ལེགས་བཤད་ཉི་མའི་སྙིང་པོ་ལས། སྙན་ངག་དང་སྒྲ་ཚད་སྐོར་གྱི་དྲི་ལན་བཞུགས།
༄༅། །དྲི་ལན་སྐོར་རྨོངས་པའི་མུན་སེལ་ལེགས་བཤད་ཉི་མའི་སྙིང་པོ་ལས། སྙན་ངག་དང་སྒྲ་ཚད་སྐོར་གྱི་དྲི་ལན་བཞུགས། ལྕགས་འབྲུག་ཟླ་ཚེས་ལ་ཕུལ་བ། ཞབས་པད་རིན་པོ་ཆེར། གུས་པས་ཞུ་བ། ༢བཀའ་ཤོག་རིན་པོ་ཆེ་གནང་སྐྱེས་བཟང་པོ་བཅས་རྫོང་སྐྱེལ་རིམ་བརྒྱུད་ཀྱིས་ཚེས་ཀྱི་གུང་ལ་སྤྱི་བོའི་རྒྱན་དུ་ཕེབས་པ་བཀའ་དྲིན་ཆེ། ཇི་ལྟར་སྩལ་ཕེབས་ལྟར་སྙན་ངག་མེ་ལོང་གི་ལེའུ་གསུམ་པའི་གནས་གཅིག་ཏུ་ངེས་པའི་དཔེར་བརྗོད་འདི། ཨ་ཀུ་ཧ་ྈྐ་མགྲིན་ལས་སྐྱེས། །ཞེས་པ་ལྟར་མགྲིན་པ་ལས་བྱུང་བའི་ཡི་གེ་ཁོ་ན་བསྡེབས་པར་སྣང་བས་སྒྲའི་སྦྱོར་བའང་ཁྱད་འཕགས་ཡོད་པར་གཞིར་བཅས་ལགས་པར་མ་ཟད། ཊཱི་ཀ་རྣམས་སུའང་མ་བཀྲལ་བས། བདག་ལྟའི་བློ་དམན་གྱིས་ཇི་བཞིན་པ་ཅི་ལ་རྟོགས་ལགས་རུང་། མའི་མདུན་དུ་བྱིས་པ་ཅི་དགར་སྨྲ་བ་ལྟར་འདི་དང་འདི་ཡིན་པ་འདྲ་སྙམ་པ་རྣམས་སྤྱི་བརྟོལ་བསྐྱེད་ནས་གསོལ་རྒྱུར། རྒྱ་དཔེ་རྐང་པ་གསུམ་པའི། ཨ་དགག་སྒྲ། ཧཱ་ཧཱ་ནི་མཚན་བརྗོད་ལས། གད་རྒྱངས་ཧཱ་ཧཱ་ཞེས་པ་ལྟར་བཞད་སྒྲ་མུ་ཅོར་སྒྲོག་པའམ། དཔང་ཊཱིཀ་ཏུ། མྱ་ངན་གྱི་བརྗོད་པ། ཞེས་འབྱུང་བ་ལྟར་ན། ཀྱེ་མ། ཀྱི་ཧུད། ག་ནི་གརྫ་སྒྲའི་བྱིངས་ལ་པཉྩ་མིའི་ཧི་བྱིན་ནས་བསྒྲུབས་པ་གརྫ་ཡ་ཞེས་པའི་ཐོག་མ་བརྗོད་པ་སྟེ་སྒྲོག་པ། ཁ་ནི་ཡི་གེ་གཅིག་པའི་ཨ་བྷི་དྷ་ན་ལས། ནམ་མཁའ་ལའང་ཁ་ཞེས་མངོན་གསུངས་ཏེ། ཞེས་པས་མཁའ་དང་། ག་ནི་འགྲོ་བ་སྟེ་མཁའ་འགྲོ། ཨངྐ་ནི་མངོན་བརྗོད་མུ་ཏིག་ཕྲེང་བར་རྟགས་མཚན་གྱི་མིང་བརྒྱད་ཀྱི་ནང་དུ་མཚན་མ་ཞེས་པའི་མིང་དུ་བཤད་ཅིང་། ཨ་ཀ་ནི་འགྲོ་མེད་དེ་ཉི་མའི་མིང་ཡིན་ཡང་། མཁའ་འགྲོའང་འདིར་ཉི་མ་ཡིན་པས་ཟློས་པར་དགོངས་ནས་མ་བསྒྱུར་བ་འདྲ་སྟེ། དེ་རྣམས་འདྲ་འདུས་རིང་པོ་བྱས་པས། གངྐཱ་ཀ །ཧཱ་ཧཱ་མི་སྒྲོག་མཁའ་འགྲོས་མཚན། ཞེས་པ་སྟེ། ཧཱ་ཕྱི་མར་ང་རོ་སྦྱར་བ་ཡིག་ནོར་རམ་སྒྲའི་སྦྱོར་བ་ཁྱད་པར་བས་བསྒྲུབས་པ་གང་ཡིན་མ་ངེས་ལགས། རྐང་པ་བཞི་པའི། ཀཾ་ནི། མགོ་དང་། ཆུ་དང་། བདེན་པ་དང་། སྡིག་པ་རྣམས་ལ་འཇུག་པ་ལས། འདིར་སྡིག་པ། ཀཱ་ཀ་ཞེས་པ་འདོད་འཇོར། ཀཱ་ཞེས་པའི་སྒྲ་སྒྲོག་པའི་དོན་གྱིས་བྱ་རོག་ཏུ་བཤད། ཁ་ནི་ཡི་གེ་གཅིག་པར། མཐོ་རིས་འཇིག་རྟེན་ལའང་མཁའ་རབ་བརྗོད། ཅེས་པས་མཐོ་རིས། ག་ཞེས་པ་འགྲོ། ཀཱ་ཀ་བྱ་རོག་སོགས་མང་པོ་ལ་འཇུག་པར་སྒྲའི་སྙེ་མ་སོགས་སུ་བཤད་པ་ལས་འདིར་མཐར་བྱེད་དེ་འཇོམས་པར་བྱེད་པའི་དོན་དང་། ཀ་ནི་བདག་སྒྲ་ཡིན་པས་འཇོམས་པ་པོ་ཞེས་པ་སྟེ། སྡིག །བྱ་རོག་འཇོམས་པ་མཐོ་རིས་འགྲོ། །ཞེས་པའོ། །རྐང་པ་དང་པོར། ཨ་གཱ་ཞེས་པ་འགྲོར་མེད་དེ། འཐེང་པའམ་འཁྱོག་པོ། གཱཾ་ཞེས་པ་སྒྲའི་སྙེ་མར། གླུ་དང་བརྗོད་པ་ལ་འཇུག་པར་བཤད་པས་སྒྲ་སྒྲོག་པའི་དོན། གཱངྒ་ཡོངས་གྲགས་ཏེ་ག་སྔ་མར་རིང་ཆ་བྱུང་བ་ཡིག་ནོར་རམ་སྙམ་སྟེ། གངྒཱ་ཞེས་མོ་རྟགས་མཐའ་ཅན་དུ་རྒྱ་དཔེ་དག་པ་ཐམས་ཅད་མཐུན་པར་འབྱུང་མོད། འོན་ཀྱང་སྡེབ་སྦྱོར་གྱི་ལྕི་ཡང་ཁྱད་སྒྲའི་སྦྱོར་བ་གཞན་གྱིས་བསྒྲུབས་པའང་མཐའ་མ་བཀག་གམ་སྙམ་ལགས། ཀཱ་ཀཱ་ཆུ་ཀླུང་སྟེ་མོ་རྟགས་མཐའ་ཅན་དུ་བྱས། ཨ་ཀ་ཞེས་དགག་སྒྲ་ཅན་འགྲོ་མེད་དུ། མུ་ཏིག་ཕྲེང་བར་བཤད་པས། ཀ་ཞེས་པ་འགྲོ་བའི་དོན་ཅན་འཇུག་པར་བསྒྱུར་བའམ། ཡང་ན་ཀ་བདེ་བའམ་ཚངས་པ་སོགས་ལའང་འཇུག་པས་གངྒཱའི་ཆུར་བཀྲུས་པས་ཚངས་པ་སྟེ་དག་པའི་དོན་ཡིན་ཡང་འཇོམས་པའི་སྒྲ་དང་ཟློས་པས་འཁྲུ་བའི་དོན་གྱིས་ཁྲུས་ལ་འཇུག་པར་འགྱུར་རམ་སྙམ་སྟེ། འཁྱོག་སྒྲོག་གངྒཱའི་ཆུར་འཇུག་སྡིག་ཅེས་པའོ། །རྐང་པ་གཉིས་པའི། གོ་ཞེས་པ་མིག་སྟེ། དེས་མཚོན་པའི་དབང་པོ་རྣམས་བསྡུ་བས་མིང་ཚིག་འཛབ་སྦྱར་བས། གཱཿཧ་ཞེས་པ་སྡུག་བསྔལ། ཁྲོས་པ། འཁྲུགས་པ་སོགས་ལ་འཇུག་པས་མ་དུལ་བའི་དོན་གྱིས་འཁྱོག་པོར་བསྒྱུར་རམ་སྙམ། སྒྲ་ལྡན་ཕ་རོལ་ལ་གཱཿའི་རྣམ་བཅད་ཕྱིས་ལས། གཱ་ཧ། ཀཱཿཞེས་པ་བདག་ཉིད་དམ་རབ་གསལ་སོགས་ལ་འཇུག་པས་གང་ལ་ལྡན་པའམ་མངའ་བའི་བདག་ཉིད་ཅེས་པའོ། །བོད་སྐད་དུ་མ་བསྒྱུར་ནའང་དབང་པོ་མ་དུལ་བ་རྣམས་ལ་མ་ཆགས་པའི་དོན་གྱིས་ཚོགས་པའི་སྒྲ། ཨོ་གྷའམ་སཾ་གྷའི་མིང་མཐའ་བརྗོད་དེ་གྷ་སྦྱར་ནས། ཨཱ་ལས་ཕ་རོལ་སྒྲ་ལྡན་ལ་རྣམ་བཅད་ཕྱིས་ཏེ། འཇིག་རྟེན་པའི་ཉེར་སྤྱོད་ཀྱིས་པླུ་ཏ། ཀཱ་ཀ་ཞེས་པ་རི་བོ་དང་ལྷ་ཆེན་ནམ་འགྲོ་བ་ལའང་འཇུག་པས་བུདྡྷའི་སྒྲ་ལྟར་རི་འགྲོ་ཞེས་བསྒྱུར། ཨ་དགག་སྒྲ། ཀ་འདོད་ཆགས་ལ་འཇུག་པས་ཆགས་མེད་དེ། མཚམས་སྦྱར་བས། ཀ་ཀཱ་ཀ །ཧཱ་ཞེས་པ་ཁ་སྐོང་དུ་སྦྱར་རམ་སྙམ་སྟེ། རི་འགྲོ་དབང་འཁྱོག་ལྡན་མ་ཆགས། །ཞེས་པའོ། །འདིར་སྣར་ཐང་པའི་ཊཱི་ཀར། རིང་འགྲོ་ཞེས་མཛད་དེ། དུས་ཡུན་རིང་པོའི་དོན་ལ་བཤད་པར་མཛད་ཀྱང་། ཊཱིཀ་མཛད་ཕལ་ཆེར་མཐུན་ཞིང་། གཞུང་གི་དཔེ་རྣམས་སུའང་རི་འགྲོ་ཞེས་མང་བ་དབང་བཙན་པར་ཞུས་ལགས་པ་དང་། རྒྱ་རི་ཞབས་དྲུང་གིས་འབུལ་བ་གནང་བའི་ཕྱག་ཐོར། ཁྱིམ་ཞག་གི་རི་མོར་འདས་ཞག་གི་ལྷག་ལུས་ངོ་ཐོག་རང་ཁྱིམ་ཡིན་པའི་རྣམ་པ་ཐུགས་ལ་མ་ངེས་འདྲ་བའི་འདས་ཞག་གི་གྲངས་མཐུན་དུ་རྟག་ལོངས་ཀྱིས་སྤེལ་བར་མཛད་པ་དང་། ཁྱད་པར་ཉིན་ཞག་གི་ཉི་རགས་དང་རེས་འདིར་རི་མོ་རྒྱབ་པར་ཤོག་འཛར་ཟུར་གསལ་འདི་བཞིན་ཤར་བ་ཕྱོགས་ཙམ་ཡང་མཐུན་མ་བྱུང་བར་མ་ཟད། ཆ་ཤས་ལའང་ལྷག་ལུས་པ་འདི་འདྲ་མི་སྲིད་པ་བཅས་བསླབ་སྟོན་རིན་པོ་ཆེ་སྩལ་ཕེབས་ལྟར་མ་དག་ངེས་ལགས་པ་སོགས་རྣམ་མཁྱེན་གྱི་དབྱིངས་སུ་བཅགས་ངོས། ཡེ་ཤེས་ཀྱི་གཟིགས་པའི་སྤྱན་རས་ཀྱི་བཙའ་བས་ནམ་ཡང་མི་གཏོང་བར་རྗེས་འཛིན་དང་། བློ་དམན་པའི་དབང་གིས་མ་རྟོགས་ལོག་རྟོག་གི་ལམ་དུ་འཕྱན་པ་རྣམས་ལའང་བཟོད་བཞེས་བཀའ་དྲིན་སྐྱོང་བ་མཁྱེན་མཁྱེན་ལགས། ཞེས་དྷརྨ་ཤྲཱིས་གུས་པས་ཕུལ་བ་ཤུབྷཾ།
༈ མི་དབང་ཆེན་པོའི་བཀའ་ལན་དུ་ཕུལ། འཇམ་མགོན་ཆོས་ཀྱི་རྒྱལ་པོ་མཆོག་གི་ཞབས་པད་དྲུང་དུ། གུས་པས་ཞུ་བ། དེང་རྨད་བྱུང་ཐུགས་རྗེ་ཡེ་ཤེས་ཀྱི་ཉི་མ་བསྟན་འགྲོ་མ་ལུས་པའི་ཕན་བདེ་རབ་འབྱམས་མུ་མེད་པའི་སྣང་བ་མཆོག་གི་སྲོག་ཏུ་སོང་བའི་ཕྲིན་ལས་མཁའ་ཁྱབ་རྡོ་རྗེ་མི་ཤིགས་པའི་ངོ་བོར་ལྷུན་གྱིས་གྲུབ་པ་ནས་བརྩེ་ཆེན་སྤྱན་རས་གཟིགས་པ་ལས་མི་གཡེལ་བའི་བཀའ་ཤོག་གནང་རྟེན་བཅས་རིམ་བརྒྱུད་དུ་སྤྱི་བོར་ཕེབས་པ་བཀའ་དྲིན་གྱི་ཕུལ་དུ་གྱུར། ཇི་ལྟར་སྩལ་ཕེབས་ལྟར། ཀ་ལཱ་པའི་ཀྲིཏ་ལྟ་བུའི་ནང་ནས་རི་མོ་དཀའ་ངེས་འདི་དང་འདིའི་ཐད་ཀྱི་དཔེར་བརྗོད་གྲུབ་འབྲས་བཅས་བྲིས་གནང་བ། དོན་གྱི་མཐའ་ཁྲོལ་བའི་རི་མོའི་རྣམ་འགྱུར་ལ་བྱིངས་མི་གཅིག་པ་སོ་སོ་ལས་ཀྱང་གྲུབ་འབྲས་དོན་གཅིག་ཏུ་འབབ་ཅིང་མི་འགལ་བ་དཔེར་ན། རིག་གནས་བཞི་པ་གཏན་ཚིགས་རིག་པའི་མིང་ཚད་མ་ཞེས་པ་ལའང་། བྱིངས་ཀྱི་སྔོན་དུའང་ཉེར་བསྒྱུར་རྣམས། ཞེས་པས་ཉེར་བསྒྱུར་པྲ་སྔོན་མའི་མཱང་ཚད་མ་ལ་སྟེ་སྒྲ་ལའོ། །ཞེས་པའི་བྱིངས་ང་རྗེས་འབྲེལ་ཕྱིས་པ་ལ། ཀྲིཏ་གཉིས་པར། ནརྡི་སོགས་ལས་ཡུ་འོས་རྐྱེན་ཡུ། ཀྲིཏ་དྲུག་པར། ཡུ་བུ་ཛྷ་རྣམས་ཀྱི་ཨ་ན་ཨ་ཀ་ཨནྟ་རྣམས་སོ། །ཞེས་པས་ཡུ་ཨ་ན། མཚུངས་འདྲ། ར་ཥ་རིའི་ཡི་གེ་རྣམས་ཀྱི་མཐའ་མིན་པའི་ནའི་ཎ་སྟེ། ནས། ས་སྡེ་བར་ན་ཡོད་ཀྱང་ངོ་། །ཞེས་པས་ན་ཎ་རུ་བསྒྱུར་ནས་སི་བྱིན་པས། པྲ་མ་ཎཿཞེས་གྲུབ་སྟེ། ལོ་ཙ་བ་རྣམས་ཀྱིས་གཞལ་བྱ་འཇལ་བྱེད་ཀྱི་དོན་ལ་མི་བསླུ་བའི་རྒྱུ་མཚན་གྱིས་ཚད་མ་ཞེས་བསྒྱུར། ཡང་ན་པྲ་སྔོན་མའི། མ་ཎ་འཇལ་བ་ལའོའི་བྱིངས་ཨ་བརྗོད་དོན་ཕྱིས་པ་ལ། ཀྲིཏ་ལྔ་པར་ཐམས་ཅད་ལས་ཡོངས་སུ་འཇལ་བ་ལའོ་ཞེས་པས་གྷ་ཉ་རྐྱེན། གྷཱ་དང་ཉ་རྗེས་འབྲེལ་ཕྱིས། ཀྲི་ཏ་དང་པོར། གྲུབ་པ་ཉ་ཎ་རྗེས་སུ་འབྲེལ་བ་ལ་ཨིཙ་བཞིན་དུའོ། །ཞེས་ཨིཙའི་བྱ་བར་འགྱུར་བས། ཨཱ་དྲུག་པར། ཨིན་ཨིཙ་ཨཊ་རྣམས་ལ་ཨའི་ཨུ་པ་དྷཱ་རིང་པོ་སྟེ། ཞེས་པས་མ་ཡིག་རིང་པོར་བྱས་ཏེ་སི་བྱིན་པས། པྲ་མཱ་ཎཿསྟེ་གཞལ་བྱ་ཆོས་ཅན་དེ་འཇལ་བྱེད་ལུང་རིགས་ཚད་མས་གཏན་ལ་འབེབས་པའི་དོན་གྱིས་ཚད་མ་ཞེས་དང་། ཡང་སྟག་ཚང་ལོ་ཙཱ་བས་པྲ་མ་ཎ་ཞེས་མ་ཐུང་ངུར་མཛད་ཅིང་། དེ་སྒྲུབ་ཚུལ་ཡང་། པྲ་སྔོན་མའི་མ་ན་ཤེས་པ་ལའོ་ཞེས་པའི་བྱིངས་ཀྱི་ཨ་བརྗོད་དོན་ཕྱིས་པ་ལ། ཀྲྀཏ་གཉིས་པར། པ་ཙ་སོགས་རྣམས་ལས་ཨ་ཙའང་ངོ་། །ཞེས་པས་ཨཙ྄། ཙ྄་ཡིག་རྗེས་འབྲེལ། ར་ཥ་རིས་ན་ཎར་བྱས་ཏེ་སྦྱར་བས། པྲ་མ་ཎ། ཞེས་གྲུབ་པ་སོགས་མཐའ་ཡས་པ་རྣམ་མཁྱེན་རིན་པོ་ཆེར་མངའ་བ་ལྟར། ངེས་བཟུང་དཀའ་བའི་གནས་ལགས་མོད། གཞན་དུ་སློབ་དཔོན་མཁས་མི་མཁས་ཀྱི་བཤད་ངག་དོན་ཐོག་ཏུ་ཧྲིལ་གྱིས་འབབ་ཐུབ་མི་ཐུབ་དང་། སློབ་བུ་ཤེར་བརྩོན་ཡོད་མེད་ཀྱི་འབྲེལ་པའི་ཁྱད་པར་ལས་རི་མོ་རང་གི་གནས་ལ་གཞུང་ཚིག་དཀྱུས་ལྟར་རིམ་པར་བསླབ་པའི་ཚེའང་དཀའ་ཚེགས་མེད་པ་དང་ཚོགས་དང་བཅས་པས་མ་ངེས་པ་སྟེ། ས་པཎ་གྱིས་སྡེབ་སྦྱོར་མེ་ཏོག་ཆུན་པོར། མཁས་པ་ལ་ལ་མཚོ་བཞིན་ངང་གིས་གང་། །ལ་ལ་འབྲུ་མར་བཞིན་དུ་བཙིར་ལས་བྱུང་། །ཞེས་པ་ལྟར་སྣང་ཞིང་ཁྱད་པར་དཔོན་སློབ་ཤེར་བརྩོན་སོགས་འདྲ་བ་ནང་ཕན་ཚུན་དུའང་གང་ཟག་ལ་ལར་དོན་དང་རི་མོ་གཉིས་ཀ་དཀའ་བ་ལྟར་སྣང་བ་དེ། འགའ་ཞིག་ལ་ཚེགས་མེད་པར་སླ་བ་ལྟར་སྣང་བའང་འོང་གི་འདུག་གཤིས་འདི་ཐད་ནས་དཀའ་ས་རང་འདི་ཞེས་གཞུང་དབུ་ཞབས་སུ་བཙལ་ན་མཚམས་སྦྱོར་དང་ཀུན་བཤད་ཀྱི་རི་མོ་ལྟ་བུ་སྤྱིར་ནང་ཕན་ཚུན་དུ་དཀའ་སླ་ཡོད་པ་གཞིར་བཅས་ཀྱང་། བྱེ་བྲག་གཞུང་ཚན་རེ་རེའི་ནང་ནས་དཀའ་བའི་མཐར་ཐུག་འདི་ཞེས་དམིགས་འཛུགས་པའང་དཀའ་བ་ལྟ་བུར་སྣང་ནའང་། བསླབ་པའི་དུས་བརྡ་ཆད་མ་བྱང་བའི་ཁྱད་ཀྱིས་ཡིན་ནམ། ཕལ་ཆེར་ལ་ལེའུ་དང་པོ་འདི་ཀ་དཀའ་བ་འདྲ་ཞིག་འོང་གི་འདུག་པས་དེའི་དབང་གིས་ཉ་ཎ་རྗེས་སུ་འབྲེལ་བ་ལ་ཨིཙ྄་བཞིན་དུའོ། །ཞེས་པའི་དོན། སྔར་ཀུན་བཤད་དུ་བཤད་པའི་ཨིན་ཨིཙ་ཨཊ་རྣམས་ལ་ཨའི་ཨུ་པ་དྷའ་རིང་པོ་སྟེ་ནཱ་མི་རྣམས་ཀྱིའང་འཕེལ་བའོ། །ཞེས་པ་ལྟ་བུ་ཨིཙ་ལ་གང་བྱེད་པའི་ཆོ་ག་དེ་ཉིད་ཉ་དང་ཎ་རྗེས་འབྲེལ་ཅན་གྱི་རྐྱེན་ཕ་རོལ་དུ་ཡོད་པ་ལའང་བྱའོ་ཞེས་པ་སྟེ། དཔེར་ན། ཌུ་དང་ཥ་རྗེས་འབྲེལ་ཕྱིས་པའི་པཙ྄་འཚེད་པའི་བྱིངས་ཨ་བརྗོད་དོན་ཕྱིས་པ་ལ། ཀྲྀཏ་ལྔ་པར། གྷཉའོ། །དངོས་པོ་ལའོ། །ཞེས་པས་དངོས་པོའི་དོན་ལ་གྷཉའི་རྐྱེན་བྱིན། ཉ་རྗེས་འབྲེལ། གྷྲ་ཁྱད་དོན། ཀྲྀཏ་དྲུག་པར། ཙ་ཛ་དག་གིས་དྷུཊ་དང་གྷ་རྗེས་སུ་འབྲེལ་བ་ལ་ཀ་ཁ་དག་གོ །ཞེས་པས་ཙ་ཡིག་ཀ་རུ་བསྒྱུར། རྐྱེན་ཉ་རྗེས་འབྲེལ་ཡིན་པས་ཨིཙའི་བྱ་བ། ཨའི་ཨུ་པ་དྷཱ་རིང་པོའོ་ཞེས་པས་པ་རིང་། སི་བྱིན་པའི་ཨི་བརྗོད་དོན། རེ་བ་དང་ས་དག་གི་རྣམ་པར་བཅད་བྱ་བྱས་པས། པཱ་འཚེད་པ། མཆན། ཀཿརྐྱེན་ཎ་རྗེས་འབྲེལ་ལ་ནི། པཙ྄་ལ། ཀྲྀཏ་གཉིས་པར། ཝུཎ་ཏྲྀཙ་དག་གོ །།ཞེས་པས་བྱེད་པ་པོའི་དོན་ལ་ཝུཎ། ཎ་རྗེས་འབྲེལ། ཀྲྀཏ་དྲུག་པར། ཡུ་བུ་ཛྷ་རྣམས་ཀྱི་ཨ་ན་ཨ་ཀ་སོགས་ཀྱིས་རྐྱེན་གྱི་ཝུ་ཨ་ཀ་རུ་བསྒྱུར། ཨི་ཙའི་བྱ་བར་འགྱུར་བས་པ་རིང་། ཙ྄་ཡིག་ཨའི་སྟེང་དྲངས་སི་བྱིན་པས། པཱ་ཙ་འཚེད་པར་བྱེད། མཆན། ཀཿདེ་བཞིན་དུ། ཌུ་ཀྲྀཉ་བྱེད་པ་ལའོ། །ཌུ་ཉ་སྦྱིན་ལའོ། །བྱིངས་གཉིས་ཀྱི་ཌུ་ཉ་རྗེས་འབྲེལ། སྔར་བཞིན་གྷཉ་དང་། ཝུཎའི་རྐྱེན་ཉ྄་ཎ྄་རྗེས་འབྲེལ། གྷ་ཁྱད་དོན། ཝུ་ཨ་ཀ །ཨིཙའི་བྱ་བ་ཀྲྀའི་རྀ་ཡིག་ནཱ་མི་རྣམས་ཀྱིའང་འཕེལ་བའོས་ཨཱར྄། དཱ་ལ། ཨཱ་དྲུག་པར། ཨཱཏ་མཐར་རྣམས་ཀྱི་ཨུཙ྄་ལ་ཨཱ་ཡིའོ། །ཞེས་པས་དཱའི་སྲོག་ཨཱ་ཡི། ཨི་རྗེས་འབྲེལ། དྲངས། སི་བྱིན་པས། ཀཱ་རཿབྱེད་པ། ཀཱ་ར་ཀཿབྱེད་པ་པོ། དཱ་ཡཿསྟེར་བ། དཱ་ཡ་ཀཿསྟེར་བ་པོ། ཞེས་པ་ལྟ་བུའོ། །ཡང་ལེའུ་འདིར། ཛ་ཧ་ཏིའི་ཀྟྭཱ་ལ་ཨི་ཏའོ་ཞེས་པའི་ཛ་ཧཱ་ཏི་ནི་ཨོཧཱཀ་གཏོང་བའི་བྱིངས་ཀྱི་ཨོ་དང་ཀ྄་རྗེས་འབྲེལ། ཝརྟ་མཱ་ནའི་ཏི། བྱེད་པ་པོ་ལ་ཨན་བི་ཀ་ར་ཎ་བྱིན་ལ། ཨད་སོགས་ལས། བི་ཀ་ར་ཎའི་འཇིག །ཛུ་ཧོ་ཏི་སོགས་ལས་བྱིངས་ཐམས་ཅད་པ་ལ་འོས་ཧཱ་ཉིད་བརྗོད། ཐུད་ངུ་འོས་སྔ་མ་ཐུང་། ཧའི་ཛའོས་དེའང་ཛར་བསྒྱུར་བས། ཛ་ཧཱ་ཏི། ཞེས་གྲུབ་པའི་ཕྱིར་ན་ཛ་ཧཱ་ཏི་ཞེས་པ་ཨོཧཱ་ཀ་ཡི་རྗེས་འབྲེལ་ཕྱིས་པའི་ཧཱ་ལ་ཀྟྭཱ་བྱིན་ན་བྱིངས་ཀྱི་ཨ་ཡིག་ཨི་རུ་འགྱུར་ཞིང་། ཨོཧཱང་འགྲོ་བ་ལའོའི་ཨོ་དང་རྗེས་འབྲེལ་ཕྱིས་པའི་ཧཱ་ལ་ཀྟྭཱ་བྱིན་ཡང་ཨི་རུ་མི་འགྱུར་ཞེས་རྣམ་པ་གཅོད་པ་སྟེ། དཔེར་ན། ཨོཧཱཀ་ཡི་རྗེས་འབྲེལ་ཕྱིས་པའི་ཧཱ་ལ། ཀྲྀཏ་དྲུག་པར། བྱེད་པ་པོ་གཅིག་གི་སྔ་མའི་དུས་ལའོ། །ཞེས་པས་ཀྟྭ། ཀ་རྗེས་འབྲེལ་མདོ་འདིས་བྱིངས་མཐའ་ཨཱ་ཡིག་ཨི། ཚིག་གྲོགས་ལ་ད་ད྄་ཏི་བཞག་པས། ཧི་ཏཱ་ད་དཱ་ཏི། གཏོར་བར་བྱས་ནས་སྟེར། ཡང་ཨོཧཱང་གི་རྗེས་འབྲེལ་ཕྱིས་པའི་ཧཱ་ལ་ཀྟྭཱ་བྱིན་ཡང་བྱིངས་མཐའ་ཨི་རུ་མི་འགྱུར་བ་ནི། ཀ་རྗེས་འབྲེལ། བྷུཉྫ་ཚིགས་གྲོགས་སུ་སྦྱར་བས། ཧི་ཏྭ་བུཉྫ། འགྲོ་བར་བྱས་ནས་ཟ། ཡང་ཀྲིཏ་དྲུག་པར། ཡང་ཡང་ལ་ཎམ་ཡང་ན་སྟེ་ཚིག་གཉིས་ཀྱང་ངོ་། །ཞེས་པ་ལ། བྷུཛ་སྐྱོང་བའམ་ཟ་བའི་བྱིངས་ཀྱི་ཨ་བརྗོད་དོན་ཕྱིས་པ་ལ། ཎ་མྲ་བྱིན། ཎ་རྗེས་འབྲེལ་ཕྱིས་པས་ཨམ྄། མདོ་འདིས་ལན་གཉིས་བཞག་པའི་བྷུའི་ཨུ་ཡིག་གཉིས། ནཱ་མི་གྱི་ཡོན་ཏན་ཨོ། དེའི་མཐར་བྲཛ྄་འགྲོ་བའི་བྱིངས་ལ། ཝརྟ་ཨཱ་ནའི་ཏི། བྱེད་པ་པོ་ལ་ཨན་བི་ཀ་ར་ཎ་བྱིན་པའི་ན་ཕྱིས་ཏེ་སྦྱར་བས། བྷོ་ཛཾ་བྷོ་ཛཾ་བྲ་ཛ་ཏི། ཟོས་ནས་ཟོས་ནས་འགྲོ་བར་བྱེད་ཅེས་སྐྱོང་བ་ལ་ཡང་ཡང་འགྲོ་བར་བྱེད། དེ་བཞིན་དུ། པཱིང་འཐུང་། ཀྟྭཱ། བྱིངས་ཀྱི་ང་དང་རྐྱེན་གྱི་ཀ་རྗེས་འབྲེལ། དེའི་མཐར། ཤཱིང་ཉལ་བའི་བྱིངས་ལ། ཝརྟ་མཱ་ནའི་སྟེ། ཨན་བི་བྱིན་པ་ཨད་སོགས་ལས་འཇིག །ནཱ་མིའི་མཐའི་བྱིང་སོགས་ཀྱི་ཡོན་ཏན་ཨི་ཨེ་བྱས་པས། པྲི་ཏྭཱ་པ྄ི་ཏྭཱ་ཤེ་ཏེ། ཡང་ཡང་འཐུང་ཞིང་ཉལ། ཞེས་པ་ལྟ་བུ་སྟེ། དེ་ཙམ་གྱིས་མཚོན་པ་ལགས་ཤིང་། ལར་ནས་ཀྲྀཏ་ལེའུ་དང་པོར་ཀྲྀཏ་ཀྱིི་ཆོ་གའི་མཚན་ཉིད་ཕལ་ཆེ་བ་སྟོན་ནའང་། ཀྲྀཏ་རྐྱེན་གྱིས་རྐྱེན་རང་མི་སྟོན་ཅིང་། རྐྱེན་ནི་ལེའུ་གཉིས་པར། ཏ་བྱ་ཨ་ནཱི་ཡ་སོགས་བཅུ་དགུ། ལེའུ་གསུམ་པ་ནས་ཨཎ། ཊཀ་སོགས་ཉེར་བཞི། ལེའུ་བཞི་པ་ནས་ཀྭནྤཱུ་སོགས་སོ་དགུ། ལེའུ་ལྔ་པ་ནས་གྷཉ་སོགས་བཅུ་བདུན། ལེའུ་དྲུག་པ་ནས་ཀྟྭཱ་སོགས་བཞི་སྟེ་མདོ་ལས་དངོས་སུ་ཀྲྀཏ་རྐྱེན་དེ་ཙམ་སྣང་བ་རྣམ་འགྱུར་རིགས་བསྡུ་ན། ཏ་བྱ། ཨ་ཀ་སོགས་རྐྱེན་གཟུགས་མི་འགྱུར་བའི་རིགས་དང་། ཏྲྀཙ་དང་ཨཙ྄་ལྟ་བུ་རྗེས་འབྲེལ་གསལ་བྱེད་འཕྱིད་པའི་རིགས་དང་། གྷྱཎ་དང་ཤནྟྲྀང་སོགས་ཐོག་མཐའ་གཉིས་ཀ་ནས་རྗེས་འབྲེལ་འཕྱིད་པའི་རིགས་དང་། ཡུ་དང་ཝུཥ་སོགས་ཨ་ན་དང་ཨ་ཀ་སོགས་སུ་བསྒྱུར་བ་ལྟ་བུ་རྐྱེན་གཟུགས་གཞན་དུ་འགྱུར་བའི་རིགས་དང་། ཀ་དང་ཌ་སོགས་གསལ་བྱེད་ཕྱིས་ནས་སྲོག་གི་དབྱངས་འཇོག་པའི་རིགས་དང་། ཝིཎ་དང་ཀྭིཔྲ་སོགས་རྐྱེན་དབྱི་བར་བྱ་བའི་རིགས་སོགས་རྣམ་དབྱེ་མཐའ་ཡས་པ་དགོངས་པ་རིན་པོ་ཆེར་མངའ་བ་ལྟར་ལགས་ཤིང་། ཡང་ཀུན་བཤད་ཀྱི་རི་མོ་ལྟ་བུར་མཚོན་ན། ལེའུ་གཉིས་པའི། ཨ་རྒྱ་ཏ་ནཱི་ལ་སིཙའོ། །ཞེས་པ་ལ། དཔེར་ན། ཌུཀྲྀཉ྄་བྱེད་པའི་བྱིངས་ལའོའི་ཌུ་ཉ྄་རྗེས་འབྲེལ་ཕྱིས་པའི་ཀྲྀ་ལ། དེ་རིང་བྱུང་བ་ཕན་ཆད་ཙམ་འདས་པའི་དོན་ལ་ཨ་རྒྱ་ཏ་ནཱིའི་དི། ཨཱ་བརྒྱད་པར། བྱིངས་ཀྱི་དང་པོར་ཧྱ་སྟི་ནཱི་ཨ་རྒྱ་ཏ་ནཱི་བྱ་བ་ཤོར་བ་རྣམས་ལ་ཨཊའོ་ཞེས་པས་བྱིངས་ཀྱི་སྔོན་དུ་ཨཊ། ཊ་ཡིག་ཁྱད་དོན། ཨཱ་གཉིས་པར། ཨ་རྒྱ་ཏ་ནཱི་ལ་སི་ཙའོ། །ཞེས་པས། དིའི་སྔོན་དུ་སིཙ། སིཙ་ལས་ས་རསྨཻ་ལའོ་ཞེས་པས་ཨི་དང་ཙ་ཁྱད་དོན་དབྱི། ཨ་དྲུག་པར། དབྱངས་མཐའ་རྣམས་ཀྱི་སིཙ་ལ་ས་རསྨཻ་ལའོ། །ཞེས་པས་ཀྲྀའི་རྀ་ཡིག་ཨཱར། དེ་ཉིད་དུ། སིཙ་ལའོ་ཞེས་པས། སིཙའི་རྗེས་སུ་ཨཱིཊ། ཊ་ཁྱད་དོན། ཨ་བརྒྱད་པར། རྒྱུ་མཚན་ལས་རྐྱེན་དང་། རྣམ་འགྱུར་དང་ཨཱ་ག་མ་ལ་གནས་པའི་ཥ་ཉིད་དོ་ཞེས་པས་ས་ཥ། ཨ་དྲུག་པར། གསལ་བྱེད་ལས་དི་སི་དག་གོ་འདིའི་ཨི་ཁྱད་དོན། ནཱ་གསུམ་པར་རྫོགས་པ་ལ་ནའོས་ད་ཡིག་ཏ། གསལ་བྱེད་དྲངས་པས། ཨ་ཀཪྵི་ཏ་དེ་རིང་བྱས་སམ་ད་ནང་བྱས་ཟིན། ཞེས་པའོ། །ཡང་ཀུན་བཤད་བཞི་པར། གཉིས་ཀ་རྣམས་ཀྱི་ཨ་བྷྱཱ་པའི་ས་རོ྅ཀྵ་ལའོ། །ཞེས་པ་ལ་དཔེར་ན། གྲ་ཧ་ཉེ་བར་ལེན་པའི་བྱིངས་ལ། ལྐོག་ཏུ་གྱུར་པའི་འདས་དོན་ལ་ས་རོ྅ཀྵའི་ཨཊ། ཨ་གསུམ་པར་ཙཎ་ས་རོ྅ཀྵ་ཙེ་ཀྲཱི་ཡི་ཏ་སན་མཐའ་རྣམས་ལའོས་བྱིངས་གཉིས་སུ་བཞགཨ་བྷྱ་སའི་གསལ་བྱེད་དང་པོ་ལྷག་མར་བྱའོས་བྱིངས་སྔ་མའི་ཧ་ཕྱིས། གཉིས་ཀ་རྣམས་ཀྱི་སོགས་ཀྱི་མདོ་འདིས་ཨ་བྷྱ་སའི་ར་ཡིག་རྀ། རྀ་ཡིག་གི་ཨ་ཡིག་གོས་ར་ཨ། ཀ་སྡེའི་ཚ་སྡེ་འོས་གའང་ཛ་ཨཱ་དྲུག་པར། ཨིན་ཨིཙ་ཨཊ་རྣམས་ལ་ཨའི་ཨུ་པ་དྷཱ་རིང་པོ་སྟེ། ཞེས་པས་གྲ་རིང་། ཛ་གྲ་ཧ་ལྐོག་ཏུ་བླངས་ཟིན། ཞེས་པའོ། །
༈ ཡང་ཙནྡྲ་པའི་དེ་ཕན་གྱི་ནང་ལྟ་བུ་ནས་རྩ་བ་འདི་ཐད་ཀྱི་རི་མོ་དཀའ་བར་འདི་བཞིན་སྒྲུབས་ཞེས་དཔེར་བརྗོད་དང་བཅས་པ་གྱིས་ཕེབས་པ། སྔོན་གསོལ་ལྟར་ཙནྡྲ་པ་འདི་མདོ་དོན་རྒྱས་ཤིང་ཚིག་གོ་དཀའ་བ་དང་། ཞྭ་ཊཱིཀ་སོགས་བོད་འགྲེལ་དག་ཏུའང་མཐའ་གཅོད་དང་རི་མོའི་བྱ་བ་ཞིབ་ཆ་ཉུང་བར་མ་ཟད། ཕྲན་བུས་ཙནྡྲ་པའི་མདོའི་དབུ་ནས་ཡི་གེའི་བསྡུ་བ་ཙམ་དང་། ཏི་དནྟའི་ཡན་ལག་གི་བསྟན་བཅོས་ལ་བརྟེན་ནས་ཏིང་སོགས་ཀྱི་གོ་དོན་རགས་ཙམ་ལས་བསླབ་མ་མྱོང་གཤིས། ཁ་སང་ཕོ་བྲང་ཆེན་པོར་དགེ་བཤེས་ཆག་ཆོས་པའི་སྤྱན་སྔར་བསླབ་སྟོན་རིན་པོ་ཆེ་ལྟར་གོ་དོན་གྱི་རྒྱུ་མཚན་རགས་ཙམ་འབུལ་དུས་ཀྱང་། འགྲེལ་པ་དང་བསྟུན་ནས་འདི་ལྟ་བུ་ལ་འདི་དང་འདི་འདྲ་བའི་སྒྲུབ་ཚུལ་ཡིན་པ་འདྲ་ཞེས་ཀ་ལཱ་པ་སོགས་ནས་རིགས་འགྲེ་སྦྱར་ཏེ། དཔེར་མཚོན་ན། ཀ་ལཱ་པར་འགོ་བརྩམས་ནས་མཇུག་མ་རྫོགས་པའི་བར་ད་ལྟ་བ་འཇུག་བཞིན་པའི་དོན་ལ་ཝརྟ་མཱ་ན་ཞེས་འབྱུང་བ་ལ་ཙནྡྲ་པར་ལགས། དེ་བཞིན་དུ་ས་རསྨཻ་ལ་ཨ་ཏང་། ཨཱརྨ་ནེ་ལ་ཏ་ཞེས་སོགས་བརྡ་སྦྱོར་ཚུལ། དཔེར་ན་བརྟ་མཱ་ནའི་ས་རསྨཻའི་སྐྱེས་བུ་དང་པོའི་མང་ཚིག་ལྟ་བུར་མཚོན་ན། སཙ྄་འཚེད་པའི་བྱིངས་ལ། ད་ལྟར་བ་ལ་ལཊའོ་ཞེས་པས་ལཊ། ཊ་ཡིག་ནི། ཊ་འགྲོ་བ་ཏང་རྣམས་ཀྱི་ཨེཏའོ་ཞེས་པའི་རྟགས་དོན་ཡིན་པས་ཕྱིས། ལའི་སྲོག་གི་ཨ་ནི། བིད་ལས་ལཊའི་ཡང་ནའོ་ཞེས་པའི་རྟགས་དོན་ཡིན་པས་ཕྱིས། ལའི་ཏིཔྲ། ཏཔྲ། ཛྷི་ཞེས་པས་ལ་ཡིག་ཛྷི། ཨི་ཕྲལ། ཛྷ་ཡིག་ཛྷའི་ཨནྟའོ་ཞེས་པས་ཨནྟར་བསྒྱུར་ནས་ཨི་སྦྱར། ཀ་ལཱ་པར། ཨན་བི་ཀ་ར་ཎ་ཞེས་པའི་དོད་འདིར། བྱེད་པ་པོ་ལ་ཤསྲའོ་ཞེས་པས་ཤས྄་བྱིན། ཤ྄་ཡིག་ནི། སིཏ་སྨོན་པའི་ལིང་མ་ཡིན་པའི་ཏིང་ཤིཏ་ལའོ་ཞེས་པའི་རྟགས་དོན་གྱིས་ཕྱིས་ནས་སྲོག་གི་ཨ་བཞག །ས་ཡིག་ནི་ཤཔྲ་བྷྱནའོའི་རྟགས་དོན་གྱིས་ཕྱིས་ཙ྄་ཡིག་ཨ་ལ་སྦྱར་བས། ས་ཙནྟི། འཚེད་བཞིན། ཞེས་གྲུབ་པ་ལྟ་བུ་ཡིན་ཚུལ་སོགས་བརྡ་དང་ཆོ་གའི་ཁྱད་པར་རགས་ཙམ་ལས་རང་གིས་ཞིབ་ཏིག་སྦྱོང་མ་མྱོང་བ་དང་ཡུན་ཡང་ཐུང་བ་བཅས་ཐམས་ཅད་ལ་རི་མོ་འགྲོ་མི་འགྲོ་ནར་འདེད་ལྟ་བུའི་གཟིགས་ལོང་ཡང་མ་བྱུང་རུང་། སྔར་དབྱངས་ཅན་མ་སོགས་ལ་ཐུགས་བྱང་གཤིས་གཞུང་ཐུགས་ལ་བཟུང་ནས་འགྲེལ་པར་གཟིགས་རྒྱུན་མ་གཡེལ་བར་བསྐྱངས་ན་འགྲོ་བ་ཡོང་འགྲོའམ་སྙམ་དེ་ཁའི་ཞུ་འབུལ་ཞུས་པ་ལགས་རུང་། ད་ལམ་བསླབ་སྟོན་རིན་པོ་ཆེར་ཇི་བཞིན་པ་མ་རྟོགས་འདུག་ཚུལ་ཕེབས་པ་རྫིང་མེད་ཡུར་ཆུའི་དཔེ་ལྟར་ཕྲན་
བུ་རང་གིས་བསླབ་སྦྱོང་མ་མྱོང་གཤིས་སློབ་མ་ཐུགས་རབ་ཇི་ལྟར་ཆེའང་གནད་ཁྲོལ ་བ་དཀའ་བ་ཆོས་ཉིད་ལགས་པ་དང་། དེ་ཕན་གྱི་སྐོར་སྒྲ་མདོ་འདིར་སྐབས་གཉིས་པའི་རྐང་པ་བཞི་པ་ནས་སྐབས་བཞི་པའི་རྐང་པ་བཞི་པའི་བར་རྐང་པ་དགུས་རྒྱས་པར་གསུངས་འདུག་ལགས་ནའང་། ཕྲན་བུས་སྔར་རི་མོ་མཐར་ཆགས་མ་བརྒྱབ་གཤིས་དེ་ཁྲོད་ནས་གཞུང་ཚིག་གང་དཀའ་རང་ཞིབ་ཏིག་འབུལ་རྒྱུས་ཕོངས་པར་མཆིས་ལགས་རུང་མཚོན་དོན་ཙམ་དུ་ཕུལ་བ་ལ་གོང་དུ་ཨཎའོ། །ཞེས་པ་ལ་དཔེར་ན། ཨུ་པ་དགུ། ཞེས་པར་འདིས་ཨཎ། ཀིཏ྄་ལའང་བུ་རྒྱུད་ལ་སོགས་པ་ལ་ཨཙ་རྣམས་ཀྱི་དང་པོའིའོ། །ཞེས་པའི་འང་སྒྲས། ཉིཎཏ་ལའང་དང་པོའི་ཨིཏ་ཀྱི་ཨེཙ་སྟེ་ཨུ་ཡིག་ཨཽ། ཨུཏ་ཀྱི་ཨོཏ་དོས་གུའི་ཨུ་ཨོ། ཨེཙའི་ཨ་ཡུ་ཨཝ྄། ཞེས་པས་གོའི་ཨོ་ཨཝ྄། དོན་ཙམ་ལ་དང་པོའོ་ཞེས་པས་སུ། ས་ཛུཥའི་རུ་འོས་སུ་རུ། ཨུ་ཡིག་ཨཏ་ལས་ཧ་ཤ་ལའང་རུའོས་རུའི་ཨུ་ཡིག་རྟགས་དོན་ཕྱིས། རྫོགས་པ་ལ་རྣམ་པར་བཅད་པའོས་ར་རྣམ་བཅད་བྱས་པས། ཨཽ་ས་ག་ཝཿཞེས་པ་ལྟ་བུ་དང་། ཡང་སྐབས་གསུམ་པའི་རྐང་པ་དང་པོར། ལཀྵཱ་རོ་ཙ་ན་ལས་ཋཀའོ། །ཞེས་པ་ལ། ལཀྵཱར་འདིས་ཋཀ྄ཨཱཏ་ལས་ཨེཙེའི་དོན་གྱིས་ཀ་ཕྱིས། ཋ་ཡིག་ཨི་ཀར་བསྒྱུར། མཐའི་ཨཙ་སོགས་དབྱི་བས་ཀྵཱའི་སྲོག་ཕྱིས་དོན་ཙམ་ལ་དང་པོའོས་སུ། མ་ནིང་ལས་སུ་ཨམ྄་དག་གོ །ཨཏ་ལས་ཨམ྄འོ། །ཞེས་པས་སུ་ཨམ་དུ་བསྒྱུར་ཏེ་སྦྱར་བས། ལཀྵི་ཀཾརྒྱ་སྐྱེགས་ཀྱིས་བཙོས། ཡང་སྐབས་གསུམ་པའི་རྐང་པ་གསུམ་པར། ཛི་ཧྭ་མཱུ་ལ་ཨཾ་གུ་ལི་ལས་ཚའོ། །ཞེས་པར། ཛི་ཧྭ་མཱུ་ལར། འདིས་ཙ་བྱིན། ཚ་ཨཱི་ཡ། མཐའི་ཨ་ཙ་སོགས་ཕྱིས། དོན་ཙམ་ལ་དང་པོའི་སུ། དེའངདུ། ཨུ་ཕྱིས། ར་རྣམ་བཅད། ཛི་ཧྭ་མཱུ་ལཱི་ཡཿལྕེ་རྩ་ཅན། ཡང་སྐབས་བཞི་པར། ཏི་ཤད་མ་ཡིན་པའི་གྲངས་ལས་ཀནའོ། །ཞེས་པར། པཉྩ་ལ། འདིས་ཀན་བྱིན། ན་དབྱངས་དོན། དང་པོའི་སུ། པཉྩ་ཀཿལྔ་པར། ཡང་། ཥ་ཥ་ལས་ཎྱཏ་ཀྱང་ཡང་ནའོ། །ཞེས་པར། ཥཎྨཱ་པ། འདིས་ཎྱཏ། ཎ་དང་ཏ་རྗེས་འབྲེལ་དང་། མཐའི་ཨཙ་ཕྱིས། སུ་བྱིན་ཏེ་སྦྱར་བ། ཥཎྨཱ་སྱཿསྐྱེས་ནས་ཟླ་བ་དྲུག་སོང་། ཡང་། ཙ་ཏུཪྺཪྞྞ་ལ་སོགས་པ་རྣམས་ཀྱི་རང་དོན་ལའོ། །ཞེས་པར། ཙཱ་ཏུརྦྦརྞྞ་དང་། ཏྲི་ལོ་ཀ་གཉིས་ལ། འདིས་ཥྱཉ། ཉ་ནི་ཨཱཏ་ལས། ཨཻ་ཙས་ཕྱིས། ཥ་ནི་ཥིཏ་ལས་ཌཱི་ཥས་ཕྱིས། མཐའི་ཨཙའང་ཕྱིས། སྔ་མ་ལ་སུ་བྱིན་པ། ཨཏ་ལས་ཨ་མྲའོས་ཨམ྄། ཕྱི་མའི་ཏྲའི་ཨི་ཡིག །དང་པོའི་ཨིད་ཀྱི་ཨིཙ་བྱས་པས། ཙཱ་ཏུརྦྦརྞྱཾ་རིགས་བཞི། ཏྲཻ་ལོ་ཀྱ། འཇིག་རྟེན་གསུམ། དཔེར་བརྗོད་སྔ་མའི་ཝ་དང་ཎ་ཉིས་བརྩེགས་ནི། ཨཙ་ལས་ར་ཧ་ལས་གཉིས་སོ། །ཞེས་པའི་དོན་ནོ། །མ་གི་རྒྱན་ལའོ། །ཨི་བརྗོད་དོན། ཨི་དིཏ་ཀྱི་ནུམ྄་འོས་ནུམ྄་ཨཱ་ག་མ། ཨུཾ་རྗེས་འབྲེལ་ཨུཎའི་ཨ་ལ། མ་ན་དག་གི་དྷུཊ་ལ་རྗེས་སུ་ང་རོ། དེའི་མཐར་བྷུ་ཡོད་པ་ལའོ། །སྨོན་པའི་དོན་ལ་པཉྩ་མའི་ཏུ། བྱེད་པ་པོ་ལ་ཨན་ཏེ་བི་ཀ་ར་ཎ། བི་ཀ་ར་ཎ་ཉིད་ལ་ཨན་ཉིད་ལའོས་ན་ཕྱིས། ནཱ་མའི་མཐའི་བྱིངས་དང་བི་ཀ་ཎ་དག་གི་ཡོན་ཏན་ནོས་ཨུ་ཨོ། ཨོ་ཨཝ། དྲངས་ཏེ་སྦྱར་བས། མཾ་ག་ལ་བྷ་བ་ཏུ། ཞེས་པ་བཀྲ་ཤིས་པར་གྱུར་ཅིག་ཅེས་ཤིས་བརྗོད་ཀྱིས་མཐའ་བརྒྱན་ཏེ། རང་བློས་ཇི་ལྟར་རྟོགས་པ་ཙམ་ཞིག་གི་དཔེར་བརྗོད་མདོ་ཙམ་ཕུལ་བར་རྨོངས་བློའི་དྲི་མས་ནོར་འཁྲུལ་དུ་གྱུར་པ་རྣམས་ཆོས་དབྱིངས་རྙོག་པ་མེད་པའི་ཀློང་དུ་བཟོད་བཞེས་དང་། ཀུན་ཏུ་བརྩེ་ཆེན་ཡེ་ཤེས་ཀྱི་སྤྱན་རས་མཆོག་གིས་བཙའ་བ་ལས་ནམ་དུའང་ཡོལ་བ་མེད་པར་ཐུགས་རྗེས་བཟུང་དུ་གསོལ། ཞེས་ལྷ་རྫས་དྲི་མ་མེད་པའི་དར་གྱི་ཁྱོགས་ལ་བཏེག་སྟེ་སྒོ་གསུམ་གུས་པས་ཚེས་དགུའི་སྔ་དྲོ་ཕུལ་བའི་ཞུ་ཡིག །
༈ མདོ་སྨད་གྲོ་ཚང་ཆོས་རྗེའི་ཞུ་ལན་དུ་ཕུལ་བ། མཁྱེན་བརྩེའི་བདག་ཉིད་མཚུངས་བྲལ་བཤེས་གཉེན་དམ་པ་མཆོག་གི་ཞབས་དྲུང་དུ། ཞུ་བ། དེང་སྔོན་གོམས་ལེགས་བྱས་ཀྱིས་མངོན་པར་བསྒྲུབས་པའི་སྐུ་རིན་པོ་ཆེ་བཙོ་སྦྱངས་ཀྱི་གསེར་ལྟར་བཟང་ཞིང་། བཤད་སྒྲུབ་ཀྱི་འཕྲིན་ལས་རླབས་པོ་ཆེ་མཁའ་ལྟར་ཡངས་པས་བསྟན་འགྲོའི་དཔལ་ཡོན་མཆོག་ཏུ་འཚོ་ཞིང་གཞེས་པ་ནས། དག་པའི་སྣང་བ་རྨད་དུ་བྱུང་བའི་སྤྱན་རས་ཀྱི་གཟིགས་པས་མངོན་པར་དྲངས་པའི་ཆབ་ཤོག་བཟང་གོས་ཀྱི་འགན་ཕྱར་ཁྱད་དུ་མཚར་བ་དང་བཀྲ་ཤིས་རྟགས་ཀྱི་རེ་ཁཱ་བཀྲ་བའི་ལྷ་རྫས་བཟང་པོའི་གནང་རྟེན་བཅས་ཉམས་མེད་ཕེབས་པས་ཡིད་ཀྱི་གདུང་སེལ་ཟླ་མེད་པའི་བཀའ་དྲིན་དུ་ཐོབ། འདིར་གནས་དགེ་སློང་རྒན་པོའང་གསར་འཚེ་མེད་ཅིང་འཆད་ཉན་དུ་བཏགས་པའི་རྣམ་གཡེང་ལ་སྤྱོད་བཞིན་པའི་གནས་སྐབས་མཐུན་པ་ཙམ་དུ་ལགས། མཚམས་ཞུས། གསར་རྩོམ་གྱི་སྡེབ་སྦྱོར་འགྲེལ་པ་དགོས་ཚུལ་ཕེབས་པ་དཔེ་འདི་བཞིན་བཤེས་གཉེན་ཆག་པ་ཆོས་འཕེལ་གྱི་ཕྱག་བྲིས་ལགས་ནའང་། གཞན་གྱིས་སྤོད་ནས་ཤར་བྲིས་སུ་གནང་བས་ཧ་ཅང་དག་པ་རང་མི་འདུག་རུང་འཕྲལ་སེལ་ཙམ་དུ་ཐུགས་ཕན་ཐོགས་རེ་དང་། རང་མཐུས་གང་སྤོབས་ཀྱིས་བཀྲལ་བའི་ཚེ་གཟུངས་དང་རྣམ་རྒྱལ་མའི་གཟུངས་ཀྱི་བྱིངས་སྒྲུབ་བྱ་ཚུལ། བྱིན་རྟེན་ལེ་ཚན་བཅས་འབུལ་ལམ་ཞུས་པ་སྤྱན་མཚོར་སྨིན་པ་དང་། དཔག་བསམ་འཁྲི་ཤིང་ལ་མཆན་འགྲེལ་ཡོད་པ་མ་མཐོང་ཞིང་། དེབ་སྔོན་གྱི་དཔེའང་ལག་ཏུ་ཐེབ་ཁྲོལ་མེད་པས་ད་རེས་འབུལ་མ་ཐུབ་པར་རྣམ་མཁྱེན་ཁྲེལ་བ་མི་འཇུག་ངོས། སླད་མའི་ཆར་ཡང་གང་དུ་དཔག་བསམ་གྱི་ལྗོན་ཤིང་རྩ་བ་བརྟན་པ་དེ་སྲིད་དུ་དེ་ལས་དགོས་འདོད་འབྱུང་བ་ཆོས་ཉིད་ལགས་པ་ལྟར། བསྟན་འགྲོའི་དཔལ་དུ་སྐུའི་དཀྱིལ་འཁོར་གསལ་འགྲིབ་མེད་པར་བརྟན་ཞིང་རྣམ་པར་དཀར་བའི་འཕྲིན་ལས་རླབས་པོ་ཆེ་ཡར་ངོའི་གང་བ་ལ་འགྲན་པའི་ཆེད་དུ་འགལ་སྤོང་མཐུན་སྒྲུབ་ཀྱི་རྟེན་འབྲེལ་བདག་གིར་བཞེས་པ་དང་། བརྩེ་བས་མི་བསྐྱུད་པའི་ཕེབས་ཚོགས་ཀྱང་ལྷའི་འབབ་ལྡན་གྱི་རྒྱུན་ལྟར་སྩོལ་བ་མཁྱེན་མཁྱེན། ཞེས་འདེགས་རྟེན་མཚོན་བྱེད་དབུ་ཞྭ། འཇམ་ཕྲུགས་བུབས། ཞྭ་སྣམ་བཅས་རྒྱལ་བའི་ཆོ་འཕྲུལ་མཆོད་པའི་དུས་དགེ་བ་ལ་ཕུལ་བའི་ཞུ་ཡིག །
༈ ལགས། ཚེ་དཔག་མེད་ཀྱི་མཚན་བརྒྱའི་གཟུངས་དང་། རྣམ་རྒྱལ་མའི་གཟུངས་ཀྱི་བྱིངས་སྒྲུབ་དགོས་ཚུལ་ཕེབས་པ་སྒྲུབ་ལུགས་མདོ་ཙམ་ཀ་ལཱ་པ་ལྟར་བྲིས་ནས་འབུལ་བ་ལ། ཐོག་མར་ཚེ་གཟུངས་ནི། ཨ་ཝ་དང་རཀྵ་བསྲུང་བ་ལའོ། །ཞེས་པའི་བྱིངས་ཀྱི་བའི་ཨ་ཡིག་བརྗོད་དོན་གྱི་ཕྱིས། ཨ་བ་ལ་ཨཏ྄་ལས་མ་ནིན་འོས་རྐྱེན་མ་ནིན྄། ཨིན་བརྗོད་དོན། ཨ་བ་ཏིའི་མཐའ་དབྱིའོས་ཨན྄་ཕྱིས། ཚ་བ་དག་གི་ལྔ་པ་ལ་ཤ་ཨཱུའོས་ཝ་ཨཱུཊ། ཤྲི་བི་ཨ་བི་མ་བི་ཛྭ་རི་ཏྭ་ར་རྣམས་ཀྱི་ཨུ་པ་དྷཱའིའང་ངོས་ཨའང་ཨཱུཊ། ཨ་ཡིག་ལ་ཨཱུཊའི་འཕེལ་བའོས་ཊ྄་གཉིས་ཕྱིས། མཚུངས་འདྲ། ནཱ་མིའི་མཐའི་བྱིངས་ཡོན་ཏན་དུ་འགྱུར་བས་ཨོ་འཇིག་རྟེན་པའི་ཉེར་སྤྱོད་ཀྱིས་མ྄་ང་རོ། ༀ་ཞེས་གྲུབ་སྟེ། རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་གསུངས་ཏེ། མཆོག་དང་། ནོར་དང་། དཔལ་དང་། གཏེར་དང་། གཡང་རྣམས་རིམ་བཞིན། དངོས་གྲུབ་དང་། ལོངས་སྤྱོད་དང་། དབང་ཕྱུག་དང་། བསོད་ནམས་དང་། ལུས་སེམས་བདེ་བ་མྱོང་བ་ལྔ་སྒྲུབ་པར་བྱེད་དེ། དོན་ལ་ཡེ་ཤེས་ལྔ་ཡིན་ཞིང་། དམ་བཅའ་བ་སྟེ་མི་འགྱུར་བ་དང་། བཀྲ་ཤིས་པ་དང་། རིག་སྔགས་ཀྱི་ནོར་བུ་འཛིན་པ་སྟེ། སྙིང་པོ་རྟག་ཏུ་དགེ་བས་སྔགས་སྤྲུལ་ཞིང་སྔགས་བཟླས་པ་དེ་རྟོགས་པར་བྱེད་པའི་ཕྱིར། དོན་མཐར་ཕྱིན་པར་འགྱུར་བས་ན། སྔགས་ཀྱི་འགོ་འདྲེན་དུ་སྨོས་སོ། །ཎ་མ་རབ་ཏུ་འདུད་པ་དང་སྒྲ་ལའོ། །ཨ་བརྗོད་དོན། བྱིངས་ཀྱི་དང་པོ་ན་ཎ། ཎ་མི་ལས་ཨ་སུན་གྱི་རྐྱེན། ཨུན་རྗེས་འབྲེལ། རྟགས་ཀྱི་དོན་ལ་དང་པོའི་སི། གསལ་བྱེད་ལས་ཀྱང་ངོས་སི་ཕྱིས། རེ་ཕ་དང་ས་དག་གི་རྣམ་བཤད། ན་མཿཞེས་གྲུབ་སྟེ། ཕྱག་འཚལ་ལོ། །བྷ་ཛ་བསྟེན་པ་ལའོ། །གྷཉ྄། ཉ་རྗེས་འབྲེལ། ཙ་ཛ་དག་གི་དྷུཊ་དང་གི་མདོས་ཛ་ག །དེ་གྷ་ཕྱིས་ནས་སྲོག་གི་ཨ་བཞག་པ་ལ་དྲངས་པས། བྷ་ག །གྲུབ་སྟེ། བཅོམ་པའམ་ལེགས་པ། དེ་འདིའི་ཡོད་པ་སོགས་ཀྱིས་བྷ་ག་ལ་ཝནྟུ་བྱིན། ཨནྟུ་དང་ཨཔ྄་མཐའི་ཨུ་ཕྱིས། བཞི་བའི་ངེ་། ད྄་ཕྱིས་ཨ་བཞག །ཨ་ནུ་ཥངྒ་ཕྱིས། ཏ྄་ཨེ་ལ་དྲངས་པས། ཝ་ཏེ་གྲུབ་སྟེ། ལྡན་པ་ལ། ན་མཿའི་རྣམ་བཅད་ཨ་དང་སྒྲ་ལྡན་ལས་ཨུ། ཨུའི་ཡི་གེ་ལ་ཨོ་བྱས་པས། ན་མོ་བྷ་ག་ཝ་ཏེ། མ་འཇལ་བ། ཀྟ་བྱིན་ལ་ཀ྄་ཕྱིས། དྱ་ཏི་སྱ་ཏི་སོགས་ཀྱི་མ྄་མི་སྔོན་དུ་མི་ཟད་པའི་ནཉ྄་བཞག །ཉ྄་ཕྱིས། དེའི་སྐྱེས་བུ་ན་དབྱི་འོས་ན྄་ཕྱིས་ཏེ་སྲོག་གི་ཨ་བཞག་པའི་མཐར་ས་རི། སི་བྱིན་པ་མི་ཟད་པ་ལས་འཇིགས་པས། ཨ་པ་རི་མི་ཏ། གྲུབ་སྟེ། དཔག་ཏུ་མེད་པ། ཨི་ཎ། འགྲོ་བ། ཎ་ནི་ཨིཎའི་གའོས་ཕྱིས། ཨིན་ལ་ཨུ་སིའོས། ཨུ་སི་བྱིན། ཨི་རྗེས་འབྲེལ། ཨིཎའི་ཨི་འཕེལ་བ། ཨཻ་ཨཱཡ྄། ཡ྄་ཨུ་ལ་དྲངས། སི་གསལ་བྱེད་ལས་ཕྱིས། སྲ་རྣམ་བཅད། ཨཱ་ཡུཿགྲུབ་སྟེ། ཚེ་ཛྙཱ་ཁོང་དུ་ཆུད་པ། ཨུ་ན྄་ཊ྄་ཕྱིས། ཡུ་ཨ་ན། མཚུངས་འདྲ། ཛྙཱ་ན། གྲུབ་སྟེ། ཡེ་ཤེས། ཡུཿའི་རྣམ་བཅད་ནཱ་མི་གྱི་ཕ་རོལ་ར྄། ར྄་ཛྙཱ་ལ་དྲངས་པས། ཨཱ་ཡུརྫྙཱ་ན་སྟེ། ཚེ་དང་ཡེ་ཤེས། ཙེཉ་སོགས་པ་ལའོ། །དངོས་པོ་ལ་ཀྟ། ཀ྄་རྗེས་འབྲེལ། བྱིངས་ཀྱི་སྔོན་དུ་ཉེར་བསྒྱུར། སུ། བི། ནིར྄། དེ་གསུམ་ཀ་ལ་སི་བྱིན་པ་མི་ཟད་པ་ལས་འཇིག །ནིར྄་གྱི་ར྄་རྣམ་བཅད། རྣམ་པར་བཅད་བྱ་ཙའམ་ཚ་ལ་ཤ྄དྲངས་པས། སུ་བི་ནི་ཤྩི་ཏ་གྲུབ་སྟེ། ཤིན་ཏུ་རྣམ་པར་ངེས་པ། ཏི་ཛ་རྣོ་བ་ལ། ཨ་སུན྄་བྱིན། ཨུན྄་བརྗོད་དོན། ཨུ་པ་དྷཱ་ནཱ་མིའི་ཡོན་ཏན་གྱིས་ཏེ། སི་གསལ་བྱེད་ལས་ཕྱིས། རྐྱེན་གྱིས྄་རྣམ་བཅད་ཏེ་ཛཿར་ཛ྄ྀར་གསལ་བ་ལ། རྀ་རྗེས་འབྲེལ། གྷ་རྐྱེན། ཙ་ཛའི་མདོས་གྷཱ་ཕྱིས་ཨ་བཞག །ཨ་དང་སྒྲ་ལྡན་དག་གིས་རྣམ་བཅད་ཨུ། ཨུའི་ཡི་གེ་ལ་ཨོ། དེ་བྱིན། ངེ་ཡ། ཨ་ཡིག་སྒྲ་ལྡན་ལ་རིང་པོར་བྱས་པས། ཏེ་ཛྭ་རཱ་ཛཱ་ཡ་གྲུབ་སྟེ། གཟི་བརྗིད་ཀྱི་རྒྱལ་པོ་ལ། ཏ་ནུ་རྒྱས་པ། ཨུ་བརྗོད་དོན། ཡ་མི་ཏ་ནི་དག་ལས། ཌ་དིཀ྄་གོས། ཌ་དིཀ྄་གྱི་རྐྱེན། ཨིཀ྄་དང་ཌ་རྗེས་འབྲེལ། ཌ་རྗེས་སུ་འབྲེལ་བ་ཞེས་པས་ཏའི་སྲོག་དང་ན་ཕྱིས། ཏ྄་ཨ་ལ་དྲངས་པས། ཏ྄ད། རྣམ་པ་བརྗོད་པ་ལ་ཐཱ། ཏྱད་སོགས་ཀྱི་རྣམ་དབྱེ་ལ་ཨའོས་ད྄་ཨ། ཨ་ཡིག་དབྱིའོས་ཏའི་སྲོག་ཕྱིས། དྲངས་པས། ཏ་ཐཱ། སི་བྱིན། ཤྲདྡྷཱ་ལས་སི་ཕྱིས། གམླྀ་འགྲོ་བ་ལ། ལྀ་ཕྱིས་དངོས་པོ་ལ་ཀྟ། ཀ྄་རྗེས་འབྲེལ། ར་ལས་དབྱི་བར་བྱ་བ་དག་གོས། མ་ཕྱིས། ག་ཏ། དེ་བྱིན། ངེ་ཡ། སྒྲ་ལྡན་ལ་རིང་། ཏ་ཐཱ་ག་ཏཱ་ཡ། གྲུབ་སྟེ། དེ་བཞིན་གཤེགས་པ་ལ། ཨརྷ་མཆོད་པ་ལའོ། །ཝརྟ་མཱ་ནའི་མདོས་ཤནྟྲྀང་བྱིན། རི་ཕྱིས། ཤ྄་ཕྱིས། སའི་སྲོག་ཨ་བཞག །དེ་བྱིན། ད྄་ཕྱིས་པའི་སྲོག་གི་ཨེ། ཨ་ནུ་ཥངྒ་ཕྱིས། རིམ་པར་དྲངས་པས། ཨརྷ་ཏེ། གྲུབ་སྟེ། དགྲ་བཅོམ་པ་ལ། ཡཛྲ་ལྷ་མཆོད་པ། སམ྄་སྔོན། ཀྭིས྄་བྱིན་ས་ཕྱིས། སི་བྱིན། ཙ་ཛ་དག་གིས་ཛ་ག །སི་གསལ་བྱེད་ལས་ཕྱིས། རྫོགས་པ་ལ་ཡང་ནའོས་ག྄་ཀ྄མ྄་ཡ་ལ་དྲངས་པས། སམྱཀ་གྲུབ་སྟེ། ཡང་དག་པར། བུདྡྷཱ་ཁོང་དུ་ཆུད་པ་སམ྄་སྔོན། ཀྟ། ཀ྄་རྗེས་འབྲེལ། གྷ་ཌྷ་དྷ་བྷ་སོགས་ཀྱིས་ཏ་དྷ། དྷུཊ་རྣམས་ཀྱི་བཞི་པ་རྣམས་ལ་གསུམ་པའོས་དྷ་྄སྔ་མ་ད྄། ངེ་བྱིན། ངེ་ཡ། སྒྲ་ལྡན་ལ་རིང་། སཾ་བུདྡྷཱ་ཡ། གྲུབ་སྟེ། རྫོགས་པའི་སངས་རྒྱས་ལ་དེ་དག་བསྡེབས་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དང་ཡེ་ཤེས་དཔག་ཏུ་མེད་པ་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་པོ་ལ་ཕྱག་འཚལ་ལོ། །ཞེས་དེ་དག་ནི་ཕྱག་འཚལ་བའི་སྔགས་སོ། །ཏ་ནུ་རྒྱས་པ། ཡ་མུ་འགག །ཨུ་གཉིས་རྗེས་འབྲེལ། ཏ་ནི་ཡ་མི་དག་ལ། ཌཱ་དིཀ྄འོས་ཌ་དིཀ྄་རྐྱེན། ཨིཀ་ཕྱིས། ཌཱ་རྗེས་འབྲེལ་གྱི་སྲོག་གི་ཨ་བཞག །ཌཱ་རྗེས་སུ་འབྲེལ་བ་ལ་མཐའི་དབྱངས་སོགས་དབྱི་འོས། བྱིངས་ཀྱི་ཨན྄་དང་ཨམ྄་ཕྱིས། ཌའི་ཨ་ལ་དྲངས་པས། ཏད྄་ཡད྄་རྣམ་པར་བརྗོད་པ་ལ་ཐཱ་བྱིན། ཏད྄་སོགས་ཀྱི་ཡད྄་ཀྱི་དྲ་ཨ་དབྱི། དྲངས་པས། ཏདྱ་ཐཱ། ཞེས་གྲུབ་སྟེ། འདི་ལྟ་སྟེ། ༀ་སྔར་བཞིན། པུ་ཎ་དགེ་བ་ལ། པུ་ཎ་ལས་ཀྱན་འོས། ཀྱན། ན་རྗེས་འབྲེལ། ཀ྄་ཕྱིས། དྲངས། བུད་མེད་ལ་ཨ་ལས་ཨཱས྄། བོད་སི་བྱིན། སམྦུདྡྷི་ལའང་ངོས་རྟགས་མཐའ་ཨེ། ཐུང་ངུ་ན་དི་སོགས་ཀྱིས་སི་ཕྱིས་པས་པུཎྱེ། གཉིས་ཏེ། བསོད་ནམས་མ་བསོད་ནམས་མ། ཡང་པུཎྱེ་གྱི་གོང་དུ། མ་ཧི་མཆོད་པའི་སྲོག་གི་ཨི་ཕྱིས་པ་ལ། རྐྱེན་ཤིནྟྲིང་བྱིན། ཤ྄་རི་ད྄་གསུམ་ཕྱིས་ནས་ཨནྟ་བཞག་པ་ལ། དྲངས་པས། མ་ཧནྟ། བརྩེགས་པའི་མཐའ་དང་ན྄་ཕྱིས། གཞི་མཐུན་ཚིག་ལ་ཨཱའི་ཡི་གེར་བྱས་པས། མཧཱ་སྟེ། མ་ཨཱ་པུཎྱེ། བསོད་ནམས་ཆེན་མོ། ཨ་པ་རི་མི་ཏ་གོང་དུ་བཞག་པས། བསོད་ནམས་དཔག་ཏུ་མེད་མ། ཡང་པུཎྱ་ལ་ཨཱས་མ་བྱིན་པར། གོང་དུ་ཨ་པ་རི་མི་ཏ་བཞག་པ་དང་། ཛྙཱ་ན་སྔར་བཞིན། ཌུ་བྷྲྀཉ་འཛིན་པ། ཌུ་དང་ཉ྄་རྗེས་འབྲེལ། གྷཉ་རྐྱེན། ཙ་ཛའི་མདོས་རྀ་འཕེལ་བ་ཨཱར། གྷ྄་ཕྱིས་སྲོག་གི་ཨ་བཞག་པ་ལ་ར྄་དྲངས། སམ྄་སྔོན། སཾ་བྷཱ་ར་སྟེ། ཚོགས། ཙིཉ་སོག །ཀྟ། ཀ྄་དང་ཉ྄་ཕྱིས། ཉེར་བསྒྱུར་ཨུ་པ་སྔོན། མོ་རྐྱེན་ཨཱས྄། བོད་སི། རྟགས་མཐའ་ཨེ། ཐུང་ངུ་སོགས་ཀྱིས་སི་ཕྱིས། ཨུ་པ་ཙི་ཏེ། ཨུའི་ཡི་གེ་ཨོ་བྱས་པས། ཨ་པ་རི་མི་ཏ་པུཎྱ་ཛྙཱ་ན་སཾ་བྷཱ་རོ་པ་ཙི་ཏེ། ཞེས་གྲུབ་སྟེ། བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་ཉེ་བར་བསགས་མ། ཞེས་པའོ། །པུཎྱེ་དང་ཙི་ཏེ་ཞེས་མོ་རྟགས་རྣམས་ནི་གསང་སྔགས་དང་། གཟུངས་སྔགས་གཉིས་ཀྱི་ཟླས་ཕྱེ་བའི་གཟུངས་སྔགས་ཡིན་པའི་དོན་ཏེ། ཤེས་རབ་ཀྱི་ཕྱོགས་ཀྱི་སྔགས་མཚོན་པ་ལས་ལྷ་མོའི་རྣམ་པར་སྟོན་པའི་ངེས་པ་མེད་དོ། །ཡང་ༀ་སྔར་བཞིན་པྲྀ་འགྲོ་བ་ལ། སརྟི་ལས་བའི་རྐྱེན། ནཱ་མི་ཡོན་ཏན་རྀ་ཨར྄། དྲངས་པས། སརྦ་སྟེ་ཐམས་ཅད། ཌུ་ཀ྄ི་ཉ་བྱེད་པ་ལའོ། །དངོས་པོ་ལ་གྷཉ། སམ྄་སྔོན། སཾ་པ་རི་ཨུ་པ་ལས་རྒྱན་ལ་སུཊ་འོས། སུཊ་ཨཱ་ག་མ་ཊ་དང་ཨུ་རྗེས་འབྲེལ། ཙ་ཛ་ས་རི་འཕེལ་བ་ཨཱར། ར྄་ཡིག་གྷའི་སྲོག་གི་ཨ་དང་། ས྄་ཡིག་ཀ་ལ་དྲངས་པས། སཾ་སྐཱ་ར། གྲུབ་སྟེ། འདུ་བྱེད། པ་རི་སྔོན་མའི་ཤུདྡྷ་དག་པ་ལ། ཀྟ། ཀ྄་རྗེས་འབྲེལ། ཏ་དྷ་དྷ་སྔོན་མ་ད། དྲངས་པས། པ་རི་ཤུདྷ། གྲུབ་སྟེ། ཡོངས་སུ་དག་པ། ཌུ་དྷྲྀཉ་འཛིན་པ་ལ། ཨརྟི་ཧུ་སུ་དྷྲྀ་ཎཱྀ་པད་བྷཱ་ཡ་སྟུད་རྣམས་ལས་མའོས་མ་རྐྱེན། ནཱ་མིའི་མཐའི་བྱིངས་ལ་ཡོན་ཏན་རྀ་ཨར྄། དངོས་པོ་ལ་ཏ་ཏྭ་དག་གོས་ཏ། མོ་རྐྱེན་ཨཱས། མཚུངས་འདྲ། བོད་སི། སམྦུདྡྷི་ལའང་ངོས་རྟགས་མཐའ་ཨེ། ཐུང་ངུ་ན་དི་སོགས་ཀྱིས་སི་ཕྱིས་པས། དྷརྨ་ཏེ། གྲུབ་སྟེ། ཆོས་ཉིད་མ། གམླྀ་འགྲོ་བ་ལ། ཡུཊ་ལྀ་དང་ཊ྄་རྗེས་འབྲེལ། ཡུ་ཨ་ན། ག་མི་ལས་ག་ཀས་བར་རྐྱེ་ནག་ཀ་བྱིན། གའི་སྲོག་གི་ཨ་དང་ཀ་ཕྱིས། དྲངས་པས། ག་ག་ན་འགྲུབ་སྟེ། ནམ་མཁའ། སམ྄་དང་། ཨུཏ་སྔོན་མའི་གམླྀ་འགྲོ་བ་ལྀ་རྗེས་འབྲེལ། ཀྟ། ར་ལས་སོགས་ཀྱིས་མ་ཕྱིས། མོ་རྐྱེན་ཨཱས། བོད་སི། རྟགས་མཐའ་ཨེ། སི་ཕྱིས་པས། ས་མུངྒ་ཏེ། གྲུབ་སྟེ། ཡང་དག་པར་འཕགས་མ། སྭ་སྔོན་མའི་བྷཱུ་ཡོད་པ་ལ། གྷཉ་བྱིན། རྗེས་འབྲེལ་ཕྱིས་ཏེ་ཨ་བཞག །བྱིངས་མཐའ་ཨུའི་འཕེལ་བ་ཨཽ། ཨཽ་ཨཱཝ྄། དྲངས་པས། སྭ་བྷཱ་བ་གྲུབ་སྟེ། རང་བཞིན། བི་སྔོན་མའི་ཤུདྷ་དག་པ་ལ། ཀྟ་བྱིན། ཀ྄་ཕྱིས་ཏ་དྷྱ། དྷ་སྔ་མ་ད། ཨཱས྄། བོད་སི། རྟགས་མཐའ་ཨེ་སི་ཕྱིས་པས། བི་ཤུདྡྷེ་གྲུབ་སྟེ། རྣམ་པར་དག་མ། ཎཱིཉ྄་ཐོབ། ཉ ྄་ཕྱིས། བྱིངས་ཀྱི་དང་པོ་ཎའི་ན། དངོས་པོ་ལ་ཨཙ྄། ནཱ་མའི་ཡོན་ཏན་ཨཱི་ཨེ། ཨེ་ཨཡ྄། དྲངས། སྔོན་དུ་མ་ཧནྟ་བཞག་སྟེ། གཞི་མཐུན་པའི་བསྡུ་བས། མ་ཧཱ་བྱས་པས། མཧཱ་ན་ཡ། གྲུབ་སྟེ། ཚུལ་ཆེན་པོ། པ་རི་སྔོན་མའི་བྲྀཉ་སྒྲིབ་པའི་བྱིངས། ཉ྄་ཕྱིས། རྐྱེན་གྷཉ། གྷ྄་དང་ཉ྄་ཕྱིས་ནས། གྷའི་སྲོག་གི་ཨ་བཞག །ནཱ་མིའི་ཡོན་ཏན་རྀ་ཨར྄། དྲངས། མོ་རྐྱེན་གྱི་ཨཱས྄། བོད་སི། རྟགས་མཐའ་ཨེ། སི་ཕྱིས། པ་རི་ཝ་རེ། གྲུབ་སྟེ། ཡོངས་སུ་བསྐོར་བ་མ་སྟེ། ཀུན་ཏུ་ཁྱབ་པའོ། །ཉེར་བསྒྱུར་སུ་དང་ཨཱང་སྔོན་མའི་ཨོ་ཧཱ་ཀ་གཏོང་བ་ལའོ། །དྲ་ཕྱིས། ཨོ་དང་ཀ྄་རྗེས་འབྲེལ། ཀྭིས྄་བྱིན་པ་ཕྱིས། སི་མ་ཟད་པ་ལས་ཕྱིས། སུའི་ཨུ་ཡིག་ཝ྄། དྲངས་པས། སྭཱཧཱ། གྲུབ་པ། གཞི་ཚུགས་ཤིག་པ་སྟེ། རིག་སྔགས་གྲུབ་པར་གྱུར་ཅིག་པའོ། །
༈ དེ་ནས་རྣམ་རྒྱལ་མའི་གཟུངས་ཀྱི་སྒྲ་སྒྲུབ་ནི། ༀ་ན་མོ་བྷ་ག་ཝ་ཏེ་རྣམས་ཚེ་གཟུངས་ལྟར་ཏེ། ༀ་བཅོམ་ལྡན་འདས་ལ་ཕྱག་འཚལ་ལོ། །ཞེས་པའོ། །སརྦ་ཡང་ཚེ་གཟུངས་ལྟར། ཏྲེང་སྐྱོང་བ་ལའོ། །ཌི་བྱིན། ཌཱ་རྗེས་སུ་འབྲེལ་བ་ལས་མཐའི་དབྱངས་ལ་སོགས་པ་དབྱིའོས་ཨཻད྄་ཕྱིས། ཏྲ་ཌའི་སྲོག་གི་ཨི་ལ་དྲངས་པས། ཏྲི་ལོ་ཀྲྀ་དང་ལོ་ཙྲྀ་ལྟ་བ་ལའོ། །ལུ་ཛ་འཇིག་པ་ལའོ། །གྷ་བྱིན། གྷ྄་ཕྱིས་སྲོག་གི་ཨ་བཞག །ཡཎའང་སྟེ་རབ་ཏུ་གྲགས་པ་ལའོས་ཡཎ྄་བྱིན། ཎ་དང་བཅས་པ་ལ་དང་པོར་འཕེལ་བའོས་ཏྲཻ། ཨའི་ཡི་གེ་དང་སོགས་ཀྱིས་རྟགས་མཐའི་དབྱངས་ཕྱིས་ནས་དྲངས་པས། སརྦ་ཏྲཻ་ལོཀྱ། གྲུབ་སྟེ། འཇིག་རྟེན་གསུམ་པོ་ཐམས་ཅད་ལས། ཞེས་སོ། །ཉེར་བསྒྱུར་པྲ་ཏི་དང་བི་སྔོན་འགྲོའི་ཤི་ཥ་ཐམས་ཅད་མ་ཡིན་པ་སྦྱོར་བ་ལའོ། །ཀྟ། ཀ྄་རྗེས་འབྲེལ་ཥ་དང་ཊ་སྡེ་སོགས་ཀྱིས་ཏ་ཡིག་ཊ། ངེ་ཡ། སྒྲ་ལྡན་ལ་རིང་། བུདྷ་ཁོང་དུ་ཆུད་པ་ལ། ཀྟ། ཀ྄་རྗེས་འབྲེལ། ཏ་དྷ། དྷུཊ་སོགས་ཀྱིས་དྷ་སྔོན་མ་ད། ངེ་ཡ། སྒྲ་ལྡན་ལ་རིང་། ཡུཥྨད་ལ་ང་། ཏྭཏ་མཏ་དག་གི་གཅིག་ཉིད་ལ་ཏེ་མེ་ཞེས་པས་ཡུཥྨད་དེ་དང་བཅས་པ་ཏེ། ན་མཿཚེ་གཟུངས་བཞིན་བསྒྲུབས་པས། པྲ་ཏི་བི་ཤིཥྚཱ་ཡ་བུདྡྷཱ་ཡ་ཏེ་ན་མཿགྲུབ་སྟེ། ཁྱད་འཕགས་སངས་རྒྱས་ཁྱོད་ཕྱག་འཚལ། །ཞེས་སོ། །ཏདྱ་ཐཱ་དང་། ༀ་ཚེ་གཟུངས་དང་འདྲ། བྷྲ་མུ་གཡོ། ཨུ་ཕྱིས། བྷྲ་མི་ལས་ཌུ་འོས་ཌུ་བྱིན། ཌ་རྗེས་སུ་འབྲེལ་བ་ལ་མཐའི་དབྱངས་ལ་སོགས་པ་དབྱི། ཨུཏ་ལས་ཨཱུང་འོས་ཨཱུང་བྱིན། ང་དབྱི། མཚུངས་འདྲ། མུ་ཨཱ་ག་མ་བྱིན་པའི་ཨུ་རྗེས་འབྲེལ། མྲ་ང་རོས་བྷྲུྃ། ཏདྱ་ཐཱ། ༀ་བྷྲུཾ་བྷྲུཾ་བྷྲུཾ། གྲུབ་སྟེ། འདི་ལྟ་སྟེ་ༀ་བྷྲུཾ་བྷྲུཾ་བྷྲུཾ། ཞེས་སོ། །ཤུདྷ་དག །བྱིངས་ལས་ཀྱང་དྷུ་ལའོས་ཡིན་བྱིན། ཨིན་ལ་སོགས་ཀྱིས་ན྄་དབྱི། ཨུ་པ་དྷཱ་ནཱ་མའི་ཡོན་ཏན། བྱ་བ་ཡང་དག་པར་མངོན་པར་སྡུད་པའི་རྐྱེན་ཧི། ཨན་བི་ཀ྄་ར་ཎ། ཨིན་གྱི་ཨི་ཡོན་ཏན་བྱས་པའི་ཨེ་ཨཡ྄་ཨ་ཡིག་ལས་ཧི་ཕྱིས། ཤོ་དྷ་ཡ། ཡང་བི་སྔོན་དུ་བཞག་སྟེ་བསྒྲུབས་པས། ཤོ་དྷ་ཡ་ཤོ་དྷ་ཡ་བི་ཤོ་དྷ་ཡ་བི་ཤོ་དྷ་ཡ། གྲུབ་སྟེ། སྦྱོངས་ཤིག་སྦྱོངས་ཤིག་རྣམ་སྦྱོངས་རྣམ་པར་སྦྱོངས། ཞེས་སོ། ཥ་མ་མཉམ་པ་ལའོ། །དངོས་པོ་ལ་ཨཙ྄་བྱིན། ཙ྄་དབྱི། བྱིངས་ཀྱི་དང་པོ་ཥའི་ས། དགག་པའི་ནཉ་སྔོན། དེའི་སྐྱེས་བུ་ལ་ན་དབྱིའོ། །སམ྄་སྔོན་མའི་ཨ་མ་ནད་ལའོ། །ཀྟ། ཀ྄་རྗེས་འབྲེལ། སྡེ་པ་ལ་སྡེ་པའི་མཐའོས་བྱིངས་ཀྱི་མ྄ན྄། ཨ་བ་སྔོན་མའི་བྷཱ་པྲྀ་འབར་བ་ལའོ། །ཤ྄་སུ་དང་སོགས་ཀྱིས་རྀ་དབྱི། རྐྱེན་ཨཙ྄་བྱིན། ཙ྄་ཕྱིས། དྲངས། སྥ་ར་འཕྲོ་བ་ལའོ། །རྐྱེན་ཡུ་བྱིན། ཡུ་ཨ་ན། ར་ཥ་རྀ་སོགས་ཀྱིས་ན་ཎ། གམླི་འགྲོ་བ། ལི་ཕྱིས་བུད་མེད་ལ་ཀྟིའོས། ཀྟི། ཀ་དང་། བྱིངས་ཀྱི་མ྄་ཡང་ཕྱིས་པས། ཨ་ས་མ་ས་མནྟཱ་བ་བྷཱ་ས་སྥ་ར་ཎ་ག་ཏི། གྲུབ་སྟེ། མཉམ་མེད་ཀུན་ནས་སྣང་བས་ཁྱབ་པའི་གནས། ཞེས་སོ། །ག་ག་ན་སྭ་བྷཱ་བ་བི་ཤཱུདྡྷེ་རྣམས་ཚེ་གཟུངས་ལྟར་བསྒྲུབས་པས། ནམ་མཁའི་རང་བཞིན་རྣམ་པར་དག་གྱུར་མ། ཞེས་སོ། །ཨུཥ་སྲེག་པ་ལའོ། །ཨུཎའི་ན། ཥ་ལས་ན་ཎ་སྟེ། ཨུཥྞ། བྱིངས་དོན་ལ་ཨིན། ཨིན་ལ་རྟགས་ཡི་གེ་གཅིག་སོགས་ཀྱིས་ནའི་སྲོག་གི་ཨ་དབྱི། ཤ་རཱི་ཥ་ལ་སོགས་པ་རྣམས་སོས་ཨཱིཥ། ཨིན྄་ཀ྄་རི་ཏ་ཕྱིས་ནས་དྲངས། བི་སྔོན་མའི་ཛི་རྒྱལ་བ། རྐྱེན་ཨཙ྄། ཙ྄་དབྱི། ཡོན་ཏན་ཨི་ཨེ། ཨེ་ཨཡ྄། པ་རི་སྔོན་མའི་ཤུདྷ་དག །ཀྟ། ཏ་དྷ། དྷ་སྔོན་མ་ད། མོ་རྐྱེན་ཨཱས྄། བོད་སི། རྟགས་མཐའ་ཨེ། སི་ཕྱིས་པས། ཨུཥྞཱི་ཥ་བི་ཛ་ཡ་པ་རི་ཤུདྡྷེ། གྲུབ་སྟེ། གཙུག་ཏོར་རྣམ་པར་རྒྱལ་བ་ཡོངས་དག་མ། ཞེས་སོ། །ཨ་བྷི་སྔོན་མའི་ཥིཙ྄་འཁྲུད་པ་ལའོ། །པཉྩ་མཱའི་ཏུ། ཨན་བི་ཀཱ་ར་ཎ། ཥིཙ྄་ལས་ནའོས་ན་ཨཱ་ག་མ། སྡེ་པ་ལ་སྡེ་པའི་མཐའོས་ན་ཡིག་ཉ་ཨསྨད་ལ། གཉིས་པའི་ཨམ྄། ཏྭ྄་མཱ་ནི་གཉིས་པ་ལའོས་ཨསྨད་མཱ། ཨམ྄་དང་ཨཽའང་ཨཱམའོ། །མཚུངས་འདྲ་བྱས་པས་ཨ་བྷི་ཥིཉྩ་ཏུ་མཱཾ། གྲུབ་སྟེ། བདག་ལ་མངོན་པར་དབང་ནི་བསྐུར་དུ་གསོལ། ཞེས་སོ། །སརྦ་ཏ་ཐཱ་ག་ཏ་སྔར་ལྟར་ལས། མཐར་ཛས྄། ཛ྄་ཕྱིས་པའི་སྲོག་གི་ཨ་དང་མཚུངས་འདྲ། ས྄་རྣམ་བཅད། སུ་སྔོན་མའི་གམླྀ་ལ། ཀྟ་བྱིན་ནས་སྔར་བཞིན་བསྒྲུབས་པས། སརྦ་ཏ་ཐཱ་ག་ཏཱཿསུ་ག་ཏ། གྲུབ་སྟེ། དེ་བཞིན་གཤེགས་པ་ཀུན་དང་བདེ་གཤེགས་ཀྱི། ཞེས་སོ། །བ་ར་སྔོན་མའི་ཝཙ྄་བརྗོད་པ་ལའོ། །ཡུཊ྄་ཊ྄་ཕྱིས། ཡུ་ཨ་ན། མ྄ྀང་སྲོག་གཏོང་བ་ལ། ནིཎྛ་འོས་ཀྟ། ཀ྄་ཕྱིས། ནཉ྄་སྔོན། དེའི་སྐྱེས་བུ་ལ་ནའི་དབྱི། མཚུངས་འདྲ། ཨ་བྷི་སྔོན་མའི་སིཙ྄་འཛག་པ་ལའོ། །སྐྱེས་པ་ལས་མིང་ལ་གྷའས་གྷ། ཙ་ཀ །ཨུ་པ་དྷཱ་ནཱ་མིའི་ཡོན་ཏན། ནཱ་མི་སོགས་ཀྱིས་ས་ཥ། བྷིས྄་བྱིན་པ་ཨེས྄ེ། ས྄་རྣམ་བཅད། མ་ཧི་མཆོད། ཤནྟྲྀང་བྱིན་ནས་བསྒྲུབས་པས་མ་ཧནྟ། གཞི་མཐུན་བསྡུ་བས་མཧཱ། བྷིས྄་ཀྱི་རྣམ་བཅད་ན་མིན་གྱི་ཕ་རོལ་ར྄། དྲངས། མུ་ད་དགའ་བ་ལའོ། རཀ྄འོས་རཀ྄་བྱིན། ཀ྄་ཕྱིས། དྲངས། བུད་མེད་ཀྱི་རྐྱེན་ཨཱས྄། ཤྲདྡྷཱ་ལས་ས་འཇིག །མ་ཏྲི་གསང་སྟེ་འཆད་པ་ལའོ། །ཨི་ཏིཏ་ཀྱི་ནུམ། ཨུམ྄་ཕྱིས། ཨཙ྄་བྱིན། ཙ྄་ཕྱིས་ནས་དྲངས། ས་ད་འགྲོ་བ་ལའོ། །ཨཙ྄། ཙ྄་ཕྱིས། བྷིས྄། དེ་ཨིས྄། ས་རྣམ་བཅད་བྱས་པས། བ་ར་བ་ཙ་ནཱ་མ྄ྀ་ཏཱ་བྷི་ཥེ་ཀཻ་རྨ་ཧཱ་མུ་དྲཱ་མནྟྲ་པ་དཻཿགྲུབ་སྟེ། གསུང་རབ་བདུད་རྩིའི་མངོན་པར་དབང་བསྐུར་དང་། །ཕྱག་རྒྱ་ཆེན་པོའི་སྔགས་ཀྱི་ཚིག་རྣམས་ཀྱིས། །ཞེས་སོ། །ༀ་འདྲ། ཨཱང་སྔོན་མའི་ཧྲྀཉ྄་འཕྲོག་པ་ལ། ཧི་བྱིན། ཨན་བིཀ྄་ར་ཎ། ཡོན་ཏན་ཨར྄། ཨ་ཡིག་ལ་ཧི་འཇིག །ཨཱ་ཡུཿཚེ་གཟུངས་ལྟར་དང་། སམ་སྔོན་མའི་ཌུ་དྷྲྀཉ་འཛིན། ཌུ་དང་ཉ་ཕྱིས། ཎྱུཊ་བྱིན། ཎ་དང་ཊ་ཕྱིས། ཎ་དང་བཅས་པ་ལ་དང་པོར་འཕེལ་བས་རྀ་ཨཱར། ཡུ་ཨ་ན། ར་ཥ་སོགས་ཀྱིས་ན་ཎ། དྲངས། ན་ད་སོགས་ཀྱིས་ཨཱི། བུད་མེད་དུ་བྱས་པའི་སོགས་ཀྱིས་རྟགས་མཐའི་ཨ་ཕྱིས་ནས་དྲངས། བོད་སི་སམྦུདྡྷི་ལ་ཐུང་ངུ་། ཨཱ་ཡུཿའི་རྣམ་བཅད་ཤ་ཥ་ས་ལ་ཕ་རོལ་གྱི་གཟུགས་སུ་བྱས་པས། ༀ་ཨཱ་ཧ་ར་ཨཱ་ཧ་ར་ཨཱ་ཡུསྶཾ་དྷཱ་ར་ཎི། གྲུབ་སྟེ། ༀ་ཀུན་བསྡུས་ཀུན་བསྡུས་ཚེ་ནི་ཀུན་འཛིན་མ། །ཞེས་སོ། །ཤོ་དྷ་ཡ་ཤོ་དྷ་ཡ། བི་ཤོ་དྷ་ཡ་བི་ཤོ་དྷ་ཡ། ག་ག་ན་སྭ་བྷཱ་བ་བི་ཤུདྡྷེ། ཨུཥྞཱི་ཥ་བི་ཛ་ཡ་པ་རི་ཤུདྡྷེ། རྣམས་སྒྲུབ་ཚུལ་བོད་སྐད་དང་བཅས་པ་སྔར་ལྟར་རོ། །ས་ཧ་པྲ་བཞག །རས་མདོའི་བྱིངས། ཨུརྨི་བྷཱུ་མི་རསྨི་རྣམས་སོས་རྐྱེན་མི། སམ྄་སྔོན་མའི་ཙུ་ད་རྐུ་བ་ལའོ། །དངོས་པོ་ལ་ཀྟ། ཀ྄་རྗེས་འབྲེལ། བྱིངས་ཐམས་ཅད་ས་མ་ཡིན་པ་སོགས་ཀྱིས་ཨིཊ། དྲངས། ཡོན་ཏན། ཨཱས྄། བོད་སི། སམྦུདྡྷི་ལ་ཨེ། སི་ཕྱིས་པས། ས་ཧ་པྲ་རསྨི་སཾ་ཙོ་དི་ཏེ། གྲུབ་སྟེ། འོད་ཟེར་སྟོང་ཕྲག་ཀུན་ནས་འགྱེད་པ་མོ། ཞེས་སོ། །སརྦ་ཏ་ཐཱ་ག་ཏ་འདྲ། ཨ་བ་སྔོན་མའི་ལོ་ཙ྄ྀ་ལྟ་བ་ལའོ། །རྀ་རྗེས་འབྲེལ། ནཱ་མི་ཨུ་པ་དྷཱ་སོགས་ཀྱིས་ཀ །དེ་འདིའི་ཡོད་པ་སོགས་ཀྱིས་ཨིན། ན་ད་སོགས་ཀྱིས་ཨཱི། བོད་སི། སམྦུདྡྷི་ལ་ཐུང་ངུ་། སི་ཕྱིས་པས། སརྦ་ཏ་ཐཱ་ག་ཏཱ་བ་ལོ་ཀི་ནི། གྲུབ་སྟེ། དེ་བཞིན་གཤེགས་པ་ཐམས་ཅད་ཀུན་གཟིགས་མ། ཞེས་སོ། ཥཊ་བཞག །པྲཱྀ་སྐྱོང་བ་ལའོ། །གྷཉ་བྱིན། འཕེལ་བ། གཉིས་པའི་ཨམ྄། ཨ་ཡིག་ལ་དབྱི། ཨིཎ་འགྲོ། ཎ྄་ཕྱིས། ཀྟ། ཀ྄་ཕྱིས། ཨཱས྄་བྱིན། མ྄་ཨི་ལ་དྲངས། པ་རི་སྔོན་མའི་པྲཱྀ་སྐྱོང་བ་ལའོ། །ཡུཊ་བྱིན། ཊ྄་ཕྱིས། ཡུ་ཨ་ན། མཆུ་གྱུར་ཨུ་པ་དྷཱའི་ཨུརའོ། །ནཱ་མི་གྱི་ར་བ་དག་གིས་རིང་། ན་ད་སོགས་ཀྱིས་ཨཱི། བོད་སི། རྟགས་མཐའ་ཐུང་ངུ་། ར་ཥ་རྀ་སོགས་ཀྱིས་ན་ཡིག་ཎར་བསྒྱུར་བས། ཥཊ྄་ར་མི་ཏཱ་པ་རི་པཱུ་ར་ཎི། གྲུབ་སྟེ། ཕ་རོལ་ཕྱིན་དྲུག་ཡོངས་རྫོགས་མ། ཞེས་སོ། །པཱ་བསྲུང་བ་ལ། ཏྲྀཙ྄་འོས་ཏྲྀཙ྄། ཙ྄་ཕྱིས། ཚིག་ཕྲད་ལས། པ་ཡིག་མར་བསྒྱུར། བུ་ལ་བསྔགས་པ་ལ་མ་ཏའོས་མཱ་ཏྲྀ་མཱ་ཏར་བསྒྱུར། ཨཱས྄། བོད་སི། རྟགས་མཐའ་ཨེ། སི་ཕྱིས་པས། སརྦ་ཏ་ཐཱ་ག་ཏ་མཱ་ཏེ། གྲུབ་སྟེ། དེ་བཞིན་གཤེགས་པ་ཀུན་གྱི་ཡུམ། ཞེས་སོ། །ད་ཤ་བཞག །བྷཱུ་ཡོད་པ། ཨུརྨི་བྷཱུ་མི་རསྨི་རྣམས་སོས་མི་བྱིན། པྲ་ཏི་སྔོན་མའི་སྠཱ་གནས་པ་ལའོ། །ཀྟ། ཀ྄་རྗེས་འབྲེལ། དྱ་ཏི་སྱ་ཏི་མཱ་སྠཱ་རྣམས་ཀྱི་ཏ་ལ་ཡོན་ཏན་མེད་པ་ལའོས་སྠཱ་སྠཱི་རུ་བསྒྱུར། ཨཱས྄། བོད་སི། རྟགས་མཐའ་ཨེ། སི་ཕྱིས། རྒྱུ་མཚན་ལས་ས་ཥ། ཥ་དང་ཊ་སྡེ་ལས་ཐ་ཋར་བསྒྱུར་བས། ད་ཤ་བྷཱུ་མི་པྲ་ཏིཥྛི་ཏེ། གྲུབ་སྟེ། ས་བཅུ་ལ་ནི་རབ་གནས་མ། །ཞེས་སོ། །ཧྲྀཉ་འཕྲོག །ཧྲྀཉ་ལས་ཀ་ཡནྟེ་དུཀ་འང་ངོས་ཀ་ཡན་བྱིན། ཀ་ཕྱིས་པའི་སྲོག་གི་ཨ་བཞག །ནའང་དབྱི་བར་དུ་དུཀ་བྱིན། ཨུཀ྄་ཕྱིས། ཨ་དྷི་སྔོན་མའི་སྠཱ་གནས། ཡུཊ། ཡུ་ཨ་ན། མཚུངས་འདྲ། ཨ་དྷི་སྔོན་མའི་སྠཱ་གནས། ཀྟ། ཀ྄་རྗེས་འབྲེལ། དྱ་ཏི་སྱ་ཏི་སོགས་ཀྱིས་སྠི། དེ་གཉིས་ཀའི་ས་ཡིག་རྒྱུ་མཚན་ལས་ཥ། ཥ་དང་ཊ་སྡེས་ཐ་ཋ། ཨཱས྄། བོད་སི། རྟགས་མཐའ་ཨེ། སི་ཕྱིས་པས། སརྦ་ཏ་ཐཱ་ག་ཏ། ཧྲྀ་ད་ཡཱ་དྷིཥྛཱ་ནཱ་དྷིཥྛི་ཏེ། གྲུབ་སྟེ། དེ་བཞིན་གཤེགས་ཀུན་སྙིང་པོ་ཡི། །བྱིན་གྱིས་བརླབས་ཀྱིས་བྱིན་རླབས་མ། །ཞེས་སོ། །ༀ་དང་མ་ཧཱ་དང་མུ་དྲ་སྔར་ལྟར་ལས་མཐའ་ཨཱས྄། བོད་སི། མཐའ་ཨེ། སི་ཕྱིས་པས། ༀ་མུ་དྲེ་མུ་དྲེ་མཧཱ་མུ་དྲེ། གྲུབ་སྟེ། ༀ་ཕྱག་རྒྱ་ཕྱག་རྒྱ་ཕྱག་རྒྱ་ཆེ། ཞེས་སོ། །ཊུ་ཨོ་སྥུརྫི་རྡོ་རྗེས་ངེས་པར་སྒྲོག་པ་ལའོ། །ཊུ་དང་ཨོ་དབྱི། སྥུརྫི་བ་ཛི་འོས་བ་ཛི། ཨི་བརྗོད་དོན། རྐྱེན་རཀ །དྲངས། ཙིཉ་སོགས་པའི་བྱིངས་ལ། གྷཉ། འཕེལ་བ། ཨཻ་ཨཱཡ྄། ལུས་དང་གནས་དག་ལ་དང་པོའི་ཀའོས་ཙཱ་ཀཱ་རུ་བསྒྱུར། ཡ྄་གྷའི་སྲོག་གི་ཨ་ལ་དྲངས། སམ྄་སྔོན་མའི་ཧ་ན་འཚེ་བ་ལའོ། །ཡུཊ། ཡུ་ཨ་ན། ཧནྟའི་ཏ་འོས་བྱིངས་མཐའ་ཏ། པ་རི་སྔོན་མའི་ཤུདྷ་དག་པ། ཀྟ། ཀ྄་རྗེས་འབྲེལ། ཏ་དྷ། དྷ་སྔོན་མ་ད། ཨཱས྄། བོད་སི། མཐའ་ཨེ། སི་ཕྱིས་པས། བཛྲ་ཀཱ་ཡ་སཾ་ཧ་ཏ་ན་པ་རི་ཤུདྡྷེ། གྲུབ་སྟེ། རྡོ་རྗེའི་སྐུར་སྣུན་ཡོངས་དག་མ། ཞེས་སོ། །སརྦ་འདྲ། ཌུ་ཀྲིཉ་བྱེད་པ། ཌུ་ཉ྄་ཕྱིས་མ་ནིན་བྱིན། ཨིན་བརྗོད་དོན། ཡོན་ཏན། སི་བྱིན། གསལ་བྱེད་ལས་སི་དང་རྟགས་མཐའི་ན་ཕྱིས། ཨཱང་སྔོན་མའི་བྲྀཉ་ལྡན་པ་ལ། ཡུཊ། ཊ྄་བྱིན། ཡུ་ཨ་ན། ར་ཥ་རྀ་སོགས་ཀྱིས་ན་ཎ། རྀ་ཡོན་ཏན་ཨ྄ར། བི་ཤུདྡྷེ་འདྲ་བས། སརྦ་ཀརྨཱ་བར་ཎ་བི་ཤུདྡྷེ། གྲུབ་སྟེ། ལས་སྒྲིབ་ཐམས་ཅད་རྣམ་དག་མ། ཞེས་སོ། །པྲ་ཏི་དང་ནི་སྔོན་མའི་བྲྀ་ཏུ་འཇུག །ཨུ་ཕྱིས། རྒྱུ་ལ་ཨིན། པཉྩ་མ྄ིའི་ཧི། ཨན་བི་ཀ་ར་ཎ་ཨིན་ཡོན་ཏན་ཨེ། ཨེ་ཨཡ྄། ཨུ་པ་དྷཱ་ནཱ་མིས་བྱིངས་ཀྱི་ཨུ་པ་དྷཱའང་ཡོན་ཏན། ཨ་ཡིག་ལས་ཧི་ཕྱིས། ཨཱ་ཡུཿསྔར་ལྟར་བསྒྲུབས་པས། པྲ་ཏི་ནི་བརྟ་ཡ་ཨཱ་ཡུཿགྲུབ་སྟེ། སླར་ཡང་ཆུད་པར་མཛོད་ཅིག་ཚེ། །ཞེས་སོ། །བི་ཤུདྡྷེ་སརྦ་ཏ་ཐཱ་ག་ཏ་སྔར་ལྟར་ཏེ། རྣམ་དག་དེ་བཞིན་གཤེགས་ཀུན་གྱི། །ཞེས་སོ། །སམ྄་སྔོན་མའི་ཨ་ཡ་འགྲོ་བ་ལ། ཨཙ྄། ཙ྄་ཕྱིས། དྲངས། ཨ་དྷི་སོགས་སྔར་ལྟར་ཏེ། ས་མ་ཡཱ་དྷིཥྛཱ་ནཱ་དྷིཥྛཱི་ཏེ། དམ་ཚིག་བྱིན་རླབས་ལྷག་གནས་མ། །ཞེས་སོ། །ༀ་འདྲ། མ་ན་ཤེས་པ་ལའོ། །མ་ནི་ལས་ཀི་ཏེ་ཨའི་ཨུཏའོས་ཀི་བྱིན། ཨུ་པ་དྷཱ་ཨུར་བསྒྱུར། ཀ་ཕྱིས་པའི་སྲོག་གི་ཨི་བཞག །ན་ད་སོགས་ཀྱི་ཨཱི། བོད་སི། རྟགས་མཐའ་ཐུང་། སི་ཕྱིས། མཧཱ་དང་བི་སྔོན་དུ་སྦྱར་བས། ༀ་མུ་ནི་མུ་ནི་མཧཱ་མུ་ནི་བི་མུ་ནི་བི་མུ་ནི་མ་ཧཱ་བི་མུ་ནི། ༀ་ཐུབ་པ་ཐུབ་པ་ཐུབ་ཆེན་མ། །རྣམ་ཐུབ་རྣམ་ཐུབ་རྣམ་ཐུབ་ཆེ། །ཞེས་སོ། །མ་ན་ཤེས་པ་ལ། ཀྟི། ཀ྄་ཕྱིས། ལྔ་པའི་ཨུ་པ་དྷཱ་སོགས་དང་ཝ་ན་ཏི་སོགས་ཀྱིས་ལྔ་པ་ན་ཕྱིས་པས། མ་ཏི། ཡང་མ་ན་ལ། ཉེར་བསྒྱུར་ལ་ཨཏ་ལས་ཌ། ཌ་རྗེས་སུ་འབྲེལ་བ་ལས་མཐའི་དབྱངས་སོགས་དབྱིའོས་མ་ཉིས་བརྗོད་བྱས་པས། མ་མ་ཏི། མ་ཧ་དང་སུ་སྦྱར། མི་ཟད་པའི་ཏ་ཐ་ལ། དངོས་པོ་ལ་ཏ་ཏྭ་དག་གོས་ཏ། ཨཱས྄། ཤྲདྡྷཱ་ལས་སི་ཕྱིས་པས། མ་ཏི་མ་ཏི་མཧཱ་མ་ཏི་མ་མ་ཏི་སུ་མ་ཏི་ཏ་ཐ་ཏཱ། བློ་གྲོས་བློ་གྲོས་བློ་གྲོས་ཆེ། །མཁྱེན་བློ་བློ་བཟང་དེ་བཞིན་ཉིད། །ཅེས་སོ། །བྷཱུ་ཡོད། ཀྟ། ཀོ་ཊི་བཞག །པ་རི་སྔོན་མའི་ཤུདྡྷེ་སྔར་ལྟར། བི་སྔོན་མའི་སྥུཊ་རྣམ་པར་རྒྱས་པ་ལའོ། །དངོས་པོ་ལ་ཨཙ྄། བུདྡྷ་ཁོང་དུ་ཆུད་པ་ལ། ཀྟི། ཀ྄་ཕྱིས། ཏ་དྷ་དྷ་སྔོན་མ་ད། བུདྡྷི་འགྲུབ་པས། བྷཱུ་ཏ་ཀོ་ཊི་པ་རི་ཤུདྡྷེ་བི་སྥུཊ་བུདྡྷི་ཤུདྡྷེ། ཡང་དག་མཐའ་ནི་ཡོངས་དག་མ། །རྣམ་རྒྱས་བློ་ནི་དག་པ་མོ། །ཞེས་སོ། །ཧ་སེ་རྒོད་པ་ལ། ཌེ་རྐྱེན། མཐའི་དབྱངས་སོགས་དབྱི། ཉིས་བརྗོད། ཛི་རྒྱལ་བ། སྨྲྀ་སེམས་པ། སྥ་ར་འཕྲོ་བ་རྣམས་ལ། ཨཙ྄་བྱིན་ནས་ཡོན་ཏན་སོགས་ཀྱིས་སྒྲུབ། སྥ་ར་ཕྱི་མ་གཉིས་ལ། ཨིན་དང་། ཧི་ཨན་བི། ཨིན་ཨིཙ྄་སོགས་ཀྱིས་ཨུ་པ་དྷཱ་རིང་། ཡོན་ཏན། ཧི་ཕྱིས། སརྦ་མན་སྔར་ལྟར་བསྒྲུབས་པས། ༀ་ཧེ་ཧེ་ཛ་ཡ་ཛ་ཡ་བི་ཛ་ཡ་བི་ཛ་ཡ་སྨ་ར་སྨ་ར་སྨཱ་ར་ཡ་སྨཱ་ར་ཡ་སྥ་ར་ཡ་སྥ་ར་ཡ་སྥཱ་ར་ཡ་སྥཱ་ར་ཡ་སརྦ་བུདྡྷཱ་དྷིཥྛཱ་ནཱ་དྷིཥྛི་ཏེ། ༀ་ཀྱེ་ཀྱེ་རྒྱལ་རྒྱལ་རྣམ་པར་རྒྱལ། །རྣམ་རྒྱལ་དྲན་དྲན་དྲན་པར་མཛོད། །དྲན་མཛོད་རྒྱས་རྒྱས་རྒྱས་པར་མཛོད། །རྒྱས་མཛོད་སངས་རྒྱས་ཐམས་ཅད་ཀྱི། །བྱིན་གྱིས་བརླབས་ཀྱིས་བྱིན་རླབས་མ། །ཞེས་སོ། །བུདྡྷཱ་ཁོང་དུ་ཆུད་པ་ལ། ཀྟ། གྲྀ་རྣམ་པར་གནོན་པ་ལ། ཨུཏ་སོགས་ཀྱིས་བྷ། རིའི་ཡོན་ཏན་ཨརུ། དེ་གཉིས་དང་བཛྲ་ལ། ཨཱས྄་དང་། བོད་སི་བྱིན་ནས་སྔར་ལྟར་བསྒྲུབས་པས། ༀ་ཤུདྡྷེ་ཤུདྡྷེ་བུདྡྷེ་བུདྡྷེ་བཛྲེ་བཛྲེ་མཧཱ་བཛྲེ་སུ་བཛྲེ་བཛྲ་གཪྦྷེ་ཛ་ཡ་གཪྦྷེ་བི་ཛ་ཡ་གཪྦྷེ། གྲུབ་སྟེ། ༀ་དག་ཅིང་དག་མ་སངས་རྒྱས་མ། །སངས་རྒྱས་རྡོ་རྗེ་རྡོ་རྗེ་མ། །རྡོ་རྗེ་ཆེན་མོ་རྡོ་རྗེ་བཟང་། །རྡོ་རྗེའི་སྙིང་མ་རྒྱལ་བའི་སྙིང་། །རྣམ་པར་རྒྱལ་བའི་སྙིང་པོ་མ། །ཞེས་སོ། །ཛྭ་ལ་འབར་བ་ལའོ། །ཙནྡྲ་པར། ཛྭ་ལ་སོགས་ལས་ཎ་ཡང་ནའོས་ཎ། གྲུབ་པ་ཉ་ཎས་ཨུ་པ་དྷཱ་རིང་། ཛས྄། དེའི་སྲོག་གི་ཨ་དང་མཚུངས་འདྲ། ས྄་རྣམ་བཅད་བྱས་པ་ཕ་རོལ་ཏུ་སྒྲ་ལྡན་བྱུང་བས་ཕྱིས། ཨུཏ་སྔོན་མའི་བྷཱུ་ཡོད་པ། ཨཙ྄། ཡོན་ཏན། ༀ་ཨཝ྄། ཨཱས྄། བོད་སི་སོགས་སྔར་ལྟར་ཡང་ས྄མ་སྔོན་མའི་བྷཱུ་ལ་ཨཙ྄་སོགས་འདྲ། བཛྲ་ལ། དེ་འདིའི་ཡོད་པ་སོགས་ཀྱིས་ཨིན། ཨིའི་ཡི་གེ་སོགས་ཀྱིས་མཐའ་དབྱི། ན་ད་སོགས་ཀྱིས་ཨཱི། བོད་སི། རྟགས་མཐའ་ཐུང་། སི་ཕྱིས། བཛྲ་ལ་གཉིས་པའི་ཨམ྄། བྷཱུ་ཡོད་པ་ལ། པཉྩ་མཱིའི་ཏུ་ཨན་བི། ཡོན་ཏན་ཨོ་ཨཝ྄། ཨསྨད་དས་དང་བཅས་པ་མ་མ། ཤྲྀ་འཚེ་བ་ལ། ཤི་ར་ལས་ཨཱི་ར་ཙའོས་ཨཱི་ར་ཙ་བྱིན། ཙ྄་ཕྱིས། རྀ་ཡོན་ཏན་ཨར྄། གཉིས་པའི་ཨམ྄། ས་ཏ་མགྱོགས་པ་ལའོ། །ཨུ་ལ་ལ་སོགས་རྣམས་ལས་སོས་ཝ་རྐྱེན། དྲུག་པི་ཨཱཾ། ནུ་ཨཱ་ག་མ། ནུ་དང་བཅས་པའི་སོགས་ཀྱིས་རྟགས་མཐའ་རིང་། མི་ཟད་པའི་ཙ་བཞག །སྡེ་པ་ལ་དེའི་སྡེ་པའི་ལྔ་པས་མ་ཉ། ཤུདྷ་དག་པ་ལ་ཀྟི། དང་པོའི་སི། ས྄་རྣམ་བཅད། ནཱ་མི་གྱི་ཕ་རོལ་ར྄། ས་མཱ་ན་ལ། དེ་ཕན་གྱི་དཱ་བྱིན། ས་མཱ་ནའི་སའོས་དེ་སར་བསྒྱུར། གམླྀ་འགྲོ་བ་ལྀ་ཕྱིས། ཀྟི། ཀ྄་རྗེས་འབྲེལ། ཝ་ན་ཏི་སོགས་ཀྱིས་ལྔ་པ་མ་ཕྱིས། ཏ་ཐཱ་ག་ཏ་ལ། ཛས྄། དེ་དང་ཤུདྡྷི་ལ་སི་བྱིན་པའི་རྣམ་བཅད་ཙ་ཕ་རོལ་ལ་ཤ །མཱ་སྔར་ལྟར་དང་། སམ྄་དང་ཨང་སྔོན་མའི་ཤྭ་ས་སྲོག་ལའོ། །བྱིངས་ལས་དྷུ་ལ་ཨིན། ཨུ་པ་དྷཱ་རིང་། པཉྩ་མ྄ིའི་ཨནྟུ། ཨན་བི། ཨིན་ལ་ཡོན་ཏན་ཨེ་ཨ་དང་མཚམས་སྦྱོར་གྱི་ཡི་གེ་སོགས་ཀྱིས་ཨན་གྱི་ཨ་ཕྱིས་པས། བཛྲ་ཛྭ་ལ་གརྦྷེ་བཛྲོ་ཌབྷ་བེ་བཛྲ་སམྦྷ་བེ་བཛྲེ་བཛྲ་ཎི་བཛྲ་མྦྷ་བ་ཏུ་མ་མ་ཤ་རཱི་རཾ་སརྦ་སཏྭ་ནཱཉྩ་ཀཱ་ཡ་པ་རི་ཤུདྡྷིཪྦྷ་བ་ཏུ་མ་མ་ས་དཱ་སརྦ་ག་ཏི་སུ་པ་རི་ཤུདྡྷིཤྩ་སརྦ་ཏ་ཐཱ་ག་ཏཱཤྩ་མཾ་ས་མཱ་ཤྭཱ་ས་ཡནྟུ། གྲུབ་སྟེ། རྡོ་རྗེ་འབར་བའི་སྙིང་པོ་མ། །རྡོ་རྗེ་འབྱུང་མ་རྡོར་འབྱུང་མ། །རྡོ་རྗེ་ཅན་མ་རྡོ་རྗེ་མ། །རྡོ་རྗེ་མཛོད་ཅིག་བདག་གི་ལུས། །སེམས་ཅན་ཐམས་ཅད་རྣམས་ཀྱི་ཡང་། །ལུས་ནི་ཡོངས་སུ་དག་པར་མཛོད། །བདག་གི་རྟོགས་པ་ཐམས་ཅད་ཀྱང་། །རྟག་ཏུ་ཤིན་ཏུ་ཡོངས་དག་མཛོད། །དེ་བཞིན་གཤེགས་པ་ཀུན་གྱིས་ཀྱང་། །བདག་ཅག་དབུགས་དབྱུང་མཛད་དུ་གསོལ། །ཞེས་སོ། །བུདྷ་ཁོང་དུ་ཆུད་པ་དང་། ཥི་དྷུ་བསྟན་བཅོས་གཉིས་ལ། པཉྩ་མཱིའི་ཧི། ཡཎ་བྱིན། ཨ་ཡིག་ལས་ཧི་ཕྱིས། བུདྷ་ཁོང་དུ་ཆུད་པ་དང་། མུ་གྲོལ་བ་དང་། ཤུདྷ་དག་པ་རྣམས་ལ་ཨིན། པཉྩ་མཱིའི་ཧི། ཨན་བི་ཀཱ་ར་ཎ། ཨུ་པ་དྷཱ་ཡང་བའི་ཡོན་ཏན་ཨུ་རྣམས་ཨོ། ཨིན་ཡོན་ཏན་ཨེ། ཨེ་ཨཡ྄། ཨ་ཡིག་ལས་ཧི་ཕྱིས། དེ་ཐམས་ཅད་ལ་ཉིས་བརྗོད་བྱ་ཞིང་། དེ་འདྲ་ལན་གཉིས་ཀྱི་ཕྱི་མའི་འགོར་བི་སྦྱར། སམ྄་སྔོན་མའི་ཨ་མ་འགྲོ་བ་ལ། ཨ་མི་ལས་ཏ། སྡེ་པ་ལ། དེའི་སྡེ་པའི་ལྔ་པས་མ་ཕྱི་མ་ན། དེ་ལ་ལྔ་པའི་ང་སི་བྱིན། ང་སི་ཨཱཏ། ཕ་རོལ་ཏུ་མ་ཡིག་བྱུང་བས་ལྔ་པ་ལ་ལྔ་པ་རྣམས་སུ་ཏེ་སོགས་ཀྱིས་ཏ྄་ཡིག་ན྄། གཞན་རྣམས་སྔར་ལྟར་བསྒྲུབས་པས་ༀ་བུ་དྷྱ་བུ་དྷྱ་སི་དྷྱ་སི་དྷྱ་བོ་དྷ་ཡ་བོ་དྷ་ཡ་བི་བོ་དྷ་ཡ་བི་བོ་དྷ་ཡ་མོ་ཙ་ཡ་མོ་ཙ་ཡ་བི་མོ་ཙ་ཡ་བུ་མོ་ཙ་ཡ། ཤོ་དྷ་ཡ་ཤོ་དྷ་ཡ་བི་ཤོ་དྷ་ཡ་བི་ཤོ་དྷ་ཡ་ས་མནྟཱནྨོ་ཙ་ཡ་མོ་ཙ་ཡ་ས་མནྟ་རསྨི་པ་རི་ཤུདྡྷེ། གྲུབ་སྟེ། ༀ་སད་མཛོད་སད་མཛོད་གྲུབ་པར་མཛོད། །གྲུབ་མཛོད་རྟོགས་མཛོད་རྟོགས་པར་མཛོད། །རྣམ་རྟོགས་རྣམ་པར་རྟོགས་པར་མཛོད། །གྲོལ་མཛོད་གྲོལ་བར་མཛད་དུ་གསོལ། །རྣམ་པར་གྲོལ་མཛོད་རྣམ་གྲོལ་མཛོད། །སྦྱོངས་སྦྱོངས་རྣམ་སྦྱོང་རྣམ་པར་སྦྱོངས། །ཀུན་ནས་གྲོལ་མཛོད་གྲོལ་བར་མཛོད། །ཀུན་ནས་འོད་ཟེར་ཡོངས་དག་མ། །ཞེས་སོ། །སརྦ་ཏ་ཐཱ་ག་ཏ་ཧྲྀ་ད་ཡཱ་དྷིཥྛཱ་ནཱ་དྷིཥྛཱ་ཏེ། ཞེས་པའི་སྒྲུབ་ཚུལ་དང་བོད་སྐད་སྔར་ལྟར་རོ། །ༀ་མུ་དྲེ་མུ་དྲེ་མཧཱ་མུ་དྲེ་མ་ཧཱ་མུ་དྲཱ་མནྟྲ་པ་དཻཿསྭཱཧཱ། ཞེས་པའི་གཞན་རྣམས་སྔར་ལྟར་དང་། སྭཱཧཱ། ཚེ་གཟུང་སུ་བཤད་པ་བཞིན་བསྒྲུབས་པས་གྲུབ་སྟེ། ༀ་ཕྱག་རྒྱ་ཕྱག་རྒྱ་ཕྱག་རྒྱ་ཆེ། །ཕྱག་ཆེན་སྔགས་ཀྱི་ཚིག་རྣམས་ཀྱིས། །ལེགས་པར་སྦྱིན་པར་མཛད་དུ་གསོལ། །ཞེས་སོ། །དེས་གཟུངས་རིང་རྫོགས་སོ། །གཟུངས་ཐུང་ནི། ༀ་བྷྲུཾ་སྭཱཧཱ། ༀ་ཨ་མྲྀ་ཏཱ་ཡུཏ་དེ་སྭཱཧཱ། ཞེས་པའི་གཞན་རྣམས་སྔར་དང་འདྲ། ད་དེ་སྒྲུབ་ཚུལ་ལ། དཱ་སྦྱིན་པ་ལའོ། །ཉེར་བསྒྱུར་མེད་པའི་ཨཱཏ་ལས་ཀའོས་ཀ །ཀིཏ་ལ་ཨཱཏ་ཀྱི་དབྱིའོས་དཱའི་སྲོག་གི་ཨ་དབྱི། གཉིས་བརྗོད། བུད་མེད་ཀྱི་རྐྱེན་ཨཱས྄། པོད་སི། རྟགས་མཐའ་ཨེ། སི་ཕྱིས་པས། ༀ་བྷྲུཾ་ལེགས་པར་སྦྱིན། ༀ་འཆི་མེད་ཚེ་སྦྱིན་མ་སྭཱཧཱ། ཞེས་སོ། །ༀ་ཨཱཿཧཱུྃ་ཏྲཱཾ་ཧྲཱིཿཨཾ་ཨཿརྣམས་ས་བོན། རཀྵ་བསྲུང་བའི་བྱིངས་ལ། ཨཙ྄། གཞན་རྣམས་སྔར་བཤད་ཟིན་ལྟར་བསྒྲུབས་པས། རཀྵ་རཀྵ་མཱཾ་སརྦ་སཏྭཱ་ནཉྩ་སྭཱཧཱ། བདག་དང་སེམས་ཅན་ཐམས་ཅད་ལ་སྲུངས་ཤིག་སྲུངས་ཤིག་སྭཱཧཱ། ཞེས་པའོ། །
༈ ཡང་དཔག་བསམ་འཁྲི་ཤིང་དུ། ནོར་འཛིན་གྱི་བདག་དབང་པོ་དེ། །ཤ་བ་རཱི་ཡི་སྐྲ་ཚོགས་ཀྱིས། །མེ་ཏོག་དྲི་བཟང་རྫོགས་པའི་རྒྱུས། །འབིགས་བྱེད་རླུང་གིས་བསྟེན་པར་གྱུར། །ཅེས་པའི་དོན་གང་ཡིན་གནང་བ། ནོར་འཛིན་ཞེས་པ་ས་གཞིའི་མིང་ཡིན་པས་ས་ཀུན་གྱི་བདག་པོ་ནི་མིའི་དབང་པོ་སྟེ། འདིར་སྔོན་གྱི་རྒྱལ་པོ་རབ་གསལ་ལོ། །དེ་གླང་རྫིས་དུལ་བར་བྱས་པའི་གླང་པོ་ལ་ཞོན་ནས་རྔོན་པའི་ལས་རྩེ་ཞིང་ནགས་སུ་རྒྱུ་བ་ན། ཥུ་རབ་ཏུ་སྐྱེ་བའི་བྱིངས་ལ་དེ་བི་བ་བི་བྷྲ་མི་བཱ་སི་རྣམས་ལས་ཨ་རའོས་ཨ་རའི་རྐྱེན། ཥ་ཤ་དང་། ཨུའི་ཡོན་ཏན་ཨོ། ཨོ་ཨཝ྄་བྱས་ཏེ་དྲངས་པས། ཤ་བ་ར། རྔོན་པའམ་རི་ཁྲོད་པ། དེ་ལ་བུད་མེད་ཀྱི་རྐྱེན་ཨཱི། སི་བྱིན་ཨཱི་ཡིག་མཐའ་ལས་སི་ཕྱིས་པས། ཤཱ་བ་རཱི་ཞེས་འདིར་རྔོན་པའི་ཆུང་མ་སྟེ། དེ་ཡང་རྒྱལ་པོ་ནགས་སུ་རྒྱུ་བ་ལས། འབིགས་བྱེད་ཀྱི་རི་དང་ཉེ་བ་ན། སྐྲའི་གཟུགས་སུ་བྱས་པ་ནགས་ཀྱི་མེ་ཏོག་དང་དར་ལ་བབས་པས་དྲི་བཟང་པོ་རྒྱས་ཏེ་རྫོགས་པ་འབིགས་བྱེད་ཀྱིས་རླུང་གི་དྲི་བཞོན་གྱིས་བསྟེན་ཅིང་ཕོག་པ་ན། དེས་རྒྱལ་པོའི་ཡིད་འཕྲོགས་ཤིང་། དེ་དུས་བཞོན་པའི་གླང་པོ་ཡང་གླང་མོའི་དྲི་ཚོར་བས་ཡིད་མྱོས་ཏེ་རྒོད་པར་གྱུར་པའི་ཕྱིར། བཞོན་པ་གླང་པོ་དང་ཞོན་པ་པོ་རྒྱལ་པོ་གཉིས་ཀ་ནགས་སུ་རྔོན་པའི་ལས་རྩེ་ཞིང་རྒྱུ་བས་ན་དེའི་སྒྲ་ཐོབ་ལ། དེས་ན་དེ་དང་དེའི་ཡིད་མྱོས་པར་བྱེད་པའི་དྲི་བཟང་དང་གླང་མོ་ལའང་རྔོན་པའི་ཆུང་མའི་སྒྲར་བྱས་ཏེ་སྦྱར་བའི་རྒྱན་དུ་མཛད་པའོ། །
༈ ཡང་དཔལ་ལྡན་སྲིད་གསུམ་བདག་མོ་ལ་གསར་རྙིང་ཀུན་ཏུ་རེ་མ་ཏི་ཞེས་པ་གང་ཡིན་གསུང་བ། ལེགས་སྦྱར་གྱི་སྐད་ལ། རེ་བ་ཏཱི་ཞེས་པ་བོད་སྐད་དུ་ནམ་གྲུ་མ་སྟེ། དེ་ཟུར་ཆགས་པས་རེ་མ་ཏི་ཞེས་རྒྱ་གར་གྱི་དཔེ་ལས་ཀྱང་འབྱུང་། དེ་ཡང་རེ་བ་ཏ་ནམ་གྲུ། དེ་ལ་བུད་མེད་ཀྱི་རྐྱེན་ཨཱི་སྦྱར་བས་རེ་བ་ཏཱི། ཀ་ལཱ་པར། ཨཱི་དང་ཨཱ་ཡིག་བུད་མེད་དུ་བྱས་པ་དག་ལ་ལར་ཐུང་ངུའོ། །ཞེས་པས་ཚིག་གྲོགས་གཞི་མཐུན་པ་དང་སྦྱོར་བའི་ཚེ། གཞི་མཐུན་གྱི་བསྡུ་བས་ཐུང་ངུར་བྱས་པའང་འབྱུང་བས་ན། རེ་བ་ཏིའམ་རེ་མ་ཏི་ཞེས་པ་ལགས།
༈ མི་དབང་ཆེན་པོའི་བཀའ་ལན་དུ་ཕུལ་བ་ཡིན་ལགས། ལགས། རྒྱུད་བླར་ཡང་དག་པའི་བསྟན་བཅོས་བླང་རིགས་པར་བསྟན་པ། གང་ཞིག་རྒྱལ་བ་སྟོན་པ་འབའ་ཞིག་གི །ཞེས་པའི་ཚིག་འདི་ལ། ད་ལམ་བསླབ་སྟོན་རིན་པོ་ཆེ་སྩལ་བ་དང་མཐུན་པར། ཀུན་མཁྱེན་རོང་སྟོན་ཆེན་པོའི་འགྲེལ་པར་ཡང་། གང་བཤད་པ་ནི་གང་ཞིག་དོན་ལྡན་ཆོས་དང་ཉེར་འབྲེལ་ཞིང་། ཞེས་སོགས་དེའི་རྒྱུ་མཐུན་པ་གང་ཡིན་པ་དེ་ནི། གང་ཞིག་རྒྱལ་བའི་བསྟན་པ་འབའ་ཞིག་གི །ཞེས་སོགས་ཏེ། ཞེས་གསུངས་པ་ལྟར་ན། རྒྱལ་བ་སྟོན་པ། ཞེས་པའི་དོད། རྒྱལ་བའི་བསྟན་པ་ཞེས་འབྱུང་བ་འདི་འཐད་འཐད་འདྲ་ཞིག་འདུག་ནའང་། རྒྱ་དཔེའི་སྐད་དོད་ཀྱི་དབང་དུ་བྱས་ན། བི་ཝརྟ་སོ་སོར་བྲང་སྤྲོད་ཚུལ་བསླབ་སྟོན་སྩལ་བ་བཞིན་ལས། ལྷག་པ་ཕྲན་བུས་ངོ་འཕྲོད་པ་དཀའ་བར་གྱུར་མོད། དེ་ལྟ་ནའང་འགའ་ཞིག་རང་གི་གོ་ཚུལ་དང་སྦྱར་ན། རྒྱལ་བ་སྟོན་པ་ཞེས་འདོན་པ་འདི་འཐད་པ་འདྲ་སྟེ། ཡརྤྱཱ་ཏ་ཞེས་པ་སོ་སོར་ཕྲལ་ན་ཡ་ད་ཞེས་པ་གང་། པྱཱཏ་ཅེས་པ་འགྱུར་བ་སོགས་ཀྱང་འཇུག་ཀྱང་སྒྲ་གཟུགས་པོ་གང་ཞིག །རྣམ་གཡེང་གི་སྐད་དོད་སྤྱིར་བཏང་གི་ཀྵེ་པ་འབྱུང་ཡང་། འདིར་བི་ཀྵིཔྟ་ཞེས་པ་རྣམ་གཡེང་སྟེ། ཞྭ་ལུ་བའི་ཉེར་བསྒྱུར་འགྲེལ་པར་གཡེང་བར་བསྒྱུར། དེ་ལ་དགག་སྒྲའི་ཨ་གོང་དུ་བཞག་སྟེ་སྦྱར་བས། ཡརྤྱཱ་ད་བི་ཀྵི་པྟ་ཞེས་པ། གང་ཞིག་རྣམ་གཡེང་མེད་པ། མ་ནོ་བྷིཿཞེས་པ། མ་ན་ཤེ་པའི་བྱིངས་ལ། ཨུཎའི་རྐྱེན་ཨུ་བྱིན་པས། མ་ནུ་ཞེས་པ་ཡིད་ཅན། དེ་ལ་གསུམ་པའི་མང་ཚིག་བྷིས྄་སྦྱིན་པས། མ་ནུ་བྷིཿཞེས་པ་ཡིད་ཅན་རྣམས་ཀྱིས། ཞེས་པ་ཡིན་ཡང་སྡེབ་སྦྱོར་གྱི་དབང་གིས་མ་ནོ་ཞེས་ཡོན་ཏན་མཛད་པ་འདྲ། སྣ་ཚོགས་སྡེ་ལས། ཨུཀྟཾ་སྨྲས་དང་ཡི་གེ་གཅིག །འདུན་པའམ་ཞེས་འབྱུང་བས། ཨུཀྟཾ་སྨྲས་པ། དེ་ལ་བྷིཿའི་རྣམ་བཅད་ནཱ་མི་ལ་ར་བྱས་པ་དྲངས་པས། མ་ནོ་བྷི་རུ་ཀྟཾ་སྟེ་ཡིད་ཅན་རྣམས་ཀྱིས་བཤད་ཅེས་པར་འགྱུར། ཤཱསུ་རྗེས་སུ་སྟོན་པའི་བྱིངས་ལ། ཏྲྀཙའི་རྐྱེན་སྦྱིན་པས་ཤ་སྟྲྀ། དེ་ལ་སི། སི་ལ་ཨཱ་སྟེ་སི་ཕྱིས་པས། ཤཱ་སྟཱ་ཞེས་པ་སྟོན་པ། ཛི་ན་རྒྱལ་བ། འབའ་ཞིག་ལ་མཚན་བརྗོད་ཀྱི། ཤེས་པ་འབའ་ཞིག་ངེས་འབྱུང་བ། ཞེས་པའི་རྒྱ་དཔེར། ཀཻ་བ་ལྱཛྙཱ་ན་ནིཥྛཱདྷུ་ཏ། ཞེས་འབྱུང་བས། ཀཻ་བ་ལྱ་དང་། སྤང་ལྟུང་གི་ནང་ཚན། ནག་པོ་འབའ་ཞིག་ལ། ཀཱ་ལ་ཀཱ་ནཱཾ་ཞེས་པས་ཀཱ་ནཱཾ་དང་། སྤྱིར་བཏང་ལ་བུདྡྷ་ཞེས་འབྱུང་བ་སོགས་སྐད་དོད་ཡོངས་གྲགས་ལ་བྱུང་བས། ར་མེ་ཀཾ་དང་། ཨུདྡི་ཤདྦྷིཿསོགས་འབའ་ཞིག་དང་། དབང་བྱས་ཀྱི་སྐད་དོད་གང་ཡིན་ངོ་མ་འཕྲོད་ལགས། མུ་གྲོལ་བའམ་མཐར་པ་ལའོའི་བྱིངས་ལ། ཨུཎ་ལས། པའོས་རྐྱེན་པ། ཡོན་ཏན་ཙ་སྡེ་འདྲ་བའི་སོགས་ཀྱི་ཙ་ཀར་བསྒྱུར་བས་མོཀྵ་སྟེ་ཐར་པ་ཐོབ་པ་ལ། པྲཱཔྟཿལབྡྷཿལཱ་བྷཿརྣམས་ཤས་ཆེའང་། འདིར་ཨཱབྟི་ཞེས་པ་སྟེ། སྣ་ཚོགས་སྡེར། ཨཱཔྟི་སྡོམ་དང་ཐོབ་པ་ལའོ། །ཞེས་སོ། །སཾ་བྷཱ་ར། ཀུན་ཏུ་ཚོགས་པ་དང་བསགས་པའི་དོན་ཡིན་མོད། ལམ་ལ་འཇུག་པ་མ་མཐོང་ཡང་། འདིར་བཀའ་མཆན་ལ་ལམ་ཞེས་སྣང་བ་ལྟར་ཡིན་ནམ་སྙམ། ཡ་ཐཱ་ཞེས་པ་ཇི་ལྟར་དང་འདི་ལྟར་སོགས་ལ་འཇུག་པས། ཐར་པ་ཐོབ་པའི་ལམ་དང་། འདི་ལྟར་རྗེས་སུ་མཐུན་པ་ཞེས་འབྱུང་ཡང་མ་བསྒྱུར་བར་སྣང་རྗེས་སུ་མཐུན་པ་ལ་སྤྱིར་བཏང་། ཨ་ནུ་ལོ་མི་ཀཻཿསོགས་འབྱུང་ཡང་། འདིར་ཨ་ནུ་ཀཱུ་ལཾ་ཞེས་སྣང་བ། དེ་དང་ཨ་ནུ་རཱུ་པ་གཉིས་མཐུན་པ་ཞེས་པར་ཞྭ་ལུ་ལོ་ཆེན་གྱིས་བསྒྱུར་བ་ལྟར། ཨ་ནུའི་སྒྲས་རྗེས་སུ་མཐུན་པར་ཡང་འབྲེལ། མཱུརྡྷཱ་ཞེས་པ་སྤྱི་བོས་ཏེ། མཱུརྡྷི་སྤྱི་བོ་དང་། དེ་ལ་ཊཱ་བྱིན་པས། མཱུརྡྷི་ནཱ་ཞེས་འབྱུང་དགོས་པའི་སྒྲུབ་ཚུལ་དང་མ་འདྲ་བས། སྒྲ་སྦྱོར་ཁྱད་པར་བ་ཞིག་གིས་བསྒྲུབས་སམ་སྙམ། ཏཏ྄་དེ། ཨ་སི་ཀྱང་ཡིན་པས། ཏ་ད་སི་ཞེས་པ་དེ་ཡང་། མངོན་བརྗོད་སྣ་ཚོགས་གསལ་བར། ཨཱ་མེས་པོ། དྲན་པ་ངག་དང་མངོན་ཁྱབ་དང་། ཞེས་པས་ངག་གི་སྐད་དོད་ཨ་ནི་བཀའམ་གསུང་། ཨཱ་ཡིག་ནི་པཱ་ཏ་མཚམས་སྦྱོར་མི་བྱེད་ནའང་འདིར་སྡེབ་སྦྱོར་གྱི་དབང་གིས་མཚམས་སྦྱར་བས། ཏ་ད་སྱཱ། རི་ཥི་འགྲོ་བའི་བྱིངས་ལ། ཨཙ྄། སི་མུ། རིཥཾ། དེའི་ཕ་རོལ་ཏུ་བཞིན་གྱི་སྐད་དོད་ཨི་བ། དེ་དག་ལ་ལར་ཨཱར་སོགས་ཀྱིས་མཚམས་སྦྱར་བས། ཏ་ད་སྱཱཪྵ་མི་བ། ཞེས་པ་དེ་ཡང་དྲང་སྲོང་བཀའ་བཞིན། པྲ་ཏིཙྪཏ་འདོད་པའམ་བླང་བ་སྟེ། རྒྱ་དཔེ་དེ་ལྟར་ན། གང་ཞིག་རྒྱལ་བའི་བསྟན་པ། ཞེས་པ་ལས། ཡོངས་གྲགས་ཀྱི་དཔེ་ལྟར་གང་ཞིག་རྒྱལ་བ་སྟོན་པ། ཞེས་འདོན་པ་འདི་དག་པ་འདྲ་སྙམ་ཞིང་། འགོས་ལོ་ཙ་བ་ཆེན་པོ་གཞོན་ནུ་དཔལ་གྱི་འགྲེལ་པ་ལས་ཀྱང་། ལུང་གི་རྒྱུ་མཐུན་པ་ནི། བསྟན་བཅོས་གང་ཞིག །སྟོན་པ་རྒྱལ་བ་ཉིད་ཀྱིས་གསུངས་པའི་ལུང་གི་དབང་དུ་བྱས་ནས་དོན་དེ་བརྗོད་ཀྱི། རང་གི་རིགས་པ་དང་ལྡན་པའི་སྤོབས་པས་བརྗོད་པ་མ་ཡིན་ལ། འོན་ཀྱང་སྟོན་པའི་ལྟར་ཡིན་ནམ། གཞན་དབང་ཕྱུག་ལ་སོགས་པས་བྱས་པའི་ལྟར་ཡིན་སྙམ་པའི་ཐེ་ཚོམ་གྱིས། འདི་ལས་ཕྱི་རོལ་པའི་ལུགས་ལ་སེམས་རྣམ་པར་གཡེངས་མེད་པའི་ཡིད་ཅན་གྱིས་བཤད་པ། གང་ཚེ་འདིའི་དོན་ཙམ་དང་། མཐོ་རིས་ཀྱི་དོན་ཙམ་སྟོན་པ་མ་ཡིན་པར་ཐར་པ་ཐོབ་པའི་ལམ་དང་རྗེས་སུ་མཐུན་པར་བསྟན་པ་གང་ཡིན་པ་དེ་ཡང་དྲང་སྲོང་གི་བཀའ་བཞིན་དུ་སྤྱི་བོས་བླང་ཞིང་བཟུང་བར་བྱའོ། །ཞེས་བཀྲལ་བའི་ཕྱོགས་འདི་བཤད་འགྲོས་ལེགས་སམ་སྙམ་དུ་གོ་ལགས་ཤིང་། དེས་ན་ཀུན་མཁྱེན་རོང་སྟོན་ཆེན་པོའི་འགྲེལ་པར་འབྲུ་འགྲེལ་ཞིབ་མོ་མེད་པའི་སྐྱོན་གྱིས། དེའི་རྒྱུ་མཐུན་གང་ཡིན་པ་དེ་ནི། གང་ཞིག་རྒྱལ་བ་སྟོན་པ་འབའ་ཞིག་གི །ཞེས་སོགས་ཏེ། ཞེས་པ། པར་བརྐོ་དུས་རྒྱལ་བའི་བསྟན་པ་ཞེས་ཞུས་དག་བྱས་སམ་ཡིག་ནོར་ལྟ་བུ་བྱུང་བ་འདྲ་སྟེ། རྩོམ་པ་པོ་ཤེས་བྱའི་ཡུལ་ལ་ཐོགས་པ་མེད་པའི་མཁྱེན་རབ་མངའ་བ་དེ་དག་གི་གསུང་ལ་སཾ་སྐྲྀ་ཏའི་སྐད་དང་འགལ་བའི་བཤད་པ་མི་འོང་ཐང་སྙམ་དུ་སེམས་ལགས་པ་རྣམ་འབྱེད་མཁྱེན་རབ་ཀྱིས་གཅད་དུ་གསོལ།། །།