བྲོ་ཚང་ཆོས་རྗེར་ཕུལ་བ།
༈ བྲོ་ཚང་ཆོས་རྗེར་ཕུལ་བ། སོ་སོ་འབྲང་མའི་བསྲུང་འཁོར་འདི་ལ་རྩ་བ་ནི་རྒྱུད་འབུམ་བྱ། རྒྱུད་གྲས་སུ་བཞུགས་པའི་གཟུངས་མདོ་ཉིད་ཡིན་ཞིང་དེ་ཉིད་འཁོར་ལོར་འགོད་ཚུལ་བསྟན་འགྱུར་གྱི་ཁྲོད་དུ་ཛེ་ཏ་རི་དང་ཤཱནྟི་པས་མཛད་པ་སོགས་ཡོད་ཀྱང་། གཉིས་པོའང་ཅུང་ཟད་འདྲ་མིན་འདུག་པ་བཞིན་བླ་མ་གོང་མ་རྣམས་ཀྱིས་ཕྱག་ལེན་མཛད་པ་ཡང་དེ་དང་འདྲ་ཞིང་། འདིར་གོང་མའི་དཔེ་བྲིས་ཁུངས་མ་དང་བྲི་ཡིག་བརྡའ་གང་འབྱོར་དཔྱད་པས་དག་ཁུལ་དུ་བརྐོས་པ་ཡིན། ཕྱི་མོ་རྣམས་ལ་ཟུར་བཞིར་རྒྱལ་ཆེན་གྱི་སྐུ་བྲིས་འདུག་ཀྱང་པར་གྱི་རིགས་འདི་ཞིབ་ཆ་ཆེ་ན་མི་གསལ་བས་སྒྲོས་མི་གཙང་ཞིང་དོན་གྱི་ཁྱད་པར་མེད་ཕྱིར་ས་བོན་དང་སྙིང་པོ་རྣམས་བྲིས་ན་ཁྱབ་སྟེ། སྐུ་གསུང་ཐུགས་ལྡན་གཟུགས་ཀྱང་དགོད། ཅེས་དཀྱིལ་འཁོར་གཞན་དུ་འགོད་ཚུལ་གསུངས་པ་ལྟར་རིགས་འགྲེ་འདིར་ཡང་བྱས་པ་ཡིན། སྔོན་སྒར་དུས་ཀྱི་མཚལ་པར་མ་ཞིག་ལ་འཁོར་ལོ་འདིའི་ཡང་ཕྱི་རོལ་ཏུ་ལྷ་དང་ས་བོན་མང་དུ་བཀོད་པ་ཞིག་ཡོང་གི་འདུག་ཀྱང་། ད་ལྟའི་བྲི་ཡིག་རྣམས་སུ་མི་གསལ་བས་སྔ་མ་ཉིད་ཁུངས་ལྡན་གྱི་ཁུལ་ལགས། འཁོར་ལོ་འདིའི་རབ་གནས་ཀྱང་སློབ་དཔོན་ཀླུ་སྒྲུབ་ཀྱིས་མཛད་པའི་འཁོར་ལོའི་སེམས་སྦྱོང་ཞེས་པཎྜི་ཏ་ཆོས་ཀྱི་སྡེ་དང་ལོ་ཙཱ་བ་ནམ་མཁའ་རྡོ་རྗེས་བསྒྱུར་བ་བསྟན་འགྱུར་ཁྲོད་ན་འདུག་པ་སོགས་ལ་བརྟེན་ན་སྐབས་སུ་བབས་པ་ཡོང་ཞིང་། འཁོར་ལོ་ཙམ་དུ་མ་ཟད་གཟུངས་མདོ་ཉིད་གསེར་དངུལ་སོགས་ཀྱིས་གླེགས་བམ་དུ་བྲིས་པ་རྙིང་མ་བའི་བཏགས་གྲོལ་ལྟ་བུ་བྱས་ནས་བཅངས་ན་ཡང་། རྟོག་པ་ལས་གསུངས་པའི་ཕན་ཡོན་ནི་འབྱུང་བར་མཚུངས་ལ་ཕན་ཡོན་འདིས་ནི་རྙིང་མའི་བཏགས་གྲོལ་ལ་འཐིང་སླད་མཛད་པ་སོགས་ཀྱང་ཤུགས་ཀྱིས་ཁེགས་པར་འགྱུར་བ་མཁྱེན་ཆོད་ལྟར་ལགས།