སྡེ་དགེའི་དྲི་ལན།
༈ སྡེ་དགེའི་དྲི་ལན། སོ་སྐྱེའི་བརྟགས་པ་དོན་གནས་གདེང་ཁེལ་ཞིག་དཀའ་ཡང་མཆོག་གསུམ་བསླུ་མེད་ལ་དམོད་བོར་པྲ་རྟགས་ཀྱི་དབང་དུ་བྱས་ན། སྡེ་དགེ་ལར་རྒྱར་བསྟན་སྲིད་འཕོ་འགྱུར་མེད་པའི་བརྟན་ཆེ་ཡང་དགྲ་གྱོད་ཀྱི་འཚུབ་ངོ་ཅུང་ཟད་གསལ་བ་ཟློག་བྱེད་ཁྲོ་འཆར་དང་དྲུག་ཅུ་པ་སོགས་བཟློག་པའི་ལས་རིམ་གང་འོས། ལན་ཆགས་གཏོར་མ་གང་མང་བསག །སྡེ་བརྒྱད་སྤྱི་སྐོངས་ཀྱི་མདོས་གཏོང་བ་སོགས་དང་འབྲེལ་བར་རང་ཞབས་ཀྱི་ས་ཁོངས་སྒྲོལ་བར་གཏོང་ཞིང་། ཤེར་སྙིང་གི་བཟློག་པ་འབུམ་ཐེར། བསྟེན་པའི་ལྷ་བསྲུང་གི་བསྐང་བ་ཕྲིན་བཅོལ་དང་ཡུལ་ལྷར་བསངས་མཆོད་འདོད་གསོལ་རྣམས་དང་འབུམ་གྱི་གསུང་སྒྲོག་གནང་བས་དམིགས་སུ་འགྱུར། བསོད་ནམས་ཕུན་ཚོགས་དང་བསྟན་པ་ཚེ་རིང་གི་སྐུ་ཆ་ཧ་ཅང་འཚུབ་པ་མ་ཤར་ཡང་གྲིབ་གདོན་གྱི་ངོ་ཅུང་ཟད་གསལ་བར། རྣམ་འཇོམས་ཀྱི་གཟུངས་སྒྲུབ་མཚན་ཉིད་དང་ལྡན་པའི་བྱབ་ཁྲུས་དང་གཟུངས་མདོ་འབུམ་ཐེར། འབྱུང་བཞིའི་གཏོར་མ་གང་མང་དང་བརྒྱ་བཞི་གཏོང་། འཆི་ངེས་སེམས་ཅན་གྱི་སྲོག་བླུ་ཞིང་ཚེ་གཟུངས་འབུམ་ཐེར། བསྐལ་བཟང་དང་གསེར་འོད་ཀྱི་གསུང་སྒྲོག་རྣམས་གནང་བས་དམིགས་སུ་འགྱུར། སྲིད་ཀྱི་ཆ་འབྱོན་པ་ལ་གེགས་ཆེ་ཡང་མི་འབྱོན་པ་མ་ཤར་བས་གདོན་ཆེན་བཅོ་ལྔའི་མདོས་གླུད་དང་སོ་སོ་འབྲང་མའི་སྐུ་བརྒྱ་རྩ་དང་གྲྭ་ལྔ། ལྷ་མོ་གཞན་བཞིའི་སྐུ་ཡང་ཉེར་གཅིག་རེ་བཞེངས། གྲྭ་ལྔའི་གཟུངས་ཆོག །སྒྲོལ་མ་མཎྜལ་བཞི་པའི་ཆོ་ག་ཅི་འབྱོར་དང་སྒྲོལ་མའི་ཕྱག་འཚལ་ཉེར་གཅིག་འབུམ་ཐེར་འདོད་དོན་དམིགས་བཙུགས་ཀྱི་གསོལ་འདེབས། རྒྱལ་གདོན་གྱི་གེགས་ཙམ་འདྲ་བ་སེལ་བྱེད་རྒྱལ་པོར་རྫོངས་དང་དྲག་དམར་གྱི་བསྙེན་སྒྲུབ་སྔོན་སོང་ཞིག་གི་གཏོར་བཟློག་བཅས་གནང་བ་དང་། དེར་དམིགས་རྒྱལ་གདོན་བསྲུང་འཁོར་གསུམ་དང་སྲིད་འབེབས་སྲུང་བ་གཉིས་ཁ་བྱང་གིས་གསལ་བ་ཕུལ་ཡོད། མི་དབང་བླ་ཆེན་སངས་རྒྱས་བསྟན་པ་ཉིད་ཨོ་རྒྱན་ཆེན་པོའི་ལུང་ཟིན་དང་ངེས་དོན་བསྟན་པའི་སྙིང་པོ་ཟུང་ལ་འཕེལ་རྒྱས་སོགས་ཟབ་རྒྱས་ཀྱི་ཕྲིན་ལས་བསྟན་འཛིན་གཞན་ལས་ཆེས་འཕགས་པ་དང་མཚུངས་པར་དག་པའི་ཞིང་སྦྱོང་གི་ནུས་པ་བརྙེས་པ་ལས། སླར་ཡང་བསྟན་པའི་རྒྱུན་ལ་ཐུགས་བསྐྱེད་ཀྱི་སྤྲུལ་པའི་སྐུ་སྔར་གྱི་སྡེ་རིས་དང་ཆོས་སྲིད་ཀྱི་འབྲེལ་ཆགས་མཚུངས་པར་འབྱོན་ངོ་ཤར་བས་བར་ཆད་ཀྱི་ངོ་ཅུང་ཟད་གསལ་བར་ཞི་བའི་སྦྱིན་སྲེག་དང་། བསྟེན་པའི་ལྷ་བསྲུང་རྣམས་ལ་བསྐང་བཤགས། གུ་རུའི་ལས་གཞུང་གང་འོས་དང་སྦྱར་བའི་ཚོགས་བརྒྱ། བསམ་པ་ལྷུན་གྲུབ་ཁྲི་ཚར་རྣམས་བསགས་པ་གནང་བས། དུས་དབང་གིས་སྔ་མ་ལྟ་བུའི་ཕྲིན་ལས་དཀའ་ཡང་བསྟན་འགྲོ་ལ་ཕན་ཐོགས་པ་གསལ། ཡུམ་དམིགས་སྨོས་གཉིས་ཀ་ལ་སྲས་མི་འབྱོན་པའི་ངོ་མ་ཤར་ཞིང་འོན་ཀྱང་གྲིབ་ཟོན་གང་ཆེའི་གཙང་སྦྲ་ལ་གནས་པ་དང་དཀོན་མཆོག་གི་རྟེན་ལ་མཆོད་འབུལ་གསོལ་འདེབས། འབྱུང་པོ་ལ་ཆབ་གཏོར་གང་མང་ལོ་མཉམ་གྱི་དབུལ་འཕོངས་ལ་ཟས་གོས་ཀྱི་སྦྱིན་གཏོང་། རང་རིགས་ཀྱི་སྲུང་མ་དང་སྐྱེས་ལྷར་གསོལ་མཆོད་ཕྲིན་བཅོལ་རྣམས་གནང་བས་བཞེད་དོན་འགྲུབ་པར་ཤར།