ཡང་བསྐྱར་དེ་ཉིད་ཀྱི་དོགས་སེལ།
༈ ཡང་བསྐྱར་དེ་ཉིད་ཀྱི་དོགས་སེལ། སྔོན་དུ་ཉམས་བཞེས་ཀྱི་ཆར་བློ་ཚོད་ཀྱི་རྒྱུ་མཚན་ཕུལ་བ་ཐུགས་ལ་འཕྲོད་པ་ཤིན་ཏུ་ལེགས། སྐྱེ་བས་ཐོབ་པའི་ཐོས་སྒོམ་གྱི་ཡོན་ཏན་རང་གནས་སུ་ཡོད་ཀྱང་སྦྱོར་རྩོལ་གྱི་བྱེད་ལས་ལ་རག་ལས་པའི་ཕྱིར། སྔར་གསན་བསམ་གྱི་མན་ངག་རྣམས་ལྡེ་མིག་གི་ཚུལ་དུ་བྱས་ནས། ཆོས་རྗེ་ཀུན་མཁྱེན་ཆེན་པོའི་ངེས་དོན་གྱི་གསུང་རབ་རྣམས་ལ་ཞིབ་མོར་གཟིགས་ནས་ཉམས་ལེན་གྱི་དམིགས་གནད་གང་འགྱུར་དུ་བསྒྲིལ་བ་གནང་ན་གནས་ལུགས་ཟབ་མོའི་ཉམས་རྟོགས་ཀྱི་སྒོ་བརྒྱ་འབད་མེད་དུ་ཕྱེད་པར་འགྱུར་ལགས་པ། སྤྱིར་ཕྱག་རྫོགས་གཉིས་ཀ་རྟོགས་བྱའི་ལྟ་བ་སྤྲོས་བྲལ་ཡེ་དག་ཆེན་པོར་རྣམ་དབྱེར་མེད་ཀྱང་རྟོགས་བྱེད་ཀྱི་ཁྱད་པར་མིང་ཙམ་གྱིས་ཀྱང་མཁྱེན་པར་འགྱུར་མོད། ཆོས་ཅན་གང་ཤར་གྱི་སྣང་བ་ཆོས་ཉིད་ཀྱི་ཕྱག་རྒྱས་འདེབས་པ་ཕྱག་ཆེན་དང་ཆོས་ཉིད་བྱང་ཆུབ་སེམས་ཀྱི་དབྱིངས་སུ་འཁོར་འདས་ཀྱི་ཆོས་ཐམས་ཅད་རྫོགས་པས་ན་རྫོགས་པ་ཆེན་པོའི་ལུགས་ཏེ་དོན་དམ་མཐར་ཐུག་གི་ཐག་བཅད་པའམ་ལ་ཟླས་པ་ཉིད་ངོ་བོ་བཟང་ངན་བར་མའི་རྟོག་པ་གང་ཤར་རིས་མི་འབྱེད་པར་རྣམ་ཤེས་ཀྱི་ལ་ཡེ་ཤེས་སུ་ཟླ་བ་ནི་ཚོགས་དྲུག་གི་ཡུལ་དུ་སྣང་བའི་མཚན་མ་བཤིག་པ་ནི་ཕྱག་རྒྱ་ཆེན་པོའི་ལུགས་ཏེ་སྤང་བྱ་རྣམ་ཤེས་ཀྱི་ཕྱོགས་ནས་སྨོས་པ་ཡིན། མཚན་མ་བཤིག་པའམ་རྩོལ་བ་བཤིག་ནས་རང་རིག་གི་དབྱིངས་སུ་ལ་དོར་བ་ནི་རྫོགས་པ་ཆེན་པོའི་ལུགས་ཏེ་གཉེན་པོ་ཡེ་ཤེས་ཀྱི་ཕྱོགས་ནས་སྨོས་པ་ལགས། དེས་ན་རྒྱལ་བ་རྒྱ་ནག་ཏུ་ཕེབས་པའི་སྔ་སོར་ཕྱག་རྫོགས་ཀྱི་ཁྱད་པར་གང་ཞེས་དྲི་བ་གནང་བའི་ལན་གོ་ཚོད་ཕུལ་བ་ལས་ཁོལ་བཤུས་འདི་བཞིན་ཐུགས་ཕན་ཐོགས་པ་ཨེ་ཡོང་སྙམ་ནས་ཕུལ་ཡོད་པ་དང་། དེ་གར་ཡོན་བདག་དད་ཅན་གྱི་ཐུགས་བཞེད་དོན་དུ་མཛད་ནས་སྐབས་སྦྱར་ལ་སྦས་ཡུལ་དུ་ཕེབས་དགོངས་གཏད་པ་དེ་བཞིན་ལ། གནས་ཆེན་འཛིན་ཐབས་རིག་འཛིན་གོང་མའི་གསུང་རྒྱུན་ལས་ཇི་ལྟར་བྱུང་བ་གནས་དུས་དམིགས་སུ་གང་འགྲོའི་རྟེན་འབྲེལ་གྱིས་བསྟན་འགྲོའི་ཕན་བདེ་སྤེལ་བའི་ཐུགས་བསྐྱེད་མི་གཡེལ་བ་དང་། གནས་སྐབས་ཡུལ་དུས་དང་མཐུན་པའི་སྤྱོད་ལམ་ཟབ་མོའི་སྐུའི་འཚོ་སྐྱོང་མི་གཡེལ་ཞིང་ངེས་དོན་ཟབ་མོའི་སྒོ་ནས་སྙིང་པོའི་བསྟན་པ་སྲོག་ཟུངས་འཛིན་པའི་དགོངས་པ་ཟབ་པ་དང་། དངོས་ཅག་ལོ་ཚོགས་ཀྱི་ཁུར་ལྕིས་ནོན་ཅིང་འབྲུམ་ནད་སོགས་མི་མཐུན་པའི་འགལ་རྐྱེན་ཕྱོགས་མཐའ་ཐམས་ཅད་དུ་བར་མེད་ཁྱབ་པ་བཅས་གནས་སྐབས་ཅི་འགྱུར་གྱི་གདེང་དཀའ་ཡང་། ལན་གཅིག་མཇལ་བའི་མོས་འདུན་ཕེབས་བཞིན་ཞུ་བ་དགོངས་པར་གཅགས་ངོས་ཆོས་ཉིད་རིག་པའི་དབྱིངས་སུ་རྣམ་དབྱེར་མེད་པའི་གནས་ལུགས་ཇི་བཞིན་བཀའ་མཆིད་ཕེབས་འོས་ཀྱང་སྔར་བཞིན་ཡོད་པ་ཞུ་ལགས། བསླུ་མེད་མཆོག་གསུམ་ཐུགས་རྗེའི་བྱིན་རླབས་དང་། །ལྷ་དང་དྲང་སྲོང་བདེན་པར་སྨྲ་བའི་མཐུས། །འཕྲལ་དང་ཡུན་གྱི་དགེ་ལེགས་ཕུན་ཚོགས་དཔལ། །བཞེད་པ་ཇི་བཞིན་གེགས་མེད་འགྲུབ་པར་ཤོག །