ཆམ་ནག་མཁན་རིན་པོ་ཆེ་བརྒྱ་སྐོར་བའི་དྲི་ལན།
༈ ཆམ་ནག་མཁན་རིན་པོ་ཆེ་བརྒྱ་སྐོར་བའི་དྲི་ལན། འཆི་མེད་དྭངས་མ་བཅུད་འདྲེན་ལ་བརྟེན་པའི་བཅུད་ལེན་གྱི་རིལ་བུ་བསྒྲུབ་པ་ལ། ཐོག་མར་རྫས་རྣམས་དམ་ཚིག་གི་སེལ་མེད་པའི་ཕྱོགས་ནས་བསྒྲུབ་ཅིང་། རྫས་ཀྱི་གཞི་ནི་མོ་ཅོང་ཧྲམ་ཧྲོམ་བརྡུངས་པ་མཛོ་ཞོར་ཞག་བཞི་ལྔ་ཙམ་སྦངས་པ་ལས། སླར་འོ་མ་དེ་གཞན་དུ་འཕོ་ནས་སྨན་གཞོང་ནང་དུ་ཞིབ་པར་བཏགས། དེ་ཉིད་མཛོ་འོ་བཞོས་མ་ཐག་པ་དང་འདམ་བཏགས་སོ་མི་རྩི་བ་དུལ་བར་བྱས་པ་ཉག་གསུམ་ཙམ་ལ། ཨ་རུ་ར་གསེར་མདོག་རྡོག་ཉི་ཤུ་ཙམ། དེ་དང་མཉམ་པའི་སྐྱུ་རུ་ར། བཟང་དྲུག་བསྡོམས་པ་དེའི་ཕྱེད་ཆ། རྟག་ཏུ་ངུ་ཨ་རུ་ར་དང་མཉམ་པ། བྲག་ཞུན་བཟང་དྲུག་བསྡོམས་པའི་དྲུག་ཆ་རྣམས་ཞིབ་པར་བཏགས་ཤིང་འདྲེས་པར་བྱས་པ་ལ་འདིར་མ་བཤད་ཀྱང་ལྕགས་སྦྲུལ་དུག་བྲལ་དང་དབང་ལག་གུརྒུམ་རྣམས་ཀྱི་ཁ་ཚར་བཏབ། སེལ་མེད་དམ་རྫས་ཀྱི་གཏའ་དང་བཅས་སྦྲང་རྩིའི་དྭངས་མ་འོ་མ་དང་སྦྱར་བས་གོ་ཕུར་བྱས་པའི་རིལ་བུ་ཆེ་ཆུང་གང་འོས་སུ་བསྒྲིལ་ནས་མཚལ་གྱིས་བསྒྱུར་བ་དམ་རྫས་ལྟ་བུ་དང་། ཡང་རྒྱུན་དུ་བཅུད་ལེན་ཁོ་ནའི་དབང་དུ་གནང་ན་དབང་ལག་གིས་བུངས་བསྐྱེད་ཅིང་ཤེལ་དཀར་ཨ་རུ་ར་དང་མཉམ་པའང་བཏབ། སྦྲང་རྩི་ལྷད་མེད་ཀྱི་དྭངས་མས་ཞུ་བ་བྱས་པའི་རིལ་བུ་རྒྱ་སྲན་གསུམ་འགྱུར་ཙམ་བསྒྲིལ་བ་ཐོད་པ་ལ་སོགས་པའི་སྣོད་དུ་བཞག་པ་དར་གྱིས་གཡོགས་ལ་མཎྜལ་གྱི་དབུས་སུ་བཞག །བདག་བསྐྱེད་བཟླས་པ་དང་བཅས་པ་སྔོན་དུ་བཏང་ནས་རིལ་བུ་ལ་བགེགས་བསྐྲད་ཁྲུས་གསོལ། བསངས་སྦྱངས་སྟོང་པའི་ངང་ལས་ལྷར་བསྐྱེད་ཡེ་ཤེས་པ་སྤྱན་དྲངས་མཆོད་ཅིང་བསྟོད་ནས། སྙིང་གའི་སྔགས་ཕྲེང་མདུན་གྱི་སྒྲུབ་རྫས་ཀྱི་ལྷའི་ཐུགས་ཀར་སྤྲོས་པས་ཐུགས་བརྒྱུད་བསྐུལ་བར་བསམ་ནས་རྩ་སྔགས་ཉིད་སྟོང་ཚོ་ཙམ་བཟླས། སླར་མཆོད་ནས་འོད་དུ་ཞུ་བ་དམ་རྫས་བདུད་རྩིའི་རང་བཞིན་དུ་གྱུར་པའི་འོད་ཟེར་གྱིས་འཁོར་འདས་སྣོད་བཅུད་ཀྱི་དྭངས་མ་ཐམས་ཅད་བསྡུས་པ་བདུད་རྩིར་འཁྱིལ་བར་བསམ་ཞིང་རྩ་བའི་སྔགས་མཐར་ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ་ཞེས་པ་ཅི་ནུས་བཟླས་ནས་ཤིས་བརྗོད་བྱ་ཞིང་། དེ་ཉིད་ནང་རེ་བཞིན་མཛོ་འོ་བཞོས་མ་ཐག་པས་གཏའ་བྱས་ནས་བསྟེན་ན་བཤད་ཚོད་ཀྱི་དགོས་པ་འགྲུབ་ལགས། ཡང་རྒྱུན་གྱི་ཁམས་བབས་དང་སྦྱར་བའི་སྨན་གྱི་ཁ་བསྒྱུར་ནི་གང་འོས་བཏང་ཆོག་པར་གསུངས་པ་རིགས་པས་དཔྱད་དོ། །གཏེར་གསར་ཡང་སྙིང་ཀུན་འདུས་ཀྱི་ཚེ་རིལ་སྦྱོར་ལུགས་ལ། གཞི་ཨ་རུ་ར་གསེར་མདོག་སུམ་ཅུ་ཙམ་ལ་བ་རུ་ར་བཅུ། སྐྱུ་རུ་ར་སུམ་ཅུ་ཙམ་བཟང་དྲུག་གཞན་རྣམས་ཞོ་དོ་ཙམ་རེ་དང་། ཁ་ཆེ་ཞོ་བཞི་འབྲས་གཙང་མའི་ཕྱེ་བྲེ་གསུམ་ཙམ་གྱིས་གཞི་བྱས་རུས་ཉམས་གསོ་བྱེད་ཅོང་ཞི་འོ་མར་འདམ་འཐགས་བྱས་ནས་དུལ་བའི་སོ་མི་སག་པ་ཕུལ་གང་ཙམ། ཤ་ཉམས་གསོ་བྱེད་བྲག་ཞུན་ཞོ་དོ་ཙམ། མདངས་ཉམས་གསོ་བྱེད་མེ་ཏོག་ལུག་རུ་སེར་པོ་ཞོ་གང་། རྩ་ཉམས་གསོ་བྱེད་རྩྭ་ཨ་བ་ཞོ་གང་ཙམ། ལྔ་ཚན་ལྔ་སྦྱར་བ་ཞོ་བརྒྱད། ཤེལ་ཀ་ར་སྲང་གང་། སྦྲང་བུར་ཕྲན་བུ་རྣམས་སྦྱར་ནས་རིལ་བུ་དྲིལ་ཞིང་མཚལ་བྱུག་པ་སོགས་འདྲའོ། །བསྒྲུབ་ལུགས་གཏེར་གཞུང་དང་ཚེ་ཆོག་འཁྲིགས་མའི་དབུ་ན་བཀོད་ལུགས་བཤད་པ་ལྟར་ཡིན།