར་དངོས་མཇལ་གྱི་གསུང་མཆིད་ཕེབས་འབྲས་ལྟར་ཞུ་བར་རྗེས་སུ་སྨོན་པ་དང་། སྐུ་ཁམས་ཀྱི་འཚོ་སྐྱོང་ཐུགས་དམ་ཟབ་མོའི་ཉམས་བཞེས་འགྲོ་ཕན་གྱི་ཕྲིན་ལས་སོགས་ལེགས་ཚོགས་སུ་སྨོན་པའི་རྟེན་འབྲེལ་སྒྲིག་ཕྱོགས་ཟབ་པ་ནས་ཕེབས་མཆིད་ཀྱང་རིམ་གནང་ཡོད་པ་ཞུ་ལགས། ཞུ་ཡིག་གཟིགས་རྟེན་མཚོན་པར་ལྷ་རྫས་དང་གསར་བསྒྲུབས་བདུད་རྩིའི་ཕུར་མ་བཅས་ཕུལ་བའི་ཞུ་ཡིག །