རྒྱུད་གཞུང་འདི་ཉིད་ཡོ་ག་གསུམ་གང་ཡིན་ལ་དཔྱད་པ།

གཉིས་པ་ལ། གོང་མ་རྣམས་ཀྱི་བཞེད་གཞུང་དགོད་པ། དེ་དག་གི་དགོངས་པ་ལ་བརྟག་པ། རང་གི་རྟོགས་པ་བརྗོད་པ་དང་གསུམ། དང་པོ་ནི། དགོངས་པ་མི་མཐུན་པ་མང་སྟེ། བསྡུ་ན། མན་ངག་རྫོགས་པ་ཆེན་པོར་བཀྲལ་བ་དང་། བསྐྱེད་པ་མ་ཧཱ་ཡོ་གར་བཀྲལ་བའི་ལུགས་གཉིས་སུ་འདུ་བ་ལས། དང་པོ་ནི། སློབ་དཔོན་ཉི་འོད་སེང་གེ་དང་ཀུན་མཁྱེན་ཆོས་རྗེའི་དགོངས་པ་སྟེ། དེའང་རྒྱ་ཆེར་འགྲེལ་དུ། རྒྱུད་འདིའི་གནས་སྐབས་སུ་རང་བཞིན་རྫོགས་པ་ཆེན་པོའི་རང་བཞིན་ལས། གང་ཡང་དབྱེར་མེད་པའི་ཕྱིར། ཞུ་བ་པོ་དང་། སྟོན་པ་པོ་སོ་སོར་མ་ཕྱེ་སྟེ། འདི་སྐད་བཤད་པའི་དུས་ན། ཞེས་སྨོས་སོ། །ཞེས་གསུངས་ལ། དེ་ལྟ་ནའང་། འགྲེལ་པ་འདིར་རྒྱུད་དོན་ཕལ་ཆེར་བརྗོད་བྱའི་ཚིག་རེའང་མ་ཧཱ་ཡོ་ག་དང་། ཨ་ཏི་ཡོ་གའི་དབང་དུ་བྱས་ནས་འགྲེལ་ཚུལ་གཉིས་གཉིས་སྣང་ངོ་། །ཀུན་མཁྱེན་ཆོས་རྗེ་ནི། རྫོགས་ཆེན་ལའང་བསྐྱེད་རྫོགས་གཉིས་མེད་སེམས་དང་ཡེ་ཤེས་རང་སྣང་བའི་དཀྱིལ་འཁོར་དུ་བསྟན་པ་དང་། བསྐྱེད་པ་དང་རྫོགས་པ་ལ་མི་ལྟོས་པར་སེམས་ཉིད་ཡེ་སངས་རྒྱས་པའི་རང་བཞིན་དུ་བསྟན་པ་དང་། ཡེ་ཤེས་རང་སྣང་བའི་ངོ་བོར་སངས་རྒྱས་པའི་རང་བཞིན་དུ་བསྟན་པ་གསུམ་ལས། འདིར་དང་པོ་ཉིད་དོ་ཞེས་བཞེད། གཉིས་པ་ནི། སྒེག་རྡོར། སངས་རྒྱས་གསང་བ། གནུབས་ཆེན་སོགས་དང་། ཟུར་པའི་བཀའ་སྲོལ་འཛིན་པ་ཕལ་ཆེ་བའི་དགོངས་པ་སྟེ། དེའང་སངས་རྒྱས་གསང་བའི་ལམ་རིམ་ཆེ་ཆུང་ལ་སོགས་པར་མཧཱ་ལྟར་བཀྲལ་ཞིང་། གནུབས་ཀྱི་རྣལ་འབྱོར་མིག་གི་བསམ་གཏན་གྱི་འགྲེལ་པར་མ་ཧཱའི་འདོད་གཞུང་འཆད་པའི་ཚེའང་རྒྱུད་འདི་ལ་བརྟེན་ནས་བཤད་པ་མཛད་ལ། སློབ་དཔོན་སྒེག་པ་རྡོ་རྗེ་ནི། མ་ཧཱ་ལ་ཕ་མ་གཉིས་མེད་ཀྱི་རྒྱུད་གསུམ་དུ་ཕྱེ་བ་ལས། དེ་གསུམ་ཀའི་སྤྱི་རྒྱུད་དུ་བཞེད་དེ། སྤར་ཁབ་ལས། དཔལ་གསང་བ་འདུས་པ་ལ་སོགས་པ་ཐབས་ཀྱི་རྒྱུད་དང་། དཔལ་བདེ་བའི་མཆོག་ལ་སོགས་པ་ཤེས་རབ་རྒྱུད་དང་། དཔལ་སངས་རྒྱས་འབྱུང་བ་ལ་སོགས་པ་མ་ནིང་གི་རྒྱུད་དོ། །དེ་ལས་དཔལ་གསང་བའི་སྙིང་པོ་འདི་ནི། ཐམས་ཅད་ཀྱི་དོན་དང་རྒྱུ་འབྲས་ཚང་བར་འབྱུང་བའི་ཕྱིར། རྒྱུད་ཐམས་ཅད་ཀྱི་སྤྱི་ཡིན་པར་གསུངས་སོ། །ཞེས་དང་། རྗེ་སྒྲོ་ཕུག་པ་དང་སྒྲོལ་གཡུང་རྣམ་གཉིས་ཀྱི་ཁོག་དབུབ་ལས་ཀྱང་དེ་ལྟར་འབྱུང་ངོ་། །ལྷ་རྗེ་སྣར་སྟོན་ནི། རྫོགས་པ་སྟོན་དུ་རུང་ཡང་བསྐྱེད་པའི་རིམ་པ་ཤས་ཆེ་བས་མ་ཧཱ་ཡོ་ག་སྟེ། ཞེས་གསུངས། ཡང་འགའ་ཞིག །མ་ཧཱ་ཡོ་ག་ལ་གསུམ་དུ་ཕྱེ་བའི་གཉིས་མེད་ཀྱི་རྒྱུད་དུ་བཞེད། དེ་ལའང་གཉིས། ལྷ་རྗེ་རོག་ནི། ཐབས་ཤེས་ཟབ་པ་དང་། རྒྱ་ཆེ་བ་གཉིས་སུ་མེད་པར་སྟོན་པའི་ཕྱིར་གཉིས་མེད་དོ་གསུངས། ཉང་ཊཱིཀ་པ། ལྟ་ཕྲེང་ལྟར་རྣལ་འབྱོར་ཆེན་པོའི་ཚུལ་ལའང་གསུམ་དུ་ཕྱེ་བའི་འདི་མ་ཧཱའི་ཨ་ཏིའོ་གསུངས། དེ་ལྟར་ན་འགྲེལ་པ་ཉི་སེང་གིས་ཨ་ཏིར་བཀྲལ་བའང་དེར་འགྱུར་རམ་སྙམ་སྟེ། དེ་དང་ལྟ་ཕྲེང་གི་ཨ་ཏིར་འཇོག་པའི་དགོངས་པ་ཤས་ཆེར་མཐུན་པའི་ཕྱིར།

གཉིས་པ་ལ། ཨ་ཏི་དང་མ་ཧཱར་འདོད་པའི་ཕྱོགས་གཉིས་ལ་ལོག་རྟོག་བསལ་བ། ནང་ཚན་གྱི་དབྱེ་བ་ཕྲ་མོས་སྤྱིའི་ལུས་ཀྱི་དབྱེ་བ་ཕྱེ་ན་ཐུག་མེད་དུ་འགྱུར་བར་བསྟན་པའོ། །དང་པོ་ནི། གོང་མ་རྣམས་ཀྱི་ཨ་ཏིར་བཀྲལ་བ་ཕལ་ཆེར་མ་ཧཱའི་ནང་གསེས་ཀྱི་གསུམ་དུ་ཕྱེ་བ་ལ་དགོངས་པའམ། ཡང་ན་ཤེར་ཕྱིན་སྔགས་ལུགས་སུ་བཀྲལ་བ་ལྟར་མ་ཧཱའི་གཞུང་ཨ་ཏིའི་ལུགས་སུ་བཀྲལ་བར་མངོན་ལ། གཞན་དུ་རྒྱུད་ལུང་མན་ངག་གསུམ་སྤྱིའི་དབྱེ་བས་ཕྱེ་བའི་ཨ་ཏིར་བཞེད་པའོ་སྙམ་དུ་རྟོག་ན་མི་རིགས་ཏེ། རྣལ་འབྱོར་མིག་གི་བསམ་གཏན་ལས། སྔགས་ནང་པས་གསོལ་པ། རང་རིག་པ་གཉིས་སུ་མེད་པ་དེ་བཞིན་ཉིད་ཀྱི་ངང་དུ་གསལ་བ་ལ། སྣང་ན་སྣང་དུ་ཟད་དེ་ཕུང་པོ་ཁམས་དང་སྐྱེ་མཆེད་ལྷའི་དཀྱིལ་འཁོར་ལགས་པའི་དོན་དེ་ལས་ལྷག་པ་ཅི་བཙལ། ཞེས་པའི་ལན་དུ། ཨ་ཏིས། དེ་བཞིན་ཉིད་དུ་གཉིས་སུ་མེད་པ་ལ། །སྐུར་བྱེད་དོན་བྱེད་རྩོལ་བ་བཅུག་པས་ནོར། །བྱ་མེད་ཏིང་འཛིན་དོན་ལ་ནམ་ཡང་རེག་མི་ནུས། །དེ་ཕྱིར་ལྷུན་གྲུབ་རྒྱལ་པོ་ང་ཉིད་གཅིག་པུར་བྱུང་། །ཞེས་དང་། ཀུན་བྱེད་ལས། མ་ཧཱ་རྡོ་རྗེ་འཆང་འདོད་པས། །ཐབས་དང་ཤེས་རབ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་སྒྲུབ་རྣམ་བཞིས་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། རྩོལ་བསྒྲུབ་འདས་པའི་བྱང་ཆུབ་སེམས། །ཞེས་སོགས་རྒྱས་པར་གསུངས་པས་གནོད་པའི་ཕྱིར་དང་། སོ་སོའི་བཀོལ་མདོར་སྨོས་པ་ལྟར་གྱི་ཨ་ཏིའི་སྒོས་ཆོས་རྣམས་ཀྱང་གཞུང་འདིས་གཙོ་བོར་མི་སྟོན་པའི་ཕྱིར་དང་། སློབ་དཔོན་བརྒྱ་བྱིན་སྡོང་པོའི་མཉམ་སྦྱོར་གྱི་འགྲེལ་པ་རྒྱུད་དོན་རྣམ་བཤད་ལས་ཀྱང་། གསང་སྔགས་ཀྱི་རྒྱུད་མཐའ་དག་བསྡུ་ན། མཚོན་བྱ་གཞིའི་རྒྱུད་དང་། མཚོན་བྱེད་ཡི་གེའི་རྒྱུད་དོ། །མཚོན་བྱེད་ཀྱི་རྒྱུད་ལ། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོའི་རྒྱུད་དོ། །དེ་ལ་བསྐྱེད་རྫོགས་རྣམ་པ་གསུམ་དུ་ཕྱེ་སྟེ། དང་པོ་རྒྱུད་ཀྱི་གྲངས་བཅོ་བརྒྱད་དུ་གསུངས་པ་ལས། ཞེས་ཏནྟྲ་བཅོ་བརྒྱད་པོ་རྒྱུད་ལུང་མན་ངག་གསུམ་ལས། རྒྱུད་དུ་གསུངས་པའི་ཕྱིར་དང་། བསྐྱེད་རྫོགས་གསུམ་མི་ཡུལ་དུ་བབས་པའི་གནས་ཐ་དད་པར་གསུངས་པ་ལས། མ་ཧཱ་ནི་རྒྱལ་པོ་ཛཿའི་ཁང་སྟེང་དུ་གླེགས་བམ་དང་བཅས་ཏེ་བབས་པར་གྲགས་པ་ལྟར། འདིའང་དེར་བབས་པར་བཤད་པ་སོགས་ཀྱིས་གནོད་པའི་ཕྱིར་རོ། །ཡང་མ་ཧཱ་ཡོ་ག་ཉིད་དུ་བཞེད་པའི་ཕྱོགས་ཀྱི་དགོངས་པ་འགྲེལ་ཚུལ་ལའང་བརྟག་པར་བྱ་བ་འདི་ཡོད་དེ། སྤར་ཁབ་ལས་ཕ་མ་གཉིས་མེད་ཀྱི་རྒྱུད་གསུམ་ཀའི་སྤྱིར་བཞེད་པ་ཉིད། གཉིས་མེད་ཀྱི་རྒྱུད་ཀྱི་གོ་དོན་ཕ་མ་གཉིས་ཆ་མཉམ་པར་སྟོན་པ་ལ་བཞག་པ་ལྟར། དེ་གཉིས་ཀྱི་དོན་ཚང་བར་བསྟན་པས་གཉིས་མེད་ཀྱི་རྒྱུད་ཀྱི་དོན་ཡང་བསྟན་པར་འགྱུར་བའི་ཕྱིར། ཆེ་བའི་ངོས་ནས་དེ་གསུམ་གྱི་སྤྱི་རྒྱུད་ཅེས་སྨོས་པ་ལས། ངོ་བོ་གཉིས་མེད་ཀྱི་རྒྱུད་ཡིན་པར་དགོངས་སོ་ཞེས་བཤད་ན་ལེགས་པར་མངོན་ལ། གཞན་དུ་ན་རྒྱུད་ཐམས་ཅད་ཀྱི་སྤྱི་ཞེས་པའང་། ནང་རྒྱུད་སྡེ་གསུམ་ཁོ་ནའི་སྤྱི་རྒྱུད་དུ་བཞེད་པ་མ་ཡིན་ཏེ། འདི་ཉིད་ལས། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། ཞེས་དང་། ལེ་ལག་ལས། ལུང་གི་སྤྱི་འདི་ཤིན་ཏུ་ཟབ་པའི་ཕྱིར། །ཞེས་དང་། འགྲེལ་པ་མངོན་རྟོགས་ལས། ལུང་གི་སྤྱི་རུ་གྲགས་པ་ཡི། །རྣམ་པར་དབྱེ་བ་ལྔ་རུ་འགྱུར། །ཞེས་སོགས་དང་དགོངས་པ་མཐུན་པ་སྟེ། ཐམས་ཅད་ཀྱི་དོན་དང་རྒྱུ་འབྲས་ཚང་བར་བྱུང་བའི་ཕྱིར། །ཞེས་གསུངས་པས་སོ། །དེ་བས་ན། ཆེ་བའི་ངོས་ནས་ལུང་ཐམས་ཅད་ཀྱི་སྤྱི་དང་། རང་གི་ངོ་བོ་གཉིས་མེད་ཀྱི་རྒྱུད་དུ་བཞག་པར་བྱ་སྟེ། དཔེར་ན་གསང་འདུས་ཀྱི་རྒྱུད་ཉིད། མདོ་སྡེ་དང་རྒྱུད་སྡེ་ཐམས་ཅད་ཀྱི་སྣོད་དང་རྩ་བར་གསུངས་ཤིང་། ངོ་བོ་ཕ་རྒྱུད་དུ་བཞེད་པ་བཞིན་ནོ། །ཡང་ཁ་ཅིག་ན་རེ། རྒྱུད་འདི་མ་ཧཱར་འདོད་པ་མི་རིགས་ཏེ། ལྟ་ཕྲེང་ལས་བསྐྱེད་རྫོགས་གསུམ་གྱི་རྫོགས་པ་ཆེན་པོའི་སྐབས་སུ་རྒྱུད་འདི་དང་སྦྱར་ནས། རྟོག་ཚོགས་ལྷར་དག་ཚུལ་དང་། རྟོགས་པ་བཞི་ཡི་གཏན་ཚིགས་དང་། མཚན་ཉིད་གསུམ་སོགས་སྟོན་པས་གནོད་པའི་ཕྱིར་ཞེ་ན། སྐྱོན་མེད་དེ། ལྟ་ཕྲེང་གི་རྫོགས་པ་ཆེན་པོའི་དོན་ནི། མ་ཧཱ་ལ་གསུམ་དུ་ཕྱེ་བའི་ཨ་ཏི་ཡིན་པར་ཉང་ཊཱིཀ་པ་བཞེད་པ་ལྟར་འཐད་པའི་ཕྱིར་དང་། དེར་བཞག་པའི་རྫོགས་ཆེན་གྱི་དོན་དེ་དག་ཤས་ཆེར་འདུས་པ་སོགས་ལས་ཀྱང་སྟོན་པའི་ཕྱིར་དང་། ལྟ་ཕྲེང་ནི་མ་ཧཱའི་གྲོལ་ལམ་ཅིག་ཅར་སྟོན་པའི་གཞུང་དུ་རྗེ་སྒྲོ་ཕུག་པ་བཞེད་པར་གྲགས་ཤིང་གྲུབ་པའི་ཕྱིར་རོ། །ཡང་ཁོ་ན་རེ། མ་ཧཱ་ལ་ནང་གསེས་ཀྱི་བསྐྱེད་རྫོགས་གསུམ་དུ་ཕྱེ་བ་དེ་འདྲ་མི་རིགས་ཏེ། དེ་ལྟར་འབྱེད་རིགས་པའི་ཚད་མ་མེད་པའི་ཕྱིར་ཞེ་ན། རྟགས་མ་གྲུབ་སྟེ། ཀུན་ཁྱབ་ཀྱི་ཚད་མ་གསུམ་གྱིས་འགྲུབ་པའི་ཕྱིར། དེ་ལ་ལུང་ནི། འདི་ཉིད་ལས། སྐུ་དང་གསུང་དང་ཐུགས་ཀྱི་རྒྱུད། །ཅེས་དང་། དགོངས་འདུས་ལས། དབང་སྒྱུར་ཐབས་ཀྱི་ཐེག་པ་ཡང་། །ཡུལ་གྱིས་རྣམ་པ་གསུམ་སྣང་སྟེ། །བསྐྱེད་དང་རྫོགས་དང་ཡོངས་སུ་རྫོགས། །ཞེས་སོ། །མན་ངག་ནི། བདེ་འདུས་སྒྲུབ་པ་ལུང་གི་བཀའ་འགོ་ལས། ཡོ་ག་རྣམ་པ་གསུམ་ལ་དགུ་དགུར་བཀའ་སྩལ་པའི། མ་ཧཱའི་མ་ཧཱ་ནི་ལྷའི་དཀྱིལ་འཁོར་རིམ་པས་བསྐྱེད་པའོ༔ མ་ཧཱའི་ཨ་ནུ་ནི་རང་བཞིན་གྱིས་དཀྱིལ་འཁོར་ལྷུན་གྱིས་གྲུབ་པའོ༔ མ་ཧཱའི་ཨ་ཏི་ནི་དོན་དམ་ངོ་བོ་མ་སྐྱེས་པའོ༔ ཞེས་སོགས་དང་། གསང་སྔགས་བཀའི་ལྡེ་མིག་ལས་ཀྱང་གསང་སྔགས་ཐམས་ཅད་རྒྱུད་ལུང་མན་ངག་གསུམ་དུ་ཕྱེ། དེ་རེ་རེ་ལའང་གསུམ་གསུམ་དགུར་ཕྱེ་སྟེ། རྒྱུད་ཀྱི་རྒྱུད། རྒྱུད་ཀྱི་ལུང་། རྒྱུད་ཀྱི་མན་ངག །ཅེས་སོགས་གསུངས་སོ། །རིགས་པ་ནི། རྒྱུད་འདིར་བསྟན་གྱི་ཨ་ནུ་ཨ་ཏི་དང་། དགོངས་འདུས་ཀྱི་ཨ་ཏི་གཉིས། དེ་དང་དེའི་ནང་གསེས་ཀྱི་ཨ་ནུ་དང་ཨ་ཏིར་བཞག་དགོས་ཏེ། གཞན་དུ་འོག་མས་གོང་མའི་དོན་མི་མཐོང་བར་བཞེད་པའི་བསྟན་པ་སྤྱི་སྐད་ཀྱི་ཕྱག་རྒྱ་ལས་འདས་པར་འགྱུར་བའི་ཕྱིར་དང་། གསང་སྔགས་ཕྱི་འགྱུར་བ་ལ་གྲགས་པ་ལྟར། ཕ་རྒྱུད་འདུས་པ། མ་རྒྱུད་བདེ་མཆོག །གཉིས་མེད་ཀྱི་རྒྱུད་དུས་འཁོར་ལ་སོགས་པ་དེ་དག་ཀྱང་། སྔ་འགྱུར་རང་སྐད་ཀྱི་མ་ཧཱ་ལ་གསུམ་དུ་ཕྱེ་བའི་མ་རྒྱུད་སོགས་མ་ཡིན་ནོ་ཞེས་འདོད་དགོས་པར་འགྱུར་བའི་ཕྱིར། བདེ་མཆོག་སོགས་མདོ་དང་། དུས་འཁོར་སོགས་ཨ་ཏིར་ཐལ་བ་བཟློག་ཏུ་མེད་དོ། །དེའི་ཕྱིར་འདི་ཉིད་ལས། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཞེས་པའི་སྐབས་ཀྱི་འགྲེལ་ཆུང་པིན་ཏརྠར། ཉན་ཐོས་རང་རྒྱལ་བྱང་ཆུབ་དང་། །བྱ་བའི་རྒྱུད་དང་གཉིས་ཀའི་རྒྱུད། །རྣལ་འབྱོར་བསྐྱེད་དང་རྫོགས་པ་ཡི། །རྣམ་ཐར་བརྒྱད་ཕྱིར་རྟ་བབས་བརྒྱད། །ཅེས་རྫོགས་པ་མན་ཆད་བགྲོད་ནས་འཐོབ་བྱ་དོན་གྱིས་རྫོགས་ཆེན་དུ་བཤད་པའང་། མ་ཧཱའི་རྫོགས་ཆེན་རྒྱུད་འདི་ཉིད་ལ་དགོངས་པའི་ཕྱིར་རོ། །གཉིས་པ་ནི། ལྟ་སྒོམ་སྤྱོད་པ་སོགས་ལ་མི་འདྲ་བའི་ཁྱད་པར་སྔར་སྨོས་པ་ལྟར་བསྐྱེད་རྫོགས་གསུམ་ཀ་ལ་ཡོད་པའི་ཕྱིར། དེ་རྣམས་གང་གཙོ་བོར་སྟོན་པའི་སྒོ་ནས་དབྱེ་བར་བྱ་བར་ཡིན་གྱི། ཕྱོགས་རེ་ནས་བཟུང་སྟེ་བསྐྱེད་རྫོགས་གསུམ་སྤྱིའི་ལུས་ཀྱི་དབྱེ་བ་ཕྱེ་ན་ཐུག་མེད་དུ་འགྱུར་ཏེ། བསྐྱེད་རྫོགས་གསུམ་འགལ་བ་མ་ཡིན་པའི་གནད་ཀྱིས་བཀའ་སྒྱུ་འཕྲུལ་དྲྭ་བ་ལྟ་བུ་གཅིག་གི་ནང་དུའང་དེ་གསུམ་ཀ་ཚང་བར་ངེས་པའི་ཕྱིར། དེ་ལྟར་ཡང་བདུད་རྩི་བམ་བརྒྱད་ལས། རྒྱུད་དང་ལུང་དང་མན་ངག་གསུམ། །དམངས་དང་རྗེ་དང་རྒྱལ་པོའི་ཚུལ། །གཅིག་ལ་གཅིག་བརྟེན་གཅིག་གི་ངང་། །ཞེས་སོ། །

གསུམ་པ་རང་གི་རྟོགས་པ་བརྗོད་པ་ནི། རྒྱུད་གཞུང་འདི་ཉིད་མ་ཧཱ་ཡོ་ག་ལ་གསུམ་དུ་ཕྱེ་བའི་གཉིས་མེད་ཀྱི་རྒྱུད་དུ་ངོས་བཟུང་ངོ་། །དེ་ལྟར་ན། དེར་འཇོག་བྱེད་ཀྱི་ཁུངས་དང་། ཁྱད་པར་ཅི་ཞིག་ཡོད་ཅེ་ན། ལན་དུ། ཁུངས་སྨོས་པ་དང་། ཁྱད་པར་བསྟན་པ་གཉིས་ལས། དང་པོ་ནི། དུར་ཁྲོད་བདེ་བའི་དཔེ་ཆུང་རང་གནས་ལས། ཐབས་དང་ཤེས་རབ་མ་ནིང་རྒྱུད། །བསྟན་པའི་ཡིག་ལམ་རྐྱེན་དུ་གསུངས། །ཞེས་པའི་འགྲེལ་པར་བི་མ་ལས། དཔལ་བདེ་མཆོག་དང་། དེ་བཱི་ཛཱ་ལ་སོགས་ཤེས་རབ་ཀྱི་རྒྱུད་དང་། དཔལ་གསང་བ་འདུས་པ་ལ་སོགས་པ་རྣལ་འབྱོར་ཐབས་ཀྱི་རྒྱུད་དང་། དཔལ་གསང་བའི་སྙིང་པོ་སོགས་མ་ནིང་གི་རྒྱུད་ཡི་གེར་བཀོད་པ་དག་ནི་ངོ་བོའི་རྐྱེན་དུ་ངེས་ཏེ། ཞེས་དང་། བདེ་འདུས་གསང་སྔགས་བཀའི་ལྡེ་མིག་ཏུ་རྒྱུད་ལུང་མན་ངག་གསུམ་དགུ་ཕྲུགས་སུ་ཕྱེ་བའི་སྐབས་སུ། ཇི་སྐད་དུ། རྒྱུད་ཀྱི་མན་ངག་ནི། སེམས་དང་ཡེ་ཤེས་རང་སྣང་དབྱེར་མེད་གསང་བའི་སྙིང་པོ་ལ་རྒྱས་འབྲིང་ལྔ་སྟེ། ཞེས་སོ། །གཉིས་པ་ལ། གཙོ་བོ་དང་། ཕལ་པ་གཉིས། དང་པོ་ནི། ལྟ་ཕྲེང་ལས། དེ་ལས་བསྐྱེད་པའི་ཚུལ་ནི། ཏིང་འཛིན་རྣམ་གསུམ་རིམ་གྱིས་བསྐྱེད་ནས། དཀྱིལ་འཁོར་རིམ་གྱིས་བཀོད་ཅིང་བསྒོམས་པས་འགྲུབ་པའོ། །རྫོགས་པའི་ཚུལ་ནི། དོན་དམ་པར་སྐྱེ་འགག་མེད་པའི་ལྷ་དང་ལྷ་མོ་དང་། རྣམ་པར་མི་རྟོག་པའི་དོན་དབུ་མ་ཆོས་ཀྱི་དབྱིངས་ལས་ཀྱང་མ་གཡོས་ལ། ཀུན་རྫོབ་ཏུ་འཕགས་པའི་གཟུགས་ཀྱི་སྐུ་ཡང་གསལ་བར་བསྒོམ་ཞིང་མཉམ་ལ་མ་འདྲེས་པར་བསྒོམས་པས་འགྲུབ་པའོ། །རྫོགས་པ་ཆེན་པོའི་ཚུལ་ནི། འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་དབྱེར་མེད་པར་སྐུ་གསུང་ཐུགས་ཀྱི་དཀྱིལ་འཁོར་རང་བཞིན་ཡེ་ནས་ཡིན་པར་རྟོགས་ནས་བསྒོམ་པ་སྟེ། ཞེས་གསུངས་པ་ལྟར། འདིར་ཆོས་ཐམས་ཅད་རང་བཞིན་གྱིས་དཀྱིལ་འཁོར་དུ་རྟོགས་ནས་བསྒོམ་པ་གཙོ་བོར་སྟོན་པའི་ཕྱིར་དང་། རྫོགས་རིམ་གྱི་སྐབས་སུ། གསང་དབང་གི་ལམ་ཐབས་ལམ་སྟེང་སྒོ་གཙོ་བོར་སྟོན་པ་ཕ་རྒྱུད། ཤེས་རབ་ཡེ་ཤེས་ཀྱི་ལམ་འོག་སྒོ་ལས་རྒྱའི་རྣལ་འབྱོར་གཙོ་བོར་སྟོན་པ་མ་རྒྱུད། དབང་བཞི་པའི་ལམ་རྫོགས་པ་ཆེན་པོ་གཙོ་བོར་སྟོན་པ་གཉིས་མེད་ཀྱི་རྒྱུད་དུ་བཞེད་པ་ལས། འདིར་ཐབས་ལམ་སྟེང་འོག་གི་སྒོ་གཉིས་ཀྱང་ཆ་སྙོམས་པར་སྟོན་ཅིང་། ཁྱད་པར་དབང་བཞི་པའི་ལམ་གཙོ་བོར་སྟོན་པའི་ཕྱིར་གཉིས་མེད་ཀྱི་རྒྱུད་དོ། །གཉིས་པ་ནི། ཐབས་ཀྱི་དེ་ཁོ་ན་ཉིད་རྒྱ་ཆེ་བ་གཙོ་བོར་སྟོན་པ་ཕ་རྒྱུད། ཤེས་རབ་དེ་ཉིད་ཟབ་པ་གཙོ་བོར་སྟོན་པ་མ་རྒྱུད་ལས། འདིར་དབང་དང་ཕྲིན་སྒྲུབ་སོགས་རྒྱ་ཆེ་བ་དང་། རྫོགས་རིམ་སོགས་ཟབ་ལམ་དག་གཉིས་སུ་མེད་པར་སྟོན་པའི་ཕྱིར་དང་། ལྷ་རྣམས་ཀྱི་རྣམ་པའང་ཆ་ལུགས་ཀྱི་ཁྱད་པར་ཞི་བའི་དཀྱིལ་འཁོར་དུ་ཕ་རྒྱུད་ལྟར་སྟོན་ཀྱང་། ཁྲོ་དཀྱིལ་དུ་མ་རྒྱུད་ལྟར་སྟོན་པའི་ཕྱིར་གཉིས་མེད་ཀྱི་རྒྱུད་དུ་གཞག་པར་བྱའོ། །

གསུམ་པ་རྗོད་བྱེད་རྒྱུད་ཀྱི་ཁྱད་པར་ལ་ཕྱི་ནང་གི་རྒྱུད་སྡེ་སྤྱིར་བཤད་པ་དང་། སྒྱུ་འཕྲུལ་དྲྭ་བ་བྱེ་བྲག་ཏུ་བཤད་པའོ། །དང་པོ་ནི། ཀྲི་ཡའི་རྒྱུད་ལ་སྤྱི་བྱེ་བྲག་གཉིས་ལས། སྤྱི་རྒྱུད་ནི་བཞི་སྟེ། གསང་བ་སྤྱི་རྒྱུད། ལེགས་གྲུབ། དཔུང་བཟང་། བསམ་གཏན་ཕྱི་མའོ། །བྱེ་བྲག་ནི། འཇིག་རྟེན་ལས་འདས་པའི་རིགས་གསུམ་དང་། འཇིག་རྟེན་པའི་རིགས་ལ་ནོར་བུའི། གླང་པོའི། ལྔས་རྩེན་གྱི། བལ་གླང་གི །ཕལ་པའི་རིགས་ཏེ། རིགས་དྲུག་གི་སོ་སོའི་རྒྱུད་མང་དུ་བཞུགས་པ་རྣམས་སོ། །སྤྱོད་པའི་རྒྱུད་ནི། རྣམ་སྣང་མངོན་བྱང་། ཕྱག་རྡོར་དབང་བསྐུར། རྡོ་རྗེ་ས་འོག་གི་རྒྱུད་ལ་སོགས་པའོ། །ཡོ་ག་ལ་རྩ་རྒྱུད་དེ་ཉིད་བསྡུས་པ། བཤད་རྒྱུད་རྩེ་མོ་དང་དཔལ་མཆོག །ཆ་མཐུན་གྱི་རྒྱུད་སྤྱོད་རྒྱུད་ལ་སོགས་པའོ། །རྣལ་འབྱོར་ནང་པ་ལ། རྒྱུད་སྡེ་དང་། སྒྲུབ་སྡེ་གཉིས། དང་པོ་ལ། བསྐྱེད་རྫོགས་གསུམ་ལས། མ་ཧཱ་ནི་སྤྱིར་ཏནྟྲ་སྡེ་བཅོ་བརྒྱད་ལས་ཁ་ཅིག་མ་གཏོགས་པ་སྟེ། གསང་འདུས་སོགས་ཕ་རྒྱུད། མཉམ་སྦྱོར་སོགས་མ་རྒྱུད། སྒྱུ་འཕྲུལ་དྲྭ་བ་སོགས་གཉིས་མེད་ཀྱི་རྒྱུད་དོ། །ཨ་ནུ་ལ། ཀུན་འདུས། ཁུ་བྱུག་རོལ་པ། རྔམ་གློག །སེམས་ལུང་ཆེན་མོ་སྟེ་མདོ་བཞི་དང་། དེམས་སུ་གྲགས་པ་སྤྱི་མདོ་དགོངས་འདུས་ལ་སོགས་པ་རྣམས་སོ། །ཨ་ཏི་ལ། ཀུན་བྱེད་དང་། སེམས་སྡེ་མ་བུ་བཅོ་བརྒྱད་སོགས་སེམས་སྡེ། ཡེ་ཤེས་གསང་བ་སོགས་ཀློང་སྡེ། རྒྱུད་བཅུ་བདུན་ལ་སོགས་པ་མན་ངག་གི་སྡེའོ། །གཉིས་པ་ནི། བཀའ་བརྒྱད་སྤྱི་སྒོས་ཀྱི་རྒྱུད་རྣམས་སོ། །

གཉིས་པ་ལ། རྒྱུད་ཀྱི་མཚན་གཞིའི་དབྱེ་བ་དང་། དེ་དག་གི་ཡན་ལག་རྩི་ཚུལ་ལོ། །དང་པོ་ནི། ཟུར་ལུགས་པ་ཕལ་ཆེར། སྒྱུ་འཕྲུལ་སྡེ་བརྒྱད་དང་། བཤད་རྒྱུད་སྡེ་བཞིར་དབྱེ་བར་མཛད་དེ། དེ་ལ་སྡེ་བརྒྱད་ནི། སེམས་དང་ཡེ་ཤེས་རང་སྣང་དུ་སྟོན་པ་རྩ་བའི་རྒྱུད་གསང་བ་སྙིང་པོ། རོལ་པ་མངོན་པར་བརྗོད་པ་ལྷ་མོ་སྒྱུ་འཕྲུལ་དྲྭ་བ། དཀྱིལ་འཁོར་རྫོགས་པར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་རྫོགས་པར་སྟོན་པ་བཞི་བཅུ་པ། དབང་གཙོ་བོར་སྟོན་པ་བླ་མ། ཡོན་ཏན་མཐར་ཕྱིན་པར་སྟོན་པ་བརྒྱད་ཅུ་པ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་དྲྭ། དམ་ཚིག་མཆོག་ཏུ་སྟོན་པ་ལེ་ལག་དང་བརྒྱད་དོ། །བཤད་རྒྱུད་སྡེ་བཞི་ནི། གྲོལ་ལམ་རིམ་ཅིག་ཅར་དུ་སྟོན་པ་ཡེ་ཤེས་སྙིང་པོ་དང་། རྡོ་རྗེ་མེ་ལོང་། ཐབས་ལམ་རིམ་ཅིག་ཅར་དུ་སྟོན་པ་རྒྱ་མཚོ་དང་། ཐལ་རྒྱུད་དོ། །ལྷ་རྗེ་སེ་སྟོན། རོལ་པ་ཆེན་པོ་བཤད་རྒྱུད་བཞིའི་གྲས་སུ་བགྲངས་ནས། ཡེ་ཤེས་སྙིང་པོ་དེ་བཞི་གའི་བསྡུས་རྒྱུད་དུ་བཞེད། གླན་ཊཱིཀ་པ་དང་། ཀུན་མཁྱེན་ཆེན་པོ་ནི། སྒྱུ་འཕྲུལ་སྡེ་བཞིར་བཞེད་དེ། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་དྲྭ། རོལ་པ་མངོན་པར་བརྗོད་པ་ལྷ་མོ་སྒྱུ་དྲྭའོ། །རྡོར་སེམས་སྒྱུ་དྲྭ་ལའང་ནང་གསེས་ཀྱིས་དབྱེ་ན། རྩ་རྒྱུད་སྙིང་པོ་དང་། བཤད་རྒྱུད་སྡེ་བརྒྱད་དུ་བཞེད་དོ། །གཞན་ཡང་རྡོ་རྗེ་གསང་བའི་སྙིང་པོ་དང་། སྒྱུ་འཕྲུལ་སྙིང་པོ་བཀོད་པ། ཁྲོ་བོ་སྟོབས་ཀྱི་རྒྱུད་སོགས་རྒྱུད་ཕྲན་མང་དུ་བཞུགས་ཤིང་། སྤྱིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་རྒྱ་གར་ན་ལེའུ་འབུམ་ཕྲག་གཅིག་བཞུགས་པར་གྲགས་སོ། །གཉིས་པ་ལ། ཡན་ལག་བདུན་ལྡན་དུ་དབྱེ་བ། དེ་རྩ་བཤད་གཉིས་སུ་བསྡུ་བའོ། །དང་པོ་ནི། ཧེ་རུ་ཀ་གལ་པོ་ལས། རྩ་བའི་རྒྱུད་དང་བཤད་པའི་རྒྱུད། །ཕྱི་མ་ཕྱི་མར་གྱུར་པ་དང་། །མ་ཚང་ཁ་སྐོང་དཀའ་བ་གཅོད། །ཀལྤ་རྟོག་པ་དུམ་བུ་རྣམས། །ཞེས་པ་ལྟར་བརྩི་ན། ཁྱད་པར་གྱི་མཚན་ཉིད་དང་། མཚན་གཞིའོ། །དང་པོ་ནི། ཐོག་མར་བྱུང་ཞིང་བཤད་གཞིར་གྱུར་པ་ནི་རྩ་རྒྱུད། མ་ཚང་ཁ་སྐོང་བ། དཀའ་བ་གཅོད་པ། འཁྲུགས་པ་བསྡེབས་པ་ལ་སོགས་པའི་མཚན་ཉིད་ཅན་ནི་བཤད་པའི་རྒྱུད། རྒྱུད་སྔ་མར་གབ་པ་མངོན་དུ་ཕྱུང་བ་ནི་རྒྱུད་ཕྱི་མ། དེར་ཡང་མི་གསལ་བ་གསལ་བར་བྱེད་པ་ཕྱི་མའི་ཕྱི་མ། མ་ཚང་བ་ལོགས་སུ་གསུངས་པ་ཁ་སྐོང་གི་རྒྱུད། དཀའ་བ་ལོགས་སུ་བཀྲལ་བ་དཀའ་བ་གཅོད་པ། རྩ་བཤད་ནས་ལོགས་སུ་ཕྱུང་བ་ཀལྤ་དུམ་བུའི་རྒྱུད་དོ། །གཉིས་པ་ལ། རྩ་བའི་རྒྱུད་ནི་ལེའུ་ཉི་ཤུ་རྩ་གཉིས་པ་འདིའོ། །བཤད་པའི་རྒྱུད་ནི། བཤད་རྒྱུད་སྡེ་བཞི་ལ་སོགས་པའོ། །ཕྱི་མའི་རྒྱུད་ནི། གླེགས་བམ་དེ་ཉིད་ཀྱི་ཕྱི་མ་ནི་རྩ་རྒྱུད་ཀྱི་ཕྱི་མ་ལེའུ་ཉེར་གསུམ་པ་དང་ཉེར་བཞི་པ་ལྟ་བུ། གླེགས་བམ་གཞན་གྱི་ཕྱི་མ་ནི་རྒྱས་པའི་ཕྱི་མ་དང་། ཕྱི་མའི་ཕྱི་མ་ལྟ་བུ། དེ་དག་ནི་ཕྱི་མའང་ཡིན་ལ་བཤད་རྒྱུད་ཀྱང་ཡིན་ནོ། །མ་ཚང་བ་ཁ་སྐོང་གི་རྒྱུད་ནི། བརྒྱད་ཅུ་པ། བཞི་བཅུ་པ། བརྒྱད་པ། བླ་མ། ལེ་ལག་རྣམས་ཏེ། ཕྱི་མ་ནི་ཀལྤ་དུམ་བུའི་རྒྱུད་ཀྱང་ཡིན་ནོ། །དཀའ་བ་གཅོད་པ་ནི། སྙིང་པོའི་ཕྱི་མ་དང་ཁྲོ་བོ་སྟོབས་པོ་ཆེའི་རྒྱུད་ལྟ་བུའོ། །གཉིས་པ་ནི། འདི་དག་ཀྱང་རྩ་བའི་རྒྱུད་ནི་ལེའུ་ཉེར་གཉིས་པ་སྟེ། གཞན་ཐམས་ཅད་བཤད་རྒྱུད་དུ་བསྡུའོ། །དེ་གཉིས་པོའི་ཁྱད་པར་གྱི་མཚན་ཉིད་ལ། སྔ་རབས་པ་རྣམས་དགོངས་པ་མི་མཐུན་ཏེ། སོ་དར་སྙིང་ན་རེ། བརྗོད་བྱ་མི་གསལ་བ་མུན་པ་ལྟར་གནས་པ་ནི་རྩ་རྒྱུད། གསལ་བྱེད་སྣང་བ་ལྟར་སྟོན་པ་ནི་བཤད་རྒྱུད་དོ་གསུངས། དེ་ལྟར་ན། སྣང་མུན་དང་མཚུངས་པའི་ཕྱིར། རྩ་བཤད་གཉིས་ཕན་ཚུལ་འགལ་བར་ཐལ་བས་མི་འཐད་དོ། །ཡང་ཟུར་ལུགས་པ་ཕལ་ཆེར། སྟོན་པའི་བདག་ཉིད་ཀྱིས་གསུངས་པ་རྩ་རྒྱུད། འཆད་པའི་སྐྱེས་བུས་གསུངས་པ་བཤད་རྒྱུད་དོ་གསུངས། དེ་ལྟར་ན་བརྒྱད་ཅུ་པ་སོགས་ཀྱང་རྩ་རྒྱུད་དུ་འགྱུར་ཏེ། རྒྱུད་གསུངས་པའི་གླེང་གཞི་རྩ་རྒྱུད་དང་ཚིག་དོན་ཁྱད་པར་མེད་པའི་ཕྱིར་དང་། སྤར་ཁབ་ཏུ་རྩ་རྒྱུད་ཉིད་ཀྱང་འཆད་པའི་སྐྱེས་བུས་གསུངས་པར་བཞེད་པས་གནོད་དོ། །ཡང་ཉང་ཊཱིཀ་པ་ན་རེ། གཞུང་གཞན་ལ་མ་བརྟེན་པར་དོན་གཞན་བསྐྱེད་ནུས་པ་རྩ་རྒྱུད། རྒྱུད་ཀྱིས་རྒྱུད་ཀྱི་དོན་འགྲོལ་བར་བྱེད་པ་བཤད་རྒྱུད་དོ་གསུངས་པ་མི་འཐད་དེ་དང་པོ་ལྟར་ན་རིམ་གྱིས་འཇུག་པ་དག་ལམ་སྟེགས་ཀྱི་ཐེག་པ་གཞན་ལ་བརྟེན་མི་དགོས་པར་ཐལ། འདི་ཉིད་ཀྱིས་བསྐྱེད་ནུས་པའི་ཕྱིར། འདོད་མི་ནུས་ཏེ། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པས་གསལ། གཉིས་པ་ལྟར་ན་རྩ་བའི་རྒྱུད་འདི་ཉིད་ཀྱང་བཤད་རྒྱུད་དུ་འགྱུར་ཏེ། ལེའུ་བཅུ་གཅིག་པའི། སྒྲུབ་པའི་ཞག་དང་། ཞེས་པའི་ལེའུ་དགུ་པར། ཞག་ནི་སུམ་ཅུ་ཕྲག་དྲུག་གམ། །ཞེས་སོགས་ཀྱིས་བཀྲལ་བའི་ཕྱིར་རོ། །རོག་བདེ་གཤེགས་ཆེན་པོ་ནི། ཐོག་མར་བྱུང་ཞིང་བཤད་གཞིར་གྱུར་པ་ནི་རྩ་རྒྱུད། རྗེས་ལ་བྱུང་ཞིང་འཆད་བྱེད་དུ་གྱུར་པའི་རྒྱུད་ཀྱི་དངོས་པོ་གཞན་དུ་གྲུབ་པ་ནི་བཤད་རྒྱུད་ཅེས་གསུངས་ཏེ། ལེགས་པར་དགོངས་པའོ། །དེ་ལྟར་ཡང་དུར་ཁྲོད་རྨད་བྱུང་གི་རྒྱུད་ལས། ཐོག་མར་གསུངས་པ་རྩ་བའི་རྒྱུད། །ཕྱིས་ནས་གསུངས་པ་བཤད་པའི་རྒྱུད། །མདོ་ཙམ་བརྗོད་པ་རྩ་བའི་རྒྱུད། །གསལ་བར་བྱེད་པ་བཤད་པའི་རྒྱུད། །ཅེས་གསུངས་སོ། །

གསུམ་པ་ལ། རྩོད་པ་དགོད་པ་དང་། དེ་སྤང་བའོ། །དང་པོ་ནི། དབུ་རུ་དཔལ་འཛིན་ན་རེ། ལྟ་བ་ཁྱད་པར་འཕགས་པའི་ཕྱིར། །རྫོགས་པ་ཆེན་པོ་མཆོག་གོ་ལོ། །སྔགས་ཀྱི་ཁྱད་ཆོས་ལྟ་བ་མིན། །དབུ་མ་ལས་ལྷག་ག་ལ་ཡོད། །ཅེས་ཟེར། གཉིས་པ་ནི། ཐེག་ཆེན་ཐམས་ཅད་ལྟ་བ་སྤྲོས་བྲལ་དུ་འདོད་པའི་ཕྱིར་ཟེར་རམ། དབུ་མ་དང་སྔགས་གཉིས་ལྟ་བ་སྤྲོས་བྲལ་དུ་འདོད་པར་གཅིག་པའི་ཕྱིར་ཟེར། དང་པོ་ལྟར་ན། དབུ་སེམས་གཉིས་ཀྱང་ལྟ་བ་ཁྱད་མེད་དུ་འགྱུར་ཏེ། གཉིས་ཀ་ཐེག་ཆེན་དུ་བཞེད་པའི་ཕྱིར། འདོད་ན། སེམས་ཙམ་པ་སྤྲོས་བྲལ་དུ་མི་འདོད་པས་གསལ། གཉིས་པ་ལྟར་ན། དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་ལྟ་བར་མཐུན་ནའང་དེ་ཙམ་གྱིས་སྔགས་ཀྱི་ལྟ་བ་གཏན་ལ་ཕེབས་པ་མ་ཡིན་ཏེ། སྔགས་ཀྱི་ལྟ་བ་ནི། བདེན་གཉིས་དབྱེར་མེད་པའི་རང་བཞིན་ཅན་དུ་འདོད་པས། དེའི་མཐུས་ཀུན་རྫོབ་སྒྱུ་མའི་མཚན་ཉིད་ཅན་དེ་དག་ཀྱང་ཡོངས་སུ་དག་པའི་ལྷའི་མཚན་ཉིད་དུ་བལྟ་བའི་ཕྱིར། དེས་ན་ཁྱེད་ཅག་སྔགས་ལ་དབུ་མ་ལས་འཕགས་པའི་ལྟ་བ་མི་འདོད་པ་མི་རིགས་ཏེ། འདི་ལྟར། ཆོས་ཉིད་སངས་རྒྱས་ཡིན་ན། ཆོས་ཅན་སངས་རྒྱས་མ་ཡིན་པ་མི་རུང་སྟེ། ཆོས་ཅན་གྱི་ངོ་བོ་ཆོས་ཉིད་ཡིན་པའི་ཕྱིར། ཞེས་འཁོར་འདས་དབྱེར་མེད་ཀྱི་ལྟ་བ་ཁས་ལེན་པའི་ཕྱིར། དེ་ལ་ཁོ་ན་རེ། སྔགས་ཀྱི་ཀུན་རྫོབ་ལྷར་སྣང་བ་དེ་དག་ཆོས་ཅན། དོན་དམ་ལ་དམིགས་པའི་ལྟ་བ་མ་ཡིན་ཏེ། ཀུན་རྫོབ་ལ་དམིགས་པའི་སྒོམ་པ་ཡིན་པའི་ཕྱིར་ཟེར་ན། ཀུན་རྫོབ་ལྟ་བའི་དམིགས་ཡུལ་དུ་མི་འདོད་པ་ནི། བདེན་གཉིས་ལ་བཟང་ངན་བླང་དོར་དུ་བལྟ་བ་མདོའི་ལུགས་ཡིན་ལ། སྔགས་སུ་བདེན་གཉིས་ཀྱི་སྐྱ་བར་ནས་མི་འདོན་པར་མཉམ་པའི་ལྟ་བ་ཁས་ལེན་པའི་ཕྱིར། སྒོམ་པ་ཡིན་པ་ལྟ་བ་མིན་པ་སོགས་ལྟ་སྒོམ་འགལ་བར་འཛིན་པ་ཡང་མི་རིགས་ཏེ། ལྟ་བ་གཏན་ལ་ཕབ་ནས་རྟོགས་དོན་སྒོམ་པར་མཁས་གྲུབ་ཀུན་ལ་གྲགས་པའི་ཕྱིར་དང་། གལ་ཏེ་ཕུང་ཁམས་སོགས་གཟོད་ནས་ལྷར་དག་པར་གསུངས་པ་ལྟར་རྟོགས་པ་གནས་ལུགས་ཀྱི་ལྟ་བ་མ་ཡིན་པ་དང་། དེ་མ་ཡིན་ནའང་། དེར་སྒྲོ་བཏགས་ཏེ། སྒོམ་པ་ཡིན་ན་ལོག་པའི་ལྟ་སྒོམ་དུ་འགྱུར་བའི་ཕྱིར། འབྲས་བུ་འབྱུང་མི་རིགས་ཏེ། བོང་བ་གསེར་དུ་བསྒོམ་པ་ལ་ཇི་ཙམ་འབད་ཀྱང་དེར་མི་འགྱུར་བ་བཞིན་ནོ། །དེའི་ཕྱིར་ལྟ་བ་ལ་ཁྱད་པར་ཡོད་པར་གྲུབ་ལ། དེ་ལྟར་གྲུབ་པ་ཉིད་ཀྱིས། དེ་རྟོགས་བྱེད་ཐེག་པའི་རིམ་པ་ལའང་ཁྱད་པར་ཡོད་པར་དམིགས་པའི་ཕྱིར། ཐེག་རིམ་དགུ་ཀ་ལ་ལྟ་བ་སོ་སོར་སྣང་ཞིང་། ཀུན་གྱི་རྩེ་མོ་མཆོག་ཏུ་གྱུར་པ་ནི་ཨ་ཏི་ཡོ་ག་སྟེ། དེ་བས་ན། མཆོག་གོ་ལོ་ཞེས་མ་རངས་པའི་ཚིག་གིས་བསྙད་པ་ནི་བླ་ཅོལ་ཙམ་དུ་ཟད་དེ། སྙིང་པོ་མེད་དོ། །དེ་ལ་ཁ་ཅིག་ན་རེ། དེ་མི་འཐད་དེ། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང་། །ལྔ་པ་ཐུབ་པའི་དགོངས་པ་མིན། །ཞེས་པས་ཐེག་པ་བཞི་པ་དང་། གྲུབ་མཐའ་ལྔ་པ་མེད་པར་གསུངས་པས་ཐེག་པ་ནི་གསུམ་ཁོ་ནར་ངེས་པའི་ཕྱིར་ཟེར། འོ་ན་མཚན་བརྗོད་དང་། རྡོ་རྗེ་སྙིང་འགྲེལ་ཉིད་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བཞིར་ཕྱེ་བའང་མི་འཐད་པར་ཐལ། གསུམ་ཁོ་ནར་ངེས་པའི་ཕྱིར་བྱས་པ་ལ། ཁོ་ན་རེ། གསུམ་དུ་ཕྱེ་བ་ནི་ཉན་རང་སངས་རྒྱས་ཀྱི་ཐེག་པ་གསུམ་ཡིན་ལ། དེའི་ཕྱི་མ་ལ་རྒྱུ་འབྲས་གཉིས་སུ་ཕྱེ་ནས་བཞིར་གསུངས་པའི་ཕྱིར། དབྱེ་བསྡུའི་ཁྱད་ཙམ་སྟེ་སྐྱོན་མེད་དོ་ཞེ་ན། དེ་འདྲ་རིམ་དགུ་ལའང་མཚུངས་ཏེ། ཕྱི་ནང་གི་རྒྱུད་སྡེ་དྲུག་པོ་འབྲས་ཐེག་ཏུ་འདུ་ལ། དེའང་སངས་རྒྱས་ཀྱི་ཐེག་པའི་ནང་དུ་འདུ་བས་འདིར་ཡང་དབྱེ་བསྡུའི་ཁྱད་དོ། །གལ་ཏེ་ལྷ་མིའི་ཐེག་པ་མ་འདུས་སོ་ཞེ་ན། སྐྱོན་མེད་དེ། ལྷ་མིའི་ཐེག་པ་ནི་མངོན་མཐོའི་ཐེག་པ་ཡིན་ལ། རྡོ་རྗེ་སྙིང་འགྲེལ་ལས་གསུམ་དུ་བསྡུས་པ་ནི་རྣམ་གྲོལ་གྱི་ཐེག་པ་ལ་དགོངས་པའི་ཕྱིར་རོ། །དེ་བས་ན་ཁྱེད་ཅག་ཐེག་པ་གསུམ་ཁོ་ནར་ཞེན་པ་ནི། ལང་གཤེགས་ཀྱི་མདོར། ཐེག་པ་བསམ་གྱིས་མི་ཁྱབ་པར་གསུངས་པ་སོགས་ཀྱི་དོན་ལ་རྨོངས་པར་ཟད་དོ། །གཞན་ཡང་ཕྱི་འགྱུར་གྱི་རྒྱུད་སྡེ་རྣམས་སུ་ཨ་ནུ་དང་ཨ་ཏིའི་ཆོས་སྐད་མ་བྱུང་བ་རྒྱུ་མཚན་དུ་བྱས་ཏེ་འགོག་པ་ནི་སྨད་མི་མཁས་ཀྱི་བསྟོད་སྒྲར་འགྱུར་ཏེ། རྒྱལ་བས་གདུལ་བྱ་ལ་ལྟོས་ནས་གསུང་རབ་ལ་མཆོག་དམན་མཛད་པའི་འོག་མ་འོག་མའི་ནང་དུ་གོང་མ་གོང་མའི་ཆོས་སྐད་དང་བཤད་པ་རྒྱས་པར་མི་འབྱུང་བ་སྤྱི་ལུགས་ཡིན་པའི་ཕྱིར་ཏེ། དཔེར་ན་ཉན་ཐོས་ཀྱི་སྡེ་སྣོད་དུ་ཕར་ཐེག་དང་། དེའི་ནང་དུ་སྔགས་ཕྱི་རྒྱུད་དང་། དེ་དག་ཏུ་གསང་བདེ་སོགས་ཀྱི་ཆོས་སྐད་མི་འབྱུང་བ་བཞིན་ནོ། །དེའི་ཕྱིར་གསང་བདེ་སོགས་སུ་ཨ་ནུ་དང་ཨ་ཏིའི་ཆོས་སྐད་དང་བཤད་པ་རྒྱས་པར་མི་འབྱུང་བ་ཉིད་ཀྱིས་རྫོགས་པ་ཆེན་པོ་ནི་ཐེག་པ་ཀུན་གྱི་རྩེ་མོར་གྲུབ་པ་ཡིན་ཏེ། སྤྲོས་པས་ཆོག་གོ །

གཉིས་པ་བསྟན་བཅོས་ལ། རྣམ་གཞག་སྤྱིར་བསྟན་པ་དང་། བྱེ་བྲག་རྒྱུད་འདིའི་དགོངས་འགྲེལ་གྱི་བསྟན་བཅོས་ངོས་བཟུང་བ་གཉིས། དང་པོ་ལ། མཚན་ཉིད། སྒྲ་དོན། དབྱེ་བའོ། །དང་པོ་ནི། གཙོ་བོར་བསྟན་བཅོས་རྩོམ་པའི་བསམ་པས་ཀུན་ནས་བསླང་སྟེ་རང་གི་ཞེ་འདོད་ཀྱི་གྲུབ་མཐའ་གཞན་ལ་བསྟན་པའི་ཕྱིར་བསྡེབས་པའི་ལུང་ཆོས་གང་ཞིག

ཁྱད་ཆོས་གསུམ་དང་ལྡན་པ་བསྟན་བཅོས་རྣམ་དག་གི་དང་། དེ་གསུམ་གང་རུང་དང་བྲལ་བ་ལྟར་སྣང་གི་མཚན་ཉིད་དོ། །ཁྱད་ཆོས་གསུམ་ནི། རྒྱལ་བའི་བཀའ་ལ་བརྟེན་ནས་དེའི་དགོངས་འགྲེལ་དུ་བྱས་པ་དང་། རྩོམ་པ་པོ་རྣམ་གཡེང་མེད་པའི་ཡིད་ཅན་གྱིས་བཤད་པ་དང་། བྱེད་ལས་ཐར་པ་ཐོབ་པའི་ལམ་དང་རྗེས་སུ་མཐུན་པ་སྟེ། རྒྱུད་བླར། གང་ཞིག་རྒྱལ་བ་སྟོན་པ་འབའ་ཞིག་གི །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་སོ། །གཉིས་པ་ནི། ཤཱསྟྲའི་སྒྲ་ལས། ཤཱ་ས་ན་འཆོས་པ་དང་། ཏྲ་ཡ་སྐྱོབ་པ་ལ་འཇུག་པའི་ཕྱིར། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པས་ན་བསྟན་བཅོས་ཏེ། རྣམ་བཤད་རིག་པ་ལས། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་སྐྱོབ་བྱེད་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་སོ། །གསུམ་པ་ལ། མཆོག་དམན་གྱི་སྒོ་ནས་དང་། བྱེད་ལས་ཀྱི་དང་། རྩོམ་བྱེད་གང་ཟག་གི་དང་། ཇི་ལྟར་བརྩམ་ཚུལ་གྱི་དང་། བརྗོད་བྱ་དོན་གྱི་དང་། བཤད་བྱ་བཀའི་སྒོ་ནས་དབྱེ་བ་དང་དྲུག །དང་པོ་ནི། བདེ་འདུས་ཀྱི་ས་གཅོད་ཚོམས་ཀྱི་ཆིངས་ལས། བསྟན་བཅོས་དོན་མེད་དོན་དམན་དང་། །དོན་ལོག་དོན་ལྡན་བཞིར་ཤེས་བྱ། །ཞེས་པས་བཞི་སྟེ། དོན་མེད་པ་བྱ་རོག་སོ་བརྟག་གི་བསྟན་བཅོས་ལྟ་བུ། དོན་དམན་པ་ཐུན་མོང་གི་རིག་གནས་བཞིའི་བསྟན་བཅོས་ལྟ་བུ། དོན་ལོག་པ་ཕྱི་རོལ་པའི་བསྟན་བཅོས་ལྟ་བུ། དོན་དང་ལྡན་པ་སངས་རྒྱས་པའི་ནང་རིག་པའི་བསྟན་བཅོས་ལྟ་བུའོ། །ས་སྡེ་ལས་དགུར་བཤད་དེ། ཇི་སྐད་དུ། དོན་མེད་དོན་ལོག་དོན་དང་ལྡན། །ངན་གཡོ་བརྩེ་བྲལ་སྡུག་བསྔལ་སྤོང་། །ཐོས་རྩོད་སྒྲུབ་པ་ལྷུར་ལེན་པ། །བསྟན་བཅོས་རྣམ་པ་དགུ་ཡིན་ནོ། །ཞེས་གསུམ་ཚན་གསུམ་ལས། སྔ་མ་གཉིས་གཉིས་ལྟར་སྣང་དང་། ཕྱི་མ་རེ་རེ་བསྟན་བཅོས་ཡང་དག་གོ །གཉིས་པ་ནི། བཀའི་དོན་རྒྱ་ཆེན་པོ་སྡུད་པའི། འཁྲུགས་པ་སྡེབ་པའི། ཟབ་མོ་རྣམ་པར་འབྱེད་པའི་བསྟན་བཅོས་གསུམ་སྟེ། རིམ་པར། ལམ་རིམ། རིན་ཆེན་དྲྭ་བ། བི་མ་ལའི་ཐུགས་ཐིག་ལྟ་བུའོ། །གསུམ་པ་ནི། སངས་རྒྱས་ཀྱིས་གསུངས་པ་ལ་བསྟན་བཅོས་སུ་བྱས་པ་རྡོ་རྗེ་ཆོས་ཀྱིས་མཛད་པའི་བདེ་འདུས་ཀྱི་ལུང་ལྔ་དང་། བྱམས་པའི་ཆོས་ལྔ་ལྟ་བུ། དགྲ་བཅོམ་པས་གསུངས་པ་ལ་བསྟན་བཅོས་སུ་བྱས་པ་མངོན་པ་སྡེ་བདུན་ལྟ་བུ། ས་ནོན་པའི་བྱང་འཕགས་ཀྱིས་བརྩམས་པ་ལ་བསྟན་བཅོས་སུ་བྱས་པ་སློབ་དཔོན་ཆེན་པོ་པདྨ་དང་འོད་འཕྲོའི་ས་ལ་བཞུགས་པ་གནུབས་ཆེན་གྱི་བསྟན་བཅོས་ལྟ་བུ། ཡི་དམ་ལྷའི་ལུང་བསྟན་ཐོབ་ནས་བརྩམས་པ་ལ་བསྟན་བཅོས་སུ་བྱས་པ་སྒེག་རྡོར་དང་ཕྱོགས་གླང་གི་བསྟན་བཅོས་ལྟ་བུ། རང་གི་གྲུབ་མཐའ་ལ་ཟློས་ཤིང་གཞན་གྱི་གྲུབ་མཐའ་སུན་འབྱིན་པ་ལ་མཁས་པའི་སྐྱེ་བོས་བརྩམས་པ་ཐུགས་སྲས་ཀ་བ་བཞིའི་བསྟན་བཅོས་ལྟ་བུའོ། །བཞི་པ་ནི། བཀའ་ཉིད་ལ་འགྲེལ་པར་བཏབ་པའི་དང་། བཀའི་དོན་རང་རྒྱུད་དུ་བརྩམས་པའི་བསྟན་བཅོས་གཉིས་ཏེ། རིམ་བཞིན་འགྲེལ་པ་སྤར་ཁབ་དང་། ཀུན་མཁྱེན་ཆེན་པོའི་སེམས་ཉིད་ངལ་གསོ་ལྟ་བུ། ལྔ་པ་ནི། ཇི་ལྟ་བ་སྟོན་པའི། ཇི་སྙེད་པ་སྟོན་པའི། ཐར་པ་དང་ཐམས་ཅད་མཁྱེན་པ་འཐོབ་པའི་ཐབས་སྟོན་པའི་བསྟན་བཅོས་གསུམ་སྟེ། རིམ་བཞིན་དབུ་མ་རྒྱན། མངོན་པ་ཀུན་བཏུས། སྤྱོད་འཇུག་ལྟ་བུའོ། །དྲུག་པ་ལ། མདོའི་དགོངས་འགྲེལ་དང་། སྔགས་ཀྱི་དགོངས་འགྲེལ་གྱི་བསྟན་བཅོས་གཉིས། དང་པོ་ལ། མཛོད་དང་མདོ་རྩ་ལྟ་བུ་འཁོར་ལོ་དང་པོའི། དབུ་མ་རིགས་ཚོགས་ལྟ་བུ་འཁོར་ལོ་བར་པའི། རྒྱུད་བླ་དང་ཀླུ་སྒྲུབ་ཀྱི་བསྟོད་ཚོགས་ལྟ་བུ་འཁོར་ལོ་གསུམ་པའི་དགོངས་འགྲེལ་གྱི་བསྟན་བཅོས་རྣམས་སོ། །གཉིས་པ་ནི། ཕྱི་ནང་གི་རྒྱུད་སྡེ་དྲུག་གི་དགོངས་པ་འགྲེལ་པར་བྱེད་པའི་བསྟན་བཅོས་རྣམས་ཏེ། གཞན་དུ་རིག་པར་བྱའོ། །