དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བ་སྤྱི་དོན་གྱི་སྒོ་ནས་གཏན་ལ་འབེབས་པར་བྱེད་པའི་ལེགས་བཤད་གསང་བདག་ཞལ་ལུང་།
༄༅། །ཤྲཱིགུཧྱགརྦྷཏཏྭནིཥྩཡཏནྟྲརཱཛམཱཡཛལསམུདཱཡཱརྠསྻདྭཱརཱཏྣིཥྩིཏསུབྷཥིཏཾགུཧྱཔཏིམུཁཱགམནཱམབིཧརཏིསྨ། །
༄༅། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བ་སྤྱི་དོན་གྱི་སྒོ་ནས་གཏན་ལ་འབེབས་པར་བྱེད་པའི་ལེགས་བཤད་གསང་བདག་ཞལ་ལུང་ཞེས་བྱ་བ་བཞུགས་སོ། །
བླ་མ་དང་རྗེ་བཙུན་འཇམ་དཔལ་དབྱངས་ལ་གུས་པས་ཕྱག་འཚལ་ལོ། །ཐོག་མཐའ་དབུས་བྲལ་སྣང་སྟོང་དབྱེར་མེད་སེམས་ཀྱི་ཆོས་ཉིད་རང་བཞིན་རྣམ་དག་གཞི་ཡི་རྒྱུད། །གང་ཞིག་རྟོག་གོམས་བྱེད་རྩོལ་དང་བཅས་རྨད་བྱུང་ཐབས་དང་ཤེས་རབ་རྣམ་པར་གྲོལ་བའི་ལམ། །གང་གི་གློ་བུར་སྒྲིབ་པ་བསལ་ལས་བྲལ་ཐོབ་མེད་རྟོགས་འབྲས་བུའི་རྒྱུད་དུ་རབ་སྣང་ཡང་། །ངོ་བོ་འགྱུར་མེད་རང་རིག་བྱང་ཆུབ་སེམས་སུ་རྫོགས་ལ་ངོ་མཚར་ཆེན་པོས་ཕྱག་བགྱིའོ། །སྟོང་ཉིད་དབྱིངས་སུ་བདུད་བཞིའི་དཔུང་བཅོམ་སྐུ་ལྔའི་མཆོག་ལྡན་མཚན་ཉིད་མཐའ་རྣམས་ཀུན་ལས་འདས། །བདེན་གསུམ་རིས་མེད་ལྷུན་གྱིས་གྲུབ་དང་བདག་གཞན་དཔལ་གྱུར་འཁོར་འདས་ཆོས་རྣམས་མ་ལུས་པ། །ཉིད་དང་གཞན་ཞེས་བརྗོད་དུ་མེད་པའི་རང་བཞིན་མངོན་བྱས་སྤྱོད་ཡུལ་ཀུན་ཏུ་བཟང་པོ་སྟེ། །རིགས་བདག་དྲུག་པའི་ཞབས་ལ་འདུད་དོ་ཐུགས་རྗེའི་སྤྱན་གྱིས་བདག་ལ་ཀུན་ནས་གཟིགས་པར་མཛོད། །རྒྱལ་ཚབ་རིགས་ལྔ་རྒྱལ་སྲས་སེམས་དཔའ་འཇོམས་བྱེད་ཁྲོ་བོ་བཙུན་མོར་བཅས་གང་དགོངས་པའི་བརྒྱུད། །ལྷ་ཀླུ་གནོད་སྦྱིན་རིག་འཛིན་ཚོགས་དང་དམ་པའི་རིགས་ཅན་དྲ་མ་ལྔ་སྟེ་བརྡ་བརྒྱུད་ཅན། །སྐལ་ལྡན་ཛཿསོགས་ཚོམ་བུར་གཤེགས་དང་སངས་རྒྱས་གསང་བ་སྒེག་རྡོར་པད་འབྱུང་བི་མ་ལ། །རྨ་གཉགས་སོ་ཟུར་གནུབས་ལ་སོགས་པ་རྣ་བརྒྱུད་ཚོགས་ཏེ་བརྒྱུད་གསུམ་བླ་མ་རྣམས་ལ་འདུད། །ཁྱད་པར་གསང་བདག་དགོངས་པའི་གནད་ཇི་བཞིན། །མངོན་དུ་གྱུར་ནས་འགྲོ་ལ་གསལ་མཛད་པ། །བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྗེ། །བྱང་ཆུབ་བར་དུ་རིགས་ཀྱི་བདག་པོར་མཆོད། །དྲུག་པའི་རྒྱལ་ཚབ་མི་ཡི་ཟོལ་བཟུང་བ། །མཁས་གྲུབ་རིམ་པར་བྱོན་པས་ལེགས་བཟུང་ཕྱིར། །སྒྱུ་འཕྲུལ་དྲྭ་བ་དཔལ་ལྡན་རྒྱུད་ཀུན་གྱི། །སྤྱི་བོར་གྱུར་འདི་ནམ་ཡང་ནུབ་མ་གྱུར། །བདག་ཀྱང་མཁའ་ལྡིང་རྗེས་སུ་བུང་བ་བཞིན། །ཚུལ་འདི་ལེགས་པར་འཆད་ལ་སྤྲོ་བ་སྐྱེས། །ཁྱད་པར་བདག་བློ་གཞུང་འདིར་འདྲིས་སླད་དུ། །ཆོས་ཀྱི་རྒྱལ་པོ་རྗེ་བཙུན་བླ་མའི་བཀའ། །སྤྱི་བོར་ལྷུངས་ལས་འགོངས་པར་མ་ནུས་ནས། །ཅུང་ཟད་བརྗོད་འདིར་ནོངས་ན་མ་མོ་དང་། །མཁའ་འགྲོའི་ཚོགས་རྣམས་བུ་ལ་མ་བཞིན་དུ། །བརྩེ་བས་བཟོད་པར་བཞེས་ལ་གྲོགས་མཛོད་ཅིག །