རྒྱུད་སྤྱི་ལ་འཇུག་པའི་མན་ངག
གཉིས་པ་ལ། རྒྱུད་སྤྱི་ལ་འཇུག་པའི་མན་ངག་དང་། རྒྱུད་གནས་སྐབས་ལ་འཇུག་པའི་མན་ངག་གཉིས། དང་པོ་ནི། ཐོས་བསམ་གྱི་ཤེས་རབ་ལ་བརྟེན་ཏེ་རྒྱུད་དྲང་ཐད་དུ་གཏན་ལ་འབེབས་པར་བྱེད་པའི་མན་ངག་སྟེ། དེ་ལའང་། སྤྱིའི་དོན་བཤད་དང་། འགྲེལ་པ་གཉིས། དང་པོ་ནི། སྒེག་པའི་ཐུགས་ཐིག །བི་མ་ལའི་ཁོག་གཞུང་གསལ་སྒྲོན་ལ་སོགས་པའོ། །གཉིས་པ་ནི། རྩ་རྒྱུད་ལ་སྒེག་པའི་རིན་པོ་ཆེའི་སྤར་ཁབ། ཉི་འོད་སེང་གེའི་རྒྱ་ཆེར་འགྲེལ། སངས་རྒྱས་གསང་བའི་རྣམ་དབྱེ་འགྲེལ། པདྨའི་རྣམ་བཤད་ཆེན་མོ། བི་མ་ལའི་འགྲེལ་ཆུང་པིན་ཏརྠ། ཙནྡྲ་གོ་མིའི་རྒྱ་མདུད་འགྲེལ་རྣམས་སོ། །བཤད་རྒྱུད་ལ་བི་མ་ལས་མཛད་པའི་བླ་མའི་འགྲེལ་པ་མུན་སེལ། ལེ་ལག་གི་སྤྱན་འགྲེལ། བརྒྱད་ཅུ་པའི་བསྡུས་འགྲེལ་ལ་སོགས་པ་རྣམས་སོ། །གཉིས་པ་ནི། སྒོམ་པའི་ཤེས་རབ་ལ་གཙོ་བོར་བརྟེན་ནས་རྒྱུད་མངོན་རྟོགས་སུ་བསླབ་ཅིང་ཉམས་སུ་ལེན་པའི་མན་ངག་སྟེ། ཡོངས་ཤེས་ཀྱི་དངོས་པོ་ཁ་ཡར་བ་སྟོན་པ་ཕྲ་མོའི་སྐོར་རོ། །དེ་ལ་བཅུ་ལས། དང་པོ་ལྟ་བ་གཙོ་བོར་སྟོན་པའི་མན་ངག་ནི། དགའ་རབ་ཀྱི་ལ་ཤན། པདྨའི་ལྟ་ཕྲེང་། བི་མ་ལའི་ཤེས་རབ་སྤྱན་འབྱེད་དང་སྒྲོན་མེའི་སྐོར། ཀླུ་སྒྲུབ་ཀྱི་གཡུ་ཐང་། དཔལ་བརྩེགས་ཀྱི་ལྟ་རིམ་ལ་སོགས་པའོ། །གཉིས་པ་སྤྱོད་པ་གཙོ་བོར་སྟོན་པ་ནི། སྤྱོད་བསྡུས་སྒྲོན་མ་དང་། རྡོ་རྗེ་འཇམ་མགོན་ལ་སོགས་པའོ། །གསུམ་པ་དཀྱིལ་འཁོར་ནི། སངས་རྒྱས་གསང་བའི་རྡོ་རྗེ་ལས་རིམ་གཉིས་ཀྱི་སྟོད་དང་། དཀྱིལ་འཁོར་ཆོས་དོན། བི་མ་ལའི་ཐུགས་ཐིག་གི་པིན་ཏརྠ་ལ་སོགས་པས་སྟོན་ཏོ། །བཞི་པ་དབང་ནི། རྡོ་རྗེ་ལས་རིམ་གཉིས་ཀྱི་སྨད་དང་། གལ་པོ། ངེས་འབྱེད་ཆེ་ཆུང་། ཐེག་པ་གསུམ་ལ་སོགས་པས་སྟོན་ཏོ། །ལྔ་པ་དམ་ཚིག་ནི་སྒེག་པའི་གསལ་བཀྲ་དང་། ཕྲ་རྒྱས་ལ་སོགས་པས་སྟོན་ཏོ། །དྲུག་པ་ཕྲིན་ལས་ནི། བི་མ་ལའི་སྦྱིན་སྲེག་དང་རོ་སྲེག །སྐུ་གདུང་ལས་ཕྲེང་། དུར་ཁྲོད་བདེ་བའི་དཔེ་ཆུང་རང་གནས་ལ་སོགས་པས་སྟོན་ཏོ། །བདུན་པ་སྒྲུབ་པ་ནི། ཐུན་མོང་གི་སྒྲུབ་པ་རྒྱུད་ལས་མང་དུ་གསུངས་མོད་ཀྱི། དེ་དག་ལ་མན་ངག་གི་ཡི་གེ་ཟུར་བཀོལ་མ་མཐོང་ངོ་། །མཆོག་གི་སྒྲུབ་པ་ལ། ངེས་རྫོགས་སྒོམ་པའི་མན་ངག་ནི། ཨིནྡྲ་བྷཱུ་ཏིའི་ལམ་རྣམ་བཀོད་དང་རིམ་པ་གཉིས་པ། སངས་རྒྱས་གསང་བའི་ལམ་རིམ་ཆེ་ཆུང་། སྒེག་པའི་རིམ་དྲུག །བི་མ་ལའི་རིམ་གསུམ་སོགས་བསྐྱེད་རྫོགས་གཉིས་ཀ་སྟོན་པའི་གཞུང་རྣམས་སོ། །མོས་སྒོམ་གྱི་མན་ངག་ནི། བི་མའི་འོད་རིམ་དང་དྲྭ་ཆེན། སངས་རྒྱས་གསང་བའི་དྲྭ་ཆུང་དང་། དམ་པ་རྒྱན་ལ་སོགས་པས་སྟོན་ཏོ། །བརྒྱད་པ་ཏིང་ངེ་འཛིན་ནི། བི་མ་ལའི་ཕྱག་རྒྱ་བསམ་གཏན། ཁྲོ་བོ་ཕྱག་རྒྱ་གཅིག་པ། རྩེ་གཅིག་བསྡུས་པ། ཕྱག་རྒྱ་བཞི་པའི་བསམ་གཏན་ལ་སོགས་པ་མཚན་བཅས་གཙོ་བོར་སྟོན་པའི་མན་ངག་དང་། སྤྱོད་ཡུལ་ཞི་བའི་བསམ་གཏན། སྤྱོད་ཡུལ་སྦྱོང་བའི་བསམ་གཏན་སོགས་མཚན་མེད་གཙོ་བོར་སྟོན་པའི་མན་ངག་རྣམས་སོ། །དགུ་པ་མཆོད་པ་ནི། པདྨའི་ཟ་ཚོགས། དུར་ཁྲོད་བདེ་བའི་གཏོར་ཆུང་། ཧེ་ཆེན། ཧེ་ཆུང་། གཡོས་ཡིག་ཆེ་ཆུང་། བི་མ་ལའི་ཐབས་མཆོག་དཔག་གིས་མི་ལང་བ་དང་། དབྱིག་གི་སྒྲོན་མ་ལ་སོགས་པས་སྟོན་ཏོ། །བཅུ་པ་སྔགས་དང་ཕྱག་རྒྱའི་མན་ངག་ལ། ཡི་གེ་ཟུར་པ་མེད་པས་སྒྲུབ་ཐབས་ཀྱི་ཁོངས་ནས་སྟོན་པ་ཡིན་གསུངས། དེ་དག་ཀྱང་མདོ་ཙམ་བརྗོད་པ་སྟེ། རྒྱས་པར་རྨ་འགྱུར་ལ་ཕྲ་མོ་དྲུག་ཅུ་རྩ་བཞི་ཡོད་པར་གྲགས་ཤིང་། སྤྱིར་འགྲེལ་བཤད་སྒྲུབ་ཐབས་ཕྲ་མོ་བསམ་གྱིས་མི་ཁྱབ་པ་སྟེ། སེ་སྟོན་རིན་ཆེན་རྒྱལ་མཚན་གྱིས་གཟིགས་པ་ལའང་བརྒྱ་རེ་བཞི་ཡོད་པར་གསུངས་ལ། དེ་རྣམས་ལ་རྒྱུད་སྒྲུབ་ཐབས་དང་འབྲེལ་བ་ཞེས་བྱའོ། །སྒྲུབ་ཐབས་ལག་ལེན་དང་འབྲེལ་བའི་མན་ངག་ལ་ཕྲིན་ལས་ཤར་སྡེ་བརྒྱད་དེ། ཞི་བ་དང་ཁྲོ་བོ་གཉིས། ཚོགས་མ་བུ་གཉིས། དབང་བསྲེ་བ་གཉིས། རོ་སྲེག་དང་སྦྱིན་སྲེག་གཉིས་ཏེ་བརྒྱད་དོ། །
ལྔ་པ་སྐབས་དོན་ངོས་བཟུང་བ་ནི། དེ་ལྟར་བཀའ་དང་བསྟན་བཅོས་གཉིས་ལས། འདིར་གང་བཤད་པར་བྱ་བའི་དམ་ཆོས་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། དེའི་ནང་ནས་ཀྱང་རྩ་བའི་རྒྱུད་གསང་བ་སྙིང་པོ་སྟེ། བཤད་རྒྱུད་རྣམས་ལ་གཙོ་བོར་བརྟེན་ཅིང་། དགོངས་འགྲེལ་མན་ངག་རྣམས་ཀྱི་ལེགས་ཆ་བླངས་ནས་བཤད་པར་བྱ་བ་ཡིན་ནོ། །གང་བཤད་བྱའི་ཆོས་ངོས་བཟུང་བ་བཤད་ཟིན་ཏོ། །
གཉིས་པ་གང་གིས་འཆད་པའི་མན་ངག་ལ། རྒྱལ་བས་གསུངས་པའི་རྒྱུད་བཤད་ཐབས་དང་། དེ་ལ་བརྟེན་ཏེ་མཛད་པའི་མན་ངག་བཤད་ཐབས་གཉིས། དང་པོ་ནི། སྤྱིར་མ་ཧཱ་ཡོ་གའི་རྒྱུད་རྣམས་རྒྱན་བདུན་དང་། ཨ་ནུ་རྣམས་ལུང་བདུན་དང་། ཨ་ཏི་རྣམས་སྤྱི་དོན་དྲུག་གི་སྒོ་ནས་བློ་ཁ་དབྱེ་བར་ཧེ་རུ་ཀ་གལ་པོར་གསུངས་ཤིང་། བླ་མེད་ཀྱི་རྒྱུད་འགའ་ཞིག་ལ་ནི། ཕྱི་ནང་གཞན་གསུམ་དང་། རྟོན་པ་བཞིར་བཤད་པ་དག་ཡོད་དོ། །སྒྲུབ་སྡེ་རྣམས་ལས་ནི། བཤད་ཐབས་ཉི་ཤུ་སྟེ། བདེ་འདུས་ཀྱི་རྒྱུད་ཀྱི་སྤྱི་ཆིངས་ལས། བཤད་ཐབས་མན་ངག་ཉི་ཤུ་ལ༔ སྤྱི་སྡོམས་ལྔ་དང་རྒྱུད་ཆིངས་ལྔ༔ ལུང་སྡོམས་ལྔ་དང་སྒྲུབ་ཐབས་ཀྱི༔ སྦྱོར་ལུགས་ལྔ་ཡིས་གཏན་ལ་དབབ༔ ཅེས་སོ། །དེ་ལྟར་བཤད་ཐབས་ཀྱི་མན་ངག་མཐའ་ཡས་ནའང་། ཡི་གེས་འཇིགས་པའི་ཕྱིར། གཞན་རྣམས་བཏང་སྙོམས་སུ་བྱས་ཏེ། འདིར་མ་ཧཱ་ཡོ་ག་སྤྱིའི་བཤད་ཐབས་རྒྱན་བདུན་དང་། ཁྱད་པར་འདི་ཉིད་ཀྱི་བཀའ་སྲོལ་སྤྱི་དོན་ལྔ་བཤད་པའོ། །དང་པོ་ནི། གལ་པོ་ལས། མ་ཧཱ་ཡོ་གའི་རྒྱན་བདུན་ཡང་། །གླེང་བསླང་བ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་སྣོད། །བདེན་པའི་དགོངས་པ་ཤེས་པར་བྱ། །ཞེས་གསུངས་པ་ལྟར་བདུན་ལས། རྒྱན་དང་པོ་ལ། དྲི་བ་དང་། ལན་བསྟན་པ་གཉིས། དང་པོ་ནི། དེ་ལས། གླེང་བསླང་བ་ཡི་གྲངས་ལྔ་ནི། །རྒྱུད་འདིའི་མིང་ནི་ཅི་ཞིག་ཡིན། །རྒྱུད་འདི་སུ་ཞིག་དོན་དུ་མཛད། །བྱེད་པོ་སྟོན་པ་སུ་ཞིག་ཡིན། །རྒྱུད་འདིའི་ལྡང་ཚད་ཇི་ལྟ་བུ། །དགོས་པ་ཅི་ཞིག་ཡོད་པར་ཤེས། །ཞེས་སོ། །གཉིས་པ་ལན་ལའང་ལྔ་ལས། དང་པོ་ནི། འདིའི་མིང་ནི་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་བྱའོ། །གཉིས་པ་ནི། གདུལ་བྱ་དབང་པོ་རྣོན་པོ་འདོད་ཆགས་ཅན་གཙོ་བོར་གྱུར་པའི་དུག་ལྔའི་སྐྱེ་བོ་རྣམས་འདུལ་བའི་དོན་དུ་མཛད་དོ། །གསུམ་པ་ནི། བྱེད་པ་པོ་རིགས་དྲུག་པ་ཀུན་ཏུ་བཟང་པོའོ། །བཞི་པ་ནི། དེ་ལས། ཆོ་ག་དེ་བཞིན་ལེའུ་དང་། །རིམ་པར་ཕྱེད་དང་དུམ་བུའོ། །ཞེས་པ་ལས། ཆོ་ག་ནི། དབང་དང་། མཆོག་གི་སྒྲུབ་པ་དང་། ལས་བཞིའི་ཕྲིན་ལས་སོགས་རྒྱས་པར་སྟོན། རབ་གནས། སྦྱིན་སྲེག །ཐུན་མོང་གི་སྒྲུབ་པ་རྣམས་མདོ་ཙམ། གཏོར་མ། ཚོགས། གནས་ལུང་རྣམས་ཆ་མཐུན་གྱི་རྒྱུད་གཞན་ལས་ཁ་བསྐངས་ཏེ་མན་ངག་ཏུ་བཤད་དོ། །ལེའུ་ནི་ཉི་ཤུ་རྩ་གཉིས་ཏེ། ཕྱི་མ་དང་བཅས་ན་ཉི་ཤུ་རྩ་བཞིའོ། །རིམ་པར་ཕྱེ་བ་ནི། རིམ་པར་དྲུག་པ་དང་། གསུམ་པ་དང་། གཉིས་པར་ཕྱེ་བ་རྣམས་སོ། །དུམ་བུ་ནི་གཉིས་ཏེ། རྩ་བའི་དུམ་བུ་ལེའུ་ཉེར་གཉིས་དང་། བཤད་པའི་དུམ་བུ་ལེའུ་ཉེར་གསུམ་པ་དང་ཉེར་བཞི་པའོ། །ལྔ་པ་ནི། ཚེ་དང་རྐང་མགྱོགས་སོགས་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་གནས་སྐབས་རིག་འཛིན་བཞི་དང་། མཐར་ཐུག་གི་འབྲས་བུ་རྫོགས་པའི་སངས་རྒྱས་འཐོབ་པའི་ཆེད་དུའོ། །རྒྱན་གཉིས་པ་ནི། གལ་པོ་ལས། སངས་རྒྱས་པ་ཡི་ཚུལ་བཞི་སྟེ། །རྒྱུད་དང་གླེང་གཞི་ངེས་ཚིག་རྒྱུ། །ཞེས་པའི་དོན་ལ། ཆགས་བྲལ་གྱི་ཚུལ་བཞི་དང་། ཆགས་ལམ་གྱི་ཚུལ་བཞིའོ། །དང་པོ་ནི། མིའི་སྐྱེ་བར་འཁྲུངས་པ་ནི་ཆགས་བྲལ་གྱི་ཆོས་ཀྱི་རྟེན་དུ་གྱུར་པའི་ཕྱིར་རྒྱུད་ཅེས་བྱའོ། །ཁྱིམ་ནས་ཁྱིམ་མེད་པར་རབ་ཏུ་བྱུང་བ་ནི་ཆགས་བྲལ་གྱི་རྣམ་པ་ལ་ངེས་པ་སྟེར་བས་གླེང་གཞི་ཞེས་བྱའོ། །རབ་ཏུ་བྱུང་ནས་ཀྱང་འདུལ་སྡོམ་བསྲུང་བ་ནི་ངེས་པར་བསྟེན་པའི་གནས་སུ་རིགས་པས་ངེས་ཚིག་ཅེས་བྱའོ། །དེ་ལྟར་གསུངས་ནས་ཀྱང་འབྲས་བུ་བྱང་ཆུབ་འདོད་པས་ལམ་ལ་བསླབ་པ་ནི་རྣམ་གྲོལ་འཐོབ་པའི་རྒྱུ་ཡིན་པའི་ཕྱིར་རྒྱུ་ཞེས་བྱའོ། །འདིར་ཆགས་བྲལ་གྱིས་སངས་རྒྱས་ཚུལ་སྨོས་པས་ཅི་བྱ་ཞེ་ན། བཅོམ་ལྡན་འདས་ཐུབ་པའི་དབང་པོ་ནི། ཇི་སྐད་བཤད་པའི་ཚུལ་བཞིའི་སྒོ་ནས་སངས་རྒྱས་པར་འཇིག་རྟེན་དུ་གྲགས་ཤིང་། རྒྱུད་ཀྱི་སྟོན་པ་རིགས་དྲུག་པའང་དེ་ལས་རྒྱུད་ཐ་མི་དད་དུ་ཤེས་པའི་སྒོ་ནས་བྱེད་པ་པོ་ཚད་མར་སྒྲུབ་པ་ཡིན་ནོ། །དེ་ལ་བླ་མ་དབུས་གྲུ་སྨོན་ལམ་སེང་གེ་ན་རེ། འདིར་སྔགས་དང་མཚན་ཉིད་ཀྱི་འདོད་པ་འབྱེད་པའི་ཕྱིར་ཆགས་བྲལ་གྱི་ཚུལ་བཞི་བཀོད་པ་ཡིན་གྱི། སྔགས་སུ་འདོད་པ་ནི་མ་ཡིན་ནོ་གསུངས། གཉིས་པ་ནི། བདག་ཉིད་རང་རིགས་དང་མཐུན་པར་རིགས་ལྔའི་སངས་རྒྱས་སུ་བསྐྱེད་པ་ནི་གསང་སྔགས་ཀྱི་རྟེན་དུ་རིགས་པས་རྒྱུད་དང་། དེ་ནས་སླར་ཡང་རིགས་ལྔ་གཅིག་ཏུ་འདུས་པའི་རྣམ་པར་གྱུར་པ་ནི་ཆགས་ལམ་གྱི་རྣམ་པ་ལ་ངེས་པ་སྟེར་བས་གླེང་གཞིའོ། །རྡོ་རྗེ་ལ་སོགས་པའི་རིགས་ཀྱི་སྡོམ་པ་བཟུང་བ་དང་ཁྱད་པར་རྡོ་རྗེ་དང་པདྨ་མཉམ་པར་སྦྱོར་བས་ཚངས་སྤྱོད་ཀྱི་བརྟུལ་ཞུགས་བཟུང་བ་ནི་ངེས་པར་བརྟེན་པའི་གནས་སུ་རིགས་པས་ངེས་ཚིག་གོ །དེ་ནས་འདོད་ཆགས་ལམ་དུ་བསྒྱུར་བའི་གསང་ཆོས་ལ་སྤྱོད་པ་ནི་འབྲས་བུ་མྱུར་དུ་འབྱིན་པའི་ཉེ་རྒྱུ་ཡིན་པས་ན་རྒྱུའོ། །རྒྱན་གསུམ་པ་ནི། ཚིག་དོན་འདི་ལས་མི་འདའ་བས་ན་མཐའ་སྟེ། དེའང་གལ་པོར། རྒྱས་བཤད་མཐའ་ནི་རྣམ་པ་དྲུག །དྲང་དོན་ངེས་དོན་དགོངས་པས་བཤད། །དགོངས་མིན་སྒྲ་ནི་ཇི་བཞིན་པ། །ཇི་བཞིན་མ་ཡིན་ཉིད་དུ་བཤད། །ཅེས་པ་ལྟར་དྲུག་གི །དྲང་ངེས་གཉིས་ནི། རྡོ་རྗེའི་ཚིག་གཅིག་གི་གདུལ་བྱ་ཡང་དག་པའི་སྐལ་བ་དངོས་སུ་མེད་པ་དང་། ཡོད་པ་གཉིས་ལ་དོན་ཐ་དད་དུ་སྟོན་པ་སྟེ། བསྐྱེད་རིམ་ཡན་ལག་དང་བཅས་པ་སྟོན་པ་དྲང་དོན་དང་། རྒྱུ་རྒྱུད་དང་རྫོགས་རིམ་སྟོན་པའི་ཕྱོགས་ནི་ངེས་དོན་ནོ། །དགོངས་དགོངས་མིན་གཉིས་ནི། རྡོ་རྗེའི་ཚིག་ཐ་དད་པས་བསྐྱེད་རྫོགས་ཀྱི་དོན་གཅིག །དེ་དང་འགལ་བའི་ཚིག་གི་སྦྱོར་བས་བཅིངས་ཏེ་བརྗོད་དོན་དགོངས་བཞི་ལ་ལྟོས་ནས་གོ་དགོས་པ་ནི་དགོངས་བཤད་དང་། རྗོད་བྱེད་དངོས་བསྟན་གྱིས་བརྗོད་དོན་དགོངས་གཞི་ལ་ལྟོས་མི་དགོས་པར་གསལ་བར་གོ་བ་ནི་དགོངས་པ་ཅན་མིན་པའི་བཤད་པའོ། །ཕྱི་དཀྱིལ་དང་སྦྱིན་སྲེག་སོགས་ཆོ་ག་རྣམས་འཇིག་རྟེན་དང་བསྟན་བཅོས་ལ་གྲགས་པའི་ཚིག་གིས་གསུངས་པ་ནི་སྒྲ་ཇི་བཞིན་པ་དང་། ཀོ་ཊཱ་ཁྱཱཿལ་སོགས་པའི་སྒྲ་དང་། འདིར་སྦྱོར་སྒྲོལ་ལ་ཨཱ་ལི་ཀཱ་ལི་ཞེས་པ་ལྟ་བུ་འཇིག་རྟེན་དང་བསྟན་བཅོས་གཞན་ལ་མ་གྲགས་པའི་བརྡས་བཅིངས་ཏེ་གསུངས་པ་ནི་སྒྲ་ཇི་བཞིན་མ་ཡིན་པའོ། །རྒྱན་བཞི་པ་ནི། གལ་པོ་ལས། བཤད་པའི་ཚུལ་བཞི་ཁྱེད་ལ་བསྟན། །ཚིག་སྤྱི་སྦས་དང་མཐར་ཐུག་ཡིན། །ཞེས་པ་ལྟར་བཞི་ལས། ཚིག་གི་དོན་ནི། ཡི་གེའི་འབྲུ་ནོན་ཙམ་ལ་གཞོལ་བའི་བཤད་པ་སྒྲ་ཚད་ཀྱི་གཞུང་དང་མཐུན་པར་བཀོད་པ་སྟེ། གཞན་དག་ཡི་གེའི་དོན་ཞེས་ཟེར་རོ། །སྤྱི་དོན་ལ། མདོ་སོགས་ཀྱི་དང་། བསྐྱེད་རིམ་པའི་སྤྱི་དོན་གཉིས། དང་པོ་ལ། མདོ་སོགས་ལ་ཞུགས་པའི་དང་། སྔགས་ནང་པ་ལ་ཞུགས་པའི་འགྱོད་པ་བཟློག་པ་གཉིས། དང་པོ་ནི། སྔགས་ནང་པའི་ལམ་བདེ་ཞིང་མྱུར་བ་འདི་ལྟ་བུ་ལ་མ་ཞུགས་པར་སྔར་མདོའམ་བྱ་སྤྱོད་སོགས་ལ་ཞུགས་པ་ནི་མ་ལེགས་སོ་སྙམ་དུ་འགྱོད་ན། དེ་དག་ཀྱང་འདིའི་ལམ་སྟེགས་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་གསུངས་པའི་ཕྱིར་དང་། མདོ་ལས་ཀྱང་། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་པས་དབང་རྣོན་ཐབས་ཤེས་ཁྱད་པར་ཅན་དང་ལྡན་ན་ཚོགས་ཀྱི་བྱ་བ་རླབས་ཆེན་གཅིག་གིས་བསྐལ་པ་མང་པོའི་ཚོགས་བཟླུམས་པ་སོགས་བདེ་མྱུར་གྱི་ལམ་མདོ་སོགས་ཀྱང་བཞེད་པས་སྤྱིའི་དོན་ཞེས་བྱའོ། །གཉིས་པ་ནི། འདིར་ཁྲུས་དང་གཙང་སྦྲ་སོགས་གཙང་སྨེ་མེད་པར་སྤྱོད་པ་ཁྱི་ཕག་ལྟ་བུ་དང་། སྦྱོར་སྒྲོལ་སོགས་འཚེ་བ་ཆོས་སུ་སྨྲ་བས་མུ་སྟེགས་ཀྱི་ཆོས་སོ་སྙམ་དུ་འགྱོད་ན། གཙང་སྨེའི་ཞེན་པ་མ་སྤངས་ན་ཆོས་མཉམ་པ་ཉིད་ཀྱི་དོན་མི་རྟོགས་པས་ཞེན་པ་སྤང་ཕྱིར་རོ་སྙམ་དུ་སྤྱོད་པ་ནི་མདོ་སོགས་ཀྱང་བཞེད་ཅིང་། མི་ནག་མདུང་ཐུང་ཅན་བསད་པ་དང་། དེད་དཔོན་གྱི་བུ་མོ་ལ་བསྒྲོད་པ་སོགས་སེམས་དགེ་བས་སྦྱོར་སྒྲོལ་ལ་སྤྱད་ཀྱང་ཉེས་པས་མི་གོས་ཤིང་བསོད་ནམས་དཔག་མེད་འཕེལ་བར་མདོ་སོགས་ཀྱང་བཞེད་པས་བསླབ་བྱ་ཡིན་པའི་ཕྱིར་སྤྱི་དོན་ཞེས་བྱའོ། །གཉིས་པ་ནི། རྟེན་གཞལ་ཡས་ཁང་དང་བརྟེན་པ་ལྷ་བསྒོམ་པ་སོགས་བསྐྱེད་རིམ་དང་འབྲེལ་བ་རྣམས་ཏེ། བསྐྱེད་རྫོགས་གཉིས་ཀའི་ཐུན་མོང་གི་བསླབ་བྱ་ཡིན་པའི་ཕྱིར་སྤྱི་དོན་ནོ། །སྦས་པ་ནི། ལས་རྒྱ་དང་སྙོམས་པར་འཇུག་པའི་ཆོ་ག་སྟོན་པ་སོགས་ཚོགས་སུ་དབྱུང་བར་མི་འོས་པའི་ཕྱིར་འདོད་ཆགས་ཆོས་སྦས་དང་། རང་བྱིན་གྱིས་རློབ་པ་རྩ་རླུང་ཐིག་ལེའི་རྫོགས་རིམ་སོགས་ཀུན་རྫོབ་བདེན་པའི་སྦས་པ་སྟེ། སྤྱི་མཐར་གཉིས་ཀྱི་དབུས་སུ་ཆུད་པས་སྙིང་པོ་ལྟ་བུར་གྱུར་པའི་ཕྱིར་སྦས་པའོ། །མཐར་ཐུག་ནི། དེ་དག་གི་རྒྱས་གདབ་ཏུ་གྱུར་པ་དོན་དམ་འོད་གསལ་གྱི་རྫོགས་རིམ་ནི་ལམ་གྱི་མཐར་ཐུག་དང་། བདེན་གཉིས་ཟུང་འཇུག་ཏུ་རྟོགས་པ་ནི་འབྲས་བུའི་མཐར་ཐུག་སྟེ། ཚུལ་བཞི་ཀ་རྡོ་རྗེའི་ཚིག་གཅིག་ལ་དབང་པོ་མི་འདྲ་བའི་སྒོ་ནས་འཆད་དགོས་པའི་ཕྱིར། ཚིག་དེའི་བརྗོད་བྱ་ལྷག་མ་མ་ལུས་པར་མུར་ཐུག་པས་ན་མཐར་ཐུག་གོ །རྒྱན་ལྔ་པ་ནི། གལ་པོ་ལས། ཉན་བཤད་དབྱེ་བ་རྣམ་པ་གཉིས། །ཚོགས་དང་སློབ་མ་དག་ཏུ་འདོད། །ཅེས་པས་གཉིས་ཀྱི། ཚོགས་བཤད་ནི་སྒྲ་ཇི་བཞིན་པ་དང་། དེ་དང་ཐུན་མོང་པའི་དགོངས་མིན། དྲང་དོན། ཚིག་དོན། སྤྱིའི་དོན་རྣམས་ཏེ་འདོད་ཆགས་ཆོས་སྦས་མ་གཏོགས་པའི་བསྐྱེད་རིམ་འཁོར་བཅས་སོ། །སློབ་བཤད་ནི། སྒྲ་ཇི་བཞིན་མ་ཡིན་པ་དང་། ངེས་དོན་དང་། དགོངས་བཤད་དང་། སྦས་དང་། མཐར་ཐུག་རྣམས་ཏེ་རྫོགས་རིམ་འཁོར་བཅས་སོ། །འདིར་ཐུན་མོང་མ་ཡིན་པའི་དགོངས་མིན་ནི་སྦས་མཐར་གཉིས་སུ་འདུས་པ་ཡིན་ནོ། །རྒྱན་དྲུག་པ་ནི། གལ་པོར། སྣོད་ཀྱི་གང་ཟག་རྣམ་པ་ལྔ། །ཨུཏྤལ་པདྨ་དཀར་དམར་དང་། །ཙནྡན་རིན་པོ་ཆེ་ཡི་དཔེ། །ཞེས་པས་ལྔ་སྟེ། སློབ་དཔོན་ལས་ཐོས་ནས་ལན་གཅིག་འཛིན་པར་ནུས་ཀྱང་འདུ་འཛི་ལ་སོགས་པའི་རྐྱེན་གྱིས་མྱུར་དུ་བརྗེད་པར་གྱུར་པ་ནི་ཨུཏྤལ་ཞེས་བྱ་བའི་གང་ཟག་སྟེ། དཔེར་ན་ཨུཏྤལ་ཆུ་ནང་དུ་རྩི་བཅུད་འཛིན་པ་སོགས་ཀྱི་ཡོན་ཏན་ཡོད་ཀྱང་རྣ་བར་འཇུག་པ་སོགས་ཀྱིས་མྱུར་དུ་རྙིད་པར་འགྱུར་བ་བཞིན་ནོ། །ཡང་མང་དུ་ཐོས་ཤིང་མ་བརྗེད་ཀྱང་གཞན་ལ་འཆད་མི་ནུས་པ་ནི་པད་དཀར་ཞེས་བྱ་བའི་གང་ཟག་སྟེ། དཔེར་ན་པདྨ་དཀར་པོ་ནི་སྔ་མ་ལས་རྙིད་དཀའ་ཞིང་རྩི་བཅུད་བརྟན་ནའང་ཉི་མ་དང་འགྲོགས་པ་ན་ཁ་ཟུམ་པར་འགྱུར་བའི་ཕྱིར་བུང་བ་སོགས་ཀྱི་རྩི་བཅུད་ལེན་མི་ནུས་པ་བཞིན་ནོ། །ཡང་། དད་བརྩེ་ཤེས་རབ་དང་ལྡན་པས་བློ་ཁ་བྱེ་སྟེ་གཞན་ལ་འཆད་ནུས་ཀྱང་རྒྱུད་མི་བརྟན་པའི་ཡོན་ཏན་རིང་དུ་མི་གནས་པ་ནི་པདྨ་དམར་པོ་ཞེས་བྱ་བའི་གང་ཟག་སྟེ། དཔེར་ན་པདྨ་དམར་པོ་ནི་ཉི་མས་ཁ་འབྱེད་ཅིང་རྩི་བཅུད་འཛིན་པ་སོགས་ཀྱི་ཡོན་ཏན་ཡོད་ཀྱང་འཛག་རྐྱེན་པས་རྩི་བཅུད་རིང་དུ་མི་གནས་པ་བཞིན་ནོ། །ཡང་ཐོས་པ་ཆུང་ཞིང་ང་རྒྱལ་ཆེ་བ་ལུང་རིགས་ཀྱི་རྩ་བ་མེད་ཀྱང་མང་དུ་སྨྲ་བ་གདུལ་བྱ་རྗེས་སུ་འཛིན་མི་ནུས་པ་ནི་ཙནྡན་ཞེས་བྱ་བའི་གང་ཟག་སྟེ། དཔེར་ན་ཙནྡན་སྦྲུལ་གྱི་སྙིང་པོ་ནི་དངོས་པོ་ཆུང་ལ་དྲི་ཆེ་བ་རྩ་བ་རྒྱ་ཆེར་མ་ཟུག་ཅིང་ཡལ་འདབ་རྒྱས་པ་སྦྲུལ་གདུག་པས་དཀྲིས་པས་གཞན་གྱིས་བླང་མི་ནུས་པ་བཞིན་ནོ། །ཡང་། ཁྲིམས་དག་ཅིང་མཁས་ལ་སྒྲིན་པ་རྒྱུད་བརྟན་པ་རང་གིས་ཐོས་ནས་གཞན་ལ་ལེགས་པར་སྟོན་ནུས་པ་ནིི་རིན་པོ་ཆེ་ཞེས་བྱ་བའི་གང་ཟག་སྟེ། དཔེར་ན་རིན་པོ་ཆེ་ནི་སྐྱོན་མེད་ཅིང་ཡོན་ཏན་དང་ལྡན་པ་བཟང་པོ་ལས་མི་འགྱུར་བ་དགོས་འདོད་སྩོལ་བ་བཞིན་ནོ། །དེ་ལ་རིན་པོ་ཆེ་རབ། གཞན་གསུམ་འབྲིང་། ཙནྡན་ཐ་མ་སྟེ། རབ་སློབ་བཤད་དང་། གཞན་བཞི་པོ་ཚོགས་བཤད་ཀྱི་སྣོད་དོ། །རྒྱན་བདུན་པ་ནི། གལ་པོར། བདེན་པའི་དགོངས་པ་རྣམ་པ་གཉིས། །ཀུན་རྫོབ་དོན་དམ་བཤད་པར་གྱིས། །ཞེས་པས་རྒྱན་སྔ་མ་དྲུག་ལ་བརྟེན་ནས་རྒྱུད་དོན་བདེན་པ་གཉིས་སུ་ངེས་པར་བྱེད་པ་སྟེ། བསྐྱེད་པའི་རིམ་པ་འཁོར་བཅས་དང་། མཚན་མ་དང་བཅས་པའི་རྫོགས་རིམ་རྣམས་ནི་ཀུན་རྫོབ་བདེན་པ་དང་། མཚན་མེད་དེ་བཞིན་ཉིད་ཀྱི་རྫོགས་རིམ་འོད་གསལ་བ་ནི་དོན་དམ་བདེན་པ་སྟེ། ཟུང་འཇུག་ཀྱང་འཐོབ་བྱ་ཡིན་པའི་ཕྱིར་དོན་དམ་དུ་བཞག་གོ །དེ་ལྟར་རྒྱན་བདུན་གྱི་འཆད་ཚུལ་འདི་ནི། རྒྱུད་འདིའི་འཆད་ཐབས་ཀྱི་བརྒྱུད་པའི་བཀའ་སྲོལ་མ་ཡིན་ཡང་། གལ་པོར་མ་ཧཱ་སྤྱིའི་འཆད་ཐབས་སུ་གསུངས་པ་ལྟར། བློ་གསར་རྣམས་ལ་མང་དུ་ཐོས་པའི་ཡན་ལག་ཏུ་བསམས་ནས་རྣམ་གྲངས་སུ་བཀོད་པའི་འཆད་ཐབས་གཞན་ལས་ཚུལ་འདི་ཅུང་ཟད་སྤྲོས་ཏེ་བཤད་པ་ཡིན་ནོ། །
གཉིས་པ་ནི། སྔོན་གྱི་མཁན་པོ་རྣམས་ཀྱིི་བཞེད་པ་ཐ་དད་པ་མང་ཡང་། འདིར་བཀའ་སྡེ་ཟུར་པའི་བཤད་སྲོལ་གྱི་རྗེས་སུ་འབྲངས་ཏེ་བཤད་པ་ལ། རང་བཞིན་དངོས་པོའི་གནས་ཚུལ། མ་རྟོགས་འཁྲུལ་པའི་སྣང་ཚུལ། ཐམས་ཅད་མཁྱེན་པའི་གཟིགས་ཚུལ། བརྩེ་བས་ཐུགས་རྗེ་སྐྱེས་ཚུལ། འགྲོ་དོན་ཇི་ལྟར་མཛད་ཚུལ་དང་ལྔ། དང་པོ་ནི། རྟོགས་རུང་མ་རྟོགས་རུང་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་ནས་སངས་རྒྱས་པ་ཡིན་ཏེ། རྒྱས་པ་ལས། འཇིག་རྟེན་འདས་དང་འཇིག་རྟེན་པའི། །མཐའ་ཡས་དཀྱིལ་འཁོར་མ་ལུས་ཀུན། །རྒྱལ་བའི་ཡུམ་གྱི་དབྱིངས་སུ་ཐིམ། །དེ་ཉིད་ཆོས་སྐུ་ཆེན་པོ་ཡིན། །ཞེས་དང་། ཡང་། འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །ཞེས་དང་། འདི་ཉིད་ལས། དེ་བཞིན་གཤེགས་པ་ཐམས་ཅད་དང་ཆོས་ཐམས་ཅད་ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མེད་ནའང་། ཞེས་འབྱུང་བའི་ཕྱིར། གཉིས་པ་ནི། དེ་ལྟར་སངས་རྒྱས་ཀྱང་མ་རྟོགས་ཏེ། དེའི་རྒྱུ་མཚན་ནི། ལྷན་སྐྱེས་ཀྱི་མ་རིག་པས་རང་ངོ་རང་གིས་མ་ཤེས་ལ། དེའི་སྟེང་དུ་ཀུན་བརྟགས་ཀྱི་མ་རིག་པས་ཕྱིན་ཅི་ལོག་ཏུ་བཟུང་སྟེ། ལས་ཉོན་ལ་རང་གར་སྤྱད་པས་ཡང་དག་པའི་ལམ་དང་བྲལ་ཞིང་འཁོར་བའི་སྡུག་བསྔལ་སྣ་ཚོགས་ཀྱིས་ཉམ་ཐག་པར་གནས་པ་སྟེ། འདི་ཉིད་ལས། འགྲོ་བའི་རྣམ་པར་རྟོག་པ་མ་རིག་པ་ལས་འགྲོ་བ་ལྔའི་རིས་བསམ་གྱིས་མི་ཁྱབ་པར་སྨིན་པ་ལ། ཞེས་སོ། །གསུམ་པ་ནི། འདི་ཉིད་ལས། ལོག་པར་རྟོག་བཏགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་པས་གསུམ་ལས། དང་པོ་དབྱིངས་ལས་མི་གཞན་པའམ་ཇི་ལྟ་བ་མཁྱེན་པའི་ཡེ་ཤེས་ཀྱིས་ཅིར་ཡང་མི་དམིགས་པར་གཟིགས་ཏེ། རྒྱས་པ་ལས། ཐམས་ཅད་མཁྱེན་པའི་ཐུགས་ལྡན་པས། །གཞི་རྩ་མེད་དབྱིངས་སྐད་ཅིག་མ། །མཐའ་དང་དབུས་ཀྱང་བརྟག་ཏུ་མེད། །ཅེས་སོ། །གཉིས་པ་ཡེ་ཤེས་ལས་མི་གཞན་པའམ་ཇི་སྙེད་པ་མཁྱེན་པའི་ཡེ་ཤེས་ཀྱིས་གསལ་ཆ་མ་འདྲེས་པར་གཟིགས་ཏེ། དེ་ལས། མཐོ་དམན་ཀུན་གྱིས་གཟུགས་སྣང་དང་། །བླ་མེད་བྱང་ཆུབ་སྐུར་སྣང་བ། །མེ་ལོང་བསྟན་པའི་ཚུལ་བཞིན་དུ། །སྣ་ཚོགས་ཁ་དོག་དབྱིབས་སུ་སྣང་། །ཞེས་སོ། །གསུམ་པ་དབྱིངས་ཡེའམ་ཇི་ལྟར་ཇི་སྙེད་དབྱེར་མེད་དུ་མཁྱེན་པའི་ཡེ་ཤེས་ཀྱིས་སྣང་སྟོང་དབྱེར་མེད་མེ་ལོང་གི་གཟུགས་བརྙན་ལྟར་གཟིགས་ཏེ། དེ་ལས། རྣམ་པར་རྟོག་པ་མི་མངའ་སྟེ། །དེ་ཡིས་མི་མཁྱེན་གང་ཡང་མེད། །ཅེས་སོ། །བཞི་པ་ནི། རིམ་གསུམ་ལས། རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་བྱུང་བར་སྣང་། །ཞེས་པས། རྟག་པ་རྒྱུན་གྱི། རང་བཞིན་ཤུགས་ཀྱི། བསྐུལ་ཞིང་གསོལ་བ་བཏབ་པའི། ཡུལ་དང་འཕྲད་པའི་ཐུགས་རྗེ་སྐྱེ་ཚུལ་དང་བཞི། དང་པོ་ནི། སངས་རྒྱས་ཀྱི་ཐུགས་རྗེས་སེམས་ཅན་གྱི་དོན་ནམ་དུའང་མི་འདོར་བའི་ཕྱིར་རྒྱུན་ཆད་མེད་པར་སྣང་བ་སྟེ། ཆུ་བོ་ཆེན་པོའི་རྒྱུན་བཞིན་ནོ། །གཉིས་པ་ནི། རྒྱུ་རྐྱེན་དང་རྩོལ་རྟོག་མེད་པར་ངང་གིས་ཐུགས་རྗེ་འཆར་བ་སྟེ། ཉི་མ་དང་འོད་ཟེར་བཞིན་ནོ། །གསུམ་པ་ནི། གང་ལ་གསོལ་བ་བཏབ་ན་ཐུགས་རྗེ་ཁྱད་པར་ཅན་མི་འགག་པ་སྟེ། ཕོངས་པས་གདུང་བའི་སྨྲེ་སྔགས་འདོན་པ་ལ་སྙིང་རྗེ་ཅན་ལྷག་པར་སྟེར་བ་བཞིན་ནོ། །དེའང་ལྷན་ཅིག་པའི་འཁོར་གྱི་དབང་ཐོབ་པས་རང་དོན་དུ་རྟོགས་ནའང་། གོ་ཕྱེ་བའི་འཁོར་གྱི་དོན་དུ་སྟོན་པ་ལ་རྒྱུད་གསུངས་པར་གསོལ་བ་བཏབ་པས་ཐུགས་རྗེ་སྐྱེས་ཏེ། འདིའི་དངོས་ཀྱི་གདུལ་བྱར་གྱུར་པའི་དོན་དུ་རྒྱུད་གསུངས་ཤིང་། དངོས་སུ་ཉན་པའི་སྐལ་བ་མེད་པ་རྣམས་ལ་ལམ་སྟེགས་ཀྱི་ཐེག་པ་གཞན་སྟོན་པའི་ཕྱིར་ཐུབ་དྲུག་སྤྲུལ་པར་མཛད་པ་སྟེ་ལེའུ་གཉིས་པ་ལྟར་རོ། །བཞི་པ་ནི། སྤྱིར་སེམས་ཅན་ཐམས་ཅད་ཐུགས་རྗེ་སྐྱེ་བའི་ཡུལ་ཡིན་མོད། ཁྱད་པར་དུའང་རཱུ་ཏྲ་ལྟ་བུ་གདུལ་བྱ་ལས་ངན་ཅན་ཡལ་བར་མི་འདོར་བའི་ཐུགས་རྗེ་ཁྱད་པར་ཅན་ཏེ། མཛངས་པ་སྤྱོད་ལོག་བྱེད་པ་མཐོང་བ་ལྟ་བུའོ། །དེ་དག་ཀྱང་འདི་ཉིད་ལས། ཐུགས་རྗེ་ཆེན་པོ་སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས། ཞེས་སོ། །དེའང་ཐུགས་རྗེ་ཆེན་པོ་ནི། ཕན་པ་ཐམས་ཅད་ཀྱི་གཞིར་གྱུར་པ་དམིགས་པ་མེད་པའི་སྙིང་རྗེ་སྟེ། བདག་དང་སེམས་ཅན་དབྱེར་མེད་པའི་ངོས་ནས་སྐྱེས་པའོ། །ལྔ་པ་ནི། བཞེད་པ་མི་མཐུན་པ་མང་སྟེ། རྟེན་ཅན་གྱིས་དོན་བྱེད་པ། རྟེན་མེད་ཀྱིས་དོན་བྱེད་པ། གནས་ལུགས་ངོ་བོ་ཉིད་ཀྱིས་དོན་བྱེད་པར་འདོད་པ་གསུམ་ལས། འདིར་ལྷ་རྗེ་ཟུར་ཆུང་པའི་རྗེས་སུ་འབྲངས་ཏེ། ཕྱི་མ་ཉིད་བཟུང་ངོ་། །དེ་ལའང་། སྤྱིར་བསམ་གྱིས་མི་ཁྱབ་པས་དོན་མཛད་པ་དང་། ཁྱད་པར་དུ་གསང་བའི་བསྟན་པ་རྒྱུད་འདི་ཉིད་ཀྱིས་དོན་མཛད་པའོ། །དང་པོ་ནི། རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཕྲིན་ལས་བསམ་མི་ཁྱབ། །ཅེས་སོ། །གཉིས་པ་ལ། འདིའི་བྱིན་རླབས་ཀྱིས་དོན་མཛད་པ་དང་། འདི་ཉིད་དངོས་ཀྱིས་དོན་མཛད་པ་གཉིས། དང་པོ་ནི། སྟོན་པ་ཀུན་ཏུ་བཟང་པོའི་ཐུགས་རྗེའི་བྱིན་རླབས་ལས་སྤྲུལ་སྐུ་ཐུབ་དྲུག་སྤྲོས་ཏེ་འདུལ་བ་རྣམ་པ་བཞིས་རིགས་དྲུག་གི་དོན་མཛད་པ་སྟེ། ལེའུ་གསུམ་པའི་སྟོད་ལྟར་རོ། །གཉིས་པ་ལ། ལྷན་ཅིག་པའི་འཁོར་དང་། གོ་ཕྱེ་བའི་འཁོར་གྱི་དོན་མཛད་པའི་དང་པོ་ནི། སྟོན་པས་འོག་མིན་དུ་ལྷན་ཅིག་པའི་འཁོར་རྣམས་ལ་ཟབ་མོའི་དབང་གསུམ་བསྐུར་བས་སྟོན་འཁོར་དགོངས་པ་ཁྱད་མེད་དུ་གྱུར་པ་སྟེ། ལེའུ་གཉིས་པའི་སྟོད་ལྟར་རོ། །གཉིས་པ་ནི། མ་འོངས་པའི་གདུལ་བྱ་ཁྱད་པར་ཅན་གྱི་ཆེད་དུ་ལམ་གསང་བའི་སྙིང་པོ་ལྷན་ཅིག་པའི་འཁོར་གྱིས་ཞུས་ཏེ་གསུངས་པ་ཉིད་རྒྱུད་ནས་ད་ལྟར་སྣང་བ་འདིའོ། །དེ་ལའང་རྒྱུད་ཀྱི་བརྗོད་བྱའི་དོན་ནི། རྒྱུད་གསུམ་སྣང་བ་བཞི་ལ་སོགས་པ་སྟེ། འོག་ཏུ་རྒྱུད་དོན་དངོས་བཤད་པའི་སྐབས་སུ་ཤེས་པར་འགྱུར་རོ། །
རྗོད་བྱེད་ཀྱི་སྒྲའི་རྒྱུད་བཤད་ཐབས་ལའང་། དོར་བྱ་བཤད་ཚུལ་ཉེས་པའི་སྐྱོན་ངོས་བཟུང་བ། བླང་བྱ་ལེགས་པའི་ཡོན་ཏན་ཤེས་པར་བྱ་བའོ། །དང་པོ་ནི། རྒྱུ་འབྲས་ཀྱི་ཐེག་པ་གཉིས་བསྲེས་ནས་བཤད་ན་རྡོ་རྗེ་ཐེག་པ་ན་བབས་ཀྱིས་བཤད་པའི་སྐྱོན་དང་། ཡོ་ག་ཕྱི་ནང་བསྲེས་ན་བསྙེན་སྒྲུབ་བཞིའི་དོན་ལས་གོལ་ཏེ་ཡོ་ག་འབྲོག་འཆོལ་བའི་དང་། འབྲེལ་ཚུལ་གཉིས་དང་མ་ལྡན་ན་སྨྱོན་པའི་ཚིག་ལྟ་བུའི་དང་། སྤྱི་དང་ཁྱད་པར་གྱི་དགོས་ཆེད་མེད་ན་དོན་མེད་འཆལ་བའི་དང་། རྟོག་གེས་བཏགས་པའི་ཐེ་ཚོམ་གྱི་གེགས་སེལ་མ་ཤེས་ན་མཛངས་པ་ལྕེ་རྡུམ་གྱི་དང་། མི་མཐུན་པའི་ཚིག་དོན་བསྡེབས་མ་ཤེས་ན་ཤེས་རབ་ལོང་བའི་དང་། མངོན་པར་རྟོགས་པའི་གོ་རིམ་མ་ཤེས་ན་བདུད་རྩི་རོ་ཉམས་ལྟ་བུའི་དང་། རྒྱུད་གོང་འོག་འཁྲུགས་པ་བསྡེབས་མ་ཤེས་ན་རིན་པོ་ཆེ་རྩར་འཆོལ་བ་ལྟ་བུའི་སྐྱོན་དང་བརྒྱད་དོ། །གཉིས་པ་ལ། རྒྱུད་གནས་སྐབས་དངོས་པོ་རེ་རེའི་འཆད་ཐབས་དང་། རྒྱུད་གཞུང་སྤྱིའི་ཚིག་དོན་འཆད་ཐབས་གཉིས། དང་པོ་ནི། ལྟ་བ་བརྒལ་བརྟག་གིས་དང་། སྤྱོད་པ་རྗེས་འཇུག་ཐབས་ཀྱིས་དང་། དཀྱིལ་འཁོར་དོན་རྟགས་ཀྱིས་དང་། དབང་གདམས་ངག་གིས་དང་། དམ་ཚིག་རྣམས་གྲངས་ཀྱིས་དང་། ཕྲིན་ལས་ཆོག་བསྒྲིགས་ཀྱིས་དང་། སྒྲུབ་པ་ཕྱག་བཞེས་ཀྱིས་དང་། ཏིང་ངེ་འཛིན་བསྐྱེད་རྫོགས་ཀྱིས་དང་། པཱུ་ཛ་ཕྱི་ནང་གིས་དང་། སྔགས་སྒྲ་དང་བསྡེབས་ཀྱིས་དང་། ཕྱག་རྒྱ་བསྐྱེད་རིམ་གྱིས་བཤད་པ་དང་བཅུ་གཅིག་གོ །གཉིས་པ་ནི། བཤད་ཐབས་འདྲེན་པའི་ཚིག་བཅུ་སྟེ། སྤྱི་མདོ་ལས། གང་ལ་ལྟ་དང་སྒོ་འབྱེད་དང་། །སྡུད་དང་འབྱོར་བར་འདྲེན་པ་དང་། །རྐྱེན་དང་གཞན་དང་དམིགས་པའི་ཚིག །མ་བཅོས་མེ་ལོང་སྣྲེལ་ཞི་རྣམས། །མེ་ལོང་བཅུ་དང་མཐུན་སྦྱར་བས། །ཚིག་དོན་རྣམ་པར་སྦྱར་བ་ཡིན། །ཞེས་གསུངས་པ་ལས། དང་པོ་རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ་ལྟར་བཤད་པ་ནི། ཐུགས་ཐིག་ལས། ག་རུ་ཌ་ཡི་ཆོས་བཞི་པོས། །རྣལ་འབྱོར་ཅན་གྱིས་ལྟ་འཕང་བཅད། །ཅེས་པས་ཆོས་བཞི་སྟེ། ཇི་ལྟར་ཁྱུང་ནམ་མཁའ་ལ་ལྡིང་བའི་ཚེ། མིག་གྱེན་དུ་བལྟ་བ་དང་། གཤོག་པ་གཡོབ་པའི་རྩོལ་བ་མེད་པ་དང་། ངམ་གྲོག་དང་གཡང་སར་ཉམ་མི་ང་བ་དང་། བྱ་ལམ་ལ་རྗེས་མེད་པ་བཞིན་དུ། འདིའི་གོང་ན་རྟོགས་བྱ་གཞན་མེད་པས་རང་བཞིན་ལྟ་བའི་ཚིག་གིས་ཐེག་པ་ཐམས་ཅད་ཁོག་འོག་ཏུ་འཇུག་པ་དང་། ལམ་བགྲོད་པའི་རྩོལ་བ་དང་བྲལ་བ་དང་། ལྟུང་གནས་སྲིད་པ་དང་ཞི་བའི་མཐའ་ལ་ཉམ་མི་ང་བ་དང་། བལྟ་བྱ་ལྟ་བྱེད་བློ་ཡུལ་དུ་བྱེད་པའི་རྟོག་པ་མེད་པའོ། །གཉིས་པ་རྣམ་པར་འབྱེད་པའི་ཚིག་སྟག་གི་མཆོངས་པ་ལྟ་བུ་ནི། དེ་ཉིད་ལས། བྱ་གྷྲྀ་མཆོངས་པ་དེ་བཞིན་པས། །ཏནྟྲའི་ཚིག་དོན་དུམ་བུར་གཅོད། །ཅེས་པ་སྟེ། ཇི་ལྟར་སྟག་མཆོང་པའི་ཚེ། བགྲོད་བྱའི་ས་ཚིགས་དུམ་བུ་དུམ་བུར་བཅད་ནས་མཆོང་པ་བཞིན་དུ་རྣམ་པར་དབྱེ་བའི་ཚིག་གིས་ཚིག་དོན་གྱི་དམིགས་སོ་སོར་ཕྱེ་ནས་མིང་འདོགས་གསལ་བར་སྟོན་པའོ། །གསུམ་པ་སྤྱི་དོན་སྡུད་པའི་ཚིག་སེང་གེའི་མཆོངས་པ་ལྟ་བུ་ནི། དེ་ཉིད་ལས། སེང་ཆེན་མཆོངས་པའི་ཆོས་གཅིག་ལྟར། །རྣམ་གྲངས་ཚིག་ལམ་དོན་གཅིག་སྡུད། །ཅེས་པ་སྟེ། ཇི་ལྟར་སེང་གེ་མཆོང་པའི་ཚེ། ས་ཚིགས་དུ་མ་ཁོག་འོག་ཏུ་ཆུད་པ་བཞིན་དུ། ཚིག་དོན་གྱི་རྣམ་གྲངས་དུ་མ་རྣམས་སྤྱི་དོན་བསྡུ་བའི་ཚིག་གིས་དོན་གྱི་ངོ་བོ་གཅིག་ཏུ་སྡུད་པའོ། །བཞི་པ་འབྲེལ་བ་མཚམས་སྦྱོར་པའི་ཚིག་བྱ་ངང་མོའི་འགྲོས་ལྟ་བུ་ནི། དེ་ཉིད་ལས། ངང་མོའི་འགྲོས་ཆོས་རྣམ་གཉིས་ལྟར། །གཞུང་དོན་དབུ་ཞབས་ལེ་མཚམས་སྦྱོར། །ཞེས་པས་ཆོས་གཉིས་ཏེ། ཇི་ལྟར་ངང་མོ་འགྲོ་བའི་ཚེ། སྔ་ཕྱི་དྲང་པོར་འགྲོ་ཞིང་། སྔ་རྗེས་ཕྱི་རྗེས་ཀྱིས་ནོན་པར་འགྲོ་བ་བཞིན་དུ། འབྲེལ་མཚམས་སྦྱོར་བའི་ཚིག་གིས། ཚིག་འབྲེལ་དང་དོན་འབྲེལ་མ་ཆད་པར་འབྲེལ་སྦྱོར་བའོ། །ལྔ་པ་རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟ་བུ་བཤད་པ་ནི། དེ་ཉིད་ལས། རུས་སྦལ་འགྲོས་ཀྱི་ཆོས་གཉིས་པོས། །འབྲུ་སྟོང་མི་བཞག་གཟེར་བུ་གདབ། །ཅེས་ཏེ། ཇི་ལྟར་རུས་སྦལ་འགྲོ་བ་ལ་ཆོས་གཉིས་ཏེ། གཡོ་འགུལ་མི་མངོན་པར་ཤུགས་ཀྱིས་འགྲོ་བ་དང་། ས་སྟོང་མི་ལུས་པར་རྗེས་ཀྱིས་ཁྱབ་པ་བཞིན་དུ། རང་རྐྱེན་གཉེར་གྱི་ཚིག་གིས་འབྲུ་སྟོང་མི་བཞག་པར་ཚིག་དོན་བརྡ་འཕྲོད་པར་བྱེད་པའོ། །དྲུག་པ་ལྡེམ་དགོངས་མན་ངག་གི་ཚིག་གནའ་ཕྲུག་བྲག་ལ་འཛེགས་པ་ལྟ་བུ་ནི། དེ་ཉིད་ལས། གནའ་ཕྲུག་འཛེགས་པའི་ཆོས་གཉིས་ལྟར། །ལྡེམ་དགོངས་གསང་བ་བརྒྱད་ཀྱི་སྦྱར། །ཞེས་ཏེ། ཇི་ལྟར་གནའ་ཕྲུག་བྲག་ལ་འཛེགས་པ་ལ་ཆོས་གཉིས་ཏེ། སྐྱེས་མ་ཐག་ཏུ་བྲག་མེ་ལོང་གི་ངོས་ལྟ་བུ་ལ་རྩེད་མོ་རྩེ་ཞིང་འགྲོ་བ་དང་། དེ་རི་དྭགས་གཞན་ལ་མི་འཚམས་ཀྱང་ཁོ་རང་ལ་འཚམས་པ་བཞིན་དུ་ལྡེམ་དགོངས་མན་ངག་གི་ཚིག་གིས་ཟབ་ལམ་སྦས་ཚུལ་དུ་བསྟན་པ་རྣམས་ཐབས་ཀྱིས་འབྱིན་པ་དང་། དེ་ཐེག་པ་འོག་མ་རྣམས་ལ་མི་འཚམས་ཀྱང་འདིར་འཚམས་པའོ། །བདུན་པ་གཏར་ག་གེགས་སེལ་གྱི་ཚིག་བྱ་གླག་ཁྲ་མོ་གཟན་ལ་བཅུམ་པ་ལྟ་བུ་ནི། དེ་ཉིད་ལས། གླག་གི་གཟན་གྱི་ཆོས་གཉིས་ལྟར། །དོན་གྱི་དམིགས་བཟུང་གེགས་བསལ་ལོ། །ཞེས་ཏེ། ཇི་ལྟར་གླག་མོ་གཟན་ལ་བཅུམ་པའི་ཚེ་ཆོས་གཉིས་ཏེ། གང་ཡིད་ལ་བཏགས་པའི་ཟས་དང་། དེའི་ཁོང་གི་བཅུད་འབྱིན་པ་ལྟར། གཏར་ག་གེགས་སེལ་གྱི་ཚིག་གི་གཏན་ཚིགས་ཀྱིས་གཏན་ལ་ཕབ་ནས་གྲུབ་མཐའི་དོན་ལོངས་པར་བྱེད་པའོ། །བརྒྱད་པ་ཚད་མ་བཀའ་གཞུང་གི་ཚིག་དུས་ཀྱི་འབྲུག་སྒྲ་ལྟ་བུ་ནི། དེ་ཉིད་ལས། དུས་ཀྱི་འབྲུག་ལྟར་ཆོས་གསུམ་པོས། །བཀའ་ཡི་ཚད་བཟུང་སྐབས་སྦྱར་ནས། །ཞེས་ཏེ། ཇི་ལྟར་འབྲུག་གི་སྒྲ་ལའང་ཆོས་གསུམ་སྟེ། དུས་མིན་དུ་མི་འབྱུང་བ་དང་། དུས་སུ་འབྱུང་བ་དང་། དེས་དབྱར་དགུན་ལ་སོགས་པའི་དུས་ཀྱི་སྤྲོས་པ་ཆོད་པས་ཡིད་ཆེས་པ་བཞིན་དུ། བཀའ་ལུང་ཚད་མ་ཉིད་དྲང་ཡུལ་མ་ཡིན་པར་མི་དྲང་ཞིང་། སྐབས་དང་མཐུན་པར་དྲངས་པས་དོན་གྱི་སྒྲོ་འདོགས་ཆོད་པ་སྟེ། ལུང་ནི་ཡིད་ཆེས་ཚིག་ཡིན་ཏེ། །ཞེས་སོགས་གསུངས་པའི་ཕྱིར། དགུ་པ། མཚོན་པ་དཔེའི་ཚིག་མེ་ལོང་གཡའ་དག་པ་ལྟ་བུ་ནི། དེ་ཉིད་ལས། མེ་ལོང་ཆོས་ལྟར་མཚོན་པའི་དཔེ། །ཀུན་ལ་དཔེས་མཚོན་ཐོག་ཏུ་དབབ། །ཅེས་པ་སྟེ། ཇི་ལྟར་རང་གི་བཞིན་རས་ལྐོག་ཏུ་གྱུར་པ་མེ་ལོང་གིས་གསལ་བ་བཞིན་དུ། ཤིན་ཏུ་ལྐོག་གྱུར་གྱི་གཞུང་དོན་རྣམས་ཀྱང་དཔེས་མཚོན་ནས་ངེས་པར་བྱེད་པའོ། །བཅུ་པ། བསྣོལ་མཚམས་འཕེན་སྡུད་ཀྱི་ཚིག་སེང་ཕྲུག་རྩལ་སྦྱོང་བ་ལྟ་བུ་ནི། དེ་ཉིད་ལས། མི་འཇིགས་ཕྲུག་གུ་རྩལ་སྦྱོང་ལྟར། །འབྲུ་ཚིག་དོན་གྱི་གོ་རིམ་སྡེབ། །ཅེས་པ་སྟེ། ཇི་ལྟར་སེང་གེའི་ཕྲུག་གུ་རྩལ་སྦྱོང་བའི་ཚེ་ན། བསྣོལ་མར་མཆོངས་ནས་དྲང་པོར་འགྲོ་བ་བཞིན་དུ་བསྣོལ་མཚམས་འཕེན་སྡུད་ཀྱི་ཚིག་གིས། དོན་གྱི་འཁྲུགས་སྡེབས། དཀྱུས་ཀྱི་གོ་རིམ་བརྗེ། འབྲུའི་འདུག་ས་བསྒྱུར་ནས་སྒྲ་ཇི་བཞིན་པ་མ་ཡིན། དོན་ཐུན་མོང་བ་མ་ཡིན་པའི་རྒྱུད་དོན་ཕྱིན་ཅི་མ་ལོག་པར་སྟོན་པའོ། །དེ་དག་ཀྱང་རིགས་བསྡུས་ན། རྗེ་སྒྲོ་ཕུག་པའི་ཁོག་དབུབ་ལས། དེ་ལ་རྣམ་པར་དབྱེ་བ། འབྲེལ་སྦྱོར་བ། རང་རྐྱེན་གཉེར་གསུམ་དཀྱུས་སུ་སྦྱར། གཞན་ལེའུ་གང་བཤད་ཀྱི་དཀྱུས་ཀྱི་ཐད་ཀར་ངོ་སྤྲད་དོ། །ཞེས་གསུངས་པ་ལྟར། སྤྱི་འགྲོ་རྣམ་པ་གསུམ་མ་གཏོགས་ལེའུ་སོ་སོ་དང་སྦྱར་ཚུལ་རགས་ཙམ་སྒྲོལ་གཡུང་གཉིས་ཀྱི་ཁོག་དབུབ་དུ་འབྱུང་ངོ་། །ཉང་ཊཱིཀ་པ་ནི། གསུམ་དུ་འདུས་པར་བཞེད་དེ། དཀྱུས་དབུ་ཞབས་ཐམས་ཅད་དུ་ཁྱབ་བྱེད་དུ་འཇུག་པ་གསུམ། ཁྱད་པར་དུ་འཇུག་པ་གསུམ། འཇུག་ཏུ་རུང་བ་བཞིའོ། །དང་པོ་ནི། རྣམ་དབྱེ། འབྲེལ་སྦྱོར། རང་རྐྱེན་ནོ། །གཉིས་པ་ནི། རང་བཞིན། ལྡེམ་དགོངས། སྤྱི་དོན་གསུམ་མོ། །གསུམ་པ་ནི། གཏར་ཀ །ཚད་མ་བཀའ་གཞུང་། མཚོན་དཔེ། བསྣོལ་མཚམས་འཕེན་སྡུད་དང་བཞིའོ། །ཞེས་གསུངས། དེ་དག་ཀྱང་སྔ་མ་ལས། ཚིག་དོན་མོས་པར་བཤད་པའི་ཕྱིར། །རྣམ་པར་ཕྱེ་བས་མ་འདྲེས་གསལ། །ཞེས་སོ། །གཞན་ཡང་། ལྷ་རྗེ་ཟུར་པོ་ཆེའི་ཞལ་སྔ་ནས། མཚོན་དཔེ་དང་སྦྱར་ཏེ་བཤད་ལུགས་གསུམ་གྱི་སྒོ་ནས་བཤད་པ་དང་། རྒྱུད་འགྲེལ་མན་ངག་རྣམས་དང་མི་འགལ་བར་བྱ་བའི་ཕྱིར་བཤད་ཚུལ་བཞིའི་སྒོ་ནས་འཆད་གསུངས། དང་པོ། མདའ་ལྟར་རྩེ་མོ་ནས་བཟུང་སྟེ་བཤད་པ། མདུང་ལྟར་སྐེད་པ་ནས་བཟུང་སྟེ་བཤད་པ། རལ་གྲི་ལྟར་ཡུ་བ་ནས་བཟུང་སྟེ་བཤད་པ་དང་གསུམ། དང་པོ་ནི། མཚན་གྱི་སྐབས་སུ་ཆོས་ཐམས་ཅད་གཞི་ལམ་འབྲས་གསུམ་དུ་དྲིལ་ནས་འཆད། གཉིས་པ་ནི། ལེའུ་ལྔ་པར་ཆོས་ཐམས་ཅད་མཚན་ཉིད་གསུམ་དུ་དྲིལ་ནས་འཆད། གསུམ་པ་ནི། ལེའུ་ཐ་མར་ཆོས་ཐམས་ཅད་སྣང་བ་བཞིར་དྲིལ་ནས་འཆད་དོ། །གཉིས་པ་བཤད་ཚུལ་བཞི་ནི། རྒྱུད་རྒྱུད་ཀྱིས། རྒྱུད་འགྲེལ་པས། རྒྱུད་སྒྲུབ་ཐབས་ཀྱིས། རྒྱུད་མན་ངག་གིས་བཤད་པའོ། །དང་པོ་ནི། རྒྱས་པ་སོགས་བཤད་རྒྱུད་རྣམས་དང་སྦྱར་ཏེ་འཆད། གཉིས་པ་ནི། རང་རང་གི་འདོད་གཞུང་སོ་སོས་སྤར་ཁབ་སོགས་འགྲེལ་པ་རེ་རེའམ་འགའ་ཞིག་དབང་བཙན་པར་བྱས་ཏེ་འཆད། གསུམ་པ་ནི། མན་ངག་གི་གཞུང་ཕྲ་མོ་རྣམས་ཀྱིས་རྒྱུད་དོན་དམིགས་ཕྱེ་སྟེ་སྐབས་དང་སྦྱར་ནས་འཆད། བཞི་པ་ནི། དེ་དག་དང་། ཁྱད་པར་ཟབ་ལམ་སྦས་བཤད་རྣམས་སྙན་བརྒྱུད་དང་ལྡན་པའི་བླ་མ་དམ་པའི་གསུང་སྒྲོས་ཀྱིས་བརྒྱན་ཏེ་འཆད་དོ། །ཚུལ་བཞི་པོ་དེ་ནི་རྗེ་སྒྲོ་ཕུག་པའི་བཞེད་ཀྱིས་རྒྱ་ཆེར་འགྲེལ་གྱི་བཤད་ལུགས་ཡིན་གསུང་སྐད་དོ། །དེ་ལྟར་བཤད་ཐབས་རྣམས་ངེས་པར་བྱས་ནས། ཁོག་གཞུང་གསལ་སྒྲོན་ལས། ཕས་ཀྱི་ལན་གདབ་འབྲུ་མནན་དང་། །ཁོག་དབུབ་ས་བཅད་བཞི་རུ་གསུངས། །ཞེས་པས། དང་པོར་སྤྱི་དོན་གྱིས་ཁོག་དབུབ། བར་དུ་དཀྱུས་ཀྱི་ས་བཅད། ཐ་མར་ཚིག་གི་འབྲུ་གཞོམ། གནས་སྐབས་ཁྲིའུར་བརྒལ་ལན་གྱིས་གཏན་ལ་དབབ་པའོ། །དང་པོ་ལ། ཐུན་མོང་དང་། ཐུན་མིན་གཉིས་ལས། དང་པོ་ནི། བསྟན་པ་སྤྱིའི་རྣམ་གཞག་དང་། བྱེ་བྲག་སྤྱི་དོན་ལྔར་བསྡུས་ཏེ་བཤད་པ་སོགས་སྔར་སྨོས་པ་རྣམས་སོ། །གཉིས་པ་ནི། འཆད་འགྱུར་ལྟར་རྒྱུད་གསུམ་སྣང་བ་བཞི་ལ་སོགས་པའི་སྒོ་ནས་གཏན་ལ་འབེབས་པའོ། །བར་དུ་དཀྱུས་ཀྱི་ས་བཅད་པ་ལ། དེ་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་པས། དབང་པོ་རབ་ལ་མཚན་བསྟན་པ་སྨན་པས་ལག་གི་རྩ་ལ་བརྟེན་ནས་ལུས་མགོ་མཇུག་གི་ནད་ངོས་འཛིན་པ་ལྟ་བུ། འབྲིང་ལ་རྣམ་པར་དབྱེ་བ་སྨན་སྣོད་ཀྱི་ཁ་བྱང་ལྟ་བུ། ཐ་མ་ལ་འབྲུ་རེ་གཉེར་རེས་འཆད་པ་སྨན་གཅིག་ཀྱང་ཆོས་དུ་མས་གཏན་ལ་འབེབས་པ་ལྟ་བུའོ། །དང་པོ་ནི། བཤད་ལུགས་གསུམ་ལས་མདའ་ལྟར་བཟུང་བས་འཆད། འབྲིང་ལ་རྣམ་པར་དབྱེ་བ་ནི། རྒྱུད་ཀྱི་རྒྱུ་དང་རྐྱེན་དང་། ཡོངས་སུ་ཤེས་པར་བྱ་བ་དང་། དགོས་འབྲེལ་དང་། གདམས་ཤིང་གཏད་པ་དང་ལྔ་ལས། ཡོངས་ཤེས་ནི། རྒྱུད་གནས་སྐབས་ཀྱི་དངོས་པོ་རེ་རེ་བཤད་ཐབས་བཅུ་གཅིག་པོས་འཆད། གདམས་པ་ནི་རལ་གྲི་ལྟར་བཟུང་བས་དང་། གཞན་རྣམས་མན་ངག་གི་ཡི་གེ་དང་གསུང་སྒྲོས་ཅི་རིགས་པས་འཆད་དོ། །དབང་པོ་ཐ་མའི་དོན་ནི། དཀྱུས་ཀྱི་ས་བཅད་པ་དང་། ཚིག་གི་འབྲུ་གཞོམ་པ་གཉིས་ཐུན་མོང་དུ་བཤད་ཐབས་འདྲེན་པའི་ཚིག་བཅུ་ལས་བདུན་པ་མ་གཏོགས་པས་འཆད་ཅིང་། དེ་དག་གི་གནས་སྐབས་ཁྲིའུར་བརྒལ་ལན་ནི་བདུན་པ་གཏར་ག་གེགས་སེལ་གྱི་ཚིག་གིས་འཆད་དོ། །མདུང་ལྟར་བཟུང་བ་ནི། ལེའུ་ལྔ་པ་ཁོ་ནའི་འཆད་ཐབས་སོ། །ཚུལ་བཞིའི་སྒོ་ནས་བཤད་པ་ནི། ལེའུ་ལྔ་པའི་བདུད་རྩིར་འགྱུར་ཞིང་འབྱུང་བ་དང་། །ཞེས་སོགས་ལྟ་བུ། ཚུལ་བཞི་ཀས་བཤད་པའང་ཡོད་ལ། ཕལ་ཆེ་བར་ཅི་རིགས་པས་བཤད་དོ། །དེ་ཡང་བཤད་ཐབས་ཀྱི་མན་ངག་འདི་དག་སྙན་བརྒྱུད་ཀྱི་སྲོལ་ཀ་མི་ནུབ་པའི་ཆེད་དུ་ཟློས་སྐྱོན་སོགས་ལ་མ་བལྟས་པར་བཀོད་པ་སྟེ། སྤྱི་དོན་ལྔའི་སྒོ་ནས་བཤད་པ་འདི་ནི། འཇིགས་བྲལ་གྱི་སློབ་དཔོན་བུདྡྷ་གུ་ཧྱ་ལ་སོགས་པའི་བཤད་སྲོལ་རྨ་མེད་པ་ཡིན་པས་འདི་ཙམ་དུ་མ་ཟད་བླ་མེད་ཀྱི་རྒྱུད་ཀུན་གྱི་འཆད་ཐབས་སུ་འགྱུར་རོ། །གཉིས་པ་མན་ངག་གི་བཤད་ཐབས་ནི། ལུང་མཆོག་བླ་མ་ལས། ཐོས་ཆུང་གསར་བུ་ཡིད་ཆེས་བྱ་བའི་ཕྱིར། །མན་ངག་སྤྱི་དོན་རྩིས་འགོས་ཀླད་ནས་གཞོམ། །ཞེས་པས་རྩིས་འགོ་ལྔས་འཆད་དེ། ཁུངས་ལ་ཡིད་ཆེས་པར་བྱ་བའི་ཕྱིར། སློབ་དཔོན་གང་གིས་མཛད་པ་དང་། བཀའ་དང་མི་འགལ་ཞིང་ཐེག་པའི་གཞུང་ཚུགས་པར་བྱ་བའི་ཕྱིར་རྒྱུད་གང་ནས་བསྡུས་ཤིང་ཕྱོགས་གར་གཏོགས་པ་དང་། བསྟན་པ་ལ་མཚན་ངེས་ཤིང་དོན་གྱི་མདོ་ཙམ་ཞིག་རྟོགས་པར་བྱ་བའི་ཕྱིར་མཚན་ཅི་ལས་བཏགས་པ་དང་། བརྩམས་པ་ལ་དོན་ཡོད་པར་བྱ་བའི་ཕྱིར་གང་ཟག་གང་གི་དོན་དུ་མཛད་པ་དང་། བརྗོད་བྱའི་དོན་ཁོང་དུ་ཆུད་པར་བྱ་བའི་ཕྱིར་དབུ་ཞབས་སུ་བསྡུས་པའི་དོན་དུ་བསྟན་པ་དང་ལྔའོ། །དང་པོ་ནི། སྤྱིར་བསྟན་པ་ལ་འཇུག་པའི་གང་ཟག་ལ་རིགས་གཉིས་ལས། རྟོགས་ལྡན་ཆོས་ཀྱི་རྗེས་སུ་འབྲང་བ་དག་ནི། བརྗོད་བྱའི་དོན་དང་རྗོད་བྱེད་སྒྲའི་སྡེབ་སྦྱོར་ལ་སྐྱོན་མེད་པར་མཐོང་ན། རྩོམ་བྱེད་ཀྱི་གང་ཟག་སུ་ཡིན་ཡང་འཇུག་པར་འགྱུར་བས་རྩོམ་པ་པོ་སྨོས་མི་དགོས་མོད། དེ་ལྟ་ནའང་དབང་རྟུལ་གང་ཟག་གི་རྗེས་སུ་འབྲང་བ་དག་ནི། རྩོམ་པ་པོའི་ཡོན་ཏན་ཐོས་པ་ན་དད་དེ་འཇུག་པར་འགྱུར་བའི་ཕྱིར། ཐོག་མར་མཛད་པ་པོ་གང་ཡིན་གྱི་མཚན་དང་། དེ་ཉིད་ཀྱི་ཆེ་བའི་ཡོན་ཏན་བརྗོད་པར་བྱ་བ་སྟེ་སྐབས་དང་སྦྱར་རོ། །གཉིས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་ལས་བཏུས་ལ། ཕྱོགས་རྣལ་འབྱོར་ཆེན་པོར་གཏོགས་པའོ། །གསུམ་པ་ནི། སྤྱིར་མཚན་གྱི་འདོགས་ལུགས་ལ། ཡུལ་དང་། མཚོན་དཔེ་དང་། གང་ཟག་དང་། གཞུང་ཚད་དང་། དོན་དམ་ལྔ་ལས་བཏགས་ཏེ། དང་པོ་ནི། ལང་ཀར་གཤེགས་པའི་མདོ་ལྟ་བུ། གཉིས་པ་ནི། སཱ་ལུ་ལྗང་པའི་མདོ་ལྟ་བུ། གསུམ་པ་ནི། རྩོམ་པ་པོ་ལས་བཏགས་པ་པདྨའི་ལམ་རིམ་ལྟ་བུ་དང་། ཞུ་བ་པོ་ལས་བཏགས་པ་བམ་བརྒྱད་ཀྱི་སྟག་འགྲེལ་ལྟ་བུ། བཞི་པ་ནི། དབྱིག་གཉེན་དང་ཐུ་མིའི་སུམ་ཅུ་པ་ལྟ་བུ། ལྔ་པ་ནི། དོན་གྱི་ངོ་བོ་ཉིད་ལས་བཏགས་པ་ཕྱག་རྒྱ་བསམ་གཏན་ལྟ་བུ། རྣམ་གྲངས་ལས་བཏགས་པ་སྒེག་པའི་རིམ་དྲུག་དང་བི་མ་ལའི་རིམ་གསུམ་ལྟ་བུ། དོན་གྱི་གཙོ་བོ་ལས་བཏགས་པ་ལམ་རིམ་ཆེ་ཆུང་ལྟ་བུའོ། །དེ་དག་ལས་གང་ཡིན་ངོས་བཟུང་བ་སྐབས་དང་སྦྱར་རོ། །བཞི་པ་ནི། གང་ཟག་སུ་ཞིག་གི་དོན་དུ་མཛད་པ་ཡང་སྐབས་དང་སྦྱར་རོ། །ལྔ་པ་ནི། བརྗོད་བྱ་དོན་གྱིས་བསྡུས་པའི་ཆ་དང་། རྗོད་བྱེད་ཚིག་གིས་བསྡུས་པའི་ཆ་གཉིས་སུ་ཤེས་པར་བྱའོ། །གང་གིས་འཆད་པའི་མན་ངག་བཤད་ཟིན་ཏོ། །
གསུམ་པ་དེས་ཇི་ལྟར་འཆད་པའི་ཚུལ་ལ། སློབ་དཔོན་དང་སློབ་མའི་མཚན་ཉིད། ཇི་ལྟར་འཆད་ཉན་བྱ་ཚུལ། དེ་ལྟར་འཆད་ཉན་བྱས་པའི་འབྲས་བུའོ། །དང་པོ་ལ། འཆད་བྱེད་སློབ་དཔོན་གྱི་མཚན་ཉིད་དང་། བཤད་བྱའི་ཡུལ་སློབ་མའི་མཚན་ཉིད་དོ། །དང་པོ་ནི། བརྒྱད་ལྡན་ཏེ། བསྐྱེད་རྫོགས་གསུམ་གྱི་དོན་ལ་མཁས་པས་གསང་བའི་མཛོད་གསུམ་དང་ལྡན་པ། ཕན་ནུས་ཟབ་མོའི་དབང་ཐོབ་པས་ཆུ་བོ་རྫོགས་པ། གསང་སྔགས་བབ་འཆོལ་དུ་མི་སྤྱོད་པས་གསང་གཉེར་ཐུབ་པའམ། ཡང་ན་སྣོད་ལྡན་ཡལ་བར་མི་འདོར་བའི་གཉེར་དང་ལྡན་པ། རྒྱུད་དོན་དངོས་པོ་བཅུ་ལ་མཁས་པས་སློབ་བུའི་ཤེས་རྒྱུད་འགྲོལ་ནུས་པ། དཀྱིལ་འཁོར་དང་དབང་གི་རིམ་པ་དང་ཞི་རྒྱས་སོགས་ལས་ཚོགས་སྒྲུབ་པའི་མཐའ་ལ་མ་རྨོངས་པ། སྙན་བརྒྱུད་ཀྱི་མན་ངག་འཆང་བའམ། ཉམས་མྱོང་དང་ལྡན་པས་མན་ངག་གི་གདེང་ཐོབ་པ་སྟེ། མཛོད་གསུམ་སོ་སོར་བགྲངས་པས་བརྒྱད་དོ། །དེའང་ལྟ་བའི་མཛོད་ཨ་ཏི། ཏིང་འཛིན་གྱི་མཛོད་ཨ་ནུ། སྤྱོད་པའི་མཛོད་མ་ཧཱ་ཡོ་གའོ། །དེ་ལྟར་ཡང་ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །ཞེས་སོ། །འོ་ན་འདིར། བླ་མ་དམ་པ་ལ་སྟོན་པ་ཞེས་འབོད་པ་གང་ཞེ་ན། མཚོན་བྱ་དོན་གྱི་རྒྱུད་རང་བཞིན་གསང་བའི་སྙིང་པོ་སེམས་ཀྱི་དེ་ཁོ་ན་ཉིད་དང་། མཚོན་བྱེད་ཚིག་གི་རྒྱུད་རྩ་བཤད་མན་ངག་དང་བཅས་པའི་ཚིག་དོན་སྟོན་པར་མཛད་པ་པོ་ཡིན་པའི་ཕྱིར་དེ་སྐད་ཅེས་བྱའོ། །རྒྱུད་སྡེ་རྣམས་སུ་སློབ་དཔོན་གྱི་མཚན་ཉིད་མང་དུ་གསུངས་ནའང་། རེ་ཞིག་བརྒྱད་པོ་དེར་འདུས་སོ། །དེ་ལྟ་ནའང་། དོན་དམ་བསྙེན་པ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བརྟེན་པར་འགྱུར་བའོ། །ཞེས་པས་མཚན་ཉིད་ཀུན་ཚང་མ་རྙེད་ན། ཡོན་ཏན་ཤས་ཆེ་བ་ལ་བརྟེན་པར་གསུངས་ཤིང་། འོན་ཀྱང་མེད་དུ་མི་རུང་བའི་ཡོན་ཏན་ནི། དབང་ཐོབ་ཅིང་དམ་ཚིག་ལ་གནས་པ། གང་འཆད་པའི་རྒྱུད་དང་དཀྱིལ་འཁོར་གྱི་ལས་ལ་མ་རྨོངས་པས་སློབ་མ་རྗེས་སུ་འཛིན་ནུས་པ་ཞིག་ངེས་པར་དགོས་པ་ཡིན་ནོ། །དེ་ཡང་སློབ་མས་བླ་མ་བསྟེན་པ་ན། ཐོག་མར་བརྟག་ཐབས་གསུམ་གྱིས་བརྟག་པ། བར་དུ་བཙལ་ཐབས་གསུམ་གྱིས་འཚོལ་བ། ཐ་མར་བསྟེན་ཐབས་གསུམ་གྱིས་བསྟེན་པ་དང་གསུམ། དང་པོ་ནི། རྒྱང་ནས་གཞན་ལ་དྲིས་ཏེ་བརྟག་པ། དྲུང་ནས་རང་གིས་བརྟག་པ། འདོད་ལྷ་དང་པྲ་སེ་ན་ལ་བརྟེན་ནས་བརྟག་པའོ། །གཉིས་པ་ནི། དེ་ལྟར་བརྟག་པས་བཟང་པོར་ཤེས་ན། ཐག་ཉེ་རིང་དང་། ལུས་ངལ་དུབ་དང་། ནོར་ཟད་འཕངས་ལ་མི་བལྟ་བར་བཙལ་བར་བྱའོ། །གསུམ་པ་ནི། དེ་ལྟར་བཙལ་བས་རྙེད་པ་དེ་ཉིད། འཆི་གསོས་ཀྱི་སྨན་ལྟར་འབྲལ་མེད་དུ་བསྟེན། ཁོང་གི་སྙིང་ལྟར་གཟུ་ལུམ་དང་རས་ཆོད་མི་བྱ་བར་བསྟེན། ཡིད་བཞིན་གྱི་ནོར་བུ་ལྟར་བསྙེན་བཀུར་ལ་ཚད་བཟུང་མི་བྱ་བར་བསྟེན་པར་བྱའོ། །མདོར་ན་བདག་རྐྱེན་བླ་མ་དམ་པ་མ་བསྟེན་པར་ཐར་པ་ཐོབ་པའི་ཐབས་མེད་པའི་ཕྱིར། བླ་མ་ནི་སངས་རྒྱས་ཀུན་ལས་ལྷག་པར་བལྟས་ལ་བཀུར་བར་བྱ་སྟེ། དགོངས་འདུས་ལས། བསྐལ་པ་འབུམ་གྱི་སངས་རྒྱས་པས། །སློབ་དཔོན་གཉན་པར་ཤེས་པར་བྱ། །ཞེས་སོགས་མདོ་རྒྱུད་ཀུན་ནས་རྒྱ་ཆེར་གསུངས་སོ། །གཉིས་པ་ནི། སྤྱིར་གང་ཟག་ལྔའི་དབྱེ་བས་སྔར་བཤད་པ་ཉིད་ཡིན་མོད། འོན་ཀྱང་བཀའ་སྲོལ་འདི་ཉིད་ལས་འབྱུང་བ་ལྟར་ཅུང་ཟད་བརྗོད་ན། སྣོད་ཀྱི་སྐྱོན་བཞི་དང་བྲལ་ཞིང་། ཡོན་ཏན་ལྔ་དང་ལྡན་པ་སྟེ། སྐྱོན་བཞི་ནི། ཐོས་པའི་སྣོད་སྐྱོན་ཁ་སྦུབ་པ་ལྟ་བུ་དང་། བསམ་པའི་སྣོད་སྐྱོན་ཞབས་བརྡོལ་དང་གཞོགས་རལ་ལྟ་བུ་དང་། སྒོམ་པའི་སྣོད་སྐྱོན་དུག་ཅན་ལྟ་བུ་སྟེ། ལམ་རིམ་ལས། བཅུད་ཆེན་འཛག་དང་འབོ་བ་དང་། །མི་ཆགས་མ་རུངས་བྱེད་པ་དང་། །ཞེས་སོ། །ཡོན་ཏན་ལྔ་ནི། ངང་ཆུ་རྒྱུན་ལྟར་རིང་བ། ཚུལ་དགེ་སྦྱོང་ལྟར་ཞིབ་པ། བསམ་པ་གསེར་ལྟར་བཟང་བ། བློ་རི་རབ་ལྟར་བརྟན་པ། ལུས་དང་ལོངས་སྤྱོད་ཆོས་ཕྱིར་གཏོང་ཕོད་པ་སྟེ་ལྔའམ། འགྲེལ་པ་སྤར་ཁབ་ལས། ཤེས་རབ་དང་། སྙིང་རྗེ་དང་། ནོགས་ཐུབ་པ་ནི་སྣོད་དང་ལྡན་པའོ། །ཞེས་པས་དོན་གོ་བའི་ཤེས་རབ་དང་། གཞན་དོན་ལ་སྤྲོ་བའི་སྙིང་རྗེ་དང་། བསྟན་པའི་དོན་འཛིན་ནུས་པས་ནོགས་ཐུབ་པ་སྟེ་གསུམ་པོ་བསྣན་ནས། ཡོན་ཏན་བརྒྱད་དུའང་དབྱེར་ཡོད་དོ། །དེ་ལྟར་ཡང་འདི་ཉིད་ལས། སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །ཞེས་སོ། །དེ་བས་ན་རྒྱས་པ་ལས། དེ་བཞིན་གཤེགས་པའི་སྤྱོད་ཡུལ་དེ། །སྐྱེས་བུ་བློ་རྩལ་རབ་ཀྱིས་རྟོགས། །ཞེས་པས་རྒྱུད་ཟབ་མོ་འདི་ཉིད་དབང་རྟུལ་གྱི་ཡུལ་མ་ཡིན་གྱི། དབང་པོ་རྣོན་པོའི་སྤྱོད་ཡུལ་ཡིན་པའི་ཕྱིར། ཤེས་རབ་དང་ལྡན་པ་སོགས་ཆོས་གསུམ་ཚང་བ་ལ་འགྲེལ་པར་སྣོད་ལྡན་ཞེས་གསུངས་པ་ནི་ཤིན་ཏུ་རིགས་པ་ཡིན་ནོ། །དབང་རྣོན་དེ་ལའང་དབྱེ་ན། རང་བཞིན་གྱི་དང་། སྦྱངས་པའི་རྣོན་པོའོ། །དང་པོ་ནི། དེ་ཉིད་ལས། ཡངས་ལ་རྒྱ་ཆེ་གཏིང་ཟབ་པ། །ཤེས་རབ་ཟབ་པས་རྟོགས་པར་འགྱུར། །ཞེས་སོ། །གཉིས་པ་ནི། འདི་ཉིད་ལས། ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་བཟུང་། །ཞེས་སོ། །དེ་ཡང་བླ་མས་སློབ་མ་ལ་ཆོས་སྟོན་པ་ན། སྔ་རོལ་དུ་སྣོད་ཀྱི་སྐྱོན་ཡོན་དང་ལྡན་མི་ལྡན་བརྟག་ཐབས་ལྔས་ལེགས་པར་བརྟག་སྟེ། ལམ་རིམ་ལས། རྒྱང་དྲུང་པྲ་སེན་མཁའ་འགྲོ་ཡིས། །གསང་སྔགས་ལྟས་སྟོན་སྤྱོ་བ་ཡིས། །ཅི་ནས་བརྟག་སྟེ་བཟང་ལྡན་ན། །མི་ལྡོག་བརྟན་བྱས་ལྟས་པ་ཡིས། །ཤི་ཥྱ་གང་ཡིན་ལག་ཏུ་གཏད། །ཅེས་པས་རིགས་བཟང་ངན་དང་རྒྱུད་འཇམ་རྩུབ་དང་། དད་པ་དང་གཏོང་བ་ཆེ་ཆུང་སོགས་རྒྱང་ནས་གཞན་ལ་དྲིས་ཏེ་བརྟག་པ། དྲུང་ནས་རང་གིས་བརྟག་པ། པྲ་སེ་ན་དང་མོ་ལ་སོགས་པས་བརྟག་པ། སྟོན་དུ་རུང་མི་རུང་མཁའ་འགྲོ་ལ་གསོལ་བ་བཏབ་ནས་བརྟག་པ་དང་། ཁྱད་པར་ལས་ལ་བཀོལ་ཞིང་ངག་གིས་འཐབ་པ་སོགས་སྤྱོ་བའི་སྒོ་ནས་བརྟགས་པས་མི་ལྡོག་ཅིང་། བརྟན་པ་ནི་ཁེ་ཉེན་ནན་ཆགས་ཀྱིས་རིགས་ངེས་པ་ཞེས་བྱ་སྟེ་བཟུང་བར་འོས་པ་ལ། དེ་ཡང་སྤྱིར་རིགས་ངེས་པ་ལ་རང་བཞིན་གྱི་དང་། དོན་མཐོང་གི་དང་། ཁེ་ཉེན་ནན་ཆགས་ཀྱིས་རིགས་ངེས་པ་དང་གསུམ། དང་པོ་ནི། དབང་རྣོན་གསང་སྔགས་ཀྱི་རིགས་སུ་ངེས་པའོ། །གཉིས་པ་ནི། ལྟ་བ་རྟོགས་ནས་གཞན་གྱིས་བསྒྱུར་དུ་མི་བཏུབ་པའོ། །གསུམ་པ་ནི། བཤད་མ་ཐག་པ་དེ་ཉིད་དོ། །གལ་ཏེ་སྣོད་དང་མི་ལྡན་པར་ཤེས་ན་རེ་ཞིག་བཏང་སྙོམས་སུ་འཇོག་པའམ། ཡང་ན། སྣོད་དང་འཚམས་པའི་དྲང་དོན་ཚོགས་བཤད་ཙམ་བཤད་དུ་རུང་ན་བཤད་པར་བྱ་བ་སྟེ། སྔ་མ་ལས། འཚམས་པར་སྐུ་བསྟན་གཅན་འཕྲང་སྦྱིན། །ཞེས་སོ། །
གཉིས་པ་ནི། ཐོག་མ་ཁོ་ནར། དཀོན་མཆོག་མཆོད་པ། འབྱུང་པོ་ལ་གཏོར་མ་བཏང་བ། གསུང་རབ་བཀླག་པ། སཙྪ་གདབ་པ། ལམ་འཕྲང་གསོ་བ་སོགས་དགེ་བ་ཇི་ཙམ་འགྲུབ་པའི་རིམ་གྲོས་བསོད་ནམས་ཀྱི་དཔུང་བསྐྱེད་པར་བྱས་ནས། ཇི་སྐད་དུ། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩམས་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་གསུངས་པ་ལྟར་སློབ་མ་སྣོད་རུང་དུ་བྱ་བའི་ཕྱིར་དབང་བསྐུར་ཞིང་། དེས་ཀྱང་སྔོན་དུ་སློབ་དཔོན་མཉེས་པར་བྱས་ཏེ་དབང་ནོད་ནས་དམ་ཚིག་དང་སྡོམ་པ་ལ་གནས་པས་རྒྱུད་མཉན་ནོ། །དེ་ཡང་རྒྱུད་དོན་དངོས་ལ་ཐུག་པ་ནས་བཟུང་སྟེ། བླ་མ་བརྒྱུད་པའི་གསོལ་འདེབས། རྡོར་སེམས་སྒོམ་བཟླས། བསྲུང་བའི་འཁོར་ལོ་བསྒོམ་པ། མཆོད་གཏོར་དབུལ་བ་རྣམས་བྱས་ལ། དཔོན་སློབ་གཉིས་ཀས་སྔོན་བྱུང་ཇི་ལྟ་བར་བསྒོམ་པའམ། ཡང་ན་གསང་འདུས་ལས། མདོ་འདོན་ཆོ་གའི་བྱ་བ་ལ། །རྟག་པར་རྡོ་རྗེ་ཆོས་སུ་བྱ། །ཞེས་པ་ལྟར་འཆད་པ་པོས་བདག་ཉིད་གསུང་རྡོ་རྗེ་སྣང་བ་མཐའ་ཡས་སུ་བསྒོམས་ཀྱང་རུང་སྟེ། འདི་ཉིད་ལས། སྨྲ་བྱེད་འཁོར་ལོའི་གཞལ་ཡས་སུ། །ཞེས་སོགས་འཆད་དབང་གི་བསམ་རྒྱུད་དུ་སྣང་མཐར་བསྒོམ་པར་གསུངས་པའི་ཕྱིར། དེ་ལྟར་ན་ཉན་པ་པོས་ཀྱང་རིན་འབྱུང་དུ་བསྒོམ་དགོས་པར་མཚུངས་ཏེ། ཉན་དབང་གི་བསམ་རྒྱུད་དུ་དེ་ལྟར་འབྱུང་བའི་ཕྱིར་རོ། །དེ་ནས་རྡོ་རྗེ་སློབ་དཔོན་ལ་ཕྱག་སྔོན་དུ་འགྲོ་བས་ཡོན་དང་མཎྜལ་ཕུལ་ལ། པུས་བཙུགས་ཐལ་མོ་སྦྱར་ཏེ། ཨེ་མའོ་སངས་རྒྱས་ཀུན་གྱི་གསང་། །རྟོག་པ་ཀུན་གྱི་རྒྱལ་པོ་སྟེ། །ཆོ་ག་རྒྱས་པར་བསྟན་པའི་རྒྱུད། །དྲི་མེད་ཟབ་མོ་བརྟག་དཀའ་བ། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །མ་ལུས་གཏན་ལ་འབེབས་པ་འདི། །རང་གསང་ཐབས་ཀྱིས་ཆོད་པ་ཡིས། །འགྲོ་བ་ཀུན་ལ་སྨན་སླད་དུ། །བཅོམ་ལྡན་བདག་ལ་བཤད་དུ་གསོལ། །ཞེས་ལན་གསུམ་གྱིས་གསོལ་བ་གདབ་པར་བྱ་སྟེ། བླ་མ་ལྔ་བཅུ་པ་ལས། པུས་བཙུགས་ཐལ་མོ་སྦྱར་བ་ཡིས། །ཉན་སོགས་འདོད་པས་གསོལ་གསུམ་གདབ། །ཅེས་སོ། །དེ་ནས་དཔོན་སློབ་གཉིས་ཀས་སྒོ་གསུམ་གྱི་སྐྱོན་བཅུ་གཅིག་སྤངས་ཏེ་འཆད་ཉན་བྱའོ། །གང་ཞེ་ན། ཉལ་བ་དང་རྐང་པ་རྐྱོང་བ་སོགས་ལུས་ཀྱི་གནས་ངན་ལེན་དང་། རྩེད་མོ་དང་། ཀྱལ་ཀ་དང་། ཅ་ཅོ་དང་། ཞེ་སྡང་བའི་བརྒལ་ལན་དང་། ཧ་ཅང་རྟོག་གེ་ལ་འཆེལ་བའི་རྩོད་ངོར་ཐལ་བ་དང་། མན་ངག་མེད་པ་དང་། རྫུན་གྱི་མན་ངག་དང་། མ་སྨིན་པའི་སྐྱེ་བོས་ཐོས་པ་དང་། རྙེད་གྲགས་ཀྱི་སེམས་དང་། འགྲན་སེམས་རྣམས་སྤངས་ཏེ། སློབ་དཔོན་གྱིས་སྨྲ་བའི་རྒྱན་དང་ལྡན་པས་སྣོད་དང་སྣོད་མ་ཡིན་པ་བརྟག་ལ་བཤད་པ་གཉིས་ཀྱི་སྒོ་ནས་འཆད་ཅིང་། ཉན་པ་པོས་ཀྱང་གུས་པའི་སྤྱོད་ལམ་གྱིས་འདུག་སྟེ། བསམ་སྦྱོར་ཕུན་སུམ་ཚོགས་པས་ལེགས་པར་ཉན་ལ། རྗེས་སུ་བཀའ་དྲིན་དྲན་པ་དང་། དེའི་དགེ་བའི་རྩ་བ་རྣམས་ཡོངས་སུ་བསྔོ་བར་བྱའོ། །
གསུམ་པ་ནི། འདི་ཉིད་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་དང་། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་འཆད་པ་པོས་ཐོབ་པའི་ཕན་ཡོན་དང་། ཡང་། གང་གིས་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་རྒྱུད་ལ་མཐོང་མོས་བྱས་པའི་ཡོན་ཏན་ཏེ། གཙོ་བོར་ཉན་པ་པོས་ཐོབ་པའི་ཕན་ཡོན་ནོ། །ཡང་། རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །ཅེས་དང་། བཤད་རྒྱུད་རྒྱ་མཚོ་ལས། སྒྱུ་འཕྲུལ་རྒྱ་མཚོའི་རྒྱུད་ཆེན་འདི། །མོས་དང་མཐོང་དང་བྲིས་པ་དང་། །བཀླགས་པ་ཙམ་གྱིས་འགྲུབ་འགྱུར་ན། །རྟོགས་དང་གོམས་པའི་སྦྱོར་བ་ཡིས། །འབྲས་བུ་ཐོབ་པ་སྨོས་ཅི་དགོས། །ཞེས་དང་། ཧེ་རུ་ཀ་གལ་པོ་ལས་ཀྱང་། སྐུ་དང་གསུང་ཐུགས་རྡོ་རྗེ་ཡི། །རྣལ་འབྱོར་འདིར་གྱུར་ཕྱིན་ཆད་ནི། །ཀློག་གམ་ཡང་ན་སེམས་ཀྱང་རུང་། །དེ་ཡང་རྡོ་རྗེ་འཛིན་འདྲར་འགྱུར། །ཞེས་པ་རྣམས་ནི་གཉིས་ཀས་ཐོབ་པའི་ཕན་ཡོན་ནོ། །གཞན་ཡང་འཆད་ཉན་གྱི་ཕན་ཡོན་མདོ་སྡེ་ལས་འབྱུང་བ་དག་ཀྱང་བཤད་དེ་སྤྲོ་བ་བསྐྱེད་པར་བྱའོ། །མན་ངག་དེས་ཇི་ལྟར་བཤད་པའི་ཚུལ་བཤད་ཟིན་ཏོ། །དཔལ་ལྡན་རྒྱུད་རྒྱལ་སྙིང་པོ་ཉིད། །འཆད་པའི་སྔོན་འགྲོའི་རྣམ་གཞག་འདི། །རྗེ་བཙུན་གཏེར་ཆེན་བླ་མ་ཡི། །དྲིན་ལས་བན་ཆུང་ཆོས་དཔལ་གྱིས། །ལེགས་པར་བཤད་ལས་ཐོབ་པའི་དགེས། །པདྨའི་གཉེན་དང་སྒྲོན་མེ་ལྟར། །འགྲོ་བའི་ནང་གི་མུན་པ་ཀུན། །སེལ་བའི་དཔལ་དུ་མཛེས་གྱུར་ཅིག །ཅེས་རྩ་རྒྱུད་སྙིང་པོའི་སྤྱི་དོན་གསང་བདག་ཞལ་ལུང་ལས། ས་དམིགས་དང་པོ་སྔོན་འགྲོ་སྤྱིའི་རྣམ་པར་གཞག་པ་འདི་ཡང་སྔགས་བཙུན་དྷརྨ་ཤྲཱིས་དྲུག་ཅུ་སྐོར་བཅུ་གཉིས་པའི་རབ་བྱུང་མེ་ཡོས་ལོ་ལ་སྦྱར་བའི་ཡི་གེ་པ་ནི། དགེ་བའི་བཤེས་གཉེན་དང་རྡོ་རྗེ་ཐེག་པའི་བསྟན་པ་ལ་གཅིག་ཏུ་གུས་པ་ཟེམ་སྟོན་ཨོ་རྒྱན་དཔལ་འབྱོར་རོ། །ཕྱིས་ལྕགས་རྟ་རང་ལོ་སོ་བདུན་པ་ལ་ས་དམིགས་གཉིས་པ་རྒྱུད་ཀྱི་སྤྱི་དོན་དངོས་ཉིད་སྟན་ཐོག་གཅིག་ཏུ་རྫོགས་པར་བརྩམ་པའི་ཚེ་དབྲི་བསྣན་ཅུང་ཟད་བགྱིས་ཏེ་དག་པར་བྱས་པའོ།། །།